KA HRINGNUN THAWNTHU-6

KA HRINGNUN THAWNTHU-6

Bawiha pian cham a ni a, kum khat a tlinna chiah a ni. Tuman an ngaihven lo emaw ka tih laiin Hmangaihsanga leh Ruattei ten thawmhnaw an rawn leisak a, Ruattei ngat phei chuan birthday cake a lo order a, cake nalh lutuk tak mai min hmuhtir chuan ka hrilhhai viau reng a ni. 

Khang thla liam ta chhung khan Hmangaihsanga min endan a la danglam lo reng reng a, Bla nen a kan ţhu dun mai mai te hi a ngaihtheih loh hmel viau ţhin. Zonuni phei chuan 'a duh chein ka hria' a ti leh tawh a, Hmangaihsanga chanchin min sawipui dawn chuan thil dang ka sawi kai thuai ţhin. 

"Awii...Bawiha mawi zia hi lo en teh u" Ruattei chuan a ti hlut a, a thawmhnaw leisak kha Bawiha haktirin dawhkanah a dintir a, nui sanga min enkual ruai pahin Bawiha chu a kuah bet a, Ruattei hian a duat a, ka fapa pawn a ngaina takzet tawh a ni. 

"Mawi tak a ni, i kawr mawi chu i va inhmeh ve Bawihte" Siampuii pawn a lo ti nem duai a, "Khawi, a mut a chhuah hmain cake hi tlem tal ei rawh se" Ruattei bawk chuan a lo ti leh a, dawhkan bul a chair chu pawt tawlhin Bawiha pawm chungin a ţhu a, Siampui'n cake chunga birthday candle a rawn dah lai chuan "Zai phawt ang u" U Remremin a ti leh ta tlat a. 

Khua a la eng uarh na a bati chu an chhi tho a, "Happy birthday to you" ti a uar leh kut beng chung meuh a Ruattei leh U Remremi, Siampuii te an zai lai chuan Bawiha pawn nui iarh iarh chungin kut a beng ve nasa a, dawhkan kil tawp lam a Hmangaihsanga awm ve chu ka melh zawk a, kuangkuah hlunin a ding khawng luah a, Bawiha hlim khek vel chu enin a nui ve suk suk mai. 

"Kut i lo beng ve vak vak a, ka duh reuh che emai a" ti chulin Ruattei chuan Bawiha biang a fawp nawk nawk a, rin loh deuh a duhsakna leh lawmpuia kan dawng chuan hnuk a ti ulh a, ţap mai mai ngai lo kha ka mittui a rawn hnam a, ka biang thlenga a luan thlak loh nan ka khap leh fak fak ţhin a, ka fapain hmangaihna leh duhsakna a dawn hian keichu ka lawm tawk em em a ni. 

"U Zote lo ei ve rawh..Hmangaihsang nangpawn rawn ei rawh. Bawiha piancham lawmna a ni sia, cake ngaina lo te pawn ei vek tur" Ruattei chuan a ti zat zat a, ka pa rawn lut pawh zunthlum a nei nasa tih hrerengin a lo ei tir ve. 

"Bawiha enteh hei eng nge ka rawn hawn hi" a rawn ti ve hlut a, choka aţang chuan chhuak leh zawkin tricycle a rawn hnuk lut a, a ţha reuh em em mai lehnghal. Kum3 vel a nih thlengin a chuang thei ang. 

"Awiii...apu chuan a va rawn hawn ţha ve. Api a hahdam ve deuh tawh dawn a nih hi" tiin Ruattei a phul leh hlut a, Bawiha min duatpuiin min duhsak ţhin hle a, a fel reuh tak tak a ni. 

Hmangaihsanga thawmhnaw rawn lei an han hak tir chu kan nui zo leh ta vek a, a mar pung a, Bawiha takngial pawh a ner a ner mai. 

"Hak a hrehawm aniang hlihsak mai rawh u" ka nu'n a tih takah chuan Ruattein a hlih sak sawk sawk a, "Kum1 ve lai tawh, Bawiha phei chu a chum lehnghal a, hetiang tiat lek han lei reng reng" tiin a phun pah nang nang a, Hmangaihsanga an han hau tak tak chu za lo deuh a nuih pahin a khabe a tuai a tuai ringawt. 

Neihkimi rawn haw chu piancham kan lawm tih hre lo ang hmakin a awm a, "Choka in va bei hnawk ve" a ti deuh chhen a, tim daiin ka melh leh ralh ţhin. "Rawng pawh in la bawl nange?" a ti chang bal a, thip zet a min melh laiin Bawiha chu vawikhat pawh a melh duh lo. 

Zamtei thung chuan pheikhawk a rawn hawn ve mial a, "Ka zawrh lai a nia, hralh theih loh aiah ti khan bun rawh se. Bakah Bawiha hi chu a lawmawm ve ţep a" a tih niah niah lai chuan Ruattein nui tet tet chungin min rawn melh ralh a, a pheikhawk rawn hawn chuan a vawmin min vawm a ni ringawt. Min ngainat loh zia ka hria a, Bawiha a ngainat chuan ka tan a tawk lutuk. 

"Zam..cake hi ei ve la" Ruattein a lo tih chuan "Ka chil a rial zel" a ti mauh mai a, cake chu rawn enin a ner nang a, tui a in nghal khalh khalh mai. 

"A ka chhungah snow spray an kap lut fu tawh a" tiin Ruattei chu a nui hak hak phawt a, "Inneih naah kan kal a, mo leh mo neitu biakin aţanga an rawn chhuah khan hlim tawkin 'Aaahhh' a tia, a lo au ve vak vak a, a au nasat ve lai takin a ka chhungah snow spray an rawn kap lut a, ka a chip ngam tawh si lo, ang reng chungin bathroom ah ka pawt lut dawr dawr a" a ti a, a nui pah nasain a thusawi hriat a har khawp mai. 

"Khata ţang khan cake cream hi a ngei tlat a, an siam lai tv a a hmuh ringawt pawn a uak vak vak zel. Snow spray angin a var ve vau bawk sia. A hmehbel chawp vel aniang" a ti a, Siampuii nen an nui kar kar reng. Zamtei lah chu a tum hman a, Bawihan a kawr a pawh pahin fiah mang lovin eng emaw a sawi a, a rik chhuah danah chuan "Bbleh" tih a ang ber. Zamtei chuan ner nangin "Bleh bleh" a ti hlak a, huat theih pawh a ni lo. Kan nui ru tet tet hlawm mai. 

Thla nga lai ka awm na a ni ve ta a, krismas pawh a hnai kuar tawh. Boruak a vawt har lutuk chu kan phun kan phun hlawm a, Bawiha piancham tuka hna ka kal tur chu api in tricycle a chuan tirin an pahnihin min thlah a, a rah kalna a la rap pha chiah lo. A hnung a nawrna tur invuah aţanga a api'n a nawr chuan nuam a ti ve em em a, Ka pa driver U Puitea pawhin "Kan tlangvala chu cycle thar a nei a ni maw?" ti a fiam hlutin a biang a piai sak zeuh a, Neihkimi chauh lo chuan kan hlimpui viau ţhin a ni. 

"Bawiha chu kum1 lai a ni ve ta a" Zonunin a lo tih chuan nui var varin lu ka bu zeuh zeuh a, hun harsa tam tak kan paltlang dun a, ka fapa hi ka tan chuan a hlu takzet a ni. 

"Nimin khan ka pe hman si lo che a, kha hei hi hak tir ve ngei ngei ang che" tih pahin ka malchungah sarang a rawn vawm a, "A ngai kher hleinem" ti mah ila sarang chu ka ţhiat ta tho a, naupang suit pawl tak nalh deuh mai a lo ni a, thlasikah phei chuan hakna tur a tam viau ang. 

"Nang nge nge nalh i hre ţhin e..ka lawm lutuk a nia aw" ka tih chuan ner nang chungin "I chhe seng sung a nih chu" min ti hlak a, a taksa ngheng al alin nui hak hak chungin a banah ka kuah a, "Ka fanu thil thel hi chu aw..a hmelţha miah lo na a lawmawmna pakhatmah a nei chuang bawk si lo" a ti vel a, kan nui ri hriain kan duty na lam a rawn kal ţhenkhat te chu an nui ve ringawt zel. 

Hospital bill khawih tu te hmu tura Zonuni a kal hlanin Bla a rawn leng a, a tih ziah danin tlangnel deuhin min ngheng leh chawt tawh. Phone phawrh chhuakin min be pah mawlh mawlh a, a hma kha chuan ka kawm ve mai thei a, mahse tunlai chu min fiam duh dan a mawi lo riau a, ka ngaina lo sawt viau a ni. 

"Zote ka ţhianpa'n party a host dawn a, kal ve ang hmiang. Drinks leh snack vel te a hmunah lam mai turin a awm vek dawn a, nuam ti viau ang" a ti lehpek a, ka chhang duh miah lo. 

"I chhe lo reuh sia, sexy deuhin han inchei la maw, mipa ho in ka aiawh an chak viau ang. Ka intithei dawn lutuk" a tih chuan ka nam tho rawk rawk a, ang deuh phamin min en a, a ha hmai inphiar pawh a langchiang lehpek e. 

"Nu ka ni tawh party mai maiah ka kal hman lo. Hman pawh ni ila ka kal lovang" ka ti fak fak a, a insiamrem sawt sawt a, kan inhmachhawn ran mai. 

"Nu i ni tawh maw?" ka hmai bul sêtah a rawn au vak a nih chu! Biakliana tak hi chu aw.

"Ni tawh ni tawh" ka ti mai a, a che sek a, ţhu hle hle thei lovin a sawt euh euh a ni ber. 

"I va sawi ngai lo ve" min ti zek a, thinrim zawkah a ţang em maw ni. 

"Min zawt ngai hleinem. Zonuni pawn i hriat laiin ka fapa chanchin min zawt fo alawm" ka tih sak a, "Fa i nei tawh maw?" a ti leh nghek a, a meng phar awn awn a, a la ang pham reng bawk. 

"Nei ve tawh e" ka tih chuan "Awii" a ti hluai mai. 

"Phone i khawih reng a, Zonuni nen a kan thusawi engmah i hre ngai lo anih kha. Hmeichhe buaiin i buai a" ka ti a, "I chhe reuh tih dawn chuan i hmelţha tho bawk sia" a tih nuah nuah hnuah "I ţha reuh" a ti vak a. 

A sam hi a wolf cut a, a sei lai berin a nghawng a thleng, "Ka ning" a ti hluk a, a mit khuh hlup khawp a a sam rawn tla chu thinrim zet a "Phui..phui" tih kher pahin a chhem kang dawrh a, a rawn tla leh rang hle. 

"Pawi lo..i hmelţha tho a, ka hruai chak tho che. I la naupan hmel si, inchei deuh la chu nula tam takin an tluk teuh lo che" tih pahin min rawn hnaih sawt sawt a, min nek tla lo chauh tawh. 

"Hei hi ka fapa a nih hi" ka phone phawrhin thlalak ka entir a, kei takngial pawn ka nin thleng rakin Bawiha chanchin ka hrilh hrep. 

"I sawi zo tawh em? Ka kal duh tawh a" nur nang a a tih chuan "Teuh lo mai. Thla5 thleng chiah ka la sawi a, niminah kum khat a tling. Hrilh tur che ka la ngah lutuk" ka lo ti a, ka nuih a za ru kher mai. 

"Ngawi rawh nidangah ni rawh se. Ka awm bo rei tawh emai min lo hau palh ang" a ti a, ban tum ang deuh a ka kut ka lek chhuah te chuan min hlau ni awm fahranin a tawlh hnung a, ka fapa chanchin ngaithla peih tawh lovin a inthiarfihlim sawk sawk a, tikha chuan party puiah min sawm chhen tawh lovang. 

Lehkhaphek ka rem fel malh malh laiin tuemaw hian dawhkan a rawn kik karh karh a, "Aw..eng nge?" ti nem diai chunga ka dah chhuah rualin Hmangaihsanga nen kan mit a intawng siah a, "Nang maw?" mak ti deuh tak a ka tih chuan a la kiai suk zui a. 

"Haw rual ang" a ti deuh tawl a, a rukin Zonunin ka mal a rawn sik vawt vawt mai. 

"Pen kawina tur ka nei" ka tih chuan "Hun awl ka ngah" a ti sam et a, thla 5 lai an hnenah kan cheng ve tawh ka tih kha. Farnu pelin min en tawh tih ka hriatthiamna a rei tawh a, chuvang chuan pehhel dan ka zawng hram hram ţhin. 

"Ka la haw hman lo" ka tih pawhin "Ka nghak hman che" a lo ti leh mai a, "Eng nge i hriat a?" ka ti ta thlawt. 

"Hriattur ka nei mi?" tiin min lo zawt let a, chhan ngaihna ka hre tawh lo. 

Lehkha ka tifel zui mawlh mawlh a, Hmangaihsanga chuan min nghak lui tlat. A mit lah chu keimahah a fu run reng a, ka che buai chhe lo chauh a ni. 

Hreh deuh chungin ka zui chhuak ta nge nge a, kawngsirah ka lo nghak a, ka dinna zawn a car a rawn tih din rualin chhunglam aţangin passenger side a rawn hawng a, hnung lam a ţhut ka tum tehlul nen, kei aiin a che rang leh tawh. 

Car chhung a ţhu lut a kawngkhar ka pawh phui rual chuan a rimtui inhnawih pa tak rim chuan min zem nghal a, min ngaihven leh lutuk chu hrehawm tih zawk chang ka ngah. Ka dinhmun ka ngaihtuah a, midangin an hriat vaih chuan min hnawtchhuak daih duh ang. Malsawmi phei chu a nasa si, min rawn ankhum leh bian bian mai ang. 

"Khatin in ngaihtuah vak vak zel suh" a rawn tih chuan ka melh hrak a, car a khalh vangin bing deuhin hmalam a en daih thung. 

"Ka hrilh tawh che a, farnu ang chauhin min ngaihsak rawh. Chutiang ni lo a min ngaihsak vul chuk chuan kan zavaiin kan tuar ang. Tu mipa mah hnaih ka tum tawh lo bawk a, hun i khawhral thlawn mai mai a ni" ka ti charh charh a, a hriatthiam ngei ka beisei a ni. 

"Ka duh che in ka hria" a la ti zui a, sawi lai mek mekin!

"Ka sawi zawh chiah kha" awki sang ang reng taka ka tih chuan "A mak tiraw?" a ti thawp sup a, ka thusawi ve te kha chu eng he hu ah a ngai lo nasa mai. 

"I farnu ka ni, kumkhuain i farnu ka ni tawh ang" ka tih chuan a rum nghut a, farnu hming pu ka nihna chu a ngaithei lo a ni. 

"Thisen a inzawmna kan nei lo" a ti a, chhan zelin awmzia a nei dawn lo. Seat nghenchhan nghengin pawn lam ka thlir ta daih a, Hmangaihsanga luhlul zia ka hre tawh a, a tawp san nghal mai duh ka ring bawk si lo, rilru a buai khawp mai. 

In kan thlen chuan ka thawveng hawk mai. Inchhung luh thuai thuai ka chak ve ţum ber a ni awm e. Car a din rualin kawngkhar ka hawng rawk a, ka tlanchhuak a ni ber. Hmanhmawh deuhin inchhungah ka lut a, Bawiha pawh ngaihven hman lovin inchungah ka chho tlang. 

Ka pindan piah deuhah hian bathroom a awm a, chu chu U Remremi leh Ruattei te nen kan inţawm. Pindan dangah erawh bathroom a awm nghal vek a, kan pathum pindan hi a dang aia a tet deuh vangin pawn bathroom kan inţawm a ngai a ni. 

Inthlak lem lovin towel leh thawmhnaw ka la hlawk hlawk a, Hmangaihsanga rawn lan hman hlau tak chungin bathroom ah ka tlan lut a, ka phi buai nasa in ka hah khawp mai. 

Darthlalang hmaa dingin ka in en vang vang a, Sangzuala te an reh tak daih hnu hian rilru a hahdam ve deuh a, nun pangai ka nei ve tawh dawn maw tih laiin Hmangaihsanga a rawn lang leh a. 

"Ka englai nge maw a duh le" ka ti chhuak hluai a, mahni leh mahni inbiak te hi ka ching sawt. 

'A mak tiraw?' te kha a tia, mak tak a ni. A rilru put hmang hi a mak thlawt. Hmeichhe tam tak an awm a, a dinhmun vang ringawt pawhin nu leh pa tam takin makpa atan an awt ang. Chuta karah kei berkher, nuthlawi fa nei tawh lehnghal! Ka fapa thawmhnaw hak tawk pawh hre lo hian ka duh che min han ti a nia, ka ngaihtuahna mak zet zet avang chuan ka chek tlak tlak a, "Tu nge awm? Ka inbual duh a nia, lo chhuak vat vat rawh" kawngkhar a ri bur bur a, U Remremi a au nasa hle bawk. 

"Ka inbual lawk U Remrem, min lo nghak lawk rawh. Khaw lum ka zo lova, ka inchiah dai" ka ti let a, "Khaw lum chu a rit awm ve" a ti deuh kher a, a lungawi loh chang chuan a ngeiawm ve ţhin a nia. 

"U Zote, dawhkan aţangin Bawiha a tla a nia, a ţap nasa lutuk" inhnuai aţangin Siampuii a rawn au lang lang a, koh nawn ka ngai lo kher mai. Towel a lu tuam bur chungin pindan aţangin ka tlanchhuak a, kailawnah ka tlan thla hlawk hlawk a, Neihkimi ka su tlu ţhelh nghe nghe. 

Choka chhung chu Bawiha ţap riin a luah khat a, Hmangaihsangan a lo pawm ve mial a, mak ka ti viau dawn a mah se Bawiha ka chhung aţanga thisen lo chhuak ka hmuh chuan mak tihna ka nei tawh lo. Hmangaihsanga chu hnaih chilhin "Khawi lai nge a sawh? Engtin nge a tlak theih?" chiai zet hian ka ti a, ka hlauthawng lutuk chu rang deuhin ka thin a phu dup dup mai. 

"Dawhkan aţang hian a tla a, a eitur ka siam zawk chhungin a nia, dawhkan bul a chair inhung zum laiah hian a intauh a" tiin Siampuii chuan kimchang deuhin min lo hrilh a, a inthiam loh hmel takzet. 

Bawiha duh lo chung chu Hmangaihsanga chuan pawm luiin thisen chhuak chu lapua in a hru a, khawngaih viau mah ila laksak chi niin ka hre rih lo. A enchian hnuah "A hlauhawm loh hi. A ka chhung vun a sawh kak ve hlek chauh. Siampuii a ţe teng tung sia, thisenah thil var a bet vu bawk nen, ka enchian hma kha chuan a ha a tla daih emaw ka ti hman a" a ti ve duah a, hlauthawng tak chung a "Thil var chu eng nge?" ka lo tih vat chuan "Buh mal" a ti tawi tak a, a nuih a zat hmel viau mai.  

"Awii..keipawn a ha emaw ka ti tho alawm. Bawiha lah a tal nghal bat bat bawk sia, en chian hleih theih a ni bawk si lo. Ka thlamuang huai mai" Siampuii chuan a lo ti halh a, Bawiha chu sitting room lamah ka pawm phei a, hnute te kan inpek hnu chuan a ţap bang ve mai bawk a, hnute pawh hi nghei tir a hun ve ţep tawh ang. 

"Chaw chhum dawn khan dawhkanah chawţhing ka dahchhuak hmasa alawm. Bowl aţangin buh mal a lo tla chhuak a nih dawn kha" Siampuii chuan a la ti lang lang reng a, insawh na viau mah se a lu leh chal vel a sawh lo hi a lawmawm letling zawk. 

Chaw kan eikham meuh chuan Bawiha hmui a vung deuh bar tawh a, a hmui chhung lam vun nem lai a sawh kak a, a vung kawh luah lo hi a mak zawk. 

Ruattei leh Bawiha an in awm thei bawk a tiin Siampuii hmun tifel ka pui a, ka chesual dawn tih hria ila chu thatchhia nih huamin ka indah awl lui tlat ang. Kitchen island hmawr te a Neihkimi phone dah chu ka tai thla palh hlauh a, a ri chang rut a, khaikhup zawngin a tla. 

Neihkimi fridge hawng mek chu "Fimkhur ta che" tih vin ţhat pahin a rawn phei a, phone chu chhar sawk sawkin a endik a, phone cover a vuah loh avangin screen a keh nasa ngang mai. 

A thlek kual fe hnuah "Tempered glass chauh a keh lo, a keh tlang vek anih hi. I va fimkhur lo ve, i ti lui zawk tihna mi?" a ti vin hlar a, ka nu leh pate zanriah ei chhuah zan a ni hlauh chu ka lawm kher mai. 

"Eng nge a?" ti hain Bawiha pawm chungin Ruattei a rawn lut a, keichu ka lo ding zum zât. Neihkimi hi chhan tinah ka tin lo, Ruattei takngial pawn Neihkimi thinrim hi a chhang let ngai tlat lo a ni.

"He mihring tlaw lutuk hian ka phone a ti keh pek anih hi. Kar hmasa a ka lei a nia, cover ka chah mek. Ţangkai lo lutuk mai, thil tihchhiat chiah thiam" a tih hlak hlak lai chuan choka a thawm ring lutuk ngaihven turin Hmangaihsanga a rawn lut ve mek bawk a. 

"Eng buaina nge in neih leh tak?" nin hmel zet hian a rawn ti a, Neihkimi chuan "Ka phone min tihchhiatsak ringawt alawm. Zei lo leh lutuk, mi a su fua fua reng a, chhuar leh dawhkan a kan thil dah ve hlek lah a sut thlak loh leh a vai thla a, Remremi nen an inang chiah" a ti hlak hlak a, coffee in a buak ţum lo kha chu chetchhiatna ka nei mang lo. Tlaiah khan ka chiai lutukin ka su tih chu ka hria a, phone chiah hi a thil neih ka tihchhiatsak awm chhun a ni. 

"Tan tan che hian, insum ţhin rawh" Hmangaihsanga chuan a ti nghut a, Neihkimi mitmeng a ling hlar mai.

"Lo ţan teivet zel suh. Diktak chuan min rawn fin ngam tur a ni reng reng hleinem. A nu vang a ka nu tawrhna--" tih thleng a a sawi tawh hnuah Hmangaihsangan "Duhtawk rawh" lo ti rum ulin a thusawi tum sawi zo thei lovin a siam a, Neihkimi chuan "A nu leh ka pa in ngaihzawn vangin ka nu a thih hma phah" a ti ta tho a, Neihkimi chu ka melh rang kher mai. 

"Duhtawk rawh ka tih chu" Hmangaihsanga chuan a ti vin ţhawt a, "Bawiha in ti phu nasa lutuk. Inhau tawh suh u, U Neihkim, i phone ang chiah kha ka leisak leh ang che" Ruattein a lo ti dam diai a, Bawiha a chhuahpui nghal daih bawk. 

"Engvanga ţan viau zel nge i nih? Ka nu tawrhna kha engahmah in ngai ve lo tihna em ni?" Neihkimi tho a ni. A au ringin a aw ah chuan tawrhna a hriat tel theih a, mahse, ka nu hian eng thil chiah nge a lo tih le? 

"I thinurna pawisawi lo chunga i hrithla ţhin hi ka hua. Zotei te nufa hi helh viau suh" a ti a, a awki a san ve tawh lo. 

"A nu nen a an remruat a ni maithei a sin. I nu tak tak a ni lo tiraw? I nutei zawk a ni lawm ni? Tun hma chuan patling hausa kawp ching tiin a lar ţhin" Neihkimin a tih chuan vuak chawrh ang maiin ka nghing dawt a, ka thin zawn hi a na nghal ngut ngut thei. 

"I ţawngtam mah mah. Ţha deuh a ka sawi lai hian kalsawn rawh" a ti dam thlup a, Neihkimi chuan Hmangaihsanga melh chho ha chung hian "Ka nu thihchhan kha i hre ve tho tiraw?" a ti tham chhal a, a aw aţang ringawt pawhin natna a tuar mek tih a hriat theih a ni. 

"Phone vang mai maiin thil hlui thar thawh a ţul lo. Ka nu kha damlohna avang a thi a ni. Chu chu engmahin a thlak danglam thei lo" Hmangaihsanga chuan a ti dam dap a, "Ka pa leh kan nuhrawn vangin a natna kha a thawk chak reng alawm. Lo in ngaizawng kher lo se chu ka nu kha a damchhuak maithei a sin" a la ti ţawk ţawk a. 

"Kal teh ang" tih nghut pah a Hmangaihsangan a hruai chhuah lai te chuan rawn hawi letin huat hmel zetin min melh a, Sangzualan ngaihzawng neih a chin aţang khan pawm lai nei kawp chingte hi ka haw lehzual a, ka nu hi ka huat ber chiin a lo khawsa ve ţhin tihna em ni? 

"Ka pi chuan eng thil chiah nge a lo tih le?" ti niah niah chungin Siampuii chuan hmun a phiat a, kei erawh ka dinna ngaiah ka la ding reng. Rilru a vak thui leh tawhin thil nih theih dan ni a ka rin ang ang te a dap kual a, chhanna ka hmu thei si lo. Neihkimi hian chhan awm lovin min haw ngawt lovang tiin rindan nghet ka neih phah a ni. 

Bawiha ka tih mut fel hnuah Ruattei a lo lut hlawl a, "I mut a chhuak tawh em?" tim daia a tih chuan lu thin pahin ka mut a chhuah rih loh thu ka lo hrilh a. 

Khumah rawn ţhuin Bawiha lu a chul thuak a, nui ver ver chunga a en reng hnuah "Ka nu kha chhul cancer in a thi a" tiin min rawn en a. 

"Ka nu hian in pawi a sawi em ni?" ti a ka zawh chuan lu a thing rang nasa mai. 

"Ka pa thiam loh a ni ve tho. Aaa..ka pa a thiam lo hmasa zawk ang. A thlem a" a ti nawi niaih a, a bul a ka ţhut ve rual chuan tawi te a min lo nuihin "Hrehawm ti duh suh" a ti zawi sap a. 

"Ka nu leh ipa an inneih khan pasal ka nei tawh a, biakin a innei lova insawirem tawp an nih vang khan ka rawn tel pui ve lem lova" ti a ka hrilhfiah lai chuan min lo en ran a, a mitmeng dam thlap chu hmuh a nuam hle. 

"An inneih hma khan i nu hi a rawn insawifiah a, kan pawm theih loh a hlauh vang a ni ber. Ka pa nen an inngaihzawn chhung zawng khan ka pa hi pawmlai nei a ni tih a hre lo niin a sawi a, ka nu a thih khan a hriat chauh thu a sawi bawk. Keichuan ka ring thlap a, mahse ka u te hian an awih lo a" a ti niah niah a, sawi nuam a tih chiah loh hmel khawp mai.

"Engatinge an rin loh a?" ka tih chuan "A chhan chu ka pa hi Care&cure hospital nei tu a ni tih miin an hre fur a, nupui fanau nei a ni tih nen lam an hria. Ka nu'n a hre lo bik kha an awih tlat lo a, ih...an lo inngaizawng bawk sia" dim tein a han ti a, sawi sual neih a hlauin a ţawng zawi tel viau a ni. 

"I nu khan a hre hman tihna em ni?" ka ti leh a, hlauh nei ni awm takin a hawikual hmasa te te a, chumi hnuah chuan min rawn hnaih lehzualin "Aw hria e. Lehkha ka thiam thei lova, school pawh ka kal lo reng zel. Ka nu nen khan kan inawm chawt a, a ţap ka hmu fo mai. Chiang deuh a a man chhuah hnu phei kha chuan a tla rawk rawk ni maiin ka hria, rilru a nat chuan taksa a ţha mawh aniang" a ti malh malh a, a nu awmpui tu berin min haw miah lova min la ti ti pui seuh seuh thei chu mak ka tiin a fakawm takzet a ni. 

"Ruatte, ka nu hi i haw miah lo maw?" ka ti chhuak khawl a, nui seihin lu a thing ne ne a. 

"Pawmlai nei kawp chingte hian thil sual lian tham tak an ni ngei alawm. Mahse, hmeichhe tam tak chu an pasalten ngaihzawng an neihin an ngaihzawngte an haw zawk daih zel a, an pasalte kha a nia an huat tur ber zawk chu. Ka nu pawh khan i nu hi a haw miah lo. Ka pa zawk hi a hua, rinawm lo zawk a ni miau a" a ti melh melh a, "U Neihkimin a sawi chhuah khan i bo lutuk a, i hmelah khan a lang vek. Engmah i hre ve lo tih ka hria a, i nu i dem mawl tawp loh nan leh i bo lutuk tawh loh nan ka hriat ang ang ka hrilh ve che a nih hi" a ti leh a, engtinnge min huat miah loh theih zawk le?

"Neihkimin ka nu nen a min hua hi a awm lutuk a nih chu. Hmanah khan lo hre tawh ni ila chuan ka khap ve thei tur a nia, mahse pasal ka nei hma a, ka nu nun a thleng engmah ka hre lo. Ka â em a, pasal ka neih chuan nuamsa deuhin ka awm hlen tawh ang a ka tia, tun hi ka thleng leh ta sia" ka tih chuan "A ho lutuk, tihian i hre tawh alawm. Hma hun kan hriat lohna tak hi hlim deuh a kan awm theih nachhan a nia, i tawn tur zawng zawng hi hre lawk vak la chuan tun ai hian i lungngai lehzual dawn asin" a ti a, ka melh ngai ka melh tlawk tlawk a, an dinhmunah hian ding ve ta ila Neihkimi ang tho hi ka nih ka ring. Ruattei hi fel ka ti thar sawt, pawm hreh viau mah ila Hmangaihsanga pawh a tel. 

Zingah hna ka kal a, Hmangaihsanga hmuh loh dan phet zawng reng chung a nilenga hospital a ka awm hnuah tlaiah inchhungah ka buai leh a, chu chu nitin a hun ka hman dan a ni. Thil danglam em em thleng lo mah se ka nu ka ngaihtuah thar a, natna eng emaw tak nei hmel a pu. Ruattei thu min hrilh avang khan ka haw lo a, huat duh viau mah ila nu te hi huat an lo har khawp mai. 

Ka fapa chanchin ka hrilh hrep ni aţang khan Bla a rawn lang leh ta mang lova, kal pahin min be zawk a, a rawn chawl khat tawh. Zonuni hnen a thil awmdan ka hrilh ni khan "A la naupang ve em a" a ti a, a vei zui lo nasa. 

Hna ka thawh mawlh mawlh laia counter hmaa Hmangaihsanga rawn ding chu ka hmu lo der hmak. A bul chiahah vai pakhat bag lian puar zet ak a ding a, MR a nih hmel. Anni ho hian an rawn visit ve reng ţhin a, thilpek ţha fe fe an dawng ruih zel. 

"Sir..damdawi kha stock a awm vek a, kan damdawi chu a man a tlawm bik a, mi rethei tan pawh lei a har lo a" tiin chu vaipa chuan lu tih chet bak bak pahin a la hrilh zawm reng a, an kiangah mi pakhat a ding ve a, vaipa thusawi chu ngaithla ang pawhin a awm lo. Lehkha phekah eng emaw a ziak mawlh mawlh a, min hmuh hlau takin lehkha thliar ang a awm chungin a thil ziah chu ka en ru den den a, karei, a hawrawp a chhe lutuk! En chian vak loh phei chuan a chhiar theih loh reng reng. 

Chutianga ka melh ruk reng lai chuan pen hmawrin ka hnar a rawn khawng kauh a, ka hup nghal thawk. A na reuh zek lehnghal.  

"Lo en ve suh" a ti hluk a, hnar hup ţat chunga amah ka melh chuan mawi deuhin min lo nuih a. Ah! A mawi leh lo. 

Ner nak chungin ka thil tih lai ka chhunzawm a, "Kha heng ho hi lo lei rawh u. Nakinah ka rawn en ang. I fate an hrisello si, school kal laia i sual ţhin vang aniang" tiin a piah a ding pa chu a fiam zuk zuk a, school an kal dun ţhin a ni phawt ang. 

Vaipa lah chuan "Sir, khawngaihin phone number min pe thei angem?" a lo ti ve sek a, nin hmel zet a thawk huai pahin ka hma a lehkhaphek lian vak lo chu a rawn ban vut a, phone number chu a ziah sak ta aniang eng emaw a ziak mual mual a, a rei hrep lehnghal. 

"Phone ah min rawn remind su aw..reminder card in dah ziah tho a, phone a in zawt lovin rawn ngaihven leh zawk rawh u" a ti dam vei thlup a, damdawi man zat te a zawh leh chuan vaipa pawh a lawm hmelin a chhang phur khawp mai. 

"Kha i ta ve tur, i awh ve hmel emai" nuihza aw zet a tih pahin ka hmaah paper a rawn theh thla a, a thlep vel ţat zui a. 

"Ka awh ve pawh ka hre lo. La let leh daih rawh" ka ti hmak na a a ruk chuan eng tak nge a ziah ka en chak tho. 

"I enchak em kha" ka ngaihtuahna hria niawm takin a rawn ti a, "I hre bawk lo" ka ti bak hlar a, a hriat lutuk vang zawk a ni reng sia. 

"I hnar chu ka khawng vung deuh a ni maw?" pawi tih hmel fe in a rawn kun hniam run a, chiang deuhin ka hnar a en pah bawk. 

"I dawheh anih chu" ka ti hlak a, ka awih mai lo. Khatiang a khawn keuh ringawt khan a vun nghal theih ka ring lo hrim hrim. 

"Mihring taksa hian point a nei ve a, a pawi lai tak point a khawn fuh chuan a vung duh lutuk tlat" ka hmai thlek run reng chung hian a ti ban charh a, ka hnar hmawr a rawn khawih leh zeuh ţhin a, a na bawk si lo. Doctor meuhin thutak deuha min en kual vel chuan ngaihţhat loh rum rum a awl khawp mai. 

"Engtin nge a awm?" ka tih chuan "A lawk luau" a ti sup a, a hmel ka en ţhin, a nui bawk si lo. A hmuh lai a phone leh darthlalang phawrh rawk rawk ka duh bik bawk si lo a, computer ka melh leh zeuh ţhin a, kan on eng va a, a inhmuh hleihtheih loh. 

"Dawt i sawi aw Hmangaihsang" ka la ti ţalh a, "Nat pawh a na tawh lo" ka ti tel hram. 

"Hnar bik chu a vun chhuah meuh chuan a na tawh ngai lo. A point ka khawng fuh em a nih hi" thutak zet a tih pahin a tawlh hla deuh a, min melh ran chungin ka hnar a tuai a tuai mai. 

Chutia a tuai pah chuan "Ti hian a na em?" a ti leh ţhin a, "Na miah lo" tiin ka lo chhang ve mai a, "Nih leh ti hian" tih pahin ka hnar chu a rawn nam na deuh a, "Aih, na chuang lo" ţha deuhin ka lo ti leh a, Zonuni rawn let vat vat se ka ti ngei mai. Casualty lamin an ko a, a thang lawk hlan a ni. 

Ka hnar hmawr a a kut zungchal a dah leh hnuah "Ti hian i hnar rawn en tum teh" a tih leh chuan "Hmangaihsang min bawl kual mai mai anih kha" bak hlar a tih pahin ka tho zawk a, a ban bul ka chum sak ţawlh hnuah ka ţhu leh hmak. 

"In en la" pangai tak hian a ti leh a, "Ka duh bawk lo. Khatiang lekah hnar a vung lawk luau thei lo hrim hrim" ka tih tan tan chuan a ri meuhin a nui chhuak ta hawk hawk a. Malsawmin min rawn hmuh hlau reng rengin ka awm a, Hmangaihsanga bula awm chuan engamah hmain ka tlanchhe nghal dui zel. 

A kalsawn veleh lehkha a thu inziak chu ka chhiar a, "Mulaakaat karane chalate hain" tih hi a lo inziak a, ka bo muai muai mai. 

"Min ko peng thei tu vek an ni hlawm a, ka ning lutuk. Pawimawh awm tawkin min ko a, acid kan liak mai mai" Zonuni a rawn let takah chuan lehkhathem chu bag ah ka khung ru ţat ţat a, "Ka thlah ang che" a ti zui zat a, Hmangaihsanga ber bur vangin Zonuni ka tibuai ziah. 

"Nia, tun ţum chiah ka inthlah tir tawh ang che" inthlahrung dek a ka tih chuan "Ho lutuk ho lutuk" a ti phawr phawr a, driver atan a Hmangaihsanga a rawn inpapek leh tawp hmain Zonuni nen kan haw thuai thuai zel. 

Lehkha a thu inziak kha ka hre ran reng a, Hindi a niin ka hria a, hindi anih ngat chuan ka tan a awmzia hriat ngaihna a awm lo. Ka hlawhchhampui ţhak tawh kha a ni ve a, exam naah pawh question hi a letling zawngin ka copy hmiah ţhin. 

"Bawiha hian min ko thiam deuh tawhin ka hria. 'Api' ti rawh ka tia, fiah lo deuhin a ti ve. Remremi pawh a ko thiam ve ţep tawh ang" tiin ka nu a lo phul hlut a, "Min koh ve pawh a ngai lo" ti hmakin U Remremi a ţhu tum bur thung.

"Ngai pawimawh duh suh, Bawihan a la ko thiam ve lova, a titau rih mai mai anih saw" ka nu chuan a ti sar sar a, a chang chuan naupang titau a ang ţhin, ka nu nen kan lawm viau zel. 

Inthlak tur a pindan chhung ka luh rualin phone ka phawrh nghal a, lehkha a thu inziak chu ka google a, rin ang ngeiin hindi a lo ni. Vawiin a ka vai hmuh kha ka mitthla nghal ngawt lehnghal a, a zia lo lam lek lek chu a ni. 

Ka thil zawn chu ka hmu ta ngei a, "Let's go on a date" tihna a lo ni. Hmangaihsanga mai mai chu aw..

CONT..