THE GOOD, THE BAD AND THE OTHER-13

THE GOOD, THE BAD AND THE OTHERS-13

MUANKIMA

"Lehkha i zir em? Vanneihi chu a ţhiante an rawnkal a, tlangval lianpui, â buang chiin a phur. A rukin ka enthla, an ţawng pawh ka hre vek" ka nu'n a rawn ti zat zat. Mi chanchin hre chak reng reng a a khawsa ţhin leh a sawi peih lutuk hi a buaithlak a ni. 

"Thu ho mai mai sawi turin min rawn be suh" ka ti nghut. Ka duhzawng min duhpui lo tu lak a awki nem hman ka ba lo. Ka nu pawh ni se. 

"Lalmuankim â miah suh ang che. Saruaka a mu lai video i hmuh ve vek kha. Mi zawng zawngin an hmu a, a zahawmna a bo vek tawh. Kei pawh ka tel, ka ngainat ţhinna leh ka dah san ve na a bo vek" a ti bawrh bawrh. 

"A mak ţhin..mi fate chhiatna hre ran lovin i fanu kha veng ţha zawk rawh. Engpawh sawi la ţhen ka tum lo" ka ti fak fak. Mi min ngaihdan tur venthawn vang maiin hmangaihna ka dah tlawm lovang. 

"Han nei chiah la a uire reng mai tur asin. Lehkhazir ţha la, nupui ţha deuh nei rawh. Vanneihi chu a zahawmna a bo vek tawh, nupui tlak a ni tawh lo" a ti khawl khawl a, ka chek tlak tlak.

"Hmeichhia ve tho i nih kha, kei aia hrethiam zawk tur i ni. Ka rawn haw pui khan i lo hnem ka beisei a" za lo deuhin ka nui zui hawk. 

"Hmeichhia ka nih vang alawm ka hriatthiam theih loh. Hmeichhia zawng zawng a ti mualpho. Mi zawng zawngin a taksa chhungril ber thleng a an hmuh tawh hnu kha mo atan ka duh miah lo a nia, hrereng ang che" a ti hmak. 

"Ţha famkim viauah in ngai suh" ka ti leh nghut. Ka nu chungah hian ka lawm lo takzet. 

Ţha famkim a a inngaihna tak hi a famkim lohna a ni. 

"A ti â zo vek tawh che anih hi. Ka damchhung chuan i nei lo ang" a tih veleh "I thih hun ka nghak mai ang" ka ti hmiah. 

Pookie hi ka nu aiin ka thlang hauh lo, ka nu vang a ka hmangaih hloh ka tum lo bawk. 

"Thu ţha reng reng sawipui theih miah loh mai. I zirlai kha zo la, ram dangah ka dah dawn khawp che. Mizoramah ka awmtir reng lo ang che" tiin min vau pang pang. 

"Khawiah pawh awm ila ka ţhen dawn lo. Nangpawn chu chu hrereng ang che" ka ti hmuk a, a thin a rim khawp ang. 

"Vanneihi aia i pawl sang hret hi a ţhatna a tam tawh khawp mai. I pa'n coaching kalna atana ţha tur ho a enkual ţan tawh a, Aizawl leh Kolasib ah chuan i awm tawh lo khawp ang" tih leh phone dah a rual. 

Thaw chhuak hawkin ka hmai ka tuai puat. Zirlai bakah neuh neuh dangin min ti buai ve reng. A hahthlak khawp mai. 

Ka zirlai bu ka melh ngur ngur a, ka nu khan Pookie tan a hriat nuam lo a sawi loh ka beisei. Ka sawichhuak hran ngai lo na a MA satliah nih ka tum bik lo. UPSC (CSE) exam hmachhawn ve ka duh. Hunawlah zirlai chauh ni lo lehkhabu ţha ka chhiar ve nasa. Mizoram a zirna ka dah hniam tihna ni lovin tun a ka hriatna leh thiamna ngawr ngawr hmang chuan ka inziah tlin hmel loh a, coaching kal ve te a ngai ang. Vawikhat na a tlin nghal phei chu ka beisei miah lo, ka bei ţang ţang mai aniang chu. 

Hei tak hi min tibuai tu a ni. Pookie hi kalsan ila engtin nge a lo awm ang? Thil ho te ah a buai chhe mai zel a, naupanlai aţanga min rin lutuk vang a ni ber ang chu; engkimah min hmatheh. 

A nu khan naupang ka nih lai aţanga ka puitlin thlengin thu ngai hlir min hrilh ţhin, "Engpawh thleng se ka fanu hi kalsan miah suh, veng tlat ang che" tih hi a thusawi ngun ber a ni. A thi thut dawn tih hria ila chu a thih hma zan khan a rilru hahdam nan ka intiam nawn leh ang. 

Cabin kawngkhar an rawn kik karh karh a, ka hawn chuan Pengluaia pawmin ka putea a lo ding. 

"Ka nei tawh lo i ti sia" tih pah a lehkhabu ka rawn lek chhuah zauh chu ka lo ban vut. Indian Polity a nia, ka pindan a tihfai ţum a ka nu'n a dahţhat lutuk na lamah a dahna a hre tawh lo. Nu mawl mang ve mai a nia, ka pindan a lehkhabu awm mai mai a hmuh chuan ril deuhah a dahţha ţhin. 

"Lo lut la" ka tih chuan "Min sawm lo mahla ka lo lut tho ang" a ti ve zat a, ka nui chhuak hawk. 

Ka lehkhazirna bul khumah ţhatchhe zetin a ţhu a, a malchungah Pengluaia a bawk vung bawk. Ka pute Nicky-a hi a tleirawl chhuah phat aţanga tun a ka kum ang rual anih thleng hian a sual ve ţhin viau niin an sawi. Naupanlai aţanga ka chung en a nia, a ţhatna chauh ka hmu hi ka ti fuh a ni. Baw raw deuhin ka chhuah loh phah. 

Midangte ţhatna lai chiah kan en chuan keini pawn hlawkna kan neih phah ve ţhin. 

"I lu a va buk ve meh a ngai anih kha. Nawr kawlh la, i ţhiante rawn haw i lo tih ţhaih dawn lawm" a tih chuan hahthlak ti zetin ka en ngur. Lu kawl avanga chhe ta viau turah min ngai em maw ni. 

"Hmeichhia hian chhia min ti ngai miah lo" fiamthu deuh a ka tih chuan nui hawk chung a "Aaa.." tih pahin ka ban bulah min rawn hnek. 

"Zak chem chem rawh Muan mawng khu vut vut" a nuih a la zat viau laiin "Khatin mi ko ziah suh" ka ti hmuk. 

Ka naupan laiin ka kekawr mawng a kâng a, a alh loh hnuah a khu vut vut. Kekawr ha chhah hlauh lo ila chu tu hmeichhia mah ka beisei ngam lo ang. 

"Hmelţha vung siin i mawng a vuai hnup lo chauh anih kha" tiin min la chhaih zel.

"Nupui i nei dawn lo em ni?" ka ti chhuak khawl thung. 

"Ka hre lo le..i pu damlo na â lah hian 'khaw nge ka tupa, khaw nge Nicky-a fapa kha?' a ti leh ruai ţhin a, ka chi thlah khawl a expire ţep tawh tih a hre der lo. Nupui ka neih loh zia hrechiang bertu in 'i fapa' a tia, a zawng chiam reng ringawt" a ti hluk hluk a, a nuihzatthlak rualin ka pu chu a khawngaihthlak. Keini lo chuan an khawngaih kher lo ang. 

Police pawi a sawi a, jail a tang reng. A rawn chhuah hnu hian a hrisello chho a, a nat zual phei chuan a â ruai zel. Ka pi thi tawh tho leh a min ngaih chang te a nei a, 'I sam i bawk tawm em ni' ti a ka lu dap kual ruai chang a ngah. Ţumkhat hospital a ka riahpui pawn amah rawn kan tu te hriat laiin pawisa ru ah min puh a, min hmu ngai lo ţhah an nih avangin min en chik a, an pawisa bag an veng uluk hlawm hle. Nu upa lam ho phei chuan an bag an pawm bet ţung. 

Ka pu aţangin kut tling lo a pawisa lakluh a hlut loh zia ka zirchhuak. In enkawlna tur pawisa a ngah, na a tuar reng thung. 

"I taksa i uluk bawk a i nalh tawh hle mai. Ei leh in fimkhur tel la, taksa nalh deuh nei chung a kawţhat loh te hi a mawi lo bik a, i pile te a lo ţhat loh palh paw'n a pawi tho ang. Kan ţhianpa pawh hi a pile a ţha lo a, 'nurse hmelţha deuh deuh hmaah mawng hlim kung kung reng a ngai a' a tih kha. I ke thlengin enkawl uluk rawh, taksa a tihrawl nalh deuh a inphiar sek ţalh chung hian i ke tin a lut ang e, jection i hlau lehnghal" a ti duah. A va han ţullo e aw..a nui duh mang si lo a, sawi tur ka hre ve lo. 

"Tak a pute, video chungchang kha" ka ti zawi sup. Zawh reng nuam miau hek lo le, ka zawt ngun viau thung. 

"I rinhlelh ber kha a thi tawh. Lucky hian mipa dang a hnaih vak lo anih phei chuan kut ringawt aţanga a ti tu hriat a har viau ang. A hmel a hmuh theih loh a, a ban kha a ni mai a, tattoo leh ser, hriat theihna tur a nei bawk si lo. Tete-a takngial pawn tihngaihna a hre vak bik lo. Phone number thlengin kan chhui vek tawh, resort a kal ve te kan enthla zui vek bawk a, rinhlelh turin an awm lo. A ti tu man chhuah phei chu a har khawp ang" a ti a, beisei ka lo nei sang hman viau asin mawle. 

"Kha mihring tlaktlai lo lutuk kha ka thah hmain a thi a" lighter rit nelh nulhin ka chal a rawn deng nghal dawt. 

"Tualthattu nih ai chuan tuai daih mah la pawi ka ti lo zawk. Lehkhazir chiah ngaihtuah la, Cookie pawh a tawk chauhin ngaihven rawh" a tih chuan "Cookie?" ka lo ti nawn ve sup. Chhang kan keih ang hian a thawiin ka kut ka keih lem lem a, chhang a sawina a nih leh nih loh zawh ka tum vang a ni.

"Cookie..i bialnu anih chu ka sawi Muan mawng khu vut vut" a ti hluk. 

"Pookie, P for Pretty" tih zawngin ka hrilhfiah. Pookie a hriat hlim aţangin a hresual ngar ngar tawh. 

"Cookie ti mai mai teh. Cooker ah inlet thuai bawk se la, lo ngai reng rawh, in inneih hnuah a la phit dawn khawp. Zing leh tlai chauh ni lo nileng a phit chang te a nei ang" a ti ngul ngul a, "Chutiang hmeichhia a ni lo" tiin a thlavang ka hauh.

"Tak taka engtin nge a awm tak zel?"

"Kolasib ah a awm, class a kal zawm duh tawh lo ang" a lo chek tlak. 

"A ti tu tal zawnchhuah sak thei ila ţha tur. A lainatawm reuh hle mai" a ti ve mial. 

"Chuvang chuan lehkha ka zir nasa zual" cigarette bawmin ka hmai a rawn deng leh pawp. 

"A lehpekah chuan hei hi a ni tawh ang aw fimkhur rawh. Hmeichhia a tuiral pur pur rual ila ni lo" a ti khur khur. Phone hlai hlup chu min kawh nan a hmang bawk. Ka ţawngsual leh chuan phone in min vawm tawh dawn tihna. 

"Ka rawnkal chhan tak zawk chu i pu rawn hmu turin ka duh che. Kan pahnih chauhin kan awm a, a khua a har ve. I nu hi a la hel tlat a, i pu hmu tur a hmin dan i zawng bawk dawn nia. Nakin a a inchhir loh nan vawikhat tal rawn hmu rawh se" thutak deuh zawk hian a ti a, kan chhungkua hi mi ngaih ang a tluangtlam a ni miah lo. 

Pengluaia hnutchhiahin ka putean min haw san. A haw hmain a hmelhriatpa kha chhui zui tir zel turin ka chah nawn leh. Ka zawn hmuh hma chu ka beidawng lovang. 

"Lalmuankim, Kolasib ah hian eng nge ka tih i hria em? Ar ka puah zo chiah. Ka mi enthlak te lahin min enthla zawk emaw tih tur a ni. Gabriel-a leh i Poopoo-i te an inhnaih hle tih bak hriat ka neih lo. Saw a nuih har har saw" phone aţangin Vulmawii a rawn phun ser ser. 

"I fel e, Pookie kha ka ring tawk" ka ti sup. Thikna a ri chhuak tel em lo ang chu. 

"Ka hrethiam lo, Gabriel-a hian Josephine kha a duh hmel thei em em a, tunah lem Lucky a ngaihven leh hawrh a" a rawn ti hlar a, ro zetin ka nui suk a, Vulmawii erawh lungawi lo zetin a thaw ham ham. 

"Ka haw vek. I Poopoo nep-i hi ka hua a, Gabriel angel suak-a pawh hi ka hua. Beisei nei turin min siam a, min hre ngai lo ang hmakin a awm leh a, i Poopoo nep-i pawhin keimah ang bawkin a ti ve ang. A kuah vel a nia aw" chu thil chuan min run zual hle. Hmeichhia ang a a en thut chhan hi ka hrethiam lo a ni. 

"Ka rawn let dawn..an bulah hian ka awm peih tawh lo. Mateo hi chu ringhlel duh suh, Nu pakhatin a ankhum hrep pawn a ngawi duk a, thi suk a nei bawk. Pastor tupa a nia, a putea pawh pastor tho. Mawl viau mah se a piangthar ang" a rawn ti. Ka nui tawp. Henu te reuh hi a landan ang a ni miah lo. Kei hian ka hrechiang ber maithei. 

"Mawh Muankim engtin nge ka awm dawn? I bialnu i ngaihsak leh lutuk na lamah hrehawm ka tawrh phah anih hi. En miah lo in ka ţhu a, an pa ber malchungah ka ţhu hnawk lehnghal, ka ngheng nghal chawrh bawk nen, a kâ aţangin a rawn ri awk a, tlem a tlemah putar ka ţhut hlum lo chauh. Ka zak lutuk tawh, ar ka puah phah zui a, hrehawm ka tihna hi 100% a ni tawh aw" a rawn ti tan tan. 

"An zingah khan awm rawh. A lahlawh a peih loh san lo turin ka hrilh chian viau che kha" ka ti hluk. A thaw ri zui hak a, a mitmeng a ling leh hlar tawh ang. 

"Gabriel-a lah Josephine chungchangah thudik hria ni awm takin min  dawp tir a, mawl min ti rapthlak a nia aw, i thluak a leng bo min ti duh lek a. Awi..nangmah vang hian zahna ka tawk hnem tawh lutuk" a ti zat zat a, a vin hlar bawk. 

"Nail polish ka lei ang che"

"Chutiang ka duh lo, hmanni ah pawh 20 man chi anih kha min lei" ka nui hawk. Fiamthu a ka thil leisak avang khan kar khat chhung min be duh lo. 

"Pookie khan hrehawm a tihna turin awm suh aw" ka sawi zawh rual deuh thawin "Khawngaih ve tho mah ila ţawngkam mawi leh nem ka hmang duai peih kher lo. Chutiang chu keimahah a bet ve lo, han tih duai duai hi ka zak tlat ka peih lo bawk" a ti hmak hmak a, a phun nasa viau na a Kolasib a awm rih turin ka hneh thei hram. 

Cafe a chhoin eitur ka lam nghal zat. Ka nghah laiin message ka check a, [I tel ve si lo a nuam ka ti tak tak lo. Mahse, keimah vangin an rawnkal vang vang a, ka hlim tho] Pookie hnen aţanga ka dawn a ni. 

[Tiang hun chiah hi damlai thla ţangkai ve hun] ka ti a, chhan dan tur vang miau hek. Ka hmangaih a, ka pha lo. Mahse sawi tur van chi ka ni ve a, google mai zel te ka duh. 

[Lunglen ve lai a damlai thla sawi te chu a! Ka rawn be ve hram hram che a, i ţawngkam thiam lo hi cute tih miah loh chang ka ngah] a message ka chhiar rual chuan a hmel awmdan tur mitthla ah a lang ruai thei. Ka â deuh huih tawh anih hi!

[Kha cute deuhin ka damlai thla a rawnkal] ka ti ve zel. 

"Lalmuankim ngati nge nangmah a i lo nuih vur vur a? Mi â hna anih kha aw" Nu Hlimi aw ring leng lawng chuan thil tak takah min hruai. 

"Eng maw? Eng maw Nu Hlim?" ka hawi kual pah thuak a, awm an awm ve nual. Aw thian kharhin ka inla mi tak lui a, Nu Hlimi tum bur chu enin za lo deuhin ka ţhen suk. 

"I phone ah khan eng nge awm? Mahni a nuih ruh ruh te chu zanah phei chuan hmu che ila ka hlau ngawt ang" a tih lai mekin dawhkan a ka phone dah a rawn êng.

"Awii..Muankim, tlangval pui si ngati nge i phone screen ah zawng nui lai a lan a? A hmui a la hnawih sen em em zui a, lehkhazir char char ang che. Thil dangah i lak tlak hlawl loh" a ti thlawt. 

"Tu emaw video vangin a â zo tawh a nih kha" Bza ţhutna lam ka hawi nghal vut. A nui hmel ka hmuh rual chuan nghet zetin kut ka hum ruh a, Pookie a nuih sawh hi ka ngaithei hlek lo.

"Eng video nge i sawi?" ka tih nghut rualin Bza hliah turin Nu Hlimi a ding. 

"Midang tan a hriat nuam lo an sawi ngai lo Bz, Muankim nangpawh a daih hmain ei vat rawh. I ei loh chuan ka barh lui dawn che a nia, in melh rawm rawm vel lo mai teh u, buaina in siam chuan ka phuar kawp ang che u" a ti tan tan. 

"I hriat kha Muankim, a tlan bo zui daih a ni lawm ni?" Bza bawk a ni. Amah vang a midangin Pookie an ngaihnep lehzual dan tur ka ngaihtuah a, ka sa phat mai. 

"Ka nau chu nise ka chenpui duh tawh hauh lovang. Khatiang hmeichhia pawm leh thei chu an dik bik lo tihna a ni mai" a ti a, ka lo ner nawk. Mipa thu khel atan chuan a ho mah mah. 

Nu Hlimin min rawn melh a, a rilru nawm nan eitur awmna bowl ka chawi kang zauh. Nu Hlimi te bungrua a chhiat loh nan leh buaina ka thlen sak loh nan chiah a inthunun ka ni. Pawn lamah chuan ka hre bik lo le.

A zawmna aw

LUCKY

"Vulmawii khan ar a puah zawh tawh chuan helipad ah han leng rawh u. Kan veng a hmun nuam ve ber a nia, chawlhni tlaiah phei chuan an tam thei lutuk" Mateo Nutei chuan a ti siam siam a, inrinni chauh a la nia, keipawn kal ve dang an awm lo turah ka ngai. 

"A thu hrimin amah chiah in tih tir a, pui ve ta che u. Matai va pui rawh" Mateo puin a tih chuan "Matai mi ti ve ziah suh. Mateo min ti mai rawh" a lo ti hluk. A haw ve khawp mai. 

"Ni e va pui rawh Matai" Gabriela chuan nuihza aw zetin a lo ti ve zauh. 

"Keimahin ka ti vek ang a ti pang pang a nih kha. Puih tum mah ila min ţawngkhum erh ang a, puih a duh chuang lovang" ti hluk hluk chungin Vulmawii pui turin a kal tho. 

"Biaktea khan rawn sat se la, puah bak chu an thiam ve vak lovang. Kg3 lai a nia, duh leh an ei tur a hawn ve ang a, kan ei seng chuang nang" Mataia nutei chuan a ti leh zat zat. Kan thaw huai hlawmin ka ring. Sa eiduh vek mah ila buaipui vel hi a peihawm vak loh. 

"I mawl em ni? Ar hmul pawt ta che ka vun piai lovin" Mataia ngei chuan a ti vin ţhawt a, a ring khawp mai. 

"Min pui suh ka ti ka tia ni lawm ni? Ngati nge chawhtawlh chhung i rawn zen luh ve sek? I vun ka piai duk vek nghal loh" Vulmawiin a ti khar khar a, amaha ar puah a tum tlat aţang khan lungawi lohna a nei tih ka hre tawh.

"I ţawng leh chuan ar lu ka hmuam tir ang che. A hel hian i hmuam tut mai ang" Mateo chuan a ti let nek a, intiam rual ang hrimin an ar puahna lamah kan phei hlawm a, an lo inmelh rang nasa mai. 

"Ka peih tawh lo" ti hlakin Vulmawii chuan chawhtawlh tui a beng per sawk a, hmai huh hluamin Mateo a chhing sawk. Vulmawii pawh tui chuan a per ve tho, a lungawi loh em avangin engahmah a ngai lo. 

"Lalvulmawi" sehchilh zet a tiin Mateo chu a meng ve ta nge nge. A che phut a, tuman kan dang hman lo. A pu in hlauthawng taka "Khaih" a tih chuan Vulmawii a kuah bet tlat hman tawh.

"Khanglang che chuan ar tui thang min ben per vel chu le" a ti a, ar lu ngei mai chuan Vulmawii hmai a nawr nawk nawk. 

Vulmawii a phar kual ruai a, leiah a ţhu thla hnawk tawh bawk. A hmui a chip tlat a, a meng tawh lo. A ner nasa hle bawk. June leh apu in Mateo pawh hran an tum a, Gabriela chuan "A ei tlak tawh loh ang a" a ti duh lek chauh. An inchai vel chu hmuhnawm thlir tak a thlirin a nuih hawk hawk reng. 

"In inkuah nghet eee..Vulmawi nangpawh Mateo ban kuai bet ve ţung lo la, kan pawt hrang thei hleinem cheu" June paw'n a ti ta hlak hlak. 

"Umm..a ţha e. No-i rubber va zawng teh" apu in a ti hluk ri pawh chu hria angin a awm lo.

"Ka nawr huh ve hluam che ang a ni mai alawm" hah hmel zet a tih pahin Vulmawii hmai a la nawr kual. A na tawh ngawt ang. 

A nutei chu rubber sen kengin a rawn let a, Mateo pu a pek veleh lo pawtfanin "Tawp rawh ka ti ka tia ni lawm ni? Puitling inrawlh tawh hnu pawh a thuawih duh hlek lo mai. Thlah rawh..thlah rawh" ti mawlh mawlh chungin Mateo biang leh beng vel a perh pawp pawp. 

Mateo chuan thlah duh mai lovin a lu a thing leh nawk ţhin a, a thip dawn lutuk a ka hriat avanga ka ner nang nang laiin June leh Gabriel te nuih a za viau. 

Apuin a perh zawm reng miau vangin a na ti chuan a thlah ve hram. Vulmawii sam pawr phungin a ţhu tum luau a, a meng ngam eih lo. A hmai a rang nuaih a, an intihfai ţhat leh vek a ngai ang. 

"I nawr hlum lo chauh alawm. I hrawl si a, insum ţhin rawh ka ti fo che a ni lawm ni? Mawl bet but lutuk, hmeichhe dim nachang reng reng hre lo" apu'n a tih tun tun lai chuan thip zetin a lo melh a, a thin a rim zia a hmuh theih vek. 

"I ti leh dawn em? Thu i awih tawh dawn em? Min chhang ta che, aw tih nachang pawh i hre tawh na nge?" apu'n a tih chuan aw a ti hreh si, apu a chhang lo ngam bawk si lo chuan "Meow" a ti phut. A pu hmai zawnah a kun pah vut kher lehnghal a, ani upa ve lam tawh chu a phu nasa hle. 

"Tu hi nge maw i chhun ni heti em em a han ât mai chu a(h). Hmeichhia chuan engtin pawn min ti se mipa chuan kut thawh loh tur. Khak an ngaih naah khak la, khati nawk nawk te chuan Vulmawii paw'n a hlauh phah nang che. A lungawina tur talin eng emaw sawi ang che, sawi tur chu i hriat kha" a tih charh charh hnuah min luh san a, Gabriel-a leh June bawk chu an nui chhuak ta huk huk. 

"In ţhelh hma mah mah anih kha. Vulmawii thaw a la chham em hleinem" Gabriel-a chuan a ti lehpek a, ka sawi tawh kha. Midang a ngaihsakna lanchhuahtir hi a hreh ngawih ngawih emaw tih tur a ni. 

"Lokal rawh bathroom ah ka hruai ang che" ti a Vulmawii kaihthawh ka tum chuan meng chiang mang lovin ka kut a lo beng per lawp. 

"Nangmah vang anih hi"min ti a, amah a tho sawk sawkin bathroom lam a pan. 

Mateo kan melh ţhap lai chuan "Nangni pawh ni ula inti ve tho ang" a ti hluk a, biang leh beng sen hlarin Vulmawii kalna lam chu a melh zawk a, inthiam lo hmel a pu tawh. A bracelet khal a a din ren rawn hnuah a kâ a thaw chhuak hawlhin Vulmawii ar puah zawh loh a puah zawm a, an inchai hnawkna vel kan lo tifai thung. 

"Tih let ve loh mai tur che a nia, a thinrim laklawh chuan a lungawi leh mai mai tawh lo maithei asin" chhuat huh lai phiah pah a ka tih pawhin a ngawi ngul tawh a, ţhu kun tlatin ar hmul a pawt mawlh mawlh. 

A inthiam thei ngang lo aniang chu, "Naa..Lalvulmawi" ti lauhin vawikhat vel a kut a thing nawk a, Vulmawii kalna lamah a kal veleh. Hmanhmawh zetin bathroom awmna lamah a pen phei pawk pawk a, an intlem lungawi zo ngut ange maw?

Ar chu buaipui zawm kan tum laiin tlangval pakhat a lokal hlauh a, keini chu awm mai mai turin min hrilh. 

"Ka kalthui hret a ni ka tih mawlh mawlh chu" ti a Mateo au ri kan hre zui zat a, kan pan hnai duh ta lo. 

Chuti chung chuan "Aw..ka nawr lai che khan ka hmaiah ham vak vak mai ta che. I duh leh tunah min rawn ham la, pawi ka ti miah hleinem. Ka dawh tawp ang" ti a a au lung lung chu a la hriat theih tho. 

"Chhurbura thlak tu Chhurbera anih saw" Gabriel-a chuan a lo ti leh sup a, an nuihza a la reh hleithei lo. 

Inchhunga kan luh ve laiin Mateo pu chuan, "A inthiam lo leh tho ang. Anu leh pate pawh ka hrilh ziah, inkhuahkhirhna awm lo lutuk hostelah dah lo ula, a duh dan danin tal tir suh u ka ti fo. Boss lah hi hostel siam rau rau chuan dan khauh deuh siam tel tur a nia" a lo ti tun tun bawk a, kan awm ve tih a hriat hnuah thil dang a sawi chauh.

"Ruihhlo a tih loh chuan a ţha a ni mai. Tunlaiah chuan amah ang rual lek lek ruihhlo ngai an tam a nia, a nghal leh chimawm mai mai hi chu dawh hram hram rawh u" tiin a nutein a thlavang a lo hauh. 

In neitupa berin buaina a neih tak si avangin kan ţhu ngawi ran hlawm a, api leh pute chuan min be seuh seuh reng mah se a hma a a nawmna ang kha a awm tawh lo. 

Rei deuh kan nghah hnuah Vulmawii nen an rawn inzui lut a, an hmai a fai dun vek tawh. 

"Ehh..bathroom ah in lut dun chiang" tiin June chuan a lo fiam pek a, ka kheuh zeuh. Puitling bul a awm ţhang lo kan nia, kan puak phawng phawng zel mai a ni. 

Lenna tur dang awm hek lo, helipad ah chuan kan kal ve ngei a, Muankima a awm ve si lo, midang chu la kal ngai lo ţhah an nia, nuam an ti khawp mai. 

"Gabriel, thli in ka sam a chhem len siau lai tak hian thla min lo lak ang che" tiin Vulmawii pawh a nui leh har har tawh. Thli thaw a nasat deuh chuan a samin a hmai a khuh hlup ţhin a, chu mai mai te chu a hlimpui. 

Ţhianten thla an lak sup sup laiin Muankima ka call a, phone a la thei lo. Ngaihţha zan lo chungin ka ţhiante che vel chu ka thlir a, ţawngkamin min hnem hluak hluak lo na a ka thaw ipik lutuk tur a zia a, ka khawharna an la kiang bawk. 

"Lunglenna in a zem leh chiai chiai bik tawh che a ni maw?" tih fiamthu pahin Gabriel-a a rawn ţhu ve a, kan taksa a insi rial. 

"Muankima ka be thei lo a, ka ngaih a ţha lo mai mai" tiin tlang takin ka lo hrilh. Ka ţhianpa a nia, tun hma zawng pawh a engkim ka thlenna ţhin a ni. 

"I hmangaih em?" a ti sup a, amah ka en laiin a ni chuan ral hla tak a thlir. Thli a thawt nasat deuh avangin men a har a, kopanga ding Vulmawii phei chu a kawr a phe hlawp hlawp. A ha lian bawk em a ni. 

"Hmangaih e..ţhian leh ţhian lo deuh ang zawng pawhin, engtin pawn ka hmangaih" ka tih chuan ka lam rawn hawiin mitmeng hriatthiam harsa zetin min melh a, "Phatsan ta che se la?" a ti zawi leh sup. 

"Ka ring lo, a chhungten a rilru an suk sak anih chuan thuhran a nia, mahse, kan inkawp ngheh hnu hi chuan hmeichhe dang lak a min phatsan ka ring miah lo" ka ti a, muangchanga lu buk pahin "Ni rawh se" a ti ringawt a, a awmdan chuan ka ngaih a ti ţha lo dawn dawn alawm le. 

"Eng emaw hriat i nei tiraw?" ka tih chuan a ner suk a, engmah phei chu a sawi lo.

"Min hrilh la" ti a ka nawr sek takah chuan "Jessie" a ti leh tawp a, "Sawi ţha ve mai la" ka ti vin hlar tawh. 

Phone a hmeh neuh neuh hnuah "Nizan a ka lak ruk" tih pahin min rawn hmeh bel a, thlalak ka hmu chiah chu mak tiin ka meng phar nasa. 

Jessie leh Muankima te cabin kawt a an nui dun lai a ni. An bul vel a thim viau na a anmahni chu cabin kawt a êng inchhi chuan chiang deuhin a chhun fuh a, an inpawh lova, ka awm ve lai phei chuan an inbe ngai mang lo. 

Mak ti zeta an thlalak ka en lai chuan "Cabin panna kawngah ka ţhu. Min rawn hmu ve lo anih hmel" Gabriel-a chuan a rawn ti leh a, "I hmu zui zel em? Jessie hi cabin ah a lut em?" ka tih chuan "Ka hre lo ka let daih" a ti sam et. 

"Thla i lak ruk theih rau rau chuan hriatchian vek law law tur che alawm" ka ti vin hlar a, thlalak hian dawt a sawi mawh khawp mai. 

"Muankima zawt chiang hmasa lovin thinrim ngawt suh ang che" thupe aw zet a a tih chuan "En ru zel la chu zawh chian kher pawh a ngai nang" ka la ti hlar. 

"Ka buaina tur a ni lo" ngaihsam fe a a tih chuan "Min hmuh tho sia lawm" ka ti a, a la nui zui. 

"Hlau suh engmah a thleng lo ang. Muankima hi mi fel a nia, ţhen hlek suh" min ti leh ang lawi a, hepa hi a maksak riau. 

"I mumal lo emai" ka ti halh. Muankima ringtawk inti viau siin ka rilru a nuam lo nghal em em ringawt. 

"Mi zawng zawng i rin vek loh nan chauh a hmuhtir che ka ni. Kan ţhianţha berte pawn zep chin an nei tih hriat a ţha. Misual ah ngai kher lo la, nangmah vaw let leh thei tur chu hrilh duh bik suh. Ţhianţha hi hmelmaah an chang ve thei" a ti nghut nghut a, Jessie chu tu pawi mah sawi ngai lo, inthlahrung dek chi a ni. Mahse, ramhuai hi khaw engah an inlan khat khawp mai. 

"Lucky, Muankima leh Bza an insual anih chu. Cafe a an awm lai aţangin buaina an nei tawh a, inkhelh naah an thar thawh leh an tia, Bza thisen a chhuak nasa mai" June ţawng lang lang chuan min pawt tho chiang hle. Buaina a lo neih vang anih chu ka biak theih miah loh. 

"Kolasib a ka awm lai ni lo se ţha tur, ka en ve chak asin" Gabriel-a chuan a rawn ti ngul ngul a, kei a hlauthawng rilru chiai chuan "Midangte buaina hi en nawm a ni lo Gabriel, thisen hial a chhuak a, chu chu ngati nge i hmuhchak em em?" ka ti hlak hlak. 

"Ngawi hmak rawh" zawi te, sehchilh zet hian June chuan a lo ti thuai a, "Gabriel-a hi i hrechiang lo. Chuvang chuan ngawi rawh" a tih leh phei chuan ka hrilhhai let zawk. 

"Thisen chhuak khawpa ţhiante insual chu ennawm a ni hleinem" tiin ka hnial ţalh. 

"A dik, mahse mi chanchin hrechiang hmasa lovin an ţawng phawng phawng ngai lo" min ti a, phone min pek hnuah hmai thi phung chunga Bza let bal thlalak chu ka en. 

"Khaw nge Muankima?" ka tih chuan "Ka hre bik nang..cabin ah a chhuk nghal daih tih bak ka hre lo" June-in a tih lai chuan Vulmawii rawn inrawlhin "Zaidam thinthawk chu na deuh asin. Khapa kha a chawh, ka ngeina a rei tawh. Hospital a luhpui rup tham hliam nei se a zia a inthlak ve mai ang. A sawisa na lo mah mah anih kha" a ti hlak hlak. Thlalak a hmu ve tawh tih a hriat khawp mai.

Kei hi chuan ka mualpho vak aţang khan hosteller ho in group kan neih ve hi ka en ngai ta lo. A tam deuh hlek hnuah ka clear pawp a, engmah ka chhiar ngai lo. Hmuh nuam lo a tam dawn a, min pawt hnual zual tu mai mai a ni dawn. 

Muankima chu biak ka tum leh pawn ka hlawhchham ţhak. Ka ngaihtuah ru kher mai. Tuman an umzui awm si lova, Bza en khan hliam a nei ve dawn tho tih a hriat. Ka khawngaih dawn dawn alawm le. 

Mateo entir ve an tum ngial na a an hlawhchham ţhak. Bza hmai thi deuh hnuang chu a en ngam tlat lo. Thisuk ka nei a tih hi tak tak nge dawt kan hre miah lo bawk. 

Ţhianho a thla te kan lak zawh hnuah puih an ngaih takin tiin kan let a, arsa chu an lo siam der tawh a, a la bang ho chu Mateo pu leh min rawn puitu pa khan an buaipui. 

"Mak ka tih chu maw pu, patil leh tuai hi Pathianin a siam ve mang si lova, an awm ve tho bawk sia, mahni anpui ka kawp e te hi an ti ve a, hetiang ho hi eng nge i ngaih ve dan?" chupa pui chuan a ti phawng phawng mai. A sawi ang chu kan kawl ve reng tih a hre der lo. 

"A ni khawp mai, an pian dan a nia, mi pawisawi a hlauhawm em avang hian ngaihdan sawi chiam chi a ni vak lo. Mahni anpui meuh an han kawp hi chu pawm thiam a har a, hmana tuai pahnih ka fanu in a kawm ve ţhinte pawh kha an nula tlang nge nupui fanau an nei tawh hriat a chakawm khawp mai. Mahse, kan pawi an sawi loh chuan en liam dan zir ila tiraw Biakte" a ti dam thlup a, June chuan ngaihthlak nuam a ti chuang lo maithei. 

"En liam a har alawm. Mahni anpui kawp ching ngat phei chu an tenawm. Vanram an kai pawh ka ring lo. Hremhmunah an la kang vut vut ang" Biakte chuan a lo ti leh, a ner pah nang nang a, a ten hmel tak tak. 

"Police leh court a roreltu kan nih ngawt loh chuan kan mihring puite judge chiam a rorel sak tur kan ni hleinem" kan pu pui chu a sawi ţha viau mai.

"Chuti chu U Biakte arsa pawh i eithei lo ang a, ar kha a tuai a, i ten ngawt ang. A thih thawh hnu pawh khan min zut min zut alawm" Mateo chuan a rawn ti pek a, Biaktea aiin apu a meng rang nasa zawk.

"Awiii...U Bakteee...i thlan tui luang mai mai pawn min chiah zawr hnâp. Ka duh vâwt vâwt zaaa che hi aww" no deuh a ţawng hlawi hlawi pahin Mateo chu Biaktea dinna lamah a kal phei nghawng nghawng. 

Chutah phur hmel zet a a kut thing chungin a nui a, "Awii haa..vawiin hi a naaamm..ka phur chawng chawng zaa hi" tih duai duai pahin Biaktea chu a kuah a, meng kual ralh ralh chunga hmui hupin a nui lui her her. 

"Zoremsang" a pu'n a lo ti fiak ţhak a, "Awwiii...pu rubber band-a vin zaa leh ka hlauh si zaa hi. U Bakteee min lo chhan" a ti leh duai duai. 

A ţhianpa, nau anga a en ve takmeuhin dangdai deuh a a thlavang a hauh takah chuan June pawh chu nui uar uarah a ţang leh thei ta. 

Chaw eikhamah kan ţhianhoin kan in lamah kan let a, an rawn leng ang a, riak turin Mateo pute in an pan leh ang. 

Inchhung ka lut hmasaber a, ka nauten min lo melh ţhap. Daisy leh Nu Puitei an lo indinchilh ran. 

CONT..