KA HRINGNUN THAWNTHU-12

KA HRINGNUN THAWNTHU-12

Pu Saia te haw hnu a inchunga ka chhoh chuan ka pindan bulah Hmangaihsanga a lo awm leh reng tawh a, inhmuh reng ringawt pawh hi ţha ka ti lo; hnar harsa ka ti ve ţan tlat tawh a ni. 

"Lumum-a chu a va mutthlu nasa tawh ve" amah zawk chuan a lo ti a, naupang a ni miau a, chaw kan ei har ţum phei chuan chaw eikham chiah hian a muhil nghal mai zel. 

"Ka mut tir dawn reng alawm" ka tih chuan a lo nui hawk a, pindanah min zui lut nghal zat bawk. 

Bawiha ka muttir lai chuan khuma lo ţhuin ka mut fel tir veleh amah si chêtin min pawt ţhu ve a, a mitmeng pa taka min en reng chungin ka kut a la a, ka thinphu a rang leh tawh hle. 

"Ka hnar thei ta hram a nih kha" a ti a, thawk hak pahin amah chu ka en a, engpawh sawi ila ka thlak danglam thei chuang lovang. 

"An thinrim viau dawn a nih chu" ka ti hnual raih a, kan dinhmun khirh zia a hre ve tho a, hmangaihnain a hneh theih a ring tlat thung a ni. 

"I him ang" a ti nghet churh a, Neihkimi awm ve tawh naah chuan him theihna hmun tak tak a awm lo tih ka hrechiang viau thung. A fing a, engkim hi a duh dan vek a kalpui a tum ţhin. 

"Kal tawh zawk rawh" ka tih chuan a awm nghengin min kuah a, a pangti lum vang vang leh a lungphu dut dut ri te chu chiang takin ka hre thei a, midangin min tih nat hlau ni awm fahrana min kuah bet hlun mai te chu thlamuanthlak ka ti takzet a ni. 

Ka thil tawn zawng zawngte avang khan ka chau takzet a, hriat loh karin ka lo kuah let ve reng tawh chu niin, inthiam lo ru tak chungin ka en chho a, min lo nuih suk a, a hmel dam thlup chu hmuh a nuam kher mai. 

"A dik lo" tih pah a inlak hran ka tum chu min lo kuah nghet zual sauh a, a hming lam meuh a ka en chhoh leh chuan a hma ai mahin kan inhnaih zawk tih ka hre thei a ni. 

Ka hmui chu melhin a nui deuh a, min fawp mai ang tih ka lo hlau hman hle. A rawn kun hniam deuh a, a hnar leh ka hnar a insik thuak hnu phei chuan ka taksa a ţang nghal at a, ka hlauh rukna chu hria ni awm takin a hmui lum thar thar chuan ka chal zawk a rawn nawr zauh a, chu erawh ka sawisel hran lo. 

"Neihkimin a koh leh che chuan min hrilh tawh ang che" thupe aw tak hian a ti zui zat a, hnialin awmzia a nei dawn lo tih hriain ka ngawi a, hrilh kher ka tum lo thung. 

🐾🐾🐾🐾🐾🐾🐾🐾🐾🐾🐾🐾🐾🐾🐾🐾

Zinga Neihkimi tho hma ve chu mak ka ti ru viau a, mahse thil tih tum a lo neih vang zawk a ni. Insawizawi turin Hmangaihsanga a chhuak tawh a, chu chu remchangah lain ka nu nen ka pa lehkha chhiarna pindanah min ko a, a thin lah chu a rim hmel em em mai lehnghal. 

"Nangmah vangin Hmangaihsangan Pa Saia a lo ţawngkhum deuh a, a zahthlak khawp mai. A fanu neih a tum hauh loh thu leh inhnim hnaih a duh tawh lo thu thlengin a sawi a, nimin khan in haw rual tiraw? I fuihpawrh em ni?" min ti a, ka inrin hmain ka nui chhuak hak. Min ring chhe thei lutuk chu han natpui vak ngaihna pawh ka hre tawh lo. 

"Fuih pawrh rual a ni em ni?" ka ti let ve salh a, min melh rumin min haw takzet tih a hmel lan danah chuan a hmuh theih a ni. 

"Kalna tur dang in neih leh neih loh ka ngai pawimawh lo. I nu hian ka nu leh pa te inkar ti khi in an nun a tichhe vek a, ka nuţapa i tih chhiat ve hma hian min chhuahsan vat rawh u" sehchilh rap rap hian a ti a, chuti taka hmusit a ka nu a ţawngkhum duh chu ka thin a rim ve kher mai. 

"Keichu i duh duh danin min ti rawh ka tuar vek thei. Mahse ka nu hi khatiang khan ţawngkhum tawh suh. Ka pa nupui a nih chuan i nu a ni ve tihna a ni mai. I duh ang ngei chuan ka bang ang a, ka nu hi ka chhuahpui bawk ang. I hmuhsit mai mai turin ka awm tir reng phal bik lo" ka ti hmarh hmarh a, ka thutlukna siam chu ka la inchhir leh ngei ang; mahse min hmusit em a, kalsan vang vang duhna ka neih phah a ni. 

"A ţhat nasat chu. Ka pa khan i nu tan hian ro engmah a hnutchhiah lo. Min rinhlelh chuan ukil hmuin in zawt fiah thei ang. Pension lak tur a awm lova, hospital ah chan engmah in nei lo bawk. Mahse kutbengin ka chhuah tir lo ang che u. Mi in luaha in khawsak a ngaih hmel a, pawisa tlem a zawng chu ka pe ang che u" a ti a, thip ramin min melh a, retheih bik lutuk hi chu ka kham takzet a ni. 

"Hmangaihsanga hian ka nu leh pate ai pawn ka pu hi a ngai zawk a, a hmangaih zawk emaw tih tur a ni. Tar chak lo a nih tawh bakah tunah hian hritlangin a man leh tawh a, an khua a zin tura a rawn koh leh ngei a rinawm. Chu chu remchangah i hmang dawn nia. Pangai deuhin awm la, Ruattei leh Hmangaihsanga awm lai chuan chhuak suh ang che" min ti a, ka nu chu ka bulah a ding ngawi reng a, kei erawh ka inhumruh nasa ngang mai. Thinrimna hlirin ka khat a ni. 

He in chhuahsan hi ka tum rilruk reng mah nise ka hlawh a bei tham a, sumdawnna bulţanna tur takngial pawh ka la nei lo. Min hrethiam lo lutuk leh a chhia zawng zawnga min puh te, ka nu nen a min hmusit lutuk te chu ka tha a na tlat a ni. 

Ka nu chuan min tlan pelin bathroom ah a tlan lut a, kawngkhar pawh kalh hman lovin a luak nghal barh barh a, mangang zetin a hnungah ka lo chul hliau hliau a, a luak zo chu a chau hnawk ni maiin ka hria. Neihkimi kan hmuh laia a ngawih reng nachhan pawh kha hei vang hi a ni maithei. 

"Ulcer damdawi ka ei hian luak a ti chhuak ve ziah a, thlak tir a ngai a ni" a hmui hruk pah hian a ti a, ngaihţhat loh sa nak laiin a awmdan chuan ngaih a ti ţha lo lehzual alawm le. 

"In entir tur a ka hrilh mawlh mawlh che kha. Ka pa pawn a damlai khan a hrilh fo bawk che a" vin angreng taka ka tih chuan hmel pha daiin min en a, "In entir ka duh lo" a ti sep a, a thawmhnaw a chul mam thuak thuak hnuah min chhuahsan nghal daih bawk. 

Ka nu te pindan a kal ka tum lai takin Ruattein Bawiha min rawn pe a, "A tlei duh thlawt lo" tih pahin a biang a piai sak zauh a, min ngaihven zui tak lohah chuan Bawiha pawmin ka nute pindanah ka lut ru a. 

Bawm ka hawng kual dan dan a, damdawi ka hmu nual a, pantop te, antacid te pawh ka hmu. Mahse an khum bul drawer ah chuan mutthilhna damdawi ka hmu tel a, zolpidem 10mg lai mai a ni lehnghal a. Ka nu hian a rukin hrehawm a lo tuar nasa ang a, a muhil thei lo ţhin em ni dawn tih te ka ngaihtuah a, hetiang damdawi hi ei a chin na a rei tawh phei chuan taksa ţhat ngaihna a awm lo a ni. 

Kan pindan a let lehin Bawiha diaper ka thlak a, ka thaw ipik lutuk chu ka puak keh thei mai dawn ten ka hria. Inhnuai a ka chhuk ve hnuah pawh ka nu chu engmah thleng lo ang hmakin a awm a, taksa leh rilru na angin a awm duh lo hrim hrim. Ka nu luhlul zia ka hriat phah a ni. 

Chaw ei laiin Ruattei a ti ti siam siam a, zingkar a thil thleng kha hre ve miah lo mah se "Hospital ah thawk tawh lo la, ka dawrah lo thawk daih rawh. Ka zirtir vek dawn che alawm. I thiam hunah phei chuan tun ai hian pawisa i la lut hnem zawk ang" tiin min sawi hmuh a, Neihkimi ka melh zawk a, ani pawn min rawn en ve chiah. Ka sawi lo tih lantir nan midang hmuh ve loh turin lu ka thing a, a hahthlak takzet a ni. 

"Ka pu a damlo a" Hmangaihsangan a tih chuan Ruattei a lo chek tlak a, "Lokal rawh a ti leh che em?" a ti zui zat a. 

"Ti e..a rang lamin a ti" a tih chuan Ruattei zawkin a lo nin hmel hle. 

"Hna i nei tih an hrereng a, kan tan i pawimawh ve tho tih an hre bawk a, ka pu te pawh hi an ti ang lo e...damloh hlek a in koh ziah ringawt mai. Kan hospital ngei pawh nise chawlh reng bik te chu nuam lo deuh tur asin, chung te chu an hre ve reng awm sia. Kal duh lo chiah la chu ka nutei te zawng zawngin an rawn ankhum leh che ang a, an mak ve ngawt mai" a ti hlak hlak a, "Ngawi mai mai teh rilru dang i put tlat zel vang alawm an ngainat theih loh che" tiin Neihkimin a lo la khap vat zui a. 

"An ti mah mah ka ti mai a nih kha. Chhiahhlawh ang maiin Hmangaihsanga an ko kual reng a, ka pu a ngaihsak lo deuha an hriat leh an rawn vui luih luih a, in rilru a lo dik lo hlawm em a nih hi. Rilru dang ka pu thei hi ka lawm daih zawk" a ti a, a ep chiah a ţhu ka nu chuan a chaw ei lai chu helhin a irh fiak ak ak a, tui lak tuma ka tho tur chu Ruattein min thawh khalh a, kan nufa tan chuan a hlu takzet a ni. 

"Ka kal ang a, lo hruai thlak ka tum bawk ang. A duh lo a nih chuan ţul tawpah lo chuan ka kal tawh lovang" Hmangaihsanga chuan a ti ta nge nge a, a ti mai mai lo niin ka hria. 

"Ni e, thutak deuhin sawipui teh. Hetiang chuan i duhzawng tih ve na hun pawh i nei dawn hleinem" Ruattei bawk chuan a lo ti leh a, Zamtei chu Neihkimi thu thu a ni mai, ngaihdan hran a neih pawn a sawi chhuak ve ngam ngai lo. 

Ka insil fai zo bathroom aţanga ka chhuak chu Neihkimi rawn chho nen kan intawk fu chiah a, "Ruattei hi kawm tlem ang che" min ti leh ringawt tawh a, puppet ah min ngai ni berin ka hria. 

"Ka ţhian neihchhun a nih hi" ka tih chuan "A rilru i suk sak nasa lutuk a a dik tawh lo reng reng. I rawn awm ve aţang hian chhungkua a buai a, ka naute an danglam a, chhiatna min thlen zel hmain inthiarfihlim vat rawh. Kan chhungkaw miah inngai lo la, mihran i nihna hi hrereng ang che" a ti duah a, chhang let lo turin ka insum nasa khawp mai. A naute ka fuih pawrh lo hrim hrim a, thiamna ngei ngeiah hi chuan ngawih mai mai har tak a ni. Mahse Neihkimi a ni miau a, min thungrulna tur hmanrua a nei ţha lutuk tlat. 

Ka pa driver ţhin U Puitea kha a lokal tawh ngai lova, car pawh a inhung tawp a, tuman an khawih leh tawh lo. Rin loh deuhin tual zawlah Hmangaihsangan min lo nghak a, Neihkimi pawh a awm ve. Tukin hi ngati nge kal hma an tum ve kher le. 

"Lokal rawh le" a ti dam thlup a, min kaih mai a tum chu hnunglamah ka kut ka lo thukru a, hriatthiam loh hmel zet a min en lai chuan "Bus in ka kal dawn" tih leh kal ka rual a, thui pawh ka kal hman lo; Hmangaihsanga chuan min lehpelin ka hmaah tak ka kawng dal turin a ding a, Neihkimi hian engkim a hre tawh a, a mitmei a veng duh tawh lo niin a lang. 

"Zoliansang ka rualin i kal thei ang? Hmangaihsang, engvanga khatianga awm vel kha nge i nih? Kawt lai a ni hi" Neihkimi chuan min rawn pan hnai a, a aw vin leh vawt tak chu hlauhawm tham a ni. 

"I rualin a kal lovang, chuan i hnen a ka insawifiah kher a ngaiin ka hre lo" a ti nghut a, "Lo tibuai tawh suh ang che" tih leh min kaih a rual a, min hnuk dawr dawr a, car kawngkhar chu pawt hawng rawpin min nam lut nawk nawk a, min dim lo khawp mai. 

A rawn ţhut luh ve rual chuan car chu a hniam deuh sutin ka hria. Ka tlanchhuah daih hlau ni awm fahrana seat belh min rawn hren tir lai chuan a rimtui pa zet chu ka lo hip kawk a, ka chhungril ipik lutuk chu a hrehawmin hahdam deuh nan a lo kuah vang vang ka chak takzet a ni. 

Sangzuala te inchhunga ka tawrh ang chiah ka tuar leh mek a, Neihkimi leh ka nu kha an inang khawp mai. Ka hma lam hun te chu a thim khup ni maiin ka hria a, kei chauh ka ni lo, ka rualin Bawiha a tel ve zel a ngai dawn a, hospital a ka thawh loh chuan hna dang ka zawn ngei a ngai bawk ang. Ka nu hnenah han kalsan dawn ila a taksa a chak vak tawh loh hmel a, mutna damdawi a la ei ţhin zui a, ka awmzel dan tur chu ka ngaihtuah thui ngam lo zawk. 

"Ţap lo teh Zote" Hmangaihsangan a rawn tih chuan ka mittui a tla tih ka hre chiah. Ka en ngai ka lo en leh tlawk tlawk tawh a, ka ngaihtuahna ka kawm nasat lutuk avangin ka mittui luang pawh ka lo hre chang tawh lo a ni. Hmanhmawh deuh a tuai faiin a lam ka hawi a, ka en tih hria ni awm takin min rawn en ve a, buaina ka tawh nachhan hi amah vanga thleng anga ngaih ka tum ţhin mah se ka thei hauh lo. Min hmangaih a, min ngaihtuah tak tak tu hi a ka puh chhe ve thei lovang. 

"Ka lu a na deuh a" ka ti tham chhal a, ka chhuanlam ho lutuk chu a awih kherin ka ring lo. Mahse, "Damdawi i duh em?" a ti a, lu ka thing mawl tawp. 

Tukverh lam ka hawi leh chuan hospital kan pel daih tawh tih ka hre leh a, mangang zet a amah ka va en leh chuan "Kan huanah" bul zet hian a lo ti a, zep ţhen a nei lem lo. 

"In huanah min hruai dawn maw? Hnathawh ka ngai tih i hre ve reng alawm. Let leh vat rawh in huanah ka kal hman lo" ka ti tuar tuar a, "Driver thu thu" nuihza aw taka a tih chuan seat belt phelhin thawh ka tum uaih hman a, car chu a ti ding thut a, ka inring hman lo chuan seat nghenchhan chu ka ngheng leh dawt a, intithei fein a lo la kiai suk zui a. 

Mi hnathawk tur a an chhuah hunlai a nih avangin traffic a lo jam a, a din thut chhan pawh a ni. Min rawn hnaih nghal ruak takah chuan ka lo ip deuh chawih a, thil atthlak tak a tih ka rin laiin seat belh bawk chu min hren tir leh a, "Thu awih rawh" a ti thawp sup a, chet leh pawh ka tum tawh lo, ka awm zawi hnawk a, ka thaw hle hle a, buaina a min hnuk lut thei thil a tih loh ka beisei tawp mai. 

Motor hmuh tur a tlem tual tual a, kan tlan chak tial tial thung a, metal loh kan thlen hnu chuan tlemin kan tlan muang leh deuh a, gate lian tak zawnah a ding dat a, kan thleng ta tih gate a va hawn danah ka hre nghal. Tala in a lo inkalh miah lova, huan enkawltu an dah a nih ka ring. Gate chhungah kan tlan lut a, a hmun chu a nuam ngei mai, in pakhat a lo awm a, chumi kawtah chuan a ding a, thlam te pawh a tih theih tho ka ring. Mi hausa ho hian huan zau leh thlam ţha ve pangai tak neih hi an intihhmuh tawhin ka hria.

"Ehe...Hmangaihsanga chu min hrilh lawk miah lo a" nu pakhat hian a rawn ti a, a nu lianin a vun chuan hang lam a pawl zawk a, a hmel chu a nelawm viau tho mai. Naupang pahnih an rawn tlan thleng ve vat a, an thawmhnaw leh taksa bal paw deuh phuk ka hmuh chuan zawitein ka lo nui a, Hmangaihsanga chuan a lo lawm em em lehnghal a. 

"Ka rawnkal thut a nih hi rei ka awm lovang" a tih liam puat hnuah "School in kal lo em ni a?" tiin naupangte chu a be zui nghal a, he hmuna min hruai ringawt nachhan hi ka hrechak zek zek tawh. 

"Zualtea pawh bazar turin a chhuak a, in intawk hman lo chiah chiah aniang. Khawilam nula nge i rawn hruai a?" chu nu chuan a lo ti leh zung zung a, nula a ti tel kher chuan min ti tim deuh tlat nia mawle. 

"Zotei a nih hi" a ti mai a, an hmel hi ka la hmu ngai miah lova, ka pa thih khan an lokal ve em ka hre lo mah se lokal se chu ka hmuh ngei ka ring. 

"A nih chu..Dinsangi ka nia, U Din min ti mai rawh aw. Lo lut rawh u" a tih lai chuan naupang pahnih chu hla feah an lo awm leh hman tawh a, "Saw ti reng saw an nia, thlasik lai phei kha chuan chat tak an ni ringawt. An vunah hian engpawh ziak ila a lang fiah em em mai a ni. An ngal leh chawn velah lehkha an zir lo chauh a ni ber" a ti zat zat a, inchhung chu rin aiin a lo nuam daih lehnghal. 

"Kha pindan chahbi aw..niminah ka tifai a" tih pahin U Dini chuan dawhkanah chahbi a rawn dah a, fu tui a rawn chhawp bawk. Inchhung chu ka'n enkual vel ţhin a, a faiin an luah nuam reuh hle.

"Apa Sang, pawnah lo chhuak lawk teh" ti a naupang pahnih an rawn au lauh lauh chuan nuih a za duh kher mai, an koh dan lah chu midangin an hman ve ngai miah loh a nia, helai hmunah hian a kal zing thawkhatah ka ngai. 

Fu tui kha a chawi chhuak a, a thang hlan chuan U Dini hnenah "Huan an nei tih ka lo hre miah hleinem" ka ti a, inchhung chu ka melh kual leh thuak bawk.

"An chhungkaw ta a ni hleinem. Hmangaihsanga khan a hrilh miah lo che em ni? Hei chu a ma ta bik a nia, hahchawlh nan a rawn hmang ţhin a, a pa'n nupui addict a neih hnu" a tih lai chuan ka lo pawt chat a, nui hak chung hian "Nupui addict a?" tiin ka lo zawt a, "Ni e..i hre nange?" a ti leh hluai a, mak tih hmel zawkah a la ţang zui. 

"Hre nang...thil ka hre lo ve lutuk a" ka ti liam satliah a, a ruk tak chuan hrehawm ka ti leh viau tawh. 

"Nihchuan nakinah amah i zawt dawn nia, ka pasal nen hian school khatah an lut ţhin a, ţhianţha tak an ni zui a, tun thlengin an la ni ta reng a nih hi.Keini lah kan vanneih phah a, in ţha deuha a thlawn a kan awm theih bakah thlai te kan ching ve thei a, kei hi a chhang chiah Zamtei nen khan kan inkawm nasa ve thung a, a pa a boral te khan min rawn bia a, kal ve kan tum tehreng nen naupang an dam thei lo lutuk a" a ti siam siam a, ka hriat duh ber lah chu a sawi duh tawh der lo. Zamtei nen a inkawm ve si ka chanchin a hre miah lo chu mak ka tih rualin ka zawt buai duh lo thung. Thil a hriat tam phah mai mai zawk ang. 

"A nu leh pate chanchin pawh in hrechiang viau dawn a nih chu" fu tui vawt raih in pah hian ka ti a, min en vang vang hnuah lu a bu zauh a, "An awhawm loh a nia aw" a la ti zui a. 

"A nuhrawn hi em ni addict i tih chu?" ka tih chuan "Amah zawt rawh" a la ti deuh tlat a, "A sawi leh i sawi chu a inang reng alawm" ka ti ve ngang ngang a, mutna damdawi ka hmu kher bawk nen, ka ngaih a ţha lo ru viau tawh a ni. 

"A sim daih tawh ang" a ti ban charh a, Hmangaihsanga a rawn luh chuan tihsual nei ni awm takin a kalsawn zal zal a, rawn let hma lutuk lo se chu ka sawi tir thei ngei ngei ang, a ţawngduh hmel ve emai. 

"Lokal teh" a rawn ti deuh tawp a, inchung kailawn a a pen chho chu a hnungah ka zui a, pindan pakhat kawngkhar kalhna a hawn rak rak lai te chuan inchung lam chu ka lo enkual a, bungrua a tam hran lo a, mahse a nuam lutuk tho. 

"Lo lut la" a tih leh takah chuan kawngkaah ka pen lut ve ta nge nge a, khum leh chhuar vel chauh hmuh ka inrin laiin lemziak tam tak ka hmu thung a. Bangah a intar phei dul a, ţhenkhat chu easel ah te pawh a la awm. 

Lemziak ka enkual lai chuan ani chu tukverh bula easel zawnah a ding a, a melh ngar ngar tih ka hmu a, eng ber nge inziak ka ngaihven lem loh laiin "Lokal teh" a ti leh a, la en zo lo mah ila a dinna lamah chuan ka phei ta tho a ni. 

Amah ka hnaih tawh viau tihah chuan ka banah lo dawmin a hmaah min din tir a, "Ka nu a nih hi" tih pahin ka chhipah a khabe a nghat zui a, nghet zetin min kuah nghal zat bawk. 

"A hmelţha hle mai" ka ti sep a, dawt ka sawi lo, a hmelţha takzet a ni. Lemziakah pawh a hmelţha a nih chuan a tak takah phei chuan a ţha thawkhat viau ang. U Remremi nen an inang khawp mai. 

"Tu ziah nge ni reng reng a? Nangmah em ni?" ka tih chuan "Umm" a lo ti a, "Ka tuina ber zawk a ni" a ti ban charh a, a ţawng zawi emai sawi nuam a ti chiah lo aniang. 

"I va thiam ve mi milem ziah tawh sa hi hmuhnawm ka ti ţhin a, an ngaihtuahna a thil awm an ziah chhuah ţhin avang hian ţhenkhat phei chu hriatthiam mai a har ţhin. Ka ngaisang a, ka thiam loh zawng tak a ni thung a" ka tih chuan a nui nghawr dawt a, "Zirtir i duh em?" a ti a, "Aa..min nuih ang" ka lo ti ve thung a. 

"Hmelţhat bak thiam i nei lo a ni maw?" nuihza aw zet a a tih chuan a hmel en tumin ka thlek deuh ha a, ani pawn min lo en ve chiah a, a nuih suk rual a a mit bul vun chuar lang ralh pawh chu ka hmu thei a, a chang chuan ka bula awm hi nuam a ti ve tak tak niin ka hre ţhin. 

"Zin phawt la i lo haw hunah min zirtir dawn nia" ka tih hnu chuan hmalam ka hawi a, thawpikna ngai bawk kha a rawn let leh a, a zin hawin min hmu tawh awm si lova, a hrilhhai viau ang le. 

"I duh duh hunah a ni mai" tih sup pahin a rawn kun hnai deuh a, kan biang a insi thuak a, ka zam chhe leh der tawh. 

"Hmangaihsang, ka nu hian damdawi a ti ţhin em?" ka ti deuh khawl a, hlauh luat vanga ka aw dik lo chu pawi ka ti kher mai. 

"Ti ţhin e..i hre lo em ni?" a tih chuan ka thaw halh a, ka mit ka chhing daih bawk. Nufa inpawh deuh anga awm siin kan lo va inhrechiang lo em. Hmangaihsanga lahin engmah a zep ve der mai bawk si lo, ka thu hriat chu a rapthlak takzet a ni. Ka nu chu aw..pasal ka neih hnu khan engtiang chiahin nge a nun a lo hman ţhin niang le. 

"Midangin an hria em?" ka tih chuan "Hre vek e" a ti leh mai a, ţawngkam dengkhawng tak tak a min ţawngkhum an chin tehlul nen ka nu nihna diktak an sawi chhuak miah lo ţhin kha lehlam zawng chuan an fel ka ti phian a, U Dini kha chuan Zamtei hnen aţangin a hria a nih ka ring. Ni lo se chu Hmangaihsanga hriat a hlau hauh lo ang. 

"Tunah a la tih i ring em?" ka ti a, a nu lem hmaa ka nu chanchin ka sawi pui char char chu ka inthiam lo leh a, mahse, "A simna a rei tawh" tiin ţha deuhin min lo chhang leh a, mutna damdawi ka hmuh kha ka sawi chhuak duh ta lo a ni. 

"Helai hmunah hian engati nge min hruai?" ka ti a, kan thupui ka thlak mai loh chuan ani pawn nuam a ti lo vat ang. 

"I hmuh ang hi a ni mai. Ka nu nen ka inhmelhriattir che u a nih hi" a tih chuan a nu lem chu ka en leh a, sir zawng deuhin a ţhu a, a sam chu mam han a ţawnin hnunglamah a bawk a, a landan a fel fai thlap a, a nui sâng bawk. Lemziakah pawh hian mihring nihna a lo lang chhuak thei khawp mai, Hmangaihsanga nu mitah pawh chuan ngilneihna a hmuh theih a ni. 

"U Remremin a chhun ber a nih hi" ka tih chuan a nui hawk a, "An ti ziah alawm" a lo ti leh mai a, ka kawnga a kut suih beh chu thlahin lemziak chu a chul thuak a, "La dam se la chuan unau kan ni lo mai tur a nia" a ti zawi deuh ruih a, "Kan intawng lo bawk ang a" ka lo ti ve zauh. 

A ţhianpain thawm a rawn neih takah chuan ka inla hrang vat a, hospital a ka hmuh pa ngei kha a ni. Hmangaihsangan school a a sual ţhin avanga a fate dam thei miah lo anga a chhaih fiam pa kha. 

Reilote an inbiak hnuah hna kan la neih chhuanlamin huan chu kan chhuahsan a, naupang pahnih khan kan chuanna car an rawn la um zui, hausa lo mah se an nun chu a nawm hmel khawp mai. 

Hmangaihsanga nen a kan inzui lut min hmu chu Zonuni chuan mak a lo tih hmel lem loh a, kalna tur min lo kian sawk sawk a, ka ţhut fel hnuah ani pawn min kalsan ve mai a. 

"Zote, in buai vak chuan ka tihpalh lutuk aw. Neihkimin a koh che khan ka hlauthawng lutuk a, Hmangaihsanga kha ka ko ve nghal a, thil awmdan ka sawi veleh ngaihven tur chein a rawnkal mai sia, in rawn chhuak kha i hlim loh hmel bawk nen, ka inthiam thei lo reng reng" a ti mawlh mawlh a, a lo hrilh nghal vang chiah a nih chu kan thusawi a lo ngaihthlak ruk ni.

 "A pawi hleinem..chhungkaw thil a nia, nakinah ka la hrilh dawn che nia" ka ti tak na a hrilh ka tum lem lo. Hmangaihsanga beng a thleng leh ang a, anin thinrimin Neihkimi a tawng leh mai dawn a, an buai zo leh vek ang. 

Rba lokal chuan "I hmel a dik lo" a ti teh ngawt a, "Khawi lai ber maw?" ka ti deuh ha a, a ţawng dan hmang chu hre lo der hmakin ka hmai chu ka tuai vel a, "I hriat reng kha" a la ti zui a. 

"Puih i ngai em?" thutak zawk a a tih leh chuan lu ka thing a, "Ka ţha alawm" ka ti liam satliah a, Zonuni ka pui nghal daih bawk. 

"I la bang chuang na nge?" Malsawmin a rawn ti ve thung a, a haw tur hi a rawn peng kawi ve ziah a, chaldelh deuh a min ţawng khum te hi a nuam tih zawng tak a ni. 

"Bang lo chu a nih hi" ka ti bung hmuk a, Zonuni leh Rba te chu an hmel hmu lo mah ila an hrilhhai ve ngawt ang ka ring.

"I hmel hmuh hi nuam ti lo tu kan tam a nia, mi pangai tak chuan ban hmakna tham a ni" a ti vel a, Hmangaihsanga berin a hnar tawh hnuah pawh inhnuh dawh mai a la tum loh hmel khawp mai. 

"Hna hniamte a kan ngaih hi tam tak chuan chhungkaw chawm nan an hmang ţhin. I hmuh peih loh vang mai maiin Zotei hi bang turin i ti ngawt thei hleinem. Hospital a zau a, hel la a ni mai alawm" Rb-an a lo ti a, mitmeiin lo khap mah ila min hmu lo der tlat a, keimah vanga buaina a tawh ka hlauhpui khawp mai. 

"Lo inrawlh duh suh i hah thlawn mai mai ang. Nuthlawi ho hi chu in zei angreng sia, ka hlau riau mai che" nui rah rah chung hian a ti vel a, tam tak chuan a fiamthu ah an ngai ang ka ring. 

"Nuthlawi ang zawng hian ti ve ziah suh Lalmalsawm. I thusawi hian nakinah a la vaw let thei che a nia, nitin a rawn din kawi ziah pawh a ngai lo. Mi chhiatna lai i sawi peih em em a, i ţawngţaipui chuang awm der si lo, nang ang hi chu kan mamawh lo nasa a nia" Zonunin a lo ti kha kha a, ngeiawm deuh deuh a ţawngkam a neih leh hnuah min kalsan ve thei hram a ni. 

"Henu han nasat dan em em hi chu, inhnial vel hi naupangchhia ti viau mah ila ka hnial lo thei ţhin lo. Ka lo ţawngthei ve tho bawk nen, ngawih reng harsa ka ti tlat zel" a ti a, Rba nen erawh an intawng fu ngai lova, mak tih hmel deuhin Malsawmi chu a enzui vung vung mai. 

"Zote, khanu vang khan bang miah suh aw. I eizawnna a tih tawp sak ngawt thei lo che. Nangmah chiah i ni lova, fa i nei tih hrereng rawh. Kum hnih kum thum vel inkhawl la, i inkhawl ngah hunah Hmangaihsanga te in pawh i chhuahsan daih dawn nia, in hrangah awm ula, inngaihzawn a awlsam zawk ang" a ti puat puat a, kan chhungkaw boruak a hre ve miau lo a ni. 

Hmangaihsangan amah nghak tur a min tih tlat avangin casualty ah ka kawi a, nurse duty pakhat Mami nen kan inhre ţha tawh a, Rba awm tawh lo mah se hrehawm ka ti vak lo. 

"I pa boral ringawt hi a mak e..tun thlengin mak ka la ti tawp thei lo. Mihring hian kan chin kan hre lo lutuk a, nun hi fimkhur a ngai tak tak a ni" a tih lai mekin addict tih hriat deuh an rawn inkuah lut a, ka nu ka hrechhuak zawk mai. 

"Ka pi, ka ţhianpa hi silaiin an kap a, na a ti angreng si a, nachhawkna sang lam min pe thei angem le?" pakhat zawk chuan a ti bual bual a, a meng vai riai a, a khawngaihthlak zawk khawp mai. 

Mami chuan doctor a ko vat a, doctor lokal hma te chuan ner nang nang chunga a awm dawmin na tih hmel zetin a kun deuh ngâih a, a awmah tak silaiin an kap a, a la ding thei te chu mak tak a ni. 

Doctor pawh hmanhmawh deuh a rawn tlan lutin damlo chu a endik a, ngun thluk fe a a endik hnu chuan a nui deuh hawk a, Mami nen kan lo ngaihven ve vat bawk. 

"Engati nge dawt in sawi?" a ti hlut a, thinrim ang paw'n a la awm chuang lo. 

"Dawt kan sawi lo ka pu, kawr chhah deuh chhanah an kap a, a kaw hawng lo mai mai a nih hi. Mahse a ruh vel hi na a ti lutuk a" tiin a ţhianpa zawk chuan a lo chhan sak leh a, Mami chuan a din hnaih tawh viau a, keichu ka la kal hnai ve ngam lo. 

"Engmah a na lovang. Silaiin an kap hleinem che u" doctor in a tih laiin Hmangaihsanga pawh a rawn lut ve a, damlo chu a rawn ngaihven ve nghal vat bawk. 

Thil awmzia a zawh veleh doctor chuan "Silaiin min kap an tia, an kap lo reng reng. Silaia kahna hetiangin a awm ngai lo. An kah lai che a i kawr hak chu khawiah nge i dah?" doctor in a tih chuan an lo riat nawi vel mai mai a, dawt an sawi a nih hmel khawp mai. 

"Nangni hi in lo in piai duk vel a ni lek lo maw?" Hmangaihsangan a lo ti ve thung a, "Silai alawm...a ruh vel te hi a na a tia, tramadol emaw fortwin injection vel in ti thei mai lo mi?" a dam zawk chuan ngen ngawl tak hian a ti a, kan doctor pahnih te nuih a za viau thung. 

"Ruhna satliahah fortwin an pe ringawt ngai hleinem. Tramadol pawh nachhawkna sang tho a nia, kan hmang zen zen lo. I ţhianpa vun duk kha piai duk na a ang mah zawk a, lo enthla chhin phawt ula, silai a kah ni lo mah se vung leh tawrh harsa khawp a na a awm palh chuan in lokal leh zawk dawn nia" ti a Hmangaihsangan a hrilh hnuah phun bul bul chungin an inzui chhuak a, "Ruih tur hi a zawnin an zawng a, fortwin phenergan leh tramadol ngat phei chu damdawi man tlawm, lei har tak si a nia, hliam an insiam chawp reng mai. Tunlai hian a nasa zual a" doctor chuan a ti charh charh a, addict ho ninawm zia leh khawngaihthlak tho zia Mami nen an sawi dun mawlh mawlh lai chuan casualty chu kan chhuahsan a, an sim hlen mawh lutuk an ti lehnghal a, ka nu ngaihven a ngai zual viauin ka hria. 

Kan hnaih a awm te hian puih an lo mamawh viau thei a, aw rawl chhuah kher lovin mangang deuhin min lo au ru ve reng thei tlat a ni. Kan hmuh phak a awm, danglam deuh a kan hriat te hi chu ngaihven zeuh zeuh a ţha khawp mai. 

Ţawngtam lo ve ve kan ni bawk a kan haw lam chu kan inbe khat angreng a, ka nu ringawt rilruah a awm a, ka bula ţhu pa chuan eng nge a ngaihtuah ka hriatpui ve lem lo. 

Veng chhung kan luh tawh hnuah ka kut a rawn la a, a hmui nen a nawr siin a fawp vang vang a, a chet dan teh thut chuan min ti hamhaihin ka kut lak let nachang ka hre lawk lo reng a ni. 

"Eng nge i tih?" tih hluai pahin ka kut chu ka phih let zawk a, "Ka fawp" a ti thum dut a, a la nui zui. 

"Kawngah kan awm hi" ka tih chuan "Min hmu pha lo ang" a ti then a, "Ka zin haw veleh chhanna min pe tawh ang che" a ti zui zat bawk. 

"Zin phawt la" ka ti a, sawi tur ka hre hlawl lo a ni. 

"Zin dawn e..ka awm loh laiin lo ngaihtuah char char rawh" min ti vel a, car a tih din rual chuan "Min zawt nawn thei tawh dawn hleinem" ka ti sap a, min rawn enin mit hmul a kan ralh a, ka sawi loh tur ka sawi chhuak tih hriain "I cham hlen daih duh maithei a" ka ti a, za lo deuhin ka nui zui hak bawk. 

"Ka kal hlat san phal lo che" nuihzat hmel tak hian a lo ti a, car aţanga kan chhuah hnu chuan ka kawngah min kuah bet leh nghal salhin ka chhip a fawp leh vang vang a, cctv a awm chuang lo bawk a tiin ka dang duh ta lo a ni. 

Mahse..."An infawp vel" tih ri kan hria a, hnunglam kan hawi chu car phen aţangin U Remremi lu a rawn lawr a, Hmangaihsanga chu a lo rum nghut a, pakhat lah chu a nui vur vur lehnghal. 

"Engtik laiin nge kan tlanpelh?" ka ti hluai a, ka zak leh mak ti lutuk chu ka aw a ring deuh aniang "Sawlai a sawn ka awm" tih pahin U Remremi zawk chuan chhak lam a pangpar awm dulna lam chu a kawk zuk zuk a, "Ka rawn tlan phei lai te kha min hmu miah nange?" a la ti zui a, thawm engmah kan lo hre pek lo a ni. 

"Ehe..Neihkimi a lo haw...Neihkim" tih leh car pawl rawn tlan lut mek lam pan a tlan phei a rual a. 

CONT...