KA HRINGNUN THAWNTHU-23

KA HRINGNUN THAWNTHU-23

"Ngati nge min lo biak? Engatan nge min tih?" ka ti ram hmak a, tlaia ka nu ka be dawn a tih khan amah a in call tel hram a ni tih ka hriat phah bawk. 

"Aw..ka be ve chak che a ni mai a" a tih chuan ka ner nak a, Siampuii sawi ţhin ang chiah khan a lo tenawm tak tak a nih dawn hi. 

"Min lo be tawh suh" ka lo tih ve chuan "Zote, i bialpa hi i ring em?" a rawn ti a, a zawhna ho lam lutuk avang chuan ka nui chhuak hak a, ţha deuh a chhang buai duh lovin "I hriat ve kher a ngaih loh tawp chu" ka ti leh hmak a, Kimkima ang mipa hi alawm ka ngei em em ţhin chu. 

"I ring tihna a ni maw? A nunhlui eng emaw tal hriat i nei em?" a rawn tih leh chuan "Hmangaihsanga hi i haw viau a ni maw?" ka lo ti ve thung a, haw lo se a chanchin chhe lam sawi tur ringawtin min rawn be lo tawp ang.

"Haw lo ka tih chuan dawt ka sawi a ni dawn a, ka hua ka ti mai ang. Hmeichhiate hi infiamna atan bak a hmang ngai lo. Infiamna hmanrua tam tak i nei ţhin a, chung zinga pakhat chu i ni" a ti a, mak in ti maithei, danglamna pakhatmah ka nei lo. Hmangaihsanga ţhatna lai chiah ka hmuh ţhin avangin Kimkima thusawi chuan min ti danglam zo lo a ni ber. 

"Tupawn nunhlui kan nei alawm. Mihring ve tho a nia, nunhlui te chu a nei ve bawk ang chu" ka ti tlat a, ka thlavang a hauh reng ţhin a, tun hi a thlavang ka hauh ve hun a ni. 

"Hmeichhe pakhat chu hmanah khan a intihlum a, hmangaihna vangin" a ti a, a ngawih vang vang takah chuan "A va â ve...hmangaihnaah hian lungngaihna leh damna a awm kawp tih a hre lo a nih chu" ka lo ti a, hmangaihna avangin ka lungngai a, hmangaihna avang bawkin ka dam leh a, he thil hi a hrechiang ber tu ka ni ngei ang. 

"Thihna pawh a tel chu a nih hi" a ti hmuk a, hman a lo intihlum tawh chu a tana mi pawimawh tak a ni ngei ang. 

"Hmangaihte chhan nan leh an dam theih nan a kan thi a nih loh chuan midang kan va hmangaihna aiin mahni inhmangaihna a nasa zawk tihna a ni mai" tiin ka lo hnial kalh leh a, ţawngkam mawi lo tak a hmang zui a, ka lo nuih liam vel mai mai thung. 

"Ka nau thihna chu nuihzatthlak ah i ngai tihna a ni maw?" a ti khur khur tawh a, a awmzia ka hrethiam ta chiah e.

"Ni lo e...i thu lak dan kha alawm ka nuihzat zawk chu. Phuba lak chakna in i khat a nih ka ring" ka ti a, Neihkimi ang chiah a nih duh hmel riau a ni. 

"Phuba la duh ila chu hman hmanah a chhiatna turin thil ka ti tawh ang" a ti tak na a ka awih sak lem lo khawp mai. 

"Chuti si engati nge min lo biak?" ka ti ve salh a, inhmuh falna hun kan nei ngai lova, hun remchang awmchhunah ka phone number neih dan a hre nghal mai chu a nia, mak ve tak a ni.

"Ka duh vang chein" a tih leh phei chuan ka mak tihna a zual sauh a, kan inhmuh khat tehreng nen, in duhna hman a awm lo reng reng.

"Ka ngaihdan kha a la ngai reng. Hmangaihsanga i hnaih theih nan Neihkimi i kawp a, tichuan a chhiatna i zawng ran reng a, a chetsual hun i chang ran te pawh a tih theih ang chu" ka ti a, ka ţawng huai ngam ve lutuk te chu keimah ngei pawn ka awih lo lek lek hial a ni. 

"A dik lo vek a nih chu. Neihkimi nen chuan kan inkawp ngei a, kan naute vang a ni lo thung" a tih chuan "Nih chuan pawisa vang em ni?" ka lo ti a, hetiang teh tawp a hmeichhe dang a biak san theih avang hian ngaihdan dik lo a piang hma hle. 

"Pawisa i ngah mi?" tiin min zawt let a, ka chhang buai peih lo. 

"Pawisa vang a ni lo, duhna vang zawk a ni. Midang tihchhiat nan a kawp ka ni lova, phuba lak nan a rawn bia che ka ni lo. Ka duh tak tak che alawm" a ti a, Neihkimi ka ngaihtuah lo thei lo a, ka khawngaih takzet a ni. 

"A nih phawt aw" tih leh phone dah ka rual a, a nau leh Hmangaihsanga te pahnih inkar a thil thleng vel pawh ka zawt zui duh lo. Nunhlui chu nunhlui a nia, a liam vek tawh a, lo thar thawh leh vak kha ţul ka ti lem lo. Hmangaihsanga hian ka nunhlui ngaihvenin chhui vak ta sela, ka tlin lohna tam tak a hmu ngei ang. Hun liam tawh zawng zawng thlenga kan in ngaihven tawn sak te chuan inlaichinna nuam tak kan nei thei lovang.

Zan dang ang lo takin inleng kan nei lova, zu rawn lam pawh an awm lo. Ka putea leh Thiangi te chuan an in a, a nu hian a rawn be ve reng a, an in lamin a lung a len tehchiam lo bawk a hawn tumna pawh a nei lo. 'I awm chhung chu ka awm ve dawn' a ti mai a, a pahrawnin a rawn biak chang phei chuan duhdah deuh deuh bakin a lo chhang ngai lo.

Bawiha tlankual pap pap reng chu hmuhnawm ti deuh a kan lo thlir ţhap laiin Hmangaihsanga a lo lut hlawl a, kawngkhar hi kan khar ngai lo ang tluk a nia, kan thawm a ring bawk nen, pawn lam thawm kan lo ngaihven lem lo a ni. 

A lo lang thut chu Bawiha chuan pan hnaiin a bawp a pawm bet nghal hmak a, "Zanin chu i va nung ve" a ti dam vei thlup a, ka fapa lah chuan hmai zangthal haw a en chhoin "Pa" a ti phawng mai a, hrilhhai hmel takin Hmangaihsanga chuan a en chhuk ve run a, a landan hi naupang tan chuan a nelawm vak loh maithei a ni.

"A pa" a tih leh lai chuan kun hniamin Bawiha kut chu a phelh sak a, amah chen tur tawkin a ţhu thla zui zat bawk a, ka fapa lah chuan a la pa mawlh mawlh mai bawk si a, a zia lo tak tak a ni. Ka nu leh pate la innei pangai reng se chu a pu tur a ni daih a, Bawiha awmdan teh thut chuan keipawh min ti hrilhhaiin ka zak ru chem chem mai. 

Hmangaihsanga pawh chuan tih vak ngaihna a hre bik lo aniang "Naupang hi chuan duh duh an sawi a" za lo deuh a nui chung hian a ti a, hrehawm a tih hlauin "Bawiha helamah lokal rawh" ka ti ve tak na a lu thin pahin Hmangaihsanga nghawngah a kuah a, an in nam sawn lo chauh ni berin ka hria. 

"A nu bulah phei ang le" a tih chuan a chhan pawh hriat lohin Thiangi a lo nui vak a, chu chu Bawiha zawk chuan lawm veleh chhawngin a lo nui ve a, su auh auh chung hian apa tiin a ko leh ţhin a, "Eih" a ti thum dût a, Thiangi nuih a za zual sauh a, keipawh ka insum thei tawh bik lo. 

"Khati hmuk hmuk te chuan i fapa khan a ngaina thei nang che. Nem deuh hlekin awiah te ti ve ta che" tiin a lo fiam a, kan nuih tet tet takah chuan a ning ta deuh aniang ka fapa chu zo deuhin a chawi kang lawp a, a pawm ţhat leh hnuah ka lam panin a lokal a. Ka bula a lo ţhut takah chuan keipawn ka ţhutna ka lo siamţha ve sat sat a, ţhuttleng seiah kan ţhu tawt thiam khawp mai. 

"Vawiin khan kan haw hmanhmawh lutuk a, U Sangtea hi ka chhuahchhal theihnghilh daih che. Truck ka khalh ţhin te i ti vel a, doctor i nih reng kha aw" Siampuiin a tih kha kha takah chuan chhan ngaihna hre tawh lovin a lo nui suk a, vanneihthlak takin ka nu fa a ni tih te, hospital an neih thu te chu ka putea hriatah a sawi lang lo hlauh. 

Bawiha bianga thil dum kai ka hmuh chuan "Khawimaw lokal teh" tih pahin ka pawt a, ka malchunga ka ţhuttir hnuah "I biangah hian eng nge kai a" tih pahin enchian ka tum a, hmai khawih haw reng reng a ni bawk a a tal nghal bat bat mai. 

Min si chet a ţhu Hmangaihsanga pawh chu a tlawh buan buan a, a rak chel chul mai bawk a en pawh a en hleihtheih meuh lo. 

"Ka tifai ringawt dawn alawm mawle. Ngah nge maw hmai khawih hi i huat viau ni?" ka tih pawh a a la tal zawm reng lai chuan "Ti tawh suh a kahchik a lang a nia" ka bula ţhu pa chuan a lo ti thum ve dut dut reng a, a hmai chu ka hru lui a, ka tihfai sak ka tho a. 

Ka thlah rual rualin Hmangaihsanga malchungah a ţhu lehnghal a, "Engmaw lang i tih kha?" ka tih chuan "Kahchik" tih sup pahin Bawiha kekawrte kar a a kawhte lawr tet chu hreh hmel deuhin a siamţha a, a nui ruh ruh bawk a, ka fapa a nih vanga a tim tlat hi ka hrethiam lo khawp mai.

"A tal nasa lutuk a a tal chhuak a nih kha. A lum em a, kekawr ka hak tir duh lo a" Thiangin a lo ti zung zung a,"A pawi hleinem" a ti ve mai a, ka fapa chuan a ngheng ar ar reng mai.

"Pa awt rual a ni ve tawh a, nakinah phei chuan zawhna mak pui pui a la zawt ang che. Naupang hian rin aiin thil an hria a nia" ka putean a lo tih chuan Bawiha ka en vat a, "Nia pa a duh ve vang a nih kha a lo pa tlat ni. Naupang engmah hre lo kan tih te hian hriat chin chu an nei ve nual maithei a ni" Thiangin a lo ti ve chiah bawk a, mahse ka ring lo. Kum2 a tling dawn ţep chauh a, pa awmzia a hriat ka la ring lo. A duh reng vanga ko thut a nih ka ring lo tel bawk a, Siampuiin uan nan eng eng emaw a lo zirtir a nih ka ring mah zawk. 

Ka putea rui chu reilote ah ţhutthleng sei pakhat zawkah chuan muhil in a hnar nghal kuk kuk a, Thiangi pawn pindanah Bawiha a luhpui a, kan pahnih chiahin kan awm leh tawh. 

Tv a in on ve ngei a, kan en awm pawh ka hre lo. Ka ngheng a, a kut ţang sei thlurh chu ka khal neuh neuh a, a awm a bei hle hle paha a kut phah leh ka kut ka teh lai chuan a lo nui nghawr dawt a, "A va in len hleih ve le" ka tih lai chuan ka kut chu lo vuanin ka darah min kuah zui zat bawk a, hetianga awm hi a nuam ber. A thlamuanthlak a, ka nu ka ngaihtuah ngawt ngawt loh phah ţhin.

"Neihkimi leh Kimkima te hi engtik aţanga inzui ţan nge an nih ve a?" ka tih chuan "A rei tawh" tih chiahin min chhang a, "Ruattein ka nu chanchin a hrilh che em?" amah bawk chuan a ti leh a, "Biak ka tum ţhin a, nakinah keiman ka lo bia ang che a ti zel a, ka nu hriat loh a min biak a tum aniang chu ka ti mai" ka ti a, result te kha an hre tawh ngei awm sia, engtak ang ang maw. 

Kan awm dan chu a ning deuh aniang phone phawrh chhuakin a khawih mual mual a, thlalak vel a enkual a ni. Thlalak hlui ve lam tawhah chuan a tawp chat a, "He thlalak hi hmanni ah ka hmu chhuak a" nuih hawk pah hian a ti a, print chhuah tawh sa kha a la chhawng leh a lo ni. 

"Tute nge?" ka ti tak na a ka enchian chuan an chhungkua an niin ka hre leh ang lawi a, phone chu chhuhsakin ka'n zoom vel a, ka rindan chuna dik chiah. A nu leh pate chu a hmaah ţhuin an inkarah Hmangaihsanga a ţhu a, Bawiha ang rual vel tur hmeichhe naupang a pawm bawk a, Ruattei a ni ngei ang. Hmeichhe pathum te chu a hnungah an ding tlar ţhap a, an inchen hlawm ngei mai. 

"Neihkimi sam hi" tih pahin a laia ding chu a kawk a, nuihza aw tak hian "Helmet" a la ti zui a. Ka lo nui ve hak a, a sam tan dan chu helmet a ang tak tak alawm.

"Zamtei hi a lo lian a nih hi tiraw? U Remremi hi chu a hmelţha mawle" ka ti a, a nu nen inang ka tih em avangin ka entawn zak zak a, an hmelţha dun bik takzet a ni. 

"A hma hi chhungkaw khaiding tu te ţhutna a nia" a ti fiamthu a, a nu leh pa te chu kawkin "Pahnih an awm lo tawh a, keichiah ka bâng tawh. Kan chhungkaw hmingţhat te, a mawi leh mawi loh te chu keimahah a innghat tihna a ni mai" a tih leh chuan fiah tum a ka fiam dan vel leh ţawngkam te kha a la hrereng tih ka hrethiam nghal mai. 

Tupawn an hringnun thawnthu ziak dawn ta se chhungkua a tel ngei ngei a ngai a, chhungkua aţanga inţan a ni zawk mah ang. A pawimawh zia a ngaihlu thiam apiang mi vannei an ni mai. 

"Ka hrethiam alawm. Hman zan kha chu ka fiam che a nih kha. In chhuahsan a, i farnu te thlauhthla tur chuan ka duh reng reng hleinem che" ka ti ta nge nge a. 

Hmeichhiain pasal an han nei a, an pasalte rilru a danglam tih an hriat hian hmeichhia chiah hi an dem nghal chiam zel a, fuih danglam tu chuan thiam a chang thei lo ngei alawm mah se fuih danglam theih a awm mipa te kan dem leh ngai miah lo hi a ţha ber lo. Mipa nghet tlet tlawt chu pindan a a nupui phun ser serin a tih danglam theih ka ring lo. Mipa hi chu an pawimawh ang bawkin ţan lam nei lovin a laiah ding thiam se a dik a ni mai. 

Ka putea a muttui tawh angreng sia, a inthlahrung ve deuh aniang hma deuhah a haw a, kawngka ka kalh fel hnuah inchhung ka tifai a, ka insu leh bawk nen, ka mut hman meuh chuan a tlai ruai tawh. 

Ruattein min lo la be leh miah lo a, Kimkim-a message a lo awm nual thung. Inleng ka neih laia phone ka khawih ve lo hlauh kha a lawmawm letling zawk. Khawih chiah ila chu "Ka duh che" tih te, "Ka hmuh hmasakber che aţang kha chuan ka ngaihtuah zui reng tawh che a" tih te hi a lo awm tuar dawn tihna a nia, kan inhauh phah ve chiang khawp ang. Phone ka lawm lutuk lo hlauh a, buaina ka pumpelh phah a nih hi. 

Chhang buai lovin Kimkima chu ka block a, message zawng zawng ka delete nghal vek bawk. Neihkimin a hriat leh lek phei chuan kan inkar ţha ve deuh tawh te hi a chhe leh vek a, ka nu ang chiahah min ngaiin min haw zual sauh bawk ang. 

Zingah Ruattei chuan min lo be ta ngei a, ka nu chu pneumonia a nih thu min rawn hrilh a, rin lawk sa mah ni se min deng dawt a, thaw a pik nghal mup a, beiseina neih luih zel a har duh khawp mai. 

"I awmpui ve duh tawh em?" a ti a, amah hmu thei kher lo mah ila a hnual riau niin ka hria a, "I ngai ve tho dawn tih ka hria a, inriah chhawk ila" a rawn ti leh a, a beiseiawm loh viau em maw ni ka ti rum rum a, ka nu awmdan tak lah chu a sawi duh der lo.

"Aw le. Nangchu hna nei i nia, riah leh a ngai tawh kher hleinem. Keimah ka riak ang a duh leh chhunah in lokal ţhin anga ni mai" ka tih chuan "Kan inchhawk dawn nia. I riah zawn lutuk chuan i chau chhe vat mai ang. Riah zui zel pawi ka ti miah lova, mahse ka nu hian kei aiin a ngai zawk ang che" a ti a, a ţawng chu a zuihral a ni ber a, ngaihthlak a hrehawm duh kher mai. 

"Damdawi a thlah kher kher kha a pawi em a ni. Kan hriatchhuah meuh chuan a tlai lutuk tawh a nih hi" ka ti chuai raih a, lo hre hma ila chu tih dan dan a awm tur a nia, natna dangin a belh ngat phei chuan a dam zawh ka ring lo reng reng a ni. 

"Ţawngţai ila Pathian kutah dah mai ang. Mihring chuan tih theih kan nei tlem a, doctor te thiamna hmanga enkawl leh kan theih ang tawk a kan duat ve hi a ni mai a, Pathian thu thu a ni tawh mai" a tih chuan ka lo inpet ruh ţeuh a, ngati nge Pathian an sawi hian ka thin a rim tlat zel le. 

"Vawiin chu lokal lo phawt la, duh leh tlai lamah chanchin kan inhrilh leh dawn nia" midangin an lo ko aniang "Aw ka lokal dawn min lo nghak rawh u" a ti zui lang lang a.

"U Zote, chaw ei a hun leh vat dawn sia, chawhmeh ka zuk lei ve lawk ange aw. Lo lungngai lutuk lo la, indawm kun tlawk tlawk ai chuan ţawngţai vak vak a ţha zawk a nia" hmanhmawh hmel tak hian a ti a, biak zui reng chi pawh a ni lo.

Ka putea leh Thiangi te hnen a chanchin ka hrilh chuan pawi an tih hmel vawng vawng kher mai. Kan inbe tam lo sawt a, chaw pawh kan ei tlem hlawm. Rilru lakpen nan ka putea chu Denga chanchin ka zawt a, Thiangin min rawn melh vat a, ti hian a rilru ka hruai peng tihna a ni mai. Ani lehzel a nguai ve chuan a nuam lo emai. 

"A nupui kut a thlak a an man daih alawm. Zu bakah thil dang ruih tel a nei a, a sawisa hlum lek lek alawm" a ti a, Denga hi chu a buaithlak lam hret chu a ni. 

Puan ka pho lai chuan Thang Lm-an min lo koin ka nu chanchin te min zawt a, a duty dawn aniang form nen a lo induang ve thlup mai. 

"Tunlai chu inleng i nei ţhin a ni maw? Ka nu'n a sawi ziah a nia aw bialpa nei lo nu" min ti deuh kher a, bialpa ka nei lo ti a ka hrilh hnua inleng ka neih leh si vangin min ţawng el vel a ni ber.

"I nu chuan min van hmu thei em em" ka tih chuan "A nghawng a sei alawm. A mit a fiah ţha bawk a,a beng zawng zawng nen" tih pahin a nur nang a, "Ţhenawmte chanchin ngaihven nan hmanraw dang kan mamawh lo. Ka nu a awm chuan a tawk. Kawmchhak nu ho nen an inhmukhawm phei chu pui tak a ni, a kaw tawp thlengin an luh chhuah vek a, vengchhung thil thleng an report hneh sawh lutuk tlat. Cctv ultra pro max an ni mai" a ti a, a duh loh zawng chu ti hian a sawi phawng phawng zel mai ni. 

"I ninawm e...misual ţawngţaipui tur an zawng pah aniang chu" fiamthu a ka tih chuan "Awii...Lal Zotei chu i â e" a lo ti hlawi a, a landan a pa angreng sia, tuai ţawng ni awm taka a ţawng vel chu  a nuihzatthlak duh bik hle.

"Tunlaiah misual ţawngţaipui an uar tawh lo. Rual pawl nan mi chhungkua rel ve zeuh zeuh tur an tia lawm" a awki ngai bawk hian a ti leh a, ka lo nuih ve hak hak lai chuan "Khaw nge Thiangtei?" a ti leh thut a, a inzawm lo thei mai sia maw. 

"Inchhungah a awm" ka ti a, a lo bu nghat a, "Ka kal aw ngaihlai Zote. Keimah ni lo i inleng hmaah khan zantin nui uar uar reng mai rawh" fiamthu a a tih hnuah chak deuhin step ah a chho a, kan khua a ti har lo ve a, a rilru a awm ang ang a puah chhuah pui phawng phawng ţhin te hian min ti hlimin in a ka awm chawt ţhin lai phei kha chuan a duty chhung pawh rei ka ti ţhin. 

Tlaiah Hmangaihsangan min lo biain "Zanin chu ka lokal hman lo ang" a ti a, damdawiinah a la awm aniang a ri mur mur mai. 

"A pawi hleinem. I laklawh deuh em ni?" ka tih chuan "Bethseby a hniam deuh a, ka awm ve rih a ngaih hmel" a ti a, he naupang nen hian an in ngaina phian a, leukemia vanga na mek naupang khawngaihthlak deuh kha a ni. 

"Inleng in nei em?" a ti a, kan neih loh thu a ka chhan hnuah pawh "I ngaihtuahawm loh ang tiraw?" a ti tel hram a, ka awmna hmun avang hian a ngaih a ngam sarh thei lo a ni ber. 

"Teuh lo mai tikhan rilru nuam deuhin awmpui rawh. Bethseby pawh lo dam leh vat rawh se" ka ti a, midang hi an ni ve em ka hre lova, fa neih chuan naupang damlo hi ngaihven lehzual a awl a, mahni fa ni miah lo thihna te hian min nghawng na vek thei hialin ka hre ţhin. 

Kan inbiak zawh a mut mai ka tum chu kawngka kik ri ka hriat rualin Rba leh pickup driver kha ka hmu tel nghal zat a, beisei loh lai tak hian an lo lang thut zel. 

"Ehe" ka ti hluai a, an pahnih chuan in melhin an nui ruh ruh a, Rba thawmhnaw chu a pangngai viau a, kan pickup driver chu a ni rawn inchei duhdah leh chu. Tawnzau leh boxer a ha tawp a, bata siliper bunin a sam te chu mumawl lo tawk hian a thur nuai a, mu tho hlim hlawt te pawh a ang alawm le. 

"In lokal dawn chuan lo sawi lawk ve ţhin ta che u" ka tih chuan an ţhu fel than tawh. Pickup bawk a lokal an nih ka ring. 

An piah deuhah ka ţhu ve a, kan driver chuan mei a zu khu leh tual tual tawh a, ka putea a lo luh chuan "Pa Sawm khawimaw zu chu" a ti ban charh a, a ţawng duhdahin peih lo deuh a ţawng te pawh a ang ţhin. 

"Khaw nge Bawiha?" Rba chuan a lo ti ve thung a, "Pindanah Thiangi nen phone an en a" tih pahin pindan lam ka kawk zeuh a, a ţhianpa chu a tho leh daih tawh. 

"I lokal thut zel a, min ti hamhaih ţhin alawm" ka tih chuan "Lal Matea alawm. Min rawn sawm thut a" tiin a ţhianpa chu a mawhpuh a, zu in an tum takah chuan pawnah kan ţhu chhuak leh ta daih a. 

"In ţha zel em?" a ti a, zep buang bar lovin ka nu dinhmun diktak chu ka hrilh ta vek a, Hiv+ a nihna erawh ka la sawi tel duh lo thung. 

"Mahni a zun leh ek thiar thei lo khawpa a awm hnuah pawh pneumonia an la ti ringawt maw?" a ti a, a natna diktak a hriat loh vang chuan mak a ti angreng hle. 

"Aw ti e. A chau angreng a, a buaithlak khawp mai" ka tih chuan "Ţawngţaipui char char a ngai a nih chu. Pathian kutah dah rawh" a ti veleh a, Ruattei nen an inang chiah. 

"Pathian kut a ka dah chuan a thih ngei dawn chu" ka ti a, a hma aia mak tih hmel zawkin min en a, ka thusawi chu a awih lo te pawh a ang. 

"Pathian i dem ve ţhin a ni maw?" a ti dam thlup tho a, ka beiseina a tih thlawn zin zia ka hriatchhuah phei chuan ka thin a rim hlur ţhin. 

"Dem pawh ka dem peih tawh lo zawk" ka tih chuan a lo thaw hak a, ka ti beidawng deuh niin a lang. 

"Tunhma a class a ka ţhutpui ber ţhin pa kha i la hria em? Saidinga kha" a tih chuan ka hriat thuin ka lo chhang a, class chhung a bengchheng ber leh ţawng chapo thei tak kha a ni miau a ni. 

"Vawiinah a thi. Ka thawhna damdawiinah, ka hmuh laiin" a ti nghat nghat a, "Eng nge awmzia? Accident tihna mi?" ka tih chuan "OD" a ti a, a reh zui vang vang a.

"Mihring hian kan chin kan hre lova, thi thut thei reng kan ni. Beidawn chang leh i duh anga thil a kal loh chang chu a awm ve bawk ang chu, chungte chu hringnun a bet tlat alawm. I nun beidawng lutukin i dem vel mai mai anih kha. I mamawh lutuk zawk. Chu chu nangpawn i hria ang" a ti a, ka chhang tawh lo. 

"Khawvel hi kan ram diktak a ni lo alawm. Min siamtu hnen a let leh vek tur kan nia, kan ram loah thlamuang deuhin kan awm a, kan ngaih a ngam leh lutuk ang a, thil ţha lo pui pui kan ti mai ang tih hlauin Pathianin kan hmangaihte min laksak ţhin a, anmahni hmangin khawvel hi kan ram nghet a ni lo tih min hriattir ţhin. Pathianin zirtirna min pek dan hi a chang chuan hriatthiam a har ţhin a,amah hmu tak tak tur chuan tlawm ral rak a ngai" a ti leh a, ka chapo awm ka hre hauh bawk si lo. 

Kan ti ti dun zel hnu chuan Saidinga kan sawi kai leh a, Rba nen hian kumtluanin an ţhudun a, an zia a inang lo viau thung. 

"Dinhmun inang lo ţheuh mah ni ila school form kan hak lai kha kan inan tlan lai ber a ni ngei ang. Kan kal darh a, a hran ţheuhin hringnun kan ziak a, kan ziah duh dan a inang lo viau thung si a" ka ti a, inhmukhawm leh chiah ila chu danglamna a nasa tawh viau ang. Kan dinhmun a inthlau lehzual tawh ang a, zir puitling ve ta lo tam tak chuab inhmuhkhawm leh kan hreh zawk ngawt ang. 

Ka nu ka awmpui veleh rih dawn a, ka kal tur pawh Hmangaihsangan min thlahin kan pahnihin ward ah kan chho dun a, Ruattei a lo buai khawp mai. 

"A khawsik a sang lutuk a, a thaw a hah deuh bawk sia" a ti a, mangang hmel takin ka nu pum zawnah a kuah a, awm a nuam lo nghal vek thei alawm le. 

"A zual deuh thut ni maiin ka hria" a ti sap a, ka nu kuah reng chung chuan thlaphan hmel takin a lo hawichhuak a, ka nu chu oxygen an pe a, a mit a chhing tlat a, a mutthilh leh mutthilh loh pawh a hriat theih loh. 

"Khawsik sang leh thawhah chu pneumonia in a ken tel alawm" lo tiin Hmangaihsanga chuan ka nu chal te chu a kutin a va dek a, hetiang a nih chuan mahni a awm a huphurhawm takzet a ni. 

"Engtin nge kan tih ang le? A ka a tui lo bawk sia, thil a ei ţhat loh phei chuan a chau lutuk ang" Ruattei chuan a ti chul a, keipawh Ruattei bulah chuan ţhu thlain ka nu kut ka vuan a, theihtawp kan chhuah tawh a, tih belh leh chuan tur pawh ka hre tawh lo.

Hmangaihsanga ber lahin ka nu an enkawl dan chu a sawisel ngai der lova, natna leh damdawi lam chinchang hre miah lo phei chuan sawisel lai tur pakhatmah ka hre lo. Rb-a khan 'i nu chu a boral ta a nih pawhin a thlarau a tho leh ang a, a ma inah ngei a haw tawh dawn alawm. Khawvel ai chuan nuam a ti daih zawk ang' tiin min hrilh a, mahse khawvelah in a la nei a, chutah chuan awmin min uap rih turin ka duh a, mi ţha tak a lo ni ngai lo a nih pawhin ka tan chuan a hlu a, khawiahmah ka kal tir phal lo a ni ber. 

"Awii...oxygen te an vuah bur bawk sia ka rilru a hah e. Ka hlauh ruk ang hi a thlen ka hlau. Hmangaihsang a na viau tawh tihna em ni?" Ruattei bawk chuan a ti leh a, Hmangaihsanga lo nui suk chu mak ka ti lek lek a ni.

"Oxygen an pek apiang an thi zel dawn tihna a ni hleinem. Hahdam rawh u" a ti dam thlup a, Ruattei nen erawh hahdam deuh a awm harsa kan ti viau thung. Ani phei chuan a nu tak tak damlo a buaipui hrep tawh a, tunah ka nu a ni leh a, pakhat a chan tawh a, pakhat a chan leh phei chuan hrehawm a ti dawn lutuk tlat a ni. 

Ka nu chuan zual lam a pan zel a, Ruattei nen in awm chhawkin kan mangan zia kan sawi chamchi reng a, Neihkimi a lo la lang ve lova, Zamtei thung chu a rawn kal ve ta fo mai. Nu Biaki te chuan dam takin min chhuahsan tawh a, keini kan chau tulh tulh thung a. Ka nu tak phei chu a chang chuan a thluak pawh a fim tawh lo ni ten ka hre ţhin. 

Zun a lo cheh palh phei chuan awngphah thlak dawnah chawi sawn a ngai ţhin a, a taksa a invenna hi a tlahniam nasa tawhin amah kan chawi sawn a, awngphah kan thlak chhung lek te hian a khua a lo sik hman ţhin a, a thih hun nghak tawp ang vel kan ni. 

Mahse lo thi ta se tu'n nge min buaipui ta ang? Ka putea in ngei a a ruang dah a duh tlat a, a damţhat lai a a sawi lawk diam tawh a ni. Ka putea lah chu Yma in an ensan lai mek a nia, min khawngaihtu lokal khawm ve te pawh khawiah nge kan ţhuttir tak ang? Yma bungrua engmah kan hmang thei lovang a, ţhutthleng takngial pawh kan hawh thei lo ang. Yma chu mipui tan a ding leh mi ţanpui tu a nia, mahse mite ţanpui ţhin tu hian engati nge a ensan leh tho zel le? 

Ka nu thawk a ran leh takah chuan rang takin oxygen ka vuah sak a, a mit a meng a, a mitmeng a dik miah lo. Ka mangang lutuk chuan nurse ka ko a, Ruattei ka call vat bawk. 

Nurse pawh chuan a rawn en thuak thuak a, tih vak ngaihna a hre bik lo. Ruattei te nghakin ka ţhu leh hnawk a, damlo awmpui tu dang ten min rawn ţhutpuiin min thlamuan mawlh mawlh a, an thusawi pakhatmah ka hre thei lo. 

"I nu hla duh deuh ka'n play ang e aw" min nghawk salh pahin Pa Mawia chuan a ti a, an ni pawh hi an awm rei ve tawh khawp mai. 

"Lungngaihna leh manganna ten nitinin min chim reng thin,

Natna te leh retheihna ten min hual reng thin a;

Tanpuitu leh min hnemtu tur leiah ka hmu lo,

Tanpuitu Lalpa, ka ngai em che" ti a ka hriat ngai loh zai chu ka ngaithla a, ka nu nen a kan dinhmun nen a inhmeh viau mai. 

Chu hla chu a play nawn tluk tluk a, nurse te pawn an rawn hau lova, damlo dang pawn an sawisel lo. 

Ka phone ri chu rang takin ka chhang a, Ruattei a lo ni. 

"Hmangaihsanga ka kaitho zo chiah a, U Remremi leh U Zamtei te nen kan pali in kan lo phei dawn. Lo mangang lutuk duh suh aw, a nat lutuk vangin a mitmeng a buai mai mai aniang" a rawn ti hlawk hlawk a, a tlankual nasa aniang a hah hmel emai.

"Hmanhmawh lutuk duh suh u. Hei midangin min men pui ţhap a, an fel lutuk thla an ti muang tak tak a ni" ka piah a ţhu te melh ralh pah hian ka ti a, cabin a awmna tur nei ve lo ho vanneih ve na a ni. Kan awm khawm luih a, a na zual deuh inhnemin kan inthlamuan tawn a, pawisa pawh nei ila cabin ai chuan tun a kan awmna hi ka thlang daih zawk ang. 

"An va ti lawmawm ve. Ka insiam mek a, i hlauhthawn deuh leh ti hian min be pah reng mai rawh. Kan lo tlai chhe lovang falkawn te chu a hnai emai kal chhung a rei lo" a ti mawlh mawlh a, a ri  rawk rawk reng bawk a, eng eng emaw chu a ti pah chiang a ni. 

"A ngai lo..tikhan insiam rawh. Chanchin kan inhrilh leh zawk dawn nia" tih leh phone dah ka rual a, ka nu chu ka bia a, a beng bulah ka phun mawlh mawlh reng a, mahse hria angin a awm lo. Min ngaihsak lova, min chhawn hauh lo bawk. 

Pa Mawia chuan ka nu tan hla a lo la play ve reng a, min awmpui tu te ho pawh an ţawng tlem sawt khawp mai. 

"Ka ngai em che Lalpa, ka ngai zual che,

Leiah hian hlimna ka hmu si lo;

Lungngaih leh mangan, retheihna zawng pawh,

Isu, i kiangah a bo tawh ang" tih lai chang chuan mak tak maiin thlamuanna min neih tir a, sawi lo mah se ka nu hian lungngaihna thuk tak a nei reng ţhin a, ka puten an hnawhchhuah aţang khan hlimna tak tak a tem veleh tawh ngai lo. Mahse chung zawng zawng chu vanramah chuan a bo vek tawh anga tih ten ka ngaihtuah a, ka nu hi a dam leh ka duh a, beiseina ka nei tawh lo thung. Chuvang chuan ka ngaihtuah dan zawng pawh tlemin a danglam ta deuh a ni. 

Nurse in ka nu a rawn endik leh lai a Hmangaihsangan min lo call na chu ka chhang vat a, "Eng nge chanchin?" a rawn tih chuan "A ngai reng a ni mai. An rawn tih dan aţang chuan a thaw chiah an en tawh te pawh a ang" ka ti a, ka ţah khat tawh nen, Hmangaihsangan min lo biak chuan ka hnuk a ulh ţeuh a, ka ţap ve lek lek a ni. 

"Kan lo thleng har tawh lo ang" a tih lai chuan min awmpui tu ţhenkhat chu an tho a, an ţhutna lam zawkah chuan nurse in screen a zar duh a lo ni. Chutianga a tih kher chhan chu ka zawt buang bar duh lova, damlo dangte an thlaphan lutuk loh nan ka nu chu a hliah daih ni maiin ka hria. 

Hmangaihsanga be reng chung chuan ka nu khum bulah ka ţhu thla leh a, a thawk chu a pawn lang (shallow) riauin ka hria a, mihringin thawk kan lak pangngai ang hi a ni tlat lo a ni. 

"A thaw hi a dik lo in ka hria...ka rawn biak hmasak ber cheu kha chuan a thaw kha a hah a" ka ti a, keimah tak pawh ka mumal tawh lo. 

"A kutah khan vuan la hlauthawng suh. Bia la a tan a hriat nuam tur deuh te sawi la" a ti a, a ţha leh mai ang a tih ka ring deuh a, mahse chutiang chu a sawi lo. 

Ka be mawlh mawlh a, Hmangaihsanga nen chuan ka biak pawlh nawk nawk ni berin ka hria. 

"Aw, Lal Isu, i lokal hun kan nghakhlel em e,

Riangvai faten kan nghak reng e, i ram buatsaih chu;

I ram êng mawi kan thlen hun chuan, he lei kan ngai lo'ng,

Chatuanin hlimin kan léng tawh ang" ti a Pa Mawia hla play chu ka bengah chiang takin a ri a, thil dang ka hre lo thung. Nikhaw hre lovin ka awm lova, mahse engmah ka hre mumal lo.

Ka mittui ka dang zo tawh lova, tuman min hnem theih pawh ka ring lo. A hla duh ber ngaithla reng chungin ka nu chu a ral riai riai tih chu ka hria a, phone pawh ka bengah ka la chuk tuah reng a, ka nu kut ka vuan ngawt ngawt bawk. 

"U Zote, ka rawnkal ve a nia aw. Ka nu khan min lo nghak rawh se aw" U Remremin a rawn ti lauh lauh a, mahse U Remrem i tlai, i tlai lutuk rilruin ka ti mawlh mawlh a, ka awm tawt lutuk avang chuan ka ţawng chhuak thei lawk lo thung. Midang an che zung zung a, kei erawh ka laktlak loh viau mai. 

Milim ang maiin ka ţhu a, thil thleng thut chu ka la pawm thei lo a ni ber. Hmangaihsanga te unau lo lut pawh ka lo en tawp a, an hrilh a haiin sawi tur an hre lawk bik lo. Ka nu kha a chat mai bik lova, an nang hman lo chiah chiah thung. 

CONT...