KA HRINGNUN THAWNTHU-24

KA HRINGNUN THAWNTHU-24

Ka nu ruang an zawn chhuah lai chu ngawi rengin ka thlir a, ka ţap ri lova, ka mittui ka hru seng lo thung. Mipa awmchhun a nih avangin thil ţul ang ang chu Hmangaihsangan a buaipui sawk sawk a, Zamtei chuan bawm lo ching felin drip la hman loh te chu kan khum piah chiah a nupa rethei ve tak te hnenah "Lo hmang zawm rawh u" tiin a pe a, eitur la hawn miah loh tam tham deuh a pe tel bawk. 

"Zote, khawiah nge thawmhnaw leh mut bu vel in dah?" a tih chuan bungraw dahna hmun bik deuh chu ka kawk a, Ruattei chuan ka nu ruang an zawn chhuah tak kha a zui a, U Remremi leh Zamtei te nen kan awm hnufual deuh a ni. 

Damdawiin a rei tak lo awm tawh, kan nufa a min hre ţha ve tu ho chuan min hnem liam liam a, ka lungngaihna min lak kian sak lo mah se a lawmawmin dawn sawn a nuam takzet a ni. 

"Mami saw lai chhuar langsar deuh a bag dum pawh saw in ta a niin ka hria" tiin Pa Mawia nupui chuan Zamtei a hrilh a, khum piah bang hrul a chhuar ding chu a kawk vang bawk a, Zamtei kal hnu chuan khumah ka kiu ka nghat a, ka kutphahin ka hmai ka hup a, nichin lawk kha chuan he khumah hian ka nu a la mu a, mahse thawklehkhatah a bo thut a, khum a ruak huai a, tawrhna leh lungngaihna te, khawharna ten min luhchilh zui zat bawk. 

"Zami, U Zotei phone hi a private a private mai" U Remremin a ti ri ka hria a, vibrate a tih ve na a ni. A nghawr der der chu hre ve tho mah ila ka ngaihven peih lo, tumah ka be chak lova, ka chau ngawih ngawih a ni ber. 

Phone a nghawr leh rual chuan Zamtein la vatin a lo chhang a, "Zotei ka ni lo...a u zawk ka nia" a ti ri chu ka hria a, chu chuan min nghawngin eng emaw ti riau hian rilru a khawih a, a thusawi dang pawh ka hre mumal tawh lo. Ka nu a thi tih leh a u ka nia tih chu ka rilru a awmchhun a ni hial awm e. 

"Thiangi a intia, Thang Lm-a leh ţhenawm khawveng te nen in kan singsa fel tawh a tia. Kan inah kan kalpui dawn lo mi?" phone biak zawh a a tih chuan amah pawh en lovin lu ka thing a, ka nu khan a in ngei a vui a duh tlat alawm.

"Zami thil nawi te te kha chu hawn duh suh a hnawk mai mai" Hmangaihsanga aw ka hriat pawh chuan ka awmdan ka la siam danglam chuang lo. Duhthusam phei chuan keimah chiahin awm ila, mitmei ven tur awm lo bawk se ka ka ti. 

"Ka hawn lo..thawmhnaw leh rizai vel a ni mai. Damdawi leh eitur chu hei ţhenawmah hian ka dah a, hman zui theih a awm nual maithei ka tia. Ka paih ţeuh bawk a" a ti zung zung a, "Khawi a lian zual deuh lo la rawh" Hmangaihsanga chuan a ti leh a, ka pa thih khan engkim a kutah tlain a buaipui vek a, tunah ka nu a ni leh a, a buai veleh lo thei si lo, kan veng yma bungrua kan hawh thei dawn bawk si lo nen, tih buai duh lo viau mah ila a buai ber tur a ni lawi bawk si a ni.

"Zotei hi" Zamtein a tih chuan "Ka rualin haw rawh se" a ti hmak a,  a reh leh vang vang hnuah hnunglam aţangin ka koki ah dimtein a rawn dawm a, a rimtui hman aţang chuan Hmangaihsanga a ni tih ka hai hauh lo. 

"Kal ang le" zawi sup a tih pahin min kaitho a, kan awm rei bawk a min thlah tu pawh an ţhahnem ve viau a ni. 

Ruang phur tu motor chu zuiin an hnungah kan tlan zel a, ngawi rengin pawn lam ka thlir a, ka dang ro lutuk tih hnawn nan tui ka in leh zeuh ţhin a, kan hma lawkah ka nu ruang a awm a, chuti chung chuan a thi hi ka la awih thei chuang lo. Ka ipik lutuk chu ka thaw leh hak ţhin a, ţap vak vak thei ila duhthusam a nih laiin ka rilru a nat lutuk vang nge ka ţap chhuak thei der lo. 

Hmangaihsanga lah chu a ngawi ve char char a, min hnem ngaihna vak a hre lo a nih ka ring. A khat tawkin ka kut a rawn vuan leh ţhin a, chetzia a a lantir bak chu eng thu mah a chhak chhuak lo. 

"Khaw nge midang ho kha? U Remremi te kha?" tham deuh ţiak a ka tih chuan min rawn melh zawkin ka khabe ruh kualah a dawm leh a, hmalam en ding ngar chungin ka bianga mittui luang chu a tuai a, a kut a la let leh vat thung.

"Taxi in min zui ang. Ruattei chu a hmaah sawn" a ti a, ruang phur motor ah chuan Ruattei a chuang ve tih reng ka lo hre lo. Zamtei te nen an inzui turah ka ngai a, rilru a fim lovin hriatna a paw ruai a, nung mawl ve tawp ang chauh ka ni rih. 

Ka biak zawm leh hmain phone a ri a, "Hruaite" a tih takah chuan ka pa boral lai a lokal ve a cousin kha a ni tih ka hre nghal mai a, "Nia a buaithlak khawp mai. Kan lo thleng ţep kulikawn kan lo lut tawh" a ti a, phone a dah hnu chuan "Hruaitea chu kan inah a awm tawh em ni?" ka lo ti vat a, a lo bu nghat a, "Ţhutthleng chu in veng tawn tirh school a mi an hawh a nih hmel" a ti a, yma ten min buaipui dawn lova, engkim kan ngaihtuah chawp a ngai a, a zahthlak khawp mai. 

A phone bawk chu hmet lehin Hruaitea tho chu a bia a, "Pu Sawma khan nachang a hriat loh takin ngaihdam dilna kha lo theh lut hrim hrim rawh u. YMA hruaitute pawh chawpchilh a ţhu khawmin an ngaihtuah ţha ve thei a, chhiat na lam a ni bawk a an ngaidam thei mai ang" a ti a, mit chhingin a thusawi chu ka lo ngaithla tawp a, Hruaitea tak pawh a zahawm. Ka pa boral hnuah kan la inhmu leh lova, ţhian kan nih loh bakah keimah chuan hmu ila ka hre tawh lo ang tih ang vel a ni. Lehlamah ka putea hmelhriat leh ţhian te an laktlak loh a, ţhenawm khawveng ten an sawihmuh loh phei chuan YMA hnen a ngaihdam dil chu ngaihtuah pawh an ngaihtuah chhuak hauh lovang.

Motor a tih din chuan muangchangin ka meng riai riai a, dawr kawtah min dinpui a lo ni. Kan hmaa ruang phur motor tlan zel a, ka hmu pha lo thuai bawk. 

"I ril a ţam em?" tih pahin dimtein ka biang chu a rawn tuai leh a, "Aih ţam lo..mahse ka tui hal a reh thei lova, coffee chu in mah ila a pawi lo ang" ka tih chuan "Ka han la ang" a ti a, a kut a ka biang khuap reng chung chuan ka chal a fawp zauh a, reilote tak tak chauh a ni. Min ngaihtuahna leh hrehawm tihna mitmeng te chu ka hmu ve vek a, awm lo ngat se zawng, dam ve dan ka thiam tawh pawh ka ring lo.

Dawr chu lei dep a awm lovin a han kang ve deuh a, step a Hmangaihsanga chho chu ka en reng a, Zamtein a han fin ka hmuh leh lek phei chuan tukverh a dakin hnung lam ka hawi a, taxi pakhat a lo ding ran mai.

Coffee an lak hnuah Zamtei nen chuan dawr kawtah an inbe kawi leh rih a, Hmangaihsanga ţawng lai chuan a nau chu a lo bu leh nghat ţhin a, tih tur eng emaw a hrilh a nih ka ring. 

Coffee min lo pek pah chuan "Hmanhmawh suh aw" a ti a, lo ţhu lut mai lovin ka ţhutna lam chu nghengin pawnah a ding a, tukverh a ka dah chhuah leh hnuah Hmangaihsanga chu en chhoin "Kan inah mi an awm ve em?" ka tih chuan a nui suk a, ka nu hian ruang kil tu a neih loh te ka hlau a, nakin zel thlenga ka nat theihna tur thil a thlen ka hlau bawk. Mahse Hmangaihsanga nui hmel ka hmuh chuan tlemin ka awm a nuam deuh a, mi tam tak ka beisei ngam hauh lo mah se mipui an awm loh tawp ka hlau a ni ber. 

"Neihkimin khawilai ah nge kan lo nghah dawn cheu a ti" Zamtein ring angreng taka a tih chuan ka lo ip chawi a, mittui bawkin min tibuai lehin ka hmu phe leh ruai tawh. Ka haw tawh hauh lo a, mahse a dam lai pawh a rawn hmu duh mang si lo a thih veleh a rawnkal a tum chu ka hrethiam lo deuh a, ka nu tan engpawh tise a thi tawh miau a, a damlai a a tihsak a nih loh chuan a hre tawh dawn chuang lova, a tan hlutna a nei tawh lovang. 

Inhmuh theihna remchang a hrilh hnuah Zamtei pawh chu a kalsawn veleh mai a, Neihkimi zawk chuan ka nu ruang chu hmu lo tawp mah se pawi ka ti lo. A taksa cher chhiat zia a hmuh phei chuan damchhungin a inchhir tawh ang. 

Motor chhunga a rawn ţhut luh leh hnu chuan kawngkhar pawh phui pahin "A zia deuh em?" a ti a, "Aw..ka tuihal zualpui chu a rehin ka hria" ka lo ti a, tui a lei tel bawk a, chu chu ka bulah rawn dahin kan tlan chhuak leh a. 

Neihkimi te min lo nghahna hmunah chuan kan ding leh a, Siampuiin Bawiha min rawn hlan a, ka fapa ka hmuh ngat phei chuan lung a chhiain ka mittui ka hru deuh reng a, ka nu khan a ngai a, a hun tawp lamah pawh an inhmu hleithei si lo. 

Sangzuala nen kan inţhen hlima ka nu ka pan tawp ni te kha ka hrechhuak a, khang hunlai kha chuan a la ţha suah a nih kha, rilru hah hmel pawh a pu lova, min tirh bo tumna pawh a nei lo. Ka insawifiah hma hauh aţangin min lo pawm thlap a, a hnenah ka awm ve zel thei ang tiin min hrilh a nih kha. Bawiha nen hian an in awm nitin a, damdawiin a kan luh hnuah pawh a ngaih thu a sawi chamchi ţhin. 

Kan in peng a ka chhuk chiah chu tu emaw hian min pawt lawp a, ka enchian chuan Zonuni a lo ni. Ka ţhiannu ve ber ka hmuh takah chuan Bawiha pawm chungin rem lo deuhin ka kuah a, ka ţap a ni nghal der mai a, sualin hnathawkin mahni inkhawngaihna ka nei lo thei lo a, kan retheih tawh sa mai bakah ensan kan ni lehzel te chuan lung a ti chhe zual a ni.

"Chanchin ka hriat khan rawn phei ve nghal ka tum a, mahse Rb-an helamah lo nghak mai ang a tia" ka ţah nasat loh deuh hnu a a tih chuan "Engtin nge in hriat?" mittui hruk pah hian ka lo ti a. 

"Kan doctor-a hnen aţangin kan hria. Keini tak chu min hrilh lo na a ka nu a boral tiin chanchin a sawi vat a ni awm e. An inhrilh pung zel a, department hran hranin group kan nei hrang ve thlih thliah a, group hrang hrangah a message an forward kual a, chhuahsan tawh mah ula nu angin a la ngai tho niin ka hria" a ti a, "Hawi kual la, mi an tam em hi. In nufa hrechiang tu chu tlem te chauh an awm ang a, mahse an thawhna hmun a hotu ve lai te mit tlun loh hlau ţhahnem tak an awm a, an lokal chhan chu engpawh nise an tam hrim hrim chuan vengchhungin an hmu mawi tho ang che u" a ti leh a, milian an nih tawh chuan a hlimawm lam emaw chhiatna lam pawh nise mi an ţhahnem ţhin reng a ni. 

"Beisei ka neih tawh loh hnu kha chuan ka nu hian ruang kil tu takngial pawh a neih loh ka hlau ţhin a, kan in an khah pawh ka ring ngai lo" ka ti a, Hmangaihsanga hian ka thlaphan leh kan mawi loh a hlau ang a, ka pa anga ropui deuh a a kal theih nan hetiang thil hi a ti niin ka hre ber. A chhan chu amah hi thu thehdarh vak chi a nih loh vang a ni. 

"Chulam chu hlau reng reng suh. Tlaivar thei chu tam lo mah se vui naah chuan mi tam tak an lokal ngei ngei ang" a ti a, Zonuni nen a kan chhuk dawn lai chuan Hmangaihsanga leh Hruaitea te lokalin "Zote, i nu kha engtik kum a piang nge khah?" tiin Hruaitea zawk chuan min zawt a, ţha deuh a ka hrilh hnuah "A pianpui unau te hi" a ti leh a, min hringtu nu leh ka putea hming bak ka hrilh lo. An unau an rual a, chuti chung chuan ka nu hian pianpui unau pahnih chiah a neiah ka ngai a, chutiang chuan midang pawn ngai rawh se. A nuţa leh laizawn dangte chu sawi tel ve tlak pawh an ni lo. 

"Kan ngaihdam dilna kha min hnawl sak em lo turah ngai ila, Hmangaihsang duh leh lo zu luhpui la, keichuan chanchin ka lo ngaichang rih ang" a tih leh takah chuan ka nau pawm lai min laksak a, a kut awl lam a min kuah hnuah kan inlam panin kan chhuk a, ka putea hnen a awm tur a kan kal ni ai pawh khan inchhung luh ka huphurh zawk. 

"Dr. Hma...ah Sir Hma..eng lo Pu Hmangaihsang" Zonuni chuan a ti nuaih a, "A va mak nawk nawk ve" lo tiin a nuih a za viau mai bawk a, "Ka buai ţhin a" tim daia Zonunin a tih chuan "Ka hming bula i dah ho kha paih vek rawh" a ti nghat a, ţawng bung viau mah se lungawi lo hmel a pu chuang lo. 

"Nichin a mi kha Dr. Hruaitea tiraw?" a ti a,a nih thu a hrilh hnuah "Ehe...khawiah nge a thawh tak? Tunhma kha chuan kan damdawiin ah khan a thawk ve ţhin sia" mak tih hmel deuha a tih leh chuan "Falkawnah..TB bik enkawlna building ah khan a awm" a lo ti veleh a, falkawn damdawiin ah kan awm reng a, Hruaitea ka hmu ngai hauh lo. Anni lah hian engmah an sawi ngai bawk si lo.

Ka ngaihtuahna chu hria ni awm takin "Tunlai tak chu a chawl" a ti a, an cousin te leh an hnathawh te hi uanpui nan an hmang ngai lova, an sawi chhuah awm pawh ka la hre lo.

Ka nu ruang kilin a unaute an lo ţhu ţhap a, ka thin a ur kher mai. Hmangaihsanga hnenah chuan "Sawng ho saw hnawt haw vek rawh" ka ti ram hmak a,min chhang lem lovin "Ruattei bula a awl laiah sawn va ţhu rawh u" a lo ti daih thung a, ka melh hrak a, "A hun rih lo" a tih leh hnuah dim deuhin min nam kal a, thil awmdan hrethiamin Zonunin ka banah a lo pawt ve thuai bawk a, Hmangaihsanga erawh a rawn lut ve ta lo. 

Ka nu kan vui zawh meuh chuan inchhung a ruak huai a, a unaute erawh an la ţhu ţhap reng a, Ruattei te unau zarah inleng pawh kan la ngah khawp mai. Ka putea ngeiin thutiam nei chunga ngaihdam dilna an theh luh kha yma te chuan min pawm sakin kan mualpho lo hlauh a, thlan laihna hmanrua vel pawh zawn chawp ngai lovin kan awm thei a ni. 

"Matei unaute maw in nih a?" ka nu Chhuanin a ti nem hlawi a, "Ni e..tu nge in nih ve a?" Zamtei chuan a ti khawl mai a, ka nu unaute pawh an hrilhhai hmel khawp mai.

"Atei pianpui unaute kan nia" an ti a, a kuang kha thla te an lakpui ve thlap a, Zamtei hian a hre lo tak tak nge a hre lo der pawh ka hre lo e a. 

"A ni maw? In va rawn lang ngai love. Ka pa nen an inneih lahin pute Sawma chiah kan hmu a, a damloh lai lah khan in reh vei ţhap bawk sia, Krista zara in unau chawp vel mai mai in ni lo maw?" meinei deuh hian a ti a, tuman an chhang let ngam lova, Pute Sawma lah chu ka nu boral hnuah chiah a hria a, a ko ve nghal thei mai bawk sia, Zamtei hi chu a ţha ve hrim hrim e, Neihkimi tih loh tu mitmei mah a veng ngai lo. 

"Kan lo hre lawk lova" ka pu Raman a tih chuan a rukin ka lo nui a, ka putea khan vawi tam tak a hrilh ngei alawm. A natna vangin an hlau zawk a nih kha. 

"A nih chu mawle. In inpawh vak lo a nih dawn chu. Zote, naktukah ka ţhianten an rawn ral ve dawn a nih hmel. Ral tur dang pawh an tam ang. Mahse pindan lam saw hawng tlang tawh lo mah ila a pawi lo" a ti zat zat a, inla tlangnel fahran a bualin a a lut chu a uak zui ţhat ţhat a, bualin hnaih ber a awm Hruaitea pawh a lo nui deuh tat tat mai. 

"Mate, i putea hnenah hian i awm zui zel dawn em ni?" ka pu Tlanan a ti dam thlap a, a insiamţhat theih takin tiin "Awm reng ang chu. Awmna tur dang a awm chuang hleinem" ka ti a, ka aw pawh a nem hran lo khawp mai. 

"Duh leh i rawn insuan lut thei tho a nia, ipi leh pu te pawn an sawi reng ţhin che a" a ti a, ka lo ner nawk chu a hmu hman maithei a ni. 

"Chu lam chu sawi rih lo teh ang u. Inleng an la awm reng a, chhungkaw thil chu nakinah, mi an rem deuh hunah kan la sawi leh dawn nia" ka pu Zelan a lo ti ta hlauh a, an vai hian ka ngaina lo vek a, lem an chang tih ka hre bawk. 

An fing phakar a, ka nu kha chu ka pa nen an inneih lai khan an pawh theih miah lohin a awm ang a an pawh huam ngam lo a nih ka ring. Ka nu khan engmah a sawi ngai lova, a ruk chuan an lo in do nasa viau maithei a ni. A damloh lai pawh a rawn ngaihsak miah lo kha a thih veleh an rawn lang kim ţhap lawi a, mipui tam zia leh ka nu fa hrawn te vanga rawn kal khawm an tam zia hriain min be ţha huam a, hamţhatna bak an ngaihtuah lo. Hmangaihsanga te unau hi inrawlh lo sela chu ţhat an chhuah hauh lo ang. 

"Thang Lm-a sawn chaw ei turin a beisei deuh che a nih hmel" Hmangaihsanga chu ka lo melh ha a, ka hriatthiam loh zia a hmuh chuan pawn lam a kawk a, kawngka bulah Thang Lm-a ngei mai chu lo dingin min hmuh rual chuan a kut a vai zuk zuk a, "Khaw nge in ei ve dawn? Neihkimi te kha an haw tawh em ni?" ka lo ti ve thung a. 

"Chaw ei turin an haw a zanah an lokal leh ang. Keini chu saw pawnah sawn an siam" a tih chuan "Khaw nge Bawiha hi?" ka lo ti leh a, inleng kawm pahin ka melh ru reng a, ka hmuh lohna a rei tawh.

"Zamtei ten an hruai haw a nih kha" ka ţhutna sir lam a din pah hian a ti a, Hruaitean a rawn be buai leh rih a, keipawh ka la kal mai bik chuang lo. 

"Zote" Thang Lm-a chuan min lo au leh a, a kut a la vai zuk zuk reng bawk a, min hruai chhoh a tum ruh khawp mai. 

"Han ei lawk la" ka biang a tawh zauh pah hian Hmangaihsanga pawh chuan min lo nawr leh a, ka putea lo lut chu rui chhe lo mah se a mitmeng a ţangin a rui tih ka lo hre nghal thei. 

"Sangte in awm lo ang tih ka va hlau ve aw. Ka u lah a boral thut mai sia, ka hamhaih khan tih tur ber pawh ka hre lo, awm lo ula chu kan mualpho viau ang. In zarah mawi leh ropui takin ka u kan thlah liam thei a" a ti a, a ţap dawn ta mai, "Ka u khan la hrethei se chu a lawm ve ngawtin ka ring. Engkim in buaipui a, ka tih ai in ti vek a, lawmthu han sawi vak ngaihna pawh ka hre lo" a ti ţuau tawh a, mi la tam deuh se chu an en duh khawp ang.

"I ti ang lo emai Pu Sawm. Kan tih tur kan ti mai a nih kha. Hetiang hun angah hi chuan kan buai rum rum a, ngaihtuah vek sen a har alawm. Lawmthu sawi a ngai lo" Hruaitea zawk chuan a lo ti a, ka putean Hmangaihsanga kut a la vawn tlat laia ka din chhuah chuan  "Hei matei pawh a lawm ang. Kan tih ngai loh a engkim min tihsak chu thuhran, in zarah mi tam tak lo pungkhawmin engmah inzawn chawp ngai lovin kan awm a" a la ti lehzel a, Hmangaihsanga chuan min lo enin a meng tal tap a, a kut pawh let a tum a, ka putea chuan a thlah duh si lo a ni. 

"Lo han kal rawh" a tih hnuah ka putea chu eng eng emaw a hrilh a, ka kalsawn nghal daih vangin an thusawi erawh chu ka hre ve vek lem lo. 

"Helamah ei an siam tho a sin" Thang Lm-a hnen a ka tih chuan "Ka nu siam a tui fe zawk. Bakah i chauh hmel a, kan inah reilote tal lo chawl hahdam rawh" a ti ve ngei a, ka tluk palh a hlau lutuk te chuan min pawm lo chauh a ni ber. 

"Thiangte hei Zotei chu a lokal" tiin pawn aţangin a au lung lung a, Thiangi pawh lo chhuak nghal vatin a pawr deuh fap a, a mit a buiin a sen deuh ram a, ka nu nen khan an in ngaina in nu ang chiahin a en ve a, a khawngaihthlak reuh khawp. 

"Ninawm e..Thang Lm-a hi min hruai chho lui ţalh a, in lamah tih tur a tam dawn tehreng nen, bakah kan chenpui ve loh te an buai ber a a zahthlak alawm" a ti hlak hlak a, ka ngaihdan chiah a ni. Ka nu unaute hi fel se chu Hmangaihsanga leh Hruaitea te kan tibuai bik hauh lo tur a nia sin mawle. 

"Ho mai mai..lut ula chaw va ei ţeuh rawh u" a ti a, amah zawk chu a let leh daih thung a. 

A nu pawn min lo be ţha viau a, chaw ei te min siamin mihring nun ho zia a sawi malh malh reng a, Thang Lm-a fanu lah chuan min nel ve tawhin "Anu Zote i kawr chu a va mawi em em" te a lo tia, kawr mawi tak ka ha hauh lo, min hnaih a chak vang zawk a ni. 

"Kawr mawi sawina hun a nih loh hi. Tv va en rawh i pu leh i patea te  pawh an awm kha" a pi chuan a lo ti a, "Fanu ka nei bawk si lo, kei lo hmeichhe dang a hmuh chuan a nel nghal vek zel mai ni" a tih zawm leh a, hreh deuh a Thang Lm-a fanu Enkawli inher chu pawt letin ka bulah ka din tir a, "Ti hian lo awm ve rih rawh se" ka ti a, Enkawli te pawh chu a phur khawp mai, chaw ei laklawh laiin ka sam te a lo khawih thul, Enkawli anga min ngaisang tu hi an vang ve ngawt ang. 

Ka nu boral aţangin kar khat a liam a, ralna pawh kan dawng hnem khawp mai. Ka pa nupui a la nih miau avanga ral an awm a, Ruattei te unau ho vang liau liau a ral an awm bawk a, ka ţhiante chu tlem te chauh an ni. Inleng kan nei lo hma a, hei chu mak ka ti lem lo. Ka nu unaute ho erawh nitin an lokal a, be ţha duh ngai lo mah ila ţha deuhin min biak zawm reng tho.

"Atei hi chu a luhlul ve a, pasal a neih pawn ka lo tlawh ang che ka ti fo alawm. A duh tlat lo a, in mihran hmak kha a duh dan zawk a nia, Sawma a fin tih phei chu kan hre ve lo hrim hrim. Hria ila chu phal lo mah se kan hmu lui tho tur a nia, hospital a a awm lahin Sawma pawn a zep tlat a, a thih hnuah min rawn hrilh chauh a, kan lokal nghal rum rum kha a nia" ka nu Chhungin a ti hluak hluak a, diktak chuan keimah min enkawl a duh vang leh heng ho hian min ngaihtheih tlat si loh avangin ka nu khan in a chhuahsan hma a, an ni ho an in ngainat ang hian ka nu kha chu an ngaina ve lo. Unau thisen zawm ngei te pawh nupui pasal neih hnu emaw inhmuh khat lutuk te hian inpawh a har tawh ţhin a, ka nu thihna hian a nghawng ve pawh ka ring lem lo. 

"A dik chiah..keipawn ka be fo lawm. Kan pa'n inleng a duh lo a tih loh leh ka hmu duh lo che u a tia, kal lui ţalh dawn ila kal sual a hlauhawm bawk si" ka nu Chhuani pawn a lo ti veleh nghal zat a, an thusawi chu ngaihthlak a nuam lem lo bawk a tiin pindanah ka lut ta daih a.

"Pi Atei chu aw..a reh ta vang vang mai sia" Thiangin a rawn ti lut a, amah pawh en lovin pawn lam ka thlir daih a. Ka nu neihchhunin min kalsan ve ta mai chu a nia, hun a rei anga, nu tello a awm hrehawm zia te, ka tan a lo hlut ţhin zia te ka la hrechiang telh telh ang. 

"Thiangte" Thang Lm-a au ri ka hriat chuan nui chungin Thiangi ka en a, a ning lutuk meng kual vel chu hmuhnawm tham tak a ni. 

"Ka ning e..a au ring thei si. A thu han awih lo dawn ila a palian ropui si a, ka lu pawh hi a hum bo vek thei ang chu" a tih hlak hlak lai te chuan "Thiangte" a lo leh ţhin a, "A duty dawn lo em mawni le" ti niah niah chungin a chhuak ve ta tho.

Ka nu unaute thawm ngaithla a ka ţhut reng lai chuan Hmangaihsanga a lo lut a, ka bula a lo ţhut ve rual chuan a rimtui hman rim pa tak chuan min zem nghal chiai chiai a, khua a tlai ruih tawh a, vawiin chu a tlai khawp mai. 

"In leng an awm em?" a tih chuan "Sawng ho bak saw an awm lo" tih pahin pindan kawngkhar ka kawk a, a lo ţhen suk a, ka ngei zia a hre ve miau alawm.

"Rilru kap tu i nei em?" a mitmeng ril ruih a min en ran chung hian a ti a, ka lo thaw deuh hak a, ka awmdan dik lo deuh hlek a man nghal zung zung bik ţhin te hi mak tih chang ka ngah mai. 

"Anni ho sawn eng nge an lo tih ve sek niang le? Ka nu chanchin an sawi lahin a chhe lai bak an sawi ngai der si lova, an tawrh loh hmelin lungngaihna chhe te mah an nei lo tih a hriat a, eng chiah nge an duh le?" ka ti khawl khawl a, ka ngaihtheih loh zia a hriat theih ka ring. 

"Eng nge an duh i rin?" dam thlup hian a lo ti a, a hmel lah chu hmuh a hahdamin thinrim leh kap tu nei ve lo ang mai a ni. 

"Ka hre tawh bik nang..ka pa kha a hausa a, ka nu hian pawisa min hnutchhiah an ring te pawh aniang chu. Rilru chhe hlawm leh lutuk mai, pawisa menin an meng a, an hamţhatna tur bak ngaihtuah an nei lo" ka ti hlak hlak a, hnar ka duh a, kei a thusawi mai mai chu engahmah an ngai mang bawk si lo, ka ipik ţun reng ringawt mai a ni. 

Ka ding hluai chu a malchungah min lo pawt ţhu leh hnawk a, ka kawngah a kut suih bet nghal hmiahin ka nghawng zawnah a thaw lum ham ham a, "Vei lutuk duh suh. Pawisa chu lo dah pawh nise i phal lo chung an la lui thei lo. An thlem che ang a, i rilru hneh an tum ang a, chuzawng chu an tih theih a ni mai" a ti a, a thusawi vang chuan ka ipik ţun ta lo deuh a. 

Hahdam deuh tumin a awm chu ka ngheng a, "An ti mak ve hrim hrim alawm. An awmdan aţang hian an thil duh ka hre nghal vek a, diktak chuan tumah han hausa fal bik an awm lo. Ka nu damloh lai te khan pawisa a ţanpui kher ka phut lova, mahse an ngaihsakna tlem te talin lantir ve se chu hetiang em em hian ka haw lovang" ka la ti tho a.

"Ngaihtuah vak duh suh. An hmin theih tlat loh che chuan an beidawng mai ang" a tih lai te chuan a hmuiin ka biang a rawn nul thuak thuak a, thil hi a ţha lam hlirin min thlir pui ţhin a, a bula awm a hahdamthlak ţhin takzet a ni. 

"Hna i zawm leh duh tawh em?" a ti a, a aw chu a dam ve thlup a, ngaihthlak a nuam viau mai. 

"Neihkimi ka lo bia ang" ka tih chuan a thaw ri hawk a, a ngaihdan a ni chiah lo a ngaiin "Ka ban dawn khan amah ka hrilh a, ka zawm leh duh anih chuan ka dil leh tho a ngai alawm. Ka bansan tawh hnu zawm leh tawp chu ka duh bik lo. Lehkha theh luh zet hnu a interview leh vel ka ngai ve chuang hleinem" ka ti duah a, Thiangi a laktlak viau tawh a, rilru lak pen nan thawk leh mah ila pawi ka ti lo. In luah man chawi a ngai lova, duh leh hlawh tlem ka pe ve mai ang chu. 

"Hna i thawh leh chuan i putean zu a zuar tawh lo ang a" a lo ti ve nghal vat a, ani hi ka putea a lo sawipui fel leh reng tawh zawk aniang a. 

"Zu zawrh a bansan phawt chuan in luah tur dang pawh zawng lovin hetah ka awm reng thei ang a" phur deuh a ka tih chuan "Nupui nei rual ka tih ve tawh hi aw" nuihza aw tak hian a lo ti a, a unauten an pawm thlap phawt loh chuan inneih lam chu sawi chi pawh a la ni lo. 

"Khalam chu nakinah" ka ti a, min nawr lui ţalh bik lo. 

Pindan aţanga kan chhuah dawn chuan thlahlel takin min fawp vawng vawng a, ka kawr chhung a zen luh a tum chuan rang lutukin a kut ka lo man bet a, a hmui la sawn chuang hauh lo hian a nui ri suk a, ka in ui rih tlat chu a haw lem lo niin a lang. 

Hruaitea ka hmu ve nawlh chu ka hamhaih kher mai. Pindan aţanga kan inzui chhuak kha nelawm deuhin min lo nuih a, a khup vuanin Bawiha a ding a, Hruaitea zawk chuan motor lem a keng a, an lo in awm ve ngei aniang. 

"Engtik khan nge i lo thlen?" ka ti deuh hluai a, motor lem a Hmangaihsanga kawh va pahin "Kha kha ka rawn zui" a ti a, Thiangi pawn thingpui a lo sem kual ve mek bawk. 

Nu chhuani te ho lah chu an la ţhu ve reng a, bathlar a ka putea ding chu va pawhin "Pute, ka nu Chhuani te ho hi an la haw dawn lo em ni?" vin hauh lo hian ka ti a, a rui lova, a khua a har hmel takzet a ni. 

"Chaw an ei dawn a nih kha. Kan eikhawm mup mup reng a, thlai leh sa an lei khawl ho pawh a la awm nual ang. Zanin tlai chauh chu ei ve mai mai rawh se" a ti a, ani pawh hi a lungawi lova, an nasat em vangin thinrimin a hnar duh lo zawk a ni. 

"Mate, insiamţhat kan ngai khawp mai tiraw? Keichu i nu thihna hian Pathian ţhatzia min hriatchhuah tir daih a, ti hian midang sawi pui ngam si lovin keimahin ka in ngaihtuah ve rauh rauh ţhin a, Pathian hian baihvai tak a kan awm chu a lo phal bik hauh lo a nih hi. I unaute kal tlangin mi tam tak a rawn tir a, a hun takah yma ten min ngaidam bawk a, Pathian hi a hun takah a che chat ţhin a nih hi tiraw?" a ti charh charh a, "Ni e" tih bakin ka chhang lo. Kan bul velah ka putea ţhiante, pawn lam a rawngbawl mek ten min pel zut reng a, sawi dunna hun a la ni chiah loin ka hria a ni. 

"Hnathawk rawh aw..keipawn theihtawpin ka thawk ang a, zu zawrh hi bansan tum teh ang. A har viau ang a, mahse i nu thih hma ang kha ka ni tawh lo. A hma kha chuan yma chiah ka hlau ţhin a, tunah chuan Pathian hlauhna ka nei tlat tawh" a ti a, ka putea hi engin nge ti danglam ka hre lo, eng ber khan nge a rilru hneh ka hre lo bawk a, engvanga Pathian hlau ta tlat nge a nih pawh ka hre chuang lo. Mahse, ka lawm takzet a ni. 

"U Hruaite chaw ei ve ru aw. U Sangtea pawh hi min buaipui nasat tehreng nen chaw i lo ei khat lutuk mai. U Neihkimi te pawh kha ko ve ta che, keichu amah te kha ka duh reuh a nia, a ngaihawm tawp" Thiangi chuan a ti phawng phawng a, berkher chuan a, Neihkimi ngai tu ka hriat awmchhun tak meuh a la ni. 

"A englai ber nge i ngaih a?" Hruaitea pawh chuan a lo ti a, a nuih a za em em mai lehnghal.

"A fel ka ti..Pi Atei an lo ral ţhin lai te khan a lokal ve ţum chuan bawnghnute leh chhang man tur vel min pe ţawk zel. In buai lutuk a in ngaihven lo mai mai a nih kha. Zotei hnenah pawisa ka dil ngai lo hrim hrim" a ti a, Thiangi sawina êngah chuan thil awmzia ka hrethiam ve kuarh mai. Zamtei leh Ruattei te bula ka awm ţhin vang khan ka lo ngaihven lova, ngaihtuah ka ngah a, an sawi loh chuan a nachang ka hre lo a ni mah zawk. Hetiang hunah hi chuan kan ni huih zel hrim hrim a, Ruattei leh Zamtei te pawn an ngaihtuah chhuak bik lo a nih hmel. 

"Pawisa kir a la duh ngai bawk si lova, amul gold te pawh Thang Lma nen a case a kan lak hnuah pawh inleng an awm reng a, a hek duh lutuk a tia, inleng kan ngah lai kha chuan pawisa ka ngah thei rapthlak" a ti a, Hmangaihsanga ang thoin Hruaitea pawn Thiangi chu a lawm khawp mai. 

"Neihkimi te chu pawisa a ngah alawm dil ziah rawh. Damdawiin ah phei chuan a lal ber ber a nia aw, nakinah hna ka la dilpui ang che" Hruaitean a tih phei chuan phur tak a ni. A nu hian a ngaihtuah a, Thiangi mai bakah keipawh min rawn be ţhin. Ka nu boral thute sawiin ngaihtuah lo turin ka hrilh ţhin a, a inthlahrung viau na a "Min enkawl ţhat sak rawh aw" tiin min chah thlap tho a, fate hmangaih hi chu a lo na khawp mai. A ţul phawt chuan tlawm leh zah a sawi theih ngai loh. A nu remtihna kan lak hnu phei chuan kan in a awm nuam a ti sawt a, zu pawh intlem deuh tawh turin ka hrilh a, zanah lo chuan a rui khat tawh viau mai. Zu tlan ţhin ho hi an han nghei hian an taksa mai bakah an hmel a ţha chak a, Thiangi pawh chutiang chu a ni. A fai veng reng tawh mai. 

Ka nu boral aţanga kar hnihna a lo thlen chuan kan khawhar hlauin Ruattei te unau an lokal a, Hruaitea pawh lo tel vein an cousin tho sual ka tih deuh Rinkimi khan a rawn zui a, ngah nge maw an lo hruai ve kher kher chu le. Neihkimi pawh Ruattei leh Zamtei ten an phut lui a nih ka ring. 

"Awii..U Neihkim ka ngaih tawh zia che chu" Thiangin a lo tih chuan midang nuih a za viau a, Neihkimi a nui tawi tak thung. Kan mi ngainat zawng te hi a inang thlip thlep thei kher lo alawm le. 

Ka nu unaute pawh an kawppui leh fate hruaiin an lo lang a, an zak hlawl lo. 

"Zote, hei i naute pahnih hian zanin chu an riah pui ve duh che a nih chu" tih pahin ka pu Rama chuan tleirawl kum 20 mi vel tur ang pahnih hi a kawk a, ka lo bu nghat ringawt a. 

Hmangaihsanga chu tlai ah a lokal ve theih chauh a, ka fapa in "Apa" a lo ti leh tawh. 

A huh deuh hluam lehnghal a, ruah in a nan hman a ni ngei ang. Tunlai khaw awmdan mumal ta lo lutuk hi chuan nunphung a ti buai ve ngawt a ni. 

Bawiha pawm ngen chu "Ka huh nasa a" tiin a hrilh ve ngial a, pindan ah lut vatin hruk puan ka phawrh a, kawngka bula a ding chu ka va pe a.

"Khati daih tawh tur kha a ni. In hru hul vat rawh se, a fapa khan a ngai tawh emai" ti a Hruaitean a lo fiam chuan an nui dar dar a, chhungkaw inngeih tlang tak te pawh kan ang ve alawm. 

"Sangtea chu i huh hman elo? Va inthlak rawh ka thawmhnaw hak tur a tam ang. Hak loh ka ngah alawm lokal teh" pindan aţanga ka putea lo chhuak chuan a ti hluai a, an inlen hleih angreng si a, a tawk dawn loin a hria aniang Hmangaihsanga pawn a lo hnar vat a, mahse "Thawmhnaw ro ţha lo hak chu hritlan palh a hlauhawm alawm. Lokal rawh rawn inthlak rawh. A ngai hlir ka ha a, Kawltea min leisak pawh a thar hlakin ka la dah alawm" a ti lui tlat bawk sia. Pindanah chuan an inhruai lut ta nge nge a. 

Pindan kawngkhar chu a ri leh ţhin a, zau vak lovin a inhawng uk a, a inkhar leh ţhin a, a thawmhnaw hak tawngchham deuh vangin a lo chhuak hreh a nih ka ring. A mi tak ve sia, a taksa rem loh pui thawmhnaw a hak chuan a unaute ho hian fiamthu thawh nan an hmang dawn a, thih hrehin a hreh hial ang chu. 

Pindan chhung aţang chuan "Zote" a rawn ti thum leh dut ţhin a, chu ringawt te chuan an nuih a ti za a, "Lo chhuak mai mai rawh" lo ti hlukin Hruaitea chuan lut lo turin nui ruh ruh chungin min hrilh bawk a, ka khawngaih reuh tak tak a ni. 

Ka putea insil zoin "Sangte" a tih leh takah chuan hreh deuhin a lo chhuak a, rin ang ngeiin an lo thawm hak a, a thawmhnaw hak tawngchham lutuk avang chuan ka putea pawh a nui ve tawp. 

Bawiha lah chuan "Apa kal la" a ti deuh reng a, lokal la a tih ve naah kan ngaihsak mai zel. 

Ka bulah dingin ka nghawng hnunglamah hian a dawm a, "Ka thawmhnaw saw va nawt ro mai teh" a ti thum dut dut reng a, nuih loh bik a har khawp mai. 

"Kha lah kha pa a lo ti ve reng a, i pa a ni hleinem hmelchhete" fiamthu titak deuh hian Rinkimi chuan a ti lang lang a, an ngaihdan a nih loh hmel hlawm viau na a tuman an khap lo. 

Chu chuan a ti phur zual sauh a, "Kan unaupa hi pa nih tir kan la phal reng reng hleinem. Apu tih zawk tur aw, tun chinah chuan pa ti tawh miah suh aw. A nih loh chuan kan lo leng tawh miah lo ang. Hmangaihsanga nen hi chuan in inang lo ve nasa sia, miin mak an ti palh ang che u" nui har har chung hian a ti a, ka fapa lah chuan a hrethiam der lo.

"I ho e ah. Naupang a nih hi..i thusawi engmah a la hrethiam lovang. En liam mai mai rawh. I kalchhan i hre lo emai" tiin Neihkimi ber chuan a lo khap a, Bawiha vang mah ni se kan thlavang a hauhna hmasaber a ni hial awm e. 

CONT...