THE GOOD, THE BAD AND THE OTHERS-16

THE GOOD, THE BAD AND THE OTHERS-16

"A harh deuh hunah mu turin ka hruai chho mai ang. Zingkar a let tur i ni sia, haw tawh rawh" tih pahin Muankima chu ka nam deuh a, hreh viau mah se reilote tal a mut ve a ngai. 

Kawtah kan han ding leh rih a, Tintin-a nu hnen aţang khan thu lawmawm a dawng dawn lo tih hre tho mah ila "Eng nge a rawn sawi?" tiin ka zawt tho. 

"An ruih vang mai mai anih kha" ngai pawimawh awm lo taka a tih chuan a banah ka chelh a, "Zu rim a nam hleinem. Eng nge an ruih?" fiah tak hian ka ti leh a, thisen rim hlir anih kha ka hriat.

"Damdawi a nih loh pawn weed aniang, Tintin-an a sawi duh si lo a, nakinah Boomer i zawt dawn nia" min ti a, sawi tur pawh ka hre lo, ka ţah te lam lam a chhuak. 

"Ka pa pawh tih tawh nak laiin Boomer lehzel, an lakah hian tihsual ka nei em mawnle" ka ti a, fel famkim bik lo mah ila ka nu thih aţang khan ka rilru a la hahdam bik lova, an ti zualkai zel hi ka hrethiam thei lo a ni. 

"Rawlthar hlim hlawt an nia, an ti ve chhin mai mai aniang. Ţha deuhin hrilh la, i thu te chu a awih alawm" a ti a, a ţha zawng bawkin min laksak leh tawh. Keimah vangin buai reng rengin hun a hman ve phah a, a tan hun ka neih tlem zia ka hre ran bawk nen, a inthlahrunawm letling zawk. 

"Ka lo zawt ang. Zingah ka tho hma ang a, ka en liam dawn che nia" ka ti a, khawlai a awm kan nih avangin a haw dawn chuan ka chal a fawp zeuh ringawt chauh. 

Inchhung ka luh chuan Boomer a lo muttui viau tawh. Nachhawkna ka pe mang si lova, zingah na a tuar nasa dawn khawp mai. Adika leh Puipuii te ka kaitho a, thophang deuhin an hawi vual vual a, Boomer chu hmu ang pawn an awm lo. Dinhliah tlat chungin an pahnih chuan inchungah ka chhohpui a, ka mut fel tir hnuah ka chhuk leh vat bawk. 

Chhuat ka nawh laiin Daisy a rawn tho a, ani pawh a phak chual mai. 

"I va meng rei ve, ka zun a chhuak lutuk" a tih hnuah zi mar uan uan chungin choka bathroom a pan a, a rawn let leh lamin Boomer a hmu chiah chu a harh kawkin ka hria. 

"Awii...hepa hi engngatinge? A mit te lah chu artui hnawih dum nawr bei ang mai a vung turu lutuk. Engnge thil awmzia ni a?" a ti chung chung a, meng phar awn awn chungin chhuatah a ţhingţhi rawk rawk. 

"Inhauh reng rengin ka lock e min ti ve ziah a, ngam loh i tawng ta a ni maw?" deusawh fe a tih pahin Boomer-a ban a la kang a, a kawr chhanah a taksa a thlek kual nasa mai. 

"Vanmalsawm, i kawr te hi a thler pheng phung alawm" a ti nang nang a, Boomer thlek kual reng chungin a chek zui tlak tlak bawk. 

"An khawlai lenna ah an intibuai pek a nih kha" ka ti hlak a, chhuat ka nawh zawm mawlh mawlh.  

"Insual awm reng pawh a ni, luhlul si, thuduh bawk si, thinchhe si" a ti ve hlak hlak a, naupang ang a ka la en vang nge khawlaia insual tur chuan ka ring ngai miah lo. Ruihhlo phei chu...a teuh lo lutuk. 

"Ka awm loh hlan khan tunge a zui ţhin? Hetiang khawp a sawisa duh tu hi rin deuh i nei em?" ka tih chuan min rawn enin lu a thing a, "Tintin-a bak zui a neih awm ka hre lo reng reng. An pahnih hian an inzui chawt a, Tintin-a zawt chhin rawh" a ti veleh a, ani pawh Boomer ang chiahin a biak tlak bik loh. 

Ka ţhu tlaivar a ni ringawt a, dar5 velah Muankiman min rawn bia a, class kal hman a let an ngai. Boomer chu a la muttui angreng a, hmanhmawh deuha tlanchhuakin Muankima te in lamah ka phei. 

Nu Puitei leh Tekeuhi ka hmuh ve chuan ka tawp chawt a, ka hnaih mai ngam loh laiin "Lokal rawh" amah zawkin a lo ti lauh a, a nu leh a nau hmaizah chung chungin ka phei. 

Bike a ţhu reng chungin ka kut a lo hmer a, a kut a lum vung vung a, chu chuan ka taksa pumpui a ti lum vek thei. 

"Nakinah chawhmeh ka rawn suah ang che u, i duh zawng ka siam" Nu Puitei chuan nem vak lo hian a ti a, a hawi tum deuh bar bawk. 

"Tekeuh ka hrilh che kha aw" Muankiman a tih chuan Tekeuhin a hmui a ti pawrh a, an awmdan chu ka hrethiam lo viau mai. 

"Ka putea ka inpuih tir ang a, ka lo chhui zui ang. Misual chu hrem loh a chhuah chuan an huangtau zel a, hostel a ka awmpui ngei ngei pawh nise ka hriatchhuah hun chuan ka mantir tho ang" a ti thlap a, a kut chu hum letin tawitein ka nui a, "Josephine kha i ţhian a ni ve em?" ka tih chuan lu min thin khum nghutin "Hmelhriat satliah chauh" zawi sup hian a ti a, a nute hriat a hlau a ni mahna. 

"Muankim i thlen veleh rawn sawi la, lehkhazir char char ang che" a tih ram hmak hnuah Nu Puitei chuan Tekeuhi a kuah lut a, "Min hmu peih tawh lo aniang" Muankiman a la ti zui. A nu te kalna lam chu nui ruh ruh chungin a en a, inchhung an luh fel hnuah ka kawnga kuahin a lamah min hnuk hnai a, "Khawlaiah hian infawh theih tho se tiraw?" a ti pek a, lai deuhin ka nui hak hak ringawt. 

"Inu kha engtinnge i hmin theih a?" ka tih chuan "Garage a indan ka tum a" nuihzat hmel fahrana a tih chuan ka tal laih a, min vuan nghet sauh thung. 

"Sawi ţha ve mai la" ka tih chuan "A duh lo ngawt chhan che kha chhuanlam a tling lo alawm. Video bak sawi tur a hre mang si lo a, chhan ţha tak a awm lo, chuvang chuan ho deuhin ka vau let ve" a ti a, a zavai chuan a sawi duh chuang lo. 

"Hmun hla deuhah kalsan ta che ila hrehawm i ti angem?" a ti leh a, ka rindan chiah. MA hi lo zo pawh nise zirna a chawlhsan mai phal rin lohna ka nei tlat a ni. Zirna sang zawk a beisei a nih ringin "Hrehawm ka ti viau ang. Ka lung a leng bawk ang a, mahse zirna vang anih chuan a tawrh ve zel theih alawm" ka ti a, ka rilru tak tak ka sawi bawk. 

"A ţhat chu, weekend ah ka rawn haw lo maithei aw..nitin ka rawn bia ang che" a tih hnuah min kalsan a, ka ruak huaiin ka hria. 

In lam a ka let leh pawn Boomer a la harh chuang lova, office kal a ngaih vangin ka pa a lo tho tawh thung. Eng eng emaw sawiin a vei kual reng a, Boomer a melh leh zawk ţhin bawk. Nizan a min hauh hrep lai khan a rui hle a, a thusawi te kha a hre kim tawh lo maithei a ni. 

"School a kal dawn lo em ni?" Boomer melh rulh paha a tih chuan "Ka hre lo" ka ti mawl tawp a, a hliam a nasa em a, school a kal peih ka ring lo. 

"I ni Mami kha i pu'n amah chauh a awm a remti tawh lova, ipu te inah lah mo an awm tawh sia, a hrawn peih lo ve khanglang a, hetah a rawn insuan lut dawn a nih hmel. I pute ka va hmu lawk ang a, chaw ka ei nghal ang" a ti mual mual a, ka pa thusawi chuan min tihlim khawp mai. 

Ka ni Mami hi engkima min hrethiam tu a nia, min duatin nu ang tluk hial a kan ngaih ţhin a ni. Ka patea te leh an nupuite nen inti thiam loin in a chhuahsan a, amahin in a luah. A sumdawng a, bungraw la a zinchhuak reng anih vangin kan inhmu tam thei tawh lova, kan unau pawh hian kan ngai takzet a ni. A bikin Boomer hian. 

Felfai leh smart taka incheiin ka pa chu a chhuak a, zu in vak vak a chinna a la rei lo a, a hmelah a la langchhuak lo na a a langchhuak thuai tho ang. 

Ka pa chhuah hnuah Boomer chu kaihthawh tumin ka sawi a, a rum ţuah ţuah a, a ţhen chawk chawk a, "I harh em?" ti a a ban vuan chunga ka sawi nawk nawk phei chuan a ha a sehchilh nasa lutuk. Ka tina anih ringin ka thlah thuai a, a rawn meng ve ta nge nge alawm. 

"Khaw nge ka awm?" a ti ţeng deuh chhar a, a aw a dik lo nasa hle. Ka tun thawh rual deuh thawin a hawi kual vut a, a taksa na avang chuan a ner leh sawk ţhin.

"Nizanah khaw nge i kal? Eng nge i ruih? Tu te nen nge in insual?" ka ti nghal mawlh mawlh a, "Daizau tui rawn la teh" a ti bul hmuk a, ka zawhna chu a ngaihsak lo reng reng. 

Tui rawn pek pahin Daisy chuan "Chhe hlek hluk lutuk. I u rilru a hah ţhin tehreng nen thawmhnaw ţet phungin thisen nen i rawn haw a, kha i la vun kawh luau kha" a ti hlar a, min hrethiam ve ţhin lutuk hi a lawmawm takzet. Nu Hriatpuii anga kawhmawh a bawl ve ka ring ţhin a, ka rin loh dan deuhin a awm. 

"A va sil theih ve" Boomer-an a tih chuan Daisy bawkin a tukhumah a beng pawp. 

"Sil ang chu..i mit dinglam te khan i hmu thei em ni? Thim chhah mup bak a lang thei tawp nang. Inah hian kan awm rei ve tawh dawn lova, vawikhatmah i u rilru hahna turin awm tawh suh" Daisy in a tih chuan ka nauin tui in ţhulhin a melh chho nghal hrawk a, keipawn ka thlek ha mai. 

"Tukin khan i pa'n min rawn hrilh a, i ni a rawn awm ve tawh dawn sia, kan tam lutuk ang a tia" a ti niah niah a, "Khaw nge i awm ang?" bul zetin Boomer bawkin a lo ti leh.

"Ka hre lo le..a rem remah a ni tawh mai. Ka nu ka zui zel a ngai sia, chuvang chuan fel deuhin awm ang che Vanmalsawm" a ti vin leh hlar a, a tui inna hmui tuai fai pahin Boomer chuan "Tu kan ni ber?" a ti fan ruih a, keimah zawk min melh tawh. 

"Ni Mami" ka ti chuan a bu nghat a, "I chhuah kher a ngai nang" tiin Daisy chu duhdah angreng takin a hrilh a, a ding uk a, a ţhu leh hnawk. 

"Nizan khan eng nge i ruih?" ka ti hriam hrak a, min rawn melh zawk a, min chhang lo. 

"Buaipui tur a tam sa em hi..nang lehzel chu kawhmawh bawl zawngin awm lo teh" ka tih chuan sleeve shirt ţial rek ruk a hak chu phelh sawk sawkin "I dawng thiam em?" tih leh min vawm nan a hman a rual a, kan in awm hlat lo bawk a, ka dawn chat rualin "Aw..thiam lutuk" nuihza aw tak hian a ti leh a, ka thin a rim viau thung. Min ngai pawimawh lo lutukin ka hria a ni. 

"Ka ni ka hrilh vek ang" ka ti nghal pang a, a hlau lo nasa mai. A hmai a dap kual dan dan a, tshirt var a la hak mekah pawh thisen a kai thluah. 

A phone a rawn phawrh chiah phei chu screen a keh nasa hle a, amah pawh a chek tlak. Tui a in leh ţhin a, eitur a lam lova, ka zawhna chhan tum awm pawn a awm lo. 

"Hostel a ka awm lai khan Puipuii leh Adika ten i lukham hnuaiah syringe an chhar tawh a, nizan khan damdawiin i inchiu em ni?" ka ti chhuak phawng a, rawngbawl mek a ka ngaih Daisy pawn "Ehe.." a rawn ti hluai. 

"Chiu lo chiu lo" a ti hmuk a, a awm dawm meuhin a ding leh a, a natna hi ka hre ran reng a, a inkhel ve thei ţhin te hi mak ka ti, a chau hma viau ţhin awm sia, nuam a tih ber a ni bawk si. A chang chuan ka khawngaih viau zel a, tun ţum chu ka lungawi hleithei lo.  

"Zanah chhuak tawh suh ang che" ka ti hram a, kailawn a vawn ban chu vuanin muangchangin a chho a, a awmdan hi ka hrethiam thei thlawt lo. 

Ka ni chu a rawnkal ngei a, Boomer-a awmdan hrilh kher lo mah ila a hliam vel a hmuh chuan a hrethiam nghal. 

"Fimkhur viau rawh kan tih ziah kha. I pa chu engtin pawn awm se runluih kher a ngai lo. Nakinah amah bawkin a tuar dawn a, en liam mai mai rih rawh u, i nu thihna a tuar rih em anih hi" a ti mial mial a, en liam tawp a harsa a, runluih pawh a ţha chuang lo. 

"In eipuar la i pem vel kha kan sil dawn nia, i pa aţangin ruihhlo ţhat loh zia i hre tawh a, ti ve reng reng suh. Adika a la naupang si a, i u leh naute in nghahna ber i ni rih a nia" tiin a zilh zui malh malh a, ka lawm ru khawp mai. Kei aiin a ngai pawimawh zawk dawn tih ka chiang. 

Zanrei lama Gabrielan min rawn biak chuan ka lo chhuahchhal nghal, "Hmanzan khan Jessie nen in kal reng sia, an thla lak ruksak angin i awm kher a" ka tih chuan "An chhakah ka ţhu a, ka lak ruk sak alawm" a ti liam mai a, a ngai ho lam viau mai. 

"Jessie nen in kal tih i sawi miah lo" ka tih veleh "Keimahin ka kal ka ti miah lo bawk. Ka let daih ka tih chiah ka sawi" a rawn ti a, a dik thlap. Tu nge a kalpui a sawi lova, a let tak daih thu erawh chiang takin a sawi. 

"Jessie nen chuan in ni ta em?" ka tih chuan a nui hawk ringawt a, "Sawi ve mai la, keipawn thu chhia ţha ka hrilh vek zel tho che alawm" ka tih hnuah pawh "Amah zawt rawh" a ti leh tawp ringawt a, hepa hi a lerh ru phian a nih ka ring. 

"Kristian a ni ve lo tih i hria ang tiraw?" ka ti a, Jessie ka duhpui vak loh tlat chhan hi ka hre lo. Kristian a nih loh vangah ka puh a, Kristian a siam tumna kan nei hlawm der si lo. Kan zinga a tel tam loh vang a nih ka ring ber a, Duhsanga vang a ni tel bawk ang. 

"Hria e..sakhua kan nei vek a, a ho emai" a ti a, ka rindan vel tho a ni. 

"Vulmawii hian a duh deuh hlek chein ka hria. Hmeichhia ve tho ka nia, a endan che hi ka hai miah lo" ka tih chuan a nuih a za khawp mai a, "A â emai" a ti mawl tawp a, thutak hla takah a la meuh lo a ni ber. 

"A sual miah loin ka hre ta" ka tih chuan "Sual lo e" a ti leh ang lawi bawk sia, Gabriela hi tupawn fel kan tia, zirlaiah lah a ţha ber ber te zinga tel ve thei ziah a ni. Chuti chung chuan hriatthiam har ka ti ber tawh. Ka hrechiang emaw ka tih hnuah a ze mak tak a chhuak leh ţhin a, ka hrethiam thei meuh lo a ni. 

"Ka ngaih ţhin dan ang hi a ni miah dawn lovin ka hria, sual leh khawlo ve deuhah ka ngai ţhin a" ka ti a, keimah zawk ka ni reng sia, ka landan phen a ka nundan ţhin kha a tenawm takzet. 

"Jessie nen chuan engtinmaw?" ka ti ţha leh a, sawi mai tur hre lovin a thaw ham ham phawt a, chutah "Khawngaihna anih ka ring" a ti ban churh a, "I khawngaih vangin i be ţha tihna maw?" ka ti hluai a, Jessie sawi dan nen a inang lo hle mai. 

"A ni pakhat ang" a ti hap a, a lo duh tak tak lo em maw ni? Duh tak tak chu nise ka chungah khatiang thil kha a tih ka ring chiah lova, a duh tak tak maithei bawk. Gabriela hi hriatthiam a har takzet a ni.

"Muankima nu rawnkal zan khan min puih i tum thu i sawi a, engtia min puih nge i tum?" ka tih chuan "I rilru lakpen ka tum mai a ni. Thil dang a tel lo" a ti hul hak a, "Mahse ka ngai che ka tih kha chuan ka ti tak tak. Bialpa chu nei lo la ka ta ah ka siam daih tawh ang che" nghet churh hian a rawn ti leh a, ka tih reng kha, hepa nun leh rilru hian awmzia a nei lo. 

Thil dang ka sawipui ta daih a, rei kan inbe zui lo. Muankima lehkhazir ka lo nghak a, a zir zawhah min rawn biain min ngaihzia a sawi ve luam. 

Ka ni rawn awm ve chungchangte ka sawi a, a lawm ve viau mai, "Nu Puitein chawhmeh min rawn suah ngei a" ka tih chuan a nui hawk hawk a, rilru kap tu ber a ni ve a, a thawveng ve huai ang ka ring.

Ni a kal liam ve zel a, weekend a lo thlen leh chuan ka ţhiante ka beisei viau na a mimal thila an buai hlawm vangin an rawn kal thei lo. A lehpekah erawh an rawnkal ngei tur thu an sawi sap sap hlawm. 

Boomer leh ka pa an inkhak deuh reng a, ka malţan tawh lo thung. Ka ni in a khap dai ţhin a, Nu Hriatpuii te nufa pawh an chhuak tawh a, Daisy erawh leng turin kan sawm reng ţhin. 

Tekeuhin nitin min rawn pui a, tih tur a awm lo ti ziah mah ila rawnkal a ţhulh chuang lo. Tunah pawh a rawn lang leh tawh a, apron hrengin inchhung a melh kual a, tih tur a zawng leh tawh a ni. 

Ka insum thei tawh lo chuan "Ngatinge nitin i rawnkal?" ka ti ta nge nge a, min melh ran a, min ngainatna zawng zawngte kha a bo vek tawh niin a lang. 

"Au Muankiman pui ziah rawh min ti alawm. School ban apianga rawnkal ziah a ngaih phah. Mahse vawiin chu school kan kal dawn lo a" a ti a, Muankima hian engber nge a chhungte hnenah a sawi ang aw ka ti rilru rauh rauh zel a, amah ka zawh lahin a sawi duh ngai der lo. 

"I u chu ka'n bia ang e" tih leh phone phawrh ka rual a, ka video call nghal. A ri nuaih nuaih a, a la hma tehlul nen bazarah an awm der tawh. 

"Lung a va leng awm ve" Mama'n a rawn ti lung lung a, Muankima nen a kan inkawp ngheh lehzual hnu phei hi chuan hun remchang a awm apiangin min chhaih a tih theih. 

"Tekeuhi a rawnkal a" ka ti ve thung a, "Lo chhawr rawh" Muankima chuan a ti then a, "Nitin min rawn pui a, tih tur pawh kan nei tawh lo" ka tih laiin "Ka pui zel dawn" tiin Tekeuhi a rawn inrawlh thuai. Choka ah a phei tharh a, a ri zui rak rak a, eng nge maw an hriat hlawm ni. 

"In va chhuak hma ve" ka ti ta zawk a, Mama hmel a lang ve tawh lo. 

"Mama hian tuemaw piancham lawmpui tur a nei a" nuihzat hmel fahrana a rawn tih chuan ka hrethiam mai, chhe lo a tih deuh nen khan an ni tawh a ni chiang mai. 

"I kal ve dawn mi?" ka ti leh a, "I phal chuan" a rawn ti ngei a, min nuih tlawn vel. 

"Inkhung ngawt ngawt ai chuan a nuam ang chu. I duh leh kal ve rawh" ka tih hnuah zan a inbiak ţhat leh tumin kan ti tawp rih a, Tekeuhi chhuat nawt turh turh chu ka khawngaih angreng. 

Ka ni in lo kheuh zeuh a, kan kal hran veleh "Henglai bawr velah hian Hriatpuii a rawn tei leh ţan tawh a, ipa hian a lakluh leh ka hlau emai" a ti a, a rilru a buai hmel khawp mai. 

"La lut tawh bik dawn mi? Ka pu in a zilh tawh a, khawtlangin an hmuh hniam nasat phah zia a hre vek bawk a, chuzawng ai chuan a lo hmingţhat ve tawhna ţhin neih let tum a a phi ruai reng hi ka hrethiam lo zawk. Ka nu thihna a tawrh vang tiin chhuanlam a siam a, tunah lah kohhranah a intat lut leh tawh a, nu Hriatpuii thlavang a hauh nasat ţhin tehlul nen tihian a chhuah tir leh hmak a, hmingţhat a tum leh lutuk hian rilru a ti nuam lo. Sual thup nan chauh kohhranah pawisa a theh lut ang tih ka hlau a, khawtlang ţhatna tur duh ber ang zia zanga a awm leh te hi miin a dik lohna an hmuh theih loh nan chauh a ti a nih a hlauhawm" ka ti a, ni reilote chhung khan a danglamna nasa tak a hmuh theih. 

Pindan chhungah zu bur a let rem rum tawh lova, ka nu hmingin biakin a hman tur thil a lei a, khawtlang hruaitute a kawm nel leh ţan tawh. A nundan ţhin kha chu miin "A nupui a sun nasat lutuk vang" an la ti thuai ang a, pawisa a chelek nasat a lem a chan tel zel chuan hmingţhatna a hlawhchhuak thuai ang. Mahse, engvangnge? Muankima pu angin a rukin pawisa hmuhna ţha lo tak a lo nei ve reng em ni? Tunah rih chuan chu zawhna chu ka pa chauhin a chhang thei ang. 

"Ţhat lam a pan chuan a ţha a ni mai alawm. Hriatpuii a khawi tawh lova, langsar deuhin zu a in tawh lova, chu aia lawmawm a awm lo" ka ni chuan a ti mai a, keizawng, rin tur ber ka hre tawh lo a ni ber e. 

Boomer leh Tintin-a te pawh dan ngai tein an rawn inzui lut leh tawh a, "My dear, i va fel turh turh ţhin ve. Ka nei daih dawn che em maw ni" tiin Tintin chuan Tekeuhi a fiam hlut a, an hmai a khem nian nuan tawh lo na a hnuhma chu a la awm. A dam fel mai bik lo tawp ang. 

Choka a an lut chu ka zui lut a, thingpui an duh leh duh loh zawh ka tum laiin Tintin-a chuan "Bawiha tunlai chu in in a reh riau" thawveng zet hian a ti leh a, "Ka pa a fel tawh a" ti a elsen zeta ka nauin a lo chhan chuan an duhzawng zawt lovin ka chhuahsan. 

"Vanneih ka chhuak lawk dawn" an inkhung ren rawn hnuah a rawn ti leh tawp a, melh pawh ka melh ţhat peih lo laiin "Adika leh Puipuii ka rawn lam haw ang. Chaw ei hmain him pialin ka rawn haw bawk ang a, insual chu ka sim" a ti zung zung a, ka phalna hmu miah lovin a chhuak. A luhlul em a, phallo mah ila a kal tho ang. 

Muankima nen kan inbe leh a, Mama ţhiannu te inah chuan kal a tum ta ngei bawk. Inrinni a nia, chhuak ve mah se a thiamawm alawm. 

"June pawh a kal dawn" a tih chuan mak ka ti deuh a, "Mama ţhiannu nen an inhria em ni?" ka ti deuh hluai a, Aizawl khaw hlun ni si loah chuan hmelhriat a ngah ngawt mai.

"A bialnu nen an inhria. I khua a har em?" a rawn ti leh daih. 

"Har ve tho e..Adika leh Puipuii an awm loh phei chuan a hrehawm. Boomer te lah an inti tlangval ve ţan a, kawm hleih theih an ni si lo a, a chang hi chuan a fel viau a, ka pa bawk hian a thin butut a chawh chhuah sak leh ţhin a" ka ti malh malh a, ka hrilh kim ve thei a nia. 

"A insiamţha veleh mai ang. Rilru suktlek a danglam zung zung lai hun a nia, nghak rih rawh" a tih hnuah "Lokal ve thei la ka ti e Pookie" naupangchhia fe hian a ti a, ka nuih a za angreng. 

"Lokal ve thei ila ka ti, Kolasib aţang chuan a har dawn sia, ka thlawk thei anih loh chuan" ka tih veleh "Helicopter secondhand lei tur zawng ila a ţha ang. Tiang ringawt chu a dik lo, naktukah plastic chi tal lo lei teh aw" a rawn ti fiamthu hlut a, mahniin ka nui ver ver reng mai. 

"Lo haw rawh ti sek dawn ila zirlai ah i tlakhniam phah ang tih ka hlau tho bawk sia, ka ngai ve tho bawk che sia" ka ti niah niah a, ka duhzia a hria a, ka inzep buai peih vel lo. 

"Inrinni lehah ka lo haw ang. I piancham a ni sia" a rawn tih chuan calendar ka en a, ka hre ve chiah. Ka buai atalangin mahni piancham ngei ngei pawh ka lo theihnghilh der alawm. 

"Ka hremiah hleinem" ka tih chuan a nui chhuak hawk a, "Ka ring..kum dangah lem thla tir aţangin i duhzawng i sawi a" a ti a, chu chuan rilru a kir tir a, ka nu damlai a kan hlim ve ţhin zia ka hrechhuak uaih uaih. Ka pa chu dahţha ta ila, kan piancham a lo thlen chuan kan nufa in hlim deuhin kan hmang ve ţhin. 

"Engmah a ngai lo" a ti zuai raih a, thil ţha ber ber pawh dawng ila, ka nu tello a ka piancham ka hman hmasak berna tur a nia, ka hlim tak tak chuang lovang. 

"Pawisa khawl ruk kan ngai sia, duh leh bazar a an thil zawrh ka enkual pui ang che. Leina nei lo mah ila kan en ve hrim hrim dawn nia" a tih chuan ka nui veleh hak hak a, ngen lo mah ila eng emaw tal min leisak tho ang. 

"Ka thlen hunah ka rawn be leh ang che" tiin phone chu a ti tawp leh rih a, tih tur dang awm miau hek lo le whatsapp ah lutin ka online ta vel mai mai. 

[Min ngai lo hle mai Di Kuhte, kei lahin in zawhte thleng khan ka ngai vek cheu a] Mateo message chu [I over lutuk] tiin ka chhang let a, Jessie message in ka mit a la ta zawk.

[Gabriela nen chuan karkhat vel lek kan inkawp leh tak tak anih hi. Tlaiah khan cafe ah Vulmawii nen ka hmu. A lerh dan em em hi] a rawn ti a, kan inbiak lohna a rei ta hle mai. 

[A va zia lo ve..in inhau em ni? In inkawp hmasak ve lahin kar khat vel chiah in inkawp a, engnge in awmzia?] tiin ka chhang let a, inhawng lo chi a nia, engkim min hrilh vek ka beisei hauh lo na a [Min fiamkual mai mai aniang. Josephine nen pawh an nih rei chuan loh kha] a ti a, Gabriela hi ka ring ta hauh lo. A landan ang anih loh hmel riau. Hmeichhia kawp ve uk a hne leh zung zung ţhin mi anih duh hmel. 

[Ka lo hau ang] ka ti ta ringawt a, han hnem vak ngaihna ka hre lo a ni. Kan zinga pawisawi lo leh vanduai ber lehnghal. Keichuan pa tal ka la nei a, Jessie chu naupangte a nih laiin a nu leh paten an thihsan. A nat dan tur ka chhut thiam lo zawk. 

Min rawn chhang let tawh lo a, ţhian a neih loh tehlul nen hrehawm a ti viau ang le. Gabriela chu hauh ka tum zet na a ka be peih lo. Ka be chak hlawl lo a ni mah zawk. Vulmawii lah chuan kan hriat ve loh hlau ni awm takin an thlalak a rawn status ham ham a, caption lah a duh thlum, [I thlum dan em em hi..kurtai chu nep tak a ni] tih vel a ni a, ka chhiar tluan lo. Jessie ka khawngaih lutuk vangin a thil post duh dan vel chu ka haw hlur mai. 

Muankiman min rawn video call a, an ri nasa kher mai. A ţawng a hriat hleihtheih loh a, a hma zawnah June leh a bialnu an ţhu ve bawk. June ka hmu chu ka au chhuak lo chauh a ni. A sam a lo tan tawi mat a, a incheina pawh a thlak danglam. Mipa ang maiin a inchei a, a bialnu a kuah chial bawk. 

"June" ring angreng taka Muankiman a koh chuan camera a rawn en a, rei vak lo hnuah an pahnihin an rawn lang dun. 

"Lokal ve la" a rawn ti vak a, ka ţawng an hriat theih ka rin chuan loh vangin an hmuh turin ka nui. 

"A thar" rawn ti lehin a Muankima lamah a thle a, a nghawng ding lamah tattoo a lo awm vang mai. 

"I va inthlahdah ve" ka ti a, rin ang ngeiin a hre phak lo. A bengchhen bakah an zalen angreng sia, Mama ţhiannu chhungte chu an rilru a zau awm mange. 

Kan inbiak zawh hnuah [Min rawn be tawh rih suh, tikhan nuam deuhin hmang ve rawh] tiin Muankima chu message ka thawn zui a, [Tum neiin ka kal a, chanchin ka rawn hrilh ang che. Zanin ka haw kher lo ang] a tih chuan mak ti viau mah ila ka remtih thu ka lo hrilh a, eng ber nge a tum ka ngaihruat thiam lo. 

Pathianni pawh inkhawm lovin inah ka tawm a, ka pa inla felin min khak nghe nghe. A inkhawm ve chhun chuan inkhawm lo a hrethei lutuk ringawt, a ngaithei lo bawk. 

Vulmawiin min rawn call ve hlawl a, mak ka ti angreng viau. Gabriela nen a an chungchang a rawn sawi ring zet chungin ka la a, ngaithla peih lo viau mah ila "Engnge nita?" tiin min rawn biak chhan ka zawt tho. 

"Josephine kha thah a ni ngei alawm" a rawn ti a, a thusawi chu ka bengverh zawng tak a ni mai.

"Engtinnge i hriat? A thattu in hria em?" ka ti nghal chul a, ka ţhu pawh ka bet tawh lo viau a ni. 

Zep ţhen si se lova thil sawi nghal vek chi a nia, mi rilru tur a dawn ngai lo. Midang daih a sawi ka rin laiin "June" a ti fiah fak a, a inrintawk hmel viau bawk. 

CONT..(Edit loh aw..ka mit a phe nasa lutuk a ka ti hleithei lo. Ka lu na a reh hleithei bawk si lova, a tawi deuh emaw a mumalloh deuh pawn min lo hrethiam mai ru aw?)