KA HRINGNUN THAWNTHU-7

KA HRINGNUN THAWNTHU-7

"U Zote mi pakhat a lokal. Zotei a awm em a tia" U Remremin a rawn tih chuan ka hawi â heu mai. Tumah ka beisei tlat lo a ni. 

"Tunge? Min hai a ni lo maw? Ţhian ka nei hleinem" ka lo ti he haw a, Bawiha a la muhil bawk si lo, nau nen a inleng kawm chu peihawm loh deuh a sin. 

"Mi pakhat lian pui" U Remremi chuan a han ti leh a. 

Taka, hriatchhuah zawk ka nei. Bl-a a ni thei angem? Khapa kha rilru a a thawh dan dan a che thut chi a nia, kan vengah a lokal ang a, remchangah a rawn pengkawi satliah em maw ni dawn ni tih thlengin ka ngaihtuah hman vek. 

"Cher deuh a ni em?" ka ti leh hram a, lu a thing nawk nawk mai. 

"Aw..ka rawn chhuk dawn nia" ka ti ta nge nge a, Bl-a a nih si loh chuan tu tak ni ang maw? Rawn len tum sa ran a min hrilh lawk tumah an awm bawk si lo; hmu tawp ila a chiang ber ang. 

Bawiha mutchhuak ngurchuai tawh bawk si chu ka pua a, a lian ve tawh sia, a puak a puak ralah chuan a hahthlak lam hret tawh chu a ni. 

Inhnuai ka thlen thlak rual a Lawmkima ka hmuh chuan mak ka ti lutuk ringawt. Min hmuh ve rual chuan nelawm deuhin min lo nuih a, Sangzuala a rawnkal ţum khan Lawmkima pawh Aizawl a kal thu a sawi ngei a, kan inhmu ta lo kha a nia. Kan inbe ngai miah lo bawk a, a rawn inlan thut chuan min ti hlau thei zawk dawn alawm le. 

"Ka rawn tibuai che em?" inthlahrun hmel deuh hian a han ti a, Bawiha a melh pah zawk bawk. 

"Teuh nang aw..i va ngaihawm ve. I rawn len dawn chuan mi hrilh lawk tur che a nia" ka ti chul a, ka phul tak hlutah chuan a hahdam deuh huaiin ka hria. 

"In kawmthlang lawkah khuan ka thleng a, kar hmasa khan ka lokal daih tawh. Ka pawn chhuak ngai mang lova, zanin chu ka rawn tei chho vel mai mai" a ti a, inchei peih lo viau ţhin si Aizawl a rawn thlen meuh chuan a nalh vei thlup mai. 

"Chuti si ngah nge i rawn len vat loh? Kan inhmuh lohna a rei tawh tehlul nen" vui hmui pu deuh tak hian ka han ti ve a, a nui suk a, insawithiam dan em em a hre lem hlei lova. 

"I dam ţhin em?" a ti leh tawp a, kan piah deuh a Ruattei phone khawih mual mual lai pawh a rawn nui chhuak ta hak hak a. 

"Aw..nang i dam ţhin em?" ka tih chuan "Heh" a ti tawi tak a, "Bawiha chu a va lian tawh ve. A biang pawh a thep ve deuh tawh a nih kha" a ti zui zat. 

"Lian ve tawh lutuk bakah i hmu khat a, naupang chu hmuh loh karin an lian zung zung mai. Hmuh ţhan loh phei chuan hmuh len a awl zual a" ka ti zung zung a, a inthlahrun hmel lutuk chu a khawngaihthlak zawk. 

"Sangzuala nen khan in inhmu em? Hmanni a rawn kal ţum khan" a tih chuan "Hmu ang chu..eng nge an chanchin? An dam ţha zel em? Khaw hran a awm chuan chanchin inhriat tawn reng a har a, ka nu leh pate an dam maw?" ka ti deuh duah a, Lawmkima pawn, "Question number pe law law teh" a lo ti hluk a, Ruattei nuih a za ngang mai. Amah hi a palian ren runin a hmel a nelawm loh si a, a ţawng bung hmuk hmuk ţhin bawk nen, hrengai lo tan chuan hlauhawm tham a ni. A landan ang ai hian a naupang lehnghal a, Sangzuala aipawn a naupang daih zawk. 

"Aww..an dam ţhat leh ţhat loh ka zawt mai che lawm" nui pah hak chunga ka tih chuan "Dam..ti ila ipa a che sual a" a ti fan ruih a, ngaihven deuhin "Engtin nge a chetsual?" ka lo ti leh vat a. 

"Sangzuala nen a leilet an kal ţumin a nia, Sangzuala sawi hmangah a hlim lutuk vang a ni ber ang chu. Bike hnungah a ţhu si a, a hlim phur phar kual vel kha bike aţangin a tla a nih ber chu. Hnung lamah bag a ak rit a, chu chuan a uai ve deuh bawk ang a" a ti ve duah a, a thau luah bawk sia, a na phian maithei a ni. 

"A va'n zia lo e aw. A thu hrimah min rawn biak ve ţhin tur che a nia. Thantei nen chuan kan inbe ziah asin" ka tih chuan "In inbe ziah lo aniang" a kekawr ipte zen ţat ţat chung hian a ti hluk a, "Kan inbe ziah tak tak alawm" ka ti ve ţalh a. 

"Anih te chuan khaw lam chanchin chu Thantei zawt mai ta che" min ti a nih chu! Ruattei a lo nui kar kar reng a, min ţhut hnai viau tawh lehnghal. 

Ipte aţanga a meizial phawrh chu a tuai a tuai a, a beng leh thuk ţhin. A insum zo tawh ngang lo chuan "Meizial ka zu dawn aw in phal em?" tiin Ruattei chu a dil phawng a, Ruattei lah chuan "Zu rawh zu rawh...i ţhutna bul side table ah khan ashtray a awm kha. Mei zu mi pahnih lai kan nei alawm, a inthlahrunawm loh lutuk" a lo ti zung zung a, Hmangaihsanga ka hrechhuak ringawt mawle. 

"Zote, i hlim tawh em?" Lawmkima chuan a ti teh tawp a, nui var var chung a lu ka buk zeuh chuan a lo nui ve suk a, "Ka zia tawh lutuk. Pathian zarah hna te ka nei ve tawh a, ka mamawh ang te ka lei thei tawh a" ka tih chuan "A ţha" a lo ti nghut a, a lungawi hmel hliah hliah a ni. 

"Engtik nge haw i tum deuh?" ka tih chuan a meizuk lai chu fawpin a si vang vang a, a ka aţangin meikhu a rawn chhuak leh tual tual a, tui a tih hmelin a nawm hmel riau a ni. 

"Naktukah" a ti mawl tawp a, min chhang tawi thei khawp mai. 

"Eng nge i rawn tih a?" ka ti lehzel a, "In kawmthlang lawkah khuan ka ni ten in an sa a, ka rawn pui ve" tiin ka zawhna chin chiah min chhang leh a, biak dan tur vak pawh ka hre tawh bik lo. 

"E...ka lo theihnghilh daih. Ruatte hei hi Lawmkima a nih hi, a fel tehmai a nia, chuan Lawmkim, Ruattei hi ka nau a nia" ka ti hluai a, a tu ve ve mah chuan chhang tange min ti lem hlei lova. 

"Kumtharah ka lokal leh ang" Lawmkima zawk chuan a ti ta hlauh a, "A ni maw? Eng nge rawn tih i tum? I ni te vang thoin em ni?" phur takin ka lo ti vat a. 

"Sawi chi rih loh" a ti leh daih a, nui ruh ruh chungin chung lam a melh a, a zia ve hrim hrim a ni. A ţawngtam lo nain phawk ve tak a nia, a ţawng ve chhunah chuan kan nui kan nui ve ţhin. Nui hauh lova midang tih nuih thiam deuh ang kha a nia, a fiamthu huatpui tawk an awm chawk reng bawk. 

"Krismas a hnai tawh sia, in inbuatsaih nasa tawh viau ang a" pangai taka ka tih chuan "Lenna apianga chhangban ei a ni mai" a ti a, a phur hmel tehchiam lo. 

"Ha lem vuah hoin chilthli tla lek lekin min lo thlir ţhin an tih kha" ka tih chuan "Chhangban hmuam ral theih a awm si lo alawm le" a ti hulh a, Lawmkima thusawi kan nuihpui hak hak laiin Hmangaihsanga a lo lut hlawl a, ka nui tawp nghal hmak mai. 

"Nula i rim ve deuh tihna mi?" ti a Ruattei lo fiamna pawh chu ngaihven lovin Lawmkima chu a en nghal chat a, kan lo inţhut hnaih vel kher bawk nen, Lawmkima ngawt chu a melh run run reng a, eng nge maw a hriat teh hrep le?

Zanah chuan khawlai a vawh deuh tawh vangin leather jacket a ha a, a taksa nalh leh lian thlup nen chuan a inrem zaih mai. A mitmeng erawh a rum mah mah deuh chu a ni. 

"I lo haw tawh a ni maw?" ka lo ti ve thuai a, khawnge a kal tih lah ka hre der lo. In khat a chen dun reng pawn ngaihven loh chuan hriat a har ve em a tin ni. 

"Kei hi nachang ka hre lo ţhin a, thingpui nge coffee in duh?" ka ti ţha leh vel a, Hmangaihsanga chuan mitmeng dur khupin min melh a, a pawisawi ta mai te pawh ka ang alawm. 

"Ka inchak hran lo" tiin Lawmkima chuan ţha deuhin min lo chhang a, "In ve hrim hrim rawh. U Zote keichu ka duh lo aw..ka pum hian a ngeih chiah lovin ka hria" Ruattein a tih tak tlatah chuan "In lum dawn leh thingpui a ni mai" a ti a, Hmangaihsanga ber bur chu ka melh zawk a, min lo la en ngar ngar nia! 

"I duh ve em?" ka ti lui ve tlat a, "Duh lo" bung zet a a tih chuan Ruattei chuan min melh tawn ralh ralh a, "U Hmangaihsang, ka laptop ka sawisel leh tawh a, min enpui leh lawk teh" tih pahin a tho tharh a, chutianga Ruattei berin a tih takah chuan hreh hmel zetin inchung lamah a chho a, Ruattei chuan awmze nei deuhin min la rawn melh zui. A ni hi hriat thawi a nei em mawn le?

"Thingpui chu ka va lum ang aw" tih leh thawh ka rual a, Bawiha chu ka chhuk hlim khan Ruattein a la thla daih tawh a, thingpui lum tur a ka kal dawnah Lawmkima malchungah ka dah. Kum khat a tling ve tawh na a vengtu awm lo chuan ka la ngaihtuah deuh tlat a ni. 

Lawmkima thingpui ka pek lai chuan "Tlangval khan min huat hmel e" a lo ti a, inchung lam a melh pah zeuh bawk. 

"Haw teuh nang. A tih ve dan hrim hrim a nih kha" ti ve ngial mah ila "A seat bikah ka ţhu emaw ka ti hman a" a ti a, min duh thu a sawi leh zeuh ţhin sia, Lawmkima nen a kan inţhut hnaih lutuk kha a huat ber niin ka hria. 

Thingpui a inzawh rualin "Ka inzo chiah nain ka haw nghal mai ang" a ti a, Hmangaihsanga awmdan vel vang khan nuam lo a ti zo vek tawh aniang. Bawiha mutthlu lap lap tawh chu ţhutthlengah ka muttir a, a tal ve deuh na a a muhil zui nghal mai. 

"Naktukah i haw tawh dawn sia duh leh la leng la" ti mah ila "Ka lokal leh hunah a ni mai" a ti deuh tlat a, din pahin a hawi kual vut a, ka chhungte tumah a hmu lovang. Zanriah kan kil ho ţhin a, chuzawng chu a ni mai. Chaw eikhamah reilote an ţhu muang ve a, mahni pindan ţheuhah kan kal darh deuh nghal mai zel a. Thingtlanga awm ţhang Lawmkima tan chuan hriatthiam a har viau ta ve ang.

"Haw i tum tlat anih leh khawi ka lo thlah ang che" ka ti a, min han hnial zet a, "Kawngka kalh a ngai tho a" ka tih takah chuan kan inzui chhuak a, pawn chhuah meuh chuan boruak a vawt var tawh. 

"Rawn leng leh ngei ngei ang che aw" ham bai bai chunga ka tih chuan nuih hawk pahin "Khaia" a lo ti hluai a, "Ka rim muthlu lo chauh che a nih kha" a ti leh a, "I ninawm" ti hlarin a hnungah ka nam dawt a, a che eih lo. 

Nuihzat hmel taka min en chung hian "Ka rawn rim leh ang che" a ti a, rim tih ţawngkam a hmang deuh kher chu ka helh lem lo, Lawmkima a ni miau a. 

Gate thleng rakin ka thlah phei a, gate ka kalh rik rak rak laia a rawn lehhawi chuan ban ka lo vai zauh a, min rawn bye bye let ve ngei. Sangzuala ţhiante zinga ka kawmngeih ve ber a ni a, ka nu khan engtin nge min rinhlelh theih zawk le? Kan inţhianţhatna a chhiat phah lo hlauh zawk a, min rinhlelh dan vel kha a rukin kan hre kar a, hre lo ang hmiahin kan awm ve ve thung. 

Inchhung a ka pen luh dawnah "Kha kha tunge?" a rawn ti thum dut a, awi le(h)! Ka phut nasat zia chu. Hmangaihsanga chu kawngka luh chiahah bang nghengin a lo ding reng a, a mitmeng te chu Lawmkima rawn len lai ang reng kha a la ni. 

"Min ti phu nasa lutuk alawm. Zawhna i neih pawn ţhutthlengah te sawn lo ţhu ve rih mai la" tih hlak hlak pahin sofa chu ka kawk a, ka kut lehlam chuan ka awm ka dawm vang vang mai. 

"Tu nge?" a ti nawn leh a, "I â emai Hmangaihsang, engatinge i thinrim ve ringawt a?" ka tih chuan a ngawi ngul a, ka rindan chiah. Chhanna ka neih sa bak chhanna dang a nei bik lo hrim hrim. 

Lawmkima nen a kan thingpui inna no ka khawm rawk rawk hnuah choka ah ka chawi lut a, Hmangaihsanga ngawr ngawr hi chu huatna ka nei hran lo a, min duhsakin ka tan a hlu takzet. Ka laka a rilru puthmang hi ka duh lo mai chauh a ni. 

No ka sil lai chuan ka hnungah a rawn ding a, kan insi lek lek a ni. Min din hnaih lutuk chu ka hnungzang te hi a za mer mer thei hialin ka hria a, ngawi rengin min zui lehpek tawh a nih hi. 

"Mamawh i nei em ni?" pangai deuh a ka tih chuan "Nangmah hi" a ti sup a, ka ngawihsan daih. Thla ruk zen zawn chiah Sangzuala nen kan la inţhen a, nupa anga kan in en lohna rei tawh viau mah se pasal ţhen hlim ang tho ka ni. Chubakah Hmangaihsanga hi ka nuţa neihchhun liau liau a ni. Keini pahnih inkara hmangaihna par tir tum chu a awmin a ang lo lutuk ringawt. 

No ka dahţhat hnuah kut ka hru hul a, min zui tawh lo. 

"Muttui aw" ka ti a, kal tum a ka inher zet tawh chu min pawt let sawk a, a awmah ka bei nghal rawk rawk mai. 

"Zanin hi eng nge maw i hriat le?" awki san hauh lova tih pah a inlak hran mai ka tum chu ka chet theih loh nan ka kawngah nghet zetin min kuah nghal hmiah a, "Midang an lokal thut ang e" ka tih rualin ka chhipah a khabe a rawn nghat a, hnar tum chu 'min hnaih zel rawh' tihna ang vel a ni. 

"Ka duh chein ka hria" a ti nawn leh tawh. Beidawng zetin ka thaw halh a, keichuan duhna pakhatmah ka nei ve lo. A hmelţhain a pianphungah sawisel tur a awm lova, a landan pa tak hian hmeichhe dang chu a hip ngei ang, inhmuam up run chi a nih loh bakah a rilru a ţha a, Hmangaihsanga kher ni lo se chu ka duhzawng tak tur chi a ni. 

A lungphu dup dup chu ka ngaithla reng a, engtinmah ka awm thei lo. Ka nuţa, kumkhuaa ka nuţa ni tawh tur a ni miau a ni. 

"Min duh tak tak em?" ka tih chuan "Aw ka duh takzet che" a ti nghet churh a, engtik a inţan nge tih leh ka englai nge a duh tih ka hre lo, hriat ka tum hauh lo bawk. 

"Awm hran kan ngai a nih chu" ka ti hmak a, ka awki ka la san chuang lo. 

"Kar hnih ka awm hrang tawh. Awmzia a nei lo" a tih chuan "Inhmu lo vang vang ta ila" ka ti a, kan inhuat phah loh nan a dam zawng a hnar ka tum tlat a ni. 

"Ka hmuh phakah i awm reng ang" a ti nghut a, engtin nge maw ka tih zel dawn ni? 

"A rem lo va, i hre vek alawm" ka tih chuan "Sawi tawh suh" a ti thawp sup a, thinrim derin hnar dan ka ngaihtuah mai dawn em maw ni ka ti rum rum tawh. 

"I inleng pa kha tu nge?" a ti ţha leh a, chhanna mumal a hmuh hma chuan min zawt leh duh dawn tih hriain "Ka ţhianpa a nih kha. Ţhian satliah, mipa hi ka nun a lak luh ka tum tawh lo" ka ti tel kher a, ka sawi chiang tawk viau tawh a ni. 

"A ţha" a ti leh sup ang lawi a, lungawi hmel zetin ka chhip zawnah a thaw lum ham ham a, mipa ka sawi zingah khan a inchhiar tel ve lo em maw ni dawn chu le. 

"Min thlah tawh rawh" ka ti a, min kuahna a phelh thawl rualin ka din hlat nghal thuai. Mi hrat khawkheng Neihkimin min hmuh phei chuan inchhungah bomb a puak leh dur dur ang. 

"I rilru put hmang i thlak danglam loh chuan ka haw thuai ang che" vau ti tih hian ka ti a, a ngaih pawimawh loh hmel nasa. 

"Duh lo ta ila" a la ti ham ham zui a, ka pawisawi se ka ti ngawt mai. 

"Ka tlanchhiatsan ang che" chang fak a ka tih chuan "Tum chhin la" min cho zet a tiin a kiai suk a, "Muttui" ka ti leh ta ringawt a, muangchangin sitting room lamah ka phei a, Hmangaihsanga bawk chuan min rawn kalpelin sofa a ka fapa muhil bam chu zo zetin a pawm nawlh a, rawn pawh min rawn eih lova kalpuiin inthazo zetin kailawnah a pen chhoh pui pawk pawk a, puakpuan kengin an hnungah ka zui ve chhat chhat. 

Pindan chhung ka luh ve meuh chuan khumah a lo mut fel der tawh. Lawmthu sawi ka tum zet na a ka tih huangtau phah hlauin ngawih ka chuh a, mu nghal duh ni awm tak a tukverh kharin parda ka pawt phui nghal sawt sawt bawk. 

Kal nghal mai lovin min dinchilh leh ran tawh a, "I thinrim tiraw? A dik em?" min chhuk en run chunga a tih chuan "Ka thinrim hleinem. Min endan i thlak vat loh chuan ka hua ang che ka ti mai alawm" tiin pangai deuhin ka chhang a, ka landan pawh a danglam loh hram ka beisei. 

"Ka tihpalh" a ti zawi ruih a, "Engah chuan maw?" ka lo ti deuh ha a. 

"I sawi ang kha ka tih theih hmel si loh a"  ka dar tawn tawn a min dawm chungin a ti a, ka lo thaw hak a, lemchang mai mai a ang si lo, ka mangang ru takzet a ni. 

"Nupui nei daih rawh" ning awka zet a ka tih chuan mit ti zim sunin min en a, "Ka ti tak tak. Khawlaia ka vahvaih i duh loh chuan nupui nei rawh" ka ti nawn leh ngat a, ka dar a dawmna chu thlahin a ding ngil a, "Hlauh i ngah a...tiraw?" a tih chuan "Aih, khawlai a vahvaih chiah ka hlau" ka ti a, ka thil hlauh ho chu sawi vek sen a ni lo thung ang.

"I vakvai lo ang" a ti sup a, a hmel a dam thlup a, a mitmeng ril ruih a min en chunga "Hetah in awm reng ang" a tih leh zel phei chuan nupui neih a remti taah ngaiin ka lawm hman viau. Mahse, "Ka la nei dawn che" a ti a, a awki a zawi viau na a a nghet churh thung. 

In her vutin kawngka lam a pan a, ka hriat phak turin "Rei deuh mah sela nghak hram hram rawh" tih lai te kha a sa chhuak al al a, ka inrin hmain ka nui thut alawm le. A mizia hi a mak riau a ni, a changin a tak ngul a, a chang leh boruak ipik lutuk hlauin min fiam nui leh a, Hmangaihsanga hi huat a har viau asin. 

Diktak chuan a farnu chiah nih ka duh. Pasal neih ka tum tawh loh chu thuhran, ngaihzawng neih ka tum tawh lo hrim hrim. Sangzuala kha ka duhin ka hmangaih hliah hliah niin ka inhre ţhin. Mahse, hun a kal a, nupa ni a chengdun reng ta na na na chu ngaiah kan innei chho a, kan inhmangaihna meiling de vat vat kha chhem alh lovin tuiin kan leih hlum a, kha tui kha a lianin a rapthlak lutuk a ni. A chhungah chuan innghir nghona leh rinawm lohna te an cheng a, inhne hluah hluahna leh inhuatna te chuan damkhawchhuah loh hlau ni awm takin an hleuh buan buan a, tuifawn na takin a chim pil zawh miau loh avangin kha tui kha kan thinlung a hmangaihna mei la ling ve chang chang leih hlum tuah a ţang ta a ni. Tichuan, Sangzuala nen a kan inkarah khan huatna kan vulh lian a, ngaihzawng a nei zut a, min riah chhuahsan a chingin min hne zia a ti lang awl lo a, kan nupa inkarah hmangaihna in hmun a chang tawh lo. A thihna a rei tawh. 

Hmangaihna hi chu a tirah a par vul chuk a, enkawl zui dan kan thiam ţhin lo a ni. Ţhenkhatin tui an pe nasa mah mah a, ţhenkhatin tui pek an ngaihsak lo leh lutuk a, a tawpah a thi leh tho ţhin. Chutih rualin hmangaihna hi eng eng emaw nen kan tehkhin fo a, hei hian mihring kan inan loh zia a ti lang a ni. Thinlunga aţanga chhuak hmangaihna hi kan enkawl thiam dan a inang lova, dimdawi taka enkawl thei pawh an tam ang. Chutiang a ni chung chuan ka hlau tlat tawh a ni. 

Ka fapa mutna lama inlet thawkin a awm zawnah ka kuah a, Bawiha hi awm lo phei sela chuan khang zawng zawng kha ka tuar zo lovang. Ngaihtuah tawh loh ka duh tehlul nen Hmangaihsanga vangin ka ngaihtuah chhuak lo thei lo. Khang hun liam ta zawng zawngte kha rilruah a rawn thar leh ta kuar kuar a, Sangzuala chu thuhran, ka nu min tihdan zawng zawng ngaihtuah phei chuan hmeichhiate hi kan chhel ka ti thlawt. Derdep tak anga lang si hian mipa in an tawrh theih loh tur tam tak tuarin kan paltlang a ni. 

Ka muhil thei hlawl lo chuan phone ka en a, [Nuthlawi zûn...mahse naupang chanchin ngaithla peih lo zawngin] tih te hi Bl-a hnen aţangin ka dawng a, ka nui tawi tak mai. 

Ka seen hnu reiloteah [Tawn hriat i ngah tawh awm sia, bakah i zei ang] a rawn ti leh a, reply lovin ka dah leh tawp. 

Tam takin nuthlawi kan endan hi a dik lo ţhin. Easy leh zei turah kan dah nghal pang zel a, nuthlawi kan tih te hian engtiang chiahin nge hringnun an fight kan ngaihtuahpui ngai lo. 

Zing ka tho chu ka rit luk mai. Bawiha a lo mu tawh lova, ka nu'n a rawn la a nih ka ring. Ka nu hi a mu rei thei lova, 'mut luih tum pawn a theih loh, ka pang a kham' a ti mai zel a, a thawh veleh kan pindan a rawn en a, Bawiha a harh tawh chuan min kaitho ve lovin a la mai zel. 

"I tho nuam em?" choka ka luh rualin Siampuiin a lo ti var a, chhang lem lova ka buk zeuh hnuah ka tih ţhan danin tui ka in hmasa leh te te a, "Chaw ka lo chhuang ang aw" ka ti a, buhfai silna bowl ka ban nghal zat. 

"Ka ti thei tho alawm. Duh leh lo inbual daih la, i kal hma ţhin sia, hmanhmawh deuh a chet rum rum zel chu a ninawm ang" a ti siam siam a, min awl vek a inhuam viau ţhin na a ka pui ve ta tho. 

Ruattei rawn tho chhuak chu ka hmu tim deuh a, Hmangaihsanga awmdan aţang khan eng eng emaw chu a hrethiam ang; haitheih ni hek lo le. Inthup ţit ţet a tum ve mang si lo, Ruattei hmuh laiin Lawmkima nen a kan inţhut hnaih mai mai a duh loh zia a lantir vel a nih kha. 

"U Zote, vawiin chu chhuah hma ka ngai a, ka rualin kal daih rawh aw, nuam i ti zawk daih ang" a ti siam siam a, zan lam a engmah thleng lo ang hmiahin a awm.

"A ţha ngawt ang, nikhat na reng reng chu kal rual ve teh ang" phur hmel takin ka ti na a ka chak fahran lo. Ruattei nen chauh a awm dun ka hreh deuh tlat a, nizan chungchang kha min zawh zui ka hlau. 

"Tlaiah min rawn tlawh kawi la, i sam kan colour dawn nia, a lang nung lo lutuk a, ka lo nghak ang che" a tih chuan "Nia ka khawih danglam ngai lova" ka sam zut pah hian ka ti a, tan tawp loh chu ka tih danglam awm pawh ka la hre lo. 

"Nalh deuhin kan khawih dawn nia, i lang thar sawt mai ang" a ti var a, ka lo nui ringawt a. 

Hmangaihsanga exer la rawn haw nen pawh kan inhmu ngei a, hmu lo angin ka awm tlat. Min biakin a rul tawk lekin ka chhang a, ka pehhel char char a ni ber mai. Ka chevel chu a mitin min chhui zui reng tlat a hriatna ka nei pek a, chian tumin ka en duh bawk si lo, "Hmangaihsang inchei ang" U Remremin a rawn ti ta hlauh zawk a. 

"Lukhum sam lem chhawm hi khum tawh rawh aw, hei a kir vel a nia" U Remremin a tih chuan nin hmel zetin a rum nghut a, a phun zui hluk ri ka hriat chuan a rukin ka lo nui. U Remremi chu a hnial fithla leh ţhak a, Hmangaihsanga kawh sawk pah a "You bad" a tih hlar hnuah a chhuak tau nghawng nghawng mai. Siampuii a lo nui leh kar kar tawh. Eng nge mawni le..i sual tihna a ni tho a, sawi dik loh a nei lo reng reng. 

Rawng kan bawl peih ţep tihah ka inbual a, Ruattei nen a chaw kan ei sawk sawk hnuah hna kal turin kan chhuak a, Scooty a lak chhuah chhung chuan Bawiha hmuh loh turah ka biru tlat. Tun hnai te aţang khan min ngen a ching a, a hma zawng a min ngen ngai der si lo; naupang hi chuan an zia an thlak thut thut zel a, a mak ve ngawt mai. 

"Lokal rawh le" Ruattein a rawn tih takah chuan ka bihrukna aţanga chhuakin seat hnungah ka ţhu kai tharh a, kan veng pawh kan la pel lo ang tihah "Hmangaihsanga hian a ngaizawng che mi?" a ti bawl mai. 

"Chutiang a awm hran lo..kan innel ve tawh a" zam ru zet a ka tih chuan "Ka awih lo..nizana a awmdan kha a dik lo reng reng. I thlavang a hauh ţhin dan em em aţang khan ka ringhlel daih tawh a, nizan khan ka chiang chiah zawk" a ti a, ka zak ru et et mai. 

"Nangni pawh ni ula in thlavang a hauh ve tho ang, farnu te chu a dan a dang alawm" phat tum taka ka tih chuan "Chuvang tak chuan alawm ka rinhlelh che u. Unau hi chu inhmangaih viau siin engahmah kan inngai lo khawp a, mipa leh hmeichhia ngat phei chu inpawh miah lo an tam. Kan buai naah a inrawlh duh ngai miah hleinem. Ka nu thih pawn a tawrh tawrhin a tuar tawp a, ţha a tih dan berin a sun a, vawikhatmah min hnem lo reng reng. Kan buai naah a inrawlh ngai mang lova, midang nen a buaina kan neih ve chang pawn kan thlavang hauh turin kan buaina a hre ngai lo hrim hrim. Unaute duat hliau hliau chi a nih loh laiin nang chu a duat em che hi. Midang hian rinhlelh ngaihna an hre lo mai mai zawk a, unau in ngaihven lem lo tak kan ni hi in vanneihpui ka ti dawn nge in vanduai ka ti zawk dawn?" a ti malh malh a, a nui pah kher lehnghal. 

"In inpawh alawm le..in khatah in la cheng ho vek a, chaw in ei rual deuh ziah bawk a" ka ti a, ka ngaihdan diktak a ni. 

"Nupui pasal neih hma a in khata chen ho chu mizote tih dan a nia, chaw ei rual hi chu ka pa duh dan. Pindan a tawm kan hrat a, inpawh deuh anga kan awm chang pawn inhlat rukna riau a awm tho. Pindan a inkhung tlat te hi mawi lo tak a ni. Inleng pawh kan neih ngai miah loh hi, kohhranah kan inhmang tlem a, ktp leh yma ah pawh member kan ni ve tawp a, kan inhmang tam lo. Mi chhiat ţhatah kan inlan tam lo hle bawk a, mahse ka nu thih khan mite ţhat zia leh tlawmngaih zia ka hmu a, miin chhiat an tawh chuan ka kal hram hram zel" a ti siam siam a, ţhatna lam hi chu thuhran a nia, chhiat han tawh chiah hian mizo nih nawmzia a lang ţhin. 

Hospital bulah a ding a, "Tlaiah chuan lokal ngei ngei rawh aw" a tih leh thlap hnuah min kalsan chauh. 

Zonuni ka thlen khalh ve mial a, mitthi kan nei aniang hospital tualah mipui an tlim hmur mai. Ka indahfel vel laiin Bl-a a rawn lang hlawl a, a kal hma ngai miah si lo. 

"Khatin phawk deuhin min en suh. Ka patea a boral a" a ti a, MLA vua leh vang a nih vang chiah anih chu mi an lo tam em em. Hetiang ho hi chuan lainattu leh sunpuitu an ngah ţhin reng a ni. 

"Message kha i seen reng a min reply duh lo" a ti bûr a, "Reply tlak anih nek loh kha" ka ti hmak.

"Zei deuh turah ka ngai che a, a lawmawm zawk daih lo mi?" a tih chuan "Nizan chu ka fapa ka paw rei lutuk a ka dar a na ţhum mai" ka lo ti daih a, a tum nghal hmuk a, hepa hi chuan min lèm der vel mai mai a ni. Zu inpui atan min duh a, ka taksa a duh bawk a, nuthlawi ka ni tih a hriat hnu ngat phei chuan min mutpui a chak lehzual. Min zuam nghal huam ni maiin ka hria. Min han mutpui chiah se la zawng, insawitheih nan min hmang ang a, min thlauhthla nghal hmak bawk ang. Hetiang ho hian alawm an mipat puite ti mualpho a nep tak anga lantir ţhin. Mipa pakhat lek tawn sual vang hian mipa zawng zawng rin loh vek a awl khawp mai. 

"Party chu...duh ve mai la, nuam i ti ngawt ang ka tih kha" a ti leh bui bui a, ka va han ning chiang tak. 

"Aw, kan kal dawn nia" ka tih chuan a mitmeng a nung nghal sar a, hlim hmel tak hian "Ka rawn lam ang che aw" a ti a, lu buk nghat pahin "Aw le, mahse ka fapa hruai a ngai dawn a, naupang tan a ninawm lutuk lo ang chu maw" ka ti a, min en run run a, a thinrim deuh niin ka hria. 

"Ka sawm tawh lo ang che" a ti hmak reng a, ka lawm zawng tak a ni. 

A kalsawn hnu lawkah Zonuni a rawn thleng a, a sam a buang vel thâng mai. 

"Eeeuu..sam thar nei kan awm elo?" nui rah rah chunga ka tih chuan "Kan inchung tuiek ka ziat khawk a, ka tat vel mai mai a nih hi" a ti a, intithei fein sam leng siau siau khawp a nasain lu a thing kual ta vel a nih chu. 

"Ka inhmeh em? Ka lang naupang sawt em?" ka beng bulah a rawn ti sa sa reng a, fakna thu ngai hlir pawh ka chhakchhuak tam na rawh e. 

"Bialpa i nei em?" ka ti chhuak phawng a, phawk fe a min en hnuah "Nei ţhin" a ti ban charh a, a sawi chak hran lo ni a ngaiin ka zawt zui lem lo. 

Mahse, "A hmel chu tuman ţha an ti lo ang, keipawn ţha ka ti bik lo" a ti a, damlo an rawnkal vangin a chawl leh lawk a, an kalsawn veleh "A fel a, ka fate min duatpui bawk a. I pasal hlui nen in inţhenna a rei tawh tho a tiin inneih pui a min sawm tut tut chang te a nei a, ani kha chuan min duh tak tak niin ka hria. Mahse, a chhungten min duh lo. Nuthlawi ka nih bakah fa pahnih ka nei tawh a, ani lah an fapa neihchhun ve liau liau a ni bawk si. Harsa ti viau mah ila kan inţhen ta nge nge a nih kha" a ti a, damlo rawn thlen hunlai a nia, an hming ziah thlak bakah zawhna chhan ngai nen, kan buai zui leh a. 

Zonuni nen hian mimal chungchang kan sawi dun ngai vak lova, inpawh viau siin kan mimal nun kan inzahsak a ni ber. Hlimawm lam lo hi chu inzawh vak chi a ni lova, Zonuni tak pawh hian "Thawnthu anga i sawi theih hunah min la hrilh dawn nia, inpeih zan hma a sawichhuah hi chuan nat nawn leh a awl ţhin a" a ti ţhin a, a pasal nen an inţhen dan a ţha zan bik lo tih ka hria a, chubak hriat ka nei bik lo. 

Ka awl chang apiangin Zonuni chu ka melh leh ralh ţhin a, min hmu fuh zeuh zeuh. Ka endan ang chiahin min lo en let ve ţhin. Zonuni chu insum thei lo zawkah ţangin a rawn nui chhuak a, "I duh duh min zawt rawh, min zawt chak anih kha, ka hre vek" ka dar a min rawn kuai dat chung hian a ti a, kei a zawh tur ber hre lo chuan "In inţhenna a rei tawh maw?" ka ti sa sa a, a sawi zo chiah sia. 

"Rei tawh e...i tawn mek a ni sia, a la reh hmak dawn bawk si lo. I rilru thar leh hlauin ka sawi duh lo a nih kha. Ka fa naupang zawk thla hnih vel lek anih laiin kan inţhen" a ti a, a fa naupang zawk hi tunah chuan kum4 a ni tawh. 

"A va zia lo ve aw" ka ti vang vang a, "Khatiang mi kha tu hmeichhia mahin an nei reng peih lovang. Kan inţhen hnu thla khat pawh a liam hmain an veng nula senior a luhkhung mawle" phawk fe a tih pahin a mitmeng bial kal chuan min rawn en a, "Kei ni zawk ta ila chu sawisel tu ka ngah viau ang. A unauten 'Zonunin a ţhen a, a khua a har lutuk a' an la ti zui a" a ti leh a, a nui pah hak bawk. 

"An la innei em?" ka tih chuan "A teeuuhh lo" a ti vak a, ka nuih a za angreng. 

"An inţhen hnuah love inphel phawk emoji kha i hre mai em? Kha kha min rawn thawn vel a, 'i chawh' ka lo ti" a tih chuan ka nui chhuak ta kar kar a,  nuthlawi phawk deuh, mipa hoin an lawm leh fiam peih deuh chi ang kha a niin ka hria. 

Kan buai zui leh ta daih a, vawiin chu ti ti tak takna hun a awm lo khawp mai. Zonuni meuh paw'n, "A mood a chen tak tak a har" a ti a, thu inzawm lo fe fe sawiin hnathawh pahin ti ti kan vawrh ve reng tho. 

"Eitur ka va lam lawk..kan sawi zawm leh dawn nia" kan ti ti kar lakah chuan ka ti a, Zonunin kawng min lo kian vatin counter aţang chuan ka chhuak a, counter pawh ka pelh hma a ka hming a min ko tu an awm takah chuan ka ding tawi leh rih a. 

Ka lam panin Malsawmi a rawn kal hmawk hmawk a, nurse thuam a inbel tawh lo. A thinrim hmel leh a mitmeng ling hlar te chu ka hmu hmaih bik lo. Eng nge thleng le ti a ka ngaihtuah lai mek chuan min rawn dinchilhin ka biang a thip nghal zawk a. 

"Mi ti ti ţha hle hle lai inben rik ngawt" ti hlakin Zonuni a rawn ding uaih a, ka biang dawmin Malsawmi chu ka melh ran a, ben let ve loh tumin ka insum nasa hle. Nghet zetin ka kut ka hum ruh a, ka phelh thawl chuan ka beng ve duh tak takin ka ring. 

"Tenawm nu" min la ti zui a, mi an tam si, tu hmai mah a zah ve ngai bawk si lo, hetiang thil a thlen hi a nia ka hlauh em em ţhin ni. 

CONT..