KA HRINGNUN THAWNTHU-18

KA HRINGNUN THAWNTHU-18

Thingpui dawr aţanga kan chhuah chuan "Min thlah rawh" a ti deuh tlat a, "Ka nu amah chiahin a awm dawn a" ka ti ban charh a, ka kal mai duh lo. 

"A phal vek..inthlah tir rawh a ti" a tih chuan ka awih lo kher mai. Ner deuh nângin ka en chho a, nuihzat hmel deuhin hmun dang a en daih a, "Nia, in inhmuh lohna a rei tawh em hi mawle. Motor dahna thleng chauh tal chu min thlah ve mai mai teh" lo tiin Siampuii chuan nui rah rah chungin min kal pel a, mahni lo mah a nuam lo tih ruk sa nak laiin Hmangaihsanga nen chauh kan han ding dun chu zam a awl khawp mai. 

"Kan la ding rih dawn nge" a tih chuan khawng tawkin ka inher a, amah pawh nghak lovin ka chhuk thla hmawk hmawk a, min umphak ka rin miah loh laiin ka darah min rawn kuah thuk a, inlak hran ka tum chu ka ban bulah a la hmer vak zui a, hmuh leh tum tawh miah lova chhuahsan ka nia, awmdan thiam a har lutuk ringawt. 

"I lai vel a ni maw?" nuihza aw zet a a tih chuan "Teuh lo emai a" ka tih bak hlak a, kan pahnih chiaha kan awm hnu pawh a min la hau chuang miah lo chu mak ka ti takzet a ni. 

"I lai a nih kha i beng pawh a sen hlar alawm" a tih chuan ka beng ka hup vat a, a lo nui ta hawk a.

"Ka nu hnenah khan eng nge i sawi?" ka ti ta daih a, dar a kan uk a, min chhang lo thung. 

"A taksa a na a nih pawn a rilru tal dam se la, chuvang chuan ka nu thu lo chuan engmah ka ti dawn lo" ka ti a, ka thutak zia a hriat ka beisei. 

"A dam leh mai ang...ţawngţai pui la" a tih chuan ka ner nak a, ka dil loh dan hlirin ka chungah thil a thleng a, Pathian hi midang tan chuan a awm tih ka hria, ka tan a awm ve lo mai pawh a. 

"I duh leh ţawngţai rawh" a zawl lai kan thlen rual chuan ka ti hlak a, ka thusawi chu mak a tih hmel khawp mai. 

"Ţawngţai lo ila a dam chak zawk ang. Ka duhzawng hi Pathian hriattir ve zel kher a ţul ka ti lo" ka tih hmak hmak lai chuan mit ti zim deuh sun hian min lo en a, ka dar a la dawm tlat bawk.

Min zilh deuh nek dawn emaw ka tih laiin "Ngaihdan leh rindan chu neih thiang alawm" a ti then a, a thusawi chuan min ti hrilhhai let zawk. 

"Chutiang chuan i ngai ve tho em?" ka tih chuan lu min thin khum nghutin "Mizoram zimte aţanga Pathian lo rinhlelh vel te chu a ngaihtuah tawi thlak emai" min ti deuh nek a, ka nui tawp. 

"Tak tak, mahni in hmangaih lutuk hi a ţha lo" thutak deuh hian a ti leh a, "Ka inhmangaih lutuk hleinem" ka tih chuan "Keiin ka hmangaih hlur thung che a" a lo ti a, kan thusawi inpersan lutuk chuan nuih a ti za a, ani pawh a insum thei bik lo. 

Motor dahna lam kan pan lai chuan "Naktukah ka lo hruai ang che" a ti a, thinrim anga a awm loh vang hrim hrim pawn thawk khat chu a veng. 

"Ka hre lo le" ka la ti tho a, "Ka nu ka hrilh tawh" a ti nghut a, motor a a ţhut luh hma chuan a kut a vai zauh a, a nui tawh lo thung. 

An kal liam thleng ka thlir a, ka hmuh phak loh hnuah dawr hnai berah lutin zan a eitur ka lei a, damlo awmpui chuan kan meng rei tlangpui a, ril a ţam duh lutuk. 

Gate pui luh hma a hawker ah ka peng kawi leh a, mix 20 man ka lei tel hram a, kan khum piah a mite lei ka ei ve a, a lo tui reuh phian a, mi ta eireng ai chuan pawisa ui ru deuh chungin tlem ka lei ve ta mai a ni. 

Ward chhung ka luh leh meuh chuan ka nu a lo muhil leh tawh a, mitthi an lo awm bawk. Mitthi chhungte ţap ri chuan ka thauah min man a, hlauhna mak tak ka nei bawk a, ka hmul thi a dingin ka vun te chu a mur chhuak vek ni maiin ka hria. 

"ICU a dah an tum lai vel a nia, nurse te pawn beisei an nei tawh lo hrim hrim a, a na reuh em a, ţawng mawi lo ni lo se keichu a thi hi a ţha zawk ka ti. A chang leh a vial ngawih ngawih a, a chang leh a rum vak vak a, a na â nasa bawk si" kan khum piah chiah a damlo awmpui tu Nu Biakin a tih chuan damlo awmpui tu tho tleirawl pakhat hian "A thla a hrang ang tih ka hlau" a lo ti pek a, Nu Biaki pawh a thutak hleithei tawh lo. 

"Ngah nge maw a hran ngawt ang le" a tih chuan chu tleirawl te chuan "A piangthar lo alawm. Damdawi ti nasa deuh a nia, an rawn luhpui khan a thluak a fim tawh hleinem. Piantharna hun a nei bawk si lova, hetiang hi chu an thla a hrang duh. Zanrei a a rum ţhin ang te khan rawn rum dur dur ta se ka hlau dawn lutuk. Thidang mai mai lovin ka thi tak tak thei ang" a ti bawrh bawrh a, hlauh hmel takin a ban a tuai a, mitthi khum lam a melh pah zeuh zeuh bawk. 

"Kan thlarau kalna tur chu mihring ten kan lo sawi lawk ve ngawt thiang hleinem. Piangthar lo a kan ngaih te hi Pathianin engangin nge a ngaih kan hre miah lo" Nu Biakin a tih lai chuan ka nu muhil chu a rum ţuah ţuah a, tleirawl te bawk khan ka nu pawh chu a hlauh hmel khawp mai. 

Thlanin a bual a, ko pah reng chungin ka bawihsawm a, a ţul ang ang ka tih hnuah a thlan chu hruksakin a sam ka chul pah a, ţha deuhin a muhil veleh mai bawk a. 

"Damlo awmpui hi chu a hahthlak e..rilru a hah hma bawk si. Ho te teah kan hlauthawng a, a ţha leh mai ang Zote, kha hei hi ei rawh" tih pahin Nu Biaki chuan chhangthawp tlang lian pui min pe a, rilţam loh lai chuan ei a huphurhawm khawp mai. 

"Ka ril a ţam lo lutuk" ti mah ila "Chaw ei hun a la hla. I thil lei ve te kha chu puarna tham a nih loh kha. Chhangthawp hi thei tui nen hian ei rawh" a tih hnuah maaza a ban nghal zat a, ei chak lo eng ang mah ila Nu Biaki hmuh lai ngeiin ka ei zo vek. 

"Nurse zirlai ho hian damlo hlir an rawn hmet a, mutna mumal pawh nei ve lo ho hi min rawn hmet tel ţhin se ţha tur. Nilengin kan ţhu tlawk tlawk a,tiang chuan kan zang a kûl haw vek ang" Pa Mawian a lo ti ve bawk a, midang an nuih hak hak laiin keichuan ka nu ka melh tlawk tlawk thung a, ka neihchhun takmeuh a ni tawh a, min kalsan ka hlau takzet a ni. Damlo awmpuitute rau rau pawh hi rilru put hmang a inang lo thei khawp mai. Kan awmpui a te an nat viau chuan midang anga nuih ve reng a har. 

Ka nu a lo harh chuan "Phone min han pe teh" a ti a, a khua a har deuh a nih ringin a phone ka charge sak mek chu phawiin ka pe a, a kut cher riak tawh chuan a hum a, muangchangin phone screen chu a thai neuh neuh a. 

"Aw Sawma" a tih chuan ka lo nui deuh a, ka putea a ngai tawh a nih hmel. Mahse "Naktuk zingkarah lokal rawh" a tih chuan ka nui tawp chiang kher mai. 

"Zotei hi lo thlak rawh. Inah khan lo haw ve lawk se la chawl hahdam rawh se" tih pahin min rawn melh a, "Min riahpui nghal mah la a pawi lo. Zotei hi chu naute nen a ni zel a, in nghak rawh se" a ti a, mi â nileng lo tan chuan Hmangaihsanga nen a kan inhmuh a la phal chuang lo tih a hriat theih a ni. 

"Naktuk zingkarah i putea a lokal dawn a, nangpawh zingkarah haw la a ţha ang" a ti a, a chawlh vang vang hnuah "Ruattei bia la, Bawiha chu dawrah hruai rawh se. Chhunah i lam mai dawn a nia" a ti leh a, a chauh vang nge a mit khap te chu a ban charh a, ţawng tum a ka an zuau zuau lai chuan "In hlui a let leh ka remti lo. Nang pawh Bawiha pawh, in let tawh lo ve ve ang" a ti ram hmak a, ka ngaihdan a ni chiah lo khawp mai. 

"Duhthlan tur a awm lo a nih hi. Ka putea a awm reng thei dawn lova, ka hrilh vek tawh che kha. Bawiha ţhatna tur i duh tak tak a nih chuan Ruattei bula awm tal i phal sak tur alawm" ngenngawl deuh hian ka ti a, Neihkimi vangin a hel a, a rilru thlak a tum loh hmel viau bawk. 

"Awm reng turin ka hrilh mai ang. Hospital ah ka awm rei kher lovang a, ka awm chhung na na na chu zu in lo mai rawh se" a ti a, ka lo thaw hak ringawt a, ngati nge an thu an duh hlawm em em le. Kei leh ka fapa hmakhua an ngai ve miah lo ni ten ka hria a, ka hun tawn khirh lutuk hian rilru dik lo min put tir zo vek tawh. 

Ka nu duh danin zingkarah ka putea a lokal a, keipawh haw tumin ka insiam ve nghal. 

"Kha Ruattei chu be rawh" tih pahin ka nu'n phone min pe a, "Hmangaihsanga hnenah engmah sawi suh a ti ti rawh" a ti tel hram a, phone hmanga kalsawn a phal lo bawk. 

Ruattei chuan ka aw aţang ringawtin min hre lova, "Zotei aw" ka tih hnuah "Eng nge in an? Biak che ka tum nasa tawh a a tlang thei miah lo. I phone number i thlak a nih te chuan min hrilh ve mai la, ka nu chu a ţha em?" a rawn ti nghal zung zung a, kan ţhat thu ka hrilh hnuah "Bawiha kha dawrah i hruai peih em? A tibuai viau che angem le, chhunah ka lo lam ang chu ka ti deuh a" ka ti niah miah a, puih kan ngaih laiin ka hmeh bel chawt a, ka duh dan chiah a thil kalpui ka tum leh chu a nuam chiah lo. 

"Hruai thei mai ang. Mahse vawiinah Siampuiin a rawn thlak dawn che a ni lawm ni?" a tih chuan "Hei ka putea a lokal a" ka ti a, a reh zui vang vang mai. 

"I hrethei em?" ka tih chuan "U Zote, ka nu kha kan ngaihtuah ve tho a, puih pawh kan chak. A damlo awmpui te kha kan duh ve lutuk a, U Neihkimi vang maiin inla hrang lo ula, hetianga in awm hian nuam kan ti miah lo a nia" a ti nang nang a, kan hun tawn khirh lutuk hi mi fel felin an tuar nasa emaw tih tur a ni. Ruattei tak pawh a khawngaihthlak. 

"Ni ngawt mai mah se ka putea hian awmpui a chuh tlat a" ka tih chuan ka putean phawk hrain min lo melh a, lawm hmel a pu hauh lo. 

"Ka nu kha kan buaipui ve loh chuan kan inthiam lo reng tawh ang. U Remremi phei chuan a hmu chak tawh lutuk a, kan hman loh em vangin pathianniah ka hruai ang che ka tia, mahse a insiam fel thlap tawh tho. Ka nu khan min hua em ni?"  a ti a, ka thusawi an hriat theih miau vangin thil sawi vak chi a ni bawk si lo, "Teuh lo mai" ka ti ta ringawt a. 

"Bawiha chu i lo lam dawn nia. Hmaichhanah kan sawi dun thei ang chu. Chhungkua kan nia, ka hriat ve miah loh thil avanga chhungkaw kehchhiat ka phal dawn miah lo" a tih chuan "Chhunah ka lokal dawn tih Hmangaihsanga hrilh suh aw" ka lo ti daih a, "Aw le" tih leh phone dah a rual a, ka ti thinrim tlatin ka hria. 

"I nu hi nangman awmpui la ka duh zawk. Ka in a nangmah chiaha i awm chu ka ngaihtuah che. Nileng zankhuain rilru nuam lo in ka awm leh dawn" ka putean a lo ti nghal chat a, ka nu erawh chuan hmui a chip leh tlat tawh. 

"Ka awm thei mai ang. I inhralh tlem deuh hlek dawn tihna a ni mai. Inchhunga an in ka phal dawn lo bawk a, ka hnar haw vek ang" ka tih chuan a lungawi loh hmel khawp mai. 

"Naktukah min rawn thlak ang che" a ti a, mipa hi chu an inthup thei a, ka putea pawn ka nu a ngaihsakna a ti lang vul chuk ve lo. 

Taxi in ngaizel thleng ka kal a, mi pathum chuang ve dangte nen inchawi semin ka chawi tam lutuk lo hlauh. Ngaizel aţangin bus ka man leh a, ka putea awmna veng a thlen theih loh avangin ka chuang kual nasa hle. 

Inah Thiangi chauh a lo awm a, chanchin kan inhrilh luam hnuah ka inbual a, Thiangin rawng a lo bawl thung. 

Ka inbual zo bathroom aţanga ka chhuah chuan patling pakhat ţawp deuh a lo lut a, en mai chuan mi ang vak lo a ang mah zawk. A inzuah bukin a thawmhnaw hak te chu a bal khak hle a, Thiangi pawn a hre ngai bik lo aniang min lo en ha mai. 

"Khaw nge Sawma?" ţeng deuh taka a tih chuan "Hospital ah" ka lo ti tawi tak a, a landan aţangin ka ngaina lo nghal ringawt. 

"Engtikah nge a lo hawn ang?" 

"Ka hre lo" tih ringawtin ka chhang a, a ipte pui ah lai aţang chuan phui hnam a phawrh a, "Hei hi lo pek ka tum a, kan nu hralh bang a nia, ka zin haw hnuah kan la inhmu leh miah lova, lo awm se ka tia sin mawle" a ti nuah nuah a, "Kan va lawm ve" ka tih laiin Thiangi chuan a kut sik palh hlau deuhin phuihnam chu a la a, min pe tupa hmuh lai reng chuan dawhkanah a vawm thla a, chu em chu ţha ka ti lo khawp mai. 

"Ka nu a awmpui daih a, a lo haw hun tur ka chiang lo. In inbe ngai lo em ni?" ka tih chuan phone a tih bo thu te, an nu'n ka putea number a neih loh thu te a sawi a, "Tui ka lo in lawk ang chu" tih pahin a ding zui zat a, filter a pan dawn laia min kalpelh te chuan thlan rim a nam huam mai. 

"Ka pu khawia mi nge i nih a? Ka va'n hmu ngai lo che" Thiangin a tih chuan "Khutah khuan kan awm" tih pahin bang thlang lam a kawk a, tukverh a dak chung meuh a en chi a ni si lova, an awmna a mawng lehchhawng a nih hmel. 

"A lo haw veleh ka lo biak tir dawn che nia, engtin nge i hming ka sawi ang?" ka tih chuan "Pu Kawltea ti mai rawh" a ti a, a nuih chiah chuan kuhva a ei nasa tih a hriat. Min hmuh ngai loh thute a sawi a, kan chanchin tlem a zawng ka hrilh hnuah "A zia lo hle mai...ka lo ţawngţaipui ang che u" a ti mauh mai. 

Ka putea ang thoin a hnar a ţawk hlur a, a hmai a chik hrup a, a puam deuh ul bawk a, a hmel leh ţawngţai a inhmeh hlawl lo. Damdawi ti nasa tih hriat takin a kut a vung lung a, a tlangval laiin proxyvon a khawih a ni ngei ngei ang. 

"Aw le" ka ti ban charh a, Thiangi lah chuan fiamthuin "Misual ţawngţaina a ngaithla ngai lo" a lo ti zeuh a, Pu Kawla chu a nui vur vur a, "Isua hi ropui takin a inlan kher ngai lo a nia" dam thluam a a tih hnuah min chhuahsan a. 

Chhun a Bawiha lam ka tum chuan Ruattei dawrah Hmangaihsanga a lo ţhu ve run mai. Ruattei leh a mi chhawr te chu an lo buai hle a, Bawiha pawm chungin hmeichhe karah a ţhu tum hmuk a, kan boruakin zir se chu nuih a za duh viau ang. 

"Ruatte" ka ti hriam hrak a, awmze nei deuh a ka melh lai chuan ka dinna bul a clip lak pahin ka beng bulah "Ka hrilh zel ang. Hnathawk hleithei lovin a zawng che a, bakah zawn ngaihna awm lek lova in bo leh daih ka remti reng reng lo" a ti hlak hlak a, tih ngaihna tak pawh a vang khawp mai. 

"Lo ţhu rawh U Zote, ka khawih lai hi ka zawh veleh thil kan ei dawn nia" Ruattei bawk chuan a ti lang lang a, Hmangaihsanga ka melh zawk a, min en rum lutuk chu melh rei ngam pawh a ni lo. 

Tim daiin a bulah ka ţhu ve a, ka mal chungah Bawiha a lo nghat chawrh a, ani lah chuan thawm chhuahin a men zui par a, a inthiam lo leh si aniang chu dim deuhin a la leh ang lawi a, ka fapa chu a malchungah bawk a ţhuttir a, a fing ve tawh a, a pangchang thiam lehzual bawk. 

"Bihruk i lo tum leh a" a ti deuh sup a, "Chutiang a ni lo" ka tih chuan a lo rum nghut a, "A ni lo tak tak alawm. Ka chau a, hahdam ka tum mai a ni. Bakah in inah kan awm tawh lova, hahdam ka tum a nih chuan ka in ngei ka pan ve bawk ang chu" ka ti a, ka inthiam loh rukna erawh ka thup tlat. 

"A nih chu" a ti bung nghut a, a thinrim tawh tak tak ni a ngaiin ka tawt ţeuh a, "Che reng suh" a lo ti leh hluk a, ka lo che ngun deuh a ni maithei, keichuan ka awmdan ka hre mumal lo. 

"Tlanchhiat chhan i nei tiraw?" zawi sup hian a ti a, midangin a ţawng an hriat a hlau a nih ka ring. A mitmeng lah chu a fin hmelin min entlang vek thei ni maiin ka hria a, ka nu a be tawh a, eng eng emaw chu a ngaihruat thiam ang. A hrechiang viau zawk maithei bawk. 

Kei lah chu ka tawt up up a, duhthlan tur neih ka duh lutuk laiin ka nu leh Hmangaihsanga berkher chu duh zawk thlan ngaiin awm lo se ka ti. Ka hmu leh hi keipawh ka lawm a,hmachhawn dan ka la thiam rih lo zawk a ni. 

"Ka putean min lo thlak a, Bawiha ka ngaihtuah bawk nen, in lama awm rih ka tum a" ka ti niah niah a, Ruattei chuan min lo melh leh ralh ţhin tih pawh ka hre ru ran. 

"Khawiah nge in in chu a awm?" dam thlupin min zawt a, a thinrim leh lo zawk em maw ni, hepa pawh hi a chang chuan hriatthiam a har ve ţhin ngawt mai. 

"Awiii...Love high-a chu parlour ah eng nge i tih ve a" hmeichhe pakhat sam sen hlar mai a rawn phul tak hlutah chuan min zawt lui ka bik lo a, thaw a veng huai thei alawm le. 

"Nau i la pawm zui a, Ruatte, i u Love high-a hian nupui a nei tawh elo?" a ti zui zat a, a nui har har lehnghal a, Hmangaihsanga pawh a ti Love high daih alawm. A hmaifang leh mitmeng vel ka en chuan inang min ti tu an awm nual ka ring. A khabe ah khuavang chhinchhiah neiin a lang chiang angreng hle a, kei aiin a ngo zawk bawk a, kan hmui a inang lo leh a, kan mit leh biang ki dan vel te chu a inang lutuk. Darthlalangah ka in en fo a, mi chi hrang hrang ka hmu ţhin bawk a, khawvelah hian unau ni kher lo leh inzawmna nei miah lo in ang deuh deuh an tam a, keipawn henu nen hian inanna lai kan nei ka ti. 

"Nei tawh e...kha an nu pawh a awm reng kha" Ruattei chuan a ti pek a, hnar a lian duh khawp mai. 

"Aizawl a i awmna a rei tawh em?" pangai takin a lo zawt a, chunu lokalin Hmangaihsanga chu a nam nawk nawk a, a tawlh sawn rualin kan inkarah a rawn ţhu tharh mai. 

"Rei vak lo mah se ka awm deuh reng tawh ang. Hei hi in nu maw? Midangin nupui i neih thu an va sawi si love" a ti a, a che sek a, a rim pawh a tui khawp mai. 

"Ni e..hei ka fa tlum ber a nih hi, a ni rih ka tihna. Ka siam belh zel duh maithei a" Hmangaihsanga chu rem leh rem loin ka melh a, pawisawi loh hmel deuh a nui chungin chunu chu a en ran thung a, awm an ti nuam lo takzet a ni. 

"A ni maw? Fa engzat nge i neih tawh a? Tinge chanchin i lo sawi ngai miah loh? Inhmu fuh lo phei ila chu i chanchin ka hre dawn miah lo a nih hi, ti ila Ruattei zawh ka tum sa hrim hrim a, hospital a rawn hmuh che ka tum bawk a" a ti zat zat a, sawi tur a ngah khawp mai. 

"Fa pali ka nei tawh" a ti bul hmuk a, thinrim hauh lo mah se a ţawng hi a nem lo ve ţhin khawp mai. Tunah phei chuan dawt a sawi zuah zuah na a a hmel a thutak lutuk ringawt. 

"Awii...in theih pap pap bik zia hi. I fapa lu um lah chu ball nise a lir ţha duh par par viau ang" a ti a, min ngei vang leh min deusawh tum ran a sawi niin ka hre bawk si lo, ka fapa ka en a, a mum ţha angreng viau a, thudik tak a sawi niah ka ngai ta mai. 

"U Awmtei hi i thik chiang mai" Ruattei chuan a lo ti a,a hminga rawn sawi takah chuan hriatchhuah ka nei. 

Neihkimin Awmtei tih hming pu ka hriat leh hriat loh te, chhungte kan neih leh neih loh te min zawh tak kha!

"Inpa hi veng ţha rawh aw. Tun hma chuan a lerh ve thei tehmai a nia" tih pahin ka mal a rawn hmer a, a kut lah chu a la sawn duh lawk lo lehnghal. 

"A lerh san tawh che em?" nui hak chunga tih pahin ka mitah a en a, a nui hmel chu a lem riauin ka hria a, vertherna ka hmu tel tlatin ka hre bawk a. 

"I hriat dan kha" ka tih lai mekin Hmangaihsangan "Mizia te chu a siamţhat theih alawm" a lo ti khauh a, Awmtei chu a hawi let rang khawp mai. 

"Huh..tunah chuan i insiamţha tawh tihna a ni maw? Nih chuan in nu hi a vannei hle a nih chu" uar zet hian a ti a, an inhriatna a rei tawh hmel viau mai. 

"Khaw nge in pa?" a lo ti ve thung a, Awmtei chuan ka mal chu a hmer nghet sual zauh a, "Delhi ah a la awm. Min ngai tawh ngawt ang. Ka tello in a awm rei thei mang si lova" zangkhai vahin a ti zat zat a, min hmer danah sawi nuam a ti chiah lo tih ka hre thei. Ngah nge maw ka mal berkher a hmer ngawt ngawt kher le, a na reuh zek lehnghal a. 

"A ţha" Hmangaihsangan a lo ti sup a, "Engmaw ţha chu?" a ti hluai a, a awki ah chuan danglam engmah a awm lo. 

"Nupa chu in ngaih tûk tur" nuihza aw taka a tih chuan kan ţhian-i pawh a nui hak a, "Dikchiah...min ngai huam huam a, keipawh chutiang tho chu. Mahse, hnam a inang lova, ram dang a pasal han neih chiah hian kan ram ngei hi ngaih a na duh khawp mai" a ti a, min hmer dan a danglam reng na a a thusawi a bahlah eih lo. 

"Hnam dang nei ho hi ka sawisel hran lo mah se keichu mizo mipa neih sen loh khawp a tam an awm laia hnam dang neih ţalh ka tum lo. Hnam dang mipa hian min ngaizawng luai luai pawh nise mizo ţawng ka hmanpui theih ngei chiah ka nei ang. Ka fate hnam dang an nih ka phal dawn hauh lo bawk a, mizo tlangval ngei neih a, ka fate pawh zoram tan a mi ţangkai tak ni tur a chher chhuah ka duh. Mahse bialpa tur hi an vang mai sia maw...min pel suau suau a, min en vang vang tu an awm ngai bawk si lo" Ruattein a lo tih chuan an nui hak hak hlawm a, "A ni lawm mawle aw..ka man a tlawm tehreng nen, min lei tum ka la hmu lo reng reng. Ka luck loh vang pawh a ni lo, mizo mipa te hian pawisa an lo ui em a nih hi" a ti zui zat a, ngaihzawng neih a la peih chiah lo tih hre tu kan tlem viau ang. 

Awmtei chu a awm ve ta reng a, a sam rawng a thlak tir a, a ţawng zat zat reng bawk a, thil ei tura chhuah na hun pawh kan la nei thei lo. 

Dar 2 velah an zo ve hram a, tunah chuan ka sam rawng an chiah a pu ve tawh. Ruattei pawn kan pahnih chuan min en tawn zak zak a, engmah phei chu a sawi lo. Neihkimi laiin min zawh tawh avangin Awmtei chanchin chu nakinah Ruattei ka la zawt ang ka ti rilru ran a, a kal dawnah "Nakinah ka lo la leng ang aw Hmangaihsang" a ti a, a hming pangaiin a ko ve ta alawm. 

Awmtei a chhuah hnu chuan dawr chhung a reh nghal ruih a, Ruattein ka fapa a chhaih ri bak ri dang hriattur a awm lo. 

"Kan awl rih tho a, eitur ka va laksak mai ang che u, hetah ei mai rawh u" tih leh Bawiha pawm a rual a, a thawhpuite chu sawmin a chhuak nghal daih a, kawngkhar an nam phui khap bawk.  

"Min chhang tawh la" midang reh diak hnua a a tih chuan "Engmaw?" ka lo ti he haw a. 

"In awmna?" a ti bung nghut a, Awmtei lokal hma a a zawhna kha chhanna a la beisei tho a nih hmel. 

Phat ngaihna ka hre lo lutuk chuan "I hre lo ang" ka ti ta ringawt a. 

"Hun ka ngah lo" dawhthei loh hmel zet a tih pahin a ban a sana chu a bih vut a, sawi lo mah se hospitalah hna a nei tih ka hrethiam pha ve. 

"Kal phawt zawk rawh. Kan awmna a hla a, sawi kual duah a ngai. I ngaithla hman lo ang" ka ti zung zung a, a mitmeng thim khup chuan min melh a, "I duh leh min demin min hau vak vak la, mahse ka sawi thei rih lo. Hre turin ka duh rih lo che. Bakah duh duh huna kalna chi pawh a ni lo" ka ti nawk nawk a, ka mumal lo zo leh vek tawh. 

"Ka dem hleinem che" zawi sup a a tih chuan za lo deuhin ka ţhen sak a, a awm loh laiin ka chhuahsan a, mamawh ka neih veleh ka pan leh a, min huain min hawisan hmak mah se la keichuan ka haw ve ngam hauh lo ang mawle. 

Min rawn hnaih lai te chuan tim daiin ka lo en a, ka hlau a, ka ngai tho bawk si. Ka nu duh loh dan a awm ka ngam bawk si lo, ka tawt up up reng ringawt a, "Sawi teh ka nu khan min hmuh a phal lo tiraw?" a ti nghut a, engtin nge a hriat nghal vek theih zawk le. 

"Zote" a ti thum dut a, ka lo ţang leh ţeuh tawh a, min la hnaih lutuk lo se ka tih laiin kan inhnaih leh viau tawh thung si. 

"Min haw miah lo em?" ka ti ta hial a, a huhang na zet ţhin khan min uap leh churh tawh ni berin ka hria. Thlakhlelh hmel taka min en ţhin te hian awm a ti nuam lo. 

"I thiam loh a ni hleinem" zawi ruih a a tih chuan tlemin ka tawlh hla deuh a, rilru sual ka put ve theih a ring lo bur a, mi thianghlim tak angah min ngai a ni ber. 

"Ka hrilh dawn lo che" ka ti a, nin hmel zetin a thaw hawk a, luhlul ka chhuah ve tlat loh chuan buaina nasa zawk kan nei leh ngei ang a, ka nu damloh lai ngat phei chuan chu thil chu kan mamawh loh ber te zinga mi a ni. 

"Engkim min hrilh rawh ka chingfel thei ang" a tih chuan ka ţhutdan siamremin amah hnungchhawn zawngin ka ţhu ta daih a, ka awmdan chu a ngaithei lo tih hriat zetin a rum nghut a, chu mi rual deuhthaw chuan a ban hrawl zet chuan ka kawngah a kuah a, tal chhuah tum a ka chet veleh a taksa si chetin min pawt hnai a, tha kan in ngah hleih bawk si, hetianga min kuah tawh chuan awm hle hle ila fuh zawk. 

"Min ring ve hauh lo, a dik em?" zawi sup a tiin ka beng zawnah a thaw lum ham ham a, Neihkimi hi a sual thiamin lam ţang a ngah a, mi dan chep dan a thiam bawk si. Hmangaihsanga lah naupang zawk a nih vangin hlauhna chhete mah a nei lova, kan buaina hi awlsam te a chinfel theih chi a ni lo. 

"Parlour ah a nih hi kan awm. Mi an lo lut thut ang e" ka tih chuan "I awmna sawi la ka thlah ang che" a lo ti hmuk a, min kuahna chu pawh phelh mai ka tum a, a kut lehlam chuan ka kut a lo man bet leh hmiah a, hnunglam aţang chuan min khuap run ni berin ka hria. 

"A theih rih loh" ka ti ve tlat bawk si, ka awmna ka sawi chuan a lokal ngei ang a, zu hmun a ni tih a hriat lek phei chuan duh lo mah ila min la chhuak nghal rum rum duh hial ang. Chu chuan ka nu a ti lungni lo leh ang a, kan nufa inkar a chhe vek dawn. 

"Nihchuan ti hian ka kuah nileng mai ang che. A nuam ting a ni mai" a ti vel a, kan inhnaih em vangin a hmel ka hmu thei lo a, a nui ri erawh ka hrechiang khawp mai. 

"Ka nu dam veleh keimah ngeiin ka hruai ang che" ka ti ta nge nge a, thudik ka sawi lo thung. Ka putea in a hruai tumna ka la nei ngai lo. 

"Ka nu'n a phal lo a ni maw?" a ti leh a, ka biang leh a biang a insi ran tawh a, a aw ah chuan tawrhna a tel ve deuhin ka hria. 

"Ka nu'n engmah a sawi lo. Mahse, i duh anga ka awm a nih chuan thil ţha lo bawkin min hmuak leh dawn a, chu thil chu thleng rih lo se ka ti. Ka nu damloh lai ngat phei chuan boruak nuam deuh awm se dam vat zawk se la ka tia, a dam hunah Ruattei nen a in duh angin kan awm thei zawk ang a" ka ti duah a, ka nu a dam chuan ka fapa nen a kan awm hran a ngai tawh lovang a, an unau hian ka hmu lo ve ve thei bawk ang. 

"I biak theihna tal sawi teh" ngenngawl deuh taka a tih chuan "Ka pe ang che" ka lo ti vat a, ka biang a fawp vang vang a, mi an lokal thut hlau reng rengin ka awm a, ka thinphu rang lutuk te chu chu ka hlauhna vangah chuan ka puh ta ber. 

Min kuahna a phelh thawl rualin a lam ka hawi a, kan la inhnaihin kan hmui a insi lo chauh a, "Awm sawn rawh ka pe ang che" tih pahin a awmah ka nam pawp a, a che duh eih lo. 

"Awm sawn teh" ka tih leh chuan "Ka hnungah hian phone a awm" nuihza aw tak hian a ti a, "Ka la peih kher lo" tih pahin ka thle sawn a, min fawh tum ni awm taka min rawn hnaih leh chuan hnunglamah ka eu dawrh a, ka lo ţhu hmawr mah mah tawh tih ka hre chiah. Hlauthawng deuh a inla hrang ka nih bawk vangin duh aiin ka eu nasa a, kan ţhutna a dup bawk nen, hnung zawnga ka tlu tur chu ka ban a lo man hmanin a tawlh hla a, ka tlak daih loh phah hlauh. 

"Ka fiam che a nih kha" a ti a, a hmui hnuai a seh nghal daih danah chuan a nuihza a insum tih a hriat theih vek. Min fawh a tum der vel kha tak tak emaw tiin eu dawrh pahin ka tawlh hla a, ka chet sual phah ţhelh nghe nghe a nih kha. Min nuihzat kher bawk nen, thinrimna aiin zahna a nasa zawk mah ang. 

Ka malchunga phone a rawn dah rualin pawn lamah thawm a awm a, eitur kengin Ruattei te an lo lut nghal bawk. 

Zahzelah "Tumah an lokal lo" ka lo ti var a, an nui hak a, "Pawn lamah kan hawlh kalh daih alawm" dawr a thawk pakhatin a tih chuan ka hawihai nasa mai. Hmangaihsanga lah chu mak ti hmel pawh pu ve lovin a lo kiai suk a, an chhuah dawn khan an hawlh kalh ri a hre bik a ni chiang mai. Midang lo luh thut a hlau ve miah lo te kha hriat a neih bik vang a ni hrim hrim. Kei lah chuan thu ka lo tiam zat zat lehnghal a. 

"Kha ei rawh u" bowl min pek pah hian a ti leh a, bowl pahnih lak pahin Hmangaihsanga chu ka lam a lo hawi a, awmze nei deuhin ka malchunga phone chu a melh ralh a, ka pe lo tawp nang a. 

Min dil zui reng dawn miau avangin phone chu ka la kang a, a pattern a lo la ngai reng. Number ka chhut luh hnuah finfiah na ni awm hrimin a call kher bawk a, a duh dan takin thil a kal aniang chu a bu nghat a, phone a ak nghal hmak bawk. 

Thil ei zawh veleh tawi khawmuang tawh lovin min kalsan a, ka duh dawn lo tih a hria a, min thlah tumna pawh a nei chuang lo. 

Ruattei haw a phal tlat lo a, customer pakhat a awm a, a nauten an lo buaipui vat a, Ruattei nen kan awmdun remchan lai chu chuhin "Tunge Awmtei kha" ka ti deuh phawng a, ka zak leh hnuhnawh viau thung. 

"Hmangaihsanga first love a nih ve thit thet kha" a ti liam puat a, Neihkimin min zawh chhan tur awm ang chu ka hrethiam nghal mai. 

"Pasal a nei tawh em ni?" ka tih chuan "Nei tawh e..vai palian pui a nei. Thau deuh a nia, a bân pawh electric ban tiat lawih a niang. En mai chuan a tenawm tawp a, mahse sumdawng hausa deuh a nia, ţawngthuchheloah lo thi ta pawh nise Awmtei chu a hausak phah sawt zawk maithei. Engkim deuhthaw kha a ta vek a ni tawh dawn a" a ti a, "An inţhen hnuah em ni pasal a neih a?" ka lo ti leh vat. 

Keipawn zawt chik ka inti ve tho mah se ka insum thei thlawt lo. Hmangaihsanga chanchin mai bakah a bialnu hlui chanchin thlengin ka ngaihven em em tawh chu a nih hi. 

"An inţhen a, an ni leh a, khatiang reng kha an ni hrim hrim a. St. Paul's ah an lut dun ţhin a, pawl 12 an zir lai vel aţanga in ngaizawng an niin ka hria. Inţhen ngun viau mah se U Awmtein pasal a neih kha chuan an inţhen lo, an pahnih a mizoram a an awm loh lai ve ve a nia, pasal a neih tak thut dan chu ka chiang bik chiah lo" a ti a, "I va ngaihven ve" a ti zui kher bawk a, min chhaih vel hi chu nuam a ti ve hrim hrim. 

Ka inrin hmain "Neihkimin Awmtei i hria em a tih vang alawm" ka ti a, insawi mam ka tum luatah sawi ka tum miah loh ka sawi chhuak palh leh tawh. 

"Bialnu hlui mai maite chu a ho e..mahse U Awmtei chu a nasa teh mai a nia aw. A duh naah chuan zah a hre bawk si lo a, i hmuh leh pawn hmelhriat tih vangin pawh lutuk duh miah suh" tiin min hrilh lawk thlap. 

In ka thlen meuh chuan Thiangi hmuh turin a lo awm lo a. Chhuat laiah khaikhup zawngin cooker a lo awm a, buh mal a tla darh nuai bawk a, ka chauh ve reuh bawk sia, ka thin a rim lek lek a ni. 

Ka fapa pawm beh reng a ngai tawh lo bawk a, ţhutthleng a ka dah hnuah hmun ka phiat a, ţhutthleng hnuai aţang chuan chaw tlang te ka phiat chhuak vel. 

"Thiangi a va hnawk ve..ka awm loh laiin in lo insual te a ni lo maw?" tih pahin pindan ah ka lut a, en chiang mang hlei lovin chhuat a a mu kawm chial chu ka kuai zangthlal thawk a, ka thil hmuh avang chuan hnunglamah ka tawlh let nghal dawrh a. 

CONT...