KA HRINGNUN THAWNTHU-29

KA HRINGNUN THAWNTHU-29

"Awwiii...inneih puiah a sawm che maw?" Zonunin a ti hluai a, duh ai chuan a ring mah mah ţhin a ni. Mahni ngawt a thutlukna siam chi ni lo a ka hriat avangin a thurawn lak tumin ka hrilh ve a, rin aiin a ţhawng daih lehnghal. 

"A rei tawh" ka lo ti sap a, ka beng zawn a kut a ben rik thlarh phei chuan ka che lawih thei hialin ka hria. 

"A ţha lutuk alawm. Rilru i pek ve hma daih aţang tawhin pasal tlak a ni ka tih ţhin kha. I nawmsakna tur a nia, tuman an chaldelh ngam tawh lovang che. Hmeichhe dang chuan hmangaih miah lo mah se a dinhmun vang hian an nei duh ang. Nang chuan i hmangaih a, hmeichhe bula a kal mai mai pawn hrehawm i tia, ani pawn a hmangaih che a, i dinhmun chhiat lai ber pawn a vuan ţang ţang che a, chu bak bak a awm hleinem. Kha leh chen kha in cheng ho a, in inhrechiang ropui si, nei hmak la i hahdam suai suai mai ang" a ti bawrh bawrh a, "Chu lam a ni lo" ka lo ti ve vat thung. 

"Eng lam nge ni a?" tiin min lo en a, a kut ka lo vuan chawt ringawt a. 

"Sangzuala nen kan inţhen aţangin kum3 êm pawh a la ral lo a" ka tih chuan "Chutiang a ho mai mai. Kum khat hnu lek a nei leh te pawh an awm alawm. I hmangaih tawh lova, ani pawn nupui a neih nghal daih kha. I hlimna tur i pan ve chu a pawi reng reng hleinem. Mi ngaihdanah buai lo la, i fapa nen a in nawmsak nan nei hmak rawh" a ti leh zat zat a, ka thaw hak a, ka ipik lutuk reng hi ka kham ngawt mai. 

"A farnu ten an remti kher angem pawh a hriat loh" ka tih leh chuan "Remtih loh nachhan tur an nei lo. An nuţa neihchhun hi a hlim ve an duh chuan an remtih a ngai alawm. Bakah misual tak an ni pawn ka hre lo, an dinhmun ngaihtuah chuan an fel viau zawkin ka hria. A thim zawng hlirin thil thlir lo la, nei pawp la, i hlim chhawm ve mai ang" a ti a, ngaihdan siam a har khawp mai. 

Awmtei lokal chu ka lo hmu vat a, lehkha pawimawh ni awm tak a keng a, kan awmna lam a rawn pan chat bawk. 

"Pu Saia hi a kal em le? Lehkha ka entir duh e, doctor dang ka duh bawk si lova" a ti niah niah a, "A lo la kal lo a, mahse a lokal ang, lo nghak la" tiin ţha deuhin chhang mah ila ka lo en uluk khawp mai. 

Nidang ang bawkin a inchei nalh lehpek a, a vun a ngo vang nge a hmui hnawih sen no chak chu a inhmeh bik riauin ka hria a, a ti lang no lehzual emaw tih tur a ni. Tshirt leh jeans a ha tawp a, a chhipah a sam a bawk khawm vek a, a landan mawl mang tak chu khawlum lai chuan hmuh a nuam viau thung a ni. 

"Aw..ka lo nghak ang..khawi ka lo ţhu ve mai teh ang hmun dangah chuan damlo an ţhu duh ang" tlangnel taka a tih chuan Zonuni chu ka lamah a rawn tawlh phei sât sât a, a lehkha ken a inzah hliau hliau pahin Awmtei chuan "Love high-a pawh hi a lo la kal nange" a ti a, Zonuni en kânin keimah zawk min rawn en daih bawk.

"A nih hmel..ka la hmu si lo a" ka ti ban charh a, Zonuni chuan Awmtei nen chuan min en tawn leh zak zak ţhin a, inang min ti lehpek tawh aniang chu. 

"A lo va kal har ve a, doctor te chu damlo ho thlen hma a thlen zung zung zawk tur alawm. A mamawh tu ten an nghak char char dawn tih an hriat vang mai hian an muangchang vak zel ringawt a, min mamawh em a, khawi nge kan kal hma ang e tih hi a awm lo ve ngawt mai" a ti lang lang a, a rangkachak bengbeh kual te chu a langsarin a vun nen a inhmeh khawp mai. 

"A la tlai chhe hleinem" Zonunin a lo tih ve chuan "A tlai chhe lo a a tlai alawm. Pu Saia pawh hi a van rei em em. Mipui tana mi pawimawh an pawimawh tih an inhre leh lutuk a a buaithlak a nih hi" a ti a, ani pawh a rawn thleng chauh a, a phun nasa hman khawp mai. 

Neihkimi lokal lah chu "U Neihkim i va nalh ve a, Egypt lalnu ni awm a mawi i ni" tiin a lo fiam zeuh a, a nui zui uar uar lehnghal. 

"Eng nge i lo tih dawn?"  Neihkimin a tih chuan "Pu Saia ka rawn hmu lawk dawn. Ka pa lehkha hi ka entir ve chhin dawn em maw ni ka tia, tuna kan doctor ah hian ka nu a beidawng deuh aniang doctor thlak te a sawi a" a lo ti ve mai a, a pa a sawi takah chuan Hmangaihsanga thusawi kha ka hrechhuak zawk mai. 

"Phaiah in kal dawn emaw tia" Neihkimin a tih chuan "Awmzia a awm chuang lo ang an ti aniang. Doctor thlak hi ţul ka ti vak lova, mahse ka nu'n a tih tlat chuan in damdawiinah kan lo insawn ang" a ti a, an ti ti chu tlemin ka ngaihven ta deuh bawk. 

"Tunah khawiah nge in awm?" Neihkimin a tih chuan "Civil hospital ah" a lo ti a, Hmangaihsanga khan dawt min hrilh chiang a ni. Awmtei te inah a ti ringawt a, damdawiinah a kal dawn tih a sawi tel hauh lo. 

"A nih chu mawle..lo dam vat rawh u" a ti ve mial a, Hmangaihsanga dawt sawi ringawtin rilru a luah leh tawh thung. Hospital ah ka kal dawn tih chu a har viau em maw ni. 

"Eng nge tunlai hmangaihna lamtluang te?" nui hak hak chunga Awmtein a tih chuan Neihkimi ka lo melh ve vat a, a bialpa hi ţhen daih se ka ti zek zek a ni ber. 

Chhang lem lova a kal daih chu "Pasal nei ve tawh rawh. Kţp conference ah pawh i kal ve theih tawh chuan loh kha" tiin a au zui a, hlau lo ve pang pang tak a ni. 

Hmangaihsanga lo lut chu ka lo melh hrak a, Awmtei erawh chuan "I va tlai ve Love high, damlo ho an beidawng mai dawn alawm. Tih ve zung zung tur che a nia" a lo ti lang lang a, hmelah inanna lai nei ve bawk mah ila kan zia chu a hrang hlak thung. 

"I muttui em?" ka hmaah a rawn ding a, tur deuh khai a ka lo melh takah chuan a nui suk a, "I mumang a ţha vak nange?" a ti zui zat bawk a, i dawt sawi ka hrechhuak tih ka chak khawp mai.

"Mumang aia ţha lo dang a tam" ka ti hmak a, Awmtei chu Hmangaihsanga bulah a lo ding der tawh. Kan inlaichinna hrereng chungin ka hmuh lai chuan a banah a kuah a, a ban a pawm bet tlat a ni mah zawk ang. Hmai zawngthal haw a en pah hian "I tlai ta sa sa Pu Saia min lo nghah pui teh" a ti vel a, "Eng turin?" tih bul hmuk pahin Hmangaihsanga chuan a en chhuk ve run a, an awmdan chu nuam a ti hauh lo tih hre mah ila hmuh dun zel ka duh loh avangin hnuai lam ka bih ta daih a. 

"Lehkha ka hmuh tir lawk dawn. Mahni a ţhut reng a ninawm tawh, ti hian la awm ve rih rawh aw" pangchang aw tak a a tih chuan Hmangaihsanga chu a lo rum nghut a, a ning viau a ni thei a, a ning lo maithei bawk. 

"Naupang angin awm suh" awki hniam ruih a a tih hnuah "Zote, chhunah thil min lo eisan suh aw" zangkhai deuh zawk hian a ti leh a, ka hming a lam ve takah chuan muangchangin ka dak chhuak a,min lo nuih suk a, Awmtei pawh chuan a lo la kuah ţang mai. 

"Tui deuh ka lei ang che" nelawm tak hian a ti leh a, ka unaupa ang a ka ngaih loh hnu hi chuan a nui te hi mawi ka ti vek tawh. 

Min kalsan hnuah Awmtei chuan "In inkawp ve viau tak tak em ni a?" a ti a, ka hmazawnah dingin dawhkan a bawh a, midang a dip tlat te chu pawi a tih loh hmelin ngun deuhin min en a, min zirchian a tum ni awm tak a ni. 

"Kan inkawp alawm" tih ringawtin ka chhang a, a aw pawh a vin hran lo. 

"Fa i nei tawh chung hian maw?" mak tih hmel deuh a a tih chuan ka bu nghat a, a nui hak hak mai. 

"Buy 1 get 1 free a ni mai dawn a nu maw? Fa i nei tawh hi pawi a ti miah lo em ni a?" a ti a, a bul vel a ding ho chu ka hmai zah khawp mai.

"Midang i dip a nia" ka tih pawh chuan "Keichu hriatchian ka chak zek zek zel. Zep ka nei lem lova, sawi hreh ka nei lo ang bawkin zawh hreh pawh ka nei lova, mi ka rel ngai lo thung. Chuvang chuan han sawi teh, i fapa hi nangmah ang chiahin a ngaina ve em? I hmangaih angin a hmangaih ve em ka tihna a nih chu" a ti deuh duah a, chhan beiseiin Zonuni ka melh a, ani chuan hna a thawk. 

"Hna a tlem deuh hunah kan sawi dawn nia" ka ti a, a hnunga ding chu ka be daih bawk a, a inthiarfihlim ve mai. 

Pu Saia pawh a nghak chhuak aniang "Pu Sai" a tih lauh hnuah a kalsawn zui nghal a, ka thawveng huai thei alawm le. 

"Khanu kha a nasa ngawt ang. Neihkimi pawh a chhaih lui char char ngam a, mi awm laiin mimal thil a zawt salh salh ngam che a, Hmangaihsanga a kuah thuak thuak bawk si, zah hre lo leh nasa ve tak a ni phawt ang" Zonunin a lo ti nghal var a, ka ngaihdan chiah a ni. 

"Ni tho mai mah se mihring hian mize hran hran kan nei a, Awmtei te ang a ri huau huau hi an rilru a ţha duh" tiin a thlavang ka lo hauh a, ţawng nem hlawi hlawi ho hi an chhungril a kha fek zel. 

"Ka hre tho a, rilru ţha deuh chung pawn a nasat theih tho alawm. Hmangaihsanga kha a duh hmel ka ti" a ti a, inlaichinna an lo neih tawh ţhin te a hre ve miau lo alawm. 

"Aniang" ka lo ti tawi tak a, pen hmawr a min hawlh zeuh pahin "Anih phei chuan nei vat rawh. Rilru ţha tak pawh nei se a duh ve miau chuan a ze ţha lo lai ber a chhuah tir ve thei tho alawm. Hetiang thil hi mihringte kan buai tamna ber a ni ziah a nia aw. Hnam dang ho phei chu an duh ber te an neih theih loh ai chuan ti a inthat duh tawk te an awm a nia" ngaihţhat loh hmel tak hian a ti a, ka lo nuih liam mai mai thung. 

Awmtei chu a lo let leh har lo khawp mai. Min pan ding leh chat a, a hawi kual thuak hnuah "Mi an tam tawh lo bawk a min hrilh tawh la, engtin nge a pawm thlap theih zawk a? A lo va danglam tawh awm ve" a tih chuan "Amah zawt mai rawh" ka ti hmak a, mi nunah ka buai ngai lova, ka nuna an lo buai ve pawh ka duh chuang lo. 

"Ka zawh chhuah theih dawn loh vang alawm nangmah ka zawh che" a ti a, a ţawng ring lutuk ta bik lo. 

"I thil hriat duh hi i pa aiin a pawimawh zawk em ni a?" ka tih chuan a ţhen sak a, "Dialysis tih a ngaih hma a transplant tih kan duh a, kan phi buai reng alawm. Kan inhre tawh sa tho a, hetia kan inhmuh remchang takah chuan ţhian angin ka zawt mai mai che" a ti nawi niaih a, "A rilru ka hriatpui vek kher hleinem" ka lo ti a, a la ner nang nang zui. 

Diktak chuan ho te te a ka thinrim te hi ka natna avang chauh a dawh hram hram a nih ka ring ve tho a, rilru kal sual laklawh thunun ka harsat bik zia a hriatthiam ngei pawh ka ring. Ka natna awmzia hrethiamin thinrim lo turin a insum hram hram ţhin a nih ka ring ta ber. 

"I boring emai" min ti a, nghah nei ni awm takin kan bulah chuan a ţhu leh a, "Tih tur i la nei em ni?" Zonunin a tih chuan "Ka nu'n min lo biak hun ka ngaichang lawk. Ka pa chungchangah tho a nia, min rawn biak dan a zirin Pu Saia ka hmu leh ang" tiin ţha deuhin a lo chhang leh ang lawi a, a maksak ve ngawt mai. 

"Nangni pahnih kha thisen inpe ve dawn em?" Rb-an a rawn ti a, coat var a ha lova, chhuah tum te pawh a ang. Eng emaw pual a thisen pek runpui neih an tia, eng pual chiah nge an tih kha ka hre leh ta lo. Tunlai chu mumang ang ruai reng ka ni ka tih tawh kha. Chhum chhah zualpui a kian hnuah pawh kiang ve duh lova châm bang a awm reng ţhin. 

"Pe ve lo mai ang. Keichu hriau hi ka hlau tlat a, a theih chhung chu damdawi ei ka duh" Zonunin a tih hnuah "Keipawh ka pe lo mai ang" ka lo ti ve vat a, "E...Zotei phei chu i pe ngei ngei tur a ni. Nang phei chu i blood group a common lo si" a ti kher a, damdawiin a ka ţhian neih ve te ho nen a kan ti ti khawm laiin kan sawichhuak a, ka ngaih ho viau laiin sial an ti em em hlawm a, thil vâng leh dangdai na na na chu Rba pawn a hrereng a nih ka ring. 

"Common loh vang ngawt a pek tur tihna a ni hleinem a. Tunah tak phei chuan duh mah ila ka pe thei kher lovang, ka HB te hi a hniam ang ka ring" tiin ţan ka khawh a, a pa an buaipui ber lai a nih miau avangin Awmtei chuan "Eng nge i blood type chu ni a?" a lo ti ve vat a, a dik lo hrilh ka tum laiin Zonunin "B-" a lo ti hmanhmawh a, Awmtei chu a meng nghal kawk a ni ber. Rba reng reng pawh sawi loh tawp tur a rawn sawi a, damdawiin a ni a, natna leh a kaihhnawih lam sawi a tam ber tho bawk si. Aa..thisen pek run pui neih ni ni kher lo se ţha zawk tur. 

"A va mak ve" a ti ban charh a, engmah ka sawi duh lova, en pawh ka en duh tawh lo. 

Anu nen an inbiak zawhah Pu Saia hmu turin a kal leh a, ka blood group a sawi lan kher avang chuan Zonuni chu ka hau a, "A ho e..blood group a ni mai a, thuruk a ni hleinem" a ti sam et a, mi awm ţha hle hle lai min rawn beisei tawp lo turah ngai hmak ang. 

Awmtei lo let leh chuan min be leh ang tih ka lo hlau viau hman a, mahse min be lovin min kalpel ta hlauh a, kei chauh ni lo Zonuni pawh a thaw huaiin ka hria. 

"I awm nawm lohna tur thil a zawh leh vak vak che ka lo hlau lutuk a" a ti a, ani chuan eitur a chah leh mai a, keichuan Hmangaihsanga ka lo nghak thung. Dawt min hrilh avang khan thinrim ve deuh mah ila naupangchhia deuhin ka che thei chuang hleinem. 

Chawhnu lamah a lo chhuak ve chiah a, damlo an rem duak tawh a, nilengin kan awm ve ţhin tak na a Zonuni nen hi chuan kan hah lo khawp mai. Damlo a indawt a hming lam ngai lah midang kutah a awm a, lut chhuak lo dawnsawn hi a ni ber. 

"I ril a ţam tawh em?" nelawm zet hian a ti a, min thinrim khumin zahlo deuhin min be ngai mang si lo a a chang chuan thinrim luih tlat a har ţhin. 

"Ţam vak lo" tih pahin ka tho a, ka ţhutna hmun aţanga ka chhuah chuan ka kawngah min rawn kuah nghal chat a, kan in en hnai viau lehnghal.

"Min kuah kher suh" tih hlak pah a a kut phelh sak ka tum chu min kuah nghet lutuk a a ngaihna a awm lo. Mi an awm mang tawh lova, in entir tur ho ţhutna phei chu a ruak vek tawh, Zonuni ringawt chu a hmaizah vak lem lo a nih hmel. 

"Va ei lawk ila" a ti a, min thlah ve ta hram e. 

Kan inzui chhuak leh ta nge nge a, pawnah chuan mi an lo la awm sap sap a, chuvang te pawh chu aniang insi lovin kan kal dun ringawt a, dawrah phei chuan lut hmasa zawkah ka ţang a, ka hnungah min lo zui a, a kil deuh lai chu chuhin ka ţhu tharh a, ani pawh ka bulah ţhu lovin ka ep chiahah a ţhu ve mai. 

A kil deuh lai ka thlang ve tak na a eitur kan chah zawh chuan nutling pakhatin a rawn be buai a, a sawi hmangah a fanu chu he damdawiinah hian an enkawl mek niin a lang. A ţhutna sir lama ding a nih miau avangin Hmangaihsanga pawh chuan sir zawng min chhawn tlat a, helai hmun a kan kal hmasak ber ţum kha ka hrechhuak uai uai mai, sir zawng ringawt pawhin hmelţha ka lo ti viau tawh a nih kha. Nutling thusawi chu ngaithla in zawhna a zawh chang chuan tawi te tein a lo chhang ţhin a, a nuihin a mawi a, a thutak viau hian a hmelţha bawk a, hmangaihnain phu loh a nei lo an ti ţhin nachung hian landan ngau ngau ah chuan phu lo ka inti khawp mai. 

Amah rawn be tu nutling kalsawn tur a inher rual chuan "I chilthli a tla ang e" ngeiawm zet hian a ti a, nui ruh ruh chungin ka lam a lo hawi a, ka lo la tum hmak thung. 

"Vawiin lam eng nge i lo an?" pangai taka a tih chuan "Ka ţha" ka ti hmak a, min en dan chuan nuam lo min tih tir viau mah se ka lanchhuah tir duh bik lo.

"Tih dik loh ka nei leh tawh a ni maw?" chik deuh a min en chung hian a ti a, eitur an lo dah chu ka pawn hnai rawk rawk a, zawhna min zawh leh ka hlau chuan ka ei nghal mawlh mawlh a.

Min be tawh bik lova, keipawn engmah ka sawi rih lo. Bulţan dan tur ka hre lo a ni ber. Doctor in damdawi min chawh kha ka la ei ve reng a, ruih theih chi pawh telin ka ei chuan mutchhuakin min zem chiai chiai zel a, zan a eitur a a tih a ni. Mut ka hmu tawh chung pawh hian ka thinchhiat rukna te hi a la reh hleithei lo a, a ni lo thleng thleng a thil ngaihtuah ka chin lah chu ka bansan hleithei der lo. Damdawi phei chu ei lo ila tun ai hian ka inthunun thei lo lehzual zawk ngei ang. 

Rilru lam natna hi chu tuar ve lo te chuan min hrethiam tak tak ngai lova, 'ka hrethiam che alawm' ti ţhin tu te pawh hi rilru lam natna in a kentel kan mize mak tak hian a ti thinur leh mai ţhin. Zuau bik nih hlawh a awl a, rilru te min ti tu pawh an awm ţhin ang, chiai na leh manganna te avang hian kan bul a awm peih loh phah an tam ang a, kan tih luih emaw ti tawk pawh an awm ang. Tuar ve lo ten awlsam te a min hua a min hrethiam lo hi a mak ka ti hran lo, mahni leh mahni pawh kan inhriatthiam tawh loh chinah chuan midang tan hriatthiam ngaihna a awm lo. 

Ka bowl a mi ka ei zawh hnuah "I puar em?" a lo ti leh tawp a, min en ran a, a mitmeng chu ka hriatthiam theih miah loh ang kha a ni leh tawh a, mahse thinrim hmel a pu lo thung. 

"Aw puar e" ka lo ti ve mai a, tui inchhawp chu noah thli chhuakin ka in leh te te a, kal nghal mai tum a ka tho chu "Ţhu leh phawt rawh" a lo ti thuai a, dawr chhunga awm an tam tawh loh avangin keipawh chu ka ţhu veleh mai. 

"I zia tawh em?" min tih chuan ka rilru buai lutuk ţhin a sawina a ni tih ka hre nghal a, "Thaw chham lek lek khawp chuan ka la buai leh rih lo" ka ti a, min en rûn a, ka natna hi kei aiin a vei zawk emaw tih mai tur a ni.

"Rilru kap tu i nei em?" a tih chuan hreh deuh hian "Dawt min hrilh a" ka ti ban charh a, ka thusawi hriatthiam loh hmel zet a mithmul a lo kan ûk te chu ka ngei lek lek a ni.

"Awmtei te inah ka kal dawn i tia, damdawiinah an awm reng sia" ka ti a, sawi nuam ka ti bik lo. Keipawn a ho chu ka ti ve tho mah se dawt a nihna a bo chuang lo. 

"Oh..kha kha maw? An in a kal tur angin ka chhuak ngei alawm" a ti then a, "Chuan?" ka lo ti vat a, a nuih a zat hmel viau tawh. 

"An in ka thlen hnuah an awmna tak ka hre chiah. Awmtei nen kan kal a, cabin no. 7 ah an awm. Phone ka keng lova, ka hrilh diak diak tawh lo che a nih kha. Hriat duh dang i la nei em?" nuihza aw taka a lo tih chuan ka hmui ka pet zauh a, a sawi chuan a dik leh vek tho bawk sia. 

"Nei lo e..i sawi lawk loh ang deuh a thil ka hriat vang mai mai mawle" ka tih chuan "I putea chu i lo sawipui tawh em?" a ti leh daih a, lu ka thin vut hnuah "Tlaiah emaw zanin ah ka hrilh ang. Keimah tak pawh hian rilru ka la siam fel lo a, ka thutlukna ka la hrilh thei chuang lo che" ka tih ve chuan rin ai takin min hrethiam leh ang lawi a. 

Hetiang thil hi chu remtih tlanna a ngai a, mi pakhat chauh thu a kaltlang pui theih chi a ni lo. Keimahni kan hmin zan tawh hnuah pawh chhungkua inrawn khawm fe hnua thutlukna siam chauh ngai chi a nia, chuvang chuan "Neihkimi te i sawipui tawh em?" ka ti a, "A thawi chauhin" a ti nghat a, tukin a Neihkimin min en duh miah loh chhan kha a ni angem le tih zawngin ka ngaihtuah leh hman tawh. 

"Malsawmi hi a va reh ve..Neihkimi chuan innei turin a la duh tho ang che u tiraw?" ka tih chuan "Khalam chu ka thu thu. Keimah chiah min en tur a ka hrilh tawh che kha" a ti bung nghut a, Malsawmi chungchang sawi hi a duh vak lo ţhin khawp mai. 

"Tlaiah ka lo sawipui dawn nia" ka ti ta nge nge a, lungawi ta ang hrimin a bu nghut a, Kimkim-a vel kha chu ka la sawichhuak ta chuang lo. Buaina min bawh tu tam lutuk hi ka kham a, ka sawi reng peih lo a ni ber ang chu. 

Ka putea nen chuan pindanah kan ti ti a, ani lo hi chu midang râwn an ngaiin ka hre lo. A hmai a tuai puak a, kuhva a seh sen ham bawk a, a'n ţhial ri chak chak chu tui hmel tak a ni. 

"Ka lo ngaihtuah ve reng ţhin tho a nia, nang chu thuhranah dah ila, Bawiha hi pa tello a seilian tur chuan a khawngaihthlak a, Sangtea hian a hmangaih tho chuan nei mah la a pawilo ka ti rilru ve reng zel. Pa tello a a seilen chuan i kawng zawh ang zawhin fahrah nun a hmang ve dawn tihna a ni mai a, phal loh nachhan tur ka nei paw'n ka hre lo. Sangtea lah mi rilru tluang a nia, a lang tlang a, a ngaihven ve tak tak che u tih a hriat bawk a, amaherawhchu a chhungte lam an hmin zan em tih hre ve phawt la, unau anga khawsa ho ve ren rawn tawh in nia, mipa a nih vang ngawtin an phal lo chung a lo nawr lui pung pung ang e, an remtih thlap loh chuan nakinah nangmah bawkin hrehawm i la ti ang" a ti charh charh a, mahse Hmangaihsanga hi rei tak ka lo hre tawh a, ka nu rilru dam loh ai chuan min hmu duh lo ţhak zel a, lehlam lehlam a phalna a neih phawt loh chuan palai a lo tir hauh lo ang. 

"An hrethiam viau chuan ka hria" ka ti thla ve rawk a, Bawiha pawh lo lutin khumah a lawn a, ka malchungah a bawk zui ar ar a, Sangzuala chuan hmu ve mak a ti ve ngawt ang, a lian tawh emai.

"An remtih tlan phawt chuan in thu thu a ni mai. Duhthlang thei rual in ni tawh a, nawr luih chi in ni tawh lo zawk a, ţha intih angin ti ula, nang phei chu pasal ţhen tawh i nia, i ţhen nawn leh chuan miin mak an ti tawh ang che. Ngun deuhin ngaihtuah la, i hmangaih a nih phawt chuan nei rawh. Engmah in dal tir suh" a lo ti leh a, ka nu boral hnu chuan ka putea nen hian inhawng takin kan ti ti fo a, tun hma zawk aiin kan inpawh zawk a, keipawn ka ngaina viau tawh. 

"Awm lo ta ila zu i lo zuar leh mai angem?" ka tih chuan "Khai a..Matei ţhin hi a" nuih hak hak pah hian a ti nang nang a, bansan thut harsa a tih zia ka hre miau alawm.

"Zuar tawh bik love..Kawltean 'kan huanah vawk leh ar vulh ila' a tia, kan insawi phur ve khawp kha. Kawltea hi ruihhlo a buai ve hrep rawh Pathian a damna chang a nia, ka eizawnna thlak ka tum hi kei ai mahin a phur zawk a, min ngaihtuah duh reng reng suh. Pasal i neih chuan lungdam deuhin i kal dawn a nia" a ti dam thlap a, 

"Mahse thuam chhawm hi kan buaina tur pakhat a ni. Kei lahin pawisa khawl sa ka nei mumal mang bawk si lova" a ti leh a, a hnual nghal rawk ni maiin ka hria. 

"Mamawh ang ka neih theih chuan a tawk mai alawm" ka ti a, ka buai rukna ve tho a ni. Ka nu min dah sak hi chu ka putea bulţan nan a hman ka duh a, ka hlawh lah a beitham ve si, inneihnain ken tel a ngah lutuk hi chu mi rethei te tan bawk hian a manganthlak. 

Ni hi a din reng bik loh avangin kan hmang liam ve zel a, hna nei ve ve kan nih avangin inkawm falna hun kan nei lo a tih theih ang. Damdawiinah lah mi mit ti kham zawnga awm a hlauhawm a, in lamah lah kan inkawm fal vakna hmun a awm bawk si lo, inneih chungchang pawh a theih ang angin kan sawi dun ve a, thuam chhawm ka sawi lahin "A ngai lo a awm sa vek" a ti mai zel a, Ruattei min sawmna pawh kha hrereng mah ila tun thlengin Bawiha ka la len phei pui chuang lo. A nawm loh na chin a awm ve a, an nuţapa nen a kan thil tum ruk dan an hre vek tawh ngei ang a, inlan sek ka hreh a ni ber. 

Rei ngial kan ngaihtuah hnu leh vawi tam kan sawi dun hnuah palai hmel chu ka hmu ta ngei a, krismas a hnai tawhin khua lah chu a vawt vin tuk tawh a, duty naah pawh puanlum nen ka thawk chhuak rup zel. Ka la hriat ngai lem lohte hmel ka hmu a, ka putea pawn pangai takin a lo dawngsawng a, vawikhatna chauh a nih avangin aw a lo pawh mai bik lo. 

"U Sangtea chu a ti tak tak ta ni maw? Pa Sawma nen insawi leh zeuh ţhin tih chu ka hria a, mahse U Sangtea zawk hian a sawi ve mai mai emaw ka tia, palai hmel kan hmu thut chu ka lo ţek chhawk thei alawm. Tun thleng hian ka la pangngai lo in ka hria" uar fe a Thiangin a tih hnuah Muanpuii chuan, "Chu chu lawm...tunlai mipa tam tak chu hmeichhe thlem nan inneih an ti ve ringawt zel a, an duh ang an hmuh hnuah an nei leh duh tak tak ngai bawk si lo. U Sangtea hi chu a fel thlawt a ni" a lo ti ve zat zat a, an phur hlawm khawp mai. 

"Nih leh U Thiangte, U Hruaitea chhungte kha an fel em? Kha, hmanah an inah chaw ei tur a i kal tawh kha" Rinrini chuan a lo ti ta daih a, khami hnu khan Hruaitea pawh a lo leng veleh fo tawh a, Thiangi nen pawh an inkawmngeih leh viau tawh.

"An fel lutuk ringawt. A nu a fel tawp a nimai. An hausak vang khan a mitin min lo xray thlap dawn emaw ka tia, mahse a ni lo reng reng. Ţha tawkin min bia a, a nui reng bawk sia, a ţawng nem hlawi lo a, ri huau huau chi a nia, U Sangtea pate unau hi an lo fel em a nih hi" a ti lang lang a, Hruaitea nen an inkawm leh hnu hi chuan a chhungte zia a sawi phur nasa viau tawh. Hmangaihsanga pa leh Hruaitea nu hi unau inchhang bung an nia, vawikhat chu ka hmu tawh a, nu lian leh hmelţha vuah mai a ni. 

"U Zotei te chu krismas hmain an innei ngei awm sia, awii polytechnic ah khan puanţhui te lo zir zawk ila ţha tur a nia, kan thawmhnaw hak tur kan han ţhui chawp mai tur" kuhva thel mawlh mawlh pah hian Rinrini chuan a lo ti ve lang lang a.

Inneih chungchang vel a kan buai viau chung pawn ka putea eizawnna tur ka dap pah ve reng a, Hruaitea ţhianpa chuan thawmhnaw min lakpui thei tho mah se nepnawi hi hralh a kal zawk ang an tih avangin neih ang angin kan la khawm ve a, kan veng a mawng a, chuvang chuan veng lun lai thleng peih lo ten a hnai zawk min lo pan zel an beisei hlawm a ni. Mi anga tam phei chu kan la thei lova, kuhva pawh hralh tam lo mah ila kuhva ei an tam em avangin tlem tlem chu kan hralh ve ţhin. Ka putea leh Thiangi ten zu an la nghei hmak thei lo hi kan buaina ber a ni tawh a, thil dang buaina em em kan nei tawh lo. Damdawi ka la ei reng a, doctor pawh ka la hmu zeuh zeuh, counsellor pan tur a min duh viau laiin ka lo hnial zel thung a, panic attack hi ka hriat hmasak ber chhiar tel loh khan vawi hnih ka nei leh tawh a, inthunun a, nunpui ka tum hram hram thung. 

"U Zotein pasal a neih pawn keichu patea bulah hian ka awm reng dawn. Lehkha ka zir tawh chuang lo" Rinrini bawk chuan lo ti lehin Muanpuii pawhin "Keipawh ka zir tawh bik lo a, putea bulah ka awm reng dawn. Inah chuan ka nu'n min kaitho hma ziah a, ka ning" a lo ti ve nghal zat a, nuam an ti tawhin keiphei chu min ngai lutuk tawh ringawt. Ka biak tam loh ţhin nen min ngaina lutuk hi a mak zawk. 

"Duh lo mah ula an lo hruai tho ang che u. Lehkha in zir lohna a rei tawh a, phal se chu hman hmanah khan an rawn dah daih tawh ang che u" panhnah hruk mawlh mawlh pahin Thiangi chuan a lo ti ve a, an nu leh pate hi beisei nei a ţha der an nih ka la ring fan a ni. 

"Hmanah kha chuan patea hian zu a zuar alawm. Bakah in lamah ţangkaina kan nei chuang lo a, patea kan awmpui duh kan ti tlat mai dawn alawm. U Thiang nangpawh i haw duh tawh bik loh kha a, hmanni a i nu'n rawn hruai che a tum pawn pindanah i tawm tlat kha" Rinrini chuan nui rah rah chung hian a ti a, "Kan in awmna a nu a hrilh thlap hnuah pindan aţangin 'Ka haw duh lo' a ti leh ţuau tho sia" tiin Muanpuii chuan a lo tui hnih a, an chhaih zui vak vak a, kan in reh ruih ţhin aţang khan hlim nui thawm a chhuak ve ta fo mai. 

"Ţawng ţawng loin ti zung zung rawh u. Zingah in tho hma thei si lo, Thang Lm-a te chhungin zingkarah kuhva an rawn lam leh ngei ngei dawn a nia" ti a ka putean a lo khak te chuan "Inhralh lo i hlau emai, pawisa i duh sawt riau" an ti a, "Kamiz ţial ruk pawh a ha tawh ngai lo, zu a in tlem a, tshirt chauh a ha duh tawh" an ti a, ka putea pawh za lo deuhin a khi ve suk suk a, hausa lo mah ila tunhma ai thlawt chuan kan hlim ve tawh a, in chhuahsan ka hreh phah hial a ni. 

Kan insawifel hnu phei chuan ka naute ho chu an phur khawp mai a, kawr thar an duh ve si, an hlim viau rualin an thil thar neih duhna chuan a uai rit ve deuhin ka hria. 

"Keichu U Hruaitean min lei dawn" Thiangi chuan inti thei zetin a mithmul a ti kang euh euh a, a nui sang mai bawk a, Muanpuii leh Rinrini te an nur nang thung.

"In nu leh paten an lei ang cheu an ti an tia lawm. Rinrini phei chu i pa'n lo ţhui tir rawh a tih che kha" ka putean a tih chuan "Tlawm deuh bak an phal tawh hleinem. Tunlaiah thawmhnaw tlawm deuh chu a nalh a vang e" an ti niah niah a, "Khawsak phu tawk in hak khan in mawipui ber. Khawsak phu lo a inchei chingte hi miin an nuihzat zawk. In ti tuai a nalh a, ho lam deuh pawh ha ula in mawipui vek ang" tiin ka lo thlem a, ka nu unaute pawh an phur viau tawh a, mahse man pawh kan la inhlan hma hauh aţang hian keimah ber hian ka huphurh ngawih ngawih ringawt a, ka hmangaih ngei a, chu ti ang a nih rual chuan a hmai ka zah vang chauh a nei tur niah ka in ngai a, ka hnial hreh vang niin ka hre ber.

"Awii...man hlan hun pawh i nghak thleng thei nange? Inneih sawi lai mek mekin kan changtupa pawh a lo lang hlawl alawm" tiin Hmangaihsanga lo lut chu an fiam a, hmeichhe awmkhawm an ni bawk a an nui ring khawp mai. 

"In va nung vet vet ve" a ti a, Thiangi sam a tuai pah zeuh a, a lai ve deuhin ka hria, an lo nuih nasa em alawm. 

"Cigarette hi keimahni chiah min dawr tawh rawh kan tih kha aw. India phei chu hlep a chhe zawk daih a nia. Pakhat lek pawh i lei khan kan tan a ţha. Aaa..zantin i lokal tawh loh takin lei lawk ţeuh mai rawh" Thiangi chuan a lo ti a, ţhahnem a ngai lutuk hi kan tan chuan a lawmawm. 

"Sangte kha hei zozial hi lo zu ve chhin teh. Keichu ram dang vaihlo hrual mum ai chuan mizo nu ngeiin a hrual mum hi ka duh zawk a" ka putean a tih chuan "Saw lah saw a" an lo ti hlak a, cigarette a lei loh phah an hlau a ni. 

"Ka dawr ang che u. Ka zu tam ve lova bawm khat pawh ka ring rei" ka putea ţhutna lam pan pah hian a ti a, ţhutthleng hranah a ţhu a, a bulah ka fapa pawmin ka ţhu phei ve nghal zat bawk. 

Ka putea zozial pek a ban lai chuan "U Sangtea chu a kut a fai sia, sana man to tawk nen phei chuan ram dang cigarette ngat hi a inhmeh zawk" an lo ti leh pek a, Hmangaihsanga pawh a nuih a za ve viau mai. 

"Pa Sawma chu i inhralh theih dawn khawp hi. An sumdawng thiam hlawm bawk a" nuihza aw tak hian a ti a, zozial khu nasa lutuk chu ka lo vai kiang a, zial khu hi chu ka ti hleithei der lo. Zu ve lo tan chuan a rim a na bawk si. 

"Kan in hi chu Thang Lm-an nuam a ti ber tawh. Ka fate hoin an zir bawk a, hunawl a neih apiangin a lokal" ka putean a tih chuan Hmangaihsangan a awmna a lo zawt a, "A duty aniang...tunlai chu zan lamah a kal ţhinin ka hria" a ti a, kan in a zu rawn in ţhin ţhenkhat kha lo len zeuh ching an la awm a, ka putea an ngainat vang chauh a ni tawh thung. 

"Awmtei pa chu eng nge a an a?" ka ti mawi ve a, tunlai a ţha lo zual viau niin an sawi.

"Dialysis an tia, hei hian a la chhan rih thei maithei" a ti a, a chian bik loh hmel khawp mai. 

"A zia lo hle mai" ka ti a, sawi zui tur phei chu ka hre chuang lem hlei lova. 

A haw tur ka thlah dawn chuan bathlarah kan han ding kawi leh rih a, "Dawr te kan siam ve hnu phei hi chuan inkawmna hmun a vang lehzual a, hrehawm i ti ţhin awm" ka tih chuan a hmui a ti zawi sauh a, "Ti love..ka nupui i ni ţep tawh tho a" zawi sup hian a lo ti a, ka kawngah a chelh zui zat a. 

"Nia i bulah ka awm reng tawh dawn a" chiang lo ruai hian ka ti a, kan awmzui zel dan tur hmuh tlang vek ka chak khawp mai. Kimkim-a lah chu chhuanlam ho te te siamin damdawiinah a lokal reng a, Hmangaihsanga leh Neihkimi te hian rinhlelh ngaihna an hre ţhak lo lehnghal. 

"Lut tawh rawh i naute ho khan an lo ngai hman ang che. An bulah i awm rei tawh dawn si lo a" a tih chuan ka lo nui hak a, hlimna chauh lo chuan thil dangin min phuar tel tawh lo hram ka beisei tlat a ni. 

CONT..