KA HRINGNUN THAWNTHU-10

KA HRINGNUN THAWNTHU-10

Ruattei thusawi chuan tu te mai pawh chu min barakhaih a, inthurual ni awm hrimin inchung lam panin an tlan chho diak a, Siampuiin U Puitea a ko thuai thuai bawk a. 

Keichu Bawiha pawmin ka dinna ngaiah ka la ding reng a, ngaihtuahna ka hmang mumal thei tlat lo. Ka nu'n a mut hahdam thu min hrilh aţang khan hun tam pawh a la liam lo a sin. 

Inchung aţanga ţap ri a rawn chhuah rual chuan ka mur nghal vek thei hialin ka hria. Tih tur ber hre lovin ka ding mawl tawp a, Bawiha lah chuan inchung lam chu a thlir chho ve ran a, an ţawng nuaih nuaih nain an thusawi ka hre mumal lo. 

Siampuii leh kan ţhenawm tlangval rawn inzui lut lai ka hmu leh tawp a, keichuan tih ber tur ka hre ve lo. An che vel chu ka thlir reng a, ka pa chu hospital-ah an hruai ve ngei a, mahse, a boral ta tho a ni. 

Beisei loh lutuk a ka pa thihna chuan min ti hrilhhai tlang a, mipui rawn pung khawmin tih tur ţul ang ang an ti nghal bawrh bawrh a, ka nu leh Ruattei te ho an ţap râwih râwih a, ka pa ruang chu ka melh tlawk tlawk a, damlohna em em nei lovin ti hian a thi thut a, awih a har takzet a ni. Inchhungah chuan ţap ri leh zai ri a inpawlh nawk a, mi an tam chak khawp mai. 

Lusun dan a inang lova, ka tawrh loh bik vang pawh ni lovin ka ţap ve thei hauh lo. Ka pa hi ka ui takzet a, ţap thei lo mah ila lung a zingin hrehawm ka ti takzet a ni. 

Bawiha awm ţha duh vak lo chu ka pawm bet lui a, a pi ţap a hmuh hnu phei chuan a men ve pur pur reng a, keiman pawm lo ila chu a ţap ve daih tawh ang. 

"Kan chhungte ho an lo thleng mawlh mawlh reng a, ţhutna lo kian rawh. Ruang kil tur ngawih ngawih an tam a, an rawn thlen belh zel dawn bawk. Duh leh nang chuan i fapa kha inchungah lo han chhohpui rawh" Neihkimin a rawn tih takah chuan ka pa en reng chungin ka tho a, inchhungah ţhutna tur a vang tawh a, puakpuan ka keng tho bawk nen, Bawiha chu pawnah ka chhuah pui ta daih a. 

Pawn a rei vak lo kan awm hnuah Hmangaihsanga te pawh an lo thleng a, tu tu ten emaw an lo be ding a, thingpui lumna lam a an inzui phei zet hnuah a lo let leh a, a rual a lokal ve ho chuan inchhungah an luhsan diak tawh. 

Kil khat a nau ka lo awi chu min rawn hmuin ka dinna lam a rawn pan ding a, a hmel ka hmu chiang thei lawk lova, min rawn dinchilh takah chuan a hmel ka lo en vat a, a mitmeng thim lam chu a dul raih a, motor chuang zo hlim tih hriat zetin a sam chu awmze nei lo tak hian a thur a, a jacket ban chu uluk lo zetin a thlep chho bawk a, a chauh hmel takzet a ni. 

"Engatinge pawnah i awm?" min ti a, Neihkimin ruang kil a phal lo tih chi a ni si lova, Bawiha chu chhuanlamah hmangin "A awm ţha duh lo a" ka ti ta zawk a. 

"A muhil tawh em?" ti a min zawh pahin ka hnung lam a rawn thlek vut a, Bawiha lah a muhil a ni mai si a, hlauh ang ngei ngeiin "A mutthilh tawh kha, lo luh pui rawh. A pu'n a ngaih em kha" a ti deuh nghat a, a rual a luh ka hreh em avangin "A mut ngheh hunah ka rawn lut ang" ka ti a, a pawm loh hmel khawp mai. 

"Hnar tu che an awm tiraw? A dik em?" zawi deuh sup hian a ti a, midang hriat ve a hlau a nih ka ring.

"Awm lo e...naupang a nia, ka nu te ţap leh mipuiin min rawn chip huk kha a hrethiam lova" ka ti ve zel a, lut turin ka nawr zui zat bawk a. Lungdam hmel zan lovin a lut ve ta nge nge a, Bawiha mut ngheh hnuah inchhung lam ka va bih zeuh ţhin a, a khat hneh lutuk. 

Hmelhriat an ngahin lumen tum pawh an tam nangiang mai. Kalna tur ka hre mai bawk si lo chu pawnah ka ţhu ta reng a, inchhung thawl deuh hun a ţhut luh ka rilruk a ni. 

Ţhalai hun a ni tawh a, an zai a ngaihnawm kher mai. Inchhungah an la khat ţan reng a, an chhungkhat hnai vai te mai bakah an ţhianţha tlaivar tum an tam hle a, an chhungte ngat phei chu an rawn thlen belh zut reng a, ka hrang bik riauin ka inhre tlat lehnghal. 

Ka kawng leh ka dar a na ngut ngut a, mu hahdam tur a inchung a chhoh ka ngam chiah bawk si lo chu pawnah ka ţhu ngat ngat a, Zonuni te pawh an lo kal ve a, zan a rei tak tak hmain an haw leh a, an lokal lai khan kan belebut em a, inbiakna hun kan nei mang lo. 

Bawiha lah chu a tal leh laih ţhin a, a harh hlauin keiin ka lo awi a, an chhungkaw mi ve tho ka ni tih hria te chuan an in lam a chawl hahdam turin min râwn hlawm a, mahse ka lo hnial zel. Ruattei te unau lung ka tih awi loh ka hlau a ni. 

Dar 1 velah Hmangaihsanga a rawn chhuak leh a, "Mu tawh rawh" a rawn ti teh ngawt a, ka thlek chho ha a, "Nau paw chung chuan i tlaivar thei lovang" amah bawk chuan a ti leh a, a sana bun lai chu a bih pah bawk a. 

"Inchungah ka chho duh lo. Min hmu vek dawn a, a nuam lo emai" ti ve ngial mah ila "Ka hruai chho ang che" a ti leh tlat tawh a, "Dar 1 a pel tawh. I hah lutuk ang" a ti zui zat a, chhang let tawh lo mah ila min nghak tlat sia, muangchangin ka ding a, inchhunga luh a, inchunga chhoh tlang chu ka hreh takzet a ni. 

"Lut ang le" a ti a, a inher nghal mai bawk sia, zui loh theih ni hek lo, kun tlat chungin a hnungah ka kal a, zak zum chi ka ni bawk nen, tu te mai pawh chuan min en ţhup ni maiin ka hria. 

Nau pawm ka nih miau vangin min hriatthiamna an neih ka ring tel a, kailawnah hmanhmawh deuhin ka pen chho hlawk hlawk a, Hmangaihsanga pawh ka lehpel hial a ni. 

Inchung kan thlen chhoh hnuah "I pindan kha khual khuaa miten an bungraw vawm khawm nan an hmang a, zanin chauh chu ka pindanah riak mai rawh u" a ti a, a inthlahrun hmel ve reuh lutuk. 

"A pawi lo, Bawiha mut theihna chang changah pawh awm ila pawi ka ti miah lo a nia" ka tih chuan a nui deuh a, "Nangpawh i mu ve ang chu le" a ti mai a, a pindan a kan luh veleh Bawiha chu ka mut sawk sawk a, ka kawng leh dar na vel chu a dam nghal sawng sawng thei hial. 

"Tikhan lo mu rawh u" a ti a, kal lehnghal mai a tum chu "Hrehawm i ti ngawt ang chu tiraw? Nang phei chu mipa awmchhun i ni a, intih pachan a ngai dawn bawk si. Mahse, mipa hming i put vang mai khan ţah loh tur tihna a ni chuang lo. Mipa te hian hmeichhia te thinlung ang tho in nei ve a, mittui hmanga natna tihlan loh bik tur tihna a ni hauh lo a nia" ka ti duah a, a mit a bui lova, a sen lova, a ţap miah lo a ni tih a hriat theih a, chuti chung chuan a mitah tawrhna bak hmuh tur a awm chuang tlat lo a ni. Hun hrehawm ber a hmachhawn lai hian a hahdamna thlen thei tu nih ka duh. Chu ka duhna chuan keimah leh keimah mak min intih tir hial reng a ni. 

Rin lawk ang ngeiin min chhang let lova, min rawn enin tawi tein a nui a, a chhuak nghal nulh a. 

Mut pahin zai ri ka ngaithla reng a, mutthilh a har duh khawp mai. Rilru a vak thuiin suangtuahnain hun liam tawh a chhui kir lo thei lova, ka pa nen hian kan la inhrawn rei hauh lo a, mahse ka ngaina takzet a ni. A aw leh a hmel dam thlap mai te, Neihkimi ten min sawichhiat bawih bawih chang pawh a ka thlavang a hauh tlat ţhin te, a fa ka ni lova, a nupui, ka nu fa pawh ka ni chuang lo. Chu ti ang a ni chung chuan min pawm thlap a, he inchhungah hian ka len ve loh a hlau em em zawk a, ka tan chuan a hlu takzet a ni. A ruang ka kil mumal ve lo te hi nuam lo ka ti a, inthlahrung viau lo ila chu Neihkimi khan min hnar mah se ka awm lui tho ang. Ka pa tak a nih lohna hian min ti tim a, an chhungkhat hnai vai ho mitmei ka veng tel lo thei lo a ni. 

Ka pa thihna hian hringnun tawi zia leh mihringten hma hun kan hriat loh zia min hriat nawn tir leh a, kan nunna thu a second 1 lek pawh thu nei si lo hian ţhenkhat chu kan han chapo ve em em a, kan hausakna leh kan thil neih kan chhuang a, midangte diriam nan kan hmang a, mahse, mi hausa leh retheite tawpna chu a lo inang reng, thlan khur thuk takah min la zalh vek dawn a, kan ruang a ţawih ral ang a, kan ruang rual a an thawmhnaw phum tel thlengin a mawih chhe vek dawn tho tho. Hringmi te tawpna hi a ho takzet a, kan thlarau chuan kut ruakin a pan tur lam lam a pan dawn a, inti vei leh chapo tak a midang thlei thei tumah kan awm bik lo a ni. 

"Naa...ka nu Pui, keimah a mut ka duh lo. U Zotei te pawh an chho lai ka hmu vek aw" U Remremin a ti zat zat a, kawngkhar a in khar phui lova, a aw ring leng lawng chu chiang takin a hriat theih a ni. 

"I va han khaw lo mai mai tak e aw. Tu nge mahni pa te hlau ngai? U Zotei i tih lah chu a pindanah a awm bawk si lo" pakhatin a tih leh chuan min zawng a nih ringin ka tho sawk sawk a, kawngkhar ka nam hawn rualin an pahnih chuan ka hmu nghal mai. 

Ka thawm an hriat chuan an rawn hawi rual chiang hle a, an kut an in vawn sak a, U Remremi zawk chu a men nasa hle. 

"U Zote, ka ţap ning tawh. Ka lu a na a, ka hnar kua a thip vek tawh" U Remremi chuan a lo ti pek a, a rual a rawnkal ve nu chuan phawk hrain min lo en reng mai. 

"Remremi u Zotei maw i nih?" a tih chuan ka lo bu nghat a, a hawikual thuak hnuah "Ti teh u, lut phawt teh ang" a ti a, Hmangaihsanga pindanah bawk chuan kan let leh a. 

"I lang naupang hle mai" min ti a, U Remremi aia upa tak tak turah min ngai a nih hmel. Kan chanchin a hre ngai miah lo aniang. 

"Ka lawm e" ka ti a, "Min zawngin ka hria a" ka ti nghal zat bawk a. 

"Aw..zawng a ni mai ang chu. Remremi hian mut a duh tawh a, awm ve rih tur a tih paw'n 'ka thawk zawngin ka hnar kua a thip zel tawh' a ti tlat sia, rawn muttir ka tum a, amahin a mu ngam chuang bawk si lova, inchunga i chho lai a hmu kher bawk nen, i bul a riah a duh a" a ti deuh duah a, "Ka pindanah eng eng emaw an dah khawm a, keipawh pindan dangah ka riak tawp a nih hi. Lo mu ve rawh U Remrem, khum a zau tho alawm" tiin an pahnih chuan ka be kawp a, U Remremi chu khumah a ţhu thla nghal hnawk a, a chauh hmel ve reuh khawp mai. 

"Zamtei khu ka beng bulah kher a ţap zel a, a ring ropui si, ka beng chhung a na vek alawm" tih pahin a beng a kawm nawk nawk a, "Ka nu Pui, Zamtei bulah ţhu miah suh aw..beng chhung a na duh tehmai a nia" a la ti tak deuh deuh a. 

"A â thei sia aw" zawi sap a lo tih pahin Nu Puii a tih chu a nui tet tet a, ka pa a thi tih hrethiam ve tho mah se keini angin a dâwn thui ve lutuk thiam lo a, pawn lam a ţhu te ti ti naah pawh U Remremi hming a lang zingin an khawngaih thu an sawi nasa mai. 

"Nih leh ka kalsan ang che u aw. Remremi nu u ka nia, awm bo vang vang chu a nuam lo emai, amah a a lo chhuk hreh chuan min ko leh mai dawn nia aw" nelawm deuh a a tih hnuah min chhuahsan a, U Remremi lah chu a kilah a mu fel than tawh a, "Ka lu a na e..ka mitmu leh ka hnarkua a thip bawk si" a ti nang nang reng a, rei pawh a mut hmain a muhil a ni nghal mai. 

Khum sir lam a Bawiha ka pawh phei det det lai te chuan a lo hnar kuk kuk tawh a, U Remremin a delh nat loh nan keimah zawk a laiah ka mu thên a, khum dup nuam tak a mu reng na na na chu ka muhil ve thuai a. 

Ka nghawng hi thil rit deuhin a delh a, thawk harsa lutuk chuan min ti harh thuai a, pindan dang daih a ka ţhang harh chuan min ti hamhaih hman lek lek a ni. Mahse, ka harhchhuak thuai a, ka nghawng delh tu pawh kha U Remremi bawp a ni. Kan nufa in khum hmawr teah kan mu tawh a, Bawiha phei chu a tla lek lek a, vanneihthlak takin a harh lo hlauh. U Remremi mangchhiat dan chu a namai lo khawp mai, ka nghawng a min khan daih thei te chu thil mak tak a ni. Duh duh danin a in leng kual a, kan nufa chuan min nek tla lo chauh a ni ber e. 

Thawm dim deuh a ka thawh hnuah Bawiha ka mutţhat tir a. Inhnuaiah chhuk duh nghal tut tut mah ila U Remremi te mu chu ţhut chilhin ka veng ta rih a, a bawp a lian angreng si, Bawiha te ang rual lek chu a khan hlum daih ang tih te ka hlau a ni. 

Bawiha harh hnu lawkah U Remremi a rawn harh veleh a, a ţhut chhuah hlawl rualin a hawi kual vut a, a awmna a hriat chian hnu chuan a bek tawn tawn a dawm chung meuhin "U Zote ka lu a na, a bung dawn a nia" a ti a, a ţawng hi a rangin ngaihthlak chian loh phei chuan hriat a har ţhin hle. 

"Nachhawkna chu ka kawl a i ei duh em?" ka tih chuan "A mum nge mum lo" a ti a, a mum a nih thu ka hrilh veleh "Hmh..a mum ka ei ngai bawk lo, i hmelchhia nih chu. Ka lem thei lo, i tlaw ber, tlaw-i" min ti ta hrep a, ka hau hmasa emaw tih mai awl tak a ni. 

"A mum lo chu ka nei lova, engtin nge kan tih ang aw" ka tih chuan "Nangman ei la ni mai lawm, a kha si, ka ei peih bawk lo, nilengin a kha ziah. Damdawi mum ka duh bawk lo, i hmel a nih chu" min ti leh nek a, na a neih chuan a thin a chhe kher mai. 

"An jection ţhin che em ni?" ka tih phei chuan phawk hrain min en a, "He nu hi a mawl maw..ka mawng an hnawh, i mawl mi?" a ti a, hmelchhia min tih leh mai ka rin laiin Hmangaihsanga a rawn lut ta hlauh a. 

"In muttui em?" a tih zet tawh hnuah U Remremi ţhu tum bur chu a hmu a, "Nang kha?" muang charh a tih pahin a mitko a kan uk a, "Damna silaimu ka duh" a ti bak hlar a, a lu a na viau tak tak a nih hmel. 

"I nachhawkna bik hi ka la kawl em le?" tih pahin khum bul a drawer chu a pawt hawng a, a hai rak rak lai chuan "U Zotein damdawi mum min pek a tum a, a mawl maw..hmelchhe si" a tih lai mek chuan Hmangaihsangan "Hey" a lo ti vat a, a mitmengin a khap pah bawk, a vin hauh lo na a U Remremi takngial pawh a ngawi ve hmak mai. 

Rei vak lo a hai leh hnuah U Remremi hriat tur ngei turin, "Ka hmu e" phur hmel zet hian a ti deuh hluai a, nachhawkna mawng a hnawh ngai chi an inpek pah chuan "Ţawngkam thlahdah loh tur ka tih ziah kha. Na neih pawn nuih tho tur. Pindanah Ruattei a phei chiah a, va inthlak ve tawh rawh u" a ti dam thlup a, a u zawk mah nise U Remremi chu midang aiin a enkawl thiam hmel daih zawk daih a, ka pa ai a awh zo phian maithei a ni. 

"Choka a hman theih a, chhuk pui rawh. Lumum-a kha a ril a ţam tawh ang" a ti leh zat a, wardrobe a hawng a, thawmhnaw inkhai vel a khawih lawr dan dan takah chuan intihfai a duh ve a nih ringin Bawiha chu ka pawm a, ngawirengin ka chhuahsan a. 

Hetiang hunah hi chuan inhnem vak ngaihna a awm lo ţhin. Sawi tur a van rualin ţawngkam hman fimkhur a ngai tel a, engpawh sawi ila an rilru natna a chhawk thei tak tak ngai chuang lo a, an lungngaihna kan belhchhahin an rilru kan ti no zual ţhin zawk niin ka hria.

Choka ah chuan Bawiha pawm chungin ka lut tlang a, rin aiin mi an lo tam a, hmelhriat loh hlir an la ni zui a, ka zam chhe lek lek a ni. Ţhenkhat chuan tlangnel deuhin fridge an hawng a, a ţhenin Siampuii an fiam a, thingpui no dawm mek te leh kilkhat a thil ei mawlh mawlh pawl te an awm a, an tlangnel hmel hlawm takzet a ni. 

"U Zote, Bawiha chaw tur em ni?" Siampuii chuan a lo ti ta hlauh a, ka lawm viau rualin an mit chu keimahah a fu ţhup a, an hmelhriat loh ka ni bawk a, min en duh hlawm ngang mai. 

"Aw...buai tak tak hmain chaw ei se ka tia" ban charh a ka tih chuan, "Nia tiraw, nichin khan keipawn ka lo ngaihtuah deuh a, mahse in la tho lo a nih ka ring a, lo ţhutpui tawp la keiman ka rawn siam ang" a ti zung zung a, hnial ve ngial mah ila awmzia a awm lo khawp mai. 

Ka hnial beidawn ţhak hnuah dawhkan bul a chair chu pawt tawlhin Bawiha chu a ţhutpui ta ringawt a, min hual deuh ţhup bawk sia, awm a nuam lo duh ve reuh lutuk. 

"Hei...keichu lollipop ka nei a sin" tih pahin mipa pakhat hian Bawiha hmazawnah lollipop a dah a, Bawiha lah chuan a lo la vat a, a thil pek dawn chu min hrilh ve ni awm takin rawl chhuah chung meuhin min hmuh tir a, kan lo nuihpui hak hak hlawm a. 

"A nui duh sia, a hmelchhe reuh lutuk hian a ti lawmawm" hmeichhe pakhat hian a rawn ti a, a hmai a chei nasain zingkarah pawh a hmui a sen hlar a, en mai chuan Neihkimi nen an inrual khat duh hmel. 

"Mi fate hmelchhia an ti ngai lo aw Rinkim. Eng hmel pawh pu se nu leh pa te chuan kan hmu ţha vek zel. Mahni fate aia ţha tih zawk neih a har teh mai a nia" tiin amah ang rual vel tur bawk hian a lo hnial a, Rinkimi a tih chu a ner nak a, "Nau ka lawm thiam ve dan a ni mai lawm" a ti deuh hlar bawk a. 

"Tlangvalin nula ka lem ve dan tiin Rinkim i van hmelchhe reuh, i lawmawm reuh e ti se i duh bik nang" Bawiha lollipop rawn pe tu khan a lo ti fiamthu ve a, amah chhaih zui nan a a ţawngkam vêk an hman takah chuan Bawiha chu huat hmel zetin a melh tawh a, a thinrimna a sosan loh nan ngawih ka chuh thung. Mi zawng zawng mit tlung khawp a fa hmelţha neih hi a har a nia nge. 

"Nuno-i khan a sawi dik chiah alawm. Mi fate hmelchhia han tih sak ngawt te chu a rilru neih loh thlak e. Kan ţawng chhuah hmain miin kan thusawi engtin nge an lo dawn sawn ang tih ngaihtuah hmasak ţhin tur. Thumal tawi te leh ho deuh a kan ngaih pawh hian mi thinlung a hliam ve thei tho a nia" kil khat a thil lo ei nu khan a ti dam dap a, an inhriatchian hmel hlawm angreng sia, in chhungkhat hnai vai tak an nih ka ring. 

"In ninawm..fiamthu tih mawlh mawlh pawh a la sawi zui ţalh reng kha a rilru neih loh thlak fe zawk. Mi hrang daih thlavang an hauh viau ngai lo" meinei zet hian a ti deuh kher a, ka nui lui a, ka na ru viau thung. 

Mi an rawn kal khawm leh ţak ţak tawh a, choka a awm ve ţhenkhat pawh an chhuak thawl ţan a, chuti chung chuan awm an la tam viau tho mai. Hmangaihsanga lo chhuk chu a landan a dang deuh zar tawh a, induh tawk ve tak a ang ka tih fo ţhin kha, khatiang chiah khan ka hmu leh thei tawh a, a pawimawh zia hria a inthunun thei tak a nihna a lantir chu ka lo lawm ru ve em em ringawt a. 

"In lo in hmelhriat tawh hlawm em?" a ti a, a awki pawh tlem chuan a zangkhai ve ta deuh e. 

"Teuh lo mai...kan la inhnial char char. Mi an lo lut ang tih a hlauhawm zawk alawm le. Rinkimi lah hi a puak phawng phawng a, fiam dawl mang si lovin na tak takin mi a fiam a" thil ei nu ka tih bawk khan a lo ti nghal zung zung a, a fel viau a, a hming erawh ka la hre ve lo thung a. 

Hmangaihsanga chuan "Zotei a nih hi" a ti ringawt a, a farnu ka nih thu a sawi tel lo. Choka a awm ve ho chu a cousin te an ni tiin min hrilh bawk a, kil khat a thil ei kha chu Rinengi a ni. 

"Rin engtheii" tiin min hrilh deuh kher a, Ruattei nen an mizia a inan duh hmel khawp mai. 

Hmangaihsanga chu mipa awmchhun a ni tawh bawk a a buai bik viau a, Bawiha lollipop rawn pe tu, Hruaitea ti a an koh mai ţhin chuan a pui bawm char char bawk a, ruang a kil veleh zawk ţhin a, a ţhu rei hman lo a ni ber a, ka pa vuina hun an hman dawnah erawh ka pa ruang an muttirna lam chu a rawn pan a. 

Ţhutna an lo kian sap sap a, U Remremi bulah ţhuin ka pa chu a en ngar ngar a, hla tak aţang pawhin natna tuar mek a ni tih a hmuh theih a, ka pa kan chân thut chu a hriatthiam loh hmel viau bawk a ni.

Kuang an chhin dawn meuh chuan ţap ri a ring lehzual a, keipawh chu ka thaw a pik a, ka pa an phum bo daih tur chu ka hrethiam lo tharin ka awih lo ţha leh a, natna in min tuam ve hlup hlup a, chuti chung chuan ka la ţap thei chuang lo. Ka pa chu 'Mangţha' tiin ka thlah a, a riin ka ţawng chhuak lo thung. Thil ţha min tih sak te leh min duhsakna zawng zawng te kha ka hrereng tawh ang. 

Thlalak naah chuan tel ve hreh viau mah ila Ruattei leh U Remremi ten min ko ve tlat a, Ruattein bul a ţan a, U Remremin min ko chhunzawm a ni ber zawk a, Bawiha pawm chung a ka tel ve chuan Neihkimi a lungawi loh hmel khawp mai. 

Ka pa a han awm lo chiah chu inchhung a ruak huai a, kan khawhar min hnem tur a rawn leng lut ţhin te chu an fakawmin mizo nih an ti nuam a, mizoten tlawmngaihna kan neih tawh loh zia an sawi fo a, mahse ka pawm zawng a ni ve hauh lo. Ka pa ruang lu men tu ţhalai tam tham tak te, phun nawi leh ning hmel pu miah lova thingpui lum tu te leh tih tur zawng reng reng a phe vat vat ho te kha mizo an ni. Ka pa thlan lai tu te pawh mizo tho an ni a, an thil tih kha tlawmngaihna a nih loh chuan engtia sawi tur nge ka hre lo. A ţul vang ti ringawt dawn ila thlan laih a ţul zia hrereng a thlan mual lam pan tum hauh lo an tam. Mizo tlawmngaihna hi a la thi reng reng lova, tlawmngai ve lo mi tlem tê kan en bik lutuk na lamah mi tlawmngai tam tak kan hmuh kân ţhin zawk a ni. 

Inleng an ţin ţan a, mikhual la nei nual mah ila inleng te tello chuan khua a har zual duh khawp mai. Neihkimi leh Hmangaihsanga te mawhphurhna a sang sawt viau a, hrehawmna leh harsatna tam tak tuar chunga ka pa'n a lo din, a ngaihhlut em em care&cure hospital enkawl zui chu an huphurh ve ve a, ka pa ang emin tawn hriat an la ngah ve lo a, hospital enkawl zui zel an zuam lo lutuk pawh chu an demawm hran loh e. Mahse, an  ko a tla an mawhphurhna a ni tawh a, ka pa duh dan ang ngei a an enkawl zui a ngai a ni. 

Malsawmi pa, Pu Saia kha a lo kal awl lo a, nitin Neihkimi leh Hmangaihsanga te a rawn hmu ţhin a, a awm rei ngai lo thung. 

Ka pa a reh ta vang vang mai si a, inchhungah chuan Neihkimin lal a hrawt a ni ber a, Hmangaihsanga leh Ruattei te awm lo se chuan kan rethei lehzual viau ang. 

Kan nunphung a pangai chho hret hret a, kan khawharna erawh a la reh hlei thei lo. Ka pa hming kan lam fo a, Ruattei phei chu fa tlum ber tih takah a ţap ru lai ka hmu fo mai. 

Rinkimi leh Rinengi ten min rawn awm chilh râwt a, an hming a inan teuh em avang hian ka nu phei chuan a lo hriat pawlh leh ţhin a, a ko sual fo nghe nghe a ni. 

Rawng ka bawl mawlh mawlh laiin Siampui'n Bawiha chaw a lo hrai a, naupang buaipui hi nuam a tia, chaw hrai vel te hi a chuh tlat zel a, ka nu paw'n a chet khalh thei tawh lo. Bawiha pawh hian a ngaina a, ka nu, Ruattei leh Siampuii te hi chuan an riah hran pui daih thei tawh ang. 

Hmangaihsanga pawh lehkha pawimawh enfel pahin choka ah chuan a ţhu ve reng a, hnar ka tum nasa lutuk tawh; a chesawn duh eih lo. A luhlul lutuk hi tih vak ngaihna ka hre tawh lo a ni ber. Hnar eng ang mah ila a duh hunteah lo chuan min kalsan chuang lovang. 

"Green tea han lum teh. Ka tui a hal teh mai a nia" Rinkimin a rawn tih chuan ka hawi let a, dawhkan hmaah a lo ţhu fel than tawh a, "Gas a la awl lo lawk a, a awl ţep tho a ka siam sak vat ang che" ka tih chuan "Tun a tuihal tawh gas awl hun innghah tir chi em ni? I tih theih zâwng chu sawi ngai lovin ti zung zung zawk ta che" a ti a, a vin khawp mai. 

"Tui in rawh" Hmangaihsanga zawk chuan a lo ti a, "Mahse green tea alawm ka duh" a ti vei tlat reuh a, a awmdan naupangchhia lutuk avang chuan Hmangaihsanga pawh a lo chêk tlak a. 

"Zotein gas a awl lo a tih kha. Naupangchhia i ni tawh lo Rinkim" rum deuh tak hian a ti a, a ţawng ngam ka rin tawh loh laiin Rinkimi chuan "Ka duh zawng ka lam ve a ni mai alawm. Inchung kan khawih a, ka hah em hi" a ti a. 

Hmangaihsangan "Chhiahhlawh a ni lo" a tih tak nghutah chuan "Huh..Neihkimi sawi kha a dik chiah a nih hi. I farnu te pawi a sawi pawhin a thlavang i hauh zel a, he hmeichhia hi i eng nge a nih a?" a ti tan tan a, a duhâm kher mai. He hmeichhia a tih pah khan min kawk kher lehnghal.

"I farnu te ho hian langsar tak a kan thlavang i hauh awm kan la hre lo. Mahse he hmeichhia hi chu midangin an khak hlekin i lo ţan zel a, nangmah vang hian min hmusit ru viau thei tih i hria em?" a ti hlak hlak a, ka pa thih vang chauhin ka hmelhriat ve a, mahse an in ngamtlak hmel phian mai. 

"Zotei a ni ka tih tawh kha" nin hmel zet hian a lo ti a, chu chuan a ti thinrim zual sauh emaw tih tur a ni. Dawhkana a kut dah chu a hum ngawt ngawt a, huat hmel zet a min rawn melh chuan gas lamah ka inher leh ta daih a. 

Ka thil chhuan lai chu ka suan a, tui lum ka chhuang leh nghal a, Rinkimi chuan "I nundan hi thlak thleng thuai ang che. Hmeichhia i buaipui dawn paw'n hetiang hmeichhia lo deuh hi ni rawh se" a ti a, ka zak kher mai. 

"I thuneihna piah lam thilah lo buai ve chiam duh suh" a ti hmuk a, Rinkimin min chhuahsan hma chu chhuah a tum lo ni awm tak a ni, a ţhutna ngaiah a la ţhu ve reng a, keipawn tun ţum chu min kalsan daih ka hlau a, keimaha Rinkimi hmachhawn ka zuam lo a ni. 

Green tea chu an pahnihin ka pe ve ve a, Rinkimin min lo melh râng nasa khawp mai, "He in hi i pa khan Remremi hmingin a dah a" ngeiawm deuh tak a tih pahin ka hmelah danglamna a awm leh awm loh hriat tum ni awm takin min rawn en kher bawk a, danglamna tehchiam a hmu kher lovang. Mahni a inhai kaw zo lo ber tur a nia, U Remremi hminga a dah chu rem hria ka ti lutuk zawk. 

"In in lamah let tawh la a ţha ang" tiin Hmangaihsanga chu a phun sup a, ţawng tam a ti ve deuh a nih ka ring. Ro chungchang chu a lo sawi ve tur a awm lo reng a ni. 

Malsawmi a rawn lan takah chuan sil tur awm ang ang chu ka sil nghal bawrh bawrh a, ţawngkam chhe tinreng hmang a min ţhawngkhum leh hmaa inthiarfihlim ka duh. 

"Ka nu leh paten zanriah min rawn kilpui rawh se an ti che a, ka rawnkal vang vang a nih hi" a ti lang lang a, a ţawng ring lui vel te chu nuihzat lamah a kal. Malsawmi ka haw ta lutuk hi mak ka in ti khawp mai. Hmangaihsanga nen a ka hmuh dun lah hian mak tak maiin nuam tih lohna ka nei tlat a, thik thuah chuan ka thik hauh lo, chu chu ka inhrilh ţhin dan a ni. 

"Ka hman lo tih hrilh rawh" dam thlupin a chhang na a sawm zui zel a chakawm loh khawp ang. 

"Kan in rawn thleng phei hman lo khawpin eng buaina nge i neih a? Ka sawmna i hnar ta fo mai a, i danglam vek tawh" a ti a, a ţan leh dawn e. 

Rinkimi te green tea ka pekna no pawh chu seng lovin choka aţang chuan ka chhuak a, ka veng hawk thei hialin ka hria. Siampuii leh Bawiha te an la inchhaih nui nasa bawk a, min ngaihven loh lai tak chu chuhin inchungah ka chho a, inbual harh ka tum a ni. 

Towel leh thawmhnaw ka lak fel vek tawh hnuah ka pindan kawngkhar chu a ri karh karh a, ka kalh tih ka hre ve chiah. Siampuiin a rawn kik a nih ringin ka hawng vat a, beisei loh deuhin Hmangaihsanga zawk a lo ni. 

"Eng nge i lo tih dawn?" ka tih chuan tlangnel fahranin khumah a ţhu daih tawh. 

"Ka rawn rim che" a ti a, "Eng a?" ka ti deuh hluai a, a nui hawk thawm ka hriat takah chuan a fiamthu tih ka hre chiah. 

"Khati zawng khan fiamthu thawh ziah suh" ka ti hlak a, din reng chuan laih ţût a awl angreng sia, chair pakhat inhung ve ranah chuan ka ţhu a, ka ţhut hmain amah hlat deuh tak thleng a ka'n pawh tawlh hram kha. 

"Min la hel deuh tlat a hriatna ka nei" a ti a, a uang leh emaw tiin fiam let ka tum a, mahse a hmel chu a thutak lutuk tlat. Ka pa thihna hi a tuar a, a khua a la har bawk a, thlakhlelh hmel zet a min en te chuan inhnemna tur a mamawh a nih ka ring a, thil dang a kaih luh loh hram ka tum a ni. 

"Ka hel loh che hi. Tunah pawh i hmaah ka ţhut luau hi" ka ti a, ka nui lui nasa lutuk te chu a hrethiam vek ang. 

"Ka duh tak tak che ka tih tawh kha" a ti leh ţan tawh a, a beidawng miah lo ang ka tih reng kha.

"Nang leh kei chu eng ti kawng zawng mahin a rem thei lo, kan dinhmun i hre vek a, nu kan inţawm chhung chu unau kan ni. I duh ang hian awm chiah ila chu kan mualpho viau ang. Sawi sep kan kai ang a, nuihzat kan hlawh bawk ang" ka ti a, mi min ngaihdan tur ka dâwn kim hle a, chu chu thuhran, kan chenpuite ngat phei chu...ngaihtuah ngam chi pawh a ni lo. 

"Sawisel leh nuihzat chu hmangaihna aiin a ropui zawk em?" ti a min zawh let khauh takah chuan dar ka lo kân ak a, a ropui zawk loh zia ka hria a, ka sawichhuak ngam si lo a ni. 

"Nih leh sawisel leh nuihzatna aiin hmangaihna i dah tlawm zawk tihna a ni em?" a ti leh a, lu ka thing a, chhanna ka ka pe thei chuang lo. 

"Min hmangaih niin i hria em ni?" nuih hak pahin ka zawt let ta zawk a, "Mi kan va duh hian kan hmangaih tihna a ni hleinem" ka ti tel hram a. 

"Chu chu ka hre ve..mi hmangaih tur hian hun tam a ngai lo tih pawh ka hria" a tih chuan ka lo thaw hak ringawt a, luhlul min ti ve ringawt a, kei aiin a luhlul daih zawk chu a nih hi. 

"Ka pa i ngaih vanga min mamawh thar riau i ni em?" ka tih chuan atthlak tih hmel zetin a lo nui chhuak ta hawk a, "Ka pa vang a ni lo. Ngaih chu ka ngai ngei alawm. Mahse ka pa vanga beisei thar leh che ka ni lo. Ka rilru put hmang chu hman ang reng kha a la ni. Hunin a ti danglam ve thei lovang" a ti nghet churh a, diktak chuan ka hlau a ni. Hlauh ka ngah lutuk hi ka hlauh ber pawh ka sawi chhuak thei lo hial zawk. 

"I hlauhna kha dah bo rawh" ka ngaihtuahna hria ni awm tak a a tih chuan phawk hra hian ka lo en a, "I hnaih a ka awmin i danglam ziah a, chu chu nangpawn i hai lo. I pawm duh lo mai mai zawk a ni" inringtawk tak hian a ti leh a. 

A awm loh lai khan ka ngai a, rilru a luah hnehin a châm zui veng veng a, ka ngaihtuah nasa ţhin tih chu phat rual a ni lo alawm, mahse...mahse tih a ngaih tawh chuan fel lo a awm tihna a ni ţhin. 

CONT...