KA HRINGNUN THAWNTHU-5

KA HRINGNUNG THAWNTHU-5

"Lo ţhu rawh" a hmaa ţhutna inhungah chuan muangchangin ka ţhu ţhla a, a ni erawh hahdam deuhin chair nghenchhan neiah hian a ţhu awn duai a, kan inkarah dawhkan lian vak lo chiah a awm. 

"Vawiinah i pasal hluiin min rawn hmu hlawl a" a tih chuan mak ka ti angreng hle. Ka pa a hmuh duh chuan keimahni kaltlangin a ngai a, Zonuni khan a lo luh tir em maw ni ka ti hman rum rum a. 

"Ka haw tur min lo chang a" a ti ban charh a, a sawi leh tur chu thinphu dep depin ka lo ngaichang a ni ber. 

"Bawiha chungchangah a nia, a nu leh paten an ngai viau a ni awm e" a tih chuan ka sa phat mai. 

"Ngai pawh nise kan inţhen tawh a, ka kal dawnin Bawiha hi an chuh lo hrim hrim. Sangzuala ngat phei chuan a fa lo angin a sawi hial duh a, an ngaih tak tak pawh ka ring lo. Ka hruai hawn tir dawn lo reng reng" ka ti hlak hlak a, ka pa chuan dam thlupin min lo en a, lak tir mai rawh a tih ka hlau hle. 

"Hlauthawng chiam duh suh, a chhuh lui thei lo ang che. Fate hi pa ta an ni nachungin kum thum chhung chu nu hnenah an awm thei. Pa hian mawhphurhna an nei ve reng a, inţhen hnuah pawh enkawl thuah chuan pain mawh a phur a" a tih lai chuan lo pawt chatin, "Ka enkawl ve thei tho alawm. Dan chu ka hria a, mahse ka fa neihchhun a nia, ţulpui ţhak ka inhuam chuan sawi theih an nei hleinem. An lakah engmah phut leh beisei ka nei lova, pawisa mamawh ngawih ngawih hun lo thleng pawh nise an hnenah engmah ka phut lovang" ka ti bawrh bawrh a, ka pa hnenah hian chhe thei ang ber a ka chanchin a sawi loh hram ka beisei a ni. 

"Hmuh che a duh a nih chuan pangai deuhin hmu la, tlanchhe suh. Bawiha chungchang pawh ţha deuhin sawi dun ula, Bawiha i thuhruk a, nangmah i tlanchhiat chuan miin thiam lo zawkah an ngai ang che" a ti charh charh a, ka thinrimna a reh hleithei lo. Ka pa thleng thlengin a lo hmu a, Sangzuala mai mai chu ka haw takzet a ni. 

"I unaute hriat laia sawi chi a ni lo deuhin ka hria a, ti hian ka ko ta mai che a nih hi. Bawiha hian min tihlimin keini pawn an lak daih kan hlau ve tho a, mahse lo ui ţung bik lo la. Aizawl an rawnkal ţum chuan an duh leh rawn hmu ve rawh se, i phal lo chung chung chu an la lui bik lovang. Naupangin duhthlan theihna an neih chinah phei chuan an duhna zawk zawkah an awm thei alawm. Vei run lo la, hahpui lutuk duh suh" min ti a, ka thinrim leh ipik chu ka lo thaw chhuak halh a, chu chuan ka pa pawh a ti nui ve huk huk mai. 

Malsawmi chuan chaw rawn ei a tum nge mawni khawthim hnuah pawh a la awm ve reng a, ka nu leh paten Bawiha an han chhaih vel te chu a ngaihtheih loh hmel viau a ni. 

Ka pa'n chhung inkhawm neih a rawt takah chuan kan ţhu khawm laih a, Malsawmi chuan Ruattei bulah, "Ka sam min khawih sak rawh aw. Tlema kawi ve hlek ang kha Hmangaihsanga hian a ngaina zawkin ka hria a" ka hriattur kher hian a ti sa sa a, ngahnge maw min thik em em ringawt ni? Hmangaihsanga nen chuan damchhungin unau chiah kan ni dawn tih a hre awm reng sia. 

"Remrem, Hmangaihsanga han ko la" ka pa'n a tih chuan "Peih teuh lo...Neihkimi, Zamtei, Ruattei, Zotei, Malsawmi te an awm" a kut ţang thliak nghoh nghoh chunga a tih hnuah duhdah zetin "Tir mai rawh" a ti a, khabe chhawng vahin a lu a chet a chet a, bawp a khawkherh tlat bawk. 

"A mak ţhin mange aw" nui hawk pah a a tih hnuah ka pa chuan Ruattei a tir ta ringawt a, kan nghah vang vang hnuah Ruattei chuan "Room kawngkhar a hawng duh lo. Ka chum bur bur pawn thawm engmah a nei lo, a muhil zawk em maw ni dawn ni" a rawn ti thla niah niah a, ka pa ngaihdan a nih loh hmel viau na a Hmangaihsanga telloin chhung inkhawm chu kan nei ta tho a. 

Chaw ei lai paw'n Malsawmi chu a ţawng zat zat a, "Kumin ka piancham chu ka pa'n car min present a tum a" tih te chu a sawi nuam tih zawng a ni. Neihkimi leh Zamtei te chuan an be ţhain an ngaina hle tih a hriat a, Ruattei leh U Remremi te chuan engahvak an ngai lem lo thung. 

"Khatin chaw ei laiin tui in vak vak suh" ti a ka pa'n ka nu a khap ri chuan min kai peng hlawm a, Malsawmi ţawng zat zat thawm a reh rual chuan boruak a veng huaiin ka hria. 

"Ka helh alawm mawle" ka nu chuan a ti mai a, "I thil ei i helh fo mai a, in entir la a ţha ang" ka pa'n a tih chuan ka ngaih a lo ţha lo leh hman pek a, ka nu chu ka en a, a landan ngau ngau ah chuan damlohna nei a ang hran lo. Ka neihchhun liau liau a ni tawh a, eng natna mahin an luhchilh ka duh lo a ni. 

Bawiha mut hun awm velah "Ka'n mut chhohpui ang e" tih leh ka nu hnen aţanga lak ka rual a, ka puak fel hnu a ka chhoh dawnah "Naute in nei ta sia in felfai vak thei tawh dawn lo a ni maw?" Malsawmi chuan a ti kher a, ka pa hriat a chutiang a sawi ngam chu mak ka ti zawk hle. 

Chhang buai duh lem lovin ka chho mawp mawp a, nu nih tawh chuan zingah nalh deuhin chhuak ve mah ila in lamah nau kan paw leh pur pur zel tho anih hi maw. 

"I eitui em?" Hmangaihsangan a lo tih chuan a room lam ka melh rang kher mai. Ka room piah chiahah a room hi a awm a, kawngka biang ngheng a thatchhe deuh a a lo ding chu "Chaw i ei dawn lo em ni?" ka ti a, bialnu te awm laia tawm bo tlat chu a dangdai ve hrim hrim e. 

"Ka ei chak lo" tih pahin chauh hmel zetin mit a khap fan ruih a, luh san daih nuam hek lo i, "I insiam tawh em?" ka ti leh ta vel a, "I muhil emaw tia" Neihkimin a rawn ti hluai a, keimah chauh a ka chho kha an ngaih a ţha lo nge intifai turin a rawn chho ka hre lo; Hmangaihsanga nen a kan lo inbe ve erawh a lawm loh hmel takzet. 

"Ka tho chiah" hmai tuai tawk pah hian a ti a, a hmel a nguiin a sam lah chu a thur siang a, mutchhuak hmel a pu tak tak a, Neihkimi paw'n a awih ve hmel lutuk. 

"Malsawmi a rawnkal ve vang vang a, ngaihsak ve la" Neihkimin a tih chuan a mitmeng a danglam zawk a, a pangai leh vat thung. 

"A tawp vek tawh" a ti nghut a, a awki chu a nelawm lohin nawr luih chi a ni lo tih a hriat a. Chuti chung chuan a u luhlul ve tak chuan "Malsawmi ai ţha an awm lo. Nupui nei rual i ni tawh bawk. Zotei te an awm rei dawn lo hlauh a, an chhuah veleh nupui nei ang che" tih pahin a mitmeng thip zet chuan min rawn melh a, engti turin nge maw ka din ve reng reng reng ni? 

"I lo buaina tur a ni love" a ti leh hmak a, keichu min rawn melh zawkin Neihkimi hnenah chuan "He in hi Zotei in ve tho a ni. Ka nu fanu anih hi, hrereng tawh rawh" ngaihtheih loh hmel zet a en chung hian a ti a, Neihkimi meuh tan pawh hmuh a nuam zawk zawk lovang. 

"Huh..mipa ber hi hneh i awl ber a" Neihkimin a tih chuan Bawiha nen a kan room ah ka lut a, ngaihthlak ve reng nachhan tur ka nei tawh lo. Mihrang ka nia, mihrang angah min ngai reng ang a, engtikahmah chhungkua angin min en lovang. Chu chu thil chiang sa reng a ni. 

"A muhil tawh em?" ka pindan kawngkaah Hmangaihsanga a lo ding run mai. Kei hi, kawngka khar nachang ka lo hre lehpek tawh lo ni awm tak a ni. 

"Muhil a, a la muhil nghet lo ang ka ring" zawite hian ka ti a, hriatthiam ve hmel takin lu a bu zauh a, ka phal leh phal loh pawh min zawt lovin ka pindan chhungah chuan a rawn pen lut a, "Hetiang hian awm lo la" ka lo ti ve ngial a, "Engtinnge ka awm?" a ti duh lek chauh a, hrevek siin a hre lo der hmak ni ah ka ngai. 

"Malsawmi a rawn len chuan ţha deuhin kawm ve la, a rawnkal chhan ber i tawm bo tlat chuan a hrilhhai lutuk dawn a sin"  ka tih chuan "Pindan chu i luah nawm reuh hi mawle" a ti daih a, a hawi kual pah vel a, Malsawmi chungchang sawi chu a duh loh hmel lutuk tlat. 

"Ngatinge Malsawmi hi ngaithei miah lo anga i awm tlat a? Nangmah hmangaihtu i hnar palh hlauh ang e" ka tih chuan "Atchilhna" a ti nghut a, Malsawmi ka hmuh hlima ka ngaihdan chiah kha a ni. 

"Ţhian leh unau kan nihna angin ka hrilh ang che" ka tih rualin a lo nui chhuak hawk a, ka thusawi dan vel chu ka zak chawpchilh nghal. 

Sawi zel rawh ti ni awm fahrana min melh takah chuan "Hmangaihtu diktak hi vang deuh mai an nia, atchilhtu neih te chu a lawmawm lutuk alawm. I tan a rinawm reng dawn tihna a ni mai a" ka ti a, khum a ţhuin hnunglamah a kutin a in nam khalh a, ka thusawi chu a ngaithla liam vel mai mai niin a lang. 

"I pasal hlui kha i hmangaih em?" a ti ta khauh a, sawi tur haihchham zawk ka ni leh ta. 

"I zui mawl ve tawp tihna nge?" ngeiawm rawngkai lek lek hian a ti leh a, "Nang hi, hmangaihna i ngaihnep hmel riau" ka ti ta thlawt a, ner nawk pahin a thle buk a, ka thusawi chu atthlak a tih viau leh min nuihsawh nan hmang tawh mai rawh se, sawi tur dang ka hre miau si lova. 

"Vawiin khan tlanchhe satliah lovin hlauh i nei tiraw?" a ti a, a thutak run mai bawk a, hriattir loh ka duh lutuk chuan "Teuh lo mai..hmuh duh miah loh ka nei a, hlauh chu ka nei lo" ka lo ti thuai thuai a, "Dawt i sawi" a lo ti leh khauh mai. 

"Dawt ka sawi lo" ti mah ila "I thinphu rang lutuk khan a hrilhfiah a ni" a ti fiah fak a, chhan zui chi ni lova hriain ngawih ka chuh ta daih a. 

"Muttui aw" tih leh din a rual a, deuh thut ţhin hian a!

"Aw...muttui le" ti a ka chhan chuan pindan pawnah a pen chhuak daih tawh. 

Khum a Bawiha ka muttir hnu a ka thawh leh dawn chuan eng emaw ka khawih thawi fua a, a vawh deuh thler vangin en lem lovin ka khawih nawn leh ngat a, phone ni ngei a ka hriat hnuah ţhut ţhat pahin ka lek kang a, phone a lo ni tak tak. En mai paw'n ka phone a ni lo tih a hriat a, ka pindan a rawn lut awmchhun chu Hmangaihsanga chiah a ni. 

"A pheina a rei tawh tehlul nen" ka ti chhuak sep a, darkar chanve lai a ni tawh ang, a rawn ngaihven miah lo. Ka hmuh laiin phone a khawih miah bawk si lova, a kekawr ipte aţang velin a tla chhuak a nih a rinawm ta ber. 

Hreh sateh mah ila phone pe tur chuan ka kal a, a pindan kawngkhar a in khar phui ta bik lo. Ka kik karh karh hnu pawh a chhanna ka dawn tak lohah chuan zawi muangin ka nam hawng riai riai a, Hmangaihsanga lo awmdan ka hmuh chuan let lehnghal mai ka duh rum rum. 

Towel in uluk vak lovin a lu a lo hru thuak thuak a, boxer nen chauh a awm bawk. Min hmu laklawh tawh si chu "Ka kik a min chhang thei lova, pindan kawngkhar a rik chuan lo chhawn vat zel ta che" ka ti hlak hlak a, "Neihkimi a nih ka ring deuh" a ti ban charh a, a inthlahrun ve hmel lutuk. 

"Hei i phone i theihnghilh a" tih leh khum a theh thlak ka rual a, a pindan chu ka pindan aiin a zau daih zawk a, mipa pindan tih takah a chhung cheina chu rawng thim lam deuh hlir a ni, rawng varin kap leh zeuh zel lo sela chu hmuh a hrehawm viau maithei e. 

Towel a a lu a hru chu ka ngaimawh ngang aniang "Dryer hmang ve mai ta la" ka ti zeuh a, "A bengchheng" a ti hmuk a, a insawizawi peih bawk a a taksa chu a sek phiar ţalh a, thahrui a ngah hmel viau bawk. Tunlai ţawng takin six pack pawh a nei. Ka thil ngaihtuah mai mai chu! Tu'n min hriatpui lo mah se a zahthlak lam mah mah chu a ni. 

"Muttui nawn leh" tih leh chhuah ka rual a, ka pindan chhung ka luh rualin kawngkhar ka kalh hmak. Vawithum nan a in mangţha a ngai leh ang tih a hlauhawm tlat. 

Sangzualan thawm a la rawn nei leh lova,  whatsapp aţangin Thantei hnenah chanchin ka hrilh a, ka zawt pah bawk.

[Sawi chu an la sawi nasa a, Sangzualan naute rawn lak a tum tut tut a nih chuan i nu leh Nu Hrili ten an tir aniang. Demtu an awm ve nual a, hmingţhat nan an ti pawh a ni maithei asin. Rindan bak chu sawi tur dang ka hre bik lo] tiin min rawn chhang a, Thantei rindan hi a dik duh hmel riau a ni. Hmingţhat hlawh nan chuan ka nu'n tih hreh a nei ngai lo. 

Rilru helhkam nei ranin zan ka mu leh pek a, rilru a chawl lova, a hahdam ngai lo bawk a, ka hma hun a thim viau ni a ka ngaih chang chuan Bawiha ka en a, a êng zawnga thil ngaihtuah ka tum tlat ţhin. 

Zing ka thawh chuan choka ah U Remremi a lo ţhu tum bur a, Zamtei pawh a tho ve tawh mial alawm. Ka nu'n Bawiha min laksak veleh "Thingpui ka'n lum ang aw" ka ti a, zangkhai thei ang ber a ţawng chhuah ka tum tlat a ni. 

"Thingpui pawh ka duh lo, chhang pawh ka duh lo, mut chhuak ka duh" U Remremin a ti hlak hlak a, Siampuii nui pût pût chu "Engngatinge a?" tiin ka zawt ru a. 

Ka lam a rawn kun pheiin "Chil ka hak a ka muhil lai ka harh a tia, a muhil thei tawh lo, la muhil chak bawk si thinrim a nih saw" a ti ser ser a, a sawi zawng te chuan a nui chhuak lo chauh a ni. U Remremi hi a tho hma ngai mang lova, min thawhkhalh chuan a thawh hma hle ţum tihna a ni mai. 

"Kha bawnghnute tal in rawh. I tho hma sia, chaw ei a la hla. I ril a ţam dawn tho tho" tih pah a Zamtei'n dawhkana no a nghah chuan "Hetiang ka duh lo..chil a ti tam" U Remremin a ti hmak a, bawnghnute chu huat hmel zetin a melh pah bawk. 

"Tuman mut laiin chil an hak ngai lo. I harh hnuah i hak zawk aniang chu. In mai mai teh" Zamtei pawn a ti ve ta hlak hlak a. 

"Ka mutthilh laiin chil ka hak a, chu chuan min ti harh. Dawt sawi ziah suh Zam lubuk" U Remremi chuan a ti let erh a, Siampuii a nui chhuak teuh ţhin khawp mai. 

"Ruattein ka sam a ti kir sual mai mai anih hi. Chil te chu i hak reng ang chu, i mu ang phuau zel alawm. I khabe ruh a thlawn ta emaw tih mai tur khawpin i mu ziah a, bawnghnute pawh hi in lo tawp rawh, i ril a ţam anga ni mai lawm" ti hlaih hlaihin Zamtei a chhuak tau nghawng nghawng a, an va han mak unau tak; an kum a upa ve tawh viau asin mawle. 

"Lies is hard" ti hapin U Remremi chuan a hmai a hup thawk a, "Life is hard a tihna" ti a lo tihdik sakin Siampuii a nui chhuak ta kar kar a, a insum zo tawh thlawt lo a ni. 

U Remremi awm loh hnuah pawh "Khawi khawi emaw aţangin sap ţawng hi a hre ve a, a thiam famkim ngai si lo, min ti nui hnem thei a nia" a la ti a, a nui hak hak reng mai. 

Hmangaihsanga kal hmain ka chhuak a, mahni lirthei hmanga zin tur anih vangin a hmanhmawh vak lo a nih hmel ka kal dawn thleng pawn a la insiam lo. 

"Vawiin chu a boring dawn mange" awmze nei deuh taka Zonunin a lo tih chuan ka nui liam mai a, mipa chhe lo ve tawk tak a ni ka ti ngam na a ngaihzawn enah erawh ka en ve lem lo. Mipa ngaihven ka tum tawh lo hrim hrim a, ka nuţa neihchhun ngat phei chu ngaihmelh ka tum lo bur. 

"Ka lo ţhu ve lawk" tih pahin mipa pakhat, sa pan lam, sang gei gui deuh hi a rawn ţhu thla ve a, a san dan em em lah chu; hampuar hret ila chu thli thaw mai mai pawn a chhem lâm nasa thei ngawt ang tih tur vel a ni. 

"Lo ţhu rawh Lalţhian, tunlai kan va inhmu khat ve. I induh chhung khan ţhian thar ka lo nei a, Zotei anih hi. Zote, hei Biakliana, BL-a anih hi. X-ray technician a nia" tiin Zonuni chuan min in hmelhriattir zung zung a, a hming chuan thil dang daih min ngaihtuahtir. Chu thil chu sawi lan kher ngaiin ka hre lo thung. 

"I va hmelţha ve" phone khawih reng chungin Bla chuan a ti a, hmuh pawh min hmu ngut dawn em maw ni. 

"Enteh Zonun, chhe lo reuh a sin. Nizanah ka bia a, min chhang let ţha rap" a ti ham ham a, engamah hmain ka ngaina lo nghal ringawt. Hetiang zawng a mipa insawithei deuh hi ka huat zawng tak a ni. 

"Vawikhat vel party naah i hruai a, i thlauhthla nghal hmak zel a" Zonunin a tih chuan "A tawk viau a ni. Tunlaiah te chuan party naah hmeichhe ngai hlir an hruai duh tawh hleinem" ngaihsam fe a a tih hnuah "Ka sawi dik tiraw Zote?" ti a min rawn zawtin a nui sung a, awii...a ha hmai a la inbawhthuah zui, a inphiar lo chauh zawk a ni. A hmeichhe kawp ho chuan a englai hi nge an duh ang le? Hmelţha bawk si lo, nungchang mawi bawk si lo te chu tuman an duh rei bik lovang. 

A kalsawn dawn te chuan "Ka rawn rim ţhin ang che aw Zote" a ti ham ham a, ka lo nuih ringawt. 

"MLA fapa anih kha, an hausa teh a nia, i duh mai lo mi?" nui har har chunga Zonunin a tih chuan "Teuh lo..a ha hmai a inphiar, a ţawngthei si" fiamthu ti tak hian ka ti a, "A ha hmai a inphiar a?" ti hluaiin a nui zui uarh uarh a, damlo kan tum a kal hoin min en duh khawp mai.  

Chhun chawlh hun awm velah Sangzuala a lokal leh a, "Kan inhmu ve ta hram e" tlangnel tak hian a ti a, "I hman chuan inbe lawk teh ang" a ti zui zat a, a hmel ringawt pawh hian thin a ti rim ţun tawh. 

"Zonun, reilote chiah ka tih ai i lo ti lawk thei angem?" mitmei ru ralh pah a ka zawh chuan "Aw thei e..ka lo awl ang che. Mahse rei lo la aw" a ti a, counter aţanga ka chhuah hnuah "Min zui rawh" ka ti bung hmuk a, sawi buai lovin min zui ve mai bawk a. 

Kan inhnial ka rin sa vangin hospital pawn lamah ka chhuah pui a, motor thawm ri chuah chuah te chu hre lo ang hmiahin ka kal hmawk hmawk a, hospital thlang daih a restaurant changkang ve tak pakhatah luhpuiin a fal deuh laiah ka ţhutpui a, chawl ve dang an tam lo hlauh. 

"I sawi duh ang ang sawi zung zung rawh. Hun ka ngah lo a nia" ka tih chuan "Hna i neih takah chuan i inla hle mai maw?" tiin min nuihzat nghal pang a, hman a min duh em em ţhin kha a ni tawh lo hrim hrim. Sangzuala hlui kha chu thuk tak a phum bo a ni tawh. A thar chhe zawk si hi a tawrhhlelhawm khawp mai. 

"Ka hnathawh kha kalsan vang vang chi a nih loh vang zawk" pangai deuh a ka tih hnuah pawh "Lawmkima a rawn zin ve kha, in lo inhmu leh reng tawh em?" ti a a ţhianpa hming a sawi chhuah chuan thip fein ka melh a, Lawmkima nen hian min ringhlel fo a, ka nu paw'n 'a rukin an inkawp' tiin kan chanchin a sawi ţhin. 

"Hmuh nachhan tur ka nei lo" ka ti a, ka awki ka la san chuang lo. A ţawngkam ngeiawm zet zet te chu engahmah ngai lo ang a awm ka tum tlat a ni. 

"Ani ang ram hnathawk mai mai i ti deuh tawh a ni maw?" mei nei deuh a a tih chuan insum zo lovin "Sawi tur i hre hlawl lo a nih kha, ka kal dawn" ka ti hmak a, ka din chhuah rualin ka ban a rawn man a, min pawt ţhu leh hnawk. 

"Uire khanglang lo la chu tun hi kan thleng lovang. Nangmah vangin Bawiha a fahrah a, ka nu leh paten dem an hlawh daih bawk. I tuar zuau leh lerh thak lutukin a hrinchhuah hi i hmu thiam ve em?" a ti khur khur a, ka chhang buai peih lo. Ngaihzawng nei ngai lo zawk uire min tia, ka sawi tawh a, sawi nawn leh mah ila insiamthiam tiin thiam loh min chantir leh tho ang. 

"Bawiha vanga lokal i nih chuan kut ruaka i haw ngei a ngai dawn a ni. Hnute hne lai a nih bakah fa a i ngaih theih miah loh a nia, i kutah ka dah dawn lo" ka thusawi chuan a runin a thinrimzia a langchhuak hial a, ka hmu lo der tlat thung. 

"Court a kan kal a ngai tihna a nih chu" a ti hmuk a, huaisen chhuahin a mitah tak ka en kal a, "I duh duh naah kal rawh. Court in dan angin ro an rel dawn a, dan bawhchhe tu zawk i ni. Tunah kal nghal dawn mah ila ka inhuam vek. Naupang hnute hne lai lehnghal chu i la lui thei lo hrim hrim" ka ti hmarh hmarh a, ka hlauh rukna ka thup nasa hle. 

"Enkawl theihna dan ka nei ve" a ti nghut na a tlemin a dawih aw ta deuh a, chu chuan min ti ngam pa sauh a. 

"I nei ang chu naute pa ah i hming a chuang kalh alawm. Hruai tur a min tih hnuah Bawiha hi ka hruai a, hmingţhat duh vang mai maiin min chuh buai duh suh u. Kei aia hmangaih tu a nei dawn lova, i fapa a nih anga a ţhatna tur i duh takmeuh a nih chuan ka hnenah awmtir rawh" ngenngawl tak a ka tih chuan "Tunah la thei lo mah ila a leikan deuh hunah ka la tho ang. Tunah pawh a ni mahna" a ti ţalh a, a luhlulna hian buai naah a hnuk lut fo reng a ni. 

"Tum chhin la, engvanga rawn ngaihven thar thut nge i nih chiang takin ka hre lo. Mahse, ka fapa hi ka phalna lovin i la lui thei lo tih erawh ka chiang viau. Kan inţhen tawh a, inhmuh reng a ţul tawh lo. Ţul tawpah lo chuan min hmu turin rawnkal tawh suh" ka ti a, kal tum a ka ding leh chu min dang tawh lo. In ngaihtuah muk tak hmel a pu a, a ţha, ngaihtuah rawh se, a thil tih dik lohzia te leh ka uire ngai loh zia te ngaihtuah chhuak uar uar teh se. 

Mahse, a nunah ka la tel ve a ni. Min paih chhuak nghal hmak se la chuan ţawngkam dengkhawng tak tak a hmang tawh lo ang. Engahmah kan ngaih loh leh kan nun a tel ve tur a kan duh tawh miah loh te chu kan haw reng lova, an nun hman dan leh anmahni hrim hrimin min tibuai pha tawh ngai lo. Rei tak chhung a nupui ka lo ni tawh a, awlsam te chuan min paih chhuak thei bik hauh lo ang. 

"Eng nge chanchin?" tiin Zonunin min lo zawt nghal var a, "Ka vau" tih chiahin ka chhang. 

"Khaia...hmeichhia mah ni la i va man ve. A ţha lutuk, mi hnawksak deuh te hi rapthlak deuh deuh a vau tur" a ti hlut a, ka nuih a za ve miah lo. 

Sangzuala hi chu ka nu'n a thluak a suk sak nasa lutuk a, a rilru a hmin hnehin thu ţha lo a fah mawlh mawlh reng a, a ti piangsual zo vek. Haw viau mah ila ka thinlung chhungril thuk takah chuan amah khawngaihna tlem te a la awm ve.

Ni a ding reng bik lova, thil danglam em em thleng lovin a liam ve zung zung. Sangzuala ten thawm an rawn nei leh tawh lova, an inrawn khawm ang a, Bawiha min chhuh luih chu thil tih chi ber a ni lo niin an hre ta ah ka ngai. 

Ka nu'n a thil ei a la helh fo a, ka pa'n in entir tur a a tih lahin a hnial zel mai bawk si. Ka ngaihbel nge a taksa te chu a tla chak riauin ka hria a, U Remremi takngial paw'n "I in entir loh chuan nu ka ti dawn lo che" a ti ve hial. Doctor pathum lai kan chenpui a, chuti chung chuan enkawl a duh tlat lo, "Ka la che peih a, ka thil ei ka helh leh zawk ţhin tih loh chu insawiselna ka nei lo. Hospital a kalpui tham a nih loh hi" a ti mai zel a, a natna hria se, damdawi te ei se chu a dam leh vat awm sia. 

Kar hnih a liam meuh chuan Hmangaihsanga zin pawh a rawn haw ve ta. U Remremi chuan naupang ang maiin a bag a lo hai nghal rawk rawk a, "A nuam em?" ti a an zawh lahin "Nuam e" tih zawngin a chhang a, a zinna khaw lam boruak a ngeih lo nge, a thu ve deuh a ka hriat tlat chu! 

"Zote, Siampuii hi va pui ve ta che" choka aţanga Neihkimi a rawn au chuan min hnaih taka ţhu Hmangaihsanga chu "A ngai te tein" tiin a lo phun hluk a, tumah phei chuan an hre pha ve lo. Kan inkawm nel ve viau emaw tih laiin min ngaihven angin a la awm miah lova, Bawiha chu ka nu malchunga ţhuttirin Siampuii pui tur chuan ka kal a, Neihkimi chhuak turin "Lo phusa ber zel suh" a tih chuan rilru a dek ve zar mai. 

"An hmusit ngawt mai che, an pawi i sawi loh tehreng nen. Ka pi pawh hi an ţawngkhum nasa thei lutuk" Siampuii chuan a ti ta reuh a, ka hriat tam chak loh zawng tak a ni. 

"An nu tak tak a ni lova, an pawm thei lo a nih pawn an demawm hleinem. Sawi tawh lo teh ang" ka ti a, fridge aţanga tomato leh zikhlum tih vel te ka phawrh chhuah hnu chuan salad siam tumin ka silfai a. 

Neihkimi leh Zamtei te hi chu ngaiah ka nei deuh tawh. Ţawngkam kha tak an hman erawh chuan ka na ve veng veng ţhin a, harsatna tam tak tuar tur leh hun khirh tak tak paltlang tur a ka piang a nih rau rau chuan Pathian hian na thei miah lovin min siam law law se ţha tur. Na ka hriat loh hun chu ka thih hun chauh a ni dawn a, Bawiha vangin thih ka hreh tho si, inthlahrung reng reng a awm a ngaihna in chu tuman nuam an ti lovang. Nikhat lek pawh hi rei duh tak a ni. 

Zikhlum ka chan mawlh mawlh lai a Hmangaihsanga rawn lut chu ka hmazawnah a rawn ţhu tharh a, ka ngaih tawh zia hrilh kher ngaiin ka hre lo. Ka ngaizawng miah lo, mahse, a farnu ten min ankhum bawih bawih chang apianga ka thlavang hauh ţhin tu a nih vangin ka ngaina lo thei lo a ni. 

"I lo dam em?" a ti a, amah en tum a ka hawi chhuah chuan mitmeng hriatthiam harsa zet hian min lo en let a, a chang chuan a mitah hian engmah ka chhiar thei ngai lo. 

"Aw dam e" ka ti mawl tawp a, "Kan lu mum-a a lo dam em?" nuihza aw taka a tih chuan Bawiha a sawina a ni tih hriain ka nui chhuak hak a, "I hmuh ang saw a ni mai" sitting room lam thlek zeuh chung hian ka ti leh a, "Ţha lutuk" lungawi hmel fahrana a tih te chuan a nuihzatthlak. Kum khat chuang lai thang bo ang velin lawm maw a awm le. 

"Min lo ngai em?" a ti chhuak khawl a, ka melh rang teh a sin. 

"Ngai ang chu mawle...i mood fuh chang a ka titi pui theih ber i nia" ka ti fiamthu a, Sangzuala ka tlanchhiatsan ni a biak a har thut chhan kha tun thlengin ka la hre chak. 

"An lo duat che em?" zawhna a va ngah tak. Ning zet a ka melh lai chuan min lo nuih suk a, Siampuii chawhmeh vil lah chu a lo nui kur kur reng a, "Ka chhang seng em em tawh lo che" ka tih hlak te chuan "I mut a lo tui em?" a hmel a nuihzatna la chambang chung hian a ti leh a, chemtein ka tin uaih lo chauh a ni. 

"Engtinnge maw ka tih dawn ni?" ipik hmel zet a thawk hawlh paha a tih chuan "Eng chu maw?" ka lo ti thuai. 

"Hre lo rih zawk teh" ti nghutin a ţhutna aţang chuan a tho a, a chhuak nghal nulh mai bawk a, hepa hi chu hriatthiam a har ve ngawt mai. 

"Pa, Hmangaihsanga hi nupui neih tir tawh rawh. Heti ringawt chuan a puitling tak tak thei lovang. A theuleu vel mai mai ringawt a, zankhat lek lek awh tur a hmeichhe kawp a hreh bawk si lo, a nun a ho lutuk" Neihkimi chuan a ti lehpek a, chaw eikham kan ţhu khawm ţhap a, Hmangaihsanga tak erawh a awm ve lo. 

"A fel ve viau tawh hi. Tun hma angin kawhmawh a bawl tawh ngai hleinem. A inpeih hunah chauh nei rawh se" ka pa thusawi chuan min barakhaih angreng hle mai. 

Hmangaihsanga leh kawhmawh bawl maw! A va inhmeh lo ber mai tak. Smart leh mahni inthunun thei takah ka ngai a, a taksa hrawl tak chhungah hian thinlung nem deuh a awm niah ka ngai ţhin. Tunhma a a landan ka hre lo na a kawhmawh bawl tur ang chuan ka ngaihbel thiam lo. 

"Ka pa chu tikhan i ti zel a, mi pawh an nu leh paten nupui pasal tur an zawnsak mai lawm. Malsawmi hi a chhiat loh mai bakah a fel a, u tak tak angin min en thlap bawk. Hei hian a beidawnsan chuan in pafain in hawi lawl lawl mai ang aw" Zamtei chuan a ti kha kha a, a sual viau na a thu mak leh nuihzatthlak a chhakchhuak leh khurh ţhin. 

"Nangmahni khan pasal nei tawh rawh u. In inti thu si" U Remremi chuan a lo ti ve khauh a, nui hak hak chungin Ruattei pawn "Nia, nei tawh mai rawh u, U Remremin a ning tawh che u nih chu" a ti a, Neihkimi nui ve chu ka hmusual emaw ka ti hial. Chhungte bulah a nui khat em a, en lenna hmang a a hmui bawr vel en nawn leh ngat a chakawm. 

Hmangaihsanga ber a rawn inlan duh tak si lohah chuan nupui neih tir chungchang an sawi zui reng bik lova, mahni pindan ţheuh panin kan kal hrang pheuh pheuh hlawm a. 

Bawiha mut hnu a tualzawl a ka chhuah chuan Hmangaihsanga chu a lo awm leh ang lawi a, kan ti ti dun hrep tawhna ţhutthlengah ngei khan ţhuin a inngaihtuah muk hmel hle. Pawh ka tum lo zet na a rilru buaina deuh a neih ringin ka pan hnai a, ka thawm a hriat ruala min rawn enin ngainatawm deuhin a nui a, zana kan ti ti dun ţhinna lai hi hria se chu Malsawmin ţhutthleng hi a vaw ţhiat duh ang. Chuti khawp chuan ka nuţapa hi a hauh na a ni. 

"Malsawmi eng nge i hawnsak?" a bul a ţhutthlak pah hian ka ti a, neih tir an tum rau rau chuan inrem deuhin awm law law se an pahnih tan a nuam zawk ang. Chuvanga sawipui reng chu ka ni. 

"A phir pui" nuihza aw zet a a tih chuan "Phir pui maw?" ka ti ha a, "Ni e..hmarcha te thak deuh" uar deuh taka a a tih chuan kan han nui leh rih ţhin. Ka va hnaih chilh hma khan engtak lo ngaihtuah ang maw? Bawiha rawn lak tum angin an awm tawh rih lova, thawk khat chu a veng. Ka buai ruk lai ang chiah khan buai rukna a nei ve a ni maithei. 

"A duhin a hauh na ve che a, duh takzet tu i nei hi i vannei lutuk alawm. I hnar zel anih chuan nakinah i la inchhir ang" ka tih chuan chal ti chuar nungin min en a, a lungawi nge a thinrim tih chu a hmel landan aţang ringawt chuan ka thliar hrang thiam lo. 

"Nupui ka neih chuan nuam i ti lovang" a ti zawi ruih a, hrehawm kan tih a hlauh vang mai mai a nei duh lo a nih erawh ka ring lo bur. 

"Pawisa kan khawl ve ang a, kan inenkawl ve theih hunah chuan heta kan awm ve reng a ngai dawn hleinem. A hmingin hna ka nei ve tawh a, Bawiha ringawt chu ka enkawl zo lutuk ang" zangkhai thei ang ber hian ka ti a, a ngawi ta vang vang mai. Bawiha enkawl hautak tur zia ka hria a, chu chu a ni pawh hian min hriatpui ka ring. 

"Hospital ah ţhianthar ka nei leh tawh a" tiin kan thusawi lai chu thlak ka tum a, min rawn melh zawk a, "Tu nge?" bul zet hian a ti a, hmalam a en leh ngar ngar tawh. 

"Bl-a a nia, in xray technician kha" ka ti a, ka ngaihtheih loh tehlul nen, sawitur ka hriat loh luatah ka ţhianah ka chhuah ta ringawt.

"A ţha lawm" a ti mai a, "Nia" ka tih ve hnuah a reh leh tlawk tlawk. 

"Ka ngaihtuah reng ţhin che" a ti sup a, a aw chu a ril ruih a, zan rehah phei chuan rilru a a thawh dan a danglam bik duh hle. 

"I uang" nuih hawk pahin a lam ka hawi a, a lo thutak run mai. Zonunin 'a mitmeng pa zet' ti a a sawi ţhin chuan ngun thluk deuhin min lo en ve a, "Ka ngaihtuah nasa ţhin che" a ti thawp leh sup a, ka rin loh lutuk thil a sawi chuan thinphu a ti rang a, ţawngtumin ka ang zuau a mah se ka kha a chih tlat. 

"Nupui ka neih chuan ka ngaihtuah thei lo che ang a, hrehawm i ti ang" a tihna chu remchangah hmangin "Ti lo ang..i duh phawt chuan nei rawh, ipa leh farnute lawm i siam a ni mai. Ka nat hlauin ka thlavang i hauh ziah a, min pui nasa bawk si, ka tihbuai ngam ber i nia, ka lawm lutuk. Mahse, nupui neih i hreh loh phawt chuan nei ngei ngei rawh" ka ti nghal bawrh bawrh a, farnu pel a min en ka lo hlau hle a ni. 

"Ka hmuhphak a i awm chhung chu tuman an ti na lovang che" a ti nghet churh a, rei awm lovin inchhung lut hmasa zawkah ka ţang. 

Bawiha bulah ka mu thla a, a zin rawn haw hi a zia a dang tlat. Dawithiam sual tawng fuhin an lo dawi â emaw tih mai tur a ni. 

CONT...