KA HRINGNUN THAWNTHU-19

KA HRINGNUN THAWNTHU-19

Na tih hmel deuh a ţhen tlawk tlawk chungin a pum a dawm leh a, a mu kawm leh chial bawk a, a kap zawnah thisen a chhuak nasain nau a lo pai reng tih ka hre chiah bawk. 

"Tikhan lo awm rawh kawmchhakte ka han pun ang" tih leh tlanchhuah ka rual a, kan tana a ţangkai tehlul nen, a thi reu reu ang tih te a hlauhawm. Kan in a thi a nih ngat phei chuan ka putea a mualpho lutuk a, a zu zawrh thlengin an phawrh fai leh leng ang a, chhuat leh pindan hnawk dan en phei chuan thil dik lo a awm tih hriat reng reng a nia, ka buaipui vat loh chuan buaina dangin min belh chhah leh mai ang. 

"In awm em?" ka ti mawi ve tak na a in neituten min lo chhawn hma hmain Thang Lm-a te inah chuan ka tlan lut a, amah tak phei chu a lo awm lo. 

"Thiangi a chesual aniang thisen a chhuak a, damdawiin a kalpui vat a ngai ang keimah chiahin ka awm sia, khawngaihin min lo pui teh u" mumal lo deuhin ka ti nawk nawk a, "Eng nge awmzia ni a? Thisen a chhuak a?" nu ber chuan a lo ti a, tlangval pakhat hi pindan aţangin a lo chhuak ve chiah bawk. 

"Aw thisen a chhuak a, tumah an awm lo. Tunah chuan Bawiha chiah a awm a, awii ka fapa ka kalsan daih kawngkhar ka hawng lehnghal" ka ti chul a, min chhanna pawh nghak lova chhuak lehin step ah chuan ka tlan thla hlawk hlawk a, a lo chhuah ve a step a a lum palh ka hlau a ni. 

"Thiangi" ka ti lut a, chhuat a Bawiha ţhu ka hmu chuan rilru a nuam huai a, ka chaw tlang phiah chhuah tak kha a lo ham pherh nasa mai. 

Pindan ah ka lut leh a, a mut ngaiin a lo la mu reng a, chhuat a ka ţhing ţhit hnuah a hmai hliah tu sam chu ka hui kiang a, thlanin a bual huh dap mai. 

"An lokal ţep ang tuar hram hram rawh aw..kawmchhakte ka han pun a, damdawiinah kan kal dawn nia" ka ti nak na a ka kalpui theih loh hmel bawk sia, a chhungte ka hre der lo lehnghal. 

"I chhungte ka'n bia ang. Khawiah nge i phone a awm?" ka tih chuan khum hnuai a kawk a, ban phak mai a a awm loh avang chuan bungbu kût chungin ka ban a, lock a dah ve ţat lehnghal. 

Na a tuar tih hriat tak a a ner nak nak lai chuan "Lock hi han hawng teh i nu biak sak ang che" ka ti leh a, lock a hawn lai chuan a samah ka lo chul pah reng a, a thaw te a hah deuhin ka hria. 

Kawmchhak tlangval a lokal lai chuan Thiangi nu phone tumin ka lo buai ve mek a, "Ehe...engati nge a?" a rawn tih pawh chuan ka chhang hman lo. Ka nu ti a a save chu call in min rawn chhan veleh Thiangi dinhmun chu ka lo hrilh a, "Civil hospital ah lo kalpui tawp rawh u. Kan veng aţangin a hla lo a, casualty kawtah ka lo awm ang" a ti zung zung a, "A ţha em? A chau viau em?" tih te min zawt mawlh mawlh a, kawmchhak tlangval pawh a lo buai ve khawp mai. 

"A pawm lawp ngam angem le? Na a tih hmel angreng sia, kan inpawm khaw lo vel ang e" a tih chuan "Pawm loh chuan tih ngaihna a awm si lo alawm. Taxi koh tur i hria em?" ka ti ve thung a, "A..koh tur chu a vang deuh maithei. Kan motor in kan kalpui mai dawn mi? Mahse ka khalh thiam lutuk lo a" a ti a, rilru a buai duh khawp mai. Thiangi lah na tuarin a kawm chial a, thil pawi zawk a thlen ka hlau khawp mai. 

"Khalh thiam an awm lo em ni?" ka tih chuan "Lawk aw..ka ţhianpa ka'n bia ang e" a ti a, pindan aţang chuan a chhuak leh rih a, mipa in an buaipui a ngaih vangin buaipui a hrehawm lutuk loh nan Thiangi kawng a chin hnuailam chu dimtein puanin ka tuam a, a na tuar chu hmuh a hrehawm khawp mai. 

Lehlam hawia a thle chiah chu a biang ki lai vel dul kual raih chu ka hmu a, a mit bul vel pawh a duk mai bakah a vung deuh a, a pilh deuh phung bawk. Ţawng tum ni awm taka a awm chuan "Hospital ah kan kal dawn nia, hlau miah suh aw ka hruai ang che" ka ti mawlh mawlh a, a na dawn lutuk tih hriain ka khawngaih takzet a ni. 

"Ka ţhianpa a lokal nghal dawn a, kan in a chahbi a lak hnuah motor a la chhuak ang a, kawngpuiah min lo nghak dawn. Puak chi chu a ni lo ang tiraw?" pindan a lo dah luh paha a tih chuan "Ni lo ang..pawm pawn fimkhur deuh a pawm a ngai ang" ka ti a, kan buai dun kher mai. 

Thiangi chu hospital thleng kan hruai a, a nu leh a unaute an lo awm ţak ţak a, in lam a ngaihtuahawm bakah nau ka hruai bawk sia, awm khawmuang lovin kan haw lehnghal a. 

Thiangi a awm loh ngat phei chuan thla a muang lo lehzual a, sawisak hrep a ang bawk nen, ka hlau ru kher mai. Thang Lm-a chu "I duty zawh veleh lo leng rawh aw" tiin message ka thawn ta nge nge a, kan in a lut chhuak ţhinte zawng zawng keimah chauh a lo dawn sawn ka ngam lo a ni ber. 

Khua a thim a, zu rawn lam pawh an awm nual tawh a, inchhunga in ţhang ho ka hre ve tawh a, an lokal apiangin "A awm tawh lo" tiin ka lo hnar zel a, engang pawn rethei mah ila zu ka zawrh kher chu ka ring ngai miah lo a nia, tunah chuan miin 'zu zuar mai mai' pawh min ti se haw thei ka ni lo, ka nihna a ni tlat tawh a ni. 

🎵Zote aw i tello chuan,

Zaleng hei zawng an kim lo🎵 ti a zai rut rut chung a Thang Lm-a lo lut chu "Leng reng rawh aw" ka lo ti var a, chhuatah ţhu tungin buhfai ka hai a, khaw en laiin buh ka thlei hman si lova, zan a tih mai loh chuan zing thlak tur pawh a awm tawh lo. 

Amah en a ka dah deuh vah lai chuan "Ka ngen a che aw Zote" ti a la zai zel pahin ka khabe a lo tuai a, a thawveng lutuk hi ka nuihpui tam viau zel. 

"Khaw nge Thiangtei?" tih pah a a hawi kual vut chu "I chhungten an hrilh lo che em ni?" ka lo ti a, "Hrilh nang" thum deuh dut a a tih chuan Thiangi chanchin ka lo hrilh a, pawi a tih hmel khawp mai. 

"Tunah eng nge a chanchin ni a?" a tih chuan ka hriat bik loh thu ka hrilh a, a phone number tak ngial pawh ka nei lova, a phone lah kha a nu ka pe daih a, chanchin inzawh ngaihna a awm lo a ni. 

Thang Lm-a awm lai chuan patling pahnih hian inchhungah zu an in lui ţalh a, Bawiha hian a hmu ve zel bawk nen, a ţhan hnan ang a, zu in pawi tih lohna a neih phah ang tih a hlauhawm. A kum a la tlem emai tih ngawt chi a ni lo naupang hi rin aiin an fing a, an thil hmuh te hi an theihnghilh mai mai bik lo. An zir ve zel a, fel chi hrim hrim nih loh chuan ţhanlennain a zir loh hian sual rawngbawl mai a har lo ngawt ang. 

Rei tawk an ti ti hnuah pawisa min pe lovin haw an tum a, kawngka an pel ţep tihah "Ka pu pawisa min pe lo" tiin ka au zui a, an lo hawi tum vuau mai. 

"In zu a dal emai ka ba dawn" pawr zet hian a ti a, buaina an chawh chhuah hlauin ka ngaihsan a, mahse Thang Lm-a chuan "Dal pawh nise in rui bual tho alawm. Pawisa chu pe rawh u" a lo ti a, an thinrim hmel khawp mai. 

"Kan ba ral dawn pawh a ni hleinem, pawisa kan ak lo" an tih tak tlatah chuan Thang Lm-a chuan va pan hnaiin "Pe rawh u" a ti nawn leh a, a lian mai bawk sia, kan pu-a te pawn an hlau ve deuh tawhin ka hria. 

"Pawisa kan ak lo tak tak, Sawma hnenah pawh kan ba fo a, kan ba ral ngai chuang hleinem mawle" pakhat chuan a ti nui nui a, "Damlo enkawl lai an nei. In bat sak hun a ni lo, pe vat rawh u" Thang Lm-a chuan a ti hluk hluk a, "A nih loh chuan ka man dawn che u a nia" tiin a vau zui a, a man ngawt theih loh zia hre tu ka nih avangin nuih a za duh khawp mai. 

"Khawmaw min lo con teh" a pawr zawk bawk khan a tih leh chuan a ţhianpa zawk chuan jeans hlui ve lam tawh a hak ipte aţang chuan 100 note hlui deuh a rawn phawrh a, amah pawh chu a indap ve ruk ruk a, pawisa chhe deuh chuan min rawn vawm a, lungni lo viau mah se engmah sawi tawh lovin an chhuak nghal nal nal mai, palian puiin a man an hlau aniang. 

An pawisa vawm a chhar hnuah min rawn pe a, hreh deuh chungin ka lo ak a, ţhiante awm laia zu man dawn te hi a nuam hauh lo, amah ngei pawh hian zu man min pe fo mah se nuam ka ti tak tak thei lo, a rukin ka zak chem chem zel. 

"Zote bialpa i nei em?" a ti deuh phawng a, ţhutthleng a ţhuin nghenchhan a ngheng a, a ban chuan a hlam duai bawk a, ka che vel chu min lo thlir reng ni maiin ka hria. 

"Nei nang aw" ka tih chuan "I nei duh em?" a lo ti lehnghal vat a, duh lohna lantir nan ka nui ringawt a, mipa dang ka bula an awm reng lai pawn Hmangaihsanga chauh ka ngaihtuah ţhin a, a mak ka ti ve viau ţhin. 

"Nei duh lo fapa ka nei a, a tawk viau a ni" hmunphiah lak pah hian ka ti a, pa pahnih te khan mei vap an hnutchhiah hnem khawp mai. 

"Fapa leh bialpa chu a inang lo e. Bem ta che ila min duh angem?" tlang tak hian a ti leh a, a kum a ţhansan kan tih ang chi kha a nia, hna a nei a, a hmelţha veng reuh bawk a, chuti ni lo se chu a laktlak loh ve ngawt ang. 

"Duh lo ang ka nau i nih kha...min u nghe nghe la a ţha ang" ka lo ti fiamthu a, "I hmelţha tih i hria em?" a ti leh hem mai a, hepa tak hi chu aw. 

"I sawi ho emai a, mahni leh mahni hmelţha intih chu a har dawn e" ka tih chuan "I hmelţha teh mai a nia aw, nula tam tak hian an tluk teuh lo che. Angel hawlhthlak pawh i ni ve lo, angel pawm thlak i ni ringawt" a ti a, kan nuih dun hak hak lai chuan "Ka inten lutuk" a ti leh zeuh a, amah chu a nuih za zawk zawkah a ţang lehnghal a. 

Min chawh hlim tum ni awm tak hian "Ka nupui chu nila basmati rice hlir i ei ang" a ti leh pek a, "I ninawm lutuk aw Thanglianmawi" ka ti bak hlar a, nuih ka insum lui thei chuang lo. 

"Tak takin Zote, ka duh reuh che" thutak deuh zawka a tih pawh chuan fiamthu ah ka lak sak zel a, ani aia ka upat thu lah chu ka sawi nawn mawlh mawlh a, "Bialpa nei lo tur chuan i uihawm mawle" a ti bui bui a, mak tak maiin kan pahnih chauh a kan awm chang pawn amah hlauhna ka nei ngai lo. Min duh thu fiamthu ti tak deuh a a sawi hnu pawh hian ka la hlau lo cheu a, ka hmuh laia zu a in pawn ka kawm serh phah chuang lo. A mizia hi ka ngainat zawng tak a nih ka ring. 

Ka ngawih tak vang vangah chuan "Engahmah ngai suh aw ka sawi tur hre lo pawt vel mai mai a nih kha, i hmelţha veng reuh bawk sia" a ti a, zu lo lam tawk an awm reng a, kan awmna a mawng tehreng nen, lokal an ţhulh phah chuang lo reng reng. 

Zan reiah Hmangaihsangan min rawn bia a, phone number ka pek chuan min lo biak sek ka ring deuh a, mahse a reh vang vang a, min be dawn lo emaw ka tih hnuah min be chauh zawk a ni. 

"I mu tawh em?" a rawn ti a, kan mut tawh thu ka hrilh hnu chuan "Ka buai deuh a" a ti fan ruih a, a inthiam loh ve hmel khawp mai. 

"Keipawh ka buai tho alawm a hun takah min lo be zawk a nih hi" ka ti a, ţawng tlem nen, phone ah phei chuan sawi tur a vang duh riau a ni. 

"Ka nu chanchin i hria em?" min zawh ka rin lo deuh min zawh chuan mak ka ti deuh a, ka putea nen pawh kan inbe deuh reng tak alawm. 

"A ngai reng an tia, enkawl lohin kan dah rei em a han kang awk awk nghal thei chi a ni lova" ka sawi zawng ringawt pawh chuan ka tawt leh up up tawh a, Thiangi a lo ni lehzel a, bawm tawt deuh a khung beh a, chhuak thei lo tur a dan chep tlat ang mai ka ni. Min chhan tum apiang an lo hliam hmiah hmiah zel a, hetiang hian ka inchan a, ka dinhmun chhiat lutuk vang hian Pathian ka haw hlur tawh. Thlei bik nei Pathian ang hialah ka ngai tawh a ni. 

"I ngaihtuah viau em?" a ti thawp sup a, chu te chu inzawh loh pawh a hriat sa alawm. 

"Ngaihtuah e" ka tih chuan "Bawiha kha Ruattei bulah dah leh la ka nu chu va awmpui rawh. Min hmuh a remti lo a nih chuan ka hmu rih lo ang che" a ti teh daih a, a rinzawn thiam vek ang ka tih reng kha. 

"I rilru i thlak deuh thut a ni maw?" ka tih chuan "Kan dam chuan a ţha. I phone number ka nei leh tawh a ka be reng thei tho che. Damlo zawk rilru damna a pawimawh, ni lawm ni?" a rawn ti a, chhuna ka thusawi kha a la hre vek a nih hmel. 

"Nia..ka nu hi a pawimawh hmasaber rih a, a taksa dam phawt se ka duh ang ka ti ve thei tawh ang" ka ti hap a, a remti kher angem phei chu ka hre lo. 

"Thil pawimawh sawi tur ka nei a" a tih chuan "Hei ka ngaithla alawm" ka lo ti a, "Tun a kan chenna in hi ka pa'n U Remremi tan bik a dah lo" a tih chuan ka kang deuh awk theiin ka hria, Neihkimi leh an cousin hnen aţanga ka hriat dan kha chuan U Remremi hminga awm ngei a ni. 

"Nih chuan tu tan nge ni a?" pangai thei ang ber a ţawng ka tum a, mak ka tihna ka thup bo zo thei em tih phei chu ka hre lo. 

"Remremi enkawl tu apiang hnenah, a tawp thlengin ka tihna a nia" a ti a, ka pa chu a fing hle mai. U Remremi enkawl tluan ţhak tuin in ropui tak an rochun dawn a nih chuan enkawl tu a nei reng thei dawn tihna a nia, in nei ringawt se, enkawl tu ţha nei chuang si lo se la chu a ngaihtuahawm dawn lutuk tlat a ni. 

"Mahse Neihkimi khan U Remremi tan a dah a ti sia" ka ti hluai a, rin loh deuh ka hre thut a, thil fel lo dang pawh a awm maithei a ni. 

"A hre sual aniang" a ti tawi tak a, hei chu ka rindan vel a ni. Neihkimi chu zilh a ngaih leh a rukin a zilh leh ang a, ka huat lehzual a hlauh dawn avangin ka hriat lai chuan a sawichhe lo hrim hrim ang. 

"A ţha a ni mai alawm. Farnu i ngah a, an enkawl thei ang chu. Nangpawn i enkawl thei tho ang a, midang aia ngaihsak bik a ngai bawk a" tiin ka ngaihdan diktak ka sawi a, hman aţang tawh khan ka ngaihtuah ru ve viau zel. 

"Ka nu kha lo dam vat rawh se. I lo hrilh ve dawn nia, min hmuh a duh hunah ka rawn hmu ang" a ti a, thu ho te te sawi zawmin rei deuh chhung kan inbe ve ngei a, kan dah chiah chu khua a har veng veng mai. 

Ka ngai ve tawh lutuk hi mak ka inti zawk, thil ho deuhah pawh la hrechhuak zel a, amah pawn hria se em em a a ti maithei a ni. A thawmhnaw hak ţhin ang mipa dangin an hak ve te hian ka mitthla ah a lo lang ringawt zel a, awm miah lo mah se a hmel hmu ang mai ka ni ţhin. In khat a kan chen dun lai kha chuan ka ngaih a ţha a, nitin ka hmuh bawk avangin ka ngaihna kha a nep deuh hlek ţhin a, kan awm hran chiah khan ka lo duh zia leh thlakhlelh zia te ka in hrechhuak a, hmu tawh lo tur anga ka inchan ngat phei chuan ka ngai zual sauh ţhin a nih kha. 

Zing a rawng ka bawl laiin ka putea a lo lut hlawl a, a awmpui rei peih ka ring lo reng a ni. 

"Ka awm loh chuan in a ngaihtuahawm emai. Vawiin phei chu Denga nen tih tur pawimawh kan nei a, i nu chu nangman awmpui leh lawk rawh" min ti a, bawlhhlawh paih tur a pawn ka chhuah chuan yma hruaitu pakhat ka hmu a, ka ip chawih thei alawm le. Kan in pal tlangin a chhuk tlang zel hlauh zawk a, hmanah warning min pe tawh a, zu zuar tawh lo turin ka putea an hrilh bawk. 

An lokal ţum khan a ngawi ran a, ensan hial an sawi thlen phei chuan ka nu'n hrethiam turin a lo ngen zawk a, warning min pe in min haw san ta kha a nia, ka putea pawh a fimkhur ve sawt a, inchhunga zu inkhawm luih luih leh thawm siam vak vak a phal ta lo a, a hlimchhawnah kha chuan inleng pawh kan nei ngai lo. Mahse a rei deuh a, a ngai ang chiahin an kal leh a, tunah phei chuan hlauh leh venthawn nei miah loin an awm leh tawh. Zu zuar tawh lo turin hrilh ve ngial ţhin mah ila "Thawh tur a vang a, eizawnna tur dang a awm lo" a ti mai zel a, a haw lova, a zawm chuang lem hlei lova kan tih ţhin ang deuh kha a ni. 

"Nileng a ţhut tlawk tlawk chu patling tan chuan a ninawm emai. Kan ruh te a na hma tawh a, kan tlin tawh lo. Damlo awmpui tur chuan ţhalai deuh an ngai, awmpui phawt la i chauh hunah ka lo chhawk leh mai ang che" zu awm sa enfel pah hian a ti zung zung a, Thiangi chanchin min zawt lem lova, a ngaihven tehchiam lo aniang. 

"Ka nu'n awm rih turin a duh che sia" ka tih chuan "A theih bik loh a nih hi. I pute chanchin ka hrilh lahin midangin an lo chhan sak zuah zuah a, rawn ngaihven tum pawh an awm lo. Nupui an ngam lo hlawm leh lutuk mai, unaute na tuar pawh ngaihven duh lo te chuan malsawmna an hlat lutuk. Beisei ve lo law law zawk rawh se" a ti hluk hluk a, ka nu hi an tan chuan mi tenawm tak a ni miau a ni. 

"Hrilh kher an ngai hleinem. Mi hrang ang chiah kan ni tawh a, an rawn ngaihsak kan phut tlat chuan kan na mai mai zawk ang" ka ti a, inbual turin ka luhsan a, Bawiha chhaih a a nui huk huk thawm ka hriat te chuan ka khawngaih tlat pek a, zu a in reng chuan a tawpna a rapthlak viau maithei a, pan tur kan neih loh laia min lo tuam hlawm tu a nih vang pawn a hrehawm ka hlau a, ka nu te unau zinga rilru ţha leh mi pangai ve ber zuin a tibuai tlat hi a pawi khawp mai. 

Bawiha chu Ruattei hnenah bawk ka dah leh a, Hmangaihsanga a lo awm tawh lo. Kan ţhut dunna lam ka hawi lai chuan "A buai deuh a, a lo kawi ta lo mai" a lo ti a, chanchin ka hrilh chuan min hrethiam khawp a, inthlahrung lo turin min chah mawlh mawlh a, mihring zawng zawng hi Ruattei ang vek chu nise khawvel hi a nuam ngawt ang. 

Nidang ang lo takin vawiin chu min ngen nasa a, awm a ti nuam lo mai dawn alawm le. Ruattei takngial pawn a pawm bet hleithei lova, "Kalsan lui rawh dawrah ka hruai ang a a tlei chhawm ve mai ang" a tih takah chuan hreh deuhin ka inher a, ka taxi hmuh hmasak ber chu phar dingin ka ţhu lut a, ka nu kan dahna hmun a hla lutuk a kal manah pawh insen ţeuh a ngai zel. 

Nu Biakin min lo hmuh rual chuan "Awii i putea kha a phun peih lutuk a, ka ruh a na a tih loh leh ka mawng a kham a tia, zial zu turin pawnah a chhuak reng bawk sia, a awm hman mang lo reng reng" a lo ti lang lang a, ka nu'n zun chhuak a lo sawi ve chiah bawk a. 

Bathroom lam a kan inkaih phei lai chuan "Doctor hnenah chhuah lo dil rawh aw. Na chhe lutuk ka nei chuang lova in lamah in enkawl ang u" a ti leh tawh a, an phal dawn lo tih ka hriat sa vangin ka sawi pui duh lem lo. 

"Bawiha chu a ngaiah bawk em ni i dah leh a?" lungawi loh hmel taka a tih chuan ka lo aw ban charh a, midang awm loh lai chuhin Hmangaihsanga thu min hrilh kha ka hrilh chhawng ve nghal zat bawk. 

"Ka hre tawh alawm" a lo tih chuan "Engtin nge i hriat a?" mak ti deuh hian ka lo ti a, "I pa khan a sawi ţhin" a ti leh mai a, "Chuti si ngati nge dawt an sawi a?" ka ti hluai a, ka aw pawh a ring tawh khawp mai. 

"Neihkimin chhan awm lova min chhuah tir i ring em ni? Remremin min ngai a, anin min hua a, pasal te an la nei ang a, Remremi nen chauh kan awm dawn tih a hria. Min huphurh em vangin chutiang chu a thlen a duh lo a, a laizawnnu vanga in ka chan bik ai chuan min hnawhchhuah a duh zawk" a ti malh malh a, a aw chau rau lutuk te chuan min ti na ve thei hial a, Neihkimin U Remremi an enkawl ve theih thu min hrilh lai te kha ka hrechhuak uai uai bawk. 

"Nih leh ka pa khan engmah a hnutchhiah lo che angin i sawi ţhin sia" ka tih chuan "Eng nge min hnutchhiah a?" tiin min lo zawt let a. 

Chhan mai ngaihna ka hriat loh lai chuan amah bawkin "Remremi enkawl tu hnenah a tia, keimah ka ni tihna a ni hleinem. I hmuh ang hian tunah pawh ka enkawl phak tawh loh hi" a ti a, a sawi dawt lo na a U Remremi hi a ngai ve viauin ka hria. 

Ţhat lam a pan mawh khawp mai a, a zual zel emaw tih tur a ni. Ka nu te ang hi chuan natna an kai hmain tihdam leh mai a har ţhin a, rilru a buaiin lu a hai muai muai zel a ni ber. 

Englai pawn ka rilru a phir a, Bawiha leh ka nu ka ngaihtuah ve ve a, ka putea lah ka nu a ţha tih tawh chuan a reh vang vang zel a, mahni chauh phei chuan hrehawm tak a ni. 

Ka nu damdawiin a luh aţanga pathianni vawi hnihna a lo inher chhuak a, kan tan chuan ni thar hian thil ţha a herchhuahpui ve ngai lo. Zan hun kan huphurh a, khawvar kan nghakhlel chuang si lo. Lungawi lohna tur zawng reng reng hmanhlel an awm laiin keini chuan hlimna kan zawng ruai reng a, tlawh tu nei zut ţhin ho chuan inkan an phal hun nghakhlel takin an thlir a, tlawh tu nei ve ngai lo kan nufa tan chuan hun leh darkarin awmzia a nei lo. Kan pahnih chauhin kan in awm a, kan awmpuite hoin an phal ang eitur min pek ve hi midang hnen aţanga kan thil pek dawn awmchhun a ni. 

Nurse ho an fel viau laiin biak har tak tak an awm ve a, thil pawimawh tawpkhawk pawh kan zawh ţhat ngam loh laiin an hmelhriatte khum bulah an nui leh har har ang lawi a, chinchang hre lo vin vak vak ching tawk an awm bawk a, thil ţul kan zawh changa min chhang ţha duh miah lo te nen, hriat belh duh kan neih pawn kan zawt nawn ngam tawh ngai lo. Heng ho hian eng nge hna an thawh chhan ni ang le ka ti ţhin. Hlawh beisei vang chauh a thawk te pawh an ang rum rum ţhin. 

Nurse fel deuh an duty ţum chuan tupawh kan hlim em em vek zel a, damdawi ţha bik min pek tur an nei chuang lo, mahse an ţawngkam mai mai pawh kan lo dampui sawng sawng ţhin. An nui hmel te leh min ngaihsakna awka te hian thla a ti muang em em zel a, thlei bik nei lova angkhat vek a min en ngat phei chuan mal lutukah kan inngai bik lo a, thawktu zinga hmelhriat ţha nei ve lo ten hrehawm kan ti ngai lo. Zawhna kan lo zawt mawlh mawlh a, ţhenkhatin an lo fiam bawrh bawrh a, min enkawl tu nurse te an fel chuan midang pawh kan inpawhin chhungkaw awmkhawm kan ang tih chang te ka nei ţhin. Thawk tu te berin thlei bik an neih chuan mipuite kan inpawh tak tak thei ţhin lo a ni. 

Chaw ka dawh laiin Ruattein min lo bia a, Bawiha ka dah ţum khan ani pawh hian phone number min dil lui tlat a, chanchin zawh zeuh zeuh a ngaih tho avangin ka pe ve mai. 

"Kan lokal dawn a nia" a rawn tih chuan "Vawiinah maw?" ka ti vak a, ka aw ring lutuk ah chuan ka hma intlar ţhenkhat chu an lo hawi dual mai. 

"Ni e..U Remremi phei chu motor-ah a ţhu vung tawh" nuih kar kar pah hian a rawn ti leh a, "Tu tu nge lokal dawn cheu" ka tih chuan "Zami leh U Neihkimi tih loh chu kan lokal vek ang" a ti a, an tum ruh mai bawk sia, hnial chi pawh a ni tawh lo. 

"Aw le..in lo thlen dawnah min lo hrilh dawn nia" ka ti ta ringawt a, rilru a buai khawp mai. Ka nu hian a lo lawm dawn hauh lo a, Hmangaihsanga nen pawh kan la inhmuh loh phah reng a, a lungawi mai ang kan ti tak na a a hel tial tial emaw tih tur a ni. 

Ka nu hnenah ka hrilh thlap a, min la chhang duh miah lo zui. Chhunah Ruattei bawkin min lo call leh a, "Duty ho bulah kan awm tawh. An la hawng lo deuh a, an hawn veleh kan lo lut ang" a rawn ti a, Bawiha thawm pawh ka hria. An lo hruai tel ve ngei a nih hmel. 

"U Remremi chuan a ning tawh em?" ka ti a, U Remremi hming ka lam chuan ka nu pawn min lo en ve vat a. 

"Tehreng mai a phun nasa sia a inthlahrunawm zawk" a rawn ti sar sar a, a duh loh zawnga thil a kal chuan mi aia nasa in a phun chiam zel. Ţawngkam mawi lo deuh deuh lah chu rin aiin a hre zek a, miin an lo chhaih ţhin dan a zir ve zel aniang chu kan ti mai. 

Nidang ang lo takin kan tu kan nei ve ta ngei a, khum bula mi ho pawn mak an lo tih hmel viau mai. Bawiha chu pawmin ka kuah a, a ban tereuhte a ka nghawnga min lo kuah ve te chuan ka nuam huai huaiin ka hria. 

Ruattei chu khum bulah a ţhu kun tlat a, U Remremi chuan rem leh rem lovin ka nu a kuah chuk chuk thung a. 

"Ka pi, Ruattei hian tui i tih deuh deuh ţhin ang kha lei vek ang a tia, eitur kan lo ken ţeuh che a nia aw" Siampuiin a ti siam siam a, keichu min kheuh zeuhin "Motor ah U Hmangaihsanga a awm" a ti sap a, ka nu hmuh lohin ka lo bu nghat a. 

Ruattei chuan kawr phiar a ha a, a ban a bul tak nain khaw awmdan nen a inrem lo khawp mai. 

"Enrawh nu hei ka hak lai hi i kawr min leisak kha a nih hi aw. Chuan Ruattei pawh hian i phiar sak kha a ha bawk a nia aw" rang deuh deuhin U Remremi chu a ţawng a, "I na viau em ni?" Ruattei chuan a ti sap a, a hmuh tum ang aiin ka nu chu a hmu chhia a ni maithei a mittui pawh a tling pam mai. 

"Na viau hran lo e..i sam rawng te chu a va lar em em ve" chau tak a tih pahin ka nu chuan Ruattei sam a chul sak a, ani pawh mittui karah a nui ve var var a, "Ka lo awmpui ve ang che aw i duh em? U Zotei ai chuan ka zei zawk dawn hrim hrim" ka bu ban rek a vuan chung hian a ti lang lang a, a awmdan chu ka lo hriatthiam pui vek. Natna thum tum a zangkhai deuh a ţawng ka tum ţhin ang chiah kha a niin ka hria. 

"Ruattei awmpui che i duh chuan ka awmpui pawh duh ve ang che" Siampuiin a lo ti ve vat a, ka pahrawn fate mah nise an sual miah lo a sin mawle. Pakhat lekin rilru sual a put pawn chhungkua chu a lo keh darh thei tho a nih hi. Heivang hi aniang chhungkaw ţangrual apiang chhungkaw awh awm an nih ţhin. 

Ka nu'n a huat bik tlat pa hmu turin ka chhuak zal zal a, ward pawn ka chhuah hnuah chak deuhin ka kal leh a, motor dahna ţhin lam panin ka kal hlawk hlawk a, car tam tak zingah a car chu ka hmu chat a, khua a lum em avangin glass a lo up vek a, pawn aţangin ka bih a, phone ngawt a lo bih ngar a, ka awm tih chu hria ang pawn a awm lo. 

Glass ka kik karh karh takah chuan min rawn thlek vut a, min hmuh rual rual chuan chunglam aţangin kawngkhar a rawn hawng nghal a, ka ţhu lut chiah chu ka dai sawng sawng mai. 

"Huat bik nih chuan motor inkhung tlat a ngai a ni maw?" tiin ka fiam a, za lo zetin min lo ţhen khum suk a, "A lo lawm em?" a ti thum dut a, ka lo bu ve nghat nghat a.

"Ruattei sam a sawisel a, U Remremi a ti ti char char bawk a, vawiin chu a khua a har lo ang" ka tih chuan a ngaih a ţhat hmel khawp mai.

"Engati nge ka nu hian a huat bik che a?" a chhanna hre sa reng chung a zawt lui ka ni. 

"Keimah vangah a ngai" a ti fan ruih a, "A ni tho bawk a, chuvang chuan siam ţhat ka duh" nghet churh hian a ti leh a, Awmtei a hmu thut kha a danglam phah em tih te hriat ka chak a, mahse "I u nen an inrem phawt loh chuan siamţhat theih a ni lo ang" ka lo ti thung. 

Mûk deuhin hma lam a en ding ngar a, a rilru a buai ve khawp ang. Neihkimi lah rilru sehhel leh hmin mai mai lo chi a nia, mipa tam tak aiin a rilru a huaisen zawk daih ang. 

"Hmun dangah kan awm daih thei alawm" a tih chuan ka melh hrak a, inhmu lo mah ila ka mitmeng chu a phawk ngawt ang. 

"Neihkimi chhuahsan i tum tihna mi?" ka tih chuan lo bu nghutin "Chu chu kawng awmchhun a nih chuan" a ti sup a, chhungkaw inţhen darh chu a chak zawk zawk hmel bik loh. 

"Chutiangin a theih ngawt dawn mi? I farnu a nia, i nu leh pate an lungni lo lutuk ang" ti a dan ka tum a, chhuak daih mah se rilru nuamin a awm dawn chuang lo. Ka hmu lawk vek. 

"Ka sawi zing tawh a, ka tih phawt loh chuan a awih dawn lo a ang" khauh zet hian a ti a, heipawh mi luhlul, a tum tawh chu a tum lui tlat zel. 

Ka ţhutna hma chiah a glove box chu hawng rawkin a zen lut a, envelope lian angreng tak hi lachhuakin "Ka nu hian hospital a pawisa lut aţanga lak theih chin a nei ve a, thla tin hlawh a nei tihna ang a ni mai. Ka pa khan a ngaihtuah takzet a, a thih hnuah pawh in enkawlna tur a neih zel theih nan a ti a nih hmel. Kan inhmu remchang bawk a hei hi lo pe rawh" tih pahin envelope chu ka malchungah a dah a, ka nu thih hnu a tawp nghal mai tur a nih ka ring. 

"Hei hi Neihkimi ten an lo thup vek maw? Rilru na deuhin ka nu a awm phah a sin. Ka pa thleng khan a dem a, a hmangaih miah lo ah a ngai a" ka ti a, tun ang rêng hian Neihkimi ka la haw ngai lo. 

"Ka tihpalh" hriat tham mang loh a a tih hnuah "Ro ah ka buai lova, ka lo ngaihven ve tehchiam lo bawk a. Neihkimi a lo buai char char ang tih rin ngaihna pawh ka hre lo" tiin a phun sup sup a, a ni khawp ang. Thisen zawmpui te ngei hi chu sual deuh tur a ngaih an har ve ngawt ang. 

Ngawi renga kan ţhut dun tlawk tlawk lai chuan "Ice cream i duh em?" a ti hlawl a, zei hmel viau si hi a zei lem lo tak tak a ni. 

A hriat lawk loh thu a sawi chamchi a, Neihkimi pawn a sawi duh lawk lo a, thinrim a an intawng hnuah a sawi ve chauh a ni awm e. Ka pa nen an inkawm zing viau ka tih ţhin kha, ro chungchang chu a sawipui ngei a, mahse ka pa khan ka nu tan a engmah dah loh chu a duh lo bur a, anin ka nu'n engmah a chan ve loh dan a ngaihtuah thung a, ukil lah kha an chhungte a ni kher bawk nen, Neihkimi tan chuan thup bo hmak a awl khawp ang. 

"Chhuak ila" tih pahin kawngkhar ka hawng a, pawn boruak chu a uap churh a, thil vawt ei chu a chakawm viau tak tak mai. 

"In kan hun a tawp ţep tawh ang" a lo chhuah rualin ka ti zui zat bawk a, pathianni chuan an hawng rei deuh a, hun tlem chu kan la nei thei ang. 

Ka kawng ah min kuahin kawng min kân pui a, dawr pakhat chauh inhawngin chupawh kawngkhar tereuhte bak a inhawng lo. Min luh hmasak tirin ka hnungah a lo lut ve a, dawr chhung phei chu lum tak a ni ringawt. 

Deep freezer chu hawngin ka enkual a, popsicle pahnih ka lak hnuah "Duh dang i nei em?" a lo ti vat a, ka duhzawng man a to lo bawk a tiin ka inthlahrung peih lo. 

Theite leh hairep vel ka la a, nizan aţanga ka eichak tawh a ni. Tengtere la telin khawmhma pack pawh ka la a, a thur lam chi hlir ka la khawm ruih mai. Acid ka ban zal zal lai a "Kha chu a ţha lo" a tih deuh nghutah chuan ka kut ka la let a, dawr neitu lah chuan "I duh naupangchhia e" tiin min lo fiam lehnghal. Hmeichhia chuan hetiang thil hi thlakhatah vawikhat tal kan ei chak ngei ngei a, thla khat chak ka ti mai. Thei dang lei mai tur a awm miau lo a ni. 

Hawker ruak pakhatah ţhudunin popsicle chu kan ei a, puitling ve ve kan ni bawk nen, a zahthlak lek lek alawm. 

Chhungkaw chungchang kan sawi dun tawh lova, kan la buai dawn chauh tih chu kan hre ve ve tho ang. Mahse tunah rih chuan ka hlim ve deuh a, ka nu'n chan a lo nei ve reng a, ka pa a huatna a bo ang a, a rilru a harhin a hahdam sawt bawk ang a, hma pawh a sawn deuh maithei a sin. 

Pickup pakhatin kan zawn a lo thlen chuan a hnunga napang invuan ding ţhap ho chuan phur tih hriat taka au chul chungin an kut an lo vai lawp lawp a, nui hak hak chungin ka kut ka lo vai ve a, Hmangaihsanga lam ka hawi a, nuih tak taka ka nui ve chu hmuhnawm tih hmel deuhin min lo en a, 'eng nge' tih nan a mithmul ka kan ak chuan lo kiai sukin hmun dang a en a. 

"Hman a i zin hma a min zawhna i la hria em? Ka rilru put hmang sawi ve tur a min tih kha" ka tih chuan a bu nghat a. 

"Tunah ka chhang tawh ang che" ka lo ti vat a. 

CONT...