KA HRINGNUN THAWNTHU-30

KA HRINGNUN THAWNTHU-30

Inneih ni tur sawifel vek tawh mah ila hna ka ţhulh phah chuang lo a, mi hnuaia thawk ka nih miau avangin a tep terah lo chuan ka chawlh theih pawh ka ring lo. Mahse in a tawm tlawk tlawk ai chuan nuam ka ti tho a, in a ka awm chuan ka ngaihtuahna kawmin ka bing mup mup a, manganna bawkin min chim leh huk ţhin a, motor thawm tak hi chu ka ning a, ipik a ti zual ka ti ţhin. Mahse hospital hi chu a reh ruih a, ka bulah Zonunin a awm reng bawk nen, ka hahdamna ber niin ka hria. 

"Min dinpui rawh aw" ti a Zonuni ka sawm chuan "Awii..nang aiin ka hmelchhia mi? Inneih niah te chuan mahni aia hmelchhia bak an dinpui ngai hleinem, min sawmna hi inhmuhsit naah ka ngai aw" a ti lang lang a, fiamthu a nihna angin a ţawng hra pha ho chu an lo nui ve hak hak hlawm mai. 

"Tuna taka khatia i tih le..a hma daih aţangin ka hrilh tawh che kha" ka tih chuan "Hmelchhia min tihna avan rei tawh awm em em" a lo ti leh a, henu hi chuan thutak a pai tam lo ve khawp mai. 

"Khawimaw monu tur chu miin an en sup sup hmain hnai deuhah ka lo en lawk teh ang" Rb-an nui vur vur chungin min rawn pan a, a coat var hak a ipte pahnih chu a zen vel ţhat a, Zonuni nen hian min han chhaih vel hi nuam an ti ve hrim hrim. 

"Zotein pasal a nei dawn ta a ni maw?" ka hmazawn a din pah hian a ti a, heipui a vawikhat hriatna ni awm taka a awm leh tawh hi.

"Ka hrilh hmasaber ve ve cheu a, hrilh hlim hlawt angin in awm reng thung a, bakah Rb, ka vawikhat neihna tur a ni lo aw..khatianga i tih khan a zahthlak mai mai zawk a nia" ka tih hlak hlak chuan "I neih hmasakin kan awm hleinem. Kan tan chuan vawikhatna ang a ni" a ti duh lek chauh a, "Chuan engtin maw? I nei dawn tak tak amaw?" a ti ţha leh a, min chhaih nan a mithmul a kân ralh a, min zawt ngun lutuk hi chhan enah ka en tawh lo zawk. 

"Hmanah kha chuan in ţhian hoin 'tunge ka pasal tur hi ni ang le?' in ti a in ngaihtuah nasat ve theih em kha. Pasal i nei ţha dawn hle mai Zoliansang" min ti a, ka pasal nei tur hi a awih hleithei lo a ni ber. 

"Min lawmpui leh lawmpui loh pawh ka hre love ah" ka tih chuan "Hmeichhia chu ni ila lawm avangin ka ţap pur ang" a ti fiamthu a, "Chu chiah..Rba hian a lawmpui zia che chu sawitur em em a hriat loh danah hian a chiang mai alawm" Zonunin lo ti ve vatin Rb-a chu a melh a, "Midang i fak chamchi a, nang anga ţhian hlutna hria leh hlut thiam hi midang ka la hre miah lo a nia aw Rb" a ti deuh phawng a, Rb-a nuih a za khawp mai. 

"Tak taka Zote, gown vel hi engtin nge kan tih ang? Keichu gown pui pui a ngai pawhin ka hre lo, fual leh puk deuh phei chuan min ti hrehawm mai mai dawn a, eng chi nge ha ila ţha i tih? Keichuan i tih ang ang ka pawm thlap vek a nia aw" Zonuni bawk chuan a ti leh zung zung a, "Ka hre lo mo thuam te hi haw man a to zek zel a, keichu puanchei bih mah ila pawi ka ti lo" inthlahrung dai hian ka ti a, ka dinpui tur ber hian nalh a lo tih loh palh ka hlau a ni. 

"Chutiang a ngai lo" Bl-a aw bawk chuan min ti phu leh dual tawh. 

"Awi..mi inrin loh laia biak thut i chin hi sim rawh ka tih kha. Rorel muk lai laiin boruak i ti chhe leh vek tawh. Kan buai loh lai kan chuh ve em em a" Zonuni chuan ti hlawih hlawih mah se ngaipawimawh lo zet hian, "Puanchei bih a ngai lo" a ti hmuk a.

"Engati maw? Duh leh kan bih ang chu, puan kan bih vang maiin mipa in puan in veng ve dawn tihna a ni hleinem" Zonuni chuan a lo ti veleh vat a, Rb-a nen nui pah a  inmelh ralhin kan ngawihsan a, anni pahnih hi chu heti reng hi, a changin an inmil a, ui leh kel thlun pawlh ang mai an nih chang a awm bawk a, an inhmeh phian mai.

"Tunlaiah tuman inneih naah puan an bih tawh ngai lo. Lawi luh dawnah chuan loh theih loh a nia, thingtlang khaw tereuhte leh mi rethei berh ve tak takte pawn kawrfual an ha hnâp vek tawh. Ha ve rawh u a mawi ve alawm. Zotei phei chuan a inhmeh dawn nasa a nia" a ti vel a, ka khabe hnuai a rawn khawih zeuh chuan za lo deuhin ka lo ţhen sak a, ka mit hi a hmanlai nge mawni inneih naa puanchei bih hi a mawi lohna ka hre ve hauh lo. 

"Mawiah in duh duh ha rawh u. Inneih niah chiah miin in lan mawi leh mawi loh an ngaihven dawn. In hmai chei chhah lutuk in phih fai hnu leh, mo thuam in hlih thlak hnuah chuan in chezia leh rilru an ensak tawh zawk ang che u. Mo hmelţha leh nalh satliah aiin mo fel hian pasalte inchhungah hlimna a keng lut hnem zawk ang. Hmangaihna a pawimawh bawk a, hmeichhia te hian bungraw ţha leh manto tak tak pawh chhawm ula hmangaihna leh ţhatna in chhawm luh tel loh chuan mi inchhung nuam pangngai tak kha hremhmunah in chantir ringawt dawn tihna a nia, mo nih chuan hmangaihna sem zai thiam ve te a ngai a nia, in inneih hma zawng in pasal te tan in rinawm tawh a, inneih hnuah chuan amah chauh ni lo, a chhungte thlenga in hmangaih a ngai tawh dawn a" Rb-an a lo tih duah hnu chuan Bl-an "Hmh..Rb-a bula awm leh sermon ngaihthlak. Hepa hi chu miţha leh fel famkim thawuih an tih ang kha a nia, mi fel famkim, ruihhlo chu sawi loh, zuk leh hmuam thlenga fihlim apiang an thaw a uih" a lo ti deuh nek a, Rb-a chu khawngaih viau mah ila nuih loh theih pawh a ni lo. 

"Ka thaw a uih lo..in enkawl ţhat chuan a uih thei lo" tih hmuk pahin tlangval sang ţha uchuak lutuk Bl-a chu thei leh thei loin a ban a, a hnar zawnah a thaw lui vak vak a, hmuhnawm thlirin kan lo thlir tawp. 

"Awii..min thawk khum hlum thei mai dawn alawm. Colgate ah assure force fresh powder phul tel ziah ang che. Vestige a nih hrim hrim chuan a nihna lo turah pawh hmang ila a ţha vek" Bl-a chuan a ti surh surh a, "Naaa..vestige i fak duh luatah thaw uihah min puh a ni maw" Rb-an a lo ti nang nang a, reitak thawk ho tawh na na na chu kan pali ngawr ngawr hi chu kan inkawmngeih ve tawh hlawm khawp mai. 

"Zonun i fate an hautak i ti maw..vestige hi i lo hmelhriat ve tawh em?" Bl-a chuan a ti vel a, Zonuni pawh a nui ar ar a, an inhau zui ta bik lo. 

"I lo va bei ve nasa awm em em" kan tih chuan "Teuh nang aw...ka kham nak laia, hetiang ti ţhin ho nupui a neih ai chuan hremhmun a tlak pawh ka duh lo. Mi hian an nupui te an cheh zia an sawi fo a, vestige leh modicare ti nasa tak tak ho phei chu an ang cheh lehzual ngawt ang, an dang a nal emai. Member lo ni ve la an tia, ka ni lo mai ang tih hnuah pawh a ţhatna min hrilh vak peih tho a nia, nei phei ila chu e..doctor hnenah ka bengdar hi min hawlh chhiat sak mai rawh kan ti duh ang chu" a ti leh ang lawi a, party vak vak a chin te kha a sim ve deuh tawhin ka hria. 

"Zote, eng nge i duh? Eng nge ka leisak ve ang che?" thutak deuh a a tih takah chuan "Engmah a ngai lo. In lokal chuan a tawk mai" ka lo ti vat a. 

"Aa..eng emaw tal kan pe ve ang che chu. Midangin eng nge tihsak che an tum hrechiang vat la, lei kawp vak ai chuan i mamawh an la lei loh ka leisak dawn che nia. A man a to deuh pawh sawi hreh lo la, pawisa ka nei lo viau nain ka ba thei a" a ti leh hram a, midangin min rawn tibuai lo se chu a ţawng leh duah ang chu. 

Ka buai chhung chuan dawhthei deuhin min lo nghak a, casualty a kal an awm lo bawk a Rb-a pawh a la awm ve ta reng a, ka ţhiante hi awm lo sela chuan ka nun a nguai lehzual ngei ang. Anni vang hian ţhian hlutna ka hriatchian phah khawp mai. 

"Bl-a sawi ang kha a ţha ka ti keipawh. Mi lei ang kan lei ve ang tih te a hlauhawm a, a dawn hnaiah lei ila a tawk chauh. Zotei tan chuan inhmang dâ ţhak mah ila na ka ti hleinem" Rb-an a lo ti veleh a, a pawimawh ber pawh kan sawi hleithei meuh lo. 

"Zote, kawrfual hak nge puan bih chu i tih tak" Zonuni chuan a ti ţha leh a, biakin hawng tur a nia, Hmangaihsanga chhungte lah mi hausa leh awm thei tak tak vek an ni, puan bih ta ila ţhing min lo ti viau angem tih te ka ngaihtuah a, a hautak lo thei ang ber duh chuan puanchei bih mai a awlsam khawp mai. 

"Nakinah kan inhrilh ţha leh mai dawn nia" ka ti ta ringawt a, ka naute pawh rawn ve phawt ila a ţhat ka ring.

Hmangaihsangan min nghah luih tlat avangin hna kan ban chuan haw tlang lovin a pindan bikah ka kal a, dawhkanah chuan damdawi sample a lo awm leh thluah tawh. 

"MR an lokal dawn lo em ni?" ka tih chuan "An lokal zo tawh" tih pahin a kut a phar chhuak a, keipawh chuan a ţhutna lam chu ka pan ding a. 

A zawn ka thlen hma hma aţangin min lo vuan a, damdawiin a awm kan nih miau avangin a malchungah em chuan ka ţhu duh bik lo. Chair bân chu a rinchhan tlak vak lohin ka hria a, chuvang chuan a bulah amah nghengin ka ding a, ka awmdan chu a nuam chiah lo. 

"In inbuatsaih nasa tawh em? Keichu inbuatsaih vak dan pawh ka hre lo" ka tih chuan "Inbuatsaih vak a ngai lo. Hautak lo thei ang ber kha a ţha a ni mai. Thuam chhawm te kha enghelh duh suh, nangmah i lo luh chuan a tawk" a ti mai a, chhawm mumal ka neih loh chuan a cousin ten chaldelh deuhin min ţawngkhum leh dawn tih chu a hre lawk ve vek tho ang. 

"Tunlai chu i ziaawm deuh tiraw?" ka ban a chul thuak pah a a tih chuan ka lo bu nghat a, "Pawisa nei reng chungin pawisain ka vur lo che i ti ţhin em?" a tih leh chuan "A ngai hleinem..hman khawp chu ka nei ve zel alawm. Ka phut ngai hauh lo a nia" ka lo ti a, nei tih vanga pawisa a invur vak vak hi ka duh dan a ni hauh lo. 

"I vui ngai lo tak tak maw?" tih pahin a dingchhuak a, kan inhmachhawn ran a, thudik ka sawi leh sawi loh hriat tum ni awm fahranin min en chik viau bawk. 

"Vui ngai lo..min pe reng la chu ka lungawi lo zawk ang" ka ti a, ka melh chho ha a, a mitah tak ka en lai chuan min lo nuih suk a. 

"Ţanpui che ka duh a, pawisa pek che u pawh ka duh ţhin. Mahse pawisa ka pek ţeuh che chuan i chapona leh i induhtawkna te a bo vek ang a, min tih lawm loh hlau reng rengin i hmanhlel ang. Chu chu ka duh lo" a ti nghat a, hetiang taka ka hmangai tu leh min ngaihtuah tu hi ka la tawng ngai lo. 

"I chhungte an lo zak angem? Keichuan ka neih ang ang hi ka rawn luh pui hreh hauh lo a, ka neih tawk a lungawi dan ka thiam tawh bawk. Mahse i chhungte an lo zak angem? I thawhpuite ho hmaah ka tizak che angem?" ka ti mawlh mawlh a, ka thusawi chu a duh dan a nih loh hmel kher mai.

"I hak lai nen chauh lo lut mahla pawi ka ti. Thuam chhawmah buaina ka nei ve lo" zawi te si chang deuh tak si hian a ti a, hlauhna leh manganna inmung tup tup ţhin hi hahthlak ka ti thei khawp mai. 

"Nih leh puan bih ta ila eng nge i ngaihdan? Biakin chhungah ka mawipui angem? Nge miin mawl mang an ti ang" ka tih chuan a lo kiai suk a, hahthlak min tih ve hmel khawp mai. 

"Nangmah i nih chuan a mawi vek ang" ka dar tawn tawn a dawm pah hian a ti a, "Mi ngaihdanah buai suh ka tih fo kha. I neih ang ang ha la, nangmah ni tawp rawh" a ti nghet churh a, ka huphurh ngai rengin ka la huphurh tho a, ka awmdan tak hi ka hrethiam lo, hmangaih viau si a neih ka huphurh ru tlat te hi, dinhmun inthlau lutuk vang a nih ka ring ber a, a ngaihdan a ni dawn lo tih ka hriat sa avangin ka sawichhuak lo thung. 

Kan inpeng thleng min thlah a, ka chhuk hma chuan "Damdawi i ei ţha em?" min ti leh hram a. 

"Aw ei ţha e..engati nge?" ka tih chuan "Hlauh i ngah leh tawh" a ti nghat a, "Ka hre lo, a nasa leh deuh a ni maithei. Hmabak a ko a, ka chiai nasa a nih pawn min enliam tawp rih rawh. Kan zawh fel hunah ka pangngai leh mai ang" ka lo ti a, danglam a ka inhriat loh pawn ani hi chuan a hre thei lutuk tlat a ni. 

"Engtikah nge doctor hmuh leh i tum?" a tih chuan "Hun bi tuk a awm chuang lova, ka mamawh ni a ka hriat hunah ka kal leh mai ang" a ban a dawm chung hian ka ti a, "Ropui le lu a tih a ngai lo ka tih kha aw. Ka neih theih che chuan a ţha a ni mai. Ropui deuh a lawm hi inneih reina a ni chuang lo. Vei run lo la, in duat zawk rawh" a ti a, chu ti ang ngaihdan a neih avang chuan ka lawm ru khawp mai. Ropui deuh a lawm duh ţalh se la chuan ka inthlahrung ang a, ka rilru pawn a tuar nasa lehzual ang. A chang chuan min hmu tlang vek ni tein ka hre hial ţhin. 

"U Zote, i lawm ngawt ang. Pa Kawltea a lokal a, kan vawk vulh lai pakhat hi Zotei man hlan niah kan talh dawn a nia, mi kan tam emaw tlem emaw pawh ni ila ruai tal kan buatsaih ve loh chuan a tia" Thiangin a lo ti nghal bawrh bawrh a, a phur em em mai lehnghal. 

"A va inthlahrunawm awm ve" ka tih chuan "Keini pawn kan lo hnial alawm. Mi tlem te chauh an lokal dawn a, eikhawp lekin arsa kan siam anga a tawk mai alawm kan tia, mahse an vawk vulh lai pakhat kha tih tel a ti deuh tlat a" Rinrinin a lo ti a, "Kan ţhiante an lokal ve dawn bawk a, thil pek eng emaw tal lo keng vek rawh u kan ti. Pawisa in neih loh pawn sahbawn bawm tal kan nia" Muanpuii chuan a lo ti ve a, thil a to vek tawh a, lawm chiam tum lo mah ila a hautak loh phah chuang lo. Chu chu hriain an theih ang angin ţhahnem an lo ngai ve a ni.

"An duh phawt chuan lokal rawh se. Mahse thil pek a ngai kher lo. Nangmahni hi che tur ber in nia, an puih theih che u chuan a tawk mai. Ka pute, Pa Kawltea pawh chu a nuam lo e, vawk talh kher a ngai lo asin mawle" ka ti ţha leh a, Bawiha sam kir pheng lutuk chu ka kutţangin ka khui pah thuak thuak bawk a. A sam hi kir chuat ang chi kha a nia, Sangzuala sam a chhun aniang. 

"A hnial theih loh. Ti suh kan ti nasa a, kan tih theih ve tawk alawm a ti tlat sia, vawk an ngah emai ti ngawt dawn ila a no pakhat man pawh a to a, a inthlahrunawm khawp mai" a ti charh charh a, vawk em em te chu lawmawm viau mah se inthlahrun a na lutuk tlat a ni. 

"Pawm sak tawp mai ang u. Thil pek lak duh loh ţalh hi chu a pe tu te tan a ngeiawm duh teh a nia" Thiangin a lo tih chuan ka bu nghat a, "Ni e..a hrilhhaithlak duh bawk a, a lawmawm e ti tawh mai ang. Ka rin phak bak a ni" ka ti a, Bawiha kekawr ha sawi lutuk ka siamţhat sak lai chuan "Bawiha hi chu thawmhnaw hak tur a lungngaih thlak ve loh e..U Neihkimi te unauin an duat si, U Zamtei emaw U Ruattein hak tur an ngaihtuahsak hrim hrim ang" Thiangi bawkin a lo tih leh chuan "A ngai lo ang...Zamtei pek tho a hak theih loh ho kha a ha thei vek tawh a, keini ai daihin thawmhnaw a ngah ang chu" ka lo ti a, chaw te kan eifel hnuah ka inbual a, Hmangaihsanga nen kan inbiak leh zawk hnuah kuhva ka khehpui a. 

"U Thiangi leh U Hruaitea pawh hi eng emaw a awm ve ţep tawh ang. Mipa leh hmeichhia chu ţhian an ni reng thei lo. Chubakah U Hruaitea hian U Thiangi lo ţhian a ngah dawn emai, a kawm ngeih viau danah hian awm a awm tihna" Rinrinin a tih chuan "Ehe..a star chiang mai che" Muanpuiin a lo ti hluai a, Thiangi a meng no lo khawp mai. 

"A awm lai ten in lo sawi ange aw..min kawm duh loh phah a ni mai" a ti hlak a, tleirawl pahnih lah chu "U Hruaitea kan star lai kha" tiin an lo nui kar kar a. 

Zing ka thawh hma deuh avang chuan damdawiin ka thleng hma angreng a, Zonunin min thlen khalh hram. 

"Duh leh tlaiah mo thuam hawh tur chu enkual ve chhin ila" a bula ţhut pah hian ka ti a, a la hma deuh bawk a mi an la tlem khawp mai. 

"Tehreng mai..i tih hun hun a ni mai. Puan bih chu em ni i tih tak a" a tih chuan "Ka hre lo le..enkual phawt ila, puan bih chu duhthusam a nia, mahse kawrfual nen hawh man a inan reng chuan duh leh kawrfual kan ha ve dawn nia" ka lo ti vat a. 

"Min hmaizah vang te hi a lo nia nge aw..engpawh ha ila pawi ka ti lo a nia" a tih chuan amah vang a nih loh thu ka lo hrilh thuai a, awl chhung a rei lo khawp mai, kan buai leh viau tawh. 

Chhun awl deuh laiin Neihkimin min ko a, eitur pawh a lo chah fel diam tawh. A hmaah pakhat a awm a, ka ep chiahah pakhat dang leh a awm a, chu chu ka ţhutna tur a nih ringin ka ţhu nghal chat a. 

Ka hmaa dispo container chu ka en a, Nu Sangpuii te dawr a mi a ni hauh lo tih ka hre nghal bawk. 

Ka ngaihtuahna hria niawm takin "Kan canteen hi chu Lala chauh cook a nih lai khan a tui a, an buai ta em a, midang an lak belh hnu hi chuan tui ka ti tawh lo" a lo ti duah a. 

"I duh zawng a ni em? Bawng sa ka duh ber a, beef rice ka lo chah ve tawp a" a tih chuan "Aw duh e" ka lo ti mai a, ka zam ru ngang mai. Kimkim-a chungchang kha a hrechhuak tawh em maw ni ka ti hial a, mahse tunlai tak chu a reh ve hmak bawk si. 

"Ei ţeuh rawh" a tih chuan container chu ka en leh a, alu chop a awm tel a, dispo hranah soup a awm bawk a, pickle pack a awm leh a, a chikim khawp mai. 

"Hmangaihsanga hian inneihna hi ho lam deuh a tih a duh a, mipa awm chhun a nih vangin keinin tih ropui kan duh ve bawk si, lo thlem ve teh" a ti a, thinrim hmel a pu lo na a a nelawm chuang lo. 

"Engtia lawm nge a duh ber a?" ka tih chuan "Man inhlan hnuah inhruai tawp mah ula pawi a ti nang. Mahse ropui deuh a tih kan duh, chu chu ka nutei leh ka putea te, ka ni te leh ka patea te ho duhdan pawh a ni. Kan cousin te pawh sawi hmaih theih an ni lo" tiin an chhungte ho chu a sawi kual duah a, ka puihna a ngen chuan a mangang tawpkhawk tihna a ni mai. 

"Ţhenrual kan ngah a, kan thawhpuite an lokal vek ang a, group hran hranah an post darh bawk ang a, mawl mang deuh a kan tih chuan a ţha lo zawnga sawi zui kan hlawh lutuk ang" a ti a, mak ka ti hran lo. An khawsa thei ve em a, ropui loh a hlau hi mak ka ti hauh lo. 

"Ka lo sawipui dawn nia" ka tih chuan "Pawisa i nei em?" min ti a, hmuhsitna a tel lo thung. 

"Aw nei e" ka ti leh mai a, "I neih loh chuan sawi hreh suh aw. Ka sawi awmzia chu i nu ralna kha chu tlingkhawm ve dawn tho mah sela dawr bungrua te in la ve a, bakah inneihna behbawm hi chu a hautak tlangpui a, indaih lo a awm ve thei teh a nia" a tih chuan "Ka nei alawm ka indaih thei mai ang" ka lo ti leh a, an ţhenrualte kan inah an lokal ve vak dawn chuang hleinem. Ka nu pawisa min dah sak kha a hre ve lo bawk a, mahse a sawi ang khan ka pasal neih hma ngeia ka putea eizawnna tur dap kha ka duh a, dawrte ka siamsak ve ta bawk sia, indaih loh chu a na khawp mai. 

"Thuam chhawm lam te" a tih chuan "Ka nei thei mai ang" ka lo ti leh thuai a, "Ka nutei te ho chuan i neih ţhat loh palh an hlau a" hreh hmel tak hian a ti a, a nuam lo duh kher mai. 

"Aw..thil ţha leh tam chhawm tur chu ka nei dawn lo. Mahse ka theih anga ţha chu tih ve ka tum tho a" ban charh a ka tih chuan "I huat tur a sawi ka ni lo a nia. Tunlaiah chuan a pawimawh ber pawl a ni tawh a, i neih ţhat loh an hlauhpui che a, kan mawi loh tlan an hlau a ni ber. Chuvang chuan midang hriat loh a a ruka puih che ka hreh hauh lo a nia" a ti a, ani chuan thil ţha deuh tiah a inngai maithei, mahse ka tan chuan zahthlak tak a ni. 

"Aih..a ngai lo ang. Hmangaihsanga chu ka lo sawipui dawn nia, in duh dan chuan ti rawh se" ka ti zung zung a, rice chu ka ei thuai thuai bawk a, kal vat ka duh vang a ni ber. 

"Aw le..i tih theih dawn chuan a ţhat chu. Man ei tur te hi an ruat ţeuh zel a ni lawm ni?" a tih chuan "An ti ţhin maithei mah se thil pek duh vanga midang man ei tir vak vak hi ţul ka ti lem lo. Bakah kan chhungkua kan bul ve a, man ei tur mang an awm lovang" ka ti a, phawk hrain min lo en a. 

"A nih chuan a tam zawk nangman i lei a ngai dawn a ni maw? Mihring zia a inang lova, ka nutei te chuan in khawsak hrereng chungin a ţha ber an beisei dawn tho a nia, pawisa ka pe mai ang che" a tih lai chuan container chu ka lo chhin ve mek a, an mi tih ţhin dan tak hi chu a..te chem chem a in ngaih mai a awl ţhin. 

"Engti fakau a ropuia tih nge in duh a?" ka ti ve ta nge nge a. 

"Engkim a ţha ber ang vekin a ni mai. Mi kan sawm hnem a, kan naute phur fal deuh ho phei chuan biakin chhung ţhutthleng thlenga chei an rawt tawh a, mahse ka nutei te chuan mi hmuh a ropui theih nan chuan i pawimawh tel ve niin an sawi a, thuam chhawm kha mi tam takin an en ber dawn an ti. Kei tak chuan hetiang lam hi ka hre ve lem lova" a ti a, sawi nuam a tih hmel bik chiah loh. A nutei te ho ka tih lungawi loh a hlauh vang ni berin ka hria.

"Hmangaihsanga pawh an ngaihtheih lohna a nia, thil eng emaw tih an tumin a khap zel a, a hautak lo thei ang berin a tia, mawl mang deuh a tih a duh a, an lungawi lo ţan a. Inneihna hi chuan tupawh ti lungawi vek se ka tih vang a nia zep lo a ka hrilh khawl khawl che. Thil ţha leh i duhzawng leina tur i neih loh chuan a rukin min dil dawn a nia" inhawng takin ti ve bawk mah se a ruk tak chuan na a awm lo thei lo a ni. Hei vang hi alawm pasal tur te fel viau mah se dinhmun inthlau lutuk hi a buaithlak ţhin ni. 

Ka let leh rual chuan Zonunin "Eng nge a?" a lo ti sa sa a, "Eitur min lei a" ka ti a, thil dang ka sawi lo. Neihkimi thiam loh pawh a ni bik lo tlat a ni. 

"Ehe..saw chu a va vul ve" a tih tak hluaiah chuan a enna lam chu ka en ve thuai a, Malsawmi leh nu pakhat an rawn inzui lut a, ka pa boral khan a lokal ve a, kan buai deuh avangij tu nge a nih chiah ka hrechiang thei ta lo. Malsawmi nu a ni lo tih erawh ka hria. 

"Kan mimawla chu a la awm em?" a rawn ti a, a hming sawi lo mah se tu a sawina nge kan hrechiang tlang khawp mai. 

"Lawk aw.." a tih hnuah Zonuni chuan "Liante 3 bikah khan engzat nge la awm?" ring leng lawng hian a ti zui a, "A tawpna ber a lut mek" Zonuni aia ring mah hian a rawn ti ve a, doctor ho pindan hi number a inpe ve thlih thliah a, naupang doctor pathum an ţhu tihna phei zawng a ni lo, private a nia, mizoram a ni bawk nen, duhthusam zanin a phuisui thei bik lo a ni. 

"Tun a lut mek saw a lo chhuah chuan a zo dawn tihna a nih chu. Lo nghak rawh u" ţha deuha a tih hnuah pawh "Damlo an tam em ni? A va bei rei ve, nge buaina dang a nei zawk" awmze nei tak hian a ti a, kan chhang lo ve ve thung. 

"Saw an lo chhuak alawm. Hmangaihsanga lo chhuah ve hmain va lut rawh u" Zonuni bawk chuan a ti leh a, a pindan awmna hi kan ţhutna aţang chuan a hla deuh na a mi lut leh chhuak chu chiang deuhin a hmuh theih tho a ni. 

"Hmangaihsanga a?" nui hawk chung hian Malsawmi chuan a lo ti a, mak ti hmel a pu bawk. 

"Aman min ko rawh a tih dan alawm. Nupui a neih hunah duh leh ka la 'pu' ve ang chu" ka ţhiannu chuan a ti deuh kher a, tum barin Malsawmi pawh a kal tak kha. 

"Ngah nge maw tun a taka a rawn inlan le? A reh ve vang vang a, hmalam a pan ve ta aniang chu tih nak laiin a lo lang leh heu a, nupui a nei mai tur hi a pawm thei ngang lo aniang" a ti bawrh bawrh a, heng thil zawng zawng hi tawp tawh se ka ti khawp mai. Nupui a neih hnu chuan tuman an rawn tibuai tawh êm lo ang chu. 

Malsawmi te tello in Hmangaihsanga chiah chu hmanhmawh deuhin a rawn chhuak a, a mitmeng aţang ringawt pawhin a thin a rim tih ka lo hre thei nghal. 

"Min lo la nghak em?" a tih chuan lu ka thing a, "Ka lo ei tawh a" nuam lo ti angreng tak chung hian ka ti a, "A ţhat chu..i haw hun âwmah ka rawn lam ang che" a ti nghat a, pawn lam pan lovin ward lam a pan ta daih a, "Thil a ei dawn lo em maw ni?" ka ti chu ka lo ţawng ring deuh aniang "Ward aţangin a chah dawn aniang. Tunlai tak chu pawn lam a mi an chah ţhin a, ngaihtuah duh suh" ka ţhiannu chuan a lo ti var a, min biak khan ţawngkam vin a hmang hauh lo na a a lungawi zân lo tih a hriat a, Malsawmi ten an ti thinrim leh hman pek a ni maithei. 

"Zote, haw dun ru aw. Mo thuam hawhna tur awm ang chu ka ţhiannu ka lo zawt chiang phawt ang a, zawn chawp ai chuan a hmun hre sa in kan kal dawn nia. Mi a dinpui tam tawh a, a tlawmna awm pawh a hre nual ang. Duh leh naktuk tlaiah kan kal dawn nia" a ti leh zung zung a, kan bang tlai thei bawk nen, zawn chawp chuan hun a duh rei viau ang. 

"Mahse kan sawi dun vek tawh a, kan tum sa a nia. Hmangaihsanga chu ka hrilh thei tho alawm. A hrethiam dawn chiang sa bawk a" ka tih chuan "Kan thim ţhak emaw a nia nga, thlasik ah phei chuan ni a rei lo si, ka lo zawt chiang hmasa dawn nia" a ti deuh tlat a, ka hnial duh ta lo mai. 

Malsawmi te rawn chhuak lai pawh chu kan lo hmu vek nain kan lam pana lokal lo in inchungah an chho a, Neihkimi an hmu dawn tih kan hre ve ve a, an rawn leng ve mai mai nge tum nei ran a lokal an nih hriat fak a har khawp mai. 

"I hman tawh em?" a ti ve tak nain kal mai inpeih atin ka dawhkan hmaah chuan a ding a, a mitmeng a thinrimna langchhuak pawh kha a la dah bo lo. 

"Aw hman a ni mai. Min lo nghak lawk" ka ti a, phone leh lip gloss chu bag ah ka khung sawk sawk a, ka din rual chuan ka puan lum ken chu min lo laksakin "Kal ang le" a ti a, tunah pawh a vin chuang lo.

"A nih u aw" Zonunin a tih chuan a bu nghat a, "Aw..zanah ka lo bia ang che aw" ka lo ti thung a, mawlh tu ka nei tlat a, eng berin nge min mawlh ka hre bawk si lo, Hmangaihsanga hlim loh vang a nih ka ring ta ringawt a. 

"Vawiin lam a hahthlak em?" ka dar a min kuah pah hian a ti a, garage lamah kan chhuk thla a, a thim ve tial tial bawk. 

"Hahthlak nang aw..hunpui kan hnaih hi chuan mi an tlem ţhinin ka hria" tiin ka ngaihdan ka sawi ve bawk a, garage ah chuan Malsawmi te an lo awm ve reng a, inchung aţanga an lo chhuk lai leh min kalpelh lai ka lo hre hauh lo. Khawiahmah ka kalsawn mang bawk si lova, Zonuni takngial pawn engmah a sawi lo. Min rawn biak kawi loh vang aniang. 

Car kawngkhar chu pawt hawngin "Lut rawh le" a ti a, kan awmna hi thim deuh ruih mah se kan lam pana Malsawmi lokal chu hmu reng chungin ka ţhu lut a, ka malchunga ka puan lum ken a rawn dah hnuah na zetin kawngkhar chu a khar ri bur a, Malsawmi a rawn thleng chawpchilh nghal bawk. Hemite pahnih hian inhauhna eng emaw an nei chiang alawm. 

Hmangaihsanga kalsawn nghal nulh chu Malsawmi chuan a umzui a, nutling lokal ve kha kan hmazawn si, min hnaih lutuk loah a ding a, chu nu dinna zawn a thlen hnuah chuan a ding chauh a,an inbia a nih ka ring a, garage a êng an chhit ve chuan min pui vak lo aniang an hmui phun takngial pawh ka hmu thei lo. 

Hmangaihsanga lo let chu Malsawmi chuan umzuiin a banah a chelh a, an lo hnai tawh bawk a a ţawng ri hre lo mah ila eng emaw sawi a nei tih chu ka hria. Ka chuanna motor hma lawk a an awm hnu phei chuan a bana a chelh na chu a phih thla sawk a, ka ţhutna lo lam chu a pan nghal vut a, hepa hi a dik lo reng reng. 

Motor a tih nun lai chuan "Buaina a awm em?" ka lo ti a, a hmel dur khup te chu ka ngaipawimawh duh lo ve tlat a, zawhna ka zawh hreh phah lo. 

"Ngaihven suh min tibuai ve duh hrim hrim a nih kha" ngaihsam hmel taka a tih lai chuan "Malsawmi saw kan hmaah a la ding tlat a nia" ka lo ti a, ka lam hawiin a kiai suk a, horn a pe zui bawk a, kan hmaa nula ding chu ka en ţhin a, a na tih ka hria, a mitmengah a lang vek. 

A rawn kalpui nuin Malsawmi a kalsawnpui takah chuan kan chuanna motor chu a tawlh riai riai a, "Eng nge an lo tih? Tunge a lo kalpui kha ni a" ka tih chuan "Ka nutei" a ti hmuk a, Malsawmi te chhungkua nen hian rin ai daihin an lo inpawh mai, a nutei pawn a duat hmel em kha maw.

"Eng nge an lo tih?" tih paha a lam ka hawi chuan min rawn melh zeuhin a nui suk a, hlim hmel put tum eng ang mah se a lungawi zân lo tih chu ka hre tho.

"An lokal ve chak aniang" a ti mai a, a sawi ţha duh lo lutuk chu ka haw tlat, "Nupui neih i tum hi a hrethiam lo em ni?" ka ti deuh phawng a, sawi hmasak loh chuan sawi tum hek lo le. 

"A nih kha" a ti hluk a, tun ţum a ka hmuh ang khan Malsawmi hi ka la hmu ngai lo. Inringtawk leh lu zo veh vawh, a chak lohna lantir duh ngai miah lo mi emaw ka ti ţhin a, mahse tunah kha chuan hmeichhia ka nih ve na angin a na lutuk tih ka hria a ni. Tlawm leh zah pawh a hre tawh lo a nih kha. 

"Tun a a awmdan khan a ti hrehawm che em? Nuam chu i ti chiah lo ang tiraw?" ka tih chuan "A tawp vek tawh" a ti bul hmuk a, "Khawngaihna chhe te tal chu i la nei ang tiraw?" ka ti leh hram a, mi fel famkim chu ka ni lo mah se kan hmeichhiatpuite tlawm lai hmel hi hmuh a lo nuam hauh lo. 

"A pawimawh tawh lo...ni reiloteah nupui ka nei dawn. Ka nei dawn che" a ti sup a, a khawngaih nge khawngaih lo a hriat theih hauh loh. 

Inbe lovin kan veng kan pan zel a, "Ka lo lut kawi lo mai ang aw" step zawna a din ruala a tih chuan "Aw le" ka lo ti sap a. 

"I ngaih a ţha lo deuh a ni maw? Ani nen kha chuan engkim a tawp tawh. Ngaihvek chûk duh lem suh. Nunhlui a ni tawh a, intihbuai tir tawh suh" ka kut la kangin a hmui lum thar thar chuan a fawp a, motor tlan a awm mang ngai chuang lo tiin inneihna chungchang ka sawipui a, a farnu te leh a nutei te ho duh ang thlap a ti turin ka hrilh nasa mai a, nuam lo ka tih hlauin kan dinhmun milpuia lawm a duh ve a nih ka ring a, "Hmeichhe lam ai chuan mipa lamin an ti ropui zawk ziah alawm. An duh dan an sawi leh pawn hnial tawh suh" ti ka chah thlap hnuah in lam ka pan san a. 

CONT