KA HRINGNUN THAWNTHU-8

KA HRINGNUN THAWNTHU-8

"Eng nge i duh?" pangai thei ang ber hian ka ti a, hospital lobby ah kan awm a, damlo doctor nghak ţhenkhat an la ţhu far bawk a, buaina chawh chhuahna hmun tur niin ka hre lo. Kei tal ka insum loh chuan kan mualpho lutuk ang. 

"Hmangaihsangan engkim a tih tawp vek nachhan hi nangmah tiraw? I rawn lan hma khan buaina kan nei lo. I rawn inlan thut a, engkim i rawn ti khawbaw zo vek" a ti piap piap a, thinrim luat vangin a aw te chu a khur der der a. 

"Engmah ka ti lo" ka ti ve ngial na a mitmeng tur zet a min melh khaiin za lo zetin a ţhen sak a, min ben leh mai hreh lo hmel a pu. Ka biang lah chu a sa hat hat a, a la thip vang vang mai. 

"U Neihkimi ka hrilh vek dawn" naupangchhia zet hian a ti a, Zonuni pawh a lo nui chhuak hak reng a ni. 

"An in a i chen ve hnu hian a zia a dang vek a, engti fakauin nge i lo thlem bik? Nuthlawi te te si zakthei lo lutuk mai" a ti khawl khawl a, a ţawng ring tawh lo nain min la en duh hlawm khawp mai. 

"Nuthlawi dinhmun hi a hniam tih ka hria. Mahse, i ngaih ang a sihhnip leh mipa lem kual hrat ka ni lo" ka tih lai chuan Malsawmi rawnkal na lam aţangin Hmangaihsanga a rawn phei ve mek a, a rawn um a ni zawk mah ang. 

Kan dinna zawn a rawn thlen rualin Malsawmi chuan "Ka rinhlelhna che u hi a dik ngei ang. Nuthlawi thar lam i rawn ngaihven a ni maw?" Hmangaihsanga melh chho hrak chung hian a lo ti a, a awki leh a ţawngkam chu a ngeiawm takzet a ni. 

Hmangaihsanga lah chu Malsawmi thusawi hre lo ang hmaka awmin ka hmai zawnah a rawn kunhniam a, ka biang ka hup beh tlat tawh loh vangin chik zetin ka biang chu a rawn en a, rawn khawih tum ni awm tak a a kut a rawn lek kan chhuah rual deuh thawin ka lo ben thlak sak. 

"Min khawih suh..ka hrilh lawk tawh che a ni lawm ni? Ka haw hlur tawh che" sehchilh zet a ka tih chuan rum chhuak nghutin a ding mar a, "Kut i thlak em ni?" aw ki hniam ruih a tiin Malsawmi chu a en run a, ani lah chuan huat hmel zetin min lo la en ngar ngar. 

"In haw rual ngun zia leh in awmdan dang te pawh ka hre vek. Kan inkarah a rawn tla zep a, min hlat phah tial tial a, ka beng na lo zawk ngawt alawm" zam lo zetin a ti a, hahthlak tih hmel zet a thaw chhuak hawkin Hmangaihsanga chuan "Buaina siamna hmun tur a ni lo" khauh deuh takin a ti a, kan doctor senior pakhat a rawn chhuah takah phei chuan "Min rawn zui teh" ti supin Malsawmi chu a tawk zauh a, a room lam panin a kal nghal nulh bawk.

"I duty hun a zo tawhin ka hre sia" kan doctor senior, Dr. Saia chuan a rawn ti a, Malsawmin pangchang taka "Pa" a lo tih chuan Zonuni ka melh nghal vut a, Pu Saia hi Malsawmi pa maw!

"Eng nge hetah i la tih reng?" a ti dam thluam a, thil thleng zo chiah a hriat ve lohna chuan min ti veng hawk thei. 

"Ka ding mai mai, Hmangaihsanga ka hmu lawk dawn a, ka haw har lo ang" a ti zat zat a, min rawn melh ralh a, hnehna chang a intih hmel hliah hliah. 

"Damlo en lai a nei tawh lo em ni? I ti buai lutuk ang e, hna leh mimal thil thliar hran thiam tur ka tih ţhin kha" a pa chuan a ti ta zek a, Malsawmi a meng rang nasa mai. 

"Eitur chu va la rawh..ka ril a ţam lutuk tawh" Zonuni chuan a ti ta hluai a, mi pafa titi ngaihthlak reng thu a awm lo reng a ni. 

Hospital huam chhunga restaurant rawn siam tu te hi an fel khawp a, aw, canteen pawh a tih theih ang chu. A neitunu nen phei chuan kan inhre ţha viau tawh. Mahse, thawktu hmeichhe pakhat hian min en duh thei riau a, Hmangaihsanga nen a kan chawlh luh ţum pawh khan mit tla lek loin min en. Eng teh ualah ka ngai ngai lo na a ka luh chang apianga ka chezia engkim chik zet a min en ţhin hian ngaih a ti ţha lo lek lek tawh. 

"Nu Sangpui, Chow leh sanpiau aw, alu chop nen" counter hma a din pahin kan ei duh zawng ka lam nghal a, kha tleirawl te bawk khan min lo en leh reng tawh. 

"Piani, chow leh sanpiau rawn pe rawh" Nu Sangpuiin a tih lang lang chuan chu tleirawl chu a che vat a, aw, Piani ngei hi alawm uluk deuh a min en ţhin tu chu. 

"Alu chop engzat nge?" ti a min zawh chuan "Pahnih" ka lo ti vat a, counter bul a chhuar chu hawngin alu chop chu sarang ah a khung a, plastic hman nasat ţhat loh zia hrechiang viau hlawm mah ila hmang lovin kan awm hleithei lo chu anih hi. 

"Kha aw" tih pahin Piani chuan ka thil chah min rawn pe a, min en zawk ringawt. A hnaiah chuan min en ţha ngam meuh ţhin lo, mipa chu nise min ngaizawng emaw ka ti ngei ngei ang. 

"Ngahnge maw nangmah a i nuih vur vur le?" Nu Sangpuiin a rawn tih nang nang takah chuan ka nui chhuak hak hak a, ka ngaihtuahna le lo lutuk vangin ka lo nuichhuak pek alawm mawle. 

"Ka nuichhuak tih pawh ka hre lo. Ka lawm lutuk aw Nu Sangpui" ka ti ţha leh vel a, eitur lak nan ber kan hman avang hian kan ba khawl a, sangkhat a tlinah te kan pe a, Nu Sangpuii pawn tlem te te a pek ai chuan a duh zawk mah. 

Ka eitur lak sa ţha deuh chu khaiin main door lam ka pan leh a, kawngkhar sir a security lo duty chuan "U Zote, beng let ve ta che" a lo ti a, hmeichhia a nia, min lo nuih ţha bawk. A lo hmu ve vek a nih dawn hi. 

"Ho mai mai" ti liam satliahin ka lut nghal daih a, a zahthlak hle mai. 

Reception counter chhehvel a ţhu te pawn min lo la en duh nangiang mai. Ka chhuah dawn khan rilru mumal lo deuhin ka kal mawp mawp a, tunah chuan ka zak chem chem tawh a ni. 

"Tui dawn vâwt vâwt ve...a sa ţha var mai bawk si" Zonunin a lo ti hlut a, ka thil khai lai chu min chhuh sawk sawkin a ţhet darh a, a ril a ţam hmel viau tawh tak mai. 

"Keichu ka thinchhia a, min beng tu chu awm ve se ka beng let ngei ngei ang" Zonunin a lo ti veleh a, "Hmun fal a awm kan nih loh hi" ka ti hlak a, thin chu a rim ve duh khawp mai. Chaldelh deuh a min ţawngkhum ţhin te hi huatawm tak chu a ni ve. 

"Taksa a nat zawk hian thin a sa phat ţhin a, inthunun a har ţhin. Tum lawk miah loh a naupang kutthlak mai te hi awl deuh asin. Min rawn beng ve se chu ka inthunun thei teuh lo" a ti a, ka eitur lak chu tui tih hmel deuhin a ei mial mial a. 

"I sawi ang chiah chuan ka awm ve tho. Mahse, lobby a awm kan nia, mi hrang hrangin min thlir ţhup a, beng let ve ila chu en nawm kan siam a ni mai. Hotute beng a thleng thuai ang a, buaina a tam mai mai. Mihring inthunun thei lo deuh te hian buaina an ngah bik ziah, buaina pakhat aţangin a dangah an inhnuk lut zel a" ka ti duah a, Malsawmi phei chu Pu Saia fanu a ni lehnghal. Pu Saia hi staff ho pawn ka pa ang mai a an zah a ni.

"Malsawmi kha Pu Saia fanu a ni tih ka hre miah lo" ka ti chhuak ta nge nge a. A thil ţhial lai a lem te te hnuah Zonuni chuan "Ni ve kir ker e mawle. Hei vang hi alawm a inlulin em em ni. Hmangaihsanga nen an lo inngaizawng khanglang bawk sia, hospital hi Malsawmi tan chuan nuam sing khaw a ni mai" elsen zet hian a ti a, a rawn thinrim tak tak chuan engmah a sawi ngam bik loh kha lê. 

"Ka thawh rei ve tawh nen ka va'n hre har tak aw" damlo lehkha ken lo dawn pah hian ka ti a, "I chut em alawm..suangtuahna ramah i cheng veng veng zel a, Bla pawn a rawn sawi tawh kha, 'Pu Saia fanu Malsawmi lah hi thinchhe si, a vin lutuk a a khuh bawrh bawrh alawm' a rawn tih nek kha" tiin kimchang deuh a min han hrilhfiah takah chuan ka hre ruai ruai thei. Chiang tak phei chuan ka hre chuang lo. 

"Min hmuh hlim hlawt aţang khan min ngaina lo nghal hrim hrim a, tunah lah Hmangaihsanga liau luau vangin min haw lehzual sauh a, nun an ti chep" ka tih chuan a lo nui ţhaw a, "I pasal i ţhen khan i khawhar loh hmel veh vawh sia, a hrehawm hle aniang ka lo tia. I pasal hlui kha i hmangaih tawh miau loh chuan bialpa neih a pawi miah lo. Nun an tihlim ve teh a nia aw, duh daih mai la" a lo la ti zui a!

"I va'n â tak aw..unau kan ni ka tih ziah kha. Chu bakah Malsawmi duh loh zawnga ka awm leh chuan Neihkimi a hrilh tawh ngei ngei ang. Tunah chuan Hmangaihsanga hian a la khap theih rih ka ring a, ka laka a rilru put dan hi ka pa'n hria se chu a khak duh ngei ngei ang" ka ti a, ka zep buai peih tawh lo. Sawi lo mah ila a hrethiam vek tho.

"Mi hran hlak fa an nia, i nu lah i nutei, nu anga i neih mai mai a nia, engahvak an ngaih ka ring lo. Fate ţulpui ţhak ţhin te hi an ngaihsanawm rualin mi puitling, pasal tlak tawn fuh chuan neih a pawi lo reng reng. Naupang hi nu leh pa uapna hnuaia seilen tluk a awm lo" a ti malh malh a, a thutak reuh phian bawk sia. 

"Aaa..Sangzuala hi haw viau mah ila ka hrereng dawn---" ka ti hman chiah tih chuan min lo pawt chatin "Hrereng ang chu, fa hial nei thei khawpin in mu dun thlawp thlawp tawh alawm" a ti deuh kher a, ka ang zuau chu min rawn en a, a nuih lah chu a za em em a.

"Ka sawi awmzia chu mipa hrim hrim hian min hneh theih ka ring tawh lo. Sangzuala ka la hmangaih e ka tihna a ni lo. Hmangaih miah lo a inhriat chang te ka nei hial zawk. Mahse, ka hlau a, tumah ka ring zo tawh lo. Ka kehchhe hneh tawh lutuk, tuman an remkhawm tak tak peih ka ring lo bawk" ka ti a, a tirah chuan min dimdawi hle ang a, hun a rei ang a, ka thinlung hi an tan hnawk sak a ni leh thuai ang. Ka kehchhe nawn leh a nih chuan thinlung ka neih ve theih tawh pawh ka ring lo. 

"Hlauhna hian thil ţha a thlen mawh khawp a nia. Mipain duhzawng, an thinlungin a thlan bik an neih tawh chuan neih ngei tumin an umzui reng ţhin. Hmanraw hrang hrang an hmang thiam viau lehnghal" a tih chuan "Kan en ang chu" ka ti hap a, Hmangaihsanga nun a intah luh ka tum mawlh lo a ni. Chutiang bawkin ka nun a lakluh pawh ka tum chuang lo. 

"Sangzuala hi i hmangaih tawh miah lo tiraw?" a ti nawn leh ngat a, "Aw..a tawp tawh a ni ber ang chu. Amah vangin ka kehchhe vek a, thinlung pek leh tur chuang ka nei tawh lo. Ka tuar a, ka dawh a, ka ngaidam a, ka rinawm a, mahse a thlawn mai a ni. Ka pek chhuah ang ka dawng let ve lova, hmangaihna hian tawp chin a lo nei ve a ni maithei, khawngaihna chu ka la nei a, hmangaihna ka nei tawh lo" ka ti dap dap a, a ngaithla uluk lutuk chuan nuih a ti za zawk. 

"Thinlung kehchhia hian tuam dam tu a mamawh ţhin. A chhe lai thawm ţha a, a hliam te tuam dam tu hi langsar deuhin a che ngai lo, ţawngkam thlum deuh deuh hmangin a tuam dam kher lo a. Anmahni kan hmuh ringawt pawn thinlung hi zawi zawiin a dam ve thei a, hnar tum viau mah ila thinlung hian a tuam dam tu a hria a, thinlung hi min thunun tu pakhat a ni bawk a" a ti nuaih a, ka dang leh der tawh. Chhan ngaihna ka hre lo chu ka lo nui tawp. 

Ka intiam angin tlaiah Ruattei bulah ka kawi a, nu valai pakhat a lo la awm. A mi chhawr lai ni awm tak pakhat a awm bawk a, kan chen ho rei leh tawh nen dawr hi ka la hmuh pui miah lo. Tun hi vawikhatna takmeuh a ni. 

"Lokal rawh U Zote, hei Nu Ctei lu hi kan su ang a a zo a ni mai. Min lo nghak lawk rawh aw. Keimah ngeiin ka khawihsak ang che" a lo ti siam siam a, Ruattei bul a awm hi chu a hahdamthlak a nia. 

Nghah pahin ka nu ka bia a, ka tlai tur thu ka hrilh chuan, "Buai ni veleh a tlai i tum a, Malsawmi te pafa in chaw an rawn ei dawn a, kan buai viau asin" a rawn ti nang nang a. 

"Ka lo haw nghal mai dawn mi?" ka tih chuan Ruattein min rawn melh zawk a, a mitmeng a eng emaw min zawh chuan phone ka kawk ringawt. 

"I thlen tawh chuan awm tlang law law rawh. Ruattei pawh kha hrilh la, reilo thei ang berin che rawh u" a rawn ti a, U Remremi leh Siampuii in au thawm ka hre zui a, an buai hmel viau tak tak mai. 

Phone ka dah rualin "Eng nge a? Bawiha a chesual em ni?" hlau hmel takin a lo ti a, "Teuh nang..Malsawmi te pafa in chaw an rawn ei dawn a, an buai deuh aniang" ka tih chuan "A ho emai..chaw rawn ei ngai lo pawh an ni lo. Mi pahnih chhum kep a ni mai alawm. Ropui deuh a dawnsawn an tum tlat zel a" a ti hlak hlak a, ţawngsual hlauin keichu ka ţhu ngawi hle hle. 

Nu Ctei zawk chuan "Tu te nge? In chhungte em ni?" a lo ti a, Ruattei ner nak chu ka lo hmu hman.

"Teuh lo mai..ka pa thawhpuite an nia, chaw an rawn ei dawn lah hian an sawi lawk loh ni a tam zawk a, kan tlai buai chung zel a, ka haw har lui ziah" a la ti hlak hlak a, Malsawmi te pafa chu a ngainat vak hmel loh. 

"An va â em em ve..chaw ei dawn chuan a hma ni aţanga in hriattir tur alawm. Chi liah tir lep lep ula a tawk mai lo mi?" tiin Nu Ctei chu a nui huau huau a, a nulianin a hmelţha vuah a, a inchei dan aţang chuan mi hausa nu tih a lang reng a.

Nu Ctei nen pawisa an inpe fel a, a kalchhuah hnuah hnathawk a a chhawr chu haw tirin "Nu Ctei kha a fel tawp. Customer regular a nia, ka khawih loh chu a duh lo, kan inkawmngeih lutuk" a ti zat zat a, nui deuh var var chunga min rawn enin darthlalang hlaipui hma a chair chu a kawk a, "Lo ţhu rawh le" a ti zui zat a. 

Ka ţhu fel chiah tihah "I landan thar ka hmuh chak rualin Hmangaihsanga hmel tur ka hmu chak zawk mah" a la ti zui a, a ti ti siam siam reng a, keiin ngawi rengin ka lo dawh a, ka lo zawm ve leh zeuh ţhin tih lohah chuan ka ţawng ve mang lo. 

Ka lu kan suk zawhah min chhem ro sak a, min set sak leh thlap bawk a, ka inhmu nalh ve reuh lutuk. Rawng êng lam hmang lovin dark brown a thlang a, nithlarah lo phei chuan a dum ang tho a ni. Mahse, rawng a neih ve takah chuan a lang nungin a tle ve ziar tawh a, ka hmai thlengin a ti êngin ka hria. 

"I hmai fang ka en hian rawng êng deuh, vul chuk ang kha i inhmeh loh zawk ka ring a, ka ring dik chiah anih hi" tiin lungawi hmel deuhin min han thlek a, rei tawk fang min en hnuah "I inhmeh lutuk tlat" a ti chhuak sep a, ti hi chuan sam ţawn reng a ngai tawh bik lo ang. 

"Pasal neih a nau pawm tak vanga in thlahdah kher tur tihna a ni lova, mizo chu kan inthlahdah zui tlangpui. In uluk sauh zawk tur. Intuai peih ila, inti nalh ve hliau hliau ila kan pasalte pawh an lungawi deuh ang" ti malh malh chungin a insiam a, ka sam hmawr tlem a cut a, chhuat a sam tla ka lo phiat fai ve thung.

Inchhung kan luh rualin chawhmeh rimin min zem nghal chiai chiai a, an lo inbuatsaih nasa a niang Siampuii thingpui no seng mek pawh a thlan a tla phang mai. 

"Inthlak ula Siampuii rawn pui rawh u. I pa leh i pa Saia te ţhiante tlawhin an kal chhuak a, an rawn haw chuan chaw ei an rawt nghal mai ang" ka nu'n a lo ti zung zung a, hmanhmawh lem lo takin Ruattei nen kan inzui chho a.

Kailawn tawp kan chuan chhuah chuan Hmangaihsanga leh Malsawmi te pindan aţangin an rawn chhuak ve chiah a, en loh theih ni hek lo; Hmangaihsanga nen chuan kan mit a intawng siah a, ka landan danglam chu a hre nghal tih a hriat. 

"Ruatte i lo haw chiah em ni? Sam kan la khawih hman mang si lova, nakinah i u hi ka rawn inhruai tir ang" meinei deuh a Malsawmin a tih lai te chuan Hmangaihsanga mit chu keimahah chiah a la fu run reng. 

'Eng nge?' tih melh a ka melh takah chuan nui sukin hnuai lam a bih a, "Tunlai chu keipawh ka buai ve lutuk, min hrilh lawk lo chuan lokal tawp suh aw" Ruattei chuan a ti ve ngat a, Malsawmi nui chu a lem nghal riauin ka hria. 

"Aw..kan lo hrilh ang che. Hmangaihsanga hman hun te pawh a ngai ang a" tiin Malsawmi chuan Hmangaihsanga banah a kuah bet tlat a, a uai ti ila ka hmuh dan nen a inmil zawk mah. 

"Ka pa te pawh an lo thleng ţep ang. Chaw rawn ei tum sa kan ni lova, ka pa kha chaw rawn ei puiah ka sawm tlat a" tih pahin min rawn melh kher a, Ruattei awm laia kal daih bik ka duh chiah si lo, ka hmu hne takzet a ni. 

"Lo sawi lawk ziah rawh u, chawhmeh tui hnai deuh in duh phei chuan kan chhungkua min hrem a ni ringawt. Kan buai phah chung zel" nui hak hak chung hian Ruattei chuan a ti leh a, a tak ru viau thung. 

"Inthlak ang U Zote, Siampuii a khawngaihthlak" Ruattei vêkin a tih takah chuan pindan ah kan lut ve ta nge nge a, Hmangaihsanga te hmu pha lo a kan awm chu ka hahdam huaiin ka hria.

"Kan Malsawmi zia tak hi chu a, a la naupang alawm an ti mai zel a, tiang em em hian naupang rilru a chhe ngai lo" khumah bag a thleh thla a, jacket a hlip nghal bawk a, ka pindanah hian eng nge a tih ve reng le?

"Inthlak i tum ngawt ang e, ka pindan zawk anih hi" ka tih chuan a meng awk a, pindan chhung chu thlek kual vutin a nui zui uar uar mai. 

"Ka hai chiang lutuk. Malsawmi vang vek" a'n ti kher a(h). 

Ruattei nen bawk a inthurualin inhnuaiah kan chhuk a, choka ah kan lut tlang nghal daih. A lo la hnawk rem rum a, dawhkanah thlai a lo inchhawp chhuak hnur bawk.

Ding chunga thlai ka chan mawlh mawlh lai chuan Hmangaihsanga rawn lutin keimah bawk chu min rawn pan ding nghal chat a, ka hnungah rawn dingin a thaw lum ham ham te chu ka hre thei a, "I va nalh ve" ka beng zawnah a rawn ti zawi sup a, midangin min hmuh ka hlauh lutuk vang nge ka thinphu a rang kher mai. 

"A ţhat chu. Kalsawn rawh" ka tih hmakna chu ngai pawimawh lo zetin a nui nghawr dawt a, min din hnaih takzet a ni. 

"I danglamna hre lo turah min ngai suh" thum ruih a a tih chuan ka thinphu dut dut chu a zawih ve deuh theih takin tiin ka thaw lo chhin vel a, awmzia a awm hlek lo. 

Neihkimi a rawn luh ve takah chuan min din hlat nghalin "Chan sin lutuk lo la, tui deuhin siam rawh aw che phelh phung nu" min ti leh zuk zuk tawh a, ka chawhmeh chan lai endik ni awm takin dawhkan a kal hual a, a chhuak ve ta nge nge e. 

Pu Saia chu ka pa ang maia pa dam thlup chi a nia, sawiselna tur a awm lo. Malsawmi chu a pa bul a ţhuin a ti ti zat zat reng a, chhung inkhawm neih dawn meuh chuan Krismas hman dan tur thlengin a sawi tawh. Pafa inchhun lo tak an ni phawt mai. 

Chaw ei lai lahin Hmangaihsanga chu chawhmeh a suah sak vel a, in neitu zawk ni awm a mawi a ni. Bawiha lah chu chaw ei neih tlai berkherin a awm ţha duh lova, nau pawm chunga chaw ei hi ngaiah ka nei thei ţhak lo. 

Ka chaw thleng a lo ban buai sek takah chuan Malsawmin "Sitting room ah va dah rih la, amah pawn a awm thei tho ang chu. Kha, Ruattei chaw thleng a a ham buak ţeuh tawh kha" a ti hlak hlak a, a ner pah nang nang a, kei chauh ni lo ka fa thlengin a melh tur viau tawh. Ruattei hi ka bulah a ţhu ziah tawh a, tun ţumah pawh Bawiha hian a va khawih buai tel reng bawk lah tak a. 

Chhang lovin ka nuih liam san mai a, a duhtawk tawh emaw ka tih hnuah "Fa ka neih ve hunah chuan kum an tlin hma aţangin ka zirtir ang. Anmahniin ţhut hran tir nalh ila, min tibuai rei teuh lo mai" a ti leh kher a, Ruattei a lo ding hluai mai. 

"Khawi U Zote Bawiha kha ka lo awm rih ang. I eikham hunah ka ei ţha leh zawk mai ang" tih leh Bawiha lak a rual a, dan hman pawh a ni lo. Tui dehna lamah kalpui thuaiin kut a sil pah chuan kan bowl hman balh ho chu a ri tel rawk rawk a, an ngawi ţhiap a, Siampuii phei chuan ka mal a rawn kheuh zeuh nghe nghe. 

"Chaw ei lai hi chuan naupangin nuam an ti ber zel a, nute tibuai ngai lo an vang khawp a nia" Pu Saia chuan a lo ti dam thlup a, za lo deuhin ka nui ringawt. 

Ka inthiam lo chu ka kham thuai a, ka ei puar pawhin ka hre lo. Ruattei inrawlh a ngaih hma khan lo thawh pui daih ila engkim a fel ni mai tur. Ka pa'n ei rual kher a ti ţhin si a, naupang vang a thawh bik daih ka hreh vang a ni. 

"Va ei leh rawh ka lo la tawh ang" tih pah a Bawiha ka ban chuan "I puar em?" min lo ti a, "Puar lutuk ringawt. Chawhmeh a tam lutuk a, ei pawh ka ei seng lo" zangkhai thei tur ang ber hian ka ti a, Bawiha lah chu inchhung boruak hrethiam ve hek lo, a hlim em em ringawt a. 

"Zakthei lo ka tihna a rei tawh lutuk. Hmangaihsanga nen an inngaihzawn tirh pawn ţhen lehnghal turin ka hrilh. Mahse a hmelţha ve em a, a pian lah a nalh zek. Ka thu awih lovin a kawp lui a, tunah lah a ning leh hle si. Nichin a a ţawng duh dan te kha ka haw lutuk. A in emaw a ti tawh anih hi" a ti hlak hlak a, a awki erawh a zawi khawp mai. 

"Enliam mai mai rawh, chaw an rawn ei zawk ringawt chauh alawm" ka ti na a Malsawmi hi ka haw tial tial. Huat loh ka tum viau a, ka huat theih dan tur tawk lek a chet leh ţawngkam neih a hrat a, ka huat a duh ve hrim hrim emaw tih tur a ni. Min tih thinrim tum ran te pawh a ang ţhin. Chupawh Hmangaihsanga te in a ka awm ve vang chauhin a ni lehnghal. 

"Rawn ei lo tawp mah se pawi ka ti lo" ti hlarin chaw ei tur chuan a phei leh a, Bawiha chu cycle a ţhuttirin pawnah ka nawrchhuak ta daih. Tumah an rawn inlan lova, chu chu ka duh dan zawk a ni.

Boruak a nuamin tualzawl a ka nawr kual chuan nuam a ti ve hle a, ka fapa nui ri chu ka bengah chuan music mawi tak ang a ni. 

"Ruattei kha i fuih pawrh a ni maw?" ka lo chek tlak. A thu lak dan leh sawi duh zawng te hi a naupangchhia thei sia aw. 

"I va eikham hma ve" ka ti satliah a, Malsawmi be chungin Bawiha ringawt ka en thung. 

"In nufa in mood in ti chhe vek a chaw ei a tui hleinem" a ti bak hlar a, "A va pawi ve" ka ti leh tawp.

"Tikhan min chhang suh" a ti ram hmak a, thinrimna hi thunun a har a, ka puah chhuah ve loh nan Bawiha tricycle hnung a vawn tur awm chu nghet zetin ka hum ngawt ngawt a, ka inpet ruh nasa hle bawk. 

"Min tibuai lovin i awm thei thlawt lo em ni?" ka tih chuan "Chu chu ka zawhna tur ni awm zawk tak a ni" a ti a, min rawn din hnaih a, rum zet a min melhna mitah chuan zamna reng reng ka hmu lo. 

"Ka pasal tur lo lem kual velin a rilru i hruai peng a, ka hnaih a awm reng ţhin kha i hnuk hla a, inţhen duh hial khawpin i siam. Hmangaihsanga min ngenna angin midang ka la hrilh lovang, mahse a danglamna ka hmuh leh vaih chuan ka hrilh vek ang" a ti khar khar a, a bialpa ngaihzawnna eih nei lo pawh hetiang hian min ti duh chu a nia le(h)! A hmelţhat tehlul nen, amah duh lo tu zar buai a phi chung reng tur a ni lo asin mawle. 

Hmangaihsanga chu ka hel zak zak reng a, min biak a tum ni a ka hriat veleh midang biak tur ka zawng a, phone hman der chang lah ka ngah. Ka hmang der tih a hriat ka hlauh deuh leh Thantei leh Lawmkima te ka biak chhawk a, zan mut hnuah ka chhuak leh tawh ngai lova, kan intawh fuh changin ka hmu lo der ţhin. 

Malsawmi a rawnkal zeuh zeuh a, a lo ngaihven chiam ngai lem lo. Krismas a hnaih viau takah chuan Hmangaihsanga chu ka pa'n "I pu in a ngai si che a, Krismas hmanpui la a ţha ang. Nikhatah vawi sarih lai te min rawn call in an khua a zin leh tur a nawr tur chein min hrilh ţhin a, luikal turin ka damţha tawh te a rawn tih kha. A chang leh sa chanpuiah ka duh te a tia, engmah ti thei tawh lo mah se i kal duh nan nuam i tih tur zawng a hriat apiang a rawn sawi a, a khawngaihthlak emai" tiin a hrilh a, a pu thusawi ka pa'n a hrilh chhawn meuh chuan a nuih a za viau mai. 

"Malsawmi tello a kal i hreh leh i hruai ve ang a, ti ila a chawl thei ngut ange maw" a tih belh leh a, Hmangaihsanga chuan a chhang lo na a hruai a tum hmel chuang lo. Min rawn en rual rualin ka hawi san a, a hmel hmu miah lo mah ila min nuih tlat a ka hriat chu le!

Pumpelh ka duh a, kan cheng ho bawk si. Ka danglamna ka hriat miah loh laiin danglamah min ngai tlat a, nupui nei turin ka duh a, anin min neih a duh thung. Engkim hi a inpersan vel vek. 

"Ka pu bula krismas hman chu ka tum sa a ni. Malsawmi tel lovin" a ti nghut a, ka lawm ru kher mai. 

Malsawmi hruai a tum loh vang a ni lo. Krismas chhung a awm dawn loh avang zawkin. 

A kal dawn zan chuan min biak fal a tum viau na a ka nu bul a ka awm loh leh U Remremi ka inchei tir a, ani lah a phur, Hmangaihsanga a mut meuh chuan makeup in ka hmai a ti chhah bur tawh. 

Huiham, hmai ka phih fai hleithei lo. Face wash tam tlerh tlurh nen a rei ngial ka tuai hnuah darthlalangah a fai leh fai loh ka en ta ţhin a, ka hlauhawm tulh tulh emaw tih mai tur a ni. Makeup remover ka lo hmang mai lo a ni te ka ti rilru a, ka hmai chu a thang tlat a, ka hiat tâwk tâwk phal bik bawk si lo, mut hma ka duh vei nen ka inphih harh vek. 

Hmai ka hruk ro hnuah bathroom kawngkhar ka nam hawng rawp a, eng emaw a tauh bawp. Thawm a chhuah zui lova, bathroom bul a ţhatchhe zet a lo ding Hmangaihsanga chuan na ti hmel pawh a pu lo. 

"I mu daih tawh maw tia?" ka ti hluai a, 'ka bum che' ti ni awm fahrana min enin nuih suk pahin mithmul a lo kan ralh a, "Mu ta che" ti liam puat a kal nghal mai ka tum chu rawn che phutin min dinchilh leh ran tawh. 

Inhmatawnin kan ding a, tumah dang an awm ve lo. Tlanchhiat theih a ni lova, pumpelh theih a ni tawh lo tihna. 

"Engtia rei nge tlanchhiat i tum?" tiin chhanna beisei zetin min zawt a, chuti chung chuan a awki a ti nem lui thei chuang lo. 

"Ka tlanchhe lo reng reng. Inah ka awm reng alawm" ka tih chuan za lo deuhin a ţhen sak a, tunah tak chuan Bawiha tal ţap vak vak se ka ti. 

"I inbum mai mai a ni" a ti sup a, chu chu ka pawm loh zawng tak a ni. Ţha ka tih danin hmalam panin ka kal reng zawk. 

"I hun i khawhral mai mai a ni" ka lo ti ve vat. 

"Engpawh ti ila hun chu a ral zel dawn" a ti a, ka dang leh der tawh. Amah vek chuan "A thlawn a a ral loh chuan a ţha ni mai" a ti leh a, tifuh inti deuhin a la kiai suk zui a. 'Thlawn' ka lo sawi tel lo pek a ni maw? 

"Ka kal" tih leh kal ka rual a, min umzui miah lo. Min auh din a tum lova, min chelh luih a tum lo. Min duh viau anga insawi si min nawr tut tut lo te hi a mak ve riauna lai a ni. 

Zingah lah chuan hma deuha chhuah a duh tlat a, en liam tumin ka nu leh pate pawh tual zawlah an ding vang tawh a, bag nen a a rawn chhuk thlak chuan sofa aţangin Bawiha ka lo pawm kang ve mek a, "Lokal teh" hmui phun a tih pah a a kut a min hui chuan mamawh a nei anih ringin ka kal ve mai. 

"Thil hrilh tur che ka nei" a awmna sawn miah lova a tih chuan ka pan hnai a, pawn aţanga langthei lo chinah a ding tlat. 

"I beng lo dawh hnai teh" kher kher chuan a. 

"Beng ka dawh phak lo" ka tih chuan min lo nuih hawkin a rawn kun hniam a, "Nangmah vang anih hi" tih chiah a sawi. 

Phawk deuh a ka en lai chuan "Min thlah hman loh ka hlau" a ti then a, "Ka thlah ve theih nan che hna ka kal hma a chhuah hman i tum maw?" ka ti hluai a, dar a kan uk a, min chhaih kual vel hi nuam a ti thar riau. 

"Bawihte bye bye aw" car chhunga a ţhut luh tawh hnuah a rawn dak chhuak a, Bawiha bia ang deuh a awm siin keimah min melh daih. 

"Bye bye ti ve la" awmze nei zet hian Ruattei chuan a ti vel a, hemite unau hian min ti â zo vek dawn. 

"Ka ngai ngawt ang che Bawihte" a tih te chu hrethiam kan tlem viau ang. Neihkimi leh Zamtei te an la tho lova, midang chu kan kim ţhap. A tlan liam thlengin kan thlir a, boruak a veng hawk tur a ka ngaih laiin boruak mak deuh a hnutchhiah hram. 

Chen ho reng na na na chuan pakhat awm lo pawh a hriat ţhin a, inah awm khat viau mahse a kal chiah chuan inchhung a ruak ve huai mai. 

"Kumtharah chiah a lo haw tawh dawn sia aw..le le" Ruattei rawn phun sa sa chu ka melh nghek a, eng he hu a ngai lovin min nuih liam vel mai mai. 

"Bawihte i khua a har huai em?" tiin Bawiha a lawm a, hre lo ang hmiah a awmin Siampuii ka pui mawp mawp a. 

Ruattei nen hian kan inngaina takzet tawh a, unau diktak kan nih lohna a lang ngai lo. Ka ţhianţhaber a ni tel bawk a, Pathian min pekah ka ngai ţhin. 

A ngai tein hna ka kal leh a, hospital boruak pawh chu nidang ang a ni lo ten ka hria a, kei hi eng nge maw ka hriat ni? 

"A zin ta em?" Zonuni lah hian nitin a chanchin min zawt a, a chaw tui ber a tih theih hial ang chu. 

"Zin ta e..zingkarah a chhuak" ka tih chuan "A zinsan vang che a thinchhiat kher a ngai hleinem" a la ti tak deuh deuh a, kan luh chhuah tamna ber kawngka lam chu enin "Awii..sawpa saw" a ti deuh hluai a, a melhna lam chu en tumin ka inher thuai.

"Tu ber saw? Hmelhriat i hmu em ni?" ka tih chuan "Kumtharah a rawn ţan chauh dawn emaw ka tia, kan veng tlangval a nia, kan doctor thar tur" a ti a, tu ber nge a sawi pawh ka hriat hmain "Lalrawngbawl" a ti tuarh a, a ring ţha leng lawng viau a ni. 

Mi pakhat hi kan lam panin a rawnkal a, chupa chuan mizo mipa hi an lo sang ve tawh e tih te min ngaihtuah tir a, "Kumthar ah ka rawn zawm chauh ang i ti emaw ka tia" kan hmazawn a rawn thlen rualin Zonunin a lo ti hluai a, inhre ţha tak an ni ngei ang.  

"Kumthar ni e..ka nu ka rawn hruai lawk a" a ti a, min en duh lutuk chuan awm a ti nuam lo lek lek a ni. 

"Ka hriat hnu i ang" a ti chiah reng a, uluk deuhin min en a, nui rah rah chungin ka lo en let a, a inzuah buk ve lova, chu chuan a khabe phir chu a ti langsar lehzual. 

"A thawhna a rei ve tawh alawm ti ila i rawnkal ngai mang bawk si lova, Zotei anih hi Zoliansangi" Zonunin a lo tih chuan inngaihtuah muk tak hmel a pu a, min hria anih paw'n a hming leh hmel ringawt aţang hi chuan tu nge a nih ka hre ve hauh lo. 

"Govt. ah i lut ţhin em? Govt. Mizo Higher Secondary School ah" a tih chuan "Lut ţhin e" ka ti mai a. 

"Min la hria em?" 

CONT...