KA HRINGNUN THAWNTHU-11

KA HRINGNUN THAWNTHU-11

"Ka ngaihtuah reng ţhin che, chu ti ang chuan nangpawn i ti ve ţhin" a tih chuan mak ti rilru deuh chung hian ka en a, a la inrintawk hmel takzet a, min lo chik ţhin viau aniang. 

"A theih loh ka tih tawh kha. Unau kan nih hi" ka ti nawn leh a, ka sawi zing tawh a, ka la sawi fo ka ring bawk. 

"Thisen inzawmna kan nei lo" a ti hmuk a, hei pawh hi min chhan ziah dan a nia. A nin tawh hmel viau bawk. 

"Unau kan nihna hi engmahin a ti danglam thei lo" ka tih chuan "Thisen zawm kan nih lohna leh kan induh tawn na hian a ti danglam. I pha thei lo ang, min duh ve alawm" ka mit a min rawn en laia a mitmeng te chu a ril deuh ruih hian ka hria a, thinlung hian dimdawih tu leh ngaihsak tu chu a hre teh meuh mai, dinhmun chhiat ber lai pawh a min hnaih tlat ţhin tu phei chu a hre lehzual, kan chhiat leh ţha hriatna hmanga hnaih chi a ni lo tih kan hriat te pawh hi thinlung hian a hnaih lui tlat ţhin si a,  mahse....hei tunah pawh mah se tih a ngai leh tawh a nih hi. 

"Nang leh kei hian danglamna kan thlen thei. Hnaih thiang lo chu ni la ka umzui duan duan reng lovang che" a ti a, a kut a inbeng khalhin hahdam hmel deuhin a ţhu awn deuh diai a, min hmuh vawikhatna ni awm tak a min melhna te chuan min ti zam chhe lo chauh a ni. Ka thinphu lah chu a rang em em a, thil thiang ni a ka ngaih loh hi a ni chuan thiangah a ngai tlat si a ni. 

Ka hmui ro lutuk ka liah huh zauh hnuah "Nuthlawi a min siam tu hi mipa a ni a, mipa zawng zawng hi Sangzuala ang vek an ni chu ka ti lo, mahse mipa zawng zawng min hlauh tir tu a ni. Mipaah rinna ka nghat ngam tawh lova, an ze ţha lo lai an thup thiam zia a lanchhuah hnua an tawrhlelhawm zia chiang tak a hre tawh tu ka ni" ka ti a, za lo zetin a lo ţhen sak a, ka lungphu inthum rawn tluk tluk chu a hriat ka hlau khawp mai.  

"A zia lo hle mai" a ti ta daih a, phawk deuh a ka lo en lai chuan "Hlauhna ka siam sak loh che a min rinna i neih bawk chuan mipa zawng zawng i tih ho ai chuan ka danglam tihna a ni ang" a ti leh a, ţhut ţhat pahin khum a towel leh thawmhnaw chu a en vut a, "In bual rawh" tih leh thawh a rual a, min chhuahsan rual chuan ka thaw chhuak ve hak a, a thusawi zawh chiah kha ka hrechiang viau a ni. 

Ka hlau lo tih ka inhria, hlauh a hnehin ka thlamuanpui em em zawk a, in a a awm lai a nih chuan Neihkimi pawhin min ti zamchhe lutuk ngai ta bik lo. Ka rin zia ka hre bawk a, U Remremi a enkawl dan leh ka nu, a nuhrawn a en dan hian ring lo thei loin min siam a ni. 

Hmangaihsanga a sawm chhuah zawh loh avangin Malsawmi zawk chuan chaw a rawn ei a, mipa hming sawi lang si lovin inneih chungchang sawiin a phul hlut reng a, Neihkimin a lo sawi pui peih viau bawk. 

"Ka pasal neih ni a hak turin a hranpa liau liauin  gown ka ţhui tir ang a, tuma la hak ve ngai loh chiin designer ţha ber ka design tir bawk ang a" a ti siam siam a, Hmangaihsanga chuan a ning ta deuh nge "Pasal i nei dawn em ni?" a ti deuh sup a, Ruattei a lo nui ve hak bawk a. 

"Malsawmi hi chuan midang a neih ka phal teuh lo, Pa Saia lah pa ang chiah a kan en a nia" Neihkimin a tih chuan "In pahnih a in inneih mai a ngai a nih chu. Mizo ah pawh anpui nei an tam ve tawh khawp hi" chimawm zet hian a lo ti leh a,  Neihkimi leh Malsawmi te an meng rang nasa mai. 

Hna ah pawh ka kal veleh ţan tawh a, Rb-a nen kan inhmu ngunin nunhlui kan sawi bang thei lo a ni ber a, kan school kal ve lai chanchin sawiin kan hlim ve viau zel. Casualty ah a awm deuh chawt a, hunawl a neih chuan kan duty na lam a rawn thleng phei vat zel. 

Lehkha pawimawh ka tih fel zawh a ka hawichhuah chuan kan ţhutna lam panin Hmangaihsanga a lo kal phei ve mek a, Pu Saia nen an ni a, ka lo en reng avang chuan min kal pelh pahin min nuih deuh suk a, inbe miah lo mah ila Zonunin a lo hmu ve chat tho aniang "In han in nuih vel a, i haw hran lo mawle..i pawm duh lo mai mai a ni" a ti a, hei pawh hi Hmangaihsanga ang mai.

"I duh duh lo sawi ve ziah suh" ka ti hlak a, ţawng vin viau mah ila ka thin a rim chuang hauh lo mawle. 

"Duh duh sawi theihna dan ka nei alawm. I duh ve deuh a nih kha, Hmangaihsanga i hmuh tawh chuan i mitmeng a de nghal sar zel, hmuh hrehawm i ti miah lo" a tih zat zat chuan "I ţawngthei lutuk aw" nui chung hian ka ti a, min lo en uluk reuh zek lehnghal. 

"Ţawngthei rual ka nih ve tawh hi mawle. I fapa ang rual lekah min ngai em ni? Min biak apianga 'a ba baa' ka lo tih zel chuan nuam i ti hauh lo ang aw" a ti kha kha a, "Sawi tawh lo teh..hmangaihna leh a kaihhnawih tih angreng vel hi chu tlanchhiatsan zel ka duh tawh" ka ti hlak hlak a.

Ka duhna chu ngaihnep hmel fein "Tlanchhiatsan kan tum meuh chuan min hnaih tawh viau zel a nia aw. Ruihhlo te pawh kan hnaih a a awm vang a nia tlanchhiatsan kan tum ţhin. Misual te lah chuti bawk. Nangpawn i hnaih ve viau tawh a nih chu" min ti a, chhan khan lah hi a hre ve angreng bawk sia. 

"Hmangaih neih duah chu a zahthlak e a" ka tih chuan "E...zak suh zak suh...hmangaih pakhat chauh neiin a fam ta tih tur hi an vang pharh ang" a lo ti deuh hluai a, kan duty na hmun rawn kal tlang tu a hmelhriat ţha deuh te chu a lo fiam pah zawr zawr bawk a, engthawl ve tak chu a ni. 

"Tak tak a Zote, hmangaih pakhat chiah neih tum kher tur tihna a ni hleinem. A rual a hmangaih neih ţeuh chu thil theih loh a nia, khatiang kha chu hmangaihna a ni lo. Mahse, hmangaih i lo nei tawh ţhin a, kha i hmangaih nen khan eng emaw vanga inţhenin in inhmangaih ţhinna te kha a ral ve riai riai a, midang i han tawng leh a, i lo hmangaih tawh ţhin, engtikahmah i ta ni tawh lo tur avang khan i hmangaih theih loh i ring nghal ringawt a, i vanduai takzet a ni. Hnah hlui an ţil a, hnah thar an lo chawr no leh a an tih ţhin kha. Hmangaih nei leh thei hauh lo tur a kan in ngaih tawh hnuah pawh hian hmangaihna hi a lo piang leh thei a nia" a ti dam thlap a, a thutak phian lehnghal a.

"Ka englai ber hi nge a duh ang le? An in a ka luh hlim phei kha chuan ka chhe awm reuh sia" ka ti sar sar a, midang hnenah phei chuan ka sawi chhuak ngam hauh lo ang. Ka sawi chhuah ngam ve berna lah hian min nuih nasa mai. 

"I hmelchhe hleinem...chubakah mipa hi hmel a buai lo chi an tam ve a, khawngaihna hi hmangaihnain a thlak thleng ve thei tho bawk a, chuan nunhlui in lo nei dun tawh te pawh aniang" a tih chuan ka nam deuh sawk a, "Kan in upat hleih ve reuh em hi, khaw hran daihah ka awm bawk sia, nunhlui neih dun tawh ngaihna a awm lo e" ka lo ti nang nang a. 

"I hmelchhe lo tak tak alawm. I landan chiahin a hip chuan lawm lo zawk rawh. Hmel leh landan mai mai chu engmah a ni lo, duh chhan riau che a nei dawn tih ka chiang. Mipa leh hmeichhia nitin a inhmu ţhin ta na na na chu inhip tawnna a awm ve te pawh a ni mahna le" a ti a, ka rilru a buai ru riau mai. Ka ngaihven ve tak tak niin ka hre tlat a, hmuh phak a a awm chuan ka thla a muang a, a kal bo lahin ka khua a har a, keimah leh keimah ka indem a, mi phei chuan min dem nasa lehzual viau ang. 

"In pa hlui khan nupui a ru i ti em ni kha?" a ti leh daih a, "Ru e...an la inkawl ve ranin ka hria" ngaih pawimawh loh hmel tak hian ka ti a, nau an pai tawh hial maithei a ni. 

"Eng mi nge?" a tih chuan "Chutiangin ka hrechiang lutuk bik lo. Hna a la nei lova, inkhawm naah ka hmu veleh zeuh ţhin tih lohah chuan a hranpain kan inhmu ngai lo" ka tih chuan "Haha" a ti deuh hluai a, ring tak mai a a rawn nui thut chuan min ti phu zawk thei hial a ni. 

"Vak vak a che" tih pah a nur deuh nang a ka en chuan "In inneih ţhat hleih dawn vel lutuk. Nang chu doctor laiin a ngaizawng che a, Hmangaihsanga hi duh hmak rawh. I hmuh veleh ban phar duai chungin 'ka inpumpek e' lo ti ang che. Sangzuala aia ţha nei la, an hmusit ngam tawh miah lo ang che" a ti a, ka va ti awm kher lo e aw. 

An rawn let leh chiah chu tih tur em em nei si lovin lehkha ka khawih kual a, dak chhuak hman miah lova buaiah min ngai rawh se. 

"I va buai awm ve" a rawn ti dam thlup a, ka dah chhuah rual a a mitmeng nalh zet ka hmuh chuan tlemin ka zam ve deuh a, tleirawl ang maiin alawm maw ka awm le..ka fak ve ziah lehnghal. 

"Buai a ni mai ang chu" ka tih chuan "Nichin lawk kha chuan i hawi vual vual sia" a ti deuh kher a, pawn lam aţangin min lo hmu vek tawh tihna a ni mai. 

"Ka ring a kham ve ţhin a, exer ka la lawk a nih kha" ka tih lai mek chuan Malsawmi haw turin min kalpel thei lehpek lo, Hmangaihsanga a awm ve bawk avang chuan a piah a din pahin inti neitu fein a banah a kuah zui zat a, a hawi sang leh hle tawh. 

"U Zote, ka pa nen chaw lo ei kan tum a, haw hma rawh aw" min rawn ti vel a, ka huatna a zual ve ta bawk a, ngawi mai mai tawh bik lovin "Ban hun pangaiah ka haw ang. Min ban hma tir thei a nih chuan thuhran a nia, i thei lo a nih chuan ka lo haw hun lo nghak ve mai rawh u. Ka rawngbawl kher in duh ţhin bawk sia, in tui tih zawng tak ka siam thiam bik aniang" ka tih lai chuan ka nui pah sang a, haw ngawih ngawih mah ila ka awki ka san duh hauh lo. 

"U Neihkimi ka han dil sak dawn che em ni?" a tih chuan "Hmangaihsanga kha dil la" ka lo ti a, engtik laiin nge ka ţawng chhuah hman ka hre bik lo. Thil ţullo tak ka sawi chhuak tih ka inhriat chhuah chuan a tlai tawh lutuk, an hre vek hman tawh. Hmangaihsanga nuih a lo za viau a, Malsawmi erawh chuan min melh tur nasa khawp mai. 

Haw tum a ka insiam malh malh laiin Neihkimin min rawn ko ve ngei a, a office lam chu pan lawk lovin Zonuni ka en hmasa a, kei aiin a hlauhthawn hmel daih zawk a, "Ka lo ţawngţaipui ang che" a ti ta ringawt a, Neihkimi min ngaihtheih loh zia a hre ve miau a ni. 

A office chhung chu a dai diai a, dawhkanah lehkha pawimawh hmel tak tak a awm nual a, pen bawm nalh angreng takah chuan pen a inthiat far bawk. 

"Engtik thleng nge kan in a awm in tum?" peh hel lem lovin a sawi duh ang a lo sawi nghal a, hlauhna in min luh chilh rang hle nghe nghe a ni. 

"Ka la hre chiah lo...pawisa ka khawl ve mek a, kan awm rei tawh lo ang" ka ti a, ka ţah a chhuak ringawt nia mawle!

"Pasal te ber an boral tawh chuan hmeichhia hian an pasalte in an chhuahsan ţhin niin ka hria a, i nu hian kan in a chhuahsan hun tur a sawi tawh em?" min en ran chung hian a ti leh a, chu erawh chuan min barakhaih khawp mai. Keichu chhuak mah ila ka nu chu an hnen a an chen tir ve reng ka rin vang a ni. 

"Ka bulah tak chuan a sawi lo a, engtia awm nge a tum ka la hre lo. Ka pa chu lo boral tawh pawh nise ka nu chu in nu a ni ve tawh tho a" ka tih chuan "Huh..chu chu i ngaihdan maw?" a ti a, min nuihsawh vel na te chuan hniam bikah min in ngaih tir a, natna leh zahna te pawh a inpawlh nawk awm e.

"Nu pakhat chiah kan nei a, i nu leh ka pa ten na tak a an siam hnuah a boral. I nu hi nu atan ka pawm ve reng reng hleinem. In hi Remremi hming a awm a ni bawk a, i nu chuan pawisa tlemte bak chan a nei ve lovang. Diktak chuan ka pa khan Remremi awm tur a a neih a ni ber zawk a" min tih khum salh salh a, "In i chhuahsan rualin hna aţanga banna rawn theh lut bawk la" a tih leh phei chuan thaw a pik duh takzet a, ka awm a tawt a, thawk thlengin a harsa vek tawh. 

"Ka chhuak ang a, ka nu chu in hnenah awm rawh se. Nikum aţang tawh khan damlohna a nei a nih ringin ka hlauhthawn rukna hi a in ţan tawh a, a taksa tlak chak dan en phei chuan hnathawk thei chi a ni tawh bawk si lo, nu angin ngai lo mahla a taksa a hahdam deuh theih nan awmpui hram rawh u" nghenngawl deuh tak hian ka ti a, hahdam hmel zetin a ţhu a, ka thusawi chuan a englai mah a khawih pha lo tih a hriat khawp mai. 

"Natna a neih phei chuan chhuahpui ngei ngei zawk rawh. A fanu i nia, nangman i enkawl ve tawh ang chu le. Ka nu thinlung hliam tu hi chenpui reng ka chak love. A damlo bawihsawm ngat phei chu ka peih lo lehzual. Pawisa ka pe che u ang a, min chhuahsan tawh zawk rawh u" a ti a, luhlul leh tawh khirh zet mai a nia, rilru a thlak mawh khawp ang. 

"Hospital a thawh zui i phal chuan ka chhuahpui ang. A nih loh chuan ka chhuak thei rih lovang. Ka nu leh ka fapa enkawl nan pawisa a ngai" ka ti ve ta hmak a, ka nu leh Bawiha te kut dawh pui ai chuan zakthei lo nih ka duh zawk. 

"I qualification in a tlin hleinem. Ka pa ka hnial hreh avang chauh a pawm ve ka ni. Ka en liam lui che a, chu ti ang chuan ka ti reng thei bik lovang" a ti a, ngatinge lungngaihna hian min tlak buak reng bik le. 

"Malsawmi leh kan cousin te mit ti kham khawpin Hmangaihsanga nen in awm dun a, nangmah vang hian nupui nei turin kan nawr nasat phah bawk a, ani lahin thinrim nan tak a hmang a, i thlavang a hauh lutuk avangin i tihsual ngei ngeiah pawh kan hau ngam lo che. Kan hauh che chuan amah hau ang vel kan ni. Kan hnen a i chen ve reng chuan unau kan inhmu sakhi mai dawn a sin" a tih chuan "Nuţa ang bakin ka en lo" ka ti vat a, hmusit tih hriat tak a min han en vel te chu tawrh liam mai har tak a ni. Ka dinhmunin zir se chu ka ngawihsan mai mai bik lo ang. 

"Hmeichhia ve tho ka nih hi. Ka nuţapa hi nang aiin ka hrechiang bawk. I hnaih a a awm chang apianga i danglamna hi hmu thiam lo turah min ngai suh. Hmangaihsanga hi inţhup thiam miah lo chi a nia, a ngaihsakna che a tih lan dan hi ka hmu thiam vek bawk. Chuvang chuan in thlen thui hmain in nufa za hian min chhuahsan rawh u" a ti chang rât a, tun ang hun hi chu a lo la thleng dawn tih ka hria a, mahse ka riin aiin a lo thleng hma. Ka nu a sawi tel ve lehnghal. 

"Engmah a thleng lovang" nghet charh a ka tih chuan "Awmtei i hria em?" min lo ti a. "Ka hre lo" ti a ka chhan hnuah pawh "I nu emaw i pa lamah Awmtei tih hming pu an awm em?" a ti nawn leh a, lu ka thing mawl ta tawp ringawt a. 

"Sawi tawh ang khan kan hnen a cheng ve reng tur in ni lova, ka pa ber a boral tawh chuan i nu pawh chhuak ngei ngei tur a ni. Lo sawi dun ula, a rang lamin in thutlukna min rawn hrilh ang che" a tih chuan chhang buai duh lovin ka ding a, ka inher zet tawh hnuah "Lawkin" a rawn ti leh a, muangchangin ka lehhawi a, "Hmangaihsanga hrilh hauh suh. Dan che a tum ngei dawn a, inchhunga buaina a thlen ka duh lo. A rukin i nu chauh hrilh ang che" a ti leh hram a. 

Neihkimi office aţanga ka chhuak tur chu Hmangaihsanga nen kan intawk a, kan insu chawrh a ni mah zawk. Min kalpel mai dawn emaw ka tih laiin ka banrek a hmer a, dim vak lo in office chhungah chuan min pawt let leh a. 

Neihkimi dawhkan lam a min pen phei pui pâwk pâwk pah chuan "Eng thil teh hrep nge i tih i hria em?" a ti vin khur khur a, sawi lo mah se kan inbiakna a lo hre ru reng tih ka hria a, pawi ka ti takzet a ni. 

"Haw a hun tawh khawp mai" a sana bunlai bih pah a Neihkimi din uaih tawh hnuah pawh "Hrep che hian..i duh duh ti theiah i in ngai tawh em ni a?" a ti leh tuarh a, keimah vang vek a thleng ah a ngai leh dawn a, Neihkimi hmel chu hmu duh lovin Hmangaihsangan min thlah rual chuan hnuai lam ka bih ta daih a. 

"In ah kan sawi dawn nia" a ti dam thlap a, chhuatah eng emaw a tla ri bur thung a, "I thuhnuaia kun kan ni lo tih hria ang che. I dinhmun a ţhat vang maiin i mihring puite thunun tum suh. I thiamna i chapo pui chhung chu râwn tlak i ni lovang, lehkhathiam mawl an la ti mai ang che. He hospital hi zankhat thil thu a chhe rup thei a nih hi. Chapo pui tham engmah neih i nei bik lo" a la ti khur khur a, a awki aţang ringawt pawhin a thinrimzia a hriattheih a ni. 

"Duh tawk tawh rawh. I u ka nih hi, ţha ka tih ang chu sawisel lovin zawm mai rawh. Kha nu vang khan kan buai ngun tawh, ka kham tawh khawp mai" a ti ve ta hmak a. 

"I kham takzet a nih chuan inrawlh lo mai rawh" a ti deuh hrawk a, "Ka pa thuchah ţhin che kha hrereng ang che" Neihkimin a tih rual chuan ka hawi chhuak ve vat a, bag ah phone leh charger vel a khung hmawk hmawk a, Hmangaihsanga thinrim lah chu a meng sen deuh rum hian ka hria a, a bek pawng ţalh ţalh khawp a a insehruh te chu Neihkimi chuan a ngai pawimawh ve tawh lo. Hmu lo ang hmak a awmin a thil tih lai a chhunzawm mawlh mawlh a, hmeichhe tawrhhlelhawm ve tak chu a ni. Lainatna leh khawngaihna pawh a nei ve lo. 

"Ka awm chhung chuan an chhuak lovang" a tih leh nghut hnuah Hmangaihsanga chuan ka banrek bawk a rawn hmerin min kai chhuak dawr dawr a, Neihkimi office kan chhuahsan hnu pawh a min la chelh tlat avang chuan "Min thlah tawh rawh" ka ti a, a hre lo der hmak. A hmel a dur khup a, a lungawi lo hle tih chu en mai pawhin a hriat theih a ni. 

Counter kan pawh rual rualin Zonuni chu a lo ding nghal uaih a, min ngaihtuah hmel khawp mai. 

"I hawn tur la khawm rawh" Hmangaihsanga chuan a la ti deuh hmuk a, Zonuni ka melh zawk a, min lo en ve mang lovin kawng min lo kian thuai thuai zawk a. 

Bag leh phone ka lak hnuah counter aţang chuan ka chhuak leh a, ka ban rek a lo hmer leh nghal hmiah a, staff ţhenkhat te leh hospital lobby a la awm ve te hmuh lai chuan min kai dawr dawr a, ka kut chu lak let tumin ţan han khawh ve mah ila tha kan in ngah hleih lutuk tlat a ni. Min kai kal dat dat a, kan haw rual chang apianga ka lo nghahna ţhin kan thlen hnuah min din pui ve chauh a, ka kut ka phih thla rang khawp mai. 

"Engatinge i rawn inrawlh? Neihkimi khan keimah vanga buaina thlengah a ngai leh ang a, min haw zual sauh dawn a sin. Khatiang te kha chu min tawrh tir ve mai mai ta che" ka ti vin hlak hlak a, ka ţawng chhung zawng chuan ka lak aţangin a mit a la sawn eih lo. 

"I rualin ka haw dawn lo" tih leh inher ka rual a, thui pawh ka kal hmain ka dar a rawn hmer a, a na kher mai. Hneh zet a min kuai herin "Ka umzui dawn tho tho che a, en nawm siam i duh loh chuan tah hian lo ding reng rawh" thupe aw tak hian a ti a, car lak tumin min kalsan zui nghal a. 

Mamawh ni takin taxi vei vak lah chu a vang hrep lehnghal a, ka hmuh hmasak ber ka lo phar ding nghal ang ka tih rilruk lai takin ka zawnah Hmangaihsanga car a rawn ding a, a tih ziah danin chhung lam aţangin passenger side lam zawk chu a rawn hawng leh a, "Lo lut vat teh. A nih loh chuan tharum ka hmang dawn a nia" rum deuh taka a tih chuan ka ţhu lut ta thuai a, "Zuan chhuah i tum chuan tlaivar ţhakin ka tlan kual pui ang che" a ti a, chu thil a sawi chu a nuih a zat hmel viau tawh a ni. 

Ngam leh ngam lovin a lam ka hawi a, a hmel landan chu tlemin a dam ta deuh a, Neihkimi thusawi khan min la vilh ngut ngut a, "Engtin nge khalai hmunah khan ka awm tih i hriat?" ka ti a, sawichhuah ka duh hauh lo na a ka insum thei ta bik lo a ni. 

"Zonuni" a ti bul hmuk a, "Mi thusawi ngaihthlak ruk ching ka ni hran lo. Kawngkhar in khar phui lo a, Neihkimi a ţawng ring bawk" tiin a insawifiah zui a.

"Nidangah khatiang thil kha i hmu leh a nih pawhin min pui kher tawh suh. Mahni a tuar thei lo rual ka ni tawh lo va, ţanpui ka ngai reng bik lo a nia" ka tih chuan "Ka hmu fuh kher lo che u a nih pawhin min hrilh hre ve ziah zawk rawh" a lo ti thung a, ka thusawi chu zawm a tum loh hmel khawp mai. 

"Ka nu ka sawipui ang a" ka tih rual chuan "Khawiah mah in kal lovang" a ti nghut a, sawi pawh min sawi zawh tir thei lo. 

Beidawng zet hian "Hmangaihsang" ka ti a, a hming ka lam na a sawi zawm tur ka hre leh chuang hauh lo a, buaina hian min veh reng ni berin ka hria. 

Jam a kan din lai chuan ka kut a rawn vuan a, ka lo inhum ruh nasa a ni tih ka hre chiah. Ka phalna la lovin min kuah fo a, na takin min hmer zo chiah bawk a, mahse tun ang a dim hian ka kut a la vuan ngai lo. A kut phah hlai hlup a ka kut vuan reng chung chuan min thlamuan tum ni awm takin a kutzungpui chu muangchangin a ti che a, "Engatinge min duh tlat?" ka ti a, amah pawh en ngam lovin pawn lam ka en daih a. 

"Ka nu min hriatchhuah tir ţhin" a ti teh daih a, za lo deuh a ka lo nuih lai chuan "Duh nachhan che ka nei lo" a ti leh a, chu erawh mak ka ti ve ta deuh. 

"Chhan awm lovin min duh maw?" ka ti hluai a, amah ka la en duh chuang lo. 

"Aw...a chhan sawi tur ka hre lo" pangai deuh a min chhang thei te chuan mak min tih tir lehzual a, kan dinhmun inthlau lutuk te hi engahmah a ngai ve lo em mawni le. 

"I mak hle mai" nui lui chung a ka tih chuan "Ka khawngaih che a, rilru ah i awm reng phah a, ka nu zia ang chiah i nei bawk. Thil dang chu ka hre lo" a ti mauh mai a, a nu nen a an inzawmna ka hre lova, chuti chung chuan a nu vang maia min duh ni a a insawina chu lungdam deuh a lo pawm sak hmak a har khawp mai. A chhuanlam mai mai a nih ka ring ber. 

"Min ring ang che" a ti leh tawp a, a aw ringawt pawh chuan keimahah hna a thawk niin ka hre tawh a, ka ring tlat mai leh ka thlamuanpui ber a ni tlat te hi ka duh lova, ka inthunun thei si lo a ni. 

"Keimah ngei pawh ka inrin zawh tawh loh laiin engtin nge ring tur che a min beisei theih?" tiin ka nui hul deuh hak a, min rawn melh zawk a, bing deuhin hmalam a en lehnghal a. 

"Nangmah i inrin zawh loh lek phei chuan rinchhan tur ban i mamawh a nih chu" a lo ti hluk a, buaina in a chim châng pawh a nghing ve mai thei lo angin a lang a, mahse, keichuan min ti nghing lawih lawih thei khawp a buaina nasa ka nei ziah a, min hnaih lui zel anih chuan a nghing ve fo tawh dawn. Chu chu ka hmu tlang vek a, a hmu ve duh si lo a ni. 

Malsawmi te pafa an lo awm reng tawh a, ka nu'n Bawiha pawm chungin min lo lawm a, a vun dâng lap mai ka hmuh te chuan ka khawngaihna a zual a, kum tam tak hrehawm a lo tuar tawh a, kut ruaka an chhuah tir phei chuan hun harsa a hmachhawn leh dawn tihna a nia nga, Neihkimi thusawi kha ka hrilh hreh takzet a ni. 

"Nu, lo chho lawk teh" midang hriat ve loh tur a ka tih chuan min zui ve mai a, pindan chhung a ka luhpui hnuah kawngkhar chu ka kalh a, hreh viau mah ila a ruk a ro kan rel a ngai a ni. 

Neihkimi thusawi ka hrilh chhawng chiah chu a ngui nghal hle a, a mal chunga a kut dah te chu a khur ti tih der mai. 

"In luah tur zawng ru deuh ila a ţhat ka ring. Hna aţanga ban loh theih dan ka ngaihtuah ang a, thawh zel an phal phawt chuan in hi kan chhuahsan vat dawn nia" ka tih chuan "Neihkimi chuan chhuak turin min duh maw?" a ti chuai raih a, a melh ngai a melh tlawk tlawk a, mit a khap pawhin ka hre lo. 

"Aw ti e...engtik niah emaw chuan in hi kan chhuahsan a la ngai dawn tho a, chu chu ka rawn awm tirh aţanga ka tum dan pawh ka ni. Pawisa khawl tlem ka nei a, Neihkimi pawn kutbeng chuan a chhuah tir lovang che, ka pa khan i tan eng emaw a hnutchhiah ve maithei bawk a kan awm ve thei em em ang. Lungngai lutuk duh suh" ka ti a, tun dinhmunah chuan keimah zawkin ka nu ka hnem a ngai a ni. 

"A rapthlak takzet a ni. Remremi ka buaipui nasain ka awm deuh chawt reng a, min thinrim khum châng lahin ţawngkam khat pawn ka chhang let ngai lo. I pa khan a fate a hlau a, a fate tih lungawi loh leh hi a thil hlauh ber a ni tawh. Nangpawh Bawiha vang a khawngaih chauh che a ni a, Remremi ka buaipui nasat zia hriain nang lo tuam hlawm che kha chu a tih turah a dah bawk. Neihkimi leh i pa an ti ti dun tak rengah kha chuan i pa pawn ukil a hmu ta fo a, kha thil a thlen hnu kha chuan a fate a hnial ngam mang tawh dawn lo tih ka hria a ni" a ti dap dap a, a thaw zui deuh halh a, keiai mahin hrehawm a tih hmel zawk. 

"Eng nge kha thil i tih chu?" ka lo ti ve thung a, tim daiin min en a, a hmel pha dai chuan thil ţha a ni lo tih min hriattir a, Ruattei thusawi kha lo dik vek a nih dawn hi. 

"Nakinah ka la hrilh dawn che nia" tih leh thawh a rual a, chhuah nghal mai a tum chu umzuiin, "Nu, Pu Saia te pafa khuan chaw rawn ei an tum hmel sia, i awmdanah engmah lantir suh aw. Ka hrilh che an ring vek dawn tho a, mahse ka thusawiin a nghawng lo che angin awm tlat rawh, Pu Saia te awm chhung chauh a ni mai" ka ti a, ngah nge maw Pu Saia te pawh chu ka ngaih mawh tak em em ni?

"Pu Saia te awm loh hnuah pawh a lang lovang. Ka thiam zawng alawm" a ti mai a, ka thaw huai thei mai. 

Kailawn aţangin Malsawmi ţawng lang lang ri chu ka hre nghal phat a, inneih chungchang bawk a sawi. Sitting room-ah an lo ţhu khawm deuh ţhap a, Hmangaihsanga ka zawng ru nghal a, hmuh tur a awm ve lo. 

"U Zote, chhuah in tum hnai niin ka hria a" min hmuh phat aţangin a lo ti nghal a, Pu Saia chuan zahzelah a piah a chanchinbu chu lain a hlam duai a, a fanu chu khap a tum tawh lo niin a lang. 

"Kan chhuak vat ang" ka ti liam puat a, Malsawmi hmuh lai chuan pangai thei ang ber a lan ka tum tlat a ni. 

"Kan lo inhmelhriat ve ting tang tawh sia, kan inneih dawnah chuan sawmna ka rawn pe ve tho ang che" a ti a, zak hmel a pu miah lo. Zam lo ve haih haih tak chu a ni. 

"Pasal nei tur angin insawi ziah teh suh. Midang neih i tum a nih chuan thuhran a nia, Hmangaihsanga neih i tum a nih ngat phei chuan zahna i insiam mai mai a ni" tiin Ruattein a lo khap a, a bul a ka ţhut ve lai tak a ni nghe nghe. Siampuii pawh a awm ve a, Malsawmi ten rawngbawl turin min duh viau mah se rawng a lo bawl zo vek tawh a. Kalna tur dang ka hre bik lo a ni.

"Nang lah hi a" Neihkimin a tih laiin Zamtei chuan "Hmangaihsanga hi nupui nei turin duh viau mah ila amah berin a duh loh chuan kan ti lui thei awm lo e. Pa Sai, nang chuan i hmu thiam tiraw? Chhungkaw innghirngho ai chuan nawr lui lo mai ula ka va ti e, keichu ka nu leh pa te thlarau an zahawm ka ti" a lo ti ve niah niah a, Neihkimi a melh ralh a, a hlauh hmel khawp mai. 

"Dikchiah..bakah nupui pasal chu kan duhzawng tak ngei kan nei tur a nia lawm. Ka nu kha la dam ni sela chuan eng buaina mah a awm lovang. Tumah a nawr lui ve ngai lova, kan inchhungah tupawh rawn tlu lut se ţha deuhin a lo dawngsawng vek zel a, Neihkimi hi tu nge i chhun pawh ka hre lo" Ruattei chuan a lo ti hluai a, Pu Saia chuan fiamthu a laksakin a nui huah huah a, "In unau han in hnial tak tak hi chu a ngaihnawm ţhin ngawt mai, in in ngamtlak si a" a ti daih lehnghal a, Ruattei ner nang nang chu a hmu lo a nih hmel e. 

"Chaw kan ei tawh mai dawn em ni Pu Sai? In ril a lo ţam ru viau tawh ang ka ring" ka nu chuan a ti fiamthu a, Hmangaihsanga pawh a rawn chhuk ve chiah alawm. 

Ngawi rengin chaw kan ei mawlh mawlh a, Bawiha chauh lo chuan thawm kan chhuah lo. Boruak a uapin kap tu nei ran vek kan nih hmel a, sawi tur a vang duh khawp mai. 

Pu Saia chuan aw a thian kharh a, "Neihkimin a sawi reng si a, palai hmel kan va hmuh mai hmel ve Hmangaihsang" a ti dam thluam a, a nui zui huk huk a, fiamthu nge thutak hriat a har viau mai. 

"Innei se la" Hmangaihsanga chuan a lo ti leh a, Pu Saia hawi vual vual chu ka hmufuh chiang lutuk. 

"I hmanhmawh viau em? Malsawmi hi dan ang thlap a neih i tum em ni? Ka pa boralna a la rei lo a, kum tal vei se la" Neihkimi melh ran chung hian a ti a, a thutak run lehnghal a, Ruattei nen kan inmelh a, a hmui pet fan fan chungin hnuailam a bih ta daih a. 

Pu Saia lah chuan "Khaih..khaih..Hmangaihsang, khatiang zawng khan kan sawi lo a nia. I farnu te hian mo hmel hmuh an chak ve tawh a, chu chu kan sawi tum ber zawk a ni" a ti a, a mangang meng phar vel chu a khawngaihthlak zawk. 

"Pa Sai, ka pa lehkha chhiarna pindanah ka lo nghak ang che" tih leh thawh a rual a, a awmdan chuan min ti hlauthawng zek zek a, buaina nasa zawk a thlen tir ka hlau a ni. 

"Ţhu muang suar suar tawh suh aw. Hmangaihsanga khan min hmuh a duh sia, ka hmuh zawh veleh kan haw nghal ang" ti a Pu Saian Malsawmi a hrilh lai te chuan rilru a chiai takzet a, tumah lahin min hriatpui ve bawk si lo. Ka nu ka melh a, danglamna ka hmu ve lo. 

Neihkimi chu bawp khawkherhin hahdam takin a ţhu a, a ke a then hliau hliau a, a hmel hmuh a hrehawm viau thung. A mitmeng chu a thip ram reng a, min rawn melh chuan ka lo ip chawih ţhin. 

"Malsawm, nichin a U Zotei te chhuah an tum hnai ang a i sawi kha eng nge awmzia? U Zotei ngei pawh kha a bang bo viauin ka hria" tih pahin Ruattei chuan min rawn en a, Zamtei pawh a bang chuang lo. Hriatchian an chak hmel takzet a ni. 

"Ka ti mai mai a nih kha. U Zotei bulah chuan duh duh ka sawi vel mai mai zel alawm" a ti a, Ruattei chuan a thusawi chu a ring thlap niin ka hria, Malsawmi zia leh a ţawngtam ţhin zia hrechiang tu ber pawl a ni miau a ni. 

Pu Saia rawn chhuk chu nidang ang bawkin fiamthuin a phul leh hlut na a ţhu muang tawh lovin Malsawmi a hruai haw nghal a..

CONT...