KA HRINGNUN THAWNTHU-25

KA HRINGNUN THAWNTHU-25

"Naupang an nih lai hian engkim zirtir vek tur alawm. A nih loh chuan a puitlin thlengin a pa tawh mai ang" Rinkimin a tih chuan Hmangaihsangan a ning ta deuh aniang "I buaina chauh ngaihtuah rawh" a ti bung nghut a, ka nghawng a dawmna chu thlahin ka koki ah a vuan thla a, Bawiha pawn min awm hnaih khawp mai. 

"Fiamthu pawn sawi ila i lo ţan zel" a tih lai mek chuan Neihkimin "Rinkim" a lo ti a, a aw fir tak avang chuan amah chu kan en ţhap a, Rinkimi hmuh tur chuan lu a thing a, ka nu unaute an awm ve vek a, inhnialna hun a ni lo miau alawm. Neihkimi ngat phei chuan mi hmuh a inngeih lo tak anga an lan a hlau dawn lutuk tlat.

"Mate a thawmhnaw chu va nawh ro sak mai rawh kha ka thawmhnaw hak tir kha a tawk lo lu lai emai" tiin ka putea chuan thu dang a sawi ta daih a, Rinkimi ţawng leh hmain ka tho tharh a, ka ţhutna a awl rualin Hmangaihsanga a ţhu vat a, a thawmhnaw hak chuan a inrintawkna a hloh tir a ni chek ang chu a che rang emai.

Khumah puan ka phah a, hman theih tur a istiri ka siam fel lai chuan Bawiha pawh khumah a rawn lawn kai ve tharh a, "A sa dawn a nia, lo khawih miah suh aw" tiin ka hrilh lawk thlap a, vawiin pawh casual deuhin a inchei leh pek a, tshirt leh summer jacket han nawh ro tawp mai chu a huphurhawm angreng hle. Denim kekawr phei chu nawh tinah ka tin lo hrim hrim. A hak luih duh ţalh leh ha ro ve tawh mai rawh se. 

Jacket ka nawh zawh dawn tawh lam a Thiangin "U Hruaitea nen chawhmeh vel kan lei lawk dawn" a lo tih chuan "Chaw ei kan sawi loh kha. Ruattei chuan in khua a har dawn sia inhmukhawm mai mai ang u, duh leh thingpui te kan in ho ang a a ti mai sia" ka ti a, ka hrilh chipchiar khawp mai. 

"An rilru an thlak aniang. Ruah a sur bawk sia, Siampuii a lokal ve tho bawk nen, haw a rawng han bawl chawp leh vel kha a peih lova, bakah Pa Sawma u te ho sawn chaw ei an ti deuh a, hnial tlat kha nuam an ti lo aniang. Pa Rama te chuan pawisa thawh khawm an tia, mahse Ruattei ten an lo hnial a, a pawi hleinem tiraw? Chhungkaw inzawm khawm hi Pi Atei duh dan ber pawh a nih ka ring" a ti a, ka lo insehruh ţeuh thung. 

Pawisa thawh khawm te chu; an thawh ve an phal dawn lo tih an hriat lawk sa vang vek aniang. Chaw eikhawm an tih tlat chhan pawh anni unau saw biak ţhat a pawh thar an duh vang te pawh a ni mahna. An rilru chhia leh verther lutuk hi ka haw hlur a,ka huatna hi a reh leh theih pawh ka ring tawh lo. 

"Zote helamah thawmhnaw ka dah mumal si lo a i thawmhnaw ui loh ber min lo hak tir teh a" inthlahrun hmel deuh a a tih leh takah chuan inthing harhin ka che thuai a, thawmhnaw ţha ka dahna bik chu hawngin "I duh duh ha rawh. Puan thuah dahkhawmna bul a suitcase intungah sawn thawmhnaw lum chu a awm ang" ka ti zung zung a, ka thil nawh lai chu chhunzawm lehin Bawiha ke ţang ka khawih leh zeuh ţhin a, a duh lo lutuk chuan a ke a lo leng bat zel a, ţawngkam a han lawm chiam dan ka thiam ve lova, hetianga ka fiam dan bak hi chuan fiam ngaihna ka hre vak lo. 

"Tihian a nalh em? I lian bik lutuk a, ka tan chuan a fual deuh. Mahse ka chawi zel mai ang" a tih chuan a dinna lamah ka hawi let a, maxi dress a ha a, a ban a tluan tho vangin jacket a ha tel lo. Khup khuh a ka hak laiin ani chu a chawn thlengin a khuh a, "I inhmeh kha" ka lo tih chuan awih loh hmel deuhin a ner nang a, "Tak tak a nia aw" ka lo ti leh hram a, a inhmeh miau alawm. Ka ha vak ngai ta lova, tun hma chuan ka ngainat ber a ni ţhin. 

"Nang berin inhmeh min tih chuan ka inhmeh a ni mai. Ka kal aw..." a tih zet tawh hnuah ka piahah rawn ţhu tung vein "Enteh maw..U Neihkimi sawn pawisa min pe asin. No ka sil laiin a lokal a, thawmhnaw lei ve rawh min tia, Zote, thawmhnaw pahnih thum vel lek ka hak chhawk zel vang a ni angem le? Nge amah hi ka ngaih vang zawk niang le" zangkhai vah hian a ti a, keipawn mak ka ti ve tho. Zamtei chu nise thuhran a nia, Neihkimi berkher chuan hetianga mi han puih vel leh an nel tur a awm vel hi a inhmeh lem lo.

"Ka hre bik lo le..fel a tih vang che aniang" ka ti a, a inchhir ve deuh a nih ka ring tel bawk a, mahse chu chu ka sawi lang kher chuang lo. 

Thiangi chhuah hnua pindan kawngkhar a rik chuan "Ka nawt zo aw" tih pahin jacket leh t shirt kengin ka inher a, ka nu Chhungi zawk a lo ni. 

"Eng nge i duh a?" ka ti ram hmak a, fiah lo tawkin Bawihan ka tih dan a lo la zir zui. Kan buai a ta langin a piancham pawh kan lo mang nghilh ţhak hlawm a, a zia lo tak tak a ni. 

"Tlangval lokal ve ţhin hi i ngaihzawng em ni? I putean Sangte a tih pa kha. I nu fa hrawn niin ka hre sia, in inkawp ve tihna a ni em?" a tih te mai mai chuan thinrim a ti zual a, ngainat loh sa nen, ka mimal nun lehzel a inrawlh tum anga a awm chu ka ngaithei der lo.

"I ngaih ngaihin ngai rawh" ka ti leh hmak a, amah ka hmuh hian ka naupanlai ka hrechhuak ţhin. Nula puitling a ni tawh a, chuti chung chuan min khing tawkin ka hmuh laiin ka ei ve chak dawn tih a hriat reng thil a ei kher zel a, biak pawh min be duh ngai lo.

"In lo inkawp a nih chuan i tan a ţha khawp ang chu. Naupangtea nuthlawiin ti hian nau i pawm a, i nu ruang awm zan leh vui ni te, a hnu lehzel thleng pawhin in mawi loh hlau reng rengin a phi buai a, mi rintlak tak a niin ka hria. Hmeichhe tan chuan min hmangaihtute hi an hlu a, nei ngei ngei rawh, i inchhir lovang. Thisen inzawm in nih loh bakah in nu leh pate ve ve an boral tawh a, neih a pawina a awm miah lo a nia" a ti a, a chal a mi phakar tih inziak kuau te chu ka hmuh hmaihna ring reng reng em maw ni. A mitah pawh vertherna bak hmuh ka nei lo. 

"Ka nu khan engmah min hnutchhiah lo a nia" ka lo ti a, dawt ka hrilh a ni. A damloh laia kan hman kha chu thudang ni sela, ka tan pawh a dah nual mai. Ruattei hi a mi rin ve ber a ni a, nu tak anga ngaiin a hmangaih tih a inhre ve a ni. Rem ka tih loh hlauin Ruattei a lo buaipui tir a, tunah chuan ka ac ah pawh pawisa tam tham tak a awm ve tawh. Ruattei leh kei lo chuan tuman an hre ve lo thung. 

"A va zia lo ve aw..mahse pawisa hi kan dam chhan ber a ni hleinem. I nu telloin nun i hmang ve tawh dawn tihna a nia, mamawh i neih chuan rawn lam hreh suh aw. I hman loh chang pawn Bawiha hi kan inah rawn dah tawp la, i duh duh i tihsan ţhin dawn nia" a tih te chuan nuih a ti za tlat tawh a, ka ban phak maiah chhungkaw hausa tak an awm tih chu hre lo se min ngaihsak tawp nang mawle. Min hlau ngawt zawk ang chu. .

"Ka lo hre dawn nia" ka tih laiin ka nu Chhuani a lo lut a, a farnu zawhna ngai bawk a rawn keng lut veleh a, Nu Chhungi ka chhan dan ang chiahin ka lo chhang ve bawk. 

"A fel hmel emai nei ngei ngei rawh. Fa i nei chung pawh a a iai lo ringawt che te hi a lawmawm lutuk. A hmangaih che a nih hi" a ti veleh a, min duhsak tak tak awm der si lo, an ţha der thiam khawp mai. 

"Anni ang ngat phei chu chhungkaw tan pawh an ţha a, chhawr theihna chin a awm zel a, thlah hlek suh" a ti leh a, ka nu Chhungi ai chuan a tlang deuh hlek e, ani chuan a ruka a thil duh a zep ve em hleinem. 

"Chhuak teh ang ka u..Sangtea kha a inthlak duh ang. Sawma thawmhnaw kha a ha tawk hlawl lo a nih kha" Nu Chhuani bawk chuan a ti leh a, an hmel chu en pawh ka en peih tawh lo. Anni ho vanga rethei deuh a khawsa ţhinah ka in ngai a, anni ho vang hian ka nu kha a rilru a nat ţhin ka ring bawk. An thil tih hrereng chunga an zak hauh lo thei te hi an fakawm letling zawk alawm le. 

"Khawi ka lo thlak ve lawk ang che, vawiin chu khua a nuam lo emai naktukah inbual mai rawh" tih leh Bawiha kawr hlih sak ka rual a, thawmhnaw fai ka hak tir malh malh lai a kawngkhar a rik chuan ka lo melh hrak a, ka pu Rama te an nih ka rin laiin inthlahrun hmel deuhin Hmangaihsanga a lo lut a, rilru a nuam huai huai mai.

"E..hei ka nawt tawh a, i va huh nasa reng reng ve, a sur tam viau em ni?" a thawmhnaw kawhhmuh pah a ka tih chuan "Step a ka chhuk laiin a tla tam thut" a ti a.

"Kekawr kha chu ha ro mai rawh" ka tih chuan a bu nghat a, kekawr a thlak zawh chuan a kawr hak lai chu a hlip nghal mai a, a dar hlai ţha zet te, a banbul hrawl tak leh a awm bawr sek ţha zet te, a six pack te nen lam chuan ka lo hmu vek a, a taksa a nalh khawp mai. 

Ka lam a lo hawi rual chuan thlang lam ka melh nghal vut a, zahzelah Bawiha kawr hak ţhat vek tawh chu ka siamţha leh vel a, ka hnungah a rawn ţhu ve tih ka hria a, ngaihsak loh ka tum tlat laiin taksa lumin ka hnungzang a rawn sik rual chuan ka awmah a kut a rawn suih bet nghal hmiah a, ka hnungzang lumna chuan ka taksa dang pawh a ti lum ve nghal vek ni maiin ka hria, ka lai ve deuh te pawh a ni mahna le. 

"Ka lo riak mai dawn" ka dara a khabe nghah pah a a tih chuan ka lo nui hak a, "Thu mak pui pui sawi lo teh. Thiangi pawh chhuatah a mu a, ka putea bulah i mu duh em ni? Ţhutthleng seiah lo mu ta tehreng pawh ni la i ke a lawr zuah awm sia" ka ti bawrh bawrh a, a sam ka tuai pah thuak bawk.

"Khum ah hian" a ti thawp sup a, ka biang a fawh leh takah chuan a lam ka hawi vut a, kan inawm hnaih lutuk avang chuan kan hmui a insi lo chauh a ni. 

"I mut dawn loh zia chu" ka tih chuan lo nuih hawk pahin min kuahna chu a ti nghet salh a, "Mawh..ka lo riak dawn" a tih leh te chuan ka ner nang a, "Uchuak suh aw" ka ti hlak a, ţawngkam thiam lo viau mah ila ka sawi tum chu a hrethiam em em ang. 

"Lo riah i phal lo maw?" a ti a, thutak hmel deuhin min en a, kan in hnaih lutuk te chuan min ti zam chhe lek lek a ni. 

"Phal lo" ka tih chuan a hmuiin ka nghawng a nul thuak a, Bawiha a awm ve bawk nen, min ngaihsak lo viau mah se a hnaih a hetianga awm hi ka duh lo. 

"I rilru a dik lo. Ka duh miah lo a nia aw" ka tih chuan a nui chhuak ta hawk a, ka nghawng chu fawpin a inla hrang zui nghal a. 

A kawr awmna lam a pan nghal vut avang chuan a thinrim emaw ka ti hman dawn a, mahse tshirt inthawlh pah chuan "Nangmah a nih kha rilru dik lo zawk chu" nuihzat hmel fahran hian a ti a, hepa hian min chhaih kual leh tawh a nih hi. 

"A awihawm loh e..ka rilru te chu a dik lutuk" ka tih chuan "Tun lawk khan eng nge i lo ngaihtuah?" a hmel a nuihzatna langchhuak chung hian a ti a, sawi tur a vang duh kher mai. Bawiha lah chu motor lem khalhin a vroom hlawrh hlawrh reng a, a chang leh a insut tir chawrh a, a chang leh a thlawh kân tir a, kan thusawi lai thlak thleng theihna khawpin min rawn ngaihsak lo hrim hrim. 

"Ti daih ila Kimkima nen hian in inhriatna a rei tawh em?" ka ti a, ka zawhna chu mak a ti deuh niin ka hria. 

"Rei ve tawh e..engatinge?" tiin zawhna min zawt let a, "Aaa...Neihkimi nen hian an inkawpna a rei tawh hmel em a ka zawt mai mai che" ka ti niah niah a, khapa pui khan buaina min thlensak ka hlau ru viau mai.

"Thil dang a awm em?" a ti dam thlup a, a mitmeng fin hmel zet chuan ngun deuhin min en a, ţawng tum a ka an zuau tawh hnuah lu ka thing ta ringawt a. 

Kimkima chanchin a sawi zui ka rin laiin "Chhuak teh ang" a ti nghut a, ka chet hun pawh nghak lovin Bawiha chu a pawm a, inhrechiang tawh viau lo ila chu a thinrim emaw ka ti ngei ngei ang. 

Pindan aţanga chhuah pah chuan Zonuni ka call a, "Haw tlang suh aw. Vawiin kan khawhar min rawn hnem tute hian chaw eikhawm an tia, lokal kawi rawh. Kan lo bawl kep ang che" ka ti a, buh thlei sa a tam leh tam loh ka en pah nghal bawk a.

"In tam dawn em? In tam viau dawn chuan a nuam lo ve deuh a, Zamtei te an lokal em ni?" a ti a, ka nu boral bawr velah khan Zonuni pawh hi a lokal ngunin an inhmu zing a, Zamtei nen an inkawm thei phian a, phone number te an inpe in ka hria. 

"Aw kal e..lokal ve ngei ngei rawh aw. Zamtei pawh ka lo hrilh ang" ka tih chuan "Zingah khan a status vangin kan inbe zuai a, ka nu te inah kan kal dawn a tia, mahse kan inbe zui chuang lova" a ti a, damlo ni awm takin a lo be buai leh rih a, ţha deuha a duh ang a lo tih sak hnuah "Neihkimi chu a lokal lo ang tiraw? A awm loh chuan a nuam deuh hlek dawn a" a rawn tih chuan zawi tein ka nui a, speaker ah ka dah ang tih a hlauhawm hle mai. 

Phone chu bualin ah ka luhpui a, chumi hnu chuan zawite hian "A lokal ve, a mak lutuk. An phut lui a nih ka ring, hna kalsan a hreh thei sia, keipawn a lokal ka ring lawk hauh lo, mahse a lo lang ve hlawl sia" ka ti a, ring ţha angreng tak hian a nui a, "Rba kan sawm ve dawn em?" a ti zui zat a. 

"A hman ka ring lo. Chaw ei an siam dawn tih ka hriat hma aţang khan ka sawm lawk daih tawh a, mahse vawiin hi a bialnu piancham a ni ve ngei sia, an lawm ve duh aniang" ka tih phei chuan a nui uar nasa mai. 

"Awii..kan Rba hi chuan a bialnu hi a dawm thiam ngawt ang. Kan venga a ţhiante phei chuan fiamthuin a lu chunga kut nghat meuhin a ţawngţaisak ţhin an tih kha" a ti lang lang a, Rba ngaihtuahin a inawm viau mai. 

Kan inbiak zawh hnua ka chhuah chuan Thiangi te rei zia an lo sawi mawlh mawlh hlawm a, boruak lah cju a vawt riau a, inhak tum ve deuh tumin pindanah bawk chuan ka lut leh a. 

Mahni chauh a ka awm hi chuan ka nu ka ngai veng veng zel. Hrehawm tuar reng rengin hringnun a hmang tluan ţhak ang a nia, a damlai a ngaihsak miah lo tu ten a thih hnuah kan in an rawn chuang kai zut reng a, a unaute leh Neihkimi ngei pawh an lokal ve reng tih te hi hria se engtin nge a ngaih ang le? 

Neihkimi ngat phei chuan nachang ka hriat loh lai pawhin inleng te ţam dawm thei tur thil a lo lei reng ţhin a, ka nu a huatna kha paih boin tun a a tih ai hi ka nu kha thil chhe te pawh tihsak se eng emaw inthlak danglam chu a awm ang mawle. Ka nu pawh kha min ngaihtuah lovin rilru nuam deuhin a kal thei ang a, a thih hnuah hi chuan inchhir eng ang mah se awmzia a awm tawh lo. Ka nu chu kan phum daih tawh a, a thlarau chuan min rawn ngaihven tawh kher lovang. Vanram a kai a nih ngat phei chuan nuam a ti tawh dawn lutuk tlat a ni. 

Pindan kawngkhar a in kik karh karh takah chuan ka inha ţha sawk sawk a, "Aw" ka tih veleh a inhawng riai riai a, ngaihtuah lai mek mekin Neihkimi ngei mai chu a lo dak lut a. 

"Helai hmun bak hi inkawm falna hmun a awm si lova" a tih chuan "Lo lut rawh" ka lo ti var a. 

Khumah a ţhu at a, a malchungah a kut pahnih dahin a suih bet tlat a, pindan chhunga a luh vawikhatna a ni bawk a a hawi kual nasa khawp mai. 

"Engtia awm zel nge i tum?" a ti a, a aw chu a nem hran lova, hman ang khan ka hlau tawh bik lo bawk.

"Ka hre lo le. Tunah tut tut chuan awmdan tur ber hriat a la harsa a" ka lo ti ve mai a, puan thuah intel chungah ka ţhu chiah tihin Bawiha a lo tlan lut a, malchung a chuh leh tharh tawh a, vawiin bik hi min zui kual duan duan reng mai. 

"Ka nauten i hna ngai thawk tur a sawm leh tur chein min râwn a" a tih chuan "Hmangaihsanga tiraw?" ka lo ti vat a, lu a thing daih. 

"Ani tak chuan engmah a sawi lo. I inpeih hun a nghak a nih ka ring a. Ruattei leh Zami te hian an sawi reng zawk a, Bawiha hi zu hmun a ţhanlen tir an phal lo a ni ber" a ti charh charh a, ka fapa chu enin a nelawm deuhin a nui a, reilote chhung chauh a ni thung. 

"I duh chuan i thawk leh thei ang. I aia kan lak khan hna dang a hmu a, tun thla chiah a thawk tawh dawn. Thlaleh aţanga thawk tu tur kan mamawh dawn tho a, ţhian i nei sa tawh bawk nen, i duh leh duh loh chu nangma thu thu a ni mai" a tih hnu lawkah "Malsawmi chu damdawiin dangah a thawk. A vanneih viau phei chuan sawrkarah a luh ve theih ka ring" a ti a, an la inpawh reng dawn a, a nuţapa nupui atan pawh a la awt reng maithei a ni.

Dil ka tum sa ran min sawi hmuh leh takah chuan "Ka lo ngaihtuah dawn nia" ka ti ve vel a, ka lawm ru viau thung.

"In tana ţha ber tur a ni. Zu in zawrh leh chuan mualphona nasa zawk in tawk leh thei tlat a, puitling chuan in tuar zel thei maithei mah se Bawiha hi nasa takin a nghawng dawn a, chutiang chu thleng lo hram rawh se" a tih chuan "I thil tih zawng zawng hi Bawiha vang chiah tiraw?" ka lo ti a, a bu nghat a, min chhang lo thung. 

"I tih chhan chu tu vang pawh nise ka lawm lutuk a nia. Awm lo ula chu ka nu kha mi tlemte, chhiar tham lekin kan thlah liam ang a, tuman ngaihdam dil nachang kan hriat ve dawn loh avangin thlan lai tur pawh kan inhmu zo lo maithei a, ruang an vui liam zawh hnuah inleng kan nei zawm lo maithei bawk a, mahse nangmahni vangin kan phuloh a ropuiin ka nu kan thlah a, ka putea pawh a danglam phah dawnin ka hria. Zu zawrh loh dan a ngaihtuah ve char char tawh ang ka ring" ka thusawi chu uluk deuhin a lo ngaithla a, ka sawi zawh chuan lukham lain a malchungah a dah a, nidang ang lo takin vawiin chu a awmdan a danglam khawp mai. 

Bawihan "Api" a tih chuan a nuih a za ve viau mai a, "Anu tih zawk tur" ti a lo tih dik sakin Bawiha chu a bulah a ţhuttir a, nui var var reng chungin a lu a tuai sak hauh hauh a. Hetianga ka fapa a duat ve hi ka vawikhat hmuhna a ni. Neihkimi rilru seh hel lutuk ti danglam vek tu hi hriat ka chak khawp mai. 

"Hna i thawk leh duh a nih pawhin Bawiha hi chu Siampuiin a awm phur khawp kha. Nitin a sawi a, a chang leh min dem lek lek a, min tawng ngam chiah si lovin a tau deuh reng a, a fa ang riakah alawm maw a ngaih le" zangkhai vah hian a ti a, keipawh lo nui vein ka ngaihnat theih ka rin ngai hauh loh nen a kan ti ti thei chu ka lawm takzet a ni. 

Pawn lama thawm a rin tak viauah chuan "An lo haw aniang" tih leh thawh a rual a, "Vawiin chu i chauh hmel riau. Ka va pui ang a, nang chu duh leh tikhan lo chawl hahdam rawh" ka ti sawk sawk a, khung bo vekna a awm rih loh vangin bangah ka nu kawr a la inkhai ve thluah a, damdawiin a a puan phah ţhin leh lukham case te pawh sukfai thlapin a awm bawk a, atthlak viau mah se ka nu thawmhnaw leh khum puan hman ţhin awm naah chuan amah a hun a hman duh ka ring tlat a, ka thusawi a hnial hauh lova, chu mai mai te chuan ka rindan chu a ti nghet lehzual a, a inchhir chu ka ti ngam lo mah se a inchhir ngei a nih rinna lian tak ka nei thung a ni. 

Thiangin report a lo pe zat zat a, a bulah Hruaitea dingin Thiangi thusawi maksak tak tak te avang chuan a lo nui ve suk suk ţhin a, an hmazawn chhuatah thlai leh sa a inhung rum a, an inlei hnem hmel khawp mai. 

"Min hrek rilţam in tum ve hrim hrim emaw kan lo ti mai asin" Zamtein a tih laiin kawngkhar a ri karh karh a, Thiangin a va hawn chuan inchhungah Zonuni a lo pen lut a, a raincoat hak aţang chuan tui a far tluk tluk a, rang deuhin Zamtei chuan bualin ah a nam lut a. 

Chawhmeh ka enkual vel lai chuan Hmangaihsanga lo tel ve vatin min dah fel pui a, Thiangi erawh chu inthlak tumin pindanah a lut a. 

Ka putea hi sa duh ngang a nia, an rawn lei ţeuh chu a phur ka rin tehreng nen a reh hmak a, inchhung a a lian lova, ka nu unaute an rawn thawk rip bawk nen, kan chep khawp mai. Ţhutthleng hawh hlauh lo sela chuan ţhutna tur pawh kan indaih lovang. Ka melh kual dan dan hnuah ka putea chu ka hmu a,ţhutthleng hniamah ţhuin kil khatah a tawm kak a, a kuang kuah hlun a, ka en lai reng chuan a mittui a hru zauh a, nilenga a ruih loh avangin a mittui tla ka hmuh chuan mak ka tiin ka ngaih a ti ţha lo khawp mai. 

Anţam then tur ka la lawk a, Hmangaihsanga hnenah chuan "Thil dang hi lo buaipui ula ka putea saw ka va ţhutpui teh ang" ka ti a, ani pawh chuan ka en na lam chu a en ve thuai a. 

"Ka lo thian dawn mi U Zote?" Ruattein a rawn tih chuan a ngaih loh thu ka hrilh vat a, ka putea ţhutna lamah chuan ka phei a. 

"Eng nge i lo ngaihtuah?" ti a zawh pahin chhuatah ka ţhu a, chawhtawlh lianpui leh anţam chu ka hmaah ka chhawp hnur bawk a.

"Aa..eng ni lo e. I nu kha la awm ve se la nuam a ti dawn em a. Chhungkaw mumal kan nei ngai lova, tunah lem inchhung khat vek khawp a tam kan pung khawm a, kan inkawm khawm a, kan nui dar dar reng bawk a, Mate i nu thihna hian thil tam tak a siam ţhain i hria em?" thutak deuh hian a ti a, min puih tum a anţam a ban chuan a kut khur chu ka lo hmu a, zu a in loh nilen vang a nih ka ring. 

"Kan hmelma lian ber pawh nise an chunga thil ţha lo kan tih chuan an thih hnuah kan inchhir tho ang. Lokal khawm zinga tam zawk hi chu inchhir na a an khah ka ring" ka lo ti a, a unaute ho pawh hi an ţhatna tur duh a lokal an nih rualin mihring pangngai an nih chuan tlem te talin an inchhir ve tho ang. 

"A ni khawp mai. I nu khan ngainat a hlawh lo a nih chuan thiam lohna chin a nei ve pawh a ni mahna, mi ngainat kan hlawh duh chuan keimahnin kan zir ve a ngai ţhin a, kan awm mai mai lai min haw tawp tu chu an vang khawp ang. Midang tana thil ţha tih nei miah si lovin midangte hi kan chunga ţhat chhuah reng turin kan beisei tlat thei bawk a, hei tak hian a nia min khawih chu" a tih chuan ka thil tih lai ţhulh meuhin ka en a, "Eng berin nge khawih che a?" ka lo ti vat a. 

"Zu ka zuar a, mi chhungkaw pawisawi tu leh ţhalaite nunkawng dik lo a hruai tu ka ni. Mahse kan chunga mite ţhat zia kha i lo hmu em? Ngaihdam ka nih hnu phei kha chuan ka pawi lo sawi tawh te hre lo ni awm takin theih tawp an chhuah a, an chhungkaw hlim lohna bul pui ka nih hrerengin ţhalai tam tak an zai tlaivar a, inchhir i tih zingah khan keipawh chhiar tel tlak ka ni. Ţhalai zinga tam tak kha an paten ka inah zu an rawn in ţhin a, an duhthlanna mah nise an pate zu ka lo pe ţhin kha ka inchhir khawp mai. Zu zawrh hian pawisa chu a tam a, hlimna tlemte chiah a awm thung. Rethei deuh dawn mah ila chhungkaw tam tak an chhiat phah ai chuan zuar lo ngam ila a ţha khawp ang. Pathian hla hi ka ngaithla ngai mang lova, i nu ruang awm zana an zai ka ngaihthlak te khan nun tawi zia hriain thih hlauhna in ka khat a, chu chuan Pathian hlauhna min siam tel bawk a, chawp leh chilh a mihring thinlung a hna a thawh theih chuan Pathian hi a awm ngei a ni. Hmu thei kher lo mah ila hna a thawk thei tih ka chiang khawp mai" a ti duah a,a ţawng chu a muangin a sawi tam viau na a ngaihthlak ninawm lai a awm hauh lo. 

Chaw ei dawhkan kil a eirawngbawl ho chu an inchhaih nui har har hlawm a, ka putea chuan "I nu awm se nuam a va ti dawn em" a ti leh ţhin a, a khua a har ve takzet a ni tih a hriat. 

Chaw ei khamah a tam zawk chu an haw dial a, Hmangaihsanga a la awm hnu fual a, ka pu Rama leh ka nu chhuani fate, Rinrini leh Muanpuii te an la awm bawk. 

Ka fapa in puak a ngen tlat a, a taksa a sa vur bawk nen, a khua a sik a nih ringin Hmangaihsanga chu "A pang han dek lawk teh" ka ti a, a ngaihthlak vung vung hnuah "A khua a sik ve deuh a nih hi" a ti chiah reng a, "Kan ni nuai nuai a ka hrilh theihnghilh daih che a nih kha. Chaw pawh a ei duh lo a nia aw, a pum kha a dawm reng a, 'na' a ti leh ţhin a" Thiangin a lo tih chuan "Ka chaw pek a ei duh loh hnu khan i pe thei bik loh maw? Vawi hnih lai pek ka tum a, a chhak zel a" ka ti a, ka ngaih a ţha lo ţan khawp mai. 

Pek ka tum ngial pawh a ka pek theih loh khan Thiangin ka lo pe mai ang a tia, chaw ka eisan a, engmah a sawi leh tak lohah chuan an inpe theiah ka ngai mai a, Bawiha pawh ka bulah a tap hrut hrut reng a, a hrisel ţhat em vangin ngaihţhat lohna ka nei lem lo. Puak a ngen tlat hnu hian ka ngaih a ţha lo ţan chiah a ni.

"Bawiha i pum a na em ni?" ti a zawh pahin ka hma thlak a, ka awmah a bei thlap a, engmah a sawi lo. 

"Thiangi a pum a na maw?" Hmangaihsanga chuan a lo ti a, "Aw a dawm deuh reng a, U Hruaitea ka hrilh ang ti rengin ka lo mangnghilh palh a nih kha" inthiam loh hmel tak hian a ti a, fate ber an nawm loh chuan rilru a zing nghal mup mai. 

"Bawiha han âng vak teh" a tih chuan amah zawk chu ka lo en ha a, Thiangi pawn min din hnaih viau tawh. 

Bawiha a ân veleh phone flashlight in a ka chhung a chhun a, "Ngah nge maw pumna ah a kâ chhung i en dik daih le?" ka putean a tih chuan "Tonsil a ni thei a, a nih hmel riau. Bawiha chu damdawiin a hruai a ngai dawn a ni maw?" a la ti tak deuh deuh a. 

"U Sangtea nau lawm thiam loh ve zia hi chu aw..naupang chuan damdawiin an hlauh em hi. Ti kha chuan i sawi ţhaih mai mai alawm" Thiangin a lo ti veleh a, Bawiha pawh a meng kual rulh rulh tawh. 

"Tonsil chu a ni tak tak ang maw?" thutak deuh zawk a tiin Bawiha chu ka ân tir a, ka endik ve vel a, a dang sir velah chuan vung a awm tlat te hian ka hre ve a, chiang tak phei chuan ka sawi ngam lo. 

"Ni ang..naktukah lokal pui rawh" a tih chuan "Ti hian damdawi i chawh thei mai lo em ni?" ka lo ti a, damdawi ei nghal se dam vat se ka duh ber. Naupang hi chu an tuar a chhel a, kan hriat hma khan a lo na viau hman tawh maithei a ni. 

"Nachhawkna te chu chawh thei e. Viral nge bacterial infection hriat fak a ngai ve a, an test ve ang chu. ENT specialist ţha deuh kan nei alawm" a ti then a, aman a en dawn lo tih ka hriat chuan "Doctor chu ka hria angem?" ka lo ti thuai a. 

"Hre lo ang..a thar a nia. Duh leh zingah inpeih hma ula, kal pahin ka lo lam kawi ang che u" a ti a, Bawiha mawngah chuan a beng zui thuk thuk kher lehnghal a. 

Kal tur dang kan awm miau loh avangin damdawi lei turin a chhuak leh lawk a, buaina ka thlen sak nasa lutuk hi hrehawm ka ti lutuk tawh. Ka ninawm viau tawhin ka ring a, tun dinhmunah ngat phei chuan min kalsan daih mah se ka vui lo hrim hrim ang. 

Bawnghnute ka intir laiin a lo let a, ibuprofen a lei chu ka pek hnuah "Mu tam rawh se" a tih vangin ka awi mu a, a nachhawkna eiin a hneh deuh nge awih mut nan hun rei a ngai lo. 

Bawiha mut fel hnua a haw tur ka thlah te chuan ka tim deuh tlat a, a bulah pawh kal duh lovin a hnungah zel ka kal a, a rawn let hnuah a ţawng mang lo bawk nen, min ning deuh a nih rinna lian tak ka nei a ni. 

"Nih leh aw..naktukah chuan keimahin ka lokal mai ang, min lo lam kawi vel chu i tan a buaithlak mai mai" tih leh inher ka rual a, pen hnih vel lek ka pen hman ang tihah chuan min pawt letin "Lungawi lohna i nei mi?" dam thlup hian a ti na a ka tawt ru ţeuh tho mai. 

"Aih..ka lungawi thlap. Mahse a nuam lo ka tia" ka tih chuan a hriatthiam loh hmel khawp mai. 

"I buai thei sia, keini lahin kan pawt buai reng bawk che sia, phur rit kan siam nasa bawk che sia, i tan chuan hnawksak kan ni tawh ang ka ring. Hna chu ka thawk leh ang a, ka nu pawisa min dah sak hmang khan ka putea pawn dawr siam ve sela, buaipui reng kan ngai tawh bik lo ang" ka ti duah a, ka ngeiawm tel tho maithei. Awmdan tur leh sawi tur ka hre tawh lo a ni ber. 

"Inthlahrung suh hrehawmna i insiam chawp mai mai" a ti duh lek chauh a, ka kal hnaih hret a, ka ngaih ve tho bawk si avang chuan "I chau tawh em?" tih pahin a kawngah ka kuah a. Ka dara min lo kuah ve vatin a chauh loh thu a sawi a, a mitmeng dul raih chuan a chauh zia a tarlang thung si a ni. 

"Tihsak ve theih che ka neih chuan ka tihsak vek ang che. Chutiang chi chu a awm a nih chuan min hrilh rawh aw" thlek chho ha chung a ka tih chuan min lo melh chhuk ve run a, min en vung vung hnuah a mit a lasawnin a nui suk a. 

"Tonsil hi chu a hluar a, a dam hma bawk. Antibiotic te nen an enkawl ang a a dam thuai mai ang. Tam tak phei chuan an kal pah vel mai mai alawm" tiin ka thusawi nen a inzawm lo lutuk a sawi ta daih a, ka inthlahrunna leh nuam lo ka tihna erawh a kiang hleithei lo thung. 

Damdawi nen a ţangkawp a kan beih hnuah Bawiha pawh a dam veleh mai a, a tlan kawi leh zar zar peih tawh. Ka putean zu a la in zeuh zeuh tho a, nghei tawp harsa a tih vang a ni. Inleng kan nei ngai ta lova, khawtlang hruai tute hlau reng reng a kan khawsak a ngai tawh lo. Ka nu khan kan hringnun kawngzawh lai thui tak min siamţhatsak a ni. 

Hna ka zawm dawn ni chuan an vaiin kawngpui thleng min thlah a, ka putea chuan "Matei chu i nalh hle mai" min ti deuh reng a, min chhuan zia a langchiang khawpin ka hria. 

Ka nu unaute an lo la kal awl lo a, Rinrini leh Muanpuii te pawh an lo la riak fo mai. Hruaitea phone number te min dil a, Hmangaihsanga a lo len chang te hian an inhrilh ru a, an nui tet tet ţhin a, nuam lo a tihna thamin an awm ţhin. Lo riak tawh suh u ti mah ila awmzia a awm mang si lova, kan en liam mai mai tawh a ni ber.

Ka duty na tur hmun ka thlen chuan Zonuni a lo rak chel chul a, thil ţha deuh ka pe emaw tih mai tur a ni. Ka ţhutna ţhin ngeiah khan rose sendâng bawr nalh deuh lo awmin card a awm tel a, "Ka thlen hlim pawn a awm tawh" Zonunin a tih lai chuan card chu ka lo en a,'welcome back' tih zawng a inziak a, a dahtu ka hre nghal mai. 

BL-a pawh a lokal phei ve chhut chhut a, mawi hnai deuh a lo lawm ka tum lai takin ka nghawngah a kuai a, "Ka duh che i tih nghal loh chuan ka lock nileng dawn che" a ti lung lung a, Zonunin a luah lo chhu lo se chu min kuai rei peih viau ang. 

"Kan ngai ve ţhin che" nuih vur vur pahin min kuah thuak a, mi a fiam dan te hi a dangdai thei bik a nia aw. Thih nge dam tih ang vel a ni ţhin. 

Rba pawn nui var varin min rawn pan a, ţhian hluite ka hmu leh chu in a haw ang mai ka ni. Ka hahdam a, ka thla a muang em em bawk. Bawiha kan entir ni kha chuan rilru hah reng rengin ka awm a, tun a nuam ka tihna ang hi ka tem pha chiah lo a ni. 

"In inzui dat dat rei ve tawh tho sia innei tawh mai ula" Zonuni chuan awmze nei deuh hian a ti a, nui tet tet chungin kan zawn a kal apiang chu chik takin ka lo en a, Hmangaihsanga ka zawng ru deuh a ni. 

"Zote, i vannei ka ti tak tak. Mahse mipa hi chu hmangaih an neih chuan hmeichhe hmangaih nei aiin an nghet zawk an ti tlat a ni. Bakah i lerh lo a, sawisel ngaiin i awm lo bawk a" a tih lai mekin ka mi zawn ngei mai chu a lo lut a, mahse amahin a ni lo. 

Awmtei nen an rawn inzui lut a, an kal dun a, Awmtei chuan a banah a kuah ţung a ni mah zawk. Pangpar pawm ran chungin ka lo thlir a, keimah leh ka thil pawm lai a hmuh chuan nui sukin ka hmazawnah a ding a. 

"I lo thlenna a rei tawh em?" pangngai taka a tih laiin Awmtei pawh chuan min lo en ve reng a, min hria angin a awm lo thung.

"Ka thleng ve deuh chiah" tih pahin Awmtein a kaihna lai chu ka en a, "Nakinah ka lokal leh ang" a tih liam puat hnuah an pahnih chuan a pindan bik lam an pan a, a bialnu hlui nen ka hmu thut chu mak ka ti ngei mai. A tan hnawksak ka nih chang a tam dawn tih hre ran mah ila ka bialpa a nih miau avangin chhunglam aţanga thikna awm hi ka dah bo thei chuang lo a ni.

"Mipa chu hmangaih an neih chuan an nghet alawm" Zonuni lam hawi paha ka tih chuan a nui tawi tak a, ka thik a, an pahnih a hmuh dun kha hrehawm pawh ka ti. Mahse ka chhungril thuk takah erawh chuan Hmangaihsanga rinna a la lian hle thung. 

CONT...