KA HRINGNUN THAWNTHU-20

KA HRINGNUN THAWNTHU-20

"Chhanna chu ka pe tawh ang che" ka ti nawn leh a, tlem chuan ka lai deuh.

"Sawi la" tih nghut pah chuan a nui suk a, ka zam ve reuh lutuk chu ka'n ding hmasa leh phawt a, a lo ding ve kher te chu ţul hi kan ti lo khawp a. 

"Ka unaupa ringawt chu i ni bik lo alawm" ka ti chhuak ta nge nge a, ding khawng luahin a mitmeng nalh zet chuan min en run a, ka zak chem chem mai. 

"Ka sawi awmzia chu ka inpawm tawh ka tihna a nia, kan inhlat leh tur anga ka ngaihtuah te hian ka huphurh a, ka hlau tlat a" ka ti a, zankhuain ka in ngaihtuah a, a rem dawn emaw rem dawn lo emaw ka rilru put hmang hi hre ve hrim hrim turin ka duh a ni. 

"I hriat vek tawh chu ka ring tho a" ka tih chuan a nuih a zat hmel khawp lehnghal a, kan awmdan leh ka thiam dan ang ang a ka ngaihtuah ve ţhin danah te hian a hriat vek tawh chu ka ring tho a, mahse chhanna kha a beisei ve tlat bawk sia. 

"Chu zawng chu a nia" ka tih leh chuan a nui ta suk a, nuthlawi hi zei turah an ngai ringawt zel a, keimahah hian nuthlawi zawng zawng an zei vek bik loh zia a hriat. Ka zak a, ka beng hmawr te chu a sa hat hatin ka hria. 

Ka hnunglamah a kut dah kualin langsar vak loin min kuah a, kawngkal an awm loh veleh rang deuhin ka chhip a fawp zeuh bawk a, ka lawm e a tih naah ka ngaihsak tawh mai ang chu. Ka kuah let ve chak a, thlamuang deuha a awm a bei hle hle te pawh ka chak tel a, mahse kawngpui lun lutuk bula hawker hmaah lehnghal phei chuan a rem teh hrep lo a ni. 

"Ruattei te an lo chhuak daih tawh ang" tih pahin a kut ka la a, a sana bunlai chu ka en sak a, inkan hun a lo zo tawh tak tak. 

"Siampuii awm se la lo haw ve daih mai rawh" a ti lehpek a, "A chi hleinem mawle. Nangpawn ka nu lungawina tur i zawn hram hram a ngai ve tawh a" ka ti bauh a, lehlam lehlamah hel pawl an awm ve ve tawh a, tawn tlang an har hmel hrep lehnghal. 

"Ka hrethiam" buk nghat pahin a ti sup a, nghet deuhin min kuah a, motor tlan leh kawng kal an awm reng vangin min thlah leh vat thung. 

"Ka thlah chho ang che" a ti a, gate puiah chuan lutin kawng chhoah muangchangin kan chho dun a, "I ril a ţam em?" min ngaihtuah deuh a a tih chuan a ţam loh thu ka hrilh a, "Ruattei ten an lo keng ţeuh tho a, a ţam hunah ka ei mai ang. Chaw ka dawh peih pawh ka ring lo an lo ken kha rin mai ka duh. Nichina kan ţhutna bul velah khan chawhmeh an zuar ţhin a, cheng10 leh 20 man vel lek lek a nia, a tui thei si, chaw ei a nghahhlelhawm thei tawp a, mahse pathianni chuan a reh dûk zel a" ka ti siam siam a, ka rilru put hmang ka phawrh meuh chuan ka zâng hawkin ka hria. 

"Eng chawhmeh nge an zawrh a?" dam thluam a a tih chuan "A-Z" ka lo ti vat a, hriatthiam loh hmel deuhin mit ti zim sunin min en a, ka lo nui hak thung a. 

"A chikim lutuk a, sawivek sen pawh a ni lo. A-Z ti ila ka sawikim ber ang" tih pahin ka nuih seih a, amahah hian hahdamna ka hmu a, hei bak a awm thei chuang dawn em ni? Inchhung buaina tih loh chu ka duhthusam a kim thlap ti ila a dik ber ang. 

"Awii" tih leh din ka rual a, "Eng nge ni leh ta?" nuihza aw taka a tih chuan kan kal tawhna lam kawkin "I lehkha min pek kha motor chhungah ka theihnghilh daih alawm. Ka nu a lo lawm dawn tehreng nen" ka ti hluai a, thu lawmawm a ni miau a, ka nu hrilh hriat ve ka chak tawh a ni. Ka pa'n a hmangaih takzet tih a hria ang a, ka nu a hlim dawn tih ka hriat vang aniang ka rilru a zangkhai ve em em ni. 

"Min lo nghak rawh" biak hman pawh a ni lo. Motor dahna lamah amahin a let thla a, ka en zui vang vang ringawt a, kawngsirah dingin ka lo nghak a, ka inphawrh thut mai hi mak ka ti. Zanah khan ka ngaihtuahna ka kawm nasa a, hrilh ve ngei ka tum rualin tunah tut tut chuan ka tum miah si lova, mahse a thawk deuh thut ni maiin ka hria. Tlem a ka hlim ve deuh vang te pawh a ni mahna. Nizan ngat phei kha chuan ka ngai lutuk kha mak ka ti zawk hial a, inkawp rem thei dawn lo mah ila a hriat hrim hrim chuan a ţha. 

A lo chhoh leh hnua lehkha min pek veleh midangin an hmuh chian theih loh nan ka zial daih a, ward pan chhoh naa kan kal lai chuan a hnung zawkah kalin min nam kal dat dat a, chho lutuk lo mah se a nuam tho. Mi haw tur kan tawk leh ţhin a, hmelhriat hmuh ka inbeisei hauh loh laiin Nu Biaki a lo tel ve hlawl mai. 

"Damlo awmpui chuan hnung zang leh kawng a kham duh a nia" a ti a, kan kal muang angreng sia, kan inhmet velah a ngai ni awm tak a ni. 

"Khaw nge i kal dawn?" ka tih chuan "Heng ho hi ka'n thlah ang e. Lo han chho rawh ka rei lo ang. I nu lo kan tu te pawh kha pawnah an chhuak vek tawh" a ti lang lang a, keini pawh kan kal chak ve ta sawt a.

Security guard ho duty na bulah an lo ţhu ţhap a, Ruattei a awm ve lo thung. Bawiha chu pawmin a biangah ka fawp a, ka putea hnen a kan awm hnu ngat phei hi chuan kan nufa in kan in awm nasa a, ka kalsan daih chu ka inthiam lo angreng. 

"I hmai a va bal ve a" ka tih veleh Siampuii chuan "Choco pie a ei a" a lo ti a, ani pawh a kawr hma a berh rang ruai mai. 

"Naupang eitur an pe vak vak ngai lo" Hmangaihsangan a lo tih ve chuan "Kum hnih a tling ve ţep tawh a, choco pie te chu a ei thei lutuk alawm, a nem vek a" a ti nang nang a, bawm khat dang a la hum ţat zui a. A ţawngthei ve tawh a, fiah lo deuh a thil sawi a nei ve ţhin. Mahse a ţawng ţha duh lo a, a rual puite anga a rilru a thil awm te, a ngaihtuah zawngte a ti lang ve chiam chiam loh ţhin avang hian hlauhthawn chang ka ngah a, kan ngaihven tak tak hman loh vangah ka ngai a, a chhan tur awm ang ka sawi fak thei lo. Naupang hi a chang chuan hriatthiam an har ve viau zel mai.

"Ruattei a lo chhuak duh tawh ang a, ka va thlak tawh mai dawn em ni?" inthlahrung deuh tak hian ka ti a, tih tur dang an neih phei chuan an khawtlai duai ang. Hmangaihsanga ngat phei chu pathianni pawh an awl ngai mang lo a nia. 

"Ka nu nen an inkawm rih duh aniang. U Zotei a lo let pawn ka lo koh hma chu in bulah lo awm rawh se a ti alawm" Siampuiin a tih rualin U Remremi a lo thaw halh a, a tum zui bar bawk. 

"U Remrem i awm ve thei tawh lo em ni?" ka tih chuan rum deuhin min melh a, ţha deuhin zawt mah ila a thinrim laklawh leh rih tawh aniang min chhang duh lo emai. 

Kan mipa ber chuan hmelhriat a hmu leh tawh a, mizoram a doctor te hi chu insawn kual ve deuh reng an nia, an inhre pawh deuh ţhum a ang ka ti. 

"Ka nu a awm ve a" a tih phei chuan doctor chuan khum number te a zawt nghal chuk chuk a, a hrilh hriat hnuah "Ka lo tlawh ve zeuh zeuh dawn nia" a ti a, pathianni hian doctor senior deuh hlek chu an lokal ngai mang lo emaw ka tia, kal tawk an awm ve reng tho a nih hmel. 

"A lawmawm khawp ang" tih chauhin a chhang a, ngaihven tur pawn a ti chuang lo. 

Ruattei lo chhuak chu a hmel a ngui riau a, a chhan zawt chak viau mah ila a rem rih si lova, lungngaih hmel viau mah se hmu lo derin ka thlah a, ka nu amah chiah a awmtir reng ka duh loh vangin ka kal thui lo thung. 

"Naktukah ka lo thlak ang che" a tih hnuah min ngen hmain Bawiha chu a kalsan pui a, hnialna hun pawh a awm lo. 

Ka nu hnen ka thlen chuan Ruattei nen an inbiak dan ka zawt hmasaber a, "Min awmpui rih a tum tlat a nih kha a hnar theih loh" a ti ram hmak a, thinrim hmel a pu hauh lo thung.

Hmangaihsanga thu min hrilh te chu ka sawi leh par par a, "I hmu duh si lova, a lo lut ve ngam lo a nih kha" ka tih tel kher hnuah envelope chu hawngin lehkha phek chu ka phawrh chhuak a, pawimawh tak tak vek a ni. 

"Ka pa khan a hmangaih che alawm. Chuvang chuan inti harh la, dam tumin bei ţang ţang rawh aw" ka ti a, a banah ka chul pah a, a cher ta lutuk hi hmuh hrehawm ka ti reng mai, ngaiah a neih hleihtheih loh. 

"Ka pa nen hian engtia intawng nge in nih a?" ka ti leh a, min la chhang duh chuang lo. Sawi hrehawm lai a awm a nih ringin ka zawt lui duh chuang lova, zep hlen daih mah se ka hek phah dawn chuang hleinem. 

"Zote chaw va dawh ila" ti a Nu Biakin min lo sawm chuan ka tho ve thuai a, kan inzui chhuah lai chuan "Chhun a i kal pui pa kha tu nge a? Kan naute in a lo hmu fuh ve cheu a, a chhe lo rapthlak a fresh si a tih nasat kha" a ti sar sar a, ka nuih a za angreng hle. Kan naute a tih hi kan khum ep chiah a tleirawl te kha a nia, a pi damlo a awmpui ve a ni. 

"Ka ţhianpa a nih kha" tiin dawt ka hrilh a, thudik tak ka sawi chuan a chanchin min sawipui peih dawn lutuk a, zawhna phei chu ka nin rak thleng min zawt peih ang. 

"Pawnah khan i awm rei a i rawn hmu ve hman lo a nih kha. A pi ţhutchhuah ve lai tak khan chhe lo fresh si ka duh lutuk a ti sep sep reng a, a piin damdawi bawm a center fresh an dah kha a pe daih a, an khum bul a mi te nen kan nuih nasa alawm" a la ti tak deuh deuh a, chhe lo fresh si tih leh center fresh chu a in tuha lo berkher e. 

Damdawiinah pawh pathianni chuan chawhmeh a ţha ve deuh hlek a, chhungkaw tam tak ei phak loh tur kan hmeh ve zan zel. Kei hi a mak khawp a, ka nu nen chiah a kan awm ţhin lai tih lohah chuan chhungkaw harsa lo ve tak tak te zingah ka tel ve char char a, chhungkaw zinga chhiar tel theih ka nih laiin ka rethei em em thung a, pawisa nei tlem hle siin chawhmeh ţha ka hmeh reng tihna a ni ber ang chu.

Ruattein pickle leh hmeh tur dang a lo keng nual a, nidanga pek tur nei ngai hlei lo khan Nu Biaki ka pe ve a, a lo lawm thiam khawp mai. 

Ka nu pawn tlem chu a ei ve a, chaw a ei hleithei lo. Ei loh aia a ei vel mai mai ang a ni. Zana Hmangaihsangan min lo biak chuan pawnah ka chhuak a, ka chhuak tur te chu kan ep a tleirawl te khan min en duh nasa mai. 

"Khawiah nge i mut ve ţhin a" a rawn tih chuan "Khum leh khum inkarah a nih loh pawhin khum hnuaiah te kan inphah a, a mut theih lutuk" ka lo ti a, mutna tur dang zawng tur a min tih ţalh ka rin laiin "Ruattei a insiam" a ti sup a, ka nu awmpui chu a tum ruh viau a nih ka ring. 

"Puan thuah kha ken hnem vak a ngai lo a nia aw a hnawk mai mai. A mang a chhiat loh phei chuan ka nu bulah pawh a mut theih ang a mah se a ngaithei vak lova" ka tih chuan "I mut ngheh theih nen i ţangkai awm lo" a ti fiamthu zeuh a, tum loh deuhin ka nuih phah. 

"Ka muhil lawk thei ngai lo na a ka mutthilh tawh chuan ka mu nghet tak tak mawle. Hmanzan pawh ka nu zunchhuakin lukham leh bottle ten min vawm a, ka harh miah lo a" ka tih chuan ani pawh a nui ve huk huk a, kan boruak ipik tho si, zangkhai ru tho bawk si chu nidang ngaihtuah chuan a nuam takzet a ni. 

"Helamah lo insawn mai rawh u" a ti a, thil theih loh tawp a sawi leh ţan dawn e. 

"Ka nu'n a duh teuh lo mai. Damdawiin aţanga kan chhuah theih nan Neihkimi a phi buai leh bawk ang a, keichu khatiang kha ka peih tawh lo. In hrangah awm ila, ti hian zalen deuhin inbe thei ila ka duh zawk. Ka nu a dam chuan hna ka zawng ang a, tunlaiah te chuan dawr a thawhna tur te a tam ve tawh lutuk alawm" ka ti zung zung a, ka nu hi engtinpawn awm se in hlui a let leh tumna ka nei tawh lo hrim hrim.

"Umm..zawn chuan a awm zel" a ti ve ta nge nge a, nupa kan nih loh avang hian min thunun tùk a tum ngai lova, pawisa tam tak min pek a tum ngai lova, thil min leisak zut lova,  hnathawh ka sawiin min hnial ngai lo bawk. Heng te mai mai hi ka duh nachhan a ni. Min ngaihsak dan chin tawk a thiam a, no vek khawpin min duat ngai miah lo. Hnathawh nuam ka tih theih nan min fuih reng zawk a, amah ka duh ve tih chu a hriatna a rei tawh mah se chu chu hman ţangkai a tum ngai lo. Ramri chin a hria a, a pel ngai hauh lo bawk. 

"Bawiha a muhil tawh em?" ka tih chuan a nui hawk a, eng nge a lo ngaihtuah ang le.

"Fiamthu ka thawh loh hi..ngah nge i nuih ngawt a?" ka ti nang nang a, "Aw muhil tawh e motor a chuang chau ve deuh aniang" a ti a, a nuih ngawt nachhan ka zawt leh a, "Ka nu eng nge a an?" a ti daih thung a. 

"A ngai reng a ni mai. Hma a sawn chak lo lutuk hian awm a ti nuam lo ţhin. Hlauthawng reng rengin ka awm a, a mutthilh rei phei chuan a thawk leh thawk loh ka endik reng zel" ka ti halh a, nu te ber an damloh chuan inchhung a nung lo an lo tih ţhin kha ka hrethiam ve tawh. 

"A dam leh vat turah ngai ang. Naktuk chu ka lo hruai thei kher lo ang che" a ti ban churh a, hruai kher ka phut loh vangin ka hnual phah hran lo. 

"A pawi lo..Bawiha ka lam kawi ang a ka haw tlang nghal mai ang. Inchhung ka ngaihtuah ve tho a, ka nu thawmhnaw tihfel ngai a tam bawk a" ka ti zung zung a, "Min lo nghak thei dawn lo em ni?" a ti a, amah hmu lova haw ringawt chu a remtih zan loh hmel kher mai. 

"Nghah kher i ngai em ni?" ka lo ti ve thung a, hmu chak ve tho mah ila kan inhmuh ngun lutuk chuan ngaiah kan innei ang tih a hlauhawm bakah venthawn ngai a la tam lutuk. 

"Min lo nghak la" a ti a, ka duh loh tlat chuan lungawi lo deuhin kan awmna min zawt leh awm sia, tunah min nawr lui lo mah se tlanchhia anga min ngaih chuan min nawr lui ve tut tut ang tih a hlauhawm. 

"Aw le" tih ringawtin ka chhang a, kan inbiak zawh hnuah thawm dim takin ka lut a, Nu Biaki leh khum piah a tleirawl Ahmingi ten nihawichi an lo la chip a, min hmuh veleh "Lo chip ve rawh" an ti a, an insiamrem nghal sat sat bawk a. 

"Awii...vawiinah i bialpa chanchin ka sawi a, ka pi'n center fresh min pe daih mawle. Enteh U Zote, mipa hi palian na na na chu hmuh ţhat an lo awl bik a nih hi tiraw? Mahse i bialpa kha chu a hmelţha tho bawk sia, riang ve deuh emaw ka ti che a, i van vannei em em" Ahmingi chuan a ti phawng phawng a, sawi hreh a nei bawk si lo, ka nui tawi tak ringawt a. 

"Eng mi nge a Zote? Hnathawh te a nei em? Tunlai mipa chu chhe lo vung, hnathawh peih miah lo an tam a nia" Nu Biakin a lo ti ve thung a, "Doctor a nih kha" tim daiin ka chhang a, ka zak kher mai. 

"A ni maw? Ka rin aiin i lo ti thei daih. Doctor hi chu mizote chuan kan la dah sang ve bawk sia, U Zotei chu a nuam ngawt ang. I mawngah pawh chiu ngai se midangin i mawng an hmu ve dawn miah lo tihna a nia" Ahmingin a tih chuan Nu Biaki chuan mak a lo tih hmel khawp mai a, ka deuh hau hian min en a, keipawn a sawi tum tak ka hrethiam bik lo. 

"Doctor bialpa a nei a ni mai a, ngati nge mawng i rawn sawi tel daih?" a ti he haw a, Ahmingi chuan nihawichi chip malh malh chungin "Aww..mawng dawh a ngaih ţhin hi. Hmanah pawh ka pum a na vak a, ka mawngah min chiu alawm. Khatiang thilah khan a nia ka tih, mi hrang hma a mawng hlim kung kung chu hmeichhe tan ngat phei chuan a nuam lova, U Zotei chuan hmun leh hmunah a dawh mai thei dawn a" a ti zat zat a, a thusawi hre phak ho chu an lo nui tet tet hlawm a, kei ka lo zak chem chem thung. 

"Kan khua a doctor rawn awm te hi an luck thei tehmai a nia aw, hmelchhe ve deuh pawn kan khaw nula hmelţha ţha an thur nalh nalh thei. Hmelţha lem lo pawh an nihna hian a ti hmelţha ka ti mai" a tih hnuah "Pawisa" a ti zawi sap a, Nu Biaki nui ring lutuk chu thlanglam a miten an la hau zui, Ahmingi hi tute pawn kan hlimpui viau zel. 

Chhun inkan hun velah Ruattei a lo thleng a, zingkara lokal a tum emaw ka tia, tihfel tur a ngah deuh vangin chhunah a lokal thei hram. A bawr angreng viau lehnghal a, hmun hla deuh a zin a cham vang vang tur a ang ber. 

"Awm rei i va tum awm ve" ka tih chuan "Rei maithei. Min lo tlawh zeuh zeuh rawh u aw...awii sawnu saw ka ţhiannu ţhin kha a ni chiang lutuk. Sikul khatah kan lut dun ţhin" a ti zat zat a, nurse kal kual vel chu a kawk zeuh bawk a, "Ka awmpui ve thei lutuk ang" min rawn en chung meuhin a ti leh a, thiamna lamah chuan a ute ho aiin a laktlak loh a, rilru ţhat lamah tuman an tluk lo thung. 

"Engin nge i lokal?" ka nu'n a lo ti ve bawk a, a cher luatah a mit khur te a thuk dâk a, a landan chu a hlauhawm lek lek tawh zawk. 

"Scooty ka lo keng" tih pahin chahbi a lek kang zeuh a, haw mai thei turin ka lo insiam ve mawlh mawlh a, Bawiha pawh Siampuii bulah a awm a, min lo nghakhlel tawh viau ang. 

"U Zotei chu i haw daih dawn bik a" Ahmingin a lo ti a, Nu Biaki nen chuan min ui der ve nasa mai.

"Ka lokal leh vat ang" ka tih te chuan an han ner vel a, inthurual ang hrimin min melh pah ralh a, Ruattei chu an be ngam mai rih lo bawk. 

"Ka nau hi a awm rih dawn a, zana nihawichi in ei hunah lo pe ve ţhin ru aw. Nu Biak chawhmeh zawrhna pawh a la hre lo ang i hruai kual ve char char a ngai a mai" fiamthu a ka tih hnuah Ruattei zawk chuan a be hmasa ve ve a, an ţawng duh hlawm barh barh bawk a an inkawm nel thuai ang. 

Ka haw tur chu Ruattein min thlah a, "Engati nge riah pui i tum ţalh a? I buai dawn tehreng nen a inthlahrunawm e" ka ti vang vang a. 

"Ka nu hi i tan a pawimawh ang bawkin ka tan pawh a pawimawh alawm. Ţhenkhat chuan nuhrawn te hi en hran kan tum nghal ţhin a, sual viau turah te kan dah ringawt zel a, ţhatna a midang hneh hi kan tum miah lo niin ka hre ţhin" a ti dam thlap a, muangchangin kan chhuk thla dun a, khua pawh a lum lehpek khawp mai. 

"Ka pa nen an inneih dan chu engpawh nise ka nu a ni tawh a, anmahni vangin ka nu kha a lo na ţhin a nih pawhin thil kal tawh a nia, tuna ka nu hian thil ţha tam tak min tihsak ve tho a, lehkha ka thiam loh vanga hrehawm ka tih ngawih ngawih ţhin laite khan ka in ngaihtuah ngut ngut loh nan la phiar te min zirtir a, kawr leh mawza leh lukhum thlengin min phiar sak ţhin bawk a" a ti leh a, nunhlui chhui let ni awm takin a awm a, a nui var var reng bawk a, ani hi chu hmuh a nuam ţhin takzet a ni. 

"Ka uten an ngaina lo a nih pawn hrethiam rawh. Lung lohah la lo la, an tan chuan pawm a har dawn tih i hriat vek kha. Mahse keichuan ka ngaina lutuk. Kan awmdun nasa in thil engkim deuhthaw kan ti dun ţhin a, ka nu tak tak nen khan keimahah danglamna an awm lo ka tih chuan dawt ka sawi a ni dawn a, mahse ka ngaina takzet, ka hmangaih a, nu atan ka pawm thlap. Ka nu a ni reng tawh dawn bawk a, chuvang chuan a damlo pawh buaipui ve ngei ngei ka duh" a ti mawlh mawlh a. 

Kan nunah hian mi chi hrang hrang an lo lut ţhin a, kan phalna la lova lo lut an awm laiin kan pawh fal bik te hi chu phalna thlap a kan lakluh an ni duh chawk a, ka hringnun thawnthu ka ziah lai mek a Ruattei ka ziak lang tel ve hi ka thil tih fuh ber te zinga mi a ni ngei ang. A tawp dan tur ka hre lova, ziah zel dan tur pawh ka la hre thei chuang lo. A kal tluang dawn viau emaw kan tih laiin a kawi thut zel a, a mam ţha viau dawn emaw tih laiin a bumboh lai a lo awm leh ţhin. Ruattei erawh hi chu a ţhatna hian a kalsan ve theih ka ring lova, tun ang reng hi a nih ka beisei tlat a ni.

Bus in civil hospital thleng ka kal a, bus a tawite ka kal leh hnuah kan veng hlui chu ka thleng a, ke a in thlen a harsat tawh dawn chuan loh vangin taxi ka hmang buai duh lo. Kein chak deuhin ka kal a, ka awm ve laia ka hmuh ve fo ţhinte pawh ka hmu pheuh pheuh a, kan in hlui ka hnaih tawh hle a ni. 

Gate a ka lut tur te chu ka kal hmasakber ni ang chiah khan ka hreh a, hun liam tawh a rawn inher lum leh bawk a, Hmangaihsanga nen a kan inhmuh dan leh dam ţha pangai taka ka nu ka hmuh ni te kha mitthlaah khami ni ang chiah khan a la lang thei a, kan ţawngkam leh thusawi zawng zawngte nen, ka hriatna a a rawn luh chak dan te phei chu khawl ang mai a ni, vawilehkhatah a indawt danin a rawn lut tup tup a, khami niah khan ka let leh ni maiin ka hria. 

Kawngkhar an khar loh avangin door bell pawh hmet buai lovin kawngkaah ka pen lut a, sitting room a reh ţhap a, choka ah hlim nui thawm a awm thung.

Chu lam pan chuan ka phei a, Siampuii leh U Remremi ten Bawiha an lo chhaih nui nasa mai. Min han hmu chiah phei chu an ri hlut a, awm kan tlem na a kan thawm chu ţha tak a ni ringawt. 

"Vawiin chu U Hmangaihsanga a buai dawn aniang hma deuhah a chhuak daih a, i lokal ni tak a ni bawk sia, ka ngei reuh tak tak a ni" Siampuii chuan a ti bai bai a, U Remremi thung chuan min la be leh miah lova, a lai put put a, damdawiina an lokal ni pawh khan hetiang hian a awm tawh. Kan inhmu khat bawk em a ni.

"Ka lo nghak ang" ka tih chuan Siampuii a nui rah rah a, a mitmeng te thleng chuan min chhaihin ka hria.

"U Zamtei pawh inah a awm" a tih chuan tlemin ka tim deuh a, fel viau mah se Neihkimi thu thuin a awm a, an lo infuih nasat phei chuan min lawm hauh lo ang. 

"Hlau duh miah suh aw. Bawiha phei chu a lawm ve tehmai a nia. U Neihkimi pawh a hrilh kher lovang" tih pahin thei tui min pe a, ka fapa chuan malchung a chuh leh tlat tawh. 

"Nizanah Ruattei nen U Hmangaihsanga kan fiam a, lo haw lo la maw, nuthlawi ngaihzawn chuan in ti ti hlekin naupang chanchin sawi tel a ngai zel mai ang kan ti vel a" a ti a, ka nui hmel chu a hmuh ka hlau khawp mai. 

An lo chhaih vang lek a nih dawn chu Bawiha chanchin ka zawh khan a nuih a zat em em ni. 

"I lokal elo?" Zamtei ngei mai chu a lo lut zan zan mai. A aw a tham chhal a, a chhuak ţha hleithei lo.

"Ka hritlang a" khuh khak khak pah a a tih hnuah "Ka nu chu eng nge a an a?" a ti zui zat a, kawrlum phiar lianpui a hak chu a hma a pawt khawm vek a, vawt a tih hmel rapthlak lehnghal.

"A ngai reng a ni mai. I khua a sik a ni lo maw?" ka tih chuan "Aniang mah se damdawi mum ka dawlh thei lo. Uluk deuh a lem ka tum pawn ka dangah a bet tlat tho zel. Ka nu pawh ka lo la tlawh ve thei lo a nih hi" a ti a, a aw chhang nasa lutuk chuan a ţawng ngaihthlak a ti nuam lo vek. 

"A pawi reng reng lo. A dam veleh vat mai ang" ka ti a, pangai deuh a min bia chu mak ka ti vak hran lo, Neihkimi a awm lo miau a ni. 

"Hmangaihsanga pawh a lo let har lo ang. Hna a thawk mumal lo rei tawh a, sawiselna a dawn hma a tih tak tak a duh leh tawh aniang" a tih chuan mak ka ti ta deuh a, tui lum intur chawi a a chhuak chu ka enzui reng a, engin nge maw lo ti danglam hman le. 

"U Zamtei pawh hi U Neihkimi vang thoin a senior der a nih hi. A bialpa kha a duhpui lo tlat a, pasal a neih a tum tehreng nen an pawt ţhen lui alawm. I chanchin kan sawi apiangin 'mi in hmangaih na na na pawh ţhen kher a ţul lo e' a lo ti ve ziah" Siampuii bawk chuan a ti sar sar a, sana ka lo en daih thung a, ka nghah pa lah chu a reh vung vung mai bawk sia. 

"A bialpa chu eng mi nge ni a?" ka ti ţha leh vel a, "Mistiri a nia, thing mistiri. Kan vengah tho hian an awm a, ka nu nen in chhuah thlaah khan nupui a nei. U Zamtei tan chuan a hrehawm ve ngawt ang" a ti a, chu chuan a lo ti danglam ve deuh pawh a ni maithei a sin. A khawngaihthlak reuh khawp mai. 

Haw san mai ka tum thut thut tawh hnuah a lo haw ve hram a, Hmangaihsanga hi smart deuh a a inchei awm ka la hre lo reng reng. Tshirt leh denim a ngaina a, sneakers a bun nasa bawk. 

Siampuii thei tui thlit mek chu nghakin ka bulah a lo ţhu a, a perfume rimtui tak pawh ka hre leh thei tawh. 

"I lo thlenna a rei tawh em?" pangai taka a tih chuan "Rei ve tawh tho" ka ti a, a awmdan a danglam ve miah loh laiin keichuan mawlh tu ka nei leh tawh. Neihkimi a lo haw ve nghal mai ang tih te ka hlau. 

"Tum aiin ka rei a" inthiam loh hmel taka a tih te chuan ka lo nui tawi tak a, choka pawn lam thawm ka ngaichang pah ran bawk. 

Thei tui a inzawh chuan "Hlauh nei i ang emai lokal teh" min tawk zeuh pah hian a ti a, "Lumum-a kha chu Siampuiin lo hrai puar rawh se" a ti tel kher bawk a, Siampuii lah a lo phur. Eitur phawrhin ka fapa chu a thlem nghal chat a,ani lahin a lo ban ve vat bawk a, loh theih loh a keimaha ka zui a ngaih phah. 

Ka ţhutna aţanga ka thawh rual deuhthaw chuan ka kawngah min lo kuah nghal salh a, "Nizan i mu ţha em?" a ti a, muk deuh a min en vang mai mai te chuan ka'n lai deuh tlat pek a. 

"Mu ţha e...ngati nge?" ka ti ha a, "I chauh hmel" tih pahin ka khawsik en tum ni awm takin a chalin ka chal a rawn nawr si a, a va han dangdai thei tak. Siampuii te an awm ve lehnghal.

Hnunglam ka hawi vut a, vanneihthlak takin min ngaihsak lo hlauh. Thlang lam kawngkhar aţanga chhuak an lo tum mek a, ball an keng bawk. 

Inchung pan a kan chhoh lai te chuan nuam tih lohna ka nei tlat a, he inchhunga hahdamna awm loh zia leh min lawm hlawl lo tu nen kan inhmu thut thei tih ka hriat rukna chuan nuam tih lohna a siam a, ka pindan ţhin ka hmuh te chuan ka ni deuh huih a, thil tlem te chauh ka ngai a, ka pahrawn mah nise ka pa kha rilruah a awm veng veng mai.

A pindan ah min hruai lut a, sofa pakhat a lo inhung tawh a, thil dang erawh danglam a la awm lo. Sofa a ţhut ve mai ka tum chu a mal chungah min lo pawt ţhu a, ka koki ah a khabe a nghat nghal zat a, zang min ti ngawt ang, tunlai phei chu ka cher zual lehnghal. 

"I awmna min hrilh phal tawh em?" tih pahin ka khabe ruh kual chu a hmuiin a rawn nawr zauh a, ngaihzawng nei ngai lo ang maiin ka hmai a sa hat hat a, ka inphawrh ve aţang khan ka danglam a, infawp ve zan tawh mah ila ka zak thar thut a ni ber. 

"Aih i lokal palh ang" ka tih chuan "Kal dawn e" a ti nghat a, hei hi alawm ka hlauh chu.

"A chi loh..ţul ka tih hunah chuan ka hrilh em em ang che. Min nawr miah lo la, ka nu hmuh duh loh zingah i tel a, ka thlem phawt ang a, muangchangin aw" ka thiam dan tawkin ka thlem ve. Ţawngkam ka thiam loh vang chu nge a nui nghawr dawt a, ka beng zawnah a thaw lum ham ham a, dek haw chi ka nih avangin ka beng hnuai te chu a za deuh uaihin ka hria. Amah vang ngawr ngawr chu a ni pawn ka hre lo. Mipa vanga zat deuh uaih hi chuan a ni lo lam a kawk tlat alawm. Ka ngaihtuahna mai mai chu a!

Lu ka thing nawk a, ka samin a hmai a la vaw zui a, nui hawk chungin a eu deuh a, "I inthing khaw lo ang e" nuihza insum zet hian a lo ti kher a, ka lai lutuk chu za lo deuhin ka ţhen sak a, ka ngaihtuahna phei chu hria se min chhaih nasa lehzual viau ang. 

"Eng nge i ngaihtuah?" tih pahin min kuahna chu a ti nghet salh a, "Engvakmah" ka ti hmak a, ka inthing tawh bik em lo e. 

"I chanchin sawi teh" tih pahin ka bek a rawn tauh dat a, ka nu hnen aţangin engmah an hre ngai lo em maw ni. 

A malchung aţang chuan chhukin sofa ah chuan ka ţhu ve a, nghen rem deuh turin a lo ţhu ţha ve nghal zat a. Pheikhawk ka phelh te te a, ke hlangin amah ngheng chuan ka ţhu a. 

"Ka nu leh pa diktak te chu an thi tawh a" ka ti a, ka awm a min kuah lai chuan ka lo ngheng ţha ve sauh a.

Ka chanchin ka hrilh thuak thuak hnu chuan "Keichu thingtlang damdawiin pawh awm lohna hmunah ka piang a,ka pu te tlawh a ka nu zin ţumin a nia, kan ţhenawmnu in min chhar a, ka pa ţhianpa fapa, U Remremi te ang chi hian ka hming a sa a" tih pahin a nui hawk a, mak ka lo ti viau mai.

"Aizawl ah in piang vek lo maw?" ka tih chuan "Zami leh Ruattei chiah" a ti a, "Kan hausa ngai hleinem" a ti leh sup bawk a. 

"Ka pa kha mi dik a nia, kan unau kan rual a, ka nu chhungte lam leh ka pa chhungte lam kha ka pa kut vek an nia" a ti thum ve dût dût a, "Mahse ka pa chu doctor alawm" ka lo tih chuan "Diktak a ti mi leh chhungte chawm tur ngah bawk si tan chuan hausak vak a har ang" a ti a, ka pawm zawng tak a ni. 

"In rethei chhe chuang lovang" ka tih laiin "I pasal hlui chiah kha a ni em?" a ti deuh thut a, min ti hamhaih lek lek a ni. 

"Eng chu maw?" ka lo tih chuan "Ngaihzawng mawle" a ti a, ka hrethiam ta chiah bawk. 

"Aw ngaihzawng dang ka nei lo" zak deuh chunga ka tih chuan "A vanduai hle mai" a ti hap a, a ngaihna hre lo zet a "Eng nge a vanduai nachhan?" ka tih leh chuan "I ţhatna a hmu thiam lo tawp a nih chu" a ti nghut a, hnunglam aţangin ka darah a khabe a rawn nghat leh a. 

"Aa...nupa nih hnu hian inhne mai a awl aniang, diktak chuan nupa inţhen leh te hi inhmangaih taka innei vek alawm an nih. Hmangaihna hian a daih rei vak lo ţhin aniang" ka ti niah niah a, "Sawifiah ngaihna ka hre bik lo" a lo ti ve sup a, amah pawh en lovin nui hak chungin a sam ka han tuai sak zauh a. 

"Hmangaihna hi chu a ril em a hrilhfiah vak theih pawh a ni lo. Hmangaihna kan thlir dan a inang lo ţhum bawk sia, chuvang chuan Pathian ruat diktak lo ho chu an inţhen leh mai zelah ka ngai tawp" ka tih chuan "In hne chang chu a awm thei ang. Mahse inţhen kher lo a tihdan pawh a awm ka ring" a ti a, nupui la nei chhin miah lo tan chuan hriatthiam a har khawp ang. 

Ka tlai lutuk dawn takngial a hriain haw ka duh thu ka sawi chhuak ta nge nge a, kan in phei chu a lun leh tawh viau ang.

"I phal chin thleng ka lo thlah ang che" a tih chuan ka hnial duh lova, ka him tih a hria a, ka phal lo chung chu lokal luih a tum lo tawp ang. Hei pawh hi ka duh nachhan pakhat a ni, mimal thil a ngai pawimawh a, a nupui ka nih miau loh avangin min nawr lui chung chung ngai lo. Luhlul viau mah se a dawhtheiin a inthunun thei a, buaina tam tak a pumpelh phah ţhin ang ka ring. 

"Min thlah chak emai ka phal sak ang che. Tun aţang chuan ka driver ni tawh mai la a ţha ang" ka tih chuan "Engtin maw?" tih pahin ka nakah na vak lovin a ţham a, ka er zawk ni maiin ka hria. 

"A za alawm" ka ti bak hlak a, kawngkhar thlen dawn a ruaiah a lam hawiin ka inher leh a, thil dang daih sawi ka tum laiin a hmui lum ham ham chuan ka hmui a rawn nawr a, a ban hrawl zet chuan min kuah bet nghal hmiah bawk a, duhthawh zet a min fawh takah chuan inthladul riai riaiin ka fawp let ve a, rei ngial min fawh hnuah keimah zawk ka inla hrang a, sawi tur a vang duh kher mai. 

"Kal ang" tih leh inher ka rual a, a nui hawk thawm te chu ka ngaihven duh tawh ţhak lo. 

"Ruattei a be tlang thei lo che a" Siampuiin a lo tih chuan keimah ka ti hman a, mahse Hmangaihsanga zawk a en reng thung a, a sawi tum chu ka lo ngaichang ve ran tho. 

"Mutbu ka lo keng hnem lutuk a, thawmhnaw dahna a khat hneh bawk sia, a inthlahrung emai zanah Hmangaihsangan lo la let ţhen mai rawh se a ti" a tih chuan a lo phun hluk a, a inkeng hnem ka ti reng a ni. Ka haw hma khan en fel vek se chu ka hawn nghal thei ni mai tur a nia, keilahin hrilh nachang ka lo hre lehpek tawh lo. 

"Thu a awih lo a nih kha" a ti bul hmuk a, helmet a lak chuan mak ti deuhin ka lo en ve reng bawk. 

"I kal thei dawn em? Lut chhuak an awm ve reng a, midangin thawmhnaw leh mutbu vel an dah ve duh a ring a, a keng hnem bik lutuk kha nuam lo a tia" Siampuii chuan a lo ti leh a, "Thei mai ang" a ti nghat a, falkawn a kal vang vang a chak loh zia chu a hmel en ringawt pawhin a hriat theih alawm le. 

"Ka lokal pui ang che" ka lo ti vat a, diktak chuan min buaipui nasa lutuk a ka inthlahrung. Bawiha chu ka hruai thei mai ang, a chhungah kan lut dawn tihna pawh a ni lo a, an tello in kal thei phei ila chu duhthusam a nia, bungraw hawn a ngai kher a, motor lo chuan a buaithlak dawn bawk sia. 

"A ngai lo" Hmangaihsangan a tih rualin Siampuii paw'n "Bawiha hi i haw pui dawn sia, zana hruai chhuah leh a chi loh ang. A hritlang ve reuh teh mai a nia, falkawn a i kalpui chuan a zual mai mai zawk ang" a lo ti ve a, an fel lutuk avang hian inthlahrun a na duh lehzual. 

"Kal phawt ang Bawiha a hritlan phei chuan Falkawn chu lokal ve lo mai rawh" a ti a, helmet pawh chu a dah leh a. 

"Ngati nge i dah leh daih?" ka lo tih chuan "Car in ka thlah ang che u. Traffic a jam dawn a, bike in kan kal rei lo zawk ang ka ti mawle. Mahse a khu dawn" a ti leh ang lawi a, ka fapa a ngaihtuah vang a nih ka ring. Lawm ve chiam ngai lo mah se a ngaihsak lutuk tho. 

Pawn lamah motor thawm a awm a, ka lo ip chawi a, Neihkimi a nih loh chuan a mak ngawt ang. 

Hmangaihsanga lah chuan kal a rawt leh a, hnial theih ni hek lo le; kan inzui chhuak a, car kawngkhar lo nam khar mekin Neihkimi chuan kan thawm hriain kan lam a lo hawi a, a sam a ti buang thang a, a mithmul a ki bawk nen, a landan thleng chuan ka hmu misualnu vek tawh.

CONT...