THE GOOD, THE BAD AND THE OTHERS-18

 

THE GOOD, THE BAD AND THE OTHERS-18

 

 

 

"Ngatinge khatiang thil kha i tih?" ka ti mawl tawp a, ka ngaihtuahna a chawl duk a, mak ka ti lutuk chu thinrim ngaihna pawh ka hre lo.

 

 

 

"In ngaidam thei em? Kut inthlakna ringawt pawh hi nu tan chuan hmuh a hrehawm tawh a, khawngaihtakin police hriattir lo hram rawh u aw" ti a min ngen lawm lawm chungin Mama nu chu Mama bulah a ţhu a, a mittui a hnam leh tiam tawh, a fapa chu venhim tum ni awm takin a kuah bawk. Nu hmangaihna tak hi chu aw..

 

 

 

"Lo ţan teivet suh, mi pawi a sawi a, an duh duhin ti rawh se" a pa chuan a ti hmuk a, a lungawi loh hmel viau a ni.

 

 

 

"Muankima hi ka duh alawm" ti a Mama a rawn ţawngchhuah chuan vuak chawrh ang mai ka ni. Muankima lo chek tlak chu haiderin "Engmaw? Tumaw i duh a?" ka ti hluai a, hmai vung burin min rawn en a, a landan chu a khawngaihthlak lek lek.

 

 

 

"Muankima hi ka duh. Ţhian anga awm siin i ta ah i lo siam anih kha" thinrim zet a a tih chuan ka nui tawp. Sawi tur ka hre lova, awmdan tur ber pawh ka hre lo.

 

 

 

"Ţhian alawm in nih. Muankima hi i ţhianţhaber a nia, engtinnge i duh theih? Jail a a thawn liam loh nan che i rilru thlak thuai rawh" tiin a nu'n a lo nawr ve sek bawk.

 

 

 

"In hrevek a in pawm duh lo a nih kha. Hmeichhia aiin mipa in ka rilru an hneh thei zawk tih in hria, mipa awmpui nuam ka ti zawk. Ka sim thei tawh lo. In duh leh jail ah chuan min dah rawh u" a ti pung pung a, rapna leh tenna a inpawlh nawk ni berin ka hria.

 

 

 

"Mipa i nih kha, chu chu engmahin a ti danglam lovang. I mipat pui i duh vangin hmeichhe pawisawi lo in a tuar a, zahpuiawm lutuk. In duh leh mantir ula, in duh duhin ti rawh u" a pa chuan a ti hluk hluk a, a fapa chu a lainat ve tho ka ring, zirtirna pek a duh vang chauh a ni.

 

 

 

"Ka inturah khan damdawi i pawlh tiraw? Damdawi awmna tak kha engtinnge June in min pek theih?" ţhutthlenga ţhut thlak pahin ka ti a, ţhutthleng pakhatah kan ţhu dun lo na a an dawhzawm vangin kan inhnaih viau. Kan inkarah tumah an awm lo.

 

 

 

"June kha keiman ka lo pe anih kha. Resort ah khan ka kal ve, nangpawn min hmuh vek kha. Rin ngaihna in hre lo mai zawk a ni" min nuihzat hmel tak hian a ti a, cctv footage ah pawh a pian phung a lang reng a, Mama a nih kan rin loh lutuk nain kan mit a ti del a ni.

 

 

 

"June pawn rinhlelh ngaihna che a hre miah lo maw?" ka tih chuan a nui hawk a, a hmui sir kak chu na tih hmel zetin a ner zui nawk.

 

 

 

"Teuh nang...in buai luih luih lai pawh khan ka hmuh theih veleh chanchin ka zawt a, kimchang deuhin min hrilh" intithei fe hian a ti a, a thil tih pawi ti lo ang tak a lan a tum na a a mitmeng a hrehawm a tihna langchhuak erawh hmuh kan theih a ni lo.

 

 

 

"Khawngaihtakin ngaidam rawh. Khatiang thil kha a thleng leh tawh lovang. Ka neihchhun liau liau a nia, fa dang ka nei si lo. Mama tello chuan ka awm thei lo ang" a nu chuan a lo ti leh mawlh mawlh a, man tir tumna ka nei miah lo chu mak ka inti. A nih tur ang a ni vek tawh a, ka mantir chuan boruak a alh leh hluai ang a, chubakah a nu rilru na lutuk tur ka hmu ngam lovang.

 

 

 

"I thil tih avang khan tun thlengin ka la inthukru tlat a, class ka kal zawm ngam tawh lo bawk. Ka nun zawng zawng i ti chhe lo na a tam tak i ti chhia a, ka zalenna thlengin min laksak a" ka ti a, "Pawi ka ti khawp mai" a ti liam puat a, a nu leh pate an awm ve reng avangin duh angin ka ţawng ngam lo.

 

 

 

"Pawi i tih chuan ţha deuhin ngaihdam dil ta che. Muankiman a man chhuak che a, an duh anga i awm loh chuan police an mantir mai ang che. Luhlul chhuah na hun a ni tawh hleinem" a nu chuan a lo ti chul a, nu mawlmawng ve tak, pasal leh fate tan a theihtawp chhuah ţhin anih ka ring.

 

 

 

"Muankiman a kalsan theih nan che a ti ka ni. Mimal inhuatna a tello, ka haw miah lo che" Mama chuan a ti a, tlemin a thutak ve ta deuh.

 

 

 

"Keini phei chuan engmah kan hriatpui lo. Inhliam phungin a rawn haw a, kan ţhiannu leh Muankima ten kut min thlak a tih khan kei phei chu ka thin a rim nghal viau a, mahse a pa hian Muankiman chhan awm lova kut a thlak ngawt a ring lo a, an buai chhan a zawt a, a sawi ta chauh a ni. A rawn rui hle bawk a, police in min man dawn a tia, hliam na tak tuar chung khan hlauthawng deuhin chhuat dungah a vei kual chhen a, Muankima kan biak leh hnuah thil awmdan kan hrechiang zual a" Mama nu chuan a ti malh malh a, Mama'n kan ţhiannu a tih chu June a nih ka ring.

 

 

 

Ka rindan nemngheh nan Mama chuan "June lah kha a lo inrawlh ve ringawt a, midang kutthlak nuam a tih zia ka hriatna a rei tawh. Kha mihring khan tumah a that hreh lovang" a ti hluk hluk a, a awmdan danglam reng chu mak ka ti, eng emaw ruih nei te pawh a ang.

 

 

 

"Bathroom ah ka va kal lawk teh ang. Tikhan lo ţhu rawh u, hriat duh in ngah hmel emai" duhdah zet a a tih leh hnuah bathroom kal tumin a tho a, tuman kan dang lo.

 

 

 

Mama awm loh veleh a pa chuan, "Muankim, a zahthlak khawp mai. Khaw dang aţangin i rawnkal a, ţhianţha tiin kan inah i rawn tlangnel a, i in pakhat ang maiin i ngai tih pawh kan hria. I ţhianpa berin rilru dik lo a lo pu reng a, a danglamna hi kan hriatna a rei tawh na a i lakah lehzel khatiang rilru kha a put kan ring miah lo. Mama hi in duh duhin ti ula, ngaihdam dil ngam tur che u ni lo mah ila min ngaidam mawlh mawlh teh" a ti dap dap a, a ţhu hle hle thei lo, a che sek a, hrehawm a ti ve hle a nih hmel.

 

 

“Vanneihi hnenah hian ngaihdam dil zawk rawh u” Muankima chuan a lo ti a, ka hming pangai a hman tawh chuan thil serious deuh a thleng tihna a ni ţhin.

 

 

 

“Ni e, ngaihdam kan ngai a ni, police hriattirin jail hial tan tir mah ula pawi kan ti miah lo a nia. Kan mitmei veng duh suh u. Engpawh ti dawn ula ngaihdam dil che u chu kan tih tur a ni” nghet zet hian a ti chuar chuar a, mak tak maiin a inngaitlawm lutuk chuan ngaihdam duhna min neih tir a ni.

 

 

 

“A rui reng lehnghal a, zu chiah a ni lo; a pindanah, lukham hnuaiah te damdawi kawr ka chhar fo mai. Engtia han tih chi nge mawni?” Mama nu chuan a ti halh a, a awmdan kha a mumallo ka ti reng a ni, a nu leh pate hi an khawngaihthlak khawp mai.

 

 

 

Mama rawn let chu ka piahah bawk a rawn ţhu leh a, amah ka en hian a thil tih te hi pawm harsa ka ti ngawih ngawih, tu pawi mah a sawi ngai lo asin mawle. Muankima lah chuan a melh duh tawh eih lova, a ţhianpa nihna tak a hre meuh chu a hlat nghal dawrh a ni ber.

 

 

 

“Mama a bul aţangin engkim han sawi the” zah pawh dawn lovin ka ti leh rawih a, police lam ka ngaihtuah chang tawh lo. A thil tih dan engkim ka hre duh a ni mai.

 

 

 

“Muankima nen kan inkawm khan ka ţhian dangte aiin ka chik bik a, ţawngtam lem lo mah se a bul a awm a nuam a, a puitling bawk. Zawi zawiin a mizi hian min hip a, ţhiante ngaihmelh tlat te chu ka tum lawk a ni bik lo. Hmeichhia aia mipa ka duh zawk miau vangin tum lawk ni miah lovin ka duh ta tlat a, I hnenah pawh ‘in inngaizawng em?’ ti a ka zawh fo che kha, aih ti chung rengin in lo inkawp nghet viau lawi a, ka hriat hlim khan ka thin a rimin in inţhen theih dan tur ngaihtuahin ka buai teh asin” tih pahin min rawn melh a, mak tak maiin min huat hmel miah lo.

 

 

 

ruahmanna dang ka siam lai mek a ni bawk. Ka ruahman lai mek anga ka chet chuan dikhlel a tam dawn tih ka hria a, a awlsam zawngin ka che ta anih kha. I mualpho ta viau erawh pawi ka ti, Muankima I lam aţang kha a pawi lehzual. Ka chetdan kha chawpchilh a ka ngaihtuah chhuah theih chhun a nia, mu tur a I luh hnu lawkah ka rawn lut ve. June chuan pawnah zu a la in a, a zui luh nghal mai che ka hlau a sin. June tello a I luh vang khan rin ang ngeiin kawngkhar I kalh lova, khati khan ka che zui ta anih kha. Ka chetdan chu sawi ngai lovin in hre vek” a ti a, rapthlak ka ti lutuk chu sawi mai tur pawh ka hre lo.

 

 

 

A pa lah chuan “I zak der mai si lova, Muankima leh I ţhiannu chuan an la sawisa nasa lo mah mah che a nih kha. Jail ah alu leh dal ei tluk tluk la a ni mai” a lo la ti khur khur a, Mama’n “Lockdown a ni reng sia, chutiang an hmeh pha kher lovang” ngaihsam hmel zet a a tih te chuan tumah kan nui thei lo. A zamna thup a tum nasa a, chu chu kan hmu thiam vek zawk ang.

 

 

 

“Damdawi kha khawi a mi nge? Eng damdawi nge I hman?” zawi ein ka lo ti leh a, thinrima ka che buan buan lo hi mak ka inti. Ang tun tun a beng sawk sawk tur ka nih laiin ka ţhu mai mai a nia, Mama ber kher a nihna hian ka tha neih ve te kha a ti bo zo. A nu leh pate lungngai hmel ringawt te hian insum theihna min pe ni berin ka hria.

 

 

 

“Damdawi te chu ka rui ziah a, kha thil kha ka tan hmuh a har lo. Damdawi dawr tam takah an kawl a, mum khat chauh paw’n tui deuhin a mutthilh tir thei ang che. Hman zan kha chuan I inturah tam deuh ka telh a, I thi lo kha a mak zawk” a tih chuan ka rap thar leh a, ka hlau bawk.

 

 

 

“I rapthlak hle mai” ka ti chhuak sep a, ka ngaidam dawn emaw dawn lo emaw a hriat laia sawichhuah ka tum lo

 

 

 

“Kan man tir lovang che” tih chu ka sawi a, a nu hahdam huai hmel leh a pa mak ti hmel chu hmuhnawm a tling.

 

 

Mama takngial paw’n “I â em ni?” a ti hluai a, phawk hrain min en a, a rui tih hriat takin a mitmeng a paw ruai thung. ‘Âtna a ni lo,chakna zawk a ti’ ka rilru chuan ka ti na a ka sawichhuak lem lo.

 

 

 

“Ka mualpho tur angin ka mualpho vek tawh. Ka man tir che a, thu a put ru leh anih chuan boruak a alh leh hluai ang a, mi tamtakin en ve loh hlauin video an zawng leh chung ang a, ka mualpho nawn leh ang. Nangmah vanga mualpho nawn leh ka tum reng reng lo” ka ti fak fak a, Muankima ngei pawh hian man tir a duh bik lo tih ka hria. Ţhian an lo nih ve tawh ţhinna kha a zah ang a, Mama nu leh pate hrehawm tawrh tir a phallo bawk ang. Ni lo se chu rei rial lovin police hriattir turin min ti daih tawh ang.

 

 

 

“A va lawmawm tak em. I ngaihdam ka ring miah lova” a nu’n a tih chuan “Ka ngaidam hleinem” ka ti hmak a, a hrilhhai hmel viau reng a ni.

 

 

 

 “A thil tih kha ngaihdam tlak a nih loh zia in hre vek ang. Ka zahzawmna min hlih sak a, mi nuihzatbur a min siamin hmusittu min pek belh a, ka zalenna min ţhiah sak vek bawk. Tumah ka hmu ngam mang tawh lova, tharum tello in puk chhungah min nawr lut a, tuman an ngaidam thei bik lovang” ka ti leh fak fak a, an ngawi ţhuap a, boruak a pik ru takzet a ni.

 

 

 

Ka ngaihdam loh thu ka sawi tak na a police ka mantir loh chuan ka ngaidam tihna a ni mai a,a hriat laia sawi ka duh lo bur a, a nu leh pate hriat pawh ka duh chuang lo. Ngaihdamna hi a ropui a, inchhir angin a awm duh lo na a thuk takah chuan a inchhir a, a hlauin hrehawm a ti takzet tih ka hria a ni. A sualna ka thungrul ve lo leh hremna ka pe lo hi ka nep vang a ni lo. Khatiang thil kha a ti tawh dawn lo tih ka hriat vang a ni. A sawichhuak miah lo na a Mama hi ka hrechiang, a ti tawh miah lovang. Hremna ka pek chuan a nu leh pa an na dawn lutuk bawk a, Mama ka tihnat rualin anni pawh ka ti na tel ve ang.

 

 

 

“Ka ti tawh lovang” Mama pawh chuan a ti ve ta nge nge a, a zah hmel takzet a ni.

 

“Ka hria, I ti tawh dawn lo tih ka hria. Mahse I thil tih kha ka hrereng tawh dawn a, damchhungin ser ka nei tawh dawn tihna a nih chu” a hriat lai chuan ka ti tho a, ka hma ngai tute thin ka ti rim maithei, mahse Kristian ţha tak ni lo mah ila sual chu sual a thungrulh loh tur tih thu kha ka nunpui ve ţhin a, ngaihdamna thiltihtheih zia ka hre bawk.

 

 

 

“Thil dang hriat leh ka duh tawh lo, duhzawng I nei anih pawhin amah hrilh la, midang hrem nan leh thil ţhalo tih phah nan hmang tawh suh” ka ti hram a, ka ding nghal uaih  bawk.

 

 

 

Muankima pawh lo ding ve thuaiin Mama nu leh pa chu ţha deuhin a thlah a, Mama erawh a be lova, melh pawh a la melh duh chuang lo. An inkawmngeih ţhin tehlul nen, a pawi ngawt mai.

 

 

 

Pawn kan chhuah rualin am zetin boruak ka hip lut a, ka thawven beisei a ka thawkchhuah leh ham ham lai chuan Muankiman ka hnung a rawn dawm a, nui seih a ka melh chhoh ha chuan min lo nuih let ve sukin “I ti ţha aw” a ti sup a, police man tir turin min hrilh miah lo.

 

 

 

“Engtinnge I hriatchhuah?” ka tih chuan “Nakinah ka la hrilh ang che” tih pahin bike awmna lamah dimtein min nawr phei a, “Enganginnge I ngaih?” lehhawi pahin ka ti leh ţalh.

 

“Tu maw?” ti supin mit ko a lo san uk a, “Mama kha” ka tih chuan “Tenawm” ti hlukin a ner zui sawk a, a chhiatna tur duh dawn hauh lo mah se a hnaih duh tawh ka ring lo. Tihian an inţhianţhatna chu a tawp a ni mai.

 

 

 

Hmun danga pengkawi lovin hostel ah kan lut tlang a, thil ei tur a penkawi takngial pawh ka duh lo. Ka mu chak a, chuzawg chu a ni mai.

 

 

 

June leh Jessie te an awm lova, zan lama ka thil tawn avang khan mahni a awm chu tlemin ka tim ve deuh. Ka inbual hmasa te te a, Muankim chu chawhnu lam class nang hman turin a kal, ani ang tan chuan vawikhat lek ţhulh pawh a uihawm reng a ni. Inbual zawh veleh khum dawhzawmah ka let thla hnawk a, biak tur ber Muankima a kal ta daih sia, tihtur awm lo lutuk chu khum a leh kual pahin lukham hnuai ka ban a, lehkhabu lo awm chu dap fuhin ka phawrh chhuak a, english novel bu hlui tawh lutuk a June tih inziak vâng chuan nuih a ti za lek lek. Mama sawisa ve tu kha Muankima ka zawt ta miah lova, a sawi anga kan June  hi a lo nih tak tak chuan a chungah ka lawm viau ang.

 

 

 

Mu zangthal ar chungin lehkhabu chu ka keu a, ka chhiar duhzawng a ni ve mang lo. Ka keu kual dan dan lai chuan ka awm zawnah eng emaw a rawn tla a, ngaihţhat lohna em em nei lovin ka la kang a, thlalak a lo ni. Phone leh computer a awm tawh a, thla kan lak pawn kan print vak tawh ngai lo a ni a, thlalak ka hmu nawlh chu mak ka ti ve deuh, June leh Josephine anni lehnghal.

 

 

 

“An inhre ngai vak bik lo emaw ka tia” tiin ka phun chhuak sep a, thlalak a June bula ding chu Josephine ngei a ni si.

 

 

Mak ka tihna belhchhah tu chu pen tuisen a Josephine hmai X anga inthai kher chu a ni. Hmuh theih loh khawp a thaichhiat a nih loh vangin Josephine tih chu chiang takin a hriat a, mahse, a thih tawh vang maiin June hian ngatinge a hmai zawn a thaichhiat kher ni ang?

 

 

(Link ngaiah ka zawm ang aw, Tunlai chu buai a zual a, zan lamah zel ka dah rih ang)

 

 

Zawmna aw...

Thlalak chu khum a dah remin phone camera in ka click a, Muankima ka thawn. Rei deuh hnuah a seen ve chauh a, [Min ngei deuh ţum chuan thlalak a ka nui ţha hle hle lai pawh ka ha te i chei dum fo kha] a rawn ti a, a dik ve reng. Mahse ngaihţhat lohna a nei miah lo chu mak ka ti. 

[He thil hian entir a nei miah lo mi?] ka tih chuan [Ka hre bik lo] tih zawngin min rawn chhang a, mak tiin ka en nawn leh ţhin a, Josephine thlalak a nih vang hrim hrim pawn ka hlau deuh reuh. Gabriela sawi kha a lo dik chiah a nih dawn hi, ţhianţha a kan ngaih te pawn zep chin an lo nei ţhin. 

Jessie a rawn haw hmasa a, "Khaw nge in chhuah daih?" a rawn ti lut. 

"Mama kan hmu a, video theh darh chiam tu kha a nia, a mak lutuk ka ngaidam mawle" ka ti hluai a, a nu leh pa hmel kha mitthla ah a lo lang leh a, hremna ka pe thei thlawt lo a ni. 

"I ti ţha lutuk alawm" tiin Jessie chuan rin loh deuhin min chhang a, ka melh deuh ha lai chuan ka bulah rawn ţhu thlain lays kawr puar leng lung chu zau deuhin a hawng a, ei ve rawh ti ni awm takin ka malchungah a rawn dah bawk.

"Kei ni ila ka ngaidam thei angem ka hre lo, mahse miin an chunga thil sual ti tute an ngaihdam hian ropui ka ti ţhin a, Mama pawn a tih tawh loh ka beisei. Ngaihdamna hian mi thinlungah nasa takin thu a khawih thei a, misual thinlung pawh a khawih che ve dawt thei ang" a ti malh malh a, min hau bawrh bawrh lo chuan awm a ti nuam deuh. 

June rawn haw ve thung chuan Jessie tui vawt rawn hawn chu ban nghalin a in dawk dawk a, lum a tih hmel kher mai. Kut a sil leh hnuah chair pawt hnaiin kan hmaah a rawn ţhu a, lays a rawn ban ve nghal zat. 

"I ngaidam ta maw?" a ti deuh thawr a, min melh kal mai bawk a, thinrim hmel leh lawm hmel ka hmu lo hrim hrim. 

"Engmah min hrilh lova, Mama a ni tih min hrilhna hun i ngah tehlul nen" ka tih chuan "Muankiman i awm nawm loh phah a hlau tlat alawm. Hrilh che ka chak mah nak laia, kan hriatchhuah hnuah thinrimin kut kan thlak a, a dawh tawp. Muankiman min dang lo se chu ka vawhlum daih ang, engtinnge i ngaihdam theih?" min dem awka hian a ti a, keipawh ka indem tho, mahse jail ah ka nawr liam thei thlawt lo a ni. 

"Ka hre bik lo" dar kan ak chung hian ka ti a, "A ţha zawk daih alawm. Jail a tan tir khan engmah a siamţha tawh dawn chuang lova, Lucky misual ngaihdam tak hian a nun a hmang ţha zui em tih te pawh kan en ang chu" tiin Jessie in ka thlavang a lo hauh. 

"Ngaihdamna hi ka thupui ber a ni ve lo. Misual chu an phu tawk anga hrem tur a ni tawp mai. Kan chunga thil ti sual chu hremna kan pek hian tu pawi mah kan sawi lo, kan ngaihdam hian midang kan ti thinrim zawk, Lucky in min ti thinrim ang chiah hian" a ti hmak hmak a, inthiam lo viau mah ila ka thil tihah khan ka inchhir chuang lo. Thil harsa tak ka ti ve tho a, ka ngaidam thei kha ka inchhuang zawk. 

"Engtinnge in hriatchhuah theih?" Jessie in a tih chuan keipawn ka lo ngaihven thuai. An hriatchhuah dan ka hrechak zek zek a ni. 

"Muankiman a ringhlel a, Mama ţhiannu piancham kan lawm zan khan kan fiah alawm. Muankima ber kha Mama bul a awm luih a ngai sia, a ţap lek lekin ka hria" nui hawk chung hian a ti a, "Mama ţhiannu kha" ka lo ti vat. 

"Ele..keiman ka awmpui" a ti sam et a, nui ruh ruh chungin a leiin a biang chhunglam a hawl a, a intihtheih hmel viau. 

"A duh ve mai che mi?" ka ti chhuak phawng mai. 

"A rui tawh a, hmeichhia leh mipa a hrehrang tawh lo aniang, a ţhianpa ber lah Muankima bulah a awm tlat sia, Mama mai mai chu kan inpawh viau asin mawle. Mipa a duh zawkna a ti langchhuak ngai miah lova, thudik a lanchhuah hnu pawh hian ka la awih lo. Duhzawng a neih chuan pangai deuh a hrilh mai tur a nia" a ti nang nang a, "Vulmawiin i bialpa a chhuhsak che maw?" tiin Jessie a fiam zui zat.

"Gabriela zia ve hrim hrim ania, hmeichhe ngai a kawp rei ngai hleinem. Vulmawii nen pawh an inkawp rei leh chuang lovang" a ti a, nuam lo a tih hmel hle. 

"I zei lo lutuk aniang chu, Vulmawii ang hian ti ve hawrh la, rei deuh in ni ve mai dawn lawm. Mipa chuan tlem a zei ve deuh hi an duh ţhin a" ti a Jessie a hrilh lai chuan Muankima lawm nan a theihtawp ka chhuah ţhin lai kha ka hrechhuak a, ka zak leh hnuhnawh. 

"Zei loh na na na chuan zei anga lan luih a har awm emai. Bakah engahmah ka ngai lo. Ka lo duh lawk lova, min thlem nasat vangin inkawp kha ka remti ve mai mai zawk a, min phatsan leh pawh hi ka rilru a na hran lo" a ti niah niah a, "A na anih niah niah kha" June lah chuan a lo ti kher a, Jessie hriat lohin a ke ka tlawh. 

June nen a cafe kan luh rualin "Lucky" tih ri kan hre nghal a, "Hetah lokal rawh, June kan ko tel ve lo" a rawn ti leh lung lung a, a hnung berah kan ţhiante an lo ţhu tlar ţhap. Vulmawii lah chu Gabriela hnaih lutukah a ţhu a, a awmah a bei hlu hlu lo chauh a ni. 

"I chhe luah luah emai, ka rawnkal ve dawn tho tho" ti letin June chuan min nam phei rawk rawk a, lo ţhu tlar sa ţhap te hmaah kan ţhu ve. 

"June, Mama chu engtinmaw? Vawiin khan min hrilh thuak ringawt a, sawi zo law law teh" Vulmawiin a lo ti sar sar a, a rawn kun phei deuh bawk. 

"Video hlawhtling lutuk siam tu kha a nia, kan model hian a ngaidam hmak bawk a" June chuan a ti deuh kher a, rin ang ngeiin Vulmawiin min melh rang nasa khawp mai. 

"I tlaw lutuk hi hauh ngaihna che pawh ka hre tawh lo. Vanram i kai chiang viau ang, Pathianin ţhian pakhat hruai ve a phal sak hial che ka ring, tihian khawvelah ka sapatal huat huat ang a, nakinah vanramah min hruai ve ang che. Ka hauh nghal a nia aw" a ti zat zat a, midang an nuih ham ham laiin ka nuih a za ve thei der lo. 

"I ngaidam maw?" Vulmawii chuan a ti leh hluai a, a awih thei thlawt lo hi a mak hran lo. 

"Aw...ka ngaihdam chhan ka hre bik lo. Engmah ni lo mah ila a hmel ka hmuh khan ka khawngaih tlat a, a thil tih kha haw viau mah ila amah ka haw tel lo aniang" ka ti ta vel mai mai a, insawithiam ngaihna ka hre lo, ka ti dik lo miau a ni. Nge ka ti dik lutuk zawk? Chupawh chu ka hre chuang lo. 

"Vulmawi, Gabriela kha hnaih lutuk lo teh. Jessie a awm loh hi" Mateo chuan a ti ta hlauh a, "Duh leh ka hnaih ang. Hnaih tu tur i neih ve loh vang" tiin Vulmawii chuan naupangchhia deuhin a chhang let a, "Engtin nge Mama kha i hriatchhuah?" Muankima hnenah ka lo ti ve thung. Ka ngaihtuah zawng a inang lo hlawm khawp mai. 

"June leh Mama hian in unauna lai an nei in ti ve em?" nuihza aw tak hian Gabrielan a rawn ti ve zat a, anpui kawp duh zawk an ni miau a, an inang viau tak tak mai. 

"Khatin min ti vel suh aw Gabriel, Mama ang emin ka sual ve hleinem" June chuan a ti hlak a, thlalak kha ka hrechhuak leh zawk.

"Josephine khan tu zawk nge a ngaihzawn cheu? Ka hriat dan--" ka ti hman chiah tihah mitmeiin Muankiman min lo khap a, min ngaichang reng tu Vulmawii leh Mateo te chu melh daihin "Ka uang a" ka ti a, ka nui lui hak hak bawk. 

"Josephine chu kan Angel-a bialnu hlui alawm. A thihzan te khan a ţap fuih fuih a" Mateo chuan a lo ti fiamthu a, Gabrielan a duh lo ngang mai. 

Zanah Muankima nen cabin ah kan inhmu a, Mama a hriatchhuah dan ka zawt nawn leh. 

"Gay porn a en ka hmu fuh a" hreh hmel zet hian a ti a, "Chuvang mai mai chuan maw?" ka tih chuan "Video chungchang kha a sawi ngun bawk. Mi engzat chiahin nge hmu ang tih te, ka rilru danglam phah leh phah loh nitin deuhthaw min zawt bawk. A thil en ka hmuh fuh tawh bawk avangin ka ringhlel a, porn pawh nise mipa pangai chuan gay berkher an en lovang, a tenawm" a ti leh nghut a, mipa leh mipa chu ngaihtuah pawh ka ngaihtuah ngam lo. 

Sawi zel tur a ka tih chuan "Aizawl a ka let khan an inah ka riak a, damdawi a ei rui a, a mutthilh veleh a rukin phone ka en sak. Drama leh movie te, chutiangah chuan Bl lam a tuipui a, ka sawi tawh ang khan porn a en nasa bawk. A phone check phei chuan mipa aiin hmeichhia a duh zawk tih a hriat theih nghal vek. Ka zawn ber chu whatsapp ah ka hmu, a ţhian pakhat nen an inbiaknaah a thil tih kha a hrilh a, a inthiam loh thu nen lam a sawi vek. Kan phone hi tuman an en lo turah ngaiin chat kan clear ngai mang lova, ka phone ah pawh min star laia min rawn biakna zawng zawng a la awm vek, min biak duh vanga ţul mang lo min rawn thawn ho kha" a ti deuh kher a, ka melh rum al lai chuan "Zanrei a in zawhte chanchin i sawina thlengin a la awm" nuihza aw tak hian a ti a, ka bula a rawn ţhut rualin a malah ka lo chum ţhawlh a, ka zak ve reuh lutuk chu ka lum ve pap pap mai. Biak hrim hrim ka duh ţhin vang khan sawi tur ka dap chawp nasa thei viau reng a ni. 

"Mama khan porn a en ka hmuh fuh hma pawn min hnaih huam huam danah ngaihţhat lohna ka nei tawh. Class i ţhulh ni aţang khan min hnaih lehzual. Tihpalh ang deuh a ka mal zut te, fiamthu ni awm taka min kaih te a hrat a, khata ţang khan a rukin ka chik a, ka hriatchhuah phah a nih ber chu. A thil tih ka hriatchhuah vek hnuah pawh ka chian lehzual theih nan haiderin bazarah te ka kalpui a, a ţhiannu piancham lawm na a kalpui turin ka intiam bawk. A ţhiannu ber kan hruai hran loh chuan Mama bulah a awm tam theih dawn loh a, June ka sawm ve ta a nih kha. Thlen phat aţangin June hian Mama ţhiannu a bekbawr nghal sar sar reng a, zu a intir zeuh zeuh bawk. Mama chu aman min tih ţhin dan chiah a ti ve in mi awm lohna lai inchung zawlah ka chhoh pui a, zu leh damdawi a ruih pawlh a, min beisei ru sa reng a nih bawk vangin a kâ aţanga ka hriat duh ho chu zawhchhuah a har lo. Ka thlem vel dan ţawngkam chu sawichhawng turin min ti miah suh" a ti lawk sa a, ka lo nui hak. 

A ţul chuan ka zei thiam a tia, chu chu keipawn ka hria. Mama a han lem kual vel tur chu a hmuhnawm phian ang. 

"A ruih vang khan min ngai huam huam tawh a, ka duh ang ka sawi tir hnuah ka thinrim insum zo tawh lovin kut ka thlak anih kha. Min zawng tur a June rawn chhoh lai a nia, 'i ngaihdan kha a dik tak tak em ni' a rawn ti a, ka chhan hma hauhin kut a rawn thlak ve nghal buan buan a" a ti a, kha zan a thil thleng kha a hrechhuak thar leh ni tur a ni a nui ta hawk hawk a. 

"Police hnen a i report lo kha ka lawm viau a sin" a tih chuan ka thlek ha a, min rawn hnaihin ka darah min kuah a, a awm si chetin min pawm bet a, "A nu kha Boomer ang tho a lung lam ţha lo nei a nia, a ni phei chu a lung a chhiat tawh lutuk vangin an buai fo. Hospital an bel ngun a, thu thinţhawng lutuk hrilh chi a ni tawh lo. Mama kha mantir la chu a taksa in a tuar ngei ang" ka chhip a khabe nghatin a phun sup sup a, a taksa kha a chhia ka ti reng a ni. 

"I fel lutuk e" min ti leh kher a, nui hak chunga amah ka kuah let ve lai chuan ka chhipah a lo fawp zeuh a, "Tun chinah chuan tuman an ti hrehawm tawh lo ang che" a ti zawi ruih a, ka chhip zawnah a thaw lum ham ham a, a lungphu dup dup ri te chu ngaihthlak a nuam takzet. 

"Ka ni rualin ka chhuk leh thuai dawn a, sumdawnna lamah ka pui ang a, ka tui zawng a nih ngang loh leh kumtharah zirna ka ţan ţha leh mai ang" ka tih chuan a nuih a za viau mai. 

Dar10 velah "Ka thlah ang che" a ti a, "Hostel a awm nghet ka ni tawh lo a, chho lo mah ila min hau lo ang. Vawiin a ka thil tawn zawng zawng nen zanin chu hetah ka riak dawn" ka ti a, a phal tlat lo. 

"Chho zawk rawh duh leh zan dangah i riak dawn nia" a tih laiin a phone ken lai a rawn èng a, thil pawi tur a awm lo ni a ngaiin amah thoin a enchiang a, Vulmawii hming lo lang ka hmuh rualin phone ka chhuh sak. 

[Kawngkhar ka kalh lo, ka roommate a awm lo bawk a, a hre vek tawh. Warden a kal liam chiah bawk a, rawn chho rawh] tih lai la chhiar mek lai chuan ka kut aţangin phone chu a rawn phih sawk a, message a en ve thuak hnuah ipte ah a ak daih. 

"Rawn la rawh" ka ti fak a, ka dar tawn tawn a dawmin cabin aţangin min nam chhuak rawk rawk a, "Ka kal dawn lo. Vulmawii nen eng nge tih tur in neih? Min thlah teh, ka kal bik dawn lo" ka ti hlak hlak a, ka kal zel tho sia, min nam nasa em alawm. 

"Keimahin ka chho ve thei reng" kawng chho lai kan thlen dawnah ka ti vin leh hlar a, "Bengchheng suh" zawi sup a a tih te chuan "I thu lo" ka ti vin tuarh. 

"Ka thlah ang che" a tih nawn leh pawn ka lo ţeu hlar mai. 

"Thlah ka ngai bawk lo. I duh duh naah riak rawh" tih leh inher ka rual a, ka pen chho hmawk hmawk a, min enreng tih ka hria, min umzui miah lo chuan thin a ti rim hlur thei. 

Hah leh hlauh hre lek lovin room thleng rak chawl lovin ka kal a, June leh Jessie chu an lo mu tawh. Khum dawhzawmah an lo mu a, tih harh hlau deuhin an sirah ka inthawlh ve. 

Ka thinrimna hrilh tur awm ta lo chu ka mu tum bur ringawt a, phone pawh ka khawih peih lo. Che lo a mu reng na na na chu ka muhil thuai a, "Tho rawh" ti a min tung tho lawp tu an awm takah chuan chiang lo ruaiin ka harh a, "A la thim vek" ka ti phak chual a, a la thim leh thim loh ka hre miah chuang lo. Min thlah rualin ka mu leh hnawk. 

"Awi...ka rap lutuk..ka hmul thi a ding vek. Lucky tho vat teh" June ngeiin a rawn ti leh a, meng mang lovin khum ka dap kual a, tumah mu an lo awm tawh lo. 

"Eng nge?" phak chual a ka tih hnuah "Inhnuaiah rawn chhuk la i hre mai ang" a ti hlak a, pen ri hlawk hlawk ka hriat chu a tham ral thuai a, mumang ang ruai ka la ni. 

Kawngka a inkhar phui lo nge pawn lamah chuan pen ri hlak hlak thawm a awm leh ţhin a, phun ri leh in au lang lang ri te nen lam hriattur a tam khawp mai. 

Muangchanga thoin ka hawi kual thuak a, kan room ah chuan tumah an lo awm ve tawh lo. Eng nge thleng hre lawk miah lovin ka chhuak ve thawr a, hmeichhe pahnaih rawn tlan dawr dawr te chuan min su ler lawp lehnghal. 

"Eng nge a?" ka lo tih chuan "Vulmawii a thi an ti. Ka hlau lutuk Pekpekin min rawn kaitho a" an ti chul a, chu thu an sawi chuan min barakhaihin Vulmawii te ho awmna inhnuai lamah ka tlan thla ve nghal hlawk hlawk. 

Vulmawii te room kawtah chuan an lo tlim hmur tawh a, mipa ho pawh an rawn thleng phei vek tawh ni awm takin Vulmawii te room kawt chu a khat hnur mai. 

"Ka lo kal ve aw, lawkin ka lo inzep ve, ka lo kal lawk" ti mawlh mawlh chungin ka inzep lut a, ka kalpelh apiang te phun ri chu ka ngaihven tawh lem lo. Rei ngial ka beih hnuah Vulmawii roomah chuan ka lut hlawl a, ka thil hmuh chuan min ţhawngin mumang emaw tih tak tak a aal rum rum. 

Vulmawii chu thlaphang takin a lo ding a, Jessie, kan Jessie ngei chu Muankiman lo man betin a kut a hnungkhirh sak a, warden te pahnih pawh an awm. 

CONT...