KA HRINGNUN THAWNTHU-32

KA HRINGNUN THAWNTHU-32

Zonuni rualin haw thei tho mah ila min thlah a tum lui tlat tho a, haw kan tum tih an hriat te chuan min ui der ve nasa hlawm ngang mai a, ţawngkam ţha mai mai mah nise a lawmawm tho tho.

"Bawiha hi chu hruai haw lo mai la, amah pawh hian nuam a la ti tho a" hmeichhe naupang pakhatin a rawn ti nang nang a, Hmangaihsanga cousin fanu a ni a, Bawiha kalna apiangah a zui ti ila a dik ber ang. 

"I mawl lutuk aw Amal, a haw duh tawh a nih kha, zan a nih tawh hi. Hetah lokal teh..nakinah chuan a lo awm reng tawh dawn tho alawm" intifel zeta U Remremin a lo tih zung zung chuan Hmangaihsanga pawh a nui ve ruh ruh a, tlem a la nau deuh hlek a kawi khawm a, a thu thuin a dah hlawm bawk a, nuam a ti khawp mai. 

An cousin fate an awm ve nual a, tlem a thil chinchang hre ve deuh hlek te chuan "Inneih ni ka chak tawh e..putea zawk hi a lai ţut ţut ang ka ring" te an ti a, an chhungkua an inpawh lutuk hi an ngaihsanawm. Unau pianghmun pawh inhmuhkhawm a har tawh laiin hlimna niah lehnghal an inţawiawm dial thei a, an awhawm ngawt mai. 

Tualah te chuan êng an dah belh aniang kan chhuak chiah chu a êng ut a, Neihkimi leh Kimkima te rawn inzui chu ka hmu lo der a, Hmangaihsanga zawk chuan Kimkima chu "I va fel ve" tiin a lo be mawi ve a, naupang ţhenkhatin min zui chhuak a, keiin chung ho chu ka be daih thung a. 

"Engtikah nge Bawiha nen hian in lo len leh dawn?" tiin lai deuhin min zawt a, "Kan lo leng tawh rih lo ang. Nangmahni lo leng zawk ula" ka tih chuan "Anute kan lo dil ang" an ti a, a ţhenin "Engtikah nge apatea nen in inneih dawn?" te an lo ti bawk a, "Karleh a ni tawh, a hnai tawh lutuk" ti mah ila "Sunday zawh ah daih maw? La rei e" an ti nang nang a, keiin hnai ka'n tih tawh tehreng nen. 

Kan hmazawna car a rawn din chuan "Bawiha bye bye aw..lo leng leh vat rawh aw" in la u tak hian an ti hlawm a, naupangber na na na chu an naute chei ve nasa mai. 

Thiangin "Siampuii ka pui ang a, U Hruaitea rualin ka lo haw mai ang" a tih vangin keimahin Bawiha pawm chungin ka ţhu lut a, naupang ho tukverh a an lo dah far lai chuan "Bawihte...khawiah nge i nu Zotei kha a awm?" Ruattein a ti lauh a, min rawn hmuh nghal mai tâkah chuan "E...U Zote..lo nghak lawk ru aw" a ti a, a tlan lut leh daih a. 

Naupang ho hnen a "Min lo thlah ve ula, hei ţhutna a awl ţeuh alawm" ka tih chuan lu an thing a, an chak tih chu ka hrereng, Hmangaihsangan a sawm ve loh vangin an ngam lo mai mai aniang.

"Nih leh nakinah lo leng rawh u aw" ka tih leh hnuah nghenchhan ka ngheng a, Bawiha chu a ute ho nen an la inchhaih reng tho. 

"Nuam i ti em?" Hmangaihsangan a tih chuan "Nuam e..ni Biakengi kha ka nuihpui nasa lutuk, darthlalang lah kha Zonunin a keh ve mai mai thei lo a ti lehnghal a" phur deuh a ka tih chuan a lo nui suk a, Zonuni haw tur thlah pahin a rukin ka entir a, a keh theih loh bakah a man to zia a sawi nasa mai, min la dil zui. 

"A fel alawm..nuam i tih ka duh ber a, ka chhungte ho nen in inpawh loh ka hlau bawk a, nangman i zir chuan tumah an sual lo ang" a ti leh daih tawh a, ka pawm zawng tak tho a ni. 

"Malsawmi landan thar kha eng nge ang i tih?" ka tih chuan "Ka hre nang" a lo ti ringawt a, "Eng nge an rawn tih a?" ka tih leh chuan "Malsawmi nauin nupui a nei ve dawn a, sawmna min rawn pe a nih kha" a ti mai a, a hriat loh theih ţhin khawp mai.

"Damdawiin a ka thawh tirh lama a nau mipa ka hmuh ve tawh kha a ni em?" ka ti a, "Nih kha..nau pakhat bak a nei lo" a lo ti nghat a, Malsawmin min ţawngkhum vak ni kha a nia, ka theihnghilh mai mai tawh lovang.

"A tuar ve viauin ka hria, a landan thlengin a thlak danglam a nia, i khawngaih ve tho em?" ka ti a, steering a hum nghet ţalh ţalh ka hmuh chuan ka zawt kher kher hi ka inchhir lek lek a ni. 

"Khawngaih e" a ti sup a, chutah min rawn enin "Ngaipawimawh duh suh..a tawp tawh. Nunhlui a nih kha" a ti nawn leh a, ka ringhlel pawh a ni hranpa lo, a khawngaih ring sa ran a zawt ka ni tho. A ngaihdan hriat ka chak vang zawk a ni. An inţhen tawh na a huatna hranpa a nei lem lo niin a lang a, a ţha phian mai. Ka ring tawk a, chuvanga neih tum chu ka ni. 

Ruattei lo let leh chuan container pahnih min pe a, "An lo dah thukru lutuk alawm mawle" a ti nang nang a, "Eng nge a?" ka tih chuan "Chawhmeh a nih kha. Putea leh Rinrini te unauin lo ei ve rawh se. A ţhing a ni lo a nia aw..kan ei huk hmaa ka suah chhuah diam a nih kha. An lo ei tawh tak leh naktuk zing hmehah a ni mai" a ti a, Ruattei nge nge na chang a hre ţhin e. 

"An lawm ngawt ang..ka kal nghal mai dawn asin. Bawiha hi a mutthilh hman chuan step chhuk a in pawm thlak a ngai dawn a" ka ti a, "Aw..kal ru, kan thil dah kha?" tiin awmze nei deuhin kan thil lei ho kha a sawi chhuak a, "Zonunin a hawn" ka tih chuan a bu nghat a, Bawiha a chhaih zui zat bawk a.

Hlauh ang ngeiin Bawiha chu kan veng pana kan tlai laiin a muhil a, tih harh tum ţang ţang mah ila a meng thei tawh ngang lo. 

"Naupangte si hi kaihthawh a harsa mai bawk sia, pawm thlak nge nge a ngai dawn a nih hi" nuih paha ka tih chuan ka fapa chu a rawn melh zeuh a, "Ka lo lut kawi ang" a ti a, a la hma tho bawk nen, ka hnial tlat bik lo. 

Kan in peng thlen hma deuh kawng thim lai kan thlen dawn chuan a tlan muang riai riai a, ka nuih a za angreng hle. 

Motor a tih din rualin min rawn hnaih nghal rual a, "I tih tum ka hria a nia aw" ka tih chuan a nui ri suk a, ka hmui a rawn fawh chuan ka lo dawh tawp ringawt a, chhan letna chi a ni miau lo. Min hmu an awm vaih chuan Thang Lm-a beng a thleng rang dawn lutuk tlat a ni. 

"Kan induh ţan tlat" tih sup pahin a in la hrang a, "Induh vang a ni lo e aw. Mi an lokal thut chuan tlangau in a hre nghal a ni mai" ka tih chuan a nuih a lo za viau mai. Thang Lm-a hian vengchhung leh veng pawn lam a thil thleng a hre thei a, a ţawng rin chu thuhran, min rawn hrilh ve kher zel bawk sia, Hmangaihsanga hian a lo lawm phian a, a awm laia a lo len fuh chuan tlangau a lo ti ta ţhin a, ani lah chu a hming thar lawm ber berah a ţang lehnghal a. 

Kawng sir a motor a dah rem hnuah "Chhuk nghal lo mai rawh ka rawn la hmasa ang" a tih avang chuan chhuk tum uk tawh kha ka ţhu ţha leh a, motor kal hualin ka ţhutna lam kawngkhar chu pawn lam aţangin a pawt hawng a, "Kan lumum-a muhil hi hnek pawp mah ila a harh lo ang" tih fiamthu pahin a pawm a, nui hak hak chungin kan hawn tur ho ka la khawm a, step a kan chhuk thla te chu la innei lo mah ila chhungkaw diktak te pawh kan ang alawm le. 

Ka putean tv a lo en laiin Rinrini leh Muanpuii ten kuhva an lo buaipui a, kan rual a Thiangi lo haw ve lo chu a chhan min zawt thuai a, ka hrilh chiah chu an inmelh ralh a, an nui zui kar kar a. Bawiha ka muttir hnuah hmai phih tumin ka chhuak leh a. 

"Eng nge i en a?" tih pah a ka putea bula Hmangaihsanga a ţhut chuan "Khi khi ka en..a film hming pawh ka hre lo. Rinrini te unauin Turkish ho an ti mai a, zantin a hran hran a chhuak a, a inzawm zel bawk sia ka entui ta phian a" a tih chuan an nui dun ve huk huk a. 

Hmai ka phih zawhah inthlak turin ka luhsan leh a, ka chhuah leh pawh chuan an lo la ti ti tui nasa mai. Ka putean a film en lai chu a hrilhfiah a, thingpui ka lum lai chuan savdhan a sawi leh daih a, thil tak takah an lut a, ka putea thusawi chu ngaihnawm tih hmel deuhin a lo ngaithla zel a, zawhna a lo zawt zeuh zeuh bawk a, an hmaa thingpui inchhawp chu an in chak vak lo aniang zial te an han zu hmasa leh te te a, Ruattei thil thawn avang chuan Rinrini ten lawmthu an lo sawi ve bawk a, inleng kan nei zui ta mai bawk nen, kan ri luih luih mai. 

Kar thar aţang chuan keipawh ka chawl ve ta a, ka nu unaute hoin rin aiin min buaipui nasa a, a der mai mai leh, keimah vanga eng emaw tal neih theih an beisei vang chauh pawh lo ni sela min buaipui lo se chu ka mualpho viau maithei a ni. 

Chhungkaw bul ve tak kan nih avangin man ei tur an tam lova, min hringtu ka pa chhungte lam phei chu kan tibuai lo hrim hrim. Ka nu Chhuanin ka ni a hrilh ve ngei a, thawm an rawn neih zui tak lohah chuan an tello in kan ti thei an tia, an hrilh nawn duh ta bik lo a ni. 

Ka ţhiante pawh an felin an bengvar a, Bl-a phei chuan "Dressing table kha tumah lo siam tir suh ka tih kha aw" a rawn ti reng a, min tihsak dawn a nih ringin ngaihţha deuhin ka awm ve tawp.

Zonuni awm loh lai hun ţha chuhin ka nu Chhuani hnenah chuan "Engati nge min buaipui chiam a? Tun hma zawngin min ngaihsak ngai mang si lova, ka pasal chuan eng hna pawh thawk se keichuan engmah ka nei chuang lo a nia" ka ti ta nge nge a, a hamhaih hmel khawp mai. Min ngaihsak ngai hlei lovin min ngaihsak thut hi awmdan thiam a har ve em a ni. 

"Inu nen khan a thih hmain kan inbia alawm. Kan ngaihsak loh che chuan i nu a lungawi dawn lo asin. Sawi chhuak tawh suh. Nei le lu lo mah ila mawi deuha kan kal tir che a ngai alawm" a ti mai a, ka ner ru zeuh chu a hmu lo a nih hmel. 

Zonunin min buaipui nasa bawk a, mo thuam pawh kan hawh tawh a, ka putea duh ang ngeiin bang rawng te pawh kan hnawih ţha a, a duty loh karah Thang Lm-an min pui ţhin a, rawng hnawihah phei chuan a ţangkai lutuk ringawt. 

Ka ţhiannu leh Bl-a te phone a an inbiak lai chuan "I pasal neih hma sam tal min dum sak ve hrim hrim rawh" a tih tlat avangin Thang Lm-a sam ka dum sak mek a, bike in a lo accident lehnghal a, a hmai leh kiu vel a belkang nasa mai. 

"Zote, Bl-an mipa pakhat tal lo chho se la a ti" tih pahin Zonuni chuan kan tlangau Thang Lm-a chu a rawn en a, "Han chho lawk mai rawh. Nakinah kan tih zawm leh mai dawn nia" ka tih tlat avangin phun nang nang chungin a tho a, ka nu boral khan Bl-a hi chu a lokal tawh a, kawng a rawn bo em bik lo e. 

Bl-a thil min pek tur an rawn zawn thla chu "Awii..BL-a hi..em em a che" ka lo ti ringawt a, sawi tur pawh ka hre lo. Dressing table leh wardrobe hi inrem thlapin a siamtir a lo ni a, dressing table chu hmeichhia ten ngei ngei a kan ken tel ţhin a nia, ka pasal neih hmasak a ka ken pawh kha tunah hian kan la hung ve reng. Wardrobe hi chu ka beisei ngam lo hrim hrim. 

"Ka cousin in a siam ţhin a, ka ba a nia aw" a ti na a a man a pe nghal ngei dawn tih ka hria a, a to viau bawk ang. 

"Pindanah va hung rawh u..bungraw ţhenkhat kan dahchhuak a a leng thei mai ang. Nula ho helamah an mu anga a ni mai" ka putean a tih chuan pindanah an zawn lut a, kan tlangau leh Bl-a te lo chhuak dun chu an inchen tawk khawp mai.

"Engati nge khatiang bur bur kha i lo tih duh a?" a mi rawn hruai te an kal diak hnua ka tih chuan "Man ka ei dawn kha..bakah i hmelţha em a" uang zet a a tih hnuah uluk deuhin chhuat lai takah chuan a lâm ta mai a, ka naute hoin an lo nuih vak vak chung pawhin a zak der lo. A san tehlul nen hniam deuhah a kûn a, kan tlangauin a lo lampui veleh thei mai bawk a, hmui pet fuat chunga uluk leh dim deuh a an han kun te, an ban an han chet vel te chu mittui tla phungin kan nuih a, sang lo se chu a nuihzatthlak kher lo ang, an sang lutuk hian an lam chu a ti mak zual a, tumah kan insum thei lo a ni ber. 

Pindanah bungrua a inhung ve far tawh a, puan pawh ka lei tawh. Thang Lm-a nu a felin ka mawi loh mawlh a hlau a, Zonuni leh a nu an ţangkai hle bawk. Tlaiah Sangzuala te khua a ka ţhiannu Thantei leh a nu an lo thleng a, rei tak kan inhmuh loh hnua kan han inhmu leh chu kan ri chel chul mai. Thantei chuan min kuah leh ţhin a, a mittui a tlak te chuan ka lo nuih hak hak a, thinlung takin min lawm pui tih ka hria a ni. 

Pindanah kan inzui lut a, an bungraw lo ken pawh a rem laiah Thantei nen chuan kan rem a, "Ka rinphak bak a ni" a ti deuh reng a, "Ka ngaihtuah lutuk che hi keimah ka hrehawm ut ut reng a, tunah chuan hnar ping ţup reng, vawilehkhata veng hawk ang hian ka awm" a ti a, tlemin a lo cher deuh tawh a, thil dang chu danglam a awm lo. 

"Sangzuala te pawn fa an nei tawh a, Btei chu nang angin an ti ve ngam lo. I nu pawh a phun hlek chuan Btein a liak let erh zel a, Sangzualan chhuak tura a tih lahin a pawr pawrah a ţang a, hmeichhe nasa chiah an mo thei ang kan tih ţhin kha a lo dik khawp mai" Thantei nu, Nu Kungtein a tih chuan ka lo nui mai a, Sangzuala leh a kaihhnawih chu ka nuih liam mai mai thei tawh. Thantei hnenah lah a chanchin min hrilh tawh suh tiin ka hrilh lawk daih tawh a, ka ngaihven lo bawk a, chuti chung chuan a fa neih thu an sawi hian min ţawng chuang hauh lo.

"Pasal ţha tak i nei tur hi ka lawm tak tak a ni. A thlalak i lo thawn kha ka lo en ve a, ipa Nuna meuh pawhin a va zahawm thlep thlup ve a ti ve khauh a, a landan chu a pawimawh hran lo a, sawi lo ta ila, an dinhmun leh a nihna zawng zawng te ka hriat hnu kha chuan an sang mah mah deuh em aw ka lo tia, mahse i ţhiannu hian a fel lutuk a tia, in han insawifel chiah phei kha chuan lawm luat vangin kan ţap lo chauh a ni" Nu Kungtein a tih chuan "I ţah reng kha" Thantein a lo ti vat a, "Puan engzat nge i lei?" Nu Kungtei bawkin a tih chuan ka lei tam loh thu ka hrilh a, suitcase pakhat chu hnuk hnaiin a zipper a hawng a, puan a lo lei chu ni rengin. 

"Tumah hnenah sawi lang suh..i nu ka nih angin ka tihsak che a nih hi. I lei tam thei dawn lo tih ka hria alawm, sem tur i neih tlem lutuk chuan Sangzuala nu ang khan an awm ve palh ang" a ti a, min ngaihtuah lutuk chu lung te pawh a chhe lek lek alawm le. 

"Thil dang min tihsak tho sia, in hek awm mange" ka tih chuan "Ipa Nuna zu manah a ral leh vek zel tho. A phalna thlap a ka lei a nih hi. Thenzawl a ka ţhiannuin a tlawmin min lo lak sak a, a tihzia tak tak a ni" a ti zung zung a, ka awm a nuam lehzual sawtin ka hria. Ti hi chuan daih vek lo mah se ka sem ve ţeuh thei ang. 

Rengpuia te pafa pawh zanah an lo thleng a, mahni motor a lokal an nih avangin an hmanhmawh lo a ni awm e. Sangzualan kan inneih naa a dinpui Rengpuia u kha chu a lo lang ve lem lo a, an rualin Lawmkima a lokal tel ve thung. Ruattei a lawm viau ang. 

An inbual fai zawh chuan "Lawmkima chu hmana i lo len ţum khan kumtharah ka lokal leh ang i tia, i reh ta vang vang sia" tiin ka lo chhuahchhal a, za lo deuh a nuih pahin a khabe a tuai tuai a, min chhan ngaihna pawh a hre lo. 

"Hepa hi chu khawpui hian a hip hlawl lo alawm. A pa'n sipai ah intlar ve rawh a tia, ram a riak char char. An koh lahin a haw duh ţhak lo a, a hnuh a hnuh haw chi a ni der bawk si lo, an tir lui lo tawp a nih kha" Thantein a lo ti hlak hlak a, in ţhenawm an nia, an inhrechiang khawp ang. 

"Chuvang chu a ni maw i lokal loh? Sipai te chu a ţha a sin..an hlawh a tam ropui si" ka tih chuan "Ka duh lo" a ti ban charh a, a hmel a tak ngul mai bawk si a, sawizui ngam chi pawh a ni tawh lo. 

"Mei ka'n zu lawk" a ti a, a chhuak nghal nulh bawk a, "Zanin chu tumah mu hrang lo ang u aw..naktuk man hlan a ni tawh a, naktuk zanah kan riak khawm leh bawk ang a, a nuam dawn lutuk" Zonunin a tih chuan an lo phur hlawm khawp mai. 

Lawmkima lo lut leh chu a ţhutna a ţhu an lo awm hman avangin ka putea leh Bla te ţhutna lam a pan a, a ţhut rual chiah chuan a ri rawp a, Lawmkima ţhutna lam chu a chim ti ila a dik ber ang. Ţhutthleng vawn chhan awm lo a nih vangin an tawlh thla dual a, an hlau meng phar vel chu nuih loh theih a ni lo. Ka pa Rama te ho pawn "In na em? Pawn a mi kan lak luh a nia, a zia lo hle mai" an ti tak na a an nui ţha hlawm a, Bl-a phone pawh a thlawk thui khawp mai.

"I va rit awm ve..ka phu nasa lutukin phone pawh ka paih daih alawm" Bl-a zawk chuan a ti hlur a, thinrim hmel a pu lo thung.

"Tikhan nakin thlengin kan sawi ang a a ţha khawp alawm" an lo ti a, Lawmkima lah chuan siamţhat theih a inring em maw ni ţhutthleng chhe lai chu a endik nasa mai. 

Man hlanna hun nei turin an lo kal khawm ve sap sap hlawm a, mi kan tam lem lo khawp mai. Pa Kawltea lah chuan ruai buatsaih a la duh tlat a, a vawk vulh lai pawh kha an talh ta ngei bawk. Ei tur kan tlem dawn a an tih avangin ka putean a hralh ţhen luih tir a, Thang Lm-a te in kawtah rawng an bawl dawn a nih hmel. 

Hmangaihsanga leh Hruaitea te lo inzui lut chu mikhual ho chuan an lo en duh khawp mai a, khawi hmunah pawh kal se zahpuiawm loh ve ve tur an ni bawk si a, ka lo chhuang ru ve nasa mai. 

Pa Rina leh ka pa Rama te ho pawh chu ţha deuhin a ti ti pui vek a, Thang Lm-a nu, Nu Ţani nen phei chuan an sawi ril hmel lehzual a, zawhna mak pui pui a zawt leh vak ang chu, min duat turin a hrilh bawk a, an thusawi hre phak a ka awm lo chu ka vannei phian. Hre ve vek ila chu zah chem chemna tur a tam leh dawn lutuk.

Palai te man hlanna an han nei a, ka man sem tura min din tir te chuan ka ţhiante ho chuan an lawm zia an thup thei bik lo. An nui sâng reng a, a lem mai mai a ni lo tih a hriat bawk. Ka bulah Hmangaihsanga a din ve miau avangin Nu Ţani leh Nu Kungtei te chuan hmuhnawm thlir tak hian min lo thlir a, a ţha lamin a chanchin an sawi nasa viau ang.

Nui var varin ka bula ding chu ka en a, ka nun kawng hrehawm lutuk hi ka rualin zawh ve zel lo se la chu tun dinhmun hi ka thleng lo ang. Ani pawn min lo en ve vat a, a inrintawk hmelin a hlim hmel takzet a, min hmangaih zia chiang takin ka hre bawk. Chu aia pawimawh chu a awm lo. 

Zanah chuan ka nu Chhuanin "Riak khawm mah ula muhil hma ang che u. Zotei leh Zonuni te zingah an thawh hma a ngai dawn a, inneih hunserh kha chawhnu daih pawh nise inchei nan hun in hmang rei dawn lutuk. Rinrini pawh i ute i chei a tho hma ve tho ang che" a ti bawrh bawrh a, Bawiha lah chu a u Rengpuia bulah a awm a, min ngaihven loh mai bakah zan danga a mut hun a ni daih tawh a, mahse mutchhuak ang pawn a la awm lo.

An ti ti siam siam hlawm a, Hmangaihsanga nen pawh reilote kan inbia a, thawm dang a tam a, an lo ko sek bawk nen, inbiak hleihtheih a ni lo. 

Facial te kan ti ve ngei a, mi tih ang em em phei chu a ni ve lo, Rinrinin scrub leh massage cream a nei a, chu chuan kan nuai ve vek mai mai. Rengpuia lah chuan "Vawi hnihna a ni tho alawm. In uluk vak a ngai lo, biakin kawtah i fapa hian i pawm a ngen dawn tho tho" a lo ti ve sek a, a nih duh hmel viau tho sia.

Zingkar aţangin chaw ei hma theih loh hlauin an buai hlawm a, Zonuni leh Rinrini te ho nen kan ei hma a, chaw eikhamah pindanah kan lut nghal diak a, min ngai ngang aniang Thantei pawh ka bulah zel a awm ve.

"Rinrini chu i tih tur tak chi a nih hi min chei nalh riau mai. Makeup hi ţha deuh hlek lei la, mo cheiin kal kual rawh. An hlawh hnem thei teh mai a nia aw" tiin Zonunin a sawi hmuh a, nalh a inti ngang aniang a in en reng mai. 

Kan kawr hak tur a mawl mang a, tam tak phei chuan mawi an ti lo maithei mah se ka nu khan mawi a ti ber a, ka ngai riau lehnghal. Nei tur tho tho te chu a damlai khan lo nei daih ila, a nat tak tak hma kha chuan biakinah pawh a kan hruai ve thei awm tho sia tih tein ka ngaihtuah ţhin a, la dam se chu mo thuam a ka inthuam te hi mawi min ti leh bik ngawt ang. 

Min hruai tur a Hruaitea lokal chu ka lo nuih var var a, ani pawh a nalh tawh khawp mai. Nu Kungtei chuan "Nimin khan in hmuhnawm ngei mai. In zahawm khup mai a,in hmel lah a zahpuiawm loh dun si, thlalak kan hawn ve duh a nia aw, kan indaihin siam rawh u. Kan khuaah hmu duh tur an awm nual a nia" a lo ti pek a, Thantein a nu a nghawk zeuh laiin Hruaitea chuan lawmthu a lo hrilh a, sawi tur dang vak a hre bik lo. 

Ţhenkhat chuan a fel fai zawk tiin hmun dangah te an inchei daih a, keini thung chu kan in loah chuan incheina tur a awm chuang lo. Engkim hi mumang ang ruai vek a nia, pasal nei mai tur ka nihna te hi a awihawm loh rum rum hial mai. 

Biakin kawtah chuan mi an lo awm ţhup tawh a, Nu Kungtei te pawh kan hnung lawkah an lokal in ka hria. Hma deuhah an kal a, a pheikhawk hnuai a tlak daih avangin Nu Ţani nen an lo let leh a, Muanpuii nen an ke a lo intiat hlauh zawk a, flat tawp an buntir a, a nuam phian zawk ang. 

Tupawh mai chu an nalhin hlim hmel an pu vek a, Malsawmi ka hmu fuh lehnghal a, min hmuh ve rual chuan a nui seih a, keipawn ka lo nuih let ve vat a.

Biakin chhungah ka putean min hruai lut a, mipui tam lutuk chuan min ti zam takzet a ni. Ka nu ka ngaih viau rualin ngaihtuah ngaiin ka awm tawh lo tih a lo hmu ve ang a ka ti rilru a, ka khua a har rualin ka hlim veng veng tho a ni. 

Rehearsal nei lawk thlap kan nih avangin buai lovin tluang deuhin inneih hunserh chu kan hmang zo a, inkutsuiha pawn lam pan a kan chhuah lai hian rem leh rem lo hian "I nalh lutuk" a rawn ti sup a, danglamna nei lo ang maiin a awm leh hmak a, ka nuih a lo za viau thung. 

Biakin aţanga kan chhuah rual chuan pangparin min lo theh a, vanneihthlak takin spray an hmang lo hlauh. Naupang zingah chuan ka fapa ka hmu ve a, Zamtei duh dan takin coat suit nen a induang ve saih a, Ruattein a kai a, a hlim hmel khawp mai.

Vua leh vang an ngah a, a thawhpuite a ni lehzel bawk a, ka peih tawh lo tih chi a ni si lo, thlalak pui tu kan ngah lutuk chu ke a khamin keartui a na ngut ngut a, min chim tu an tam lehzel bawk nen, ka chau deuh nghulh tak tak thei alawm. 

A pawimawh chin a zawh hnuah min lakpui ve duh hrim hrim an awm lehzel a, mi an rem deuh hnuah Bawiha hoin kan la ve a, inneih chauh si chhungkua kan din nghal der mai.

Hmangaihsanga pawm a ngen deuh tlat lehnghal a, "Pafa kan ang deuh tawh em?" Bawiha pawm pah a fiamthu a a tih chuan "I fapa a ni ve tawh alawm..kan fapa" ka lo ti vat a, Sangzuala te chhungkuain an tih ai zawng zawng anni unau hian an ti ti ila ka sawi sual lo khawp ang, a mamawh apiang an tihsak a, kan nufa tan chuan an hlu takzet a ni. 

An inah chuan pangngai takin ka lawi lut a, mi nawl puiin an ei zawh hnuah zanriah ei ve tumin choka ah kan lut a, nula hoin min lo buaipui zung zung a, an fel tak tak a ni. 

"I chau em?" ka bula rawn ţhut paha a tih chuan nui chungin lu ka thing a, "I chauh hmel tlat..naupangin present hawn hun an nghakhlel ber sia, chumi hma chuan i chawl hahdam dawn nia" a ti a, ngaihtuah hmel taka min en te chuan ka lo hlim veng veng mai. 

Chawhmeh min rawn chhawp sak lai mekin Malsawmi a rawn pai lut khat khat a, kan zawn a thlen chuan zu rim a nam huam a, a hnungah a ţhiannu ni awm takin a rawn zui bawk. 

"Malsawm chaw i ei tawh em?" Hruaitean a lo ti var a, a rim na zet leh a kal ngil thei lo te chu hria angin an awm duh hauh lo.

"Ei lo" fiah lo deuh a tih pahin dawhkan lu lam, ka pa dam laia a ţhutna bik kan tih ţhinah khan a ţhu hnawk a, a hmel hmuh a awlsam lehzual. 

"Ei ve nghal ula keini pawn kan ei dawn chiah..Dini i ţhiannu kha chaw eipui rawh" Hruaitea bawk chuan a ti leh zung zung a, Malsawmi awmdan chu a hrethiam viau niin a lang. 

"Chaw ei ang aw" a ţhiannu in a tih chuan a bu lâwp a, dawhkanah a intauh lek lek hial a ni. Zu a in ngai awm ka hre lova, hmeichhe invawng leh felfai tak a ni. Vawiin ni bik hi harhfimin a hmang ve peih lo a nih ka ring a, zu in ngai hauh lovin rui hnapin zu a in chu a nia. A inthunun theihna leh a chhia leh ţha hriatna te a bo vek ang a, zah a hre tawh lovang a, naktukah tuna a awm dan hi a hretawh kher lo maithei bawk. 

"Fian hian ei mai rawh aw..kut sil tur pawn tho tawh lo law law mai rawh" a ţhiannu chuan a ti dam thluam a, "Ei ţeuh rawh aw" lo tih ve pahin ka pasal chuan duat hmel deuhin min en a, Malsawmi awmdan chuan a awm a ti nuam zân bik lo maithei a ni. 

Kan ţhiante awm ve tho mah se chawhmeh min suah sak a, "Ka suak ve mai ang" ti mah ila a ngaithla duh lo. Min duat dan hian pawi a sawi lo a, ka tana zahthlak tur chi a ni lo bawk. Mi tam tak pawhin min hmu se nuam ka tih tho ka ring. Mahse Malsawmi a awm ve avang erawh chuan ka lawm tur angin ka lawm thei lova, ka khawngaih a ni ber. 

Chaw kan ei mawlh mawlh lai chuan insut ri kan hria a, Malsawmi ţhutna lam aţanga inţan a ni. Inthurual ang hrimin a lam kan hawi ţhap a, Malsawmi lo hawichhuak chu a mittui a tla par mai. 

"A thak" a ti ţiau a, hetiang hi mi inneih naah a thlen ve ngai awm pawh ka hre lo, kan chhangchhe khawp mai. 

Midangin an buaipui ka rin laiin 

Hmangaihsanga a tho vut a, kut a silfai te te hnuah Malsawmi ţhutna lamah kalin a thlen hma aţangin "I puar tawh em?" a ti nghut a, a thinrim emaw tiin hlauthawng takin Hruaitea ka melh a, a lo nui suk duh chauh. 

"Aw" ţah aw ţuau hian a lo ti a, "Nih chuan kal ang le" dam deuh zawka tih pahin Malsawmi chu dim deuhin a kaitho a, "Ka lo let lehnghal ang" a ti a, mi hmuh loh theih dan ber turin choka thlang lam kawngkharah chuan a chhuahpui a. 

An eina a khawm sawk sawk hnuah a ţhiannu pawh chuan a zui chhuak ve a, Hmangaihsanga pawh a rawn let har lem lo. 

Ka bungrua pawh remţhat lohin pindanah a la awm a, Zonuni nen a pindan chhung kan lut chiah chu khumah ka let nghal tawp. 

"I va chau awm ve" a ti a, a nuih a za viau mai bawk a, "Nizan kan mengrei a, zing kan tho hma leh a, ka mit hi chhing vang vang ila minute 5 pawh nghah a ngai lovang, ka muhil nghal bawrh bawrh thei ang" ka tih chuan "I mu tak tak thei ţep tawh a nia, enteh Malsawmi kha ka khawngaih reuh. A awmdan kha naktuk a harhfim huna a hriatchhuah chuan a zak ve ngawt ang. Ruih pawh hian inthunun thei lo khawpa ruih loh tur a nia, mualphona mai mai" a lo ti a, ka la ngaina chuang hauh lo na a keipawn ka khawngaih khawp mai. 

"Choka ah khan mi la awm tam phei se chu a mualpho vak dawn a nih kha. An rawn hmuh tam hmain inpa khan a hruai chhuak hlauh zawk a, hmangaihna hi chu a hlut rualin ninawm ka ti, tuemaw tal an nat ngei ngei a ngai ţhin a" a ti hnual raih a, hun hi a ding duh bik lova, Malsawmi pawh a ţha chhawm ve zel mai ang. 

"Naktuk shooting neih an ti lehnghal a, an phur hlawm si, ka peih tawh lo tak tak" ka tih chuan a lo nui hak hak a, tunlaia inneihna hian a chhawm tel tlat tawh a, thlalak hreh mi ka ni bawk si, mahse ka tih ve ngei chu a ngai ang. 

"I la chau em viau em?" Hmangaihsangan a rawn tih chuan lu ka thing a, khum aţanga ka tho chu ka kut rawn vuanin a hum lum vang vang a, "Tih tur ang ang ti zo vat ila mu vat zawk teh ang" ka tih chuan mawi em em hian min lo nuih a, a mitmeng nung sarh te chu hmuh a nuamin a hlim takzet tih ka hrethei a ni. 

Miin thilpek min pek khawmte chu kan hawng a, naupang hoin nuam an ti khawp mai. Bawiha chu Ruattein a chang chawt a, inchhung kan tihfel vel laia "Ka lo la dawn mi? I hah tawh lutuk ang" ka tih chuan "Ngai lo..mi chu lawiţhat zanah te hian an riak chhuak daih zel asin. Zanin chu ka lo riahpui mai ang" nui rah rah chung hian a lo ti a, lak luih tum pawhin a phal tlat lo. 

Ka chhungte bik chu an hawna a rei tawh a, ka awm ţhanna sa mah nise ka nu sulhnu hmuh tur a tam a, chu chuan khua a ti har veng veng thei. 

Hmangaihsanga pu chuan a bulah min ţhut tirin zawhna mak pui pui min zawt a, a sual thiam reuh em em mai lehnghal. 

"Ka cham ve rih dawn a, rem i ti vak lo tiraw?" te min tia, ka thinrimna chawh chhuah phet a tumin ka hria. 

"Hmangaihsanga hi ka tute zingah rau rau pawh min duat ber tu a nih hi" a ti thul, an inpawh zia ka hria a, insawitheih nana a hmang pawh hi a âwm lutuk tlat a ni. 

"U Zote, naktukah thla kan la dawj maw?" U Remremin a rawn ti a,a nui reng mai a, nuam a ti berin ka hria. 

"Dawn e..kan la chuai chuai dawn nia" ka tih te chuan pawr tawkin "Yes" a tia, a naute ho a va sawm leh a, shooting vel chu a sawi aniang naupang ho pawh an hlim dar dar khawp mai. 

Zonuni leh Hruaitea te nen bungrua kan rem fel thuak thuak a, Ruattei pawh a rawn lut ve zeuh zeuh a, Bawiha a ngaihtuah deuh avangin rei a awm ve ngai lo thung.

"Awii..ti vak duh rih suh u. Vawiin ni ang phei chu chauh a na duh si, mu tawp ula naktuk velah in ti dawn nia, Zonun lo riak rawh aw" Zamtein a rawn ti ve bawrh bawrh a, bungrua ka ngah loh avangin remţhat tur a tam hran lo. 

"Bawiha thawmhnaw lah hi a tel ve zel a ngai a, tê si daihzai bawk si" Zamtei vêkin a tih leh chuan kan nuih a za tlang khawp mai. Vawiinah a infiam ve nasa a, a muttui viau ang chu. 

"U Neihkimi ka va hmu tawh lo ve, present an hawn lai vel kha chuan ka hmu ngei a" Hruaitean a tih chuan "A mu ta a nih kha, pawimawh a awm tawh chuang lo a tia, anni ang nula senior te chu hun bakin a thunun tawh hleinem" a lo ti fiamthu hlut a, ka mona tur hi a hrehawm dawn lo tih ka hria a, chu chuan awm a ti nuam ve deuh a, ka nu ka ngaihna erawh chuan nilengin min kalsan lo tih theih a ni.

Rinkimi te nufa haw tum tawh chu an lo lut kawi a, Rinkimi nu hi an nutei a ni. Ka bungrua te chu an enkual a, an ner nak chu ka lo hmu ru reng a, engahmah ka ngai duh lem lo. Ka phak tawk ang a ni miau a, han zahpui viau a ţulna pawh ka hre chuang lo. 

Thil ţul ang ang kan tih zawh hnuah ka inbual a, zan a rei tawh em em mai lehnghal a, Hmangaihsanga chu a pu'n a char rih ni awm tak a ni a lo lut zawk a, putara kohnaah a kal leh ta kha a nia. 

Bualin aţanga ka chhuah chuan pindanah a lo lut ve chiah a, "Geyser ka on a, va inbual ve nghal rawh a tlai tawh sia i hritlang ang" ka lo ti sawk sawk a, thlasik lai a ni bawk nen, inbual zawh phei chuan a vawt angreng hle. 

"Aw ka rei lo ang lo in ha lum rawh" a kawr phelh mawlh mawlh pah hian a ti a, "I sam kha lo ti ro rawh" a tih hnuah bualinah a lut a. 

Tukverh bulah ka ding ran a, pasal ka han nei leh pauh chu a nia, hun a rei ang a, Sangzuala ang hian min hne ve mai angem tih te ka ngaihtuah rauh rauh a, ka natnain a ken tel hlauhna in min zem leh chiai chiai tawh a, do let a hnawh kian ka tum nasa viau thung. 

A taksa lumin min rawn deh rual chuan ka inher thuai a, a lo inbual zo reng tawh chu niin, ka in ngaihtuah nasat luatah thawm ka lo hre hauh lo a nih hmel. 

"Vawiin khan i nalh takzet a nia" zawi sup a a tih chuan ka lo ţhen sak a, ka kawng a min kuah rual chuan zam chung chungin a nghawngah ka lo kuah ve chial a. 

"Ngaihtuahna ka lo kawm nasa lutuk a, ka ning tak tak a ni. Duh lo mah ila eng eng emaw hi a rawn lut zut zut zel a" ka tih chuan "Thil dang ngaihtuah suh awmzia a awm lo. Zanin phei chu keimah chiah min ngaihtuah rawh" nui suk chung hian a ti a, ka hmai bul chetah a rawn thaw lum ham ham a, min pawm nghet zual sauh bawk a. 

A hmui leh ka hmui a intawh rual chuan "Êng hi ti hlim phawt rawh" ka lo thuai a, a nuih a za khawp mai. 

Kan piah lawka switch chu a ban nghal vut a, "I lungawi tawh em?" tih pahin ka hmui a rawn tawk leh a, zo deuhin min pawm kang a, kan nupa khuma min nghah lai te chuan ka zam hle a, thil thleng tur ka hre lawk vek a, chu chuan ka tiril te a ti khur thei hialin a nia ka hriat ni.

Duat takin min fawp a, kan nupa khum zau taka kan hun hman dan chu sawi phal chi pawh a ni lo.

Tukverh aţanga ni zung lo lut chuan min ti harh a, ka pasal chuan min lo la kuah reng a, nuih var var pahin a lamah ka inlet thak a, a lo la muttui ngang mai. 

A muhil thaw sak sak chu ka thlir reng a, mipa hmelţha tak chu a ni ve chiang alawm. 

CONT..