KA HRINGNUN THAWNTHU-17

KA HRINGNUN THAWNTHU-17

Phone ri chu ka ngaithla vang vang a, ka nu'n ka sim hlui min pek let leh hmang khan chanchin hrilh ka tum a ni. Ka awmna sawi ka tum lo thung a, a mangang dawn tih ka hria a, zankhat mut theih loh pawh a hrehawm; a thlamuan deuh theih nan a 'ka ţha e' tih tum a call ka ni. Ka awmna hmun hi a him lo tih ka hre bawk a, awm reng ka tum lo bur. Ka nu hi dam se, a remtihna thlapin ka chhuahsan ang tiin rilru ka siam fel tawh. 

A lak theih lawk lohah chuan dah leh mai ka tum ut ut a, ka dah hmain phone a nghawr det a, "Khawiah teh hrep nge i awm a?" a ti vin zui ţhat bawk. 

"Ka ţha a nia" ka tih chuan "Khawiah nge i awm?" a rawn ti nawn leh a, a thinrim zia hre turin amah hmuh kher ka mamawh lo khawp mai. 

"Ka nu nen kan awm. Ngaihtuah kan ngai lova, min zawng duh suh lo tih ka tum a" ka tih leh chuan "Ka hmuh hma che chu ka zawng ang che. Pil ril deuhah pawh awm la ka hmu tho ang che" luhlul zet hian a ti a, ka nu a chet ţuah ţuah lai chuan puanin ka inkhuh a, vanneihthlak takin a harh lo hlauh e. 

"Zawn kher ka ngai lovang. I mangan lutuk hlauin chanchin ka lo hrilh che a nih hi. Ruattei pawh min lo hrilh sak la, min duhsak ber bertu in ni sia, chanchin sawi lova pil bo hmak chu kei ni ila ka mangang dawn lutuk a, ka awmna ka sawi a la rem rih chiah lova, chuvang chuan min zawng lo turin ka ngen pah bawk che" ka ti duah a, a reh vang vang a, zan a rei tawh a, kan inah takngial pawh hnar kùk kùk ri lo chu hriattur a awm tawh lo. 

"Engtia khawsak zel nge in tum?" a rawn ti a, a ţawng ring tawh lova, a chauh hmel viau zawkin ka hria. 

"Dam chuan thawh tur a awm zel alawm. Puitling ka ni tawh a, ka inhai kaw thei em em ang. Engmah sawi lova bo daih kha a puitling lo ka tih vangin ti hian ka lo bia che a, mahse ka be zawm tawh kher lo ang che" ka ti a, a aw ka hriat hian ka ngai thar leh a, engahmah ngai lo ang maia biak vel hi harsa ka ti ve tho.

Min duh zia ka hria a, rilru sual ka put chang chuan ka bula awm tur a thlem chhuah daih mai te ka duh rum rum a, tupawh kan ni vek ang ka ring. Thinrim lutuk chuan ze ţha lo lai phawrh chhuah mai a chakawm ţhin. 

"Lo let leh rawh u" beidawn hmel zet hian a ti a, ka khawngaih kher mai. 

"I ţha tak tak em?" a rawn ti leh sup a, "Aw ka ţha alawm. Min ngaihtuah miah suh aw hei Bawiha pawha muttui lutuk" ka ti a, ka nui lui pah hak bawk a. 

"I awmna veng hming tal i sawi thei lo em ni?" a rawn la ti ţalh a, "Ka hrilh thei lo che" ka tih chu lungawi lo zeta rum nghut riin a zui a, tunah chuan ka dam ţha tih a hre tawh a, min ngaihtuah lutuk tawh lo deuh ang chu. 

"Ka ngai che" ti a a aw thuk leh hniam ruih ka hriat chuan ka thinphu te hi a su leh dut dut tawhin ka hria a, Pathian hian chhan awm ngeia min intawn tir a nih ka ring a, eng ber nge a chhan ni ang le ti a ngaihtuah zui a ngai fo thung. Ka lungngaihna tur bawkin rem a ruat leh bik tawh a ni maithei. 

"Ka dah tawh dawn a nia" ka tih chuan "A ţul lo" a lo ti vat a, "Live location min lo thawn rawh. Ka hmu che ang a, tumah ka hrilh lo ang" ngenngawl zet hian a rawn ti leh a, mahse "Nghak rawh" ka lo ti thung. 

"In thuhruk reng ka tum hleinem. A ţulna avang chauhin tihian ka awm rih a, ka bo reng dawn lo. Hmeichhe dangte ang thoin Bawiha tan hian a ţha ber ka duh pui ve tho a, ka awmna ngaiah hian awm reng ka tum lo" tiin ka inpuang ta nge nge a, ka hma ka sial ve ngawt mai. 

"Ka lo biak leh hma che chu pangai deuhin lo awm la, remchang hmasa berah keimah zawkin ka lo be leh ang che" tih leh phone dah ka rual a, ka switch off nghal bawk. 

Ka ngai zui veng veng a, ka duh ve a ni tih ka pawm thlap tawh bawk. Kan inkawp rem thei kher lo maithei mah se ka duh takzet a ni. Zu rui ho kar a thlaphang taka ka awm chang te hian min thlamuan turin awm ve se ka ti ţhin a, hlauh ka neih chang pawhin amah tho ka hrechhuak ţhin. 

Ni a liam a, thla vei ve zel bawk a, ka hringnun hman dan erawh a hahthlak telh telh emaw tih tur a ni. Ka nu a dam thei lova, hmuh theih khawpin a chhe chak a, a hmel pangai kha a bo vek tawh. A mu tawp a, engmah a ti peih tawh lo.  

Hmangaihsanga ka la be leh lova, ani paw'n thawm a rawn nei leh lo. Min zawn chhunzawm tho chu ka ring a, mahse veng tlabirh lutukah zu kan zuar a ni tih hi a ring pha miah lovang. 

"Mate, i nu hi a khua a sik hluah mai" ka putean a tih chuan ka insuk lai dahin ka nu ngaihven turin ka kal nghal a, khumah a lo mu khur der der a, amah be pah mawlh mawlh chunga puan lak belhin ka sin tir a, "Nachhawkna ka lo pe ang che" ti a ka hrilh hnuah ka chhuahsan a. 

Ka putean min lo zui chhuak thuai a, "Hospital ah hruai ang..duh lo mah se hnuk lui mai ang. Tunah phei saw chuan ţang turin tha pawh a nei tawh dawn lova, hruai theihna hun remchang a ni mai" a ti mawlh mawlh a, a mangan ve hmel viau mai. 

"Motor hman tur i hriat chuan hruai pawh a pawi miah lo" ka ti a, ka ngaih a ţhat lohna a rei tawh a, keimah chauh chuan ka ti lui thei si lo a ni. 

"Kha nachhawkna hi lo va eitir la insuk hi kan tleuh zo law law ang e" tih leh damdawi pek ka rual a, a la ve nghal mai a, tui nen pindan lamah a kal zui zat bawk. 

"Zote khawmaw pakhat" kan customer hlun ve deuhin zu a rawn lam a, ka putean a dah thuhruk na ţhin aţang chuan phawrhin bottle khat chu ka pe vat a, ka awm rei ve deuh tawh hnu hi chuan zu ka hralh ve ta reng mai. A tirah khan hreh deuh mah ila ti lo thei lo dinhmunah ka ding a, ka putea a awm hnai reng bik lo nen, loh theih loh a hralh a ngaih chinah chuan ngaiah ka nei ve vat mai. 

Kal a tum zet tawh hnuah "Khaw nge midang?" tiin a ding khawmuang leh a, "Pindanah an awm. Ka nu a nuam chiah lova" ka lo ti ve mai a, "A va zia lo ve, eng nge na? Hospital a hruai te a ngai em?" a ti a, hepa hi a rawnkal ngun viau a, kan inah zu a in ve ngai lo thung. A felin mawi lo deuh a ţawng pawh a nei ngai lo.

"Amah hian a duh tlat lo ţhin a, mahse vawiin chu hruai kan tum ve deuh" ka tih laiin Thiangi a lo lut a, kan thusawi hriat chin a nei ni ngei tur a ni min zawt fiah ve vat a, ka hrilh rual rualin ani chu pindanah a tlan lut nghal daih. 

"Motor ka lo keng a, a dang zawn buai ai chuan ka hruai mai dawn mi? Pi Atei hi tunlai ka hmu chhe riau a" a ti ban charh a, a remchang viau tak mai. 

"Lo ţhu rawh ka putea ka'n ko ang" tih leh pindan a tlan luh ka rual a, ka nu chu Thiangin a lo buaipui mek a, U Ţp-a thusawi ka hrilh hnuah ka putea nen kan inzui chhuak a, keichu bathroom ah insuk buaipui turin ka lut tlang a, an pahnih khan an inbe fel thei mai ang. 

"Mate, i kal chuan Bawiha a tel ve zel a ngai dawn a, Thiangi nen kan kalpui phawt ang a, in lo nghak rih mai ta che" pawn aţanga ka putea lo au chu "Aw..ka zo ţep, min lo nghak lawk rawh u" tiin ka lo chhawn a, an kal tur tal thlah liam ka duh a ni. 

Ka nu chuan hreh viau mah se ka putean thinrimin a nawr a, Thiangi leh U Ţp-a ten an thlem heuh heuh bawk. Pawn thlenga an kaih chhuah hnuah step a zawh ve ngai lo turin ka putea chuan a pua a, ka nu ka thlah liam hnu chuan thil hriatchhuah ka nei. 

A thawmhnaw dahna leh bawm zawng zawng ka hai a, Art damdawi kha a lo awm tawh miah lo. Tiang damdawi hi chu vawikhat a la ţeuh lovin lak zeuh zeuh a ngai ţhin niin ka hria a, mahse ka nu chuan in a chhuahsan leh tawh hauh lo a, a awmzia chu damdawi a lo ei lo vang vang tawh tihna a ni mai. Damdawi thlah thut hlauhawm zia ka hre ve tho bawk nen, hlauhthawnna a zual duh khawp mai. 

"Civil hospital an khat hneh lutuk a, i nu chu falkawnah kan hruai dawn a, hei kan kal mek" tiin ka putean chanchin min rawn hrilh a, "A khua a la sik em? In phur kual nasa sia, a chau duh awm mange" ka tih chuan "A chau angreng. A tawpkhawkah kal a ngai ţhin tho a, kal tur a kan tih lai khan duh mai se ţha tur a nia" a rawn ti lang lang a, "Admit a ngai an ti em?" ka lo ti ve thung. 

"Ka hre lo le..a ngaih tak leh ka lo hrilh dawn che nia"  a tih hnuah kan inbiakna kan ti tawp a, chawhma lamah ni a sat ţhat tehlul nen khua lah chu a hniam ruai ruai a, puan pho ka seng fel meuh chuan ruah a tla der tawh. 

Inleng kan nei lo bawk a tukverh bula ţhutthleng sei inhungah chuan Bawiha pawmin ka ţhu a, thlang lam chu kan thlir dun reng a, hringnun hi thunun theih ka chak ţhin khawp mai. Kan hringnun ziak a, changtu ber kan nih lai hian khuarel thil, thunun theih miah loh kan ngah lutuk a. Duh dan thlapin kan thawnthu kan ziak thei ţhin lo a ni. 

Zing ka tho te hi thil hlimawm takin min hmuak ve se ka ti ţhin a, diktak chuan min ngaihsak a, ka ţhatna tur chauh duh tak tak tu tuemaw hi ka bulah lokal se, rei tak chhung min ti ti pui se ka ti ţhin. Ka dinhmun chhiat lai ber a min vuan tlat a, ka dinhmun a ţhat a min lawmpui thei chi ţhian hi ka la nei ve lo. Nun a bumboh chang pawh a lung ang mai a chak ţha min nawr kal tur ka mamawh a, mahse chutiang chu ka la tawng lo. Ka ţhian neih ve chhun te hi an fel viau a, a zawng zawngin ka inhawng ngam lo thung. 

Khaw thim dawn ruaiah "I nu chu an lo admit a, zanin chu ka riah pui a ngaih hmel. Thiangi a lo haw dawn a, a riah pui thei ang che u" ka putean a rawn ti leh a, ka thaw hak ringawt a, "Ngaihtuah lutuk suh aw. Mahse thisen pek a ngai te an tia, thisen var an ti emaw ni, khatiang te kha a lo tlachham a" a tih leh phei chuan ka chal ka dawm vang vang a, duh ka ngah a, tih theih ka nei tlem thung. Hei hi tun a ka awmdan diktak a ni. 

"Thisen te an lo test a maw, i nu hian--" a tih lai chuan ka lo pawt chat a, "Ka hre vek tawh. Tikhan zanin chu riah pui phawt la, inchhawk dan a awm mai ang" ka ti a, Bawiha bawkin rilru a tibuai leh ta. 

Naupang hi chuan hri an man hma a, hospital a hruai chi a ni dawn hauh lo a, ka tello a in a awm tir lah ka phal der lo. Rba leh Zonuni thlenga ka ngaihtuah chhuah phah a, Ruattei leh Hmangaihsanga an lo lang leh a, Thiangin min riahpui reng thei lo ang a, bakah zu a ruih tawh chuan a ngaih a sam vek tawh zel a, tlangval leh patling rui ţawng zet ţhinte kar a mahni a awm chu ka ngam teuh lo. Ka putea lah zu in lovin a awm thei lo tih theih a ni tawh a, lo haw a duh vat dawn. Hospital a ka riah ngei a ngai ang a, engtin nge ka fapa hi a awm ang? Ruattei ka pan mai dawn em mawni ka ti rum rum. 

Thiang lo haw chuan kimchang takin chanchin min hrilh a, doctor ten an lo ngai serious viau a ni awm e. 

Zu a inthlit rak rak a, a rim hi ngaiah ka nei tel hleithei lo. No hnih vel a in hnu chuan kan piahah rawn ţhu vein Bawiha chu a chhawnchhaih luam a, chaw ei pawh kan ngaihsak hleithei lo. 

"Zote, keichu i nu hi a damchhuah ka ring lo" a ti deuh khawl a, ka melh hrak a, min lo en ve ran bawk. 

"Nitin hian chhiat lam a pan zel emaw tih tur a nia, ka lokal ve lah hian ka pum a nuam lo a tih loh leh ka pum a na a tia, a luak a chhuak ngun bawk si, damchhuak thei chi a ni pawn ka hre lo" a ti phawng phawng a, min hnem lo ve khawp mai. 

"Nunna thuah mihringin thu kan nei lo. Pathian thu thu a ni mai" ka ti chang fak a, ka nu hi thi turin ka la dah chhin ngai lo. Mahse Pathian chuan min laksak leh duh tho maithei. 

"Ni chiah mai keini lah kan thi thei der si lo. Mahni nunna lak ngawt lah ka ngam bik si lova, thi tawh ila ka ti a nia" a ti hlak hlak laiin Thang Lm-a a lo lut hlawl a, a duty loh chang chuan a lo leng ve fo a, kan inkawmngeih tawh viau mai. 

Ka nu chanchin te kan lo hrilh a, min ţawng thlamuan ve luam a, a chhungte hriat lohin a lo chhuk a, zu tlem a in ve ţhin a, tunah pawh pawisa min hmeh bel leh chawt chawt tawh. Police ho hi chuan an zu man khawl sa in tur an nei ţhin emaw ka tia, Thang Lm-a hi chuan ka putea zu hlir a rawn in ţhin. 

Ka inngaihtuah fe hnuah ţha bera ka hriat danin ka che a, Ruattei dawrah ka kal. Min hmu thut chu a hamhaih deuh a, rei tawk fang min en hnuah "Ka kek buan buan dawn che em mawn le" a ti ban charh a, ka banrekah man chawtin pawnah min kaichhuak a, "Customer an tam..hetah lokal teh u" tih leh a dawr bul chiah thingpui dawr lama min kalpui a rual a, kan ţhut fel hnuah pawh rei tak chhung chu kan inbe lo. 

A ţulna in min nan miau avangin duhthlan tur ka nei ngang si lova, Rb-a ka rawn a, ţha min tihpui hnuah hetiang hian ka che chhuak ta mai a ni. 

Bawiha kut a khal niap niap a, en pawh min en ve duh lawk lo a, kan eitur chah an rawn dah hnuah "Tun thlengin kan la zawng cheu a" muang charh hian a ti leh a, a hnar tuai zeuh pahin min rawn en a, "Veng tin deuhthawah kan zawng tawh che u. U Remremi lahin ka nu a ngai em em a, keipawn ka ngai che u. Hmangaihsanga leh Neihkimi lah ho te teah an inhnial reng a, kut an inthlak lo chauh reng a ni ber. Chhungkua kan buai vek a, inbe peih pawh kan awm mang lo. Ka nu hi nu tak tak angin kan en a, ka pa'n min kalsanna a la rei loh tehlul nen ngati nge ka nu'n min kalsan ve daih a?" a ti bawrh bawrh a, fahrah nun hi chu a hahthlak a ni. Chhungkaw mumal deuh hlek chu nei ila ka chhuahsan tawh hnuah hian ka let a ngai awm der si lo. Neihkimi a thinrim leh ang a, Ruattei te ka ti na bawk si, hetiang tur teh hrep te chuan Pathian hian min siam ve loh mai tur a nia. 

"Ka nu a damlo a, hospital a ka riah ngei ngei a ngai. Bawiha hi min lo awm sak thei angem? Mahse Neihkimin a hmu dawn bawk sia tiraw?" ka ti a, duhthlan tur neih ka va'n chak tak em. 

"A damlo maw? Eng nge na a? Hospital ah in dah lut maw?" a ti nghal mawlh mawlh a, lu buk nghat pahin thil awmzia ka hrilh a, Hiv+ a nih thu erawh ka hrilh tel lo.

"Engati nge min chhuahsan reng reng a?" a ti ţha leh a, "Chulam chu sawi lo teh ang" ka tih chuan a lungawi loh hmel khawp mai. 

"Bawiha hi Neihkimi hriat lohin i lo awmpui lawk thei angem?" ka ti nawn leh a, "Ka u in a hnawtchhuak cheu tiraw?" a lo ti ve thung. 

"Ka sawichhuak vek dawn..Hmangaihsanga hnenah engkim ka hrilh ang a, ka nu nen lo haw leh rawh u. Ka pa in a nia, a hnawt chhuak ngawt thei lo che u. Ka u in a hnawtchhuak che u em ni?" chiang khel khawl a a tih chuan chhang lovin soup ka hawp a, a sa phian lehnghal. 

"I duh ve tiraw?" a la ti tak deuh deuh a, hre lo awm deuh a "Eng chu maw?" ka lo tih chuan "Hmangaihsanga hi i duh tiraw? Duh lo la chuan biru reng chungin a mangan hlauin i rawn be lovang. Mangang leh rilru buai deuh a a awm i hlau a nih chuan i duh a, i ngaihsak ve takzet tihna a ni mai" a ti a, ka soup hawp a sa bawk nen, kawchhung a sa ţha ham ham duh khawp mai. 

"A ngai che a, i biak thu a sawi laiin thil dang a sawi tam lem lova, ani chu i hriat kha" tiin a ţhen zui sak a, "Mahse, hunawl a neih apiangin a inkhalh chhuak a, a zawng ţhin che. Nangni lah in reh vang vang a, tunah i rawn inlan hlawl a" a tih chuan "Duhthlan tur ka nei lo" ka lo ti hap a. 

Ngaihţhat hmel vak lo a min en lai chuan "Ka nu hospital ah a awm a, Bawiha awmpui tu tur an awm lo. Hruai ve ngawt chi a ni lova, phal pawh an phal lovang. Neihkimin a remti dawn lo tih chu ka hre lawk vek a, mahse inah a awm khat a, a hriat miah lohin a awmpui ru thei maithei. Lo hre dawn pawh nise duhthlan tur ka la nei chuang lo. Nang lo chu pan tur ka nei lo" zak tak chung hian ka ti a, a ngaihdan ni chiah lo hmel chuan min ti hlau lek lek a ni. 

"Naupang pawisawi lo a nia, thuhruk kher a ngai lo. A ngaihtheih loh leh lawm lo se a ni mai alawm. Chhungkhat hnai vai nei mang si lo engati nge in chhuah ringawt? Ka nu a dam loh phei chuan in lo let leh ngei ngei a ngai a nih chu" a ti hlak hlak a, a ngaih ang a awlsam a ni der si lo. 

"Engpawh nise hospital ah chuan ka kal phawt ang a, ngaihtuahawm a nih loh a riahpui kher a ngaih loh phei chuan in a i hawnpui kher ngai lovin Bawiha hi ka rawn la leh ang" tiin thil dang ka sawi a, kan chhungkaw buaina hi chu sawi a fel thei chi a ni lo. A hnawk tial tial emaw tih tur zawk a ni. Kan baihvai leh fahrah zia phei hi chu sawi nawn reng ka duh lo.

Ka kal dawn chuan ka fapa pawm chungin min en ran a, "Hmangaihsanga hnenah engmah la sawi rih lo phawt rawh" ka ti hram a, taxi a ka lut tur chu Bawihan min ngen deuh na a Ruattein a pawm miau avangin min ngen nasa lo hlauh. 

"Ngaizel thleng aw" ti a driver ka hrilh hnuah ka ţhut dan ka siam rem a, ka chhuahsan ve uk tawh te puihna dil ngaia ka awm leh hi ka zak takzet a ni. Thang Lm-a khan a nu hnen a dah turin min râwn a, mahse Bawihan a duh der si lo. Reilote an lak chhoh ve pawn a rawn ţap haw ngei ngei zel a, Rba te inah pawh a awm thei dawn lo tih hriain Ruattei ka pan ta tawp a ni. Zu dawra amah chiaha hnutchhiah ka ngam miau si lova, tlawm leh zah pawh a sawi theih loh. 

Ka nu chu amah chauhin a lo mu bâm a, a chauh hmel kher mai. Ka thawm a hriat pawn a meng peih mang lova, a kut zawi hnakah chuan vawnsakin khum bulah ka ţhu ta reng a. 

A vun a dâng lap a, a thisen dawn te chuan awmzia a nei lo ni awm tak a ni. Khum bula miten min lo be siam siam a, zan a mut mumal loh thu te an lo sawi a, damna in hian kan tan awmzia a neih ve loh ka hlau khawp mai. 

Min chhawk thei an awm miau loh avangin ka nu chu ka riah pui ta nge nge a, ka fapa ngaihtuah viau mah ila tihngaihna a awm lo. Neihkimi thinurna ka hmachhawn leh ngei a ngai dawn a nih hmel. 

Chanchin zawt tur pawn Ruattei chu ka be lova, ka nu a ţawng peih bawk si lo, keimahin khawhar deuhin ka awm rek rek a ni ber. In kan chhuahsanna a rei ve tawh a, khami ni aţang khan damdawi a lo ei tawh lo char char tihna a nia, a chak lo tial tial tih chu ka hria, a chhan zawh nachang ka lo hre lo a ni. 

Zing chaw tur ka dawh zawh hnuah kan piah a damlo awmpuitu nen bawk chawhmeh lei turin kan kal leh a, kan ti ti luam a, kan chhungkaw chanchin min zawh chuan ka chhang lo. 

"I nu hi Hiv+ tiraw?" a tih chuan mak ti deuh tak hian ka en a, chu chu a hrethiam ni ngei tur a ni "Doctor te hian thawm an dim vak ngai lova, damlo te hian eng natna pawh vei ila an sawi phawng phawng zel a, doctor in ward a rawn fan ţumin a ţawng ri ka hria a" a ti nang nang a, sawi nuam a tih chiah hmel bik loh. 

"A nih chu mawle" ka ti ringawt a, min zawt lui tlat ta bik lo.

Chhunah doctor in ward a fan dawn chuan damlo awmpui ţhenkhat chu security ten an chhuah tir a, inkan hun berkher a ward an fang ţhin chu an phun nang nang hlawm a, "In kan hun a rei loh tehreng nen, nghah ve mai tur a nia" te an tia, an thlak danglam thei chuang mang si lo. 

Midang an chhuah sup sup laiin Hmangaihsanga a rawn lang hlawl a, ka phu nasa lutuk chuan ka thinphu a ti danglam a, rang deuhin a su dawt dawt ni berin ka hria. Ruattei khan a hrilh ngei a ni tih ka hre mai. 

Tuman an lo dang lo te chu mak ka tia, doctor a ni tak nain he hospital a thawk hi a ni tlat lo. Zawn nei ni awm takin a hawi kual a, ka bikbosan rei bawk nen, min haw ngawt ang ka ring. 

Min hmuh veleh kan khum lam panin hmanhmawh deuhin a rawn pen phei pawk pawk a, bihrukna tur a awm tawh lo. Ka dinna ngaiah dingin ka lo nghak tawp a, a nih nih ni tawh mai rawh se. 

Ka nu khum bulah dingin ngun thluk deuh hian a en ngar a, ka nu pawn Hmangaihsanga a hmuh chuan a meng awkin ka hria, a beisei bik lo khawp ang le. 

Kan khum bul chiah a doctor ding chu ka hmu tawh chiang lutuk. Hmangaihsanga te hospital ah khan amah nen ngei hian ka hmu dun tawh. Zonunin a chanchin min hrilh zui nghe nghe a, Bl-a nen pawh an inhriat ţhat viau kha. 

"Hei hi i nu maw?" a tih chuan Hmangaihsanga chu a lo bu nghut a, a kekawr ipte zenin khum mawngah a ding khawng luah a, ka nu chu a melh ngawt ngawt a ni ber. 

Doctor nen chuan an inbe zui mawlh mawlh a, nurse training lai ni awm tak te pawh lo tel vein an fel khawp mai. 

"Puih in ngaih chuan min hrilh ru aw" an ti a, naupang te te an nih hmel a, an hmel dam thlap chu hmuh a nuamin a hahdamthlak takzet a ni. 

Doctor kal hnu chuan min rawn din hnaih a, amah a lianin min uap hneh leh viau tawh a, thinrim a min hauh chiam ka hlauh viau laiin "I chau tawh em?" min ti a, chu a ţawngkam khat lek chuan chawp leh chilhin ka hlauhna a hnawt bo a, "Chau lo e" tiin ţha deuhin ka chhang a  ka melh zawk a, a mitmeng chu hriatthiam a harsa angreng hle. 

"Siampuii a lokal dawn" a ti nghut a, a ţawng dan chu a nelawm tehchiam loh hle a, a bung mah mah a ni mah zawk.

"Kan chanchin chuan inchhung a luah khat leh tawh a ni maw?" ka tih chuan ngeiawm rawngkai lek lek hian a nui a, "Tlemte chauhin kan hria" tih pahin nurse in damdawi lei tur a ziahna lehkha ka ken va chu a rawn phih thla a, engmah sawi lovin a chhuah pui nulh lehnghal. 

"I hrilh em ni?" zawi tea ka nu'n a tih chuan khum bulah ka ţhu thla a, "Ruattei bulah Bawiha ka dah alawm" ka tih chuan a lungawi loh hmel nasa mai. 

"Hnaih tawh loh tur ka tih kha. Neihkimin min hmusit lehzual dawn tih i hria em?" a ti a, chau viau lo se chu min vin nasa viau ang. 

"Hria e..thil thleng thei zawng zawng hre lawk vekin Bawiha ka hnutchhiah. Hetianga ka ti lo a nih chuan ka putea hnenah amah chauhin a awm dawn a sin. Thiangi lahin a enkawl thei dawn der lova, ka chapona mai mai ai chuan Bawiha ka dah pawimawh zawk. Ka pute inah dah dawn ila ka naupanlai a min tih ang chiah khan an lo ti ve ang a, kawng dang i hriat chuan min hrilh la, duhthlan tur neih te chu ka duh lutuk alawm" ka ti kha kha a, Pathianin kan tawrh zawh loh tur kan chungah a thlen tir ngai lo kan ti tak na a ka tuar zo lo lek lek tawh chu a ni. Min siam ve avang ringawt te hian ka thin a rim hlur reng mai. Bawiha min pe tih loh chu thil ţha min tihsak awm pawh ka hre lo. Ngaihsak tu min pek ve te lah chu ka hnaih ţhat ngam loh hlir an nia, ka kawng a dal hneh ve khawp mai. 

"An hriat tawh miau chuan tih ngaihna a awm tawh lo. Mahse, eng thil pawh tiam che se kan let dawn hauh lo tih hrilh ang che. Min hmangaih miah lo tu tan ka in hmang ral a, a sulhnu pawh ka hmu peih tawh lo. A fate laka tlawm ngawih ngawihin min siam a, hmuhsit nawn leh ka ni duh tawh lo reng reng" tiin ka pa thlengin a sawi kai leh a, a thusawi duh a sawi zawh meuh chuan a chau khawp mai.

"Ka hrethiam alawm...hahdam rih rawh" tih pahin a awmah ka dawm a, a hmui ro rap chu liak zeuhin min melh ţawk ţawk a, a la naupan tehlul nen, a landan chu pitar ang mai a ni. 

Hmangaihsanga leh Siampuii te lo lut chu ka en rei duh lova, ka nu kut vawn sakin ka ţhu kun tlat a, Siampuiin damdawi a rawn dah rik rak rak lai te chuan thawm hre lo ang maiin ka awm. 

"U Zote, zanin chu ka lo chhawk ang che. Tukin khan U Neihkimi a zin chhuak a, zanhnih a riak ang" a ti dam thlap a, "A ngai lo" ka lo ti thung. 

Ka nu pawh lo inrawlh ve in "Kan tibuai nasa tawh cheu a, tunah chuan kan tibuai tawh lo ang che u. Zotei a awm tho a, riahpui ka ngai lovang" a ti a, Siampuii lehzel pawh a hnar chu mak ka lo ti angreng hle. 

"Ka riah pui ve chak che alawm. U Zotei pawh zankhat tal chawl hahdam se la, Bawiha pawn a ngai tawh a" tih zawngin ka nu chu a thlem a, Hmangaihsanga erawh a la ngawi ngul reng thung. 

Siampuii hnar haw ka tum chu a haw duh bau lova, kan inhnial zui rap rap lai chuan "Tho rawh" tih hmuk pahin Hmangaihsanga chuan min rawn pan a, ka lo chiai nghal viau mai. 

"Chawl hahdam rawh" ka darah a hmer a, na hauh lo mah se ka lo ner nak tho a.

"Ka hman lo" ka ti hmak a, ka nu'n min en reng vang a ni. 

"Ka thusawi i hria em?" rum deuh tak hian a ti leh a, chhan beiseiin Siampuii ka melh a, min lo en ve tak nain a ţap lek lek ni berin ka hria. 

"Ka nu ka ngaihtuah alawm" ka tih chuan "Siampuii a awm" bul zet hian a ti a, ka tello a haw a tum hauh lo a nih hmel khawp mai. 

"Nia U Zote, ngaina lo ber tu che a awm lova, i tan hahchawlhna hun remchang a ni mai alawm. Ka pi hi khawiahmah ka kalsan lovang. Chanchin ka rawn hrilh char char ang che u, i pindan te kha kan la ti danglam miah lo a nia" tiin Siampuii lah chuan min thlem ve seuh seuh a, diktak chuan Siampuii a awm chuan ka nu hi ka ngaihtuah lo; inhlui a let leh ka hreh vanga hnial ka ni zawk mah. 

Khum chu hel kualin kan ţhut lohna lam zawkah Hmangaihsanga chu ding a, inkan hun a zo daih tawh a, thawm dang hriattur a tlemin midangin min ngaihven bik ang tih hlau viau mah ila aw ka la pawh duh chuang lo. 

"Na i nei em?" tih sup pahin a kut pahnihin khum tlang a nam run a, damlo na tak a biak pawhin a aw a nem phah chuang ţhak lo. 

"Nei lo e" ka nu chuan a lo ti liam mai a, nei pawh nise a hrilh miah lovang. 

"Zotei hi hruai haw lawk i phal em?" a ti thawr a, hei tak hi nia kan buai ziah nachhan chu, a duhdan leh ţha a tih angin thil a ti a, a thup ve ţit ţet ngai lo. Min duhna a tih lansarh lutuk vang alawm Neihkimi te pawn an hriat vek ni. 

"Bawiha in awmpui theih tho chuan Zotei chu awm rih rawh se" ka nu chuan a lo ti a, nin hmel zetin a thaw hawk a, dawhtheih loh lutuk vang a ni zawk mah ang. 

"Zote, Siampuii khan engmah a la ei lo" a tih chuan thil awmzia hrethiamin ka tho a, Siampuii pawh chu ka pawt tho ve a, ka nu chu a ti na dawn miah lo tih hriain ka chhuahpui zui a, sawi dun se la, ka pa a rinchhiat lutuk na te pawh a paihthlak sak thei mahna. Mipa ber engmah kan hrilh hre ve ngai lova, ka nu hetiang a nih takah chuan ka pa chungchang chu sawi dun mah se pawi ka ti lo. Kei erawh chuan ka nu thu lo chuan engmah sawi ka la tum lo fan a, a dawhtheih loh tawpah min khuahkhirh ve niah ka ngai. 

"Falkawn an tih hi ka lo hresual a, falkland ah ka kal daih a, ka rei phah a nih hi" a ti a, ka ban a kuah bet ţung chungin a nui kar kar a, thingpui dawr lian berah ka luhpui a, mihring pawh an lo tam khawp mai.

"Thil i la ei lo tak tak em ni?" ringhlel deuh taka ka tih chuan "Ei nang aw..ka lo chhuak hma ve tho a, mahse ka kal sual a, traffic a jam bawk nen, ka rei ta hrep a" a ti a, a ei duh tur a ziak mawlh mawlh a, ka ril a ţam loh avangin thingpui bak ka chah ve lo. 

"Hospital ah Malsawmi a thawk tawh lo a" a tih chuan ka ngaihven ta deuh a, "Engati nge?" ka lo ti vat bawk. 

"U Hmangaihsanga thinrim thil tih aniang" a ti ringawt a, hriat belh chak deuhin "Pu Saia te an thinrim lo em ni?" ka lo ti leh a. 

"Ka hre lo" tih pahin dar a kan ak a, "Thinrim pawh nise tih theih an nei lo e. Kar hmasa phei kha chuan U Neihkimi kha kut a thlak dawn emaw ka ti hman a" a la ti tak deuh deuh a, an buai hmel viau tak tak mai. 

"Ti nge a?" ka ti hluai a, "A ţawngthei em alawm" a ti a, mak pawh a tih ve hmel lem loh. 

"A mak lutuk, a hma zawng kha chuan a thinrim deuh pawn a lanchhuah tir vak ngai lova, mahse a danglam thut a, U Neihkimi te leh Pa Saia te hi a haw hlurin ka hria" a ti zat zat a, eitur an lo dah chu a ei zui mawlh mawlh a. 

"A hlau hmel chu a khawngaihthlak zawk alawm. U Hmangaihsanga hian a kawr awmah a ţham nawk hman a, mahse U Zamtei leh Ruattei te an lo inrawlh hlauh a" a ti ţalh ţalh a, "Ka hmu leh cheu a a nuam e. Bawiha phei chu ka ngai tawh lutuk a" a nui zui var var a, a thil ei lah chu tui a tih hmel em em mai lehnghal. 

"Ka pa boral hma lutuk hi chu a pawi ngawt mai" ka ti ta daih a, la dam se chu pangai takin kan la awm tlang thei tur a nia, ka nu paw'n beiseina a la nei ang a, damdawi ei ţhain tun dinhmun hi a thleng lo ang. 

"In eitui em?" min si chet a Hmangaihsanga lo ţhu chu ka lo en a, casual deuhin a inchei a, tshirt var leh jeans kekawr a ha tawp a, khawlum lai chuan a inchei dan chu hmuh a nuam phian mai. 

"Rilţam chuan chaw hlang chauh pawh a tui. U Zotei hian engmah a duh ve lova" Siampuiin a tih chuan min rawn melh a, ka en reng tih a hriat phah ka ring, ka lo la en miau sia. 

"Naktukah ka lo hruai ang che" thupe aw tak hian a ti a, ka nu a be fel vek tawh ang a, kei a lo hnial ve ngawt chi pawh a ni lo. Ka fapa ka ngaihtuah ru takzet bawk. 

"I awmna sawi tawh rawh" Siampuii awm ve reng lai chuan a ti leh pek a, a landanah ngat phei chuan ka hrilh hma chu min zawt peih ang tih tur a ni. 

"Ka awm naah" fiamthu ti tak deuh tak a ka tih chuan za lo zetin a lo kiai suk a, min dang chep tawh viau a ni. 

"Inbihruksiak tawh lo teh ang" a ti nghut a, thlakhlelh hmel zet a min melhna te chu ka hmu lo der tlat a, chanchin hrilh ve uk si, ngaihtuahawm âwm lo taka ka awmna ka hrilh duh loh hnuah kum chanve em pawh a liam hmain keimah zawkin ka pan leh chu a ni sia, kan dinhmunin a zir loh vang pawh nise mi pangai tan chuan ngam sarh a har tawh ang. 

"Bihrukna tur ka hriat tawh loh hi" ka lo ti hap a, kan ngawih lai taka kan hnunga ţhu ten Pathian ţhat zia an sawi chuan ka nui chhuak hak a, keichuan a ţhatna ka hre ve lem lo. Van lam malsawmna kan dawn khat vang te pawh a ni mahna; duhsak bik a nei ni ten ka hria. Ka au nasa ţhin a, a reh vang vang takah chuan ţawngţai ka bansan ta mai. Ka fapa chu Pathian thu kher lo pawh thu ţha tam tak ka hrilh thei tho a, min chhang duh lo tu na na na chu biak reng ţul ka ti tawh lo a ni. Ka thil tih leh tawn zawng zawngte hian beidawnna bak min thlen ngai chuang lo. 

CONT...