KA HRINGNUN THAWNTHU-33

KA HRINGNUN THAWNTHU-33

Pasal te muhil thlir reng ringawt chu tiin ka tho chhuak a, khua a vawt viau na a ka inbual leh tho. Ka lu ka ti huh tawh lova, pindan chhungah ni zung a lo luh tawh bawk avangin inbual zawh chuan rinai takin a vawt lo.

Hmangaihsanga pawh a lo tho ve tawh a, tukdang a tho hma thei hle si tukin chu a mu rei ve phian mai. 

"Insawizawi turin i chhuak ziah sia, tukin chu i va mu rei ve" darthlalang hmaa din pah hian ka ti a, khum zawnah a la inhung a, darthlalang aţang chuan a che vel chu ka melh pah ralh a.

"Ka chau tawngkhawng aniang, lo mu leh zawk la" a ti hem mai. Ţhu luau tawh si kha a mu leh hnawk a, thlasik lai hi chuan zing thawh a peihawm loh ve bawk a ni.

"Mutrei theih a ni nang..mikhual kan la ngah bawk si, naupang ho phei chu an ril a ţam vat ang" ka ti a, day cream ka inhnawih pah mawlh mawlh a, ti hian nilengin thil dang inhnawih loin a awm leh theih mai ang. Makeup hi ka ngaina hran lo a, midangin an inhnawih hi chuan mawi ka ti, keimah hian ka inhnawih thiam ve vak lo a, cream in tah tawp hi ka tan chuan a awlsam ber mai. 

"Ka lo zuk chhuk ang aw" ka tih rualin a ţhu chhuak leh a, a sam a thur sung a, a la phak chuap bawk a, parda ka nawr tawlh vek hnuah phei chuan men harsa tih hmel zetin mit ti zim deuh sun hian min lo en a, "Nangmahin i tho ngam maw? Mikhual an la tam a nia" amah nghah beisei zet a a tih chuan "Ngam e..Ruattei leh Siampuii pawh an tho daih tawh dawn a" ka lo ti then a, he inah hian rei tak ka lo khawsa tawh a, ka zak lo lui thei mai ang, a ţul miau sia.

"I zah loh pawn zak der ve tal la" fiamthu a a tih chuan ka nuih a za ngang mai.

"Nghah i beisei chuan sawi tlang law law zawk la" ka lo tih zawm ve zat a, "Nangmah a lo inbual thawt thawt loh tur che a nia..ka bual chak che asin mawle" a tih niah niah chuan closet aţangin tshirt ka phawrh a, enchiang mang hlei lovin amah vawm nan ka hmang zui zat bawk.

"In ha rawh i inbual dawn loh chuan chhuk tawh ang" hmanhmawh ru deuh hian ka lo ti a, tshirt pawh chu ha chuang lem hlei lovin a darah a bat liam a, "Min lo nghak rawh" a tih sup hnuah bualin ah a lut a. 

Bungrua la fello te chu ka lo remfel a, khum te ka lo siam a, suk tur awm ang ang ka vawm khawm bawk a, Zonuni vang liau liauin tih tur a tlem tawh khawp mai. 

Bualin kawngkhar a rik rual chuan sofa ah ka ţhu tharh a, towel veng chunga a lo chhuak chu ka lo en ran a, a thar var tawh a, ka bui deuh lâk laiin ani chu zingkar aţangin hmuh a nuam nghal sarh mai. 

"Shooting neih an tih vel kha a peihawm loh ka ti. Nimin khan lo ti vek law law ila ţha tur" a inthlak laiin ka lo ti a, a nui thawm ka hria a, peihawm ang pawn a awm ve lo.

Tshirt hak pahin ka lam a rawn pan a, "I faten hmuhnawm an la tih dawn nak laia" a ti a, "I hman tawh tiraw?" tiin ka lo ding nghal vat bawk. 

"Umm" tih pahin ka kawngah min kuah a, "Nih chuan chhuk ila. Kan thawh tlai viau chuan mikhual te ngaih a ţha lo ang" ka tih chuan a lo kiai suk a, "Haw tir vat ila a ţha ang" a ti a, min fawp zui zat bawk a. 

"Awm reng zawk se khua an ti har lo alawm le. Inneih vuakvet a zo ang a, hna a ni leh reng tawh dawn a" ka tih chuan a nuih a zat hmel viau mai. 

Rin ang ngeiin inhnuai chu a lo ri leh luih luih tawh a, Ni Biakengi ka hmu chu ka kuah chuk chuk lo chauh a ni. 

"Ehe..Zotei chu i lo va chhuk hma ve, nimin lam i chau awm sia mut reng tur che alawm" a lo ti sawk sawk a, "In muttui maw?" nui rah rah chung hian Siampuiin a lo ti bawk a. 

"Awii...ka fapa hian min ngaihven lo reng reng. A unaute bulah a awm a, ka rawl a hriat pawn a rawn hawi duh eih lo" Ni Biakengi bula ka tih chuan a lo nui huau huau a, a nui ringawt pawh hi min tihlim tham a ni. 

"Bawiha..hei..Sanglur i nu in a ngai ve tawh che a nih hi" a tih pawhin min rawn en zawk a, truck lem lianpui kengin pawn lamah a ute nen an tlanchhuak a, ţhian a ngaina ve tawh khawp mai. 

"In haw san hunah kan naute a khua a va har dawn ve. Ani Siampuii nen chiah an awm leh ruk ruk awm sia" biak bik em em nei lo hian Neihkimin a lo ti ve mial a, U Remremin a kawr a pawh sek takah chuan "Aw..ani Remremi pawh a tel. Ani Remremi nen inah an awm dun nitin leh dawn a..haw san lo mai rawh u" a ti ve chul a, tlema a au rin deuh hian a aw hi a tham deuh chhal zel a, a nuih nasat pawn a ni tho tih tunah ka hre chiah. A nui nasa khat em alawm. 

"Bawiha infiampui tur chu lo ngaihtuah hah duh suh u..nghah rei a ngai nang" Hmangaihsangan fiamthu a a lo tih chuan hmeichhe lam chu an lo ner nang nang hlawm a, ka ni Biakengi leh a cousin mipa ho chuan an lo lawm ngang mai. 

"U Neihkim chu nau awm tur in neih belh vat zawk dawn a nih chu. Kha a insawithei nasa tawh mai sia" Puipuian a lo tih chuan "Dik chiah..duh ai tam kan neih a hlauhawm emai ven deuh a ngai ang. Ka pa khan fa neih tam ţhat zia min hrilh ţhin a, upat hnuah a hlu zual a a ti fo a, Mama pawh hi a naupanlai khan eng nge i puitlin hunah nih i tum an tih chuan 'Fa 10 nei tu' a ti lauh lauh zel" a ti ve bawrh bawrh a, a inhmeh hlawl lo. Mama a tih pah khan Hmangaihsanga a kawk zeuh a, a koh duh dan aţang chuan an unau inkar a ţha leh tawh tih a hriat a, chu chuan keipawh min ti lawm takzet a ni. Ka nu awm ve lai ai khan Siampuii pawh hian hrawn nuam a ti zawk ang. 

Rawng kan bawl mawlh mawlh Zonuni a lo thleng a, "Nimin khan U Zotei te hi midangin an chei a, vawiin chu keiman ka duhthusam zanin ka chei ang" Ruattein a lo ti nghal chul a, Rinkimi a rawn luh ve chuan an reh nghal diak ti ila a dik ber ang. An ngaina lo tlang khawp mai. 

"Hruaite engatinge nimin lamah Nutei ka hmuh ve loh a?" a rawn ti a, "A lokal hman lo aniang chu" Rinengin a lo ti vat a. Ka pa boral laia fel ka tih deuh nu kha a nia, Hruaitea te unau zinga a tlum ber a ni bawk a, Ruattei nen an inkawmngeihin an zia pawh a inang viau mai. 

"In inţhen tih thawm te ka hria a nia aw" Rinkimi bawkin a ti leh chuan phawk deuhin Hruaitea ka en a, an sawi ngai hauh lo na a rinhlelhna chu ka nei tawh, mahse tunah hian ka doctor nu nen khan an lo inngaizawng reng tih ka hre chiah. 

"Vei lutuk duh suh..ţhenna ram khawvel a nih hi. Mo ka nei har deuh dawn tihna a ni mai. A thu hrimah midang inţhen leh ţhen loh tih vel a buai reng lovin pasal tur te zawng ve daih la, ropui deuhin kan lawm leh huk dawn alawm" Ni Biakengi chuan thinrim hauh lo hian a lo sawi hmuh a, a thutak viau na a midang chu an lo nui tet tet hlawm a, Rinkimi erawh a thinrim hmel khawp mai.

"Engtik velah nge chaw ei in tih a?" Pa Chhawna, Ni Biakengi pasalin a tih chuan "Rawngbawl kan peih hun a ni mai ang chu. Shooting kha tlai lamah daih an tia, kan hmanhmawh lo a nih hi. Duh leh naupang ho i lo ei hma pui dawn nia" a lo ti zung zung a, anni nupa hian nu leh pa chan an chang a, an rawn ber an nih bakah keipawh in a ka ngainat ber te an ni. An fate lah chu an fel em em mai lehnghal a, fa pathum chiah an nei a, an fa upa ber U Remzeli hian pasal nei tawhin pastor a nei a, thingtlangah an la awm ve rih a, a pasal a hman loh avangin a fate hruaiin inneihna hmang turin a rawn kal ve ta tho a, a nu ang maia nuih duh leh sawi tur haihchham lo ve tak a ni. 

"Keichu engkim hi zo vek tawh se ka ti..tih tur hmachhawp nei lovin awm vel mai mai tawh ila, la cham reng tho ula" Zamtein a tih chuan "Kan inang chiah a nih chu" ka lo ti a, pheikhawk sang bun ngai mang hlei lovin ka bun rei ve bawk nen, ka ke te a vung deuhin ka hria. 

"Ni, Hruaitea hian doctor kalsanin hmeichhe zu heh deuh a zui duan duan reng a nia aw" Rinkimin a tih chuan rang takin ka inher a, ka hawi let zawk pawh a tih theih ang chu. Ka nau-i a sawina bak a nih ka ring lova, Thiangin dam ve tur a a beih nasat hria hrechiang ber tu ka nih avangin tuman an sawichhiat ka rem ti lo. 

Ka melh nghal kal a, nui sakin min lo en let ve a, "A neih ngat phei chuan in monuin zantin zu rim a nam dawn tihna a ni mai. Zotei te vengah hian ka ţhiante an awm ve a, Zotei te awmna lai bik hi an veng mite pawn slum area an ti bik ţhin a ni awm e. Chutah chuan a nia Hruaitea hi a len ţhin" a ti zat zat a, ka fianpui ken lai chuan ka vawm lawlh dawn em mawni ka ti hman rum rum a ni.

"Min ngaithei viau si engati nge kan awm ve na hmun apiangah i lokal ve ziah a? Inneih te chu a zo vek tawh alawm. Duh chuan lokal lo thei i ni tawh a, helai hmunah hian ka awm ve dawn tih hrereng chungin i lokal tho a, min hmuchak hrim hrim a nih kha" ka ti a, a thinrim hmel chu enin ka nui ve ta thung a, ka insum zo tawh thlawt lo a ni. 

Hmangaihsanga lah chu Rinkimi hnungah a ding a, nuih ruh ruh pahin a kutzungpui a lo ti pir vah a, ka thlavang a hauh a ngai tawh bik lo hi hmasawnna pakhat a ni. Diktak chuan a lo tel ve apiangin midangin an khak ngai khawpin min diriam ziah a, kan tlin lohna a sawi peih mai bakah kan retheih avang hian min hmusit a, kan dinhmun chhiat zia sawi te hi a nuam tih zawng tak a ni. Keichuan ka tuar mai mai thei a, Thiangi leh a hming ti hliau thei zawnga ţawngkam a nei kha ka duh lo a ni ber. 

"Kan in ang tho a nia, ka unaute an la awm vek bawk a, duh duh hunah ka kal thei alawm. Mahse i awm ve tawh sia, ka kal khat sawt dawn a nih hi. Pindan lian puiah i lut a, i bungraw lo ken ve te lah chu kil khatah a leng vek a" a tih chuan choka chu a reh diak tawh a, a thusawi duh dan chuan min run hle bawk. 

"Kan dinhmun hrereng chungin i lo beisei sang mah mah a ni maw? Duh leh pasal i neih hunah i pasal te in khat hnawk khawpin i keng lut dawn a nia, pasal i hmuh ve chuan" ka ti kher a, gas lamah ka inher nghal hmak bawk a, nidang anga ka ngawi mai mai lo chu mak ka in ti. Chhang let ve bawk mah ila ka rilru natna a kiam phah chuang hauh lo. Theihtawp a kan ţan tlan hnuah ka neih ang ang ka keng lut a, ka thuam chhawm hi zahpui lo mah ila kamchhe tleuh nan taka a hmang hi ka ngaithei der lo. Neihkimi te chuan min sawisel se thuhran a nia, chhan pawh ka chhang let kher lovang. Mahse in hrang a awm berin min rawn sawisel zat zat a, mi tam laiin a la ni zui a, mo thar tuk a buaina neih duh lo mah ila ka chhang let lo thei lo a ni. 

"A hmin ţep tawh em?" Hmangaihsangan a lo ti thum dut a, ka bula a lo ding chu ka melh zawk a, "Hmin ţep tawh ang. I ril a ţam tawh a ni maw?" tiin ka lo fiam a, Rinkimi phun hlak hlak ri pawh ka la hre pha reng. 

"Hmeichhe zurui nen a an inchhawm hnak hnak reng hi an inhmeh ka ti telh telh. A lo nasa reuh em a nih hi" a la ti hlak hlak a, "Thiangin i pawi a sawi lo reng reng. Hruaitea nen ţhian an nih avang maia a chanchin chhe lam sawi vak kher a ngai lo. I duh leh Hruaitea kha Thiangi sawichhe kher lovin kawm tawh lo turin hrilh rawh" ka ti leh hram a, "I thu lo emai" a tih lai chuan Hruaitean a ning ta deuh aniang "Ngawi mai mai rawh. I fel famkim bik loh kha" a lo ti khauh a, awm a nuam huai mai alawm. 

"I chawk sawm vek ange aw..a tak zawn chawp angai a nge" tiin Hmangaihsanga lah chuan min lo fiam a, ka lo chawk na deuh a maithei e. 

"Ni e..mihring te chuan ţhatna lai leh ţhat lohna lai kan nei vek a, mi dangte ţhatna lai hi hmuh tum tlat ila mi vannei kan ni mai. Zotei nen a in inbakkaih rap rap te kha in inpawhna tur zawk zel a nih kha. Hre zui reng lo ula, unau chu inngeih tlang takin awm ila mi ngaihah kan zahawm mai" Ni Biakengin a lo ti a, lo ngawi hle hle ila buaina a awm lo zawk maithei a ni mah se khatianga ka tih khan min hmusit zui reng lo zawk ang.

"A dik khawp mai..buaina siam tur ringawt chuan lokal tawh lo la a ţha ang" tiin Hmangaihsangan a lo tuihnih a, a ţawng dam thlup na na zawm ngei ngei tur a sawi a ang; thu a pe ni maiin ka hria. 

"Khawi ka lo chhawk ang che" a ti a, ka thil chhuan lai chu a suan a, bel dang a chhuang kai zui zat a. 

Ka en reng tih a hria aniang chu ka lam lo hawiin a nui suk a, "I ril a ţam tawh em?" a tih chuan lu ka thing ringawt a, "I la buai char char a va ţhu hahdam ve rawh. Ka lo ti tawh ang" tih pahin ka sam chul a, duat hmel deuh a min en na te chuan min in ngaih hlut tir ka ni mai, damkhawchhuah tum a ka lo bei ţang ţang ţhin kha ka inchhir ta lo hle mai.

"Midang pawh an buai ve tho a, Ruattei leh U Remremi ten naupang ho an kawi khawm a, Zamtei leh Siampuii chu mipa ţhenkhat nen pawn lam an tifaiin ka hria, mikhual te tih tir chi an ni si lova" ka ti niah niah a, ţhahnem viau e ti lo chuan che chi kan tlem a, indaih loh a na viau tho mai. Neihkimi chu tuman kan phut lo hrim hrim.

Dar11 velah Thantei a lo thleng a, Zonuni hoin kan pindan ah kan inzui chho a, "Bawiha tlei theih zia hi" tih vel sawi a an nuih dun hak hak laiin pindan chhungah chuan kan lut a, "Eng nge nizan lam te?" an ti a, mitmeiin min chhaih pah ralh ralh bawk a. 

"In ho emai a. Taka Zonun ka chet dan kha a mawi lo viau em? Ni Biakengi khan min hmu mak vek lo ang tiraw?" ka tih chuan "Eng nge thleng a?" tiin Thantei chuan a lo ngaihven nghal khawp mai.

"Hmu mak lo ang..a tihdan che kha a dik lo alawm. I thuam chhawm thlenga a lo ngaihven ve chiam kher a ngai lo va, mahse nangpawh khatianga i awm ngai la hre hauh lo. Malsawmi takngial pawh i chhang let ngai lo kha a nia, i period dawn aniang" a ti a, a ngaihna a hre lo khawp mai.

"Ka inveng lawk ve a nih ka ring" ka tih chuan ka sawizel tur an lo ngaichang ran a, "Ka tlawm dâk reng a, Sangzuala nuin ka dinhmun chhiat zia a sawi te khan ka chhang let duh ngai lo. Tikhan kan inţhen thlengin hrehawm ka tuar tluan ţhak a, Rinkimi pawh kha chhang let lo ila chu min zuam tawlh tawlh dawn niin ka hria a, Thiangi a sawi tel kher bawk nen, mihring hian limit kan nei ve a; chu chu a thleng ve tawh a nih ka ring" ka tih chuan min lo hrethiam khawp mai.

"Ni chiah e..dawhtheih loh chin chu kan nei ţheuh alawm. I dawhtheih loh chin a thleng ve a nih kha, tikhan chaldelh deuh deuhin a ţawngkhum ngam tawh lo che anga a ţha zawk" Zonunin a lo ti ve thuai a, pasal vawikhat ka ţhen tawh a, vawihnihna hi chu ţhen ka tum tawh lo bur a ni. Kan hlimna kawng daltu an awm ka remti dawn lo bawk.

Ruattei lo lut chuan "Ka chei ang che u. Bawiha chu a ute ho bulah a awm. Anu bulah kal ang ka tia a duh lo nasa mai" a ti sawk sawk a, chaw ei lai kha chuan ka bulah a awm ve a, rei a awm duh chuang lo. Infiam a han tlankual vel vak vak kha nuam a ti laklawh tlat tawh.

"Nizan Malsawmi che nawi lutuk kha a, a ţhiannu khan inah pawh haw pui ngam lovin an ţhianpa hotel ah a lo riahpui daih alawm" a ti a, ka khawngaih reuh hle mai. Kan thil tawn mek hian hlimna tawpkhawp min thlen laiin Malsawmi tan chuan lungngaihna vawrtawp a ni thung a, hei hi a nia kan hmuh phaka awm reng te nen a kan dinhmun inan loh ţhin dan chu ni. 

"A zak ngawt ang ka lo tia, nizan a kan chaw ei lai khan a che chhe bawk sia, chaw a ei ţha ve mai emaw tih laiin a rawn ţap thut a" Zonunin a lo ti a, ani pawn a lainat thu tukin thlengin a la sawi ve. 

"Ka u hi a atchilh ve em alawm. Niminah pawh mipa lam chhungte angin ka bulah a ţhu a, a mittui a hru zeuh zeuh tho alawm. A induhtawk ve tehreng nen a insum thei ngang lo aniang chu ka ti mai. Kei lahin hnem tange ka ti lem hlei lova, a zah ka hlau a ka hre lo der hmak" Ruattein a ti zat zat a, chu chuan ka khawngaihna a ti zual a, a lokal ve thlap te kha fakawm ka ti letling zawk a, mipa dang ţha tak a tawn leh vat ka beisei tlat a ni. 

"In nalh lutuk ringawt..professional photographer an ruai dawnin ka hria a, in lang nalh lehzual viau ang" a ti deuh hluai a, Thantei pawh chu min thlek vang vang hnuah a bu nghat nghat a. 

Hmangaihsanga a lo luh chuan kan inpeih thawkhat viau tawh a, ngun zet a min en vung vung takah chuan dik lo a awm emaw ka ti hman dawn a, mahse "I nalh lutuk" a ti sup a, min han fak takah chuan lungawi hliah hliah hmel a pu zui niin ka hria. 

"Kal tlai lo ila haw tlai lo bawk ila" ka tih chuan a bu nghat a, closet chu hawngin a hak tur a la chhuak ve a, mipa hi chu an awlsam khawp mai.

"Thawmhnaw keng ula duh leh thlalak zawhah in inthlak nghal daih ang a" Ruattein a tih chuan "Kawrfual hnawk deuh a ni chuang lo a ti hian haw tlang leh mai ang. Motor chhungah kan ţhu daih dawn tho a" ka ti a, chapal ka bun a, pheikhawk sang chu bag ah ka khung thung a, thawmhnaw thlak tur bik chu ka keng duh lem lo. 

"Ni tlak dawnah a nalh duh a, kan haw hma lutuk thei lo maithei a ni" Zonunin a lo ti a, Hmangaihsanga pawh a inpeih der tawh; tuxedo a hak chuan a lang nalh leh thlurh tawh a, sawiselna tur pawh ka hre lo. A landan chu sawi ngai lo a ţha sa a nia, min la duat em em zui a.

Inhnuai a kan chhuk chuan hmeichhe pakhat hmelţha deuh kan tawk a, "Khawiah nge ka chuan ve dawn a, monu bulah kher ka ţhu duh a nia aw. Zan lam chanchin te ka zawt châk a, keini ang pasal neih tum lo hi chu sahara thlaler kan ni ringawt tawh a" a ti lang lang a, biakin ah khan ka hmu zuai a, thla te pawh min lakpui ve a, ka hmu zui ta miah lo kha a nia. 

"Hei hi kan cousin tho a nih hi..U Nghaktei a nia" Ruattein a tih chuan "Nghak hirha-i" Hmangaihsangan a lo ti kher a, "Tu nen nge in lokal?" Neihkimin a lo ti thung a. 

"Ka vahpa ka lo hruai. Zotei chu i va nalh ve..hnai set sawtah ka hmu ve chiah che a, Hmangaihsangan a atchilh tûk che pawh hi a awm ve tho a nih hi. Angelina jolie te pawh min hriatchhuah tir alawm le" a ti bawrh bawrh a, ka va han awih lo ve chiang tak. Keimah ang bawkin midang pawh an nuih a lo za a, Ni Biakengi nen an zia a inang nasa mai. 

"Ka pa leh a pa hi unau an nia" tiin Ruattei chuan a rukin min hrilh a.

Zonuni nen a kan inkarah a ţhu a, ka pasal ber chu a hmaah a ţhuttir daih. Hruaitean motor a khalh ve thung a. Kawngtluanin a ti ti kan ngaithla a, nuih na tur a ti tam khawp mai.

Midang nalh tih dan ang anga thla kan lak zawh meuh chuan khua a thim lek lek tawh a, ţam dawm turin hmun remchang laiah kan eitur ken te kan ei a, ka la hak zui. 

Ka khuh a, ka thaw hleithei lo bawk a, kan thil ei a thak si a hrehawm zek a, Hmangaihsangan min buaipui vat a, ka helh na phian lehnghal. Ţap lo mah ila ka mittui a tla a, ka thaw in ka hrawk bak a thleng lo ka ti mai boruak ka hip lut tam thei lo hrim hrim a, rei ngial min buaipui hnuah ka pangai leh thei ta chauh a ni. 

Ka mittui ka tuai fai thuak thuak lai chuan "Tikhan tui hi in daih rawh le" a lo ti a, helh leh ka hlau chuan a tui min pek pawh chu ka in muang tawh nasa mai.

"Ka hlauh hman zia kha i thaw ri hrawih hrawih bawk sia" Ruattein a lo ti a, Bawiha lah chu ka pui ang che ti awm hrimin ka bulah a lo ding a, ka tui in lai te chuan min lo kuah ve ngei bawk a. 

"Kan ţhiannu pakhat S Ţha-i a boral ţum khan keipawh ka che chhe tawh alawm. Ka ţah lai takin ka chil ka hak a, mittui nen, hnar lam a lo tui ve bawk nen, ka buai teh asin" U Nghaktei chuan a lo ti a, kan chhan hma hauhin "Depression hi chu ka haw tak tak a ni. Mi hlim thei tak emaw kan tih kha depression in a lo rûn ve a, ama pindan ngeiah a lo inkhai ve ringawt a, ka la awih thei lo reng reng" a tih chuan keimah nen ka lo hmeh bel a, doctor ka rawn hma a, hnathawhna hmun leh in lamah nen puitu ţha tak ka nei a, thil pawi ka tih ve hmain ka chak thar theih nan thu pawimawh tak tak min hrilh a, min fuih bawk a, ni lo se chu ka intihlum ve lo ang tih pawh a sawi theih loh. Beisei tur nei tawh lo a in ngaihna hian thih duhna a thlen thei tih chiang takin ka hria a ni. Chuvang chuan rilru lam damlohna nei ni a inhria te tan chuan mi thiam pan vat a ţha, mi an lohna a ni lo a, mi kan an vang zawk a ni. 

In kan thlen rualin Bawiha chu a unaute hnenah a kal lehnghal a, Zamtei leh Zonuni te choka ah an inzui lut a, keichu inthlak turin ka chho tlang thung. 

Ka sam an zial tawm ka phelh mek laiin Hmangaihsanga a lo lut a, necktie a awrh tawh lova, a kamis kilhna pawh a awm lang theiin a inhawng hiai tawh a, a kekawr ah phei chuan a inbilh lut tawh lo hrim hrim. 

Khumah coat a thleh thla hnawk a, a hmaah ka lo ding vat a, hmalam a ka sam ka hui thlak hnuah "Ka phelh tawp chuan makeup a kai dawn a, a hnung kilhna kha min lo phelh sak mai teh" ka tih chuan a phelh ve mai a, kal nghal mai ka tum chu ka kawngah min lo kuah vat a, a taksa si chet khawpin min pawt hnai a. 

Ka hnungzang a lang huau tawh a, min phuar tu awm tawh lo na na na chu ka thawl huai a, ka thinphu a rang em em thung a. 

Ka awm bawr ţham pahin ka dar chu a hmuiin a rawn nul a, thawk a rang duh kher mai. Ka kawrhnuai hak ve te chu a hlim tawm chho vek tawh a, a hmui a ka nghawng a nul chhoh zai zai lai chuan ka inla hrang thut a, a lo rum nghut bawk a. 

Min rawn hnaih leh nghal ruak chu "Nakinah" tih vat pahin ka kutin a awmah ka lo nam deuh a, "Zonuni pawh a la inthlak lo, hei a thawmhnaw a awm vek a, a rawn lut ţep ang" ka ti sawk sawk a, thawmhnaw hak tur ka lak hnuah bualin ah ka lut nghal daih bawk. 

Ka kut chu a lo vuan a, a hum vang vang a, "Ka duh loh hrim hrim vang a ni hauh lo a nia" ka tih chuan a lo kiai suk a. 

"Ka hmangaih che" a mitah tak en chung hian ka ti a, ka vawikhat sawina a ni hial maithei. Ani pawn mak ti hmel a pu deuh a, mahse a insiamţha leh thuai a. 

"Nangpawh ka hmangaih lutuk che" a ti chuan ka hlimna ka thup thei bik lo, min rawh fawh rual chuan rang takin ka lo chhang let a.

Shooting naa kal ho chuan zanriah kan ei tlai deuh a, mikhual hoin haw an tum hnai tawh a, chhungkhat hnai vai an lokal khawm a, puitling ti ti leh naupang hlim thawm nen,kan ri ve teng tung mai. 

Zingah mikhual ho kan vai liam a, an ngaihawm dawn khawp mai. Bawiha phei chuan a ute kal mai tur chu phal loin a ţap bai bai reng a, hruai an han tum chhin lahin a duh der bawk si lova, a ute an awm loh chuan kan nufain kan in awm leh chawt dawn tihna a ni mai. 

"A reh ruih mai alawm" kan ti lut sap sap a, Aizawl lama an chhungte chu ţhenkhat an la awm a, awm ve reng mah se pawi ka ti lo, kan thawm a zawi leh hlawm dawn si a, a khawharthlak dawn lutuk. 

Chaw ei a sawm tu kan nei ve reng a, kan nupain kan kal kual ve zak zak reng a, tu in mah nuam ka ti meuh lo. Kimki deuhin ka awm ţhin a, mo puan ka chang ve lo an tih fiamthu te hian nuam lo ka lo ti ţhin a, Rinkimi te inah ngat phei chuan chaw a ei hleih theih loh a ni hawt a, a nu nen min han xray vel a, min hmuh hniam zia an ti lang hreh lova, tê chem chemah ka in ngai hial reng a ni. 

Ni Biakengin "Lo ei ve reng reng rawh u" a tih tlat avangin Hruaitea te inah kan kal a, Bawiha kan hruai tel bawk. 

Min lo lawm thiam khawp a, kan chaw ei tawhna te nen a inang lo khawp mai. Krismas chawlh a ni tawh a, medical lam hi chu an chawl ve ngai mang si lova, Hmangaihsanga pawh nitin a kal a, inah a hman hun ka lo nghak tawp zel a, kan chaw eina tur thlen hma loh chang kan ngah mai.

Rin loh deuhin ka doctor nu kha a lo awm ve a, min hmuh chuan a lo nui sen sen a, a hmelţhain a ngainatawm takzet a ni. 

Hruaitea motor thar an endik vel lai chuan an piahah ka doctor, Felpuii nen kan lo ti ti a, nidang aia kan hma deuh avangin khua a la thim chiah lo. 

"I fapa hian pa tak tak angin a en tawp tihna a ni maw?" a ti a, var kawngkhar a inhawng a, Hmangaihsanga hmaah Bawiha chu ţhuin steering a vawn ang chiahin a lo vuan ve a, an hmuhnawm takzet a ni.

"Aw kan inneih hma aţang tawh khan a nia, mipa dang min hnaih deuh tu an awm hran lo a, a pa angah a ngai aniang" ka tih chuan a lo nui hak a, "A ţha alawm. Pa tak anga a en chuan in pa pawhin fa tak tak angin a en mai ang. Tunlai i ziaawm deuh em ni? Hmuh i nuam riau mai" tih pahin min rawn thlek a.

"Aw..ka hlim vang aniang. Ka hmangaih leh min hmangaihtu nupui ka ni tawh a, ka putean zu a zuar tawh lo a, fapa ka nei bawk a" ka tih chuan hlim hmel pu sarh hian min en a, "Ka lawmpui che..mahse a reh hmak dawn lo a nia. Mood a inthlak ve chhen zel bawk a, i la tawrh ve deuh chu a ngai ang a a rei tawh lo thung ang" a ti damdiai a, a bula ka awm ringawt pawh hian ka hahdam ţhin ni maiin ka hria. 

"Hruaitea te nen hian in inchhung em ni?" tiin hre lo awm deuhin ka zawt a, "Chhung lo e..inzawmna kan nei lo. Vawiinah a lehkhabu ka hawh sak ka pe let a, a chhungten chaw ei rawh an ti tlat a, min char a nih hi. Nangni chu Krismas in hmang nuam bik dawn mange" nui rah rah chung hian a ti a, "Nangpawh" ka ti ringawt a, ka nui pah ve tho bawk a.

"Khawhar chuan hunpui hi lawm dan vak a awm lo. Khua a har zual ting mai a, bawhkan daih theih se ka ti" a ti a, Hruaitea hian eng rilru pu a bansan nge maw a nih le. Thiangi nen lah an in ngaizawng lo tih ka hrechiang ropui mai si a. Felpuii phei chu mifel lutuk, min pui nasa ber tu a nia, keichuan ka ngaina takzet a ni. 

Hunpui kan hmang zo a, kumthar kan chuang kai a, nitin an vai deuhthawin an chhuak diak a, Bawiha leh U Remremi ka lo awm kawp ţhin a, Siampuii awm lo se chu ka khua a har thei viau ang. 

Awmtei a rawn leng lut hlawl lehnghal a, ţum dang ang bawkin hmuh a nuam lehpek khawp mai. 

"An chhuak vek asin" ka lo ti nghal thawr a, "Pawi lo" a ti puat a, sofa ah tlangnel deuhin a ţhu zui a. 

"Aizawlah hian DNA test a theih ve tawh a nia" a tih chuan ka bang bo kher mai.

"Chu chu engatan nge?" ka lo ti a, DNA test ngawt nachhan tur ka nei hauh lo. 

"Ka hre duh" a ti hmak a, "Ka test duh lo" ka lo ti ve thung a, a tum bar mai. 

"Nau i pai tawh em?" a tih chuan lu ka thing a, min en kal a, awm a ti nuam lo khawp mai. 

"DNA test chu i duh lo maw?" a ti leh hliai a, "Eng aiah nge ka test ngawt ang a" ka ti kha kha a, "I mawl a nih chu" min la ti zui. 

"Pasal neih chu eng nge a an?" te a ti leh daih a, "A nuam a ni mai" ka lo ti a, henu hi a mumal hlawl lo.

"I pa eng nge a an a?" ka ti mawi ve a, "Zu a in nasa a, a thin te a chhe vek tawh a, a mit te aliam aniang a vun a eng deuh bawk a, a damchhuah chuan a vannei hle tihna a ni ang" a ti a, kal a sawisel thu chauh an sawi ţhin a, natna a lo ngah angreng phian mai. 

"Engti tur a lokal nge i nih hrim hrim a?" ka ti a, Siampuii pawn min ngaihven ţan tih ka hre ru ran bawk.

"In vengah ka kal a ka lokal kawi mai mai a nih hi. Kan inhmuh fo a ngai maithei a nia aw. Thingpui han lum teh ka ril a ţam" a ti zung zung a, a zia hi a lawmawm phian a. 

"Engati nge nau i la pai loh a? Thla a vei leh tawh a nia" a tih chuan "Duh duh hunah a rai theih bik hleinem" ka ti hlak a, a la nui uar em em zui a. 

"Ka pa nen in blood group a inang a nia aw. Thil thleng a ni thei tho bawk a, mahse ka pa kha a tal hiar ţhin a, nasa taka ka ngaihtuah hnuah sawn a lo thlak a ni lo maw tih ngaihdan ka nei a" a tih chuan "Sawn ka ni lo" ka lo ti vat a,thingpui lum turin ka kalsan ta daih a. 

Thingpui ka pek lai chuan "A diary ka chhiar ru a, mi in fa dang a neih an rin thu an sawi ţhin avanga hriatchian tum a chhiar ka ni ber ang chu" min en ran chung hian a ti a.

"Chuan?" ka lo ti leh vat a, "DNA test rawh" min ti leh a, ka lo nui liam mai mai thung.

"I pa lerh vang maiin sawn a thlak a nih i ring tihna maw? Kan blood group a inan bawk vangin a khawlai fa ka nih i ring a?" ka tih chuan a lo bu nghat a. 

"I ngaihruatna mai mai a nih kha. Ka tet laiin an boral na a nu leh pa chu ka nei ve alawm. I pa hi ka kal pe turin min duh em ni a?" ka ti deuh khawl a, "Teuh lo mai..natna dang a nei zel a, transplant team nen inbe pawp ve tho mah ila hetiang teh nuaih chuan an zai ngam lo ang" a ti leh lawi bawk sia.

"Ţangkaina ka neih loh tawp chu" ka tih leh chuan "Hriatchian ka duh mai chauh a ni. Hman ţangkai che ka tum hauh lo" a ti a, diary ah chuan engtak inziak ang maw.

"A fa chu ni ila min ngaihven em em ang. Ka awmna chin hriat a tum reng ang a, fahrah deuhin min awm tir reng lo ang. Ka nutei khan a chanchin min hrilh ngei bawk ang a" tiin ka ţang ve tlat a, beidawn hmel zetin a thaw halh a, boruak danglam ka mamawh tawh lova, thlamuang deuh a awm ve ka duh tawh bawk. 

"A khawlai fa chu lo ni tak tak ta la?" a tih chuan "Ka ni lo angah kan ngai lui zel mai ang chu" ka ti a, fate ngaihsak nachang hre lo leh nupuite hlutna hre lawk lova hmeichhe kawp lawr ţhin fa nih ka duh hauh lo. 

"Chhungkua i duh lo em ni?" a tih leh chuan "Ka nei tawh alawm..ka hlim tawh bawk a" ka ti hmak a, min tih luih ngaihna a hre bik lo. 

A reh ta vang vang a,thla hnih lai a vei leh hnuah pawh min hmu turin a lokal zui lova, ka pasal pawh a rawn be ngai lovin ka hria. 

Tuk dang ang bawkin Hmangaihsanga insiam chhung chuan khumah ka lo ţhu a, ka nawm loh em vangin ka tho hma peih lo. 

"I ril a ţam lo em ni? Tlem tal zu ei la" min ngaihtuah hmel taka a tih chuan "I nalh lehpek hle mai, i lang ţha bawk si" ka lo ti a, a nui suk a, a lungawi hmel khawp mai. 

Perfume a la chhuak a, vawikhat chiah a spray hman tihah "Awii..kha chu ni lo. A dang hmang rawh" ka lo ti chul a, perfume bur a en vang vang hnuah mak tih hmel deuhin min lo en leh a, "Rimtui i tih ber kha a nih hi. Inkap ziah rawh i tih kha" a ti dut dut a, "Hmang rih lo mai rawh" ka lo ti thung. 

"Hmang lo mai rawh hmeichhe dangin rimtui an lo ti ve palh ang che" fiamthu a ka tih chuan a kiai suk a, a la mawi em em zui a. 

"Hei hi rimchhia i ti maw?" a ti nawn leh a, perfume chu ka hmai zawnah hnai teah a rawn keng lang kher bawk a, a awmdan min hmuh chian tir a tum a ni ber.

"Aw..hmang tawh suh i bulah ka awm peih lo ang. Chauh nen a inrem lo emai" ka tih phei chuan mak a tih hmel lehzual a. 

"Siampuiin a pui ngai lo che em ni? U Remremi pawh hi a tirh tlak tho a nia" a ti a, a sawikual reng chu ka ning ta deuh a, "I duh leh in kap la, i bulah ka mu lo anga a ni mai alawm" ka ti bak hlar a, a hawihai khawp mai. 

"I eng nge na a?" a ti a, a mithmul a kân ralh a, "Ka chau a ni mai ka tai te a na" ka tih takah chuan a dah let leh hnu hnu a, perfume a lo kah tawhna kawr chu a phelh a, thawmhnaw dang zawngin closet a hai ruk ruk a. 

"Engtin nge i zun a awm?" a tih chuan "A ngai reng..ka tai bawr vel a nat avang hian zunkawng a hnai awm te a nih ka ring a, in entir ve hrim hrim ila a ţha ang. Mahse vawiinah chuan ka peih lo" ka ti zung zung a, na lutuk lo maj se a na riai riai reng a, chu chuan awm a ti nuam lo ţhin.

"Naktukah kan kal dawn nia" a ti a, ka lam pana a lokal lai chuan "Nurse hoin an la enzui nasa ţhin che em?" ka lo ti a, "En zui lo e. Nupui hmelţha leh fel ka nei tawh tih an hria alawm" a ti a, rawn kun hniamin ka chalah a fawp a. 

"Thil tlem tal lo ei rawh aw..duhzawng i neih chuan lo sawi la ka lo hawn ang" a ti a, ka hmui a fawh zeuh hnuah min chhuahsan a. Tukverh ka pan thuai bawk.

Bawiha lo lut chu ka lo ban vat a, ka pawm kan zet tawh hnuah a sam chu ka kutţangin ka khuih a, kan nufa in car dum tawlh riai riai chu kan thlir a,ka nawm loh deuh avangin Bawiha chu ka dah thla leh thuai a,khawih tur zawnga a kal kual vel chu ka lo nuih a, chhungkua ka nei ve ta mai hi awih harsa ka la ti fan a ni. 

CONT..