KA HRINGNUN THAWNTHU-15

KA HRINGNUN THAWNTHU-15

"Zamtei scooty a keng chhuak" hnunglam aţangin Neihkimin a rawn ti a, min en miah lo pawn ka ngaihtuahna a hre thei em maw ni. 

"Aw le..min enpui duh suh. Ka thiar zung zung anga kan kal ang" ka ti a, ka awki pawh a nem tehchiam lo. 

"Siampuii leh Remremi te kha ka nutei te inah an leng a, an lo haw har lo ang" a ti a, a hranpain hmanhmawh turin min tur duh bik hauh lo. 

"Aw le" ka ti tawi tak a, suitcase chu ka chhuahpui a.

Pickup driver chu a lo fel reuh khawp mai a, "Kawngka bulah ka lo chang ang che. Lo dah khawl la, a dang chu ka lo ti ang" a ti a, a la upat vak hmel bik loh a, kan inrual vel maithei a ni. 

Ka nu bungrua ka lak dawn chuan tukverh bula a lo ding ka hmu a, muangchangin ka pan hnai a, ral hla tak thlir ni awm tak hian a lang a, ka pa nen a an sulhnu te hi kalsan a hreh viau maithei a ni. 

"Ka putea hnen a kal chu i duh tak meuh maw? Zui rui hlir kan hmu dawn a nia, chu chu i duh em ni?" ka la ti a, ka putea fin rawih mai chu ka hreh em a ni. 

"I pute hnenah i let thei ka tih tawh kha. Engtinpawn awm la ka sawisel dawn lo che. Duh leh inluah tur pawh zawng la pawi ka ti reng reng lo. Keichu ka nau bulah ka kal dawn a, ka thih hma zawng a hnenah ka cheng ve tawh ang" a ti sap sap a, awlsam tea thihna lam a sawi tel chu duh lovin "I kalna apiangah ka kal ve ang. Nangmahin hrehawm i tuar tawh dawn hleinem. Chuvang chuan Bawiha leh keima tan i dam reng a ngai a nia" ka ti dam thlap a, mitmeng ngui tak hian min en a, "Nakinah kan la ti ti dawn nia" a ti ve thei ta hram a. 

Ka putea chu veng tla birh ve deuh a awm a ni tih chiah ka hria a, a in awmna lai tak ka hre thei tawh lo. Ka nu zawk chuan driver hnenah "Motor hi Sawma in thleng a kal thei dawn lova, bungrua hi min thiarpui thei angem? Pawisa kan pek belh dawn che nia" a tih takah chuan kan in thar tur chu a mawng ve deuh dawn tih a hriat nghal theih bawk. 

"I phone han la teh" a ti zui zat a, phun nawi lovin ka phone chu ka pe ve mai a, a hmel êng a, Zonuni missed call a lo tam khawp mai. 

Ka nu chuan a switch off ta daih a, mak ti deuh a ka lo en lai chuan sim card leh ka phone bawk chu min pe lehin "On leh kher a ngai tawh lo. Kan inchinfel zawh veleh sim thar kha i hmang dawn nia. I lo hmelhriat ve tawh te kha tumah be pawp tawh suh" min ti a, hmalam a en ngar a, a landan chu a hlauhawm lek lek hial a ni. 

"Hmangaihsanga zawn hmuh theih turin awm lo la, hna pawh thawk rih lo mai rawh. Bawiha awm nileng thei chi ka ni tawh lova, inah awm tawp rih rawh" a tih chuan "Ka awm tawp te chuan kan pawisa kawl sa a zo ang a kut kan dawh mai dawn asin. Pawisa hman tur kan neih lai hian hnathawh tur ka zawn vat vat a ngai alawm" tiin ka lo hnial a, min rawn en a, a mitmeng chu a thip ram a, chak tak angin awm tum mah se a kehchhiat nasat zia chiang takin a hmuh theih. Ka nu hi a na takzet a, en thuak chuan tuman an hre lovang, mahse keichuan a mizia leh hawiher danglam danah te, pawisak a neih loh sâwt viau danah te hian ka hrethiam a, awka vin hmang lo turin ka insum nasa hle reng a ni. 

"Pawn chhuah a ngai rih lo. A ţul chuan keiman ka thawk mai ang. Hmangaihsangan a zawng ngei dawn che a, in in hnim hnaih leh loh nan ka khuahkhirh ve thung ang che. I putea inah zu rui an tam emaw tam lo emaw in i chhuahsan ka remti dawn lo" a ti hmarh hmarh a, rim deuhin zawng ila chu in luah tur kan hmu ve ngei ang; ka nu erawh hi chuan ka putea pan a duh thlat a, hei tak hi a ni ka hriatthiam theih loh chu ni. 

"Kan hma chiah a step zawnah sawn ding rawh aw" ka nu'n a tih leh takah chuan hmalam ka en veleh a, kan kalna kawng chu metal loh a nia, a ro angreng viau bawk. 

Pickup a din rual chuan ka nu'n Bawiha min laksak a, "Driver hian bungrua min thiarpui a inhuam tho chuan Bawiha nen hian kan lo zu chhuk hmasa ang a, i putea ka rawn tir chho dawn nia" a ti a, tunlai chu a thusawi hi thu tawp a ni nghal zel a, ka hnial buai peih lo. 

"A ţha alawm" ka ti ve mai a, Bawiha paw chunga step a a chhuk chu driver nen motor bul aţangin kan lo thlir a, "Pawisa min pe duh suh aw" a tih chuan mak tih deuhin ka en heu a, min en ve duh miah lo lehnghal. 

"I motor kan hmang a, bungrua min thiarpui dawn bawk a, pawisa chu kan pe ve bawk ang che chu" ka lo ti sawk sawk a, "Englo a nia..Lalrawngbawlan min pe tawh a" sawi hreh hmel tak hian a ti a, Rba mai mai chu aw. 

"Ngati nge a lo pek duh che a? Motor hman man chu ka kawl tho a sin mawle..ka pe che ang a pe let leh mai rawh" ka tih chuan lu a thing nghut a, "Teuh lo" a ti bung hmuk tawh bawk a. 

"Midang pawisa hmanga inthiar chhuah ringawt chu a nuam lo emai" ka ti niah niah a, hman a ka lo puih tawh avang khan ba neiah a inngai tlat em mawni dawn le. Chutianga a in ngaih chu ka duh hauh lo ang. 

"Hrilh suh min ti zawk a mah se min pek luih i tum tlat duh hmel bawk sia, hnial ngaihna che ka hre lo alawm. Hria angin awm lo mai rawh" a ti hluk hluk a, a awki a dam lo ve khawp mai. 

"Bungrua min thiarpui man tal ka pe ang che" ka tih pawhin "A ngai lo. Ka pui ve che u a ni mai" a ti tlat a, Rba mawlh chu biak dan ngaihtuah a ngai a ni. Driver bula phun chiam chi a ni si lova, hmanah khan phut let neiin ka pui lo tih hria se ka duh khawp mai. 

"E...mate in lo thleng tawh maw?" ka putea hmel ka hmu chiah chu ka taksa a ţang nghal at ni maiin ka hria.

A mitmeng ngilnei tak ţhin kha chu a la ngai reng a, zu a in nasa ve a ni tih hriat zetin a hnar a ţawk hlur a, a vun a thim khup mai bawk a, a sam a lo ţuak nasa tawh viau bawk. Kum tam tak ka hmu tawh lova, nupui vawi thum a ţhen hnuah ti hian a parawl ta tih chu ka hria. Fa ah a tluang lova, fa pahnih neiin an boral ve ve tawh a, an nupui hluite pawn pasal an nei leh daih tawh ang. 

"Thiar tur a tam em?" tiin driver chu a zawt a, ni a sat deuh avangin a meng zim deuh sun a, kamis hlui ve tawh tak a ha a, a kilhna chu a awm hnuai vel thleng a inhawng huai a, lum a tih hmel kher mai. 

"Lo ti ve duh suh ka pu, Zopari nen hian kan thiar thei mai ang. Kan zui che ang a, i in awmna kan hriat phei chuan i kal nawn ve kher a ngai tawh lo ang" Driver chuan a lo ti zung zung a, ka putea chu en mai pawn a chak tawh lo tih a hriat a, a khawngaih ve te pawh a ni mahna. Zopari min ti daih lehnghal a, ka hming a hreţhelh nasa khawp mai. 

"A va inthlahrunawm awm ve, rit ka la chawi ve thei lutuk tho asin" ka putean a tih ngial pawhin driver berin a phal tlat lo, lawmthu an inhrilh hnuah kan hmaah a kal a, inkhai bawr luk chungin kan zui thla a, tlu palh ila chu kan lum thui viau ang.

"Min hre tawh miah lo mawle" a ti leh pek a, "Ka putean maw?" ka tih chuan a bu nghat a, "In inhria elo?" ka ti hluai a, la hmu phak tho mah ila min hlat viau tawh a, kan ţawng a rawn hre pha lem lo. 

"Hria e..a in pawh ka hria, zu kan in tawh alawm" a ti a, min rawn enin a nui ruh ruh a, a la â phuang mai bawk sia, kei aiin a naupang leh si ang ka ring. Zep lah chu a nei der lo lehnghal. 

"Zu in ţhin ho lah hi in thleng thui thei si. Hla tawkah pawh zu la turin in kal peih zel mai chu a nia" ka tih chuan a lo nui hak hak a, "Hetah chuan vawihnih chiah ka la kal. Sunhlu a nei tui lutuk" a la ti zui a, rilru a hah viau lai pawhin nuihpui theih khawpa hlimawm a lo awm ve zel tho a nih hi. 

Ka putea inchhungah chuan zu rim a nam deuh ham ham a, chu chuan kawchhung a ti let but a, luak a chhuak duh kher mai. Ka nu lah chu eng rim mah hre ve lo ang maiin a awm a, driver hmelah pawh danglamna hmuh tur a awm chuang lo. 

"Pindan ah khan vawm lut tawp tawp rih mai rawh u. Bungrua a lo bo ţhen ang tih te a hlauhawm a, inthiar zawh hnuah Matei khan remţha mai rawh se" ka putea thusawi chu kan pawm zawng tak aniang ţhut pawh ţhu chawl lovin kan chhuak lehnghal a, step lah chu a chho un ropui mai bawk si a, a hahthlak dawn khawp a ni. 

Driver chu rin aiin a kal thei phian a, kei chu vawn bânah ka uai a ni ber tawh. Ka thaw hlawp hlawp a, ka hrawk leh âwm a thip hlur a, thlanin min bual huh vek tawh bawk. 

"Thiar tur a tam lo a nia aw..motor chhungah khan ţhu lut la chawl rih rawh, tui pawh a awm kha" a ti leh hluk hluk tawh a, zial a ţan nghal zat bawk a, lum ti ve miah lo te pawh a ang alawm le. 

Ka hah lutuk chu ka inthlahrung buai peih lo. Ka ţhut luh rualin tui ka ban nghal rawk rawk a, a lum pup lehnghal a, a tui hran lo kher mai. Driver chuan phone ah mi a bia a, a ţawng dan hmangah chuan a bialnu a nih duh hmel. Hmangaihsanga ka hrechhuak zawk a, a pute khua a la thleng kher lo maithei a, khua a lut vel mek maithei bawk a, rilru nuam leh thlamuang deuhin a la awm ngei ang a, chanchin a hriat huna a buai phili dan tur te ka ngaihtuah tel zel a, ka khawngaih takzet a ni. 

Bungrua kan thiar zawh hnuah driver chuan ka putea chu "Min hre tawh lo mi?" tiin a zawt ta nge nge a, an inbiak zuina chu ngaihven tawh lem lovin ţhutthleng nghenchhan ka ngheng a, ka hmai hupin ka thaw hle hle a, Bawihan min ti buai lova, ka nu pawn min be lo. Tukverh aţanga thlifim lo lut chuan min chhem dai sawng sawng a, mahse chu thlifim chuan khawharna a keng tel tlatin ka hria a, Hmangaihsanga ka ngai a, ka khua a harin a bula hahdam taka awm theih ka chak takzet a ni. 

"Mate, kha lukham hi kham la muhil rawh. I chau a nih kha" tih pah a ka putean lukham min lo pek chu ka la a, inleng an awm lo bawk a tiin ţhutthlengah chuan ka mu a, driver kha a la leng ve reng a, ka putea nen an ti ti tui bawk nen, nghenchhan lam hawiin ka saisir ta daih a.

Ka putea hian min lo dawng sawng ţha viau mah se ka lung a awi thei thlawt lo. Mi fel tak a nih rualin eizawn nan zu a hmang a, diktak chuan zu hmun a chen hi ka huphurh a ni. Ka fapa ka ngaihtuah tel lo thei lova, zu hmun a seilen tir ka phal hauh lo, nitin zantin mi chi hrang hrang an lokal ang a, zu an lam zel bawk ang a, a hmun a in tawk an awm reng bawk ang a, a tan entawn tur ţha a awm dawn lo lutuk a ni. Lehlamah lah ka nu ka ngaihtuah tel lo thei lova, natna tihdam theih loh kan tih ţhin a vei mek a, damdawiin a la pui ve hram hram a, rilru nat lutuk vangin damdawi lo thlah ta sela a tan a pawi dawn lutuk tlat a ni. Ka ven tel tho a ngai a, ka pa thih hnu hian a danglam lehzual a, ka awm hlat san ngam tawh lo a ni ber. 

"Mate..chaw i ei peih dawn em?" min sawi det det tu an awm rualin ka putea aw ka hre tel a, ka lo muhil a ni ngei ang, ka harh chiah meuh chuan khua a thim dawn ruai tawh. 

Ka tho thut a, ka taksa lah chu a na em em mai lehnghal a, "Ka va'n muhil rei awm ve..min kaihthawh vat tur che u lawm" ka ti deuh chul a, Bawiha phei chu ţap zo hlim ni awm takin a hnar leh biang vel a lo sen hlar mai. 

"I chau aniang kan tia kan kaitho duh lo che a nih kha. Bungraw remfel ngai a tam a chaw ei hma ang u" ti a ka nu zawkin min lo chhan chuan chaw ei siam tumin ka tho a, ka zunchhuak tawh lutuk lah chu ka tai a na ţhum tawh a, tenchhe chi nih nen, chaw ei hma a bathroom a luh ka hreh kher mai.

Loh theih lohin ka lut a, rin ang ngeiin bathroom chhung pawh zu rim a lo nam huam a, ka uak ţhat ţhat nghe nghe. 

Engmah en chiang duh lovin ka zung a, bathroom no lah chu a balin khawih a chakawm loh viau bawk a, parawl a nih bakah mi chi tin chi tang luhkhawmna a nia, fai han turin ka beisei lo sa hrim hrim. 

Chaw kan ei meuh chuan ka putea chu a ţawng bual bual tawh a, a awki pawh kan thlen hlim ai khan a danglam tawh zawk a, hmun ka tihfel laiin mipa pathum an lo lut a mah se ka putean pawnah a chhuahpui nghal a, "Nu, heta awm i duh tlat chhan hi ka hrethiam thei miah lo a nia, ka putea i ngaih vang ti dawn ila a ni chiahin ka hre bawk si lo. Eng nge a chhan ni a? Neihkimi ten min hmuhsit tawh sa tehreng nen, hetia kan awm chuan min hmusit lehzual dawn asin" ka ti hlak hlak a, pawn lamah thawm a awm reng a, ka ţawng an hriat phak loh nan ka lungawi lohna ka lantir nasa duh lem lo. 

"Ka chhungkaw neihchhun a nih hi. Ka sawi zing tawh, i hmin thei ngang lo a nih chuan in ka zawn sak ang che" a ti hmak a, ka lo thaw hak ringawt a, eng thilin nge nasa deuh a ti danglam ni ang le. 

Pindan pakhat chiah a la awm zui a, mahse ka nu chuan "Sawma chu pawn lamah sawn a mu thei mai ang. Kan pahnihin pindan hi kan inluah ţawm thei ang" a ti ta hlauh a, inleng a hnar vek seng lo aniang chu, pindan a kan inkhung meuh chuan an ri nghal luih luih mai. 

Bawiha ka ti mu hmasa te te a, ka nu inbual hlanin a rukin phone ka on a, Hmangaihsanga missed call a lo tam ngang mai. 

Message a hnutchhiah nual bawk a, a tawp nan tak tak tiin message chu ka en thla diat diat a, [Ka be tlang thei lo che] a tih loh leh [I chanchin ka hre tawh. Khawiah nge i awm?] a rawn ti a, [Zanah ka lo haw ang] tih te a ni nawk a, [Ka ring tawk che] tih ringawt a rawn phei chu tawi viau mah se chhiar a hrehawm kher mai. 

Hriat loh karin ka ţhi locket ka lo hum reng tawh a, vanneihna, rinna, beiseina leh hmangaihna, engkim ka kawl vek a, mahse ka nun hian hniam lam a pan tulh tulh thung. 

Ruattei pawn min biak a tum nasa a, Hmangaihsanga ang thoin message a hnutchhiah hnem hle bawk. 

[U Zote i awmna sawi la ka lo hruai ang che. Midang hriat i duh loh pawn a ruk talin min lo be rawh. Ka ngaihtuah lutuk cheu a, in him dawn tih hre mah ila ka awm hle hle thei chuang lo. Nau ang tak tak a min en a nih chuan min lo be ngei ngei ang che. Tumah ka hrilh lo ang] tih te a rawn thawn a, dinhmun ţha zawk a ding mah nise Ruattei chu ka khawngaih a, ka ngai viau bawk. 

"On tawh lo tur a ka tih che kha" tih leh ka nu chuan phone min chhuh a rual a, a thawm ka lo hre hauh lo. A hmel chu ka hmu phe ruai a, ka mittui a hnai tih ka hre thei a ni. 

"I mittui tih tlak bak thiam an nei lo. Tumah be tawh lo la, helai hmunah hian bet deuhin awm rawh. Engtikahmah kan inzawm leh thei tawh lovang. Min hmusit tu te ai chuan kan tlukpui te bula chen a nuam zawk" a ti hmawk hmawk a, a off leh hmain ka phone chu a ri a, laksak ka tum veleh a kalsawn pui a, min lo biak tum tu chu hmu hman lo mah ila Hmangaihsanga bak a nih ka ring lo. 

"Kha..hei hi in rawh" ka hmaah no a rawn hung a, ka khawng nghal awt a ni ber. Ka nu chu mak ti lutukin ka en a, ka nu in zu min chhawp sak a nih chu! 

"Eng thilin nge ti danglam che" ka ti tham chhal a, ka nu pangai kha la ni sela chu zu min pe hauh lovang. 

"Neihkimin engtin nge a tih che? Pawisa i la duh lova, tunah lah i fanu ngei zu i chhawp sak duh chu a nia, i hriatna a fim lo a nih kha" ka ti chang bal a, ngawi ranin min en a, a ţap teuh tawh viauin ka hria. 

"Hrehawm ti deuh a awm reng ai chuan kha kha in rawh. A chhawk ang che" a ti nawn leh a, a awki a dik tawh bik lo, mahse a mittui a la dang thei tho. 

"Ka duh lo..ruihhlo hian rilru hrehawmna la bo thei se la chuan tuman doctor an pan lo ang a, an nunna hlu tak an chhat lo bawk ang. A ti zual kai tu chauh a nih hi. I na a nih pawn min sawi pui la, ţap bawrh bawrh la a zia mai dawn alawm. Na miah lo anga lan tum kher a ngai hleinem"  ka ti mawlh mawlh a, zu rim chuan luak a ti chhuak hlui tawh lehnghal a. 

Ka putea zawk chu lo lutin "Engatinge Matei pek ve i tum a? Mate i nu hi a thluak a fim lo a nih hi, muttir la naktukah a zia leh mai ang. I pa fanu nen khan an inhau deuh a, sawi loh loh tur an sawichhuak pek aniang, a â rih a nih hi" a ti a, ngaihven zui lovin ka nu zu no lo ken luh nen khan min chhuahsan a. 

"Engtin nge in inhauh a?" ka lo tih chuan "Nakinah kan sawi dawn nia" a ti leh daih tawh a, ka dawhthei tawh bik lo chuan "Nakinah i ti reng a, nakin chu engtik nge ni dawn a? Nangmah ngaihtuah reng rengin ka awm a, ka fapa hma hun thim zia hre ranin helai hmun thleng hian ka zui che. Eng emaw tal i sawi thei lo em ni? Engin nge i nun i ti nguai tih te, i mize danglam thut chhan te hi sawi a har viau em ni?" ka ti bawrh bawrh a, ka aw pawh a ring sawtin ka vin hle bawk. 

"I pa khan min hmangaih miah lo. A nupui a thi vat dawn tih a hria a, fanu mi ang lo a nei bawk a, thil thleng tur hre lawkin fin rawl a chhuah a min ngaizawng der mai mai tih ka hria, min hmangaih tak tak nise ka tan eng emaw tal a dah ve ang chu. A fate nuihsawh mai mai turin min hnutchhiah a, Neihkimin deuhsawh taka singkhat a tawk em min ti vel te kha ţha deuhin ka lo dawngsawng bik dawn tihna em ni? Lungpui ka nih loh hi, hriatna leh thinlung ka nei a, na leh engkim ka hre thei vek. Fiamthu pawh nise khatianga elsen taka ţawngkhum tur kha ka ni bik lo. Chhungte belh tur nei miah lo ang ten min sawm a, hei, belh tur chu kan nei a ni lawm ni?" a ti bian bian a, a mittui a tling pam a, a taksa a chak lo bawk nen, a tluk hlauin ka lo chelh thuai a, khumah chuan dimtein ka ţhuttir a, keichu ka tih ziah danin chhuatah ka ţhu a, ka khup tawmin ka kuah bet tlat a, hun hrehawm tak zawng a va ni em. 

"Nih leh ka pa kha Hiv+ a ni ve em?" amah pawh en chuang lovin ka phun sap a, "Ni lo" a ti hmak a, "Engtin nge a nih loh theih?" tih paha ka hawi chhuah chuan min lo en ve ran a, "Hiv+ a ni ve lo. A inven theih alawm, hmangaih miah lohte lakah phei chuan inven theih tak a ni" elsen zet hian a ti a, "Mipa mak ve tak chu a ni. Min khawngaih angin a awm a, mite hmuhsit rawn ni turin min hnutchhiah thung a, min hmangaih tak tak emaw ka ti ţhin. Ka natna zawng zawng nen hian min pawm vek emaw ka ti ţhin a, mahse a lo ni miah lo a nih hi" a ti chuai raih a, a mittui pawh a biangah a luang thla va ngiai ngiai a, ţap lo tur a insum hram hram ni awm takin a inpet ruh nasa viau bawk. 

"Pawisa eng emaw zat ka tan a dah tur thu a sawi ţhin a, hnial ţang ţang mah ila fa ang chiah a Remremi ka enkawl ţhin avangin chumi zat chu i tan ka dah ang a, ka ziak fel thlap ang a ti ţhin a, a tawpah chuan a faten a rilru an thlak thleng sak leh tho a, Neihkimi min ţawngkhum ţhin dan zawng zawngte kha ka ngaithla liam mai mai bik hleinem. Min chhun na a, min vilh ngut ngut a, a hnen aţanga pawisa lak ai chuan kut dawh pawh ka thlang zawk" a la ti hlak hlak a, "Ka pa nen khan in innei tak tak lo em ni?" ka lo ti a, hiv+ a ni ve bawk si lo, ro engmah a hnutchhiah lo bawk a, nupa ve lem siah chuan mak tak a ni. Ka pa nen hian an innei rei lutuk lova, a natna hre lawk sa a nih phei chuan inven dan kawng a awm dawn tih chu hre mah ila mak ka tihna a bo chuang lo. 

"Nupa chu kan nia lawm. Doctor rawn a fimkhur bawk chuan a inven theih lutuk alawm. Ka natna zawng zawng nen a min pawm thlap avang khan min hmangaih turah ka ngai a, min hmangaih loh zia chu i hriat tawh hi. I pa leh a fate ho nen hian inzawmna neih ka duh tawh lo hrim hrim" a ti leh tan tan a, "Ka pa khan i tan engmah a dah loh i ring tak meuh em?" ka lo ti a, ka pa hmel ka'n mitthla ţhin a, a felin kei takngial pawh min enhranna a nei ngai si lo, "Thil felhlel deuh a awm a ni lo maw?" ka ti hial a, mahse ka nu chuan min ngaihven duh tawh lo. 

Khum a puan inphah sa chu a hlip hmawk hmawk a, nun a lo hman ţhin dan zawng zawng te leh ka pa nen a an intawn dan te chu ka hre chak zek zek a, a sawi duh ka rin tawh loh avangin nidanga zawh atan ka khek ta zawk a. Nufa kan nih vang ngawtin heng thil hi ka zawt hreh tur tihna a ni lova, ka zawh chhuah loh chuan amahin a tuar ngawt ngawt ang a, a nun a tawi phah zawk ka hlau a ni. 

Rem lo deuhin kan mu a, tukverh a dream catcher inkhai va chu enin ka mu meng kar reng a, tunah phei chuan a mangang lehzual tawh viau maithei, a lo haw lehnghal rum rum a nih phei chuan Aizawl a lo thleng leh tawh ang a, in lamah eng boruak nge an neih ang le? Hmun hran daih a ka awm avangin inchhunga thil thleng tur awm ang hriat ka nei lova, mahse thil pakhat chiang taka hriat ka nei; zanin hian Hmangaihsanga a muhil bik miah lovang. 

A buai chung dawn a, Neihkimi nen an inhau maithei bawk a, engang pawn ka chanchin sawi se min rin tlat chuan huatna aiin khawngaihna a nasa zawk ang a, chu chuan hmangaihna a ti pung sauh maithei. 

Bawiha tal laih laih chu ka kuah a, Sangzuala nen kan inţhen ţum ai khan hrehawm ka tiin ka khua a har zawk daih a, ka awmdan  hi kei ngei pawn ka sawifiah thiam lo. Ka nu chu mu a phu leh zawk ţhin bawk a, an pahnih chuan ka veng a ni ber a, mut a chhuak thei bawk si lo, ka putea te lahin thawm an nei reng a, ka mut ve meuh chuan khua a var lek lek tawh. 

Ka thawh chhuah chuan chhuatah mi pathum an lo la mu a, a laia mu chu hmeichhia a la ni zui. Ngaihtuahna an ti kal thui khawp mai, hmeichhia ngat phei chu chhungte tan ngaihtuah kan na a, tu te emaw fanu duatlai a ni ve ngei awm sia, ruihhloin a zahawmna a hlih sak a, zu zawrhna hmunah thlamuang deuhin a mu thei chu a ni sia, ruihhlo hi chu a hnawksak takzet a ni. 

Chaw ka chhuan dawn laiin hmeichhia ber chu a lo harh lehnghal a, sam thur bumin a ţhu chhuak a, thawmhnaw a inbel thlap ka hmuh chuan ka thaw a lo veng huai a, meng mang lovin a in hiat a, a tep chuap chuap bawk. A men chian rual chuan min rawn hmu ve nghal a, min hlauh loh nan ka lo nui a, "Puih i ngai em?" thophang aw zet hian a ti a, lu ka thin hnuah ka che zui sawk sawk a. 

Ka hmuh lai a zu in a hreh deuh nge bathroom ah a keng lut ţat ţat a, mipa pahnih pawh kha lo harhin zu in tur an zawng nghal a, "Ka lu a va na ve" an ti ve ve lehnghal a. 

Hmeichhia ber chuan alu min vel pui lui tlat a, "Thiangi" tiin a hming min hrilh a, ka hming ka lo hrilh ve nghal var a. 

"Ka lokal ngun lutuk alawm. Ka riak ngei ngei zel bawk a, mahse hmun dangah ka riak ngai miah lo a nia aw" a ti a, a meng nu phut a, a lo in hnem leh hman viau aniang. 

"I chhungte an mangang ţhin awm" ka tih chuan "Awiii...Thang kekak-a a mangang hlawl lovang. Bakah maw keichu rui lo chuan khawvel ka hmachhawn peih lo. Ka hringnun diary ah pawh zu zu zu a ni tawp mai" a ti ham ham a, a nui zui huau huau a. 

"Zu ruih hi a nuam viau em ni?" ka tih lahin "Nuam nang..ruih chhung a rei lo si, penţawng a hrehawm si, kan harsatna lah hi a pung sawt emaw tih tur a nia" a ti lang lang a, "In ve miah suh aw. Vawikhat tih chuan zawngchhang a awl a, ruihhlo hi chu tih chhin loh a ţha ber" a ti leh tho bawk sia, a maksak ve ngawt mai. 

Zanah Rba leh pickup driver kha an lo lut hlawl a, inleng pawh kan lo nei leh nual tawh. Driver chuan ka putea a bekbawr nghal sar sar a, ka nu erawh chuan Rba te lo lan rual khan pindanah Bawiha a luh pui a, "Pawnah chhuak lawk ang" Rb-an a tih chuan ka zui chhuak ve mai a, awmna tur hmun rem tak a awm chuang lo. Ţhutna tur kan zawnkual fe hnuah step ah kan ţhu dun ta ringawt a. 

"I ngai em?" min ti a, Hmangaihsanga a sawina a ni tih hriain "Ngai ve tho e" ka ti sap a, zankhua a ka ngaihtuah hnuah nilengin rilruah a awm leh a, ka ngai veng veng ti ila a dik ber ang. 

"In hmangaih te hian ngatinge fiahna an paltlang hmasak a ngaih phawt zel le tiraw?" a ti a, ka lo nui hak a. 

"Ka hmangaihah i ngai em ni?" ka tih chuan "I hmangaih alawm" min lo tihsak a, "Kan hriat miah lohin thinlung hian duh a lo thlang tawh ţhin a, nangpawh i thinlung khan a thlang tawh a, i ngaihthlak chian chuan i hre thei ang" a ti leh a, kan ngawi zui vang vang a. 

Inchhung a awmten thawm an neih len viau laiin pawn lam chu a reh tlawk tlawk a, thla a êngin van a thiang hle bawk a, "Thawk khat lai khan beiseina sang tak ka nei ve hman a, ka hma hun a thim lutuk tawh bik lo ni te'n ka hre ţhin a, ka fapa hi rethei lutuk lovin ka enkawl thei ang tih chang te ka nei a, mahse beisei kan neih san poh leh beidawnna a zual ting mai a nih hi" tiin ka phun sep sep a, tunah chuan beiseina chhe te mah ka nei tawh lo. 

"Tun a i rilru ang chiah hi ka pu ve ţhin. Ka pa a thi hma a, ka nu leh ka naute enkawl an ngai a, doctor nih ve ngei ka duh bawk si. Mipa mah ni ila ka ţap ru fo a, chaw kan han ei a, hmarcha rawt chauh kan hmeh chang a inleng kan neih phei chuan hnathawk thei ber ka nih avangin ka zak chem chem zel a, tuman min hmusit lo mah se mahni kan insit a, kan inkiltawih a, mizote hi kan incheina a sang ve tawh a, hei vang hian mi rethei te tan chuan inkhawm a hrehawm chang te a awm a, mah se Zote khawvel hi a mum tih i hria ang tiraw?" a tih chuan "Hria e" tih pahin ka lo nghat a. 

"Chu tak chu a ţhatna a nia, a vir kual reng a, i tan a hun ţha a la rawn herchhuak ve mai ang. I hun a la ni lo ah ngai tawp rawh. Kan hriat miah loh laiin a vir a vir ang a, i hun a thlen ve meuh chuan thil ţha tinreng in a la hmuak ang che. Kan retheihna hriat leh lutuk te hi a ţha lo a, midang tan a ngeiawm khawp a inngaihtlawm te hi awm ve theih a nia, chu ai chuan kan awm awmin awm tawp ila, khawvela kan awm chhung chuan hrehawmna leh natna te hi kan tuar deuh reng dawn tiin pawm thlap ila, kan tawrh zawh loh tur natna hi Pathianin min pe dawn hauh lova, chuvang chuan hmachhawn thei tur a inbuatsaih lawk te a ţha a, sawi mai chuan a har hmel a, mah se kan tuar a, a tam zawk chuan kan tuar chhuak zel chu a nih hi" a ti dam dap a, uluk deuhin ka lo ngaithla a, beiseina ka nei lehnghal chu ka ti lo, mah se beiseina ka neih leh theihna tur thil ţha pakhat tal awm se ka ti. 

Chu ka thil ngaihtuah chu hria ni awm takin "Fapa i nei a, i taksa peng pakhat a ni a, lungngaihna vawrtawp a lo thlen pawhin i fapa en la, beiseina i nei leh thei mai ang" a tih chuan ka nui tawi tak a, "Ka ngaihtuahna i chhiar thei em ni?" ka ti pah hluai bawk a, a nui hul hak a, zahzelah a lu a tuai deuh puat kher bawk. 

"A hrehawm lutuk lovang tiraw? Lo tuar hram hram la, i nu sawipui deuh reng bawk a, dawr nghah tur te ka lo melh pui che anga in luah tur pawh kan zawng zel dawn a nia" a tih chuan "Ba neiah in ngai miah suh aw" ka lo ti a, a ngaihna a hriat loh hmel khawp mai. 

"Pick up hman man i lo pe a, ka hnathawh tur thlenga min ngaihvenpui i tum bawk a, nang hi ba neiah i lo in ngai ang e" ka ti a, ka nu'n hnathawh a phal loh vel te kha chu ka sawi thleng duh lem lo. 

"Ba neiah ka in ngai hleinem, mihring te chu inpui tawn tur kan nia, tunhma a ka ţhian neihchhun ţhin i ni bawk a, chuvang chauh chuan puih che ka duh. Ka ţhian dang te hi i dinhmunah hian ding ve ta se, tun a ka puih ang chiah che hian ka pui ve ang" a tih chuan rilru a nuam huai mai.

"Zonuni a buai em? Hna a tam awm sia" ka tih leh chuan "A zawng che a, biak pawh che a tum reng a, mak sak deuh deuhin min dawp reng bawk a, kan pi-i office ah pawh a kal" ngaina lo tih hriat zet hian a ti a, Neihkimi hi chu tuman an ngaina tak tak thei lo. 

"A khawngaihthlak e" ka ti a, a awmdan tur chu hmu kher lo mah ila ka ngaihruat thei vek a, heivang hi a nia a hriat ka duh lo. Hrilh ve ila chu min ngaihtuah lutuk na lamah Hmangaihsanga beng a thleng thuai ang. 

"Khawngaihthlak e mawle. I bang tih a hriat khan a ngaih a ţha lo nghal ringawt a, a ţap pur reng mai" nuih hak pah hian a ti a, "Hmangaihsanga i hmu em?" ka ti a, "Hmu lo" a tih chuan ka hnual nghal rawih ni maiin ka hria. La rei lo hle mah se a chanchin ka hre chak a, a inthunun theihna a hloh loh ngei ka beisei tlat bawk. 

"Hrilh mai la" a tih chuan "Ka nu hian eng emaw vangin a haw deuh tlat rih a, a rilru a la mumallo ve rih bawk nen, ka nu thu angin ti hian ka awm tawp rih ang a, mangang deuh a awmtir reng ai chuan hrilh te pawh ka la hrilh hre ve ang chu. A puitling a, thutlukna engpawh siam ila ţha deuhin a dawngsawng thei mai ang" ka ti chuan a awih loh hmel kher mai. 

"A hmangaih tak tak che a nih chuan kawng a dap ngei ngei ang. In inhmu leh a nih phei chuan a kal tir tawh lovang che" inringtawk tak hian a lo ti a, reitak kan ti ti a, Zonuni ang maiin ka nel tawh a, kawm a nuamin min hre thiam a, ngaihthla tu ţha tak a ni bawk. Ka dinhmun harsa leh khirh tak hian ţhian hlutna min hriatchian tir a, ţhiante hian thlamuanna an keng tel tih ka hriat phah bawk. 

Rb-a leh a ţhianpa chu tawite ka thlah ve a, pickup in an lokal a ni awm e. Kawng an dal hlauin an haw vat ta reng bawk a. 

Inchhung a ka lut tur chu mi pakhat nen kan intawk a, min kal pel mai lovin ka darah a dawm a, zu rim a nam nasat dan lah chu tawrh hrehawm tham a ni. 

"Hmuh fal che ka chakna a rei tawh a" a la ti zui a, "Min thlah vat rawh" ka lo ti bak hlar a, kal sawn ka tum luih meuh chuan ka dar tawn tawnah dawmin bangah min nam bet a. 

CONT...