KA HRINGNUN THAWNTHU-27

KA HRINGNUN THAWNTHU-27

Kimkima thlalak min lo thawn chu ka en zawh hnuah phone chu ka bengah ka chuk tuah leh a, ka chhanna a ngaichang ni awm tak a ni a reh vung vung mai.

"Ţhian hlui an nih hi. Awmtei hi pasal nei lai a ni bawk a, ngaihdan dik lo min neih tir tum suh" ka ti ve tlat a, Hmangaihsanga hian a der chauhin min hmangaih se chu min pui reng peih lo ang a, hetiang a nasa hian min buaipui lovang. 

"Awmtei hi tleirawl lai aţanga a hmeichhe buaipui tawh a nih hi. Phaia an awm lai khan in an luah dun ţhin bawk a, chuan a pasal nen an inţhen" a ti a, mipa ve si a ţawngtam ve ngawt mai.

"An chanchin chhe lai i sawi hian ka haw zual sauh dawn che tih i hria ang tiraw?" ka tih chuan "Hria e..min huat ring sa ran chungin thudik ka hrilh che a nih hi. A pasal nen an inţhen avang chauh a mizoram rawn chhuang chhuak leh a nih hi" a lo ti a, ka ngawi vang vang a, rilru mumal loh sa nak laia thu thinţhawng tak mai ka dawng chu awmdan thiam a har tluk zetin ngaihdan siam pawh a har a, chhan ngaihna ka hre tawh lo a ni. 

"Awmtei hi a chak loh na ber aniang chu. Rei tak ţhian an lo nih tawhna chu thuhran, school naupang an nih lai aţanga inzui an nia, an inkawp rei a, Hmangaihsanga tan pawh thlah hmak a harsa dawn tih hrereng rawh" a ti khawl khawl a, chu hun reilote chhung chuan hlauhna in ka taksa leh rilru a ţhâm chhuak leh vek tawh a, kan thil hlauh ber kan hmachhawn ang mai hi ka ni. 

"Ka dah phawt dawn" tih leh phone dah ka rual a, ka kawr tlang ka lo ţham nghet hman hle a, khumah ka ţhu hnawk a, ka rilru a hahdam theih nan Bawiha muhil chu ka thlir ngawt ngawt a.

A lo puitling ang a, ka vanduaina hi a chhawm zel a nih chuan hrehawm reng rengin nun a hmang ve ang a, mi hausa karah zum deuhin a awm ve melh melh ang a, school ah a zirlai puiten an la ti duhdah ang a tih thlengin ka ngaihtuah a, chu chuan min ti chau lehzual. 

"U Zote, U Sangtean ka call tlang thei lo a ti a" tih pahin Thiangin phone min rawn pe a, "Hello" ka tih rual chuan "Tu nge i biak?" a ti deuh hmuk a, Kimkima kha ka lo be rei hman viau em maw ni, ka hre hauh lo.

"Zonuni nen kan inbia" tiin dawt ka sawi a, "I mu tawh em?" a tih lai te chuan hmeichhe pakhatin "Hmangaihsang, Awmtein a zawng che a nia, tun ang hunah te chuan phone hmang daih bik lo la, buai thei leh lutuk mai. Tlaiah pawh chaw ei hman lo pawlah i tel" a lo ti tan tan a, nuam an tih hmel khawp mai. 

"Hetah a ni maw i lo awm? Buaipui dang nei bik reng lo teh a ninawm emai. Tunhma ang kha chu nise i phur leh ber ang a, pawt hniam vek tu che an awm em ni?" tih ri in a zui zat a, Awmtei aw ngei a ni.

"Ka lokal ang" a tih lai te chuan ka lungphu mumallo lutuk chu ka lo ngaithla ve reng a, ka awm chhung te hi a tawt up upin ka hria. 

Hmeichhe pahnih a kalsawn tir hnu chuan "I mu tawh em?" a ti nawn leh a, "Mu tawh e" ka ti tham chhal a, ka aw danglam chu kei ngei pawhin ka hrechiang lutuk ringawt. 

"I ţha em?" ngaihţhat loh hmel tak hian a ti a, rilru thlabar leh chiai reng rengin ka nileng a, tun hnai chu hetiang hi ka awm dan a ni hrim hrim. A êng zawnga thil ka ngaihtuah theih loh mai bakah ka nu ka ngaihna a zual a, dam reng chunga hremhmun a awm ang vel ka ni. 

"Aw ţha e" ka ti leh tawp a, min ngaihtuah lutuk ka hlau ru kher mai.

"I lungawi lo tiraw?" dam deuh thlup hian a ti a, min hmu thei hauh lo na a lu ka thing nar nar a, "Lungawi e" ka lo ti vat a, a awih ka ring hauh lo thung. 

"I ţha lo a nih kha" a ti nghut a, ka ţhat thu bawk ka lo sawi leh a, ka awmna tur tak ni a ka hriat mipa ka be chung hian nuam tihna ka neih phah awm pawh ka hre chuang lo. 

"A la tlai chhe lo bawk a ka lokal ang" a tih chuan hnial ţang ţang mah ila a sawt lo khawp mai. Tun hnai a ka khawsak dan hi danglam ta riauin a hria a, keipawh chu chu ka inhriat dan ve tho a ni. Ngaihtuah ka ngah em a, chu chuan ka khawsak phung a thlak danglam ni ah ka ngai. 

"Dah rawh ka lokal dawn" a ti na a phone dah hmasa zawkah a ţang a, Thiangi pawn min lo en uluk khawp mai. 

"I damlo a ni maw?" min ti a, ka ţhat thu ka lo hrilh thung. Tun hma zawng aia thil ţullo ngaihtuah ka chin hnu hi chuan Hmangaihsanga pawh hian min ngaihtuah zual niin ka hria a, ka danglam deuh a a hriat laiin keiin khawi lai ber nge danglam ka hre lova, ka hrehawm tawrhna hi ka hriat awmchhun chu a ni mai. 

Ka phone a rik chuan ka ban vat a, number hlang tho a ni. Hmeichhia hi chu thil hriatchian chak reng reng kan ni bawk a, Kimkimi haw viau chungin ka be leh tho a, "I lo hrilh em ni?" a rawn ti a, thlalak chungchang kha a nih ka ring nghal hmak. 

"Thlalak pakhat vang mai mai a danglam theiah min ngai em ni a?" ka lo ti let ve salh a, Hmangaihsanga awmdan a danglam ve loh phawt chuan thlalak mai mai vanga thinrim vak chu a inrin loh thlak lutuk tlat a ni.

"I ko haw daih a an phun nasa a nia, a ţhiante berin an sawichhiat che chuan i tan a ţha lo ang. Bakah buaipui ngaia i awm reng chuan rilru na deuhin a la siam ang che" tiin ka hlauh berte zinga mi a rawn sawi chhuak a, "Ka sawi awmzia chu..anni chu keini aiin an la nau deuh a, nin chin an nei ţhin. Ka ning ve lo ang che. Ka tuam hlawm cheu ang a, retheiin ka siam lo ang che u. Rilru thlak nan a la tlai lo a nia" a tih zawm leh a, Neihkimi hian a bialpa mize diktak hi engtin nge a hriat loh theih zawk le. 

"I thusawi hi mipa sawi âwm pawh a nih loh hi" tiin ka lo khak a, tunlai mipa ţhenkhat hi chu hmeichhia aiin an ţawngthei zawk an ti ţhin a, a dik hmel viau mai. 

"I hma ka ngaih vangah ngai rawh. Min buaipui chung tu te hian min ning thuai ţhin. A atchilh che a, i zûnah a uai nghet rih a, mahse a nin chin a thlen chuan a hawisan che ang a, i lam a lo hawi leh tawh lovang. Awmtei a rawn inlan leh tawh a, an inkawp leh thuai dawn, chu chu he inchhunga awm ho hian kan hre vek. I bialpa hian phurrit a ti thuai dawn che a, hnawl i nih hmain kalsan law law rawh" a ti a, ka ngaihtuahna ang a sawichhuak thei zel chu mak ka ti khawp mai. Hmeichhe dangah ka ringhlel lova, phurrit leh hnawksak nih hlauhnain ka khat thung. 

"Keichu ka chhungte hi ka thuhnuaiah an awm a, dip dal tu leh mitmei ven tur a awm ve lo. Ka chhungte ka hlau ve dui lova, ka dah hmasa zawk bawk ang che" a ti leh a, a ruih hmel viau lehnghal. 

"Min lo be tawh suh" ka tih chuan "Ka sawi kha thil nih dan tur tak vek a nih kha aw. Nin chin a nei dawn, a nin hunah che chuan mittui mai maiin a thinlung a ti nem zo tawh dawn hauh lo a nia, a hmangaih a rawn let leh tawh tih hria la, mihringin hmangaih kan neih chuan an nunhluiin min tibuai zo tawh ngai lo. Ti hian zawi zawiin a hrang ang a, ngaihdam deuh a i awm laiin a la thlauhthla ang che" a tih chuan phone ka dah a, ka lungphu mumallo lutuk chu mak ka ti khawp mai. 

Hlauhnain ka khat a, chu chuan ka thinphu a ti rang a, ka awm tawt lutuk te chuan thaw ţha hleithei loin min siam ni berin ka hria. Ka awm a na ngut ngut a, thi mai tur te pawh ka ang. 

"U Zote" Thiangi chuan a lo ti vat a, ka putea a lo lut thuai bawk. An awmdan chu ka hmu vek a, mumang ang ruaiin ka hre thung a ni. 

"Thiangi tukverh kha hawng teh" ka putea chuan a ti a, ka thaw hi a chham dawn ni ten ka hria a, ka hlau khawp mai. 

"Mate engtin nge i awm a?" ka putean a tih lai te chuan ka hai muai muai a, ka thawk a rang tih pawh ka hria. Mu leh mal nei lo ang maiah ka in ngai.

"U Sangte lokal vat teh" Thiangi thlabar aw te chu ka la hre thei tho a, ka hlauhna leh lungphu dik thei lo hi ka thunun thei lo a ni. 

Buai ru deuh a ka awm lai chuan ka kut a rawn vuan a, "Hlauthawng suh aw..a rei dawn lo a nia" a ti dam thlup a, midang thawm ka hre ve tawh lo. 

"A zo ţep tawh..i bulah ka awm ang a, duh lo mahla ka be lui zel ang che. I kut pawh hi ka thlah lovang" a ti leh a, ngaihthlak nuam ka tih tur chi a sawi zawm reng a, ka buai zual chhung chuan hun a duh rei lo, mahse a hrehawm tawpkhawk thung. 

"U Zote i ţha tawh em?" Thiangin a tih laiin Hmangaihsanga chuan "Engtia rei nge a awh a?" a lo ti ve thung a, "Ka hre chiah lo..ka hmu lawk bik lova, ka hmuh kha chuan thawhah ang deuh hian a awm a, a thaw kha a rang a,pa Sawman a biak khan  darkar chanve chu a tling lo ang" a ti sawk sawk a, a aw aţang chuan a thabar zia a la hriat theih.

Midang an chhuah hnu chuan ka bulah a lo mu ve a, Bawiha chu a kil lamah muin a mangchhiat lutuk na lamah bang a kuah lek lek a, ka fapa vang chauh pawh hian khatianga awm tur kha ka ni lo a sin mawle. 

"Khatiang khan i awm ţhin em?" ka dul zawn a kuah pah a a tih chuan "Aih..thaw chham mai dawn a inhria ang hian ka la awm ngai lo. Vawikhatna a nia, ka hrethiam lo khawp mai" ka ti a, ka awm chhung hi a puak keh mai dawn emaw tih tur khawp a hrehawm a ni. 

"Doctor hmu rawh aw" fiah angreng, dam thlap tho si hian a ti a, "Eng doctor nge ka hmuh ang a?" ka lo ti vat a, khatianga ka awm leh kha ka hlau a, ka duh tawh bik lo a ni.

"Ka ţhiannu hi psychologist a nia, naktukah ka hruai dawn che nia" a tih chuan "Rilru lam doctor daih maw ka hmuh dawn a?" ka ti hluai a, depression ka nei niin ka inhre bawk si lo, a mak khawp mai.

"Ni e, i mamawh alawm" a lo ti mai a, "Tuna ka awmdan kha eng nge?" ka lo ti ve thung.

"Panic attack aniang" a ti a, ka hrethiam ve ta kuar a, ka hlauhna hian a tawp khawk a thleng tawh pawh a ni maithei asin. 

"Ka awm ang khan midang an awm ve ţhin em? Keimah chiah ka ni lo ang tiraw?" ka tih chuan "Awm ţhin e, mahse a thawh dan a inang vek lova. Tam tak chu an bulah awm reng mah ila kan hrethei kher ngai lo. Ţhenkhat chu hriattheih khawpin a langchhuak thung a, a rei zawng pawh a inang lo, a tlangpuiin minute 5 aţanga minute 10 te a nia, Thiangi sawi hmangah nang chu minute 30 vel lai a nih hmel a, doctor hmu vat la a ţha ang" a ti duah a, min rinhlelh rukna a rei tawh a, doctor pan tur a min râwn nghal mai pawh hi a âwm lo lem lo.

"Sawi dun i duh em?" a inbeng kang a, min en chhuk ran a, a hmel dam thlup te chu thlamuanpui tham a ni. 

"Ka sawifiah thiam lo. Ka rilru a dik chiah rih lo aniang. Ka ngaihtuahna hian hmun tin a hawl kual a, a ţha lamin ka ngaihtuah ngai bawk si lo. Ngaihtuah loh tum viau mah ila inthunun a harsa bawk si" ka tih chuan "Ka hrethiam alawm" a lo ti a, ka thil hlauh ber hi ka hrilh dawn nge dawn lo tihah rilru a insual nasa khawp mai. 

"Engtin nge an enkawl ţhin?" ka tih chuan "Ka hre tam lo. Doctor in ţha a tih danin a enkawl mai ang che" a ti a, kuah rem tak tur a a inbengkan lai a ni bawk a tiin a taksa chu ka kuah a, rim danglam a nam lova, tu hmeichhia mah a kuah ve lo tiin ka inhrilh pah mawlh mawlh bawk a, a ni lo lam ngaihtuah loh ka tum nasa ve hle. 

"Hnathawh kan ngai ve ve awm sia, doctor chu a hmuh theih reng tihna mi?" ka ti ţha leh a, damdawi ei a dam vat vat ka duh. Hetiang reng a nih chuan ka la thi tak tak thei mai ang. 

"Tlaiah i bang hma mai dawn nia" a ti then a, "Engati nge i lokal nghal daih a?" ka tih chuan "Min mamawh a" a ti zawi sup a, ka awmdan danglam a hriatna a rei tawh ka tih tawh kha, ka ţha lo ni a a hriat hnua a lokal vat chhan pawh hi a nih ka ring. Hetiang thil a thlen hi a beisei sa hrim hrim ang. 

"I kal kawi leh dawn em?" ka ti a, Kimkiman min lo biak lai pawh khan thawm a la awm a, an la haw darh mai lovang. A rawn ruih hmel viau laiin Hmangaihsanga erawh zu rim a nam ve hauh lo a, harh fim chuan tihsual palh neih pawh a har deuh ang chu.

"Ka haw tlang ang" a tih lai mek chuan phone a ri a, ka phone a ni loh tih ka hre nghal bawk. Ka phone chu vibrate in ka dah reng zel a, a ri chhuak ngai lo.

Hmangaihsanga chu tho nghal vutin chhuata a jacket tla a chhar a, a ipte a zen rak rak hnuah phone a phawrh chhuak a, a ri a tawp hman chiah bawk. 

"Ka jacket i tlawh thla daih alawm" nuihzat hmel fahran a a tih chuan ka lo ţhen sak a, a tlawh thlak a nih loh ang bawkin a tlak lai pawh ka hre chuang lo. 

A phone ri leh mek a en chiah chu a ner deuh sawk a, a hmet tawp nghal daih bawk. Jacket a hak lai chuan "Haw nghal i tum em ni?" ka lo ti a, "Min la ngai a ni maw?" tiin min lo fiam zui ve zat a, ka lo ţhen sak a, engmah phei chu ka sawi lo.

"Awmtei kha i la duh em?" ka tih chuan min en nghal vut a, ka hre tawh tih a hre hauh lovang. Mumal deuhin Awmtei chanchin kan la sawi ngai tlat lo a ni.

"I rilru a dam thei thlawt nange?" a ti bul deuh hmuk a, a thinrim a nih ringin ka ţhu chhuak ve rang hle.

"Ka hmuh dun cheu vang mai a vei thar ka ni lo a nia, i bialnu hlui tih ka hriat avang chauhin ka zawt che" ka tih chuan a nui deuh a, chu chuan tlemin awm a ti nuam leh ta deuh e. 

"Engpawh ngaihtuahna la a chhe lamah kha chuan min telh ve suh. Kei chauh min en la, ngaithla bawk la, midang intihbuai tir suh" a ti a, a kut lum vang vang chuan ka biang tawn tawnah a dawm a, "Min ring turin ka hrilh che a nih chu" hnai taka min en chung hian a ti a, Awmtei chungchang erawh chu a sawi tel ve lo.

"Awmtei kha i la duh em?" ka ti nawn leh a, "Duh lo" a ti nghut a, min chhang rang khawp mai. 

"Nih leh min ngaizawng deuh tu hi kalpui ve ta ila engtin nge i tih ang" ka ti a, ka ngaihtuahna a kal thui leh nasa tawh. 

"Kalpui lo mai rawh" nuih hawk paha a tih chuan ka lo nui ve ta ringawt a, tawi te, a nihna tak siin min chhang ţhin a, rinhlelh luih tlat a har khawp mai.

Phone a rik leh chuan phun hluk pah hian a ban vut a, a tih tawp leh hnuah a switch off hmak a, "Tu nge a?" tiin ka lo inrawlh a,min rawn melh zawk a,"Ka ţhiante" tih pahin phone chu a kekawr ipte ah a thun a. Awmte in rawn biak a tum tih chiang takin ka hre thung.

"Nih leh Awmtei hian lo zar buai reng ta che sela i hmin leh mai angem?" a jacket lukhum pawh chhuahsak pah a ka tih chuan nin hmel tak hian a thaw hawk a, ka haider lui tlat thung a. 

"A tawp vek tawh. Sawi tawh lo la Awmtei a tel ve lo a ni mai" a ti a, a awki aţang chuan zawh zui zel chi niin ka hre tawh lo. 

Thlah kher a ngaih loh thu a sawi avang chuan ka mu leh a, a kal dawn tak takah chuan "Muttui" tiin thlakhlel hmel takin min fawp vawng vawng a, in ngaihtuah ngut ngut lo tur a min chah hnuah min kalsan chauh a ni. 

Hna kal tur a ka chhuah hmain Bawiha chaw ka pe a, a ke a then lauh lauh a, a dam tawh lutuk chuan min ti hlim a, harh viau lo se la chu ka kalna apianga hruai ve zel ka chak khawp mai. 

"Vawiinah U Hruaitea a lo leng dawn a, naktuk aţangin hna a ţan tawh dawn sia vawiin chu ka lo tlawh ang che u a ti. Chaw eiah ka sawm nghal daih ang" Thiangin a ti zat zat a, a ngaizawng pawn ka hre lo, Hruaitea hi kawm nuam a tih chi tak a niin ka hria. 

"Nia lo char rawh. Guwahati a a ţhianpa chuan thawmhnaw vel chu a lakpui thei dawn che em tih te zawt la, a theih chuan veng tawn tirhah khan thawmhnaw man tlawm te te kan ţhutpui ve ţhin ang a, secondhand hlui deuh deuh an sale ţhin ai chuan mi pawn an duh zawk ang" ka lo tih chuan a phur khawp mai. 

"Thiangte chaw i ei tawh em?" Thang Lm-a aw a hre zet chu, "Awii ka ning chupa lung lung lah chu" a ti hlak a, pakhat-a lah chuan "Thiangte" a ti leh ţhin a, ner nang chungin a kal tau chhuak nghawng nghawng mai. 

"I duty dawn lo mi? Pawn aţangin min ko lung lung zel suh ka tih kha" a ti a, ani pawh a au ve vak vak tho sia. 

"Bai ka lo suah dawn che a nih hi. Zanah chiah ka duty dawn. Ka rawn rim nileng dawn che a nia aw" a tih veleh "I duh leh lo leng rawh U Hruaitea pawh a lo leng dawn a" a hma ang chiah a ring hian a ti leh a, a vin tawh lo thung. 

"Kha Hruaitea ve lah kha a, a fai veng reuh a. In inngaizawng ve deuh mi a?" Thang Lm-an a tih chuan "Hemite ţhian dun tak hi chu aw" ka putea pawn a lo ti ve vang vang a, a nui pah ruh ruh bawk a. 

"Ngaizawng aw zawng lo aw Thang Lm. Mipa leh hmeichhia ţhian an nih hian an in ngaizawng emaw ti tlat pawl an awm ve ziah. Bakah mipa fai te chu an ţha alawm intifai peih lo deuh ai chuan. Khawi bai chu han ta teh" a ti leh hlak hlak tawh a, an inpe mai lo tawp ang.

"Ehh...a thlavang i hauh danah khan eng emaw a awm chiang mai. I inbual taima ka ti reng a ni" tiin a han fiam kual leh rih phawt a, Thiangi lo lut leh chu a phun nasa ngang mai. 

"Nizan U Sangtea buai lutuk kha ka khawngaih e...a rawn let leh khan a tlai tawh bawk sia, a haw ngat phei kha chuan a tlai tawh viau ang. U Zotei hi chu a vannei tak tak a ni" Thiangi chuan a ti siam siam reng a, a che pah reng bawk a, zinga a insuk lah khan a thawmhnaw lei kha a lo ţha vak lo ni tur a a ni a sawisel nang nang reng a, ka la enpui lem hlei lova. 

"I thawmhnaw pho saw va clip ta che..thli in a len thla mai dawn asin" Rinrinin a tih chuan clip bawm nen a tlan chhuak leh a, Bawiha chaw ei thleng ka sil laiin a lo lut leh hman a, a duh chuan a che rang khawp mai. 

"Awii..keichu zana secondhand thin chu ka sim hmak. Khua a thim tawh a kan sale a an han tih tawh chuan phur deuhin kan hai turh turh a,êng deuh bik lai zawngin kan phar darh darh a, a chhe lai a lo awm leh nge nge ţhin" a ti hlak hlak a, thinrim ang phei chuan a awm lo. 

"Secondhand hi chu secondhand a nihna lai a awm ve ţhin alawm. Hawn hlim hi chu a ţha thei lutuk a, women's polytechnic a ka luh ve zuai lai khan traffic a jam nasat deuh chuan bazar kan luh hian a thim tawh ţhin a, bazar puiah kan thing ziah alawm. Inhralh tam loh an hlau ţhin a, khua a thim tawh phei chuan haw vat vat an duh tawh ţhin bawk sia, thin fuh loh deuh ţum a awm ţhin na a cheng10 man ţha deuh deuh a tam thei lutuk" Rinrin in a lo ti ve vat a, pawl 10 a zawh hnuah polytechnic ah BCC a zir ve zuai a ni awm e, Ruattei nen in nel deuh se chu an ti ti a inrual viau maithei a ni. 

"Nakinah U Zotei hoin kan la zuar ve dawn nia. Veng chhung a nih phei chuan duh duh thleng kan ţhu thei dawn a. Keichu sumdawn ka chak teh mai nia" Thiangin a tih phei chuan Muanpuii leh Rinrini te an phur khawp mai. 

Nilengin Zonuni nen kan buai a, clinic chu an hawng rei ţhin tho a tiin Hmangaihsanga pawh ka tur hmanhmawh duh lo. Appointment nei sa lo kan nih phei chuan kan thim duai ang a, a hmun a nghah tlawk tlawk ai chuan ka thawhna hmun a hahdam deuh a awm ka duh zawk. 

"Zote, vawiin pawh i nguai riauin ka hria, nui ve tho mah la a rei lo thei e. Vei ruk deuh te i lo nei a ni lo maw?" Zonunin a tih chuan lu ka thing mai a, "Ka awih lo e..ka ţawng char char pawn ngaithla liam mai mai angin i awm. Thil i ei tlem bawk sia, vitamin ei la a ţha ang. Nakinah doctor haw hunah sample kan zawng dawn nia" ngaihsam hmel zet a a ţawng lang lang chu ka lo en reng a, Zonuni leh Bl-a te ang hian vei em em nei lovin awm ve thei ila a nuam ngawt ang. 

Ban hmain Hmangaihsanga nen doctor hmu tur chuan kan kal a, ani chuan a hna a zo tawh a nih hmel. Office ban hunlai vel a nih vangin a jam nasa a, chu chu remchangah lain "Nizan a i kalna khawi veng nge a?" tiin ka lo be buai a, veng hming min hrilh chiah chu kan veng nen a lo inhlat lo khawp mai. 

"Kan inbiak zawh khan ka lokal nghal" a ti leh bawk a, ka buai nasat em vang khan sana ka en lova, engtia rei nge a thang pawh ka hre lo. Ka lokal dawn a tih hnu daihah Kimkima khan min lo bia a, kan inbiak zawh hnuah ka buai zui nghal ang a ni mai a, min rawn buaipui hman a nih chuan a lo thleng har vak lo tihna a ni mai. 

"Doctor chu eng mi nge a?" ka tih chuan "Hruaitea aţanga ka hriat a nia, kan inhnim hnai ve hran lo" a ti mai a, "In inhriatna a rei tawh em?" ka ti leh ţalh a, rilru lam doctor te hi chu doctor dang aiin hmuh an huphurhawm zawk a, clinic bul velah hmelhriat an lo awm ang tih te a hlauhawm. 

"Kum 2 vel" a ti leh mai a, Hruaitea hi amah aiin a naupang a, ka hmuh hma hauhin doctor chu mi thiam tak a nih ka ring nghal.

"Hruaitea ang rual lek psychiatrist ni thei chu a ropui hle mai" ka ti chhuak hial a, "A upa zawk" a lo ti zauh a, motor pawh an tlan chhuak leh ţan a, mamawh viau siin doctor chu ka hmu hreh khawp mai. 

Clinic a hawng hma deuh nge mawni mi an lo awm mang tawh lova, mi pahnih lo la awm te chu kan nghak a, an zawh vek hnu a luh ve ka tum chu Hmangaihsangan "Hmanhmawh suh aw" min lo ti a, clinic nghak tu bulah a ţhu zui zat bawk. 

Doctor awmna pindan chu a zau vak lem lova, min hmuh chuan a nui sâng a, "Lo kal rawh..tah khan lo ţhu rawh" a ti zung zung a, a hmel a ţha vak lo na a a fel hmel khawp mai. 

"Eng nge i lokal chhan ni a?" a tih chuan "Ka rilru a hah thei lutuk a, ka in ngaihtuah vak vak zel bawk a" ka ti tawp a, doctor ngei pawh chhanna mumal ka pe thei lo chu a ni. 

"Chiai a mangang vak chi i ni em?" a ti a, "Ni e" ka lo ti leh mai a, "Mi aia nasain a nia nga tiraw?" a tih chuan ka bu zeuh a, miin uchuak an tih tur leh an ngaihtheih loh dan turin ka awm miau a ni. 

"Engin nge ti mangang che a?" a ti dam thlap a, "Engkim" ka ti deuh sap a, ka mangang ţhin dan leh thil awm lo pui pui ka suangtuah kual ţhin te, thil ho te pawhin thui tak min ngaihtuah tir bik ţhin dan te ka hrilh a, nunhlui te sawichhuakin ka thil tawn tawh zawng zawng te chu chipchiar takin ka hrilh phawng phawng a, min pui thei tu ber a nih avangin ka pasal neih chungchang pawh ka zep buang bar peih lo. 

Uluk deuh a ka thusawi min ngaihthlak sak hnuah "I kum ngaihtuahin i tuar thei zawk hle mai. I chhel hle a nih chu. I tawrh ang zawng zawng hi hmeichhe dangin tuar ve ta se hrehawm an ti ngawt ang" a ti a, zuau min ti lova, midang pawn an tuar thei tih velin a sawi lo bawk a, ka hnualna turin eng ţawngkam mah a nei lo. 

"Engtik aţang khan nge in ngaihtuah vak vak i chin? I mangan vak ţhinna te chu engtik a inţan nge?" a ti leh a, ka nu thih thu ka hrilh tawh tho avangin "Ka nu boral aţang khan niin ka hria" ka ti a, a lo bu nghat a. 

"Mahni chauh a awm chuan ngaihtuahna hman vak vak a awl ţhin alawm. Chhuah harh ve zeuh zeuh a ngai ţhin a, nuih i châk loh pawn nuih luih tum la" a ti dap dap a, awm dan tur leh ka buai zual dawn ni a ka hriat a inven dan tur te min hrilhin "Kumkhua a daih dawn lo tih hrereng la" a ti a, rei tak kan inkawm hnuah damdawi min ziah sak a, counsellor a ni lo na a ka hlawkpui viau chuan ka hria. 

Hmangaihsanga pawn min lo nghak ve reng a, ka hnung lawk a doctor a lo chhuah ve nghal avang chuan an inbe luam a, an thusawi dan hmangah Hruaitea nen chuan inlaichinna an nei ve deuh ni awm tak a ni. 

Damdawi min chawh chu ka lam a, fluoxetine tih te a ni nawk a, a hming a mak hlawm khawp mai, rin aiin a to lo lehnghal a, a tihzia tak tak a ni.  

Kan haw kawngah chuan "Chaw lo ei ve nghal mai la, Thiangi khan Hruaitea lo len a tum a tia, chaw eiah a sawm nghal daih maithei a ni" ka tih chuan "Kalna tur ka nei a" a ti leh tawh a, keimah chauh min ngaihtuah rei tawh a, tunlai chu a buai ve khawp mai. 

"Khawi lamah nge?" ka tih chuan "Damlo an awm a" tih ringawtin min chhang leh a, a sawi chak loh zawng a nih ringin ka zawt lui ţalh duh bik lo.

"Mu hma ringawt lovin mutthilh hma tum rawh aw. Ka hman veleh ka lo bia ang che" a tih chuan "Umm" ka ti a, pawn lam ka thlir ta daih a. 

"Lungawi lohna i nei mi?" a tih leh chuan ka neih loh thuin ka chhang a, zanah lo leng kher lo mah se pawi ka ti lo tlat a ni. Mahnia awm a ţhat loh rualin mahnia awm ka chak a, ka khua a har tho bawk si, damdawi hian min ti dam thei em ang chu maw. 

Kan in pan chhukna step bul a din dat rual a chhuk nghal mai ka tum chu min pawt letin "Engtizia nge a?" a ti nghut a, ngun zetin min en a, a meng dur khap mai bawk a, chu chuan min ti zam lek lek a ni.

"Engmah a ni lo. Ka ţha alawm, zanah ka muhil hma bawk ang" ka ti liam satliah a, doctor khan anxiety min ti a, panic leh generalized anxiety disorder ka neih kawp a ring deuh lehnghal. He natna hmelhriat ve te lo chuan ka awmdan hi an hrethiam kher lovang. Thil ka dâwn thui thei lutuk hian min ti chau hluau hluah a ni. 

"I ţhat loh tawp kha" a ti hluk a, ka dar a dawm pahin ka hmai zawhah a rawn kun hniam a, "Zote, engin nge tibuai che a" min ngaihtuah hmel tak hian a ti leh ang lawi a, "Zan a i kalna tur sawi phawt la" ka tih chuan a nui a, "Chu chuan maw tibuai che?" a ti a, ho a tih hmel khawp mai. 

"Engkimin" ka tih hlak hnuah "Nang chu thudang daih alawm. I kalna tur chu chiang deuhin ka hre ve chak a" ka ti leh a, kan inhnaih tawh khawp mai. 

"Awmtei pa a lo damlo nasa a, ka lo hre lawk lo, a lo let hnu hian a sawi chauh a" a ti ban charh a, Awmtei a tel ve vang a nih chu min lo hrilh chian duh lawk loh ni. 

"A nih chu...chhungte chan nat zia ka hre tawh a, Awmtei pa pawh chu lo dam rawh se" pangai takin ka ti thei a, ka danglamna a hmuh loh avang chuan ani pawh a lawm ve khawpin ka hria. 

In ka thlen chuan chaw an lo ei dawn vel mek a, Hruaitea a lo awm tawh lova, "In sawm ve lo em ni?" ka fapa pawm kan paha ka tih chuan "A lo ei hman lo a, mah se naktukah keiman ka ei dawn. A nu piancham a nih bakah hna a zawm leh ni a nia, damdawiin a thawk rau rauah pawh TB lam chu damlo an tam vak ngai lova a tia, falkawn aţanga a lo haw pahin min lo lam dawn" Thiangin a ti zat zat a, a phur zia sawi zuiin Rinrini leh Muanpuii te an lo nui kar kar bawk a, an insual vak hnu kha chuan an in mil ta phian a nih hi. 

"U Thiangi hian U Hruaitea a star chiang mai" an ti a, Thiangi lah chuan "A teuh lo lutuk ringawt. U ang chiahin ka en a, a fel a, hmeichhe tan a kawm nuam chi a ni bawk a, star ila chu an inah chaw ka ei ngam hauh lo ang" a ti pang pang a, thawmhnaw hak tur a neih loh zia sawiin a phul leh hlut a, ani chuan Neihkimi a ti thiam a, hmanni lawk pawh khan pawisa an inpein ka hre sia, thawmhnaw ţha a lei ngam lehpek tawh lo aniang. 

"Rinrini hi Beauty culture & cosmetology (BCC) zir chhuak lo deuh a nia, mahse mi chei a thiam lutuk. I kal dawnah i inchei tir dawn nia" Muanpuiin a tih leh ngat phei chuan phur tak a ni tawh. 

Hunbi deuh hlek a thil ei a ngaih vangin an rual chuan chaw ka ei ve a, ka eikham hnuah ka inbual a, Bawiha ka mutpui nghal daih a, zanlai a ka harh leh mai hlauin damdawi ka ei duh lawk lo a, ka fapa awih mut nan phone ka enpui a, Hmangaihsanga ka ngaichang pah reng bawk. Mahse Thiangi te rawn mut luh thlengin min be lo. 

Bawiha mutthilh hnuah damdawi ka ei a, ka mutthilh nghal theih mai lohah chuan whatsapp ka en a, Ruattei message a lo awm ve ngei a, "Bawiha ka ngai tawh bawk sia, pathianniah lo len pui rawh. A nih loh pawn keimah ka lo leng ang" a rawn ti a ni. 

Pathianni a ka nu unaute an lo la kal ziah avang chuan inah ka awm peih lem lova, keimah bik chu hnaah pawh ka kal ngai lo. In a awm a an ti ti ngaihthlak ai chuan tiin "Ka lo leng ang" ka ti ve ţhuai a. 

"U Zote nizan ang khan awm tawh suh aw" nula ho chuan an ti sap sap a, keipawn in ngaihtuah ngut ngut loh chu ka tum ve nasa ţhin a, mahse chiaina a lokal mup mup tawh chuan inven a har lutuk ringawt. 

"Awm tawh lo ang..muhil rawh u" ka ti a, êng an tih thim rualin keipawn ka mit ka chhing a, ka mutthilh hma zawng chu Hmangaihsanga ka lo ngaichang a ni. 

Zing ka thawh veleh thingpui ka lum a, ka thawm hriain an lo tho ve sap sap a, tuk dang ang bawkin bualin hman an inchuh a, an intur nasa leh viau tawh. 

"U Thiangi chuan Thang Lm-a te bualin han hawh mai rawh se" ti a an fiamna te chu vin hlarin a chhang let a, kan inchhung boruak chu a kângin a nuam sawt hle a, chu chuan ka chhungril a thaw ipikna hi nawr kiang thei se ka ti ţhin a, kumkhua a awh dawn lo ti a doctor-in min hrilh kha ka vawng reng bawk. 

Damdawiin ka thlen chuan Zonuni a lo ti ti leh nasa tawh a, zan lam a nurse duty haw tum tawh te a lo be khawtlai lehpek tawh a ni. 

Hmangaihsanga missed call leh message lo awm nual kha ka hmu ve ngei a, zingkarah hunawl ka neih tlem ţhin avangin "I mu tawh em?" tih min lo thawn chu "Hei hospital ah ka awm tawh" tiin ka chhang let a, keimah zawk chu ka nuih a za a, Zonuni pawn "Nuam awm vur vur ve" a lo ti leh zuk zuk tawh a, ka chhan let danah chuan ka thinrim loh zia a hriatthiam ngei ka ring. 

Tuk dang aiin a lokal tlai a, kan dawhkan hma a a rawn din chuan Zonuni zawkin a lo fiam leh luam tawh a, mihring hi a lo danglam theih khawp mai, inbe ngai hlei lo kha an in ngamtlak ta em em mai chu a nia. 

"I muhil thei em?" a kut a ka biang rawn nul thuak pah a a tih chuan "Aw..mahse mi aiin ka meng rei tho" ka lo ti var a, a nui ve suk a, min biak lawk loh chhan te chu sawiin phone a charge a, phawi theihnghilhin phone tello in a chhuak a lo ni. 

"Tlaiah ka thlah hman kher lo ang che aw" Zonuni buai lai tak chuan a ti a, a inthlahrun ve hmel reuh em em mai lehnghal. 

"A ngai kher hleinem" ka tih chuan "Lokal ve rawh ti ila i duh leh dawn si lo a" a ti a, a nui hmel chu hmuh a nuam takzet a ni. 

Rin dan nei sa ran chungin "Khaw nge i kal dawn?" ka lo ti a, "Hruaitea te inah" a ti chiah reng a, Thiangi nen an inhmu nawlh dawn a nih hmel.

"Nizan i haw har em?" ka ti ţha leh a, mi an la tam lo bawk a a inbiak theih viau mai. 

"Ka lo be nghal che" nuam lo tih hmel zet hian a ti a, min rawn biak hun kha a haw hun a nih chuan a leng rei thawkhat tihna a ni mai. 

"I va leng rei ve" ka ti bak hlak a, ka bialpa chu duh chuan ka khak ve thiang alawm. Ka va ringhlel tihna phei chu a ni lo. 

"Nu berin haw a phal tlat lo a" a tih chuan mithmul ka lo kan ak a, "Awmtei nu mawle" a ti nghut a, eng em ti dawn lo mah se kan duh ber te hmeichhe dang kianga an awm chuan ngaih a ngam mawh ve hrim hrim. 

"Ka haw hmain thil kan ei dun dawn nia" a tih hnuah a pindan lam min pan san a. 

Zonuni nen kan tih tur kan tih mawlh mawlh laia Kimkima ka hmu thut chuan ngaih a ti ţha lo khawp mai. A nui hmel verther hmel tak te chu ka hmuh hmaih lo a, Neihkimi bialpa a nih miau avangin thil pawimawh ti tura lokal a nih ka ring lo bur. 

Kan lam pana a lokal chuan ka lo ip deuh chawi a, pawn lamah ngat phei chuan inhria anga awm ka duh lo hrim hrim. 

"I va buai awm ve" a tih te chuan ka lo nui tawi tak a, "Eng nge i lo tih dawn?" tiin a mawiah zawhna ka lo zawt ve a, Neihkimi hi mimal nun thup tlat chi a nia, tuman an inlaichinna hi an hriat ka ring lo. 

"Ka lo hmu dawn che" a tih chuan ka ner nak a, "Min block leh tawh sia" zawi sup hian a ti leh a, ka buai vak zan la la khan ka block nghal a, a reh zui ve mai ka rin laiin min hmu turin a lokal leh a, a huangtau sawt khawp mai. 

"Ka block zel ang che" ka ti hmak a, a zahtheih loh zia hi mi bulah phei chuan sawi ila an awih kher lo ang tih tur a ni. 

"Ti hi chuan min block thei nang" a la ti tak deuh deuh a, kan chheh vel a mite hi amah hre lo tu vek an nia, hlauh leh venthawn pawh a nei lo. Amah hre tu ber tur Hmangaihsanga lah damlo enin a buai dawn nasa mai bawk si.

"I buai zo ţep tawh em?" a lo ti leh a, a mitmeng lerh hmel lutuk te chu ka kham hluah hluah a, thinrimna leh hlauhna min siam nasa khawp mai. 

"Nilengin ka buai dawn" ti ve hmak mah ila "Nih chuan tlaiah ka lokal leh ang" luhlul chhuahin a ti ve tlat a, "I bulah ka kal lovang. Neihkimi te unauin min hmuh dun ka duh hauh lo a nia, lokal nawn leh a ngai tawh lovang" vin lek lek a ka tih chuan Zonuni pawn min ngaihven ţan a, a chet phungah chuan min ngaichang ru ran tih a hriat theih bawk. 

"Ban hun awmah ka lo lam ang che" a ti a, a kut a vai zauh hnuah a chhuak nghal nulh a, zakthei lo ka tih rualin eng chiah nge a duh hriat ka chak khawp mai. 

CONT..