THE GOOD, THE BAD AND THE OTHERS-15

THE GOOD, THE BAD AND THE OTHERS-15

"I inkhawm em?" Jessie in a rawn ti ţalh a, a aw aţang ringawt pawhin a hlim hmel viau mai. 

"Khawm lo, min rawn be teh hlawl a" ka ti a, June te ho an rawn zin hnuah kan la inbe leh miah lo. 

"Nia i reh vang vang sia, eng nge i an ka rawn ti duh a" a ti a, Jessie hi hriatchhuah miah loh chang ka ngah kher mai. Muankima nen a an inbe lai ni awm tak thlalak ka hmuh hnu kha chuan ka ngaihtuah chhuak leh zeuh ţhin. 

"Ti daih ila Jessie, cabin ah i kal ngai em?" ka ti deuh hlawl a, Gabriela thlalak min hmuh tir kha ka la hre ran a ni. 

"Kal ngai lo ti ila hmanzanah ka kal. Inpa nen pawh kan inhmu, a khawharthlak em a, ka ko chhuak ve hrim hrim anih kha" nui har har chungin a rawn ti a, inpa a ti deuh kher chu ka nui ve tawp. 

"I dawih tehlul nen i kal ngam ka ring lova" ka tih chuan "Gabriel-a nen alawm kan kal" a rawn ti. A thusawi chuan min ţhawng takzet a ni. 

"Eng nge in tih? Gabriela nen berkher, in in kawm nasa vak lo a ni lawm ni?" ka ti hluai a, hepa pui hian min tihder leh tawh a ni ngei ngei ang. A nui duh ngai mang si lo. Muankima leh Jessie te ka ringhlel rum rum hman a nih kha. 

"Kan inhel tawn zak zak reng a tih theih ang chu. Hostel ah hian ka rawn awm ve na a la rei lova, mahse hostel danga ka awm lai daih aţangin ka hre tawh" a ti lehzel a, "I va sawi har em em ve" ka ti vin hlar a, ka ţhiante hi ka hrechiang viau emaw ka ti ţhin a, ka lo hrechiang miah lo a nih hi. 

"Aw..a zahthlak ve alawm. Bakah ka mizia i hria ang a, ţhiante hnen a inphawrh vek chi ka ni lem lo. Fimkhur deuhin ka nung reng a, tumah ka ring lo ang bawkin miin min ring lo mah se pawi tihna ka nei lo. Josephine nen khan in anna lai kan ngah. Entirnan miin thuruk min hrilh ta se, kha an thuruk kha keimah lo zawkin lo sawichhuahsak ta se, min ringhlel tel ve daih thei a, chuvang chuan tuman an thuruk min hrilh lo mah se pawi ka ti lo. I chanchin pawh kha midang aia tlai daihah a nia ka hriat ve chauh ni" a rawn ti mawlh mawlh a, "Eng ber nge zahthlak i tih?" ka lo ti thung. 

"Aw karkhat lek kan inkawp" tih chiah a sawi hman tihah a tawp chawt. Chu thu tawi te ka hriat chuan ka ţhu lai chu ka kâng deuh awk ni maiin ka hria. 

"Jessie ka hrethiam lo che. Room inţawmin kan awm ve ren rawn tawh a, June nen hi chuan kan inpawhin engkim kan sawi dun ţhin..mahse nang chu" ka tih lai chuan "Min telh ve ngai lo" a rawn ti khauh a.

Ka ngaihtuah let a, Lucky a tih loh leh June ka tia, khum khata ti ti dunin eng eng emaw kan ei a, a ni tak tak. Kan telh ve ngai miah lo. June hian fiam zeuh a ching a, cafe ah min zui veleh zauh ţhin bawk. June in a ruala kal tur a min sawm pawn Jessie a sawm ve ngai lo. Ka nu thih khan a rawnkal ve lova, tun ţum an rawn zin pawh hian an sawm ve chuang lovang. 

"Min mamawh chang bakin ka hming in lam ve ngai hleinem" zaidam tak hian a ti a, mualphona ka tawh hnu, class ţhulh a min awmpui ni aţang chauh khan ka pawh ve tak tak chauh tih te ka hrechhuak leh zel. 

"Khawvelah hian rin tur ka hriat loh chu thuhran, inphawrh ve ngamin min siam lo tlat alawm. Josephine ang chiah khan ka inkhar khip a, ka chhuah ve theih nan tuman kawngkhar in rawn kik miah lo. Chuvang chuan hmanni a nileng a kan inkawm ve ţum pawh khan ka sawi vek duh lo a nih kha. Min theihnghilh lehnghal dawn tih ka hria a" a rawn ti khauh khauh a, kolasib a ka haw hnuah pawh min rawn biak loh chuan ka be ngai miah lo. Message takngial pawh ka thawn ve ngai lo. Kan bula awm tho siin a lo mal ngawih ngawih reng tihna a nih chu. Keini lahin hmelhriat satliah lekah kan lo ngai a, June nen kan inpawh em em ringawt a. 

"Gabriela nen in inkawp ve tawh maw? Bialpa ka la nei ngai miah lo i ti sia" chhuahchhal titih hian ka ti a, amah hnang ţangkai mai mai ţhin tu Duhsanga chauh kha a sawi ngei alawm. 

"Kan inngaizawng hleinem. Ka bialpa ni miah lo bialpa angin ka sawi thei hleinem" a rawn ti a, "Zanah in chhuak ru dun ngei a, eng nge in tih?" ka tih chuan rin ang ngeiin min chhang lo. 

"Nih chuan Gabriel-a hmeichhe duhzawng chu Josephine leh nangmah ang a zezawi deuh chi a ni maw? Puak ve phawng phawng lo, mahni a awm nuam ti chi" ka tih pawhin min chhang duh chuang lo. 

"June hi i ring em?" a rawn ti ta zawk a, "Ka kawr chhar kha ka hlauh em em nachhan i hria em?" a ti zui zat bawk a, "Ring e, ka ţhianţha ber a nia, Josephine kawr ngei ni a in hriat i chhar nawlh theih dan kha chu ka hre lo" ka ti a, June khan Josephine ta ngei a nih thu a sawi a, chuzawng chu ka hriat a ni mai. 

"A hrang aniang, Josephine kha a thla a hrang ang a, kawr kha kan hmuh turin a rawn dah aniang" tiin thu atthlak zet mai a sawi pek a, hlau viau mah ila keichuan a hran em chu ka ring lo a ni. 

"Hrang lampang chu sawi lo teh ang, June a rawn zin daih si a, keimah chiahin ka awm dawn" amah bawk chuan a rawn ti leh a, "Ih maw..Lucky, June leh Gabriela te hi an hmeichhe duhzawng a inang tawp, chhaih ngei ngei rawh" rawn ti velehin a nui pah hak hak a.

"I sawi takah chuan tuna June bialnu ni mek leh Josephine kha an zia a inang tawp. June nen pawh an lo inkawp ve hman reng lo maw? Tu emaw min hrilh dan takah ţhianţha a kan ngaihte pawh hian zep ruk an nei ţhin sia" ka tih chuan "Em em che hian...Josephine te chuan mipa alawm a kawp ţhin, Gabriela te, i hrethiam mai lo mi? Hmeichhe pangai chuan mahni anpui an kawp nang" a ti a, a duhthaw hle. 

A la hre ve lo a ni phawt ang a, keichuan Muankima thusawi kha ka hre ran a, ka hrilh chhawng duh lem lo. Muankima leh June lo chu rintlak ka hre tawh lo a ni. 

Eng eng emaw kan sawi hnuah kan inbiakna kan ti tawp ve thei hram a, ka phone a sa vang vang mai. Boomer-a inkhawm bang chu Tintin-a leh a nau Sensiari te nen an rawn inzui lut hlawl a, mak ka lo ti angreng hle. 

Tintin-a te nen hian vengkhatah kan awm lo nachungin kolasib chu aizawl ang em emin a la lian ve lova, ka nau ţhianpa ber anih bawk avangin Tintin-a te chhungkaw chanchin chu ka hre ve nual. An unau an rualin paruk lai an ni a, Sensiari hi an tlum ber niin a pawn chhuak tam lo hle. Mak ka tih chhan pawh a ni pakhat. 

"Teh hlawl cheu chuan" ka lo ti hluai a, ka bulah Adika rawn ţhu tharhin ka malchungah a ke a hlang a, a pheikhawk ka lo phelhsak. 

"Ţhianhoin chaw kan eikhawm dawn a, Boomer hi inthlak fel se kan in lamah kan let ang. Sensiari hi chu heti ziah hi, mak ti vak duh suh, khuahkhirh nasat apiang hian an chhuah ve chhunah chintawk an hre lo ţhin" a ti zung zung a, a nau a sawisa kual vel chuan nuih a ti za angreng hle. Sensiari lah chuan "Dawt min hrilh vang anih kha" a ti ve hlar a, inchhang bung an nia, an awm dun ka hmuh apiangin an inhau ziah. An in ngai angreng phian tho a, an ute ho hi chiang takin ka la hre ve lo na a an puitling hlawm viau an tih chu ka hria. Kohhranah an inhmangin a thawh hlawk ber pawl an ni a, an entawntlak takzet a ni. 

Chutianga kan lo ţhut ţhap lai chuan mi pakhat a rawn lut a, Boomer pawh choka aţangin tui bottle kengin a rawn chhuak ve chiah. A kamis kilhna chu phelh vekin a inhawng huau tawh a, kan inleng pain "I pa a awm em?" a tih lai te chuan tui in pahin uluk deuhin a lo en reng a, ngaihdan dik lo a neih leh ka hlau khawp mai. 

"Aw awm e, a la tho lo a, lo ţhu rawh kan kaitho dawn nia" ti zung zungin ţhutna tur ka kawhhmuh a, a hmel leh a ţawng thlukah chuan mizo diktak a ang lo. Burma lam mi a nih duh hmel lutuk.

"Ngatan nge i tih?" Boomer chuan chiang angreng tak hian a ti a, "Ka hmu duh mai mai. Kan inhmuh lohna a rei tawh a" awn deuh hlek hian a lo ti ve thung a, Tintin leh Boomer te chu awmze nei deuhin an inmelh a, kei lo chuan an hmu kher lovang. 

"Mami i pa chu min kohsak teh" a ti leh a, "Aw ka'n kaitho ang e" tih leh thawh ka rual a, kik lem lovin ka pa pindanah ka lut. Nu Hriatpuii hmuh tur a awm lova, khumah amahin a lo mu duai a, khum bul chhuatah zu bur a let ngât a, ka nu nen a an thlalak chu khum bul tho a dawhkan inhungah a ngai ngaiin a la intar. 

Be peih lo viau mah ila "Pa" ti a ko reng chungin ka sawi det det a, rei ngial ka beih hnuah a rawn harh ve hram. 

"Eng nge ni?" a ti vin hlur a, "Inleng i nei, a hming ka hre chiah lo a, mipa kum35 awm mi vel" tiin chipchiar deuhin ka hrilh a, ka pa chu a tho rang hle reng a ni. 

"Rawn luhtir rawh" a ti nghut a, cigarette phawrh rawk rawkin a ţan zui nghal. 

"Pa..chaw ei mang lova zu i in reng a mei i zuk sek bawk chuan i hriselna in a tuar thuai ang. Ka chunga thil thleng zawng zawngte avang khan keichuan engtikahmah ka ngaina tawh dawn lo che. Mahse, ka nau te vang talin dam reng ang che" ka ti hram a, office a kal dawn hi chuan a thar ve vur zel a, a rawn haw a, Nu Hriatpuii nen an inbekbawr sar sar a, chaw ei a hun meuh chuan a rui viau tawh zel. 

"Ka pu, ka pa chuan rawn lut rawh se a ti" pindan kawngkhar pawh phui pah a ka tih chuan Boomer a lo ner nawk. Chupa chu ngunthluk fe hian a en ngur reng a, hmuh kim loh a neih ka ring miah lo. 

"Pindan chhunga inhmuh ngai hial chu a va pawimawh awm ve" rum deuh tak hian a ti a, ka ngaihven duh lem lo. Kan inhnial thinrim leh ang tih ka hlau a ni. 

"Naa..insiam mai mai teh Bawiha, Hriat alcohol-i nen ngawt a an awm ai chuan a ngaihţhatthlak zawk" Tintin-a chuan a lo ti hlauh a, Boomer te ang rual chu an ni hrim hrim, chhungte thu aia ţhiante thu ngaih pawimawh zawk chang an ngah. 

"Daisy nu kha maw?" Sensiarin a lo ti ve khauh a, "I hria em ni?" ner nang chunga Tintin-an a tih chuan "Hria e..hria tih lemah Daisy kha Pa Lawma te inah a leng ziah alawm. Zu zuar an nia, card den an hrat bawk si. Daisy pawh a tel ve ţhin alawm. Patling zingah a lai takah a ţhu a, a nui ring ber ziah" nui kar kar chung hian a ti a, Daisy ka mitthla lo thei lo va, a inhmeh phian mai. 

"A inhmeh khawp chu" Boomer chuan lo ti hlukin a nui pah suk a, kan ngaihdan a inang ve teh mial e. 

"A thawveng sia, ka kawm chak a nia" Sensiari chuan a lo ti leh zeuh a, "I kawm rual a ni lo. I u u leh ang vel anih kha" Tintin-an vin deuh taka a tih chuan lei a chhuah zauh a, a zah hmel hle. 

Sensiari hi a hmelţhat bakah a hmel hian pawi a sawi lo reuh hle a, a zahzum hmel tehlul nen harhvang leh nung ve tak a ni thung. Phoebe kan sawi ang em em a ngo a sawi tur a ni lo na a tuman hang an ti lovang. A vun a thianghlim sar a, a hmui lah chu hrisel hmel takin a sen siah reng a, makeup a hmang lai ka la hmu lo na a a lang thar var reng. Tintin-a sawi dan takah an school ah chuan Phoebe nen an langsar ve hle a ni awm e, upa zawk a ni bawk a, Sensiari ai chuan Phoebe a sang zawk daih a, Sensiari chu inkhawm naah pawh pawnfen chhing la feng rual lek a ni. 

Ka ţhiante rawn lut chu an phul leh hlut tawh a, Gabriel-a ka lo en deuh bik. Dawt min hrilh avang khan ka thinrim ţun a, Jessie nen an inkarah eng emaw a awm tih Jessie thusawi hmangah ka hrethiam, chuti chunga bialnu nei lo ang hmak a a awm te chu ka haw hlur mai. Muankima a awm ve avangin inbiak falna hun kan nei miah lo lehnghal. 

Boomer-a inthlak zo rawn chhuk chu ka pa inleng pa nen khan an intawk hman hram a, a endan a dik chiah lo niin ka hria a, buaina a siam leh rum rum duh mai ang tih ka hlauin ka ip ru leh nasa tawh. 

Ka pa leh a inleng an rawn chhuah meuh chuan ka ţhiante pawh an ngawi dâk a, thil hmuhnawm deuh en ang mai an ni. Chupa lah chu tumah min en let ve lovin a chhuak nulh a, midang awm laia chhungkaw buaina sawi chi a nih rih miau loh avangin Boomer chuan Tintin-a a hui zauh a, Sensiari pawh a ding ve nghal zat. 

"La leng ve rih rawh u, kan haw daih dawn asin" ka ţhiante chuan an ti na a "Inkawm nel lo law law ang, kan ngai lutuk palh ang che u" Tintin-a chuan a ti deuh tlat a, Sensiari hnunga dawmin a kaltir hmasa a, "Kan ti dawn ta em?" tiin Boomer a zawt zui zat. 

"Aa..teacher ten hmu ta se?" fan ruih a tih pahin Boomer chuan lukhum a khum a, thil ţha tak tih an tum ka ring lem lo. 

"Eng nge tih in tum?" ka ti chang fak a, min rawn en ţhap a, ka ţawng ring bawk em a ni. 

"Tattoo chhut an tum, an sawi ve ziah alawm" tiin Sensiari ber chuan min lo chhang a, an hmeichhe hruai ve chhun chu an nam chhuak nghal rawk rawk. 

Boomer zawk chu rawn let lehin "Ka zawhte note ho kha lo veng uluk ang che" min ti a, Mateo a melh zawk hnuah ngaihngam chiah lo âwm deuh hian a chhuak a, zawhte râl a ţhu vung tak alawm. 

"Rawn let ve nghal mai la" tiin min thlem ngial hlawm a, ka duh lo thuin ka chhang zel. Vulmawii lah chu Muankima hnaih takah ţhuin a bekbawr sar sar reng a, Gabriela nen a min en tawn pah kher zel chuan ngaih a ti ţha lo. A zualko a nih ka ring mai a, min fawh luih lai kha a hmuh loh hram ka beisei. Muankima chu Vulmawii ţawng zat zat lai chuan a lo nui ve suk suk a, chu chuan tlemin awm a ti nuam deuh. 

"Josephine kha thah a nih in ring ve em?" kan awmkim ţhep ţhawp laiin Vulmawiin a rawn sawi chhuak ta nge nge e. 

"Ring lo" Gabrielan a lo ti hmuk a, a nin hmel hle. 

"Ni maithei a, ni lo maithei bawk. A thla hi hrang vak se, police in an chhui lo rau rau a nih chuan amah rawn inpuang se" Mateo chuan a lo ti a, thlahrang hlau ber a nih vangin kan thawm hak. A nui apiang chu kutthlak mai hreh lo hmel pu hian a melh kual a, kan nuih loh phah lem hlei lova. 

"Thah a nih ngei chuan a thattu chu hostel a awm ve a ni tih ka sawi ngam" inringtawk fe hian Vulmawii chuan a lo ti leh a, at hmel viau siin a ngaihtuah ve fe a nih hmel. 

"In buaipui peih e...an phum tawh a, ruang an phawrh leh a nih loh chuan hnuchhui thiam te tan pawh chhuichhuah ngaihna a awm tawh lo" June chuan a ti ve thung a, ka ngaihdan chiah a ni. 

"Keichu ka mumangah Josephine kha ka hmu ziah. In duh chuan min nuih ru pawi ka ti lo emai. Mahse ka hmuh hian a tak a ang thei lutuk. Ka khum tlanga ţhu hian min enreng zel a, mumang angin ka hre na a rawn ţhu tak tak a ang ţhin" ti tu chu Vulmawii bawk a ni. Kan melh ţhap a, Vulmawii berkher. 

"Ţhian in nih loh kha" ka ti ta nge nge. Ka insumthei thlawt lo a ni. 

"Resort a kan kal chang leh a huho a kan chhuah changte hi chuan kan inzui ve ziah alawm. Chuvang chu a nia Gabriela nen a an chungchang pawh ka hriatchian em em. A boring ka ti viau na a ka bulah khan a awm tam ve" a ti nuah nuah a, sawi nuam a ti chiah lo tih a hriat. 

"Keichu zawhna ho te te min rawn zawt ţhin tih lohah chuan kan inbe ngai vak lo. Amah kha kawm nel a har em a" ka ti a, kan ngaihdan kan sawi nasat tehreng nen Muankima chu a ngawi ran a, a ngaihdan neih ve te kha ka hnena a sawi bak chu a sawi chhuak leh tawh lo. Thu chiang a hre bik tlat lo a ni. 

"Josephine angin ka hrang der dawn em maw ni le. Ka tih ţhaih kual vek ang a, amah thattu chu a awmdan a danglam hrim hrim ang" Vulmawiin a tih chuan Muankiman pawi a lo tih hmel khawp mai. A sawi loh tur sawi ang hrimin Vulmawii chu a ţhu lut ta daih a, be mah ila kan be ţawng zo tawh lo ang tih ang vel a ni. 

"Thawm chu a nei reng alawm. Tupawn kan hria ang chu, kan beisei sa anih hlawm vangin kan buai vak phah lo mai mai zawkin ka hria" June-in a tih chuan Mateo chu a hawi tang hra tawh a, keipawh ka bang bik lo ang, ka inhmu thei lo mai mai zawk a ni. Thawm ka hriat ve ngai miah loh laia an hrereng bik hi a mak tih loh rual a ni lo. 

"Keichu thawm tak chu ka hre lo mah se ka mumangah ka hmu reng" tiin Vulmawii pawh a rawn ţhu ngil veleh tawh a, Gabriela leh Muankima ten engmah an sawi lova, keini chuan kan ngaihdan ho te te thawh khawmin thil ni thei tur ang kan ngaih ruat kual nasa mai. 

"A room piah lawk a awm ho an khawngaihthlak, single room ve tho a ni sia, mahni a awm nuam ti ho pawn nuam an ti tawh lo" June chuan ti lehin "An hriat leh hmuh ţhenkhat phei chu mihring tan tih theih a ni lo an ti" a ti zui zat a, hostel ka chhuahsan chu ka lawm letling tawh zawk. 

"A thla a hrang an tih vang te, mumanga ka hmuh reng vang te hian a nia thah a nih ka rin. Ni lo se chu heti em em hi a ni lovang. A lungawi lovang a a chawl hahdam thei lo aniang" Vulmawiin a tih chu kan pawmpui tlang, Gabriela chauh lo chuan. 

"Mipa lam chu min tih ţhaih ve lovang chu tiraw?" Mateo chuan a ti pek a, Vulmawii a ner nang nang mai. 

"A thla in thudik min hrilh se i ti zo chiah a ni lawm ni? A thla chu hmu ta pawh nila au vak vak lovin 'sawi rawh, inpuang rawh' lo ti ang che" a ti hlak hlak a, rin ang chiahin Josephine aţangin keimahah an pakai. 

"Muankima kha chu ka hmuh phakah a awm reng a, ka rui ve vak lo bawk. Mateo zai lung lung ri ka hre reng bawk a, mu turin kan lut ho thlap bawk. June leh Gabriela ka hmu lo reng reng" Vulmawii chuan a ti lehpek a, midang a kher tel zel kher a, June pawh a ngaihdan a nih loh hmel viau. 

"Min ringhlel ve hrim hrim a nih kha. Kha thil kha ka tih a nih i ring chiang lutuk. Josephine chungchangah pawh nangmah chiahin thawm i hre lova, nangmah chiahin mumang i nei lo. Hre ber ang khan awm vel lo mai teh" a ti ta hlak hlak a, engpawh sawi ila kan sawi kaw zo ngai lo. A tawpa inhauh a ni mai. 

"Hmm..in inla ngawi thei mai anih chu. Thawm ka hria pawh ka ti bawk leuh, mumang in neih ve te chuan sawi ve ula, police kan hrilh ang a, a chhungte kan hrilh leh anga, ruang phawrh an remtih chuan an zirchiang leh ang a, an chhui thei mai dawn lawm" Vulmawii chuan a ti zung zung a, sawi tur ka hre ve der lo. 

"Jessie in bathroom ah kawr a chhar a, Josephine kawr ngei a ni tiin June hian a sawi a" ka ti a, kawr rawng leh a awmdan vel ka sawi chuan kut beng meuhin Vulmawii a lo nui hak a, "Awii...ka awih lo turu lutuk. Tu emaw in a dah chawp aniang, kha kawr kha ka hrechiang emai, Nu Hlimin a intihtheihpui em kha, hmeichhia zawng zawng chu min hmuh tir vek ang chu. A thih ni khan Josephine nen kan inhmu a, kha kawr kha a ha ngei alawm. Deusawh fe in "Nu Hlimi zawrh duh dan a common emai ha tawh suh, kawr dang nei lo pawh i ni lo. Khatiang cotton ve mai mai, a man tlawm chi lehnghal' ka ti vel a" a ti zat zat a, kan hlimpui ve vak loh vang nge "Ka tih ve ţhin dan hrim hrim a nia, a ho e, engahmah a ngai lo" a ti nawi niah niah mai. 

"In sawi ho e. Sawi reng lo ula a tawp a ni mai. A chhungte pawh an ngawih hmak hi" Gabriel-a chuan lungawi chiah lo tih hriat zet hian a lo ti a, "Aww..a chhungte chuan hmingchhiat an hlau alawm. Zoram mipuiin an hrevek dawn a, Josephine nun dang thlengin an phawrh fai vek ang a, thil inti hria an tam si, khang zawng zawng kha an duh lo a ni mai. A hminga chauha rawngbawltu chhungkua an nia" Vulmawiin a ti leh salh salh a, kei aiin an hrechiang zawk vek mai. 

"Tu nge i rinhlelh?" kan tih chuan "Hetah hian a awm ve, mahse ka sawi duh lo" a ti mauh mai a, Muankimi nui hawk thawmin a zui a, a phenah Vulmawii a ţhu pil leh daih tawh. Anni pahnih hi thik enah ka en tawh hauh lo. 

"Khanglang che hian" June in a tih hrawk chuan Muankima phen aţangin "Tunah thil sual ti tu a lo thinrim ber ang" a rawn ti leh a, kan nui ru tet tet tawh hlawm. 

"Keichu ka ni lo" lo ti thuaiin thinrim lo awm takin Mateo a nui lui huk huk a, choka a thil tla ri bawl chuan a nui lai a ti tawp chawt a, kan thusawiin zir miau hek lo, kan phu nasa hlawm hle. 

Inthlahrung miah lovin Kungawrhi a rawn chhuak a, "Zawhte anih ka ring reng a" an ti leh sap sap a, an hlauh viau hlawm kha le. 

"Khaw nge Daisy?" June in a tih chuan ka hriat loh thu ka sawi na a Sensiari sawi tak te inah khan card a den ka ring. Min hrilh lovin a put ru zeuh a, a sawi hreh aniang. 

Thudik kan hriat hmain an haw hlawm a, Mateo erawh a pu'n a phal loh avangin thawhţan zingah Muankima nen an let rual ang. An haw tur kha ui tak chungin ka thlah a, "Kan lokal leh vat ang. Class ţhulh mai mai chi a ni si lova, weekend ah lokal leh kan tum ang" an ti ve ngei a, an rawnkal ka ring chiah chuang lo. 

Mateo chuan Adika leh Puipuii te a phur chhuak a, a chhuah hmain "Chance ka pe lo che u nia" a ti hram a, ka pa a awm avangin ngaihngam deuhin min chhuahsan. 

"Muankim nang chu inzir puitling rawh aw, i ţhiannu lah a chawl daih a, zir luih tir theih reng reng loh" ka pa'n a tih laiin "I inleng pa kha hmuh tawhna ka nei" a lo ti thung. 

Ka pa chuan muk deuhin a en a, "Khaw nge i hmuh?" a ti hluk a, a awki a dam tawh miah lo. 

"Fb ah hian chanchinthar tarlanna group a tam a, whatsapp ah nen. Chutah chuan a niang" tiin duhdah deuhin a chhang a, ka pa hi zah tlak a ni lova, keipawn ka zah lo. Mahse midang chuan zah lo deuhin be ve kher lo se ka ti. 

"Chhang ţha ve mai la" ka pa hriat hlau tak hian ka ti a, ţhudun kan ni bawk a ka ţawngzawi viau a ni. 

"Police in an man tawh" chang khel khawl hian a ti leh a, ka pa hmel chu hmuh a nuam tawh lo kher mai. 

"Ka ţhian a nia, misual a nih vang maiin ka thlauhthla thei bik lo alawm le" a ti a, vawikhatna atan ka pa'n min en ngam lo ve hial. 

"Ţhiante tih ang kan ti ve kher chuang hleinem. I ţhianpa ang kha ka hre nual" Muankima chuan a la ti tak deuh deuh a, chhuanlam siamin pindanah ka pa a lut daih. 

"Ngatinge khatiang i sawi?" tih pahin a malah ka chum ţawlh a, na ti awm pawn a awm lo. 

"Pa chauh in nei tawh. Ka pu anga awm ve lo turin ka duh" a ti a, a thutak viau mai. A pu chanchin chu ka hre ve tawh alawm, vawikhat ka hmu ve tawh bawk. Smuggler a nia, a inhnamhnawih nasain police pawn an man hleithei lo. A tawpna erawh a hlimawm viau lo a ni. Ka pa hian a hna chelh lai zahawm tak phenah hian engnge a lo tih? Khatiang thil kha a ti ve em ni? Zawhna ka ngah nghal hle mai. 

"Khapa kha i hmu tawh tak tak em ni?" ka tih chuan "Hmu lo" a ti leh daih bawk sia, hrechiang a intih vei nen. 

"Dawt i sawi a ni maw?" ka ti hluai a, ka thin a rim lek lek a ni. 

"A hmel a phat nghal dai kha, ipa lehzel in chân chuan in hma hun a thim lutuk. Nang chauh i ni lo, nau pathum lai i neih hi. In a i awm rau rau chuan ipa chetdan hi chik viau rawh" min ti a, rilru a vak thui a, khaw hawi a tawi tuk thung. Ka chhungte tal chuan rilru hahdamna min pe ve se ţha tur. 

"Lehkha i zir duh tawh loh chuan midang thil tih sual vang chauhin nangmah i intichhia a ni dawn a" a ti leh khauh a, engang pawn min nawr se kal ka tum tawh lo. Mi zawng zawngin min hmuh dan a dik lo zo tawh a, vai ramah anih ngawt loh chuan Mizoramah ngawr ngawr chuan tlangnel deuhin ka awm thei tawh lo ang. Ţhiante phenah zel ka awm ang a, an hlimthla ka ni reng tawh dawn a ni. 

"Min nawr lui mahla ka let dawn lo. Tihian inah ka naute ka enkawl ang a, Puipuii leh Adika phei chuan nu ang maiin min en a, ka tello a awm an hreh ngawih ngawih tawh a, nakinah ka nauten min la enkawl let ve ang a" ka tih chuan a nuih a za viau mai. 

"Diakkawn a in building luah tute kha chhuah tir la, sumdawng mai rawh" min ti ta bawl a, "Mihring chuan hma hun kan hre lo. Inrin ve a ngai" a ti leh a, kan chhungkua min hrechiang tu a nia, kei aiin a ngaihtuah tam zawk bawk ang. 

"Ka pa'n a phal teuh lo mai. Sumdawng duh ringawt pawh ni ila pawisa hlawm a ngai a, ka nei lo nghal pang. Ka pa ka dil chhuak thei dawn der lo. Zirna chhunzawm ka tum loh bur avang hian min haw hlur a, biak pawh kan inbe hleithei lo a nia" ka ti bawrh bawrh a, kawng a ping rih a ni.

"Pawisa khawl ka nei nual a, i hmang vek dawn nia" a ti hem mai a, a ngaih anga awlsam hi ni ţhin se ţha tur. 

"Chutiang a ngai lo. A thu hrimah, i nu khan tum sang tak nei angin a sawi che a, hotel siam emaw sumdawn vel chu em ni i tum tak?" tiin a mimal chungchangah ka pakai daih.

"Beidawn tawpah chuan ka sumdawng mai ang chu" a ti hap a, a nih tum tak min la hrilh ngai lova, hnathawh tur a hmuh lo anih chuan a sumdawng ang tiin a sawi ţhin. 

"Zir leh la chu duhthusam a nia, i duh lo anih rau rau chuan keiin ka zir chhung inven nan lo sumdawng rawh. Resort vel kha ka pa ka sawipui ang ka tih laiin hetiang hi kan ni leh sia" a ti a, nuam lo a tih hmel kher mai. Min khawngaih tlat ţhin vang hian hrehawmna a insiam tel ve zel. 

"Ka duh reng reng lo. A hmun kha a nuam ka ti ringawt alawm. Ka kal nawn duh tawh miah lo lehnghal. Chu bakah resort enkawl tur pawh lo nei ve ta tehreng ila, ka vanduaina kha ka hrereng tawh dawn a, nuam ka ti chuang lovang" ka ti deuh duah a, Nu Puitei ka beisei ruk reng laiin a rawn lang miah lova, Muankima hian a vau ve a ni maithei. Boomer pawn a ngaihdan a thlak phah ngei ka beisei. 

Aizawl a let leh vat tur a nih avangin zanah a rawn leng leh a, inchung zawlah kan ţhu. A bawp pahnih inkara ka ţhu chu hnunglam aţangin min kuah a, van a thiangin zan lam chu boruak a nuam hle. 

"Keimah vangin an chhaih zeuh zeuh reng dawn che a, insual phah nan hmang tawh reng reng suh. Thil ţha lo tih phah nan a i hman chuan i nu a hel zel dawn a, min ngaina thei tawh lo ang" ka ti malh malh a, a khup a tun rualin ka lo vuan nghal hmak a, a awm leh ka hnung a insi chial a, mipa dang bulah inveng deuhin ka awm reng a, Muankima chu a ni ve lo, a bulah hian ka thla a muang ţhin. 

"A hel tawh lo ang" a ti mai a, engti zawngin nge a nu a kar ka hre lo na a engemaw tak a ti dawn tih chu ka hria.

"I zak ve ţhin em? Ka mualpho rup a, inthiarfihlim vat mah ila miin kan inzui nasat zia an hre tho a" ka tih chuan rawn kun pheiin ka darah a khabe a nghat a, kan biang a insi lek lek. 

"I duh reng vanga thleng chu nise ka zak ang a" a tih lai mek chuan "Min kalsan bawk ang a" ka lo tih khalh a, a nui hawk chuan min rawn nghawr a, ka lo nui ve ringawt. 

"Ka pawm thei tawh kher lo ang che. Ser a awm tawh dawn tlat a, mahse in unau hian ka ngaihsak zui tho ang che u" a ti chhuak ta nge nge a, kan pian ve ve hma aţanga in ţhenawm tawh kan nia, min hlamchhiah ngawt theih chu ka ring bik lo a ni. 

"Ka nu kha la dam ni se chuan tun ang em em hian hrehawm ka ti lovang. Min lo thlir reng te ka hlau a, chuvang chuan ka nu hi ka be duh ngai miah lo. Ka ngaih thu pawh ka chhakchhuak ngai lo. Vanah hlim takin awm se ka ti. Min rawn thlir anih chuan a na lutuk ang. Na turin ka duh tawh si lo va" ti a ka phun sep sep lai te chuan ngun thluk fein min lo en a, a lam ka hawi chuan min lo fawp a, a rem lo viau na a nuam ka ti tho. 

Min thlah rual chuan "Min hmangaih tih chu ka hre tho a, mahse i sawi ngai miah lo" ka tih chuan a nui suk ringawt a, ral lam a thlir leh a, a sawi dawn lo takngial emaw ka tih hnuah "Hmangaihna hi chu a hlu a, sawichhuak nasa apiangin an hrethiam lo. A hlutna an hre lo" a ti zawi ruih a, ţawngtam lo mi anih avanga sawi lo mai mai emaw ka ti ţhin a, min hmangaih zia chu a lantir chamchi tho ţhin. 

Puipuii te a rawn dah hnuah Mateo a haw a, ţhutthlengah an muhil bam tawh. Dar12 a ri tawh a, Boomer a la rawn haw loh avangin Muankiman min nghahpui. Chhuat dungah ka vei tawn sek a, Muankiman biak tumin a call ngat ngat thung. 

"School naupang, pawl12 lek a la nia, haw hun a hre lo nghal ringawt a, a fapa piansual nasat lutuk hma hian ka pa hi insiamţha se ka ti ngawt mai" tiin ka ang leh hlak hlak ţhin. 

"A rawn haw ve mai ang. Mipa a nia, an la intihlim ve rih aniang" Muankima chuan a lo ti a, a dam zawngin a la na a a rilru a nuam chiah lo tih chu ka hmu thiam ve tho. 

Dar1 velah a rawn lut ve hlawl a, a kun ngul a, a pai khut rual chuan kawngka biang a vuan a, Muankiman lo pui vat lo se chu a tlu daih ang. 

"I zakthei lo..i va rui em em ve" tih pahin ka pan phei hmawk hmawk a, an zawn ka thlen chuan ţhutthlengah an lo inţhuttir fel tawh. 

Hmai khuh nan a a hman a lukhum ka pawt thla hlawk a, chutah chiah chuan a hmai thi nasat zia ka hmu. A mal a kiu nghatin a ţhu kun ngul a, chhuatah thisen a far. 

"Eng nge awmzia? In insual em ni?" tih ruai pahin chhuatah ka ţhingţhi a, a khabe dawmin ka kuai dak a, a khabe ah ringawt pawh thisen a kai luai. A ka chhung aţanga rawn chhuak a ang zawk. A ruih tehlul nen zu rim a nam miah lova, thisen rim lo chu hriat ka nei lo. 

"Kha thisen kha hrukfai sak rawh" tiin Muankiman lapaw hnawm chap hi min rawn pe a, a lo ti huh hman nual mai. 

Boomer ka thlah rual rual chuan ţhutthlengah a let thla tawp a, a chau viau a ni. 

"Ka phone ah khan Tintin-a number a awm. Han be teh" tiin Muankima chu thu ka pe leh tawp a, ka phone chu a ban ve mai bawk a. 

Ka nau chu ka mut zangthal tir a, a taksa a na a ni chek ang chu a lo ţhen chawk chawk a, a hmai a khem nian nuan a, a mit dinglam phei chu a vung phui lo chauh a ni tawh. 

Chutia kan inbuaipui lai chuan ka pa a rawn tho a, Boomer a rawn thlek vung vung hnuah "Zahpuiawm lutuk. I insual pek a ni maw? Pawisa hman leh buaina thlen chiah in thiam a, han mutsan rawh u. Khatiang misual buaipui a ngai lo" a ti tawn tawn a, ka buaipui loh phah lo. 

"E..Tintin" ti a Muankima a kalsawn hnu phei chuan "Eng hian nge ti piangsual zo che u ka hre lo. Mi fate pawh an paten zu an in, zu zuar pawn fa an nei. Nangni anga khaw lo an awm lo reng reng. Chhuak thei tawh miah lo turin i ke te kha lo ti tliak se ţha tur a nia, ka buaipui dawn hlek lo che a nia, damdawi man pawh min dil suh ang che u. Adika leh Puipuii ten an rawn entawn che u ang a, miin an la nuih ve sup sup ang che u. Naupang te si thi hnuanga rawn haw rual pawh i ni lo, nu leh pa bula awm lovin tei rawlai vel mai mai ula a ţha zawk ang. Inu in chhun a, tumah in fel lo. Pasal te pawh kham khawp lo kha nangmahni vang chauhin ka pawm a, min rulh let dan hi a rapthlak lutuk. Heivang hi alawm ipi leh pu te pawn an ngaihsak duh miah loh che u, fahrah tur tak in fahrah a nih hi " a ti khur khur a, "Mi hurnu fa ni awm in ni" a tih leh phei chuan ka ţah loh nan ka thaw chhuak halh a. 

Boomer a taksa che chu "Che suh" tih ţuau pahin a awmah ka nam a, ka ţahchhuak lutuk chuan ka aw a ti dik lo zo. 

"An intibuai anih kha..Tintin pawh a biak hleihtheih loh. A nu nen kan inbia a" Muankiman a rawn ti a, ka pa a awm tawh lo hlauh. Boomer a mutthilh miau loh avangin an inbiak dan a sawi thui duh lo. 

"I ti mak emai..nang phei chu lung lam ţha lo nei i nia, ka nu pawn fimkhur tura a hrilh ziah che kha. Inkhelh pawh a phal ţhat loh laiin i insual tih phei chu hria se engtin nge a tih ang? Ka pa tih ang tho khan a ti ve ang, a hau hrep tho ang che" ka ti hlak hlak a, vin luih ka tum nasa hle. 

A mit na lam zawk dimte a ka hruk lai chuan a mit na lo lam aţanga mittui lo hnam chhuakin a bekah a luang thla a, keipawn ka mittui ka dang thei tawh bik lo. 

"Ka lo chhawk ang che" rawn tih pahin Muankima chuan dimtein min pawt tho a, ka nau chu a buaipui zawm. 

Buaina ka ngah bik takzet a ni, midang buaina tawhin min thlunzawm vek bawk a, tu hmaikawr mah ka phelh sak thei rih bawk si lo, ka hah takzet a ni.

CONT..