THE GOOD, THA BAD AND THE OTHERS-7

THE GOOD, THE BAD AND THE OTHERS-7

"Eng nge maw i hmu chiang mai" ka ti chhuak halh. A mitmeng ka en a, a thi bul in ka hmu. Lungngaihna vawr tawp hmachhawn mek leh beiseina bo duak hmel a pu bawk. A mittui a tla hauh lo na a a mittui tling deuh ram chuan a thil hmuhin a tih nat zia a lantir bawk. 

"Khawi ka lo en ve" tih pah a ka hnaih ruak chu rang lutukin ka dar tawn tawnah a lo dawm. 

"I sawi loh chuan keiman ka en dawn" tiin ka tal phat phat a, ka tal nasat poh leh min vuan nghet ting a ni mai. 

Chutia kan unau a kan inchai bap bap lai chuan kawngkhar a ri rawk a, pindan chhung aţang chuan zu rim a rawn nam chhuak huam. Ka uak lo chauh a ni. Ka pa chu rui tih hriat zetin a meng leh phut tawh a, ka pa a hmuh phei chuan ka nau min vawnna chu nghet tawh tak a ni. 

"I pi te ka bia a, rawng an bawl kep che u. Chaw va ei phei rawh u" a ti dam thlup a, Boomer en lo va keimah ringawt min en chu mak ka ti. 

"Boomer, i pi in i duhzawng ka lo siam ang a ti" a ti dek dek a, "Min ngaihtuah der vel lo mai teh. Ka pa i nih loh kha" Boomer chuan a ti vawt ruih mai. 

Min dawm bet tlat chungin ka pa chu a melh run a, ka pa mitmeng erawh a tlanchhe nasa hle. 

"Eng nge thil awmzia? Ka pa, thil i ti sual leh tawh tihna mi?" ka ti a, ka pa awmdan chu thuhran, ka nau beidawng lutuk hmel ringawt pawh hian lung a ti chhia. 

"Hepa hi 'pa' in tih duai duai reng chuan nu thar in nei thuai ang" elsen zet hian Boomer chuan a lo ti a, ka pa a ngawi reng thung. 

"Pindan chhungah sawn in nu tur a awm" zawi sup a a tih leh chuan ka pa'n "Thil thleng palh anih kha" a lo ti thuai. 

"Huh...anih tak chu! I la nei khawp ang. Keichu ka nu fa chauh ka ni. Kan awmpui tenawm lutuk fa zawng ka ni lul lovang" ten hmel zet a a tih nek hnuah min thlahin pawn lamah a chhuak a, ka pa chu rilru hah hmel zet a thaw chhuak halhin a hmai a tuai puat. 

"I fapa i ti na hle mai ka pa, eng thil chiah nge in lo tih? Nu Hriatpuii nen bawk a ni lehpek ang tiraw?" ka ti a, ka ngaihruatna vang ringawt pawh hian ka pa ka zahna a bo vek. 

"Tihpalh liau liau a ni" a ti na a ka pa chu vai kiangin pindanah ka lut lui tho. 

Sofa ah Nu Hriatpuii a ţhu kun lap a, a ţhutna hma a zu bur leh no pahnih inchhawp ran ka hmuh chuan zu an in dun ngei tih ka hria. Khum phah a chuar hle a, Boomer-a hrilhhai hmel kha ka mitthla ah a lo lang zawk a, thil thleng chu hmu ve kher lo mah ila ka hrechiang thawkhatin ka hria. 

Ka pa a rawn luh veleh "In zakthei lo hle mai. Ka nu thawmhnaw leh bungrua in a hual ţhup chung cheu in nuam in chen ngam a nia. Nu Hriatpui, ka pa hi nang aiin a upa daih a, fa panga lai a nei tawh lehnghal. Pawisa i ngaina lutuk a, pawisak i nei miah lo anih hi" ka ti salh salh. 

"In duh duhin min ţawngkhum teivet suh u. Ka kâ ka an vaih chuan i pa hi a mualpho hle ang. Mi'n an nuihzat hlauin ka inthuk ru hram hram anih hi" Nu Hriatpuii chuan a lo ti ve a, a rui bawk a a ţawng huai ngam khawp mai.

"Ka pa a hmingchhiat rualin nangpawh i hmingchhe ve tho ang. In mo ten an millo che hi awm ka ti ngawih ngawih. I zah loh mai bakah i lo nasa em anih hi" ka tih chuan min rawn melh hrak a, mitmeng ling hlar chung a a nui chu a rapawm lek lek. 

"I pi te inah chaw in ei dawn a ni lo'm ni? Va kal ve ta che" ka pa'n a tih chuan a dinna lamah ka inher rang hle. 

"Ei dawn nang...tenawm deuh a in lo khawsak vang anih hi in lamin min hip tlat. In ti faitu hming pu a mi pa mutpui ching" ka ti hrep. 

An pindan aţanga chhuak a ţhutkhawmna ka thlen chuan "Engtin maw min tih?" a rawn ti vin hlar a, Nu Hriatpuiin min zui chhuak tih ka hre chiah. A sam a pawrin a mitmeng a phelh phung a, a rui viau a ni. 

"Ka sawi dik lo mi? Inthlahrung dek angin i awm a, a rukin ka pa nen nuam in chen reng. In tenawm lutuk, ka nu te kha in that hial lo maw?" ka ti vin vak vak. 

"I nu kan that awzawng lo. Naupang te si chaltlai reuh lutuk. Kawmngeih tum cheu in theih tawp ka chhuah a, ka ţhatna aiin ţhat lohna in hmu lian zawk" a tih chuan "Ţhatna lai nei hek lo che. Ka pa pawisa it in i taksa i hmang ţangkai a, i inzuar a ni ringawt" ka ti hlak hlak a, Nu Hriatpuii chuan min rawn hnaih ruakin ka inrin hmain ka sam a kek a, min hnuk tlu tawp a ni ber. 

"Chaltlai reuh lutuk, duh duh a in ankhum tur ka ni lo. I pa remtihna thlap a hetianga awm hi kan ni" ti hlawih hlawihin ka tho tur chu ka sam a rawn ţham leh. Ka pa'n min ţanpui eih lo. Ka thlavang a hauh miah lo bawk. A ţawngchhuak lo hrim hrim. 

"Tawp nghal rawh" mipa aw vin tuar kan hriat rualin Nu Hriatpuii chuan min thlah chawpchilh nghal. A la insut hruih zui. Chhuat a ka ţhut nuaih na lam panin hmanhmawh deuhin a rawn pen a, ka bul a thlen rualin a tawp chawt. 

"Engvang a kut lo thlak ngawt nge i nih? Hrep che hian! I eng pawi nge a sawi?" Muankima chuan a ti khur khur a, a rawl a vin hle bawk. Tun ang a a vin hi ka la hre ngai miah lo. Ka ti tak tak. 

"Muankim, an thu a inhmu lo palh anih kha. Hmeichhia an nia, an sawifel ang a an boruak a pangai leh mai ang" ka pa'n a lo ti nem duai. Ka va ten tak. 

"I fanu anih hi..mi hrangin kut an thlak lai lo thlir tawp mah ta che. In inchhungah hian sawi theih ka nei hauh lo, mahse vawikhatmah kut lo thlak tawh suh u" ti ram hmakin chhuatah chuan a rawn ţhingţhi. Ka khabe a dawmin min kuai dak a, uluk lo deuh a ka hmai zar tu sam a hui kian hnuah ka hmai a hliam a awm leh awm loh hriat tum ni awm takin a thlek kual dun dun a, min chik kher mai. A hmel a dur khup a, a mitmeng chu a thimin thinrimna vangin a tle sar sar ni maiin ka hria. Hetiang hmel hi vawikhatmah min la hmuh tir chhin ngai miah lo. Ka tan chuan mikhual, mi thar hlak ang mai a ni. 

"Tho rawh le" zaidam deuh a tih pahin min kaitho a, a ban rinchhan a din ka tum te chuan thinrim vangin a ban bul te chu a ruh zual sauhin ka hria. Ka vawnna lai tihrawl te chu a sak ţal a, ka din ngil rual a ka pai khat te chuan ka tluk hlauin min kuah nghet sauh. 

Nu Hriatpuii leh ka pa chu an ngawi dâk a, kawngkapui inhawng huang kha hre lo ang hmiahin an khawsa a, an rin loh lutuk a Muankima rawn lang si chuan an zahna a thlen a ni mahna. 

"Saw lai chhuarah sawn i nu cake min pek ka dah" ka ti ţuak a, Boomer-a ngaihven ka tum lai khan remchang laiah ka dah tawp. Ni lo se chu Nu Hriatpuiin kut min thlak khan a darh nuaih ang. 

Ka pa te chu Muankima chuan a hau zui lem lo. A fapa a ni ve miau lo a, a tan lo hauh ve chiam chiam a rem lo. Min kuah reng chungin ka cake dah chu a la a, choka ah min luhpui daih. Ka pa te pawn buaina an siam ta bik lo. 

Choka a kan luh chuan chair ah ka ţhu hnawk a, kitchen island a kiu nghatin ka kutphahin hmai ka hup a, ka ţap chhuak ta nge nge. Ţah hi ka duh lo viau ţhin asin mawle. 

"Coffee i duh em?" tiin Muankima chuan ka duh ber hmang a ka rilru lak pen a tum ve ngial. Ka bulah a rawn ţhu a, dimte in ka hnungzang a chul pah bawk. 

Insut hraihin ka biang a mittui luanna huh niaih chu ka tuai fai a, Muankiman lainat zet a min lo en na te chuan ka rilru no lai a kaihthawh leh ka hlau hle. 

"I inchak chuan ka lo lum ang" ţah chhuak vang a aw khur der der chung hian ka lo ti a, min melh run chungin a nui ri suk a, lu a tling pah bawk. 

"Ka siam i inchak lo mi?" a ti dam thlup a, min tihnat hlau ngawih ngawih angin a awm. 

"Chak tho e" ka tih lai mekin Muankima nu, Nu Puitein "Awiii...Hriat hnap, hetah eng nge i tih? Puan tai pawr thei khawpin i ke sir a la khir ngai em?" a ti lang lang a, a aw rin zia chu. A nui zui uarh uarh a, nu phawk tak a ni ka tih tawh kha. Nu Puitei au ri vang chuan ka pa te pindan ah an inkhung ta bik rih lo tih a hriat. 

"Vanneih khawmaw cake mould min lo hawh teh. Tunlai chu cake siam ka tui thar riau a" ti lawng lawng chung a choka a a rawn lut chuan Muankima nen a kan ţhudun min rawn hmu thut. 

"Lalmuankim inthlak hmasa ta che. Uniform nen khan i fah thlum thei zawk tihna mi? Cake ei duh ngai hlei lo in hetah chuan i ţhutchilh run a, kha, Vanneihi darah i fu vung lo chauh anih kha" a rawn ti bawrh bawrh. Min chhaih zeuh zeuh ţhin na a inkawm satliah ang a min en chang a ngah zawk. 

"I bengchheng..haw rawh" Muankima chuan a lo ti bul hmuk. Nu Puitei lahin "Mould ka rawn la dawn. Vanneihi te in anih vang a cake i ţhutchilh run te hi i pa ka hrilh dawn khawp" a lo ti fiamthu mai a, a ţawngtlem em vangin Muankima hi a chhaih peih ve hrim hrim. 

Kan mould kawl sa ka dah chhuak a, a duh zawng a lo thlang. Ka nu nen khan cake an siam dun fo a, tray nen kan lo la kawl nual. 

"E..mould chu! Muankima naupanlai mawng tiat lek lek chiah in nei anih hi" a ti deuh kher a, lungawi lo lutuk a Muankima lo phun hluk chuan nuih a ti za. 

Te a ti hlawm viau na a a la nual tho a, ka nu nen khan an inkawl pawlh nasa ţhin a, an inpawh takzet bawk. Nu Puitei pawh kan inah chuan a inthlahrung lem lo. 

Chhuah pah a "Hriat hnap..Pathianni i chawl emaw tia! I awm ka rin loh nen i lo ţhu hnur sia ka zam lek lek alawm. Hna i lo thawk mah mah ang e aw..nutling kan inhmu sakhi mai ang" ti fiamthu in a nui har har a, huat theih si loh, mei nei deuh a ţawng a thiam nasa. Ka nu nen an inkawm nasa a, Nu Hriatpuii ngaithei lo ber tur te zing a mi a ni ve. 

Ka pa te awm chhung chu Muankima nen choka ah kan awm ngat ngat a, coffee pawh vawihnih lai kan in hman. Boomer leh Tintin te rawn inzui haw in choka ah an rawn lut zuai a, Boomer pawh ka hmu pangai viau tawh. A inthup nasa viau dawn tih erawh ka hria. Games khel turin a pindan lamah an inzui chho a, ka pa te thawm hriat tur a awm ta lo. Khaw nge an kal ka hre lo va, Nu Hriatpuii haw leh haw loh ka hre lo. An awm awmin awm vel mai mai teh se. Inthuk ru tlat se la, kan unau tan a nuam a ni mai. 

Ka pi te in aţangin Adikan min rawn bia a, "Chaw kan ei leh duh lo. Puipuiin haw ang a ti tlat a" a rawn ti bai bai. 

"Ngati nge? Chaw ei in tum ruh hle sia" ka tih chuan "Puipuii leh Afeli te an insual alawm" a la ti zui. Afeli hi ka putea fanu a ni. 

"Aw ka rawn hruai ang che u. Nangmah niin lo haw su aw.." tiin ka chah thlap a, speaker a ka dah vangin kan inbiakna hre ve vek tu Muankima chuan "Ka va hruai ang" a lo ti thuai. Ka chhan hma hma a a ding nghal vut chu melh chho ha in "Puipuii nen an nia aw" ka ti hram.

"Ka phur thei ang" ti supin a kal hmain ka chhip a rawn dawm zeuh a, kei chauh ni lo ka naute pawn an tibuai nasa ţhin. Ka ţhianpa a ni miau a, an u en ve tlat. 

Ka naute pahnih rawn hlim haw lutuk chuan min ti lungngai daih. An la hrethiam ve tak tak mang si lo va, ka nu thih hnu phei chuan min ngaiin ka bul a mut ve ve chang te an nei ţhin. Min ngaih poh leh kalsan ka huphurh a, ka kalsan tho a ngai ţhin bawk si, ka pa hian zir se chu nuam sa deuhin kan la awm thei tur. 

Choka a an rawn luh zuai hnuah ka naute chu tv en tumin an chhuak leh a, Muankima lawmthu ka hrilh tawp. 

"Min pui nasa thei lutuk a, ka tih ai i ti nasa thei bawk si. Kan unau tan hian i hlu teh mai nia" ka tih chuan a nuih a za viau. 

Ka bul chet a rawn ţhu lehin min kuah hlu hlu a, ka dar a khabe nghatin ka biang a fawp zeuh. 

"I hlu daih zawk" ti leh supin ka kut a vuan a, "I nunhlui khan a la tibuai viau che em?" tiin min zawt zui zat. 

Lu buk nghat pahin "Tehreng mai..ka insit phah a, tling lo ka in ti. Hmeichhe dang aia ka pangai loh bikna hian min ti hnual nasa" ka ti a, ka thusawi chu duh lo tih hriat zetin min kuah nghet sauh. 

"Danglamna i nei lo. Hmeichhia ve tho i nia, in inang vek. Ka duh che a, i nunhluiin min ti buai pha lo. Chu chu hrereng rawh" a ti nghut nghut a, a ţawngkam chuan min ti lawm tawk em em. Hmeichhia, nunhlui hnawk tak nei te hian kan nihna ang ang a min pawm tu alawm kan mamawh ber. 

"Nakinah min lo iai leh si ta la tih te ka ngaihtuah ţhin" ka tih chuan rum nghutin ka taksa chu a sawi dawt. 

"Ngun deuhin ka ngaihtuah hmasa. Thlauhthla leh mai mai tur che in ka vuan lo che" a ti nghet churh a, "Vulmawii kha" ka la ti hram. Ka thusawi chu atthlak tih hmel zetin a nui hawk a, "Ka bialnu a ni lo" a tih chuan inrin hmain a kut ka hmer vak. 

"Hmela, i va sual ve a" ka ti hlar a, ka rilru put hmang hriatchian nan a lo ti der ve ngei anih hmel. 

"Ka ta ni turin i piang a, ka nei ngei ang che" a ti zawi ruih a, a hmel ka en a, a thutak run lehnghal. 

"Nangpawh ka duh che..ni lo..ka hmangaih zawk che. Hman aţang khan, engtik lai a inţan nge ka hre lo" tiin huaisen chhuahin ka inpuang ve ta nge nge. 

"Kan mawl hle mai" ti supin ka bek a dawm a, ka sam kar a a kutţang rawlh lutin am zetin min fawp a, keipawn ka chhang let ve thuai. Kan awmna hmunin zir miau hek lo, inthlahlel viau mah ila inla hrang hmasa zawkah ka ţang. Ka bek a dawmna chu thlah mai lovin Muankima chuan a chalin ka chal a rawn nawr si a, "I thikthu a chhe si, ka duh zawng tak a ni" a aw a nuihzatna lang chhuak hian a ti sup a, ang pham a ka lo thawk ham ham laiin ka hmui hnuai a rawn pet zeuh. 

Thawhţanni zingah chuan ka naute school kal thlah liam phawt ka duh vangin ka khawmuang lui a, ka pa phei chu kan hriat miah lohin office kal turin a chhuak. Chaw ei dawn a a pindan ka enin a awm lo tih ka hre chiah. 

"Boomer, i necktie kha pawt chip ve mai rawh. Kamis nghawng kilh phui loh luih vel te kha a ţullo aw" Adika leh Puipuii te tiffin siam pahin ka ti bawrh bawrh a, "School thlen dawn ah" ngaihsam zetin a lo ti liam puat a, chaw eina a ti fel pah mawlh mawlh. 

Tintin leh a uite Phoebe lo zawk, kan Phoebe ngei mai an rawn lut a, Tintin a rik phawr phawr laiin Phoebe chu Tintin-a hnungah zel a awm. 

"Vari, biru zuk zuk lo khan min rawn pui zawk teh" ti a Boomer-an a lo fiam chuan, "I ninawm aw..tikhan min ko ve ziah suh" tiin a ţeu hlar mai. 

"Tintin, thukru tlat lo la, kan hmu ve chak tho a" nui ruh ruh chung a tih pahin Phoebe biru ţawk ţawk chu ka nau chuan a thlek hram a, "Rawn sawm kher che pawh ka tum lo. Tintin-a hian min rawn nghak tlat anih kha. Nidangah ka sawm ngai bawk lo che" a ti nuah nuah a, a zah zia ka hmuh miau vangin ka khawngaih ru angreng hle. A ţap lek lek tawh a ni ber. 

"Aizawl ah in kalin ka hre sia, engtik khan nge in rawn haw?" tiin an chhaih zawm loh nan ka lo bia. 

"Nimin tlaiah kan lo haw..school kal a ngai sia" a lo ti a, min chhan lai a Tintin-a hnung aţanga a rawn dak ker te chu ka naute ţhiandunin an lo lawm kher mai. 

"Puih i ngai tak tak a mi Boomer?" a rawn ti leh de de a, a zah hmel takzet. Zahzum hi chu a hrehawm a ni, dem ngawt theih an ni lo. 

"Ngai e..thleng ka la sil lo. I sil peih em? A la hma tho a" nui hauh lo hian ka nau chuan a lo ti a, Tintin pawh a lo tum ve hmuk. 

"Sil sak mai rawh Phoebe. U Vanneihi hi Adika te buaipuiin a vir sek a, Aizawl a let leh ngei ngei a ngai ve tho" Tintin chuan a lo ti ve bur. 

Muangchangin a rawn ding lang a, a kamis ban kilhna phelhin a kiu thlengin a thlep chho a, sil a tum tak tak niin a lang. 

"Hahthlak thei ve..lokal teh" ti hlukin thleng sil tum a kal zet tawh chu ka nauin a pawt let a, chek tlak tlak chung a lu thin pahin a thlek vung vung. 

"Fiamthu anih kha..hrehrang ve ţhin ta che" Tintin pawn nui hawk hawk chungin a rawn ti ve hluai a, Phoebe zak sen ap ap chu a khawngaihthlak zawk. 

"Boomer leh U Phoebe te an inmelh no vel" Puipuiin a ti chiah chu harhchhuak zawk ni awm takin Boomer chuan Phoebe ban a paih lawp. An kum a la nau a, midang hmuh lai a han inlem kual ve chu an tan a la zahthlak hrim hrim. 

A ţhiante chhuah zet tawh hnuah Boomer chu min hnaih deuhah a rawn ding a, Nu Hriatpuiin kut min thlak kha a la hre lo. Buaina a chhuah hlauin ka hrilh duh lo. 

"Ih...min ngaihtuah suh aw" ti supin a hnar a tuai zeuh a, a inthlahrung dek ni maiin a lang. 

"Ngaihtuah lo e..thinrim phut changin che buan buan ţhin mah la i rintlak tih ka hria alawm. I ţhiante bul a i nui ve hawk hawk te kha a hmuhnawm. Ka pa chu engtin pawn awm se lo hlim zel rawh u. I naute ngaihven reng chung leh lehkhazir ngaihthah miah lo in ţhian kawm tel la, intihlim ve rawh" ka ti dap dap. 

"Pawisa i nei em? Kan mi tenawm-a khan a kal hmain a pe che em?" a ti a, ka pa a sawichhuak chu ten hmel zetin a ner zui sawk. 

"Fee pek dawnah ka ac ah a lo thun leh mai ang. Nangmah zawk hian i nei em? I lo nei lo bik lutuk ang e aw" ngaihtuah zet a ka tih chuan "Nei e..diakkawnah bungraw thiar tur a awm a, Tintin-a nen kan inhlawh dawn. Zan a ni tho a, tih tur dang a awm chuang lo" a tih chuan hrehawm ka lo ti. 

"I thiam ve dawn mi? I la inhlawh ngai miah si lo a, Tintin pawh nangmah ang tho a hnathawk ngai lo. In chesual vel ang e" ka tih chuan a lo nui hawk hawk. 

"Pawisa dil ka tum tawh lo" bul zet a a tih chuan ka pa a sawina a ni tih ka hria. 

"I tih dan dan le" ka ti a, a na ve em a, ka hnial kalh tlat duh lo. 

"School in rawn ban meuh chuan ka lo awm tawh kher lo ang a, i naute lo buaipui rawh aw. An thlabar loh nan inchhungah buaina awm lo hram se la" ka tih chuan lu min buk khum nghutin "Hahdam rawh" a ti sup.

"Ka pa hian kan thu a zawm duh kher lo ang a, Nu Hriatpuii hian a rilru a suk sak nasa lutuk tawh. En liam zir la, nghah rei a ngai tawh lo ang" ka tih chuan "Ka tlai dawn" a lo ti hluai. 

"Ka tlai chuan min hrem ang. School ah hmeichhia an awm ve sia, a zahthlak dawn. Ka kal ang aw" ti fiamthu in ka ban bul a rawn beng thuk a, Nu Hriatpuii sawichhuah chuan sawi tur dang a zawng chung. 

"Aw le..ka thlen veleh ka lo bia ang che" ka ti a, choka aţanga a chhuah dawn meuh chuan hmun dang ka hawi daih. Keimah chauh chu ni ila thuhran, ka naute hi ka lainat takzet. 

"Khaw nge?" Muankiman a rawn ti lut ve thung a, zawn nei ni awm takin a hawi kual ruai bawk. 

"Pindanah an kal leh lawk..perfume kan inkap dawn an ti ve ngei a" nui hak hak a ka lo tih chuan min rawn hnaihin ka hmui a fawp zeuh. 

Min hlat leh thuai a, choka aţanga a chhuak tur chu ka zui chhuak thuai. Inchung lam a dak chho in "Ka kalsan dawn cheu nia..naupang dang ka thlah ang a vur ka leisak bawk ang" a ti lung lung a, Adika leh Puipuii ten thawm an rawn nei rang hle. Muankima chuan min rawn melh a, intithei zetin a nui suk lehnghal. 

"A u te pahnih hi kan bul a an awm chuan a nuam e. Auto rickshaw a kal a ngai lo a,  school thleng U Muankima a lokal ve dawn bawk sia" Puipuii chuan fel fai deuh hian a ti reuh a, "Apa ni daih se" Adikan a lo tih ve lauh chuan Muankima a nui huk huk, ka zak thar viau thung. 

"Nia..Boomer chu school ah bike a keng duh si lo a, a ţhiante nen an kal zel a, U Muankim, a u hi nei daih mai la" Puipuii tak hi chu. Muankima kutphah hum ran chungin hmai pho vahin a melh chho ha a, a ang deuh phiau bawk. 

"Ka nei mai dawn mi?" ti fan ruihin Muankiman min rawn melh a, a hmel a nuihzatna langchhuak ka hmuh chuan lei ka chhuah zuk. 

"Aw nei daih rawh. In inah kan lo awm daih ang a, apa'n min kawm duh tawh si lo a" Puipuii bawk chuan a ti leh a, kan unau a hrehawm tuar thei lo ber a ni. 

"Fel deuhin awm ula kan ngaihtuah ţha dawn nia" Muankiman a ti ta ringawt. 

Ka nau te pawh phur deuhin an kal a, an lan theih chhung zawng ka thlir. Ka hmuh phak loh a an awm chiah chu ka zawi hnawk. Aizawl a kal tawh loh mai te ka duh rum rum na a Boomer berin zir zawm turin min duh tlat bawk si. 

Phur lo deuhin ka insiam a, insiam zawhah kawngka kalhin chahbi ka dahţha a, Muankima te inah ka phei. Chawhnu lam a chhuah tum chauh kan nih vangin ka hmanhmawh lem lo. 

"Lokal rawh..a la inbual dawn vel mek chauh. Thei tui ka lo siam ang che aw" Nu Puiteiin a ti nghal sawk sawk a, ngawirengin dawhkan bulah ka ţhu.

"I naute chu ngaihtuah duh suh. Rilru nuam deuhin han awm leh la, ka lo ngaihven reng dawn nia" tiin min ţawng thlamuan mawlh mawlh a, Nu Puitei hi awm lo se la chuan rilru a hah lehzual ngawt ang. 

"Engmah ti thei lo mah ila ka awm hian an thlamuang ve a, ka rilru a nuam ve deuh bawk a" ka ti bauh bauh a, ka ipik ţun reng mai. 

"Rawn ngaihtuah reng reng suh. Hriat hnapi hi a rawn lawr sek a, ka awm chhung chu sual a chhuah ngam lovang. Hman aţanga ka hriat tawh a nia, min nawr lui ngam teuh lo. Min en la, nghawng sei ţha tawk ka nei a, ka lo enthla ziah ang" boruak tih zangkhai tum a a tih chuan ka lo nui hak. 

"Awm lo ula chu kan chan a chhe lehzual viau ang. Ka pa hi ka nu thih hnu a danglam anih ka ring lo. Ka nu thih hma aţang daih khan a inţan tawh ang. A lo na fo tawh zawk maithei a ni" ka ti halh a, ka zep buai peih lo. Keini aiin a hrechiang daih zawk ang. 

"A sawi fo alawm..ipa nen an inkhak zeuh zeuh ţhin a, ipa lahin insiamţhat a tum lo. Hriat hnapi te zawng, duhzawng a zahna hre miah lo a nia, khap a har khawp ang. Ipa pawn a hnar theih ka ring miah lo. Sawi tawh ang khan ka hriatah chuan a sual ngam dawn lo va, i naute chu ka lo thlithlai ţhin ang. Rilru nuam deuhin awm hram hram rawh" a ti malh malh. An chhungkaw boruak dam diai hi a awhawm khawp mai. 

Dar12:30 velah Aizawl panin Muankima nen kan chhuak a, kan haw lam ai daihin kan kal leh lam hi min ngaihtuah zawk. Kan inlaichinna a ngheh ve tak vang anih ka ring. Nu Hriatpuii zu ruiin kut hial min thlak hnu khan ka rilru no lai baw chhuakin Muankima hnenah ka inpuang ve ta vek a, hun rei tak aţanga ka duhthusam ţhin kha a thleng ta nge nge. Hlim viau tur ka nia, ka hlim ngei bawk. Hman a kan chhungkua ang kha la ni phei ila chu ka hlim lehzual viau ang. 

Parking lot ah kan tlan lut a, beisei loh deuhin Mateo leh Gabriel te class bang ni awm tak an lo awm. Min lo lawm tih hriat zetin nui hmel min hmuh ve ve. Bike aţanga Muankima rawn chhuk ve chuan ka bek a dawmin min kuai deuh a, an hmuh laiin ka biang a fawp. Kan ţhiante pahnih nui hmel chu mak tihna in a thlak chiang hle. 

Fel than a ding dun ran chungin an meng phawk hra a, Muankiman uang zet a min fawh nawn leh chuan "E...e...ee...in va zak lo. Lalmuankim eng thil nge i tih?" ti mar putin Mateo chuan Gabriel-a lam a hawi a, min kawk vu bawk. Kan inzawmna hre ngai lo ang maiin an la phawk hra reng. 

"In lo dam maw?" nui ruh ruh chung a Muankiman a tih chuan Mateo a ner nawng. 

"Chil chhak kher lovin uak thui. Min runluih tu te tan ka chil ka ui" a ti hluk hluk a, kei thleng thleng a min huat ka hlau khawp mai. 

"Nge maw i lo uak ve vak le? A bialnu a fawp a ni mai lawm" Gabriel chuan Mateo nek sawk pahin a ti hmuk a, mak an ti lutuk chu an khawngaihthlak zawk. 

"Nui vur vur kher suh. Ka hnek pawp dawn che mawnle Lalmuankim" Mateo chuan a ti leh bul bul. A lungawi lo lutuk chuan nuih a ti za. A la naupan zia a langchhuak nasa hle bawk. 

"Mateo, scooty hi min lo lakchhuah sak lawk teh. Ka dahna hi a chep lutuk a, ka la chhuak thei lo" Vulmawiin a rawn ti lang lang a, Muankima ka melh thuai laiin Mateo chuan "A chep a ni mai lawm. Scooty tang zawng zawng ka lachhuak vek seng lo. Lalvulmawi, bialpa veng zo lo nu" a lo ti nek. Keimah vang a thinrim anih mai bakah a naupanchhiatna lai kaihthawh sak tu ka nia, a nuam lo lek lek.

"I va han thinchhe em em..nidangah pawh phun lovin min tihsak mai zel a, i peih loh pawn vin hlur mah ta che" Vulmawiin a rawn ti ve hlawih hlawih. 

"I au ring..tumah beng ngawng kan awm loh hi" ti leh hlukin a mitmeng hriam zet chuan Vulmawii a melh a, a hrilhhai lutuk chu a khawngaihthlak zawk. 

"Hnute lian zawng zawngin bialpa te an veng hneh kher lo tihna a ni maw?" rawn ti lauhin bang phen aţangin nui ţhaw in June a rawn chhuak a, a kutţang karah meizial a zep vang bawk. 

"Niang chu...Big letter H a nei a, hmang ţangkai der lo" ti a Mateo thusawi chu an lawm ngang mai. Midang an nuih hak hak laiin ani chu a la tum bur. 

"Big letter meuh a Hnute nei si i va hmang ţangkai awm lo ve Vulmawi" June chuan a ti leh a, Vulmawii pawh min huatna dahţha in a nui ve tawp. 

Room a kan luh hnuah Muankima nen a kan chanchin chu June ka hrilh a, min lawmpui thiam khawp mai. 

"Ka rin aiin a awlsam daih. Vulmawii nen khan an nih tak tak ka ring lo reng a, inkawm ve satliah mai mai an ang tlat. Muankima chu a rintlak alawm. En tawp hian a sual hmel viau na a belhchian chiah hian a rilru ţhat zia a hriat a" a ti luam. 

Darthlalang hmaa ding chung meuh a "Keichu ka hnute hi small letter H a nih duh hmel ka ti" ka tih chuan a lo nui chhuak hak. 

"Keini aia a kum a tlem chu thuhran, duat no a nia, a puitling har khawp ang kan Mateo ve hi chu" a lo ti a, kei aiin a hriatchian hmel daih zawk. 

"A status te hi" tiin June a nui uar uar a, Jessie nen phone kan bih rang hle. 

[Ka thinlung ke bai thi zawih zawih tuam dam tu mamawh zet hi..bandage nen min rawn pan vat rawh. Di kuhte] tih a lo ni. Ka ha hi a kuh emaw a ti tlat, a hmuh lai a ka nuih ngun tawh tehreng nen. 

"Hepa uan peih zia hi chu aw..Lucky a uang anih hi aw..rilru nuam deuhin awm phah zawk rawh. Thinrim se chu hetiang status a nei lo tawp ang" June chuan a ti bawrh bawrh a, "Gabriel lah hi a lo tuihnih ve ziah a" phone melh ran chung a a tih chuan ka phone bawk ka en leh. 

Kawr ruak a a awm lai thlalak a dah a, a hnute hmurah paper var tereuhte, a hnute hmur chiah tak tak hliah thei tur a bel. 

[Ka thinlung lum ti sa huam, zar hliah tu mamawh zet hi...nihliap nen min rawn pan vat rawh. Di tlawrh te] tih hi caption ah a dah a, kan ţhian thum chuan kan nuihpui nasa. 

"A hnute hmur a paper var bel hi ţullo e..hemi te pahnih inhmeh lutuk hi chu a" Jessie chuan a ti a, a dang ngaichang leh ni awm takin phone ngawt a la bih ve tho. Kan in ai ngawt chuan hostel boruak chu a zangkhai deuh. 

"Awii..Lalmuankima zah loh zia hi aw..a inhmeh lo eee...a tih ve zel duh ka ring miah lo a nia" tiin June chu a malpui beng meuhin a nui hak hak a, a va han tlei tak em. 

Muankima status ka hmuh chuan ka phu zawk. Ngaihzawng nghet a neih duh ngai loh chu thuhran, midang hmuh tur a tarlan phei chu a duh lo viau zel. Mahse ka thlalak a lo dah vang.

[Ka thinlung, hmangaihna in a chhun khah hneh vang a baw liam zawih zawih hi..chawhtawlh nen min rawn pan ta che. Di Fuhte] a rawn ti ve thung a, kan nui bawk bawk mai. An vai a status hmu kim vek thei lo phei chuan mak an ti viau ang. Muankima ngat phei chuan ka thlalak a dah daih lehnghal. 

"Mipa lam chu an phawk a chhuak a ni maw?" Jessie chuan a ti hluai a, mipa ho phawk a chhuah chuan hmeichhe lamin kan lo hlimpui phian zel. 

"Muankima hi chuan a tih ve duh loh hmel tak tak. Gabriel pawn a inhmeh chuang lo" Jessie bawkin a ti leh. 

"Mateo lungawi lo sa an chhaih thinrim belh chak anih hi" June chuan a lo ti mai a, kei takngial pawh ka nui ve vak vak a, a ţha phian mai. 

Tlai daiah mipa ho an inkhel a, hmeichhia leh mipa, inkhel ve lo ho in kan thlir ţhap. Tih tur dang a awm miau lo a ni. 

"Ngati nge a sek ţha ber saw lei a a mut leh tual zel a" an ti sap sap. Sek deuh, palian deuh a nia, kan enduh hle. 

"Pichiu-a saw maw?" kan hma a mipa ţhu in lehhawi meuhin min rawn zawt. 

"Tu nge Pichiu-a?" kan lo ti ha. 

"Awww...sek in tih deuh saw. Keini pawn sek kan ti, a ţan tak tak chuan a mawngin kuhva pum a ţhial sawm thei" fiamthu a a rawn tih chuan kan lo nui dar dar. 

"Ni e..ngati nge sawti sawn a awm. A let tawp a, midang in an ngaihven chhung a tal tawp tawp bawk sia" kan bul a mi ten an lo tih chuan kan hma a ţhu bawk chuan "Dêk a hua mawle..kal ţha hleithei lo khawpin a sek a, thahrui a ngah zia lah a cho tawh tu ten an hrechiang. Mahse, dêk a hua a, kut ţang hi ti kawm ila, amah hlat deuh aţanga dêk tih ringawt pawn za a ti lutuk" a ti duah a, kan nui ham ham hlawm. 

"School a kal lai paw'n kamis a ha hlei thei lo an ti. A school luhpui ţhin pawn 'vawikhat chu class neih laiin a kamis nghawngin a nghawng a vet kual kha za a ti thut a, class neih laiin amahin a nui vak vak a, a zi uan uan bawk sia, a chhungten rilru lam doctor an panpui a ti'" a rawn ti leh a, awih vak lo mah ila kan nuih a za laklawh tlat tawh. Mipa ho hian insawisak an hrat a, a phuahchawp aniang. 

Pichiu-a an tih chhan lah a ho. A hming pangai a mawi tehlul nen an ko duh ţhak lo. Dek a huat em vangin a mi tawh te apiang hi inven nan 'Pichiu' tih pah a ben lawlh a hrat a ni awm e, a lian ţha sia, dêk zui ngam lo an tam phah phian. 

Muankima chawlh hahdam tum chu kan ţhutna lamah a rawnkal a, mipa ho in "Di Fuhtei bialpa thinlung khat liam-a hi ţhutna lo kian ang u" uangthuang zet a lo tiin an tawlh sawn dual a, rin ai daihin ka zak. 

Inkhelh na lamah ţe ţhawt ri kan hre zui zat a, Muankima ţhu zet tawh pawh a tho leh vat. Kan vaiin kan tho dual a ni ber. Mateo chu a awm dawmin a kun ngul a, a kut awl lamin a khup a dawm bawk. 

"Penglenglenga awmdan hi a dik lo" ti chul chungin mipa ho an tlan khawm a, Gabriel leh Muankima te pawh Mateo dinna thleng phei hmasa an ni. Hmeichhe lamin kan lo ngaichang ţhap bawk. 

"Engtin chiah nge a awm le?" tiin Jessie a dingdihlip ak ak a, keipawh ka hlauthawng takzet. 

"A thaw a hah deuh a ni lo maw?" tiin June a phun sep a, hlauhna in min ţham nasa tawh kher mai. Tupawhin a kan nau chei Mateo anih miau vangin ngaihven lo reng kan awm lo. 

CONT...