KA HRINGNUN THAWNTHU-28

KA HRINGNUN THAWNTHU-28

Chhun a doctor hoin thil an ei lai chuan keipawh Hmangaihsangan thil ei puiah min rawn sawm a, Zonunin amah chiaha a ei tur chu khawngaih viau mah ila min nghak leh run tawh a, zui loh theih a ni ţhin lo. 

Nitin inhmu mah ila Nu Sangpuii hi chuan min lawm thiam em em reng a, Piani tê kha chu hmuh tur a awm tawh ngai lo. Kan ei duh zawngte kan lam hnu chuan "Thisen i pe ve ngai em?" a ti deuh phawng a, ka hawi â nasa viau maithei a ni. 

"Pe ngai nang..ka pe thei lo ţhin a, pe pawh ni ila pek let ka ngai zawk maithei a ni" ka ti fiamthu a, ngun deuhin min en a, ka awm a ti nuam lo lek lek a ni.

"B negative tiraw?" a tih chuan ka aw zawi tawh viau a, thil ţha lo eng emaw a thleng leh dawn ni a ngaiin hlauhna bawk chuan min ţham leh mer mer tawh a, a rukin kut ka humruh nasa viau bawk.

"B negative hi a vang khawp mai. Mizoram chauh ni lo ram dangah pawh a ni tho, blood type ah chuan a vang ber pawl a ni" a ti leh rih ţhin a, hlauhthawn tawh sa nak laiin "I nu kha O a nia, duh mah la thisen i pe thei dawn lo a ni maw?" a la ti tak deuh deuh a, "Ka hre ve tho alawm. Ka nu diktak a ni lova, min hringtu nu leh pate kha pakhat A, pakhat AB pawh lo ni sela ka blood group chu B a ni thei reng" ka ti hlak hlak a, ka pian dan ringhlel awm ang zia zanga a ţawng vel chu ka ngei tawk a tling ve hle a ni. 

"A leh B ringawt pawh ni sela B ka ni thei tho, a dang pawh a tam mai. Kan chhungkua hi kan mumal vak lo tih chu ka hria, mahse khawlai aţanga an chhar ka ni bik lo a nia" ka ti a, ka thin a ur leh tut tut tawh a, ka inthunun ve nasa khawp mai. 

"Chu chu ka sawi tum a ni lo" a ti bul hmuk a, a aw chang leh nelawm loh lutuk te chuan min ti thinrim zual sauh a, hlauhna pawh a bo chuang lo. 

"Eng nge sawi i tum chu?" ka tih chuan "Awmtei pa hi kal (kidney) thlak ngai a nia, kal thlak dawn chuan thisen inmil a ngai ve. Nizanah an lo sawi a, a mil pui a vang angreng" a tih hnuah "Nangmah lo chu" a ti zawi sup a, ka lungawi lo lutuk chu ka nui chhuak hak ringawt. 

"Ka kal hi Awmtei pa pe turin min duh a maw?" ka ti hluai a, ka hmaa eitur tui hnai tak inchhawp chu eichakna pawh ka nei tawh lo.

"Pe turin ka ti hleinem che. Doctor ka nia, damdawiinah ka che tla nasa a, B- hi ka hmu ngai lo ti ila ka sawi sual tam lo ngawt ang" a tih chuan "Chu pawh nise engatinge i sawi chhuah kher? I sawi dan hmangah khan Awmtei pa pui turin min beisei a nih hmel. Mizoram chhung kher loah pawh an awm ang chu. An hausa tho a, zawng se a ni mai alawm. Keichuan ka pe dawn hauh lo" ka ti nghet bur a, ka taksa peng pawimawh tak mai hmelhriat loh hnen a pek chu ka tum lo khawp mai, thi mek ila chu thuhran, dam tum a ka beih lai mek a ni lehnghal.

"Eitur kha a dai ang e" ka zawhna pawh chhang tawh chuang lova a tih hnuah a hmaa eitur inchhawp chu a ei zui nghal a, "Awmtein a tih tir che mi?" ka lo ti leh a, thil hote pawh thleng se hlauhna hian ngaihtuahna a ti kal thui vek tawh ţhin a, a tan ngeiawm deuh dawn mah se ka insum thei bik tlat lo.

"Tuman an hre lo" a ti hmuk a, Awmtei te tana ka blood group rawn hriat daih ngaihna a awm lo tih chu hrechiang viau mah ila "A pa blood group i hriat khan i sawichhuak palh a ni maithei asin" ka ti leh hram a, a meng dur nghal khap mai.

"I nuam lo leh deuh em ni?" a tih chuan "Awm nawm theihna tur sawi kan nei em ni?" ka lo ti ve fak a, ka pawl tual tualin a hria aniang chu min chhang zel duh ta lo. 

Pawisa a pek lai chuan Nu Siampuiin "In inzui ka hmu khat lutuk a ka mangang hman a, mahse Zotei hna aţangin a bang tih an sawi leh a, ţawng mawh viau mahla kan ngai ve tho che aniang i chanchin kan sawi ve reng mai. Hna i rawn zawm leh ta hi lawm tur an tam a nia aw" a ti bawrh bawrh a, ka nuih liam mai mai laiin "Tiraw Lal-a?" a ti lauh a, Nu Sangpuii en na lam ka en ve veleh an cook chu hmanhmawh tawkin choka ah a tlan lut a, a thawhpuiten an hlimpui dar dar khawp mai. 

"I zia deuh em?" min rawn khawih a tum rual a ka tawlh sawn dawrh chuan a rum deuh nghut a, ka lung a awi thei tlat lo a ni. Min ţhawng dawt tu a awm chang leh ka thin a ur chang chuan ngai awh lehnghal mai a harsa ţhin hle a ni.

"Ka lut nghal mai dawn Zonuni a lo buai lutuk ang" tih leh inher ka rual a, pen khat lek pawh ka pen hmain ka koki a dawm a, "Englai ber kha nge i huat?" a ti nghut a, min rawn hnaih nghal ruakin ka hmaah a ding ngur a, tur deuhin min melh khui bawk. 

"Ka chanchin hriat chian chak deuh i nei zawk em?" ka ti let a, a ngaihdan a nih loh hmel khawp mai.

"Zawhna ka zawt che" a ti bung nghut a, "Ka haw vek. Ka pian dan ringhlel ang zia zanga i ţawng te, Awmtei pa chhan nan kan thisen inmilna lai i sawi chhuak kher te kha ka hua. Anni kha ka hre ngai lova, Awmtei pawh hmu fuh lo ila chu tun thlengin ka la hre lovang. Pa pakhat damlohna avangin thu mak pui pui i sawi a, min hnuh luh ve i duh hial a, i la thlahthlam thei tak tak lo tih a hriat alawm" ka ti a, Kimkima thu min hrilh te kha ka bengah a ri nawn tluk tluk a, ka thin a tawt nghal awp awp bawk a, hrehawm tawpkhawk kha a lo thlen leh ka hlau khawp mai. 

"Awmtei pa leh ka mimal nunin inzawmna a nei lo" a ti bul hmuk a, ani pawh a lungawi zân tawh bik lo tih ka hria, mahse "Chuti si engatinge ka thisen thlenga i sawi chhuah a?" ka ti vin hrak a, mi mitmei veng lo ila chu kan ţawng ring dun tawh viau maithei. 

"I lungawi hunah kan sawi dun dawn nia" beidawn hmel zet a a tih hnuah min kalsan a, ka awm tawt lutuk hian ţah te lam lam a ti chhuakin ka hria. 

"Ehe...pakhat a lo lut hmasa a, a hnunga lo lut phei hi chu a lungawi loh hmel lehzual a, ţha te tein thil in ei dun ang chu tih nak laiin in inhau em ni a?" zangkhai vah hian Zonunin a lo ti a, ka huat thu chhe sawt lutuk vang te, ka rilru te thut thut ţhin avang te hian ka che uchuak mah mah maithei, tunhma a ka khawsak ţhin loh dan hlirin ka khawsa a, ka rilru te hi a dik thei tawh lo. 

"Zonun khawvel hi i ning ve ţhin em? I duh dan loh deuhin thil a kal kual ve char char ngai em?" ka ti ta thlawt a. 

"Khawvelah hi chuan lungawina famkim a awm thei dawn lo tih hriat tur a nia, keichuan khawvel hi nin hluah hluah ka tum lo. Ka nat ve chang pawhin ka hnual duh ngai lova, natna kha inhneh tir ka tum lo. Taksa natna chu thuhran a nia, rilru lam natna ho hi chu maw, an hneh theih loh nih ka tum zawk. Kan mihring puite vang a nih ngat phei chuan nat reng ka tum lo bur a, anmahni vanga intihhlum phei chu ka tum lo lehzual. Kan thih hlimchhawnah tuar deuh angin an awm ang a, an status ah kan thlalak an dah ang a, luanral zawih zawih theihna tham khawp a thumawi leh ril an ziak tel ang a, pangpar leh mittui tla zawih zawih emoji an dah tel ang a, chu chu kan chan san ber tur a ni. Kan thih cham kum khatna a thlen meuh chuan hmalam an pan suau tawh ang a, kan hming bak an hreve tawh lovang. Natna leh accident vang chuan ka thi thei teh meuh mai, mahse keima kut ngei hi chuan ka nunna ka chhat lo tawp ang. Rilru natna tawpkhawk kan neih pawn Pathian nen chuan hneh theih loh a awm lo tih hrereng ila, a hun hma a thih tum bik hauh loh tur" a ti bawrh bawrh a, hlauhna a nei ve ngai miah lo em maw ni ka ti hial a ni. 

"Rilru lam natna hi chu sawifiah dan vak a vang khawp mai. Mahni a hrehawm tawrh tlawk tlawk chuan intihhlum hi a har dawn lo" ka lo ti a, ka tawrh mek a nih vangin midang lo tuar ve tawh te leh tuar mek te pawh ka hrethiam ve ta khawp mai. 

"Nia a hrehawm dawn tih chu ka hria alawm. Hetiang lam natna hi ka ngainep hauh lo, nep se chu ţhalai hma hun êng tak tak nei te hi an thi phawk phawk reng lovang. Mahse, ka hneh thei tih ve tlat tur a nia, hun harsa ber leh thih chak ngawih ngawihna a lokal pawhin theihtawp chhuah a hnawh kian tum phawt tur a nia, tum chuan theih loh a awm lo an lo tih ţhin kha. Thil tih harsa tih leh thil tih theih loh tihah hian danglamna nasa tak a awm a, rilru lam natna hi awlsam takin a dam thei lova, vawilehkhata dam thut thei chi a ni lo bawk. Mahse, rilru natna hi tawrhhlelhawm leh khirh, kan duh lo chung a min run lui ţalh ţhin tu mah nise kan rin aia nasa in thunun theihna kan ngah tih hriat tur. Mi ti hlim thei leh rilru la peng thei thil tih tur zawn hram hram a, inthunun tum ve tlat a ţha khawp mai. Kan mi ngainat leh rin zawng te hman ţangkai a ţha bawk a, a tirah chuan a harsa ang, step by step a tih a ngai ve ţhin. Dam khawchhuah tum tlat hi thil tih theih loh a ni lo, thih tum nghal mai lova dam tum a beih fan fan phawt tur" a tih dap dap hnuah "Bl lokal teh" a ti zui lauh a, a inzawm lo thei mai bawk sia maw, mahse doctor nen khan an thusawi inang a tam a, lo tuar ve hrep tawh te pawh a ang alawm le. 

"Eng nge Zonuntluang?" tih pahin kan hmazawnah a rawn ding a, a sam a ţawn tawm vek a, a lang fai ve sar mai. 

"Nichin a mitthi kha in veng a mi tiraw?" thutak deuh hian a ti a, casualty aţanga thi an awm a, keichuan ka lo ngaihven ve vak lem lo.

"Ni e..a mak tak tak a ni. Kan vengah na na na chuan a lar ve a sin" a lo ti a, a chhang ţha duh khawp mai.

"Tukverh aţangin a zuangthla an ti mai a, helai kher hi an lo pan sia mak ka ti deuh mawle. In chhung hnai a nih ka ring deuh a" Zonunin a tih chuan "Kan veng aţanga damdawiin hnai ber a ni sia lawm. A chhungte kal bo vek hlan a chesual a nia, police ah an report dawn te an tih kha. Mahse chhul ţha lo vanga buai reng a nia, a duhthu a zuangthla a nih duh hmel zawk ka ti" a ti nuah nuah a, ruang a awm tawh lo chungin casualty lam a thlek zeuh zeuh bawk. 

"Misual deuh deuh an tam tawh a, an namthla te pawh a ni maithei asin. Mi ang vak lo lehnghal mahni a zuanthlak ngawt thu awm lo" Zonunin a tih laiin Bl-a chuan "A ţhat lai chuan patil kan tih ang chi hi a nia. Hmeichhia a nihna hre lova kal theng theng ang chi kha. A anpui kawp a ching zek bawk a, mahse a danglam thut a, chhul ţha lo an ti mai zel a, pa deuhin chhul ţhalo in a thi a nih ber chu" a ti pek a, a ţawng ring angreng sia, lo khap vat lo ila chu a sawi zui nasa leh viau ang. 

Naupang lam a in entir tur an awm tawh lo bawk a Hmangaihsanga chu nidang aiin a lo chhuak hma a, "I zia deuh em?" a rawn ti leh a, "Zawhna ngai bawk" ka lo ti sap a, a hre phak kher lovang.

"Ţha e..i kal tawh dawn mi?" ţha deuhin ka lo ti ve mai a, midang awm laia ka lungawi lohna lanchhuah tir chu ka duh bik lo. 

"Kal nghal mai ang. Zanah ka lokal ang" a tih chuan "A ngai kher lo" ka lo ti vat a, a hamhaih hmel khawp mai.

"Lokal kawi kher a ngai lo ka tihna" dam deuh zawka ka tih leh chuan mit ti zim sunin min lo en a, "A la dik chiah nange a?" awmze nei taka a lo tih chuan ka chhang tawh lem lo. Ka lung a la awi lo niin a hria a, ka la dik zân lo a ring a, a ring dik chiah bawk. 

"Zanah kan sawi dun dawn nia" a ti a, kal hmasa zawkah a ţang leh tawh a, Awmtei pa nen a kan blood group inang kha mak ka ti hran lo, khawvelah hian mihring tam tak kan awm a, kei chauh ni lo B- dang pawh tam tak an awm ve tho alawm. Ka taksa pawimawh lai midang ka pek ţhen daih te chuan dam tum a ka beih hram hramna hian awmzia a nei thei nang. 

Neihkimi pawh nidang aiin a lo chhuk thla hma a, a kal hi a kal ve mai mai ngai lo reng reng. A ke pen a zangkhai vah zel a, a pheikhawk hnung a hnuh awm pawh ka hre ngai lo. 

Phone be mawlh mawlh pahin min kal pel a, Kimkima kha hruai ve daih se, ka mithmuhah rawn inlan tawh lo se ka ti takzet a ni. Neihkimi bialpa a nih vang hrim hrim pawn ka hmu hreh a, an hriat chhuah vaih chuan Neihkimi hian min ngaina thei tawh ngai lovang. 

"Zinga lokal pa khan a lo lam dawn ta che em?" tiin Zonuni chuan a la sawichhuak zui a, "Ka hre lo le..min lo lam lo se ka ti a nia. Mi chanchin chhe lai a sawi peih si, mipa tih tlak pawh a ni ve lo" ka ti hlak hlak a, "A hmel kha a tenawm e" a lo ti veleh tawh. A mitmeng hian a ni lo lai a melh duh hmel bik riau tlat alawm. 

"A meng sexy pawh a ni lo, a meng sexy chak ka ti mai. A puan hnuai men tlat" a tih chuan ka nui hak a, "I va sawi thiam tak e aw" ka lo tih te chuan a sawi chak zual sauh emaw tih tur a ni mak pui puiin a sawi zui nasa emai. 

Hlauh ang ngeiin ban bun hmain a lo lang a, chahbi vai vir pah a a lokal phei te chu a vai film riauin ka hria. Vai mipa inla pa deuh hi a ang ka tia, vai hi chu an inlak pa pauh leh an nuihzatthlak. 

"I inpeih tawh em?" a rawn ti a, a aw hi a thum eih lova, Hmangaihsanga nen engkimah an hrang hlak ti ila a dik ber ang. Neihkimi hian a englai nge maw a duh ni. 

"Zonuni nen hian haw rual kan tum" ka tih rualin ka ţhiannu chuan "Ni e" a lo ti ve nghal zat a, a lo ţawng ve zel chuan min rin loh phah ang tih hlauin a mal ka piai zauh a, Kimkima lah chuan zam lo tak hian "I ţhiannu hi lo nghak lawk rawh" a ti a, Zonuni chuan hnial tlat se ka ti kher mai. 

"Engatan nge i tih a? Kal kawina tur kan nei a kan hmanhmawh viau a sin" a tih chuan "Sawipui tur ka nei a, a rei lo ang" a ti zel a, a luhlul lutuk te chu ka huat tawk a tling a, Hmangaihsanga chanchin bak a sawi leh lo tawp ang. 

"Tikhan sawi mai rawh" tiin ka lo inrawlh a, mi inkarah tlak zeh ţalh a tum a, mi induh ţha hle hle lai hi dawt hmang lo chuan pawh ţhen a har khawp mai. A dawt sawi ka ngaithla peih lo a ni ber. 

"Ka lo nghak ang che" a tih hnuah a kalsawn a, mahse a kal hla lo. Damlo ho ţhutna ţhin a a ţhu chu theihtawp a nasa in ka melh a, a mitmeng chu thuhran, a ngo leh lutuk te chu a tenawm lek lek a ni. Mipa ngo hlung hian englai mahin ka mit an la ngai lo hrim hrim bawk.

"Tu nge sawpa saw?" Zonunin a tih chuan "Ka hre lo amah sawn min hria a" ka lo ti a, Neihkimi hian an inlaichinna hi mi hriat theih turin a lantir ngai lova, chutianga tih chhan chu a neih ka ring bawk. A mimal thil zah sakin keipawn hrereng chungin ka zep a ni. 

"Kan doctor-an a hriat chuan a thinrim dawn nasa a nia aw. Nangpawn hmeichhe dang nen a hmuh hrehawm i tia, ani pawh nangmah ang chiah kha a ni ve dawn tih hria la, mipa te hi tharum tih lohah chuan hmeichhia ai hian an chak vak bik lo maithei a nia" a tih chuan "Nang aiin kalsawn turin ka duh zawk ang" ka lo ti hlak a, hmasawnna lam sawi tur a hre leh dawn bawk si lo, ka bialpa ţhat lohna lai ka ngaithla leh reng dawn tihna a ni mai. 

Kan haw hun a nih chuan Zonuni chu min nghak lui tlat turin ka ngen a, "Tehreng mai..ka lo ţhu char char ang. Hmanhmawh turin i nawr sek dawn nia" a tih takah chuan Kimkima min lo nghahna lam chu ka pan a, "Hmun danga kal kher a ngai lovang. Ti hian i duh apiang sawi rawh" tih pahin a bulah ka ţhu hnawk a, a sawi ţan hma aţangin ka ning nghal der. 

"Engtikah nge hun thawl i neih theih ang?" a tih chuan "Ka nei lovang" ka ti hmak a, a nui ri thleng chuan ka haw hlur mai a ni.

"Awmtei lo let hian a tibuai hle che a ni tiraw?" a ti dam vei thlup a, ka chhang lo. 

"I bialpa hi a hmangaih ve tho alawm. Mi hausa chhungkua chu ni sela kha vaipa kha a nei hauh lo ang" a tih chuan ka meng kawkin ka hria.

"An hausa lo maw?" ka ti hluai a, "An tlachhia" hahdam hmel tak hian a lo ti a, a mak hle mai.

"Chu te chu thil awm thei alawm" ka ti a, chhan nuam a tih tur chi tak a nih dawn miau avangin zawhna ka zawt zui zel duh ta lo.

"Dawr lian pui an nei ţhin a, an khawsak pawh a nuam. Nu berin pawisa hman a thiam lova, pa ber lahin zu in a ching a,nula nen zu nen nuam a chen a, fa pahnih chauh an nei a, an fa u zawk a fel bawk si lo, an da ţhak a nih kha. Ba an nei ţun a, Awmtei a chet loh chuan tuman an ba rulh ngaihna an hre hleinem. An mualpho tak tak hmain pawisa pe thei tu a um ni berin ka hria. Bakah pawisa ren lo ţhang an nia, retheih thut kha an thiam lo a" a ti ta tho a, tu te pawh hian thawnthu kan lo nei ngei a nih hi. Ruattei te unau lo ţawng tam loh zia ka hriat phah bawk. Awmtei chanchin sawina hun chu an ngah mah se a chhe zawngin an sawi ngai lova, an chhungkaw chanchin phei chu an la sawi ri lo hrim hrim. 

"Eng ber nge i sawi duh?" ka ti nawn leh a, midang chanchin ngawt ngaihthlak chu ka kham tawh a ni. 

"Hun thawl i neih theih hun ka hre duh" a lo ti ve nghal vat a, "Hun ka nei ve lo ka tih kha" ka tih chuan "Nih leh helai hmunah hian hmu tur chein ka lokal ziah mai ang" a ti tlat a, venthawn tur nei lo ila chu mualpho huamin ka hnar ngei ngei ang. 

"Min zah lo a nih pawhin Neihkimi tal zah ve ta che" ka ti a, hepa hian lung a ti zing lehzual a, min ti mangang tawh khawp mai. 

"Duh naah tu mitmei mah ven a ngai lo. Midang chhiatna ka duh vang a ni lo ka tih tawh kha. Keimah lo midangin an neih che ka phal lo zawk a ni" a ti a, ka ten a, lanchhuah tir harsa khawpin ka ten ti ila ka sawi sual tam lo khawp ang. 

"I thil tih lai hi i beidawnna tur mai mai a nih hi. Nang neih ai chuan pasal nei lova ka fapa ţul pui ţhak ka duh zawk" tih paha ka thun chu ka banrekah a lo man a, ka thing thla rang khawp mai. 

"Min lo be tawh lo la, vawikhatmah lokal tawh lo bawk rawh. Nangmah vanga huat ka hlawh a nih vaih chuan ka zak duh dawn bik hauh lo a nia" ka tih kha kha hnuah kan ţhutna lamah ka let a, min umzui tih hre mah ila ka ding duh chuang lo. 

"Kal ang Zonun" tih leh bag lak la rual a, hlauh te pawh ka hlau deuh reuh e a.

"Ka lo bia ang che aw Zote" a tih te chuan "A â deuh a nih ka ring. Min zar huam huam te hi ka ngaih a ţha lo" Zonuni kalpui hlawk hlawk pah hian a ti a, "Chu chu lawm..hetiang hi chu an hlauhawm a sin. Atchilh neih hi chu a ţha lo reng reng. A ti na duh mai ang che tih te a hlauhawm" hawi let zeuh zeuh reng chung hian a ti ve a, a nau thihna khan a nghawng lutuk anga a ât phah daih emaw tih turin alawm a awm le. 

"Hmangaihsanga hrilh mai rawh" garage lam pan a kan kal laia a tih chuan "Kan buai leh nuai nuai dawn asin. Kan vaiin min nghawng leh ang a, min dem let daih ta se engtin nge ka tih ang?" ka lo ti ve thung a, rilru buai lai a lo ni nen, a rawn inlar hun lo khawp mai. 

Nidangah chuan a rualin haw dawn lo mah ila scooty a lak chhung hian kawtah ka lo nghak reng ţhin a, tun ţum chu keimahin ka awm ngam lo. Khapa kha a lo lan leh thut ka hlau a, ka chiai leh nasa viau tawh mai. 

"Hlau duh suh aw...kan awm ve chhung chu engtin mah a ti lovang che. A hranpain hmu lo la, a him chinah zel i hmu dawn nia. Keipawh hmanah chuan hetiang hi ka ni ţhin alawm. Ka mipa tawn apiang te hi khum min kaipui tum an ni zel a, hetiang mipa hi chu aj awm reng dawn. Chutih rualin mifel deuh pawh an lo lang ve zel tho a, buai vak i hlauh phei chuan i fimkhur hle a ngai a ni mai. Neihkimi hi inhuat tir tawh miah suh. Amah hi hrilh lawk daih la" kan tlan chhuah hnuah pawh a la ti mawlh mawlh a, rilru a buai duh angreng hle. 

"Lo hrilh ta ila mi ţhenkhat chuan an kawppuite fel lohna hmuh kânin a tuar tu zawk an haw daih zel a, Kimkim-a a insawithiam viau phei chuan Neihkimi hian keimah min haw daih ve thei tho a" ka ti ban charh a, min umzui luih zel chuan Hmangaihsanga hrilh mai ţha zawkin ka hria a ni. Sawi lo turin ka hrilh tel thei tho alawm.

Inchhung ka luh rualin Bawihan min lo pan nalh a, Muanpuii nen an lo in um ni awm tak a ni, "Chaw a ei a, a kawr awm a berh vek sia, thlak ka tum lahin a tlanchhe zel bawk si" a lo ti a, ka hauh hrep hnu kha chuan kawhmawh an bawl ngam tawh lova, an ze ţha lai chiah an chhuah takah chuan ngainat an awl dawn khawp mai. 

"Lo inthlak tur che a lawm" ka tih laiin fiah lo deuhin "I star" min ti a, a thusawi ngaithla ţhang viau lo ila chu eng nge a nih ka hre tawp nang. 

"Thang Lm-a zirtir a nih kha. Bawiha bulah hian 'Thang Lma hi a hmelchhia tiraw?' ka tia, 'Aih' a ti ve ngei. Min star a nih kha a tia, Bawiha hnenah hian i star ti rawh a tia, a tih nawn tir tlauh tlauh mawle" Rinrini pawn a lo ti ve zung zung a, ka fapa pawh an ngaina ve ţan viau chuan ka hria. 

Thiangi lo haw chu a ngui riau a, Muanpuii leh Rinrini te pawn an fiam nui ţha hleithei lo. Pindan a a lut chu ka umzui a, "An lo hau che em ni? Khawiah nge Hruaitea?" ka tih chuan "Keimahin ka lo haw" a pheikhawk tlawh hlih pah hian a ti a, hun nuam tak a hmang lo a ni phawt ang. 

"Neihkimi i hmu em? Lo khak tu nge an awm em ni a?" ka tih chuan "An inpawh hlawm sia, nuam ka ti lo a ka lo haw daih. Tuman min hau lo" a ti a, awih lo viau mah ila ka zawt lui duh lo. Hmangaihsanga a lokal dawn tho a, ka zawt thei mai ang chu. 

Bawiha ka mutpui lai mek chuan Rinrini a lo lut a, "U Sangtea a lo thleng" a tih chuan "Lo awm rawh se" ka lo ti vat a, dar 8 vel chiah chiah a la ni a, rin aiin a lo thleng hma. 

Ka fapa muhil ka thawhsan hnu chuan darthlalang ah ka inthlek be ngei a, ka hmai chu ka tuai ve thuak tak na a engmah phei chu ka hnawih lo, ka inbual zawha ka awm ang ang khan ka la awm a, kha leh chen kan cheng ho tawh alawm tiin ka lo inchei vawr ngai lem lo. 

Ka putea nen an lo ti ti a, "Thingpui in phawt rawh aw" ti a thingpui lum nghal mai ka tum chu "A in daih tawh" an lo ti a, a zahthlak duh khawp mai. 

Ka putea lah chuan eizawnna thlak thut a harsat zia te, zu in tlem harsat zia te leh a inleng ţhin te ngaih chang a neih ve ţhin zia te a sawi duah a, an piahah chuan ka ţhu ve ta reng a, an ti ti chu han zawm ve theih pawh ka nei chuang lo.

Sawi dun tur kan la neih miau avangin bathlarah in bang nghengin kan ţhu dun a, pawn a êng kan chhitna hnuaiah ţhutthleng kan hung a, van paw riai mai chu chiang deuhin kan hmu thei bawk nen, a nuam reuh khawp mai. 

"I lung a awi deuh tawh em?" tiin bul a ţan a, thinrim lai chuan eng thil mah a sawi dun hleih theih ngai loh a, lawm zân lo mah ila lungawi lo deuh ang chuan ka awm duh ta bik lo. 

"Thil lang thei zawng zawng hmu kim vek ţhin lo mah ila lang lo tur a thuhruk engmah a awm ngai lo. Kan rilru put hmang leh thinlungin a duh bik te thleng hian kan thukru hlen thei ngai dawn lova, i la duh takzet a nih pawhin ka dem hauh lo ang che. Mahse a ruk a min bum char char lovin chiang deuhin min hrilh dawn nia" thutak deuh a ka tih laiin ani chuan "Eng thil nge i lo ngaihtuah leh tawh a?" nuihzat hmel zet hian a ti thung a, kan sawi tum a inan loh hmel viau mai.

"Awmtei pa nen kan blood group a inan chiah thu i sawi kha mawle. A kal thlak a ngai i ti zui leh a, a pa thlenga i la ngaihven a nih chuan Awmtei pawh i la paihchhuak lo a ni mai" ka ti a, ka rilru put hmang chu kei tak pawhin ka ngaithei lo, ka natna hian huat thu chhiatna te, rilru kawi leh tê te hi a keng tel aniang chu ka ti mai. 

"Nunna hlu lo a awm hleinem. Awmtei ka ngaihven thar leh vang a ni hran lo, a thuphungin a pa damlohna chungchang ka sawi chhuak a nih kha. In blood group hi khawvel a vang ber pawl a nih vangin mak ka ti bawk" tiin a insawifiah a, "In ang an tam alawm. O ngat phei chu an tam lehzual a, Awmtei pa nen chuan inzawmna kan nei deuhin i hria em ni?" ka ti deuh phawng a. 

Ka lam lo hawiin ngun deuh a min en pah hian a hmui hnuai a pet zeuh a, "I nu diktak kha eng mi nge?" a ti nghat a, inzawmna kan nei tak tak ang a a ngaih chuan nuih a ti za angreng hle. 

"Ka hrechiang lo..ka pa nen khan ka naupan laiin accident in an boral a, ka nu chhungte leh ka pa chhungten min enkawl duh lo ve ve vangin ka nutei khan min chhuahpui a, ka nu tak takah ka ngaih phah reng bawk. Birth certificate leh thil dangah pawh ka pa boral ta hming kha a chuang a, ka pian hlim a min pawm hmasaber tu a ni bawk a, chhungkua a kan thlalak pawh pakhat chu kawl ka nei. Ka nu leh pate fa dik tak ka ni a, midang nen inzawmna kan nei lo. Khawvelah hian thil thleng thei lo a awm lo a, ram lian leh pui zawk chauh a thleng tur a kan dah te hi mizoramah ngei hian a thleng ve reng tawh. A inang palh mai mai a nih kha" ka ti deuh duah a, Awmtei nen inang min tih hlawm vang maia chhungkhat a in ngaih chi a ni lo khawp ang. Inzawmna nei miah lo hmel inang tak tak an tam tawh emai. Kan chhungte chu nise ka hre daih tawh ang, sumdawng lian ţhin an nih ngat phei chuan ka nu unaute hian an man tang chat dawn hrim hrim.

"I pa chhungte chu eng ang chhungkua nge?" a lo ti leh a, ka lo thaw deuh hak a, an chanchin sawi reng hi ka tan tak pawh a nuam lo.

"Kum10 mi ka nih lai a an in a ka kal kha ka kal.tawpna ber a ni. Chhungkaw pangngai an nia, an khawsa thei pangngai bawk a, min ngaithei se chu nuamsa deuhin ka sei lian ve ang chu. Min ngainat theih tlat loh vangin ka nu bawk khan min lachhuak leh a, tun thlengin ka la hmu leh lo a, hmuh tumna pawh ka nei lo. Min ngaina lo a min duh lo tu na na na chu pan zel a ţulna ka hre lo a ni ber" ka ti a, ka naupanlai ngaihtuah chuan rilru a na thar leh ţhin a, inchhirna tlem te tal an nei ve angem le tih hi hman ata tawh tun thlenga ka hriatchian chak ber pawl a ni. 

"Ka nei che ang a i dam mai ang" a ti teh daih a, hnial tum a a lam ka hawi ve chuan ka biang tawn tawnah a lo dawm a, "Hmeichhe dang ka mamawh lo. Ngaihţhat lohna i nei ţhin kha dah bo la, keimah chiah min en rawh. Hmeichhe dang buaipuina hun ka nei lo bawk. Ka nupui tur i nih hi" a ti nghet charh a, rinhlelh luih zel a har khawp mai.

"Min rinhlelhna i nei bik lo tiraw?" ka tih chuan "Ka ring che ka tih ziah kha. Nang chu i chak a, engkim i hneh vek thei ang" awmze nei deuh tak hian a ti a, hma ka sawn theih nan a min fuih ziah ţhin vang hi alawm a bul a awm nuam ka tih em em ni. 

Ka hmui ngawt a melh ngar lai chuan "Ka hneh theih tak tak i ring em?" ka ti chhuak sep a, ka manganna leh thlabar ţhinna te chu vai kiang lawp a har dawn lutuk tlat a ni. 

"Thei e..tum chuan theih loh a awm hleinem" a ti a, ka hmuiah chuan a fawp zeuh a, êng hnuai a awm kan nih miau avangin a inla hrang leh vat thung. 

"Neihkimi hian min la huain i hria em?" a dar a lu nghah pah a ka tih chuan "Haw lo ang. Tumah a haw tak tak ngai lo" a ti mai a, keipawn nelawm loh chi ve hrim hrim a nih ka rinna a rei tawh. Mahse, a bialpa khawsak dan hi a hriat hun chuan min haw leh viau maithei a ni. 

"Kimkima nen hian an inkawpna a rei tawh em?" ka tih leh chuan "Ka hriatpui lo" a ti mauh mai a, chuvang chuan a bawraw ve deuh laia inţan a nih ka ring thla rawk a, a lo ni a nih vaih chuan an inkawp rei ve viau tawh tih a a ni mai. 

Thang Lm-a te in lam aţangin Thiangi a lo chhuk thla chhat chhat a, a chhuak tih ka lo hre hauh lo. Kan zawn a lo thlen hma aţangin "U Sangte vawiin khan ka hmu reng che. I cousin te hoin an bawh buai lutuk che a, ka lo ko lo mai mai che a nih kha" a ti lang lang a, "Engati nge i haw daih a?" ka bul a ţhu pa chuan a lo ti ve thung a. 

"In buai lutuk a ka haw daih alawm. In cousin te ah hian hmeichhia an lo va tam em em. U Zotei nen pawh hian innei ta ula fa hmeichhia hlir in nei ang a" a ti a, a mitmeng dik lo chu chiang takin ka hmu thei a, Thang Lm-a nen zu an lo in dun a ni chiang mai, a in khat tawh viau a sin mawle. 

"Kan buai vanga i haw ka ring lo. Nangni hi in lo inhau a ni lo maw?" ngaihţhat loh hmel zeta Hmangaihsangan a tih ve takah chuan Thiangi rawn nguai haw vek nachhan chu a hre bik lo tih a hriat nghal mai a, an cousin te hoin min ngainat loh zia ka hriat miau avangin keimah nen inzawmna a neih leh palh ka hlau takzet bawk. 

"A thu hrimah i zei lo lutuk. Zanah secondhand min thin pui a, tereuh te te a pawp a lo awm lehnghal. U Zotei pawh hi thawmhnaw te present ve ta che" tiin Thiangi chuan thil dang a sawi ta daih a, thawmhnaw leisak ka beisei emaw a ti ang tih ka hlau lutuk chuan "Ka mamawh lo. Eng thil mah leisak ka ngai lo" ka ti hmak a, ka aw a vin deuh nge Hmangaihsanga chuan min lo en vat a, a meng tal tap mai. 

"Thawmhnaw tam chu a hnawk mai mai, ka mamawh ang chu ka nei ve alawm" ka ti nawi kual leh vel a, nui kar kar chunga Thiangin min luhsan hnu chuan a ngai te bawkin inneih a sawi leh der tawh.

"Kan in aţangin i putea chu i ngaihven thei tho ang. Kan ţang dun ang a, kan pui nasa thei zawk ang" a ti a, a inhuam viau na a pasal neih leh nghal mai chu thih hreh takin ka hreh thung si a ni. 

"Pasal ka neih leh vat chuan miin mak min ti lutuk ang" ka tih chuan "Hei vang hi alawm i hlim theih miah loh" nin hmel tak hian a ti a, "Mi ngaihdan tur che ngaihven suh. I hlimna tur chiah ngaihtuah rawh" a tih zawm leh a, a vin lek lekin ka hre mai. 

"Pasal ka ţhenna a la rei lova, nangpawn i hriat ve vek kha" ka ti a, pasal nei leh vat an tam tih hre ve tho mah ila ka la tim deuh tlat.

"I pasal ţhen hunin kan inneih theihna a dal lo. Chu chu ka hre tel bawk" a lo ti ve nghal vat a, "Nupui pasal a insiam dawn chuan ngaihtuah thui a ngai lutuk" tiin a lam ka hawi a, ka thaw hak bawk a, amah ka hmangaih zia chu ka hria lawm. Min kalsan daih se chu awmngaihna ber lovin ka â lek lek thei hial tawh ang chu. 

"Ka ngaihtuah vek tawh" a ti nghut a, ka ţhutna chair chawp chuan min pawt hnai a, inhnaih lui kher lo mah ila kan taksa chu a insi leh chêt tawh. 

"Min nei la i hahdam zawk ang" tih zâwngin min thlem a, ka nu kha damţha deuhin damdawiin aţang khan chhuak se chu tunah hian palai hmel ka hmu daih tawh ang. Ka nu boralna avangin min la ngaichang leh rih zawk mai mai a ni. 

"Ka awm loh chuan ka putea nun hi a ho leh vek maithei a, i chhungten i nupui tur em chuan min duh lo maithei bawk a" ka tih chuan "Ka lo sawipui ang" a ti sam et a, min neih a duh takzet tawh a nih hmel a, ka ringhlel ve deuh reng hi a ning a ni maithei bawk. 

"Aw le" ka ti ban charh a, lo remti tak tak ta ila Kimkima hian hlauhawm khawp a min umzui a chin hi a bansan angem? Tawp thei hlauh se ka ti ngawt mai. 

"Kan inhrechiang tawk tawh a, kan inhmangaih bawk. I putea lo sawipui la palai ka rawn tir ang" a ti dam thlap na a thu min pe a ang mah zawk. 

"Aw le" chiang lo ruai hian ka lo ti leh a, tunlai tak chuan in concentrate thleng hian harsa ka ti rih a, ka aw e liam vel mai mai a ni ber. Mahse, chu ti ang a nih rual chuan kan nufa nawmsakna tur leh phang lo a kan awm theihna tur a ni tih ka hria a, Sangzuala te chhungkaw nuihzat ka hlawh tawh lohna tur leh chhungkaw pangai ka din ve theihna hun ţha a ni bawk. Bawiha pawn pa a nei ve tawh ang a, hei hi a ţha zawnga ka ngaihtuah theih awmchhun a ni. Thil dang chu sawichhuah tlak pawh a ni lo, a thim lutuk ringawt.

A haw dawnah "Muttui" tiin ka chal a fawp vang vang a, keimahin bathlarah rei deuh ka la ţhu a, mihring nun hi risk takmeuh a ni tih ka hrechhuak tawh. Risk kan lak loh chuan kan tem tur ang kan tem ve thei dawn lova, risk lak fuh leh fuh lohah a innghat ni berin ka hria. Mahse, dam chhuah tuma ka beih hram hram lai hian risk ka la ngam angem le?

CONT..