KA HRINGNUN THAWNTHU-26

KA HRINGNUN THAWNTHU-26

"Ngaihtuah ran duh suh..hmeichhe ţhiante chu neih thiang alawm. Nangpawh Bl-a leh Rb-a ten an nel em che hi" Zonunin a ti sa sa reng a, ka rilru nawm loh a hlau khawp mai. 

"Chulam a ni lo..rilru buaina dang ka nei a" ka tih chuan "Eng lam nge?" a lo ti vat a. 

"Ka tibuai lutuk mah mah niin ka hria. A chang chuan ka man chawp, keimaha tang tlat niah ka ngai ţhin a, buaina leh harsatna ka tawhin keimah ang chiahin a buai ve a, ka rilru hah ţhin ang em chuan a hah ve lo maithei mah se keimah vanga a buai hi a tam tawh lutuk. Phurrit ka nih ka hlau a, ka inrin loh laia min thlauhthlak thut ka hlau bawk a,  mihring a rinna nghah leh lutuk hi a lo ţha lo a nih hi. Nitin hian ka hlutna a tlahniam zel niin ka hria" tiin midang hriat hlau takin ka phun sap sap a, a lo ngaithla uluk khawp mai. 

"Midangte chunga rinna nghah lutuk chu a ţha lo alawm. Ninawm kan ni thuai thei a, min hlut lo tial tial thei bawk a, mahse chu ti ang a nih rual chuan i insit leh lutuk a nih kha. Ka hrethiam che alawm, dinhmun a chhiat chuan inthlahrun a awl a, kan zum dâk bik reng a, nuthlawi nih ngat phei chuan miin rawn hre chat lo mah se mahni kan inhre ran a, ngaizawngtu kan neih ve lahin 'nuthlawi ka nia' tih nghal mai te a zahthlak ve a, kap tu nei ranin kan awm reng a, min ngainep ang tih hlau reng rengin kan awm bawk a. Duh vang a thlawi kan nih bik loh zia ngaihtuah chang tawh lovin ţhenkhat lah hian min han ngainep nghal ringawt zel a, ka ngaihdan chauh mah ni se a dik chiang ngawt ang. Nuthlawi nih vang maia awlsam bik riau tur a min ngai hi an awm ţhin" a ti bawrh bawrh a, dik ka lo ti khawp mai. 

"Mahse Zote, Hmangaihsanga chungchangah chuan i ngaihdan kha thlak daih rawh. Nangmah a i tih theih thil a awmin a puihna i ngen ngai hleinem. Tun ţum ngat phei chu a buai ngei ngei tur zawk alawm. A pa nupui a nih angin a nu ve tho a nia, inrawlh duh lovin a kut sil hmak se chu mak kan ti zawk ngawt ang chu. Inthlahrun nan hmang lo la, a tih tur tak a tiah ngai zawk rawh" nem deuh zawk hian a ti leh a, ka khup a a kut rawn dah chu ka lo vuan thuai a, hlauhthawn hmel takin min en nghal vut bawk. 

"Zote i tha a khur elo? Eng nge i hlauh a? Chiai lo la, inthlahrung miah suh ka tih kha. Tu tan mah phur rit i ni hleinem" a ti nghal mawlh mawlh a, a aw a hlauhna lang chhuak chu a hriatchian theih khawp mai. 

"Naa..keichu ka ngaihtuahna a chawl thei lo. Ka hlauhna a reh thei bawk si lo a, ka rilru a thlabar reng a, chhungkaw khawsak leh thil dang a tam lutuk. Hmangaihsanga pawh hian ka inrin loh lai takin min thlauhthla ve thut ang tih ka hlau a, i hrethiam lo a nih kha, Sangzuala pawh khan a tir chuan min duh tho alawm mah se hetiang hi kan nia. Rin loh deuhin ka nu'n min kalsan reng a, keichu vanneihna hian min hnaih ve ngai dawn lo aniang. Thil ţha lo lo thleng thut tur ang hian ka ngai ţhin a, zan mut te hi ka harsat a sin. Aaa..sawi sawi pawh ka peih lo, ka ngaihtuah reng pawh tih tawh nak laiin" ka ti hlawk hlawk a, hlauhna hi keimahah a bet reng ţhin a, ka nu boral hnuah ngat phei chuan a nasa lehzual. 

"I thlan te a tla a nia, hlau suh ka tih kha. A kalsan hauh lo ang che, i chungah thil ţha lo a thleng dawn hauh lo bawk a, hahdam deuhin awm rawh" a ti a, tissue paper la in ka chal leh khabe ruh kual vel chu a rawn dep hlek hlek a, "Chhungkaw khawsak tih vel mai mai te chu in nghei loh chuan a tawk a ni mai alawm. Mangang duh reng reng suh, kan inpui tawn zel dawn alawm" a ti dam thlap a.

A chang chuan ka ngaihtuahna te hi a mang vek a, chutih rualin thil ţha loin min deng leh dawt dawn ni a hriatna ka nei tlat ţhin a, rilru a chawl loin ka hahdam thei ţhin lo a ni ber. Mak ka tih ber chu thlamuanna leh hahdamna min pe ţhin tu ber Hmangaihsanga laka ka inthlahrung tlat hi a ni. Tling lo riauah ka in ngai leh ţan tawh a, thaw a ipik ţun reng mai. 

"Kha tui hi in rawh. Thil ţullo ngaihtuah tawh lo la, inkiltawihna i neih tlat kha dah bo vat rawh" tih paha a tui min pek chu ka lo ban ve mai a, tuivawt chuan ka kaw chhung a fan thla raih raih a, mahse ka hahdam phah hauh lo. 

"Kha nula kha a va lo chhuak har ve, in entir a hun a ni dawn tawh asin mawle" Zonuni chuan a ti bai bai a, Hmangaihsanga hmu duh tu an awm far tawh a, naupang ţap ri hriat tur a awm tawh a, ţhenkhat an tlan kual zak zak bawk a, kan ţhutna leh a pindan bik hi a inhnaih angreng a, keipawh chuan a rukin ka lo melh pah reng a. 

"An inkawm laklawh aniang" ka ti a, an rei lutuk chu ka thin a lo rim ve ţeuh a, Awmtei kha pasal nei lai a ni tih hre mah ila Ruattei hnen aţangin a nasat zia ka hre tel tawh tlat a ni. 

"Damlo ten an mamawh a, laklawh sawi thei an ni lo" a ti hmak a, a phun leh hmain Awmtei zawk chu a lo lang ta hlauh a. 

A kal tlang mai dawn emaw tih laiin kan dawhkan hmaah a rawn ding a, min hre ve ta a ni ngei ang min nuih seih a, "Hmanni a kan inhmuh ţum ai khan i cher a nia aw" a ti zui zat bawk a. 

"A ni maw?" tih hluai pahin ka biang lehlam lehlam chu ka khawih tawn zak zak a, a lo bu nghat nghat a. 

"Ka cher pawh ka lo hre hleinem" ka tih lai chuan main door lam hawiin "U Neihkim" a ti lauh a, a kut a vai nghal vut bawk a, ka taksa a lo ţang ţeuh thung. 

Neihkimin kan zawn a lo thlen chuan a rukin Zonuni nen kan inkai a, min lo tih retheih tawhna te kha hrerengin Zonuni pawh hian a ngaina thei hlawl lo a, keipawh hian ka ngaina hauh lo, mahse ka haw tawh lo thung. 

"Vairamah masala i bar hawng hawng ang chu tih nak laiin engatinge helaiah ka hmuh nawlh che?" a ti a, a ngeiawm thiam khawp mai.

"Cham rih turin ka lo haw a nih hi. Love high-a ka tlawh a, in entir tur an tam deuh vangin ka lo chhuahsan lawk a, ti hian a zawh hun ka nghak mai ang" a ti zat zat a, Neihkimi hnen a zep ţhen nei map lova a ţawng duah ngam te chu a awhawm letling zawk alawm le. 

"Nghak duh suh a rei ţhin. Damdawiin chhungah na na na chuan damlo te ah chiah rilru pe rawh se" a ti ta hmak reng a, Awmtei lah chuan lei a chhuah tet a, pawi tih hmel deuhin min rawn melh kher bawk a. 

"U Neihkimi chu i fir thei vel e. Tiang te chuan pasal pawh i nei thei ang. Keini ang hian inhawng ve huau rawh" fiamthu a a tih leh te chuan "Mimal thil leh hna hi thliar hran thiam tur. In pa chuan helama i awm a phal reng reng em ni?" a ti a, Awmtei pasal hi la hmu ve hauh lo mah ila vai hmuk buk chhep chhup a nih ka ring ve ringawt. 

"Phal ang chu ka dilna a rei tawh alawm. Mahni ram ngei hi chu ngaihawm chang a awm ve ţhin a, min hrethiam lutuk" a ti a, sawi nuam a tih chiah loh hmel khawp mai.

"A ţhat chu...nang chu inpa a hausa a, mi nawlpuiin an diriam ngam ve hleinem che. Kan ramah hian nuam deuhin chawlh i hmang dawn nia" a ti deuh kher a, keichu ni ila ka zam viau ang mah se Awmtei chuan "Hnam dang pasal ka neih avang maiin min en hrang a ni maw?" nui hak chung hian a ti a, a hmelah pawh zamna a langchhuak lo. 

"Teh nang aww...kan enhrang tlat che anga i ngai a nih chuan hnam dang pasal i neih rual khan i rilru a hrang nghal tihna a ni mai. Ka sawisel hran lo bawk che, hmangaih berte chu neih thiang alawm. Hahdam tak khan awm la aw" a ti a, a hmel landan chu a dam thlap reng a, eng nge a ngaihtuah ve ang tih hriat a har ţhin khawp mai. 

Neihkimi kal hnuah Awmtei vêk chuan "Henu ngainatawm loh dan em em hi chu. Nel kan tum pauh leh a inla hrang zel emaw tih mai tur a nia, a chhungte heart attack a an thi phawk phawk lo hi a mak zawk" a ti hlak hlak a, a hmelhriat ni awm tak a hmuh hnu chuan nui har har chungin a pan a,an awm loh ve ve takah chuan boruak a thiang nghal kawk ni maiin ka hria.

"Awii..Neihkimi nen pawh an inhria a nih kha. A chhe lo reuh sia, hnam dang nei daih tur chuan ka ui e. Keichu maw Zote, hnam dang nei tawh sa hi sawisel vak ţulin ka hre ve lova, kan diriam vak vak vang hian an ţhen phah dawn hauh lova, chuai chuan pasal la nei lo ho hi hnam dang nei lo tura kan fuih reng a ngai zawkin ka hria. Nu leh pa an pawimawh hmasa ber ang a, thuziak mite pawh an pawimawh tho ang. Ţawngkam chhe tinreng a ţawngkhum ai chuan kan nula tlangval te hi an rilru hneh ngei tumin fuih zawk ila, chu chuan kawng ro a su zawk ang" Zonunin a ti ve nghal mawlh mawlh a, "An diriam vek chuang hleinem" BL-a aw lo ri chhuak thut chuan min ti phu nasa lutuk ringawt. 

Kan ţhiandun hian inhmatawnin kan ţhu a, dawhkan hma a Bl-a ding reng chu kan hmu lo ve ve a ni awm e kan phawk dun emai. 

"Mi ţawng ngaihthlak ruk ching mah ta che" vin zeta Zonunin a tih chuan "I lu ruh a ring alawm. Ngaihthlak tum lo pawn an hre vek ang chu. Zotei hrilh ru a i inngaih chang pawn inhnuai ber thlengin kan lo hre ve vek zel" a ti a, kal nghal mai tum ang pawn a awm lo. 

"In thusawi kha tunlai a ka vei ve ber a nih kha. Hnam dang nei zawng zawng an diriam ngai lo aw Zonuntluang, mi hâng leh vai chhe chi nei ho hi an diriam nasa a, vun ngo leh vai hausa nei te chuan ngaisang tu an ngah lutuk. Thil dang siamţhat kan tum hmain kan rilru put hmang a dik hmasak phawt a ngai. Hnam dang rau rauah dinhmun leh vun rawngin danglamna a nei tur a ni lo. Mizo hmeichhiate hnam dang nei lo tura kan duh chuan mipa te pawh hian nei lo ngam ve tho ila, Daduhi pawn 'Zo leh zo ngei' a tih al al zel kha. Mizo nula te hi ft pawh tling lo, a khâp a khâp ngai an tam zawk a, chuti chung chuan hnam dang nula te ai chuan ţha ka ti zawk tho tho. Nuthlawi ngat phei chuan min rap hrual tawp tawp thei ang" uar fe a a tih zuah zuah hnuah earphone vuahin main door lamah a kal bu phei luk luk a, a ngai te te ka hmu nitin leh dawn a nih hmel. 

"Kan va daihzai tak e aw...vur tlang ţha leng lawng Neihkimi a lokal hnu lawkah mi mawl leh thawveng lutuk a lo lang lehnghal zat a" Zonunin a ti lang lang a, Bl-a engthawl leh vei nei lo lutuk hi chu ka awt ru fo mai. 

"Hnamdang nupui pasal a neih ka vei a tih ve te kha maw tikhan a zo der. A ngaihdan a sawi zawh hnuah eng thil mah a vei zui tawh ngai lo. Bakah mizo hmeichhia te hian inteh kan cho ve tho emai, khâp kher kan ngai bik lo" a ti hlak hlak na a a nuih a za ve viau mai. 

Damlo a en zawh vek hnuah Hmangaihsanga a lo chhuak ve chauh a, a chauh hmel riauin ka hre tlat lehnghal a, tunlai ka awmdan leh rilru put hmang hi keimah ngei pawn ka ning a, mahse ka ti tawp thei hauh lo. Ho te te a ngaihţhat lohna ka neih ţhin te hi ka nu boralna in min la nghawng vangah ka ngai a, zingkar aţangin lung a zing ţan a, zan thlengin a reh lo ti ila a dik ber ang. Ka lu lah chu a na ngut ngut reng lehnghal a, awm a ti nuam lo takzet a ni. 

"I nawm loh hmel?" ka hma dawhkan bawhin chik deuhin min en a, "Ka ţha" lu thin paha ka tih chuan a kutphahin ka biang a khuap a, mi an la tam deuh avangin a kut ka lo benthlaksak vat a. 

"Khai a..i tho fu chiah nange a?" a tih te chuan ka ngawi ran a, amah aţangin ka mit ka la sawn hauh lo thung. Ka awmdan chu hrethiam thuaiin a kiai suk a, chhungril a ka thaw ipikna hi a kiang hleithei lo, ni tam tak chhung a ni tawh. 

"Love high" Awmtei aw kan hriat rual chuan a thaw ri hawk a, keipawh chu ka hnual lehzual a, Malsawmi thlak tu ang riakah ka ngai hial a ni. 

"Na i nei em?" a ti leh sup a, midang hriat hlauin a ţawng zawi viau bawk.

"Nizanah ka meng rei a, chu chuan ka lu a ti na. Na dang ka nei lo" ka tih chuan "Thikthu vanga na te a awm em?" a ti leh kher a, a aw a nuihzatna langchhuak te chu ka ngei deuh tlat a, mut ka hmuh ţhat loh vangin ka thin a chhe ru et et ti ila a dik ber ang. 

"Nei lo" tih hluai pah a a awm a ka nam chu ka kut a lo hum a, a nui suk bawk a, kan inlaichinna hi midangin hrethiam mah se pawi a ti hauh lo niin ka hria. 

"Kal nghal ang ka nghah rei zia che hi aw..Makimi te nupa pawn rei min ti tawh ngawt ang" tih lang lang pah chuan kan awmdan chu a en a, keini lah kan la lo la invuan tlat mai bawk nen, a nuih a za tawh hauh lo. 

"Khawiah nge in kal dawn a?" ka ti deuh phawng a, engmah a sawi lawk bawk si lo, insum theihna ka hlauh palh a ni. 

"Kan ţhiannu piancham a nia, midang sawm lovin keimahni chiah min sawm a, kan kal ngei ngei a ngaih phah a nih hi. Love high-a hi lerh viau mah se ngaihtuah suh ka lo veng char char ang" tiin Awmtei zawk chuan min lo chhang a, a hmel verther hmel zet a a nui te chu ka hmu lem lehzual tlat tawh a, rilru buai lai a lo ni lehzel nen, ngaihtheih loh mai a awl khawp mai.

"Lokal ve ta che" Hmangaihsangan a tih chuan "Ka hman ve hleinem" ka lo ti mai a, a ţhiannu ka ngaihtheih lohna lanchhuahtir loh hram hram ka tum tlat a ni. Nupa kan ni tak tak lo tih a hre daih tawh ang a, chuvanga ngampa thar riau te pawh a nih ka ring. 

"I haw hmain ka lo let ang" tih paha kal nghal mai a tum chu "Zonuni hi a lo leng dawn a kan haw rual thei ang" ka lo ti vat a, chhunglama hrehawm tihna ka neih tlat ţhin te pawh a inmung leh tup tup tawh a, a intihhlim ve chu ka phal lutuk alawm mah se a tih dan takah amah hi chu ka ring a, Awmtei hi ka ring tel ve lo a ni. 

"Ka awm rei dawn lo. Min lo nghak rawh" a ti dam thlap a, a fiah viau thung a, thikna lian tak ka neih rualin keimah avangin a buai leh dawn a ti tein ka ngaihtuah leh a, tunlai ka awmdan hi ka hrethiam lo tawp mai. An kal liam hnu chuan ka bek tawn tawn a dawmin ka kun tlat a, beidawnna bawkin min delh rit leh viau tawh a, ka hah takzet a ni. 

"I ţha maw?" ka koki a dawm paha Zonunin a tih chuan ka lo bu nghat a, ka la hawichhuak chuang lo.

"Vawiin chu i awm dan a mak riau mai" a ti ban charh a, ka chhang let lo thung. 

"I thik viau em ni?" a tih leh chuan lu ka thing mai a, ka in ngaihbel nge ka thinphu te chu a rang riauin ka hria a, "Kha kha engati nge?" Neihkimi aw fir tak ka hriat rual chuan ka insiamţha thuai a, a mitmeng fim kak a min lo melh ran chu hlauhawm tham a ni. 

"A lu a na deuh a, thil dang chu a ţha vek. A lu a na ringawt a nih hi" tiin ka ţhiannu chuan min lo chhan sak sawk sawk a, min endanin min ti zam lutuk chu ka kut phah a thlan huh dap thei hial a ni. Hnathawh naa ka awm dan chuan a lung a tih awih loh ka hlau a, thawk tlak loh a min ngaih leh te ka hlau a, min huain min ban tir leh daih mai ang tih te ka hlau a, ka thil ngaihtuah tehhrep chu ţul ti lo viau mah ila ka thunun thei tlat lo. 

Min en vang vang hnuah "Engtin nge i awm?" a ti leh a, "Ka ţha vek" ka tih hnuah aw ka thian zui kharh kharh a, ka ţawng ri chhuak thei lo lek lek alawm le. 

"Zan i mu thei em?" awki nelawm loh taka a tih leh chuan lu ka thing a, ka nu boral hnuah ngat phei chuan hlimna tak tak ka hmu tawh lo tih theih a nia, zanah pawh ka ngaihtuahna maksak tak tak bawkin min tibuai a, mutthilh chu sawi loh, zan a rei a, ka harh telh telh a, ka tla kawk kawk ni maiin ka hria. 

"Doctor hmu rawh" a ti nghat a,a sana bunlai bih pahin min kalsan a, "Mu thei lo ringawtah te chuan eng doctor nge maw ka hmuh chuan ang le?" ka ti nang nang a, ka lu na tluk tluk hi chu ka rilru chawllo lutuk vang a nih ka ring ber.

Hmangaihsanga a lo let mai tak lohah chuan haw kan tin tuah a, ka inkhung mawlh mawlh lai chuan "A lo let alawm" Zonunin a lo ti sap a, keipawh chu hawichhuak thuaiin kan ţhutna a lo thleng ţep tawh zawk hi a lo ni. 

"Ward ah ka kal leh lawk dawn a, min lo nghak rawh" fiah angreng tak, dam thlap tho si hian a ti leh a, a tlai deuh ruai tawh a, a damlo bik te a enkual hmasa duh a nih ka ring.

"Haw rual lo mai ang aw. Naktukah kan inhmu leh dawn tho alawm mah se ka lo nghah pui ang che. Awmtei nen a an awm dun kha hmuh nuam i tih loh chuan in pahnih chiah a in awm hunah sawichhuak rawh. Hetiang hi chu thik suh intih ringawt theih pawh a ni chiah loh a, chuvang chuan hrilh tawp mai rawh. Thinrim kher lo la maw ţha deuhin i sawi chhuak ang a mah se hmeichhe ţhenkhat hi chu mipain an hnar pawn awmzia a awm ngai lo a nia aw" a ti malh malh a, ka thik vang ringawt a buai ka ni pawn ka hre lo, ka ngaihtuahna kal kual nasa lutuk vang zawk a nih ka ring. 

Rei mawi tawk kan nghah hnuah a lo let a, "Kal ila" a tih rual chuan ka tho tharh a, Zonuni hoin kan inzui chhuak a. Zan lam a duty tur pawh a lo thleng tawh. 

Garage ah kan inzui thla a, "Nih leh u aw..dam chuan naktukah kan inhmu dawn nia" a tih hnuah Zonuni chuan two wheeler park na lam bik chu a pan a.

Motor chhunga ka ţhut luh rual chuan seat nghen chhan ka ngheng a, ka mit ka chhing vang vang a, a hma ang emin ka hlauhna leh thlabarna te kha a nasa tawh lo, mahse min la kian san lo thung. 

Motor a a lo ţhut luh ve rual chuan "I damlo mi?" a ti leh a, "Dam e..vawiin chu ka chau riau a, chuzawng chu a ni mai" ka lo ti a, ka sam a khawih rual chuan ka meng chhuak a, ngun fahrana min lo en ran chu ka hmu nghal chat a. 

"Min ngaihtuah duh suh zanin chu mutthilh vat ka tum ve tawh anga naktukah chuan ka ţha var tawh mai ang" ka tih chuan a lo nui deuh a, "Zantin i sawi" a lo ti ve sup a, mut hma ka tum ziah a, thei ngai hek lo le. 

"Ka ti tak tak" ka tih chuan ka lamah rawn awnin duhthawh zetin min fawp a, kan awmna hmun hrerengin tim daiin ka lo fawp let a, a ruala ka hmui ka chet ve takah chuan ka samah a kut ţang a rawlh lut a, ka bek a dawmin min fawp uar sauh a, a thim deuh ruih tho na a miin min hmuh hlauin ka thle sawn a, a lo nui hak a, ka biang a fawp leh ta tho a. 

"Awmtei kha i thik tiraw?" zawi sup hian a ti a, kan la inhnaih khawp mai. 

"Aih...ka awm a nuam lo lutuk a" ka la ti tlat a, hmuh nuam chu ka ti lo chiang alawm. 

"Thik lo tak tak maw?" a ti leh kher a, a nuih a zat hmel viau bawk. 

"Aa..hmuh dun cheu kha nuam ka ti lo a, ka thik chu ka ti dawt thei chuang lo" a mit a en ran chung hian ka ti a, ka inrin hmain a chhip samah ka kutţang ka rawlh lut a, ka kut chêtin a sam chu ka khawih zui neuh neuh a. 

"Pasal nei lai a nih kha. Ni lo pawh nise ka tan a hmeichhe awmchhun i ni. Chu chu i hrereng dawn nia" aw thuk leh ril raih a a tih hnuah min kuah a, keipawh chuan a chhip sam aţanga chul thla zetin a nghawngah ka lo kuah ve a, hetianga min la kuah duh a nih chuan a tan ninawm ka ni rih lo tihna a ni phawt ang a, ngah nge maw hetiang zawng hian ka ngaihtuah tak tlat le.

An haw rem deuh thuak tawh avangin lirthei lak chhuah tum a lokal an awm lo hlauh a, khua a tlai tawh a, garage aţanga kan chhuah pawh chuan mit men a hrehawm hauh lo, mahse ka mit chu ka chhing leh tlat tho a, mut hnawk ka chak a, mu mah ila ka hahdam leh awm chuang si lova, tunhnai phei chu engmah nuam ka ti lo, ka hne em em vek a ni mah zawk. 

Muangchangin a ding riai riai a, thawm a awm nak nak bawk a, traffic a jam tih hriain ka meng kher duh lem lo. Ka kut rawn banin a la kang a, a hmui lum thar thar chuan a fawp zui vang vang a, "I cher riau" a tih chuan ka lo nui mai a, thil ei a harsa em a ni. 

Ka phur chang chuan ka hahdamin thla te pawh a muang ve ţhin a, rei a daih ngai lo thung. Thaw ipikna hian chhungril aţangin min rawn tur leh ţhin a, ka beidawn lutuk chang phei chuan ka hlim phal lo tu hi an va tam em ka ti leh ringawt ţhin. 

In thleng min thlah thlap a, Bawiha pawn min lo lawm khawp mai. Thiangi hmuh tur awm lo chu "Khaw nge?" tih pahin pindan ka hawng a, a lo ruak huai mai. 

"Khawiah nge Thiangi?" ka tih nawn leh chuan "Rinrin nen hian an inhnial a, ţawngkain a daih loh chinah kut an inthlak a, a chhuak tau a nih kha. Dan ka tum ngial a, a dan theih loh" tih pahin ka putea chuan ka nu Chhuani fanu chu a kawk zeuh a, ka thin a sa ve phat mai. 

"Eng nge in hriat a? Tun hma zawnga min ngaihsak ngai mang si lo in rawn riak tluk tluk a, he in hi in duh duh a inkhawsakna tur a ni hleinem. Thiangi khan nangni ai chuan min duhsak daih zawk. In awm chhung chu a lo let duh tawh lovang. Chhuak ula lokal leh tawh suh u" ka ti fak fak a, min en kal a, an chesawn duh eih lo.

"Chhuak rawh u ka tih chu" ka ti vin tuarh a, ka au a ni mah zawk awm e. 

"Kan awmdan apiang a sawisel a nih kha" Muanpuii zawkin a lo tih chuan "Sawisel loh theih in ni hleinem. Nilengin in mu a, phone in khawih a, inchhung chet leh rawngbawlah in pui ve ngai bawk si lo. Insiam ula haw nal nal rawh u ţangkaina pakhatmah in nei lo" ka ti hlawih hlawih a, Hmangaihsanga chuan chik zetin min lo en ran a, min dan a tum lova, min khap hauh lo bawk. 

"Thiangi hei i u a lo haw a" ka putean a tih takah chuan phone ka chhuhsak rawk rawk a, ka beng a ka chuk tuah rual chuan "Khawiah nge i awm?" ka ti fiah fak a, ţap ri lo chu thawm hriattur a awm lawk lo lehnghal. 

"Khaw nge i awm a Thiangi?" nem deuh zawk hian ka ti leh a, "Kan in chhakah ka awm" a rawn ti ţiau a, a aw te chu a khawngaihthlak lutuk. 

"I la lut lo em ni?" ka tih chuan "Aw lut chiah lo, luh ka tum vel mek a, ka lut ţep tawh ang" a ti niah niah a, sawi dawt lo mah se a haw hreh zia ka hai lo chiang khawp. An inah chuan haw se zanin la la ah pawh a pahrawnin a lo khawih leh emaw a nia nga, a rilru na in zu a tlân leh mai ang. 

"Ka lo hruai ang che" ka ti ve ţhuai a, "A ngai lo" a lo ti vat thung. 

"In chhungkaw zinga mi ka ni ve lova, keimah vanga inchhunga buaina a awm ai chuan kan inah ka haw tawh mai ang" a ti chuai raih a, Muanpuii leh Rinrini te chu ka melh hrak a, eng thil nge maw an lo hrilh le. 

"Buai love..i telloin kan awm thei lo zawk alawm. Tikhan lo awm reng la, anih loh pawn in veng kawnah min lo nghak la ka lo hruai ang che" ka ti nawn leh a, anni vang mai mai a Thiangi hrehawm tawrh tir ka phal teuh lo. 

A duh lawk lova, rei ngial ka thlem hnuah a remti ve ta hram a, kawng dang a awm miau loh avangin Hmangaihsanga chu min kalpui turin ka ngen a, phun nawi lovin min zui ve mai a, Bawiha ka hruai tel bawk. 

"Danglam i inti ve em?" a ti sup a, rang takin a lam ka hawi a, bing takin hmalam a lo en thung a. 

"Danglamna hian danglamna a thlen thei alawm" ka lo ti fiamthu a, min rawn melh zawk a, thawk hawk pahin hmalam bawk a hawi leh a. 

"Engin nge mawlh che?" a ti bung nghut a, lem taka ka nui hmel pawh a ral ve riai riai a, a thutak lutuk tlat a ni. 

"A tam lutuk ka sawi seng lo" ka ti a, ka awmdan tak hi ka sawifiah kilh kelh thiam lo a ni zawk mah. 

"Depression i neiin i inhria em?" a tih chuan "Teuh lo lutuk" ka ti hluai a, ka awmdan hian a ngaih a ti ţha lo a nih hmel khawp mai. 

"Ka thinrim ka puak chhuak ve a ni mai a, depression ka nei tihna a ni kher hleinem. Ka hne na a rei tawh a, ka enliam zel zawk a. Anmahni vanga Thiangi a chhuak ringawt hi ka ngaihdan a ni bik lo alawm" ka ti duah a, thil dang a sawi ka rin laiin "Tunlai chu i thin a chhia, nidang i ang lo" min lo ti leh a, lungawi lo ru deuh mah ila ka chhang let lo thung.

"Ka chik ru reng che a, danglam ka hmu nual. In chik ve la a ţha ang" a ti dam thlup a, Bawiha a chhaih zui daih bawk. 

"Zan mut ţhat loh chuan engkim kan hne vek e an ti ţhin alawm. Ka muhil ngai mang lova, insomnia in min tibuai aniang" ka tih chuan "Maithei" a lo ti bul hmuk a, thinrim hmel a pu lo thung. 

"Insomnia thlen tir tu a awm maithei bawk" a tih leh chuan "Ka ngaihtuahna ka hmang nasa lutuk hi aniang. Ngaihtuah tur hi a lo tam ve ţhin bawk sia, coffee ka ngaina bawk nen, in tlem deuh ila, rilru seng vak vak tawh lo bawk ila a ţha ang" ka ti ve mawlh mawlh a, Zonuni ka hrilh ang kha chu ka hrilh ve duh lem lo. 

"In entir la a ţha ang" a tih chuan chhang tawh lovin Thiangi ka bia a, kawnah chuan a lo ding ngei a, a nu nen an ni thung. Thiangi nau chhiat ţum khan ka hmu tawh a, a lo la danglam lo khawp mai. 

"Ka nu chawhmeh bazar nen kan inhmu fuh a" a lo ti a, nuam lo tih hmel deuh hian min en a, a nu chu ka lo be vat thung a. 

Ngaihtuah lo tura ka hrilh hnu chuan "Ni e, i hnen a a awm chhung chu ka ngaihtuah lo. Hmun dangah chhuah tir miah suh aw, ka bula a awm chuan in ah a awm ţha duh ngai lova, a bo vang vang a, pawisa a neih loh tawpah a lo haw chauh zel a, khang hun lai te khan i hnenah a awm char char tih chu hria ila ka hahdam deuh tur a nia" a ti bawrh bawrh a, ka putea hnen a kan awm ve hma daih aţanga riah chhuah ching tawh a nia, a nu hnenah chuan ka bula awm char char angin a insawi ve tlat. 

"A fel lutuk a nia" ka ti a, thil dang sawi zawm zelin Thiangi ka fak pah reng a, fate berin thu an awih duh loh chuan nu leh pate tan a hahthlak ve khawp ang. JAC tih velin han man se la, an hmangaih miau avangin an tihdan ho te tein an rilru a ti na ang a, rintlak ni a min ngaih avanga Thiangi nu thlamuang huai chu ka hrethiam khawp mai. 

"Engtin nge an tih che a?" kan veng lam pan a kan tlan laia ka tih chuan "An thawmhnaw bal suk turah an dah ţun a, su ve rawh u ka ti kha an hua a nih kha. Rinrini nen a kan insual min ţhelh tum ang deuh a awm siin Muanpuiin khan ka sam a rawn hnuk ve vak vak a, an ţawngkam a chhe dun ropui si, ks ang riakah min chhuah a, ka thinrim insum zo lovin in ka chhuahsan tawp a nih kha. Mahse ka inchhir leh vat a, kan inah ka haw hreh tho bawk si, Pa Sawman min lo call khan ka lawm a sin aw" a ti zat zat a, a lungawi ta deuh aniang a ţawng a zangkhai emai. 

"An awm lui zel a nih a, nidangah in intibuai leh a nih pawhin chhuak zawkah ţang tawh hauh suh. Kan hnen a chen ve reng hi nuam an ti lo thuai dawn a, tunah chhuak lo mah se nakinah an la chhuak tho ang" ka lo ti ve a, an nu leh pate an beidawn phawt a ngai ang a, an lam ka hawi lo tih an hriat hunah meuh chuan phal lo mah ila an hnuk haw rawk rawk mai ang. 

Kan veng tawn tirhah secondhand thawmhnaw an lo dah ruih a, kan haw lam leh Thiangi hruai tura kan kal leh laite khan ka lo hmu lo hrim hrim. Thiangi zawk chuan "Awii..U Sangte secondhand saw ka thing chak e, thawmhnaw ka nei mumal lova, ka nu khan pawisa tlem min pe hlauh bawk a" a ti lang lang a, rilru ţha ngang a ni bawk a an buaina kha a hrechang leh tawh lo a nih hmel khawp mai. 

"Va thing la" a lo ti ve mai a, kawngsir zau laiah a ding a, glass ka down rual chuan Bawiha pawh a dak chhuak ve vat a. 

"I en ve duh em?" min tih chuan lu ka thing a, "Naupang thawmhnaw a nih loh chuan ka duh lem lo. Ruattei khan min leisak nasa ţhin a, ka ha seng lo" ka tih takah chuan tukverh a dakchhuak meuhin Thiangi a au a, "Naupang thawmhnaw a awm em?" a ti lauh a, "A awm a nih chu" ţhut ţhat leh pah hian a ti zui zat a, sana a bih leh zeuh ţhin chu "I hmanhmawh tawh em ni?" ka lo ti ve thung a. 

"Hmanhmawh lem lo. Naupang thawmhnaw chu va en ve rawh thinrim tih reh nan a ţha..va hai buan buan rawh" nuihzat hmel taka a tih chuan "Lokal ve rawh" ka ti deuh tlat a. 

Motor aţanga kan chhuah hnu chuan Bawiha min laksak a, a tih ziah danin kawngpui kan kân dawn chuan ka darah min kuah a, ka ngaihtuahna hruai peng thei thil tih tur min tuk sak ni berin ka hria. 

"Kha kha a hak tawk chuan la ngei ngei rawh a thar ţha teh a nia aw. I fapa lah chu a hmelţha bawk sia, a nu leh pa a chhun kawp a nih kha" secondhand zuar tu nu chuan a ti lang lang a, ka fapa hmelţha ti tu awmchhun a ni hial ang. A nu leh pa a chhun kawp a ti kher bawk nen, kan lei loh hlau a fak der chiam a ang mah zawk. 

Hmeichhia chuan secondhand thin hi nuam kan ti ţhin a, a hmun a remchan phei chuan kan ţhut chilh reng peih hlawm ngei ang. Thiangi nen a kan han thing tak tak chu Hmangaihsanga ber chuan a ning leh si a, "Engzat nge in lak tawh?" a tih loh leh "En loh in la ngah em?" a ti deuh reng a,min zawh apiangin kawr pahnih ka lo hmuh ta ţhin a, hai vak mah ila lak tur a vang bawk em a ni.

"Duhtawk tawh mai teh u khua a thim dawn" a ti deuh sek bawk a, a hnukhawi an sale a ni bawk a a man a tlawmin pawisa min pek sak a tum chuan ka duh lova, jeans kekawr ka hak chuan a iptea pawisa dah mai ka ching a, tunah pawh ka ak ţat a, pahih lek man chu ka nei daih ve lutuk.

Ka cousin te pahnih chu an lo la awm ran a, "Khatiang khan tih kan tum bik lo" an lo ti nghal var a, Thiangi berin engahmah a ngaih tak lohah chuan keipawhin ka hnar lui ţalh ta bik lo. 

Hmangaihsanga haw tur chu bathlar thleng ka thlah a, "Zanah eng nge i tih dawn?" ti a a thuphunga ka zawh chuan "Makimi te inah ka kal leh ang" a ti a, huat tinah ka tin tawh lo. Ka rilru hahdam lai tak a nih vang a ni maithei bawk. 

"Lokal ve ta che" a ti leh a, lu ka thin na na hnuah "Kal lo ang. Bawiha hi chhunah ka chhuahsan ziah dawn sia, zanah chuan a bula awm hram hram ka duh. A nih loh chuan min ngai lo palh ang" nui var var a ka tih chuan "A ţha" a ti nghat a, ka tihbuai leh hrep hnuah min haw san ve ta nge nge a. 

"U Zote ka thawmhnaw lei ho hi a nalh em?" khumah a tlar dal a, min u ngai miah lo kha a nia, tun hnu hian min u ve ta fo mai. 

"Nalh lutuk ringawt. A man a tlawm ang huin a ţha hlawm khawp mai" ka tih chuan "U Sangtea fel zia hi tiraw?" a ti leh daih a, min en ha a, chhanna a beisei chiang mai. 

"Fel e..kan chhungkaw tan ngat phei chuan" ka ti a, fak phu viau mah se ka fak hluak thiam chuang lo. 

"Pasal tlak mawle..a hmelţha tho bawk sia, a pa tel tho bawk a, nang chu ni ila ka nei hmak ang. Bakah maw nuthlawi zun a uai chu a na an tia sin, an zûn a uai laklawh tawh chu an invuan tang ţang ţang zel a, chhuah tum eng ang mah se a theih ngai loh an ti. A ţhen chuan nuthlawi an nih vang hian an chungah khuanu'n zah a ngaih mai bakah an lu chungah zawlaidi hi a surin a sur tir a, anmahni hnaih tu mipa chu an zûnah an uai zel an ti ţhin a, tlangval pakhat phei chuan nuthlawi zûnin a phuar tawh loh nan ţawngţai dam thei a pan tawp an tia lawm" a ti zat zat a.

Nui hak hak chunga "I phuah chawp a nih kha" ka tih chuan "Ni e" a ti a, a ţhen sâng bawk a, a hmel hmuh a nuam leh tawh viau mai. 

Hmangaihsanga pawh a reh vang vang a, an ţhiannu piancham an la lawm zo lo a ni khawp ang. Number hlang aţanga ka call dawn chu Kimkima hnen aţang bawkin a lo ni a, ka block vek tawh chung pawh a number dang aţanga min lo la be ţalh te chhan min ti thinrim takzet. 

"Min lo be tawh lo tur a ka tih che kha" ka ti bak hlak a, "Ka be ve chak che alawm. I lusunna a rei veleh tawh a i biak tlak tawh ang chu tiraw? Nakinah a hranpain ral tur chein ka lo la kal ang" a ti zuah zuah a, zak lo hi ka va han ti tak. 

"Ngai lo mai rawh se..min ral tlukin ka lawm e. Ka dah a nia" ka tih chuan "Ngaithla rawh" a ti bul hmuk a, "Eng nge?" ka tih chuan "Makimi te inah ka awm ve..ka nau ţhiannu a nih bakah an pa hi ka ţhianpa ber a nia" a rawn ti vel a, thil ţha tak min hrilh a tum lo tih ka hre nghal phat bawk. 

"Chu ti ang a nih te chuan Neihkimi pawh a awm ve ang chu" ka ti sam et a, "Awm love..i bialpa leh nuthlawi thar lam an awm" elsen zet hian a ti a, Kimkima anga midang huatna pai reng hi a hrehawm duh viau ang. 

"A nih chu" ka ti hap a, "An awmdun lai i hmuh ve duh chuan thlalak ka lo thawn chiah che, whatsapp han en lawk teh" a ti a, a sawi ang chuan ka ti veleh mai a, Hmangaihsanga leh Awmtei te ngei an lo ni. Chhuna a thawmhnaw hak ang kha a hak tawh loh vangin tuna a awm mek dan tih a hriat a, thlalak hnuaiah chuan a lak hun dar zat a chuang tel kalh bawk. 

CONT...