KA HRINGNUN THAWNTHU-1

He thawnthu hi chhan hrang hrang avanga kehchhia, beiseina leh hlimna zawng leh mekte tan ka hlan bik🤭

A HRINGNUN THAWNTHU-1

Thinlung kehchhia, i tuar ve tawh em? Mihring nun kal tluang pangai thlakthleng hlawk thei; hnial rual loh leh phat theih miah loh khawp a natna rapthlak leh runthlak. 

"Tuman dang suh u, a duh phawt chuan chhuak rawh se. A ngaithei lo ringawt che u pawh hi ţhenna tham a ni. Tunah phei chuan a uire. Pasal te kham khawp lova mipa dang biak lawr ching nupui ka duh hleinem" ka pasal ţawng hluk hluk chu ka bengah a ri ring hle mai. 

Air bag chhungah thawmhnaw ka vawm lut hmawk hmawk a, a thusawi ka hriat rual chuan ka thil tih lai chu tawp chawtin thawmhnaw remna chhuar nghengin ka ding leh rih. 

"Chutiangin an ti ngai lo Mama, i nupui a nia, i ţhen ngawt thei lo ang. I hlimna tur anih phawt chuan hrehawm kan tuar thei. Keini chu min ngaihtuah suh, engtin pawn min ti se kan tuar ngawt ngawt mai ang. In inneih hma zawngin min duat tawh alawm" ka nu'n a ti hlawi hlawi. Takzet hian! A thusawi saw a hrechiang ange maw chu. 

Inherin thawmhnaw dahna chhuar bawk chu ka ngheng dawt a, za lo zetin ka nui ro hak. 'Lemchang thiamnu' ti a va keh buan buan tak hi ka nâp a. Kan nupa kar buaina bulpui ber chu ka nu a ni. Ni e, ka nu, ka pasal nu, nu tak tak ang a ka en hian fanu atan min pawm ve thei lo. 

"In tuar tawh lovang. In fa ang chiah a pawmin inhmangaih a, ka enliam thei tawh lo. In sawichhuah hlim khan lo ţhen nghal daih ila chu tun ai hian kan na nep ang. Hmeichhe dang an tam, uire ve ngai lo tur an tam. Chhungkaw bul bal nei lo chhungkua ka pe a, lawm tak aruangin min uire san a" ka pasal chuan a ti hmuk hmuk. 

Chutah chiah chuan a ni ka pasalin ka thinlung a tih kehsawm tak ni. Ka awm chhung a na ngut ngut a, ka hrawk a phui zo a, ka mittui luang chuan ka natzia a pho chhuak zo lo ang. 

Inhau fo mah ila ţawngkam dengkhawng a hmang ngai lo. Uire min ti ngai lova, kan chhungkaw bulh zia a sawi ngai lo. 

"Chhuak pawh nise tu nge a pan chuan ang? Anu leh pa an thi tawh a, amah enkawl bertu a nutei lahin pasal a nei tawh bawk si. Api leh pute han bel dawn se rem lohna a tam lutuk. Ngaidam hram hram rawh" ka nu bawk a ni. Rilru ţha ber ang zia zang a ţawngkam a neih leh tawh saw. A thinlung khakna hi a thup thiam ngawt mai. A fate ngei pawn an hre lo chu a nih hi. 

Kan pa chuan "Kan inchhung nawm zia a hrechhuak ram ram dawn a nih chu" a ti duh lek chauh. 

Ka thinlung kehchhe hneh viau mah se ka thluak chuan hna a thawk tho a, ka tan a ţha tur ka ngaihtuah thiam a, thil thleng leh thleng leh zel tur chenin ka thluakah a rawn lut zut zut. 'Ka thiam loh a ni lo' ti a ka inhrilh rualin 'Thiam zawk nih vang ngawt a awm luih a ngai lo. An chhunzawm ang a, a thleng nawn leh mawlh mawlh ang' tiin ka inhrilh tel bawk. Tih chhiat tham khawp a nasain ka thinlung ka pe a, kan intiamna zawng zawngte kha, ţhiat hmasa tu chu amah a ni. 

Ka biang hnawng chap tuaifai pahin ka insut hrawih a, pan tur hre lo mah ila awm luih ka tum bik lo. Min duh lo a min hmusit ngawih ngawih reng tu te bulah hian hlimna ka hmu ve ngai lovang. 

Ka insiam zawm leh a, air bag a khah hnuah suitcase ah Bawiha thawmhnaw ka khung. Hruai tu ka neih miau loh avangin ţul zual tak meuh meuh ka khung khawm a, suitcase ka khar phui awrh tihah ka pasal a rawn lut. 

A hmel chu thinrimna avangin a lang chang rut a, a mitmengah lah min thlakhlelhna pakhatmah a lang tawh lo. 

"Chhuak turin min duh takzet em?" ka ti fiah fak a, ka aw a dam thlap bawk. 

"Ka dang lo ang che" a ti a, khum a Bawiha muhil bam a melh zawk hnuah keimah bawk min rawn en lehin "I hruai thei ang. Ka fa a ni kher lo maithei asin" a ti leh kher. 

A ţawng duh dan chu na tiin ngei viau mah ila ka inthunun tlat. A mitah tak en luiin "Belh tur nei lo viau mah ila ka chhuak anih chuan ka rawn let tawh lovang. Inchhirin min rawn umzui leh mah la min pawt let thei dawn miah lo" ka ti a, ka vau lawk a ni mah zawk. A inchhir thuai dawn tih chiang tak a ka hriat vang a ni. 

"Pawt let leh tur chein ka kal tir lo che. Chhuak la, i tlangval ho nen nuam chen luih luih rawh u" elsen zet hian min ti a, ka mit ka chhing sawk. Ka sam chu ka chhipah tuai chhoin ka dawm zui vang vang a, ka pasal, min hmangaih ţhin tu kha a ang tawh hlawl lo. 

Thaw chhuak halhin ka mit chu ka meng a, "Thudik ka sawiin 'I insawithiam min tia,' hrilhfiah che ka tumin i ngaithla duh ngai lo. Ţhenawm ten rawn hre vek lo mah se office i kal hlan a ka awm ţhin dan chu Pathianin a hria a, thudik hi a biru reng ngai lo. Engtik niah emaw chu thudik chuan a deng che ang a, chutih hunah chuan mithar ka nih tawh hram ka beisei. Ka beiseina chu a thlen dik theih nan Pathianin min pui mawlh rawh se" ka ti dap dap. Vin chiam chiamin awmzia a neih tawh loh zia hriain awka vin ka hmang buai peih tawh lo. 

"Pathian puihna i dawn theih nan ka lo ţawngţai ang. Mithar mai ni lovin mo thar i ni leh vat dawn nia" deusawh zet a min ţawngkhum hnu chuan huatthla la deuhin a nui zui a, Bawiha kaihthawh ka tum laiin ka nu a rawn lut. 

"Chhuah kher a ngai lo Zote, i pa Siama te pawh kan hriattir ang a, sawifel teh ang u. Fa innei tawh a, inţhen a ţha ber lo" a la rawn ti ngam nia!

A mitmengah chuan vertherna bak hmuh tur a awm lo. Min lainatna pakhatmah a nei lova, hmingţhat duh vang leh 'Chelh ka tum a, a kal lui' a tih duh vang chauh a min dang a ni. 

"Ka nu, mo i nei leh a nih chuan, a rethei emaw a hausa emaw, mihring angin en tawh ang che. Mi fanu duatlai te hi fa ang a i en ve thei hlawl lo a nih pawhin mihring ang talin en ang che" ka ti khawl khawl mai. Amah vang a kan chhiat vekna hi ka hre ran tawh a, ţawngkam mawi ka hmang duh lem lo.

"Zoliansang, khatiangin ka nu ţawngkhum reng reng suh" tiin ka pasal chuan ka nu thlavang a lo hauh vat. A awki a ring miah lo na a a hlauhawm takzet. Kut min thlak mai a hreh loh zia a hmelah a lang vek bawk. 

"Sawi dik loh ka nei em ni? Ka nu hi ka ngaina a, nichin lawk a i sawi ang khan ka naupanlaiin ka nu a thi. Chuvang tak chuan ka nu hi nu tak tak angin ka en" thip ram a ka pasal ka melh hnuah ka nu chu en ve thungin, "Hmeichhia hi a hmeichhiatpui vekin a hriatthiam loh chuan tu nge hrethiam kilh kelh ang? Mo hi mo lo nih tawh vekin a hriatthiam loh chuan tu dangin nge hrethiam chuang ang? An pasalten maw? Nge an pate zawkin? Ka dinhmun hrethiam tu tur ber ni a ka ngaihin min doin min kher nget nget reng a, ka nu, ka hrereng ang che" ka ti salh salh. 

Ka pasal chuan thinrimin ţawngkam chhe pui pui a chhakchhuak leh, sawi chhawn tlak pawh a ni lo. Bawiha mu tui lai chu pawm tho lawpin a harhchian hmain ka pua a, ka nu leh kan pa awm reng laiin ka rickshaw hman ţhan ber ka bia, thla khat vel lai chhuak turin min nawr sek tawh a, a u zurui lahin ka thawmhnaw thehchhuahah min vau khur khur reng. Ka awm luih theih tawh loh chu thuhran; awm an phal tawh lo hrim hrim. Kan inneih ve hun chhung khan kan inhauh apiangin chhuak turin min ti ti ila a dik zawk ang. Tun hnai te hian min nawr nasa lehzual. 

Airbag ka dah chhuah hnuah suitcase ka hnuk chhuak leh a, ka nu'n min zui dat dat reng. Ka pa erawh chuan engmah a sawi lo. A tihziah dan a ni, buaina a awmin a inrawlh ngai lo. Hmeichhe rorelna inchhungah ka lawi lut a, dawt an vawrh kual nasat lutuk avanga ka chhuak tur pawh hi min dan a tum eih lo.

Rengpuia a rawn thlen chuan ngawi rengin ka bungrua ka hlang lut a, min lo pui thuai. Kan in lam ka hawi let lova, 'ka chhungte' ka lo tih ve ţhin ten thawm an rawn nei tawh lo. 

"U Zote zin tur i ang si lova, khaw nge i kal dawn?" hrilhhai hmel deuh a a tih chuan "Ka haw dawn anih hi" ka ti hluai a, ţawng zangkhai ka tum lutuk na lamah phur deuh angin ka lang maithei. 

"Ehe..U Sangzuala nen in inţhen dawn tihna maw? Thla hmasa lawk paw'n chaw in rawn ei sia, ka pi Liani vang em ni?" a ti deuh tawng. 

"Ni lo e, ka haw rih mai mai dawn" ka ti daih. Thawl hawkna tham khawp a ka thinrimna ka anchhuahpui chuan an mualpho lutuk ang. Ka awm tawh dawn chuang lova, sawi mualpho kher a ţulna ka hre lo. 

Rengpuia u hi kan inneih khan kan pa'n a dinpui a, an inah hian chaw kan ei zeuh zeuh. Ka len luh tamna ber an nia, chuti chung chuan Rengpui takngial paw'n kan boruak a hre lo. Ka sawi ngai miau lo a ni. 

"Sumo stand ah aw. I ţhianpa sumo kha a la chhuah loh chuan min biaksak la, zin vei vak tlem lai a nia, a la full lo ang" ka ti zung zung. 

"Nutling ve uaih tawh si sumo ticket pawh i la ngam lo a ni maw?" ti a min fiamin a nui huah huah a, chhang lem lovin ka nui ve mai. 

Rengpuia hi kum19 chiah a la nia, lehkhazir hi a hlauhin a hlau. School a kal emaw an tih laiin nitin a lo tlanbo ţhin a, an chawlh tir ta nge nge. Auto rickshaw a khalh duh zawk miau avangin a pa'n a laksak ve rawih a, ti hian nitin a service ve ţhin. 

"Ticket ka la fel aw, ka ţhianpa sumo ngei a ni e" rawn ţhu lutin ka ţhutna lam a rawn hawi nghal zat a, sumo ticket min pek pahin "Darkar chanve hnuah a chhuak ang" a ti leh sup. 

"Ka lawm lutuk a nia, i fel pur pur mang e" nui lui chung a ka tih chuan "U Zote, ngati nge haw i tum thut? I rawn let leh angem?" thutak deuh hian a ti a, lu ka thing mawl tawp. 

"Pa Siama ten an hria em? Hrilh miah lo a i haw chuan an lungawi lo ang a" a ti ve khauh. 

"Nakinah phone in ka hrilh mai ang. Bungrua hi min lakchhuahpui la, duh leh min kalsan mai dawn nia" ka tih chuan "Ka en liam ang che u" a ti bur. 

Sumo counter-ah kan ţhu lut a, Bawiha a tal laih laih takah chuan hmalamah ka dah a, a mitmeng pawisawi lo zet a min melh kiau chuan ka nui chhuak hak. A lu tunin a hawikual a, mipui an zik luih luih bakah a bengchheng a, a phawk hra mai. 

"Mak i va ti em em ve. Aizawlah kan haw dawn a, nuam i ti ngawt ang" tiin ka be mawlh mawlh. Hrethiam miah lo mah se min melh vung vung a, a khap fak fak a, a lawmawm lutuk ringawt. 

"Biang lianpa, min rawn be ziah ang che aw. I nu'n a hauh che chuan ka rawn la daih ang che" Rengpuia chuan a lo ti ve bawk a, a biang chum biang avang hian 'biang lianpa' a ti ve ziah a, ka hau fo reng a ni. 

Sumo tlanchhuah thlengin a awm ve a, min ngaihven turin a ţhianpa chu a chah vei thlap. Ka chuanpui te chuan Bawiha chu an han chhaih fiam vel a, a nui bawk bawk na a tuman an la thei lo. Vanneihthlak takin vengchhung mi hriatchian chuanpui ka nei lo hlauh.

Bawiha chu an chhaih nui hiar hiar tak na a a awm ţha rei duh lo. Sumo chhung phui tak chu ngaithei lo thuaiin a tal reng a, chhuk a tum thul. Ka pawm beh tlat hnuah chuan ţap chhuakin mittui hmangin min nawr leh tawh a, hnute te kan han inpe leh rih ţhin; a hahthlak khawp mai. 

Naupang na na na chu motorin a sawi muhil thuai a, ka fapa muhil chu ka pawm dan ka siamrem hnuah seat nghenchhan ah chuan ka lu ka nghat dawt a, maimitchhingin ka thaw chhuak ham ham. 

Ka hringnun hahthlak lutuk hi 'tawp tawh mai se aw' tih vawng vawng chang ka ngah. 

Kei hi Zoliansangi ka ni a, kum5 lek ka nih laiin ka nu leh pa te accident in an boral. Pi leh pu chu nei ve bawk mah ila nei lo ang ka ti. Kei aia lal leh min ngaithei lo tu an tam em a, ka pi leh puten min ngaihven ngam lo. Kum10 mi ka nih lai a ka hmuh kha ka pi leh pute ka hmuh hnuhnun ber a ni. 

Ka nu nau chiah ka nute in min enkawl a, tawp chin awm lova min hmangaihtu awmchhun a ni. 'Ka nu' tiin ka ko mai zel a, ka putea te leh an nupuiten min ngainat lohna an lanchhuahtir nasat lutuk avangin ka nutei chuan in aţanga min chhuahpuiin ka nu lam a ka pi leh pute hnenah min hruai. Karkhat vel chu ka han awm ve ren rawn a, tuman min be ngai lo tih ka la hria. Ka nutei bawkin min rawn hruai leh a, ka len deuh hlek hnua ka hriat leh danin ka patea te leh ka niten min ngaithei lo a ni awm e. 

Ka nutei (ka nu tih hlirin ka sawi tawh ang) nen chuan inluahin kan khawsa chho ve naw naw a, ka nu thawhchhuah beitham ve tak kha kan rin ber a ni ţhin. Kum19 ka nihin ngaihzawng ka nei a, tun a ka pasal ţhen tak Rosangzuala hi a ni. 

Aizawlah college kalin a rawn awm a, ka nu nen a kan awmna vengah a ţhianpa nen in an luah ve. A rawn leng tlut tlut a, min birh tluk tluk ti ila a dik mah zawk ang. 

Ka nu lahin inleng a nei ve reng a, ka pu ten pasal nei turin an rawn nawr ve sek bawk. Sangzuala hian ka nu ka dang bet niin a sawi ţhin a, 'Nangmah vangin pasal a nei ngam lo' a ti ţhin. 

Kum khat kan inngaihzawn hnuah ka pasal chuan an khuaah hna a hmu ve a, a hnathawh a sang lo na a hna a nih hrim hrim chuan a ţha vek. Ani pasalin a thun a ni awm e. Kan veng a a awm loh hnuah pawh min rawn be reng a, hunawl a neih apiangin a rawn zin bawk. 

Ka dinhmun thlenga min hriatthiampui em avangin min hmangaih ve tak takah ka ngai a, ka lerh hran loh avangin a thusawi engkim awihin ka ring hmiah zel. Kum hnih kan inngaihzawn hnuah ţum khat chu a tih ziah danin min hmu turin a rawnkal leh a, "I nu i dang bet tlat a, pasal i neih hma chu a nei duh lovang. Inru ila, i nu pawn pasal a nei chhawm ve mai ang" a ti a, ka duh mai bik lo. Inruk a bulţan ka ngam chiah lo a ni. 

Mipa dang ngaihven thei lek lova min siam tu chuan thlem tak tein min thlem a, thu a tiam pah reng. Ka la naupangin ka ngaihtuah a tlem a, hmangaih ber nen a kumkhua a hlim taka awm bak ngaihtuah ka nei lo. Ka hlim reng theihna tur niah ngaiin ka zui ve tawp. 

Hmeichhiate hi kan hmangaihte tan hian kan inhuam zau asin. Kan pek theih ang apiang phal takin kan pe a, hei tak hi mipa â chuan hlut nachang an hre ţhin lo. 

Kan inruk tawh miau avangin tihngaihna awm hek lo; kan innei ve rawih. Puanchei hi a mawi ka tia, kawngfual thianghlim sar nalh tak tak a tam laiin kan inneih ni paw'n pawnchei bih ka thlang. Min ti mizo bik riauin ka hria a ni. 

Thla thum chhung chiah ka hlim! A awihawm loh zawk. Thla thum a ral meuh chuan ka nu'n a zia a chhuah a, ţhenawmte bula min fak hlawi hlawi siin inchhungah a tawrhlelhawm ţhin hle. Kut hial min thlak anih chu! 

Hmeichhia chuan mamawh kan ngah a, ka pasal hlawh an pumbilh vek. Office a kal dawnah tlem an pai a, min hrechang ve tawh lo. Shampoo hman a phal ngai lova, pads leina takngial pawh min pe ui ţhin. Khaw hran a awm kan nih avangin an zia hre miah lovin ka pasal ka zui a, inhriatchian hmasak a ţul zia ka zirchhuak a ni. 

Ka nu zia hrechiang inti ten min sawipui an tum ngial ţhin tak na a ka bula ka nu rel zat zat ţhin ho kha ka ring tlat lo. Ka hriat a ka nu an sawichhiat bawih bawih duh chuan keipawh ka nu bula min sawi duh ka ring tlat zawk a ni. Ka nu'n min huat lehzual loh nan ngawih ka thlang. 

Ka pasal awm loh lai chuan a hlim hmel ka hmu ngai lova, ka pasal awm laiin min duat hle thung. Zan ka mut hnuah ka pasal Sangzuala hi eng emaw sawipuiin a phun sar sar ţhin a, ka nu nen an menrei ţum chuan zingah ka pasalin thinrimna a zawng ziah. 

Min hmusitin mi mo a fak awl lo a, an hausak zia te leh a mona ten an chhawr zia thlengin a sawi ţhin. 

"Thuam chhawm a nei ţha lutuk, puan lah chu an sem hnuah pawh a la chuang a" te a ti ţhin a, mizoin vai ang mai a thuam chhawm kan dah chungnung ta hi a pawi ngawt mai. Inel nan kan hmang emaw tih tur a nia, mi rethei te tan chuan mizoram pawh hi a chep lek lek tawh a ni. Thuam chhawm avanga pasal nei ngam lo kan la awm ang tih te a hlauhawm. 

Tunlaiah mo an enhran tawh loh laiin ka nu chuan min enhrang tlat a, 'kan chhungkua' a tih hian ka tel ve ngai lo. Theihtawp a pawh ka tum a, a thusawi apiang ka zawm vek, ka dinhmun hre ranin an pawi sawi hlau reng rengin ka awm a, mo leh nu inkar a ţhat a pawimawhzia ka hria, chuti chung chuan inzawmna thuk ka neihpui thei chuang lo. Hnaih ka tum nasat poh leh min hlat ting a ni mai. 

Nau ka pai thei lawk lova, ka pasal bula 'a ching aniang' min tih ţum te khan na ka ti ngawih ngawih. Fa lo pai thei lo ta tehreng pawh ni ila hmeichhia ka nihna a bo miah lo. 

Tu a awh ve thu a sawi leh ţan a, nu nih nawmzia min hrilh chamchi ţhin bawk. Vawikhat chu ka chhang let ve, "Hmeichhia pasal nei tawh phawt chuan nu nih kan chak vek a, kan pasal te tih lawm nan tal pawh fa hrin kan duh. Nau kan pai theih loh hian hmeichhiain hrehawm kan ti ber. Hetianga insawi hian kan hrehawm tihna in belhchhah mai mai a ni. Mahse, nau kan pai theih loh avang ngawtin hmeichhia leh nupui kan nihna a bo hleinem" ka ti a ni. Ka thusawi chuan a run a, ka pasal hnenah fa neih ka duh loh thu a hrilh. A rapthlak asin!

Nau ka han pai ta cheng a, in duat der ve chu sawi loh; nau pai chung pawh a a chet nasat ţhin zia a sawi cham chi a, "Tunlai mi hi chu na chhete in neih pawn in mutpui nghal zel a" min ti fo bawk. 

Fa kan han nei a, thlasik khawvawh vin tuk lai paw'n diaper hman a phal tlat lo. Ka insu tluk tluk reng a, tui ren a ngaih zia a sawi leh tho. Ka dawhtheihnain a tlin lo lek lek ţhin. Mahse, ka pasalin a hlauh zia ka hria a, kan inneih chhung, tun lawk a ka chhuah hma thleng khan vawikhatmah ka pasal hriatah ka vui lo. 

Hmeichhe ţhenkhatin a rukin an pasal te an fuih seuh seuh a, an nu leh pate nen ţhen hran phet an tum ţhin tih ka hre ve tho, chutiang chuan ka ti ngai lo. Kan thil tih ang hi kan chungah a let ve ţhin. Mo la nei ve tho tur hian mi chhungkua ka pawt ţhen thei lo a ni. 

Mipa hian min kawmngeih viau zel a, kan pa ţhiante hian min nel zual. An rawn len changin an bulah ka ţhu ngai hauh lo na a ka be bawrh bawrh zel a, chu chuan ka nu mit leh beng a tikham a ni chek ang chu uire hming ka put tak hi!Phone hmangin mipa tumah ka be ngai lova, an rawnlen a ka lo biak lumlam ve ţhin hi a ni mai. Ka pasal zawk hi a ruk a hmeichhe biak nei reng a ni. Patling pui tawh si nula chhuah ruk pui chang a ngah. Chu chu ka nu paw'n a hriatpui a, a haider thung. Kan pa ka khak ve hlek chuan chhungkua a buai a ni nghal zel. 

Ka chhuah hma thla khat chhung khan kan buai zual a, ka pasalin thinrim hmaisen min hmuh fo. Inţhen a sawi awl lo a, tun hi kan thleng ta a ni. Engmah ni lo mah ila dawhtheih chin ka nei ve a, belh tur haihchham viau siin chapona ka nei ve tlat. Pasalte berin uire a min puh a, min chenpui duh loh miau chuan awm luih reng theih a ni lo a ni. 

An chhungkuain min do rawn a, a u in zu a ruih apiangin ka bungrua thehchhuah a tum bawk. Awm luih zel na chi a ka ngaih loh avangin pa Siama te pawh ka hrilh lo. Hrilh ila chu ka nu a insawithiam ang a, ka chhuah loh theih dan tur an ngaihtuah ang. Chutiang chu a thlen ka duh lo a ni. 

Tuar zuau nih ka hlawh maithei a, a ni ve tho. Ka inpawm thlap. Mahse, belh tur mumal nei miah lo chunga chhuah ka duh tlatna hian a hrehawmzia a hrilhfiah theiin ka ring. A ninawm loh nan a tlangpui chiah ka sawi, sawi vek dawn ila chu a tam lutuk. Kum tlemte chhung khan sawi vek sen loh khawp a tam thil thleng a awm a ni. 

Pawisa kan kawl ngai lo ka tih tawh kha. Tuna ka pawisa neih ve pawh hi pa Siama nupui, ka nu Hrili'n "Invenna awm lo ringawt a ţha lo. Nau no pawm i nia, i pasal awm loh hlanin eng emaw a thleng thut thei. Invenna tur tal kawl ve rawh" ti a a pawisa min pek a nia, ka hmang ţhen hman lo hlauh. Pawisa kawl lai nei lo ila chuan ka haw thei tawp nang.

Ka thil tawrh hi tam tak tan chuan awih a har ang, mahse, a thleng miau si a ni. 

Aizawl kan thlen meuh chuan mipui an tam lehzual a, sumdawng leh hna pawimawh tak thawk ni awm tak a inchei fel tlurh te, tih tur pawimawh nei lem lova theu leu mai mai te an inpawlh nuk. 

Sumo dinna bulah taxi ka lo chang a, Rengpuia ţhianpa sumo driver khan bungrua a hlan thlak fel hnuah min chanpui. A tlan lai a phar ding nghal mai a, bungrua min hlan luh sak hnuah "Kha pawisa" tih leh taxi chhunga pawisa rawn theh luh a rual. 

"Ngati nge? Taxi chuan man chu ka nei alawm" ka lo tih chuan "Sumo chuan man anih kha. Ticket a lak khan Rengpuia khan ama pawisa a hmang a, i pawisa hi chu Aizawlah chauh pe rawh a tia, i chhuk hlim khan ka theihnghilh daih. I kal bo hman lo hlauh a" a ti nuah nuah. Ka hrilhhai letling zawk.

Rengpuia mai mai chu a neih bik dawn loh tehlul nen. Taxi a tlan rualin lawmthu ka hrilh a, a hrepha kher ange maw. 

Ipikna bawkin min tuam lehnghal mup mup. Ka nu pasal neihna veng ka hria a, a pasal phei chu thingtlang mi pawn an hre fur ang. Pathlawi, fa nula tlangval nei ţhiau tawh a nei a, an pahnih chuan fa an nei tawh lo. A fate chu ka la hmu chiah lo na a a pasal erawh thlalakah ka hmu tawh. Whatsapp dp ah pawh ka nu chuan an nupa thlalak a dah. 

Care&Cure hospital neitupa a nia, ka nu nen an in upat hleih. Ka pasal nu khan ka nu pawisa duh vangah a puh a, pawisa min rawn thawn ngai miah lo te khan a ti thinur hlur zel. Mahse ka nu chuan "Pasal i nei tawh a, ka rawn inrawlh ve sek a mawi lo. Mamawh i neih chuan min hrilh la, amaherawhchu engkim ka tihsak vek che chuan i pasal leh a chhungte an mualpho lutuk ang" a ti ve tlat a ni. 

Taxi driver hnenah chuan "Dr Lalbiakthanga te in i hria em? Care&cure hospital neitupa kha" ka ti thawr a, mak ti hmel pu deuhin a rawn hawi let zawk. Ka landan leh ka mi zawn pa chu a inrem vak lo a nih hmel. 

Pasal ka neih hnuah ka nu hi vawihnih chiah ka hmu leh. Vawikhat a rawn zin a, fa ka neihin a rawnkal leh bawk. Aizawl ah ka let ta lo reng reng a, Rengpuia te in a kan chaw ei ringawt pawh ngaithei lo ka nu khan khawiahmah zinchhuah a phal lo. Nau ka pai lawk loh avang khan inentir ka rawt a, Aizawl thlen a remti chuang lo. Chuvang chuan ka nu pasal te awmna veng chu hre mah ila an in tak ka hre lo a ni. 

"Hria e..hmanni ah ka zu in nasa lutuk ka in admit alawm. An hospital kha awm man a to si, drip an khai a, an kap eng pep a, zanhnih chiah ka riak. Pawisa ka chawi ţeuh" a ti hluk hluk. 

"Private chu sumdawng an nia, a to tlangpui ang" ka tih chuan "Ka lut tawh lo chiang viau ang" a ti hmuk a, ka chhang zui duh ta lo. 

In lianpui kawtah a ding a, an inhung tu bang pawh a sangin a rintlak hmel khawp mai. Bang leh bang inkarah gate mawi leh lian zet a awm leh a, gate a inhawn deuh avang chuan in lianpui ding luah chu a hmuh vuai vuai theih. Aizawl hi chu miin an bawh nasain in an sa mawlh mawlh reng a, ka nu pasal te paw'n gate chhungah chuan kawtzawl zau tak an nei bik lo. Mahse an chei nalh khawp mai. 

Bawiha ning tawh lutuk chu a ţap uar leh viau tawh. Lut mai lovin kan han inawi leh rih a, a chhangchhiat theih khawp mai. Hnute ka pe a, ka awi pah hliau hliau bawk. Motor horn ri tuarh chuan min ti phu nasa kher mai. Gate zawn a ding kan ni a, motor thawm ka hre hauh lo. Kei ang bawkin Bawiha pawh a phu ve zawk tho. 

Horn a rawn rik leh rual chuan ka hawi let a, awm sawn mai lova chu car dum hnum hlarh ka en he haw lai chuan horn a rawn pe leh tuarh. Khai aw..gate chhungah a tlan lut duh a ni ngei ngei ang. Car melh reng chungin ka awm sawn a, ka bungrua chu dahţhat ngai lovin a sirah a awm sa. Car khalhtu chu ka hmu vuai a, chiangin ka hmu lo. Ka awm sawn rualin horn a pe leh zeuh, kher kher chuan. 

Gate lam panin a tawlh riai riai a, gate hmaah a ding. Gate hawng zau tur ni awm takin car aţang chuan a chhuk a, a palianin a sang kher mai; a fai hmel takzet bawk. Inthazo tih hriat zetin gate lam panin a pen phei a, a ke pen chu a zang vah ni maiin ka hria. Gate a hawn hnua a rawn let rualin hnunglam ka hawi ve nghal. A hmel ka hmuchiang chuang miah lo. Mipa pumraw inkhaithli leh sang thlup kha ka hmuh chhun a ni mai. 

Gate chhunga car a tlan luh chuan ka thawchhuak hak. Khapa kha tu nge niang? tiin ka inzawt ru nghal mawlh mawlh. A huhang a nain min hmu miah lo ang a a che bawrh bawrh chung paw'n ka thaw dep dep a, a kawng ka dal hnu lawkah ka hmel a hmuh ka hlau leh hnuhnawh a. Ka dinhmun ka ngaihtuah tel lo thei lo a, belh tur dang ka neih miau loh avangin ka nu ka bel lo thei si lo. Ka nu chuan min lo hnar hauh lo ang a, awm rei ka tum miah lo na a kha ka mi hriatchian loh kha ka belhchian hma hauhin a mi uap a nat hmel ka tiin reilote chenpui pawh ka huphurh a ni. 

Ka pasal vangin ka kehchhia a, ka na a, ka la na zel bawk ang. Ka thinlung hliam ah hian chi min phul sak duh tu an awm loh hram ka beisei a ni. 

Bungrua nen gate chhung ka lut ve rawih a, a rual a ken a har deuh avangin pakhat pakhatin ka thiar. Airbag leh suitcase chiah mah nise nau paw chung chuan a rit deuh a ni. 

In chu ka thlir vang vang a, he khawvel êng ka hmuh ve ţan tirh aţang tawhin hetiang in ropuiah hian ka la cheng ngai lo. Gate ka lut zet tawh na a nau nen a inchhung luh ka huphurh leh hnuhnawh a, ka ţhiannu biak ka tum leh ut ut. Mahse, anu a hriselloin an khawsak a harsa ve a, phurrit ka siam sak ka hlau bawk si. Hringnun hi a hahthlak a ni. 

"Reilote chiah aniang" ka ti chhuak sep a, ka huaisenna neih ang ang sawmkhawmin in chu ka pan hnai a, ka door bell hmeh tum mai mai pawh ka tha a khur thei nia! Ka ban lek kan uaih tawh chu ka thlak thla leh hnawk. In ţha tak a luh ka tum vang chauh a ni lo, in ropuina ai mah chuan ka luh tum dan leh min dawnsawn dan tur vel ka ngaihruatna hian min ti zam a ni. 

Vawihnih nan ka ban ka lek kang leh a, door bell chu ka hmet ta ngei. Kawngkhar inhawngin min tauh phak lohna tur chin, kawngkhar zawn thoah ka ding a, hmeichhe pakhatin a rawn hawng. 

"Ehe..tu nge i nih? E...hmelţha ve hmelţha ve, i naute kha a va cues ve, awii..chum buang buang" tiin a phul hlut. 

A ţawng duh dan aţang chuan mi pangai ang pha zan lo a nih ka ring. A sam tawi mat mai chu a sir tawn tawn a ţawnin a kawh teuh a, a biang leh hmui a sen hlar. A mit a hnawih dum huam a, a hnar ngul chu a sen thla riai bawk. A mit tih loh chu a taituk a ni ber. Kawngfual arh zet a hak hnuaiah kekawr tight deuh a ha a, bakilh par a kilh bawk. 

"Tu nge ni Remrem? Rawnkal an awm em ni?" ka nu ngei chu a rawn au ta lang lang. 

"Aww...lo en vat vat rawh" tiin ka hmaa ding chuan a au let a, ha pui zawng zawng langin a ţhen ţha a, a thle bek bawk. 

Ka nu'n min rawn hmu chu phung a hmu emaw tih tur a ni. A meng phawk hra a, ţawng tum a a ang zuau chu sawitur hre lo ni awm takin hmui a chip leh. 

"Enteh ka nu..he naute cues zia hi" ka nu'n Remrem a tih nu bawk khan a lo ti leh. Bawiha a sawina a ni sia, cute a tih ve naah ngaihsak tawh mai teh ang. 

"Zote, eng nge awmzia? I rawn zin nge thil dang zawk?" ka nu chuan a ti chhuak hluai a, a hmelah chuan mak tihna leh hlauhna a inpawlh nawk. 

"In ka chhuahsan a, pan tur dang ka hre rih lo a ni" zawi fe hian ka ti a, fa hial neih hnua let leh hi chuan nute meuh pawh an zahawm duh hle. 

"Lo lut rawh" a ti a, Remremi chu dim deuha nam kiangin ka ban a rawn hmer. 

"Lo lut rawh" ti nawn lehin inchhungah chuan min pawt lut a, pawn lam a ropui ang bawkin inchhung pawh a ropui. Bungrua te chu an enkawl ţha tih hriat zetin a hnûm hlarh vek a, chung  te hlei hlei chuan min ti tim a ni. 

"Ţhu phawt teh ang" tiin sofa a ţhut pahin min pawt ţhu ve a, puak puan suihna rawn phelh sawk sawkin Bawiha chu min laksak. 

"Bawihtea chu a va changkang tawh ve" a ti a, mak tak maiin Bawihtea a la thei tlat. A tihmawhin mi nazawngin an pawm thei miah lo. Zosanglura a nia, Bawihte kan ti ve mai zel. 

"Hmelţha si, cues si, biang puar pum pum si" Remremi khan a rawn ti leh a, kan ep chiahah ţhuin a ke a ti che reng. 

"Ka fanu anih saw..an unau hi panga an nia, Remremi saw a upa ber. Mipa pakhat chiah a awm a, a dang chu hmeichhia vek an ni" tiin ka nu'n a chenpui zat a sawi a, belhchhah tu nih a inthlahrunawm zual viau mai.

"Sangzuala ka ţhen a, neih luih ngaihna ka hre tawh lo. Tunah phei chuan uire ah min puh leh tawh a, anu a sual bawk si. Awmngaihna ka hre tawh lo" ka ti chuai raih. 

"Ava mak ve, nimin a kan inbiak paw'n Sangzuala chuan inţhat tlan lai anih thu a sawi a" a rawn ti khauh. 

Ni e, ka nu hian mawi a zawng ve ţhin. Keimah zawk min be reng lovin chanchin a hriat duh chuan Sangzuala a be mai zel a, mamawh kan neih leh neih loh a rawn zawt ve zeuh ţhin. Sawi tak ang khan ka pasal leh a chhungte an lawm loh hlauin a rawn inrawlh duh vak lova, kei lah chhungte hnen a vui chiam chi ka ni lo ve bawk nen; kan buaina hi a hre ve kilh kelh lo. Kar khat lai chhuah tumin ka inbuatsaih ru tawh a, ka nu pawh hi min dan ka hlauh lutuk avanga hrilh lawk lo ka ni. 

"Ngaihzawng neih a la ching em?" ti a ka nu'n min zawh chuan ka aw mawl tawp. He thil hi chu ka sawi tam peih lo, ka khamin ka ten hluah hluah a ni ber. Ka dinhmun chhe viau lo se chu ka chhuahsan daih tawh zawk ang. Kum25 ka ni tawh a, naupangtea pasal ka neih avangin tawnhriat ka nei ţha thawkhat tawh viau a ni. 

"A va buaithlak ve aw..ka fanu i nia, ka awmna apiangah i awm ang" ka nu'n a tih lai chuan lo pawtchatin "Hna ka zawng ang a, awm rei a ngai lovang. Rawn fin che hi ka inthlahrung lutuk. Remremi te unau an rual ve angreng sia min ngaithei lo ang tih te a hlauhawm a, nangmah thlengin i hrehawm phah thei. Keimah vangin kha leh chen kha hrehawm i lo tuar tawh a, harsatna siam leh che ka duh miah lo. Ka inenkawl thei ve thuai ang" ka ti bawrh bawrh. 

"Ka fanu i nia, i tlanchhiatna tur hmun ka ni alawm. Amaherawhchu, ipa leh i unaute be bawrh bawrh la, tih tur ţul ang ang i ti ve ang a, nangman i zir chuan an sual lo ang. Ipa Siama te ka bia ang a, ipa kan hrilh hre ve ang a, rorel a ngai anih chu. I chhuah hmain min hrilh la ţha tur, ipa Siama te tal pawh" a ti malh malh. Min awm luih tir ka hlauh avanga an hriat loh a haw ka ni. 

Ni e, ka hlau hluah hluah tawh. Ka pasal leh a chhungte kiangah hahdamna a awm lo. Ka pasalin ngaihzawng neih a chin hnu phei chuan tawrhchhuah hun a awm theiin ka ring lova, a tlai hmaa ţhen fel vat hi ka duhdan a ni. 

"Eng nge thil thlen dan ni reng reng?" ka nu'n a tih chuan harsa ti chung chungin ka hrilh. Ţah loh hram tum chungin kimchang deuhin ka sawichhuak dap. Ka sawichhung zawngin uluk deuhin a lo ngaithla a, a chang leh a lo thaw leh halh ţhin, a changin pawi min tih pui hmel a pu a, a changin lainat deuhin min melh a, nu te nge nge chuan min lo hrethiam ber mai. Natnain ka thin a vilh ngut ngut laiin ka nu chuan thlamuanna min pe tel tho. 

Ka nu pasal, ka pa a ni ve tawh mai ang chu. A rawn haw chuan min hmuh a inbeisei chiah bik loh hmel khawp mai. Remremi nen ka bungrua la lutin ka nu in awm tur a min tihna pindanah kan dah lut diam tawh a, Bawihtea thawmhnaw ka thlak a, kei erawh ka la intifai ve hman lo. 

Ka nu hnenah engkim ka sawi tawh a, ka nu'n ka pa a hrilhchhawng veleh. 

"Ka ngaihven tawk loh vangah ka ngai. An pa be ziah mah ila a mawi chiah lo a ka hriat vangin a chhungte ka be tel ngai lo a" tiin ka nu chuan amah leh amah a indemna thu a chhakchhuak. 

"I ring a, an kut a i dah tawh chuan biak sek an ngai hleinem. An fanu a ni tawh a, ngaihven chintawk hriat a ţha. I han biak sek chuan i ring tawk lo tihna a ni zawk dawn a"  ka pa'n a ti charh charh a, dik ka ti khawp mai. 

An fate an rawn haw khawm a, ka pa'n "Ka fanu ve tho a nia, in laizawnnu anih hi" a tih laia ei loh hmel deuh a pakhat lo ner nawk ka hmu fuh. Min lawm hauh lo a ni tih ka hre nghal phat. 

Chutah inchung pan chhohna kailawnah chuan mipa sang thlurh hi a rawn chhuk thla hmawk hmawk a, gate bul a ka hmuh ngei kha niin ka hria. Ani lo rin tur dang ka hre lo a ni. A inchei fel thlup a, khawiah emaw kal a tum anih hmel. 

A farnu te leh a nu leh pate nen a kan lo awm khawm ţhap avang chuan a ding chawl ve rih a, a hmelţha viau mai. A hnar ngul a sang vah a, mitmeng thim lam a ni. A khabe ruh kual nalh zetah chuan hmul a ţo siar siar a, a landan chuan hmeichhe tam tak hipin an rilru a tibuai hneh viau maithei. Kei erawh chuan mipa pangai satliahah bak ka ngai lo. Chumai bakah ka nu bula ka awm anih chuan ka nuţa tur a ni bawk dawn a. Pianpui unau neih a, ka thlavang hauh tu tur nuţa neih hi ka thil awh ber pawl a ni.

"Buaina a awm em?" a ti a, a aw thum leh ril deuh raih chu a landan nen a inhmeh viau. Gate bula ka hmuh lai ang bawk khan an zinga ka awm ve chu hria angin a awm lo. 

"Awm lo e..i chhuak dawn em ni?" ka nu'n a lo ti thuai. 

"Aw, chaw eina tur ka nei" a tih chuan ka nu bawkin "Ka hre leh si, zingah khan i sawi tak alawm" a ti dam thlap. 

A chhuak turin min rawn kalpel a, kan taksa a insi thuak. Hnai tak a en chuan a mit rawng chu a uk kharh a, min hmu ve tawh tih hriat zetin min rawn melh a, engmah phei chu a sawi lo. Mak tak maiin a farnu te angin min ngaihtheih lohna a hmelah a langchhuak ve lo. Ka nu a endan pawh a pangai berin ka hria. 

"Vai chhungkaw rorel ang maiin in ding deuh ţhup a, ţhu teh u" ka pa chuan nui chung hian a ti a, Bawihtea pawmin a malchungah a ţhuttir.

"Han intifai ve la chaw kan ei dawn nia, i unaute pawh an rawn haw tawh a an ril a ţam ang" ti a a ruk deuh taka ka nu'n min hrilh chuan ka pindan tur lamah ka tlan chho thuai. 

Tukverh hawngin pawnlam ka thlir a, keimah chiah a ka awm hnu chuan thil tak takin min rawn deng leh. Pasal ţhen, nuthlawi ka ni ve ta mai a, eng nge ka tawn zel dawn ka hre lo. Mahse, "Ka tawpna a ni lo" tiin ka phun chhuak sep. 

Ka hringnun liam ta te kha ka nawt reh thei hauh lo. Mahse, mithar ni a in ngai chungin ka ziah zawm leh thei. Lungngaihna kawr ruam kan pelh chuan hlimna tlangah kan lawn ve thei tawh an ti ţhin a, chu hlimna chuan min lo hmuah ngei ka beisei. 

Rang thei ang ber a bungraw lak ka duh a, nun bul ţan ţhat leh ka duh a ni. 'I ţhen tawh a, hmangaih viau mahla hmalam pan rawh' tiin kan inhnem ţhin a, a dik ber lo ka ti. 

Kan hmangaih ngawih ngawih te kalsan ngamna kan neih a, kan ţhen hian hmalam kan pan daih tawh zawk. Hnungtawlh lova hmalam pan zel zawk hi a ni pawimawh chu. 

"I fapa in a pu a zunkhum a nia" nui kar kar chungin Ruattei, ka nu fahrawn te zinga an tlum berin Bawiha a rawn pawm lut. 

A va hun lo tak aw, counter bulah khan diaper leiin ka hrentir ngei a, ka nu'n a lo phelhsak hman a ni. Hren tir leh tum ru ranin ka mangnghilh palh a ni. Inthlahrun sa nak laiin haihawt lutuk hi chu a pawi ngawt mai. 

"Naute a zung a, sofa a hing hum hum mai" tiin ka hriat loh hlau zetin pindan pawn aţangin Remremi a rawn au lang lang. Lehzel chuan aw..

CONT..