KA HRINGNUN THAWNTHU-13

KA HRINGNUN THAWNTHU-13

Neihkimi chuan car a ti ding a, U Remremi nen a an inbia chu kan lo thlir reng a, pangpar dahna bula a awm hmu miah lo khawpin kan lo awm em maw ni dawn le. Kan din rual khan min lawm tumin a rawn tlan phei ang a, chu pawh chu kan lo hre chuang lo aniang. 

Hlauthawng thaw dep dep a ka awm laiin Neihkimi chuan min kal pel a, min be lova, melh pawh min melh eih lo. U Remremi zawk chuan "Ka sawi bawk lo" a ti teh ngawt a, a zep tluan thei ngut ange maw. 

A ât viau rual hian finna lai a nei ve a, thluak lam fel lohna nei a nih miau avang hian mi rilru tur dawn pui hauh lova ţawng phawng phawng a ching a, khawlai a chhuah a miin an lo bawl te, an lo chhaih thinrim te hian inchhung thlengin a rawn ang lut ta ţhin a, tlangval pakhat phei chu kut a lo thlak palh tawh nghe nghe a ni. A vei zawng chu a vei et et a, mipa a hre ve viau bawk. A period hian a thinchhe hlur zel a, dawhtheih a ngaiin dawm thiam pawh a ngai tel ţhin a ni.

Neihkimi chu a tihziah danin inthlak lovin sofa ah a ţhu hahdam hmasa a, keipawn Bawiha ka buaipui ve nghal a, Hmangaihsanga erawh chu intihfai tumin inchungah a chho a, a awm loh chuan thla a muang lo nghal mai ţhin. 

Neihkimi chuan ipad phawrhin eng eng emaw enkual ni awm takin a awm a, min be lo chu mak ka tih viau laiin "Tukin khan i chhuak hma hle si a, khawiah nge i kal kawi a?" min ti a, ka nu'n Bawiha chaw ei tur min lo pe ve mek bawk a. 

"In luah tur ka zawng" tiin dawt ka hrilh a, a ruk tak chuan ka inthiam lo. Mahse, dawt ka sawi mai loh chuan an unau an inbak kaih leh mai ang. 

"I hmu em?" a tih chuan ka la hmuh rih loh thu ka sawi leh a, min en ve ta nge nge alawm. 

"I pute in lamah in let mai thei lo em ni? An chanchin ka hre ngai miah lova, i nu hian a sawi ngai lo. Ka pa nen khan insawirem tawp a, khami ţum pawh khan i pi leh pute an inrawlh chuang lo. I putea a ni mai a, in baihvai viau tak tak em ni? Nge ni a ngaihsak tlak lohin in khawsa zawk?" a ti khawl khawl a, a aw chu a dam viau a, nelawmna pakhatmah a awm lo thung si a ni. 

"Kan inpawh vak lo a" ka tih chuan lu a bu zeuh a, "Keini angin i fin ve rawih ngam lo bawk tihna a ni maw? Kan chhungkua ang hi tam tak an awm ve a, i tawrh ang tuar pawh an awm. Chhungkaw buaina hi kan sawi tam loh pawl a nih vangin i hre lo mai mai zawk a nih kha. Mi pawn an tawrh theih chuan in tuar ve thei mai ang. Hetah chuan in awm ve rem ka ti tawh lo. Remremi chu kan laizawn tak tak a nia, kan enkawl thei" a ti charh charh a, chhungril a hrehawm tihna in mung tup tup chuan thinchhiatna a siam a, "Ei mai mai rawh. Chhak zel mah ta che" tiin Bawiha chu ka vin a, min melh kiau a, mak min tih hmel khawp mai. 

"Naupang engmah hrethiam lo a nih kha. Fa enkawlna tur nei miah lova fa in nei ve ringawt zel hi ka hrethiam lo. Chhungte chawm turin em ni fa in neih? Tunlaiah mipa tam tak chhungte chawm tur a nupui nei an tam, chhungte tan phurrit an siam mai mai a ni. Mipa in hnathawh a nei a nih pawhin nupa chu inţhen thei reng an nia, hmeichhia hi mawl loh tur a sin. Hna chhe te tal neih ve phawt hnuah pasal chu neih chauh tur. Tunah pawh nang aiin i fapa in a tuar nasa dawn a nih kha" tiin min ţawngkhum fak fak a, a thusawi chu dik na chin a awm ang, a zavai chuan ka pawm chuang lo. 

Zamtei lo haw chuan min ko hrangin "In ruak a hria a sin" a ti sar sar a, fridge phenah kan ding a, lokal an awm leh awm loh hriat tum ni awm takin a hawi kual leh vut ţhin bawk. 

"Khawi vengah?" ka tih chuan "Chhinga vengah a nia, vawiinah customer te ka zawt a, pakhat khan a lo hria a, mahse luah man a sang deuh hlek a, sing chuang daih a ni" a ti leh sa sa a, "Ţanpui che ka chak vang a ni lo a nia, Bawiha ka khawngaih vang zawk" a ti zui zat a. 

"Sing chuang man te chu kan luah phak dawn em ni?" ka ti ban charh a, thla tin a sing chuang theh chhuah chu rapthlak deuh a sin. 

"Chhuah vahna a awlsam a, a in a lian bawk a, pindan pawh a tam an ti" a ti a, Zamtei hi dawr nei a ni a, in luah tur chu a hrethei phian maithei a ni. 

"A dang min lo melh pui ve la, te deuh mah se tlem a tlawm ve deuh hlek ni thei se, hna aţanga ban ngei a ngai dawn bawk nen" a hriat vek tawh ring a ka tih chuan "I bang dawn a maw?" a ti a, a phawk hra a, a meng tal tap bawk a, a la hre ve miah lo tih ka hriat phah a ni. 

"Ka hre lo le..Ruattei khan thawk turin min sawm sia" ka ti leh vel a, kan chhungkaw inpawh loh zia chu a hriattheih mai awm e. Hna nei ţhah, mahni in enkawl thei ţhah an nia, an thu an duhin dik an inti vek a, an inpawh tehchiam lo a ni. Mi hausa chhungkaw tam tak hi chu an awhawm loh reng a sin. Chhungkua a chaw takngial pawh ei rual hleithei lo an tam tawh lutuk. 

"Ban kher a ngai lo..nau awm tur i ruai ang a, chhunah i chhuahsan zawk anga tlaiah i haw leh mai dawn a, mi pawn chutiang chuan an ti mai alawm" a ti a, Neihkimi khan ka nu a hnawtchhuak tel tih pawh a hre ve chuang lo a nih dawn hi. 

"Eng nge in tih a?" Hmangaihsangan a rawn ti thum dut a, Zamtei chu hlauthawng sa a ni bawk a, a lo khek deuh ţhat mai. 

"I va mawl ve" a ti tuar a, Hmangaihsanga nui ruh ruh lai chu a awmah chum sakin "Nupui nei vat ang che. Nangmah vangin rilru hahdam deuh pawn kan awm thei lo. Luhlul leh thuduh lutuk hi a ţha lo a nia" a ti hlak hlak a, keipawh min melh thip leh viau tawh a ni. A zia hi a mak ve ngawt mai, mahse engtin pawn min ti se ka huat ka ring tawh lo, a chhungril ţhatna ka hmu fuh tlat tawh a, lanchhuah tir a hreh mai mai a ni. Harsatna tam tak tawk ţhin mah ila Pathian hian khawngaih tu min pe zel a, fahrah te hi Pathianin a hmangaihin a ngaihtuah bik an ti ţhin a, a lo dik ngei a nih dawn hi. 

Hmangaihsanga chu zanah ka pindanah a lokal leh a, a rawn kik vei deuh thlap a, amah a nih ring ran chungin ka hawng a, a lo ni chiah reng bawk. 

"I farnute hi i haw lo ang chu tiraw? Neihkimi nen pawh inhnial bap bap ţhin mah ula i haw tak tak thei lo ang tiraw? Pianpui unau ka nei lova, unaute inzawm ngheh dan hi ka hrethiam ve chiah lova" ka ti a, tukverh bul a dingin pawn lam kan thlir a, thla eng chu a mawi zual riau lehnghal. 

"Thisen hi chu a nghet a, thisen zawmpuite chu huat an har bik. Nangpawn haw duh suh a la danglam ve mai ang" a ti a, ka thlavang a hauh char char lai pawn a farnute chhiatna lai hi ka hriatah a sawi ngai lo reng a ni. 

Kan ngawih vang vang hnu chuan "Ka farnute leh nang hi, duh min thlan tir em lovang chu tiraw?" nui chung hian a ti a, keipawh chu ka lo nui ve mai. 

"Teuh lo mai i farnu te zingah min chhiar tel ve duh lo mahla duh ka thlan tir lo ang che. I hmangaih zia ka hmu thiam vek alawm" ka ti a, thikna ka nei lo. Unau an nia, an inhmangaih tur alawm. An inpawh vak lo pawh mak ka tih tawh nak laiin in hmangaih miah lo phei se chu mak ka ti lehzual ngawt ang. 

"Nangpawh ka hmangaih tho che. Ţan bik neih ka duh loh vang zawk a ni. Dik ni a ka hriat thlavang ka hauh a, Neihkimin a tih ang che hian ti ve la chu nangpawh ka hau tho ang che. Mipa hi chu a lai taka kan din a ngai ţhin, chu chu kan pawimawhna a ni" tiin a insawifiah deuh duah a, a zin hlanin ka chhuak daih dawn tih hria se engtin nge a tih ang le?

"Engtikah nge i pu hmu tur chuan i kal dawn?" ka tih chuan a lo thaw hawk a, a phur vak loh hmel kher mai. 

"Ka hre lo le..min chah reng a, tawp chin a nei dawn lo. Kum a upat hian rilru a naupang thar leh a, khawngaih viau mah ila hrem ve deuh a ngai a ni. Tun ţum bak chu ka kal tawh rih lo ang" a ti dut dut a, ka awm ve hnuah pawh a pu hmu tur hian vawithum lai a kal tawh. A lo remti mai zel hi thinrim a inhauh a peih loh vangah ka ngai. Boruak nuam deuh hnuaia khawsak a duh a, buaina in mung churh te hi a ngaithei ve lo. Chhungkaw pangai tak neih a duh a ni. 

"Vawt i ti a ni maw?" tih leh min kuah a rual a, tukverh bulah dingin thli thaw kan inchhem tir reng a, tshirt chauh hak chuan a vawt hma lutuk. Ka taksa awmdan hi ka hrethiam lo, ka cher vang nge mi ai hian vawt ka ti hma ţhin bik hrim hrim. 

"Ka ngai dawn che sia reilote chiah ka cham ang" a ti deuh sup a, a awm lum nuam deuhah chuan ka tawm kak a, a lungphu ri dup dup hi ngaihnawm ka ti ţhin. Ka chhip zawna a thaw lum ham ham te chuan thla a ti muang hliah hliah a, hetiang hian min kuah thei lo thuai ang a, kan inhmu leh tawh kher lo thei bawk. Mahse chu ka ngaihtuahna ţullo tak chu ka dah bo thuai a, a lungchhiatthlak zawnga ngaihtuahna hman loh hram hram ka tum a ni. 

"Sawi teh min ngai ve angem?" tih pahin min kuai dak a, a mitmeng muk ruih chuan min en a, min fawh mai hlauin ka tiril a khur thei hial a ni. 

"Ka hre lo" zawi sep a ka tih chuan hmui a lo ti sawi zauh a, ka lungphu inthum rawn tluk tluk te chu a hriat ka hlau hle. 

"Min ngai khawp ang" zawi deuh sup hian a lo ti leh a, a inringtawk viau bawk. A kutphah hlai hlup a ka khabe dawm reng chung chuan a kutzungpuiin ka hmui a nul a, rawn kun hniamin ka chalah bawk min fawp leh a, ka hmuiah chuan min fawp miah lo. 

A inlak hran rual chuan rei tak thaw tawh lo ang maiin ka thaw chhuak halh a, ka awmdan chuan a nuih a ti za viau a ni. 

"Neihkimi hnenah ka awm loh chhunga tibuai lo tur chein ka lo hrilh dawn nia" a ti dam thluam a, a aw a min ngaihsakna langchhuak te chu hriat a nawm rualin lungngaihna bawk a kai chhuak leh ţhin. Ţhat a chhuah ţhinna zawng zawngte hi ka tan a a hlut zia leh a hnawksak tho si zia te hi a hre kher lo ang. Ani chuan awlsam te a chinfel theihah a ngai tlat a ni. 

"Mu tawh rawh Bawiha khuan a ngai ve tawh ang che" tih pahin khum lam a thlek vut a, min kuahna a thlah fel hnu chuan a vawt nghal sawng sawng a, pindan aţanga a chhuah rual chuan khumah ka ţhu hnawk a, ka thlakhlelh tawh zia ka hai bik lo, a laka ka thlamuan tlat bik nachhan hi ka sawifiah thiam bik lo. Min dawmthiamin a dawhthei em a, ka hmaah dingin ka hnung a dawl a, thlamuanpui loh chi ziazang a ni lo. Sawi kim loh ka nei a, chu chu ka sawichhuak thiam lo a ni. Mahse keini pahnih chu engtikahmah a rem ve thei ngai lovang. 

Titi pui ţha a hriain midang mut reh hnuah ka nu hmu turin ka kal a, a lo la muhil lo hlauh. Khum tlangah a ţhu a, khum nghengin chhuat a carpet dup nuam tak inphah chungah ka ţhu ve thung. 

"Nu, ngatinge ka pasal nei tur kha min dan loh? Rilru hrehawm phah nan a i hman dawn ai chuan min dan mai tur alawm. Khatih hunlai khan ka la naupang a, thui tak ka la dâwn thiam lo. Nangmahah ka innghat a, keimah vanga pasal nei thei loah ka ngai che a, i hlimna tur ka duh ve lutuk a sin" ka ti a, ka ţap ti tih nghal der chu a ni mai. 

Ka chhipah a kut a rawn nghat a, a taksa chhe lutuk te chuan lung a ti awi thei hlawl lo a ni. 

"Sangzuala kha mi ţha tak emaw ka tia, mi pangai chhungkua an niin ka hre bawk. In inru tawh a, mi ngaihah chuan pasal um i ni tawh. Naupangtea nuthlawi an tih loh nan che harsa ti takin ka pawm ve mai a ni. Ka hrin ni lo mahla pasal nei lova ţulpui ţhak che ka hreh reng reng hleinem" a ti dap dap a, a aw dam lutuk te chuan mittui a kai chhuak lo thei lo a ni. 

"Nih leh engtin nge i nun chhoh zel? Chanchin min rawn zawt ngai miah lo te khan chhan a nei ang tiraw? Sangzuala leh a chhungte i hmaizah vang ringawt chu a ni lo tawp ang. Biak che ka tum ve lahin biak tlang i har thei bawk si" insut pah hian ka ti a, a hmel hmuh tumin ka en chho a, a mitmeng te chu a ruak huaiin ka hre mai. 

"Ka nung mawl ve tawp a ni mai. Chanchin sawi tur vak ka nei lo. I pute nen kan inbe tam lova, i pute Sawma hi ka hnaih leh biak tam ber a nia, i pa nen hian intawngin kan innei a, chuzawng  chu a ni mai" a ti a, hmui a chip nghal hmak a, damdawi chungchang kha ka hrechak a, ka zawt ngam si lo a ni. 

"Zanah i muhil thei lo ţhin em?" ti a pehhel deuh taka ka zawh chuan "Muhil thei e..min ngaihtuah lutuk duh suh" a ti mai a, thei leh thei lovin a mit hnuai a dum kual raih chu ka han ban ţawk ţawk a, a kum ngaihtuahin hetiang em em a lang upa tur hi a ni lo. 

"Thil ţha lo i ti ngai miah lo maw?" ka tih leh chuan a mitmeng a danglam zawk a, "Ti love..ngaihţha deuhin awm rawh" a la ti tho a, "Ka pa nen in in ngaihzawn hian nupui nei lai a ni tih i hria em?" ka ti chhuak phawng a, a hrilh a hai hmel lek lek a ni. 

"Va mu tawh rawh..i fapa kalsan reng mah ta che" vin deuh hlek hian a ti a, beidawng mai duh lovin "Eng nge thil thlen dan diktak ni a? I kâ aţang ngeiin ka hre duh" ka ti ve tlat a, min nawr lui ngial mah se ka ţhut ngaiin ka ţhu lui tlat. 

"Ka sawi chin bak kha sawi tur a awm lo" luhlul zet hian a ti a, kan inzawh chhuah loh hmel khawp mai. 

"Ka pa hi a nupui hmasa nen a an inneih lai rengin i kawp tih ka hria. Neihkimi hnen aţang pawhin thu dengkhawng tak tak ka dawng ţhin a, a dik lo tih tal i sawi thei lo em ni?" ngen ngawl deuh hian ka lo ti a, a ning ta deuh aniang a tho thut a, "Duhthlan tur ka nei hleinem. Ka hrisel lo a, hna ka thawk thei lo. I puten min tuithlar a, ka dam khawchhuah ve theih nan a rem rem ka thawh a ngai alawm" a tih chuan keipawh ka ding ve hluai mai. 

"Eng nge a rem rem i tih chu? Eng ber nge i lo thawh ţhin a?" ka tih chuan a ngawi leh daih a, ka dawhtheihna a tlem sawt khawp mai. 

"He inah hian ni reilote chiah kan awm tawh dawn a, tunhma ang khan kan pahnih bawkin in kan luah dun leh dawn. Rei tak kan awm dun tawh lova, i nun lo hman ţhin dan sawichhuah chu a har viau em ni? I fanu ka nih hi" tih zâwnga ka kar pawhin kawngkhar a hawng a, "Va mu rawh" a ti hmuk a, a hmel chu a lang chang vek tawh a, zawh zui zel chi a ni tawh lo. 

Ka hriatchian theih nan pindan ka la hai ru leh tho ang tih rilru pu chungin ka chhuak a, lung a zing duh khawp mai. 

Khum bula ţhingţhiin ka ţawngţai a, kan hma hun a thim em a, Pathian auh mai loh chu tih theih dang ka nei lo. Thim chhah zet hian min hual tup tup ni maiin ka hria a, ka ţap thei tawh lova, ka kawchhung a tawt up up thung. 

Zing ka thawh chuan Neihkimi'n "Hmangaihsang kal vat vat ta che. Ka pu'n i hming a lam reng a, hmu tur a i kal loh chuan ka pu chungah thil ţha lo thleng ta se i inchhir kumkhua tawh mai dawn a sin" a ti lang lang ri ka hria a, chhuak tura min tih hnu hian ka inthlahrung leh tlat tawh a, ka che hrim hrim pawh a khawr leh tawh lutuk. 

"Duh duh huna zin thei ka nih bik loh hi" a ti a, a hmel hmu lo mah ila a aw ah chuan a nin ve zia a lang chhuak thei hial.

Sofa a Bawiha ka ţhuttir hnuah choka ah ka lut phei a, an unau chuan ka lam an lo hawi rual ţhawt a, Siampuii a phe vat vat bawk.

"I va tho hma ve" Hmangaihsanga zawk chuan a lo ti a, ani pawh walk turin a chhuak dawn chiah a nih hmel. 

"Tukin chu kan harh hma lutuk a" tih pahin Siampuii dinna lamah ka phei a, "Pui duh suh..i fapa eitur buaipui zawk rawh" Neihkimin a lo ti ve khauh a, choka a awm ho chuan mak kan ti kher mai. 

"Chu U Zote, U Neihkimin Bawiha buaipui zawk turin a duh che a nih chu" Siampuiin a ti sawk sawk a, min nawr sawn pah bawk a, an awmdan chuan min ti lai lehzual. Neihkimi thil tum ruk hre lo ila chu keipawh ka lawm viau ang. 

Bawnghnute ka chhuang lum a, chaw kan ei vat zel tho a zingkarah chuan eitur ka pe tam ngai lo. 

Ka nu rawn tho chhuak chu a mit a bui deuh lâk a, Hmangaihsanga a chhuak tawh a, Siampuii lo chuan tuman kan lo be lum lam lo. Ka thinrim hauh lova, min hrilh ngam loh a nei a nih ka ring. Nunhlui chhuanawm loh tak nei te tan hi chuan sawichhuah a chakawm loh bawk a ni. Mi han biak lum lam vel ka thiam loh em avang hian ka nu nen chauh a kan awm lai pawh khan kan inbe tam ngai chuang lo. 

"Zam, tlaiah dawr khar hma rawh aw. Pa Saia ten zanriah eipuiah min sawm a, i hming ka sawi tel ringawt a" Neihkimin a tih lai chuan Zamtei a la ham bai bai a, a zi mar pah al al bawk.

"Mi in a chaw ei ka peih lo a sin le..min sawi tel ve zel a, Pa Saia te phei chu an in a kalin a haw mai theih ţhin loh lehnghal" a ti bai bai a, zawi deuh a a kut thlak thla hnawkin gas bulah a kal hnai nghal zat bawk. 

"Sawmna an hnar ngai lo, Hmangaihsanga lokal ve bawk se la, Ruattei leh U Remremi te chuan an duh leh dawn chuang lova" a ti zat zat a, amah ka en apiangin chiang deuhin min lo en ve ţhin a, ka nu khan bawnghnute kha min chhuhsak lo se ţha tur a nia. Neihkimi awm laia choka a chet chu a nuam lo. 

"A duh awm lo emai..mipa a nia, Zamtei i thunun ang ngawt chuan i thunun ve thei lovang. A thu hrimah, Malsawmi a hnar tawh ber te chuan Pa Saia te pawh hian pawh beh tum tlat lo se la, mi pangai deuh emaw ka tia, a fanu tan ţhahnem a lo ngai hle mai" Ruattei chuan a lo ti pek a, a uar em em mai lehnghal. 

"A fate ang tho a min en vang a lawm min duhsak, nel in tum ve lova, in in la hrang tlat a, hmuh dik loh ţalh in tum bawk a" Neihkimin a tih chuan "U Neihkimi chu i thu lak dan hi a dik lo ţhin. U Zotei pawh hi i en hrang mah mah. Inchhungah hian rorel tum suh, ro i rel duh tlat a nih leh thlei bik nei lovin pangai deuhin awm ve mai la. Ka pa awm tawh lo mah se nuţa kan la nei alawm. Nang aiin a naupang ngei a, mahse mipa rorel leh hmeichhe rorel chu a inthlau lutuk" khunkhan deuh tak hian a ti a, ka duh lo chungin thingpui min siam kep lui tlat bawk. 

"Engtik aţang khan nge min kalh zawnga awm hi i zir ţan a? Tun hma zawnga min kalh ngai mang si lo mi tih fek fek i ching tlat tawh" Neihkimi chuan a lo ti a, ka en duh lo lui tlat chung pawhin ani chuan min en reng ang ka ring.

Fridge ka hru daih a, ka bulah Ruattein thingpui no a rawn hung bawk a, Zamtei chuan a en ngai a la en tlawk tlawk mai. 

"I dik lohna te chu ka sawi ve bawk ang chu ka huat vang che a ni chuang hleinem. Ka pa boral hnu hian i zia a dang tlat a, min thunun vek i tum a, heti tur a ni ngai lo. Puitling vek kan ni tawh a, tuman ruihhlo kan khawih lova, thunun ngai kan awm hleinem" Ruattei chuan a ti dam thlap na a ka lo ip chawih tho. Ka nu bawk rilruah a lo lang ţhin. 

"Ngawi mai mai rawh..chhungkaw pa ber a awm tawh loh chuan pa mawhphurhna chu upa ber koah a tla ţhin. Rilru ka sen nasat ţhin zia hre hawt lovin dik lo lai zawn hmuh phet i tum a, i hna chiah ngaihtuah rawh. I dawr te hi tih len tum ve rawh" a ti ta zek a, kan awm chhung chu nitin an inhau mai dawn a nih hi. 

Hna kal a hun chuan Hmangaihsangan min lo nghak leh reng tawh a, in khatah kan cheng a, kan hun hman dan kan inhriat tawn sak vek avangin chanchin inzawh tehchiam a ngai lova, kalkawngah pawh kan inbe tam lo hle. 

Ka chhuk dawnah "Vawiin hi i piancham a nia, i hre nange?" mak tih hmel tak hian a ti a, ka harh kawk mai. Buaina ka ngah lutuk a ka piancham pawh ka lo theihnghilh pek a nih dawn hi. 

"Aih, ka hre miah lo" ka ti hluai a, min rawn enin a nui suk a, atthlak a tih hmel viau a ni. 

"Engtin nge i hriat?" ka ti a, a lo hre ve daih hi mak ka ti tak tak. 

"Ka nu ka zawt a, a rei tawh" a hmui hnuai pet zauh pahin min rawn en leh a, nuam a tih hmel chiah bik lo. 

"Ka zui ru lo che a nia, Bawiha pianchamah khan a thuphungin ka zawt a, ka la hrereng tihna zawk" tiin a insawifiah zui a, keimah berin ka sawi loh miau avangin zingkarah khan hria angin an awm lo vek a, ka nu ber pawh khan a theihnghilh a nih ka ring. Neihkimi lek phei chuan engahmah min ngai lo lutuk hi a tan chuan awm ve lo ang hmak ka ni. Ka hriat laia a chhe zawnga ka chanchin sawi bawih bawih a hreh lova, sawi tawh ang khan puppet ah min ngai a ni ber. 

"Nangmah chiahin i hria a nih chu" ka ti a, ka nui lui sâng bawk a, ka chhuah hma na na na chu ka hlim hmel chauh hmuh tir ka duh; ka thei ngût ange maw. 

Garage ah min tlan luh pui a, building hnuai ber a awm a nih avangin a thim deuh raih a, hmun dang angin êng ve uarh lo mah se chiang deuhin kan inhmu thei tho a ni. 

Hospital kawtah khan ka chhuk lo na a car a tih din rual chuan chhuk nghal mai ka tum a, min lo pawt let thuaiin "La ţhu rawh" a ti thum dût a, thuawih deuhin ka ţhu veleh mai bawk a. 

Ipte a zen rak rak a, silver ţhi a rawn phawrh chhuak a, a lek chhuah rual chuan a locket chu a inthen nalh nalh a, four-leaf clover niin stone a inphum kual vek a, a mawi khawp mai. 

"Four-leaf clover chhar fuh te hi chu vanneihna in a hmuak an ti ţhin a, chuvang chuan he ţhi hi i piancham a pek tur chein ka lo chher tir lawk a" tiin min rawn awm hnaih a, a locket chu keng kangin min enchian tir lehzual bawk. 

"Hei hian rinna a keng tel a, tunah vannei rih lo mahla ka ring tawk che a nia. I nun hi buai nuai rih mah se vanneihna in a hmuak reng che tih rinna nei tlat rawh" a ti a, a mitmeng ril ruih a min enin a nui deuh suk a, "Beiseina a entir bawk a, i nunah thil chhe ber a lo thleng a nih pawhin beiseina nei la, chu chuan hmalam pan zel thei turin a pui ang che" min ti leh a, ţhi leh amah chu ka melh tawn zak zak a, ka mittui tih tlak loh ka tum nasa hle. 

"Hmangaihna a entir tel bawk a, hmangaihna lamah hian ka fimkhur a, lem ka chang ngai lo bawk. Hmangaihna hi sawifiah vak ngaihna a awm loh rualin keimahniah a chiang a, hmeichhe dang hnenah ka hmangaih che ka la ti ngai lo. Ka hmangaih miau loh chuan anmahni tih lawm nan ringawt a hmangaihna hman ţangkai ka tum ngai lo. Mahse Zote, nang chu ka hmangaih che. I eng lai ber nge ka hmangaih ka hre lo, engtik laia inţan nge a nih pawh ka hre chuang lo. Ka hmuh che hian ka taksa hnathawh dan a danglam em em hran lova, mahse ka hlim tak tak ţhin tih chu ka hria" a ti deuh duah a, ţhi min awrh tir lai chuan ka lo insiamrem ve a, engtikah nge vanneihna nen chuan kan intawn ve ang le? 

"In rawn awm hlim kha chuan ka khawngaih che u a, ka rilru put hmang a danglam tial tial thung a. Unau kan nihna hian min phuar ve ţhin, pawh lo tur chein ka insum nasa a, ka pu tlawh tura ka kal hmasak ber ţum kha a ţul vang a ni lo, rilru dang ka put theih beiseiin ka inla hrang rih zawk a nih kha. Mahse ka danglam phah chuang lem hlei lova, ka rilru put hmang kha a dik a nih ka rin theih phah a, ka inpawm hnuah chauh ka umzui che" a ti a, a hmel chu a thutakin thudik tak vek a sawi tih a hriat theih a ni. 

"Ka lawm lutuk" nui chunga tih pahin ţhi locket chu ka hum vang vang a, "Ka ring ang a, ka beisei ang a, vanneihna nen chuan kan la intawng ve mai ang. Ka lawm lutuk tak tak aw" ka ti a, hmangaihna ka sawi tel loh avang chuan a hnual rawih niin a lang. 

Tumah an awm ve lo bawk a tiin rang deuhin ka che a, a biangah ka fawp zauh. Ka zak ve viau tho a, mahse kan inhmu rei tawh dawn chuang hleinem. 

"Kal tawh ang" tih pah a chhuah mai tum a ka inher chu ka darah hmerin seat nghenchhanah min nam bet a, mak ti deuhin ka lo en a, a hmui leh ka hmui a insik lai reng ka hre lo. Engkim chu a thleng thut a, ka hamhaih lutuk tlat a ni. 

Duhthawh deuhin min fawp a, chhan let nachang pawh ka hre lo. A lei chuan ka hmui rawn nawr kauin ka kâ chhung chu a hawl kual a, ril leh zei fahrana min fawhna chu chhan let loh a har khawp mai. Chiang deuh a sawi vek chi a ni hran lo bawk, midang hriat ve ka phal lo a ni ber. (😂)

(Uar leh lutuk a ziah chu kan tih ngai loh kha aw💛)

A hmui a lak hran chuan ka lo thaw hle hle a, min la hnaih lutuk tho a ni. 

"Sapţawng thiam ve tho mah ila piancham chibai aw Zote" a ti a, a nui ri suk a, keipawh ka lo nui ve ringawt. 

"Thilpek dawn ka lo in beisei hauh lo a, lawmthu sawi ngaihna ka hre tawh lo zawk" ka tih chuan "A ngai lo..ka hmuh phak a i awm chuan a tawk" tih deuh sup pahin ka chal a rawn tauh dat a. 

"Kal tawh teh ang kan tlai lutuk dawn" tiin keimah zawkin kal ka rawt leh a, ani anga inthlahdah thei ka ni ve miau lo a ni. 

"Umm..ka fawh leh hma che hian kal teh ang" a ti fiamthu a, hreh deuha a inlakhran hma chuan ka hmui hnuai lam chu a'n pet leh hram a. 

"Happy birthday" Zonuni leh Rba te pawh an lo au ring kher mai. Birthday cake kutphah tiat vel lek an keng a, "Kan eizo seng dawn si lova, hei mini birthday cake a nih hi..a te chi" Zonunin a lo tih chuan Hmangaihsanga pawh a nuih a za ve viau mai. 

"Tikhan nuam deuhin lo hmang rawh u" a tih hnuah min kalsan a, a pindan lamah hmanhmawh deuhin a kal phei a, kal pah chuan a sana bun lai a bih zawk a, chu mai mai te chu ka lo hmu hman vek mawle..ka va'n enchiang awm em em. 

"Engtin nge ka piancham a ni tih in hriat a?" ka tih chuan "Facebook" an lo ti rual ţhat a, ni tak e, khawih ngai lo mah ila ac chu ka neih ve ngei kha mawle. 

"Ehh...keichu ţhi thar ka hmu a" Zonunin a tih rah rah takah chuan Rb-an a rawn en ve vat a, an pahnih chuan min chhaih zawmin Hmangaihsanga hming pawh an lam ngun dun khawp mai. 

Zonuni chuan kawr nalh deuh min pe a, a mipa zawk Rba chuan clutch min pe ve thung a, "Bible leh hla bu a leng" a la ti zui. 

"Awii...in fel e" ka ti deuh hluai a, an lo nuih hak hak lai chuan "A nia lawm..engmah ka beisei hauh lo a sin. Ka piancham a ni tih in hriat pawh ka ring lo zawk a" ka ti leh a, ka piancham a thil pek ka dawn loh nachin pawh ka hre tawh lo. 

"Kan tih theih ve tawk a nih kha" an ti a, casualty lam an buai tak deuh avangin Rba chuan min kalsan a, chhun chaw min leisak a tum ruh hle mai bawk a. 

Chhun chawlh a nih chuan Rba nen kan inzui chhuak a, ţhian a neih deuh ringin "In luah tur min dap pui dan i hria angem le? An sual vang ni hauh lovin mi in a inthlahrung deuh a awm ai chuan mahni a awm hran ve ka duh a" ka ti a, mak a tih hmel kher mai. 

"Deuh teh thut che chuan..nang hi buaina i tawk a ni chiang mai. Chhuak turin an ti che em ni?" a ti a, a ring dik lutuk chu ka hrilhhai let zawk hial a ni. 

"Ti chuang lo e..ka sawi ang kha a ni mai. Ka inah ka ngai thei tlat lova, rethei mah ila mahni in leh mi in chu a in nawm hleih emai" pangai taka lan tum chunga ka tih te chuan ngun thluk deuhin min lo en ran a, "Ka zawt mawi mai mai che a nih kha. Buaina i tawk tih te chu ka hriatna a rei tawh. I hlim lo a, i en ngai i lo en leh vung vung zel bawk a, engin nge tibuai che? Puih theihna che ka neih chuan ka pui ang che" a ti a, sawi mai tur ka hre lo chuan ka kut ka khal neuh neuh a, a zirchhuahna a la rei lova, dinhmun a siam ţan ve mek a, diktak chuan tihbuai ka hreh a ni. Inthlahrung chi nih hi chu a buaithlak, tu hriatpui si loh hian a rukin hrehawm kan tuar a, miin ho deuh a an ngaihah te hian ka inthlahrung bik tlat zel. 

"Ka chhuah ngei chu a ngai alawm" ka ti ban charh a, "Ka nu hruai tel a ngai bawk a, ka pa ber a boral tawh chuan awm reng nachhan tur a nei bik lova" ka tih zawm leh a, lainat hmel takin min en a, kei chuan ka landan tih danglam loh hram ka tum thung. 

"Ka lo ngaihven dawn nia, ka theih ang angin ka pui ang che" a tih chuan "Min zep sak tlat bawk rawh aw" ka lo ti a, mak a tih deuh vang nge a meng tal tap mai a. 

"Zep ngai chi a ni rih a, Zonuni hriat pawh ka duh lo. Ka mangan em vangin i puihna ka dil che a, midang hriat ve chi a ni miah lo a nia" ka ti mawlh mawlh a, min en vang vang hnuah a bu nghat a. 

Tlaiah chuan Zonunin min thlah a, nidang aiin ka thleng hma deuh. Hmangaihsanga lo haw chu "Pa Saia te inah chaw i ei ve dawn maw ka tia ka chhum kep reng reng lo che" Siampuiin a lo ti var a, keipawn a ei ve daih turah ka ngai.

"In phal zat zat min pe ţhen ve mai dawn nia" tih pahin Bawiha a rawn piai a, a lo la ngen zui. 

"Tunlai chu U Hmangaihsanga a ngaina thar riau a, a inti tlangval ve deuh tawh aniang" Siampuiin a lo ti hlut a, midang hmuh lai chuan pangai deuhin a awm ve mai. Bawiha pawh inchungah a pawm chho a, "Lo inring ru aw a ţah chuan ka rawn theh thla dawn a nia" a ti uang vel a, duhdah deuh takin a pawm na a Bawiha chuan nuam a tih hmel phian a. 

"U Zote lokal teh" tih pahin Siampuii chuan min hui zauh a, choka a kan inzui phei hnuah "Ka pi a chhuak a, a lo la haw miah lo a nia aw. Phone ka tum a, a la duh bawk si lova, chawhma lam khan a chhuak daih tawh" a ti sar sar a, "A va mak ve khawnge a kal ang a? Nidangah a chhuak ngai em?" ka tih chuan "Aw mahse a rei ngai lo. Chhuah zeuh chang a nei a, nitin phei zawng a ni lo. Ka pu pawh khan a hria a mah se a sawisel ngai lova, vawiin chu a rei e" a ti nang nang a, ka nu ka rinhlelhna a zual sawt mai. 

Ngaihţhat loh sa nak laiin rinhlelh turin a awm reng bawk si, ţha deuha sawipui ka tum lahin ngawih a chuh tlat a, thuruk lian tak a nei ngei a ni. 

CONT...