THE GOOD, THE BAD AND THE OTHERS-17

THE GOOD, THE BAD AND THE OTHERS-17

"June, eng nge i rawn tih?" a ti nawn leh a, ka thaw huai huai ri chu a hre pha maithei a ni. 

"Ka lehkhabu leh thil dang hrim hrim kha engmah khawih suh ang che. Lucky ka be lawk, ka bialpa thar neih pawh a la hre ve nang" a tih zat zat hnuah "I ngaithla em?" min rawn ti leh a.

"Ngaithla e..Gabriela nen a in inhuat loh zia ka hria alawm. I status vel kha ka hmu vek. Josephine chu engtin nge thah a ni tih i hriat?" ka tih chuan "Ka mumangah ka hmu alawm. Ka khum tlanga ţhu reng chung khan 'min ţanpui rawh' a lo tia, a kâ a ang lova, kha thu a sawi lai khan a hmui takngial pawh a che lo. Mahse, min ţanpui rawh a tih kha ka bengah chiang takin ka hre tho" a ti a, mak ti viau mah ila ka rin lawk sa a ni. 

"Mumangah hlir i hmu a, amah tak kha hmu la chu a awihawm deuh zawk ang mawle" ka ti nang nang a, ka awih lo ka ti phal chuang lo.

"I rilru a chhia a nih chu. Ka hmaah rawn inlar tak tak se chu ka thidang hial ang chu. Thih pangaia thi chu nise min ţanpui rawh a ti miah lo ang. Ka hmu ngun tawh ropui sia, thlamuang deuh a a chawlh theih nan ka tih theih ang ang ka ti vek ang" a rawn ti buan buan a, "A thattu a sawi lo mi?" ka ti hram. 

"Sawi nang..thlahrang ho thuruk zep theih zia hi ka ti tawp alawm. Ţanpui tur a min duh chuan a thattu sawi ve nghal mai tur a nia, rilru tibuai tawk lek hian an ţawng ţhin bawk sia, min ti hah vek. Han sawi chiang teh kan tih rual rualin an ral daih a, induh thiam tak an ni. Anmahni ngaihtuah zui lo thei lo a min siam an thiam" tiin a ang hlak hlak a, Vulmawii thusawi ngaithla ve reng tu June nui ri pawh ka hria. 

"Chuan engtia tih zel nge in tum?" ka tih chuan hriat theih mang loh hian a phun hlak a, "Hriat ve zel i duh chuan hostel ah rawn let leh la a ni mai lawm. Duh hun pawh a hmuh theih lohna hmunah i awm a, phone aţangin kan hrilh seng vek bik hleinem che" nin hmel zet hian a ti a, ka zawt kher kher chu  ka inchhir lek lek a ni. 

"Gabriela kha a ni thei angem? A chetsual hun chang ran chunga ngaizawng der i ni em?" ka tih chuan "Awii...thluak sale runpui te hi awm se tun a i thluak ai kha chuan sale mai mai pawh a ţha zawk daih ang" min ti deuh zek a, a lawmawm loh thei e. 

"Rinhlelh i nei em?" ka ti leh a, min rawn hrilh ta sa sa, ka hriat duh apiang ka zawt dawn. 

"Nei e..lawk aw" a tih hnuah a ri rak rak a, ri a tawp hnuah "June hi ka ringhlel" a rawn ti sar sar. 

"Khaw nge i awm?" ka tih chuan "Ka biru..June a la awm sia, a hriat laia sawi chi a ni si lo a, midang rinhlelh ka nei lo. A chak dawn sia maw, mi muttui lai mai mai chu a that hnehsawh ngawt ang" a rawn tih chuan ka nui chhuak hak hak. 

"June ai chuan Gabriela kha en ngun zawk rawh. Keichu a awmdan hi ka hrethiam thei miah lo. Mizia chi hrang hrang a neiin ka hria. Nang pawh hi fimkhur viau rawh, eng emaw i lo tawk ve palh ang e" ka ti a, ka ngaihtuah tak tak bawk. Gabriela ka sawichhe bawl bawl te chu inthiam lo ru viau mah ila amah lo chu tuman an ni thei lo. Hriat a ngah mai bakah amahah hian engemaw riau a awm. A boruak ken hi a danglam tawh tlat a hriatna ka nei. Min rawn biak chang te hian nuam ka ti thei tawh miah lo. Ka hlau deuh reuh ti ila a dik ber ang. 

"Ka enthla pah reng tho alawm. Jessie nen an inţhen leh nghal mai vang hian Gabriel hi mak i tih phah tihna mi? Jessie te ang chut lutuk chu tunge duh anga? Kristian a ni lo bawk a, Gabriela chhungten an duh dawn lo hrim hrim. Chung zawng zawng chu a hre ve vek a, a tlai hmain a ţhen anih hi. Bakah Jessie chu a ke ţhiah a ţhing lutuk a ti" a rawn ti tel hram a, a duh loh zawng chu a sawichhe hneh viau zel. 

"Chupawh nise rin a har tawh dawn e. Nangchu ni ila Gabriela hi ka duh miah lo ang" ka tih chuan "Keimah i ni hleinem" a rawn ti hmak. 

"Engtin nge in nih ve tawp theih hrim hrim a?" ka ti hlawl a, hre chak miau hek. 

"Bialpa i nei em min tia, nei reng chungin nei lo ka tia, kan ni ve tawp. Bialpa hi chu rualpawl nan leh a ţha nghah nan neih ve reng tur a nia. Keipawh hei ka nghak chhuak mai alawm" a ti zat zat a, ka nui tawp. Engemaw han sawi ila hnehsawh deuhin min chhang let a, min sawisa tel kher zel lehnghal, lehlam zawnga ngaihtuah chuan Gabriel nen hian an zia a inang a, an inmil phian ang. 

"June chu eng nge a rawn tih?" a bihrukna aţanga a chhuah ruala ka tih chuan "Hei ka khumah a mu..awii ka ning lutuk he thil siam hi" a ti a, kei aimahin June nuih a za zawk. Mipa emaw hmeichhia tiin an sawi ngai vak lo, a nihna tak hria ka ţhiante ho hi chuan thil siam zinga pakhat ang chauhin an sawi ţhin. 

Inkhawm an rawn ban tak avangin kan inbiakna chu kan ti tawp rih a, ka pa leh patling, amah ang rual vel tur pathum vel an rawn inzui lut. Vengchhung mite an nia, an zinga pahnih phei chu sunday school zirtirtu an ni nghe nghe. 

"Vanneih, hei i pa Biaka te hi tui deuhin thingpui han lumsak teh" ka pa chuan a ti dam dap a, hnial buai lovin thingpui lum tur chuan ka kal nghal. 

"Boomer i inkhawm bak chu lengchhuak suh aw. Rawlthar chhuak hlim ţhenkhat, pawn lam a zu in ching leh buaina zawnga hmanhlel an tam a, in thiam lohna ni miah loah kut in tuar leh ang e" ka pa chuan a ti leh lung lung a, a awki a vin miah lo bawk. 

Boomer-a rawn lut chu"Pharisai, tenawm lutuk" ti a phun hluk hluk pahin fridge a pawt hawng rawk a, zing a ka thei tui dah vawh chu thli chhuak hranpa lovin a in nghal khawlh khawlh a, ka pa nen hian an inmil thlawt lo a ni ber. 

"Ţhat a tum ve tak tak tawh a ni maithei asin. Chu loah a inkhawm ve duh te chuan a tan pawh a ţha a, zu a tlan tawp lai ai kha chuan a bul a awm pawh a hahdamthlak zawk alawm" ka tih chuan "Mite sualna hmu lian tawk lek a piangthar ho an nih saw" a ti nghut a, ka pate ţhianho nihna a sawi zawh chuan a ner sawk a, a ngainat loh hmel hlawm takzet a ni. A ten hmel ti ila a dik zawk mah ang. 

"Thingpui i duh ve em?" ka tih laiin "Naktukah Ni Mami nen Aizawlah kal ru" a lo ti thung. Kitchen island bula ţhuin min en run a, Aizawl kal tura min tihna a rei tawh a, keimah ber hian ka hreh tlat a, class kal zel ka tum tawh loh rau rau chuan ka bungrua te la turin min duh tawh a ni. 

"Ka la ngaihtuah mek, min nawr tut tut kher suh u" ti mah ila "Private school pakhatah zirtirtu lak belh an duh a, dil ve rawh. In a i tawm reng chuan i suangtuahnaah depression khua te i din palh ang. Chhuak harh la, i rilru la peng tur zawng rawh. U Muankima hi tun rum rumah i nei thei dawn miah lo" a ti mawlh mawlh a, thim angreng taka ka melh chuan min lo nuih suk a, sawi ţha a intih hmel asin aw.

"Diakkawn a kan building kha, tun a luah mek tute hi ka niin chhuah tir a tum a, aman a luah dawn. Sumdawng a vah kual reng ai chuan dawr lian ve tawk tak siam ila a tia, school a thawh ai chuan ka chak daih zawk" ka ti ve thung. Ka ni a tel chuan Muankima pawisa khawl sa hman a ngai dawn lo a, tih tur hmachhawp a la ngah hmel em avangin Boomer sawi ang chiah hian Muankima hi ka neih vat theih ka ring lo bawk. Pawisa lakluhna tur ka zawn ve ngei a ţul takmeuh a ni. 

"Ni Mami puih i tum nge nangmah a sumdawn ve i tum?" a ti khauh a, "Englo" ban charh a ka tih lai chuan min thlek deuhin mit ko a lo san uk a, "Ka pui phawt ang a, keimahin ka ti veleh ang a, thil kal hmang ka hre phawt ang a" ka ti a, ka riat nawi ta vel mai mai. 

"MA tal hi zawh ve a ţha i ti lo mi? I zir ve ting tang tawh a" a tih chuan "Sawi ve ziah suh u. A zir tur berin ka peih loh chuan min nawr luih phet tum suh u. Ka mualpho angin in mualpho ve lo a, in tan chuan zir rawh tih mai a awlsam ang chu. Ka kal zawm dawn lo, mi nuihzat nih ai chuan duh leh nakinah ignou ah te ka la ti ve mai ang" ka tih tan tan lai te chuan nur nangin min lo en a, hmui ia chip hmak rualin "Khaia!" a ti hluai a, min nuih ru tet tet chungin a chhuak. Ka mualpho ang hian mualpho ve se chu an inkhung ve chawt tho ang. Kalna apiangah miin min en bik tlatin ka hre ţhin a, ka awmdan ka sawithiam lo. Rilru lam natna eng eng emaw chu ka nei ve te pawh a ni mahna. Ka hretawh bik lo le. 

Chhungte lam aţanga nawr na a nasat deuh avangin ka ni nen Aizawl kan kal a, kan chhungte in a thlen a tum laiin keichu hostel a lo awm rih ka thlang zawk. Fee ka pe lawk a, ka mualpho vak hnua chhuahsan chauh ka ni. Duh phawt chuan thla hnih zan ka la awm thei. Mahse, ka ni intihfel chhung chiah ka awm ang, chupawh pawn chhuak lo chiin. Ka ni chu vak kual reng zawng a sumdawn a duh tawh loh avangin bazar a a thawmhnaw pekna ho ah ba ţhin a tum a, vawilehkhata tih zawh vek theih a ni dawn si lova, chuvang chuan kani ve tho te inah a a thleng dawn a, chumi chhung chauh chu Aizawl ah ka awm tawh ang. 

Class an kal hlanin hostel ah chuan ka lut a, warden ka hmu hmasa. Sam a lo ti kir chhup a, chu chuan a landan a thlak hlawk. 

"In thukru daih mah ta che. Mi ngaih ang ngawt i nih loh zia lantir zawk tur che alawm. Mahse, vanduaina tawk tu tan a a hrehawm tur zia kan dawn thleng ve thiam chiah lo ţhin a, kha thil ti tu kha man chhuak ngei ngei ru aw" a ti duah a, sawi tur vak a hre bik lo. Inhnem ngaihna a vang ve bawk em a ni. 

Kan room chhunga ka luh rualin ka bungrua ang ang chu ka melh kual nghal a, ka dah dan ngai ngaiin an lo la awm vek. June leh Jessie ten an lo la dahsawn miah lo tih a hriat a, ka ţhiante nen inhmu vat dawn mah ila ka bungraw kalsan tawh ka hmu leh chiah chu lung a leng dun lutuk. 

Room chhunga June nen a kan infiam bawrh bawrh lai te, Jessie kan tih buai bik lai te mitthla ah a lang uar uar a, June nen khumah kan ti ti a, kan piah deuhah Jessie-in lehkha a zir a, kan thawm a nat deuhin min rawn khap a, keini'n kan runluih a, kan lungngaih changin kan ţhu khawm laih a, kan ţawngkam thiam ang angin kan inhnem ţhin a, khang hunlai kha rilru in a chhui kir lo thei lova, kan lungngaihna kha tun ang em a nasa a ni ţhin lo. Puitlinna hian natna rapthlak tak tak a kengtel anih dawn hi ka ti rilru a, nunhlui ngaiin ka ţap lo chauh a ni. 

An class bang rawn haw in min hmu chiah chu min kuah nghal chung chung a, June danglam ta lutuk chu a awihawm loh viau na a a hmuhnawm takzet a ni. Jessie pawn a sam rawng a lo ti danglam a, model te han ni ve duh se chu a tling zan zan ang. 

"I rawn let leh tihna mi? Kan bulah i awm ve reng tawh dawn em?" June chuan a ti chel chul a, a mitmeng a nung sar a, min hmu chu a lawm hle a ni tih a hriat. 

"Teuh lo mai..ka chawl rih ang. Ka hma hun chu ka sawi thei lo, kum te han vei phawt se ka zir leh duh anih tak leh tih dan a awm mai ang. Tunah tak chuan ngaihtuah dang ka ngah rih lutuk a, zir leh mah ila chhawrtlakin ka chhuak chuang lo ang" ka ti deuh duah a, insawi thiam chawp a ngaih chuan thui deuh sawi kher a ngai ţhin. 

"Nia, kan hrethiam che alawm. Mihring hi kan huaisenna a inchen lova, rilru dawih leh hlauthawng hma chi te, zakzum mi te tan chuan i thil tawn ang kha chu palzam mai mai a har ang. Mi hmai zah a na dawn a, inkiltawih a awl dawn bawk a, i inpeih thlap hunah chiah zir zawm leh rawh. Lehkhazir chu rilru pek ngai chi a nia, zirlai a har tawh bawk nen, kal pah mai mai theih chi a ni si lova" June chuan a ti ve ta nge nge a, Jessie pawn "Dik chiah, awm ho lo mah ila ţhian kan ni reng dawn a, min hmu pha lo mahla i tan kan awm reng tih i hre dawn nia. Puih theihna che ka neih phawt chuan ka tlanchhe miah lo ang" a lo ti bawk a, ţawngkam mai mai mah nise thla an ti muang khawp mai. Ţawngkam ţhain sial a man an tih kha maw, an ţawngkam ţhain min ti dam huai huai ni maiin ka hria. 

"I ni chuan engtik thleng nge cham a tih?" lehkhabu min lak khawm pui pahin June chuan a ti a, "Ka hre lo le..cham chin tur tak chu a sawi thei lo. Ba ka ţhing kual ang a, pawimawh chin ka tih zawhah kan haw dawn nia a ti ringawt a" ka ti a, lu a bu zeuh zeuh a, a lawm hmel em em mai lehnghal.

"Karkhat zen zawn chiah ka hmu che a, tattoo leh sam thar nen i lo ni rup a, enginnge thlak danglam che?" nui paha ka tih chuan a koki lo san zeuhin "Huaisenna in" a ti liam puat a, min chhanna duhkhawp lo a ka melh reng takah chuan "Ka nihna a nia, hetianga intih danglam hi ka chakna a rei tawh. Ka thawmhnaw duh ang hak a, nalh ka tih ber dan a sam tan te, mipa nih ka chak a, hmeichhe taksa ang neiin ka piang thung. Hmeichhia angin inchei mah ila mipa rilru ang ka pu a, ka hmeichhiatpuite ka duh tlat a, ka inthup chhung zawng khan hlimna tak tak ka nei ngai lo. Tunah chuan nuam ka ti, ka taksa thlak danglam thei lo mah ila ka incheina ka thlak danglam thei a, tattoo hi mipa zawng zawngin an nei vek lo nachungin hman aţanga neih ve ka chak tawh a ni. Midang mitmei ka veng peih tawh lo, nihna ang anga langchhuak ngam te hi huaisen ka ti a, keipawh chutianga awm chu ka tum" a ti malh malh a, ka insit thar leh vel nia. Dawihzep ka inti em a ni. Mahse, chu chuan ka thil tum a thlak danglam lo. 

Ka nauten min mamawh tho tiin ka inhnem a, zirlai ka ngaihsak thei dawn miah lo tih ka hre bawk. Chuvang chuan chawlh rih mai ka thlang ta a ni. 

Zanah ka chhuak ru lehnghal ringawt a, warden te chuan min hmu mah se min hmuh loh der ka ring. Ka dinhmun an hria a, ka harsatna tawh zawng zawng nen. Cabin ah inkhung chawt mah ila cabin neitu berin min sawisel loh chuan min sawisel duh bik ka ring lo. Kan hostel hi khualbuk ang deuh a ni ka tih tawh kha, Aizawl ah hian kan hostel ang hi a awm ve lo maithei. Chuvang tak chuan awm man to deuh mah se awm duh an tam a, awm sa te pawh mi hausa fa an ni fur. 

Muankiman min hmuh rual chuan min lo kuah a, "Lokal lo la chu rawn haw ka tum" a tih chuan inlak hran ka tum a, a remti lo nasa, ka chet hlek chuan min kuah nghet sauh zel. 

"Engatinge?" a awm a bei hle hle pah chuan ka ti ta ringawt a, ţul a tih hunah min thlah ve tawh mai ang chu. 

"Ka ngai che a" zawi sup a a tih chuan inring hman lovin ka nui chhuak. Ka nui sawh emaw a ti ang tih hlauin ka hmui ka hup vat a, ka ngaih ve zia a hre lo mai mai. Hre ngat se chu min kuahna hi a thlah duh tawh miah lo ang. 

"Min ngai viau mahla rawn haw sek suh. Kolasib ah ka awm rih vang vang dawn lehnghal a, i rawn haw chuan i nu zia a danglam leh vek ang. Ka chah haw che ah a ngai ang a, min hmu dik lo zo leh vek dawn. Ţul tawpkhawkah lo chuan rawn haw suh" ka ti hmawk hmawk a, lunglen te chu hrehawm viau mah se kan tuar thei ang. Kan thei tur a ni. 

"Engtinmah a ti tawh lo ang che. Nangpawh a mit ti kham lo zawng a awm tum la, ka nu pawn i natna tur zawnga chet a thawh emaw ţawngkam a neih chuan min hrilh dawn nia" a ti a, Nu Puitei hi engtin chiah nge a thlem ka la hrechak reng. 

"In inhauh phah vak em? Keimah vangin in lo inhau ange aw" a ban tawn tawn a dawmin tlemin ka tawlh hla deuh a, ani pawn ka kawngah min la kuah bet tlat. 

"Nangmah vangin ka chhungte ka thlauh thla dawn lo a, lungngai an kun tlawk tlawkna turin ka awm dawn lo. Chu chu hre lawk la ka duh" nghet churh hian a ti a, Boomer-a sawi kha a thleng dik dawn ni a ngaiin ka hlauthawng a, ka thinphu te chu a rang nghal dawt dawtin ka hria. 

"Thlauhthla rawh ka ti hleinem. I chhungte kalsan turin ka ti ngai miah lo che, i nu in min haw daih kha ka rilru a na a ni mai" ka ti dat dat a, a chhungte aia min thlang zawk turin ka ti ngai lo hrim hrim reng a ni. 

"Ka chhungte vangin ka thlah dawn lo che. Hlimna chiah ka pe ang che ka ti ngam lo mah se i ţahna thlen tu nih loh ka tum ang. Min lo nghak rawh, harsatna hrang hrangin a tlakbuak che anih pawn min lo nghak la, tun a i hrehawm tawrh hi nakinah, ka hlawhtlin hunah ka la rul ang che" a ti ve duah a, hetianga thutiam a siam tawh chuan min kalsan a tum tihna a ni ţhin. Kei aiin a pawl sang a, Aizawlah kei aiin a awm hmasa. Aizawl ah an la dah ngei dawn a ni tih a hriat khan thu min tiam duah a, tun a a tih ang chiah hian. 

"Khaw nge i kal dawn?" tih pahin zawi deuhin a taksa chu ka kuah a, zirlai chauh kan la ni hi a pawi takzet a ni. 

"Kal nghal dawn lo mah ila ka la kal ang. Ka bei ve ţauh ţauh ang a, ka theih ngang loh leh tih tur dang ka zawng mai ang" tiin ka zawhna lo ang deuhin min chhang daih. Hun a la tam a, ţul a tih hunah min la hrilh mai ang. 

Min thlah rualin khum ka pan a, lehkhabu a lo chap darh nuaih mai. Ka khawm nghal sawk sawk a, zirlai ni lo lehkhabu dang awm ve chu ka enchiang bik a, chung aţang chuan exam hautak tak hmachhawn ve a tum tih mi â nileng lo tan chuan a hriat theih vek. Vawikhatmah ka hriatah a la sawi ri ngai lo a, a hlawhtlin hma chuan min hrilh duh lo a ni mahna. 

"Khaw nge Josephine-i lehkhabu chu?" khum bul dawhkana lehkhabu rem ţhat pah hian ka ti a, dawhkan kil lam a lehkhabu inchherchhuan chu keu dan danin a hnuai ber a lehkhabu thar ţha angreng tak chu a rawn phawrh a, Josephine-in a nihna diktak a ziahna vel chu chhiar tumin ka keu kual nasa. 

Ka bula Muankima a rawn ţhut ve rual chuan "Khawilai takah nge a ziah?" ka lo ti a, milem chiah ka hmu a, thil dang ka hmu mang lo. 

Lehkhabu min laksakin khumah a lawn kai a, khum lu nghenga a ţhut takah chuan keimah ka insawn chho a, insi riala ţhuin Josephine-i lehkhabu chu kan keu dun. Khua a thim chhahin kan awmna hmun a fal a, nuam lo duh tak a ni ringawt. 

"Hei a tam hi" Muankima lah chuan a ti then mai bawk sia, kei lahin a milem ziah chu a ngaihna hre lo deuhin ka en reng ringawt a, â min tih lutuk hlauin "Milem ziah a lo va'n thiam em em. Lehkhazir lovin lemziah lamah pawh kal se kham khawp a la lut ziah tho ang" ka ti mual mual a, min nuih tho. 

"Nuihzatthlak a awm hleinem. Hetah tak chuan mipa aiin hmeichhia a duh zawk tih a ziak lang miah lo. Ţhian dun ti ti lai lem anih duh hmel" tih pahin lehkhabu chu ka chawi kang lawk a hnai set sawtah ka bih nghal vut. A ruk a thu inziak takngial pawh hmuh tur a awm lo. 

"Lemziak thiamte hi thawnthu ziaktute nen in anna lai an nei. An ngaihtuahnaa thil awm an ziak chhuak fo mai. Milem pakhat zawk hian a banah kut chuk a nei a Josephine ang chiahin" a tih takah chuan ka ngaihtuah chiang a, Josephine khan a banah kutchuk lian tak a nei tak alawm. A duh loh ţhin zia a sawi te pawh ka hre fuh tawh tak e. 

"I sawi takah chuan hmeichhe lem pakhat a ziah hi June a ang hle mai" ka ti vel a, â min tih lutuk ka hlauh vang a ni. 

"A ang tawh lo. A danglam tawh hi" zawi sup hian a lo ti a, ka meng kawk kawk maithei a ni.

Zawmna

"I sawi awmzia chu lehkhabu hi i kawl tih June hian a hria em ni? Lemziak vel hi a hriat ve vang a inti danglam nghal vak a ni em?" ka ti hluai a, min chhang lem lovin phek dang a keu leh a, milem bawk a lo inziak leh. Uluk deuh a ziah tih a hriat a, lehkhazir peih deuh anga lang siin milem a lo ziak ve mai mai a nih dawn hi. 

"Hetah chuan June a ang pawh ka ti leh tawh lo, Vulmawiin a sawi nasa em a, rinhlelhna ka neih vangin June emaw ka ti mai mai niang" ka tih chuan "June a ni lo" a ti khauh a, ka thawveng huai thei alawm le. 

"Tu nge a nih i rin?" ka ti ha a, "Suangtuahna aţanga a din mai mai a nih hmel. Gabriela nen a an inţhen hnu lawkah a thi a, hmeichhia a la kawp hman lo ang" a ti a, ka bang bo telh telh mai. 

"Nih leh rinhlelh i nei em?" ka tih chuan lu min thin khum nghutin lehkhabu a khup a, "Naktuk i chhuak ngam angem?" a ti daih. 

"Ka hre lo le...chak deuh a min tlanpui dawn chuan ka ngam" ka lo ti fiamthu a, kan thutak lutuk chu ka kham tawh a ni ber. 

"Hruai duhna che ka nei a" a ti fan ruih a, nuam lo a tih hmel hle nghe nghe. 

"Khawi lamah nge?" tih paha amah ka thlek ha lai chuan min lo kuahin "Pawimawh deuh. Zanin chu tui deuhin mu phawt rawh" min ti a, hmun hlauhawm deuh a min hruai tur te pawh a ang alawm le. 

Ka chak lohna hrerengin riah dun ka duh lo va, buaina tam tak kan nei tawh sa a, neih belh leh ka hlau a ni. Inven theihna ang angah chuan inven ka duh. Zanrei ah min thlah chho a, tumah hmuh tur an awm lo. Kan hostel leh a chheh vel chu a reh vung vung a, mahni chauh chuan ni ila ka hlau ngawt ang. 

Kan room pan chhohna kailawn bul thleng min thlah a, venthawn tur an awm lo bawk a, ka kal zet tawh chu theihnghilh nei ni awm takin min pawt let a, "Eng nge?" hmui phun a ka tih chuan ka hmai zawn a rawn kun hniamin ka hmui a fawp a, a chet dan chuan min ti nui hak a, ka fawp let ve ta tho a, "Naktuk chu aw" ti a min hrilh nawn leh hnuah cabin lama let turin a inla hrang. 

Hlim leh thlamuang ru takin kan room panna rahbi chu ka rap chhat chhat a, thawm dim ngai lo se chu ka zai rat rat ang. 

"Lucky" tih hi ka bengah chiang takin a rawn ri a, min ko thawm a ang lo, chhung ril deuh aţanga rawn ri ni maiin ka hria. 

Engmah hmu lo mah ila ka hmul thi a ding nghal a, hlauhna in min man chawpchilh bawk. Ka awmna hmun te chu a vawt nghal suai suai ni maiin ka hria a, light lah chu zan dang aiin ka hmu êng lo zawk a, hlau viau siin ka ding chawt a, ka hawi kual ruai mai. 

Ka hminga min ko ang tak ka hre leh a, ka hnungzang a za thla uai uai a, chu aw chuan min fan hnehin ka hlau lutuk chu ka che thei tawh lo. 

Ka hnungah chuan tu emaw a awm ang tlatin ka hre lehnghal a, fiah turin ka hawi let ngam der si lo. June emaw Jessie tal min zawng turin rawnkal se ka tih lai takin Josephine-i room awmna ţhin lamah chuan thil phe vuai ka hmu a, ka dinna aţang chuan hla deuh mah se ka hmu chiang lutuk. Light a inchhi phei thluah a, chu chuan a chhun chiang hle na a a phe zawk chauh anih vangin eng nge a nih ka hre thei lo. 

Chutia ka en reng lai chuan "Eng nge i tih?" a rawn ti thut a, aw ka hriat rual chuan ka phu zawk a, ring tawk tawkin ka au zui nghek nghek. Min rawn be tu lah chu kei aia ring mahin a au ve a, min rawn kal pelin ka hmazawnah a ding a, a sam kir buk lutuk ka hmuh hnuah pawh ka la au vak vak tho. A khawk rum rum a, ka au ri bakah ka thinphu nasa lutuk ri pawh a tel ang. 

"Eng nge i tih ka ti mai alawm" ring zet a a tih hnuah warden chu a au zui leh tuarh tuarh a, kan inau rin siak a ni ber. Hmeichhe ho an rawn tlan khawm a, inhnuai lam aţanga rawn chho pawh an awm. Building lehlam a mipa ho pawh an rawn thleng nual tawh. 

"Shhh...kan awm vek tawh. Hlauhawm a awm lo" hnung lam aţanga dim lo zet a ka hmui rawn hup thukin ka beng bulah Mateo a rawn phun sup sup a, a awm lian tak chu tauh datin chet sawn ka tum, ka hlau lutuk chuan ka chheh vel a mite chu ka hmu phe ruai tawh a, ka mittui a tla tih ka hre chiah. 

"Eng nge thil awmzia ni a?" mipa lam warden in a tih chuan "Inhnuai a awm ho ka en fel hnuah inchungah ka chho a, Lucky hi a lo ding reng a, amah a ni tih pawh hre lovin ka bia a, a au ta vak sia, tun hnai hian hostel an sawi hrang deuh bawk nen, hlau sa a chho ka nih miau avangin ka au ve vak vak anih kha" tiin Miss in a lo hrilhfiah a, mipa ho chuan ho an ti ngei mai. 

June leh Jessie ten min kaiin kan room lamah min hruai a, miss rawnkal loh na lam, Josephine-i room hlui lam a eng emaw phe vuai ka hmuh thu ka sawi uar nasa mai. 

"Amah anih chu...midang pawn an sawi fo alawm. A room a veng an ti mai a, tumah kan chhuak ru tawh ngai hleinem" June chuan a ti a, puan faiin ka bek thlan hnawng chap leh ka biang a mittui luanna te chu min hruk sak a, "Muankiman naktukah min hruaina tur a neih thu a sawi a, khawi lai nge i hria em?" ka tih chuan lu a thing ne ne a, min bum a tum chiang. June berkher hi chu ka hrechiang lutuk tlat. 

"Han sawi teh...khawiah emaw min hruai a tum a, buaina leh bawk a ni em? Buaina nen kan inzawm lehpek em?" ka ti hlak hlak a, khum a rawn lawnin Jessie in min rawn zawm ve. 

"Zanin chu mu ho ang u...nang meuh pawn i hlauh chuan eng emaw a awm aniang, keimahin ka mu ngam lo" a ti dar dar a, a meng phawk hra a, a hlauh zia a hmelah a la lang thei. 

"Keini chuan Pathian nung kan bia a, khatiang mai mai kha kan hlau ve hleinem" tiin June chuan a lo fiam a, ka nui ve thei lo. Ka hlau miau alawm, hlau tak ka ni ringawt. 

"Nia, kei aiin in huai zawk a, in bulah ka mu dawn. Tawt deuh pawn inhnawh mai ang u, a kilah hian ka mu duh" a ti a, fel thanin a kil chetah a mu nghal zat. 

Room chhung a bungrua te chu siamremin June nen khum kan dawh zawm a, Jessie a che ngam tawh lo hrim hrim. Ka mut rualin nghet tawkin min lo kuah a, min khan bet tlat bawk. A laiah ka mu a, a sir berah June a mu. 

Zingah hma tawkah ka harh a, June leh Jessie ten min kuah bet nasa bawk a ka thlan a tla hluam mai. Pawn lamah thawm a awm tawh a, an tho nual tawh tih ka hre mai. 

Ka ţhiante tih harh loh hram tumin ka tho a, rem lo deuhin tukverhah ka dak. Zanah khan June nen bungrua kan nawr khawm ruih a, kan room chhung chu a hnawk ngang mai. 

Josephine-i kawr an tih pawh kha ka hmu a, ka en ngial pawhin Josephine nen ka hmeh bel thiam lo. A ha lai ka la hmu lova, ka mitthla thiam lo a ni ber. Room chhunga an la dah duh reng te chu a mak e, ka ţhiante hi an huai ka ti letling zawk. Kei ni ila ka paih chhuahna a rei tawh ngawt ang. 

Midang class kal tur a an chhuah rem hnuah pindan ka chhuahsan ve chauh a, thawm danglam ka hre tawh lo. Zan lam a aw ka hriatna lai ka thlen chuan hlauhna bawkin min man leh a, ka la ţum ur ur thei hial. Thawklehkhatah ka tlan thut a, Muankima min lo nghahna lai ka thlen thlengin ka tlan. 

Hah lutuk vanga ka thaw hlawp hlawp chu min lo dawm dingin thil awmzia min zawt a, ka chhang thei lawk lo lehnghal. Thei leh thei lo a ţawng ka tum chuan a nuih a ti za a, dawhthei deuhin ka hahdam hun a nghak. 

"Zan lam a thil thleng i hria em?" ka tih chuan a hriat tawh thuin min chhang a, "Khua a eng uarh tawh na a ka la hlau a" ka tih chuan a nui chhuak ta hawk a. 

"Mihring dam lai an hlauhawm zawk. An sawisak hneh em che hi" awmze nei deuh a a tih chuan "Khawiah maw min hruai dawn?" ka ti ţha leh. 

"I hre mai ang" tih sup pahin mask a rawn lek chhuak a, zawhna ka zawh leh hmain min vuah tir nghal mawlh mawlh.

"Tikhan i hawi chhuak ngam ve deuh ang" a ti a, Josephine chungchang min zawt zui lo va, kan kalna tur pawh a la sawi lo. 

Bike hnunga ţhuin a taksa ka kuah bet a, kan kalna tur hre lovin ka zui mawl tawp. Rilru a nuam duh lo khawp mai. 

"Mualpho deuh a siamtu che hi hre ta la i ngaidam thei angem?" tiin amah zawk chu ţawng chhuak hmasa ah a ţang a, ka ngaihtuahna a ti thui khawp mai. 

Ngaidam thei lo khawp a fel famkim ka ni miah lova, ngaihdam tlak loh ka ngaihdam chuan sual ka vulh lian a ni dawn a, insiamţhat tum miah lo, tihsual nawn hreh miah lo mi ka ngaihdam ka hlau a ni. 

"Kha thil tu kha tunah ka hmu dawn tiraw?" ka tih chuan a kawnga ka kut ka suih beh tlat chu a rawn hum a, "Misual hian chance ţha neih leh an phu i ti em?" tiin zawhna vekin min chhang let a, ka awmdan ka sawifiah thiam lo. Hlauhna leh hrehawmna te, thinrimna leh phurna te, mihring min ti phawk lek thei tu ang hi ka nei kim vek a ni ber. 

"Ka nun zawng zawng a ti chhia a, hma hun eng tak nei lo mah ila class kal zawm ngam lovin min siam a, ka mihring puite hmu ţha ngam lovin min siam bawk a, ka nunah hrehawmna tinreng a thlen tir a, hmeichhia ka nih anga ka zahawm ve ţhinna zawng zawng min lak bo sak a, hetianga min siam tu hi a phu tawk hremna pek i chak viau lo em ni?" ka ti malh malh a, min chhang tawh lo. 

In ţha ve tak kawtah kan ding a, chu in ka hmuh chuan mak ti ru deuh takin "Hetah hian eng nge kan tih dawn?" ka ti hluai a, chu in chu ka kawk pah va bawk. 

"Kha thil ti tu kha kan hmu dawn" a ti liam satliah a, ka kut rawn humin a hmer vang vang a, kei aiin a luh hreh hmel zawk. Thinrim angin a awm lo na a a lungawi hmel chuang miah lo. 

Door bell a hmeh rik hnuah nu pakhatin a rawn hawng a, a chauh hmelin a ngui nghiai a, ţap hrep hnu a ang bawk. 

A kutin min hui a, engmah phei zawng a sawi lo. Muankima chuan min kai lut a, ka mihring puite nuihzat bur a min siam tu, hmuhsitawm taka min siam tu leh ka hma hun zawng zawng min tihchhiatsak vek tu nen chuan kan inhmachhawn ran mai. 

A hmai a duk nasa in kut thlak hrep hnu tih a hriat hle a, a mit leh biang vel a vung ul a, a ban an tuam luk a, hmuh tlak a awm lo a tih theih a ni. 

"Mama, nangmah maw?" zawi te tak takin ka ti a, ka hrawk a ro a, ka aw chu a ri chhuak zo lo lek lek a ni. 

CONT..(Edit loh aw...awii ka buai tawpz a😂😂)