THE GOOD, THE BAD AND THE OTHERS-LAST

THE GOOD, THE BAD AND THE OTHERS-LAST

"A that tih te chu a chiang vek tawh alawm. Rilru dang min puttir ţalh lo teh. Keipawn rin harsa ka ti ve tho alawm" ka ti nang nang a, phone a tawp zui daih. 

Vulmawiin min rawn call nghal zat a, ka lak rualin "Phone i va la thei lo ve" a rawn ti bak nghal hlar a, eng nge a duh ve le?

"Eng nge a?" ka tih veleh "Jessie an man lawm nan Gabriela nen kan in kiss. Awiii...a thlum dan chu chini lian chi leh chocolate man to chi a ni ringawt, cheng5 man chi lek angin min fawp lo" a rawn ti bawrh bawrh a, nuam a ti lutuk chu a au lo chauh a ni ber. 

"A va nuam awm bik ve aw...i lo muhil thei lo vel ang e" ti a ka fiam chuan "Ka nui ver ver reng mai a ni. A hmui lah kha a nem thep a, sofa dup nuam kan tih te chu nep te a ni ringawt. Enteh Lucky, kan inneih hunah ţhianah ţang rawh aw" tih thlengin a sawi tawh a, a va han phur tak. A pasal neih ni a dinpui tur a min duh chu mak ka tih ruk viau laiin "Inneih naah chuan ţhian atan mahni aia chhia zel hman tur an ti" a rawn ti leh kher a, min nuihsawh zui nasa hle. 

"Vawikhat lek a la fawp che a, inneih i ngaihtuah thleng nghal a" nui chunga ka tih chuan "A nuam ve lawm a(h). I pa eng nge a an? Hmanni a kan lokal ţum khan in hlim loh hmel lutuk a" a rawn ti ve mial a, "A ţha a ni mai. Tunah chuan a fel tawh lutuk" tiin ka fak a, a la tawrhhlelhawm zia erawh ka sawi tel duh lo. 

"A ţhat nasat chu. I nau kha a chhe lo reuh tawp. Ka thinlung hi Gabriela tan chhum so bawrh bawrh lo ila chu ka star daih ang" thawveng tak hian a rawn ti a, ka lo nuih liam pui vel mai mai. 

"Taka, June kha ngati nge a rilru a danglam vel vak a? Jessie berkher chu keipawn rin harsa ka ti ve tho. Mahse min thah a tum ngei a" a rawn ti leh ţan tawh a, "A pawm thei thlawt lo a nih kha" ka ti chuan "Ni reng e...a pawm theih loh vang mai mai. A vun a pilh lo tih mai mai te chu, Josephine khan lo ham ve deuh mah se a pilh lo a ni ve thei tho a, Jessie khan a sawi uar mai maite pawh a ni thei a, vul pilh loh vang ngawt a danglam nghal chiam te chu" a ti hlak hlak a, keichuan ngaihdan ka siam thiam tawh lo. 

"Jessie ber a inpuan tawh chuan a inpuanna kha dik berah ngai tawp mai ang. Chhui zui vak dawn mah ila ruang phawrh phalna te kan nei a nih ngawt loh chuan chhui ngaihna a awm chuang lo. Tikhan tualthattu an man taah ngai tawp ang" ka ti a, kan mi hriatchian a nia, pawm nghal hmak erawh a har rih khawp mai. 

"Rilru lam a dik lohna nei te pawh a ang alawm le. Engpawh nise, muttui phawt aw. Kolasib a ka lokal leh veleh i thil zawrh ka leisak ang che" ţha deuhin a ti ve ngei a, kan inthlah ţhat ber ţum a ni hial ang chu. 

Ka muhil thei lo chu zanreiah in ngaihtuah harh turin inchung zawlah ka chho a, kil khatah Boomer a lo ţhu reng mai. A bul a ka ţhut ve rual chuan zu rim ka hria a, a natna nen a inmil lo thil a ti ve reng tawh mai. 

"I muhil thei nange" ka ti a, thlang lam a in ding thluah chu kan thlir pah reng bawk. 

"Umm" tih ringawtin min chhang a, bing deuhin thlang lam chu a thlir a, in ngaihtuah muk tak hmel a pu bawk. 

"I rilru tibuai tu a awm em ni? Ka awm loh hlan khan thil thleng a lo awm leh tawh em ni a?" ka tih chuan lu a thing nghut a, "Ka pian ve chhan ka ngaihtuah mek a nih hi" a ti zawi deuh ruih a, kei ngei pawhin he thil hi ka ngaihtuah fo mai. 

"Pathian hian min siam chhan a nei ţhin alawm" ka tih chuan "Ka tello a awm thei vek in nia lawm. Pathian hian tihpalh thil thuin min siam tel ve mai mai a ni" a ti a, a thutak run a, sawipui zel chi niin ka hre lo. 

"Ka nu kha thah a nih i ring takmeuh em?" ka tih chuan "Ring tawh lo" a lo ti hap a, zawhna ka zawh leh hmain "Nu Hriatpuii khan zu leh pawisa chiah a duh. Ka pa a duh tel hleinem. Ka nu han thah ngawt nachhan tur a nei lo. A huaisen tawk lo bawk. Ka pa pawh hian ka nu kha a hmangaih, mahse ka hua" a ti hluk hluk a, a tum zui bur lehnghal a, puitling deuh a in ngai chunga a la naupangchhia viau si te hian nuih a ti za ţhin. 

"A nih chuan tlemin i rilru a dam ve deuh dawn a nih chu. Chuan Muankima hi i ngaih ang a ni miah lo. Kei aiin Nu Puitei a ţan lo a, Nu Puitei aiin min ţan lo bawk a, a laiah a ding tlat a, a nu vangin min thlauhthla miah lo" ka ti malh malh a, a ngaihdan kha thlak se ka tih vang chauh a hrilh ka ni. Kan mimal thil hi a hranpain kan sawi dun ngai lem lo. 

"Ka hre daih tawh.  Ka ngaihdan a dik vek bik lo tihna a ni mai. Dodaltu aiin hmangaihnain thil a ti thei zawk tihna a ni tel bawk a" a ti charh charh a, ipik hmel zet a a thawk hawk rual chuan zu rim ka hre nawn leh a, ka insum thei tawh ngang lo chuan "Zu i in a ni maw? Ka pa vangin i haw viau emaw ka tia" ka ti chhuak khawl mai. 

"Zu rui hrawn hrehawm zia hre ve rawh se" a lo ti then a, a kut dinglam zawk a hum reng a, a bul a ka ţhut hlim aţang khan a la hum char char a ni mah zawk. 

"Eng nge i hum reng a?" ka ti leh a, thil ţha lo deuh a nih ka hlau khawp mai. Buaina ka tawh zin em vang hian hlauhna ka nei awlsam bik niin ka hria.

"Engmah" a ti deuh hluk na a "Ti lang teh" ti a ka nawr tak sekah chuan a thil hum lai chu min hmuh tir a, cigarette tlawn khat leh lighter a lo ni. 

"Zu ve mai ta che" nui hak chunga ka tih chuan lu a thing a, a ngai ang bawkin a hum bo leh daih. Meizial min la zuk khum ngam chiah lo a ni. 

"Chaw eikham a rawn be tu che kha tu nge? I vin vak vak kha" ka tih chuan "Sensiari" ner suk hian a ti a, Tintin-a chungchangah bawk a nih ka ring. An biak theih loh chuan chanchin ngaihvenin Boomer an rawn be ve ziah. 

"Ţhian hi kan han nei ve a, kan inkawmngeih viau emaw tih pawh hian an zia hi kan lo hrechiang lo thei lutuk a" ka ti ta daih a, "Muankima hi hosteller zinga hmeichhe ho bik kha chuan kawp lawr ve tak a nih an ring fur a, a ţawng tlem bawk si, hei vang hian sual deuhah an ngai vek a, mahse mifel tak a lo ni daih a, sawisel bawih bawih ţhin tu te phei chu an inchhir tawh ngawt ang. Vulmawii lah hi sual deuh angin a lang a, ka belhchian nasat poh leh a rilru ţhat zia ka hre ve thung a, mihringte hi kan landan ang ngawt kan ni lo a nih hi" ka ti a, Jessie ka ngaihtuah chhuak zawk mai, keipawh ka tel. 

Tupawn mifel tak ni turah ka ngai a, an hmuh phak loh chin a ka chet tenawm theih zia ka hai lo. Ka ţhianţhaber ka mutpui hial ţhin a nih kha. Tun thlengin ka unaute hian an la hre lo. Ka nundan diktak chu hria se sual min ti viau ang. Mize thup min tih ka ring. Jessie pawh keimah ang tho a ni, tu pawi mah a sawi ngai lo emaw tih laiin tualthah thubuai a awrh daih.

"Lan dan ang ngawt kan nih loh vang alawm love phel phawk emoji an siam. Kan mi rin ber ber te hi min ti na tu an ni ţhin a" nuihza aw tak hian a lo ti a, heivang hi a nia midang a in nghat nasat lutuk a ţhat loh ţhin ni. 

Muankima hnenah Jessie chanchin nitin ka zawt ţhin a, thu thar eng emaw hriat ka inbeisei ţhin a ni. Mahse, central jail a an dah hnu kha chuan thuthar danglam deuh engmah hriat tur a awm tawh lo thung. 

Thla a liam ve zung zung a, exam te a nih chhoh nawk avangin Muankima pawh a rawn haw khat a, ngai viau mah ila zirlai ngaihsak thei lek lova ka siam hlauin ka be zut duh lem lo. June nen kan inbe zeuh zeuh a, hostel dangah a awm tawh mai bakah kan awmdun ţhinna aiin an dan a khirh zawk a, zan chhuah ruk chu sawi loh, engkim a hun takah vek an tih ţhin thu a sawi a, chaw ei lo mai mai an awm ve ngai lo a ni awm e. 

Ka mualpho vakna kha a rei leh deuh tawh avangin Nu Puitei pawn pangai deuhin min be leh thei tawh a, mahse hman ang kha a ni thei tawh lo. Kan inkarah eng emaw a awm tlat tawh a, kan inpawh tak tak thei tawh lo a ni ber. 

Boomer hian zu in zeuh zeuh a ching chho ţan a, rui chhia a ni ngai lo a, zirlai a ngaihthah phah lo bawk. Rawlthar tir mize inthlak thleng reng hunlai a ni ang bawkin a zia thlakin ngaihzawng a nei zut reng a, thla khat a kawp tlin chuan a kawp rei hle tihna a ni mai. Tunlaiah chuan social media kan hmang nasa tawh bawk a Kolasib a mi chauh lo pawh a nei tel fo ţhin a. Engtin tin emaw ka hre veleh zel a, zawh chian ka tum ve ţhin tak na a min hrilh duh ngai lem lo. 

Kei ve thung chuan chhunah ka ni dawr ka nghah pui rawt a, thawmhnaw leh pheikhawk vel te zuarin dawr tu kan nei ve reng a, zanah Adika leh Puipuii te lehkha ka zirtir a, keima tawkah ka buai ve ţhin hle. Video chungchang kha tuman an sawi lang ngai tawh lova, ka inkhawm ngam leh tawh a, kţp ah pawh ka inhmang leh ngam tawh. Hreh deuhin ka kal na a min lo be bawrh bawrh hlawm a, inthlahrung lo tur leh kţp thil tih a tel ve zel turin min hrilh hlawm a, hruaitute fel vang liau liau a ni. 

Vulmawii lah chuan status a la nei thlum em em reng a, a sawi dan takah chocolate man to chi a ni ringawt. Min rawn be ve ngei zel a, June ai mahin ka be tam zawk emaw tih tur a ni tawh. 

Mateo chu a nundan a la ngai reng. Zawhte leh bike a buaipui a, lehkhazir a ngaihsak tehchiam lo. A ni zawng midang aiin a vannei a, a chhungten eizawnna kawng an sial sak sa vek ka ti mai, zirna lamah mi aia chungnung zawk a ni kher lo a nih pawhin pawisa lakluh na tur tawk chu a nei reng dawn tho. Thlah tu aţanga hausa an nia, sumdawnna lama a chhungte lo hlawhtlin tawhna zar zoin nuamsa deuhin a awm reng thei ang. 

Gabriela pawh lehkha a zir nasat thu ka hria a, a hranpa in inbe tam lo mah ila chanchin kan inzawt leh zeuh ţhin. A pa'n a ţha ber ni tura a duh thu a rawn sawi a, zirna lamah a insawr bing nasa lehzual ni awm tak a ni. A pa hian professor ni turin a duh a, ram danga thawk thei khawp a thiamna nei turin a duh. A naupan deuh lai pawn vai ramah lehkha zirin a awm ţhin ni awm tak a ni. Rawlthar chho a nih khan a nu in a hmuh chak changa hmuh mai a awlsam theih deuhna tur a awm turin a duh a, chuvanga mizoram a zir zawm chauh chu a ni. A pa duhthusam ti hlawhtling turin a bei mek a, hlawhtlinna a la neih ngei ka duhpui takzet a ni. 

Vulmawii hi journalist nih tum a nia, tun hnu, kan inpawh ve deuh hnu hian min hrilh chauh nghe nghe. Chhungkaw lamah harsatna a tawk ve nasa a, a pa zu ruiin a sawisak ve ţhin thu min hrilh a, a nuhrawnin a huphurh hle niin a sawi bawk. A pi leh pute vang chauh a lehkhazir thei a ni a, kan ţhian dangte anga hausa an ni ve lo, midangin an hmuh hniam hlauin a nihna diktak a thup mai zawk a ni. Chawlh laia an khua a haw anga a awm changte khan an chhungte leh ţhiante inah a lo riak kual mai mai zel a, chapo leh inti vei ber anga lang ţhin kha a lo baihvai ber zawk a ni. 

June chuan sipai a ţan hmasak phawt a duh a, chumi hnu ah chuan chief minister nih a tum. Hmiah mai a. Ka tlin hma chu ka tar ţhak thleng ka bei ang a ti hem mai a, thei tak ang maw. 

Jessie khan artist nih a tum ţhin a, thil lian tak a tihsual avangin a tum ang a ni ve thei dawn ta lo a ni. Kan chak lohna lai ber hi setana hian a hmang ţangkai thiam a, Pathian ring tlat chunga nasa tak a beih let a ngai ţhin a ni. 

"Boomer, eng nge nih i tum?" ka tih chuan min rawn melh hrawk a, ka ţhiante ka ngaihtuah lai tak a nih vangin rilruah a lang thut a ni ber. 

"Dam reng ka tum" a ti hmuk a, tv lam chu hawiin a en leh ngar ngar a, ka biak zawm leh hmain ka ni a lo haw ta hlauh. Mahse ka pa pindanah a lut tlang a, kan hriat lai ngei pawn ka pa hi a zilh malh malh ţhin a, kan hriat loh lai phei chuan a hau hial ţhin ang. Ka ni in min rawn awmpui hi kan ţhatpui a, hma kan sawnin chhungkaw boruak pawh a zangkhai sawt hle. 

Muankiman a rawn haw tur thu a sawi chuan ka phur nghal sarh a, tlai lam a lo chhuak tur chauh mah nise ka inchei nghal vel. Kan ţhiante an rawn tel ve theih dawn thu a sawi tel lehnghal a, ka hmu lo rei tawh a, ka hmuchak takzet a ni. 

"Vanneih, Tintin-a nen kan chhuak lawk dawn a nia" Boomer-a chhuah nghal mai tum chu "Ding lawk teh" tiin ka au ding a, Tintin-a nen inkawp hian buaina an thlen nasa. An inthlah thei der si lo. 

"Inkawm tawp rawh u aw. Pu Biakrema fapa men dan te kha zir sak tawh reng reng suh u. A duh vang a mit chhia a ni miah lo a nia" ka tih chuan "Naupangchhia ka nih tawh loh hi" a ti nang nang a, a ner deuh sawk pawh ka hmu hman. 

"Nghal lutuk suh aw aw..miin min hmu mawh ang tih te a hlauhawm a nia. Rawn rui haw miah suh, ka pa'n min deusawh let theihna tur engmah ti suh" ka tih lehzel phei chuan a nin tawh hmel takzet a ni. 

"I sawi zo tawh em?" a ti bul hmuk a, lu ka thin chuan kal lui ngam bik lovin tshirt lianpui a hak chhungah chuan a ban a thun lut vek a, chutianga a tih kher chhan chu ka hre bik lo. 

"Chhungkua kan buai ve zawk tawhna kha i inhneh tir mah mahin ka hria. I nun chhiat phah suh se, ţang sauh zawk la, rin ngamin awm rawh. Tun ang reng a i awm chuan rilru a hah lutuk ang. I rawn haw har ringawt pawn ka ni phei chu a muhil thei ngai miah lo a nia" ka ti leh malh malh a, nin hmel zetin a thaw chhuak hawlh a, ka zilh zui duh ta lo. 

A kal hmain a zawhte in a rawn zuan a, a kawrah a in ham tang. 

"Adik, Vanapa hi rawn la teh" a ti nghal lung lung a, Kungawrhi fate pawh an lian ve tawh lutuk. 

Adikan a rawn lak veleh a ban a dah chhuak a, a kawr chhunga a thun ţat nachhan ka hre ve chiah. Ka nui chhuak hak nghe nghe a ni. Nur nang a min rawn enin "Min châng reng a, min zuan dawn tih ka hria vang anih kha ka thun. Ka pilh leh phung dawn a sin" a ti hluk hluk a, a pawi ka sawi der si lo. 

A kal tur chu "Lo haw har suh aw" ka ti leh hram a, uang zet a a hnar chuar zauhin helmet a khum a, a naupanlai ang em kha chuan min hlau tawh bik lo. 

Muankima te an rawn thlen chuan midang mitmei pawh veng lo in ka lo kuah chawt a, ka ngai tawh takzet a ni. An in a peng hmasa lovin a rawn tlang lehpek a, Nu Puitein kan thawm a hre si, "Lalmuankim, i thawmhnaw hi rawn la vek law law rawh" a rawn ti lang lang reng a, a au ring viau na a a thin a rim hran lo niin a lang. 

Inchhungah ka kai lut a, midang pawn min rawn zui lut ţham ţham a, an rawnkal tur thu an sawi lawk avangin dawr kal loin inah ka lo nghak a ni. 

Thei tui ka lo dah vawt sa vek a, an ţhutfel hnuah choka ah lut thuaiin ka thlit sak sawk sawk a, ka va pek kual den den lai te chuan Vulmawiin Gabriela a lo ngheng ar ar a, min hmu lo der vel. Gabriela laksak kher a phut vang a ni. Gabriela lah chuan a no tur a lak hnuah Vulmawii ta tur chu a lak kep ve mai bawk a, an lo ner nang nang hlawm mai.

Muankima bul a ka ţhu chu min lo kuah ve nghal zat a, hostel a kan awm ho lai te, kan inhmelhriat ţan tirh dan te sawiin kan hlim ve dar dar hle.

"In ngaizawng tih vang a ţhu dun tel tel ho hi chu vawm leh tawp ka chak ţhin" Mateo chuan a lo ti hmuk a, "Ka ţhutpuinu ve lah hi a" tih pahin June chu a melh kher a, an han inmelh rum phei chuan inhmeh tak an ni ringawt. 

"Ve lutuk che hian a. Min sawi chhe bawng bawng mah la ka bulah i tawlh hrut hrut zel tho. Min ngaih lutuk vang a nih kha a" June pawh chuan a ti ve hlaih hlaih a, Daisy ho in Adika leh Puipuii te an leng chhuak hman a, ni lo se chu ka ţhiante lokal chu an lo lawm thiam leh ngawt ang. 

"MA kan zo ve ţep tawh chu a ni sia, Mateo lah BA pawh la zo ve lo tur a nia, khawngaihthlak reuh mange. Hostel ah amahin a ţhu tum bur zel dawn ni mai. Boss ber nih tum khan Sir a tlawn leh vel ang a" Vulmawiin a ti zat zat a, Mateo huat tawk a tling leh viau tawh. A naupan bik vang te, zirna lamah pawh keini ho aia a la hniam bik vang te hian a thinrim ţun zel. 

"Hmanni ah Jessie ka kan a" June chuan a ti chhuak phawng a, kan melh ţhap a, tim daia min enkualin "Hrilh cheu ka tum a, mahse kan inhmu dawn tho sia ka tia" a ti nawi niaih a, a inthiam chiah loh hmel khawp mai. 

"Eng nge a lo an?" Muankima berkherin a lo zawt chu mak kan ti vek a, ngaihven lo tur ber a kan ngaih a ni. 

"A ţha lutuk mah se a cher a, chaw ka ei tui lo lutuk a a tia, ka khawngaih reuh lutuk" a tih lai chuan Vulmawiin "Misual chuan an sual man an hmuh a ngai si alawm le" a lo ti halh a, a sawi lang lo na a a khawngaih ve deuh chuan ka hria, nidangah pawh Jessie chanchin kan sawi dun fo mai. 

"Cabin thlangah khan diary ka phum a tia, Mateo hi sawmin a sawina hmun awm vel kan hai vek a, kan hmu miah lo. Diary kan zawn hnuah Jessie ka la hmu leh lo a, a phum ngei a nih chuan awm âwm tak a nia, a nih loh pawn keini aia kal hmasa an awm tihna a ni mai" a ti charh charh a, a ngaihdan a la sawn sawn miah lo tih kan hre thar leh a ni ber. 

"Aaa...June, pawm ve tawh mai rawh. Josephine kha that lo se chu a thah dan thlengin a phuah chawp thei lovang. A nundan kan hriat ve miah loh thlengin a hre vek a, a zui ru nasa thawkhat tihna a ni mai" Vulmawiin a lo tih chuan "Sawi tawh suh u" tiin Muankiman min lo khap a, Gabriela ţhu kun deuh ngul chu a melh zawk a, ngaihthlak nuam a tih loh zia a awmdanah chuan a hriat theih a ni. 

"Kawng hran ţheuh kan zawh ţep tawh a, biak theih a in awm reng loh chuan in chak lo ngawt ang aw"June chuan a ti ta daih a, zir chhunzawm an tum dan te an sawi laiin keichuan kan dawr neih sa tih changtlun zel ka duh thu ka sawi ve thung a, rin aiin min phur pui daih. Vulmawii phei chuan "Kawr pakhat tal lei ka tum nen dawrah i awm mang si lova" a ti a, pawisa ren a ngaih zia ka hriatpui ve thung. 

"Kan thil tih laia kan inthlur bing a ţhahnem kan ngaih chuan kan hlawhtling nge nge zel. Hna hi te lua a awm lo" Muankima thusawi chu ka pawm zawng tak a ni. Ani pawh hi a in buatsaih nasa tawh a, kan inkarah mel tam tak a tla ve ţep tawh. Aizawl chu a hnai a, lunglen te pawh a zia ve deuh a, vai rama a awm daih hunah chuan ka ngai lehzual viau ang. 

Daisy-in naupang a rawn haw pui chuan ka ţhiante an phul hlut a, no seng a choka a ka lut chu Gabriel-an min zui lut ve mial a, ka no silna bulah lo dingin "In zia deuh tawh em?" min ti a, nui chungin ka lo bu nghat a. 

"A ţha" tih sup pahin lu a bu zauh a, "Tun bak chu kan inhmu leh zen zen tawh lovang a" ka tih chuan "Hmu tawh kher lovang" a ti fan ruih a, "Ngah nge kan inhmuh tawh loh kher ang? Inhmu zut lo mah ila kan la inhmu zeuh zeuh ang chu" ka lo ti hluai a, awm zel a tum dan a la sawi ve hauh lo. 

"Mizoram a awm ka tum lova, vai ram a awm pawh ka tum chuang lo. Ka pa thununna hnuaiah ka awm peih tawh lo a ni ber. Zawn hmuh theih lohna hmunah ka awm ang" a ti ve duah a, "Chutiang ringawt te chu a chi nang, Vulmawii i khawngaih lo em ni?" ka lo ti ve zat a, a in ngaihtuah muk hmel khawp mai. 

"Khawngaih e...duh leh min zui se la. Hmangaih tu a nei bik hleinem" a ti nghut a, ram danga awm hautak zia hrechiang tu ber a ni awm tho sia. 

Ka ngaihtuahna chu hria ni awm takin "Pawisa khawl ka nei nual a, bike ka ti ral bawk ang a, ram dangah pawh thawh tur a awm ve zel" a tih chuan "Kal theihna tur vel i buaipui tawh em?" ka ti leh thuai a, midangin an hriat hlauin kan ţawng zawi viau mai.

"Ka la buaipui ang chu" a ti leh tawp a, "I va ngaihawm dawn ve" ka lo tih chuan "Min ngaina lutuk suh" a ti daih. 

Amah bawk chuan "Min ngaina lo la i khua a har lo a ni mai. Khawvel hi chu inţhenna ram a nia, kan la in kalsan reng dawn. Tumah chelh luih theih an ni lo. Mihring kan in ang lo a, tih lawm chin kan neih rualin tih lungawi theih loh tam tak kan nei dawn tho bawk. Ţha i tih dan danin nung la, ngainat leh rin fal bik nei lovin en liam mai mai rawh. Chutianga i tih chuan i na lo beng ang. Nangmah kha inringtawk la, chu chu a tawk mai" a ti sup sup a, a lungngaih hmel viau lehnghal. 

"I landanah chuan i thil tih tum hi i phur vak lo a nih hmel. I pa kalsan hrehna i la neih chuan kalsan tum lui lo mai la, a duh anga i awm thei lo a nih pawhin chiang deuhin hrilh mai la, Vulmawii pawh hi thlauhthla reng reng suh. A landan ang hi a ni bik miah lo a nia" ka tih lai chuan min lo pawt chatin "Ka hria" a ti chang bal a. 

"A duh chuan min zui rawh se ka tih kha. Min duh a, min thlamuanpui a nih chuan min zui se la, ka kalna apiangah ka hruai ang. Mahse, thlamuanpui tham ka ni hauh lo" a ti a, Gabriela hi hriatchian a har takzet a ni. Hrechiang viau emaw inti mah ila rilru tibuai thei zawng a ţawngkam neih a hrat a, ţul a tih chin bak a sawi ngai mang bawk si lo. A sawi ang khan en liam tawp ila kan hah lo a ni mai. 

Bathroom a ka luh zawk laiin Daisy a rawn kal a, ka kut sil ţha hle hle lai chu min nam chhuak ti tihin "Hmanhmawh teh" a ti pah reng a. 

"Eng nge a?" mak ti deuh tak a ka lo tih chuan "Ka kekawrte hi, a hma lam tur hnung lamah ka dah a, awii...a hrehawm ngar ngar. Chhuak teh ka inthlak lawk dawn" a ti a, min nam leh dawt dawtin ka pen chhuak rualin kawng a khar nghal hmak.

Kan ţhiante chuan Mateo pute in lam bawk an pan a, Muankima pawh zan a rawn len leh tumin a haw rih. Ka pa chuan inleng neiin pindanah bawk a kawm leh a, zu a in nasa tawh lova, a lang fai leh sar tawh. Nu Hriatpuii chuan parawl zu zuar a luh khung a, ka ni pawn Daisy awm ve na chiah a ngai lo aniang hlawh nei a min awmpui turin a sawm a, inchhungah a ţul ţul a khawih a, thla tawpah hlawh kan pe ve ţhin. A nu hnen a awm ai chuan a duh daih zawk a, kan hlimpui phian lehnghal. 

Zan a Muankima a lo len chuan kan ti ti ve nasa khawp a, hmalam hun kan sawi dun a ni ber. Kan inkarah thil ţha lo thleng thei a tam zia hrerengin kan awm dun theih hun tur sawiin duhthu kan sam a, keimah vanga hlawhtlin ngei a tum thu te a sawi ve a, ngaihthlak a nuam takzet a ni. 

Mipa hi hmelţha ringawt melh an ngai pawh ka ti chuang lo. Muankima a hmelchhia ka tihna a ni hauh lova, mize ngainatawm loh tak a nei chung pawh hian duh der tu a hmu ve reng. Zei lutuk leh hmeichhe lawmna siam thiam ngawr ngawr pawh an ţha chuang lo, mipa hi chu rintlak leh innghahna tlak ni se a ţha ber. Mize nghet nei se la, eng hna pawh thawk se an rintlak phawt chuan nupui fanaute an chawm thei tho ang. Driver mai mai kan tih ţhin te paw'n chhungkua an chawm hneh ţhin em hi. Mipa an nihna anga an pawimawhna hria se, mipa ropuina phawchhuak zo ni se a fuh ber. 

Boomer-a rawn haw pawn min fiam veleh zuk zuk tawh a, a rawn bal haw nasa mai. Zan dang aiin a rawn haw hma a, a kekawr a hlim chhoh laia thisen chhuak kan hmuh rual chuan Muankiman a chhan a lo zawt vat a, keichuan ka ngaihsak duh lo lui tlat. 

Ka pa paw'n a khak ve nghe nghe a, aman a zir loh vangin Boomer hi a hau khat a, a insum zo tawh bik lo a nih ka ring. Ka pa'n a hauh lai chuan a ngawi ngul a, Daisy chu first aid box lak tirin amahin a inbuai pui a, a hliam chu bike a an tlukna niin a sawi a, rin aiin a kak zau phian lehnghal. 

Bai auh auh chungin inchungah a chho a, nui ruh ruh chunga Muankiman a lo en reng lai chuan "Eng nge i nuih?" ka lo ti hlar. Tunlai a awmdan hi chhungte tan chuan a nuihzatthlak loh khawp mai. 

"A inti tlangval ve tawh em a" a ti a, sawi tur dang a hre chuang miah lo. 

"Result chhuah rualin i kal nghal dawn tihna em ni?" ka tih chuan "Ni kher lo ang. Reilote ka chawl ve ang chu. In ka luah chuan i lo zin ţhin dawn nia" a ti sam leh et tawh a, a kal daih tur hi a huphurh loh hmel bik riau.

"Kum hi vei zung zung se, i hlawhtlin ni lo ni thut se ka ti" naupangchhia taka ka tih chuan a nuih a za viau mai.

"Ţha deuhin lo awm la, ka ta diktakah ka siam thuai ang che. Eizawnna fumfe ka neih hma a ka neih che chuan nangmah zawkin hrehawm i la ti ang" a ti charh charh a, dik ka tih rualin huphurhawm tak a ni. 

Hun a kal duak duak a, kan awmdun ţum phei chuan ni a rei lo ka ti ţhin. Vulmawii lah chuan Gabriela nen a an awmdan min rawn hrilh reng a, zui mai a hreh loh laiin a pa a ngaihtuah ve tho thu te a rawn sawi chiam zel, khawngaih mah ila tih theih ka nei tlem viau thung. 

Ka ţhiante chu rin aiin an ti ţha vek a, result a chhuah meuh chuan ka lo zir lui lo kha ka inchhir rum rum. Ţhianten result ţha tak an neih meuh chuan ţhahnemngai lo bik a kan ţang ţhin kha kan inchhir viau zel tawh. Tuman lawm an tum hran lova, Vulmawii leh Gabriela te ngat phei chuan mahni in ngei pan an hreh ngawih ngawih. Chanchin min rawn hrilh sap sap hlawm na a hmuh phakah an awm lo vek a, awm hmun aţangin ka lo lawmpui ve em em ringawt. 

Muankima kan thlah ni chuan kan ngui nghiai hlawm a, keipawh Aizawl kal phah. Airport ah chuan mi chi hrang hrang an insul pel zut zut a, Nu Puitein a fapa a zilh malh malh laite chuan thil dang daih ka lo ngaihtuah. 

"I va ngui ve" a rawn tih chuan "Ka huphurh lawk a" ka ti a, ngainatawm taka min nuihin ka kut a hum vang vang a, Muankima tello a nun bul ka ţan ţhat a ngai dawn tih thlengin ka ngaihtuah a, Nu Puitei ngei ai pawhin hrehawm ka ti zawk ang. 

Sana inang kan neih chu kan dah dun a, "Zan dar7 ah ka lo be ziah ang che. Zingah chuan dar6 ah hian ni se la, chhunah chuan dar12 velah" sana a number inziak kawk kual dun dun chung hian a ti a, "Hun dang chu ka ngaih chang apiang chein a ni mai. Darkar tin a ni thei bawk ang a" a tih chuan ka lo nui hak hak a, "Min ngai ve tho angem?" ka ti a, ţah harsat chi ka nia, hun hrehawm ber pawl ka tawn lai mek pawh hian ka ţap miah lo. 

"Nasa deuhin mawle..i rin aiin ka ngai ang che" tih leh min vawnna thlah a rual a, ka biang tawn tawnah dawmin midang mitmei veng hranpa lovin ka chal a fawp zauh a, "Ka hmangaih bawk che. Ka awm rei dawn chuang lo a, lo tuar ţang ţang rawh" a tih hnuah ka chal bawk chu a fawp leh a, "Muankim duhtawk tawh rawh. I nu ka awm ve reng hi, i zakthei lo liau luau emai" Nu Puitein a rawn tih hnuah min thlah ve chauh a ni.

Van sang taka thlawhna thlawk hian lung a ti leng ţhin a, naupanlai phei chuan a chhunga chuangten khawi lam nge an pan dawn tih te, an rawn kir leh angem tih te hre lek lovin 'thil min lo hawn rawh aw' tiin ban kan vai lawp lawp ţhin.

Muankima chuanna thlawhna bik pawh kan en liam a, thil min lo hawn turin ka hrilh lo. Hre phak tawh lo mah se ka rilru chuan lo let leh rawh aw ka ti mawlh mawlh a, thil dang ka duh lo. Hlawhchham pawn lo haw se, Muankima, mi fel tak ţhin kha a la nih phawt chuan ka lo pawm thlap ang. 

Aizawl kal remchan lai tiin central jail ka pan a, vanneihthlak takin inkan ni a lo ni hlauh. Jessie chu hmuh min phal sak a, rin aiin ka hmu ţha daih lehnghal. 

"Ka ngai lutuk che..i lokal har ka ti reng a ni" nuisang chung hian a ti a. 

"Ngati nge khatiang thil kha i tih? Gabriela chiah mipa an awm hleinem" ka tih chuan a hawi kual zak zak a, "Thuruk i hre duh em?" a ti chang fal a, lu ka lo bu nghat a. 

"Gabriela hi ka unaupa a nih hi" a tih chuan ka phu zawk thei hialin ka hria. 

"Dawt i sawi amaw?" ka tih chuan a nui a, a nui hmel te chu ka rap lek lek a ni. 

"Hun kan ngah lo a, ka hrilh zung zung ang che. Thudik hre tur a ka duh awmchhun i nih avangin ka lo nghak ţang ţang che a nih hi. Ka nu leh pate an thih khan Gabriela nen hian kan tel ve a, ani chu vannei zawkah ţangin ka pa uten an la a, keichu min duh lo. Kan inhrechhuak har lo a, phone a kan inbiak ngam loh pawn lehkha te kan inthawn ţhin. Kan inkawmngeih a, lehkha a thiam bawk. Aizawl a kan awm hnuah phei chuan inhmuh kan ching a, kan in ngaina zual zel a, thisen inzawm na na na chu inhmangaih pawh a awl khawp mai. Kar khat chhung a inkawp tih vel kha chu tih mai mai a nih kha. Josephine kha a atchilh a ni ber a, mahse kha mihring kha anpui kawp ching a lo nia, Gabriela kha a duh ve tak tak ngai lo. A nihna thup nan chiah a hmang ţhin. Chuan ka thah a ni lo. Mahse, Muankima khan eng eng emaw a hrechhuak ve zel a, Josephine nihna a hriat tawh thu Vulmawii bula a sawi lai ka hre fuh a, Vulmawii lahin a thla a hmuh thu a sawi sek bawk. Misual chu um lohin an tlan chhe ţhin an tih kha, hriatchhuah an neih hlauin tikhan ka inpe a nih kha. Min bum emaw in tia, ka bum vek zawk che u" a ti a, a nui rah rah a, a ngainatawmna zawng zawng te kha a bo vek tawh.

"Gabriela tan chuan engpawh tawrh ka huam. Ani chuan lehkha zir sela, sang tak thleng rawh se. Nupui fanau neiin chhungkua din se la, tunah amah enkawl tu te khuahkhirhna hnuaia awm reng lo hian zalen vat rawh se" a ti a, "Diary kha" ka tih chuan "Diary ka ziak ngai lo" intihtheih hmel zet hian a ti a, amah ţan tlat tu June pawh a bum tihna a nih chu. 

"Chuan Josephine kha Gabriela thah maw?" ka tih chuan inkan hun a tawp a, min kalsan zet tawh hnuah rawn hawi letin a hmui leh a kut ţang a chuk tuah a, sawi chhuak suh min tihna a nih ka ring. 

Haw pahin thu tawite ka ngaihthlak ho chu ka remkhawm a, Gabriela nen unau an lo ni reng tih a hriatchhuah phat aţangin Gabriela tan engpawh tih a huam nghal a, a tir a ka rindan kha a dik chiah. A hmangaih berin amah aia a hmeichhiatpui a thlang chu duh loin a that a ni. Muankima leh Vulmawii ten an chhui chhuah mai hlauin Jessie bawkin rem a ruat leh a, Gabriela nen an inkawp leh thu a thang chiam a nih kha. Tualthattu a nih kan rin theih nan lemchangin Vulmawii thah a tum a, chupawh Gabriela an manchhuah a hlauh vangin. An thil tih duh dan chu mai ka ti kher mai. Gabriela phei chu mifel tak angah ka ngai ţhin a, mah se tualthattu a ni.

Zanah Vulmawii hnen aţangin chanchin lawmawm loh tak ka hria a, "Cell chhungah Jessie a inawkhlum" tiin min rawn hrilh a ni. 

A TAWP TA (Tawp lai in ti leh hlawm ang chu😂😂)