KA HRINGNUN THAWNTHU-21

KA HRINGNUN THAWNTHU-21

Kan mit a intawn rual chuan hlauhna avangin ka thinphu a rang zawih zawih a,a melh a nain a mitmeng a lian kelh kawlh bawk si, a ling hlarin ka hmu lehnghal a, kut min thlak mai hreh lo hmel a pu niin ka hre ber. 

"Khawiah nge i kal dawn?" Hmangaihsanga zawk chu a en ve thung a, a awki pawh a chang khel khawl viau mai.

"Zotei te nufa hi kan thlah lawk" tiin pangai deuhin a chhang a, hlau hmel leh nuam lo tihna nei hmel pawh a pu ve hran lo. 

"Haw ngei ngei in ngai em ni?" a tih chuan chhan nachang ka hre lawk lo a, ţha deuha min be kher chuan ngaih a ti ţha lo rum rum zawk.

Ka ngawih deuh ren rawn hnuah "Aw ngai e" ka ti sap a, a bu nghat a, min kalpelh nghal mai ka rin laiin "Inkawm lawk ang. Ka be tlang thei bawk si lo che a, sawi tur a tam" a ti nghat nghat a, ka kut lehlamin Bawiha ka pawm a, lehlam chuan hriat loh karin Hmangaihsanga ka lo vuan reng tawh. Hetiang em em a Neihkimi ka hlau hi mak ka inti zawk. Kan chhiat lehzual theihna tur thil a tih ka hlau a ni ber. 

"Tunah thlah ka tum" Hmangaihsanga chuan ka chhan ai min lo chhan sak a, beidawn tum loh hmel zet hian "Ka hmu alawm. Mahse a ţha lo lai siamţhatna hun kan nei tur a ni lo'm ni? Zotei hi ka hmu duh" a ti a, mawi deuhin a nui zui a, a tho â thut emaw tih mai tur a ni. 

"Lo lut rawh aw Zote, reilote bak a ni lo ang. Be thei che ila chu tum loh deuha kan inhmuh hun kher ka nghak lovang. Siamţhat theih chin chin siamţhat tum teh ang" a ti hlawi hlawi a, Sangzuala nu nen inang ka ti tial tial. 

A lut nghal daih mai bawk si a, tihngaihna a vang duh khawp mai.

"Lut rawh" tih sup paha Hmangaihsangan Bawiha a lak chuan "Neihkimi hi chuan danger sign awrh law law se ka ti e" ka ti nang nang a, a thutak tehlul nen, ka thusawi chuan a nuih a ti za viau mai. 

"A sual chu ka ti miah lo mah se mahni a hmuh chu ka hreh. Siamţhat ngai a awm awm pawh ka hre lo. Ti hian min thlah lui tho mai rawh" ka tih chuan ka kawngah min rawn kuah a, "I hlau viau a nih phei chuan hmachhawn rawh. I hneh thei ang" a lo ti a, a mitmeng te chu a finhmel bik riauin ka hria a, a hmelah inrintawkna a lang bawk. Mipa tam tak chu nise an kalpui ang a, an hmachhawn ve ang a, an bialnu te hmaah an ding tlat maithei. 

Mahse keichu ka hlauh zia hrereng chungin keimaha hmachhawn turin min ti tho a, ka hlauh zawng tak hi mahni a hneh turin min duh a, mittuiin awmzia a nei dawn lo tih chiang takin ka hre tel a, min duat viau chung hian min ngaihtuah miah lo anga awm chang te a nei ţhin a, hmeichhe dang pawh ni se an zuau lui ţalh thei bik lo ang. 

"Hmu tawh lo tur chein min ti ta se" ka ti leh te te a, fiah ka chak deuh tlat vang a ni. 

"Kan inkar thuah chuan tih theih engmah a nei lo. Chulam chu ka kutah dah la, in pahnih inkar chingfel rawh u. Zah lo kher lovin hlau bik lo la, chu chu i mamawh" min ti a, indona hmun a lut tur ang mai ka ni. Ka zam dan em em lah chu râl tam tak mahni chauh a bei tur angah ka inchan a, kan dinhmun chhiat bikna leh baihvai na zawng zawngte hi hmang ţangkaiin ţhil ţha lo deuh a ti leh ang tih ka hlau a ni. 

"I lo lut ve dawn lo maw?" ka tih leh chuan lu a thing a, a nui tel kher bawk. Ka huphurh zia hrereng a min nuih vel te chu thin a rim lek lek a ni. 

"Mipa dang chu nise min luhpui ngei ngei ang mawle" ka ti zeuh a, a mitmeng danglam zawk chu chiang takin ka hmu hman a, a lawm zawng ka sawi lo tawp mai. 

"Mipa dang ka nih loh hi" a ti bung nghut a, ka lo nui tawi tak ringawt a, "Pawnah ka awm a, a ti na lo ang che" a tih leh hnu chuan ka pen lut ve ta nge nge a. 

Choka luhna bulah kuangkuahin a lo ding a, min hmuh chuan a nui deuh seih a, a awmdan hi ka hrethiam lo tawp mai. A sual ang aiin a nui mawi reuh zek lehnghal a. 

"Siampui pawnah Hmangaihsanga leh Bawiha chiah an awm a, amah chauh chuan a awm tlei rei miah lovang. A tlaw ve ropui sia, va awmpui rawh" a ti zung zung a, Siampuii chuan ngaihtuah hmel takin min en a, nui paha lu ka buk khum zeuh hnuah muangchangin a chhuak a, Neihkimi nen chiah kan awm leh ta. 

"I nu eng nge a an?" a ti ve mial a, a ţhat thu ka hrilh hnu chuan "Lo ţhu ta che" nuihza aw tak hian a ti leh a, a ep chiahah ka ţhu a, a perfume rimtui tak chu a nam chem chem a, a hmel ka en ngam lo chuan a nghawng a khuavang pahnih a inzawna awm chu ka en ngawt ngawt ringawt a. 

"Diktak chuan ka rilru a dam thei lo" a ti deuh phawng a, a naute ka pawh buai vang a nih ka rin laiin "Ka nu kha damlo chungin a ţap muhil ţhak ţhak ţhin a, zan engzat nge chutiang chuan a awm sawi fak theih pawh a ni lo, ka chhiar seng lo hrim hrim. A rilru natna kha ka naute hriat a hlau a, Ruattei hian tlem chu a hre ve maithei mah se ka hriat ang zawng zawng hi ka nauten hre ve se la chuan i nu hi an ngaina thei bik lovang. A damlo hi buaipui an chak a, buaipui theih loh an hlau et et a, ka nu khan i nu leh ka pa vang hian eng ang chiaha nasa in nge a tawrh chiang takin hria se la chuan keimah ang hian an hawisak hmak ang" a ti khawl khawl a, dawhkan chunga ka kut dah chu nghet deuhin ka suih a, hriatchiah chak ka ngah a, ka zawt ngam lo thung. 

"I nu hian ka pa hi nupui nei lai a ni tih hre lo angin a awm maithei, chu chu ka naute ngaihdan pawh a ni. Mahse a hre lutuk tlat. Kan hospital ah ka nu kan admit a, Ruattei a awm reng hman lo. Ka pa kuta ka nu a awm chiah khan i nu hi a rawn inrawlh ve ţhin a, ngaihsak awm deuha ka nu buaipui chungin ka pa nen an inchhaih nui har har reng a, ka nu hian ţap chungin an awmdan min hrilh ţhin" a ti a, a sehchilh rap rap a, a thaw pawh a rang sawt khawp mai. 

"Ka dinhmunah hian ding ve ta la engtin nge i tih ang? I nu hi a ro chan ai i pe duh bik dawn em ni? A theih chen chen i thup bo duh ve tho ang chu. Ka nu na tuar hmaah in haw lo deuhin an awm dun ţhin a, i nu phei chuan cancer hlauhawm zia a sawi chamchi ţhin niin ka nu khan a sawi. Chemo vanga a sam tla te kha fiamthu nan a hmang ţhin a, hmeichhia hi sam neih loh vangin kan hmeichhiatna a bo tihna em ni? Kan unau hmuh laiin a inlan duh miah lova, U Remremi a lak tlak loh a, upa ber chan ka chan a ngai. Chuvang chuan ka nu khan engkim min hrilh ţhin a, a rilru a nat lutuk ţhin avangin a sawi ţha hleithei ngai lo. Sawi teh, nang ni ta la phuba ringawt i ngaihtuah ve ţhin angem? I nu ka tihdan avang hian min hua a, ka nu a tih ţhin dan nen a khaikhin chian nep tak a ni" a ti hlak hlak a, a mitah chuan huatna bak hmuh tur a awm lo. 

"Engatinge i naute i hrilh mai loh. An upa tawh a, an hrethiam tho ang chu" ka lo ti ve thung a. 

"Upatna hian nu kan mamawhna a hnawt bo thei chuang tlat lo a ni. Hrethiam rual chu an ni teh meuh mai mah se nu an mamawhna a nep chuang lo. Ka nu aiawh turin a lo lut a, Hmangaihsanga hian a pawm thei lo mah se i nu hian ţhatna in a hneh thei tlat. Nuhrawn nei fel an in tia, an hlimpui em em a, ka naute hi an rilru a chhe hleinem. Mahse keichu i nu ţhat derna khan min hneh ve thei lo, inhneh tir ka tum lo hrim hrim zawk. Tuna na a tuar pawh hi hmana a tihsual kha a chungah a let ve ah ka ngai. Ka pa pawh a thih hma em hi" a tih chuan "Khawngaihna an tlachham lutuk ngai lo. Ka pa kha i lainat miah lo em ni?" ka lo ti a, za lo deuhin a nui hul hak a, dawhkana a bag dah chu pawt hnaiin a hawng a, phone phawrh chhuakin a tuai zui mawlh mawlh a. 

"Hei hi en rawh" tih pahin ka hmaah phone a rawn dah a, keipawn ka lo bih vat a, Neihkimi chu naupang tam tham deuhte nen ding khawm laihin an nui sang hlawm a, a sam rawng en chuan tun hnai mai a an thlalak a nih duh hmel viau. 

"Ka nu kha khawngaihna leh lainatna ngah tak a nia, mi rethei chhungkua a piang a ni bawk. Retheih awmzia hriain a ngaihsak a, a thih dawn thleng khan a tihdan entawn turin min hrilh ţhin. Fahrah te hmangaih turin min zirtir a, tun thleng hian fahran rûn hi ka hun hman tamna ber a la ni ngei ang. Nang pawh ka khawngaih ţhin che, Bawiha phei chu ka hmangaih lutuk" a tih chuan ka hawi chhuak rang kher mai. 

Mak ti deuhin ka melh tlawk tlawk a, min khawngaih si engatinge hrehawm deuh a min siam kher le tih chu ka zawhna a ni. Fahrah te a ţanpui ţhin hi a nauten an hre miah lo em ni tih te, zawhna ka ngah khawp mai. 

"An hria em?" ka ti chhuak sep a, hrethiam deuhin lu a thing a.

"Ka zah" a tih chuan tum loh deuhin ka nui chhuak palh a, ka insum leh vat thung. 

"Sikul ka kai ve ţhin lai hian mi pakhat ka ţanpui a, min haw tuten inti fel min tia, zirtirtute hnen aţanga fakna dawn duh vang te an tia, khata ţang khan ka sim hmak. Mi kan ţanpui chuan tuman hre lo mah se rilru a hlim tho alawm ka ti mai a, naupanlaia thil thleng hian min lo nghawng rei thei khawp a, ka naute takngial pawh hian engmah an hre lo. A hre tu awmchhun chu ka ţhianţha ber kha a ni mai, ka nu kha" a ti a, Neihkimin pangai taka thil tam tak min hrilh ve te chu mak ka tiin eng emaw tum ruk a nei a nih te ka ring rum rum a, ni lo se chu a naute pawn an hriat loh thil min hrilh hauh lo ang.

"Hmangaihsanga hian awm hran a duh thu a sawi reng a, chu thil chu a thlen ka remti lo" a ti a, a aw leh hmelah te chuan nelawmna pakhatmah a awm leh tawh lo. 

"In nufa hian lo lut leh mai rawh u" a ti leh a, ka nu a sawi tel ve tawh lo. A haw takzet tih ka hrechiang zual sauh bawk. 

"Keimah vanga awm hran tumah i ngai a ni maw?" ka tih chuan "A ni alawm" a ti a, kan in en ran a, nichin lawka ti ti ve luam kha a ang tawh lo tak tak. 

"Kan lo lut thei tawh lovang" ka ti dam thlap a, pawi ti hmel pawh a pu chuang lo, a ruk tak chuan pawi a ti ve tho maithei bawk a ka hre tawh bik lo le. 

"Chulam chu in thu thu ni sela, mahse chhuak lo turin i lo hrilh ve dawn nia. Nangmahah a bet laklawh tawh a, i sawi chuan a awih ngei ngei ang" a tih chuan "Ka nu i huat vangin engati nge min huat tel ve kher a?" ka lo ti thung a, a nihna diktak ka hriat hnu phei chuan ka dem hauh lo, hriatchian zel ka chak vang zawk a ni. 

"Ka haw lo che ka tih tawh kha. I nu tih hrehawm nan ţhat ka chhuah duh lo zawk a nih kha" a ti a, "Ka chhuah hmaa Zamtei thawmhnaw rawn dah te kha i tirh vang a ni hial lo maw?" nuih hak pah a ka tih chuan "Ni lo e...ka haw lo che u a, ka pui lo bawk che u" a ti hmak a, a ţhutdan siamremin kut a kuangkuah leh than tawh a, a phone erawh ka hmaah a la awm reng thung. 

"Ti nge Hmangaihsanga chhuah chu i ui viau a?" ka ti leh a, thil tam tak min hrilh tawh a, a zavaia hriat law law ka duh a ni. 

"Hei hi a in alawm. Damchhunga a in tur a nia, keini chu pasal neiin kan insawn chhuah a la ngai dawn a, mahse a ni chu heta a awm reng a ngai. A naupanlai chuan ka kalna apiangah min zui ţhin a, sikul kan kal rual a, kan haw dun leh a, a kal hrang duh ngai lo. Tunah chuan engkim a danglam tawh a nih hi" a ti halh a, a hmel leh a aw ah chuan tawrhna a lang ve tawh a, sawi lang duh bik lo mah ila khawngaihna ka nei ve tawh. A dinhmunah hian ding ve ta ila a tih ang chiah hian ka ti ve ngei ang. Ka nu thiam loh zia ka hriatchian tawh em avangin ka haw ngam tawh lo bawk a, tihsual nei lo se chu ka nu hian engkim min hrilh vek tawh ang. Dawt min hrilh ngai lova, ka hnen a dawt sawi a duh loh vanga ngawih chuh a nih ka ring. 

"Ka lo hrilh dawn nia, i nu tawrhna chu pawi ka ti khawp mai" ka tih chuan "Ka la sawi kim lo zawk mawle" a lo ti vat a, Hmangaihsanga chhuah a hlauh luatah a thuruk a phawrh fai ta leng a, ka ngaihdan a inthlak hlawk bawk. 

Mihring hi pawnlam dan lan ringawt a inteh tur kan lo ni miah lo a nih hi. Misual leh mize ţha lo deuh nei ni a kan ngaihte hian hun harsa tak an lo paltlang ve tawh ţhin tho a, chu chu Neihkimi hian a ti chiang awm e. A thinlungah huatna in zung a kaih laklawh a, ka nu leh kei min tih hrehawm hian a nu phuba la ah a in ngai a ni. Hei hi hringnun aţanga ka zir chhuah a ni. Nitin hian zirlai thar a inchhawp chhuak a, vawiin a ka zirchhuah chu ţha ka ti khawp mai. 

"U Neihkim, ka pa kha i haw ve em?" ka tih chuan muang deuh a mit khap pahin a bu zeuh a, "I nu ka huat ang chiahin. Thiam zawk an awm lo. An thiam loh dan a inchen chiah. Tualthattu hialah a nia ka ngaih ni" a ti a, a ngaihdan chu a dik khawp mai. Miin mi pa a ngaihzawn hian hmeichhia ringawt dem tur an ni lo, mipa in duh lo tlat ta se hmeichhe tan ngaihzawn luih theih a ni bik tlat lo a ni. 

"I unaute hriat ve miah loh thil tam tak min hrilh phal a a lawmawm" nui var var a ka tih chuan "Chhungkaw tan chauh mawle" a lo ti vat a.

"Ka nu khan kan unau kan inhlat a duh dawn miah lova, engkim i hriat vek loh chuan ka nau hi chhuak lo turin i thlem thei nang. I nu nen a ka tihdan cheu hi ka nunrawn vang hrim hrim a ni lo tih hre tel la ka duh bawk a, ka nu thlarau ka ti lunghnur dawn lova, a hnung ka zui a ni tih hria la ka tih vangin fahrah in a ka thlalak pawh ka hmuh tir che. Thil tam tak i hre tawh a, chhuak lo tur a dan beh pawh i phur sawt ang chu tiraw?" beisei nei deuh hian a ti a,a thil tih hi a dik vek bik lova, ţhat lohna leh dik lohna tam tak a nei ngei ang mah se a nu tan chuan fanu ţha tak a ni ngei tih ka chiang khawp mai. A pa thuchah ngaipawimawh ang deuh a awm a, a nuţapa ngei Malsawmi nei tur a a nawr lui ţhin te kha a sual vang hrim hrimah ka ngai ţhin a, ka nu leh kei min tih hrehawm nan chauh a ti a ni thung. Chupawh a nu tawrhna kha tlawn lo se, a ti hrehawm tu te khan hrehawm tuar ve se a tih vang chauhin. 

"Engatinge midang i hriattir ve loh. Mahni a tawrh ngawt ngawt chu a hrehawm lo em ni?" ka ti a, keichu ni ila tu emaw ber hnenah ka thlen ngei ngei ang. 

"Kan nun a thil thleng te hi chipchiar deuh a hria an tam chuan kan kawng dal tu an tam mai mai. Hmangaihsanga hi ka nuţa neihchhun a nia, tunhma chuan ţhian kawm lovin min zui kawi reng ţhin. Mahse tunah chuan nangmah vanga in chhuahsan duhna hial a neih tawh hi. Vawiin a kan ţhianţhaber hi naktuka kan hmelma lian ber an ni thei a, chuvang chuan thuruk chu keimahniah a him ber" a ti a, a nu phuba chu a la zo ta alawm. A duh ang ngeiin ka nu'n na a tuar ve mek a, mahse a hlim phah angem le?

"I hlim em?" ka ti a, a tawpna takmeuh a ni. Hei lo chu eng thil mah ka zawh belh tawh lo ang.

"Phuba lakna hian hlimna famkim a keng tel lo. Ka duh ka hmu a, ka chhungkaw zinga mi pakhat chan thut thei dinhmunah ka ding thung" a ti a, a mangan ve hmel kher mai. 

"Ka hrethiam" ka ti sap a, puih ngei pawh ka tum a ni. Hmangaihsanga hi chhuak tura ka nawr lui a nih chuan Neihkimi ang tho hian ka hlim tak tak lovang a, ka chungah a let ve maithei bawk. 

He in ropui tak hi en ringawt chuan miin an awt viau maithei, a chhunga chen ve an chak ang a, an chhungkaw zinga mi nih chu an duhthusam a ni ţhin maithei bawk a, mahse he inchhungah hian hlimna a awm lo khawp mai. Tu hriatpui si lohin a buai ru a, awihawm loh khawpa rapthlak thil a thleng fo a, chhungkaw dangin an tawn ve miah loh tur leh sawi mah ila an awih chuang lo ang tih tur khawp a thil mak leh rapthlak a thleng fo mai. Kan chunga thleng ang chiah hi mi chhungkaw chungah a thleng ve tho maithei bawk a, ţawngthei ber kan tih te pawhin chhungkaw lam na na na hi chu an zep thei a, hei vang hian mi chhungkaw buaina hi kan hre ve lo ni maiin ka hria. 

Neihkimi hi ngaihsan deuh nachhan pakhat ka nei a, phuba chu a la ngei a, huaisen takin a hlim tak tak loh zia a pawm thlap a, tam tak chu nise an sawi lang duh hauh lo ang. Hmangaihsanga ang thoin mize tlang tak a nei ve ngei a ni. 

Kawngka aţanga ka chhuak chu pawn a awm te chuan min lo en uluk khawp mai a, Hmangaihsanga phei chuan ka mitmeng fing zet chuan ka mit a en ran a, natna a tel leh tel loh finfiah a tum ni berin ka hria. 

"A tlai ruai tawh a, min thlah nghal mai rawh" ka ti a, car pawh a lo inhung ran tawh alawm. 

Bawiha ka pawm hnuah kawngkhar ka pawt hawng a, a lo lock lo hlauh e. Car chhunga a rawn ţhut luh ve chuan "A ţha vek em?" a ti deuh sup a, nui chungin lu ka lo bu nghat a. 

"Ţha vek e...insawn chhuak suh aw" ka ti a, amah fiah duhna ka nei zui zat bawk. 

"Chu chu sawi turin a ti che ni maw?" nui hawk pah hian a ti a, "Ti lo e" ka ti a, a ban bul ka tuai zauh bawk a. 

Car a tawlh riai riai a, Neihkimi ringawt ka rilruah a awm. Khawngaihna ka nei tlat hi mak ka inti a, a thil tih te hi thungrulh duhna ka nei hauh lo. 

"Neihkimi hi haw ta ila mak i ti angem?" ka tih chuan "A mak hleinem" pangai tak hian a ti a, "I chhuahsan hreh tiraw?" ka ti zui zat a. 

"Kan in hi naupanlai aţanga kan awmna a nia" a ti ban charh a, a hreh tih chu chhuah a tum thu min hrilh hmasakber ni aţang khan ka hre daih tawh. 

"Mahse keimah vanga i chhuahsan a ngai alawm tiraw?" ka tih chuan min rawn melh zawk a, rang deuhin hma lam a hawi leh a  kawngpui chu a en ding hle bawk. 

"Ka u zirtirna ka pek duh vangin" a ti chang bul a, hringnun thawnthu hi vawikhat ziah sual chuan uluk deuh a ziah a ngai tawh ţhin a, mipa hi kan ziah sual nachhan pakhat an ni ţhin bawk. Chuvang chuan dik deuh a kan ziah theih nan kan fiah ve zeuh zeuh a ngai ţhin a ni. Mipa puitling leh chhungkaw hlut na hria apiangin hmeichhia an dawm thiam a, chhungkua an din pawhin a tlo bik ţhin. 

"Neihkimi vang hian inţhen duh ta thut ila?" ka tih chuan "Eng nge a lo hrilh che?" a ti nghut a, a lungawi lo ti tih nghal der mai. 

"Sawi chhawn leh chi kan sawi lo. Ka sawi leh vek chuan a ngaihdan a ni lo sauh dawn a sin. Nangpawh inthunun la, hre lo angin awm hmak rawh. A nih loh chuan tun ai hian kan hrehawm a ni mai" ka tih chuan a ngawi ngul a, a in ngaihtuah mûk hmel hle bawk. 

"I farnute hi i hmangaih em?" ka ti leh a, a hmangaih thu sawiin min chhang rang khawp mai. An unau inhmangaihna te hi fakawm ka tia, an nu leh pate hi fa enkawlah chuan an hlawhtling ka ti. Mahse chu chu ka ngaihdan chiah a nia, midang ngaihdan ka hre ve lem lo. 

"Lo nei ta che ila i ngaihsak tho angem?" ka ti a, a ruk chuan ka zak a, sual ka inti bawk. Neihkimi khan a nuţapa hi a ngai hlu em a, engangin nge a ngaih ve hriat ka chak tlat a ni. Tin, ka sawi tawh ang khan fiah chakna ka nei tel bawk. 

"Ngaihsak ang" tih ringawtin min chhang a, "Engati nge?" ka lo ti leh vat a. 

"Pa kan nei tawh lo a, an rin ber ka ni tawh" a ti nghut a, ka thusawi dan kal hmang vel chu a ngaihtheih loh hmel ţan viau a ni. 

"Kei aiin i ngaihsak dawn tihna mi?" ka ti a, hetiang hi ka zia tak tak ni ta se hrehawm ka ti ţhin ngawtin ka ring, reilote chiah lem ka la chang a, hrehawm ka ti lutuk tlat a ni. 

"I sawi thei na nge? Duhthlan dawn meuh chuan a harsa a ni maw?" ka ti leh a, kawngpui lun lai ka pel tawh bawk a kawngsir ah car a ti ding hrawk a, "Eng teh hrep nge i hriat a?" a ti zui ţhawt a, Bawiha veng hman hlauh lo ila chu a intauh na viau ang. 

"Zawhna ka zawt mai mai che a nih kha" pawisawi lo awm tak hian ka ti a, pawi ka sawi nasat zia ka hrechiang viau thung. 

"Chhan tlak pawh a nih nek loh kha" a ti hrawk a, car nghenchhan chu a ngheng dawt a, traffic an awm loh avangin kal lehnghal mai a tum hmel loh khawp mai. 

"I chhan theih ka ring lo sa hrim hrim a" ka tih chuan mitmeng hriatthiam harsa deuhin min en a, ka hlau ru viau bawk.

"Ka u khan eng nge a sawi?" a ti hluk a, "Kan inkar sawi a nei lo" tiin ţan ka khawh a, a sawi lo reng bawk a. 

"A ţhat chu. Thil ţul lo sawi sawi tawh suh" a ti hmuk a, ka la fiam kual chak chuan "Min chhang dawn lo tihna mi?" ka ti leh hram a  a thin a rim tawh hmel takzet a ni. 

"Ka ngaihsak ang che, a tawp thlengin ka thlahthlam lo ang che. Ka hmangaih che a, ka hmangaih reng che pawh ka ring. Mahse chhungkua kan tlem tawhin ka farnute lo chu thisen zawmpui ka nei tawh lo. Min pawh ţhen i tum a nih chuan hmeichhe ţha i ni lo tihna a ni mai. Ka kalsan ang che" thutak deuh a a tih duah chuan ka thin a phu dawt hman a, mahse ka lam a lo hawi a, ngunthluk fein min en bawk a, a fing tih ka hriatchian em vangin ka hlauthawng ru kher mai. 

"I huat zawng deuhin an awm em ni?" a ti a, a aw pawh a la nem hran lova, a mitmeng pawh a rum khawp mai. 

"Awm love, kan cheng ho tawh a, a nawm loh zia chu kan hre ve ve a" ka ti niah niah a, inthlahrung deuh anga awm ka tum a, ka nuih za tlat chu ka haw ru in min manchhuah phah ka hlau a sin aw. 

Engmah hrechiang ve ngai lo a ni bawk a "Engtin chiah maw an tih che a?" a ti a, min ngaihtuah ve deuh tawh aniang a meng tal tap a, lem ka chan duh tak tak chuan min manchhuak thei bik miah lo mawle. 

"Ngaihven miah lo thei la ka ti. Chutianga i ti thei a nih chuan ka awm hran pui daih hreh hauh lo che" ka ti a, a rilru buai hmel lutuk chu a khawngaihthlak zawk. 

"I pangai hunah kan sawi ţha dawn nia" a ti hmuk a, a ning tawh zawk a nih ka ring.

"Tunah pawh ka pangai tho alawm" ka tih chuan "I rilru a buai rih a nih kha" a ti a, min ngaihsak zui lova car tih nun leh mai a tum lai chuan "Ka rilru a buai lo. Min ngai hniam lutuk hi ka hne ve tawh a, diktak chuan min hmusit lutuk a, ka tan pawh an hnen a chen ve reng a nuam lo lawm. Min khawngaih ve lo mi?" a ban a vawn pahin pangchang aw tak hian ka ti a, a nur nang a, a nin tawh hmel viau tak tak mai. 

"Ka lo hau ang" a ti liam satliah a, awlsam te a min zui a tum loh hmel viau a ni. 

"Min hmangaih emaw ka tia" ka ti chuai raih a, hnuai lam ka bih ngar a, a hmel landan ka hmu thei tawh lo na a nin hmel deuh a a thaw hawk ri chu ka la hre thei.

"Khawi laiah nge ka dah dawn che u?" a ti nghut a, "Sawi phawt rawh" ka la ti ve ţalh a, a nin tawpah a sawi chiang mai ang. 

"Neihkimi lo chu an sual hran loh hi. Ka u chu ka lo hau ang a midang pawh ka lo hrilh ang. I rilru an tihnat chuan haw viau mahla ka dem lo ang che. Chuti ni lo a chhan awm lova i hua a nih chuan i thiam lo ve tho tihna a ni mai. Hmeichhe rual ve si ah chuan fel deuh a nia an nih" a tih chuan "Sawitur hre lo thei hle si i farnute thlavang hauh tur chuan i ţawng tam ve hle mai. Ţawng duah kher a ngai em ni? Min la dem zui a" ka ti nang nang a, a nui hawk a, min chhang tawh lo thung. 

"I thlang zawk tihna a ni maw?" ka tih leh chuan "Nangmah ang tho a fahrah kan nih hi. Pasal chhia ţha an la nei ve ang a, ka awm loh lehzel chuan an mawi thei lovang" a ti a, ngaihsak ang a awm ngai mang si lo an hriat lohah an thlavang a hauh leh hle sia, Ruattei chuan hria se a lawm ngawt ang. 

A lamah ka inher a, "I ngaihtuah ho emai. In hausa a, pawisa in a thuam mawi mai dawn alawm. I tel ve kher a ngai hleinem" ka tih chuan "Zit zet che hian" a ti hluk a, sawi tur a hre lo lutuk chuan min ti nui teuh khawo mai. 

"Zit zet lam a ni lo. Ka sawi dik tih i hria alawm. Pawisain a ti mawi vek ang, nu leh pa ai i awh kher a ngai lo. Fahrah rau rauah pawh kan dinhmun a inţhat hleih emai. Ka sawi ang chuan ti hle hle rawh. A nih loh chuan ka thusawi kha ka sut leh, ka duh leh lo che" ka tih hlak hlak lai chuan nui ruh ruh chungin min lo en a, a thinrim hmel zawng zawng kha a bo leh vek tawh. 

"Nang te hi" tih nghut pahin a kut phah hlai hlup chuan Bawiha hmai a hup thuk a, rawn kun hniamin ka hmui a fawp zauh a, hrilhhai zawk ka ni leh tho. 

"I tih theih hauh loh tur sawi suh" a ti a, a inrintawk hmel leh tawh viau lehnghal. 

"Ka ti thei alawm" ka tih chuan "I mizia a ni lo. Ka hrechiang che min bum thei lovang" a tih leh ngat phei chuan mak ka ti letling zawk a, ani anga min hrechiang tu hi ka la hre ngai hauh lo.

"Ka farnu te hi ensan tum mah ila i phal tawp nang" a tih deuh hlukah chuan ka nui chhuak ta nge nge a. 

"Min van man chhuak rang em em" ka ti a, ka nuih reng lai chuan ka hmui sir a rawn fawp leh zauh a, a hmai ka lo hup vat thung. 

"Kawngpui a nih hi" ka tih chuan "A reh vek" a lo ti ve nghal vat a, "Chupawh nise motor a lo tlan thut thei. Tak takin insawn chhuak suh aw, i sawi ang khan nu leh pa in nei tawh lova" ka tih leh chuan "Pa tih chiah ka sawi" tiin a lo ti dik a, a sawi dan lo deuh a ka sawi chhawng chu a lo ngaithei lo lehpek tawh a nih hi  

"Aw..pa in nei tawh lova, mipa awmchhun i nih bawk vang hian i mawhphurhna a sang a, U Remremi pawh i awm loh chuan enkawl a harsa ţalh dawn a, anni ang ho hi chuan an thu an duh ve sia, a hlauh ber i awm loh chuan midang chu engahmah a ngai lo ang a, a leng chhuak reng ang a, nau pai thei chi a la nih phei chuan nau a pai ang tih te a hlauhawm. Chuvang chuan i uap reng an ngai. Nakinah phei chuan pa ang riakah an la ngai ang che" ka ti mawlh mawlh a, a farnute a ngaihpawimawh em vang khan ka thin a rim hauh lo, ka lawm zawk. 

Hmangaihsanga anga mipa rilru nghet leh chhungkaw ngaihsak mi ka nei hi vannei ka inti a, min hrechiangin thil dang zawng aiin ka mize diktak a ngaihven hmasa a, mi pawn min sawichhia se ka mizia nen a hmeh bel a, ho te teah a thin a rim ve lovang. Min lo chik ţhin viau a ni tih ka hriat phah a, ka nei thei a nih ngat phei chuan ka hlim viau ang. Chhungkaw nghet tak a din thei dawn tih ka hria a ni. 

"Neihkimi hrem nan chauh ka tih tawh kha" a tih chuan "Kan inrem tawh" ka lo ti vat a, mak tih hmel deuh a min en chuan "Kan sawifel vek tawh. Kan inkarah inhriatthiam lohna a awm tawh lo a, nichin pawh khan ţhian inkawmngeih deuh angin kan inbia. Vengthawng tawh lo la, i rilru tibuai duh tawh suh. Duh duh huna ka lokal a phal tawh a, kan inkar phei chu a sawi buai lo mai ni lovin a sawi lang lo hrim hrim. Lo chhuak lo phawt la, kan awmzel dan tur chu hunin a la hrilh mai ang" ka ti seuh seuh a, a luhlul zia hriain a rilru hneh ngei ka tum a ni. A farnute a hmangaih em a, chhuahsan mah se a hlim chuang lovang. Neihkimi a hrem dawn lo, amah leh amah a inhrem mai mai zawk ang. 

Min sawi pui duh ta lova, a thutlukna zawt nghal mah ila "Ka hre lo" tih bakin min chhang lo. 

"Khua a thim tawh sia in inthleng ka thlah mai ang che" a tih chuan "A ngai lo" ka lo ti vat a, min en duh khawp mai.

"Rem ka la ti lo ka tih kha. Keimah ngeiin ka hruai theih hun che lo nghak tawp rawh" ka ti tlat a, min ngaihtuah viau mah se ka putea awmna veng thlen hma deuh taxi stand ah ka din tir a, "In ngaihtuahawm lo ang maw?" a ti leh hram a, min ngaihtuah lo tur a ka hrilh hnuah ka chhuk a, taxi hmasaber ah ka ţhu lut tharh a, driver hnen a kan kal duhna ka hrilh hnuah pawn lam ka thlir a, Hmangaihsanga car kan tlan pelh hnu chuan dak chhuak meuhin ka hawi let a, a ding char char a, ka hmu phak lo thuai a, min umzui lo tih ka hriat hnu chuan thaw a veng huai thei alawm mawle. 

Ka putea chu YMA ten an ensan a lo ni a, Thiangi nen an lo awm a, a dam loh hnu khan ka hmu leh ta miah lova, an lo rui khawp mai. YMA an huat zia an lo sawi pang pang a, an tello a an awm ve theih zia thlengin an sawi kai a, keichuan pawi ka lo ti viau thung. Ka nu dinhmun ka ngaihtuah thleng lo thei lo a, YMA ensan nih chu a rapthlak lutuk. Ka nu hian min lo boral san thut ta se YMA tello chuan kan awm thei lovang.

"Vengchhungah zu zawrh an phal lo a, i zuar lui zel a, i in an vawm chhe vek lo a i vannei zawk a nih hi. Warning an pek lai che pawn ka nu'n ngaihdam a dil lawm lawm a, zu zuar lovin inhlawhna tur te zawn ve mai a nia" ka ti hlaih hlaih a, min chhang lo. A chal dawmin a ţhu kun tlawk tlawk a, YMA tello a a awm theih loh zia a inhre ve a ni ngei ang. 

Thiangin pindanah min zui lutin lawmthu min hrilh mawlh mawlh a, "Denga a lokal a, kan thu inhmu lo chhoin kan inhnial a, chaw ei a tum laiin ka hau a, thinrim deuhin chaw tlangin min vawm a, cooker kha chhuatah a theh thla bawk a, kut min thlak zui a, thisen a chhuah takah kha chuan hlau hlawpin min tlanchhiatsan ta a nih kha" a ti zat zat a, a zu ken lai chu a tlak pawp a, a kâ hmangin a thaw zui hlawi hlawi a, a ner nasa hle bawk. 

"Denga hi chu a kut a ram ve ngawt mai" ka tih chuan "Chu chu lawm. Thinrimna tur a awm loh tehreng nen a thinrim thut a, hepa hi chu a hnawksak ve chiang alawm. Hmun tinah a awm bawk si, hmeichhe kutthlak a hreh bawk si lo. Police in man daih se ka ti a nia" a ti hlak hlak a, ka bulah a rawn ţhu hnawk a, in ve lo tan chuan zu rim chu a ninawm hma khawp mai. 

"Nau pai laiin zu i in a, tunah i hliam pawh a la dam fel lo ang tih tur i la nih laiin zu bawk i in leh a, nakinah i la buai ang e aw" ka ti a, lu a thing mai a.

Min ring ve tawh bawk a tiin "Tu fa nge a?" ka ti a, "Ka pahrawn" a ti mai a, sawi hrehawm pawh a tih hmel lem loh. 

"Ka nu hriat lohin min mutpui ziah a lawm. A tir kha chuan hrehawm ka tia ka inten a, tunah chuan ngaiah ka nei tawh" a ti a, a nui bâwk bâwk a, hetiang hi a nih hi kehchhia diktak chu. Na pawh a hre tawh lova, mu leh mal pawh a nei tawh lo. 

"I nu hrilh la" ka tih chuan "A rilru a na dawn lutuk a hmangaih ve bawk sia maw, min ngaihtuah suh, in in a ka riah hi chuan ka him lutuk a nia" a lo ti a, rei deuh ti ti pui ka chak a, mahse ka putea nen a an ang kha rei deuh chhung ka ngaithla tawh a, chhang let tawh rih lovin ka inthlak ta zawk a.

"Mate inleng i nei" ka putean a tih lauh takah chuan Thang Lma a nih ringin phur deuhin ka tho a, Bawiha chu "Keiman ka lo thlak ang" a tih vangin Thiangi kutah ka dah a.

Pindan aţanga ka chhuak chiah chu Hmangaihsanga nen kan inhmachhawn ran mai. 

CONT...