KA HRINGNUN THAWNTHU-22

KA HRINGNUN THAWNTHU-22

"Hei a rawn zawng che a" ka putea bawk chuan a ti leh a, Hmangaihsanga chu a hre ve lo a nih hmel. 

A landan chu a hlauhawm takzet a ni. Ka phalna la lova a lo lang hlawl hi ka lawm lo viau bawk. 

"Eng nge i lo tih?" ka ti ram hmak a, "Inbia ang" kei aia maha bung zawk hian a lo ti a, min en ran a, ka putea chu awm lo ang hmakah a ngai a ni ber. 

"Ka duh lo" tih leh inher ka rual a, pindan a ka luh leh hmain ka banrek a lo man hram a, ka ban lak let ka tum lahin a hmer na zual sauh zel bawk si, a hmuh lohah ka ner nasa ngang mai. 

"Khaih..khaih..in upat tawh kha" ka putean a lo la ti zui a, keipawh chuan kan pahnih chiahin kan awm lo tih hre chawpchilh nghalin ka inher ta vat a, zu hmun a min hmu ta mai chu a hamhaih ve viauin ka hria.

"Min zawng lo tur a ka tih che kha" ka ti ţha leh a, kan tlan liam dawn thleng ka hawi let a, car kha a dinna ngaiah a ding reng a, engtin nge ka awmna a rawn hriat chat theih zawk ni. 

"Inbe lawk ang reilote chiah" ngenngawl zet hian a ti a, ka putea ka melh zawk a, a lo la ţhu ngui lap a, a awm laiin engmah thleng lo se ka tih rilruk lai takin tlangval pahnih an lo lut a,zu an lam nghal zat a, ka putea ho chuan mitmeiin an inbia ni berin ka hria, a zu dah ţhatna lam a pan lai chuan Hmangaihsanga kut ka la lawk a pawnah ka kai chhuak nghal vat vat bawk. 

"Engtin nge min rawn zawn hmuh?" ka ti nghal tawng a, ka pehhel buai peih tawh lo. Tunah chuan ka nu nen a kan awmna chenin a hre leh vek tawh a nih hi.

"Taxi driver kha ka zawt" zawi te tak tak a a tih chuan ka nui hul hak a, min thlah zo a let leh kha a lo chang a nih dawn chu. Kei lahin step bul teah ka dintir a, ka chhuk hnua chuan man ka pek hnuah step ah ka chhuk lehnghal kha a nia. 

"Kan in a hre hleinem. Ka hmelhriat pawh a ni lo" ka tih chuan "Hre tu che an tam" a ti hmuk a, ka hawi chho a, khat deuh deuhin in a intlar chho ve a, a rawn zawt thla zel a ni ngei ang. 

"Chuan eng nge?" ka ti hap a, ka sawi anga a awm lo chu ka thinrim ţeuh a, ka inpeih hmaa min hruai chhuah daih ka hlah khawp mai.

"Ka nu dam veleh palai ka lo tir dawn" a ti hem mai. A thil sawi chu awih lo lutukin amah chu ka en chho ha a, a hmel a thutak run a, a thil sawi zawh chiah kha a hriatchian hmel viau bawk. 

"I â em ni?" ka tih vak chuan "Kha chu i ngaih dan dan" a landan thlak danglam chuang miah lo hian a ti leh tawp a, pangai deuh a kan inkawpna pawh a la rei lova, palai tirh nghal te chu a, a ti awm ang lo lutuk. 

"A ngai bawk lo" lungawi chiah lo a ka tih chuan "In lo hnar thei alawm" a ti leh hmiah a, hnar harsa ka tih tur zia a hrechiang tlat tawh a ni.

"Chuti rum rum a ngai lo, helai hmunah hian ka him a nia" ka ti a, ka nui lui hak hak reng a, a rilru thlak sak ka tum a, hneh ka duh bawk a, ka thiam si lo a ni. 

"Ka hria" a ti nghut a, chutah min rawn enin "Nangmah i nih chhung chuan i him ang" min rintawk hmel tak hian a ti leh a, thlifim vawt varin ka hmai a rawn chhem rual chuan maimitchhingin ka thaw hak a, rintlak loh ka intih viau lai pawn a ni hi chuan min ring tawk em em zel a, ti thei lo tur a ka inngaih te pawh hi thei turah min ngai tlat ţhin bawk a, heivang hian keipawh ka inringtawk ve vek tawhin ka hria. Ka theih lohna lai leh chak lohna lai te, ka chhiatna lai te a sawi ve ngai lova, fiamthu thawh nan min hmang ve ngai tlat lo a ni. Min hruai haw a tum lo tih ka hriat tel phah bawk. 

"Ka nu duh dan a ni" ka tih chuan "Ka hria" a ti bung nghut a, a thinrimna a lanchhuah tir lo na a a lungawi loh zia a hriat theih a, a huat ber erawh keimah ka ni miah lo ang. 

"A tawp ţep tawh ang" ka ti leh tawp a, ka thinrim ve na te kha engtik laiin nge an lo reh diak ka hre lo, min rintawk zia ka hriat aţang khan a ni maithei. 

"Kan ti tawp dun thei ang" a ti nghet churh a, kan ngaihtuahna a hran daih thung. Ani chuan nupui a min neih vat theih dan a ngaihtuah ka ring a, keichuan ka nu a dam huna insawn chhuah thuai theih dan tur ka ngaihtuah ve thung.

Ţawng tuma ka an zuau laiin tlangval pahnih kha an lo chhuak a, ipte an ak hlauh a an thil lak a lang lo hlauh e. Hmangaihsanga chuan a lo en chik khawp mai a,"Zote zanin chu i awm ve mial a ni maw?" min hriat ţhan hmel taka an tih te chuan a mitmeng chu a dur khup khup thei hialin ka hria.

"Aw thlak tu ka nei a" ka lo ti a, buaina an siam ngai lem lova, ţha deuha min biak chuan ka be chhe ngai bik lo. 

"A va lawmawm ve. Pi Atei chu lo dam vat rawh se aw" an ti a, inchhungah khan tlem an in aniang zu rim an nam ham ham a, an ţawng aţang pawhin a hriat theih. 

"Ni e, kan ţha leh vat mai ang" ka tih chuan "Dam deuhin a lo chhuak leh mai ang. Lungngai lutuk lo la, nangpawh in enkawl ţha rawh aw" pakhat zawk chuan a ti a, ka dar a hmer pah kher bawk nen, ka bula ding pa chuan tur deuhin a lo melh khui ni maiin ka hria. 

"Kan kal aw Zote" an kut vai paha an tih chuan "Aw le..in lum ange aw fimkhur ula" ka ti a, kan in a kal tur chuan step an zawh ngei ngei a ngai a, tumah an la lum lo hi mak ka ti khawp mai. In neitupa ber ka putea erawh ka hmuh laiin a lum tawh a, kar khat chhung a sil awng nghe nghe. 

"Ehhh...kan Zotei hi chu a fel thei. Muttui aw...biangah muah" pakhatin a tih laiin a ţhianpa chuan "Biang lehlamah pawh muah" a lo ti ve kher a, nui ham ham chungin an chho a, an la inkai zui. 

"Kan Zotei" Hmangaihsanga chuan bul zet hian a lo ti a, min nel ve tu ho chuan kan Zotei min ti kher zel tak tak a, "An sual lo a nia, ka putea hi a fimkhur a, ka tan a hlauhawm tur ang chu inleng a nei ngai lo" tih pahin a dar bal lo pui chu ka beng thak a,mit chhingin thawk a la kawk a,ka awmna hmun hi pawm thlap har a ti ve niin ka hria. Mahse mi pangai a nia, zu zuar mai mai mah nise ka putea zah lohna a ti lang hauh lo ang. 

"Pindan kalhna a nghet ţha em?" ipik hmel zet hian a ti a, ka nuih hak hak lai chuan ka kawngah lo dawmin a taksa si chetin min kuah bet hmiah a, a lum nuam a, rinchhan tur ban nghet tak ang mai a ni. 

"Nghet ţha e..min ngaihtuah duh suh. Ka awm rei ve tawh a, ka la him pial hi" ka ti ve ngial a, a ner sawk a, kawngka lam a thlek zui vut bawk a, "Lut teh ang" a tih chuan mak ka ti deuh a, "Sawifel theih a awm lo" beidawn hmel zet hian amah bawk chuan a ti leh a, hruai haw nghal mai theih ka ni lova,ka nu a damlo bawk nen, tih theih vak a awm lo reng a ni. 

Ka putea pawh a kai ţha leh tawh viau a, Hmangaihsanga hnenah chuan in la polite tawkin "Matei hi zawng a vanduai em a, nuih pawh a nui ngai ta mang lo. Tun hma kha chuan hnar phe hlep hlep khan a nui ve ţhin a, a thil tawnin a zir ngang lo a nih hi" a ti dap dap a, ka bula ţhu pa lah chuan min en kher lehnghal a, ka hnar a en bik deuh niin ka hria. 

"Khawi a mi nge i nih a?" ka putea chuan a ti leh rih a, ka nu inthup nasat dan ngaihtuahin an inhre lo hi thil mak a ni hauh lo. An veng hming chu ţha deuhin a hrilh ve mai a, ka pa fapa a ni tih erawh a sawi tel lo thung. 

"Nih leh maw Sangte" ka putean a tih chuan lehlam hawiin ka nui a, Sangte ti a kan koh ţhan loh vang nge a inhmeh lo riauin ka hre tlat pek a, "Zanin hi i vawikhat lokal na em ni? Ka hmuh ve ngai mang lo che a" a ti leh zel a, Thiangi te pawn thawn an nei rak rak reng mai.

"Aw vawikhatna chiah" a lo ti a, an in angin inkawm falna hmun a awm ve vak lo a, nuam lo a ti ru viau maithei a ni. 

"A nih chu mawle. Leng reng rawh aw, keichu ţhutthleng seiah a nih loh leh chhuatah ka mu mai zel a" a tih chuan Hmangaihsanga pawh a nui ve ta tawp a, kan inah chuan ti ti falna hmun ang kha a awm lo tawp ang a nia, midang hriat ve loh chi sawi dawn pawn ţawng zawih a ni mai.

"Duh leh mu tawh la" a tih chuan ka putea chuan lu a thing a, "Tunlai chu rilru a hah a, mut pawh a chhuak thei lo. Ka u damloh chu thuhran, vengchhung mite pawi ka sawi bawk si a, hna thawh tur lah a vang phian zel mai bawk a" a ti chuar chuar a, a sawi thui lutuk ka lo hlau ru kher mai.

"Zu zawrh hi nuam i ti em?" a ti deuh khawl a, a pehhel lo ve khawp mai. Sawi lo mah ila a rawn luh khan a hre nghal vek a nih hmel. Hriat loh theih pawh a ni lo, inchhungah zu rim a nam huam reng a, bottle a inhung fur a, tlangval te lah khan a hriat laiin an rawn lam kher bawk si, haider ţalh tum pawn a theih loh ang vel a ni. 

"Ti nang le, mahse sawi leh sawi hnu, kan lo in ve reng duh bawk sia, in loh chuan kan buai chhe der a ni tawh a, hnathawh tur mumal a awm loh phei chuan zu leina tur pawisa a awm reng lo a, zawrh mai loh chu tih theih a awm lo. Mi angin ka zuar nasa lo zawk a, mahse zu zuar tho ka ni. Tumah ka dem lo, a ti sual tu ka nia, keimah leh keimah hi ka indem" a ti bual bual a, a ţawng duh par par tawh khawp mai. 

"Inhlawhna tur a awm ang hmunphiat ang zawng te pawhin" Hmangaihsangan a tih chuan "Awm teh nang aw..keini ang hnar bawk lel lawl, biang uai per pur te chu tuman min chhawr duh lo. Thla tin hlawh nei ve tur ang phei chuan a theih loh reng reng" a tih laiin Thiangi a lo chhuak a, ka inleng pa chu a enduh nasa. 

"Ka hmu ngai miah lo che" a ti nghal chat a, "A lokal ngai lo lawm" ti a ka lo chhan sak chhan awmze nei deuhin min melh a, min chhaih ve niin a lang. 

"Thingpui lum nachang pawh a hre nange? Tikhan lo ţhu rawh keiman ka lo lum ang" a ti zung zung a, Hmangaihsanga pawn a hnial hran lo. Len reng te chu a chak zawk ngawt ang. Ka putea ten chaw min lo ei san daih tawh tho a, awm ve reng mah se pawi ka ti lo. 

Thiangin Bawiha chaw ei tur a siam lai chuan "A ei tawh" ka lo ti a, tlai a Neihkimi lo haw hma chiah khan Siampuiin a hrai puar fel diam tawh. 

"E..a pawi loh chu. Nangpawn thingpui in ve rawh aw, in ril a lo ţam lutuk ang e" a ti a, ketli a ban nghal zat a, Thiangi nen hian kan awmdun tamin tih nachang a hriat ngai loh te kha kan ti dun zel a, bungbel pawh tunah chuan a fai vek tawh a, inchhung thlengin a bal ngai ta bik lo. 

Thingpui inzawhah Hmangaihsangan min haw san a, Thiangin min chhaih deuh reng bawk a, tunlai tak chu inhmu ngun ve viau mah ila a awm loh hlek chuan ka ngai veng veng zel. 

Pindan a ka mut luh hnuah ani pawh chhuatah a rawn mu ve a, inbeng kangin khum a ka mu chu min en reng a, ka ngaih a ţhat vak loh hnua "Eng nge?" ka tih chuan "I vannei e" min ti ve lehchhawng a nih chu mawle!

"Ka vanduai zia i hre vek alawm. Nitin deuh thaw i hmu bawk a" ka tih chuan "Ka hriatchian tawh vang che alawm vannei ka tih che. I inleng pa khan a duh tak tak chein ka hria, a en danah che khan ngaihţhat lohna ka nei miah lo. I nui a hmuh te khan a lungawi hmel hliah hliah a, khatiang kha ka duh ve, i inlengpa in a en ang che a min en tu tur ka duh ve" a tih chuan "Hmangaihsanga" ka lo ti zauh a, a ngaihna hriat loh hmel deuh a min en laia "A hming a nih chu" ka tih leh chuan a nui var var a, him dam taka ka hmu leh thei hi ka lawm takzet a ni. Ka ngaina ve tawh a, hlim turin ka duh bawk. 

"Keichu maw ka na thei tawh lo reng reng. Mi'n ka chanchin chhe lai ka hriat a an sawi bawih bawih chang te hian ka engahmah a thawk tawh lo. Ka chawmawlh zo tawh a, zu in leh ka nu leh pate pawisa ruk hi ka hna ber a ni mai" ngaihsam hmel fahran a a tih lai chuan a mitah lungngaihna a lang thei a, thuk takah a na tih ka hria a ni. 

"Kum engzat nge i nih tawh" ka ti a, "Kum 23" a tih chuan mak ka ti kher mai. 

"Kum 23 lek maw i la nih a?" ka ti hluai a, hlim hmel pu lui reng chung hian a bu zeuh zeuh a, a va rapthlak tak. 

"Zu dawr a riak mai mai rual i la ni hleinem. Thiangi, i pahrawnin a tih dan che chu i nu hrilh vek rawh" ka tih chuan "Shhh" tih pahin a kut zungchal chu a hmuiah a dah a, ka ţawng ring mah mah tih ka hre chiah bawk. 

"Ka nu hi a lung a ţha lo a, thu thin ţhawng hrilh chi a ni lo. Ka hrilh chuan a buai vak ang a, min kalsan daih ang tih ka hlau. Ka tawrh ang tuar hi hmeichhe tam tak an awm ve dawn a, sawi chhuak ngam lo pawh an tam ang. Chutiang chuan ka inhnem ţhin; ka tawrh ang hi keimah chiahin ka tuar lo a, hmeichhe tam takin min tuarpui ve a ni ka ti ţhin a, chu chuan min ti zangkhai ve deuh ţhin a" a ti sap sap a, vawt a ti deuh aniang rizaiin a inkhuh ţha sat sat a, ka khum lam a lo la hawi reng thung. 

"Zote, thih daih i chak ve ţhin em?" a ti a, ka chak ţhin thu ka lo hrilh a, kei aiin a naupang daih zawk a, zu a in nasat em vangin a lang upa zawk thung. A ţawngkam a fel faiin mi pawi a sawi lo viau bawk. 

"Keipawh ka chak ţhin. Intihhlum te hi ka tum ngun a nia aw, mahse ka ngam lo. A mak lutuk, ka nun hi ka ning a, hrehawm ka tih tehlul nen intihhlum ka ngam lo tlat a, inawkhlum te hi an huaisen ka ti a sin aw..keichu dawihzep ka ti ve miah lo. Han inkhai ve ngawt dawn teh, i ngam miah lo ang. Anni pawn harsa an ti ve ţhin ngawt ang ka ring" a ti a, min en kal a, a sawi leh tur ka lo ngaichang tawp a. 

"Nun an ning tawp khawk a, an nunna la tu tur hrui hrual ai khan khawvel leh a chhung a thil awm te hi an hlau zawk niin ka hria. A rapthlak tiraw? Mahni nunna an la tawp mai a nia, an nunna ti tawp chak ngawih ngawih a siam tu hi eng thil chiah nge ni ang le ka ti ţhin. Aaa...ka sawi thiam lo U Zote, damchhan nei lova in ngai a an nunna ti tawp mai ho hian damchhan tur pakhat tal chu an la nei ve ang tiraw? An inngaihtuah chiang lo mai mai a ni" a ti nuai a, hriatthiam a har khawp mai. 

"Mahni nunna ngei tih tawp hlau miah lo a siam tu chu a hrehawm dan a nasa ve hle a nih ka ring. Khawvel aia hrehawm zawkah an kal dawn tih hrereng chunga an intihlum ţhin hi ka khawngaih a sin. An tan a khawvel hrehawm dan tur chu han ngaihtuah ve mah teh, an dinhmun a kan din loh chuan kan hrethiam tak tak lo ang. Khawvel aiin hremhmun an thlang tawp mai a nia, mihringin lungngaihna vawrtawp a tawh chang hian setana a lo inrawlh vat zel a, hei vang hi a ni pakhat ang. Mi chak lo tan chuan sual hi do hneh a har em a ni" a ti a, a mitmeng chu a ngui nghiai a, a dawrawmin a chak loh zia a hmuh nghal mai theih a, puih theih ka chak takzet a ni. 

"Zu in tawh lo la" ka tih chuan "Harh fimin khawvel ka hmachhawn peih lova, fim karin ka pahrawn ka hmu ngam lo bawk. Ka ten ngawih ngawih a, ka nu hriat loh tur a thup hram hram a ngai bawk si. Min hmangaih tu emaw ka tih te lah hian ka taksa chauh an lo duh zel a, mi chuan hmeichhe nasa tak angah min ngai a, ka ţhiante pawn min kawm duh tawh lo. Min pawm ber tur a ka ngaih kohhran mi ţhenkhat te pawn min pawm thei tawh lova, an vai phei chuan ka ti lo, mi ţha tak tak an tam tih ka hria" a ti a, a aw a dik tawh lova, ţah a hnaih tawh viau a ni.

"A chang chuan engati nge ka lo pian ve kher kher le ka ti ţhin. Pathian hian mihring hi siam ve lo tawp se tih chang ka nei a, mi ang lo kan tih ţhin te hi awh chang ka ngah bawk. Ka sawi peih tawh lo ka mu dawn" a ti hlak a,light a off zui zat bawk a. 

Ka mu meng kar a,rei deuh kan ngawih hnuah zawi tea ţap ri ka hria a, ka muhil tawh emaw a ti a nih ka ring. Ka phone ri pawh ka ngaihven duh lo a, ka harh tih a hriat chuan a zah ka hlau a ni. 

Zingah chuan pangai deuhin a awm leh tawh a, a ţawng zat zat reng a, Denga sual zia sawiin ka putea a khak deuh reng a, zana ţap nasa hle si zinga kan nuihpui nasat ber a ni leh tawh. 

"Zote, damdawiinah i kal dawn em?" bualin chhung aţangin a au lang lang a, "Ka hre lo..engati nge?" ka tih chuan "Ka kal ve duh a, i kal leh dawnah min hruai ve rawh aw" ka ti a, tui a in leih sar sar riin a chhunzawm a, ka inbual dawn a tih tak kha mawle. 

Ruattei bia a ka nu chanchin ka zawh chuan "A ţha vak lo a nia aw. A khua a sik a, a khuh bawk a. Doctor ka hrilh ang ka lo tia. Nau awm tu an awm loh chuan vawiin chu lokal kher duh suh, Siampuii khan ka chhungte ka tlawh dawn e a tia, U Remremi pawh a hruai daih ang" a ti zung zung a, ka nu chu ka ngaihtuah khawp mai. 

"Ka nu kha" ka tih zet tawh hnuah sawi hreh leh deuhin "Ih...eng lo" ka ti kual leh vel a, "Ka hre tawh alawm" a rawn tih chuan "Engmaw?" ka lo ti let leh daih a, a nuih a za viau mai.

"Kan hnena a chen ve lai khan ka hre tawh alawm. Inah ka awm tam ţhin a, damdawi la tura a chhuah vel ţhin te kha ka hai ngai hleinem. Ka pa ka zawt a, min hrilhfiah hnuah rilru danglam pu lo turin min hrilh bawk a, ka ute ho hian an hre ve em phei chu ka hre lova, keimah ngawr ngawr chuan ka hriatna a rei tawh" a rawn ti a, chuti chu khang hun chhung zawng khan a lo zep pui char char tihna a ni maw. 

Ka insum zo lo chuan "I rilru hi a ţha ve ngawt mai" ka ti chhuak phawng a, a lo chek tlak a. 

"Ţha vak bik lo e. Ka mi tawn te reng reng hi judge hmasa lovin anmahniah inchanin an dinhmun angah ka indah hmasa ţhin a, chuvang chuan ka hrethiam thei mai mai alawm. Ka nu bikah chuan a natna ang hi puanzar vak chi a ni lova, midang hriat a duh loh ringin ka zep sak a, chuzawng chu a ni mai" nuihzat hmel tak hian a ti a, a chhan chu engpawh lo nise tuman rilru chhia an tih ka ring lo. 

"Naktukah Siampuiin nau a awm theih dawn chuan ka lokal ang. I hah tawh em? Ka lo chhawk tawh dawn che mi?" ka tih leh chuan "A ngai lo..ka awm ve ţan chauh a ka la hah hleinem. Mahse ka nu hian a ngaih che ka ring a, Siampuii nen inbia ula lokal hram i tum dawn nia. Naktuk phei chu ka u in a kalpui thei ang che" a ti deuh ngei a, doctor a lokal a tih vangin kan inbiakna chu kan ti tawp a, Thiangi pawh a lo inbual zo diam tawh. 

Chanchin min zawt ve luam a, ka hrilhfiah hnuah "Ka zui ve dawn che nia" a ti leh a, Hmangaihsangan min lo la call zui.

"Nizan i muttui em?" a rawn ti dam thlup a, "Aw tehreng mai. I lo call pawh khan ka muhil tawh aniang zingah missed call ka hmu chauh a" tiin dawt ka sawi a, Thiangi mitmei ka veng ve a ni. 

"A ţhat chu. I hna ngai kha i thawk leh duh tawh em?" a tih chuan "Duh rih lo" ka lo ti vat a, Neihkimi thu a bang ka nia, kan inbiak ve lah khan hna chungchang kan sawi mang si lova, a thu hmu phawt lo a thawh leh chu ka duh tawh lo. 

"I duh hunah sawi mai rawh aw. Tukin chu ka kal hma deuh a" a tih lai mekin "Khawimaw han la teh. Call ringawt la ţawng duah kher suh ka tih mawlh mawlh kha" Zonunin a lo ti hlak hlak a, reception counter bulah a awm a ni ngei ang. Zonuni aw chu ka hai lo chiang viau bawk. 

A rik deuh rawk rawk hnuah "Zoliansang" a rawn ti vin ţhat a, "Min tih mangan zia i hria em? Rba takngial pawh engmah i hrilh lo a, i ban ngawt chhan ka hre bawk si lo, a mi pangai zia lo emai" a la ti hlak hlak a, Rba chuan a lo la zep ve ţang ţang a ni ngei ang. 

"Nakinah ka la hrilhfiah ang che" ka tih chuan "Phone i dah rualin keimah bik min rawn be nghal ang che. Hei tunah pawh i chanchin ka lo zawt tawp a, tunah chiah pawh a ni lo. Ka hmuh apianga ka zawh ţhin vangin tunah i chanchin ka hre ve chiah tihna zawk. Kei tal chu min hrilh tur alawm. Ţhianah min ngai ve miah lo em ni a?" tiin a vui nasa mai a, kei tak pawh ka inthiam lo. Mahse ka dinhmun kha a khirh em a ni. 

A hranpain ka be leh thlap a, ka nu chanchin te ka hrilh leh thlap hnu chuan a lung a awi ve ta deuh a, hunawl a nei veleh a lo len ngei a tum bawk. Ruattei ka be deuh reng a, phone aţang chuan chanchin min hrilh ţha duh vak lo, pneumonia a nih an rin deuh vangin thisen test leh xray te, test dang neuh neuh te a ngaih bakah ct scan thlenga a ngaih maitheih thu te a sawi a,a lo TB mai ang tih te an hlau a ni awm e, chanchin min hrilh lai chuan a ngaihtuahawm loh a ti pah reng a, ka nu bula awm a nih vangin ţawng a fimkhur hle. 

Zanah Hmangaihsanga a lokal a,Thiangi hnen a ka lo sawi thawi tawh avangin "U Hmangaihsang, naktukah Pi Atei in tlawh dawn chuan ka kal ve duh a nia aw. Ka tibuai lo ang che u" a lo ti nghal var a, a pawnchhe ken lai pawt neuh neuh chungin chhanna a ngaichang ran mai.

A thusawi leh awmdan avang chuan Hmangaihsanga pawh a nui ve suk a, "I kal ve dawn nia" a ti a, ka bula a lo ţhut rual chuan Bawiha a lokal nal nal a, a malchung a chuh tharh mai. 

Ka nu natna hi a hriat tawh ka rinna leh rin lohna a inchen vel a, hrechiang law law turin ka zawt ngam bawk si lo. A lo la hriat loh phei chuan a hriat phah dawn tihna a nia, rilru a insual buai leh nasa tawh. 

 "Khaw nge i putea?" min rawn hnaih paha a tih chuan "Inhnuaiah a chhuk lawk a nih kha" ka lo ti mai a, "Hruai haw daih che ka duh" zawi sup hian a ti a, ka hrethiam khawp mai. 

Min ngaihtuah a, a hmuh phakah awm lo mah ila hmun him a awm turin min duh. Chutih a nih rual chuan min neih ngei a duh vangin ka nu leh ka putea te tih lunghnur a duh lo thung.

"Ka ţha ka tih tawh kha" ka tih lai chuan Bawiha a dawm beh lohna lamin min kuah ve thung a, "Ka ring che mah se in inleng te kha ka ring tel ve lo" a ti a, zan hmasa lama tlangval te kha a la hrereng a nih hmel.

"Ka inveng thei lutuk alawm. Naktuk chu i hman thei dawn mi? I hman loh pawn Thiangi nen kan kal thei tho a nia" tiin thil dang ka sawi ta daih a, chhungkaw chanchin sawi chuan min ngaihtuahna a zual mai mai ang. 

"Hman ang. Chawhma lamah ka kal zuai ang a, in kan hun nang hmanin falkawn chu kal kan tum mai dawn nia" a tih chuan rilru a nuam huai mai. Motor hran hran hmanga kal kual chu pawisa a hek duh lutuk a, bakah chauh a na duh bik. 

"A ţhat hlauh chu. Lo lut ve tawh rawh aw, ka nu pawn a hmu duh tawh ang che" ka tih lai chuan lo kun hnai hretin ka bekah a fawp zeuh a, Thiangin min hmu teuh em em mai lehnghal.

Thingpui a chhuang leh vat a, a fel reuh tak tak a ni. Zu in nasa viau mah se a mawng a zang a, Bawiha pawh a hma ai ngawt chuan a ngaihtuahin kan pahnih phei chuan kan inkawmngeih tawh hle.

Ka putea lo luh rualin Hmangaihsanga chuan min thlah a,a rawn be leh luam a, kan piah chiahah ţhuin a khat tawkin kan ti ti a lo zawm ve a, a rui viau emaw tih pawn buaina siam chak tlat an tih ang khan a awm ve ngai lova, a zurui a hnawk sak lo khawp mai. 

Zan hmasa lam aiin a leng rei deuh a, haw tuma a ding chu Thiangin "Naktuk chu aw" a lo ti lehpek a, thu a tiam nawn tir leh te te hnuah kal a phal ve chauh. 

Pawnah kan inzui chhuak a, zan boruak chu a vawt var a, thlifim thaw heuh heuh ţhinte hian ka nu natna la boin kan buaina te hi chhem kiang duak thei se ţha tur a nia. 

Êngin a chhun phak loh chinah min phei pui a, zan rei a la nih loh avangin a thim chhah mup chuang lo. Min kuah rual chuan a awmah ka bei thlawp a, ka thlakhlelh ang chiahin min thlahlel ve a, chu chuan min ti lawm a ni. 

Min kuai dakin duhthawh zetin min fawp nghal tawn tawn a, chhang let ve tho mah ila pawn a awm kan nihna chuan timna min neih tir a, rei pawh min fawh hmain a awmah ka nam a, ka chetdan chu ngaithei lo ni awm takin ka kut chu a lo man bet hmiah a, kan inah zanrei a awm ve lo tih hrerengin ka tal laih a, rum chhuak hawlhin min thlah ve thei ta hram a. 

"Kan inah hian zanrei a awm ve lova, kan inleng i ngaihtheih loh deuh te khan min hmuh palh chuan min zuam phah mai ang" ka ti a, ka aw chhuak pawh a dam angreng hle. 

"Ka hrethiam" tih pah a a chal a ka chal a lo tauh dat lai chuan a biang ka lo dawm ve mial a, "Awm lo ta la engtin nge ka awm ang le? Ka sawi awmzia chu Ruattei nen hian awm lo ta ila chu hrehawm ka ti lehzual viau ang" ka ti a,a lo nui hawk a, a ngaih ho hmel viau mai. 

"Min khawihna hmasaber a nih hi" tih sup pahin ka biang ka dawmna kut chu a lo hum hnan a, ka lai kher mai. Vawikhat a biangah tho ka fawp ve tawh a, a sam ka chul thuak tawh bawk a, hetiang hian ka la khawih ngai lo tak tak.

"Lo chhinchhiah thlap thlap kher zel lo la" tih nang nang pahin ka kut chu ka la let riai riai a, "Kal tawh rawh i tlai lutuk palh ang e" ka ti zui zat bawk. 

"Umm..ka lo bia ang che" a ti ve mai a, a kal hmain min fawp leh a, keipawn a lan theih chhung ka lo thlir a, hun a neih phawt chuan zantin a lokal peih ngei ngei ang. 

Zing dar11 velah Hmangaihsanga a lokalin Bawiha chu in hluiah kan dah kawi leh a, ka nu'n natna a lo man belh phei chuan a bul hnaia awm chi a ni ve tlat lo a ni. 

Thiangi chu a hnungah ţhuin a ti ti siam siam reng a, kan driver pa chuan a nin palh ka hlauh viau laiin a lo hlimpui phian a, a ti ti kar lakah zawhna a lo zawt leh zeuh ţhin a, Thiangi chuan a chhang phur thei khawp mai. 

Keini pahnih inkawp ve hi chuan sawi tur kan hre lo ve thei khawp a, ţawngtam loh na na na chuan induh tawn ve viau mah ila a ţul chin kan sawi chuan kan duh tawk em em zel a, mipa zawk a nih miau avangin Hmangaihsanga hian min fiam leh zeuh ţhin a, chuti tih lohah chuan nileng pawn awm dun ila kan inbe tam lo ve ngawt ang. Thiangi a awm hlauh a, khua a ti har loin hah a ti dam takzet a ni.

"U Sangte eng hna nge i thawh a?" a tih chuan keimah zawk ka hawi let zawk a, a chanchin kan sawi ngai mang lova, a hre lo hi a awm lo lem lo. Keiin ka sawi ngai lova, ka nu dahin ka ngaihven zel hlauin sawi chhuah a duh der lo. In lian lo ve taka khawsa ho kan nih avangin ka putea nen pawh an sawi dun ngai lo tih ka hria.

"Kuhva ka phur ţhin" a lo tih chuan "A ni maw?" a ti hluai a, vawi hnih nan ka hawi let leh a, a meng phawk nasa ngang mai.

"Ni e" a ti leh mai a, "Truck i khalh ţhin tihna em ni?" a lo ti veleh hluai a, Hmangaihsanga nen chuan kan inmelh zawk a, a hmel a nuihzatna langchhuak chu ka hmuh hmaih lo chiang kher mai. 

"Khalh ţhin e" a tih chuan "Nangma ta nge midang ta?" a lo ti leh a, an inzawt chik sawt viau a ni.

"Keima ta ngat mawle. Min zui duh em? Zotei pawh hi ka hruai ţhin a" nuihza aw taka a tih chuan "I ninawm e" Thiangi hriat tham loh tur hian ka lo ti a, "Awii...U Zotei hi a inhmeh lo e. Nangpawh truck khalh i inhmeh chuang lo ka ti. Kuhva phurh vel ngat phei chu in inhmeh lo dun tawp. Fimkhur rawh u aw" a ti a, a awih nghal thlap vek niin a lang. Kum naupang na na na chu an naupanna hi lanchhuah chang a awm ţhin. 

"Kan la hruai ve ang che" a tih te chuan a phur khawp mai a, a nihna diktak a hriat hunah a haw viau maithei a ni. 

Kulikawn a eitur kan lei lawk sa avangin dawr a peng kawi lovin kan tlang a, kan thlen chuan mi an lo tam tawh nasa mai. Keini ang thoin eitur an khai ve fur a, tlawh tu kan neih ngai miah loh laia a hrehawm ţhin zia kha min ti hrechhuak leh alawm mawle. 

Ruattein min lo dawng sawngin xray an tih tawh thu min lo hrilh a, a ţhianpa ni awm tak tur hi a lo awm ve bawk. 

"Huna hi a lo thleng hma hlauh a, min pui char char a a fel tak tak a ni" tih luam pahin a ţhianpa chu min inhmelhriattir a, ka nu chuan lawm pawh min lo lawm ve peih lo thung. 

Ahmingi te pi tu pawh an lo la awm ve a, Nu Biaki pawh a lo phul leh hlut a, an ngaihawm ve riau a ni. 

"Ka duh lo" Ahmingi pi aw kan hriat chuan an hnaih a awm te chu kan hawi phei ţhap a, Ahmingi chuan nebulizer hman tir tumin a lo bei ţang ţang a, a pi lahin "Khatianga ka hnar leh ka i hup daihin ka thaw thei nang" tiin ţan a lo khawh a, "A va mak tak. Inhaler i hmang hleithei si lova hetianga kan tih mai hi a ngai alawm" pakhat lahin a ti vin hlar a, an buai pi tu khawp mai. 

Ruattei ţhiante an lokal bawk a, chanchin a hrilh hlawm tawh a nih hmel. Nu Biaki pawh chuan "I u aiin rual i pawl zawk a ni maw? I u chauh a awm chuan tumah an lokal ngai hleinem" tiin a lo fiam a, nuih tak tak a har duh viau mai. Kan awm chhung zawngin ka nu a harh peih lova, awm reng theih ni hek lo le, hreh deuh chungin ka hawsan a, a la chau rih mai mai aniang, ka nu lehzel chuan min kalsan hauh lo ang tiin ka inhnem pah reng bawk.

In hluiah bawk kan let hmasa leh a, hospital aţanga an rawn koh avangin Hmangaihsanga chu a hmanhmawh deuh aniang, "Min lo nghak lawk mai rawh u" a ti ta ringawt a. 

"Keimahni pawn kan haw thei tho alawm" ti mah ila "Ka thlah dawn che u nia" a ti a, hospital bawk a kal leh tur chuan min chhuahsan zui nghal a. 

"Awiii...an in nawm zia hi. Khaw nge truck chu?" lo tiin Thiangi chu a hawikual nasa kher mai. 

"Ka hre bik lo" ka ti a, ka nuih liam mai a, Siampuii nen an inkawm thei viau a, Hmangaihsanga chanchin a sawi chhuah meuh chuan Siampuii nuih a za ngang mai. Thudik an inhrilh hnu meuh chuan kan Thiangi pawh a zah ve hmel khawp mai. 

Tlai a lo nih chuan Hmangaihsanga aiin Neihkimi a lo haw hmasa a, a bialpa KimKima'n a lo zui haw bawk. 

"Lo ţhu rawh ka inbual lawk dawn. Vawiin chu ka chau riau" Neihkimi chuan a ti a, min be lova, min hmu ang pawn a awm lo. Mahse a hma ang khan ka haw thei tawh lo thung.

Choka a Bawiha eitur kan siam laiin Kimkima a lo lut a, tlangnel zet a fridge hawngin in tur a insiam chawp a, ka thil siam lai a zo chiah tihah Siampuii chuan min rawn chhuhsakin "Keiman ka lo pe ang. Tv ah nursery rhymes ka entir a, pek a awlsam lutuk" a ti sawk sawk a, a chhuak nghal daih lehnghal. Kimkima bula awm reng a peih loh vangah ka ngai. 

Hmun phiah lak tuma thlang lam kawngka a ka chhuak chu min lo zui chhuakin "Zote i phone ka lo hmang lawk. Ka phone battery a low a, ka nu biak hmanhmawh a ngai bawk si. I ţhiannu saw ka dil ngam lo a" a tih chuan phone ka lo pe ve mai a. 

Number a chhu lut mawlh mawlh a, a call rualin inchhungah ka lut a, hmun ka phiah lai te chuan Kimkima chu pawnah a ţawng lung lung reng a, a nu nen a inhnial te pawh an ang. 

"Ka lawm e aw" tih pahin phone chu min pe let a, buk nghat pahin ka ak ţha leh a, Hmangaihsanga pawh lo haw vein min thlah nghal a, zan a lokal a tum tho vangin step a kan chhuk chu min thlir liam a, a lo lut kawi ve kher ta lo mai. 

Chaw ei khamah number hriat loh aţangin call ka dawng nawlh a, ka nu a damlo bawk nen, tunlai chu phone call dawn a hrehawm ţhin. Eng thu nge ka dawn dawn tih ka hriat lawk lohna hian hlauhna min siam a, thinphu a mumal lo ţhin.

Tim daia "Hello" ka tih chuan "Zote" a rawn ti a, a aw aţang chuan tu nge a nih ka hre mai thei lo.

"Aw..tu nge aw?" ka lo ti ve thung a,beisei loh deuhin Kimkima a lo ni. 

CONT...