KA HRINGNUN THAWNTHU-2

KA HRINGNUN THAWNTHU-2

Dinhmun chhiat lutuk avanga hmuhsitna, i tuar ve tawh em? Midang mit fukna ber leh an ngaihven ber ni chunga mal riau a inhriatna, he thil hi ka tawrh tawh, ka tawrh mek leh ka la tawrh zel tur a ni. 

Remremi leh Ruattei te chu ka chungah an ţha viau a, midang pahnih, Neihkimi leh Zamtei te chuan awm ti nuam lo khawp a chikin min en a, min ngaihven hle. Reilote chhung chauh pawhin ka dinhmun avanga min hmuhsitna an lantir nasa tawh viau. 

Ka intihfai zawha inhnuai ka chhuk rualin ka nu'n "Bawiha hi ka hrai puar tawh chung paw'n a tlei duh lo reng reng" mangang deuhin a lo ti a, nupa kan han inţhen hian naupang nen chuan mahni in ngei a let pawh a nuam ngai lo. Chhungte mitmei ven a na a, inthlahrunna chin a awm ţhin. Kei phei chu ka chhungte ni chiah lo, ka nu pasal leh a fahrawn ten min hual vel a, inthlahrun a na zualin ka zam takzet a ni. 

"Kan chawei hun pangai a pel duai tawh. Chauh nak laiin i fapa a ţap reng bawk si, ti tlei thuai thuai rawh" Neihkimi'n a ti hlak hlak a, Bawiha chu ka awi a, ka rilru a hmanhmawh et et. Muhil vat thei se ka ti ngei mai.

"A pawi hleinem, naupang kan awm tawh lova min tihlim phian ang" ka pa chuan a ti dam thlup a, Remremin Ruattei hmai a lo chei mek a, anni chuan min ngaihven tehchiam lo. An zinga ka tel ve thut chu pawi an ti ve em em lo niin a lang. 

"Hna nei ţhah kan nih avang hian tuk ţhuan ei ho a harsa a, zanriah tal hi kilho thei ila kan tia, chhung inkhawm neih kan duh vang a ni pakhat a" ka pa chuan min râwn titihin an chhungkaw tih dan ţhan min hrilh a, ka hnaih ber sofa ah ka ţhu chat. Vanneihthlak takin Bawiha pawh a ţap tawh lo. 

Chhung inkhawm kan neih zawh veleh chaw ei siam turin ka tho tharh. Nula fel deuh an nei na a puih zel ka duh. An mit tlun loh ka hlau a ni. An chetphung la hrethiam miah lo ka ni a, an nula che vel chu ka en ru leh zeuh ţhin. 

"Lo awm mai mai rawh, nau i paw lehnghal. Chaw eisiam mai mai chu ka awlsam alawm" tiin awl turin min hrilh ngial na a ka pui lui tlat. 

Ka pa hi pa ţha duam mai a nia, a hmel hmuh a hahdamthlakin a aw a dam thlup bawk a, hrehawm ka tih hlauin min be mawlh mawlh reng. A fate pawh a zilh ta chiah reng a, "Zotei hi tuman enhrang suh u aw. Vanduaina leh lungngaihna te hi a ngen a kan ngen chhuah a ni ngai lo. Khawvel hi a ngaiin a kal reng lova, chu chuan hringnun a thlak danglam ţhin. Mi vannei a vannei reng lova, tumah an vanduai reng ngai lo. Kan hmuhsit a kan enhran ruk tlat te dinhmunah hian kan ding ve thei. Chu chu kan hriat tlan a ţha khawp mai" a ti a ni. 

Ka ep chiah a ţhu Neihkimi leh Zamtei te chuan tui tih loh hmel zetin chaw an eizawm a, ka pa'n "In khata kan chen ho chuan chhungkua kan ni tihna a nia, chhungkaw hming kan put chuan mihrang kan awm lo tihna a ni mai" a tih leh phei chuan hawichhuak lo mah ila min en tu an awm tlatin ka hria a, rilru ipik ţun sa nen; chaw ei a tui mawh khawp mai. 

"Kum engzat nge i nih tawh?" tiin Ruattein min rawn zawt hlauh a, kan thupui a thlak chu ka lawm kher mai. 

"Kum 25" ka tih chuan "Kei aiin i u hret anih chu. U Zote ka ti thei che a nih chu" tiin a nui var var a, a hmel a ţhain a nuih phei chuan hmuh a nuam takzet a ni. Remremin lo chei vak hman lo phei se chu hmuh a nuam zual ngawt ang.

Chaw eina hnawk vel ka tih fai lai chuan Remremin min zui kual dat dat reng. Ka hmai chei a chak zia leh a thiam zia sawiin a phul hlut reng a, mahni a awm chak viau tawh mah ila a mawiah ka nu te kiangah ka ţhu tawi ve rih. 

"I bulah ka riak dawn aw U Zote" Remremi chuan a ti pek a, kei hi, Remremi ka ti teh fo a, kei aia a upatna a tam angreng si, U Remremi ti ila a mawi zawk ang. 

"A chi loh ang..i mang a chhe si a, naute i delh khaw lo ang" ka pa'n a tih chuan "Nih leh naute min lei ve rawh. U Zotei naute ang a che thei leh ţap thei ka duh ve. Hmeh ţah chawp ngai ka duh tawh lo" a ti mauh mai a, min u ve ngawt chhan lah ka hre der lo. 

"Duh reng reng suh. U Zotei pawh nau paw chungin chaw a ei te a ngaih kha, keichu nau pawm ka peih lo tawp. Pasal neih thlengin ka peih loh phah. Mipa ah hian ka duhzawng ka la hmu chiah lo bawk" Ruattein a tih ve hnuah U Remremi pek chuan "Keichu mipa hi an hmelţha e ka ti. Mahse hnaih loh tur. Stop" tih pahin a ban chu X angin a dah thuah a, "Hetianga tih zel tur hi a nia, anih loh chuan kan pahnih chiah a kan awm veleh ramhuaiah a chang dawn" a tih zawm leh. 

"Chutiang chuan tu nge hrilh che a?" nui kar kar chungin Ruattein a lo ti a, "Hmangaihsanga" ti a U Remremin a chhan phei chuan a nuih a za zual sauh emaw tih tur a ni. 

"Ka ring reng a" a ti a, U Remremi kalsawn veleh "Mipa a hre ve reuh lutuk a, nau a pai palh kan hlau. Nau pawm chi anih loh avangin kan sawi ţhaih ve deuh ţhin a" tiin min hrilh ru. 

Kan thusawi chu hria ni awm takin ka pa chuan "Ramhuai ang zawng a sawiţhaih kher a ngai lo asin mawle. Hmangaihsanga tak hi chu aw.." a ti vang vang a, U Remremi chuan chhuatah pher a phah a, exer la ni awm takin a zuang auh auh. An unauah a thau ber tho. 

Dar8 velah mu turin ka kal a, tun a ka dinhmun ang tawn hi alawm hrehawm. Midang ngaithei lovin mahni a awm kan chak a, mahniin kan han awm ta cheng a, kan ipik zual sauh emaw tih tur a ni leh a, thil thleng tawh te kan suangtuah let lo thei lova, pindan zau leh nuam tak a ka awm chung hian lung a zing a, nuam tihna ka nei miah lo bawk. 

Bawiha bulah mu in ka kutin ka inbengkang a, tui taka muhilin a thaw ri sek sek a, keimah avanga a tawrh ve zel a ngai hian ka hrehawmna a belhchhah nasa hle. Neihkimi leh Zamtei ten nin hmel zet a an melh te khan ka na veng veng. 

"Vawiin chu i chau ngawt ang. Zin kawng thui deuh kan zawh a, hahchawlhna hun i la nei mang bik miah lo" tiin ka phun sap sap. A awm ka dawm a, a lungphu chu a dam thlap a, chu chuan a thlamuan zia min hriattir. Awm ngai loh naah kan awm tih hrethiam ve ni awm takin a hawi tang hra reng a, ka nu lo chuan an la thei lo. Ka pa leh Ruattei ten an pawm ve zawk kha a ni mai.  

Zan boruak reh ruih mai chu ka phone ri chuan a rawn ţhiat a, ka pasal hlui te khua a ka ţhiannu Thantei a lo ni. 

"Hello" ka tih rual deuhthawin "I va mawl ve..kei tal min hrilh ta che" a rawn ti nghal hlar. 

"I hreve tawh a ni maw?" dimtein ka lo ti a, ka mutna aţanga tho chhuakin tukverhah ka dak. 

"Hria ang chu mawle. Mahni hlawkna tur pawh ni miah lova mi chanchin sawi peih hnam kan nih hi. Ka nu lengchhuakin mi sawi a hria a, ka be tlang thei lawk lo zawk che" a la rawn ti hlak hlak a, a lungawi loh hmel em avang chuan "Pawi ka ti..tumah hrilh lovin ka chhuak mawl tawp" ka ti a, ka kal tur kha tuman min hmu lo asin mawle. 

Ka ngaihtuahna hria ni awm takin Thantei chuan "Chanchin chhe lam chu a darh chak alawm. In ţhenawm ten an hria ang a, an inhrilh chhawng zel tihna a ni mai. Veng lu lam leh veng hmawr lam ten an hriat dan a inang lo ang a, thil kalphung tur chu i hriat kha. Uire thanin a nia i than" a rawn ti a, za lo deuhin ka nui ro hak. 

"Mahse hnual miah suh. Keichuan ka ring thlap che, thiam an chan theih nan i nu chuan chhe thei ang berin a sawi ang che. Nupa an inţhen reng rengin hmeichhia hi chan chhe zawk kan ni ziah alawm. Tunah an sawi hluai ang a, a reh chhawm ve mai ang" fimkhur deuhin a rawn ti. Sawi sual neih a hlauh hmel khawp mai. 

"A rukin ka kal sia, a than nghal vak ka ring lova" ka la ti cheu. 

"Ka sawi ang kha a ni mai. Tam tak sawi nuam tih tur chi a nia, mahse, lungngai miah suh. Aizawlah chuan eizawn a awlsam nge nge alawm. Pa tello a fa pahnih pathum enkawl an tam em hi. Hmeichhia te hi kan landan ang ngawt a derthawng kan ni hleinem. I fapa nen a in eikhawp lek thawhchhuah dan chu i hre thuai ang. I lam ka ţang tlat a, min ring rawh, ka hriat lai chuan tuman an sawichhe ngam lovang che" a ti malh malh. Ţhianţha tak hi chu aw..an va'n hlu tak em.

"I hriat lai ngei a an sawi anih paw'n ngawi tlat rawh. Engtinmah ti dawn lo mah ila thudik a lanchhuah hunah chuan min sawichhe nasa apiangin min hmu hreh ang. Hnar lo mah ila min pawh ngam miah lo ang. Ka cho loh vanga ngawih chuh ka ni lo, ka chak tawk vang zawk a ni" ka ti charh charh. Inringtawk tak angin ka ţawng na a hriat loh karin tukverh chanve daih tur a an dah tlak dal ka lo hum nghet hman viau. 

Ka ţhiannu'n min hnem leh malh malh lai chuan gate chhungah motor a rawn tlan lut a, khapa kha a lo haw chiah a ni ngei ang. Amah khan boruak mak tak ken tel a nei a, a uap a na ka tih tawh kha. Mut hnu a a rawn haw chauh chu a lawmawm letling. 

Ka nu a rawn luh tak vangin ka ţhiannu nen a kan inbiakna chu ka ti tawp rih a, "In muhil thei angem?" ti a min zawtin Bawiha lu chu a rawn chul a. 

Dim deuhin khumah ka ţhu thla a, kan mut theih tur thu ka hrilh hnu chuan "Ipa Siama ka bia a, in pa hi i ţhen thei tak meuh ang maw? Nangmah chiah i ni lova, fapa i nei" a tih lai chuan lo pawt chatin "Ka thei ang" ka ti thuai.

"Ka thei ngei ang. Fa ka neih hma khan lo ţhen daih tawh ila ţha tur. Ka nu, ka khua a har miah lo, ka pasal leh a chhungte ngaihna pakhatmah ka nei lo" ka ti hlawk hlawk a, fa hial ka neihpui tawh mipa kha ka chhuahsan meuh chuan ka ruak ve huai tih chu ka sawi tel duh hran lo. 

"Ka pasal kha fel se chuan ka nu khan engtinpawn min ti se ka enliam thei ang. Chutiang bawkin ka nu khan ka thlavang hauh ve ţhin se, ka lam a ţan chang nei ve ţhin se chu ka pasal a sual viau paw'n ka tuar thei mai tur. Mahse chutiang chu a ni lo. An pahnihin min do rawn a, min ning tawh lutuk a awm luih tlat ngaihna a awm lo" ka nu kut vuan chung meuhin ka ţawng mawlh mawlh.

Thaw chhuak halhin a lu a bu zeuh zeuh a, "Ka hrethiam..ka hrethiam. Ipa Siama ka bia ang a, i let duh tawh miau loh chuan bungrua kan lak mai a ngai anih chu" a ti a, min lainat rualin a hah hmel takzet a ni. 

"I unaute hi an sual hauh lo a nia, i rawn lang thut hi an hrethiam rih lo mai mai a ni. Nangman i zir phawt chuan an insiamrem vat ang" a ti ta zawk a, ka kut a rawn vuan let ve a, min hnemna thu a chhakchhuak lo. Sawi tur a haihchham ve a nih ka ring. 

Hma taka thoin Siampuii rawng ka bawl pui a, Bawiha chu ka nu nen an in awm a. Neihkimi rawn tho chhuak chuan thingpui lum turin min hrilh a, kitchen island bula ţhuin phone a khawih nghal zat. 

"Thlum lutukin ti suh aw, a duh loh dana i siam chuan a hau hrep mai ang che" tiin Siampuii chu ka beng bulah a rawn phun sar sar. 

Thingpui ka siam zawh chuan pek tumin ka chawi phei a, "Zam, hei i thil min chahtir" tih lauh pahin min en mang lovin a ding thut. Kei lah a ţhutna bul ka thleng tawh si, ka thingpui no ken chu a rawn tauh bua a, thingpuiin a per ve rualin kei chu min buak nasa zual. No beng ka vawn ngheh em avangin no a tla keh lo hlauh.

"I va mawl ve, fimkhur ta che" a ti vin ţhat a, "Ka tihpalh lutuk" ti a a thawmhnaw ben fai mai ka tum laiin ka khawih duh lovin a tawlh hla. 

"I va che fel lo em em ve, hetiang chuan engtin nge pasal i neih theih reng ang?" min ti erh a, awmna mamawh zawk ka nih miau avangin chhan tinah pawh ka tin lo. 

"Siampuii chhuat nawh fai sa i ti bal vek a nih hi. I che phelh phung a, kha leh chen pasal nei tawh te chu chet fel viau zawk tur alawm. Nge i pasal te inah engmah i ti ngai lo zawk?" a ti deuh salh salh a, hrehawm ka tihna leh ka zahna chu a inchen vel awm e. 

"A thiam loh anih loh kha" mipa aw tih hriat zet rawn rikchhuah na lam chu kan hawi rual chiang viau mai. 

Choka luhna kawngka ah chuan an nuţapa kha a lo ding run a, meng zim deuh sun chung hian min rawn en a, "I lo tho ve tawh maw? Thingpui i duh em? U Neihkim nangpawh ka lo siam ţha leh ang che" ka tih zung zung lai chuan min en reng chungin kan dinna lamah a rawn pen phei pawk pawk a, min hauh let daih loh nan ka rilruin ka ţawngţai mawlh mawlh hial a. 

"Thingpui min rawn leih buak kher anih kha. Ka thingpui intur a siam peih loh viau te chuan sawi mai tur alawm" kan zawn a rawn thlen rualin Neihkimin min lo hek zat zat. A thil tih duh dan a naupangchhia phian mai a. 

"Ka hmu vek che u. Pha buai duh lo mai teh" rum deuh tak a tih pahin kan dinna ep chiahah a ţhu a, "Thingpui chu min lo siam ve la, che phelh phung nu" min han ti kher a. A hmel a nuihzatna lang chhuak lah chu tu tan mah hmuh hmaih theih a ni lovang. 

"U Neihkim i duh ve em?" ka ti dek dek a, "Duh lo" ti vin hlarin a ţhu tau sawk. 

"Siampuii khan min rawn siam sak rawh se. Hmangaihsang eng nge i hriat a? Min hmuh vek te chuan ka thiam loh a nih loh zia i hmu tel lo em ni? Kan chhungkua ringawt pawh kan buai tawk tawh. Mihrangin min rawn fin ve sek hi ka kham khawp mai" a ti hlak hlak. Hmangaihsanga lah chu a ngawi leh daih tawh sia, Neihkimi tan tak pawh tih ngaihna a vang khawp ang. 

Thingpui siam a amah hnungchhawn zawnga ka din tawh hnu te chuan min la enreng niin ka hre tlat pek a, a boruak ken tel ţhin bawk khan min uap leh khup tawh. Min en leh en loh chu Siamtei hnen a zawh tawp mai ka duh rum rum. Ka siam zawh veleh rang lutukin ka inher a, min en hauh lo. Neihkimi angin phone a khawih ve lo a, thawm ka neih rualin min rawn melh chauh zawk a ni. 

Nichin lawk khan ka thlavang a hauh ngei a, thil thlen dan a hmuh vek vang chauhin. Misual tak angin a lang lo na a amah hian daidangtu ban lianpui a keng tel tlat niin ka hre mai, kawmngeih a, pawh mai a har dawn riau niin a lang. 

Thingpui an in zawh chuan an bo leh vang vang a, ka pa khan zingah chaw an eirual ngai lo niin a sawi a, chu chuan ka awm a ti nuam deuh. Ka che chhe kher bawk nen; kan vaia chaw kan ei rual chuan ka zam dawn lutuk a ni. 

Ka duh lo dan deuhin thil a thleng a. Huphurh ruk ang ngeiin Hmangaihsanga leh Neihkimi te chuan kan rualin chawei dawhkan an kil ve a. Ka kawm nel ve ber Ruattei a awm lova, Zamtei pawh a chhuak lai ka hmu. 

Ka pa chuan "Zote, i graduate em?" min rawn ti a, zak ru deuh chungin lu ka thing. 

"BA chu a zir ve hman a, a graduate hman lo" tiin ka nu chuan min lo chhan sak a, lehkhathiam vek an nih hmel sia, hniam rawih rawih a in ngaih a awl khawp mai. 

"A inzir chawp theih tho a, a hmingin hospital kan nei ve a, mi te anga lian leh changtlung a ni hauh lo na a i thawh ve theih ka ring" a ti a, ka ţhu ngil awt a ni ber. Ka nu ka melh a, ani paw'n phawk hrain ka pa a lo en ran. A beisei aiin ka pa chuan a sawichhuak hma a ni mahna. 

"Receptionist pakhat a bang a, midang rawn dil an awm nual na a nangmah hian a ai i awh thei ang" ka pa'n a ti chiah chu Neihkimi thleng a ri rawk. Thlengah fian a dah sawk a ni ber. 

"MA an nih ngei ngei a ngai. Chu dan chu hospital dangah pawh an hmang deuh vek. Thawk duh an awm nual laiin graduate lo lehnghal hi i thawh tir thei lo ang" a ti bak hlar a, chaw lem a sak leh ţalh tawh. 

"In awm lai chuhin ka sawichhuak a, ka rawn lo che u. Hna rawn dil an awm pawhin thutlukna chu ka siam tur a ni" ka pa chuan a ti nghet charh a, ngunthluk fe a Hmangaihsanga min rawn en vang vangna chuan min ti zam chhe hneh hle. Neihkimi ang thoin tling loah min ngai ve anih ka ring. 

"Zotei hian fa a nei a, bungrua kan lak dawn rau rau chuan hnathawh tur ka sawihmuh mai a ni. A thawh duh leh duh loh chu ama thu ni se la, nakin zel atan a hminga hna vawn lai neih ve a ţha. I thawk anih phawt chuan midang hlawh lak zat ang thlap ka pe ve ang che" ka pa chuan a ti leh a, hna min sawi hmuh chu thawk turin min duh hmel takzet a ni. 

"I ti sual chiang viau ang" ti hlakin Neihkimi chu a tho tau leh tawh a, rin ai awlsamin hna ka hmu a, Pathian ka lamah a ţang a ni. Mahse, ka thawk ngam ngut ange maw?

An chhuah dial hnuah ka nu chu an chanchin ka zawt a, "Hmangaihsanga leh Neihkimi te hi doctor an nia, Zamtei hi chuan bazarah dawr lian ve tawk tak a nei. Hmangaihsanga hi paediatrician a nia, Neihkimi hi surgeon a ni thung. Remremi chu a dinhmun i hre vek ang a, Ruattei erawh hi chuan pawl12 pawh a zo lo. Nikum khan parlour hawngin bul a ţan ve a, eng nge maw a an zel dawn ni"  tiin min hrilh a ni. 

Ka pa'n hnathawk tur a min lo duh em em kha a mak hran lo. A faten hna an nei vek a, chutiang tur chuan min beisei ve a nih ka ring. Ka nu nen an in upat hleih ka tih tawh kha, a fate pawh Ruattei tih loh chu kei aia u vek an ni. U Remremi hi a upa ber niin Neihkimin a dawt a, Hmangaihsanga dawtah Zamtei, Ruattei hi tlemin a fal deuh. A fate a chher puitling vek a, pa fakawm tak a ni.

Bungrua chu kan la ta ngei a, ka than dan a mawi lo viau na a hrehawm tak a phuar hrep hnua zalen ang vel ka ni. Neihkimi leh Zamtei te min endan a la ngai reng a, ngeiawm deuh deuh a ţawng fek fek an ching. Ka nu'n ka thlavang a hauh ngam ngai lova, Ruattei leh U Remremi ten hrehawm ka tih an hlau viau thung. Hmangaihsanga erawh a la ngai reng, min be tam lova, ka dinhmun leh ka hun tawn mek chu a ngaihven ve lo na a ka thlavang hauh zauh a ching thung. 

Ka pa'n hna chungchang kha a la sawi awl lo a, ka nu leh ka fapa in nel phawt se tiin ka hrilh ţhin. Nilenga ka tello a a awm theih phawt loh chuan chhuahsan vang vang a harsa rih ang. 

Ka fapa chhuahsan ka hreh viau rualin ka nu hnenah hian ka awm reng theih ka ring lova, keimah vangin inthlahrung reng rengin ka nu a awm ang a, keipawh chutiang tho chu ka ni dawn. Hna thawh a, pawisa khawl ve bek bek chu ka tih ngei ngei tur a ni. Ka mal zia ka hria, thawh loh chuan pawisa a awm ngawt thei bawk si lo a ni. 

Ka pasal hlui kha rilruah a awm reng lo thei lova, thinrimin inţhen mah ila bungrua meuh han lak takah chuan khawharna in min tuam ve veng veng reng. 

Hringnun khawhar takah hian khawharna a piang ve lo thei lo a ni. Hnemtu mamawh apiangin hnem tu kan vai a, hringnun hi zawng palthiam a har a nih hi. Han hrethiam viau ila hringnun a ni leh dawn si lo. Hriatthiam lohna ringawt hian hringnun a ti famkim leh chuang bawk si lo. Khawvel hian hringnun chhia leh ţha a thliar thiam lova, chutih rualin hringmi te hian kan thliar thiam a ţul tho si a ni. 

Thla khat lai ka nute ka fin ve hnu chuan hnathawh tumin rilru ka siam ta nge nge. Neihkimi leh Zamtei ten an pawm thei lo va, midangin min phur pui viau thung. Chhia leh ţha ka thliar thiamna in thutlukna siam thei turin min pui a ni. 

Selna ka dawng nasa in mi ngaihah chuan uire ka ni. Mi min sawichhiat dan min rawn hrilh chak zek zek an tamin nitin chanchin ţha lo ka dawng a, ka beng ka chhu ngawng lui tlat. Selna ka inhneh tir zel chuan hmalam ka pan thei lo ang. 

Ka pa rualin ka kal a, hospital kan thlen ve meuh chuan mi an lo phu suau suau tawh. Thawk rei tawh deuh chuan hmel thar an han hmu thut chu min en deuh ha ha hlawm a, ka pa ruala ka kal vang a ni tel. 

Reception counter chu i duty na hmun tur a ni tiin min hrilh a, nu pakhat lo awm hnenah chuan ka hming te hrilhin a fanu ka nih thu a sawi tel zeuh a, chu chuan min ti hrilhhai letling viau a. Min zahpui miah lo leh min enhranna a nei lo tak tak chu mak ka ti zawk a, ka la tawn ngai loh a ni. 

"Zonuni ka nia" ti a a hming min lo hrilhin ka duty pui tur nu chu a nui zui var var a, sam a ţawn sang vah a, a vun a ngo hlung lo na a a nung nalh hle. 

Ka pa'n min kalsan hnuah pawh "Zotei i nia, kei Zonuni, kan hming bul a inang anih chu. Khuanu hian engti kawng zawng emaw takin min phiar zawm ve aniang" ti fiamthuin a nui hak hak a, a bula awm a nawm hmel khawp mai. 

Ka ţhut ve rualin "Pasal i nei tawh em?" min ti a, lu ka thing zet tawh na a "Fa chu ka nei" ka ti sep. Pa a nei tawh lova, Bawiha hi a pa in a rawn ngaihsak miah lovang. Kei chuan engkimah ka tel ve zel ang. 

"A ni maw? Kan va inang lehzel ve. Keipawh pasal ka nei lova, fa erawh pahnih lai ka nei" a ti hluai a, harsatna tam tak paltlanga tun dinhmun hi thleng a nih ka ring. 

A dar a min rawn nek salh pahin "Kan hming bulah Zo tih a awm ve ve sia, Zo thlawi kan ni mai" a ti pek a, a nui ring nasa mai si, min enzui vung vung tawk lah bo lo, nun a tih hlim phian dawn hi a. 

Receptionist in kan lo tih tur te min hrilh leh zung zung a, sap sikul a kal ve char char ka nia, pawl12 pawh ţha deuhin ka zo. Ka sapţawng thiam ve te chuan min puiin a thusawi chu ka man sawt ve viau a, a tihdan ka en nilen chuan ka thiam thuai ang. 

Chhun thil ei hun anih veleh Zonuni chuan eitur a chah a, an rawn dah har lo. Thil kan ei lai mekin Hmangaihsanga chu mipa pahnih nen an rawn inzui a, a hmelţha zet chu a langsar bikin ka nuţa ti a ka sawithei tur chu ka inchhuang ru hle. Mizo hian doctor kan ngaisang a, ram dangah pawh a ni tho ang. Mahse ramdangah chuan doctor aia pawisa la lut hnem an tam a, mizo in kan dah san ang hian an dahsang ve em em lo maithei. An hnathawh a ropui a, mi nunna chhan nan theih tawp an chhuah ţhin. Mi te leh milianin kan pan suau suau reng a, doctor hawihhawm leh thlei bik nei lova damlo bawihsawm ţhinte phei chu ngaihsan loh rual an ni lo. 

Hmelhriat loh ang a min enin min kalpel leh mai ang chu tih rilruk lai mekin counter zawn an thlen chuan kan lam a rawn hawi a, min rawn hmuh takah chuan a ke pen chu tawpin min hre ve ni awm takin a nui. 

Hospital a lo thawk ve ren rawn tawh Zonuni zawk chu a nuih emaw tiin ka ţhiannu thar chu ka en vat a, phawk tawkin min lo en ve tho. Zonuni chu nghawk sawk pah a "Enteh a nui nia!" tih tak hi ka nap a. 

Counter lamah a rawn phei a, min en ngur mai bawk si, kei hian tih sual ka lo nei leh ta em maw ni? Thil ei ti tui lo rawk khawp a ţawngkam dengkhawng a hman loh ka beisei. 

"A hrehawm i ti em?" a kut pahnih a counter rawn nam pah hian a ti a, chhan lawk nachang pawh ka hre lo.

"A hrehawm em a ti" tiin Zonuni lah chu ka beng bulah a rawn phun sep. 

A ţhiante chu zawng ru deuh chungin an chhuk thlak tumna lam kha ka va thlek a, Hmangaihsanga pawh a hawi let ve vut mai. An lo la nghak reng. A hnunglamah a ţhiante an awm a, a hmazawnah Zonuni nen kan awm. Zonuni a biak si loh chuan min bia tihna a ni mai. Hepa hi min hre ve angin a awm tihna anih chu. 

"Hrehawm loh e" ka ti ban charh a, ka awmdan chu atthlak tih hmel zet a min enin a ri meuhin a nui chhuak hawk. 

"Hna ka thiam leh thiam loh rawn thlitlai tum i ni em lovang chu tiraw?" ka lo tih leh chuan "Ţhatna i dawngsawng thiam hlawl lo a nih hmel" a hmel a nuihzatna la chambang chung hian a ti a, nurse pakhatin a rawn biak takah chuan a awmdan siamremin pangai deuhin a lo chhawn a, doctor coat var thianghlim sar mai a hak te chu a inhmehin a ti lang pa lehzual. Ka unaupa hian hmeichhe tam tak a hip ngei ang. A nihna mai bakah a landan thleng hian. 

Min kalsan nghal mai dawn maw ka tih laiin "Kan ţhat lohna a langsar a, kan ţhat rukna a tam zawk. Chu chu hmuh theih turin lantir ang che" a ti fak fak a, a thusawi awmzia chu ka hrethiam lutuk ringawt. Neihkimi mit tlung tur a ka thiamna leh theihna te lantir ve turin min duh a ni. 

A ţhiante chu va zawm lehin inhnuai lamah an chhuk thla a, hmuh phak loh a an awm rualin Zonuni'n min nam deuh sawk a. 

"Awii..khapa kha nurse hoin an duh thei tehmai nia, ţul tawpah lo chuan a rawn chawl ngai miah lo. A farnu tak tak i ni lo tiraw? An chanchin hre tam viau lo mah ila an chhungkaw zat chu ka hre ve, hmanah pawh kan pu ber nupui neih chungchang hi an khel sup sup tawh" a ti nghal mawlh mawlh. Chuti anih chuan a thawk rei tawh viau a nih dawn chu. 

"Ni lo e" tih ringawtin ka chhang a, a rukin ka lawm ru veng veng. Hman aţanga ka lo chak ve  ţhin nuţa te hnen aţanga ngaihsakna ka dawng ve ta niah ka ngai a, min fuihna thu chhum bung tak kha ka hrereng tawh ang. 

"Chupawh nise a nuam tho ang. Amah duh ru ve tute paw'n 'ka bialpa a nih loh pawhin ka unaupa tal nise' an ti fo alawm. A bialnu i hria em?" zangkhai vah a a tih chuan "Hre nang..anni ang rual tawh te chu chhungten an ngaihzawng kan hriatpui kilh kelh hleinem. An rawn hruai te anih ngawt loh chuan" ka ti deuh duah. 

"Ka hria asin" intithei zet a tih pahin nui var var chungin a mithmul a ti kang auh auh a, a va han chhe reuh tak. Nuih te lam lam a ti za. 

"Hre mai mai teh" tih liam puatin kan ei ruahna ka khawm a, kan ke bul a bawhhlawh bawmah ka khung sawk sawk. 

"Malsawmi a nia, nurse niin hospital ah hian a thawk ve. Nu nasa zet mai mawle, a duh zawk tak tak a ni. Awii...ka ţawngtheih zia hi tiraw?" a'n ti leh rih a, "Ka hre nang" nui hak hak chung hian ka lo ti a, rilru a la peng e ka tia, ka lawm viau zawk. 

"Mipa hmelţha leh chhe lo deuh hian bialnu chhe deuh an nei duh an tia, mahse Malsawmi chu a hmelţha rapthlak. Chapchar kut miss te pawh lo ni ve tawh a nia, a nasa tih mai loh chu sawiselna tur a awm lo" a ti zung zung a, hnathawh pahin a ti ti mawlh mawlh a, lehkha rawn dah tute biak an ngaih leh a be leh zawk ţhin a, min hrilh pah zel chungin keipawh min tih tir ve. Rin aiin nuam ka ti daih a, in a awm a, suangtuahna ram a chen veng veng ai chuan a ţha hrim hrim e. 

Zan lam duty tur an rawnkal hnuah haw tumin ka intintuah ve a, "Thlah i ngai em?" ti a Zonunin min zawh chuan a ngaih loh thu ka hrilh. Min zirtir reng rengin a buai nileng ve ţhak a, inthlah haw tir lehzel chu a zahthlak lutuk. 

Ka pa ka beisei ngam lova, a haw daih tawh ka ring bawk. 

"Khatin hawi vual vual suh" hnung lam aţanga aw thum zetin a rawn tih chuan ka lehhawi a, Hmangaihsanga a lo ni. 

"I la haw dawn lo em ni?" ka tih chuan "Dawn e" a ti ţha ve mai a, a kekawr ipte chu zen ruk rukin chahbi a rawn phawrh chhuak. 

"Ka pa a haw tawh a" fan ruih a tih pahin chahbi chu a kutţanga dahin a vaivir kual vel a, a chetdan naupangchhia lutuk chuan min ti nui tawp. 

"Taxi hman tur a awm mai ang" ka tih chuan "Ka rualin haw rawh" a ti chhuak phawng a, "Hmangaihsang" ti a hmeichhe pakhatin a rawn koh takah phei chuan min rawn hnaih sauhin "Ka rualin haw rawh" zawi supin a rawn ti nawn leh. 

"Hmangaihsang ka nghak ve vang vang che a, ti nge engmah sawi lova i kal daih?" hmeichhe hmelţha takin min rawn hnaih zui nghal ruak a.

Kan hmaah a rawn ding a, Hmangaihsanga nen a kan lo awm dun chu a lawm lo tih hriat takin huat hmel zetin min melh a, hmelma neih ka duh hauh  lo. Hmangaihsanga chu ka din hlat rang hle. Zonunin min lo hrilh sil tawh bawk a chunu chu a bialnu a tih ngei kha anih ka ring. A hmel a ţhain a sang a, a taksa a inphut mawi mai bakah a vun a ngoin a paw phek a, a hmui sen no chakah chuan engmah a hnawih lo tih a hriat. Makeup a inbel nasa lo viau na a a mitmeng rum tak chu a fiah kak mai a, tur zetin min melh khai khai lo phei se chu nalh ka ti viau ang.

"Henu hi tu nge?" min ngaina lo tih hriat zet a min melh chung hian a ti a, min kawk pah va bawk. 

Hmangaihsangan "Ka" a ti hman chiah tihah "A unaunu ka nia" tiin ka lo inrawlh. Chunu chu a ner nang a, "A unaute ka hmu vek tawh. Ee..U Neihkimi'n nuthlawiin naute nen min rawn fin a ti tak" intithei zet a tih pahin min rawn din hnaih leh kher. A ţawngkam chuan na takin min chhun a, ka hmelah a lanchhuah loh hram ka beisei. 

"Tunge i nih? Hmangaihsanga te chhungkua hi engvang chiahin maw i fin?" chiang kek kawk a a tih chuan "Duhtawk rawh Malsawm" Hmangaihsanga chuan a lo ti bul hmuk a, a aw chu a zawi viau na a a hlauhawm takzet. Car chahbi mai mai hmanga min intihtheih khumtu kha a ang tawh lo. 

A hmel a rum ul tawh a, mitmeng thim khup a Malsawmi chu melhin "I tel ve na tur chin hre rawh" a ti nghut a, keimah avanga an inhauh vak hlauin rang deuhin ka kalsawn. 

Min rawn umzui ka hlau a, chak deuh a kal hlawk hlawkin taxi rawn tlan remchang ka phar a, taxi a tlanchhuah tawh hnuah pawh hnunglam ka la hawi zui hram a. 

Malsawmi kha mipa in an hne ngawih ngawih tawh hnu pawh a umzui hram hram ching a ang lo. Chutiang ti tur chuan a hmelţha lutuk a ni. Umzui tu tam tak a neih zawk ka ring. Mipa umzui ţang ţang mi anih chuan chu mipa chu a atchilh nasa hle tihna a ni ang. 

Mihringin hmangaihna kan thlir dan a inang lova, inpumpekna, a hlimna tur a thlah zalen ngamna, hmangaih luat vanga ţhen phal lohna. Heng hi hmangaihna huangah kan khung ţhin a, dik ber erawh ka hre lo. Mihring kan inang lo ang bawkin hmangaihna kan thlir dan pawh a inang lovang. Atchilhna leh hmangaihna thliar hrang thiam miah lo an awm bawk a, min duh miah lo tu kan duh tlat a, tlawm leh zah dawn lo lek a kan umzui ţhin hi atchilhna a ni. Kei chuan hmangaihna huangah ka khung ve thei hlek lo. 

Nih leh ka pasal hlui kha ka hmangaih em? Ka ngaihtuahna avang chuan inthiam lo deuh hian ka ţhu ţha sat sat a, ka luin seat nghenchhan ka tauh dawt. Ka thawmah chuan driver pawh a rawn hawi zawk nghe nghe. 

Hmangaih lo ila kha leh chen hrehawm ka tuar dawn em ni? Nge ka baihvai lutuk vangin khang zawng zawng kha ka tuar zawk? 

Let leh duhna ka nei em? Teuh lo, thih hrehin ka hre hial ang. Ka ngai em? Tlem te chauhin, chupawh amah ka hmuh rualin a bo leh vek ang. Thlakhlelhna ka la nei em? Pakhatmah a awm tawh lo, zan mutnaa min kuah ringawt pawhin ka kham. A thinrim loh nan ka dawh mai mai a ni. Hmeichhe tam tak kuahtu kut kha ka ten tlat. 

Ka thinlung a ti na em? Lutuk e, tam takin. Kan hmangaih miah loh te hian kan thinlung an tihnat theih leh theih loh ka hre lo. Ka nu khan min ti na ngun mai, mahse ani pawh nu anga ka pawm thlap vang a ni. 

Mihring hian hmangaih pakhat kan neih hnuah hmangaih dang kan nei leh thei em? Ka hre lo, ka pasal ni lo mipa dang hi ka nunah ka la lut leh thei angem ka hre lo. Tunah chuan mipa dang ngaihtuah thei ka ni miah lo bawk. Ka fapa nen a kan nakin hun tur chiah ka ngaihtuah. School a la kal ve ang a, pawisa ka khawl ţang ţang loh chuan keimah ang bawk a retheiin ka siam ang. Chutiang a thlen chu ka duh miah lo. Pasal nei tawh lo pawh ni ila a pawi hleinem, fapa ka nei a, min enkawl tu tur ka nei tawh alawm. 

In ka thlen chuan min lo ban nghal ruai a, nghet deuh a pawmin a luah ka fawh sak zauh a. Ka fapa aia pawimawh an awm lo. Ka nu leh paten chanchin min lo zawt a, kimchang deuhin ka chhang. Ruattei chuan min lawmpui zia min hrilh a, U Remremi chuan min rawn melhin "Hmh"  tih pahin kut a kuangkuah a, a hawisawn hmak. Hna kal tur min chei a tum a, ka lo hnial vang a ni. 

Inthlak tur a inchung ka chhoh paw'n Bawiha ka hruai zel. Tunah chuan diaper hren an phal ve tawh a, hrentir lo ţhang ka nih avangin ka lo theihnghilh fo zawk a. Neihkimi leh Zamtei te an ang nasa thei hle a, inchhung a tih hing thu sawiin diaper hrentir reng turin min hrilh ţhin. A ute pahnih ang chiam zel chu a ning deuh nge Ruattei hian diaper rawn lei haw a ching a, 'Ka lei ve thei' ti mah ila 'Keipawn leina ka nei, a hmang zo zel a, lei reng a ngai alawm' a ti mai zel a, Bawiha ta tur anih phawt chuan lei char char a inhuam thu a sawi fo bawk. 

Bawiha chu apiin a lo hrai leh a, a kawr awm a berh luai mai. A thawmhnaw ka thlak lai mekin ka pindan kawngkhar chu tuemaw hian a rawn kik karh karh a. Ka pawh hawn rualin mipa lian tak nen kan inhmachhawn leh run tawh mai. 

Min ţhawng deuh viau mah se "I lo haw tawh a ni maw?" ti a ţha deuh a zawh paha dak deuh chunga ka melh chhoh ha lai chuan "Thupa chawi nan" tih leh diaper pack lian pui rawn lek chhuah a rual a, ka lo ngaihtuah lai mek mekin. 

"Aww..Rawn lei kher a ngai hleinem" ka ti mawi ve. Mihring chu an fel poh leh inthlahrun a na. 

"Thupha chawina ka tih chu" aw thum leh zawi tak hian a ti a, mitmeng hriatthiam harsa zetin min melh pah bawk. Hepa hian a laizawnte pahnih min tihdan avang hian min khawngaih nge pasal ţhen tawh ka nih vang zawk? Nge a laizawn ve tho ka nih vang? A sawi loh chuan ka hre dawn hauh lo na a min khawngaih a nih ka ring. 

"Nih leh ka lawm e aw" pangai deuh a tih pahin diaper chu ka la a, lungawi hmel fe a a kal tak kha. 

Malsawmi avang khan nuam a ti chiah lo anih ka ring. Chupawh chu lo nise thupha chawi nan a diaper han in leisak tawp mai chu leh. A dangdai viau na a kan mamawh lutuk alawm. 

CONT..