KA HRINGNUN THAWNTHU-31

KA HRINGNUN THAWNTHU-31

"Zote, lo lut kawi lawk teh. I fapa pawh a awm" Thang Lm-a nuin step a a hmarcha pho a lo seng mek a, nidang ang bawkin min lo ko ding leh tawh a ni. Ani hi chu a ţawng duh a, inhmuh nikhua hian biak hmasak kan chang ngai lo.  

"I va inseng tlai ve a" ka ti mawi ve a, "Nia, naupangin min tibuai hneh lutuk a, ka hmarcha pho hi ka theihnghilh alawm" tiin thlangra chu a la kang a, "Lokal teh" tih leh kal a rual a, ka fapa a awm tho bawk avangin ka zui ve nghal mai.

Ka thlen hma deuh a Ruattein min lo call takah chuan "Lawk aw Nu Ţan ka lo lut ang, phone ka'n chhang lawk ang e" ka tih hnuah ka 'hello' zui nghal a.

"U Zote, in in buatsaih nasa tawh em?" a rawn ti var a, inah a awm lo aniang ri dang a tam emai.

"Teh nang aw..tih hleihtheih pawh a ni lo. In puahchah vak ngaihna ka hre bawk si lo a" ka tih chuan a nui hak a, "Khawiah nge i awm a?" ka ti zui zat a. 

"Ka naute ho nen kan bazar a, an ţang mai bawk sia maw hei kawr kan ţhui tir duh sia a rawng kan thlang kual a, mipa lam rau rau ah pawh ka pa chhungte lamin Pink an ha dawn a, ka nu chhungte lam hian Mint ha ve bawk se an tia, keini unau bik chu lavender kan tia, Thiangi leh i naute ho kha ka leikep ve dawn em maw ni ka tia, ka nu chhungte lam an ni ve tho a, kawr bik hi mint colour kher an ti bawk nen, an hak loh bik chuan hrehawm an ti ang" a rawn ti a, lehzel chuan a, thil dang pawh tih tawh nak laiin. 

"Ţhui tirna tur bik in nei em ni?" ka tih chuan "Nei hran lo e..ka naute ho rawt chhuah a nia, hetiang dan hi a awm leh awm loh pawh ka hre lo. Mipa lam rau rauah pawh nu leh pa lam tih vel thawmhnaw hmanga an thliar hran ngai awm pawh ka hre lo a, mahse an duh dan a ni tlat sia, thingtlang lama kan chhungte pawh puanthan kan lei kep vek dawn tho a nia aw in lo inthlahrung ang e" a ti leh rih a, midangin rawng inang ţhap an rawn ha ngei ang a, ka nauten an awt ve dawn a ka hriat vangin "Engtin nge kan inpek ang?" ka ti a, ka remti ta nge nge a. 

"Kan lokal kawi hman maithei a ni ka la chiang lo, khua a thim hma tawh lutuk a, hman hram leh kan lokal dawn nia scooty kan keng tho a" a rawn ti lang lang a, kan inbiak zawh hnuah Thang Lm-a te inah ka lut a, Bawiha te pawh an lo la in um kual nasa khawp mai. Hnawk nuaiin a sam an lo ţawn kak sak a, a hmai te chu a sen rang niai nuai mai. 

"Thingpui ka chhuang aw" Nu Ţha-i chuan a ti lehzel a, Thang Lm-a erawh hmuh tur a awm lo thung. 

"Zote, Thang Lm-a hian inpa tur te hi an chhung an rual lutuk a ti mai zel a, puan ken hnem a va ngai duh awm ve" a ti nem duai a, ka lo ngaihtuah ruk ve rauh rauh ţhin a nia, min uai rit tu a tam khawp mai. 

"Aw an rual ve angreng" ka ti ban charh a, hetiang hunah hian alawm mi nei nung fa nih ve a chakawm ţhin. 

"Puan lah hi a to tawh nasa mai sia, in dinhmun ka hrechiang ve tho bawk nen, nang aiin ka rilru a lo hah zawk ang" a ti a, a mak lutuk a pawnfen kawng chu a kut pahnihin a zen lut a, zipper ri ni awm tak hi a ri zui rât a, "Eng nge?" ka ti hman chiah tihah "Ţawng sug" ţawng rin hlau tak hian a lo ti a, mak ti deuh a ka lo en lai chuan pawisa a rawn phawrh chhuak ta mai a. 

"Kha hei hian puan lei la, tam tak phei chu a lei theih kher loh ang. Mahse an chhung an rual chuan an indaih tur chu i keng thei dawn lo hrim hrim a, hei hian a daih chin chin lei la, a bak lei belh duh suh" tih pahin pawisa chu min hmeh bel chawt chawt a. 

"A ngai lo nu Ţha, a tam hmel bawk si, hetiang chu ka la thei lo ang" ti a pek let ka tum chu ka kut a lo vuan bet tlat. 

"La hmak rawh...pawisa senna tur dang a tam a, i indaih lo palh ang a sin. Pasal i nei dawn tih ka hriat aţang khan ka ipte rukah hian ka kawl ţha kiau tawh. Kuhva ka rawn lei lahin i putea lah khuan lehkha min pe chiah si lovin kawmchhak nu hian man a ei ngei ngei a ngai a ti fiamthu ziah a, pawisa hi chu indaih tak tak a awm lo nachungin a indaih loh viau dawn chuan ka pe ang ka tia, mahse nghak khawtlai loin ti hian la mai rawh. Bungrua lei loin pawisa hian ka pe mai ang che. Keini chu chhungkhat ang chiah kan nia, i nu angah min ngai la, i nu hnen aţanga pawisa hmuah in ngai tawp rawh" a ti a, ka zak ru angreng khawp mai. Inpawh viau mah ila hetiang em em chu ka lo beisei lova,min vin bawrh bawrh ţhin mah se min lo ngaihsak ruk zia ka hriat phah a ni. 

"Min pe let miah suh aw. Ka la duh tawh dawn hauh lo a nia" a tih hnuah "Fate zingah fello an awm chuan a ipte hian pang a deh reng a ngai a, ka kawngah hian elastic in ka thlung mai" tiin a insawisa zui a, elastic chu a pawt ri pah kauh a, kan nuih dun hak hak lai chuan Thang Lm-a pawh lo hawin "Zote aw i tello chuan zaleng hei zawng kan kim lo" a ti ţan lehnghal a, Thang Lm-a vangin kha hla kha ka ngaihthla ve chhin a, a lo nalh reuh phian lehnghal. 

"I pindanah zu um ka chharleh tawh a nia. I u pawh tih tawh nak laiin nang lehzel chu fihlim tum teh" Nu Ţhai chuan a ti hlak hlak a, uluk deuh leh ka thiam ang tawka lawmthu ka hrilh hnuah Bawiha chu ka haw pui a, mi thilthlawnpek lak hi chu a nuam chiah lo alawm. Pawisa ngat phei chu a dan a dang a, phal deuh a min pe pawh nise lak mai a harsa ţhin. 

In ka thlen veleh puan than chungchang kha ka sawi chhuak a, "In hak loh bik chuan hrehawm in tih ka hlau sia, puanthan lo dah turin ka hrilh a" ka tih chuan rin aiin an lo lawm hran lo a. 

"Nu te lam te chu kan ha ve thei nang. Pi Atei kha an nu ve tho pawh ni se mo tur i nia, unau inhnai deuh innei in ang dawn emai" Thiangin a tih chuan "Chu chu ka ngaihtuah dan a ni ve tho a, mahse thawmhnaw thar in awt ve hlawm sia, Ruattein puanthan a rawn dah chuan duh leh Thang Lm-a te kawmchhak nula khi in ţhui tir ve ang a, ti khian inah a ţhui a, a ti to lo ang" ka lo ti vat a. 

"Aa..keichu hak loh pawi ka ti lo. Hmeichhe lam kan ni dawn a, Ruattei te lam hak ang kan ha ve thei lo" Thiangi chuan a ti tlat a, kawr thar an neih loh ka hlauh luatah an pawi ka sawi der a nih hmel. 

"Nia, vawiinah pawh kan lo sawi a, thlasik lai a nih tho vangin rawng sen pawh ha ila hmuh kan hrehawm dawn loh kan tia, a sen vek hak kan lo tum ve a" Rinrinin a lo ti ve nang nang a, a thar kher an duh loh chuan tiin an lokal hmain Ruattei chu ka be leh a, ka len rei tehreng nen puanthan zawrhnaah an lo la awm nia mawle. 

Thil awmdan ka sawi chuan "Ni dawn tak e...keipawh hi engatinge maw ka ngaihtuah thlen miah loh le, kan buai ve em a ni. Pasal ka neih ve hunah chuan i naute leh ka naute ho hian inang ţhap an ha thei tawh ang" nui kar kar chung hian a rawn ti a, tunah chuan ka naute pawn kawrthar an sawi reng tawh lo ang a, thawk khat chu a veng deuh alawm. Pianghmun ni lo mah ila han chen ho hi chuan kan in ngaina thuai zel a, naute duhzawng tih sak theih loh chu a hrehawm emai. 

"U Zotei hi i chut reuh e..engtin nge U Sangtea hian a duh zawk che le? Hetiangah chuan Pathian thiltihtheihna a tel a ngai ngei ngei ang. Pathianin duhsak hle che lo sela chu a duh teuh lo mai che" Muanpuiin a tih chuan ka putea pawh a lo nui ve vur vur a, thih min chak tir ţhin tu tam tak zingah hian damchhan tur pakhat tal a lo awm ve ziah reng a ni. 

"Chu chiah..i ţhat ţhat hian i ţha ve tawp a, mi i lem thiam lo si, i hnial hreh ţhin bawk si. Bazarah pawh kal la dawr neitute hmaizah vangin i duh loh pui pui pawh i lei ţeuh zel dawn tihna a ni mai" Thiangin a lo ti ve nghal zat a, an awmkhawm tawh chuan an nui hak hak reng a, an bul a awm nuam an tih ţhin avangin inleng pawh kan ngah veleh tawh ţhin hle. 

Hna ban veleh Zonuni nen mo kawr hawh tur chu kan enkual ta ngei a, a lo to hlawm nangiang mai. Hnam puan bih duh rilru viau mah ila kawr fual kan enkual a, nalh kan tih deuh chu hawh man a turu thei lutuk. 

"A man tlawm in duh chuan in en lai ai khan heng ho hi a tlawm hlek a" dawr nghak tu in a rawn tih chuan Zonunin "Hnam puan kan bih duh a, top chiah kan lo en ang" a lo ti a, ka hmel a rawn hmuh chuan a ţhen sak a, "Min hmaizah tih ka hria alawm. Engpawh nalh ka ti vek ka tih tawh kha. I duh ang ngeiin puan kan bih dawn nia" zangkhai vah hian a ti a, kawng chhing ringawt chu a hawh man pawh a tlawm deuh hlek maithei.

"Hei hi a nalh. A simple a, bakah cape a chhawm a" tih pahin dawr nghak tu chuan kokia puan bah tur puan pan tak, mawi deuha inchei tho si hi min pe tel a, "A ţha dawn lutuk. Hnam puan bih chungin kawrfual ha ang deuhin i lang thei dawn bawk tihna a ni mai. I kokia i bah chuan hnunglamah a uai hnalh ang a" phur fe hian Zonunin a lo ti bawk a, a kawr pawh chu an chei chuai lo a, ka duhzawng tak a ni. 

Muangchan lutuk chi a nih tawh loh avangin ka ha chhin a, ka lo ha tawk chiah lehnghal a, hawh rei chuan chawi belh a ngai ve zel sia, a dawn hnaiah kan lo la ang kan ti ta ringawt a. Vawiin chu enkual phawt ang kan ti sa hrim hrim kha a nia, kan duhzawng kan hmu thei hlauh chu a lawmawm. 

Chau hnâpin in ka thleng a, ka naute pathum chuan min awl hneh hlauh a, an buai deuh tawh avangin zanah Hmangaihsanga a lo leng lo a, mut kan tin tuah laia ka phone ri chu "U Sangtea a ni ngei ngei ang" an lo ti sap sap a, a ni chiah reng bawk a. 

Bawiha mutchhuak tawh bula mut chu a nuam phian mai, min kuah a, a che peih mang tawh lo. 

"Vawiin lam te kan chau em?" a rawn ti a, ka chauh thu ka sawi ve zân a. 

"I indaih thei angem? I lo phâng ange aw" a ti a, pawisa a min vur chiam duh lo mah se thlaphang deuh a ka awm a phal chuang lo. 

"Thei mai ang" ka ti liam satliah a, nula pathum te chhuat a an rawn mut ve tak avangin bang lam hawiin ka saisir ta daih a. 

"Mikhual kan nei ţan a" a tih chuan "A âwm ve tawh alawm. In inbuatsaih nasa mup mup tawh viau lo maw?" ka ti a, Nu Ţani hnen aţanga thil pek ka dawn kha ka hrilh chak khawp mai, mahse a la hun lo deuhin ka hre bawk sia.

"Buatsaih nasa lo. Ka ta i ni ţep tawh a, chu chu a pawimawh ber" a rawn ti a, inhmu lo mah ila ka lai ve deuhin ka hria. 

"Umm..ni ţep tawh" zak ru deuh taka ka tih chuan "Keichu i ta ka ni reng. Ka hmuh tirh aţang che khan" a ti a, a aw te chu a ril deuh ruih ni mai hian ka hria a. 

"A dik alawm" ka ti mawl tawp a, a nui hawk a, zei lo min ti ve ngang aniang. 

"Zan khat lek ka hmu lo che a, ka ngai hman tho che" thum deuh sup a a tih chuan "Nangpawh ka ngai che" ka lo ti ve sap a, kan chhuat a ri det det a, tuemaw chuan a ke a per chiang a ni. An reh ka ti reng a, ka thusawi an lo ngaithla ru reng a nih hmel. 

Min ngai tak tak aniang ţum dang a min lo biak hi chuan a dah zung zung zel a, tun ţum chu amah zawkin zawhna min zawt a, sawi tur haihchham viau thin si sawi tur a hre zek lehnghal. 

"Zanin chu i van ţawng duh em em" ka tih chuan "Ka hmuh theih loh vang che aniang" a ti fiamthu a, Thiangin "Chakai ka eichak zia hi aw..a to thei si. A bawppui ka lu tiat lawih hi sawm vel awm se ei miah miah mai ila" a ti lang lang chu a hre pha a niang a ri meuhin a lo nui a, "Chakai ka ei loh nachin pawh ka hre tawh lo" ka lo ti ve nghal zat bawk a. 

"Hmuh remchanah ka leisak dawn che nia" a ti nghal hmak a, "In in a kan awm chhung zawng khan kan hmeh lova, in ei ve ngai lo a niang chu ka ti mai a" ka tih chuan "Umm..keimah hian ka ei thei lo" a ti a, a sawizel danah thawk harsa a tih phah nasa a, a tirah chuan a ei sual mai mai emaw an tia, a ei nawn leh hnuah pawh a hma ang chiah khan a awm leh a, allergy tih an hriatchhuah phah bawk a ni. A nu khan a it ve hlauin midangin an ei bik a remti lova, a nu duh dan an kaltlang pui zel a nih hmel, chakai kan hmeh ngai hauh loh chhan pawh kha a ni. Chhungkua hi chuan chin ţhan leh kalphung te te kan nei vek a, han sawisel ngawt theih pawh a ni lo. Mipa awmchhun a nih vang hian an tan chuan a hlu viau dawn tih ka hre tel bawk. 

"Fiamthu hian a bawraw lai kha an ti ve ziah a, i che pui thei viau a ni maw? Bialnu engzat nge i neih tawh?" ka tih chuan a nui hawk a, ho a ti leh ngawt ang chu. Awmtei leh Kimkima ten a lerh zia ngawt alawm an sawi le. 

"Chhan tlak pawh a nih nek loh chu a" a ti hluk a, a thinrim hauh lo thung. 

"Panga a tling tawh em?" ka ti leh a, kan ti ti a zangkhaiin awm a ti nuam takzet a ni. 

"A tawpna ber, damchhung daih tawh tur i ni" a ti daih a, a sawi ţha duh lo kher mai. Keichu a hriat sa vek avangin ka sawi ve duh lem lo a, min zawt lo bawk. 

"Ka ngai che a, tling lo viau mah se ka nu pawh kha ka ngai tho a, hlimna ka tawn apiangin ka ngai ber zel tawh dawn a nih hi" ka ti a, min lo hrethiam khawp mai. A nu a chân ve tawh miau alawm. 

"I nu a boral khan i ţap em?" tiin zawhna atthlak tak ka zawt a, a ţah loh thu min hrilh chuan "Engati nge mipa hian ţah in hreh em em le?" ka ti ta thlawt a. 

"Thinlung in nei ve a, in na ve thei a, mittui in nei a, in thinlung pawh a nat theih chuan engati nge in mittui a luan theih loh bik ang? Mipa hi ţap ve thei lo tura ngai an tam tak em avang hian ţah in hreh phah ni maiin ka hria" ka tih leh chuan a lo nui mai a, hmana ka ţhian kawm ţhin pakhat chuan 'mipa mittui nei chu ka ten' a ti ţhin a, an nat tawpkhawk a an mittui a tla ve ţhin hi chu pa lohna ni pawhin ka hre lo. 

Rei tak kan inbiak hnu chuan "I mut a lo chhuak tawh ang e muhil tawh rawh" min ti a, phone kan dah hnuah damdawi ka ei a, Thang Lm-a nu pawisa min pek khan Thiangi pawh a ti lawm ngang aniang "U Zote a lawmawm tiraw? Thinchhia ka tih theih nen a hunah chuan nu chan a chang a, diktak chuan man pawh lo eitir ila thil ho te bak a tihsak che ka ring lo a nia" a ti leh ţhin a, Pathian demna ringawt zawng ţhin khan Pathian ţhatzia ka hriat belh zel chu a nih hi. 

😘😘😘😘😘😘

Damdawiin ka thleng rualin Ruattei call ka dawng a, a aw a la phak chual mai. 

"Tlaiah chaw lo ei rawh aw. Kan cousin te hian an hmu ve chak che a, inpawhna zel a ni mai. Midang ang kan ni lova, nang chu kan hnena cheng reng tawh i nia" a rawn ti zat zat a, "Tunlai chu bazar a kal ve reng a ngai a, nimin ah pawh kan kal a" ka tih chuan "Ka kalpui ang che. Min lo tlawh haw la, ka hah ve thei hleinem" a ti a, Zonuni nen pheikhawk en kan tum a, kan kal ho thei mai ang chu maw.

"Duh leh bazar ho ila mah se chaw ei chu a chi loh ang. Bawiha chhuahsan rei lutuk chu rilru a nuam lo duh emai" ka tih chuan "Thiangi kan lo be mai ang. Siampuii pawh hian a ngai tawh a, midang pawn an hlimpui ang" a ti puat puat a, "Ngawi teh Ruatte chaw ei em chu" ka ti hman hram a ni, phone a ti tawp daih. 

Zonuni hnenah thil awmzia ka sawi a, engah vak a lo ngai lem lo. 

"In lei khawm nghal chuk chuk thei kan nih ve loh avangin inneih ni tur pawh kan ruat tlai deuh a, kan inpawh a, a farnu te nen pawh kan inbe reng tho a, mahse chaw ei em chu a tih chi dawn em ni? Inneih ni tur sawi fel tawh hnuah hmeichhia hi mipa inah chaw ei turin an kal leh thei tho em ni a?" ka tih chuan "Thei ang..tunlaiah thiang lo tak tak a awm tawh hleinem. In innei dawn a ni mai a, man hlan ni leh inneih ni a nih loh chuan in duh apiang in la ti thei ang chu mawle" a ti a, a ngaihpawimawh loh hmel khawp mai. 

Hmangaihsanga nen pawh pangngai takin kan inbia a, Ruattei nen a kan thil tum chu ka hrilh ve lem lo. 

"I rualin ka haw thei lo ang, Zonuni nen bazar kal kan ngai a" ka ti a, inbuatsaih lai mek kan ni bawk a, min hrethiam viau a, awmze nei deuh a phone a lek kan zeuh hnuah hmet mawlh mawlh chungin a pindan lamah a phei a, message ka dawng zui vat reng a ni.

"Nangmah a i tih theih loh chinah puih i mamawh chuan min hrilh rawh aw" tih zawng hi a lo thawn a, ka nui ver ver tho. Mahni inrintawkna ka neih theih nan leh induhtawkna ka hloh loh nan te theih chin chinah keimaha ti turin min duh ţhin a, ka theih loh tawpah chuan ka tan engpawh a ti duh ţhin. 

"Aw le" tih zawngin ka chhang let a, kan buai mawp mawp laia "Zote, in in buatsaih nasa tawh em?" Pu Saian a rawn tih chuan ka dak chhuak a, min bia pawh mak tih tawh nak laiin Malsawmi landan chu mak ka ti lehzual. Chawhnu lam a ni tawh a, ka hmuh hmasak zawk pawh kha tun ang hun vel tho hi a ni. Tunlai chu chawhma a nih loh pawhin zanah a duty ţhin a nih ka ring.

"Aw theih ang ang chuan kan inbuatsaih chho ve bek bek a" nui pah a ka tih chuan Malsawmi pawh a lo nui ve seih a, a nuih a za hlawl lo tih chu tupawn an hmu thei ang. 

"A ţha a nih chu. Tunlai ka tha (nerve) ka sawisel nasa a, Hmangaihsanga te in lamah pawh ka lang hman meuh lo a ni. Ka lawmpui khawp mai che u" a ti dam thluam a, a fanu hriat a chutiang a sawi chu mak ka ti ru angreng khawp mai. 

"Ka lawm e" ka tih chuan Malsawmi bawk chuan ngeiawm hauh lo hian min lo nuih leh a, a meng dul raih a, a sam sei tak ţhin kha a beng hnuaiah a tan tawi mât a, a hmelah lungngaihna lo chu engmah a chhiar theih loh. 

An kal liam hnuah pawh Zonuni chuan "A lo hmangaih viau em mawni le? Hmangaihsanga nupui nei tur chu a la na hle a nih dawn kha. Hmeichhia in lungngaihna vawrtawp kan tawh hnuah kan lungngaihna thlen tu nunhlui leh hriatrengna tam tak kan thlah a, hmalam kan pan duh chuan sam kan tan ţhin an ti alawm. Sawi dan dang pawh a tam a, ka sawi vek seng lo" a ti a, a hmuh lai renga Hmangaihsanga nen motor a kan tlan liam san ni kha ka hrechhuak a, Malsawmi landan thar hi hmu ve se chu ani pawn a khawngaih ngawtin ka ring.

Doctor hoin thil an ei ve avang chuan damlo ho pawh an lut rih lo a, ka chhehvela mite ngaihven lem lo a phone ka khawih neuh neuh lai chuan Zonunin min nghawk zeuh a, ka hawichhuah ruala Pu Saia te pafa leh Hmangaihsanga te lo inzui ka hmuh chuan ka hamhaih lek lek a ni. Ka haw hran hauh lova, Hmangaihsanga hmu turin an kal tih ka lo hre hauh lo. 

"Thil i ei tawh em?" min rawn ti a, danglamna hmuh tur a awm lo. 

"Aw..kan lo ei zo chiah" ka ti ve mai a, a mawiah a inlengte a rawn thlah a nih ka ring. An chawlh hun pawh an hrethei khawp alawm. 

Tlaiah Ruattei hoin bazar tumin kan inkhalh chhuak a, Zonuni nen kan inphur a, Ruattei amahin a chuang thung. 

"I nau tur khan chaw eiah min sawm tlat sia, hnial a har ropui si, ka nute hnenah chanchin ka la hrilh lo lehnghal" a ti a, Zonuni tel ve tur chu ka tan hlei hlei hian a lawmawm. Mikhual an nei nual tawh a, a awm loh chuan ka buai chhe lutuk ang. 

"Nangchu a la sawm zawk che alawm. Keite chu min rawn mumal loin ka fapa leh ka nau an lo hruai daih a sin" ka tih chuan "Zamtei berkherin a hruai lehnghal a" a lo ti ve vat a. 

Hnam puan bih dawn mah ila a sen rau rauah pawh inang lo deuh a bih palh kan hlau chuan rawng inang thlapin puanchei kan lei a, pawisa ka neih leh neih loh hriat tum ni awm takin Ruattei chuan min en uluk ţhin hle. 

Pheikhawk kan enkual leh a, a man tlawm deuh hlek kan zawng zel te chu Ruattei chuan min sawisa a, kan nui leh hak hak ţhin a, mahni tawkah kan hlim ve khawp mai. 

"Zote, nau i pai hunah inpa haw miah suh aw. Pasal te haw tlat hi an awm ţhin a, an khawngaihthlak thei lutuk an ti" Zonuni chuan a ti ţan tawh a, "Mipa zawk hi lukham nen a pindan aţangin a chhuak bur bur reng mai anga" Ruattei pawn lo ti vein min fiam nan tak an hmang a, bazarah kan kal ho lo ang tih a hlauhawm zawk. 

"Pani puri ei ang u" Ruattei bawkin a tih leh chuan phur deuhin vaipa ţhutna lam kan pan a, ei ţeuh tum sa ran aniang chu vaipa chuan thleng hlai puiah a rawn rem nghauh nghauh a, kan lei chin a dah kim meuh chuan ei huphurhawm tak a ni tawh. Rin aiin a lo tui phian a, kar loah kan ei zo a, Ruattei te inlam kan pan a. 

Kan thil lei kan dah thuhruk zawh hnuah inchhungah kan lut a, Bawiha pawma Hmangaihsanga tlankual zak zak chu ka hmuh hmasakber a ni. A hnungah naupang pahnihin an um a, an che vel chu midangin an lo nuih dar dar a, inchhunga kan lut ve chu hria ang pawn an awm hlawm lo. 

"Ee..hei nu ber a lo thleng alawm" Hruaitea ţawng hre pha ho chu an lo hawi nghal vat a, hei vang hi a nia ka kal duh rih loh. 

"U Hmangaihsang, ka inbual duh sia ka bai chhuan lo vil rawh ka tih kha. Ka inbual hma hmain i kalsan daih a, a liam nasa lutuk alawm" Siampuiin a tih hlak hlak takah chuan keini pathum chu choka ah kan lut a, a lo liam nasa lah tak a, "Han inbual rawh kan lo vil dawn nia" kan tih takah chuan tum barin a kal hnak hnak a, "Hmangaihsanga pawh kalsan daih loh tur asin mawle..a tui lai tur zawng zawng a liam vek a nih hi" a hriat phak tawk tura Ruattein a tih fiamthu te chuan chhuat a rap na zual sauhin ka hria. 

Choka a lo lut ve chu "Bawiha kha naute chei reng suh. Kawmchhakah te pawh a leng char char thei tawh a nia" ka lo ti a, ngaipawimawh lo zet a pawm lui tlat chung hian ka bulah a lo ding a, "Khai a...i va chhuang liam nasa ve" min la ti zawk zui a. 

"Ve lutuk a che..hre lo der vel suh aw..Siampuiin i kutah a dah a, i chhuanliam vek hnuah tui leihbelhin ka chawk mek a nih hi. Hruk ro tur tam deuh a awm bawk" ka ti kha kha a, nui ruh ruh chungin bai chhuan lai chu a en a, "Han tem chhin teh" a ti mauh mai. 

"Tui ka leih belh a, a so leh phawt loh chuan a tih chi nang" ka tih laia Thiangi leh Hruaitea lo inzui lut chu ka lo melh ralh a, an nui tawp vel hmakin ka hria.

"Tukinah U Zamtein min lo hruai alawm. Zotei kan hrilh tawh a ti tlat a, hreh tawkin ka zui a nih kha" tiin a insawithiam zung zung a, "A pawi lo..ka hre lawk sa alawm" ka tih chuan nuam a tih hmel sawtin ka hria. 

Chhuat ka hruk lai chuan Thiangin min lo puiin gas dawhkan vel chu a theih chin chin a lo hru ve a, Hmangaihsanga bawk kan bulah a la ding ve run a, Bawiha lah chuan a nghawngah a kuah ţai reng a, infiampui tur naupang an awm reng chung pawhin a thlah duh hauh lo. 

"Hei a so tawh" Hmangaihsangan a tih leh takah chuan ka herh hniam deuh a, ka chawh leh rak rak hnu chuan ka tem chhin ta nge nge a, "I siam em ni?" ka tih chuan "Chi ka al ve" a lo ti a, a nui tawi tak bawk.

"Tem rawh i ti sek sia i siam emaw ka ti hman alawm" ka ti hluai a, liam lo phei se chu a al viau ang, tui kan leih belh avang khan a al nep ta deuh zawk a. 

"Eichak zual deuh i neih chuan ka siamsak ang che, chakai lei tur kan zawng dawn mi?" a ti vel a, "Kan hmu lo tawp ang. Nidangah ni mai rawh se" tih pahin ka sam chu ka hui chho ve tak na a a ngai ang bawkin a rawn tla lehnghal. 

"A van nalh ve" tih sup pahin ka sam chu ka beng lang turin a hui kiang a, a rawn tlak lehnghal mai loh nan a vuan tlat bawk. 

"Nitak...Ruattei min leisak a nih hi" ka ti a, ka beng hi pahnih laiah ka verh ve a, a hnuai zawkah chiah bengbeh ka beh ţhin thung. Ruattei a phur thut aniang chu silver zawrhnaah min hruai a, Zonuni nen min leisak a, kan pathumin a inangin kan beh ţhap mai. 

"Khatin ka beng en vak vak bik suh. Ruattei leh Zonuni te pawn ka beh ang chiahin an beh ve" ka lo ti hlak a, bengbeh pahnih ka beh ve chu a vawikhat hmuhna takmeuh a ni ngei ang.

"I inhmeh bik a nih hi" nui lek lek a a tih chuan "Kha i nui dawn..dawt i sawi, min chhaih chak ve mai mai" ka tih chuan "I inhmeh bik a nih hi" thutak deuh hian a ti leh a, ka sam a dawmbeh chu thlahin ka beng hmawr a hmet neuh neuh a, kan inen ran bawk. 

"Bazarah chuan eng nge i lei a?" a tih chuan "Puan leh pheikhawk chiah ka lei" ka lo ti vat a.

"Hmangaihna in thla a zar tawh chuan midang hi chu kan hmu phe ruai tawh zel mai a nia" an lo tih chuan ka insiamţha thuai a, Hmangaihsanga chuan ka beng a la khawih reng a, nui ţhaw a min lo en hlawm avang chuan lei chhuah tet pahin a kut ka benthlaksak a, kan bai vil lai leh chu a so bawrh bawrh thei tawh lo reng reng a. 

"In thil chhuan kha a thawm a va zawi ve, in herh hniam rei lutuk a ni lo maw?" nuihzat hmel taka Zonunin a tih chuan gas lamah ka inher a, ka herh san leh hnuah a liam leh hlauin ka vil a, min chhaih nak nak reng tu te lam chu ka hawi leh tawh eih lo. 

"Zote" ka hming ngei a min ko tu a awm takah chuan ka inher let leh ta chauh a, Hruaitea nu nen kan inhmachhawn ran mai. 

"Lokal lawk teh" a tih chuan Hmangaihsanga ka en daih a, a lo bu nghat a, hmui phun a "Hlau suh" a tih takah chuan hreh deuh chungin ka zui a. 

Inchungah min chhoh pui a, Hmangaihsanga pindanah a la lut zui. Sofa a a ţhut chuan tim daiin a bulah ka ţhu ve a.

Dawhkan a a bag dah lu lain thil bial, mandala design nalh neuh neuh chhuanna hi a rawn phawrh a, "Compact mirror a nih hi" a tih hnuah darthlalang a ni tih ka hre ve chiah. 

"Hmanni ah ka chah a,ka chhiar chian loh a leiah a lo thleng ruih a, pakhat chiah emaw a nih dawn ka tih laiin paruk lai a lo thleng a, naupang ho ka sem ve tawh mai ang ka tia, ka hrechhuak zawk che a, midangin an thlan hmain thlang hmasaber rawh" a ti duah a, "Keichu a ngai ve lo" ti mawi ve mah ila "Thlang rawh thlang rawh, dah chhuak ila chu a zo nghal vek dawn, i mit pawh i khap hman lo ang. An duh zawngah chuan an che rang lutuk" a ti bawrh bawrh a.

Ka tim deuh tlat a, darthlalang mawi tak tak intlar dal ka enreng lai chuan "Thlang rawh..darthlalang mai mai a nih hi" a lo ti leh a, "Aa..aw..ka lawm e aw" tih bah niaih pahin ka hnaih ber a mi ka la a. 

"Hawng chhin teh" a ti leh hram a, ka han hawng chiah chu amah zawk a lo nui chhuak hawk a, darthlalang pakhat zawkah chuan a pangngaiin ka lang a, pakhatah chuan lianpuiin ka lang thung a, ka hriat sa mah nise a nui chu ka nuih veleh chhawng a, a nuih a zat pauh leh a nui zawi emaw tih mai tur a ni. 

"Ka lo hre ve ngai lehpek lo a, a mawi emaw ka tia ka chah a, ka inhmu thut chu ka phu nasa alawm" a ti a, a la nui tlet tlet reng a, Thiangin a fel lutuk a tih tak kha mawle. 

"I ni Biakèngi tur ka nih hi aw..min hre tawh tho ang" a ti leh rih ţhin a, "Neihkimin thuamchhawm chungchangah a titipui che em?" a ti bawk a, a thutak ve ta khawp mai.

"Aw tlem chu kan sawi" ka ti a, an nutei te leh an ni dangte pawn an hre vek tawh ang.

"Kan u leh naute ho hi an buai lohna turah an buai tam peih lutuk alawm mawle. Neihkimi lah hi chhungte thuawih, fuih nuam chi a ni bawk si. Lo ngaithla liam mai mai rawh aw, an thu zawm kher a ngai lo. I duh duh rawn keng lut la, ken ngei ngei ngai nen chiah lo lut mah la kan lo pawm thlap tho ang che" a ti a, thla a ti muang huai alawm le. 

"Nia..ken theih ka nei tam kher lo ang" ka tih laia Hmangaihsanga lo lut chu "Hei ziah zuah lah hi..reilote pawh awm hrang thei hlek lo mai. Zote, darthlalang kha han pe ve teh" a ti a, a nui a ni leh der tawh a, a hmui a hup a, a taksa a insawi det det a, a ri miah lo thung. 

"Darthlalang pakhat a kan lang lian vak hian a nuih a ti za ve em em a" nui chunga tih pahin ka darthlalang chu ka lo pe a, a hawng a, ho tih hmel deuhin za lo zet hian a nui a, "I inhmu hluai em?" Ni Biakengin a lo tih lai chuan ka bulah a lo ţhu a, nuih a duh emai thau loh ngaihna a awm lo. 

"Ka ni, Zotei hian inneih hun kha sawn hma leh si mai ang u a tia" a ti pek a, a hmel a thutak run mai bawk a, Ni Biakengi pawh a nui tawp chiang hle. 

"Ka tih loh tawp kha a..sawn hma pawh a ngai tawh hleinem karleh lawk hi a ni tawh a, dawt sawi lo mai teh aw" uar zet hian ka lo ti a, ni Biakengi chu enin a nui lek lek tawh a, chhaih nuam a tih vang mai mai a ni. 

"Keichu maw Mama kawr hak tur rawng bik an siam hrang thlap te kha ţha ka ti lo. Naupang ho hian an duh duhin ro an rel a, an ti hautak mai mai alawm. Hetianga kan tih zel te chuan keimahni min ngaina a min ngaipawimawh ve tu mi harsa zawk ten hrehawm an ti mai dawn a sin. Lokal hreh te an awm a nia ka rin ni" a tih chuan "Ka hrilh ngun tawh..awmzia a awm lo" a ti hluk a, a lungawi loh hmel tak tak bawk. 

"Mi hmuh a lan ropui mai mai a ho lutuk, kawr inang hak phei chu ţhian ho tih awm lek a nia, duh leh a chenpuite chuan a inang ha se, midang hi tel ve kher lo se a ţha tur a nia, mi rethei te kan dang chep ta lutuk hi a ţha lo" a ti bawrh bawrh a, nu pangngai leh rilru tluang tak a niin ka hria. 

"Zotei hi i vawikhat hmuhna a ni em?" a ti ta daih a, ka hming a min koh theih chuan a ni lo tih hriat ve mai awm a nia. 

"Ni nang..i pa boral ţum khan ka hmu tawh alawm. I nu boral lai kha kan zin lai a nia, ka lokal ve thei lo a nih kha" a tih rual a a pawi loh thu ka sawi laiin Hmangaihsanga chuan "Hmelţha i ti em?" a lo ti leh hmanhmawh a, min chhaih laih vel hi nuam a ti ve hrim hrim. 

"Hmelţha e..min tluk ve ţep alawm. Ka nulat lai te chuan electic current kan la nei ve mang lova, khua a thim rualin in kawtah ka ding a, a êng nghal pup zel a, ka unauten lehkha an zir theih phah alawm. A hmelţha berin pawl sawm pawh ka pass loh phah a" a ti a, a dawt sawi chu kan lo nuihpui hak hak a. 

Ni Biakengin min chhuahsan hnu chuan "Chhuk ang chaw ei an duh tawh ang. Ka fapa i lo kalsan daih lehnghal a" ka ti fiamthu a, thawh nghal mai ka tum chu ka banah a lo vuan a, "Aw..lawkin theihnghilh i nei" awmze nei deuh a a tih chuan nui chung hian a biangah ka fawp a, duhkhawp loh hmel zet a min lo en chuan "Nakinah" zawi te hian ka ti a, ka kun daih bawk. 

Ka ban a vawn lohna lam chuan ka khabe ah dawmin min kuai dak a, ka hmuiah min fawp ta tho a, hnar tum mah ila awmzia a awm lo. 

Inhnuaiah chuan an lo la ri luih luih a, hlim deuh a ka fapa infiam lai chu hmuhnawm ti takin ka thlir a, thingtlang lama an chhungte an tam ber a, khawpuia awm sa chaw ei tur ringawt a lokal chu tlemte chauh an ni. Mi fel tak tak vek an nia, boruak a hahdamin a hlimawm takzet a ni. 

"Karleh ah chuan Zotei rawngbawl ngei kan ei thei tawh ang a, kan rit haw nulh ang tih a hlauhawm mang e" puitling ho chuan an ti vel a, "Kha i fapa kha ngaihven rawh, a bel leh chawt tawh che a nih kha" Hmangaihsanga hnena an tih te chuan ka lai deuh tlat a, mahse hetiang hi chu ngaiah ka nei thuai dawn. 

Khirh deuh deuh an awm ve lo hlauh a, chaw ei lai pawh chuan min fiam zuk zuk reng hlawm a, ka rin lawk dan ai daihin a nuam a, Bawiha lah an chhawnchhaih peih a, an en hrang bawk si lo. Huphurh ru deuh chunga kal khan hun hlimawm tak ka hmang ta hlauh a. 

CONT..