KA HRINGNUN THAWNTHU-14

KA HRINGNUN THAWNTHU-14

Ruattei lo haw pawn ka nu a zawng a, a chhuak a la haw loh thu kan lo hrilh a, U Remremi lahin min zawt deuh chhen bawk si, nu te hi chu an lo pawimawh em a ni. 

A lo haw chu pindanah ka zui lut a, "Hmangaihsanga a zin ţep tawh. A rukin lo in pack lawk ve deuh rawh" amah zawk chuan a ti a, kil khatah suitcase a in chherchhuan a, a inrin tawh hmel viau mai. 

"Ka ţhianpa hnenah in luah tur min zawn pui turin ka hrilh a" ka tih chuan "I pute Sawma kan fin ang. Ka be vek tawh" a ti ta mai a, fel viau mah se ka putea hnena awm chu ka hreh ngang mai. 

"Nu, zu a zuar tih i hria ang tiraw? Ka fapa hi zu dawr a seilian turin i duh em ni?" ka ti chang fak a, sam ţawn pahin min rawn en a, a hmel chu a nelawm tawh hlawl loh. 

"I duh chuan in luah tur i zawng thei alawm. Min zui kher ka phut hran hleinem" a ti dam thlap a, rilru a buai takzet a ni. 

"Ka putea fin lo mah ila kan awm ve thei tho ang chu. Nau i lo awm ang a, keiin hnathawh tur ka zawng ang a, Neihkimi pawisa min pek hmangin eichawp dawr te kan siam ve ang a, kan nufa a awm chu i huphurh viau em ni?" ka ti a, ka rilru hah leh thinrim chu ka thawk thlengin a rang vek thei hial a ni. 

"Hmangaihsanga i hmangaih avanga hetianga awm hi kan ni" nghert charh a a tih chuan "Eng maw?" ka lo ti halh a, "Nang lehzel pawh maw?" ka ti nawn leh kher bawk a, min tih duh dan chu mak ka ti takzet a ni. 

"Nangmaha i awm duh loh leh i pute fin la, an lo duh kher che angem ka hre lo mah se keichu i putea hnenah ka awm ang" a ti hmak tawh mai si a, han hnial chiam ila a rilru ka ti hel tial tial ang tih ka hlau bawk si, a ruk tak chuan ka kalsan dawn miah lo tih a hria a ni. 

"I pu te fin ta ila tenawm tiin min hnawt chhuak leh tho ang" a ti uk a, sawisual intih hmel deuhin a ngawi leh daih a. 

"Engati nge tenawm an tih che? An hnawtchhuak che a maw?" ka ti hluai a, min en leh duh tawh lovin sir lam min chhawn leh tlat tawh a, tuna ka nu hi min hringtu nu nau a nia, a la upa hauh lo. Ka pahrawn nen phei kha chuan kum inthlau tak an ni. Mahse, a lang upa in a mitmeng te chu a thi bal a, a vun a nung lo hrim hrim bawk a, a cherin a dawl dang viau a ni. 

"I duh chuan i pu te chu fin la, eng tin pawn awm la ka sawisel lovang che. Keichuan i putea hnena awm ka duh a, min sawisel sak bik lo la" a ti a, thu ngai hlir kan sawi a, ka hriat duh ber min hrilh a tum chuang lo. 

"Kal tawh rawh...chaw ei an duh tawh ang" a tih chuan lungawi zan lo chungin ka inher a, chhuat a thil tla ri ka hriat takah chuan ka hawi let leh rang hle thung. 

Ka nu bag a lo ni a, khum a awm reng kha a ni nghe nghe. Zipper a phui loh avangin a chhunga mi a tla chhuak deuh vek a, chhuah tum uk tawh si kha ka nu thil tla chhar pui tumin ka ţhu tung veleh a, "Kal tawh zawk rawh" min lo ti mah se ka chhar pui mawp mawp tho.

Damdawi bur vel dah luh tum a bag ka hawn chuan lehkha ka hmu a, "Bag kha han la teh" ka nu'n a lo tih nghal zat takah phei chuan ngaihţhat lohna a zual a, lehkha chu enchian ka chak zual phah sauh mai. 

"Ka ţawng i hria em?" khauh deuh a tih pah a bag min chhuh a tum chu ka ding hluai a, muangchang lovin bag a lehkha chu ka en nghal zat bawk. 

"Chhuak tawh tur a ka tih che kha" tih pahin min rawn hnaih leh a, lehkha bih reng chung chuan ka tawlh hnung a, ka thil hmuh chuan min ţhawngin ka mittui a ti hnâm nghal thei hial a, ka rap takzet a ni. 

"Hei vang hi em ni damdawiin a kal i duh miah loh? Ka rual a kal tur pawn ka tur nasa che a, min hnial zel nachhan kha hei hi a ni em?" ka ti a, mittui vangin ka nu hmel ka hmu chiang thei tawh lova, lehkha pawh chu min chhuh luih a tum tawh lo. A ding tawp a, hmui a chip tlat thung. 

"Ka nu, HIV positive maw i nih a?" ka ti a, ka aw chauh a khur lo, ka tiril zawng zawng thlengin a khur vek thei hial a ni. 

"I ni maw? I lo positive reng a maw? Engtia i kai nge ni a? Ka nu, min chhang ta che" ka ti mawlh mawlh a, ka thaw a rangin ka awm te chu a insep dawrh dawrh thei hialin a nia ka hriat ni. 

"I hre tawh alawm. Duh aiin min buaipui mah mah a ni. Min rinhlelhna i nei tih pawh ka hria" dam thlap a a tih chuan "Ka ringhlel daih tawh che mahse, HIV kher kher chu ka rin loh ber te zing a mi a ni. Cancer emaw natna dang i nei a nih ka ring a, he natna hian i taksa ah hmun an khuar ve ka ring ngai lo. Bag kha thlauh hlauh lo phei la chuan ka hre dawn miah lo tihna a ni a, engvanga thleng nge? Vanduai vang nge thil dang vang zawk? Hei vang hian em ni ka pute chuan an ten che?" ka ti hlawk hlawk a, ţawng rin theih se chu ka au tuar tuar ang. Ka thaw a ipik lutuk hian au vak vak min ti chak a ni. 

A damdawi ken lai ka chhuh sak hmawk hmawk a, damdawi mum sawl chi, lian ve angreng tak te chu eng nge a nih sawi chat thei lo mah ila ka nu tan a a pawimawh tur zia erawh ka hria. 

"Nu...chaw ei kan peih tawh a, in ei nghal peih dawn em?" pawn aţanga Ruattei aw lo chhuak ka hriat rualin damdawi leh lehkha chu bag ah ka khung sawk sawk a, "Aw..kan lo chhuk dawn nia, Zotein pindan min tihfai pui a" tiin ka nu chuan a au let a, thawm dang hriat tur a awm tawh lova, Ruattei chu a kal lehnghal daih aniang. 

"Chaw ka ei peih lo. Nang angin ka inthunun ve thei lova, midangin min rinhlelh phah mai mai zawk ang. Chhuanlam min siam sak mai rawh" ka tih chuan engmah sawi lovin a chhuak a, thil awmdan zawng zawngte chu ngaihtuah kualin ka insehruh ngawt ngawt a, ka bei a dawng takzet a ni. 

Ka pindanah letin khumah ka mu kawm chial a, mittui ka dang bet hleithei lo. Ka hriatna zawng zawngte hi bo thut se ka ti rum rum a. Ka thil hmuh leh hriat te kha ka rap ngawih ngawih a, HIV+ te hi ka thinhrik tihna a ni lo, mahse mahni ngeiin han tawn ve chuan a mi den dan a lo dang bik em a ni. Midang ta tura ka ngaih kha ka nu ngeiin a vei ve a, tunah ka hre chiah lehnghal chupawh tihpalh thil takmeuhin. 

Saisirin tukverh lam ka hawi a, Bawiha ka ngaihtuah thei rih lo. Ruattei a awm bawk a tiin ka inla hrang lui a ni. Ka nu kha chu a mittui pawh a tla ve miah lova, mittui a nei ve tawh lo aniang. 

"U Zote, Bawiha thawmhnaw ka lo thlak lawk dawn a nia" tih ri ka hriat rualin pindan kawngkhar a inhawng nghal zat a, ka lo muhil der ta ringawt a. 

"Ehe...i nu chu a muhil em mawni le. U Zote i damlo em ni?" tih pahin Ruattei chuan min rawn hnaih a, a aw ah chuan a ngaihţhat lohzia a lang chhuak tel bawk. 

Hlauh ang ngeiin ka chal leh biang vel te chu a kutin a rawn dek a, "I khua a sik bawk si lova, mahse ngati nge i hmai a huh dup a" a ti a, meng lo mah ila hnai teah min bih tlatin ka hria. 

"I ţap em ni?" aw dam tak hian a ti leh a, thawm chhuah mai ka hlau lutuk chu ka insehruh nasa kher mai. Ka meng ngam lova, ka hmui takngial pawh ka ti che ngam lo. 

"Bawiha i thawmhnaw ka thlak sak ang che aw...anu hi a damlo a, zanin chu keiman ka awmpui dawn che nia" a ti a, mi â a ni lova, ka awmdan chu a hrethiam vek tih ka hria a ni. 

Ka muhil lo tih a hre bawk a ka fapa a buaipui lai chuan 'Hlau suh ka awmpui che' tih hla ngei kha a sa a, min hmuh hlau deuh a chein ka ţah loh nan ka kut ka seh ta ringawt a. 

"Hmatiang hmuh lawk loh kawng,

Hlauhawm a hnai thei;

A hnai zawk Chhandamtu'n,

'Thlamuang rawh,' min ti" tiin a zai rat rat a, keimahah inchanin ka mittui a sur zung zung a, ţah ka insum nasa lutuk chu ka thaw a hah thei mai dawn te'n ka hria a. 

Ka hma lam a kawng hi ka hmu lawk lova, engin nge min hmuak ka hre hauh lo bawk. Hlauhawmin nge hlimna in min hmuak ka hmu lawk thei lova, chuti chung chuan engtin nge thlamuang taka ka awm theih ang ni. Ka nu tal hian buaina nei lo se chu tun ai hian ka chak deuh mahna. Mahse ka hlau a ni, ring tu mah ni ila ka hlau takzet a ni. 

"Zan khaw dur hnuaiah pawh,

He tiamthu a eng;

"Ka kalsan lo vang che,

Malin i awm lo'ng a " a ti" tiin chang tir lam a sa leh dawrh a, min en zeuh zeuh reng dawn tih hriain che lova awm ka tum nasa takzet a ni. 

Mi tam takin min hual ţhup a, mahni a awm lai nei mang lo chung hian mal ka inti tho si a, kei hi ka piangthar tak tak lo nge mahni inkhawngaihna ka dah langsar lutukin Pathian min hmangaihna leh ka tana a thil tih te ka hmuh hmaih zawk? Pathian thlamuanna beisei tak tak lovin mihringah thlamuanna ka lo zawng zawk tihna em ni le?

"Malin ka awm lo'ng,

Ka hnenah a awm;

Aman min awmpui a tiam si,

Mah riakin ka awm ngai lo'ng" a la ti rât rât a, ka ngaihthlak tur chauh a bul ţan si kha a zai tui ta phian a nih ka ring. Kei lah chuan hla thu chu keimah ka lo inhmeh bel zel a, Ruattei duh ang ngeiin ka ngaithla uluk khawp mai. 

Hmatiang ka hmuh lawk ve theih miah loh kawngah hian hlauhawm tam tak a hnai thei a, mahse chung hlauhawm te aia min hnaih tu zawk chu Isua a ni. Chu ti ang a ni chung chuan hlauhnain min zem chiai chiai reng tho a, mala ka awm loh tur thu min tiam mawlh mawlh chung pawhin ka hmangaih te leh min hmangaihtute hi nitin an hla zel ni maiin ka hria a, Pathian rorel dan hi a chang chuan hriatthiam a har ţhin khawp mai. 

Ruattei hla sak chuan min hneh takzet rualin ka beidawnna erawh a la kiang zo chuang lova, ka awmdan hi sawifiah theih chi pawh a ni lo, natna in min luhchilhin ka taksa zawng zawng thlengin a fan chhuak vek ni berin ka hria a, hlauhna leh beidawnna a lian a, ţawngţai ngaihna pawh ka hre tawh lo. Ka dil loh hlir ka nunah a thleng miau a ni. Hrehawmna leh natna te, hlauhna leh beidawnna te hi ka dil ngai miah lo a sin mawle. 

Ruattei bawk chuan puan min rawn sin tir a, ka tan a a ţhatna zo zai te hi pawisa chuan rul let dawn ta ila a tam tham viau ang. Engtikahmah ka rul seng dawn lo tih ka hria a ni. A chhuah pah chuan "Lut lo mai rawh..a nuam sam lova, zanin chu amahin awm rawh se" a ti ri ka hria a, kawngkhar a inkhar phui chiah rual chuan chhum chhah deuhin min bawh leh nghal mup ni maiin ka hria. Ka bing chuk chuk a, vanduai bik riau a inhriatna in ka khat a, thih daih duhnain a rawn zui leh a, keichuan Pathian thlamuanna hi ka la hrethiam ve tak tak lo a ni ber. 

Zingah chuan lu a na bur a, mit a thip ram mai bawk a, Ruattei leh Bawiha inchhaih thawm ka hre hmasaber a, an lam pana ka kal lai chuan "I tho hma ve duh kher a nih kha..coffee i duh em? I harh huai mai ang" a lo ti seuh seuh a, ka danglamna leh zan lama thil thleng kha chu hria angin a awm lo hrim hrim. 

"Aih a ngai lo..nizan in mu thei em?" ka tih chuan nui var varin lu a bu nghat a, "U Remremin lo riah ve a duh tlat a, chhuatah kan mu tawp alawm" a lo ti var a, ka tello a a mut theih ka ring miah lo a nia, Bawiha pawh a fel ve tawh khawp mai. 

Zanah khan ka ţap muhil a ni ber a, ka fapa ngaihtuah thei lek lova ka awm chu a zahthlakin Ruattei lakah pawh ka inthlahrung a, mahse ka thu hriat khan min deng na em a ni. 

"Hna i ţhulh thei lo ang tiraw?" a tih chuan ka lo bu zauh a, "Ka nu a la tho lo a, ani pawh a nuam lo a nih ka ring. Keichu tu hnuaiahmah ka awm lova, vawiin chu dawr hawn ka tum lo mai. Rilru nuam deuhin kal la, Bawiha hi ka lo awmpui dawn nia" a ti a, "Chuan nizanah nikum daiha i inlengpa kha instagram ah ka hmu a, ka follow hmak mai mawle" a ti zui zat a, Lawmkima a sawina a ni tih ka hre ve nghal mai. 

"Nang hi i lo star ve deuh a ni lo maw?" ka tih chuan a nui kar kar a, "A mizia ni deuh mual mual kha ka duhzawng tak mawle. A rinawm ngawt ang. Kumthar ah ka lokal leh dawn i ti ve sia, a lokal leh si lo em ni?" a ti a, min en chik em em mai lehnghal a. 

"Ka hre lo..lokal se chu min hrilh awm tak a nia, Lawmkima i neih chuan thingtlanga i mo a ngai dawn a nia" tiin a lo fiam ve a, rilru hruai peng thei thil a sawi chhuak chu a lawmawm letling zawk. 

"Chutiang a ho emai, mipa tak a nih chuan a tawk mai. A chang chuan thingtlanga pem daih ka chak ţhin asin. An nunah hian mizo ze nghet kha a la bet tlatin ka hria a, khawpui mite angin hnam pui ho zia leh inchei dan te an la lachhawng ve vak lova, khawpui mite hi chu changkang zawkah in ngai mah ila changkang kan teh danah hian dik hlel a awm ţhin a, ţhenkhat phei chuan mizo ţawng an hmang zak emaw tih mai turin an thusawi laiah sap ţawng an rawlh thla zen ringawt a, bakah in elna a sang tawh lutuk a, khawtlangah chauh nilo kohhran thlengin rethei leh hausa kar a hla tawh lutuk. Mi rethei tan chuan kohhran upa atana thlan chhuah nih te hi a har tawh a nia aw, kan intihsiak a, mi hausa bawk an dingchhuak a, ka ngaihdan hi a dik vek kher lo ang mahse, ngaihdan neih ve chu a thiang alawm tiraw?" a ti a, amah te hi a mak ve hrim hrim reuh a, chapo thei khawpin an hausa a, a inngaitlawm em em thung. 

"Ih maw U Zote, Bible chang ka duh ve deuh chu 'Mi rethei leh hausa an awm za a, an vaia siamtu chu Lalpa a ni' tih kha a nia, Pathianin angkhat a a siam ţheuh ţheuh inthlei thei kan awm hleinem tiraw? Tunlaiah chuan in el lovin kan in er tawh a, infuih lovin kan in rel a, mi ţhatna sawi kan hreh hlawm bawk si. Mahni leh mahni ţha kan intih lutuk vang a ni ber a, midang han fak te hi kan han hreh khawp a, mi hlawhtlinna lah lawmpui thei lovin kan sawisel a, a hahthlak i ti ve em?" a tih chuan ka lo nui ringawt a, mihring rilru inang lo ţheuh pu kan ni a, khawvel hi chu mi pakhat duhthusam ang chauhin a kal thei miau lo alawm le. 

Chaw ei hun thleng pawh a ka nu a la rawn thawh loh avangin Hmangaihsanga pawh a ngaih a ţha lo ţan a, ka landan a dik chiah lo bawk nen, keipawh min en duh khawp mai. 

"I nu han ngaihven rawh" Neihkimin a tih chuan "Keimah ka han kal ang" tiin Hmangaihsangan min lo khalh a, hepa hian ka nu chanchin hi a hre vek tawh angem le? 

"Ei san ang u..a peih hunah a ei ve mai ang" a rawn tih takah chuan chaw ei kan siam a, ka ruala kal ve ziah a duh avang hian nidang aiin chaw kan ei hma ţhin. Kei tak phei chu ka insiam peih thlap tawh a, ka mitmeng a dik thei si lova, makeup ka hman ve phah nual mai. 

"Engtikah nge kal i tum?" Neihkimi chuan a ti leh tawh a, a dawhthei lo sawt viau a ni. 

"Naktukah" ti a Hmangaihsangan a chhan chuan ka chaw ţhial lai ka tawp chawt a, vawiin chauh ka hmu thei tawh dawn tihna a ni maw. 

"I chamrei angem?" a ti lehzel a, "A tam berah zanhnih bak ka riak lo ang" tiin ţha deuhin a lo chhang ve zel a, hmanhmawh deuh a kan chet rum rum a ngai tihna a ni mai. 

Chaw ka ei hmanhmawh lutuk chuan ka helh pek a, ka awmah a tang tlat a, ka irhfiak phah hial a, thawh ka tum laiin Neihkimin a tui intur inchhawp lai min rawn pe ve mial a, "Hun a la tam..ei hmanhmawh suh" min ti a, lemchang a thiam lutuk te chuan Sangzuala nu min ti hrechhuak rum rum thei nia mawle. 

Tui ka in chiah chu a na thla veng veng a, Hmangaihsanga chuan min en uluk viau tih ka hre bawk. Naupanlai aţanga hrawk chak lo ka nia, thil ka ei hmanhmawh ve thei ngai lo. 

Tual a min lo nghak chu mak ka ti tawh lem lova, vawiin chauh kan kal dun thei tawh dawn; chuvang chuan phur hmel takin car ah chuan ka ţhu lut a, ka ţhi a lan chian theih nan tlem a kawr nghawng zau ve deuh ka ha a, Hmangaihsangan ka ţhi awrh lai a hmuh chuan a nui suk a, seat belt min hren tir pahin "I nalh lutuk" a ti sup a, mahse amah zawk hi a chauh hmel riauin ka hria. 

"Nizanah i chhuak em ni?" ka lo ti a, ka pindan a rawnkal tum kha amah hi a nih ka rin viau laiin "Aw..zing lamah ka lo haw chauh. Bethsebi an rawn hruai a" a ti a, ka hriatna a ţhat loh tehreng nen kha naupang cancer kha chu tun thlengin ka la hria, ka ngaihtuah zui fo ţhin vang aniang. 

"Eng nge a an?" ka ti a, ka mit na deuh ţhum chuan men a ti nuam lo va, ka khap leh fak fak ţhin bawk a. 

"A zia leh tawh...ka lo haw tlai sia, ka rawn rim duh lo che a nih kha" fiamthu a a tih chuan a ngaihţhat nan ka lo nui lui a, min hmu lo a ka lawm zawk, khatiang teh nuaih khan min rawn hmu se chu a chhan hriat a tum leh ngei ang a, thil a ti harsa lehzual vek ang. 

A ţhutna lam ka hawi phei zeuh zeuh a, mipa hmelţha tak chu a ni ngei mai. U Remremi hi chu a hmelţhat em vang hian tuman an tluk lova, chuti tih lohah chuan a farnu te ho hian mipa ber hi an tluk lo. Sir zawng ngat phei chuan a landan hi a mipa zual bik a, a landan piah lama a thinlung ţhatna zawng zawng nen, sawiselna tur ka hre lo a ni ber. 

"Ka hmuhnawm viau em ni?" a ti a, a nui pah suk bawk a, ka lo en leh veng veng tawh tih inhre chawpchilh nghalin zak deuhin hmalam ka hawi a, "Rilru kap tu i nei em?" min ti a, lu ka thing ringawt a. 

"I zin hunah chuan ka ngai ngawt ang che" ka ti ve ta nge nge a, hmangaihna lam sawi dun chu ka duh tawh hauh lo. Beiseina ka siam uk ang a, reilote hnuah beidawnna ruamah ka kai lut ang tih ka hlau a ni. 

"Keipawn ka ngai dawn che. Ka cham rei lovang" tih pahin ka mal a rawn hmer zauh a, "Nizan i mu thei em?" hmalam melh ran chung hian min zawt a, "Aww...mu thei e" ka ti ban charh a, a hmel landanah chuan ka thusawi chu a awih leh awih loh ka hre thei lo. 

"I mit a bui luk a, i ţap em ni?" a ti chiah reng a, tu tan mah hai theih ni hek lo le. Nizan kha chu ka ţap nasa ve em a ni, ka ţap thawl thei hauh lo lehnghal a. 

"Ka mumang a ţha vak lo a, chuvang chu aniang. Mang lamah ka ţap ang a, ka ţap chhuak tak tak a ni maithei a sin" pangai thei ang ber a lan tum chung a ka tih chuan a lo kiai suk a, "I mumangah chuan eng nge i hmuh a?" damthluam hian a lo ti a, a bul a awm hi chu a hahdamthlak bik ţhin a ni. Ka pa kha a chhun khawp mai. 

"Ka hre tawh lo...mumang te chu zingah kan theihnghilh vek zel alawm. Rei vak lo pawh ţap ila ka mit hi a bui vek zel bik a" ka ti zat zat a. 

Hospital kan thlen chuan garage a lut ve tawh lovin kawtah ka chhuk tharh a, "Chhun chaw ei dun ang aw" a ti hram a, ka lo remti thlap. Vawiin chiah hun kan nei tawh tih chu ka inhrilh nawn ngun ber te zing a mi a ni ngei ang. 

Rb-an min lo bekbawr sar sar a, in ruak a ngaihven nghal tih te, a van zia te min lo hrilhin a beidawn hmel khawp mai. 

"Pawi ti duh suh..ka nu'n ka putea fin phawt a duh a, ka putea hnena kan awm hunah muang marin kan zawng leh dawn nia" ka tih hnuah "Naktukah kan chhuak ang" ka ti tel zauh a, min en phawk khawp mai. 

"In chhuak rum rum dawn amaw? Engin nge in inthiar chhuah dawn a? Bungrua in ngah em? Motor in be tawh em?" a ti mawlh mawlh a, min ngaihtuah lutuk avang chuan ka nui ta ringawt a. 

"Bungrua kan ngah hran lova, motor lian a inthiar a ngai lovang" ka tih chuan "Taxi ah in leng dawn em ni? I nu leh i fapa nen a nih chuan pickup tal in mamawh ang. Biak tur ka hria alawm..ka lo biak sak ang che u" a ti zung zung a, hnar duh viau mah ila hnar ngaihna a awm ngang lo a ni. 

"Naktuk dar engzatah nge chhuah in tum?" a tih laiin Zonuni a lo lang hlawl a, "I lo thleng tlai thei si, naktukah dar engzatah nge i chhuah ang? Kan lo nghak ve ţang ţang zel che a, U Zonuni ang hian lo thleng ve vat vat zel rawh" a ti ta daih a, Zonuni pawh chuan "A dik chiah..keipawh chhangchhe nu ve tho ka nia. A hunah ka thleng zat zat thei tho" a lo ti ve nghal zat a, kan thusawi engmah a rawn hre pha lo hlauh chu thaw a veng deuh huai thei alawm. 

Chhunah Hmangaihsanga nen thil kan ei dun a, kan inbe tam hran lo, ţawngtlem mi nih hi chu a buaithlak, rual kan pawl lo bik riau ni ten ka hria a, ka thil eipui pa lah keimah ang bawk a ţawngtam lo ve tho a nia, "Ei ţeuh rawh aw" tih te, "A tui em?" tih vel mai mai bak min zawt lo. 

Kan eizawh hnuah pawisa a pe a, kei lah chuan ngaihtuah chiang mang hlei lovin "Nu Sangpui, ka ba kha ka lo pe ve nghal ang" ka ti pek a, "Engzat nge?" Hmangaihsangan a lo tih chuan a hun lo ah ka sawichhuak tih ka hre ve chiah. Pawisa pek sak ka phut hmel lutuk a, a nuam lo duh tak tak a ni. 

"800 chiah a la nia, a la tam hleinem Zote" Nu Sangpuiin a tih chuan wallet aţangin 500 note pahnih a lo phawrh vat a, counter a a dah chuan pawisa chu ka lo hup thawk a, "A ngai lo..keiman ka pe dawn" ka tih te chuan a ngawi ran a, pawisa lak let a tum chuang lo. 

"A phal phawt te chuan pek tir mai mai teh..nang aiin a nei zawk daih" tih pahin Nu Sangpuii lah chuan ka kut chu a hnawl sawn kher lehnghal a, "Ka pe thei alawm" ti ve ţang ţang mah ila Hmangaihsanga pawisa chu a la hmak a, nuih pahin a kir min la pe daih zui. 

"Kha la rawh" pawisa kir pek let ka tum chu "Lumum-a diaper man tur a ni mai" a ti then a, a la duh lo reng reng. Nuam ka tih loh zia chu hria se a la ang mawle. 

Tlaiah Neihkimi hmu turin ka kal a, mahse eng lehkha mah ka ziak lo. Ka luh rual chuan a kut a kuangkuah a, "I khar phui em?" awmze nei deuh a a lo tih chuan kawngkhar chu ka va endik leh a, ka kharphui mai bakah ka kalh thlap. 

"Naktuk aţangin ka kal tawh lo ang. Chu chu rawn hrilh che ka tum a, inah sawina hun remchang a awm kher lo thei a" ka tih chuan buk nghat pahin "Ţhu rawh" min ti a, a dawhkan hmaa chair chu a kawk pah zauh bawk. 

"Ka pa'n i nu tan ro a hnutchhiah lo ka tih khan ka ti mai mai hauh lo a nia. Ro sem tur a nei tam lo bawk. Inhmun tih vel chu a awm a, mahse chu chu ka nu dam lai daih tawh a kan unau inkim a a lei a ni, i nu nen hian engmah an lei belh lo a nih hmel. Mahse pawisa a pe reng a, hman dan a lo thiam ru viau te a nih chuan i nu hian pawisa a la ngah ang. Sawi tawh ang khan nupa an nihna bak chu ka pa nen khan inzawmna thuk zawk an nei pawhin ka hre lo, chu chu ka hmuh dan diktak a ni. Inpawh deuh si khan an inhlat ru riauin ka hria a, ro chungchangah hian keimah min dem ngawt ka hlau khawp mai. Ka pa khan a duhdan thlapin thil a ti a, i nu in chan a neih loh avangin pawisa pek ka tum zawk a, mahse a lo hnar" a tih chuan ka meng phawk nasa ngawt ang ka ring. 

"Engtik khan nge i lo sawipui a?" ka tih chuan "Niminah" vei loh hmel deuh hian a ti a, ka rilru a chhia a ni maithei, mahse keichuan lak theih ang zawng zawng lak sak vek se ka ti. U Remremi a enkawl vang hrim hrim pawn ro a chan ve loh rau rau chuan pawisa tal laksak turin ka duh bawk. 

"Ka pa duhthusam ber i hre duh em?" a tih chuan ka lo bu nghat a, "Pa Saia te nen hian chhungkua nih a duh. Hmangaihsanga hi a nawr lui ngam lo mai mai zawk a, mahse hospital chhung a ni emaw, in lamah pawh nise kul muk deuh a kan pafa a kan ti ti tawh chuan Malsawmi nen innei tur a a duh zia te, Pa Saia te nen a chhungkhat nih a chak zia te a sawi chamchi ţhin. In i chhuahsan a nih rau rau chuan ka nau hi hmu tawh lo la ka duh tel bawk a, i hmu lui zel a nih chuan ka pa duhthusam a thleng dik thei lovang, a duh ang a thlen theih nan i inthiarfihlim mai a ngai a ni. A duhsak ţhin em che kha, a duh ang chu i tihsak thei ang tiraw?" a ti heuh heuh a, a awmdan hi mizo zia ni pawn ka hre lo. Vai ramah an awm nasa a, vai zia an kai a nih ka ring hial tawh zawk. 

"Ka nu'n pawisa a lak duh loh chuan thuhran a nia, keipawn ka dil bik lovang che. Mahse hlawh chu ka phut ve a, nitin hna ka thawk a, chumi hlawh chu min pek a ngai ang" ka ti a, pawisa induhthaw a na a, kan pawisa neih sa kan hman chhungin hna thawh tur ka zawng char char ang a, kan awm ve thei mai ang. 

"Ka pe ang che..i hlawh ai tam deuh ka pe dawn che nia, buaina i siam loh ka beisei bawk ang. Hmangaihsanga nen a in inkawp zel chuan dodal tu in nei reng dawn a, tuman an remti dawn hauh lo. Chu chu ka hmu tlang vek a, kan chhungkaw tan mualphona a ni bawk ang a, ka pa hming a chhe vek dawn bawk a, buaina hlir a ni mai. Kan chhungkaw mualpho leh hospital a hmingchhiat ka phal dawn hauh lo a, ka pa hming a chhiat tel phei chu ka phal lo lehzual, chuvanga hnawtchhuak che chu ka ni pakhat a" a ti charh charh a, hmangaihna hi a chang chuan hnawk sak leh min ti na tu chauh a ni ţhin reng a ni. 

Neihkimi nen a kan inbiak dan chu ka sawichhuak duh ting tang lova, ka nu pawh a lo phe leh vat vat tawh a, inbe tam lo mah ila ka ngaihtuah deuh avangin a che vel chu ka melh ru reng a, damdawi chu ei lo se a thi daih tawh ang a tih thlengin ka ngaihtuah a, rilru ber a hah chuan taksa a chau hma duh khawp mai. 

Hmangaihsanga lo haw chuan paper bag a rawn khai lut a, a u a lo haw tawh sia, ka lo hmu lo der hmak. Ka pa thih hnu kha chuan chhung inkhawm kan nei ngai ta lova, chaw kan eirual khat ta deuh bawk. 

Chaw eikham veleh insiam turin pindanah ka chho a, khumah chuan Hmangaihsanga bag rawn khai haw ngei kha a lo inhung a, ka ta tur a a lei a nih ringin ka hawng tim lem lo. 

A chhungah chuan dream catcher nalh deuh a lo awm a, ken tel ngei ngei ka tum nghal a, chuvang chuan ka tar chhuak duh ta lo a. Khum a dahin ka thlir reng a, min ngaihtuah takzet na hian rilru no lai a kaichhuak leh ţhin. 

Bawiha a rawn pawm lut a, "A muhil a" a ti deuh sup a, a thil min leisak uluk deuh a ka lo en lai mek a nih avangin a lai ve deuhin ka hria. 

"A mawi lutuk a nia" ka tih chuan a hmui a ti sawi zauh a, Bawiha muhil chu min hrilh nawn tum ni awm takin a chawi kang zeuh bawk a, rang tak a lo laksakin khumah chuan ka mutţhat tir a. 

"Ruattei khan chhunah a mu mang lo a tia, zanin chu a muhil hma hle mai" thawh kan pah a ka tih laiin dream catcher chu a lo khai kang ve thung a. 

Tukverh bulah kalphei puiin a rem laiah a khai a, "Hei hian mang chhia zawng zawng a man tang vek mai ang" tih pahin maimawm ril ang deuh a inkaih chîat lai chu a kawk a, hmai zangthal haw a ka lo en ve lai chuan ka sam karah a kutţang rawlh lutin ka bekah a dawm a, rawn kun hniamin ka hmuiah a fawp zui a, keiman ka fawh hmasak hma kha chuan hetiang thil hi a ti ngai miah lo a sin mawle. Ka duh ve deuh tawh ni a a hriat vang a nih ka ring. 

Damthlup a min fawhna ka lo dawh tawp lai chuan "Min chhang let rawh" a ti sup a, tim deuh hlek chunga ka thiam ang ang a ka fawh let ve chuan min lo fawp uar sauh a, ka mipa fawh hmasak ber a ni lo a, mahse min fawhna hian min fan bik riauin ka hre tlat a, nuam ti viau mah ila inla hrang hmasa zawkah ka ţang thung. 

Kan la inhnaihin kan chal chu a la insi reng tho a, "Tun bak ka kalsan tawh lovang che" a ti nawn leh a, mit ka chhin vang vang lai chuan ka hmui a rawn fawp leh zauh a, a inla hrang zui ta daih a. 

"Aw..khawiahmah kal tawh lova, ţha deuhin awm rawh aw" ka ti sap a, ka sawi awmzia chu hria se tun ang hian a nui hauh lo ang le. 

"Buaina lo chawk chhuak lo ula a dik a ni mai" a ti fiamthu a, "Kan buaina ber i awm loh te chuan" ka lo ti ve zat a, ti hi chuan ngaihţha deuhin a kal thei tawh ang ka ring.

Zingkarah kher kal a tum leh a, in aţanga a chhuak chu Ruattei nen kan zui chhuak a, tualah chuan car pawh a lo inhung ran tawh. 

"Ka pu chu hrilh ngei ngei ang che..a pangchan dan em em hi a dik lo reng reng. Ho te teah min tibuai tawh suh ti la, ngaihtuah viau mahla hrem ve rih ang che. Pathian zarah eng em a ti lovang" Ruattei chuan a ti deuh hlak hlak a, car a a luh hnu te chuan Bawihan a la ban ve ţawk ţawk a, Siampuii sawi ang khan tunlai chu an in ngaina thar riau. 

Car a tih nun hnu a min rawn en chuan kut ka lo vai zeuh a, a bu nghat a, "Kan inhmu leh vat dawn nia" pangai taka a tih hnuah car chu a tawlh riai riai a, a tlan liam rual chuan keipawh ka ruak nghal huaiin ka hria a, a lo haw hunah chuan ka lo awm tawh lo ang a, Neihkimin chhe deuh a min sawi phei chuan min haw ngei ngei bawk ang a, chu thil chuan min uai rit nulh mai bawk a, mahse min haw law law se a tan chuan a nuam zawk ang. 

"Ruatte, vawiin chu dawr hawng tawh rawh aw. Niminah Neihkimi hnenah chawlh ka dil fel diam tawh a, ka nu a la nawm loh hmel emai in ka lo nghak ve thung ang" ka ti a, "Ka u in chawlh a phal maw?" a lo ti ha a, "Phal e..ka nu a dam si lova, Bawiha ka chhuanlam a" nui paha ka tih chuan min ring ve hram a, Siampuii leh U Remremi takngial pawh an awm lo. Neihkimi leh Zamtei chiah an awm a, midang chu an tir bo daih a nih ka ring. 

Zonunin min rawn biak a tum nasat em avang chuan phone ka switch off ta hmak a, pickup pawh a rawn thleng har lo. 

Thawmhnaw ka khung mawlh mawlh lai chuan Zamtei lo lutin, "Bawiha hi chu min pe mai rawh. In kalna tur in sawi duh bawk si lova, in retheih viau phei chuan a khawngaihthlak lutuk ang" a ti a, ani hi chuan a rilru a awm ang ang a sawichhuak tawp zel a, sual hauh si lo hian ngeiawm deuh angin a lan phah ţhin. 

"Ka tello in a la awm thei si lova, bakah ka fapa hi chu ka hmuh phakah ka awmtir reng ang" ka ti hmak a, a chhuak tau emaw ka ti chu reilote hnuah lo let lehin thawmhnaw a pawm bawr luk a, "Heng ho hi a thar vek a nih hi aw..ka zawrh lai a nih hi. Zote, hrehawm deuhin dah miah suh aw. Bawiha hian eitur a neih loh chuan ka u hriat lohin min lo dil ţhin dawn nia" a ti hem mai a, Bawiha a ngaihtuah lutuk chu ka lawm viau rualin "Chu ti anga tih ngai chuan kan awm lovang" ka ti nghet charh a, ka fapa chu a en vang vang a, a lainat hmel takzet a ni. 

Bungrua min thiarpui a tum chu "Bawiha hi lo awmpui rawh. Keiman ka lo thiar ang" ka ti a, min hnial lo ve khiah a, inhnuaia chhuk nghal mai lovin ka nu pindan lamah ka phei a, ani pawh a lo inring tawh khawp mai. 

"Tikhan dah khawm tawp rawh ka lo thiar vek mai ang. Damdawi vel kha theihnghilh lo la, zawn hmuh awlsam deuh theihna turah i dah dawn a nia" ka ti a, min chhang lo. Kei aiin a rilru a hrehawm daih zawk dawn tih ka hria a, ka nu leh paten min boralsan hnu a min enkawl ţang ţang tu hi a ţhatna ka rulh let ve a hun tawh niah ka ngai. 

Suitcase pahnih khai chunga kawngka aţanga ka pen chhuah chuan tual a Ruattei scooty lo inhung reng ka hmu thut a, chu chuan min ti ding chiang kher mai. 

CONT..