THE GOOD, THE BAD AND THE OTHERS-14

THE GOOD, THE BAD AND THE OTHERS-14

"Eng nge a?" Nu Puitei leh Daisy te melh tawn zak zak chunga ka tih chuan "Henu hian buaina siam a rawn tum ringawt alawm. I nulat laiin nasa viau mahla i nulat lai ang chiahin ka nasa ve tho. Fate tihsual a puh mawh tur zawng tlat ho hi ka ngei zawng tak" Daisy in a lo ti tan tan. 

Nu Puitei chuan "Warden in min rawn bia a, i video tenawm lutuk avang khan a ţhianpa nen an insual chiam. Hospital a kal a ngaih phei chuan senso zawng zawng kan tum vek a ngai ang a, nangmah vang anih hi" a ti salh salh. 

"Mipa te chu an insual ve bawk ang chu, a pa daih zawk alawm. Hmangaih te chhan nan han insual bian bian mai sela, a ţha lutuk ringawt. Nutling rawn an chiamna tham a ni lo. Senso te lek lek pawisa in ngah em hi" Daisy bawk chuan a lo ti leh a, Nu Puitei lah chu a thinrim zual sauh emaw tih tur a ni. 

"Ka fapa hian tum sang tak a nei a, nangmah vanga a tum ang anih theih loh kan hlau ber. Thisen chhuak khawpin mi pakhat a sawisak phah nghal pang tawh a, thil rapthlak zawk a tih loh nan ţhen hmak ang che. I nu ka nih ve tho na anga ka ngenna che anih chu" a ti a, ka pa pawh a rawn haw ve chiah. 

Ţhianten kawng an lo kian sap sap a, a rawn rui haw lehpek. Nu Hriatpuii nen an rawn inzui haw leh lek phei chu Nu Puitei chuan a ngaihnep hmel kher mai. 

"Ka sawi ang chuan ti rawh aw..hostel i luh leh hmain chaw i rawn ei ve dawn nia" pangai tak a a tih hnuah min chhuahsan a, mihring zia hi a mak ngawt mai, a inthlak danglam thut thut dan hi ka hrethiam ţhin lo. 

"Buaina i nei lehpek em ni?" vin angreng tak a ka pa'n a tih chuan Boomer a tho vut. Nghet zetin a kut a hum a, a mitmeng hlauhawm zet chuan ka pa te a melh ngur. 

"Hetiang teh hrep hian awm lo la chu tuman buaina kan nei lovang. Vanneihi a hlim ang a, keini pawh kan hlim ang. Tu nu mahin an rawn ankhum lo bawk ang. Nangmah vang vekin anih hi mi hmuhsitna kan tawrh a ngaih" a ti nghek nghek a, a insehruh nasa in a thinrim lutuk chu a bek a pawng ţalh ţalh a, ka pa te a endan lah chu; thah mai pawh a hreh lo ang tih tur a ni.

"Dawrah kal teh ang..ti ti pah a bawl mai mai tur min lei pui rawh" ti zung zungin June chuan Boomer chu a nghawnga dawmin a kuai hniam deuh a, a beng bulah eng emaw sawiin a phun sep sep. 

A thusawi chu hrepha lo mah ila Boomer chu a pawt chhuak dawr dawr tho a, ka pa te rui hmel lah chu ka hne hluah hluah, ka zak em em bawk. 

"Nangni pahnih lah hi meng nu phut reng mai. Nu Puitei khan in laktlak loh dun zia thlengin a rawn sawi. Nangmahni vangin Vanneihi te unau hi a hmusit tak tak alawm. Boomer hi ka fuihpawrh ang a, ka la sawisak tir dawn khawp che u, bu luk luk duo tak hi chu ah, Vanneihi a hrehawm phah lutuk" a ti tan tan a, Nu Hriatpuii zawk chu kai hrang hlawkin mikhual pindanah a nawr lut nawk nawk. 

Ka ţhiante an awm ve avangin ka pa chuan engmah a sawi lova, a thin a rim hmel viau thung. 

"Adika leh Puipuii maw in nih?" ti a zawtin Gabriel-a chuan Adika men pur chu a pawt hnai a, a malchungah a hlang. 

"Aw ni e" ti ţuau chungin Adika chu Gabriel-a awmah a bei a, ani'n duat deuhin a lo kuah bawk. 

"Muankima nu chu rin loh deuhin ka hmu. Muankima ka hmuh dan a hmuh ka tum a, a ni miah lo anih kha. Mi inkawp ţha hle hle lai ţhen tur a intih ngawt te chu a hnam dang zia e" Vulmawiin a lo ti ve bai bai. 

"Lo ţhu rawh" tih leh pahin min rawn melh a, tawlh hla hretin a ţhutna bul ruak a beng thuk. Vulmawii bulah ka ţhu thla riai riai a, "Nep zel zul si, miin i biang lehlam a an ben che chuan lehlam i dawh leh te te hnuah a aia na in beng let rawh. Chu chu Bible kalh si lo, mi kut thlawn ba chiah si lova awmdan anih chu. Ngawi kar tawh suh, dirh derh che hian" a ti hlak hlak a, chutianga tih theih chu ka chak khawp mai. 

June leh Boomer te an rawn let chuan Boomer chu inchungah a chho tlang a, June thung chuan Adika leh Puipuite lawmzawng a rawn lei ţeuh. 

"In unaupa June anih hi aw Adik, Puipui. Khawlaia in hmuh paw'n au tih a ngai lo, unaupa June ti ula, tun a mi ang kha a leisak ţeuh ţeuh mai ang che u" tiin Mateo chuan ka naute a lo fuihpawrh. 

"Ka lawm e unaupa June" Adika chuan a ti tak tak a, sin tawk tawkin Mateo a ţe zui vak vak. 

"Ka rawl pui ka chhuah hmain tawp rawh Lal June, tawp chiaaang rawh" a lemchan lai ang chiah a no khan a ti duai a, a ţe zui vak vak. June chuan a ngal hmul a pawhsak a ni. Adika leh Puipuii te lah chuan an lawm em em a, eitur pawm ţun chungin an nui ar ar mai. 

"I nau kha han ngaihven rawh" June in thutak deuha a tih takah chuan inchungah ka chho a, ka ţhiante hi an felin min ngaihsak em em vek. Ka ţhatna tur an duh a, ka khawhar hlauin an rawn kal vang vang zawk. Kei hian an ţhatna ka lawm zo lo zawk a ni. 

"Boomer" ka ti lut a, tukverh bulah ţhutthleng a dawh a, pawn lam hawiin a ţhu ngawi ngul. 

"Nu Puitei chuan engpawh sawi se ngaipawimawh duh suh" ti a hrilh pah a a dar a dawm ka tum chu ka kut lo vai per lawp pahin a ţhutna aţangin a tho a.

"In ninawm vek. Ti nge inchhungah buaina hlir in awm rawn ken luh? Ka nu damlai ang khan thlamuang deuhin min awmtir ve thei lo mi? Ti nge in nunrawn hlawm em em? Ka pa lahin fate aiin hmeichhia leh ruihhlo a thlang a, nang lahin keini ho min buaipui aiin ngaihzawng neih i thlang a, chhuak rawh. Ka hmuh phak a in awm reng chuan ka thinrim lutuk hi ka puak keh thei mai ang" a ti tuarh tuarh a, hetiang hian vawikhatmah min la vin ngai lo. Nu Puitei khan a rilru natna tur ţawngkam a hmang nasa a nih ka ring. 

"Muankima hi ka ţhen ang" ka ti ve ta nge nge. Heti khawpa min dodal tu an tam chuan ka ţhen em em ang. Ka naute aia ngaihsak ka nei miah lo bawk. Keiin ka duat a ka ngaihven loh chuan tu nge rawn ngaihven chuang ang?

"Nu Puitei thusawi chu engahmah ngai suh. Min rin kha, khatiang thil kha ka ti dawn lo tih i hria a ni lawm ni? Muankima nuin in rilru a tihnat reng ai chuan a fapa hi ka ţhen mai ang" ti malh malh chungin a biang tawn tawnah ka dawm a, "Ka sawi chu i hria em? In hlim zawkna tur anih chuan ka kalsan mai ang" chiang zawkin ka ti nawn leh. 

Am zet a thaw chhuak hawkin a inla hrang a, a thinrimna beng daih a tum nasat zia a hmuh theih. 

"Ţhen kher turin ka ti lo che. I hmangaih a, a ni lawm ni?" tiin a nui ro hak a, ngah nge maw Muankima hua ang hrim a a awm tak le? 

"Nangni ai chuan hmangaih lo ve, ka hmangaih zawk vang che u in alawm ţhen ka tum. Kan inchhungah a nu a rawn an tawh loh nan te, in tan a hriat nuam loh a sawi tawh loh nan te ţhen ka tum" ka ti vin ve hlar. 

Dak deuh chunga a nghawng tuai pahin a thaw chhuak ham ham a, a chang leh tukverh ah dakin nghet zetin bar a vuan a, awm ngaihna a hre lo a ni ber. Nu Puitei khan eng chiah nge a rawn sawi ang tiin ka ngaihtuah a, Daisy zawh chian a ngai a ni. 

"Boomer" ka tih chuan "Chhuak rawh" a ti leh nghut. Chair a ţhu thla hnawkin a ep chiah a chair inhungah chuan ka ţhut ve hlau ni awm fahranin a ke a hlang a, a lu an meh sual avangin tunlai chu inah pawh lukhum a khum chawt. Ka biak zawm loh nan a ţhu kun ngur a, a lukhum hma a kuai kun daih bawk. 

"Zaninah ka ţhen ang" ka ti sap a, ka nau pindan chu ka chhuahsan. 

"A ţha vak nange?" kailawn tawpah bang nghengin Gabriel-a a lo ding reng. 

"Kan ţha em?" lo ti lehin min ti zim sunin min lo en a, "Ka hre lo" ka ti thei ţawk. Ka awm tawt lutuk hi puak darh vek se ka thawl hawk zawkin ka ring. 

"In kuah man ka chhiar tam ve vak lo a, i hria em? Tlemte chauh. I duh chuan min kuah thei ang, discount lai a nia" tiin a phun sup sup a, za lo deuhin ka nui hak. 

"Discount lai pawh nise pawisa ka nei lo" ti a kalpelh mai ka tum chuan min pawt let hrawk. 

"Gabriel midang an awm ve vek saw" ka ti bak hlur a, infiam kual mai mai ka peih lo. 

Rawn kunhniamin hnai deuhah min en a, "An awm ve lohna hmun i hria alawm" ti supin ka bek zawnah a thaw lum ham ham. 

"Inleng ka nei a, an kianga awm chu ka tih tur a ni" ka tih pawhin "I awm hnem tawk tawh. A ni lo mi?" tiin min cho let a, chutianga kan awm lai tak chuan Vulmawii a rawn hawi a, a mitmeng a ling nghal hlar mai. 

"Eng nge in tih dun reng a? Gabriel inla model fahrana kun vel kher a ngai em ni? Lucky nangpawh kha ngati nge khatianga min rawn melh vel kher? Ka thik cheu ah i ngai em ni?" a ti kha kha. A pawi ka sawi awm ka hre der lo. 

"Naaa...ka peih lo Lucky" ti hluaiin Gabriel-a chu a ding a, chu chuan min ti hrilhhai viau mai. 

"Engmaw i peih loh?" ka ti he haw a, Vulmawii lah chu a hawisawn duh der lo. 

"Puanpho min sengpui rawh i tih kha, ka peih lo. Mahse ka kalpui mai ang che" Vulmawii hriatphak ngei tur a tiin min kuah vei thlup. 

"I â em ni?" sehchilh zet a ka tih chuan "Inchungah maw? Nge pawnah zawk?" a lo ti a, "Inchung zawlah U Daisy in thawmhnaw huh a pho" Puipuiin a lo ti lauh. Sofa nghenchhan phen aţangin a lu a rawn dah lawr tet a, a awm hnai tih ka hre chiah. Vulmawii bulah a lo ţhu reng chu niin. 

Mateo leh June hmuh tur an awm lova, choka aţanga an inhnial thawm rawn chhuak erawh ka hre pha.

"Inchungah anih chu. Kal vat teh ang" Gabriel-a chuan a lo ti hmanhmawh a, min kuahna thlahin ka nghawng hnung leh darah a dawm a, min nam chho a ni ber ang chu. Hnung lam aţanga min nam avang chauh a ke pen ka ni. 

"Eng thil nge ti ni a i inhriat?" inchung zawl kan thlen rualin ka au nghek. Thinrimna inhnawh khawm sa nen, thil tih tur huphurhawm zet zet a inchher chhuan hnuk bawk a, a awmdan chu ka haw hlur mai. 

"Ka pui che anih hi" a ti hluk a, a lungawi chiah lo niin hre mah ila "Puih ka ngai miah lo. Min pui turin ka ti lo bawk che. Hetianga min lak hran vel hian ngaihdan dik lo an nei vek ang, mualpho hlim hlawt ka nih hi" ka ti tan tan. 

"Ka hria, hrehawm i tih loh nan a rawnkal ka ni bawk" a ti nghet churh a, chuti chung pawh chuan ka la duh tawk thei chuang lo. 

"Rawnkal turin ka ti miah lo che. Kan inah hian i nu rawn ang ve buan buan se i duh zawk a mi?" ka tih chuan vanvadakin a nui chhuak ta hawk. 

"Pathian leh! I rilru a va kal sual nasa em em ve, hmeichhe hriatthiam har tak i nih hi" min ti thlawt. 

"Chuan engtin zel? Hriatthiam harsa tak ka nih chuan engtin zel nge tih i tum? Min kawm tawh loh maw? Nge ka hrehawm tawrh laia tun anga min fiam kual vel mai mai hi" ka ti hlak hlak.

Cho zetin hmai zangthal haw in amah chu ka en a, chhanletna ngeiawm zet ka dawn ka rin laiin ka tukhum samah a rawn ţham a, ka inrin hmain ka hmui a rawn fawp tawn tawn. A chetdanin min ţhawn em avang leh ka hamhaih lutuk chuan chet mai nachang ka hre lo. 

Ka hmui rawn nau kauin dim lo leh zei tak siin ka kâ chhungah a lei a hawl kual nawk nawk a, ka harhchhuak chiang hle. Ka che phut a, a awmah ka nam rawk rawk. Kan inlen hleihin tha kan in ngah hleih a, a awm a ka namna chu man betin duhthaw zetin min fawp zui a, min thlah rualin a hmai a ben tumin ka tin uaih. Boruak tlachham zetin ka thaw ham ham a, "I duh chuan min beng thei ang" ngeiawm fahrana tih pah a a rawn kun hniam chuan ka ban lek kan guaih tawh mah ila ka kut chu ka hum leh. 

"Min chhan let dan tur" ka tih halh lai chuan min lo pawt chatin "Engtinmah ka ti let dawn hleinem che. Chu chu i hriat duh anih chuan" a ti zawi ruih a, ka ban rek a rawn hmerin a biang zawnah a dah a, "I duh chuan ti la" a ti nawn leh a, ka kut ka tih pharh mek chu melh zawkin a biangah a nem hnan a, "Puih che ka tum mai a ni" a ti leh sup. 

"Hmeichhe duh lo chung hmun fal a hruai a fawh luih vel hi inpuihna a ni lo. Bialpa ka nei a, nangpawn i hre vek. Min dodal tu an inlar sup sup hma khan theih chu nise Muankima hi neih daih asin ka duh" ka la ti vin hlar. 

"Ka hria, ka tum lawk a ni bik lo. Engtikahmah in inchhungah ka nu a rawn ang lovang. Nu ka nei tawh hleinem Lucky" a aw thum leh zawi ruih chu ka bengah a ri ring hle. 

"Mahse hrehawm i va tih loh hmel bik ve. Ipa'n hmeichhia khawiin zu an in ve reng lo em ni? Keimahni ang hian in buai ve luih luih lo tihna mi?" ka tih chuan "Aw, hmeichhia a khawi lova, zu a in ngai lo. Mahse keimahah beiseina sang tak a nei reng a, a ţha ber ni tur a nawr reng ka ni. A hahthlak zia i hrethiam kher lo ang" zawi te tak tak hian a ti leh a, kei aiin a vannei zawk daih tho anih chu. 

"Kei aiin i dinhmun a ţha zawk tho" ka tih chuan "Maithei..kha kha chu dahţha la, puih che ka duh. Chu zawng chu a ni mai" a ti a, "Josephine kha hetiang hian i ti ve ţhin em? A chak lohna hmang ţangkaiin i inhnaih tir a, i nin hnuah i that em ni?" ka ti khawl khawl. 

"Aw..ka that ta anih kha" a tih chuan ka tawlh hnung dawrh. 

"Engmaw i sawi? Josephine kha i that a maw?" ka ti hluai a, ka hlauhthawn tehlul nen a ri meuhin a nui chhuak ta hawk hawk. 

"Hahdam rawh tumah ka that lo" a ti leh ang lawi a, "Kei aiin hriatthiam i har fe zawk" ka ti hap. A dam thlup reng a, awka vin a hmang ngai mang lo. Chuti chung chuan maksak tak takin a awm fo. 

Inhnuai a kan chhuk leh meuh chuan kan inhlat viau tawh. Keiman ka hlat a ni mah zawk. Vulmawiin min melh ram ram reng a, "Nangmah vangin Muankiman a dawhtheihna a hloh a, mi pakhat a sawisak vak phah. Lawm tak aruangin nang lah chuan mipa dang i awmpui a" min ti deuh sek bawk. 

Ka ţhiante haw hnuah Muankima ka bia a, tun a ka biak hma hian min rawn biak a tum ngun tawh, phone ka lo ngaihven lo zawk a ni. 

"Tawp tawh mai ang" ka ti nghal thawr. Rin ang ngeiin a duh lo nasa mai. 

"Vulmawii hnen aţangin chanchin ka hria a, ka nu pawh ka hau. Gabriel-a nen in in pawh sawt viau bawk a, chuvang chu a ni em?" rum deuh tak hian a rawn ti a, Vulmawii nen hian an inkawmngeih viau em maw ni?

"Gabriel-a vang chu a ni lo. I hre tawh rau rau bawk a i nu vang chu a nia lawm. Keimah chauh min bei lovin kan inah a rawnkal a, ka naute tan a hriat nuam lo pui pui sawiin Boomer phei chu a ti hel vek. Ka chhungkua leh video te avang khan ka itawm hlawl loh tih chu ka hria, mahse ka naute hian tihsual an nei ve lo" ka ti fak fak. Gabriela vang a ni lo tak tak. Ka ţhian a nia, duhna ka nei miau lo a ni. 

"Naktukah ka rawn haw ang" a tih chuan "Aih, a ngai lo. Pathianni a nia, chu loah i chhungten an phal loh kha. An thu awih la, min ngaihven lovin i tum hlen zawk rawh" ka ti ve hmak. 

"Kha kha chu i tawrh tur a ni. Keipawn ka tuar tho. Midang pawn tuarin an tuar chhuak thei a, kan theih loh bik i ring tihna mi?" a rawn ti nghut nghut a, keimah vanga a rawn haw leh lek phei chuan a nu'n min haw zual sauh ang. Chutih rualin a tum tawh chu thlak tir leh theih a ni ngai lo. 

"Keimah vang mai mai a i tum i hlen zawh loh te a hlauhawm a?" ka tih chu nui hawk thawmin a zui a, nep deuh anga lan a duh miah lo bawk. 

"Subject har deuh pahnih ka nei tihna a ni mai" a ti mai a, a ngaih awlsam ang hian thil a awlsam der si lo. 

A zawmna aw

"Vanneih tho rawh inleng i nei a nia" kawngkhar chum pahin Daisy-in a rawn ti leh ţhin a, zanah Muankima nen kan inbe rei a, ka muhil thei lo zui bawk nen; khawvar lamah ka mu ve chiah. 

"Ava mak tak e aw..tho vat vat rawh Muankima a rawnkal" a ti chiah chu ka ţhu chhuak hlawl mai. Dar12 pelh rawk thleng kan inbia a, a rawn thleng nghal thei lo hrim hrim. Sana ka en a, dar6 a pel awrh chauh. 

"Duh i neih chuan sawi ve mai la min tihder kher lo in" ti bai bai chunga kawngkhar ka hawn chuan min nam rawkin pindan chhungah a rawn lut. 

"A rawn lang hlawl tak tak alawm. Keipawn ka mitvai emaw ka tia, ka mit ka nuai nasa lutuk. I awih loh chuan chhuk la zu en rawh" a ti mauh mai sia, dawt sawi hmel lah a pu der lo. Kan inthlah dan a ţha vak lova, kan tan chuan inţhen mai a ţhat zawk thu ka sawi chamchi anih kha. Kan inbiakna kan tih tawp dawn thleng khan inţhen ka sawi a, ţhian ni leh mai ang tiin a ngenin ka ngen. 

Daisy thusawi chu awih chiah lo chungin kailawnah ka pen thla chhat chhat a, dawt a sawi lo tak tak. Kailawn tâwp, kawngka pui bulah a lo ding run mai. 

Tshirt leh pyjama nen teh tlawng a la ni zui a, rawn tlan hrep ni awm takin a hah hmel hle. A tshirt hma, a awm zawn bik lai phei chu a val kulh a, awmze nei lo zet a a sam thur siang te chu hmuh hmaih theih a ni lo. A biang ki lai a duk kual ruih a, a hmui sir chu hnek na hnu niawm takin a kak bawk. 

Min hmuh veleh min rawn hnaih nghal ruak a, min kuah mai tum ang hrimin a ban a phar uaih a, rang lutuk a la let lehin a thaw chhuak hawlh a, a landan mumallo lutuk chuan awm a ti nuam lo. 

"Khaw nge i kal? Nizanah in inah i riak a tunah khan exer i la zo chiah tihna em ni?" ka ti hluai a, chutiang hmuh chuan ka hmu. 

"Kan inah ka la lut lo" a la ti zui a, mak ka ti telh telh. 

A hmelţha zetah chuan manganna a hmuh theih a, ka thusawi khan a nghawng viau em maw ni ka ti rum rum. 

"I kawr awm val kha eng nge? Thlan nge tui?" ka tih chuan "Tui..naupang exer la ho in ve ka dil" a ti a, hma lutuk a a rawn haw nachhan tur awm ang hi ka ngaihruat thiam chuang lo. Ka khawngaih zawk e a.  

"Lokal rawh" tih leh a kut a kaih ka rual a, nghet zet a ka kut a lo hmer let ve chuan a rukin ka nui. 

Choka kan luh rualin "Khaw nge i phone? Mite pawh rawn hrilh lawk ve tur che alawm. In in a i la luh miah loh phei chuan bungraw dahna tur i nei awm si lova, bag i rawn ak haw lo tihna em ni?" tiin zawhna ka zawt leh ţeuh tawh. 

"Ka ak" a ti sam et a, a chhungte paw'n a rawn haw hi an la hre miah lo a ni phawt ang a, a rilru a a thawh dan danin a rawn che chhuak anih ber hi. 

"I va rawn chhuak hma awm ve..a thu hrimah, i rawn chhuah hma a inthlak ve tal tur che alawm" ti nang nang chungin gas ah thingpui bel ka chhuang kai a, "Kawnpui ka thlenin ka inthlak lo tih ka hre chiah" a lo ti hem mai. A che phelh nasa lutuk chu amah nen a inhmeh lovin ka nui chhuak hak a, "Patling fa nei duah tawh angin lawm i chet" ti a fiamin ka nui nasa zual sauh. Naupang hnenah tui in a dil a, thawmhnaw a thlak lo tih hre miah lovin a rawn haw bawk. 

"Eng nge i ngaihtuah le? Fing ber tur a ngaih si hi i lo â ru zek anih hi" ka ti a, za lo deuhin a lo nui ve suk suk duh chauh. 

Thingpui ka pek hnuah a bulah ka ţhu ve a, "Inţhen i sawi leh chuan nasa takin ka dem ang che. Mi lehkhazir ţha hle hle lai ţhen tawp mai chu nunrawnthlak deuh asin" lungawi lo deuhin a phun bul bul a, ka nuih a za viau mai. 

"A chhan ka rawn hrilh vek tawh che kha. Zirlai nih chuan nu leh pa, min chawm tute thuhnuaia awm kan nia, keini aia an dinhmun a san miau avangin kan han thunun ngawt thei lova, an duh anga awm a ngai rih miau sia" ka ti zuai raih. 

"Ka nu chu ka lo hrilhfiah ang. Thil thleng kha atan pawm a harsa rih dawn a, hriatthiamna i neih ve tho a ngai. Chinfel hna chu ka kutah dah la, nangchu ti hian a rukin ka lamah ţang la, hmeichhiain a ruka mipa in puihna hi a langsar viau lo a nih paw'n mipa te hian kan hrereng tho. Kan hmangaihte hi kan chakna pakhat an ni ve a, ho te teah inţhen rawt suh" muk zet hian a ti a, a thutak run mai bawk si, lo hnial kalh chi a ni rih miah lo. 

Boomer-a rawn tho chhuak chu tim daiin ka lo melh a, Muankima erawh chuan pangai takin a lo bia. Adika leh Puipuii te rawn tho chhuakin Muankima an hmuh chuan an ri nghal chel chul a, an hlim khek vel chuan Boomer pawh a ti nui ve tawp. Ka pa leh Nu Hriatpuii ten thawm an la rawn nei lova, office kal loh ni a nih chuan ka pa a tho hma ngai tawh meuh lo.

"Tekeuhi dawr kalin kawtah sawn i bike ni awm tak a hmu reng a" Nu Puitein a rawn ti lut a, Muankima lak aţanga Adika leh Puipuii te inthiarfihlim rang lutuk chu an khawngaihthlak zawk. Nu Puitei hi an nel tawh hlawl lova, ka haw hma pawh khan engtin emaw a lo ti tawh a nih ka ring. 

"Rawn haw lo turin ka hrilh chiang viau che sia" a ti leh a, kuangkuah thanin Muankima nen a kan ţhutna hmaah a rawn ding a, thinphu a rang duh hle. 

"Ka rawn haw leh si anih hi" ngaihsam hmel fahran a tiin Muankima chuan Adika a pawt hnai a, an ngai ve sia, an hlat phal tak tak chuang lo. Anni pahnih hi chu Muankima nen a kan awm tlei ang kha an ni ve a, lenna apiangah kan hruai ţhin. 

"I rawn haw te chuan mahni in pan tlang ta che" Nu Puitein a tih chuan nin hmel zetin a thaw hawk a, kan inchhungah buaina a awm tawh loh hram ka beisei a ni. 

"Lo va phei rawh ka rawn phei ang" pangai takin a ti na a a lungawi loh zia a hmelah a lang chhuak thei hial. 

"Ka rualin rawn haw rawh. Mahni in a haw nachang pawh hre lo, atthlak lutuk mai" Nu Puitei chuan a ti leh hlak hlak tawh a, ka hrehawmna chu dahţha ta ila, Boomer zawk a ni ka venthawn chu. 

"Ka rawn haw dawn lo ka ti lo. Haw hmasa turin ka hrilh che" a ti bung hmuk a, ţhudun lo ila chu mitmeiin haw turin ka hrilh tawh khawp ang. 

"I pa ka hrilh vek dawn a nia, hmeichhe pakhat lek vanga han buai chiam mai chu" Nu Puitein a tih chuan lo pawt chatin "Anih a hnu, inrawlh mah ta che. Hmeichhe pahnih vangin ka buai der a nih hi" nuihza aw deuh tak hian a lo ti a, nuih tur ka hre ve der lo. Nu Puitei chu ka hlau a ni ber ang chu. Daisy lahin ka hlauh rukna hrerengin a nulat laia a nasat zia min hrilh chamchi a, 'A damloh lai, inhnial thei lo khawp a a ţawng ţhat theih loh lai ber paw'n tlawm zawk nih ai chuan a hmelma te a chhiat khum char char peih tho' a ti ţhin a, Nu Puitei mizia enin a in awm fu mai. 

Muankima nen an la inhnial bap bap reng a, Muankima'n "I haw nghal loh chuan hetah hian ka riak ang" ti a thu awm ang lo lutuk hmanga a sawi ţhaih hnuah a haw ve chauh a ni. 

Ka naute awm loh hnuah kan buaina nen a inrem lo deuh a rawn sawi chhuak a, "J tih kha Josephine a ni ngeiin i hria em?" a ti phawng mai. 

Hamhaih zet a ka melh ha lai chuan "J kha Josephine ah chiah i hmeh bel tihna a ni em?" ka mit a min en ran chung hian a ti leh a, "Aw..phone number leh email id thlengin Josephine vek alawm. Ngati nge? Engvanga rawn thar thawh leh nge i nih?" ka tih chuan "J kha midang ni ta se" a ti fan ruih. 

"Josephine nen kan inbiak hnuhnun ber khan uangthuangin that turin ka ti. J kha midang anih chuan ka thupekin Josephine a that tihna maw?" ka ti hluai a, lu a lo bu nghut. Lehzel chuan..Josephine chungchangah berkher chuan ka tel ve miah lo. 

"A turu hle mai, ka ţhianţhaber ka hmangaih a, hmeichhe dang hmanga runluih fe ka nih hnuah ka nei thei chauh. Chutah ka muhil lai tu tih hriat lohin min khawih a, i nu in min do leh a, Josephine thihna chungchangah ka hming a lang veleh a, buaina hian min duh bik viau tihna mi?" ka ti hlut. Awm tawt sa nen, ka thin a rim takzet a ni. 

"Josephine thihna leh video khan inzawmna a nei lo" chiang fek fawk hian a lo ti a, kei aiin a fing tih chu ka hria, mahse chiang taka a sawi mai thei chu mak ka ti tho. 

"Engtin nge i hriat? Josephine khan hliam a nei lo an tia, a muttui lai taka beih a ni ve tho ang. Keipawh chutiang tho chu a ni. He thil ti tu hian mi muhil lai a chang ran reng a nih hi" ka ti vin hlar tawh mai a, kha thil thleng teh hrep avang khan ka zirna thlengin a buai vek. 

"Josephine kha thah a ni kher lo thei, a ni ngei thei bawk. A chhungten postmortem an phal miau lova, phal se chu thah a nih leh nih loh te, a thih dan thlengin a hriat theih ang. I hriat miah loh a khawihtu che kha Josephine thattu chu ni sela a that ve ngei ang che. Pawi khawih ţhinte hian tum neiin pawi an khawih ţhin. Serial killer te hian mi nunna lak nuam an tia, an tum ber a ni. Mi an thahin thah dan bik te an nei tlangpui bawk. Thah theihna che hun remchang a neih laiin i thi miah lo. Josephine kha mipa in a chul kual lai video hmuh tur a awm ve lo. Gabriel-a nen hian thil dang vanga inţhen an ni lo bawk a. Josephine khan mipa aiin hmeichhia a duh zawk" a tih leh phei chuan mak ka ti tawh takzet a ni. 

"Engmaw? Josephine khan hmeichhia a duh maw? Engtin nge i hriat?" ka ti hlut a, ţhen ka tum vang nge thu mak pui pui min hrilh duh vanga rawn haw anih ka hre ta hauh lo. 

"A lehkhabu ka lo la kawl" a tih chuan huat vang ni miah lo, mak tih lutuk avang zawkin ka melh dawrh. 

"Chuta a thuziah ţhenkhat hmang chuan a tih theih ang chu" a ti hawlh a, thu mak pui puiin min deng dawt dawt reng mai anih hi maw. 

"Pawi khawih tu hi pawnlam mi an nih i ring em?" ka tih chuan lu min thin khum nghutin "Ni lo ang. Hostel emaw university a mi an ni thei ve ve. Kan mi hriatchian a nih ka ring" a ti mauh mai. Chu chuan min ti hlau sauh a, mipa nge hmeichhia anih a rin ka zawh chuan a hriat bik loh thuin min chhang.

"Gabriela a ni thei angem? Josephine khan hmeichhia a thlang ta daih sia, rilru na leh thinrim avanga tualthahna a ni mai lo maw?" ka tih chuan "Ka hre lo. Hnuchhui thiam ka nih bik loh hi. Hnu hma an hnutchhiah a nih paw'n chhui zui dan ka thiam kher lo ang" nin hmel zet hian a ti hluk hluk a, a bul ţan a ni reng sia. 

"Nih leh mental illness lam te?" tim ru deuh chunga ka tih chuan "Ka ring lo" tiin pangai takin min lo chhang leh ang lawi a, a thil sawi ho hrim hrim hi remkhawm dan thiam a har khawp mai. Ka bo mup ti ila a dik ber ang. 

"Inu khan tum sang tak a nei a ti che a, MA i zawh veleh a hotel siam chu em ni i tum tak?" ka ti ta daih a. Josephine chungchang hlir kan sawi a ka kham. Ka tel ve deuh reuh bawk sia, ka awm te a ti nuam lo. 

"Hunin a la hril ang chu. Ka nupui fanauten rual an awt lovang. Chu chu ka thil tum" a ti a, ka lam rawn hawiin sawiţha intih hmel zetin a nui suk a, ka lo ner khum nang. 

"I hmui leh biang te kha a na em? Nge i insual ve ngawt a?" tiin melh tur ka zawng kual a, min en reng chu nuam ka ti lo. 

"Na ang chu..min duat viau tur i nih laiin inţhen i rawn rawt ţuau a" a ti deuh kher a, a aw a nuihzatna langchhuak chu ka ngei tawk a tling hle. 

"Ka rawt ţuau kher lo, pangai deuhin anih kha ka rawn sawi" ka ti vin hlar a, ţap ţuau anga min sawi chu ka ngawih liam san mai mai thei tlat lo a ni. 

"I nu hian min do reng ta se engtin nge i tih ang? Min kalsan phah daih angem?" ka ti a, rawngbawl tur a Daisy a rawn luh ve tak avangin ka ţawng zawi ta deuh a.

"Fapa mal ka nia, an damchhunga ka bula awm tur an ni. Eizawnna ngial nghet ka nei te te ang a, awm hran theihna tham pawisa ka thawhchhuah meuh chuan min dang lui ngam lovang" thutak zet a a tih tawh hnuah pawh "A hel laklawh chuan inneih hnuah pawh a hel lui zel thei tho a, ka naute ngaihtuah an ngai bawk nen" ka ti a, hmeichhia hi chuan kan dawn thui ve ngawt mai. 

"Mipa in kan zir chuan chutiang a thleng ngai lo" a ti mai a, a ngai awlsam thei bik mai sia. 

"Hmeichhiain pasal in neih chuan in pasalte hmangaihna dawng reng mah ula hrehawm tawrh a ngaihna chin a awm reng dawn. Nu in mo a neih paw'n fa a neih belh rualin chân chin a neih a ngai. A fapa kha a ta bik leh duh duh a a thunun tur a ni tawh bik tlat lo" a ti leh a, pasal neih chuan a nawmna mai bakah a hrehawmna pawh a tam ve tih chu tupawn kan hriat tlan a ni.

Inţhen ka sawi vang mai a zingkar a a rawn haw chuk chuk leh sawitur hre mang ngai lo a rawn ti ti ve duah chu ngaihtuah chian chuan a nuihzatthlak. Naupangte siin nupui pasal chungchang kan sawi kai a, kan hun tawnin min nawr ti tawh mai teh ang.

"Zam mah ta che u..hahdamna tui nung lui neitute in nih kha" a rawn ti leh khauh a, a awmzia ka hre ta map lo mai. 

"Engmaw ka neih? Hahdamna tui nung lui chu eng nge?" ka tih hluai lai chuan ka awm zawn melh ngur chungin a kiai suk a, ka hrethiam chiah. 

"Hnute hi maw?" tih hluai pah a ka awm bawr ka kawh va chuan a nui chhuak ta hawk a.

Anu in a rawn call ngun em avangin haw a duh thu a sawi ve ta nge nge a, kan inzui phei a, kawngka aţanga a chhuah zet tawh hnuah rawn hawiletin "Nichina i sawi kha a dik lo" min en ran chunga a tih chuan ka bo leh viau tawh. Kan sawi hnem em a ni.

"Eng nge ka sawi?" ka tih chuan "Vulmawii bak hmeichhe dang hmangin ka runluih lo che. I laka ka rilru put hmang a danglam beisei a kawp ka ni" a ti nghet churh a, min thlah rawh a ti deuh tlat bawk.

Kan inzui chhuak a, pathianni tuk anih avangin khawlai a reh hle. 

"Inu in a inkhawm luih tir ngei ngei ang che" ka tih laiin an gate a ri rak a, Zodini a rawn chhuak zal zal. 

"Kan milar chhuak thar ka hmuh hlawl chu le. Tunlaiah ngawr ngawr chuan nang aia lar an awm miah lo" min elsen fe hian a ti a, chutah Muankima chu enin "I rawn haw rau rau chuan lo leng ve rawh aw. Hmanni ah ka pa'n car min laksak ve a, kan khalh chhin vel dawn nia" phur zet hian a ti zui a, a ngampa leh tawh viau mai. Nau a la pai zui. 

"Thlahrang ho hian ti nge vanram dress an hak ve ngawt zel i hria em?" Muankima'n a lo ti daih. Birthday lawm naa kal tur a an sawm lai kha ka hrechhuak zawk. Zodini takngial pawh a hawi â nasa lutuk. 

"Kawrfual var sar chu vanram kai te chauh hak tur ni awm tak a nia, thlahrangin an ha daih zel" a ti leh pek a, amah ngaihven tu te hi zawhna atthlak pui pui hmangin a be â zel mai a nih hi maw. 

"I ninawm..i mawl emai a. Tlangval a pumpa vanram leh thlahrang dress a buai te chu" Zodini chuan a ti hlak hlak a, Muankima a melh pah ram ram bawk. 

Muankiman ka dar a min kuah tak hnuah phei chuan "Rawn leng ngei ngei ang che..inu leh pate pawn an phal vek tawh" a ti ram hmak a, a kal tau nghawng nghawng mai. 

"I duh loh zawng deuh pawh nise thumak sak deuh deuh sawi kher zel a ngai hleinem. Zei lo an ti ngawt ang che" amah thlek chho ha chunga ka tih chuan "Ka zei thiam tho a" a lo ti fan ruih a, min haw ngawih ngawih tu te in kawtah ka nuih leh tak kar kar hi.

CONT..