THE GOOD, THE BAD AND THE OTHERS-12

THE GOOD, THE BAD AND THE OTHERS-12

[Ehe...a va hmang ţangkai mai mai phal zawk che ve. A hming te min hrilh ve la] tiin ka chhang let. 

"Pawngvini a bengchhen lutuk hmain ka va haw ang e" ti a Muankiman min hrilh te chuan ka ngaihven tawh lo. Ka thil dawn chuan min ţhawngin rilru zawng zawng a la peng a, thil dangin min luah zo lo a ni ber. 

Mumallo deuhin kan inthlah a, Jessie in [Lalduhsanga a nia, nikum khan a thi] a rawn tih phei chuan vuak chawrh ang mai ka ni. 

[Chuti si min va hrilh lo ve] tiin ka chhang let thuai. Ka ming mup mup a, phuba ka lak ve hma a a thi chu pawi ka ti hle.  

[A chanchin ka ngaihven ngai hleinem. Amah hi ka hlau tawh a, ka hnaih chuan ka duhna a zual zel ka hlau. Ih maw..an that an tia, thiin an chhar an ti] a rawn tih phei chuan a ngaihna ka hre lo viau a ni.

[News velah a va lang lo ve] ka ti lehzel a, mizoram zimte ah hi chuan tualthi te hi hriat an awl a, miin rawng tak a an thah phei chuan kan hre zel. Duhsanga pawh hi a thih dan hnawk nuaih se chu kan hre ngei ang.

[Ka ţhiannu hi Lawngtlai khua a nia, a hre tam bik lo. An khua a mi zawh tur ka lo zawng ang] a rawn tih chuan ka thinrim hlur mai. Hriatchian vek ka chak, a vai a hriat ka duh. 

[Ka hriat hnu a ang riau. Lo zawt chiang thuai teh aw] ka ti a, ka awm hle hle thei lo. Vawikhat nan ka pa'n thudik a sawi ve anih dawn hi. 

Ka mut hnuah ka pindanah Boomer a rawn lut zal zal. Thawm dim deuh a chair hnuk hnaiin khum bulah a rawn ţhu a, rawn kunhniam deuhin a a malah a kiu a nghat a, a kut pahnih a suihzawm bawk. Min rawn ngaihven anih ringin mu chungin ka lo en tawp. 

"Eng nge i an? I lu a na em?" a ti chiah reng a, "Na lo e" ka tih chuan "I awm te kha" a ti leh. 

"Aih..a na tawh lo" tih pahin ka lu ka kan a, ka sam ka delh beh tlat chu hui chhuakin ka insiamrem a, fiamthu thawh mai mai tur a lokal a ang lo khawp mai. 

"Phoebe hi ka duh lo miah lo. Ka la duh reng" zawi te a a tih chuan mithmul ka lo ti chuar nang. Phoebe nen a an nih lai reng pawn a chanchin min hrilh ngai lo. Tun a taka a sawichhuak chu mak ka ti khawp mai. 

"Anih a hnu, ni leh mai ula, hrilh leh rawh mipa i nih kha" nui chung a ka tih chuan lu min thin khum nghutin "Kan chhungkua hmusit ru ran tu ka nun a lak luh ka tum lo" a ti bur. 

Thawh kan ka tum lai chuan min ven tum ni awm takin a che vut a, a ban a lek kan uaih chu lo benthlak sakin "A na tawh lo tak tak" ka ti hram. 

Khum lu nghengin ka ţhu a, Adika puan ka sinţhat tir hnuah "I hresual aniang. Phoebe te chuan rilru chhia a pu hleinem. A thianghlim em hi" ka tih chuan "Nia, amah chuan a pu miah lo" a ti sup a, chair hnung nghengin thatchhe deuhin a ţhu a, a landan tak ngul chuan min ti hlauthawng. 

"A chhungte pawh an fel. Duh duh hunah eitur ka lam ngam a, ka chungah phei chuan an ţha em em vek" ka ti a, Phoebe te chhungkua a ngaihdan chu mak ka ti khawp mai. 

"Ni lo e..mi hi an lam dan ngawt an ni ngai lo" a ti dam thlup. Inlak puitlin mode a on leh tawh anih ka ring. 

"Mi pangaiah ka ngai ve ţhin. Rilru tluang leh mifel chhungkua, chu chu ka ngaihdan ţhin a ni. Mahse, vawikhat Phoebe nu in tham lo deuh a ka nu a bia ka hre fuh a" a tih chuan hriatzel chakin ka ngaithla uluk sauh "Pa uap lum loh chhungkua, Adika leh Puipuii te hi an polite lo lutuk, in pa nen in hlim loh vang anih hi. Keichu ka fate hi chhungkaw pangai ah chiah ka lawi luh tir dawn. Nangmah ang a hrehawm an tawrh ve tlawk tlawk ka hlau" Phoebe nu thusawi chu sawichhawngin zawi deuhin a phun sup sup a, a sawi zawh chuan thaw chhuak hrawkin a nui ro hawk. 

"I hrethiam em? A fanu neih ka la hlat viau laiin ka pa ang ka nih a, Phoebe in ka nu ang a hrehawm a tawrh hlauin kan chhungkua a a lawi luh a hlauh zia peh hel deuhin a sawi a, khatianga ka nu ţawngkhum duh tu fanu chu ka nun a ka lakluh nachhan tur ka hre bik tlat lo" a ti nghut nghut a, a sawi chhuah thut chhan hre lo mah ila ka lo bu nghat nghat. 

"Chhungte, a bikin nu te hi an inrawlh peih a, chhungkua leh mimal nun an chawk buai thei fu. An fate an hmangaih vang anih rualin fate hlimna an laksak chang a awm. Phoebe ka hnaih apiangin a nu avanga ka nu hrehawm ti hmel kha ka mitthla ah a lang ţhin a, Phoebe hi fuih nuam leh thlem awlsam, nu te hlau chi a ni. A nu a lawm loh ai chuan a thu a zawm zel ang. Ţha lo lam pawh nise a nu sawi anih chuan a ti vek ang. Lo kawp lui zel ta ila chuan Phoebe hian ka nu leh ka unaute a ti na fo ang. Chu chu ka ngaihdan a ni. Ka nu a boral tawh chung pawh hian ka ngaihdan a la ngai reng" a ti a, a awki a zawi na a hriat a awl viau thung. 

"Chu chu ngati nge i sawichhuah? Phoebe nen boruak in nei leh deuh em ni?" ka tih chuan min melh run chungin muangchangin lu a thing a, "U Muankima leh Phoebe hi an inang chiah" a ti nghet churh. 

"Muankima hi ţhen turin min ti lo ang chu tiraw?" nui hak chung a ka tih chuan "Aw leh Aih" a ti hmuk a, hrethiam lo deuhin ka lo thle ha. Sawichhuak lo mah ila a awmdanah Muankima nen a kan inkar boruak a hriatthiam zia a lang a, ka zep buang bar peih lo. 

"Nu Puitei hi nidang ang a ni lo. Ka nu damlai kha chuan kan chungah a ţha. Hriat alcohol-i rawn awm aţang chuan ka be ţawng zo mang miah lo" a tih chuan a sawi tum ka man chiah. Phoebe nu leh Nu Puitei te hi an in an a ring a ni. Ka nau hi a â lo ka tih ziah kha, eng thil mah a enliam mai mai ngai lo. 

"Tlangval nula rim rual,a lenna in a kalchilh a ko haw duh chu ngaihtuah teh, a lawm lo che a, a fapa in a hnaih che a duh lo tihna a ni mai. I hmangaih anih chuan min hrethiam la, i hmangaih nen a pawh ţhen luih che ka tum lo. Mahse hmangaihna hian natna a keng tel. Mihring hmangaih nei natna in a bawh buai loh an tlem viau ang. Ngaihtuah rawh, U Muankima nen a innei tur angin han suangtuah vel chhin teh. I hlim angem? Fapa mal a nia, a nu a hmangaih bawk. Hmeichhe rorelna a nia, a nu uapna hnuaiah i hlim angem? Hmangaihna hian natna a keng tel ka tih kha, a dam leh thei bawk. Min hmusit tu uapna hnuai a awm a damchhung hrehawm tawrh ai chuan reilote nat a thlanawm zawk. U Muankima hian engtikah mah a nu aiin a thlang lo ang che" a ti a, Boomer hian ngaihdan nghet a neih tawh chuan thlakthleng tir a har khawp mai. A rilru a nghet a, a sawhsawn mawh lutuk. 

"Ka mualphona hi hriain a thinrim rih a ni maithei asin. Kan inkawmngeih zia a hria a, min pawh hran a tum miah lo ang" ka tih chuan a lo chek tlak.

"Mawl suh ang che. Hmangaihna hi i mit tih del tir miah suh. Pawh hran cheu tumin bul a ţan tawh zawk. School naupang lekin ka hmuh theih hi ngati nge i hmuh ve theih loh" vin deuh tak a a tih chuan ka en mawl tawp. 

"Lungngai suh..i hrehawmna belhchhah thei ţawngkam a phuh chhuah chuan i thlavang ka hauh ang" a ti zawi leh ruih tawh a, a sawi zawm zel dawn maw ka tih laiin a tho daih. 

"Nu kan nei tawh lo a, ka pa hi la dam mah se pa nei lo ang kan ni. Unau tal kan ţan rual loh chuan min hmusit tu te hian dik an inti lutuk ang" a ti a, a chhuah hmain light a off thlap.

Ka muhil thei lo chuan phone ka en a, whatsapp message ho ka enkual. Muankiman [Naktukah ka let lehnghal ang. Class ţhulh rei a chi si loh a, weekend ah ka rawn haw leh ang] tiin message a lo hnutchhiah a, keimah vangin class a ţhulh ngun viau. A chhungten an remti tawh lo anih ka ring. Zirna hi a pawimawh a, thiamna neih a hlu. Nu leh pa te chuan fate hi sang deuh thleng turin an duh ţheuh ang. Sum sengin an zirtir a, class kal ţha peih lo a fate an then mai mai chuan an pawisa kha a lo thlawnin a ral mai mai dawn. Chutiang chu a thlen an duh lo vek ang.

[Aw le...nang tal chuan ţha deuhin zir rawh] ka ti a, min rawn chhang tawh lo. A muhil tawh anih ka ring. 

Gabriel-an status a nei ve mial. Vanah chiang lo ruaiin thla a lang a, chu chu a thla la in a rawn dah a ni. Caption ah [Kolasib ah a lang ve angem aw?] tih hi a ziak a, ka ţhen sak. 

[Ka mu tawh a, ka mut hma kha chuan ka hmu ve ngei alawm. Kolasib nula dang aiawhin ka rawn chhang che] ka ti a, a seen hnu lawkah a rawn call. 

"I muhil thei nange?" ka ti nghal thawr. 

"Mut a chhuak thei meuh lo anih hi" a ti a, a nui hawk thawm ka hre zui zat.

"I lung a leng a ni maw?" ka tih chuan "Anih hmel" a ti a, "Tu nge i ngaih? Ka lo hrilh sak ang che" tiin ka fiam zeuh.

"Ka ngai che ti ta ila" a rawn ti a, hmu kher lo mah ila a awmdan tur ka hre thei. A chhip sam a ţham ang a, lai deuh a nuiin a hmui hnuailam a pet zauh bawk ang. 

"I nasa lutuk aw Gabriel..Lal Angel" ka tih chuan "Sister pawh min ti la ka ngai tho che" a ti mauh mai. 

"Kei ve mai mai min ngai tlat hi ka va phu lo em" ka ti a, "Eng nge i an?" tiin kan thusawi lai a rawn thlak. 

"Ka ţha ni mai" tih pahin khum a ţangin ka tho a, "Ka thil tawn ho hi ruah ah ka ngai a, ruah sur hnuai a awm rengah ka in ngai. Kan khua a haw ka thlang hi inhrethiam lo maithei mah se keichuan ruahsurin min nan zawr hnap loh nan nihliap khumin ka inveng ah ka ngai. Kan in hi ka nihliap a nia, ruah sur hi a nasat em avang hian ka hlau a, tihian nihliap hnuaiah ka tawm reng mai ang" ka ti malh malh. Tukverh hawngin ka dak chhuak a, Muankima pindan a thim ţhiap tawh. Ka thlir tum berah êng a awm tawh si lo a, van ka thlir ta tawp. 

"A pawi loh chu..i tan ruah a sur rih a, nangmah chauh a nan rih che anih kha. I do tlawk tlawk ang a, i damlo ang tih a hlauhawm zawk" a rawn ti ve sup sup a, diktak chuan midang han hnem vel hi a inhmeh hlawl lo. An ngei tur tawk lekin ţawng se la, chutiang chu a Gabriel-a bik tlat. 

"Nia, ka tawn luih chuan rilru natna ka hre tam ang a, ka taksa in a tuar ang. Chuvang chuan ruah a sur nasat chhung chu nihliap hian ka inzar hliah rih ang. A sur reh theih loh leh damchhungin nihliap hnuaiah ka awm tawh mai aniang chu" ka ti a, a reh vang vang hnuah "Lucky" thum zawi ruih hian ka hming a rawn lam a, "Aw" tih chiahin ka chhang let. 

"Nakinah i nihliap kha dahthla chhin rawh. Nihliap khan chhimbal a hliah daih thei a, i khum luih reng chuan i chung lawk a chhimbal zam i hmu thei lo ang. Ruah sur zawhah chhim bal a lang ţhin" a aw chu a la zawi ruih tho a, mahse ka taksa pum pui a fan chhuak hneh hle. Gabriel-an hetiang ţawngkam hi a la hmang ngai lo. Deusawhna leh elsenna chiah ka dawng ţhin a, min ngaihsak viau chang pawn min hnemna leh ngaihsakna thu a chhakchhuak ngai lo. Beisei loh ber hnen aţanga ngaihsakna dawn chu a mi den dan a dang. 

"Sawi tur ka hre tawh lo. Lawmthu sawi ngawt na chi niin ka hre si lo" tiin ka nui ro halh a, ani pawh a nuih a za viau mai.

"Pawi lo, i thinlung ka hre pha tho" zawi te tak tak hian a rawn ti a, a inrintawk hmel fu thung.

"Ve ringawt che hian...min hrechiang deuh ang khan awm vel lo mai teh aw" ka tih kha kha chuan "Hrechiang e i rin ai daihin" a rawn ti sup. 

Ka chhan leh hmain "Muankima i hmangaih hlur midang hre chang lo lekin" a ti deuh nek a, a awki pawh a san ve ta deuh. 

"Ka hre vek che u, ka hmuh kân ngai lo hrim hrim cheu" ka tih laiin "Ka thin a nia, duh leh a chhia ang" ti lang lang chungin Daisy a rawn lut. Puanthuah leh lukham a la pawm ţun zui. Chhuat a theh hlawm tawpin chhunglamah a kal nghal hmak a, "Ka nu ang tun tun reng hi ka ning. Chhuatah hian ka mu dawn" tih leh puan phah a rual nghal zat. 

"I buai em?" lehlam a mi chuan a rawn ti dut a, "Buai lo e..Daisy a rawn mu ve dawn a" ka ti a, a hming ka sawi vang nge min rawn melh ralh. 

"Kolasib a tawm bo i thlang sia, puih theihna che ka neih chuan min hrilh dawn nia" a tih chuan "Tehreng mai, ka lawm lutuk ringawt. Mamawh i neih chuan---" ka tih mek laiin "Nangmah" a rawn ti leh sup.

"Engmaw?" ka lo ti he haw a, zanin a min biak duh dan hi ka hrethiam lo takzet a ni.

"Nang hi ka mamawh che ti ta ila" zawi leh ril ruih a a rawn tih leh chuan chhan ngaihna ka hre tawh lo. Ka ngaihtuahna a chawl duk a ni ber. 

"Muttui le..Lucky. Ka hmu leh thuai ang che" a ti a, phone a tawp zui nghal. Thaw halhin Muankima pindan lam ka thlir a, thli thawin ka hmai a chhem vawt seng seng a, boruak nuam zet leh ka nun buai nuaih hi a inrem hlawl lo. 

"Nu Puitei saw i naupanlai aţanga i hriat mah nise hlau viau rawh. A nulat laiin a nasa an ti nia, tun a a pasal lo saw pasal ang deuh reuh pahnih a nei tawh. An inah an chen chilh tawp ţhin an ti. An luhkhung anih ber chu. Aizawl a an veng a mi ka ni in a sawi vek. A duh loh zawng a i awm vaih chuan a hau hrep mai ang che. Chutiang chu a thlen loh nan Muankima pawn a hawpui vat kha" Daisy in a lo ti hlak hlak.

Ka ngaihven mai loh vangin "Aa..Muankima hi a khawngaihthlak. Apa nen hian an dam sia, a nu a nasa ve ropui sia, an zahpui ru ve thei ngawt ang" a ti leh a, ka bengkhawn chuang lo. Mi chanchin chhia ka sawi peih lo a ni mah. 

Zingah Muankima a rawnkal a, ka rawngbawlna bulah a ţhu ve reng. Chawlh rih ka tum sia, amah talin zir ţhat a mamawh thu a sawi a, inthlahrung lo turin ka hrilh ve luam. 

Midang thawm a reh ta maw tihah ka hnung a rawn dingin min kuai her a, "I tello a ka kal hreh zia i hria tiraw?" a tih chuan ka lo bu zauh. 

A kutphah hlai hlup chuan ka bek tawn tawnah a dawm a, mitmeng hriatthiam harsa zet a min melh lai chuan ka lo en chho ve kiau. 

"Kut an thlak che emaw, i hrehawm tihna tur a an awm anih chuan min rawn hrilh ang che" tiin a phun sup sup.

"Aw le..tih theih nei dawn lo mah la ka hrilh ngei ang che" ka ti ve ngat. A rilru puthmang diktak ka hre duh a ni. 

"Tih theih a awm ang. Nangmahin ka tawrh tir dawn lo che" nghet charh a tiin a tawp nan ti ni awm takin ka hmui a rawn fawp a, min dal tu an awm loh hram ka beisei. 

A kal tur chu ţha deuhin ka thlah liam. Inthlahrung deuhin pawisa ka duh leh duh loh min zawt a, ka duh loh thuin ka chhang. Nu Puitei awmdan teh thut hi mak ka ti ngawt mai. Ka nu nen an inkawmngeihin fel ka ti a, ka fak viau ţhin. Tun a tak a a danglam thutna hian min ti hrilhhai takzet a ni. 

Muankima nen an in lam a kan inzui phei lai te khan Tekeuhin "Au Muankim, anu'n pengkawi suh a tih che kha" a rawn ti anih kha. Min ngaina ve ţhin tu Tekeuhi ngei pawn min melh hrek hrek duh chauh tawh a, a ţawng duh danah min zahna a nei tawh miah lo tih a hriat vek bawk. 

Ni a ding reng bik lo va, khawhar takin ni ka chhiar liam ţhin. Ka nu leh Muankima ka ngai a, hrehawm ka tihna leh mal ka intihna a reh thei lo. Inrinni zing ka thawh rualin resort a kan kal ni kha ka hrechhuak nghal a, lokal lo tawp ila ţha tur. 

Rawng ka bawl malh malh lai a Boomer-a ţawng lung lung thawm ka hriat chuan ka tawp chat. 

"I lo leng a ni maw Pu Hrang? Chaw ei rawh aw dul kiar eng ung pa, bal deuh hian i rawn lut leh nulh nulh zel a" a ti anih chu!

Rang lutukin ţhutkhawmna pindan lamah ka tlan phei.

"Boomer" ka ti chhuak hluai a, sofa ah thatchhe zet a ţhuin zawhte lian pui a lo awm.

"Puih i ngai mi?" zawhte ngawt en chung hian a ti a, "Khaw nge pu Hranga chu?" ka ti ve thung. 

"Hei ka pawm mek hi..Pu Hrang eng ung-a anih hi" zawhte hnung beng thuk chunga a tih chuan ka thaw halh. Patling tak tak a bia emaw tiin ka hlauthlawng hman viau anih kha.

"Patling i bia maw ka ti alawm. Rawn hauh che ka tum a" ka tih chuan nuih rik hawk pahin min rawn melh a, "Pu Hranga anih hi, Kungawrhi nen an inchhai ve ziai ziai zel" a lo ti mai a, a zawhte buaipui hi hauh sim theih a ni lo. Ama tan a ţhat loh thu ka nu pawn a hrilh ţhin, awmzia a awm lo. Mateo nen an inmil phian tak ang; an ngainat zawng a inang emai. 

Ka insuk laiin Daisy-in "Vanneih inleng i nei" a rawn ti a, tuman an lo len ka beisei miah lo. 

Tunge niang aw ti rilru chungin ka chhuak a, sofa a lo ţhu run ka hmuh chuan mak ka ti lutuk ţawng nachang pawh ka hre lo. 

"I lawm vak nange?" nuihza aw zet a amah zawkin a tih chuan "Gabriel" ka ti hluai a, sawi chhunzawm tur ka hre chuang lo. 

A zawmna aw...

"Eng nge i rawn tih dawn? Ngati nge i lokal thut?" hamhaih zet hian ka ti leh a, Gabriel-a berkher chu hmuh ka inbeisei miah lo. 

"Ka rawn rim che" nuihza aw deuh a a tih laiin June leh Vulmawii an rawn lang ve hlawl. Phun niah niah chungin an rawn lut a, sawm chawp ngai lovin tlangnel takin an ţhu nghal tharh. 

"Nangni pawh maw? Eng nge in awmzia? Ngati nge in rawn lan thut?" ka ti leh chul. 

"Kan Lengleng-a pawh in kawtah sawn zawhte buaipuiin a awm. Nang aiin zawhtein a hip zawk aniang" June chuan a ti lehzel a, Mateo pawh a rawnkal tel anih hmel.

"Aw..no a nei a, nichin lawk khan Boomer-an nilumah a dahchhuak a, engti turin maw in rawn kal?" ka ti leh rih. 

"I khawhar hlauin chawlh kan rawn hmanpui dawn che anih hi. Lawm hle rawh in khaw kawng a chhe ropui si" Vulmawiin a ti hlak hlak. Ani phei hi chuan min ngaina lo si, kan in a a rawnkal ve duh ka ring lo hrim hrim. 

"Tu inah nge thlen in tum? Chhungte in nei em ni?" ka tih chuan "Mateo pu te inah a ni mai" an ti sam et a, min ngai pawimawh a rawn kal chu lo mikhual tur hi ka nia. 

"Kan buai lai ni lo se chu in rawn thleng vek tur a nia" ka ti niah niah. Zahzelah beng ka khawih pah neuh neuh. An rawn kal thut a, Gabriel-a min endan phei chu danglam riauin ka hre tawh. 

"Awm hnaih suh hmaiah a beng thut zel ka tih mawlh mawlh kha, a tin a chhuah ţhin lehnghal, a na em?" ti a Boomer ţawng lung lung ri kan hriat chuan midang an nuih ham ham laiin ka tlanchhuak thuai. 

"Zawhtein a beng che em ni? Min en run run a min beng thut zel a, a na em?" ti sawk sawkin Mateo hmai ka ensak a, min ngaih pawimawhna an lantir hi ka inthlahrung vek. 

"Na ang chu min beng alawm" ti hlukin a kut a la thla a, zawhte ke tin thla a awm. 

"A inrin ve deuh anih hi, no a neihna a la rei lo a, a kawlh ve rih deuh bawk a" ka tih chuan "Min ngai ber em?" a lo ti daih. 

"Ngai e" ka ti ţha ve mai a, min din hnaih sauh. 

"Ka ring reng a, min ngaih vangin i lo ţap hluam hluam ţhin em?" a ti leh. Ka zak deuh chuan Boomer ka en thuai a, nui vur vur chungin Mateo nen a kan indinchilh ran chu min lo melh. 

"I mawl emai" tih pahin a awmah ka nam a, a chesawn lo reng reng. 

"I nau hian makpa atan min duh" thutak zet hian a ti leh a, Boomer a lo nui chhuak ta hawk.

"I la naupangchhia lutuk chutiang sawi rual i la ni lo" ka tih chuan "A chhuanchhe zawng a sawi lo khan ţha deuhin min hrilh rawh" a lo ti a, ka bo daih. 

"Eng nge awmzia?" ka tih chuan "A chhuanchhe zawng tih chu a dawngkhawng zawng a thusawi tihna. Naupangchhia min ti tawh suh, puitling deuhin ka ti ti thiam" a ti leh hem tawh. 

"Ţawng upa han hman vel kha puitling tihna a ni hleinen. Ţawng upa te chu zirlaibu ah a awm vek" ka tih chuan "A chhun a zanin ka ngai che" a lo ti a, sawi lai mek mekin. 

"Lo lut phawt mai teh, thingpui ka lum ang che u. Boomer, chhang a zo vek a, va lei lawk rawh aw" ka ti zung zung. 

"Ekhai! I nauten a bo a bang awm lovin chhang an ei vek a ni maw?" Mateo bawk chuan a lo ti a, Boomer-a lawmah a tla a, a lo nui huk huk reng. 

"A ninawm..khatiang a ţawng un fiah lutuk a hman vel kha a tenawm aw" ka ti ta ringawt. 

"Mai sen in muh tuh" a ti a, a insum zo ta ngang lo aniang a nui zui hawk hawk. 

"Eng nge awmzia ni leh ta?" ka tih chuan "Ţawng upa fiah lo anih kha. Hmaisen min hmuh suh tihna. Fiah deuh chu i ten sia" a hmel a nuihzatna la chambang chung hian a ti a, a phawk a chhuah hi chuan kan hawi hu hu reng mai. 

"Lut teh ang..puitling lo tih vang a ţawng upa hman vak vak kher a ţul lo" ka ti nawn leh.

"Ka uang anih kha..ka ngai che ka tih kha chu ka ti tak tak" a ti a, ka chhip leh dar a dawm kawpin amah zawkin min nam lut. 

"Ka nauin chhang lei se thingpui kan in dawn nia" ka tih chuan "Kan thlen in turah kal phawt ang u. Lucky, nangpawn min zui ve ngei a ngai ang. Inthukru bik reng suh, kan bulah chuan i him dawn a, lo chhaih tawk che an awm chuan kan kungfu mai ang. Insiam la, kal ang u" June-in a lo ti zung zung. 

"Nia inbual harh ve phawt te a chakawm a, kan zin ta sa sa, kan lengkhawthawng ve ang chu" Vulmawiin a lo ti bawk. 

"Kal ve rawh ka lo insu vek ang. A thu hrimah in va han lian hlawm em em. Tunlai mi hi chu in ţhang duh e, keini eitur ţha a awm hma a piang chu kan bing turh a, han kal tau ve nghawng nghawng mah ila mawng leh tukhum a invaw chawrh chawrh a" uar fe a Daisy in a tih chuan an lawm khawp mai. Ţawngduh ngang a ni bawk a a be nel nghal vek. 

Keimah vanga rawnkal an nih miau avangin ka zui chhuak ta nge nge. Bike a lawnkai pah a "Lawn la" Gabriel-an atih chuan "Teh ngawt a che..tun ţum chu Lucky ka phur ang" Mateo bawkin a rawn ti vut. Min kai nghal zat bawk. 

"A hauh hlur tak che lawm" tiin Gabriel chu a mit bul a vun chuar lang thei hian a nui a, Mateo chetdan chu atthlak a tih hmel hle. Chutih rual chuan tuman kan haw ngai hran lo. Keini aia a naupanna hrereng chungin kan zingah a tal tam a, a rualpuite zui lovin keini ho hi min zui chawt. Min ngaihnat der ve em avang hian a naupanna a lan chang pawn kan ngaithei viau zel. 

Mateo nen hma kan hruai a, midangin kan hnungah min zui. Kan veng kan la pelh fel hmain thawklehkhatah kawngsir aţangin naupang a rawn tlan thut a, ka khek ţhat. Bike a din rualin Mateo hnung ka tauh dawt a, "Fimkhur ta che u" tih riin a zui. 

Thinrim zetin Nu Ngaihzualin min rawn pan a, ka hlau ru hle. Zu zuar an nih bakah nu nasa a nia, tunah pawh a rui lej chhar tawh. 

"Ka tupa kha inhmu lo em ni?" vin zet a a rawn tih chuan "Hmu e..ka din kha" tiin Mateo chuan a lo chhang a, diktak chuan kan thiam loh a ni miah lo. Kan din rual khan kan hnung chiah min hnaih tak a tlan kan ţhiante pawh an ding a, an hmu ve vek ang. 

"I meng lo em ni? Naupang i chil ţep anih kha. Chak deuh deuhin bike in khalh a, chil hlum ta la engtia tih nge i tum?" a ti vak vak. 

"Saw a la dam alawm ka pi" ţha deuh a Mateo penglenglengan a tih pawn "I hmu lo em ni a hlauh em saw" ring zetin a la ti tho. 

Kan ngawih reng hnuah pawh "Police ka phone dawn. I meng lo mi? Mawh i meng lo mi?" a ti tuarh tuarh a, mi mit kan lak tak vangin Mateo chuan "Meng e ka pi hei ka meng" a ti sawk sawk. En nawm kan siam hma a inlak hran vat a duh ve anih hmel. 

"Khatia i mit keu kau kher a ngai lo" Nu Ngaihzualin a tih chuan "Min dang rei khawp mai ka pi" hnunglam aţanga mipa aw rawn chhuak chu Gabriel-a a ni. A inrawlh duh ka ring miah lo asin. Nu Ngaihzuali chu an hnial hneh dawn chuang lo. 

"Thum deuh chhur khan engmaw i lo sawi ve? Aw thum pawr nazawng ka hlauh i ring em ni? Naupang in su hlum lo chauh a, fimkhur turin ka hrilh che u anih hi" a ti chiah reng a, patling pui pui pawn a zu man an bat ngam loh laiin Gabriel-a kher kher chu a. 

"Naupang kha a thiam lo. Chu chu kan hre vek. Motor hlau turin hrilh tawh ang che" Gabriel chuan a rawn ti chang bul a, ka hawi let a, Nu Ngaihzuali ngawt a lo en. 

"Pawi i tih loh chuan i tupa nen khan in kalsan tawh dawn em ni?" a rawn ti leh a, a vin hauh lo na a Nu Ngaihzuali pawn hnial zui chi ah a ngai lo aniang kawng sir a ding a tupa chu a va kai a, a kalpui hmawk hmawk. 

"A va ropui ve le" ti hapin Mateo chuan bike a ti nung leh a, "Min vuan nghet rawh ka tlanchak dawn" ti a min hrilh leh hnuah a tlan chhuak nghal, kawngpui hnaih zawk a kal Nu Ngaihzuali chu chil tum ni awm tak a hnaih luiin a tlan pel fua a, min rawn ankhum phak lohna chin kan thlen hnuah a tlanmuang ta deuh. 

"Ka tlanna lam hi a dik em?" a ti leh ang lawi a, a dik thu sawiin a pu te veng awmna lam ka hrilh. 

"An veng chin aţang chuan keiman ka hrilh ve thung ang che" min ti a, "Tlawnngai khanglang lo mai teh, i kal ngai lohna a nia, hriat loh kha a zahthlak loh" tiin ka lo fiam. 

In pakhat zawn a a din chuan kan thleng ta ah ngaiin ka chhuk tharh. 

"Ka tihder a" tih leh hmalam a tlan a rual a, "I mawl em ni Zoremsang?" vin zet a tih pah a ka um hlawk hlawk chuan kawng zau laiah bike a turn a, a rawn tlan let. Inphurhna tham anih miau loh avangin ka um let leh a ni ber. 

Ka chhukna bul lawk kha a pu te in a lo ni reng a, ka va han ngei mai mai tak. Midang lah chuan min lo nuih ţhaw duh lek chauh. 

"Bengchheng miah su..ka ţhawng thut dawn a nia" nui ruh ruh chung a min melh kualin Mateo chuan a hmuiah a kutchal a nawr bet a, kan lo bu nghat nghat hlawm. 

Vawilehkhatah kawngkhar a nam hawng rawp a, ban phar huangin "Surprise" a ti lut. A au ri avang a nui hak hak chungin kan lut ve a, patling pui puiin min lo melh ţhap. 

Mateo pawh ban pharin a ding khawng luah a, inchhung a lo ţhu ţhup ho lah chuan mak min tih hmel nasa. 

"Ka tupa anih hi" an zing a pakhat chuan lo ti thuaiin Mateo chu rum zetin a melh a, "Choka ah i pi a awm. Va inhnawh puar rawh u" pangai takin a tih zawm leh. 

Choka a kan luh veleh "Ipu hi kohhranah committee member a la nia, an committee zo an rawn leng khawm anih saw. Rawn au luh vak kher a ngai em ni?" Mateo pi chuan a lo ti a, chawei dawhkan kan ţhut hual ţhap.

Ka sawichhuak rih lo na a Muankima lo tel ve miah lo hi mak ka ti ru takzet. Rawn haw dawn se chu zing lamah khan a lo thlen daih tawh ka ring a, tunah lah chawhnu her a ni tawh si. Whatsapp ah a rukin ka zawt a, chhanna ka la dawng lo. Nu Puitei ten haw lo turin an ti em maw ni ka ti rum rum. 

"Thingpui ka lum ang che u. In phawt ula in inbual dawn nia, mikhual pindan pawh ka tifai vek tawh" kan lenna nu chuan a ti leh a, an rawnkal tur hi an hrilh lawk vek tawh anih hmel. 

"Ar kan talh ang a, in ţhianho in in eikhawm dawn nia, kan chhung kan tlem sia min rawn tlawh zeuh zeuh rawh u" a ti zung zung a, a fel hmel khawp mai. 

Thingpui inzawh hnuah a indawtin an inbual a, ka nghak rei ngat ngat khawp mai. Muankima chuan [Lehkha ka zir âm deuh a, ka rawn haw ta lo. Lo thinrim suh aw kan pahnih tan anih hi] a rawn ti a, tun a tak a lehkha zir a ţhahnem a ngai te chu a mak riau. 

"Khatia rawn au luh a ngai em ni? Kan zing a beng ţha lo ber pawh a phut zawk kha. I â leng lung emai" Mateo pu chuan a rawn ti lut lung lung.

"Putar ho kha an va lengrei ve, ar kan talh lawk duh asin. In siam chhungin kan leng kual ve duh a" Mateo pawn a lo ti zung zung. 

"Thlang lamah a awm reng kha..kan lei daih tawh alawm. Va talh ula" a pu'n a tih chuan Gabriel chu a tho nghal mai Mateo erawh a ţhut ngaiin a la ţhu reng.

"Kal ta che" ring deuh zawkin a pu chuan a ti leh a, Mateo ve thung chuan kun ngul chungin "Thisuk ka nei" a rawn ti chhuak sup. 

"Ar thisen lek chuan a nghawng vak dawn che em ni?" a pu'n a tih leh chuan "Nghawng ang...ka hmuh duh lem lo. Ar ka la talh ngai lo hrim hrim" a ti bul bul. Ar talh a sawi phur tehlul nen hian!

"A buaithlak ţhin...ipi in tarmit dum lianpui a nei alawm. I mit a khuap hneh khawp ang, tarmit dum bunin va talh rawh" a pu'n a tih lehzel takah chuan Gabriel-an "Keimahin ka ti mai ang" a lo ti a, "I ti thei dawn em ni?" ti a an zawh a "Ka talh fo mai" inringtawk zet a a tih chuan "Thlanglamah sawn a awm a, dawm pui i ngai angem?" chem pek pahin an han ti a, lu thin khum nghutin "Ka ti thei ang" a ti ve tlat. 

A inrintawk viau laiin midang chuan an ring chiah lo niin a lang. Ar talh lai chu kan hmu duh lo ţheuh a, amahin thlanglam bathlar lamah a kal. A thang ve vang vang a, "A talh zo tawh angem aw" kan lenna ten an tih lai mekin kawngkhar a invaw ri bur a, Gabriel chuan a ar talh tur ni awm tak chu chempui nen a rawn um lut. 

Kan tho dual a, Vulmawii phei chu a ţe teng tung. Mateo pu chuan "Khaih..khaih..khaih chempui tal kha dah teh. I ken reng chuan kan um ve ngam lo ang" a ti chul bawk a, kawngkapui a inkhar phui miau avangin ar chu choka ah a tlan kual zak zak a, Vulmawii phei chu dawhkan chungah a lawn kai der tawh.

"Ar talh dawn chuan a ke phuarna phelh miah loh a talh tur" Mateo pu in a tih hnu lawkah ar chu choka tukverh inhawng awmchhunah a chhuak. 

Kan vaiin a kalna chin hriat tumin kan thlir zui a, Mateo pu bawk chuan "Kan hmeh hman angem aw" a ti vang vang. 

Gabriel chu ka melh ru a, a chhip hiat mual mual chungin min rawn melh ve chiah a, zahzelah lei a chhuah zauh. Chempui a la hum reng bawk. 

Ţhenawm tlangvalin min man sak a, kan mipa te an rintlak si loh, kan ar eitur chu tlangval dangin min talh sak. 

"Thiam loh i lo nei miah lo anih hi" Gabriela bul a din pah chuan ka ti a, ka fiam dan avang chuan a lungawi loh hmel viau.

"I talh fel diam tawh ang chu tih laiin in rawn in um lut a" nui rah rah chungin ka ti leh a, feet 6'2 lai a nia, amah en duh chuan dah vah zel a ngai. Ka te chhe miah lo, ft 5'5 lai ka ni ve. 

"Ka khawngaih deuh a" a ti ve ngial a, ka nuih a za tial tial thung. 

"Daw lo mai teh..i chhungten an chhawr ngai lo lutuk che anih kha" ka tih chuan ngawi ngulin ka mitah min en ngur a, a chhungte sawichhuah chuan a hlim lo vek zel. Hei chu hman aţanga ka hriat tawh a ni. 

"Tikhan min en suh" ti hlakin a taksa chu ka nek zauh a, "I sawi dik" a tih chuan "Engmaw?" ka lo ti leh he haw. 

"Lehkhazir tur chiahin min duh" a hnar tuai zauh pahin a ti sup a, a ner zui nawk bawk. 

"Chutiang te chu a ţha lawm. Nang phei chu keini aiin i zirlai a har zawk hmel sia, zir nasat i ngai ngawt ang. Ka chhungte zawng zawngin min ngai pawimawh ve se chu keipawhin ka zir ţha ngawt ang" ka ti siam siam.

"Nangchu i zir peih a, class i ţhulh ngai mang bawk si lo. I chhungten zir tur a an duh phei che chuan an lawm ve ngawt ang. Sawiselna tur che an hre mang lo ang ka ring" ka tih lai te chuan hmuhnawm tih hmel deuhin min lo en a, a awmdan teh thut hi ka hrethiam lo. 

"Muankima hi ngati ngr a rawn haw ve loh le" ka ti ta daih. 

"A la rawn haw ve mai ang" a ti liam satliah a, "Ih maw..hmeichhe hmangaih deuh lo nei ta la, i chhungte duh lo tlat ta se engtin nge i tih ang?" ka ti a, ka zawhna awmze nei zet chu a hriatthiam loh ka beisei.

"An ngainat loh chhan a zir aniang chu" a tih chuan "Engti zawngin?" ka ti a, min chhang tawh dawn lo emaw tih hnuah "A sualna sawi tur hre lo va chhungkua leh nunhlui vang mai mai anih chuan ka nei lui ang" a tih chuan "Nih leh hmeichhia kha i chhungte angin awm ta se, an sualin sual ve zel ta se?" ka ti leh hram.

"Neih tlak a ni lo anih chu" a ti nghut. 

"Mahse, a tuar tlawk tlawk dawn bik a, mipa chhungten an tih ang a tih let ve chu a pawi viau dawn em ni? Dawh reng ta se, mipa chhungte khan an duh lohna lanchhuah tir reng tho se" ka tih chuan "Chutah chiah chuan Muankima a inrawlh tawh ang" a lo ti a, ka zawh chhan a hrethiam chiang lutuk. 

CONT...(Hei pawh edit loh aw...tihsual a awm pawn min lo hrethiam rih lawk dawn nia ka buai lutuk a😂)