KA HRINGNUN THAWNTHU-4

KA HRINGNUN THAWNTHU-4

Ka la ang nge la lovang ti a ka rilru a insual mek laiin phone ri chu a tawp hman a, rei vak lo hnuah ka pasal hlui bawk chuan biak tumin min rawn call leh. 

"Hello" ka tih rualin "Aizawlah ka lokal a, Bawiha kha hruai haw ka duh" a rawn ti ngam a pek a nih chu! In khat a kan chen ho lai pawh a ngaihsak duh ngai der si lo, a huangtau lutuk chu ka haw kher mai. 

"Nu tello a awm rual a la ni lo. Min mamawh rih a, ka hmuh phak lohna hmunah ka kaltir lovang" khauh zet hian ka ti a, min chhuh luih chu tum se tih thlengin ka rilruah a awm hman vek a ni. 

"A pa ka nia, duh hun hunah ka hruai thei. I phal lo lui a nih chuan a pawi viau ang. Ka fapa kha ka awmpui tawh dawn" a ti khur khur a, ka sa ve phat mai. 

"I fa a nih loh zia i sawi vek tawh kha. I duh tawh loh hnu hi rawn ngaihven thar leh a ngai lo. Min chhuh luih i tum vaih chuan police hnenah ka zualko ang" ka ti hlak hlak a, ka thinrim lutuk chu ka tha a khur der der thei hial a!

"I duhna apiangah zualko rawh. Ka fa a nih chhung chu thuneihna ka nei. Kan hmuh ve i phal loh chuan thiam i chang thei bik lo" a rawn ti a, khawih phakah awm se chu ka beng sawk duh awm e. 

"Ka damchhung chuan i hruai hrang lovang. Min rawn zawng buai duh suh, ka awmna ka hrilh dawn lo che" ka ti a, thumal tin te chu a hriat loh hlauin ka lam fiah khawp mai. 

"Ka hre daih tawh..chhunah ka pizawn ka rawn bia alawm" intithei zet a a tih chuan sawi ve tur ka haihchham ti tih der. Ka nu reng reng pawh chu engvanga lo hrilh nge maw a nih le? 

"Ka nu hnenah ka awm ngei a, riah nan chauh ka hmang" ka ti kual vel a, ka dawih aw chu a hriatthiam loh hram ka beisei. 

"Ni e, in in ka hria a, chhun lama i hnathawhna pawh ka hria alawm" a ti veleh zel a, ani ang khawngaihna nei lo lutuk chuan min laksak duh tak tak ka hlau a ni. 

"Hmanni lawkah i duh loh thu i sawi a, engvanga rawn duh thar thut nge i nih?" ka tih chuan vin lutuk tawh lo turin ka insum nasa hle. 

"Chutiang lehzel i hriat a ngai lo. Bawiha kha ka la ang a, dip daltu awm miah lovin i awm thei ang. I duh dan a nih zawk ka ring" min rawn ti a, min deusawhna ţawngkam chu haider luiin "Engthilin nge in rilru thlak tir cheu ka hre lo, mahse, ka fapa hi a duh lo chunga lak luih in tum chuan court hial thleng dawn mah ila pawi ka ti lo. Tikhan tlangval lenin leng leh la, nupui nei leh vat zawk rawh. Nang te chuan neih mai theih tur i nei leh reng tawh ang chu" ka ti ve salh salh a, an ngam chuan lak luih tum se la, nu hian a fa tan eng chen a thui nge kal a huam an hre mai ang chu. 

"Kan hre mai ang" a tih lai chuan thinrim takin phone ka dah hlum a, ka nu nen a an inbiak dan ka hre chak khawp mai. Tun tut tut a zawh chi a ni der si lo. 

Ka fapa ka tih mut hnuah pawh ka la meng zui ta reng a, a sawi ang khan a ti duh tak tak dawn tih ka hriatna chuan rilru a ti buai khawp mai. Ani angin puitu ka nei ve lo a, ka lamţang awmchhun chu ka nu chauh a ni. 

Tukverh a dak chhuakin ka hui leh pap ţhin a, bungrua kan lak fel vek tawh hnu pawh a min la ti buai zui zel duh hi an rapthlak zia ti lang tu pakhat a ni. Zan lah chu a thiangin a reh tlawk tlawk a, thlifim thaw heuh heuh te chuan ka chhungril lum pup pup chu an chhem dai zo chuang lo a ni. 

Inchung aţanga ka chhuk te chuan inhnuai a lo thim ţhiap tawh a, thawm dim deuhin kawngkhar lam ka pan leh a. Kawngkhar lo inkalh lo chu mak ti angreng takin ka nam hawng a, kawngka aţanga ka chhuah rual chuan ka taksa a dai nghal sawng sawng thei. 

Pawn chhuah meuh chuan boruak a daiin a nuam reuh hle. Tualzawl a ţhutthleng inhung chu pan dingin ka ţhu thla hnawk a, ka fapa hi hmun hla zawkah ka tlanbopui mai dawn em ni tih thlengin rilruah a awm tawh. 

Ţhutthleng nghenchhan ka nghen rual chuan van lam thlirin ka thaw hle hle a, court hial lo thlenpui ta ila, ka baihvai leh retheih zia te thiam deuh a an sawi chuan fa enkawl tlak lo ah min ngai mai angem tih te ka ngaihtuah a, mahse, awlsam te a pek erawh ka tum hauh lo. Ka fapa nen a kan awmdun theihna tur a nih dawn phawt chuan ka tih theih ang ang ka ti vek ang. 

"Zanin chu boruak a nuam riau" ka bul a Hmangaihsanga rawn ţhu ve chu ka lo ngaihven lem lo. Thil lian tham lutukin rilru a luah a, engdang mah ka ngaihven lem lo a ni. 

Kan ngawih dun ren rawn hnuah "Buaina i nei, a dik em?" a ti zawi ruih a, min en reng tih hre turin amah ka en ve kher a ngai lo. 

"Nei e, buaina hian min hnawh hlum lo chauh a nih hi" uar fe a ka tih chuan a nui ri suk a, a lam a thlek ha pahin "Buaina chu nuihzatthlak i ti elo?" ka ti zui zat a, ka nun a thil thleng ho hi chauh pui tham khawp a hahthlak a ni tlat a ni.

"Sawi la" bul zet a a tih chuan "I hrethiam ve chuang lo ang" ka ti leh ang lawi a, "Ka ngawng bik lutuk lo a nia" a ti nang nang a, ngaithla duh tu ka neih veleh sawi tur ber ka haihchham leh tlat. 

"Midang hrethiam tur chuan anmahni chimtu tuipui a pil ve a ngai a, nangchu khawmualah nuamsa deuhin i awm a, thawchham lek lek a tuipuiin a chim te dinhmun i hrethiam ve lo ang" ka tih chuan muk zetin ka mitah tak a rawn en a, "Hrehawm an tihna ka hmuh thiam sak thung alawm" tiin zawi tein a phun sup a, ka inthup ve viau emaw ka tia, ka sawi chhuah loh chuan tuman an hre lo turah ka ngai a, mahse, min hmu ve tak tak tu ka lo nei reng a nih hi. 

"A langchhuak nasa viau em ni?" ka tih chuan lu min thin khum nghutin "Thuk tak a entu chauhin an hmu thei ang" a ti leh sup a, a reh zui tlawk tlawk a, zawi te te a kan thaw ri chauh lo chu thawm ri va dang hriat tur a awm lo.

"Min khawngaihna lantir miah suh. Ka nu hnen aţanga ka dawn a nih loh chuan tu khawngaihna mah ka pawm tawh dawn lo. Ka nu aţanga chhuak a nih loh chuan a lem vek a ni" tiin ka phun chhuak sep sep a, ka thusawi tawp lam chu keima tan a sawi ka ni zawk mah. 

"A lem apiang a mawi rei an tih kha" min rawn ţhut hnaih rualin ka tawlh hla dawrh a, tlem te chauh pawh tawlh leh ila chu leiah ka tla a ni tawh ang. 

"Khawngaihna leh duhsakna i dawngsawng thiam miah lo anih hi" a ti nghut a, ka chetdan chuan a ti lawm lo viau a nih hmel. 

"Thiam tehreng mai, a lem hlir ka dawng ţhin a, ka dawng duh tawh lo ang ah ngai tawp rawh" ka ti a, nidangah mumalin kan inbe ngai lova, khatiang reng kha nise ka duh zawk. 

"Khawngaih takzet tu che i hnar ve thei" a tih chuan amah a insawina a ni tih hriain "Midang ka zui apiangin keimahin ka let ţhin. Chu chu ka hringnun a bet tlat a ni" ka ti chang khawl a, thla eng tak chuan chiang deuhin a chhun pha a, thim a kan awm rei tawh avangin a inhmuh chian theih viau mai bawk. 

"Hringnun thawnthu hi a ngai pûtin an ziak ngai lo" a ti hmuk a, a mitmeng thim khup chuan a landan a ti hlauhawm lek lek thei hial a ni. 

"Ka ziak nawn reng chu anih si hi. Phek tinah lungngaihna a tel lehnghal" tiin ka ţawng el a, "Nangni ang vannei sa a piang, retheih hre hauh lo leh hmusitna dawng ngai miah lo chuan engtikahmah min hrethiam lovang. Khawngaihna leh duhsakna kan teh dan pawh hi a inan ka ring lo" ka tih leh hlaih hlaih lai te chuan mit ti zim deuh sun hian min lo en a, hmuhnawm min ti nge rapthlak min ti pawh ka hre nek love. 

"Min hriatthiam tum apiangin min hrethiam lo ţhin. In rual a ka thâwk ve theih chhung chu ngaihţha deuhin awm ula, min ngaihven vul chuk duh suh u" ka tih leh phei chuan nui hawk chungin "I luhlul reuh zek a" a ti a, ţhutthleng nghen chhan chu a ngheng dawt a, "Harsatna tawk lo kan awm hleinem" thawven hmel zet a a tih hnuah vanvadakin a thaw chhuak hawlh a, ka rilru a nat leh vak hlauin ka inveng ru tih a hre hauh lo. Keichu ka danglam bik a, midang chunga beiseina ka neih ve dek dek tawh chuan beidawnnain min hmuak ţhin.

"In in a kan lo awm ve hi hnawk min ti em?" ti a zawhna atthlak tak ka zawh chuan a rawn thle buk a, "Ka sawi awmzia chu nau ka pawm a, zir sang vak lo chungin hospital ah hna ka thawk bawk sia" ka ti leh niah niah a, a unaute ang hian min ngaithei lo ru ve viau angem tih te ka hre chak tlat a ni. 

Ka zawhna pawh min chhang lem hlei lovin muk deuhin min en a, min entlang vek a tum emaw tih mai tur a ni. Rei mawi tawk min en vung vung hnu chuan "Hnawk ka tih hma chein mu teh ang" tih leh a ţhutna aţanga thawh a rual a, a zik mar ţalh ţalh hnuah a kut thlak thlain "Hnawm hnawk ka pan ngai lo" thuk ruih hian a ti sup a, a ngaihna hre lo zet a ka en reng lai chuan in lam panin a pen phei pawk pawk a, he pa min hmuhdan diktak hi hriat ka chak ngawt mai. 

Zingkarah midang thawh ve hmain ka nu chu Sangzuala nen kan inbiak dan ka hrilh a, ka thawhna thlenga a lo hrilh hriat ve avangin ka chhuahchhal ti tih bawk. 

"Ţha deuhin min rawn bia a, Bawiha phei chu a ngaih thu te a sawi a, i ţhat leh ţhat loh min zawt bawk a, hna i nei thei hi ka chhuang ve che alawm. Indawmkun tlawk tlawk lova nitin hnathawk tur a i chhuah thu ka hrilh a nih kha" a ti sam et a, thil pawi lutuk a thlen phah thei tih hre miah lovin engkim a lo hrilh a, Sangzuala zah loh zia a la hre ve tak tak lo a ni. 

"A va pawi tak aw...Bawiha hi min chhuh tum tak tak se engtinnge ka tih ang? Fa enkawl tlak lo tih zawngten min hek ta se, Bawiha hi an duh tak tak chuan tih hreh an nei dawn miah lo a nia" ka ti a, a thlaphan loh nan ka hlauh rukna erawh ka thup tlat thung. 

"I fapa a nia, tuman an chhuhsak lovang che. Court thlen phei chu an duh teuh lo mai, mualpho an hlau dawn a, an vau mai mai che anih kha" a ti a, engvakmaha a ngai lo chu mak ka ti letling zawk. 

"Ka rilru a nuam lo tak tak a nia nu, ka thawhnaah te a lokal duh mai ang. Min hmu mawh tu an awm tawh sa bawk sia, boruak ţha lo thlen ka duh miah lo" ka tih chuan "In chhuah vek hunah ka lo be leh ang a, hmu lo tur chein ka hrilh dawn nia" a ti dam diai a, a awki ngaihthlak a nawm viau rualin ka hlauhna a ti nep reng reng lo. 

"U Zote" ka hming lam chunga U Remremin ka dar a rawn dawm chuan ka phu nasa lutuk. Hnung lam aţanga min rawn khawih thut a ni a, ka nu nen a kan inbiak ruk lai a ni kher bawk nen, ka thlawk chhuak lo chauh a ni. 

"Phu zuk tih hma hmain i phu daih a, ka chei tawh dawn che a nia aw" tih pahin dim lo baksakin a lamah min kuai her lawp a, a lianin a sa a ţha si, kei ang cher pan hling hleng chu min zo lawp lawp khawp. 

"Hna ka kal dawn lawm U Remrem, duh leh ka lo hawnah min chei dawn a nia" ka tih pawhin "Hna i kal dawn vang takrengin ka chei dawn che" a ti a, nui sangin a kawr hak lianpui inpe aţangin makeup a rawn phawrh a, intithei fein ka hmai zawnah a kut chu a vai kual vel a, ka va hnar hreh ţhin em. 

"Ka hman rih lo lawk a, rawng ka bawl ang a, chumi zawhah ka inbual leh ang a, ka kal nghal daih dawn. Keichu Neihkimi leh ka pa te aia thlen hma bik ka ngai a" tiin naupang biak takin ka bia a, U Remremi biak naah chuan a ngai tlat a ni. 

"Dawt sawi suh rawngbawl laiin Siampuii pawh ka chei ziah" a ti a, a thinrim ţan leh tawh a. 

"Ka buai rih lawk dawn a. E...ka hria, Hmangaihsanga chei rawh. I chei a duh ve alawm. Insawizawi turin a chhuak tawh maithei, a lo haw veleh i chei dawn nia" ka ti a, midang chei turin ka nawr lui ngam mang si lo, min hau na lo ber tur ni a ka hriat hming ka sawi ta tawp a. 

"Aww..ka hria" a ti ban charh a, a nui pah ţha bawk a, chutah ka hmai bul chet a rawn kun phei thutin "Lukhum sam lem chhawm ka nei" rang tak a khap fuk fuk chung hian a ti leh a, hul deuhin ka lo nui lui hak hak a, min chei luih ka hlau bawk si, kalsawn thuai se ka ti kher mai. 

"Hmangaihsanga ka chei ang a, lukhum sam lem chhawm ka khum tir ang a" ti lauh lauh chungin naupang ang maiin choka aţang chuan a zuang chhuak auh auh a, a rilru buai chhan ber an hre lova, tlanchhiatsan reng mah ila ka khawngaih lutuk tho. Mi ang pangai tak ni se chu pasal ţha deuh a nei tawh ang. A hmelchhe lo tlat a. 

Bawiha chaw tur ka siam laiin "Sam lem anih hi, i samah khan a bet tak tak dawn lo. U Zotei pawn a sawi vek, inchei i duh reng kha" ti a U Remremi au lang lang ri ka hria a, ka hming a sawi tel ve avang chuan ka lo ip deuh chawih a. 

"A tawk Remrem, mipa in khatiang an inhnawih ngai lo" nin hmel zet a Hmangaihsanga ţawng ri chu a rawn hnai tawh hle a, choka a lo luh a tum a nih ka ring. 

"Remremi tak hi chu aw..inchei hi a thupui a, chei tur a zawng kual reng mai" nui hak hak chunga ka nu'n a tih lai chuan "Kha aw" tih leh Bawiha eitur pek ka rual a, thlang lam kawngkhar hawng rawk rawkin pawnah ka chhuak nghal daih. Hmangaihsanga hming ka hrilh ve ting tang tawh si a, ka hmu hreh deuh tlat a ni. 

In hel kualin kawngkapuiah ka lut leh a, Siampuii a awm tho bawk a tiin inbual turin inchungah ka chho tlang. Khum a ka phone let ngât chu ka en hmasa leh te te a, Sangzuala missed call a lo awm leh ţeuh tawh. 

Ka va call let awm love aw ka tih rilruk laiin amah zawkin a rawn call a, "Vawiin chu hnaah kal suh ka lokal dawn. Bawiha chungchang hi sawi dun kan ngaiin ka hria" tiin thu min la rawn pe ngam nia!

Ka thinrim insum zo lo chuan "Kan inţhen tawh ber chuan reh vang vang ta che. Min ngai nghal ang hrim a thawm rawn neih reng a ngai lo. Bawiha hi khawiahmah i hruai lovang" ka ti hlak hlak a, inbiak sek ka duh lo. Ka chhuah dawn, ka insiam vek tawh hnu thlengin duhthlan tur ka la siamsak a, meinei deuh a min ţawngkhum fek fek lai khan engkim ka sawi chiang vek tawh. 

"Ngai teh nang aw..ka fapa kha reilote ka awmpui ve ange ka ti mai a ni. A pi leh puten an ngai ve a, ka fa a nih chhung chu ka duh hun a hmu ve thei turin dikna ka nei" a rawn ti a, zanah kan sawi zo vek tawh emaw tih laiin zingah bul a rawn ţan ţha leh a, ka kham takzet a ni. 

"Tunge a pa ber a hriat hleinem. Khatin ka fa rawn ti ringawt suh, nangmah ngei pawn chiang taka i sawi tawh kha" ka ti hmak a, ka deusawhna a ni tih a hriatthiam ka beisei. A fa ngei a nih leh nih loh a hriat loh thu min hmusit tak chungin a sawi ngei alawm. 

"Phal lo sateh mahla ka rawn hmu thovang. Ka hruai haw leh haw loh pawh ka thu thu a ni" tih leh phone dah a rual a, a va han zakthei lo ber mai tak. 

Helhkam nei ranin hna kal turin ka chhuak a, ka pa driver, U Puitea bawkin min thlah leh. Kawng tluanin kan inbe lova, hospital ka thlen hnuah pawh tumah be lum lam lovin ka ţhutna lam ka pan a. 

"I mumang a fu chiah lo a ni maw?" Zonunin a lo ti var a, "Ka tho nuam chiah lo zawk" ka ti a, ka fapa chu Sangzuala ten an lak luih mai hlauin court chhunga sawi tur thlengin ka ngaihtuah a, rilru a chawl lo a ni ber. 

Chhun chawlh hun vel a ni tawh a, phone ka en ngun viau a. Ka nu hnen aţangin eng thu mah ka la dawng lova, Sangzuala takngial pawh a la reh vang vang. 

"Eng emaw tal ei ve ila, eng nge ka chah ang?" Zonunin a tih chuan "Eng nge niang aw?" tih pahin main door lam ka melh pah kher a, chutah chiah chuan Sangzuala lo lut ka hmu a, beisei lawk sa mah nise min ţhawng kher mai. 

Zonuni ţhutna lam a inher sawk sawk pahin "Engmah ka ei duh lo" ka ti zawi sep a, min rawn hmuh ve ka hlau a ni. 

"I ril a ţam lovem ni? Thil ei chung pawn damlo lut chhuak tur te chu kan buaipui thei tho ka tih ziah kha" a la ti lang lang zui a, mahni lo mah a fimkhur ve nak laiin. 

Zonuni chu enkanin a hnung lama Hmangaihsanga rawn kal chu ka en ta zawk a, thil ei tur a chhuah tum tho a nih hmel. Doctor thuam hian a ti lang fresh zual a, mi tam tak zingah pawh a langsar nalh ţhin reng a ni. 

Ka ţhutna aţanga tho hluaiin "Ka lokal lawk" tih leh Zonuni dawm ran chunga chhuah ka rual a, ka hmanhmawh em a, ka pal nawk nawk ta ve ang. 

"I engngemaw chiang lo reuh le" a lo ti ban charh a, a fiamthu hauh lo. 

Hmangaihsanga lamah chuan ka pen phei hlawk hlawk a, nurse in a lo biak dinna lai ka thlen chuan engkhaw sawi set set lovin a ban ka vuan chawt a, "Insawi zo tawh em?" ka ti nghal thawr a, mak tih hmel lek lek a min en chung a lu a buk zauh takah chuan a rawn kal tawhna lamah ka pawt let phei leh dawr dawr a, sawi buai lovin min zui ve mai bawk.

Thlanglam tukverh bulah ka dinpui te te a, rilru a a thawh dan dan a che phut ka nih vangin sawi tur a vang duh viau a. Ka vawnna ka thlah rual chuan aw thian kharhin ka kekawr chhanah ka khel bawr ka tuai thuak a, "Eng lo...min lo kuah teh..aw min kuah rawh aw" ka tih bah nawk nawk lai chuan mit ti zim sunin min lo en a, inbe khawmuang reng thei pawh kan ni lo, tunah hian Sangzuala chuan Zonuni bulah ka awmna a zawt mek tawh maithei. 

"Tu emaw ka bikbosan lawk a, main door lam hawi lo sawn, tukverh lam hawi hian min lo kuah bo daih lawk teh" ka ti a, atthlak tih hmel zet a nui hawk chu ka melh ralh a, "Mawh...thuai vat" ka lo ti leh a, keiman ka va kuah hmasa ngam si lo, Sangzualan min rawn hmuh hman ka hlau khawp mai. 

Tukverh lam hawiin reception counter chu ka hnungchhawn tlat a, midang mitmei vengin min kuah duh lo ah ka ngai a, kei pawh hi midang awm ve laia inkuah tir tum reng reng; doctor room ah te lo tlan lut daih ila ţha tur a nia. Hlauhthawn lai chuan ngaihtuah a tlem duh a ni khawp ang. 

Mahni leh mahni ka inhauh ruk mawlh mawlh laiin ka hnungzang si chetin Hmangaihsanga a rawn ding a, ka kawngah a kut a rawn suih bet hmiah bawk. 

"Heti hian a ni em?" ka beng zawn a zawi sup a a rawn phun chuan ka lo bu nghat a, hnunglam aţangin min khuap run a, ka zam lutuk chuan ka ngaihtuahna a ti chawl duk a, kan chhehvelah chuan veivak an awm leh awm loh pawh ka hre tawh lo. A lungphu dut dut te chuan min nghawr che thei hialin a nia ka hriat ni!

"Engtia rei nge ka kuah dawn che?" pangai tak hian a ti leh a, "Hawilet la, counter kha i hmu phak em?" ka tih chuan a hawilet ve nghal mai ni awm takin a taksa chu a che a, "Hmu phak e" a ti thum dût a, ţawng ring suh ti a hauh ka chak khawp mai. 

"Mipa pakhat a ding em? Palian lam a nia, a tiat lo deuh ang che" ka tih chuan "Tumah ka hmu lo" a ti leh mai a, "Counter bul velah pawh maw?" ka ti leh a, a "Umm" ri ka hriat takah chuan ka kawnga a kut suih beh chu ka pawh phelh sak a, ka inlakhran rualin a lamah ka inher a, zahthlak duh chem chem tak a ni. 

"Englo a nia...ka ngaihtuah chhuah theih hmasak dan berin ka che a, hre zui reng duh suh. Ka zak ve tho a, kha thil kha a thleng lo ah ngai mai ang" ti a ka insawifiah lai te chuan min lo en runin ka hmazawnah a ding khawng luah a, "Chuan ka lawm lutuk aw. Awm lo la chu ka zawntir pa che khan min hmu ngei ngei ang" zam luat vanga kut ti che kual chhen chung hian ka ti a, ka pasal hluiin min rawn zawng tih hi a hriat ka hlau a ni. 

"Tu lakah nge i tlanchhiat?" a ti a, a aw rik chhuah dan chu amah hrechiang lo tan phei chuan a nelawm loh ngawt ta ve ang. 

"Mipa a nia, chuzawng chu. Kal rawh, va inhnawhpuar ve rawh" ka ti zung zung a, man chhuah hlauin ka phi cheng a ni ber. 

"Chhun chaw ei dun i duh em?" a ti a, ka thusawi lai nen a inrem loh lutuk zawhna ka dawn chuan "Maw? Eng chhun chaw nge?" ka ti he haw a, min chhang lovin min en ran reng ringawt a, a zawhna ka hriatchian zia a hria a ni mahna. 

"Zote, lokal lawk teh..ngatinge hetah i din reng a?" Zonunin a rawn ti ta hlauh a, ka ban a kaiin kan duty na lamah min pawt phei dat dat a, "Mi pakhat a lokal a, i awm leh awm loh min zawt. I tlanchhiat dan aţang khan hlauh nei i ang ka ti reng a, a lokal lo ka ti a nia aw..hlau tawh miah suh" a ti pah malh malh a, Sangzuala chuan min rawn zawng ngei e. 

"A kal ta mi? Nge pawn lamah sawn a la tei hawi vel?" ka tih chuan "Ka hre lo..ka enzui lova. Ka nupui a nia a ti che a, nang hi pasal nei lai i lo la ni reng zawk lo maw?" min ti a nih chu! 

Sangzuala min tih duh dan chuan nuih a ti za, kan inţhen aţang khan hun tam a la liam lo a, engvanga Aizawl thleng thleng a min rawn umzui leh nge maw a nih le?

"I ngaih dan dan a ni mai. Kan inhriat ţan tirh khan thudik vek ka hrilh che. Pasal nei lai ni ila chu ka tlanchhiatsan lo tawp ang" ka ti hmak a, "Ka ring che alawm" tim dai hian a ti a, min ringhlel awm taka a ţawng chu a inthiam loh hmel viau a ni. 

"Zonun thil i ei tawh em?" Hmangaihsangan a rawn ti hlawl a, thawm a rawn siam hmasa lehpek tawh lo a nih hi. Zonuni pawh a hamhaih deuh a, "Engthil maw?" a lo ti ve ha mai. 

"Chow te..rice te" nin hmel zet a Hmangaihsangan a tih chuan "Aw...ka chah a, i nau hian engmah a ei ve peih si lo a, ka eitur chiah ka lo chah mai" a ti zung zung a, min sawi tel kher a ngai ţhin lo a sin mawle...Zonuni tak hi chu aw. 

"Ka lo nghak ang che" a ti a, hnial ka tum vei nen a kal nghal nulh sia, beidawng deuhin Zonuni ka en ta ringawt. 

"Ka lo nghak ang che a ti" Hmangaihsanga kalna lam a kawk a, a mitmeng chu a la phawk hra mai. 

"Engatinge khatianga i men awl awl a?" ka ti hluai a, vawikhat chu a khap deuh fuk a, "Enteh Zote, khapa khan ka hming a hre lo emaw ka tia, a be ziah che pawh mak ka tih tawh tehreng nen kei thlengin ka hming a hre vek tawh" a ti a, thawk ho na na na chu a hre ve bawk ang chu mawle, hahthlak ţhin. 

"A hre lutuk ang che. I hmingpum leh kum zat thlengin a hria ang. Sawi tur a neih loh vangin a be ngai lo mai mai che a nih kha" ka ti a, "Awii...nuthlawi chu ngaihzawng leh star an neih paw'n an kal pah vel mai mai an tia, keichu ka ni lo. I unaupa hi hmanah ka star ve tawh a, ka bei lungrun rapthlak" a la ti tak deuh deuh a, a malah ka ben sak thlawrh mai. 

"I ninawm e...mihring kan inang vek lova, nuthlawi zawng zawng a inan theih hleinem" ka tih chuan "Nia...induh deuh ni ah ka ngai a, ka melh peih tawh lo hrim hrim a, hnathawh ti nuam tu atan ka'n star ţha leh vel mai mai teh ang" a ti fiamthu a, ring zetin a nui zui har har a, a pangai leh ţan tawh e. 

"Kal ta che a lo nghak reng tawh ang che. Unau tan pawh thil ei chhuah zeuh zeuh te hi a ţha ngai, inpawh zelna a nia" a tih chuan peih lo deuhin ka tho ţuah ţuah. Zawhna mak pui pui min zawh leh phei chuan dawt sawi ka thiam bawk si lo a, Hmangaihsanga bula awm ka chak tehchiam lo a ni. 

"Min fak hle ang che. Tunah pawh min awl char char a ti la" a ti a, a la nui uarh uarh reng. A ni hi zawng, fiamthu a duh ve a, fiamthu a thawh chang a nuih duh miah loh ţum te a nei a, ka fiam sual ta emaw intih rum rum chang te ka nei ţhin. 

Pawnah chuan min lo nghak ngei a, patling pakhatin naupang damlo a lo pawm a, chupa bulah chuan ding hian min lo nuih suk a, a ti tak tak a va nih mai hmel ve. 

Restaurant chhunga kan luh chuan staff an lo tamin min en duh hlawm ngang mai. Pasal nei tura biakin chhunga lut te pawh ka ang alawm. Zonuni nen a inhre ţha deuh FA pakhat phei chuan hmai zangthal hawin min lo en a, unau kan nih te chu hre ve vek tur an nia sin mawle. 

Ţhutna awlah inhma tawnin kan ţhu a, Sangzuala leh Malsawmi hmuh ka hlau ve ve a. Sangzuala chuan min rawn deusawh leh ang a, Malsawmi a ang hlawih hlawih thung ang. Lokal lo ve ve se ka tan chuan a nuam a ni mai. 

"I duh duh chah rawh" menu min rawn pe a, a ni chu kalkawng hnaih zawk chair ah ţhuin min en duh tawh lova, sir lam min chhawn ti ila a dik ber awm e. 

"Momo a ni mai, thil dang ei chak ka nei lo" ka tih chuan min rawn melh zawkin ka piah a paper tereuhte intung far chu a rawn ban a, pen an chhawp nachungin a ipte a pen a phawrh a, paper nen chuan ka hmaah a rawn dah a. 

"Engnge i ei ve ang?" pen lak kan pah a ka tih chuan "I ei ang ang a ni mai" a lo ti et a, momo tlem te chu mipa tan phei chuan puarna tham a nih ka'n ring lo khawp a. 

"I duh belh em?" melh ralh chungin ka ti a, "Aih" a ti hmuk a, a awmdan chu min hmu peih miah lo a ang zawk. 

Momo an rawn dah chuan ngawi rengin kan ei dun a, min biak hmasak loh chuan biak ka tum bik lova, ka be lo reng bawk. Ka inkuah luih tir vang khan min hua emaw ka ti rum rum. 

Kan eizawh hnuah pawisa a pe a, hospital chhung kan luh leh hma chuan "Naktukah ka zin dawn" a ti a, kawngkhar pawh hawnna ka vuan zet tawh chu hawiletin "A ni maw? Engtia rei nge cham i tum?" ka ti hluai a, min be tawh dawn lo emaw tih hnua min be leh hlawl chu a lawmawm hrim hrim e. 

"Karhnih vel aniang" a tih chuan "Engnge tih i tum?" ka lo ti a, "Ka pu damlo a khuahar deuh a" a ti fan ruih a, pu an la nei tih ka lo hre hauh lo. 

Ka ngaihtuahna chu ka hmelah a langchhuak nge "Ka nu pa" a ti leh zeuh a, "Aww...a nih chu" tih vang vang pahin hrethiam deuhin ka bu ta nghat nghat a. 

Kan inzui lut a, engmah phei chu kan sawi tawh lo. Zonuni chuan a mitmengin eng emaw min lo zawt a, ka â ka ti dawn nge, ka ţhiannu mitmei chu ka hrethiam der lo. 

"Sir" ring leng lawng a Zonunin a tih chuan Hmangaihsangan a mitko a lo san ralh a, "Engtik chhung nge i awm dawn loh?" a hma a lehkha inchherchhuan khawih neuh neuh chung hian a ti leh a, a nui pah rah rah bawk a. 

"Karhnih chhung aw. Tiam chin a pelh dawn tak leh kan inhrilh leh dawn nia" fel fai taka a tih hnuah min kalsan a, a hming a a koh theih vang mai a a be phur teh hawrh chu a nuihzatthlak zawk. Ţawngkam ţha hian mi a lo ti lawm thei khawp mai, ţawngkam ţhain sial a man an tih tak kha maw. 

Vanneihthlak deuhin Sangzuala a rawn lang tawh lova, nilengin rilru helhkam neiin ka awm a, ban hun a nih meuh chuan ka thaw huai mai. 

"In pa hlui kha i hmu leh hlauh palh ang, hmuh i hreh hmel sia, ka lo thlah ang che. Chak deuhin kan tlan pur pur dawn nia" Zonunin a tih chuan ka hnial ta lem lo. 

Motor tam tak kar a kan inzeh ve hram hram lai chuan "Khawpui chhung tawt lutuk hi a ninawm. Kawngchhawng lah kan nei thei mang si lo. Ramin hma a sawn mawh ropui si, a ninawm tak tak a ni. Pawisa sem an han ti thla rawk a, ţawngkam ringawtin an sem. Nang i dawng ve em? Zote, khawnge i nuai 3 dawn kha?" a ti lang lang a, a aw a ring si, min hnaih taka scooty rawn ding ve a chuangte pawh an lo nui hawk hawk a.

"I ţawng ring si a zahthlak" ka ti sa sa a, a ngawipawimawh lo nasa mai.

"Ka zah loh dan chu pui tak a ni. Thutiam ti hlawhtling thei miah lo sawisel hi ka zak bik ţhak lo. A jam reng mai bawk si. Aww..a kal theih chiah" a ti nawk nawk a, rilru nguai deuh chang pawh hian ka hlimpui phian zel. 

"Zote, tunlai hian nuthlawi an dek lar riau a, nuthlawi association tih hming puin music video te siam ve ila kan lar chak phian ang a" a tih chuan ka nui ve ta hak hak a. 

"I ti ve lo mi? Group tinah nuthlawi tih hmuh tur an awm a, fiamthu thawh nan an hmang ziah lehnghal. A chang chuan ka haw ve deuh ţhin a, nuthlawi laktlak loh leh awm ţha duh lo chu an awm teh meuh a, mahse, kan thlawi chhan hre miah lova min nuihsawh ţhin ho hi ka haw ţhin" thutak deuha a tih hnuah "Mahse, nuthlawi zun a uai chu a na an ti sia, nuthlawi ka nihna hi ka zahpui duh ta lo. Ka zun a uai chak an tam theih nan ka hming bulah hian N dah mai ka duh, Nuthlawi Zonuni tih duah ai chuan N Zonuni min ti mai ta sela" uangthuang zet hian a ti leh a, ka ţawng ve hman reng reng lo.

"Virgin again damdawi min zawrh ţhin ho phei hi chu an dawmdawi zawrh lai ngei a vawm lawlh ka duh ţhin. An fak thiam thei hlawi hlawi si, Pathian pindan sa kan ţhiah tawh chuan a gin again thei tawh lo hrim hrim" a ti hlak hlak a, an zawrh ţhin dan kal hmang chu a hre vek ang, a sawi tur hre lo pawt vel mai mai a ni. Min tihlim a tum ve deuh bawkin ka hria. 

Gate bula a din rualin ka chhuk a, lawmthu ka hrilh hma hmain "Keipawh ka pasal nen kan inţhen hlim khan harsatna ka tawk nasa a, engkim hi sual ve a ngai a, kan sual chhuah tawh chuan a kal tluang purh tawh mai ni. Tuar hram hram rawh, inti chhel lui la, nakinah chuan tun a i buaina mai mai hi chu thawnthu ang lekin i sawi thei tawh ang" a ti a,chu thil a sawi erawh chu a thutak ve reuh khawp mai. 

"Aw le...ka lawm lutuk aw. Awm lo la chu hrehawm ka ti thei ngawt ang" ka ti ve luam a, gate a ka lut tur chu min au dingin ka hawi let rualin "Virgin again i lei duh em?" min lo ti a, ka chhan hma hmain hnung lamah a tawlh hret hret a, nui chungin ka luhsan ta nge nge a. 

"Sangzuala a rawnkal em?" ka nu ka hmuh rualin ka zawt nghal tawl mai. 

"Kal nang..a lokal em ni?" a ti a, ka bu zeuh a, midang an awm ve vangin ka sawi thui pui duh rih lo. 

"Hmangaihsanga a lo la haw lo em ni?" Neihkimi a rawn ti lut lang lang a, Malsawmi leh Zamtei ten an rawn zui bawk. 

"Haw lo aniang a motor ri pawh ka la hre lo" ka nu'n a lo tih chuan "A va rei ve, hospital ah a awm tawh bawk si lo. Ngatinge heti mai mai a a awm a? Naupangchhia emaw a la inti em maw ni le?" Neihkimi bawkin a ti leh hlak hlak a, nau ka pawm lai chu Malsawmin min rawn melhin ngeiawm deuhin a nui vel a, en loh luih ka tum hram hram zawk a ni. 

"I pa pawh a la haw chuang lo" ka nu'n a tih te chuan "Ka pa chu ka hmu a, a haw lo tih ka hria. Hmangaihsanga hi phone a la duh bawk si lo, a nun a ho emai nupui nei vat rawh se" Neihkimi thusawi chuan Malsawmi a hawisan tir larh larh khawp mai. 

"Lo ţhu rawh Malsawm, thingpui han lum teh u. Nilengin ka buai a, inhnawhpuarna hun pawh ka nei lo" Neihkimi vek chuan a ti leh zat zat a, nula senior khirh zet thusawi chu kan inchhungah chuan a tlang khawp mai, thingpui lum turin ka kal thuai a, an hmuh phak loh a awm theihna a nia, a ţha phian zawk. 

"U Neihkimi leh U Zamtei an awm chuan inchhung hi a uap nghal vek zelin ka hria, a lum nghal pup pup zia hi" elsen zet a tih pahin Siampuiin chuan a kutphahin a hmai a zap hliau hliau a, ka lo nui ringawt chu min nghawk deuh salh a, "I va phun lo thei zawk ve. Keichu ka phun nasa thei rapthlak, mahse an hriat lohin" a ti a, hrehawm tuar ţhang chu kan phunchiar lo tlangpui a ni. 

Hmangaihsanga lo haw chu inchhung a rawn pen luh rualin "Khaw nge i bo vang vang? I khawsa ho emai nupui nei rawh" Zamtein a lo ti tawl a, a hrilhhaithlak ve viau ang. 

"Tu?" a ti hmuk a, a unaute leh Malsawmi ten an en ţhapna chu ngaih pawimawh loh hmel fein a kal tlang hmiah hmiah a, in chung panna kailawn a a chhoh mek lai pawhin, "Ka pa ka hrilh dawn a nia, nupui neih tir vat tur chein ka hrilh ang" tiin an la au zui lang lang tho. 

"Nei zawk rawh u..in chul rup tawh kha" ti sam etin an ngei tur tawk lekin a kiai suk a, a bialnu meuh lokal ve ta chu a ngaihsak lo khawp mai. 

Ka pa ve thung chuan "Ka lehkha chhiarna pindanah min rawn hmu lawk teh. In be lawk teh ang" min ti a, a thutakin a mûk run a, thil ţha tak zawng a ni lo tawp ang mawle.

CONT...