THE GOOD, THE BAD AND THE OTHERS-19

THE GOOD, THE BAD AND THE OTHERS-19

"Kal kiang rawh u..police an lo thleng ţep tawh ang. Inhnawhkhawm luih suh u" Sir in a ti tuarh tuarh a, a thusawi chuan awmzia a nei lo kher mai. 

Room chhung chu tlemin a thawl deuh a, Muankima leh Jessie te chu va hnaihchilhin "Eng nge thleng? Ngatinge Jessie hi hetianga i man beh tlat?" ka va ti a, thil awmdan teh nuaih chu ka hrethiam lo hle. 

"Sir in kal kiang rawh u a tih kha. Thu in awih lo hlawm hle mai, a hmingin kan Sir a ni ve a, a sawi ang khan ti ta che u" Mateo chuan a lo ti lauh lauh bawk a. 

"Ve lutuk che hian Zoremsang"

"I thu lo ber aw"

"In tih mark ţhat tum viau suh"

"Sir in hotu ah dah se a tih vang vek"

"Cafe ah a awm reng chak sia, Sir in Nu Hlimi puih a phal theih nan thuawih berin a awm a nih hi" an ti sap sap hlawm a, keichuan Jessie ka la en ngar thung. 

"Awii...ka hlauh zia chu..khanu khan min thah a tum. Ramhuai a nih kha, nangmahni nen a inti thiam lo angin a rawn insawi a, ka muhil tawh ni a a hriat hnuah lukhama min up hlum a tum alawm. A chet tum dan kan hre sa vek a, hmaikawr phen a a nihna diktak chu tupawn in hmu ve ta anih hi" Vulmawiin a ti hlak hlak a, a la meng phar nasain a hlau hle tak tak tih a hriat. 

"A dik em?" tiin Jessie chu ka zawt a, room inţawmin kan inkawm nel ve hman a, mi a thah duh em chu ka ring lo a ni. 

Gabriela rawn lut chu "Tenawmpa" ti sapin Jessie chuan a lo melh hrak a, a tal laih laih a, che thei se chu a beng sawk duh ngei ang. 

"Josephine khan a hlau che. A thla i tih muan loh zia nitin min hrilh ţhin. A thih hnuah hei hi i bag ah ka chhar a, Josephine-i tan a a hranpa liau liau a ka chher tir a nih hi" tih pahin Gabriel chuan bracelet a rawn phawrh a, Jessie, Josephine leh Gabriel te hi an department a inang a, an vaiin class khatah an awm vek tih hi ka lo belh sak hram ang e. 

"Vulmawii nen a kan inkawp veleh hun remchang dapin a roommate haw lai i chuh a, i bei leh chat a, a dik em?" a ti fak fak a, a kut lek kangin Josephine-i bracelet chu a la hum ngawt ngawt a, a rilru a na takzet tih a hriat a ni. 

"Josephine ve kha, nang aia hmeichhia a duh zawk vang a ni lawm ni a ţhen che. Hmeichhe khaw lo lutuk a nih kha. Mahni anpui kawp ching a nih kha" Jessie in a tih lai chuan a bek ruh pawng ţawlh ţawlh khawp a inseh ruhin Gabriel chuan a lo melh ngar ngar a, "Ka bialnu a ni reng reng hleinem" a ti zawi raih a, mak kan lo ti tlang khawp mai. 

"Engmaw?" Jessie pawn a ti deuh hluai a, Muankiman a kut a hnungkhirh tlat avangin a chet hlek chuan na tiin a ţhen leh sak ţhin a. 

"Ka ţhiannu a nih kha. A nihna diktak thup nan kan inkawp der mai mai chauh a ni. Ka ţhianţhaber, nang hian ka ţhianţhaber min thah sak a" a ti a, "I bialnu a ni lo maw?" Jessie in a lo tih leh hliai chuan mahni inthununna thlakchham hmel zetin a lo ţhen sawk a, Jessie chu kut a thlak mai ang tih te a hlauhawm. 

Police an lo thlen chuan "Ka thah a ni lo...Vulmawii pawh thah ka tum lo" tiin a au tuar tuar a, kawl an bun tir lai chuan a hmei a pain rap hmel zetin kan lo melh ţhap a, an hruai chhuah dawnah Jessie chuan "Nangmah vang vek" ti vin tuarhin a kun zawk a, a chapal lawk ber burin Muankima a rawn vawm hmiah. 

"I va kawlh sen reuh e aw" police pakhatin a tih lai chuan kan Mateo bawkin Jessie chapal chu a chhar a, hostel a hotu nih a duh vang a Sir te mit tlun a tum lutuk chuan a va bun tir vei thlap a, "Phelh tawh suh aw" a ti tel kher lehnghal a. 

Jessie chu a rawn hawi let ţawk ţawk a, a mitmeng chu huat nain a khat a, tu ber nge a melh tih erawh ka hre thei lo. 

"Eng nge awmzia? Jessie khan Josephine a that tihna maw? Ka thla te kha a hmu vel sia, a hmu tak tak lo tihna mi? Ka damlai thla meuh a chhuah chu ka ring si lova, Awiii....Jessie khan tual a that maw?" June chuan a ti chel chul a, keimah ang tho a ni. Thil thleng mek chu awih harsa a ti khawp mai. 

"I thla a hmuh khan eng angah nge i lo ngaih a" Muankiman nui suk chunga a lo tih chuan "Ka damlai thla a nih ka ring. A hlau sia, Lucky bulah lah June ka hmu a tia, resort aţanga ka haw te khan min hlauin a biru a, chuti taka min hlau te chu ka damlai thla a chhuak ang a, min hmu tak tak aniang ka tia, Lucky hian min hlau ve dawn a ka hriat vangin ka sawi chhuak duh lo mai mai alawm. Keichuan ka damlai thla a nih ka ring hmiah" a ti a, midang kan thutak viau laiin a hlau ber Vulmawii a nui ru put put mai. 

"Midang kan rinhlelh theih nan lem a chang mai mai tih hriat reng reng. Nang a pawh chu i va mawl ve, damlai thla pawh nise tukverh sang laiah a uai kher nang" Gabriela melh zawk pah hian a ti a, keini pawn kan melh leh ralh ţhin a, a thin a rim em vangin kan be ngam lo a ni ber. 

"Hmuchiang a intih viau te chuan rin loh ngaihna a awm hleinem. Resort ah ka awm daih sia, min hmuh miau chuan damlai thla bak puh tur a awm hleinem" a tih hnuah Gabriela ban bulah a hnek ţawlh a, "Inthlah dul rawh. Josephine chu vanramah a awm daih tawh ang" a ti teh ngawt a, Gabriela lah chu engmah sawi lovin a chhuak nul nul a, Muankiman a zui bawk. 

"Khamite pahnih khan a rukin an hre vek a, engmah min hrilh ve lo tihna a ni maw?" tiin Mateo chuan an kalna lam chu rum zetin a melh a, "Keipawn ka hriat loh hi" June in a tih laiin "Keipawh min hrilhna a la rei bik chuang hleinem. Ka roommate a haw dawn khan Muankiman Jessie hrilh turin min tia, awii ka hlauh zia chu kawngkhar a rawn kik amaw, ka va hawn chuan men purin a lo ding a, zan a rei tawh ropui lehnghal. Khum hnuaiah Muankima a mu a, eng emaw a ti thut thei an tih vang khan mutthilh ka hlau lutuk a, ka mut a chhuah deuh hnu phei chuan muhil der chungin a rukin ka insik char char" Vulmawii chuan a ti siam siam a, midang an chhuak vek tawh tho a, Mateo chiah mipa a awm tawh. Mateo berkher chu a zah lem lo aniang, a mal a hlim chiah chu a lo duk thluah a, a insik nasa viau tak tak a nih hmel. 

"Chuan lukhamin a up tawp che tihna em ni?" ka lo tih chuan "Ka hming a min ko pah reng chungin min sawi dat dat reng a, a chang leh ka rum ţuah ţuah a, a changin ka tep chap chap a, tui tawk a muhil angin ka awm. 'Ka tihpalh aw' a tih hnuah lukhamin ka hmai a rawn hup thuk a, nasa tawkin ka tal nghal vak vak. Ka thih hman ka hlau lutuk a, mahse Muankima khan a rawn man bet ta hlauh a" a ti zat zat a, a hlauh a reh tawh nge ka hre lo, sawi nuam a tih hmel khawp mai. 

"Min en chungnun viau angai ang, nunna thapin misual ka man tih hre rawh u" a ti zui zat a, vengtu nei lo se chu a ti awm bik miah si lo. 

Jessie chu police in an dawp a, a tirah ţang ve deuh mah se a ţang rei thei lo hle. 

"Ka mipa duh ve ber khan min hmang ţangkai mai mai a, min duh ve deuh ang a awmin a nihna diktak thup nan min hmang a, hmeichhe chhe lo ve pangai tak chu rinhlelh an lo har aniang, a hna ka thawh sak chang a tam mai. Ruihhlo tawlh ru ţhin a nia, hmelma a ngah tih pawh ka hria. A rukin ka pui char char a,  mahse kha pa khan lawm nachang a hre lo. Hmeichhe dang a kawp reng a, keichu min mamawh chang bakin min rawn be ngai lo. Vanneihthlak takin tu tih hriat lohin an that a, a thih khan tawrhna pakhatmah ka nei lo. Ka rilru a na lova, thih kha a phu hliah hliah zawk ka ti. 

"Gabriela nen kan intawng leh a, kar khat vel chiah kan la inkawp tihin hmeichhe dang a zui daih a, Josephine ngei kha. Class ah an ţhudun a, class kal loh ni lahin khawi khawiah emaw kalin an chhuak dun reng a, ka mit an tihkham zia an hre lo mai mai zawk a, thah hial duh khawpin ka hne tih chu hria sela an inzui reng hauh lo ang. Hmangaihna lamah hian ka vanduai ve a, ngaihzawng nei ngai lo ka ni lo, ka neih ve ţhin te hi an rinawm thei hlawl lo zawk a ni. Gabriela ah hian ka duh ang zawng zawng a awm vek a, neih let leh ka tum ruh hle. Josephine kha ka zirchiang a, a mizia leh Gabriela bul a a awmdan ţhin te kha chik deuhin ka en ţhin. A tihdan ang chiahin ka ti ve ta reng a, ka ţawngtam duh lova, thawmhnaw leh sam nen ka entawn vek a, chuti chung chuan Gabriela a lo let duh chuang lo. Josephine kha ka umzui reng a ni ber a, rei ngial ka thlithlai hnuah a hmeichhiatpui a kawp ţhin tih ka hria a, Gabriela nen an awm dun khat ta pharh bawk. Josephine nihna diktak a hriat vanga inţhenah ka ngai a, chu chuan Josephine min huat tir lehzual. Keiin ka duh em em laiin a ni chuan duh duh danin a ti kual thei a, an inţhen tawh ni a ka hriat hnuah an awmdun lai ka hmu leh ţhin bawk a, an mumallo lutuk kha ka ning ta takzet a, Josephine hi that ila engkim a fel mai ang tihna rilru ka put phah. Josephine khan hmangaihna chungchangah tu emaw a be rawn fo tih ka hria a, ka duhdan a che rum rum lovin Gabriela vang liau liauin chu nu chu thurawn lak nan ka hmang ve a, Gabriela min tih dan ţhin ka sawi chuan that turin min rawn ti a, mahse Gabriela chu ka that phal teuh lo mai, damchhunga ka ta ni turin ka duh. Chuvang chuan Gabriela ni lovin Josephine zawk kha ka that ta a ni" a ti a. 

"That tur a thurawn pe tu che chu tu nge?" an tih chuan "Tih tak zeta ka ngainat ve awmchhun a ni hial ang" a ti leh tawp a, zawt lui ngial mah se ka hming a sawi lang duh lo. 

"Josephine chu eng tin nge i thah?" an ti leh a, "Zanreiah a pindan kawngkhar ka kik a, lehkha a zir rei ţhin vangin khami zan pawh khan a lo la meng a, single room ah a awm a, ka ţhiante nen a kan inhauh thu hrilhin zankhat chauh riah ka dil a, ţhian ka kawm tam loh zia hre tu chuan riahna tur dang ka nei dawn lo tih a hre tel a, awlsam tein min lo phal sak. Ngaihţhat lohna nei miah lovin min luh tir a, hrilh tur ka nei ni a insawiin mut ka rawt a, a lo remti ve mai. Kan mut hnuah dawt hmangin ka ţhiante ka hek a, uluk deuhin a lo ngaithla a, vawikhatmah a sawichhe ve lo thung. Min ngei pui em ti a ka zawh te khan a nui liam mai a, amah a tla hrang chi, mi chanchin ngaihven lo leh an chhiatna sawi ngai miah lo a nia, min relpui dawn lo tih hrereng chungin ka tlak tlum theih nan ka ţhiante ka rel zat zat reng. Ngaihdamna ropui zia te min lo hrilh let daih a, ve lutuk a! A engkim ka huat miau avangin inlak fel tumah ka ngai a, a ţawng mawlh mawlh lai te khan ka lo ner leh nak ţhin tih a hre lo mai mai a ni. Kan sakhaw inzirtir dan ţha a tih zia thleng a sawichhuakin zawm turin min hrilh vel a, Gabriela chanchin ka sawipui a, atan a mipa ţha ber, a rin ngam ber leh a hmangaih ber a nih thu a sawi a, min ti thinrim zual sauh tih pawh a hre lo. Tichuan a mutthilh hun ka chang ran a, a muhil tui ta maw tihah lukham ka la kang a, vawilehkhatah a hmai ka hup thawk a, na deuhin ka nam bet a, a tal nasa in a ke a leng nasa hle. Ka ban pawh a ham pilh nian nuan nghe nghe. Thapui thawh a nam ka ni bawk a, min sual nasa viau nain thi zawk a ni ta tho a, a thih veleh ka mut rem tir a, awngphah ka pawt mar a, puan ka sinţhat tir leh hnuah a room chhuahsanin kan room ah ka phei a, ka ţhiante an lo la muttui hlauh. A bracelet roh ve em em ka laksak kha bag ah ka khung a, a kawr pakhat ka lak ruk chu suitcase ah ka dahţha nghal daih bawk. Zingah a ruang an hmu a, engmah hre lo angin ka awm. A kawr ka lak ruk kha hmang ţangkaiin bathroom ah ka dah a, Josephine thla hlau ang deuhin ka awm a, min rinhlelh loh nan a ti ka ni. Mahse, a bracelet kha ka lo hre chang tawh lova, Gabriela hnem tum a a bula ka ţhut vel ţhin lai khan ka thlauh palh a nih ka ring. Ka ti bo tih chu ka hria a, pawi tihna ka neih lem loh laiin Gabriela berkherin a lo chhar a, bracelet a chhar hnu khan Muankima leh Gabriela ten min lo enthla ru reng tih ka lo hre lo a ni. Lem ka chang zui a, dawih deuh angah ka inchhuah a, Josephine kha thah a nih an rin tlat avangin rinhlelh bik an neih theih nan theih tawp ka chhuah. June ka hlau der a, thawm mak tak tak hria angin ka awm a, mahse, ka thil tih khan awmzia engmah a nei lo a nih hi" a ti chuai raih a, "Gabriela khan bul ţan ţhat leh a duh a, duh viau mah ila hmeichhe dang ang bawkin ka induh der ve. Min nawr lui a, a hma ang mai maiin kan tawp tawh lo ang tiin min hrilh bawk. Kar khat chiah kan inzui hnuah Vulmawii nen an inkawp leh a, Vulmawii lah chu min runluih zawng hlirin a awm a, ka hmuh ngei tur a status a neih loh leh ka hmuh laiin Gabriela a kuah chung chung a, ka awm ve tawh chuan a chanchin a sawi ngei ngei bawk. Ka ning leh ta takzet a, hnawl ka ni reng bik chu ka tlawmngai hle bawk. Josephine kha ka thah a ni tih tuman an hre lo a, Vulmawii pawh that ila an hriat ka ring chuang lo. Tlai khat chu cafe ah Vulmawii nen kan inhmu a, a roommate a haw tur thu sawiin a ngui deuh bur a, zan khat chiah awm lo tur angin a sawi bawk. A roommate hi Aibawk mai a awm a ni tih ka hria a, rawn let leh nghal mai thei reng a ni. Zankhat lek hun ka nei a, bawhpelh ka tum lo bur. Chet dan tur ka ngaihtuah nghal ruai laiin Gabriela nen a an hun hman ţhin dan min sawi khum leh sak sak a, intithei zet a a hawi vah vah te chu hmuh nuam tak a ni lo. Vulmawii thah ka tum hi Gabriela ka duh vang ngawr ngawr a ni tawh lo. Toys ang mai a min ngai ţhin hi ka hua a, a nun tih hrehawm ka duh vang a ni mah tawh zawk. Vulmawii thi leh se la, duh ber te chan chu engtiang chiah a na nge tih hre ve turin ka duh. Zanah Vulmawii room ah ka kal a, Josephine ka thah dawn a ka tih ang bawk khan ka ţhiante pahnih chhiatna ka sawi leh a, Vulmawii chuan Josephine ang lo deuhin min lo rel pui nghek a, kei ai aiin a sawi nasa zawk. An hmel hmuh ringawt pawh a hne hlui ţhin thu te a sawi a, Josephine ai khan thah a awlsam ka rin phah bawk. Vulmawii chuan ka ţhiante pahnih chu a hmelma lian ber an nih thu leh an awm mai mai pawn a pawi a sawi thu te, hmelma te thah hi pawi a tih loh thu leh in roommate se chu a thah daih tawh tur thu te a sawi a " a tih chuan Vulmawii kan melh ţhap a, "Ka ngei ţhin cheu lawm" lo ti fel thenin kut a kuangkuah hmak a.

Zawmna aw

"Ka ţhiante, a ţhiante ni ve bawk pawh a rel duh chuan a rilru hneh a awl dawn tih ka hria, a duhzawng sawipui phawt chuan lamţanga siam a har dawn lo tih pawh ka hria, bum a nuam lutuk te kha ka khawngaih letling a, mi ka relpui hnu ngat phei chuan ka leng halh tawh. Gabriela lo ngaihven ve chiam lo se la chu thah tumin ka bei hauh lo ang. Mahse, â ber tur a ka ngaihin min fin khalh a, ti hian manchhuahin ka awm phah a nih hi" a ti a, amah hi a khawngaihthlak zawk. Kan mihring puite kan atchilh lutuk na hian tualthah duhna a hring chhuak chawk reng a ni. Hmangaihna tello atchilhna ringawt hi chuan thil ţha a thlen mawh khawp mai. 

Hostel a let nghal mai lovin restaurant ah kan chawl kawi a, kan ngui ngiai hlawm a, "Mak deuh chu Jessie khan Josephine-in a ham nasat thu a sawi a, a ban a ham pilh nian nuan thu thlengin a sawi a nih kha. Mahse, Josephine-i ruang kan hmuh tuk khan class kal tur a a insiam kha ka hmu reng a, a ban kha a pilh miah lo. Khatia hostel a kan awmpui a thih thut avang khan ngaihţhat lohna kan nei ţheuh a, a ban kha pilh ngei se chu a chhan ka zawt em em ang. Keichu thil fel hlel deuh a awmin ka hria, chhui chiang leh deuh se ka ti ngawt mai. Muankima leh Gabriela ringawt chu hnuchhui thiam pawh an ni lova" June in a tih chuan "Min thah a tum kha. Kha bak bak a chiang kha a awm thei tawh dawn em ni? Lukham a min up hlum a tum ngei alawm, Muankima kha che vat lo se chu ka ti daih thei tih hre ta che" Vulmawiin a lo ti vin hlar a, ka sawichhuak lo na a keipawn ka pawm thei chiah lo a ni. 

Jessie hi a lerh hran lova, a duh tawh chu a duh bur zel dawn tih hre mah ila tualthat tur em chuan ka dah phal lo. A ngilneiin mi pawi a sawi awm ka la hre lova, rei tak awm dun tawh kan nihna laiah pawm thlap a har khawp mai. 

"In awm ho rei a, a inthup thiam bawk si. In pawm thei lo mai mai a nih kha. In rilru tak chuan tualthattu a ni tih in hre vek. Thih huamin ka chhan chhuak che u a nih hi, inpe tawp lo ila chu a that ve daih ang che u" Vulmawii chuan a la ti hlak hlak a, a lungawi loh hmel nasa mai.

"Muankima awm vang chauh a inpe ngam i nih kha aw. Thih huam tak tak ni la i muhil siai siai ang chu. I thi dawn lo lutuk tih i hriat vang a nih kha i fiah ngam. I mumangah Josephine i hmu ve ziah a, i bulah a ţhu reng zel ringawt a, i mang i chhawr ţangkai lo ropui si" June chuan a ti a, an inmelh no viau lo a ni. 

"Engmah a sawi miau loh chuan eng nge a duh hriat a har alawm. Hrim hrimin a dikna chanvo a hmu duh ngei a nih te chuan eng emaw tal sawi ve tur a nia, thlarau ngawichawi tak a ni. Jessie an man tawh a, a reh hmak tawh mai ang" thawveng zet hian a ti a, Muankima chuan "A banah hamna hnuhma i hmu lo maw?" tiin June a lo zawt ve thung. 

"Hmu nang aw...Josephine khan ham tak tak se chu a hnuhma a awm ngei tur a ni. Hmeichhe room inţawm chu kan inzahpah vak lova, khami ţum khan ka hmuh laiin a inthlak ngei alawm. Thawmhnaw hak tur a zawn lai pawn kawrhnuai nen chauh a awm a, engmah ka hmu lo hrim hrim" a ti a, a ţanna ngaiah a ţang ve tlat. 

"A kuttin a bul aniang chu" Mateo chuan a lo ti ve khauh a, kan nui hak hlawm nghe nghe. 

"Jessie berin min ham pilh a tih kha. Ka thil hmuh khan tualthattu a ni tih ring lo thei lovin min siam a, mahse ka chhungril tak hi chuan tual a that lo tiin min hrilh tlat a" ti a Vulmawii kalh zawng a June a ţawng leh chuan a lo ner nang nang a, "I rilru chhungril a chut a nih chu. Mit a hmuh ngei pawh rin theih loh tlat mai, khawlhkham reuh lutuk" a ti ta zek a, "Muankima lah hi kolasib a kan kal ţum khan Gabriela enthla turin min hrilh vel a, an pahnih a an remruat vek a ni reng sia, Josephine chhuanlamah hmangin Lucky nen a an awm dun lai min enthlak tir char char a duh vang vek a lo nia. Thikthu tih lan hreh viau siin khaw lum hnuaiah keimah min kal tir a, ka kal duh theih nan chhuichhuah ka chak ber Josephine thihna chungchang vel a la hmang ţangkai zui" a ti bawrh bawrh a, a mumangah Josephine hi a hmu tak tak ngut ange maw?

Gabriela chu tuman kan la be ngam lova, a thutak run reng a, a thinrim zia chiang takin a la hmuh theih bawk. Muankima leh Mateo chuan an vei zui hmel vak loh a, Vulmawii chuan a inpek zia a sawi bang thei lo. 'In nun chhan nan ka inhlan' a ti deuh sek a, Gabriela leh June te chu a vei zui ber an ni awm e. Gabriela chu a ţhianţhaberin a dikna chanvo a hmuh tak avangin a ruk tak chuan a dam deuh hawk ang a, June erawh chuan kan Jessie chu tualthattu a nih ring thei lova, a rilru a dam lo hle thung. 

"Enteh maw Mateo kan han mu chiah kha" Vulmawiin a tih leh chuan "Ka ngaithla peih tawh lo. A vaia belh khawm phei chuan vawi100 vel i sawi tawh ang. Vawikhat kan ngaihthlak naah khan kan hre vek tawh, sawi tawh lo teh" a ti hluk hluk a, "Chi dang deuh a lawm ka sawi dawn" a ti hram a, Mateo tshirh nghawng a pawt betin a hrilh lui ta tho a, ning viau mah se kolasib a ar an puah dun hnu kha chuan kut a thawh ve ngai ta lo. 

Muankima nen kan inphur haw a, "Engtikah nge haw i tum?" a tih chuan "Naktukah" ka lo ti var a, ka ni in min lo be tawh a, a thil tih tur ang te a tih fel tawh avangin Aizawl a cham reng nachhan tur a awm tawh lo. 

"Thlah i duh em?" a ti a, ka chhanna chu a zawi nge, "Maw?" tih pahin sir lam a hawi zawk a, "Thlah ka ngai lo, ka ni nen sumo in kan haw dawn" ring deuh zawk a ka tih takah chuan lu a bu zeuh a, ka ni chu amahin haw thei dawn tho mah se Muankima ka pawh pen leh chuan Nu Puitein min haw ţha leh palh ang. 

"Keipawh ka rawn haw har tawh lo ang. Zanah cabin ah lokal rawh aw, hrilh tur che ka nei" a ti ve duah a, hostel pawh kan thleng har lo. 

Kan room chhung chu a reh ruih a, June nen chiah a kan han awm ta mai chu a khawharthlak hial a ni. 

"Ka hawsan leh daih che ang a, nangmah chauh a i awm a ngai awm sia, i huphurh em?" ka thawmhnaw hawn bang khung mawlh mawlh pah hian ka ti a, thawpik hmel zetin khumah a ţhu hnawk a, ţap tur te pawh a ang alawm le. 

"Ka chhuak ve daih ang" zuai raih a a tih chuan ka melh nghal dawrh a, "Hostel dangah i insawn dawn tihna em ni?" ka ti pah hluai bawk. 

"A ni mai ang chu. Jessie nen a in awm loh chuan ka awm peih bik lo. Jessie phei chu ka fiam ber ţhin a nia, bakah hmathlir thui tak a nei ve a, a nu leh pa te hriatreng nan a an khuaa school din a chak zia te min hrilh fo mai. Thil thleng hian min ţhawng a, mumang ang ruai a ni. Keimahin in sulhnu ka chhui rek rek reng dawn a, ka awm peih tawh bik lo" a ti a, ka khawngaih kher mai. 

"Keipawn pawm har ka ti ve tho a, mahse a chang chuan kan thinlungin pawm harsa a tih ber pawh kan pawm luih a ngai ţhin a, tualthat tur chuan ka ring phal bik lova, chuti chung chuan Vulmawii thah a tum tho bawk si. Police ho hnenah a inpuang thlap tawh bawk a, pawm thiam kan zir a ngai a ni mai" ka tih chuan a ţhutna aţanga thoin Jessie bungrua a hai rawk rawk a, Police ho bawkin an ching let hneh tawh a, thil ţangkai hmuh a nei chuang lo. 

"A diary kha an la tel em ni?" ti a min zawh chuan "Aniang, a inpuang duh lawk si lova, diary an hmang ţangkai a niang chu" ka lo ti mai a, chiang taka an man hnuah pawh ţan a la khawh ve tlat ka tih tawh kha. A ţan rei ngam loh chhan erawh diary kha a nih ka ring. 

"A va'n pawi tak aw...keichu Jessie hian tual a thah ka ring lo bur a, tu ten emaw an vau a nih ka ring. A rilru a dawih em kha, Jessie chu vau zam a awl lutuk. Gabriela khan bracelet a chhar a, khavang khan an ringhlel ringawt a, Gabriela tan chuan a awm ve tho. Josephine tan liau liau a a chher tir bracelet kawl tu a ni miau a, a thih hnuah Jessie bag ah a hmu lehnghal a, keini pawh ni ila kan ringhlel ve tho ang. Gabriela leh Muankima te hi dem ngawt chi pawh an ni lo. Chuan Mateo hian Josephine-i room a kalpuiah min sawm reng ţhin a" a tih chuan ka beng a verh khawp mai. 

"Ka rawn hmuh zan cheu khan in kal ngei a, zandangah in kal tho em ni?" ka tih chuan "Kal e...tualthattu te hi mi an thahna hmunah kan kal nawn reng ţhin tih ka hre tawh a, Mateo pawn Josephine-i room a luh ruk a rawt fo mai. Jessie an man dawn lah khan kan rilru lakpen dan phet a lo zawng ve sek a, ka ţhianţhaber te zing a mi a nia, hetiang rilru hi pu lo tur ka ni tih ka hria. Mahse, Jessie ai chuan a rinhlelhawm daih zawk" a ti a, ka ngawihsan ta daih a, a rilru a chiai rih a, puh tur dang a zawng kual rih a nih hi. 

"A diary kha hmu ila chu engkim ka hre thei tur a nia" a ti nang nang a, police ho khan an lak ngei ka ring a, diary ah midang hming ziak lang se chu Jessie an hruai ang khan an rawn hruai ve tawh ka ring bawk. Tualthattu a nih ka ring phal lo va, a chetdanin ring lo thei lo in min siam bawk si a ni. Tual a thah ngam ka ring lova, Vulmawii kha bei kher lo se chu tualthattu ah pawh puh se a lam ka ţang tlat ang. 

Zanah cabin ah ka chhuk thla a, Muankima chu a lo awm reng tawh. Insi rialin sofa ah kan ţhu dun a, ka haw san leh mai dawn sia, ka huphurh ve takzet a ni. 

"Eng nge min hrilh tur chu?" ka ti a, Josephine chungchang a nih ka rin laiin "MA hi ka zo ve a nih chuan hmun dangah ka awm san daih rih dawn che" min ti a, Jessie an rinhlelh dan vel ka zawh hmaa ka lo zawt hmasa kher kher chu ka inchhir lek lek a ni. 

"Khawiah nge i awm ang?" ka tih chuan "Vai ho zingah" ti supin a nui zui hawk a, "Coaching kal te ka duh a, pasal officer nei la ka ti ve deuh a" a ti leh kher a, "Chuan i tum i nih theih loh chuan i sumdawng ang a?" ka lo ti let khauh a, beidawn tawp a sumdawn a tum tak kha mawle...hotel siam te. 

"Sawrkar hna ka hmuh loh chuan ka sumdawng tawh mai ang chu" a ti a, nakin zel a kan awmdan tur hre lo mah ila innghahna tlak mipa ka tawng hi ka hlim rih takzet a ni.

"Hlawhtlinna kawng hi a thui ve a, tunlaiah te chuan phone a awm tawh alawm. Hmun hla deuhah pawh awm la nitin kan inbe thei tho a" ka ti a, thiamna um a kal tum na na na ka lo dan beh tlat nachhan tur a awm lo. Kal se la, hlawhtling ngei turin zir rawh se tih hi ka duhthusam ve tho a ni. 

"Ka kalna hmun tur ber a la chiang lo. Ka enkual thuak tawh a, an fak tlangpui vek a, ka pa nen kan inhmuh hunah thutlukna kan siam thei ang" a tih chuan ka hriatthiam zia lantir nan ka lo bu nghat nghat a, "Duh leh lokal ve la" a ti hem mai a, ka nui chhuak ta hak hak a. 

"I mawl em ni? I zirna lehzelah ka zui thei nang che. Ka lo nghak tlat dawn che alawm. I rintlak a, i thi a nih loh chuan ka nghak chhuak ngei dawn che tih ka hre bawk a" amah melh ralh chung hian ka ti a, atan a ka pawimawh ve zia ka hria a, Pathian ruat kan ni lo a nih chuan thuhran, mahse ka rinawm chhung chu a rinawm thei ngei ngei ang. 

"Ka inghah thlawn tir lovang che. Nakin a kan nawm sak nan kan inţhen zawk rih a ngai dawn a tih a ni mai" a ti dam thlap a, min ti nguai thei thil ngaihthlak ka duh tawh loh avangin "Jessie kha eng tin nge in hriatchhuah?" ka ti ta daih. 

"Kei ai chuan Gabriel-an a sawifiah thiam zawk ang. Bracelet a chhar bakah Jessie khan a tawrhna hnem anga awm siin a be zui reng a, Gabriela min hrilh angin ka awm. Mama kha ka manchhuah a ni ngei a, Jessie erawh Gabriel-a khan a thlithlai ve thung. Josephine kha a that a nih a ring tlat a, thawnthu a ziak nawn leh a ni ber. Hun liam tawh a her let leh a tih theih bawk ang chu. Josephine thih hma khan Jessie nen an inkawp zuai a, bracelet a chhar hnu khan a chik ru a, Vulmawii thah a tum ţum pawh khan kan chang risk a nih kha. Jessie kha a kawp der leh a, a hma ang bawkin kar khat hnuah a ti tawp. Vulmawii hian a duh hneh ve a, chu chu remchangah hmangin Vulmawii a kawp leh a, Jessie runluih a ngaih miau vangin Gabriela khan engkim a hrilh a, mi runluih chu Vulmawii thiam zawng tak a ni" tih nghut pahin a nui hawk a.

"Engtin nge a tisual lai tak kan man theih ang kan tih laiin Vulmawii roommate kha haw a tum thut a, a nu damlo a na viau a nih hmel. A rawn let hun tur hre lo mah ila Gabrielan zankhat chiah riah tum anga sawi turin Vulmawii a hrilh a, a hna a tlin khawp mai. Gabriela bialnu a ni tawh a, Jessie khan Josephine a thah tak tak chuan amah chiah a Vulmawii awm lai tak chu chuhin eng emaw a tih ngei an ring a, Vulmawii room a riak tur a min tihna kha ka pawm ve mai bawk. Thuchiang kan hriat hma chu hrilh loh che ka thlang a, i tih tauh phah nghawng nghawng kha" a ti vel a, sawi zawm turin ka lo hrilh thung. 

"Hriat ka nei tam vak bik lova, kei phei chuan Gabriela nen an in ngaizawng emaw ka tih char char kha. Rin lawk ang ngeiin Jessie kha a rawn kal a, a bak chu i hriat tawh kha" a ti a, a chak lohna hmang ţangkaiin an chang risk a, Jessie lah an rin ruk ang chiahin a che chhuak a, an in man chhuak ta a ni. 

"Gabriela chuan Josephine thattu hriat a duh ber a, a rilru a nuam huai tawh ang" Muankima bawk chuan a lo ti leh a, kan pahnih chungchangah lut chhoin a awm bo hun tur te thlengin kan sawi kai leh tawh a, sawichhuak lo mah ila a ruk chuan kan huphurh ve ve. Min kuahin duat deuhin min fawp a, min thlah a hreh hmel ţhin hle. Inthlahlel viau mah ila kan room lamah ka chhoh san a, khum lu a June lo ţhu tawm kak chu room chhung ka luh rual chuan a lo phu nasa hle a, a khek ţhat nghe nghe a ni. 

"Min va hlau ve" fiamthu a ka tih chuan kawngka lam a kawk a, ka hawi let a, a inkalh lo ka hmuh chuan ka va kalh a, chuti chung pawh chuan a la kawk tlat tho. 

"Eng nge?" ring deuh hlek hian ka ti a, "An rawn kik nasa lutuk, nangmah emaw ka tia, ka hawn apiangin thawm a reh lehnghal zel a, tumah hmuh tur an awm lo. Ih..ke pen thawm takngial pawh hriattur a awm lo" a ti mawlh mawlh a, kawngka bawk chu a kawk leh a, a melh ngam tawh lo thung.

"An fiam che a ni lo maw?" ti mah ila "Teuh lo...kawngkhar bulah ka chang a, a rawn rik rual a ka hawn pawn a reh nghal hmak zel. Boruak a danglamin hlauhna ka nei tlat a, Josephine ka ngaihtuah chhuah phei chuan ka hlau lehzual. I duh leh nangmahin riak ve chhin rawh, thawm i hre ve tho ang. Naktuk a i haw dawn chuan keipawh ka chhuak ve nghal dawn" a ti khur hlak hlak a, a hlau hle tak tak mai. 

Zankhuain min kuah a, zing a ka harh pawn June chu a lo la muhil miah lo. Ka thawh rual a thoin a insiam sawk sawk a, "Nizan khan ka sawi tel ngam thlawt lo a, Josephine ka hmu. Ka hmu chiang lutuk. Kawngka an rawn kik nawn reng hnu khan min fiam emaw tiin ka chhuak a, ka hawi kual ruai bawk a, Josephine kha, a room a a lut lai ka hmu" a ti a, a kut te chu a la khur der der a, kan room aţanga chhuah chiah hian kan room piah lam a room intlar phei put chu tam tak a hmuh theih a, a hlauh em vangin a thil hmuh chu ka ringhlel lem lo. 

"Kan inah i rawn awm ve rih mai dawn mi?" ka tih chuan lu a thing a, "Ka ţhiannu'n in a luah a, tah chuan ka awm ang. Class ţhulh thei ka ni lo. Zawi zawiin hostel dang ka zawng mai ang" a ti tlat a. 

"Josephine chu engtin nge i hmuh? A landan a danglam em?" ka ti leh a, "Danglam lo...a thawmhnaw hak kha ka hmuchiang thei lova, rawng thim lam chu a ni. Min rawn en reng chungin a room ah a lut a, miss ten tala in an kalh vek tho sia" a ti a, a thaw a rang khawp mai. 

June chu ka chhuah rualin a chhuak ve a, Muankima'n min thlahin June awmdan chu atthlak a tih hmel viau mai. Inhrilh chianna hun awm tawh miau hek lo le. 

In kan thlen chuan ka naute an lo ri nghal chel chul a, Daisy pawh a lo awm. Ka niin kan awm loh hlan a ka naute lo awmpui turin a hrilh a, card deng lo turin a chah thlap bawk a, a zawm ţha viau a nih hmel. 

"Awwiii...ka hlau lutuk Boomer Vanmalsawm" choka aţanga Daisy au tuar ri ah chuan kan hawi phawk hra a, "I va mawl ve...ka thi daih mai tur a sin" a tih leh takah chuan ka ni in mitmeiin enfiah turin min hrilh a, choka a ka lut chu thinrim tawkin Daisy a lo ding at mai. 

"Eng nge a?" ka tih rualin Boomer chuan pangang lem min lo hmuh tir a, "I kut dawh rawh min tia, pangang lem kha a rawn dah alawm. Mawl leh lutuk mai, ka chhu hrep dawn che em mawn le" ti vin nghek pahin hmarcha rawt fung a lek kang uaih a, an invaw mai ang tih ka hlau chu an inkarah ka ding. 

"Min pe rawh i ti a nih kha a" Boomer chuan a ti a, chu chuan Daisy a ti thinrim zual khawp mai. 

"Ka ti hlawl lo...choka a ka rawn luh veleh i kut dawn rawh min lo ti nghal a nih kha. Dawheh si, chimawm si, mahni thuduh leh luhlul. Ka vaw hrep tak tak mai tur che a nia" a ti hlak hlak a, Boomer lah chuan a ngaipawimawh lo nasa, "Ka pe phal hleinem che Daizau..min dil min dil suh" tiin a ţawng el zawk a, Daisy chu ka vuan bet a, ka pa hriat tham khawp a ringin buaina siam lo se ka duh a ni. 

Ţha deuhin a chhuak dawn maw tih laiin Boomer chuan "Daizau..catch" tih lauh pahin pangang lem chu Daisy lamah a rawn vawm leh kher a, nui hawk hawk chungin a chhuak zui a, Daisy erawh a tlu lo chauh a ni. 

Mut hnuah June biain chanchin ka zawt a, a ţhiante inah chuan a riak ngei a, a aw pawh ngaihthlak a nuam ta deuh. 

"Josephine kha amah thattu ber an hriat tawh chuan thawm neih tawh loh loh tak a nia, a room hluiah phei kha chuan lut tawh miah lo se rilru a nuam zawk ang" ka ti ţha leh a, "A lung a la awi lo aniang chu" a rawn ti nghat a, lungawi lohna chhan tur a awm tawh lo ni a hriain ka ngaihdan chu ka sawichhuak ta nge nge a.

"A lungawi lo ang..a chhan chu Jessie khan a that hleinem" a la rawn ti ţang ţang a, a ţan ţha leh dawn a nih hmel.

CONT...