KA HRINGNUN THAWNTHU-16

KA HRINGNUN THAWNTHU-16

"Min thlah nghal rawh hmela" ka ti vin hlar a, rilru buai tawh sa nak laia hetianga min lo ti hi ka haw hlur a, ţawngkam mawi hman theih pawh a ni lo.

"Fa i nei a, pasal chu i nei lo a tiraw? I khua a har ţhin em?" a ti kual vel a, a va han tenawm chiang tak. 

"Chu lehzel i hriat ve a ngai lo. Vawikhatmah lokal tawh suh" tih pahin a awmah na takin ka nam a, ani zurui ding nghet lo chu a kat ve dawrh thei a, luh lehnghal mai ka tum lai chuan ka sam a rawn ţham ta mai a, ka thinrimna chuan hlauhna zawng zawng a hnawt bo vek ni maiin ka hria. 

"Nuthlawi zu zuar mai maiin kut ka thlak e te mi tih le" a ti a, ka chhip sam a ţham reng chung chuan ka hmaah a rawn ding a, a hmaiah ka lo ham sak a, tha rum hmang meuhin chupa chu ka sual let a, rui viau mah se ka hneh lo khawp mai. Kan thawm hriain midang an lo tlanchhuak ta hlauh zawk a, ka putea chuan a hau hrep a, ka nu leh Thiangi ten inchhungah min hruai lut ve thung a. 

"Denga hi chu a che mawi lo ve ziah, hmeichhia a duh ropui si a, a nupui hi ka khawngaih ţhin. Zu a in duh leh in tawp se la, hmeichhia hrim hrim khawih a tum vek hi a dik lo reng reng" Thiangi chuan a ti hlaih hlaih a, ka sam min tuai mam sak pah mawlh mawlh bawk. 

"Denga kha chhuahvah puiah i lo sawm em ni a?" ka putean a rawn ti lut a, a ngaihna hre lo deuhin ka lo en a, ka thinrimna pawh a la reh fum fe loh laia chu tia a rawn sawi leh kher te chuan min ti thinrim leh a, ka putea thleng chuan ka ngei nghal rum rum mai. 

"Ka sawm aw zawng lo. Ka ţhiante ka thlah zo min lo pawt ding a nih kha, a awmah ka nam a ani'n kut min thlak zui a, inchhungah hian zu rawn in ve tawh suh se" ka ti hlak hlak a, engkimah zu sawi tel zel a ngai tawh dawn chu a nia le(h).

"A ţhiante an hman tawh si lova chhuah vah puiah min sawm a ti sia, i nawr luih nasat avanga kutthlak che angin a insawi a, Denga hian dawt a sawi ka hre khat khawp a nia, nula a awmpui lai renga a nupuiin a lo biak pawn thudik tak a lo hrilh ţhin" a ti a, kei aiin Denga a rin hmel zawk daih. 

"I ngaih ngaihin ngai teh" tih leh din ka rual a, mawi lo taka min ţawngkhum tu leh min khawih ringawt tu thlavang a hauh chuan min ti lawm lo kher mai. 

"Khatiangin lung lohah an la ngai lo, Denga hi nau ang chiah a ka en a nia, dawt min la hrilh ngai lo tih thuah ka zawtfiah mai che a nia" a ti dam thluam a, ka nu lo ngawi reng ringawt te chu ka haw tel hlur a, Bawiha chu chhuhsakin pindanah ka lut tau ta daih a. 

"Denga lo lut rawh" ti a ka putean a au ri te chu ka hria a, hetiang a nih chuan a huang tau zel ang a, ka tan a la pawi thei dawn tih ka hria, chuvang chuan ka fapa mutthilh hnuah ka chhuak leh ngat a. 

Min lo en ţhap a, ka nu pawh Thiangi nen an lo inţhut hnaih khawp mai. Denga mitmeng verther tak chu ka hmuh hmaih hauh lo a, ka putea zurui chuan a hmu ve lo mai mai zawk.

"Rawn lut tawh lo tur a ka hrilh che kha" ka ti chang fak a, lo let leh tawh lo tur a hnawhchhuah vang vang ka tum a ni. 

"I putea nen zu an chhuang dun ţhin a, in tan a hlu tehmai a nia aw" a bula ţhu pa chuan nuih hak pah hian a lo ti a, ka melh hrak a, a ngawi zui ve mai a. 

"I la thinrim em ni?" a ti nem duai a, ka ten lutuk ringawt. 

"Pa tello a nau ka pawm avanga min zuam nghal mai a nih chuan zanin a i tih ang khan keimaha ka awm lai min chang ru leh fo ang. Haw la, lokal leh tawh suh" ka ti a, ka nu leh ka putea te hriat lai kher a sawichhuah ve ka duh a ni, ka thlavang hauh a an hnawh haw ka rin vang a ni pakhat.

"Engmah a thleng tawh lo ang Mate. Pindanah va lut daih la, Denga hi chu ka bulah ka awm tir tlat dawn a nia" ka putea chuan a la ti cheu a, ka nu hian hmun hlauhawmah min hruai tih a hria angem le. Ka him nan lokal tawh lo tur a an khap ka ring kha a nia, ka ti sual chhia va a ni. 

"Nih chuan hruiin inthlun zawm ula, vawikhatmah min umzui tawh suh se. Min khawih leh vaih chuan mualpho huamin police ah ka report ang" ka ti salh salh a, zu in ho chuan min en ţhap a, "Nangni ho pawh kha ka hrilh lawk ang che u. Kan inleng regular tur in nih hmel a, ka bulah ţawngkam mawi lo in hmang emaw, ka phalna lova ka taksa in khawih a ka fapa nen a min tibuai a nih chuan police ka man tir zel ang che u. Ka putea leh a zu zawng zawng man tel vek mah se pawi ka ti lo. Ka duh dan lova in awm a nih phawt chuan a letleh chu a na khawp ang" tiin ka vau zui khar khar bawk a, inven nan a ti mai ka ni. 

An ţhianpa min tih dan avang khan heng ho hi ka nel lova, an tlangnel phian tho bawk si. Ka putea hnenah hian kan awm ve ren rawn hmel si a, nakin zel a min zuam zui loh theihna tur atan a ti ka ni. An chhuah tir duh lo a nih rau rau chuan kei talin ka vau ve a ngai alawm. Hmeichhia ka nia, tharum ah phei chuan ka hneh dawn lo, ka putea leh ka nute an ngawi hmak a, police bak inphenna tur ka nei chuang lo. 

"Kan tihpalh a nih kha mate" Denga hnaih bera ţhu chuan a ti liam puat a, chhang buai duh tawh lovin thinrim ţeuhin pindanah ka luhsan leh ta daih a. 

Ka nu lo lut ve chu "Damdawi i ei tawh em?" ka lo ti a, lu a buk zeuh hnuah chhuatah a mutna tur a phah zui a, khum pakhat chiah a awm a, mi pathum mut theihna chi ziazang a nih loh avangin chhuat a mut a ngai a, mut ka tum ngial nain ka nu hian a phal tlat lo a ni. 

"Zu pek che ka tum kha ka inthiam lo khawp mai. I mangang leh rilru na kha hmuh reng a hrehawm ka tia, i mutthilh nghal bawrh bawrh theihna tur a ka rin angin ka che a nih kha. Zote, i putea hnen a kan chen ve chuan Denga te ang kha chu tam tak an awm dawn tih hre lawk la, chak tak leh zam hauh lovin hmachhawn zel rawh. Khawvel hi a hrehawm a, hlauhawm tam tak a awm bawk. Tun hun hi inzirna atan hmang rawh aw ka dampui reng lo maithei che a nia. Ka telloin engkim i hmachhawn thei dawn tih ka hria, zaninah pawh i huaisen em kha" a tih mawlh mawlh lai chuan bawkkhupin chhuata a mu chu ka zu en a, a chalah a ban a dah a, a mit a chhing daih bawk a, "Ka putea hnen berkher a min hruai hi ka hrethiam lo" ka ti nawn leh ngat a. 

"Kan chhungkaw neihchhun a nia, kan baihvai lutuk bik loh zia ka lantirna a nih hi. Ka lo thi thut a nih pawhin ka in ngeiah ka thi dawn tihna a ni mai" a tih chuan "Engati nge thih i sawi reng a?" ka lo ti a, ka vin mah mah maithei a ni. 

"Mihring te chu thi vek tur alawm kan nih. Tuman kan chin kan hre hleinem, i pa pawh a thi thut a, nangmah hringtu nu leh pate pawh tikhan an thi thut a, ka thi ve thut a nih pawhin ka ruang chu ka in ngeiah an vuiliam ve thei ang. Ka nuţapa in chu ka in ve tho a ni" a ti leh a, depression te hi a nei ve em mawni dawn le ka rilru neuh neuh a, puitling a ni tawh a, a duh lo chung chu doctor hmu turin ka hruai lui thei dawn bawk si lo, "ART damdawi bak damdawi dang ei miah suh aw" ka ti ta ringawt a, mutna damdawi chak deuh chi kha a la kawl maithei a, thihna tham khawpa tam a lo ei ka hlau a ni. 

Ka nu chu a mutthilh thlengin ka veng a, zan dar11 velah pawh ka putea te chuan thawm an la nei a, mutthilh a har lehpek khawp mai. Ka sim hlui kha ka nu'n min paih sak bik lova, Hmangaihsanga biak ka chak a, ka chhungril tawt leh ipik lutuk hian engkim hrilh vek mai min ti chak a, ka nu hriat lohin ka hrilh vek mai dawn mawni ka ti rum rum hial a ni.

Ka nu mu chu ka en leh zeuh ţhin a, a mut ngaia a mut rei viau phei chuan ngaih a ţha lo nghal ringawt zel a, a awm ka en a, a che leh det ţhin a, thawk pangaiin a thaw reng tih ka hriattheih phah ţhin bawk a, thla a muang nghal huai zel. 

Zingkar a Bawiha ka chhuah harh pui lai chuan kawmchhak in aţanga tlangval pakhat lo chhuak nen kan inhmu fuh a, a inthuam danah chuan insawizawi tum ni awm tak a ni. 

Kawngkhar a nam khar chiah chu rang tawka inhawng lehin naupang kum4 mi vel tur hian "A pa" tih leh pawn a chhuah ve a rual a, tum loh deuh a ka nui chu kawmchhak pa chuan min hmu fuhin ka hria. 

"I pite bulah awm rawh ka tih kha" rum deuh taka a tih lai chuan ka putea in lam aţangin zawhte a lo chho a, an in lamah chuan a peng ve thung a. 

Bawiha lawm zawng tak a ni bawk a step ah chuan ding reng lovin zawhte pheina lamah chuan kan phei ve a, pafa inthlem te pawh an thawm a ring sawt khawp mai. 

"Duty naah pawh min hruai ve lo" mipa naupangin a tih chuan "Duty rual ni hek lo che. Min tibuai mai mai dawn a sin. Lut rawh ipi te kaitho la thingpui va in rawh, min ti tlai zo vek dawn" a ti hluk hluk a, keini nufa chuan zawhte ringawt kha kan lo buaipui a, a la lian lutuk lo a, a ngam hma phian lehnghal. Kan han chul vel chuan pangchang takin a awm a lo ti ri vel a, ka fapa nen a kan nuihpui hak hak lai chuan "Kan ta a nih kha aw" kawmchhakpa chuan a lo ti a, kan la daih turah a ngai aniang a. 

"Kan khawih mai mai alawm" tih leh din ka rual a "Ka hmu ngai lo che. Khaw nge i awm?" a lo ti thung a, ka putea in ka kawh takah chuan a mitmeng danglam zawkin mak tih hmel deuhin min en a, "Pu Sawma nupui maw i nih?" a ti ta mai, kan in leh kan nufa chu min en tawn zak zakin a meng tal tap a, a ngaihdan atthlak lutuk chu ka hlimpui ta phian a. 

"Ni lo e..a u fanu ka nia, kan lo fin rih lawk mai mai" ka tih chuan a thaw deuh huaiin ka hria a, "Kan inhnaih angreng sia, i hming tal sawi la" ngaihsam hmel fe a a tih leh chuan "Zotei" ka lo ti vat a. 

"Thang Lm-a ka nia" ti a a hming min hrilh chuan ka nuih a za ru viau a, chu chu a lo hmu ni ngei tur a ni, lungawi loh hmel deuhin min en a, "Thanglianmawia tihna a nia, min koh duah peih leh a full pawn ka phal" nur nang hian a ti a, a palian rapthlak mai lehnghal a, Hmangaihsanga pawn a chen lo nasa ang. 

"Nih chu Thang Lm, kan inhmu leh dawn nia aw" ti a kal mai ka tum chu "Ţhian ka nei lo a, ka lo leng ţhin ang" a ti a, ka remtihna lantir nan ka bu nghat a, kawm a nuam phian maithei a ni. 

Chaw ei lai chuan ka putea chu "Kawmchhakte khi an awmna a rei tawh em?" tiin a thuphungin ka zawt a, "Rei ve tawh e..an ning deuh tawh aniang veng dangah inhmun an lei a, an sa mekin ka hria. Helai hi chu a mawng deuh hlek a, an sak zawh chuan khi khi chu midang an luahtir daih ang ka ring. Anpa ber khi kohhran upa a nia, an fel a nia" a ti zung zung a, "Tukinah an fapa ni awm tak ka hmu a" ka tih leh chuan "Palian pui kha em ni?" a ti a, fapa pakhat chiah an nei lo a nih hmel. 

"Ni e" ka tih veleh "A fel a nia, police a nia, hei police sang pui pui chi hi. Kum24 chiah a la nia, kum naupangtein sawn a thlak lehnghal a, a pathlawi der mai. An hotute hnenah min hek ngai lo reng reng" a ti bawrh bawrh a, a fel tak tak aniang ka putean fak nuam a ti emai. A palen em em danah khan city police a nih ka ring reng a ni. Kawmngeih ila, inphen nan a ţha phian ang. 

HMANGAIHSANGA POV

"Sawi rawh..khawiah nge an awm?" min melh ran a, vawi tam tak ka zawt tawh, a kâ a âng duh lo. 

"I u hian a hre bik lo alawm. An nufa khan an chhuak tawp a" ti a Pa Saia lo inrawlh chu "In rawlh ve suh. I fanu chungchang a nih loh hi" ka ti nghut a, ka zin hlan a hetiang thil an lo ti hian min ti lungawi lo khawp mai. 

"Sawi rawh" tiin Neihkimi bawk chu ka zawt leh a, thunei ber ang ziazanga thil ti thei a ni lo. Ka pa ai ka awh a, midang hriatah puangzar lo mah ila a hmingin hotu zinga mi ka ni ve. Min rawn lovin Zotei a ban ngawt thei lo. 

"An kalna ka hre lo. Ka bang dawn a tia, ka remtih sak a, tikhan an nufa in an chhuak leh tawp a, thil dang hriat ka nei bik lo" a tih chuan thinrim takin a dawhkana thil awm ka vai thla a, ka ning tawh a ni. Ka kham tawh takzet. 

"A lo bang duh ta a nih pawhin dang ta che. Hrep che hian, i ngaihtheih lohna i lantir reng vang a nih hi hetiang buaina hi a awm" ka ti khur khur a, tharum hmanga dawp a chakawm rum rum. 

"Mi bang duh na na na lo dan ngawt theih a ni hleinem. I awm loh lai remchangah lain an chhuahsan che a ni mai a, haw viau zawk ta che" a tih chuan za lo deuhin ka lo nui hawk a. 

"Nang hi alawm ka huat ber tur chu. Ka hmuh hma chu ka zawng anga, ka hmuh veleh ka rawn hruai haw ang. I ngam chuan min dang dawn nia" rum taka ka tih hnuah ka inher vut a, ka kal chhuak chu Pa Saian min umzuiin office chhungah min zui lut a, "Hmangaihsang rilru fim pu hram hram rawh. Hriatthiam a har dawn tih chu ka hria mah se an kal tawh a, mizoram hi a zau a nia, i zawn hmuh kher loh phei chuan i beidawnna a zual mai mai zawk ang" a ti dam thluam a, dawhkan hmaa a ţhu chu ka melh run run a, Neihkimin Zotei leh ka nu a ngaihtheih loh chhan hi hemite chhung vang hi a ni pakhat.

"Malsawmi hi chawl rih rawh se" khauh zet a ka tih chuan phawk hrain min lo en a, mi rethei zawk pawh an bantir duh a, Zotei awmna an sawi hma chu ka theih ang angin ka nawr let ve tawh ang. 

"Hospital ah hian nurse a nia, a hna a pawimawh a" a ti ban charh a. 

"Hospital ah hian doctor leh bawlhhlawh thianfai tu te pawimawh dan a inang reng. Hospital hi ka pa'n harsa taka a din a nih angin tupawh leng halh turin ka duh ţhin. Rethei leh hausa, doctor leh hmunphiat te angkhat a awm turin ka duh bawk a. Ka pa nen khan dinhmun avanga inthliarna a awm hi kan hlauh ber a ni ţhin. Chuvang chuan mi rethei te chu bill kan chawi tlem tir bik ţhin a, hospital dang a leng lo, loh theih loh a min rawn pan, retheih lutuk vanga bill pek tur nei lo hnenah phei chuan pawisa kan beisei ngai lo. Theih ang anga chhawmdawlin kan ţanpui let a, mi rethei te tana kan luanchhuah nasat avangin Pathianin mal min sawm kan ti ţhin a, langsar khawpin kan ţhang bawk. Ka pa nen a kan duh dan leh kalphung zawng zawng Neihkimi nen hian inti danglam a, tunah chuan ka hna ka thawk tawh ang. Ka dinhmun diktak ka luah tawh ang a, ka rilru ang pu mi ka inpuih tir bawk ang" ka ti duah a, chawl tur a ka duhzia a hriatthiam ka beisei. 

"Hospital hi chu sumdawnna a nia, i hria alawm. An nunna an duh a nih chuan pawisa a an khul a ngai a, khulna tur nei lo chu kan hospital a enkawl ngaihna a awm ngang lo a ni" a la ti ngam tho a, ka u anga min hneh ve theih a inbeisei a nih hmel. 

"Mi rethei nunna a hlu lo bik i tihna em ni? Ka pa hi thingtlang pa mawlmang ve tak fapa a nih hi. Ka nu pawh chutiang tho chu. Retheihna paltlanga ding chhuak a ni a, chuvang chuan nangni angin mi rethei a nam nul ve ngai lo. Kan kal phung i duh lo a nih chuan i inhnuk dawk thei reng alawm. I upa tawh tho a, hospital a nitin rawnkal turin kan phut hran lo che" 

"I bialnu bona hian a nghawng hle che a nih dawn hi. Ka fanu nei tur hian i pa khan thu a chah ţhin che a, nang lah chu i hel tlat a, i pa khan pumkhat ni ula, keini pawh chhungkhatah insiam ila a ti ţhin a sin mawle" a ti charh charh a, min thlem thluk a la tum ruh kher mai. 

"Thu min chah ţhin a, mahse thu ka tiam ngai lo" nghet churhin ka lo ti a, ka upa ve tawh a, mi ţha lo ka umzui a nih loh chuan tuman min dang ngawt thei lo. 

"I pa duh dan tih puitlin i duh lo em ni? I u chuan a duh a, a ti mek bawk a" a tih chuan "Pawisa leh ropuina aiin hlimna a dah sang zawk. Mizo ze bo ţhakin che lo teh u. Ka pa pawh i ni lova min thunun thei turin ka engmah i ni lo. Neihkimi thluak hi suk sak tawh lo bawk ula, hetianga in tih reng chuan mi chhungkua in ţhiat darh vek mai ang" dam deuh zawk hian ka ti a, ka hrilh chiang thawkhat chuan ka hria. 

"Nang hi chu naupanlai aţang tawh a mahni thuduh leh luhlul kha i nia, han zawng phawt mai la, keipawn hmuh phak loh a an awm hi ka duh bik lo. Hmuh phakah tal awm se, theih ang angin pui bawk ila" nui huah huah chung a a tih chuan ka lo ţhen sak a, Mizorama awm ngai mang lo ka nih avangin an zia hi ka farnute angin ka hre chiang ve tehchiam lo. Malsawmi nen kan inzui hnuah ka bel chiang ve chauh a, an zia ka hriatchian rualin ka inla hrang. Tumah an fuih ngai lo, an fuih pawrh ţhin. 

"Ka hmu a nih chuan kan inah ka hruai let leh ang. Min dan tum buai duh suh ang che u" ka tih laiin kawngkhar pawh kik lovin Malsawmi a lo lut a, Pa Saia a inthiarfihlim ve thung. Hemite chhungkua hian min al hneh khawp mai. 

"Thil min eipui rawh ka ril a ţam tawh. Nu Sangpuii te dawrah chuan ka ei peih lo a nia, hmun dangah kal chhuak ang" a ti zat zat a, "Ka chhuak dawn" tih nghut pahin coat var ka hlip a, chhuah tumin ka inbuatsaih zui nghal bawk. 

"I inla hrang sawt lutuk aw Hmangaihsang, min ngaihsak duh tawh ngai lova, ka ngaih tehreng che nen" a ti nang nang a, a tum zui bar mai bawk a. 

"Ngaihsakna chhan tur che ka nei em?" ka lo ti ve thung a, he hmeichhia hian engvang teh hrep a min zar buai reng nge a nih ka hre lo. Kan inkar ka tih tawp vek tawh hnuah lehnghal. 

"I hriat ve reng kha..kei aiin nuthlawi mai mai i buaipui a, nuthlawi ho hi ring suh, an fing a, mipa rilru hneh an thiam bawk a, an duh miah loh pawh duh ang deuhin an awm thiam. An neih an eisak hnuah an kalsan daih zel lehnghal a" a ti zat zat a. Khai a! tê reuh si, ţawngthei zit zet bawk si. 

"Pawi i tih loh chuan ka chhuak duh a" dam thluamin ka ti a, chawl rih tur a ka duhna vel kha chu a pa'n lo hrilh ve tawh mai rawh se. 

"Hrilh tur che ka nei alawm" a ti leh ang lawi a, "Sawi vat vat la kal rawh" ka ban a sana ka bih pah vut a, Zotei zawn thuai thuai ka duhna chuan min nawr nasa tawh kher mai. A chungah eng thil ţha lo mah a lo thleng hman tur a ni lo. 

"Ka ngei che" a ti deuh khawl a, ka lo nui hawk thung. 

"Khanu kha a hmelţhat em em loh kha bakah fa a nei tawh lehnghal a, lo nei ta tehreng pawh ni la i fa ni miah lo chu fa atan i pawm thei dawn mi? Ka nu pawn an inrem tak tak thei chuang lovang a ti vek a, naupang an awm tawh chuan a buaithlak ţhin a ti alawm" a ti hlak hlak a, dawhkan chu ka kut pahnihin ka nam a, Bethseby file en pahin a thusawi chu ka ngaihthlaksak a ni.

"I nu thusawi chu ngaithla tawh lo la" ka lo tih sak a, "A ţawng reng miau chuan a ngaihthlak loh theih hleinem. Bakah Mapuia nen hi chuan upat lam fa kan nia, min ngaihsak bik a, ka ţhatna tur te chu a sawi ve bawk ang chu. U Zotei hian ka lak aţang hian thiam deuh a lak hran che a tum a, ka nu paw'n a sawi vek" a ti tan tan a, "A ti mai mai a nih chu. Zotei awmna i hre mial lo maw?" tih pahin file aţangin ka mit ka la sawn a, Malsawmin chu ka en ta ran a, a mitmeng a buai deuh nak a, eng emaw hriat a nei ngei a ni. 

"Ka hre lo..engatinge min zawh daih a? Tunlai phei chu ka lokal khat em hi" a ti ve tak na a Malsawmi hi inthup thiam vak lo chi ve tho a nia, hre chat lo mah se hriat a mual mual chu a nei ang. 

"I rilru i thlak hunah i hriat ang ang min hrilh dawn nia" ka ti a, ka kun lehnghal daih a, thinchhe ngang a nia, a thin a thawk leh tawh a ni chek ang chu, "Ninawm...Zotei ti reng mai" tih bak hlar pahin ka sam a rawn tuai thur a, uar zetin a a pen chhuak nghal tan tan bawk. 

Ruattei call chu chhangin "Ka lo haw dawn chiah" tia ka hrilh hnuah ka dah lehnghal a, ka buai ve theih nen, Neihkimi zet chuan buaina min siam tam hle mai. 

Inchhung a reh ţhuap a, Bawiha hlim khek thawm hriat tur a awm tawh miah lo te chu a khawharthlak a, ka nu hrawn lah kha ka thinlungin nu atan a lo pawm hman nge ka nu boral hlim a hrehawm ka ti ang tho khan tunah hian hrehawm ka ti a, Zotei a kalpui daih vang te pawh aniang. 

"Khaw nge Matei?" Siampuii hnena Ruattei awmna ka zawh chuan inchung a kawk a, tawi khawmuang lovin ka nau pindan chu ka pan a, kawngkhar a inhawn sa avangin kik buai lovin kawngkaah ka pen lut a, khumah a ţhu ngui lap a, tukin phei chu Neihkimi nen an insual lo chauh a ni. 

"Ka nu pate kha, an veng awmna i hria em?" chair pawt tawlh a a khum hma a ka hung chu min lo melh kiau a, "Zotei pu te kha" ti nawn lehin chair ah chuan ka ţhu thla a. 

"Tuikual nge tuikhuahtlang ka hre lo..tui tih chu a tel ang. A thu hrimah engatinge an chhuah daih le? Kalna tur mumal pawh an nei lova, Neihkimin hnawtchhuak lo se chu anmahni thua an chhuah ka ring lo hrim hrim. U Zotei lah a hna aţangin a bang kher bawk sia, U Neihkimi bak rinhlelh tur ka hre lo" a ti hlak hlak a, ka ringhlel ve tho a, ka thin pawh a rim takzet a ni. 

Mahse, thinrim a chet rum rumna hun a ni lo. Rilru fim put a ngai a, uluk deuh a ngaihtuah chunga chhui chian ngai chi a ni. Thiam deuhin an kawng ka dal ang a, ka pa ro sem dan pawh ka endik vek ang. Thinrim a ka chet buan buan chuan hun ka khawhral mai mai a ni dawn a, Zotei ten hrehawm an lo tawrh nasat hman ka hlau a ni. 

Pawn aţangin U Remremin "Keichu ka hria a(h)" a lo ti leh ţhin a, thu pawimawh kan sawi dawn hian kan ko ve ngai mang lova, zep ngai chi a nih phei chuan hre ve lo se kan duh zawk mah. Tunah chuan ka nu a awm tawh lova, a khua a har ve a nih ringin "Lokal teh Rem" ka ti ta nge nge a. 

Inthlahrun hmel deuh a a lo lut zan zan chu "Mi thusawi ngaihthlak ruk i la ching reng tiraw?" ka ti a, chil a lem khalh a, tim daiin min melh bawk a, he thil hi a chin ţhan a ni a, naupanlai aţang tawh a a chin dan hrim hrim niin ka nu tak zawk khan a sawi ţhin. An hau sim hleithei lo a ni awm e. Lehkha a zir ve thei lova, pawnah hnathawkin a chhuak ve thei lo bawk a, ţhian a nei hran lo bawk nen ka nu kha chuan a nun khawhar inawm tleinaah a ngai ţhin a, a ni chiah em phei chu ka hre lo. 

"Zotei pu te chu khawi vengah nge an awm? Ka sawi awmzia chu, ka nu khan a pa te awmna a sawi ngai em? Ka pa te chu chutah chuan an awm a ti ngai em?" ka thiam dan dan a ka zawh hnuah pawh bo hmel deuhin min en haw a, kan inzawh chhuah loh hmel khawp mai. 

"Ka nu khan a chhungte chanchin a sawi duh ngai miah lo a, U Zotei pawh min rawn fin hnuah kan hre ve chauh a nih kha. Kan pahnih a in kan nghah dun chang te hian ka zawt ve ţhin a, mahse thil dang a sawi daih zel a" Ruattei zawk chuan a lo ti a, mipa hi chu kan ngaih a sam deuh nge zawh nachang ka hre ngai hauh lo ve thung a. 

"U Zotei putea alawm. Kha hmanah pawh lokal tawh kha, hnar lian pui kha" U Remremin a lo ti ve khauh a, ka ngaihven rang khawp mai. 

"Chutah chuan an kal em ni?" ka tih chuan inngaihtuah ni awm takin chunglam a melh a, ka nawr lui nasa deuh em mawni ti rilru in ka khawngaih leh deuh a, "I hriat loh chuan a ngai lo aw. Ka zawng chhuak ang a, Zotei leh ka nu leh Bawiha te chu an lo haw leh mai ang" ka tih rualin "Hiv an ti" a lo ti ve nghal zat a. 

"Ka hre vek alawm Ruattei pawn a hria" tih pang pang paha Ruattei a kawh chuan "Chutiang ka hre ve lo" a ti bak hlar a, rilru fim an la pu thei lo a ni ber. Inchhunga thil thleng thut hian min barakhaih a, mumal lo hlawm viau mah se a awm lo lem lo. 

"I hriat ve tho kha ka hmu che alawm" U Remremin a tih chuan a hnial tawh loh nan Ruattei chu mitmeiin ka khap a. 

Ka nu leh pate inneih lai hian ka awm lova, a putea an tih pawh chu ka hre veleh chuang hauh lo. 

"Ka nu nau chu keipawn ka hmu tawh. Ka nu ţawiawm tu awmchhun kha a nia, mahse a awmna veng ka hre chuang lo. U Zotei leh ka nu chu puitling an nia, anmahni an inngaihtuah thei mai ang a, Bawiha mawlh kha a ni ka khawngaih chu, engmah a hrethiam ve der si lo. Tihian a kual a kual ve mai chu a nia" a ti chuai raih a, tawng pawng zawn tawp chi ni a ka hriat lohna chuan rilru a ti buai khawp mai. 

"Rei deuh chhung kan inah a awm ve tawh chung pawn ka nu hi kan lo hrechiang lo khawp mai. Misual ruk bo ngat phei chu nise kan mualpho viau ang. Kan hriatchian loh em em dan hi a awihawm loh zawk" Ruattei chuan a ti leh a, a duhâm khawp mai. 

"A sawi miau loh chuan hriat ngaihna a awm hleinem" ka ti sup a, U Remremi lah hria inti siin sawi tur mumal a hre der lo. 

"A putea kha khawi vengah nge a awm kha aw..a pu te veng kha chu a bulah Tui tih a awm chiang alawm. A pu hming kha tu nge ni kha aw?" mumallo zetin a ti nawk nawk a, khawiah nge maw an kal daih le? 

"Ka lo enfel ang a, ka nu pa hming chu ka hre thei mai ang. Ka pa khan lehkha pawimawh dah ţhat a neih nual ka ring a, xerox chauh pawh hmu ila kan ţangkaipui thei ang" ka tih chuan chawp leh chilh a a mitmeng nung nghal chu a hmuh theih a, beiseina a nei sang nghal viau a ni. 

"Engmah ka hre ve mang si lova, ka nu khan a pa te chanchin sawi ri ngai miah lo mah se lehkha pawimawh ţhenkhatah chuan a pa hming chuanna a awm dawn hrim hrim. Zawng thuai thuai rawh aw. A hming kan hriat chuan veng hming ka sawiah khan kan rin zawn tawp dawn a nia" ka kut a rawn vuan chawt a, Zotei nen khan an lo in ngaina hman viau tih ka hriat phah bawk. 

"Ka nu phei kha chu U Zotei khan damlohna a neih a rin thu a sawi ziah a, in entir a duh ngai mang si lova, Neihkimi hian pawisa a pek leh pek loh ka hre lova, a pek loh phei chuan kan zawn thuai thuai a ngai ang. Ka pa kha a thih hma khan Neihkimi nen an awm hrang ngun a, ro chungchang pawh nangmah ngeiin Pa Muantea i zawh chian a ngaiin ka hria. Kan u hi tu tu ten emaw a rilru an ti buai zo vek tawh. Kan chhungkua hi midang tan inhmang em em lo mah ila hnawk sak kan ni ngai lo a sin mawle" a ti nang nang a, ro vel hi ka ngaihven ve tehchiam lova, ka tan engmah dah lo mah se doctor ka nih vang hrim hrimin ei ka hmu dawn tih ka hria. Mahse ka nute an chhuah thut takah chuan ngaihven ve a ngaiin ka hria. 

Neihkimi lo haw chuan "Naktuk hi Pa Saia piancham a nia, kan chhunga chaw kan ei phei a ngaih hmel" a rawn ti a, ka insehruh nghal ţeuh a, min ngainep ka ti khawp mai. 

"Nangmahin va ei rawh. Midang chu kan kal ve lovang" khauh deuh taka ka tih chuan min en ţhap a, puitling vek an ni a, thunun beh tlat ka tum ngai lo, mahse tun ţum chu an ti mah mah ka ti ve a ni. 

"Zotei vang maiin inchhungah lungawi lo hmel pu reng kher suh. Kan chhung zinga mi ang an ni tawh a, kan ţawiawm ve a ngai alawm" a tih chuan "Ka dang ve hleinem che" ka ti hmuk a, min kalh lui ţalh ngam bik lo. 

Pindanah lutin tukverh lam ka pan nghal vut a, mangchhia ang mai a ni. Ka farnu huatna avanga thinrimna inmung chuan thisen a ti lum bulh thei hial a, Zotei mangang thlabar dan tur te ngaihtuahin tukverh bul bang chu ka chum pawp a, min bengdai zo chuang der lo. 

Chair nghenchhan a jacket in bang chu lain chahbi ka ban zui vut a, pindan aţanga ka pen chhuah chuan Ruattei nen kan intawk chat a. 

"Mate ka chhuak lawk dawn nia" tih leh kal ka rual a, pan lam tur pawn hre lovin ka inkhalh chhuak thawr a, inchhir leh pawi ti hmel pu miah lova Neihkimi ka hmuh hian thinrim a zual ţhin a, kut thlak duhna ka nei rum rum fo mai. Zan boruak reh ruih hian min beng dai thei mahna. 

Ka hnaih a Zotei a awm hian kim hluah hluahah ka inngai ţhin a, a nui ri mawi tak mai hriat tur a awm lo thut te hian min ti he deuh huihin ka hria. Hmelţha tih zawng a inang lova, ani kha hmeichhia ka hmuh tawh azawng a hmelţha ka la tih ber a ni. 

A vun a ngo hran lova, a sam kha a dar pel chang chang chauh a sei mah nise a nû zem tho. A mitmeng ti lang fiah turin makeup a mamawh ve lova, engmah a inhnawih loh paw'n a mitmeng nalh tak kha a fiak kak reng a, a hmui hnuailam chhah tap kha a lai takah zia a kal thla raih a, a mizia leh nungchang nû hnâp leh dam raih reng ţhin te kha ka duh chi tak a ni. Ka mitah chuan a famkim a, chu chuan keipawh min ti famkim ve a ni. Amahah khan nitin ka luang liam ţhin a ni tawh ber ang chu. 

A dinhmun chhiat zia hriain a inthlahrung dâk reng a, ka hmuh hmasak ber a gate bul a bungrua nen a lo din khan buaina tawk a ang ka ti nghal a, rin loh deuhin kan inchhung ngeiah ka hmu leh a, a pawr pheng a, a hmel a ngui viau bawk. Ngaihven lo âwm deuh a awm chunga ka khawngaih nghal zia a chhût thleng kher lovang. 

Thiam dan danin ţhat ka chhuah a, amah ka hnaih khan mak deuh maiin min hip tial tial a, hrilhfiah theih pawh a ni lo. A rilru a ţhain a in ngaitlawm a, mi pawi sawi a hlau bawk. Nghet lo leh dawrawm viau angin a lang na a a zia a nghet charh thung a, mipa dang a um pawh nise ka hmuh phawt loh chuan ka awih kher lovang. Chutiang khawp chuan ka ring tawk a ni. 

Ka ngaihtuahna avang chuan thinrim zetin ka ţhen suk a, lo kalsan lo tawp ila ţha tur. 

Glass ka down a, thlifim te chuan keimahah hna an thawk miah lo emaw tih tur a ni. 

"Khawiah nge i awm le?" ka ti chhuak sup a, hmeichhiah pawh kawlhrawng lo chi, rilru dawih tak a nih avangin ka ngaihtuah lehzual. 

Ka mangan takzet rualin khawharna in min tuam a, thlifimin a thawt heuh heuh rual chuan lunglennain min zem ve chiai chiai reng a ni ber. 

Kawngsirah motor ti dingin mit ka chhing a, a hmelţha zet kha rawn lang zawkin manganna bawkin min delh leh a, ka farnute lungawi lohna pawh a awm lutuk; tumah ngaihven ngai lo khan Zotei kha ka duat em em a, amah ngaihsak turin tumah a ngen ngam lo na a ngaihsak a mamawh zia ka hre thung. 

'Ka zawng hmu khawp ang' rilruin ka ti mawlh mawlh a, mualpho huamin nupuiah ka nei bawk ang. Nuthlawi fa nei tawh tih mai maiin a hlutna a ti bo lo, fa loh vanga thlawi lo an tam alawm. Fa a neih vang hian ka ngainepin ka zuam phah lova, ka hmangaihna a nep phah lo bawk. 

Ka phone vibrate chur chur chu lak tumin ka kekawr ipte ka zen ruk ruk a, phone screen a Zotei hming lo lang chu ka en ran a. 

CONT..