KA HRINGNUN THAWNTHU-34

KA HRINGNUN THAWNTHU-34

Chhunah Siampuii nen pangpar kan repot a, plant ti ila a chiang zawk mah ang. Hna ka kal ve tawh ngai si lova, khawhar hnem atan a ţha phian mai. 

"Ţhenkhat hi chu thla ruk hnua repot zel ngai te a awm a, tumah hian an lawm ve mang si lova, tunah chuan min tuipui tu ka nei ve ta che alawm" a ti siam siam a. 

"Ka tui ve hleinem..a inang pût a, a par ngai bawk si lo, a kawh fer fur ringawt a, chu chu rawn la rawh ti mahla lak tur ber pawh ka hre tawp nang" ka lo ti a, nalh tih ka neih loh chu thuhran ka ngaina hlawl lo a ni ber. 

"Nih chuan U Hmangaihsanga i ngaih vangin khawhar hnemah min pui mai mai a ni maw?" min melh ralh pah a a tih chuan nui chungin ka lo bu nghat nghat a, repot hrim hrim chu min hrilh danin ka ti ve zel a, ka dim thiam ve vak lo thung a. 

"Chaw i ei ta miah lo em ni?" a ti teh daih a, "Aw chaw in min ko rih lo aniang. Ice cream kha kan la nei em khah? Khua a lum sia kan ei mai mai dawn mi?" ka tih chuan ang deuh pham hian min en a, "A la lum lutuk loh hi. Bakah hmanah kha chuan i ei ţhat duh ngai miah loh kha. Bawiha ei an phal rih si lova, engmah kan kawl tawh rih hleinem" a ti a, tricycle a chuangin Bawiha pawh kan bulah a inkhalh kual ve a, a thawm a na khawp mai.

"Neihkimin a duh sia kan kawl reng turah ka ngai a" ka ti ban charh a, sawi chhuah takah phei chuan rilruah a awm reng mai. 

"Ka sawi chu..Bawihan a it ve dawn sia, kan kawl rih lo tawp alawm. Ka va leisak dawn che em ni? Ţhenawm dawrah an kawl ang" a tih chuan "Keimah ka kal mai ang" tih leh din ka rual a, pawisa ka ah chhuah loh avangin pindanah ka let chho leh te te a, ice cream lei tur chuan ka chhuak a, Bawiha ka hruai bawk. 

Ka nu nen helai a kan awm laia ka kal ve fo na a ni bawk a dawr neitu chuan min lo be luam a, "Ice cream kan duh a" ka tih chuan "En rawh u..ka kawl tam lo. Tunlai chu hralh a la har rih a" ţha deuha a tih hnuah deep freezer hawngin ka duh ka thlang kual a, Ruattei te unauin ei an phal lo na a Bawiha ta tur pawh ka la tel ve ta tho. Ka ei chuan a ngen ve dawn hrim hrim kei lahin chak tak tein ka chak bawk si a. 

"Eng nge i chhungte an an a? A nawm dawn hmel em? I awm ve ren rawn tawh a, an fel ang chu tiraw?" a tih chuan "Aw fel e..a nuam lutuk" ka ti mai a, nu lianpui pakhat lo lut hnenah chuan "Hei hi Hmangaihsanga nupui chu a nih hi" a lo tih zawm nghal zat bawk a. 

"A ni maw? An inah sawn i awm reng tawh niin an sawi a, kei tak chuan ka la hmu ngai miah lo che a, hei hi i fa bik tihna em ni?" tih pahin ka fapa a kawk a, hetiang mi hi an awm ţhin. Pawi leh pawi lo tur pawh ngaihtuah lem lova ţawng chhuah phawng phawng ching hi an tam lutuk tlat. 

"Aw a nih hi" ka tih chuan dawr nei tu nu a melh ralh a, "Nuthlawi a nei dawn an ti mai a, naupang an sawi tel lo a" a tih leh chuan ka lo nui liam mai a, "A tel ve zel a ngai alawm" ka ti a, dawr chu chhuahsanin in lam ka pan zui nghal a. 

"Lum ti vak lo mah ila i lei tam emai kan ei ve teh ang" tih pahin Siampuii chuan a duh a thlang a, a bang zawng fridge ah a dah bawk a, Bawiha chu pakhat bak ei ka phal lo a, U Remremi pawn tui tih hmel tawkin a ei pulh pulh mai.

"U Zote ka leng duh a nia aw sawi miah suh aw" a tih chuan "Leng lo ang" ka lo ti vat a, a len naah miin an lo chhaih ţhin a, a ţhenin an bawl a, a duh loh anga thil a thlen phei chuan a rawn thinrim haw leh dawn a, a tawrhhlelhawm thei lutuk tlat. 

"Tih tur pawh a awm lo. Ka ţhu reng a, keichu ninawm ka ti e. Tv pawh ka en chhuak vek tawh" a ti zat zat a, a ninawm duh viau tak tak ang mah se "Kan inkawm mai dawn a nia, leng lo mai rawh" ka ti tlat tho a, mipa a hre ve bawk si, nau a pai mai ang tih te ka hlau. Duh leh midang dil se la, keiman ka chhuah tir chuan eng emaw thleng palh ta se min mawhpuh vek thei dawn a, chutiang a thlen chu ka duh lo.

"Sual reuh emai a, tumah ka kawm peih lo" a ti leh bur bur tawh a, mi ang lo kan tih te hi a chang chuan a ngeiawm thiam ve thei zek ţhin mai. 

"Tv va en rawh nih loh pawn inchei la, milem te i ziak thei a, pangpar kan khawi thei bawk a" ka tih te chuan "Duh leh nangman ti la a ni mai alawm. Chutiang ka peih bawk lo" a ti zel a, a tum bur lai chu ka en a, ka nui ta ringawt a. 

"I sual si Lalzote" uar fe a a tih hnuah choka a chhuahsan a, "A zia tawh zawk a nih kha aw. Ka awm tirh khan a â zualin ka hria, a nu kha a la dam bawk sia, a sual thiam thei tawp a, U Neihkimi pawn a hau nasa ţhin alawm. Mi ang lo ţhenkhat hi chu pawn lamah an nui hawr hawr a, fiam pawh an nuam viau zel. Mahse in lama sual tlat an awm ve ţhin a, chutiang chu a ni ţhin alawm" a ti bawrh bawrh a. 

Hmangaihsanga nen kan inbe zuai a, ka eichak zawng ka hrilh hnuah a rawn haw tlai loh tur thu sawiin phone a ti tawp a, mahse a lo haw har tho. A unaute an rawn haw vek hnuah pawh a la reh vang vang a, zanriah pawh "Eisan mai ang u" an ti hial a, biak tum eng ang mah ila tuman kan be thei lo. Chak lo chung chungin ka ei lui a, tlem tal ei pawh ei loh ai chuan a ţha hrim hrim ang. 

"Eng nge i an a? Ka u in a nuam lo deuh a ti che a?" Zamtein a ti ţha veleh a.

"Aw ka ţha tawh lutuk" ka tih chuan "Naktukah in entir rawh u. Na hi chu ho te pawh nise ngaihthah loh tur" a ti a, min ngaihtuah ve hmel reuh lutuk. 

"I rai aniang" nui rah rah chunga Ruattein a tih chuan min en ţhap a, "Ka rai ka ring chiah lo" zawi sap hian ka ti a, "Rai maithei a sin. I tho thang a ţha lo emai nidang ang i ni lo tlat" te an ti thul. Ka period a mumal loh hnuah thla khat tal tawp chu ka awl tawh a, mahse hetiang hi chu hmeichhia chuan kan tawn ţhin a nia, ngaihţhat loh na em em pawh ka nei chuang lova, inrinhlelhna ka nei lo bawk. 

"I khua a sik em?" Neihkimin a tih chuan lu ka thing a, "Test ve hrim hrim la, rai loh pawn i zun tlem bak a hek dawn chuang hleinem" a tih chuan kan nui hak hak a, "Ninawm, chaw ei laiin chutiang sawi suh u" Zamtein a lo ti hlak a, a ner pah nâng bawk.

"Hei lah hi a lo tenchhe fal thei sia" an ti a, an fiam zui mam mam a, "Lo rai ta la, ka u i hrilh hunah engtin nge a tih ang le?" Ruattein a tih chuan "A ţha a ti ang. Thil dang sawi tur a hre awm lo e" Zamtein a lo ti ve vat a, a nih duh hmel viau mai. Ka thinrim chang pawh a min thlem ngaihna hre lo, ka lungawi hun nghak tawp ţhin kha a ni miau a ni. 

"Awmtei pa lah chu a beiseiawm vak loh lehnghal a, Hmangaihsanga hi Awmtei te bulah a awm a ni lo maw?" an tih chuan ka lo ngaihven nghal vat a, Awmtei reh vang vang chhan pawh a ni thei mai ang a? Mahse biak theih a awm ve tal tur a nia. 

"Zu a in nasa e..a ngaihna a awm lo alawm. Thi lek lekin damdawiin a lut ngun a, doctor ten in tawh suh an tih hnuah pawh a in lui char char a, a damrei zawk ngawt alawm" Zamtei chuan a ti bawl bawl a, hmeichhia vek an ni bawk a Awmtei pa laktlak loh zia an sawi zui nasa mai.

Ka phone a rik chuan hmanhmawh deuhin ka la kang a, ka pasal ngei a ni tih ka hriat chuan sana ka en vat a, dar 8 chiah chiah a ni.

"I va rei ve..chanchin i rawn sawi bawk si lo" ka ti nghal thawr a, "Ka tihpalh ka buai deuh a, Bethseby ka buaipui a, tunah civil ah ka phei leh tawh a" a rawn ti a, "Chupawh nise chanchin in hrilh zawk a har hleinem" ka ti ve ţalh a. 

"Ka pindanah phone ka theihnghilh a, ka buai ata langin ka theihnghilh tih pawh ka lo hre lo. Damdawiin ka chhuahsan dawnah ka hrechhuak chauh a" a ti a, amah hmu lo mah ila a inthiam lo ve nasa tih chu ka hria. 

"Engtikah nge lo haw i tum a?" bul deuh a ka tih chuan "Ka lo haw har lo ang. Awmtei nu hian min phut tlat zel sia, ka rei lo ang aw" a rawn ti dam thlup a, diktak chuan a bialnu hlui, rei tak a lo kawp tawh nen a an awmdun tih hriat tawh hnu phei chuan rilru nuam deuh a awm a har ve a sin aw.

"Dar9 hmain i lo haw hman angem? Ka thil chah che kha i lo lei em?" ka tih chuan "Lei vek tawh..dar 9 hma chuan ka lo let thei mai ang" a ti a, chhun a kan inbiak bak kha kan la inbe leh lo a, thin a rim ve lek lek alawm le. 

"Aw le" tih chiahin ka chhang a, "I lungawi lo mi?" a rawn ti ve nghal zat a, "Min hrilh tur che a nia" ka ti nang nang a, rilru nuam lo deuhin ka awm a, tunah lah a hma ai mahin rilru a nuam lo leh a. 

"Ka lo haw har lo ang..chempui nen min lo hmuak em lovang chu tiraw?" a rawn ti vel a, tum loh deuhin ka nui chhuak a, "Lo haw vat ang che" vin hlar a ka tih hnuah kan inbiakna chu ka ti tawp rih a. 

Pindan a a lo luh chuan sana ka en nghal ringawt a, dar9 a la ri lo hlauh. 

"Kha chu Ruattei bulah a mu duh tawh nange?" Bawiha en pah a a tih chuan "Aw..a thlem nasat tehreng nen a duh lo ve tlat" ka ti a, ka thil chah ho chu ka lo ban vat bawk a. 

"A ngai che a nih kha, a hun ve tawh alawm i mutpui lo rei tawh a" a kawr phelh pah hian a ti a, "Thiangin min lo bia a" a tih zawm zat bawk a. 

"Eng chungchangah" ka tih chuan "Pathianniah chaw lo ei rawh u a ti" a tih chuan "Engtin nge i chhan a?" ka lo ti vat a. 

"Ka lo rawn ang ka ti" a tih hnuah "Eng nge i lo an a?" a ti a, min rawn hnaih nghal ruak bawk a, "Ka ţha lutuk" ka tih chuan "I khua a sik em?" tih vut pahin ka pang a rawn dek a, "Sik lo e..ka ţha lutuk ka tih kha" ka ti leh mai a, "Mu hahdam tawh rawh, ka la inbual dawn, min nghak duh suh" tih pahin a tho a, bualin a a luh rualin chocolate kawr ka kheh a, ka fapa tih harh hlau tawkin ka ei a, nuih te lam lam a za alawm mawle..ka fa thlimin a rukin thil ka ei chu a nia. 

Mut dawn a ruaia chocolate ei chu a remtih loh ka hlau deuh a, bualin kawngkhar a rik rak rual chuan chocolate kawr chu ka thukru ţat ţat a, a hmu tho aniang ngun deuh a min en hnuah a nui suk a. 

"I hmuiah a kai" a ti thum dut a, rang lutukin ka hmui ka tuai a, ka kut ka en leh a, engmah a lo kai lo.

"Khawi lai takah?" ka ti ha a, darthlalang lamah awn viau mah ila ka inhmu pha mang tlat lo. 

"A kai lo..ei rawh ei rawh" a ti leh ang lawi a, "Dawt min hrilh ve ziah a" ka ti hlak a, ka ei zo diam tawh sia, muangchangin a kawr chu ka phawrh chhuak a, "Chaw i ei em?" thutak deuh zawk a a tih chuan ka ei thuin ka lo chhang vat a. 

"Naktuk in entir chu i ti em?" a tih leh chuan "Aih..ka ziaawm tawh tho a, a nat leh tak leh nidangah a ni mai" ka ti a, ka thil eina kawr ka paih hnuah bualinah ka lut ve a. Thil thlum ka ei tam angreng sia, ka ha in a tawrh hlauin ka nawt hmasa te te a, hmai ka phih leh hnuah ka chhuak veleh a. 

"Kawr ha vat ta che..i che muang thei emai" tih pah a a awm ruak kung ka han khawih kher chuan a lo phun hluk a, hmai ka phih zo chiah bawk nen, a vawt khawp ang. 

"Zote, ka pu kha naktukah lokal a tum a" night cream ka inhnawih ve mawlh mawlh laia a tih chuan "A ţha alawm" ka lo ti mai a, inneih zawh hnu pawh a awm zui reng tum kha a nia, a haw veleh ta daih si a, a reh vang vang hnuah rawnkal a chak leh si a nih hmel. 

"Ka cham rih dawn a ti tak na a a khua a har leh vat tho ang. A awm chhung reilote chu dawh hram hram rawh aw, a phunchiar a nia" tiin min hrilh lawk nghal thlap bawk. 

Khuma a mut hnuah "Betseby chu eng nge a an?" ka lo ti ve thung a, ka mut ve dawn lai chuan a lo tawlh rem a, ka mut veleh min lo kuah nghal vat bawk a, a thlamuanthlak ţhin a nia.

"A ţha lo" a ti bul hmuk a, he nau hi a na rei tawh khawp mai.

"Mahse nangchu doctor i nia, mitthi i hmu reng ang a, lo thi ta pawh nise a hrehawm lutuk tawh lo ang tiraw?" ka tih chuan "Bethseby hi chu ka ngaina a" a ti ban charh a, "Na tawrh reng ai chuan kal tawh mai se tih chang ka ngah, mahse ka ngai viau maithei a ni" a ti sup sup a, naupang dang aia an inzawmna a thuk bik hi ka hrethiam lo khawp mai.

"Naupang dang aia danglam bik deuhna a nei tihna em ni?" ka tih chuan "Nei lo ang..ka hre lo. Amah hian min ngai a, damdawiin a a awm loh pawn min rawn phone chamchi ţhin. Min ngaina zual bik tu na na na chu ka ngaina ve mai aniang" a ti a, "Damlo thi lek lek kan tih te hi an fei duh zek a, an kal mai dawn emaw tih hnuah pawh rei deuh an la dam ţhin. Mahse, nia na tawrh reng ai chuan kal vat zawk sela a ţha ka ti keipawh" ka ti a, naupang te si a khawngaihthlak reuh tak tak a ni.

"I pu ahh ka pu chu naktukah maw a lokal dawn?" ka ti buai nuaih a, nupa chiah a awm e ti lo chuan kan han nui leh rih ţhin a, boruak a zangkhai leh tawh khawp mai.

"Aw..mahse an lo thleng har ang. Puipuian a rawn thlah dawn a, sumo vel chuan a chi tawh loh. Ka pu phurh chuan a duh dan te a motor khalh a ngai" nuihza aw tak hian a ni a, a nu pa a nia, a pa pa zawk chu kan inhriat ve hmain a boral tawh. 

"A tar ve tawh sia a la peih e ka ti. Buaipui ngai reng ang a ni tawh a, diktak chuan inneih naah pawh khan a rawnkal peih ka ring chiah lova" ka tih chuan "Min ngai a, nupui ka nei tawh sia an khuaa kal tur min sawm chhuah theih a ring tawh lo aniang. Tar chu a tar ve tawh khawp mai" a lo ti mai a.

Bawiha a muttui bawk a tiin a lamah ka inher a, min lo kuah ţhat sauh sauh lai te chuan a hmel ka lo en reng a, kan inhmuh hmasak ber khan nelawm loh ka tiin a mi uap a na ka ti ţhin a, Pathianin ka tana min pek a ni tih ka lo hre ngai hauh lo. Ka hmaa ding a ka hnung dawl ţhin tu tur a nihna hre lek lo khan in a a awm chuan ka awm a lo nuam lo ve em em ringawt zel a, mahse hei kan thleng thui tawh khawp mai. Ka hmangaih a ni tih a inhriat theih nan tun aia nasa hian lantir thiam ila ka ti ngawt mai. 

"Kan thleng thui tawh i ti em?" ka tih chuan dam ruihin min lo en a, "Hmabak pawh kan la ngah alawm" a lo ti mai a, "Nia..awlsam deuh tawh sela a ţha ang. Thil tam tak kan paltlang tawh a, chuan ka dinhmun chhiat ber lai pawn min chelh tlat a, nang hi Pathian min pek i nih ka ring" thutak deuh a ka tih chuan "Ni e..Pathianin min hrilh ruk aţang khan ka lo nghak char char mai che" a lo ti fiamthu a, eng eng emaw sawi zawmin kan nui dun leh hak zel a, Awmtei te bulah a kal tih pawh a mutthilh hnuah ka hrechhuak leh chiah. 

Bawihan min kaihthawh chuan khua a lo eng uarh tawh a, ni zung pawh pindan chhungah a lo lut leh tawh. Sana ka en vat a, dar7 a lo ri duai tawh a, ka menrei luatah thawh ka hai chiang khawp mai. Hmangaihsanga pawh a lo tho leh daih tawh a, insawizawi turin a chhuak leh daih tawh ang. 

Hmai ka phih sawk sawk hnuah inhnuaiah ka chhuk a, an lo tho vek tawh. Ka awm tlangnelna hnu mah nise inthlahrun a na duh kher mai. 

"Bawiha kha thil ka eitir laiin a hawi vual vual a, hmuh tur i awm si lo a a ngaih a ţha lo aniang a duh thuin a rawn chho a nih kha" Ruattein a lo ti a, "A lo tho daih tawh maw?" ka ti ha a, a harh hlim hlawtin min kaitho emaw tih nak laiin.

"Aw..ka u nen an tho rual alawm. Tukin chu zunchhuakin min kaitho a, ka tho hma hlauh a" a ti zung zung a, Neihkimi chuan uluk deuhin phone a bih a, chawhmeh siam tur ka lak chhuah mawlh mawlh lai chuan "Awmtei pa nen inzawmna in nei em ni?" a lo ti fiah fak a, a lo hrilh hman a ni maw..Awmtei mai mai chu a.

"Aih nei lo...Awmtei khan inzawmna kan neih a ring a, mahse kan nei lo" ka tih chuan "Engtin nge i hriat?" a lo ti khauh a. 

"Ka nu leh pate an boral khan la naupang viau mah ila ka hre phak alawm. Ka sawi thei kher lo ang a, mahse chiang lo ruai chuan ka hria. Nu leh pa ka nei ngei alawm" ka tih chuan a bu nghat a, Ruattei leh Zamtei te chuan a ngaihna an hriat loh hmel hle thung. 

"I nutei khan an chanchin a hrilh ţhin che em?" a tih leh chuan "Aw hrilh ve nasa ţhin. An thlalak awm ang ang te min hmuh tir ţhin a, nupa inngeih tak an ni tiin a sawi ţhin" ka tih laiin Hmangaihsanga a lo lut a, ka thawveng huai thei alawm le. 

"Buaina a awm em?" min enkual a, lu kan lo thing mat mat hlawm a. 

"Zotei hi Awmtei pa nen an blood group a lo inang chiah a, Awmtein a pa leh Zotei hian inzawmna an neih a ring tlat bawk a" Neihkimi chuan tlang deuhin a lo hrilh a, "Eng inzawmna?" a ti nghut a, tui a in zui daih bawk a.

"Ka hre lo mah se nimin khan Awmtei nen kan inhmu fuh a, a pa leh Zotei nen eng emaw inzawmna an neih a rinna a nasat thu min lo hrilh a, an blood group a inang chiah bawk a" pangngai deuh a a tih chuan "Nei lo ang. Nangpawh hman a kan in sa a inhlawh ţhin Raju nen in blood group a in an kha" nui ruh ruh chung hian a lo ti a, ka thinrim leh hlauin a la thutak duh tawh lo ah ka ngai. 

"Ka blood group hi chu a common em alawm. Zote, i nu leh pate thlalak chu i la nei em? Enteh i awk tih nawm loh ka tum hauh lo a nia aw. Inzawmna in lo nei a nih chuan va hmu ve la ka tih vang mai mai a nia, natna a ngah a, a dam zawh an ring lo lehnghal a, mi an thih hnua inchhir chauh chu a hrehawm duh lehzual a nia" a ti ve duah a, anih chuan ka nu thihna khan a nghawngin a inchhir hle tihna a ni mai. Inchhirna pakhatmah nei lo se chu ka chungah ţhat a chhuah hauh lo ang. 

"Zote i tho nuam em?" Hmangaihsanga chuan a ti ta daih a, Neihkimi chuan a la duh tawk loh hmel kher mai. 

"Aw nuam e" ka ti mawl tawp a, chawhmeh tur ka buaipui chu Siampuiin min lo pui vat a, tukţhuan hi kan ei vak ngai lova, a hmanhmawh ho chuan mah niin an ei tawp a, chawhmeh kan siamthar hman loh pawhin an phun ngai lem lo. 

"Ka pu te chu an lo chhuak tawh a, Taitei a lo tel ve aw" Neihkimin a tih chuan "Eng nge a lo tih dawn?" Ruattein a lo ti vat a. 

"Puanţhui a zir dawn an tiin ka hria, Aizawl ah chhung hnaivai an nei si lova ka lo remti ta mai a nih kha"

"Chupawh nise engahnge i lo remtih thawt thawt a, kan chhungte tak tak pawh a ni lova, ka pa leh a nu inkawmngeih vang chauh a nia, hetiang hi chu awmpui an hahthlak duh asin. Kan hau ţha ngam dawn bawk si lo, a duhdan lo zawnga thil a kalin a nih dan aia nasain a vui bawk ang a, min rawn hmasa lo a nih chu aw" a ti vang vang a, Neihkimi thusawi a lo kalh chang hi chuan a ngaihdan a ni lo hle tihna a ni mai. 

"A nu in dil tak tein min rawn dil a, a awmţhat duh loh chuan duh leh hostel a dah turin kan ti mai dawn nia" a ti a, a hmanhmawh ngang aniang a chhuak nghal nal nal mai. 

Hmangaihsanga insiam mawlh mawlh lai chu "Taitei chu i hre ve em?" tiin ka lo be buai a. Darthlalang hma a ding reng chungin min rawn melh zawk a, "Hre ve a" tih chauhin min la chhang zui a.

"A fel em?" ka tih chuan "Fel ang..ka chiang lo. A sual leh kan chhuah tir anga a ni mai" a ti then a, Ruattei takngial pawn a hriatchian danah ţhian hnaivai tak chu an ni ang. 

"Niminah ice cream i lo lei ţeuh a ni maw?" ti a min fiam chuan ka nui tawi tak a, "Ka ei chak a, tualah pangpar kan khawih a, tui a hal duh em alawm" ka ti ve ţang ţang a, "Lo haw har tawh suh aw" ka tih zawm zat bawk. 

"Min chah duh i neih chuan i lo sawi leh mai dawn nia, nge dawrah kan kal hmasa dawn?" a tih chuan "Ngai lo..ka lo hrilh mai ang che. Nizan a mi pawh kha a la awm a, duh ka neih leh dawrah ka kal ve mai ang, pawisa ka kawl tho a" ka ti zung zung a, "In a awm nilen hi a lo ninawm ve reuh lutuk. Heta ţanga kan chhuah pawh khan hrehawm ka ti tho a, tunah pawh hrehawm ka ti ve deuh. Zonuni te pawh an ngaihawm ve ţan" ka ti a, ka sawizawm ngam tawh lo. Engmah sawi lo mah se a mitmeng thunei zet chuan min khap ka ti mai a, sawi zui ngam chi pawh a ni tawh lo. 

"Mahse Bawiha vang hian inah ka awm char char ang. Ka chhuah ve reng chuan naupang tan a ţha dawn lo a" tiin ka riat nawi ta vel mai mai a. 

"Dan chep che ka duh lova, hrehawm i ti chung chung chu khung beh reng che ka duh lo bawk. Mahse fa enkawl tur i nei a, awmpuite hnuaia seilian leh nu leh pa ngeiin an enkawl seilen naupang chu a inang thei lo. Hna ka nei a, ka enkawl thei che u. I duh chuan ngun lutuk loin leng chhuak ve zeuh zeuh la, mahse Bawiha hi a hmasaber ah dah rawh. A lian ang a, a sual emaw a fel emaw, eng emaw hlekah kan hming a ri tel ve zel dawn" a ti ta nghut nghut a, kan inngaihzawn laia pawisa min pe vak ngai mang si lo kha kan han inneih hnu hi chuan min vur nasa viau ang lawi a, a kawm chi ka nia, pawimawh ah lo chuan ka hmang lo hlauh zawk a. Phang deuh a ka awm a hlau a, pawisa min kawl tir chung pawhin mamawh ka neih leh neih loh min zawt awl lo a, a farnu te ho, a bikin Neihkimi pawn min thik ngai tawh lovin ka hria, ka pasal hian a ngaihsakna a lantir thiam ve deuh tawh vang aniang. 

Ka pasal kal hnua Neihkimi kal ve tur chuan "Thlalak chu lo zawng rawh aw" a ti leh hram a, a buaipui ta vak mai chu a ngaihna ka hriat loh laiin "Ka duhsak vang che a nih hi" a ti hmak mai bawk a, zawn pawh ngai lovin ka purse ah ka dah reng ţhin a, ka la entir nge nge ang. Hmel leh blood group inang nazawngin inzawmna kan nei lo tih an hriat phah ang a, a ţha khawp ang chu. 

Chhun thil ei hun awm velah Zonuni ka call a, "Pasal neih chu a va nuam awm ve...thla engzat chiah nge min lo biak hmasak tawh loh ang aw" a ti vel a, a nui har har bawk a. 

"Zonun thil hrilh tur che ka nei a" ka ti zawi sap a, "Han sawi la" a lo ti vat a. 

Ka awmdan vel te chu sawiin "Hmeichhe ho hian test rawh min ti a" ka ti tel hram a. 

"I inringhlel deuh tihna em ni?" a rawn tih chuan "Teuh lo mai. Sangzuala nen a kan inneih khan nau ka pai har a, chuvang chuan naupai harsat chi ka nih ka ring a, mahse eichak deuh leh chau ngawih ngawih, mut chhuak reng ang te hian ka awm a, ka hrethiam lo" ka ti niah niah a. 

"Aw..i rai aniang chu. Rai hun bi a awm chuang hleinem. Keichu rai tak tak la ka ti, in kha nuam i ti sawt dawn a" phur deuh a a rawn tih chuan "Lo rai ta ila chu ka zak maithei a ni. I hrethiam em?" ka tih chuan a nui uarh uarh a, "Hahai" ti kher ţhin ang hi a ni bawk si a, a hmunah phei chuan a ring ţha viau ang. 

"Ka cousin pawh an inneih lai khan a period a, period zawh hlim velah hian raina chance a sang an tia, nau a pai nghal tak tak asin. Ka nu te phei chuan fiamthuin in puk lawk a ni lo maw an ti mai mai zel a, hetiang hi chu Pathian thu thu a nia, zahah la lo la, Pathian remruatah ngai zawk rawh. Nangni te chu innei thar hlim pawh in ni tawh lova, ka cousin ngaihtuah chuan rai har tak i ni. Inneih hnu lawk a nau pai nghal an tam lutuk, i rai a nih phawt chuan lawm zawk rawh" a ti mawlh mawlh a, "I la test lo tiraw?" a ti zui zat bawk a.

"Aw...test kit a awm lo a, Bawiha ka pai har lutuk vang hi aniang, inrinhlelh ngaihna pawh ka hre lo ni berin ka hria, period mumallo leh thla hnih khat han awl zeuh hi chu hmeichhiaah chuan a mikhual lo sia" ka ti nang nang a. 

"Ni ve tho mai mah se keiman ka ringhlel che alawm. Test kit ka lo pe dawn che mi? Leitur a awm reng a, gynae ward ah pawh lei ngai lova lak tur a awm reng ang" a ti zung zung a, a phur fal leh nasa tawh. 

"Lo hawn an awm maithei a, nang chu i bang tlai thei sia, kan in a lokal kawi chhung nen hun a duh dawn lutuk a, fa nei lo chu nila leng turin ka sawm reng che ang a, mahse i faten an lo nghakhlel ve dawn tho che sia. An lo hawn loh leh naktukah i hna kal hmain ka lo hrilh ang che. I chhungte hnenah khan i hrilh lawk ang a, chaw i lo ei nghal daih dawn nia" ka tih chuan min hnial a tum ve ngial a, "Lo hawn pawh nise naktukah chuan min lo tlawh kawi hrim hrim rawh. Chaw i ei loh chuan i leng rei thei dawn si lova, chuvang chuan i dil lawk anga" ka ti ve tlat a, ka ngai tawh em a, min hnial hleithei bik lo. 

Tlaiah ka pu te an lo thleng a, Taitei an tih pawh chu haitheih a ni lo, hmeichhe dang lokal ve an a tlat lo a ni. 

"Ka pu chu i chau ngawt ang a, u Hmangaihsanga lah a lo la haw mang si lova, lokal rawh ka kai lut ang che" Siampuiin a lo ti sawk sawk a, keichuan han biak vak ngaihna ka hre lo, mi ka ti lawm thiam lo lutuk hi chu a buaithlak. Tih tur min hrilh tawp se chu ka ti zung zung tho ang a, a lawm na tur a ţawngkam han chheh vel ka thiam hlawl lo. 

"Puipui ka lo pui ang che. Ka pu mutna tur pawh kan lo siam fel vek tawh a, a pindan turah ka han dah sak ang" ka tih chuan a nuih a lo za khawp a. 

"Ka pu i chau em? I ril a ţam em? te lo ti ve ta che. Inneih lai khan in inbe mang lo tiraw?" a tih chuan ka lo bu nghat a, "Biak chu kan inbe zawk a, mahse inbiakna hun a tam lem lo. Ka cham rih dawn a tia, a haw veleh ta daih sia" ka lo ti a.

"A ngaingam leh lo a nih kha. Be ve bawrh bawrh rawh aw..in inpawh chho zel mai ang. In inbiak ţum chuan i ţawng ring em?" a ti teh daih a, "Ring vak nang..engatinge?" ka tih chuan "Ka pu'n a hre pha em ni? In ţhudun em?" a lo ti leh a. 

"Ţhu dun chiah lova, mahse aw ka hmui phun a hmuh theih naah chuan ka ţhu ngei alawm. Eng nga chu a ti reng tho a" pangngai deuh hian ka ti ve mai a. 

"A upa tawh a, a beng a ţha vak tawh lova, i awm hlat deuh chuan au vak vak mai rawh a, a mit pawh a ţha lo, hnai deuhah lo chuan a hmu thei lovang" a ti a, "Aw..ka lawm tawp..min hrilh lo la chu ka hre dawn hauh lo a nia" ka ti a, bungrua te chu ka thiarpui a.

"A beng a ţhat loh te chuan Hmangaihsanga te pawh hian sawi ve tur a nia. Phone ah an inbe ţhin tho sia" inchung aţangin kan chhuk mek a, ka rinhlelh deuh vanga sawi chhuak leh hnuhnawh ka ni. 

"I hmuh laiin an inbe tawh em?" a tih chuan lu ka thing a, "Chuvang a nih chu. Hmui phun tal a chhiar theih a ngai a, an inbiak pawn video call zel aniang. Smart phone a hmang a, video call na lai bik te an hrilh a, tarmit nen chuan a hmu ve thei viau a, thil dang a khawih thiam lem hlei lova, inpa phei chu a ngai a, a duh hun apianga inpa a biak theih nan video call dan vel te chu a zir ţha duh lutuk mawle. Inpa te chuan hre turah an ngai che aniang, beng leh mit ţha lo hi chu upatna hian a keng tel ve a, a nih loh pawn sawi nuam an ti lo aniang" a ti duah a. 

"Aw..nihchu ka lawm lutuk aw, ka pasalin min hrilh chawp zel ka ngai dawn bik lo a nih chu" ka ti a, a lo nui suk a.  

Ka nu leh pate pindan bik kha chu tuma luh theih loh turin kan kalh a, ka pu chu ka pindan hluiah khan a awm ang a, Puipuia mikhual pindanah a awm thung ang a, Taitei chu Ruattei nen pindan an inţawm rih dawn a nih hmel. Chu chu an siamrem dan a nia, Puipuia haw hnuah duh leh mikhual pindanah a insawn mai ang a an tia, an thurel ang ang ka lo pawm ve hmiah mai. 

Hmangaihsanga lo haw chu pindanah ka zui chho a, a inthlak lai chuan "Inbual rih lo mai rawh. Ka pute an lo thleng tawh sia, an ril a ţam ang" ka ti a, ani pawn a lo aw ve nghal mai. 

Ka pu mutna turah kan lut a, khum chu a khawih chhin vel a, "Ka pu hi chu a dangdai a, bedsheet leh lukham a rawn inken leh thlap mai ang" a tih chuan ka melh ha a, Puipuia khan min hrilh tel hauh lo. Bungrua a ngah ka ti reng a ni. 

Suitcase lian ber a hawng a, lukham leh bedsheet chu a lo awm ngei a, "Ka nu leisak a nia, hei a hlui tawh em hi. A duh tlat sia" tiin min hrilhfiah a, pawt vak ila chu kan pawtthler thei ang tih tur a ni. 

"Thlak sak mai rawh..ka pu chu duat vak theih a ni lo. Ka lo pui ang che" a ti a, a inthlahrun hmel vei reuh lutuk lehnghal a, a unauten amah ang hian a pu an ngaihven ve hauh lo bawk. 

"Ngai lo..a lo ngai tawh ang che. Lo zu chhuk la keiman ka lo ti mai ang" ka tih chuan "I ti thei ang maw? A khirh lutuk a a buaithlak. Ka nu leisak kher a hman hian 'Mami kianga awm angah ka in ngai' a ti mauh mai sia" a ti a, "Aw a ho lutuk..ka lo ti dawn nia" ka lo ti vat a, a kawng a kuahin a awmah ka beng thak thak a, inlak hran mai ka tum chuan ka taksa chu a lo kuah bet a, kut beng a kal tum lo ni awm takin min han fawp hram a. 

"I phah zawh hunah i duh angin ka phahsak che ti la, hrilh thlap la, a lawm ve dawn nia" tiin min hrilh lawk thlap a. 

"Uluk vak duh suh..a mut theih chuan a ţha a ni mai" a tih leh hnuah min chhuahsan a, khua a tlai ruai tawh a, an lo haw kim ţhap tawh bawk a, ka pu a awm chuan chhung inkhawm neih a duh ka ring bawk si. Ka che hmanhmawh khawp mai. 

Siampuii nen a kan lo phah sa chu ka hlip sawk sawk a, ani pawh hian engmah a hre lo em maw ni a sawi mang si lova. 

Hmangaihsanga pawh mipa ngang a ni bawk a lukham vel a lakchhuahna suitcase kha inhawng huauin a kal san a, a la inhawng reng tih pawh a hre tawh tawp nang. 

Lukham vel ka dah let hnuah a rawn ken chu mar deuhin ka phah sak a, lukham pawh ka dah thlap bawk. A intodelh khawp mai. 

Puipuia nen khan kan dah tawp sia, ka han remţha leh rih bawk a, ka chhuk meuh chuan an lo ţhu ţhap tawh. Ka fapa pawh Ruattein a pawm a, chhung inkhawm chu an nei tak tak dawn a nih hmel.

An buai buai a an lo buai lai chuan "Ka pu i mutna tur ka siam fel thlap tawh a nia aw" ka ti vak a, a ring ţha khawp mai. 

Min en ţhap a, ka pu pawh a tel ve. A ţhutna a kil angreng a, tarmit a vuah lo bawk. Kan inneih ţum khan Ni Biakengi pawn ring deuhin a be lang lang reng tho a tiin "I bedsheet lo ken kha ka phah aw" a hma aia ring mah hian ka ti leh a, zak chung chungin ka au ve a, min chhang duh hauh lo. Hmangaihsanga lah chuan nuihzat hmel tak hian min lo la en zui a.

Rei fe hnuah ka pu chuan "A khaih Zote..keichu ka vannei a, ka mit leh beng hi a chhe vak lem lo" a ti ta daih a, Puipuia ka en a, nui ri ngam chiah lovin a ri lovin a lo nui kiah kiah bawk a, ka va han zak chiang tak. Ni Biakengi chuan tupawh ring deuh deuhin min be vek alawm tih te ka ngaihtuah leh hman vek a, ka dinna ngaiah ka ding reng a, ka lai zo vek tawh.

"Puipuia sawn a tihder pek che a ni maw?" Ruattei chuan a ti hlak a, "Puipuia min hrilh a nia" ka ti ban charh a, "Awii..ka insum thei tawh hlawl lo" an ti a, Neihkimi leh Zamtei te pawh a ri meuhin an nui ve ta hak hak a. 

"Zotei a rawn au thut sia, U Neihkimi hi a phu deuh zawk a" la nui reng chung hian Zamtei chuan a ti a, ka nuih a za ve thei hauh lo lehnghal a. 

"Khatia au khan a chiang nge nge alawm" tih pahin Hmangaihsanga chu a ding vut a, a nui ve duh lo na a a nuih a za tih ka hre reng. 

Ka hnunga a din rualin ka koki ah a vuan a, "Ka pu'n chhung inkhawm neih a rawt a, reilote chiah aniang. I ril a ţam tawh em?" a ti dam thlup a, lu ka thing a, zahna in min kiansan hleithei lo. 

"Kal ang le..zak duh suh Puipuia vang a nih kha" ti ve bawk mah se ka zak tho tho. 

Chhung inkhawm kan neih zawh rual rualin choka ah ka phei a, ka che chhe ngai tawh lo ka tia ka lawm ve hman nen, Neihkimin min rawn kheuh zeuh a, midang hmuh lohin test kit min pe a, "Ka hre hmasaber duh" a la ti zui. Henu inthlak danglam chak zia hi aw, a awihawm loh zawk alawm le. A lo inchhir awm hle mai ka ti ta vel mai mai. 

CONT...