KA HRINGNUN THAWNTHU-3

KA HRINGNUN THAWNTHU-3

Hringnun hian eng nge a zirtir ve che? Eng emaw tal zir chhuah i nei ve tawh ang tiraw? Hringnun hian thil tam tak min zirtir a, kan hma ngaitu emaw kan tih, tih takzet a kan rin leh hmangaih te hian kan rilru ang an pu ve kher lo tih ka zir chhuak a ni. 

Bungrua hial kan lak hnu pawh a ka chanchin a ţha lo zawnga sawi zui peih ber chu Pa Siama nupui, Nu Hrili a ni. Ţhenawmte ka rin miah loh laiin Nu Hrili hnenah chuan engkim ka thlen ţhin. Ka hlimna leh lungawilohna te, a ţawngkam chauhin min duhsak let ve tih ka hre ngai lo a ni. 

Thantein Nu Hrili min sawi duh dan min rawn hrilh chiah chu ka awih lo hial zawk. Ka ţhiannu chu ka ringhlel rum rum a, mahse, Nu Hrili chauhin a hriat rawn sawichhuah a ngah lutuk. 

"I pa Siama te inah i nu a lutchhuak reng a, Nu Hrili nen i chanchin an sawi nasa thei lutuk. Mihring hi an lo mak e, a khawngaih viau che emaw ka tia, tunah lem a rel phar nasa ropui che sia" a rawn ti a, ka ngaithla mawl tawp ringawt. 

"Ka nu bulah pawh a lo sawi ţhin a, 'Zotei hian a pasal te inchhungah min lo rel nasa thei lutuk a, ka haw riau mai' a ti fo a, ka nu hian sawipui ngat se la zawng; damchhung a ngaihthlak tham sawi tur a nei ang" a la ti zel a, an mak mange aw..nutling pui puiin keia chanchin ve mai mai an khel peih chu an fakawm letling zawk. Mi rel tur talin an la dam ve alawm le. 

Hma taka thoin tual ka phiat nghal mawlh mawlh a, "Bawiha tan khan a khu lutuk dawn asin. Hmangaihsanga pawh a tho tawh a, pawm tir mai tur che alawm" ka nu'n a rawn ti hlak hlak a, Bawiha chu min laksak nghal rawk rawk bawk. 

"Ka phiat zo a ni mai. Kan tlangval neihchhun a nia, nau kan pawm tir pur pur ten a dik nang" ka lo ti fiamthu hlut a, naupang doctor bik a ni nachungin ka tim tlat tho. Naupang doctor zawng zawngin nau an lawm vek kher lo thei a, naupang hlir hmu nileng ţhak ţhin chuan a hne hlui thei bawk. 

Tual ka phiah zawh a inchhung ka lut tur chu kawngka ka pel fel awrh tihin ka hnunglamah awm ve an awm tlatin ka hre pek a, hawi chhuak mang lova hmunphiah leh bawlhhlawh ruhna nen a lut tawp ka nia, thawm ka lo ngaihven miah lo. 

"I harh chiang meuh maw?" hnunglam aţangin a rawn ti thum dut a, awm chu an awm ngei e, tunge a nih chiang takin ka hre bawk. 

"Aw harh chiang e" tiin chesawn lem hlei lo chuan ka chhang a, a nui thawm ka hriat hnuah amah en tumin ka inher ve chauh a ni. 

Kei hi ka te chhe miah lova, mizo in a vantlang pawl kan tih mai ţhin hi chu ka pel zân zân a, chutiang a ni chung chuan Hmangaihsanga hi chu ka la chen lo hle. Mizo mipa an lian ve tawh viau na a a lian pawlah an chhiar tel ve ngei ngei ang. 

"I leng chhuak a ni maw?" ka tih chuan "I hnar bawrh bawrh lai khan insawizawi turin ka chhuak tawh mawle" chimawm zet hian a ti a, a lengchhuak mai mai emaw ka lo ti leh hman pek a nih chu!

Min han kal pelh takah chuan a thusawi chu a inthuam dan chuan a nemnghet tih ka hmu thei a, puma track suit hain running shoe a bun a, a jacket hnung lam chu thlanin a ti hnawng deuh dup a, enchiang hmasa ila chu ka ţawng sual bik miah lo tur a nia. 

"I lo let der a ni maw? Chanchinbu a lo thleng tawh a nia aw..chuan green tea ka rawn pe ang che" Siampuiin a lo ti zung zung a, cabinet vel a hru fai pah hliau hliau bawk a.  

"A ngai rih lo ang. Ka han inbual ve phawt ange" a ti ţha ve mai a, inchung panna rahbi a rah zet tawh hnuah lo lehhawiin "Kha milim kha intir rawh. Ding zum zut reng mai" nuihza aw zet hian a rawn ti kher a, mi inthlahrung ve te. 

"U Zote, green tea i duh ve em ni?" Siampuii chuan a ti chiah reng bawk a, a inher leh hmaa Hmangaihsanga nui suk chu ka hmu hman hram bawk a, tlema intih tlangnel ve deuh hlek a ngai a ni. Neihkimi emaw Zamtei pawh nise ka hmuh tawh chuan ka che khawrin ka inrintawkna ka hloh nghal zel a, hetiang reng a nih chuan zakthei lo mai bakah â nih ka hlawh tel vat ang. 

Rawng ka bawl malh malh laiin Siampuii chuan inchhung a ti fel ve thung a, a ri rum rum reng a, choka aţang pawn thawm a hriatchian theih viau mai. Hmangaihsangan thawm a la rawn nei leh lova, a lawmawm phian. Chawei hma zawng inbual se, chawei dawnah an vaiin rawn inlan huk chauh se ka tan chuan a nuam ber. 

"Ka'n hraipuar hmasa ang e. Siampuii kha khawiah nge bib a dah va zawt teh. Awrh tir loh chuan a berh leh luai mai ang" ka nu chuan a rawn ti zung zung a, Bawiha paw chungin a chaw ei tur a siam pah mawlh mawlh a. 

"Green tea ka lo siam lawk dawn" tih paha Siampuii rawn lut chu "Khaw nge bib?" ka lo ti a, sitting room lam kawk vain "Frame ah ka khai. Ka tifai mek a, a hnawk teh mai a nia aw" a ti lawk sa a, sitting room leh choka hi a inping dang a, ka awmna aţang chuan Siampuii chetna chu a hmuh nghal mai theih loh. 

"Pawi lo..ka thil kan kha a hmin ţep tawh ang lo chawk pah zeuh zeuh rawh aw" tih leh chhuah ka rual a. 

Karei! Inchhung kilkhawr ber thleng a tihfai tum pawh nise hetiang em em a ngai dawn em ni? Ka hawikual ruai a, bip pawl, ramsa hlauhawm pui pui nui ţhaw lai lem chuanna ngei pawh ka hmu. Milem ziak nalh tak an tarna frame kil zum laiah a lo inkhai va mai. 

Frame hnuai chiah single sofa ah Hmangaihsanga chu chanchinbu hlam duai chung hian a lo ţhu a, a inbual ta ngei aniang a sam pawh a lang hnawng chap alawm. 

Ka mamawh ber intarna hnuai berkher a a ţhu chu pawi ka ti ru veng veng mai. A ţhutna sofa lah chu Siampuii pek chuan cabinet nen a nawr si chêt bawk si a, cabinet awm lohna lamah lah inchhung a kan pangpar khawi (plant) sang pui pui a dahkhawm ruih bawk a, hmun awl a zuah lo reng reng a. 

Ţhutthleng dang lah chu kilkhatah insi ratin a nawr khawm vek a, chhuat a la huh phung a, khawih danglam nasa tak a ni. Cabinet awmna lam zawkah bip chu a khai va a, a hautak dawn tehlul nen henglai daih daih a khai chu ka ti rilru rauh rauh a, awm lo ang hmiaha min ngai leh tawh tu Hmangaihsanga chanchinbu chhiar chu tihbuai ka hlau ber mai. 

Fimkhur deuhin ka kal phei a, "Bip hi ka lo la lawk" tih leh Hmangaihsanga lu chunga bip intar chu ban ka rual a, ka che hmanhmawhin ka chapal chhuat nal chi leh chhuat huh chu a lo inrem lo hle aniang ka ke a inphet a, tihbuai ka hlauh ber pa chu ka bawh rawp lo chauh a ni. 

Ani lah chu a chunga ka bawh rup loh na tur a inven tumin a kut pahnihin ka awm a hup thuk a, "Awii" tih chiah ka sawi hman; khawvel leh a chhunga awm zawng zawng hi an chawl duk a, a reh ţhuap a, rilruah engmah a lut thei lo. 

Ka hnute pahnih a hum beh tlat avang chauha a chunga bawk lo ka ni mai a, kan inhnaih viau tho mai, kan insi lek lek zawk a ni. A hmel ka en a, rem leh rem lovin a kut awmna lai chu ka melh thla leh riai riai a, phur fe a 'Uai' tihna tur chi a ni lo tawp mai. 

Ka hamhaih lutuk chu thawklehkhatah a kiang duak a, khawvel leh a chhunga awmten a nih dan tur tak a hna an thawh leh meuh chuan ka ding fel der tawh. Hmangaihsanga hmaah ka ding ran a, chanchinbu ka delh chuar nasain ka lak tum ber pawh ka la lo. 

Thil thleng kha hre lo ang hmaka awmin aw ka thian kharh a, "Bip kha min lo lak lawk mai teh a" ka ti lawi rût a, ngawirengin min laksak ve mai bawk a, bip min pek pah chuan 'ka ţham hnu' ti ni awm hrimin ka hnute a rawn melh leh kher a nih chu!

"Khawi rawn la rawh, khatin melh run kher suh" tih hlak pahin bip chu a kut aţangin ka pawt thla hlawk a, ka zak lutuk chuan Siampuii ka haw rum rum mai dawn alawm le. 

Min fiam chak thut a ni chek ang chu, "Bawiha chu a puar thei pùk pùk dawn hle mai" a ti leh kher a nih chu!

"Min deusawh nan hmang zui kher suh. Thil thleng palh liau liau a nih kha" ti a midang hriat hlau taka ka phun ser ser chuan a khi suk a, ka ngei lek lek a ni. 

"Fakna a nih chu" ti liam satliahin a ţhutna lamah a let a, chanchinbu pawh mar pah a a nui leh suk ţhin te chu chechang lovin ka en reng. Zah lutuk chuan mahni taksa ngei hi thunun a lo har ţhin khawp mai.  

Min rawn melh leh rualin khawng tawkin ka inher a, chak deuhin choka ah ka lut a, Siampuii ka su lo chauh a ni ber. 

"U Zote i va hmanhmawh ve" a ti hluai a, ka nu pawn min en duh nasa ngang mai. 

"Bungrua i va hung hnawk nasa em em ve, bip lah chu sang deuhah i khai daih bawk si a, ka chesual lo chauh alawm" ka tih chuan inthiam loh hmel taka min enin "Ţhutthleng chunga lawn chung meuhin lawm ka khai" a ti then a, inchhung tihfai a tum luatah ka zak chem chem a nih kha. 

"Chhuat nawh dawn paw'n saw ti lutuk saw a ngai ţhin lo ka tih kha Siampui, i remţha leh zung zung ngai chuang bawk si lo a, chawhma chhung a hnawk leh ange aw" Neihkimi paw'n a rawn ti lut ve lang lang a, awmngaihna awm miau hek lo, an phun sup sup lo zawk ngawt alawm. 

"Tifai ţhin tu ber ka nia, a fai lohin in phun ziah. Inchhung kilkhawr ber thlenga a fai in duh chuan en liam ve mai mai teh u. Phun peih hlawm lutuk" ti a phun hlak hlak chungin Siampuii chu a pen chhuak a, Neihkimi pawn chhan ngaihna a hre bik miah lo.

"Bip chu han la ta che" ka nu lah chuan a lo ti ve sek a, ngawi reng a bip ka pek hnuah rawng ka bawl zawm a, Neihkimi chu eng nge a mamawh ka zawt buai ta bik lo. Siampuii a ti deuh kher zel bawk a, ka zawt thlawn ngun tawh emai lo nghak tawp mai rawh se. 

Ka pa kal chhuak a lo haw erawh chuan thingpui a duh leh duh loh te ka lo zawt zung zung a, "A sen hangin ka lo duh ang" a tih hnuah ka fapa chu ţhutchilhin thiam lo deuhin a lawm ve a, a rukin ka nui ka nui mai. 

"U Zote han inbual ve tawh rawh. Midang aia kal hma i ngai a ni lo'm ni?" Siampuiin a rawn ti khauh a, ka pa'n a lo tuihnih ve nghal zat avangin ka kut ka hru ro a, nuam ti zan lo chungin inchung lamah ka chho a, hmanhmawh deuh a inbual sawk sawkin ka thawmhnaw neih ţhat ve deuh chu ka ha a, smart taka inchei a ngai lova, a tihzia phian mai. 

Ka insiam zawh hnua ka chhuk thlak chuan Hmangaihsanga nen kan inhmu hman lehpek a, hmu reng chungin ka hmu lo der. A mit chu keimahah a fu run reng ni maiin ka hria a, chet vel a ti nuam lo vek. Gas bul a dingin chaw tlem ka ei a, "Thlah i ngai dawn em? Driver pakhat chiah kan nei a, inthlah tir hmasa rawh" ka pa'n a rawn tih takah chuan chaw hmuam chungin ka lehhawi a, ka ţhial chip hman miau lo a ni. 

Ka pa ţhutna bulah kuangkuah hlunin Hmangaihsanga a lo ding ve luah a, zingkara kan thil tawn vang nge, a hmelah chuan min nuihzatna a la langchhuak tlat hian ka hria. Ka pa chu chhang lem lovin ka hawisawn a, chaw ka lem fel hnuah inti mitak deuhin an dinna lamah ka inher ţha leh a, "A ngai chuang hleinem, bus stand thleng kein ka kal ang a, bus ka chang mai ang. Ka la tlai lutuk chuang lova" tiin ţha deuhin ka chhang. 

"Ke a kal chhung leh bus nghah chhung nen i tlai lutuk ang. Driver a awm reng tawh alawm, inthlah tir rawh. Ka lo va bia ang a i in eipuar hnuah i rawn chhuak dawn nia" ka pa chuan a ti deuh tlat a, Hmangaihsanga chu eng emaw a hrilh zawm a, anmahni hnungchhawn zawnga ka din leh tak daih avangin an thusawi chu mumal pawhin ka hre zui ta lo. 

Chaw ka eikhamah ha ka nawt a, darthlalang a ka inen leh thuak hnuah pawnah ka chhuak a, tual a motor inhung bul a ka pa leh driver ding pawh ka hmu chawpchilh nghal. 

"Puitea anih hi aw Zote, min nghah vang vang a ngai dawn tho a, chumi chhung chuan a thlah thei ang che. Puitea tan pawh a ninawm loh zawk ang" ka pa chuan a lo ti seuh seuh a, Puitea pawn min be nghal bawrh bawrhin nuam lo ka tih rukna pawh a vai kiang duak thei a, mifel tak a ni phawt ang. 

Hospital chu ka thleng hma viau na a Zonunin min lo thlen khalh a, mihring an la tlem deuh bawk avangin Zonuni nui ri chuan kan duty na bawr vel a luah khat hneh khawp mai. 

"I lo thleng tawh a ni maw? Hemi te pahnih hi Hmangaihsanga nau i ni tih an hriat veleh hmu tur chein an lokal" ti lang langin Zonuni chuan a piah deuh a nurse pahnih ding chu min kawhhmuh a, an la naupan hmel em em lehnghal. 

"A ti mai mai anih kha, kan doctor vanga lo nghak che kan ni lo. U Zonuni bula kan awm chak vang alawm" an lo ti nawi ve niah niah a, ka nuih liam ta vel mai mai. 

Zonuni chhuah lawk hlanin Malsawmin lehkha a rawn dah a, a kal lehnghal mai dawn maw ka tih laiin "Chuan pan tur dang i neih ngang loh avangin Hmangaihsanga te chhung i pan ta rawih a?" a ti deuh kher a, uniform a inbel tawh a, a inhmehin a lang nalh zual viau na a hmuh nalh har ka ti tlat tawh. 

"Engkim i hre tawh niin a lang a, ka hrilh chiang law law ang che. Awm reng tum a fin ka ni lem lo. Ka chhuahsan thuai dawn a, min lo ngaimawh viau duh suh" ka ti fak fak. A hriatchian loh ka hlau em a sin. 

"A ţhat nasat chu. Inthlahrun a na viau lo maw? Naute nen i chhungte ni miah lo i fin a nia, keipawh ni ila ka inthlahrung viau ang" a ti vel a, Zonuni lo lang hlawl se ka ti ngei mai. 

"Lehkha hi a neitu turin a rawn lam hunah ka lo pe ang. Min chah tur dang i nei em?" ka ti ta hmak a.

"Nei lem nang..i awm mekna in hi i chhuahsan vat theih nan ţha deuhin thawk rawh tih tê chiah ka sawi duh" a ti a, ngeiawm deuh a nui rah rah chungin a inthiarfihlim a, thaw ham ham chungin ka en zui a, ka hma hun tur hre lawk lo mah ila Malsawmi ţawngkam ang kha chu ka la tuar fo dawn tih ka hria, min ngaithei lo tu te hian min hmusit tel tlat a tin ni. 

"Malsawmin lehkha a rawn dah em?" tlangval pakhatin a rawn tih chuan en mang lovin ka lo pe a, phone a min rawn biak lai a nih vangin en chiang mang lo in ka pe mai a ni. Ani paw'n lehkha chu la in a kalpui ve mai a, engkim a kaltluang emaw ka tih laiin Malsawmi leh lehkha rawn la tu pa bawk kha an rawn let leh a, Zonuni pawh a rawn thleng ve chiah. 

"Ziak leh chhiar i thiam lo em ni? Ngati nge kan lehkha tur ni lo zawk i rawn pek?" Malsawmi chuan a rawn ti vin hlar mai a, mi an tam tawh si, ka zak kher mai. 

Lehkha chu ka enkual dan dan a, Malsawmi rawn dah zawk chu a lo la awm reng tak tak a, "Ka tihpalh lutuk ka lo pe sual a nih hi" ti sawk sawk mah ila tlangval lehkha ken chu laksakin min vawm nan a hmang a, Zonuni chuan lo la vatin a dah ţha a. An lehkha tur diktak chu a pe nghal thuai bawk a, chuti chung chuan an kal nghal mai duh chuang lo. 

"Fimkhur ve ta che, rintlak loh reuh lutuk mai. U Neihkimin lehkha i zir san loh zia min hrilh hlauh zawk a, hospital a thawk ve tlak pawh i ni nek love" min ti teh hrep a, ka zak lutuk chu hawi ngaihna pawh ka hre lo. 

Min en hrek hrek hlawm a, ngaihdam dil mawlh mawlh mah ila "Ţhu mai mai turin em ni i lokal? Lehkha tlem te pawh hre hrang thei hlei lo, damlo an tam deuh hunah engtia tih nge i tum? Hna thiam miah lova rawnkal ve reng te hi hrehawm i ti lo em ni?" a la ti tan tan a, chhan ngaihna ka hre bawk si lo, ţah te lam lam a chhuak alawm le. 

"Khaw nge in lehkha chu?" Hmangaihsangan a rawn ti ta khauh a, a awm ve tih ka hre hauh lo. Min en deuh ţhup tih chu ka hria a, ka hmelhriat an tel ve tih ka hre lo a ni. 

"Hei Mapuia hian a keng" Malsawmin a lo tih chuan "In lehkha ber in hmuh tawh a hnu ngatinge i la an chiam?" Hmangaihsanga chuan a ti a, a awki pawh a nem tehchiam lo. 

"Fimkhur turin ka hrilh anih hi. Hna thiam miah lo inchhawr tih i hria em? Lehkha a kan hming inziak pawh a chhiar thiam lo" min ngaihnep hmel taka Malsawmin a tih chuan hnuai lam ka bih a, khuk ral daih ka chak takzet a ni. 

"Tihpalh anih kha. Mapui i u hi kalpui tawh rawh" Hmangaihsangan ţha deuh a a tih tawh hnuah pawh Malsawmi lung a la awi lo, "A thlavang i hauh tlat chhan hi ka hrethiam lo. Hna thiam miah lo in chhawr reng chuan in mualpho rup mai dawn asin. Ban daih rawh u" a la ti tan tan mai. 

"Nang pawh hnathawk a chhawr lai tho i ni. Chu chu hrereng rawh" a ti bung nghut a, Malsawmi pawn engmah a sawi zui ta lo. 

"Fimkhur tawh ang che" min tih hnuah a reh zui vang vang a, an kal ta anih ka ring. 

"Ka thil chah lam turin ka kal lawk a, hmun diklo a a kal kha a lo let hun ka nghak leh ta sia, Zotei hi a lo buai deuh aniang lehkha a pe zual palh a" tiin Zonuni chuan thupha a chawi a, keichu ka la hawi chhuak ngam chuang lo. Ka zak a, hrehawm ka ti takzet a ni. 

"Mi thar i duty pui a, ţul tawpah lo chuan chhuahsan tawh suh" thupe aw zet a Hmangaihsanga a ţawng chuan hreh deuhin ka hawi chhuak a, Zonuni a bia emaw tih laiin kei min lo en reng a, kan mit leh mit a intawn chiah chuan ka zak thar leh a, ka insit a ni ber. 

"Staff ho in lehkha an rawn dah chu telephone hnuaiah emaw a hrang bikin dah la, buai laia an rawn lam thut pawn zawn buai a ngai lo ang. Tun a thil thleng ang kha i pumpelh duh chuan fimkhur ve deuh a ngai a ni mai" a ti a, a aw a la nem chuang lo na a tlemin a hmel a dam ta deuh. 

"Aw le..phone lo kal lai a nia, ka lo en si se lova, lehkha inang a tam bawk sia" ka ti bah nuai a, insawifiah ve hrim hrim ka ba alawm. 

"Tihpalh a nih kha" a ti leh mai a, "I che chhe thei si" ti leh zeuhin awmze nei deuhin a kiai suk a, zing kar a thil thleng kha ka hrechhuak leh lo thei lo a ni. 

Ka chhan hmain patling pakhat hi naupang pawmin a rawnkal a, khua a lum tehlul nen lukhum an khum tir ţup lehnghal. 

"Min hawsan daih dawn sia, i ngaihawm dawn hle mai. Nitin min lo be rawh aw" tiin Hmangaihsanga chuan naupang cher ve tak chu a fiam a, lukhum leh mask nen a nih ţup vangin a hmel ka hmu chiang thei lova, a thawmhnaw aţang chuan hmeichhe naupang ni ngeiin a lang. 

"Doctor ka ngai dawn e a ti ve reng a, in inhmuh takah chuan a zak leh si vel anih hi" nutling inkhai bawr luk hian a lo ti ve a, bill vel kan dawng ve ngai lova, Hmangaihsanga vang chauh a rawn ding kawi an nih ka ring. 

Naupangin min rawn en chuan nuih pahin ban ka lo vei a, a hmel hmu chiang lo mah ila a ban erawh a rawn vai let ve a, kan inawm hnaih angreng bawk sia

, a nuihzathlak letling zawk. A cherin a dawl dang a, natna khirh tak vei anih ka ring ve ringawt a, a khawngaihthlak ngawt mai. Natna hian naupang leh puitling a thliar mang si lo, khawvel hi chu a hahthlak a nih hi. 

"Min rawn be ziah la, mahse hospital ah chuan lokal tawh suh aw" ti a a hrilh hnuah Hmangaihsanga chuan kan sanitizer chhawp lai chu a rawn ban a, a kut a tih thianghlim te te hnuah naupang chu pawmin a kuah hlu hlu a, a mitmeng a chu naupang a lainatna langchhuak chu thlamuanpui tham khawp a ni. 

"Ngai viau che mah ila lokal ngai tawh lo se kan ti khawp mai. Tun ang reng hi ni thei se duhthusam a ni asin mawle" nutling awm ve bawk khan a lo ti leh a, a mitmeng a ngui riai a, fapa ka neih ve avangin a tawrhna chu ka lo hriatthiampui, ţawngkam khat  lek pawhin inbe lo mah ila ka lo lainat ve em em ringawt a. 

Boruak a ipik hlau ni awm takin Hmangaihsanga chuan "Lokal ru ka lo thlah ang che u" a ti hluai a, naupang chu kalpui nghalin a hnungah a nu leh pa ni awm tak te chuan an zui a, an kal liam rual a ka thaw chhuak halh chu lo hriain Zonuni a nui hak hak a. 

"I unaupa enkawl lai anih kha, hospital ah hian an lut chhuak ve reng a. Naupang kha Bethsebi a nia, cancer a nih kha. Kum7 chauh a la ni lehnghal. A khawngaihthlak tak tak a ni" tiin min hrilhfiah zung zung a, ka rindan chiah a ni. 

"Anih chu mawle...dam leh thei hlauh se a ţha dawn emai" ka tih chuan "A beiseiawm chiah lo ka ti. A taksa a chhe chakin damdawi hi a thawk miah lo emaw tih tur a nia, vei zui lutuk duh suh, hospital a i thawh chuan nitin khatiang kha i hmu dawn" min ti a, ka hmel landan aţangin ka rilru a hrethei a ni khawp ang. 

"Damna duh a hospital pan ţheuh an ni dawn sia, an duh ang ngeiin dam vek thei se ţha tur" ka ti chuai raih a, "Awiii...Hmangaihsanga hian a va be ţha thei bik che ve a" a ti deuh hluai a, ka thusawi nen a inzawm lo lutuk a rawn phul pui tak hlutah chuan ka nui ve ta ringawt a. 

"I sawi zawh chiah kha, i unaupa i tia, ka unaupa a ni miau alawm. Min be ţha lo thei nang" ka ti liam puat a, in entir tur pakhatin form fill up dan tur min rawn zawt hlauh a, Zonuni thupui khel lai kalsan tumin ka lo hrilh nghal sawk sawk a. 

"Chutiang chhuanlam a tling lo, a u diktak Dr. Neihkimi nen pawh an inbe khat lutuk, inpawh deuh a an ti ti bawrh bawrh pawh ka la hre lo. I landan hian a hip ve deuh a ni lo maw?" a la ti ţalh a, ka sawi chak loh zawng tak a ni. 

Ani ang doctor thiam, a hmelţhat chu thuhran, a palianin a taksa a mawi a, a landan ang ngawt a chapo leh inti vei a ni bawk si lo. Duh duh thing thei dinhmun a ding hi kei hian ka hip hlawl lovang. A nau anga min ngaih vang leh min khawngaih vang chauh a ni. A hmeichhe duhzawng nih te chu khawvel a ka thil hlauh ber a ni tel hial ang chu. 

"Unau pahnih inkarah inhip tawnna zeh luh ţalh i tum a ni maw?" nui rah rah chunga ka tih chuan hmel pha daiin min en a, "Chutiang a ni lo..ka sawi awmzia chu unau tak tak in ni si lova, i mipa duh zawng a ni lo anih pawn a duhzawng tak chi i lo ni mial angem ka tihna a nia" tiin a riat nawi ta vel mai mai. 

"Chutiang chu thlen tir miah suh se" ka ti chhuak phawng a, "Engatinge? Kan mi duhzawng te chu tupawn kan pan ruak ruak alawm. Bakah, i vanneih phah dawn e" phur deuhin a rawn ti veleh tawh. 

"A theih loh a ni tawp mai. Pasal ţhen tawh ka nia, mipa hrim hrim hi ka nun a lakluh ka tum tawh lo. Chumai bakah unau nihna pel a min en ni chu ka vanduaina inţanna ni tur a ni" ka ti malh malh a, belh tur fum fe nei lova in chhuahsan ka tum tawh lo reng reng a ni.

"Hmangaihna hi dan theih a ni ngai lo a nia, a ropui em a, a luhchilh ve che anih chuan lo ti tlawm hauh suh" min ti a, a sawi awmzia pawh ka hre nek love. Engahmah hma a Hmangaihsanga nen min hmehbel nghal ringawt chu ka hrethiam lo lehzual. Khapa pui kha staff tan hian a lo tawh khirh viau em maw ni zawk le? 

"Aa...Zonun, hmangaihna tih vel chu sawi lo teh ang. Hmangaihna awmzia hi tuman kan hrethiam tak tak lovin ka hria" ka ti a, damlo doctor pan tur an awm tak ţak ţak avangin chhun chawlh hun hma chu ti ti han vawrh hluaina hun kan nei tawh lo. Ka tan chuan a ţha phian zawk. 

Malsawmi lah chu min kalsan hleithei lo ni awm tak a ni a inthlak vek tawh hnuah a rawn peng leh hram a, "Damlo ho hmun ni lo lo a thawn i nei nual lo maw?" a rawn ti vel a, a aw a min deusawhna langchhuak te chu ka haider lui hram hram zawk a ni. 

"Kal vat zawk teh ang" a nau ni awm tak, a pianphung en a tlangval ve uaih tawh, hmel la no tak si hian a lo ti ve nghal zat a, lehkha ka pek sual pa kha a ni. 

"Kan inhmuh hlim hlawt aţang khan ka ngaina lo che a, chhan a awm ngei ngei ang" a la ti tak deuh deuh a, kei aiin a naupang zawk dawn tih hriat reng reng a nia, min hmusit lutuk chu tha a na duh khawp mai. Ka nunhlui khan inthunun theihna min zirchhuah tir hlauh lo se la chu kan ri buan buan tawh hial ang chu. 

"Ngainat loh zawng an awm ve alawm. Chuvang chuan kal vat rawh, i hmuh reng chuan i luak ang" Zonuni lah chuan a lo ti kher a, Malsawmi mitmeng a ling nghal vât vât mai. Tlangval erawh kha chu a nuih a za viau reuh a. 

"I thawk rei lo tawp ang" min ti teh ngawt lehnghal. Min melh ram ram hnuah a nau chu a chhuahpui a, min ngainat loh viau nachhan lah ka hre der lo. Ka hmel hi midang tan a ngeiawm hluah hluah a nih ka ring ta ber. 

Min thlak tu tur an rawnkal hnuah bag ka la a, Zonuni bulah thlah ka ngaih loh thu bawk ka sawi leh. 

"I inthlahrung mai mai a nih kha. In veng a hla tham ve sia, bus chan buai leh ai chuan a awlsam zawk daih a sin" a ti na a fa nei ve tho a nih vangin ka hnial fi thla ţhak. 

"Naktukah kan inhmu dawn nia" a tih hnuah min kalsan a. Ka hawi kual thuak a, mitin te chu mahni buai buaiin an buai ţheuh a, nurse pakhat hmanhmawh deuh a tei thuak thuak ka hmuh chuan Malsawmi ka hrechhuak. Min tih dan te ka ngaihtuah let a, huatna ka nei hranpa lo, ka thiam loh a ni miau a, mahni dik lohna pawm thlap hi tlawmna ni lovin chakna pakhatah ka ngai tawh zawk. Mahse, hmeichhe nasa ve tak zawng a ni khawp ang. 

Ka nghawng hnung lam dawmin ka thle tawn chhen a, "Ni a rei duh ţhin dawn hle mai" tiin ka phun chhuak pah bawk. 

"Hnathawh i ning ţan der a ni maw?" Hmangaihsanga aw ka hriat chuan ka phu deuh zawk. Hnunglam ka hawi a, main door chhuah chiahah a lo ding a, "Min ti phu alawm" ka tih chuan khi sukin min rawn pan a, "Ka hmu alawm" ka ţawng chhuah dan thlukin an ti ngei a(h). 

"Engin nge i haw dawn?" ti a min zawh pahin ka bulah a rawn ding a, Malsawmi a haw hma hlauh chu a tihzia ngei mai tih zawngin ka lo ngaihtuah daih. 

"A mak vung vung ţhin" nuihza aw taka a tih chuan chhan mai nachang hre lovin ka lo en leh veng veng tawh tih ka hre chiah. Suangtuahna ram a chen ka hrat a, melh ngai melh vung vung ka chin phah. Ka at hmel thei ngawt ang. 

"Bus in aniang chu" tih pahin hmalam ka en ta daih a, "Ka rualin haw rawh" a tih leh pawh chuan a lam ka hawi duh tawh lo. 

"A ngai chuang hleinem. Bus a kal reng tho a" ti a chhan paha ka ban ka then kher te chuan a nuih a ti za a, Hmangaihsanga nuihzat bur ka ni ber tawh. 

"Kawngpui bulah lo awm rawh, motor ka lo la chhuak ang" a ti a, thu min pe a ni mah zawk. 

Min ngaichang miah lo a a kal nghal vut avang chuan a rual a haw hreh teh mah ila kawngsir ah ka lo nghak a, taxi vei vak te chu phar mai ka duh rum rum. Rei nghah ngai lovin a lo lang thuai a, ţhut dun ka hreh deuh sia, hnung lam kawngkhar hawngin ka ţhu lut a, a mi uap a nat em avangin ka ţhu chu ka bet lo hle nghe nghe. 

"Vawiin a naupang damlo chhuak ta kha eng nge a dinhmun?" tiin boruak reh lutuk ţhiat hmasa tu ah ka ţang leh ang lawi a, kei tal ka ţawng chhuah loh chuan boruak uap lutukin min up chau mai ang. 

"I hmuh ang kha" tih tawp a min chhan chuan ka melh zawk a, bing deuhin hmalam a en thung. 

"A damloh hmel lutuk a" ban charh a ka tih chuan "A damlo alawm" a ti a, a aw a nuihzatna langchhuak ka hriat tel avang chuan amah bawk chu ka en leh. A rawn hawi let a nih loh chuan min hmu thei ve kher lo ang. 

"A dam lo tih chu ka hre tho a" ka tih phei chuan a ri meuhin a nui chhuak ta hawk a, ka thusawi vel te chu atthlak a tih hmel kher mai. Chutih rualin ka sawi tum tak a hriatthiam ngei ka ring bawk. 

"Lymphoma" thutak deuh zawk hian a rawn ti a, damlo kha a ngainat hmelin a natna chungchang sawi pawh a hreh takzet tih a hriat a, Lymphoma hi la hrechiang lutuk lo mah ila ka zawt zui duh ta lem lo. Mizo naupangah phei chuan vei an tam lutuk lo ang a, ka thawhna hospital an rawn pan hma hian hmun pui lam a an kalpui tawh ka ring bawk. Chu zawng, ka lo buaina tur a ni lo e. Ngaihtuah nasat poh leh khawngaihna a zual a, ngaihven lo lui ila a ţha zawk ang. 

"Vawiin a min rawn ţanpui kha ka lawm lutuk a nia" ka ti ţha leh a, a rilru lak pen dan ka zawng a ni ber. 

"Kum engzat i nihin nge pasal i neih?" a ti daih sia, ka hamhaih lek lek a ni. 

"Ka la naupang lutuk" ka ti ringawt a, ka kum zat tak ka sawi duh bik ţhak lo. 

"Engatinge i neih ve ngawt?" min ti leh a, hepa hian min naupangchhe chei riau mai. Naupang zawhna zawt te pawh a ang. 

"Ka duh a ka nei a ni mai lawm" ka lo ti ve hmak a, ka pasal chanchin min zawh tel ka hlau. Tunah tak chuan ka sawi chak loh ber te zing a mi a ni rih. 

Gate a lo inhawng huai a, a chhung a kan tlan luh lai chuan kan inbe tawh lo. Ka chanchin min zawt vak ang tih ka hlau lutuk chu motor a tih din rual rualin ka chhuk rawk rawk a ni ber. 

Tualah ka nu'n ka fapa a lo awi a, an lam ka pan lai te chuan a lo khek ve rawih rawih a, a ban tawi te a min lo ban ve ak ak na chu ka hnar lo chiang kher a sin. 

"Ha tereuhte a nei a, mi seh a hrat em em a" ka nu chuan a ti fiamthu a, a hmuh apiang a khel ţhin miau alawm. 

"A lu a bial hle mai" Hmangaihsanga chuan a rawn ti teh ngawt a! Dim deuh taka Bawiha biang a rawn piai chuan ka nu zawk a lo nui hak hak a, U Remremin ring tak takin a ko chel chul bawk sia, hmanhmawh deuhin inchhungah min tlan luh san daih. 

"Naupang chhawn chhaih i thiam hmel tehlul nen" tiin ka lo fiam a, a kut phah hlai hlup chuan Bawiha biang a dawm a, na vak lo in a beng leh dat ţhin a, a lawm thiam hlawl lo. 

"Vawiinah i lo fel em? I pi leh i nu Remremi te i lo tibuai leh viau lo maw?" tiin ka fapa chu ka be ta zawk a, a mitmeng pawisawi lo zet chuan min melh kiau a, a lawmawm lutuk ka insum thei lo chuan nui chungin a hnar leh ka hnar ka nawr si a, ka inlak hran leh rual a ka nui hmel a hmuh chuan a ha ţo awmchhun langin a nui ve sun sun mai. 

Min en reng tu awm a ka hriat tlat vangin kan hnaih a awm chhun Hmangaihsanga chu ka melh a, kan nufa in chhaih vel chu hmuhnawm a tih hmel takzet a ni. Chhaih thiam hauh si lovin naupang a lawm ve hmel em a, mit la sawn lek lova min en pawh hi a awm lo lem lo. 

"Eng nge i en vung vung?" ti a ka fiam leh  chuan nui deuh sukin lu a thing nghut a, Bawiha a piai leh zeuh hnuah kawngka lam a pan ve ta nge nge a. 

Hrawn har hmel ber si hi a fel phian a, a landan maiah chuan a khirh hmel viau a, khawngaihna a ngah phian thung.

Chaw ei laiin Neihkimin ka chetsualna a la sawi chhuak zui a, "Hna a thiam lo ang ka ti mawlh mawlh a, in la lui tlat a, Malsawmi chauh lo pawn an sawi. I hming a lang tel ve zel lehnghal" ti hlaih hlaihin ka pa a melh ran a, keichu awm lo ang hmak ka ni. 

"A zir zel ang a, a thiam mai dawn lawm. Lehkha pek sual mai mai thinrimpuina tham a nih loh chu" ka pa'n a tih pawhin "A zahthlak, mi tam laiin a ni lehnghal. Nangmah thlengin an nuihzat che a, duhsak vangin tling lo deuh a chhawr an tih che kha" a ti hlak hlak a, chaw ei a tui duh lo a sin aw. 

"Ban ang che ka pa, anih loh chuan keiman engkim ka ti ang. Staff ho in eng angin nge an ngaih ka zawt ang a, chhawr tlak vak lo ni a an hriat chuan ka ban ang" Neihkimin a ti leh zat zat a, ka kut awl lam chu dawhkan hnuai a thukru in ka hum ruh nasa hle. 

Hmangaihsanga ngaihdan a ni chiah lo aniang, bul zetin "Engmah i ti lovang" a lo ti deuh nghat a, a reh zui vang vang. Hospital neitu hi ka pa a nih rualin thunei ve tu dang pawh an awm ka ring a, ka hre thuk lutuk lo na a Neihkimi pawh hian thuneihna tam tak a neih ngei ka ring bawk. 

"Nangpawh i awm ve a ni lawm ni? Pawi tihna i nei miah na nge?" Neihkimi thoin a rawn ti ţha leh a, chaw ei zo lova thawh san daih ka hreh si, ka beng hi ngawng thut se ka ti rum rum. 

"Receptionist pakhat vanga hospital i sit viau anih leh insawn rawh. Thawhna tur dang zawng rawh" a ti nghut nghut a, chaw ei lai berkher a an sawichhuak ţhin hi ka hua, kan inhmuhkhawm theihna hun a ni miau sia, ka hriat lai kher a an sawi duh bawk si chuan hun remchang ber a ni lawi si. 

Siampuii nen a chaw eina hnawk vel kan seng hawi fel hnuah inchungah ka chho tlang a, hna vawn lai ka nei ve thei hi vannei ka intih ve tawh tehreng nen min ngaithei lo tu an awm leh zel a, hringnun hi a hahthlak takzet a ni. Hlimna leh lawmna famkim ka nei ve thei lo. 

Ka phone nghawr dar dar ri ka hriat chuan "Tu tak ni ang maw" ti rilru chungin ka dahna lam ka pan a, min rawn biak tum tu chu rin loh deuhin ka pasal hlui Sangzuala a lo ni. 

CONT...