KA HRINGNUN THAWNTHU-9

KA HRINGNUN THAWNTHU-9

"Ka hria che em?" ka ti ve thung a, Lalrawngbawla tih hmingpu hmelhriat ka neih awm ka hre tlat lo. 

"Section khatah kan awm ţhin. Mahse, pawl-10 ah chiah. Pawl-11 ah khan science ka la daih a, ka hria che keichuan" a ti a, ka ngaihtuah chhuak ve thei lo. 

"A hmel hi copy la, i thluakah han paste leh la, eng emaw hriatchhuah i nei thei mai ang" Zonunin a lo ti a, ka hrechhuak zo si lo chuan lu ka thing mawl tawp a. 

"Min va hrerei zawk ve" ka ti ta daih a, "Chhinchhiah bikna che ka nei a" a tih chuan mitmei a sawizel tur a hrilhin ka thlek deuh ha a. 

"Pheikhawk min leisak tawh kha..i chhun chaw min pe ve ţhin bawk a, ka zawng ru reng ţhin che a sin" a tih chuan ka var kuar mai. 

"Rpa maw i nih? Khaw nge i tarmit?" ka ti hluai a, ka ding zawt ni mai hian ka hria. 

"Ni e..i danglam deuh tawh nain hai theih i ni lo. In veng ni a i sawiah ka kal fo a, tuman an hre bawk si lo che a" a ti a, a kut min rawn pek chu ka lo vuan vat a, kan inchibai lâwp lâwp a. 

"Engtin nge a nih theih? Doctor i ni tawh a maw?" mak ka tih zia chu ka awki sang zetah chuan a lang chhuak ngei ang. Tarmit a lo vuah tawh lova, a thau tawh lo bawk nen, mi thar hlak ang mai alawm a nih le!

"Ni ve tawh e..ka nu ka va ngaihven lawk ang a chhun chaw ei dun ang aw..ka treat ang che" min kawh zeuh rual chuan mit a siai pah zauh a, kan Rpa kha a ni tawh lo reng reng. 

"Zonun, in vengah maw an awm?" ka ti ţha leh a, ţhut ţhat pahin ka ţhiannu kut chu ka vuan chawt a. 

"Ni e, nau anga ka en a nia. Kan in piah lawkah mi in luahin an awm. A fel teh a nia" a ti a, kan school kal lai vel min zawt lo chu ka lawm kher mai. 

A sawi angin chhunah a lokal leh a, Zonuni phalna thlapin Nu Sangpuii te dawr lamah kan inzui phei a, rei lo turin min chah lawk thlap a. Krismas a hnai tawh a, hun dang angin kan buai vak lo hlauh zawk a ni. 

Restaurant chhung a kan luh rualin Nu Sangpuii pek chuan "Zotei chu a va nuam awm ve" a lo ti teh ngawt a, a mitmengin min chhaih pah ralh ralh a, Piani pawn min lo enduh lehpek khawp e. 

Eitur kan chahfel hnuah "Pasal i nei tawh em?" a ti chhuak thawr a, ka nuih chhuah tak hakah chuan mit ti zim deuh sunin min en a, "Ka nei tawh lo zawk" ka ti a, min zawh thui ka hlau ru viau a ni. 

"Pasal i va duh hma ve" min ti ta zek a, min zawt zui lem lovin "Ka zawng ru reng ţhin che a" a ti nawn leh a, a mitmeng chu a takin dawt a sawi lo tih a hriat.

"Engatinge min zawn?" ka tih chuan "Ka retheih lai a min ţanpui tu i nia, damchhungin ka hrereng ang che" min ti a, chu chuan rilru a kir tir lo thei lo a ni. 

Pawl sawm kan zirlai khan keipawh ka rethei ve em em a, ka nu nen hian in tereuhte luahin kan awm ve ţhin. Rb-a hi school ah nitin ka hmu ţhin a, ţhian a kawm ngai lo. A chum buang zel a, tarmit a vuah ţhin bawk. Chhun chawlhah te hian pawn chhuak lovin lehkhabu a bih ngar zel a, tuman an tibuai ngai lova, han kawm nel tum tu lah an awm lo. 

Vawikhat chu ţhianho a kan awmkhawm laih laiin a rawn chhuak ve a, kan zawn a rawn thlen veleh kan ţhian pakhat hian "Rp-a pheikhawk saw en teh u" a ti sa sa a, hrilh nawn kan ngai lo chiang kher mai. A danglam deuh bik a nih ringin kan en a, a kal chak viau na a a pheikhawk chhip pawp kha chiang takin ka lo hmu hman. Liberty a bun a, pakhat chiah a pawp lo, a khing hnih a a pawp ka hmuh khan ka khawngaih tlat a, ţhiante an nuih liam mai mai laiin ka rilruah a châm zui ta reng a. 

Ka nu'n pawisa min pai tir hian bus fare bak chu ka khawl ţhin a, khawl bawm ka hai rawk rawk phah reng a ni. Min hmuh hlau deuhin nitin a pheikhawk ka en a, a hmawr pawp hlir a bun. Thil dang sawipui pahin a pheikhawk size ka zawt phawng mai a, khami ţum khan rang tawk a a ke a thukru lai ka hmu a, ka khawngaihna kha a zual sauh a ni. 

Min hrilh duh miau loh vangin amah va kawm pangai anga awmin a rukin ka pheikhawk nen ka teh ru a, ka rin lei tawp. Ka pawisa khawl sa zawng zawng ka hmang zo vek reng a ni. 

Ka pek ţum khan a thin a rim viau a, ka hmusitah a ngai a ni. Mahse, kan retheih ve tho zia leh a puihna mamawh ve thei reng ka nih zia te hrilhin ka veh thlem a, rei ngial ka hnawn hnuah a la ve chauh a. 

Pheikhawk thar kha a rawn bun mai duh lo lehnghal a, a rilru tur hriatthiampuiin a bun hun tur ka nghak tawp. Nikhat chu ka dar a min rawn kheuh zeuh pahin lehkhate min pe a, ka lak rual rualin a tlanchhe zui lehnghal a. Ka enzui na lamah a pheikhawk ka hmu fuh a, ka leisak ngei kha a bun vang mai. Lehkha themah lah chuan [Ka lawm e aw. Ka thawl deuh a. A chhiat vek hma chu ka bun ngei ang] tih hi a lo ziak a, ka chhiar nui ver ver tih te nen lam ka hrechhuak leh vek nia mawle!

Ţum khat chu tiffin box nen Rb-a ţhutna lamah ka phei a, min hmuh rualin a tiffin a lo chhin thuai thuai a. Eidun pui a ka sawm takah chuan hreh deuhin a hawng leh riai riai a, "Chawhmeh ka ei zo tawh a" a ti nain chawhmeh dahna bik tur lai kha a faiin a hil vek a, engmah a awm lo tih a hriat. Chawhmeh tel lovin chaw hlang chiah a pai ţhin tih te nen lam ka hriat belh zel a, midang hriat loh turin chawhmeh ka pe ru zui fo. 

Rb-a nen a kan hun hman dun dan zawng zawng te kha ka hre kilh kelh tawh lova, chutih rualin pheikhawk leh chawhmeh inpek vel lai chu chiang takin ka la hria. Pawl-11 kan zir hnu khan kan inhmu leh ngai ta mang lova, pawl-12 kan nih phei chuan Rb-a ka ngaihven tawh lo. Kan kal hrang a, tihian kan inhmu leh nawlh a, khawvel hi a lo zim takzet a ni. Tuman eng he hu a an ngaih loh, pheikhawk pawp a bun avanga an nuihzat, chawhmeh pai tur pawh nei ngai lo kha tunah chuan doctor a ni ta! Hringnun tak hi chu aw. Kan inbuan a, kan inleh thal tawn zak zak a, kan inkal thelh a, kan inlehpel zung zung mai a nih hi. 

"Ka sawi i hria em?" ka hmaizawn a kut a rawn vai chuan ka inthing harh a, suangtuahna ramah ka lo cheng leh veng veng tawh chu niin. 

"Tihpalh lutuk, eng nge i sawi?" ka tih chuan min lo nuih sukin "Eng nge i ngaihtuah vung vung?" tiin min zawt let a, dar ka lo chhin ak ringawt. 

"Pasal i neih vang em ni in veng ni a i sawi ţhinah khan hmuh tur i awm loh? Zote, MBBS ka zawh hlim a Mizoram ka rawn chuan chhuah leh khan hmu tur chein ka lokal vang vang asin. Nang lah chu hmuh tur i awm mang si lo" a ti a, engin nge ka rilru ti no ka hre bik lo, ka mittui a tla ringawt nia! Ţanpui a ngaih lai khan ţanpui lo ila chu a hlawhtlinna ţawmpui turin min rawn zawng hauh lovang. 

"Eheu...i ţap elo?" mangang zet a a tih rualin ka kun nghal a, nui ri hak hak chungin ka mittui ka hru a, a tawp hleithei der lo thung. 

"Ka vel che a ni maw?" tiin a nui hul hak a, lu ka thing nawk nawk a, ka dah chhuah rual chuan ka insut hraih a. 

"I va danglam tawh ve..ka hre reng reng hleinem che" pangai thei ang ber a ţawng ka tum ve a ni. 

"Ka thau kha san lamah a kal a, hei a insem rual vek tawh" a ti fiamthu a, Piani bowl rawn ken a lo ban pah bawk. 

"Nang chu i thleng sang tawh bik hle mai" ka ti ta ngawt a. 

"Duh angin a zir theih loh a nih hi. MBBS ka zo hram a, private hospital ah ka inhlawh kual ang a, nakinah ka la zir zawm leh thei mai ang" a ti a, a duh ang a la thleng chiah lo a nih hmel. 

"I nu leh pa an dam em? Tunah chuan an nuam sa ve tawh ang chu tiraw? E...i nu i rawn hruai tak e tiraw kha?" nawi nuaih a ka tih chuan "Ka pa chu pawl-9 ka zir kumin a boral a" a ti daih a. Chhungkaw lam kan inhriatpui miah lova, ka zawt laklawh tawh si, a zahthlak duh angreng.

"A va zia lo ve aw...engtin nge i zir zui zel?" tiin thudangah ka luhpui a, "Sawi hrehawm deuh te a awm chuan ka ngaithla duh kher chuang lo" ka tih zawm zat a. 

"Awm love, kan vengah sumdawng hausa deuh an awm a, an insak na a ka inhlawh ţumin an pa'n min koin zirna lam min sawipui a, ka zir zawm zel theih chhan an ni. Pathian ram pek aiah keimah min chawm a" a tih chuan "An van ti ţha em em" ka ti hluai a, doctor an chher chhuak der alawm.

"Zote, pasal i ţhen tawh tihna em ni?" chik deuh a min en pah a a tih chuan ka bu nghat a, insit a na duh ngei mai. 

"Fa i nei tawh em?" 

"Pakhat ka nei tawh. Kum1 a pel ve tawh lehnghal a" zangkhai thei ang ber tur a ka tih chuan "Khawiah nge in awm tak?" a ti a, zawhna a ngah ngei mai. Kan veng awmna leh ka pa hming ka sawi chuan thil awmdan a hrethiam mai turah ka ngai. 

"Ka la rawn tlawh ang che. Vawikhat tal ka rawnkal loh chuan i bo leh daih palh ang" a ti a, "School khat a kan luh lai te khan rawnkal daih tawh tur ni zawk awm tak i ni" ka lo ti ve rah rah a, "Aa..khang hunlai kha chu nula rim rual kan la ni lova" a ti ban charh a, fiamthu mah nise ka ngawihsan ta daih a. 

"Tam deuh ei rawh aw...tun ţum chu keiman ka chawi vek ang" a ti hlut a, ka hmui ti chein lu ka bu zeuh a, "I fapa chu a kal thei tawh em? Kan inhmuh lohna a rei tawh a, zawhna ka ngah lo zawk ngawt alawm" tiin a intlawh khalh nghal zung zung a, mittui tling deuh parin ka lo nui ve hak hak mai bawk a. 

"Kal ve chhet chhet thei tawh e, a la nghet lutuk lova, Pathian zarah a hrisel ţhain a damlo ngai mang lova, hritlan ve zeuh chang chu a nei, chuti tih lohah chuan buaipui a ngai mang lo" ka ti deuh duah a, ka nu'n min chhawk hneh a, ka hahdam ve tawh takzet a ni. 

"A va lawmawm ve aw..naupang an hrisel chuan nu leh pa tan a hahdamthlak a ni mai" a tih chuan a thusawi nen a inzawm loh deuhin, "Ka lawmpui che e..doctor i ni thei hi ka lawm lutuk ringawt. Min la hrereng hi ka lawm bawk a, ka lawm vel vek a ni mai" ka ti ţha leh a, school a pheikhawk bun tur ţha pawh nei ngai lovin nihna ropui tak a nei ta hi ka lawm a ni. 

"Min lawmpui ber tu tur i ni tih ka hria, chuvang a rawn zawng che chu ka ni. Ka tan a i thil tih kha englai mahin ka theihnghilh ngai lova, ka hriatnaah hian i châm reng tawh ang" a ti duah a, a thutakin a ţawng liam satliah lo tih a lang reng mai. 

"Hriatreng zui tlak khawp a thil ţha tih ka nei lo. Ka thil tih ho te ah i lawm thiam a, chu zawng chu a ni mai" ka ti a, sawi zui ka duh loh zia ka awki ah a hriatthiam ka ring. 

"Mipa lam khan an sawi nasa ţhin che a sin aw" a ti ta daih reng a, "A awihawm loh e..tu khaw khain min hre lovang. Ţhian ka kawm zau bik vak hleinem" ka tih pawhin, "Sawi nasa ţhin e...class hran a kan awm hnuah pawh i hming an sawi ka hre ţhin. Zotei an ti reng zel a, an ralkhat ngaihzawn fur chein ka hria" phur zet hian a ti a, ka nuih a zat viau rualin lung te pawh a leng rum rum mai dawn alawm mawle. 

"Ka hriat ve miah lohin ngaizawngtu ka lo ngah viau a ni maw?" nuih hak hak pah a ka tih chuan "Ngah tehreng e..arts lamah khan hel tu che an awm nual kan ring a, hnawl nih ai chuan ralkhat aţanga thlir tu ni mai ang kan tia. Êé....duh la chu min kawp ruih thei ang" a ti vel a, ka awih lo lutuk chu mittui tla zo chiah e ti lovin ka nui vak vak a, kan thawm pawh a ring sâwt viau mai. 

"Dawt sawi te nen lam i zirchhuak a nih hi mawle" ka ti a, school a ninhlei lo pawl, kilkhat a ţhu mai mai pawl zingah ka tel ţhin a, min han ngaihven chiam tu an awm ngai lo. 

"Dawt a ni hleinem. Langsar deuh a duh tu che kha chu â kan ti ţhin a, i hnawl tho kan ring vek a" a la ti tak deuh deuh a, kan ti ti a ho sawtin boruak pawh a zangkhai ţan viau a. Ţhian kawm ngai hlei loin mipa zinga ka lansarh thu a sawi chu a nia, dawt sawi lo ang hmiah hmiahin a la awm zui. 

"I phone number min lo pe teh" a ti a, min dil pawh a ang lo, thu min pe a ang mah zawk. 

A ţhutna lamah ka kun phei a, "Ka lo sawi ang" ka tih rual a phone screen a hmeh ên chuan hmeichhia nen a an thlalak a lo lang a, a rukin ka nui leh sak a, Rb-a meuh pawn lungdumtu a tawng ve ta ni ngeiin a lang. 

A phone screen chungchang chu sawizui lovin ka phone number ka sawi ta zawk a, a save fel meuh chuan a lungawi hmel khawp mai. 

"Ti hi chuan duh duh hunah ka be thei tawh ang che" a ti a, rei vak lo kan ţhut leh hnuah kal ka rawt a, titi pah a thil ei chu ei rei a awl duh phian mai. 

"I va rei ve" Zonuni pawh chuan a lo ti vin hlar a, a kil zawk a ţhu ka nih avangin tim daiin ka kal pel a, Rb-a zawk chuan min lo phat sak ve nasa. 

Krismas chawlh nei ve em em lo mah ila Krismas lo thleng tur chu kan ur lawk ve nasain Ruattei phei chuan bazar a rawt reng a, lei tur nei ve mang si lovin tlaiah ka kalpui ziah a, mipui an tam tawh bawk nen; in kan thlen meuh chuan kan chau hnâp tawh ţhin. 

Hmangaihsanga chanchin ka hre zeuh zeuh nain kan la inbe miah lova, inbe tur pawhin a phone number ka nei lo hrim hrim. A reh vang vang danah ani pawn a nei bik lo a ni ngei ang. 

Rb-a erawh chuan min rawn be zui reng a, kan ti ti duhzawng a inangin pawl-10 kan zir ve hunlai te kan sawi ţhin a, kan inkawmngeih leh tawh viau mai. 

Urlawk zan a ni a, Ruattei ţhiante an rawn kal khawm ţak ţak a, dar10 a rik chuan an thawm a ţha viau tawh. 

"Kan lo han mu ang e aw..Bawiha mutthilhna a rei tawh bawk sia, kan dip ang che u" ti a Ruattei ka hrilh thlap hnuah sofa a Bawiha muhil chu ka pawm a, U Remremi pawh kailawn tawpah a la ţhu ve reng a, "Ar talh tawh ang u" an tih apiangin "A bawp ka hauh aw" a lo ti ta ţhin a, mu turin tuman kan nawr kal zo lo. 

Ka mu fel awrh ang tihah Thantei hnen aţangin call ka dawng a, 'hman pui tur a nei lo aniang chu maw' ti rilru chungin ka la a, "Mak i ti viau ang" ring leng lawng a a rawn tih chuan ngaih a ţha lo nghal em em ringawt a. 

"Thil thleng a awm em ni?" pangai deuh a ka lo tih chuan "Sangzualan nupui a ru. Nu Chhawntluangi fanu Btei nen khan an tlan dun a, an kalna an sawi duh bawk si lo, i nu te an mangang lutuk a nia" a rawn ti lang lang a, a thusawi chuan min barakhaihin dawnsawn dan thiam a har ka ti kher mai. 

"Nupui a ru a?" tiin ka zawt leh ngat a, engtik laiin nge ka ţhutchhuah ka hre lo reng reng. 

"Ru ka tih mawlh mawlh chu. Btei nen an tlan daih. Nichin lawk khan Sangzualan chanchin a rawn sawi a, ka pa nen an in a kan luh remchan lai a ni hlauh a, tunah bathroom ah ka awm mek. A rukin ka rawn hrilh che" a ti hlawk hlawk a, "A mak e" a rawn ti leh ţhin bawk a, Sangzuala hian min tihnat zawh ka ring tawh miah lo asin mawle. 

"Thante, khawi aţanga inzui chhuak nge an nih a? Nu Chhawntluangi ten an hria em?" ka ti a, chiai buai loh hram ka tum nasa ve hle. 

"Chupawh ka hre lo, ka hriat zawng chu ţhianho a hman khawm tum an nia, Btei nen Pu Dailova te ar lei turin an chhuak a, tun thlengin an la let lo tih a ni mai. Sangzuala chuan dar7 vel a an chhuah tawh thu a nu te a rawn hrilh a, a ţhiante chuan an lo la nghak reng maithei a ni" a ti a, khawiah tak kal ang maw?

"Lawmkima han be chhin teh" ka tih chuan "Awii...hepa chet chut hian engmah a hre ve lovang. A status kha i hmu lo em ni? Dar7 velah a mut hnur tawh kha" a ti leh bawk si, tih vak ngaihna ka hre bik lo khawp mai. 

"Puitling an ni tawh a, an zurui ngaihsam thil tih te pawh a ni ve thei tho bawk a, ţha deuhin an rawn haw veleh mai ang. Thluak a fim loh chuan atthlak deuh a chet mai a awlsam a" ti ve ngial mah ila "Kan khuaah zu an khap. An vai char char a, zu in tur nei an tam lo ngawt ang. An rui dawn lo chiang sa" a rawn ti a, Bawiha ka en a, pa a nei puitling lo bik lutuk hi ka khawngaih thar leh a, Sangzuala chet dan chuan min tih nat tho rualin ka haw takzet a ni. 

"Tikhan nuam a tih dan berin awm rawh se. Kan inţhen tawh ber chuan eng tih pawh a thiang vek tawh alawm. Mahse, Bawiha hi min rawn chuh buai tawh lo turin ka duh khawp mai" ka ti a, kum3 a la tling lova, hei vang hian ka awm a la nuam thei zan lo a ni. 

"Thiang e thiang lo e sawi a ngai lo. Nupui a ruk vang hian i hming an lam thar leh dawn. Ţhenkhatin an khawngaih leh vel che ang a, ţhenkhatin an dem lehzual che ang a, ka ngei hluah hluah mai a ni. Hmeichhia te hi inthurual ila, Sangzuala te ang mipa hi chu tar nghal bawih thei tur khawpin neih rawn ila a ţha ang" a tih hlak hlak chuan ka nui chhuak ta hak a. 

"I pa nen chuan eng nge in tih reng reng a?" ka ti daih a, "Kan carol" a rawn ti bak hlar mai. A pa a rui lehpek tawh ang a, tawhsual a tawh hlauin a zui tih hriat reng reng. 

"Awww..zu an khap i ti emaw tia" ka tih chuan "Khap nasa e...vawiinah khaw ţhenawma a ţhianpa a rawnkal a, an lo inpe ru aniang kan ti mai. Ruih phet tum tan chuan tihdan a awm ve zel bawk sia, Sangzuala te ang zu in ngai mang lo ho chuan tihngaihna an hre dawn lova, ka pa te ang ho chuan inrawlhruk dan an hre zel. Guitar, a hrui pawh kim tawh lo kha a awrh a, 'ka carol dawn e' ti a a chhuak ka nu'n min zui tir tlat a nih hi. Ka zak bawk si, duty tawn fuh ka hlau bawk si" a ti zat zat a, a pa vang hian chhungkua an buai ve rum rum ţhin reng a ni. 

"A zia lo hle mai. Sangzuala chanchin hi chu hre lo tawp mah ila pawi ka ti. Chanchin ţha lam a ni ngai mang bawk si lova, hre lo hrim hrim ila ka hahdam zawk ang" ka ti a, ka duh dan tak tak ka sawichhuak a ni. 

"Ni ngawt mai, ka lo insum hman lo leh ţhin a, hre ve turin ka duh zel bawk che sia, tun bak chu ka rawn hrilh tawh miah lo ang che" a ti vei zung zung a, min hrilh leh awm tho e. 

Zan a rei tial tial a, ka harh tulh tulh emaw tih mai tur a ni. Sangzuala chetdan atthlak lutuk chu ka ngaihtuah zui reng a, ka chhuahsan vang a puhin ka nu chuan min dem leh nasa viau ang. Chhuat dung a vei tawn sek pahin a ang leh tun tun ang a, a an hla tur te nen lam ka ngaihruat thiam vek. Ka hming a lam ri zing viau ang. 

Ruattei te ţhian ho chu tual zawlah an ţhuchhuak a ni ngei ang an thawm a ring ţha ham ham emai. Ka thunun theih miah loh thil suangtuah kual chiam ai chuan tiin tukverah ka dak chhuak a, ka pindan ţukverh aţang hian tual zawl a hmuh chian theih khawp mai. 

Mei an chhep hluah a, thing te khu khawi a mi nge maw an hmuh reng reng ni? 'Ar kan hem dawn' an ti reng a, tualah mei an chhem ang tih ka ngaihtuah pha lo. Hmangaihsanga nen a kan ti ti ţhinna hmunah khan awmin mei an ţhut bial laih a, kan ţhutna ţhin ţhutthleng bik pawh an luahkhat hneh narawh e. An hmel ka hmu chiang thei hlawm lo na a an thawm aţang chuan an hlim zia erawh hai rual a ni lo thung. 

"Krismas a ni ta" ti a mipa au luah luah chuan min ti phu deuh zawk a, bang a sana lian intar ka lo melh ve vat a, chumi hnuah ka fapa mu lai chu en lehin tawitein ka nui a, kan nufa a Krismas hman dun zel theih ka duh tak meuh a ni. 

Phone vibrate in ka kut a rawn nghawr rual chuan phone ka la keng reng a ni tih ka hre chiah a, Thantei tho a nih ringin ka en vat a, phone number hlang zawk a lo ni. 

[Krismas chibai] a rawn ti a, dp a dah bawk si lo, message ka en vang vang hnuah a hming ka en leh a, Vanlalbeidawntumlova a lo inti kalh mai a, tu nge a nih ka hrechiang lutuk tlat. 

[Krismas chibai] ti a ka chhan let rualin a seen nghal a, a reh leh hmak ang lawi a, amah ka hriatchhuah zeuh theihna tur a thil tih a thiam ru phian mai a. 

A pu te khua a a kal hnu khan rilruah a awm zui ve rauh rauh reng a, min ngaihven ber pawl a nih vang nge a khawharthlak riauin ka hria a, 'min tihbuai peih vang' ti a inhnem ka tum ve ngial ţhin tak na a ninawm khawp a min zar buai awm ka hre bawk si lo. Nitin a inhmu ţhin kan nia, kan inhmuh loh thut vang aniang te ka ti ta ringawt a. 

Hmangaihsanga ka ngaihtuah chang apiangin inthiam lohna ka nei tel ve ţhin a, nuthlawi ka ni a, ka pasal nen a kan inţhenna a la rei loh bakah ani chu ka nuţapa a ni. A insawi ang hian min duh lo tak tak pawh nise keichu ka danglam ve tur a ni lo tiin ka infuih ve mawlh mawlh ţhin a, Sangzuala hnen aţang khan ngaihsakna leh hmangaihna ka dawng ngai hauh lo chu ka ti ngam lovang a, chuti chung chuan ngaihsaktu leh hmangaihtu nei ve lova ka inhriatna a rei tawhin Hmangaihsanga hnen aţanga ngaihsakna ka dawn te hi ngaihtuah zui loh har tak a ni. Kan thil awh zawng tak hi rin loh deuhin miin min hawh tir ve thut ta se, an lak let leh hnuah pawh rilru ah a châm zui veng veng reng ang. A lawmawm rualin lawmna famkim neih a har viau dawn a ni. Hetiang chiah hi ka ni, ka duh ang ngeiin ngaihsakna dawng ve tawh mah ila ka ta tur a ni tlat lo.

Kumthar kan chuangkai a, hma lam pan a ke ka pen thui tawh zia te ngaihtuahin ka inchhuang rilru ve hle a,ka hriat danin Sangzuala te pawh Btei nen chuan an la inkawl ve ran a ni awm e. Rin ang ngeiin ka nu chuan keimah min mawhpuh vek a, 'Zotei a uire a, a rilru na lutukin nupui a ru ve ta mai a nih hi' te a lo ti vel a, a chhia zawng zawng a min puh vek mai ţhin chu thinrim viau mah ila thawm han neih ka tum lo bur a, Sangzuala awmdan leh ka nu ţawngkam vel chu engamah ngai lo ang a awm ka tum a ni. 

"Tunlai chu U Neihkimi hian ka pa koh hran daih a ching a, eng emaw tih tum a nei a ni hrim hrim ang. A bialpa nen khan inneih an duh ve deuh tawh em mawni le?" Ruattei chuan a ti melh melh a, a purun chan zawh hlim chu nawr sawnin mittui tla deuh parin a rawn dak chhuak a, "A awmdan hi inngaihven ve miah lo em ni?" tiin min zawt zui zat a. 

"Hospital chungchang bak a nih ka ring lo" ka tih laiin Siampuii chuan "Keichu U Kimkima hmel hi a tenawm ka ti. A mitmeng te hi a dik lo reng reng, hmeichhia hrim hrim hi it hmel deuhin a melh ţhin ka ti mai, a vun lah hi a ngo hlung mai bawk si a, ka ten zawk tak a ni" a ti a, a ner pah nang nang a, "U Neihkimi hi khirh viau mah se U Kimkima mai mai nei tur chuan ka phal hauh lo" a tih leh phei chuan Ruattei nen kan lo nui hak hak a, ka hriat laiin vawikhat a rawn leng tawh a, ka lo chik ve tehchiam si lova, a hmel takngial pawh ka mitthla thiam chiah lo. 

"Diktak chuan U Hmangaihsanga bawraw ve deuh ţhin lai ai pawh khan a tawrhlelhawm daih zawk alawm" Siampuii chuan a ti leh pek a, Ruattei chu a melh ralh a, sawi sual inti hmel a pu bawk a, hrehawm a tih lutuk loh nan "Chu a lo che boy ve viau ţhin a ni maw?" tiin a thusawi lai chu ka thlak sak ta daih a. 

"Pui tak a ni" Ruattei chuan a lo ti a, ka awmna lamah a rawn kun phei deuh dui a, "Ka nu thih hnu khan a dik lo chho a, kum khat lek hnuah i nu leh ka pa te an innei leh bawk sia" a ti sa sa a, midang hriat ve a hlauh hmel khawp. 

"Kan hospital ah pawh hian a thawk duh ngai hleinem. I nu hi a ko duh lo reng bawk a, mahse engin nge ti danglam ka hre lo. Rin loh deuhin a insiamţha ve tehmial a, Pathianah piantharna a chang aniang ti dawn ila inkhawm a thatchhe ve ropui sia, han zilh ve mah ila 'midang vei tawk lek a piangthar min tia', ka ngei ve thei tehmai a nia" tiin a nui pah hak hak a, "In a a awm lohin nuam kan ti zawk ţhin. Phaiah khan awm reng zawk se kan ti ţhin a, a rawn haw ve chang pawn zu rim a nam tluan zak zel tho a, kan inhau nasa thei lutuk" a ti leh zat zat a, a sawi chhung zawngin Hmangaihsanga hmel ka mitthla char char a, a inhmeh loh bakah ngaihtuah tawh loh tumin rilru ka siam fel vek tawh asin mawle. 

"Siampuii hi tleirawl te a nih lai aţangin kan hnenah a awm tawh a, Hmangaihsanga chenpui hrehawm zia chu a hrechiang viau ang. Ka pa'n han hau se a ngawi ngal zel a, a zawm chuang lem hlei lova" ti a Ruattein min hrilh lai chuan Siampuii rawn inrawlhin "Zu kha a nghei thei tawh dawn lo emaw kan tia, a nghei hlim te khan mak kan ti lutuk a, 'engatinge i nghei deuh thut?' kan tih lahin 'pumin a ngeih lo' a ti ringawt zel sia, a sawi thui duh ngai bawk si lo, a nghei hrim hrim chuan a ţha kan ti ta vel mai mai a" a ti siam siam a, "Hmangaihsanga chu a hahchhiau nasa ngawt ang" tiin kan han nui leh rih ţhin, ti ti pah a rawngbawl chuan chawhmeh a hmin zung zung bik maiin ka hria. 

Bawiha ţap ri ka hriat rualin sitting room lamah ka tlan phei a, a kâ chhung aţangin ka nu'n eng emaw a lo kawm chhuak mawlh mawlh a, an piah deuhah Lays bawm kengin U Remremi a lo ding ngawi ran bawk. 

"Eng nge i kawm chhuah mawlh mawlh? Thil ei a nei em ni?" ka ti chul a, Bawiha chu ka pawm kang a, sofa a ka ţhut rualin ka malchungah ka ţhuttir a, ka nu chuan uluk deuhin a kâ chhung a la en reng a, "Remremi'n lays a lo barh alawm. A thak chi a ni sia, hrehawm a ti a nih kha. Tui ka va la ang e" tih leh din a rual a, Bawiha kâ chhung chu ka en ve ngial a, engmah a hmuam tawh lo tih ka hmuh chuan a ţap chu ka thlem ta thuai a. 

"A rawn ban reng a, ka hmeh sawm vek hnuah chauh ka pe" inven tum tak hian U Remremi chuan a lo ti a, lays pawh chu a ei zui ngam tawh lo. 

"A tlei leh vat mai ang. Nidangah chuan ei chhin phawt la, thak i tih chuan Bawiha pe ve tawh suh aw" ka ti dam thlap a, keini angin a hriatna a hmang ve zung zung thei lova, thinrimin awmzia a nei lo. 

"Hei hi maw?" tih pah a lays bawm min hmuh chuan "Aw khatiang hrim hrim kha thak deuh chu Bawiha hian a ei ve thei lova" ka ti a, "Ehhh...hei te chu thak ka ti lo hrim hrim" intithei tawkin a lo ti daih a, kan inhrilh var loh hmel khawp mai. 

"Aw...ei zawm leh tawh rawh" ban deuh charh hian ka ti ta ringawt a, ven uluk lehzual a ngai tihna a ni mai. 

Nitinin hospital-ah ka la kal ve reng a, Zonuni nguai riau ţhin chuan ngaih a ti ţha lo ru viau a, ka insum theih tawh loh hnuah a mize danglam thut nachhan chu ka zawt a, "Ka bialpa hlui khan nupui a nei dawn" a tih chuan "A ni maw? Eng mi nge a neih dawn? In induh viauin ka hria a, in inrem leh vat ang chu ka lo ti a sin" ka ti nghal mawlh mawlh a, a thusawi berkher chu ngaihthlak ka inbeisei loh ber te zing a mi a ni. 

"Duh vak lo chungin alawm a neih dawn. Nizan pawn a lokal a, a huphurh zia hlir a la rawn sawi" a ti a, "Chu ti si neih loh mai tur alawm" ka lo ti leh vat a, a mitmeng nung sarh ţhin kha a dul raih a, a khawngaihthlak reuh lutuk ringawt. 

"A chhungten nei turin an nawr tlat sia, a hnial lui thei tawh bik lo aniang. Nuthlawi fa nei ve tawh tho a nei dawn. Kan inngaihzawn laiin 'nuthlawi fa nei tawh' tiin min pawt ţhen a, tunah lem keimah ang chiah an neih tir dawn a, officer a nia, mi ţhenkhat chuan pawisa hi an pathian a, fate hlimna ai paw'n an ngai pawimawh zawk mawle" a ti tan tan a, ngawi rengin ka lo ngaithlak sak a, inbunruak vek se la, a veng huai mai ang. 

"Rintea hi nuthlawi ho ah a tla na hrim hrim aniang, a nupui tur pawh hian a ngaizawng nasa viau an tih kha. A chhungte lahin an lo duh em em a, kan zoramah ngei pawh hian rethei leh hausa kar a hla tawh ngawt mai. Min hmuhsit tehlul nen, pakhat lah an pak hluam a, officer lai ni ve ila chu kan innei daih tawh ang" tih bawrh bawrh pahin ka lam a rawn hawi a, a ţhu rem zui sat sat a, han hnem vak ngaihna ka hre lo, 'a ţha leh mai ang' tih ngawt chi lah a ni der si lo. 

"Dinhmun a inang lova, retheihna avang leh lehkha thiam theih thlawt loh vanga lehkhazir sang vak lo te a awm theih a, tunlaiah phei chuan MA ve lai tan pawh hna hmuh a har. Tihpuitu leh duhsaktu nei ve lo tan phei chuan sawrkar hna a hmuh theih loh ang tluk a ni. An chawrchhuahna leh hun harsa an lo paltlang tawh te hre hawt si lo va dinhmun leh nihna aţanga kan inteh ngawt ţhin hi chu ka haw ngawt mai" a ti hlak hlak a, ngawirengin ka lo ngaithla a, damlo rawn kal te ka lo dawngsawng pah char char bawk.

"Lehkha zir sang lo leh mi rethei kan chep a nih hi" a tih chuan ka nui hak a, "Chep hleinem..nangpawh MA thlawi ngat i nia, i zir sang lutuk alawm. Tunlaiah te chuan eizawnna tlak hna a tam tawh a, han sang lua angin lang lo mah se puanţhui thiam te pawh hi an hlu lutuk alawm. Lehkhathiam lo tan pawh pawisa lakluh dan a awm ve zel a, taimak a ngai thung a" ka ti a, "MA thlawi min han ti ngei a(h)" tiin a nui leh kar kar thei tawh a, a ang zo ang a, a thawl hawk ang ka tih reng kha. 

"Zo thlawi te chu in va ti ti muk hmel ve" Bl-an a rawn ti lauh a, a kal thauh thauh a, a san lutuk vang nge a kal bu deuh luk luk zelin ka hre mai. 

"E...Bl, inhnuai berah min zuk kal lawk teh. Lehkha dahthlak a ngai a, tunlai chu ka nun ram a chau a nih hi" Zonunin a lo tih chuan "Ka khup a tuah lutuk a kawng chhuk ka kal hleithei lo" a ti a, phone hmet chungin min kal liam san daih a, Zonuni a ang zui hlak hlak mai. 

Zonuni hian zo thlawi tih kha casualty lamah a lo sawi ni ngei tur a ni, an lo la fuh hlawm phian a, doctor te meuh pawn zo thlawi min ti tawh. Ka ţhiannu'n a nuih pui huau huau laiin keichu ka lo zak ru chem chem ţhin. 

Nidang aiin ka haw tlai a, ka pa car pawh U Puitean a lo hru fai hliau hliau tawh a, inchhung ka luh veleh ka nu hnenah ka pa chanchin ka zawt mawi ve a, "Vawiin chu a rawn haw hma angreng, a chau deuh a, mu turin a kal ta a nih kha" a ti mai a, tunlai chu a buaiin 'mi pawimawh hmuh tur ka nei' a ti reng a, a hah tawngkhawng ve tawh te pawh a nia nge. 

An rawn haw khawm ţak ţak a, an intih fel fai hnuah ka nu'n chaw ei a rawt a, ka nu kal kher ngai lovin Ruattei chuan "Ka pa ka han ko ang" tih leh inchung lam a tlan chhoh a rual a, "U Neihkim" ti chul chungin a rawn tlan thla leh thuai a.

"Engatinge khatia mi koh chiam chiam a" bul zet hian Neihkimi chuan a lo ti a, Ruattei chuan Neihkimi kut a vuan a, a mitmeng pawh a buai deuh nak mai. 

Chiai tak chung chuan "Ka pa ka kaitho thei miah lo a nia" a rawn ti a. 

CONT...