KA HRINGNUN THAWNTHU-35

KA HRINGNUN THAWNTHU-35

Neihkimi thil min pek ka ah ţhat rualin Hmangaihsanga a lo lut ve a, min hmu hman em lovang chu maw. He inchhungah hian thil zep ţit ţet a awm vak lo tih ka hre tawh a, mahse Neihkimi kha chuan midang ka hrilh hma a hrilh turin min duh a nih hmel. 

"I nuam lo sia lo va ţhu rawh. Siam zawhah kan lo ko ang che" ka pasal chuan a ti ve mial a, "Chi nang" tih pahin a lam ka hawi a, a mitmeng dam thlup te chuan ka pa kha min hriatchhuah tir a, chhungkua chuan kan la awm ngei a, nu leh pa uap leh uap loh inthlauh zia nitin kan hre thar zel thung a. 

"Ti ve vak duh suh..hmeichhia an tam em hi" a tih lai mekin Taitei chuan "Nia lo awl rawh. Kan lo ti ang" a lo ti ve khauh a. 

"Nilengin motor i chuang a, i chau ngawt ang chu" ka tih chuan "Teuh lo mai. Tlan pangaiin tlan ila chu kan lo thleng hma ngawt ang. Ka pu duhdanin kan lokal a,kan tlan muang lutuk, kawngkal te nen kan ti ti pah thei reng ang chu" a tih chuan ka nuih a za kher mai. Ning deuhin thu an awih lo ngam si lo ang a, ka peih loh zawng tak a ni. 

Chutia ka nuih hak hak lai chuan "Haw dawnah chuan Mama te nupa in min thlah rawh se a ti" a lo ti leh zauh a, ka pasal hi Mama an ti ţhin a, keimahni bak kan ni lovang. 

"A ţha tho alawm" ka ti mai a, chhan dan tur vak a awm lo. 

"Bawiha i nu'n chaw a pe vek tawh che a, rawn inkhawihberh tawh suh aw" Ruattein a ti lang lang a, Bawiha chu ka lo la hrang vat bawk a. A tal bat bat na a ka pawm bet lui tho a. 

"U Zote a duh loh chuan ti lui duh suh. Ka inchawi mai ang. Sitting room ah tv en pahin ka eipui ang a, a ei tam duh dawn chuang lo" a ti leh ang lawi a, hauh dawn hian a lo phal lo tlat zel a, naupang hi an lo â lo khawp mai, ka fapa pawh hi Ruattei bulah hian a pangchang zual bik a, Neihkimi nen pawh an in awm thei viau tawh. 

"Chaw a ei tawh a, tv lo va en rawh se inchawi duh kher suh. Midang a tihbuai loh nan ka hrai hma ve hram hram a" ka ti a, Bawiha kaih chhuah mai ka tum lai chuan "Fian ka la ang a, ka thleng a mi hi a ei ve mai dawn alawm. Hmarcha ka ei ve chuang lo a" a lo ti leh a. 

"Aa..ngaiah a nei mai mai ang. Lokal rawh tv va en rawh" ka ti a, ka aw pawh a nem hran lo. A ţang tlat lehnghal a, a men velin ka hria. 

"Khawi teh..kan inchawipui mai ang e, naupang a nia, engmah a hrethiam tak tak lo. Bawiha eng nge kan hmeh dawn kha?" a ti zui zat a, pakhat lahin fiah mang lovin "Artui" a lo ti a, kan hmeh dawn der si lo. 

"Pakhatin a hauh chuan midangin lo chhan lo ula. Puitling ho ţanna lam a inan loh chuan naupang an ţha thei lovang" Hmangaihsangan a tih chuan Ruattei a lo ner nang a, "Ţha leh ţha lo hre rual a la ni lo. Hauh na âwm ngawih ngawihah chuan hau ula ka ţan bik lovang" a ti hmak a, a farnu chu hahthlak tih hmel deuh hian a en a, pakhat-i lah chu a nui leh kar kar tawh a. 

Sangzuala nen kan inţhen hlim khan Ruattei hian ka fapa hi a lainat ngawih ngawih a, rethei deuhin ka awmpui zui leh bawk nen, a khawngaih lutuk na lamah a hmangaih zo vek tawh ni berin ka hria. Bakah kan cheng ho rei ve a, Bawiha hi naupang awmchhun a nih char char vang a ni bawk ang a, Ruattei bula a riah chuan zanah pawh a buai ngai lo hrim hrim. 

Chaw ei lai te chuan Neihkimi thil min pek ngawt khan rilru a luah a, ka rai angem rai lo angem tih hlir rilruah a awm a, rai ila chu duhthusam a nia, kei chauh ni lo ka chhungte ho pawh hi an hlim ang a, ka pasal bik phei hi chu a hlim zual viau maithei a ni. 

"I chaw ei a tui lo elo?" a lo tih chuan amah chu ka en vat a, "Tui e..ka ei tui lutuk" ka ti vat a. 

"Ei ţeuh rawh..i cher zual deuh em mawni lehnghal ni..i taksa a chhiat telh telh chuan ka mualpho lutuk ang" a ti fiamthu a, ka chawhmeh duh zawngte chu min suah sak a, midang hmuh laia min ngaihsakna lantir te hi a hreh ve lo a, thunei zawk ni tho mah se min dah pawimawh em em reng tho a, ka pasal hi chu hmangaih loh theih pawh a ni lo. 

Chaw eina hmun ka tihfel lai chuan Neihkimi bawkin "Ka pindanah ka lo awm ang. I lo lut mai dawn nia" a ti leh a, ka bu ve nghat a, midangin kan inbe lai min hmu lo hlauh e. 

Ka tihfel laiin Siampuiin thleng a lo sil daih sia, Taitein hmunphiah a chuh tlat bawk si, "Bawiha kha a inti bal em?" tiin Ruattei ka zawt ta ringawt a.

"Bal lo..min khawihpui vak lo a, ka bulah hian awm rih rawh se. Nilengin ka chhuahsan a, ka ngai ve alawm a" a lo ti a, kha a chuh leh tlat tawh. Ruattei leh Siampuii ten min chuh hneh lutuk hi mahni fa ngei ngaihsak ţha peih lo te pawh ka ang a, ka fapa lahin a ngai ve ve tho bawk si, min ngaih tawpah lo chuan ka chang ve thei meuh lo. 

"Aw..nih leh ka han insil ve lawk ange aw" ka tih hnuah Hmangsaihsanga chu "Tikhan ka pu lo awmpui rih rawh. A ngaih em che kha" ka ti thung a.

Bualin ah ka lut tlang a, Neihkimi test kit min pek chu ka en vang vang a, nau pai ka duhna a lian viau tawh a, lo rai ta lo ila chu ka hnual rawih thei hial ang chu. Ka test hnuah pawh test kit chu ka la en vang vang a, ka thil hmuh avang chuan ka thin a phu nghal dawt dawt lehnghal a. 

Neihkimi pindan kawngkhar ka kik karh karh a, test kit ka hum ran bawk a, a rawn hawng a, ka luh hun pawh nghak lovin min pawt lut a. 

"Eng nge result?" a ti nghal thawr a, test kit ka phawrh hnuah "Ka rai, nau ka pai enrawh hei a positive, i hmu thiam tiraw? Tihian i hrethiam em?" ka ti chul a, ka lungphu lah chu ka lawm luatah a inthum rawn tluk tluk lehnghal a. 

"Aw ka hmu..ka hrethiam alawm...awi leh" a ti ve zung zung a, a ţhawn ve hmel khawp mai. 

Ka ban bul tawn tawnah a dawm a, kei aiin a sang hret a, kan din dun loh chuan a hriat em em loh. 

"I rai mawle" a ti nawn leh a, ka lo nui hak a, hei hi Neihkimi awmdan tur a ni lo hrim hrim. Tunlai chu a ze ţha lai chauh a lantir ni maiin ka hria.

"Ka nau fa lehnghal" te a ti leh ringawt ţhin a, ka nuih a za a, chutih rual chuan rilruah ka nu a awm a, la dam ve se chuan ka ti reng tawh mai dawn a nih hi. 

"I zawi nguai a, i mut a chhuak em em zel bawk sia, ka ringhlel reng che a ni. Awii..ka naute ho an va lawm dawn tak" a ti leh ţhin a, tuna ka hmuh ang a mizia hi pu reng se inchhung a van nuam dawn tak. 

"Nangman hrilh ang che" min ti leh a, kei aiin a ţawng hnem daih tawh zawk mawle. 

"Midang i hrilh hmain ka nau hrilh hmasa ngei ngei ang che" min ti leh a, kan hlimna hi mitmengah a langchhuak thei a nih ngai chuan Neihkimi mitah hian ka hmu chiang khawp mai. A hlim takzet tih ka hria a ni. 

Pindanah Hmangaihsanga ka lo nghak a, mahse Ruattei leh ka fapa an lo lut hmasa zawk a. 

"Eng nge i ngaihtuah a? Nangmahin i lo nui vur vur bawk sia, kan hlau mai dawn che alawm" a rawn ti hlut a, Bawiha thawmhnaw bawm a hawng nghal zat bawk a. 

"Thil ho deuh deuh ka ngaihtuah" ka tih hnuah Bawiha chu "Ka bulah riak rawh aw" ka ti a, lu min thin khum daih zui a. 

"Nih leh tu bulah nge i mut dawn a?" ka tih chuan "Ani bulah" tih pahin Ruattei a kawk a, pakhat lah chu a lawm mai bawk sia. 

"A chi dawn mi? Ruatte, Taitei kha khawiah nge a mut ang a?" ka tih chuan "Chhuatah ka inphah mai ang a ti alawm. Puipuia a awm rei dawn chuang lo a, mikhual pindanah a insuan lut vat thei tho a" ngaihsam deuh hian a ti a, nau lawm hi ka thiam lo a, ka fapa pawh han chhaih vak ngaihna ka hre lo ţhin. 

"A nutei ka nih lai khan a la ţawngthei lutuk lo hlauh a a tihzia e, tunah ani ka ni leh ta daih bawk sia" fiamthu hian a ti a, "In inmil ţan riau mai. Kei aiin a ngai mai dawn che alawm" nui chung hian ka lo ti ve a. 

"Nu te nge nge hi chu a dan a dang a, engang pawn in awm nasa mah ila a ngai zawk tho tho ang che. In inneihna a la rei lutuk si lo a, ka la hrang rih mai mai a nih hi" awmze nei deuh hian a ti kher a, Taitei pawh a lo lut ve hlawl mai. 

"Hei chu U Zotei te pindan a nia, nangman thawmhnaw i dah chho lo em ni?" Ruattein a lo tih chuan "Aw..U Puipuia ten an dah chho a, a inhawng berah ka lo lut a" a ti ban charh a, inchunga a chhoh lai awm ka hre lo reng a ni.

"Min lo nghak rawh Bawiha thawmhnaw ka la ang a kan phei dawn nia. Bualin te ka hrilh che anga maw..duat hlawh vak lo ho chuan bualin kan inţawm a" a ti leh pek a, Taitei pawh chuan "U Zote in pindan chu a nawm reuh hi, a zau bawk sia, nuam ka tih chi tak a ni" a ti a, a ţawng duhin min u ve nghal mai bawk a, a fel hmel khawp mai. 

Hmangaihsanga lo lut chu nui var varin ka lo en a, mak min tih hmel nasa mai. 

"Ka pu ka muttir hmasa a" a ti ban charh a, min en leh zawk hnuah a tshirt a hlip a, "Kan inbual lawk ang aw" a tih chuan ka lo bu nghat a, ka lawm lutuk a, ka chet chhiatna pawh ka lo hre chang tawh lo. Bang bo tih hriat deuh hian bualinah a lut a, a lo chhuak leh pawh chu nui var varin ka lo la en a, a hma ai mahin a bo hmel lehzual a, ka hlauhawm viau tak tak ang ka ring. 

"I ţha maw?" a ti ta ringawt a, hmel pha dai a min en te chuan ka nuih a za tial tial thung a. 

A inthlah zawh hun ka lo nghak a, a zawh veleh "Nau ka pai" ka ti a, a ke pen a tawp chawt a, hamhaih hmel deuh hian min en a, "Eng maw i sawi?" a ti mawl tawp a, ka thusawi kha a ringhlel deuh niin ka hria. 

"I en ve duh em?" tih pahin test kit chu ka la chhuak a, min rawn hnaih nghal ruak a, min chhuh sak rawk rawk a ni ber. 

A en vang vang hnuah keimah zawk min en leh a, mak a tih viau rualin a mitmeng de sarah chuan phurna leh hlimna te ka hmu tel a, ka bulah a rawn ţhu a, "A lawmawm..i hria tiraw?" a ti leh tawp a, sawi zui vak ngaihna a hre lo chuan a awmah min kuah bet thlawp a. 

"I lawm tiraw?" kuah let ve pah a ka tih chuan "Tehreng mai" a ti sup a, ka chhipah a fawp vang vang a.

"Ka hria alawm. Kan hlim lutuk chuan kan sawifiah thiam ngai lo an tia, i hlim tih ka hria alawm. Sawi lo mahla ka hre lutuk" ka ti mawlh mawlh a. 

A inlak hran hnuah pawh ka kokiah a dawm a, kan in en hnai khawp mai. 

"Naktukah damdawiin ah kan kal dawn nia. E..clinic ah a ţha zawk ang tiraw an uluk deuh ang a. Bawiha awm tawh tho mah se ka vawikhatna ang tho a nia, doctor mah ni ila ka enkawl thei lo che. Ka la tawn ngai loh ka tih tawh kha, naktukah kal phawt ang" a ti mawlh mawlh a, "Hahdam teh..i chiai lutuk a nih kha. In sawiselna ka nei hran lova, Bawiha ka pai pawn ka in entir mang hleinem" ka tih chuan "I in entir a ngai alawm" a lo ti bur bawk sia, a lungdam nan a kal ngei a ngaih hmel. 

"Aw..nih leh ka kal ang. I thu vek alawm" ka tih chuan pa deuh hian a kiai suk a, "In dim viau rawh" a tih vang maiin dim deuhin min han fawp kher a. 

A inla hrang hlek a, chutah a hma aia ril leh thuk zawkin min fawp leh a, a hlimzia a sawi duah thiam lova, a chezia ah chiang takin a hriat theih thung. 

Ţukţhuan ei laiin midang kan hrilh ve a, kan kim ve ţum a ni bawk nen an phul nghal hlut a, "Chaw eikhawm a ngai a nih chu. Ni Biakengi kan call nghal teh ang. An lawm dawn lutuk ringawt" tiin Zamtei chu a tho nghal vut a, a chaw ei pawh ngaihsak lovin Ni Biakengi chu a call a, spreaker ah a dah deuh kher bawk a.

"Eng nge ni Zamchhia?" a rawn tih chuan kan lo nui hak a, "Ni..i lawm dan tur chu maw..Zotei hian nau a pai a sin" a ti a, a reh zui vang vang a. 

A ri rawk rawk a "Ngaithla teh" a ti ngei a, mahse a ri zawi angreng a, "Han sawi nawn leh teh" ring deuh hian a rawn ti leh lauh a. 

"Zamtei hian nau a pai" a ti nawn leh a, "Hei ipa Chhawna ka ngaihthlak tir ve a" Ni Biakengin a tih laiin "Hmangaihsanga mai mai chu aw" Pa Chhawnan a lo ti a, Neihkimi takngial pawh a nui ve hak hak mai. 

"Kan lo phei ang...vawiinah hun kan neih veleh kan lo phei ang" an tih chuan "An inentir dawn ti rawh" Hmangaihsangan a lo ti khauh a.

"Hei..ka u in kan inentir dawn a ti a nih chu" a tih chuan "Zingkarah kal rawh se..clinic ah zingkarah kal se la zo vat zawk rawh se. Zotei pawh kan hmu chak alawm" an rawn ti tlat a, a hnathawh a khawih buai lo theih dan ber a ni bawk a a remti ve mial a.

Ni Biakengi te nen kan inbiak zawh chuan "Ka ţhiannu piancham a ni kher a a van pawi tawk. Lawm a tum a, min beisei ve tlat bawk sia, zanah chiah ka lo haw dawn a" Zamtei chuan a ti nang nang a, "Chutiang deuh chu ka ni. Ka ţhiannu fanu piancham a nia, zanah bak ka haw thei dawn bik lo" Neihkimin a lo ti ve vat a. 

"Keipawh ka tlai dawn..mi pahnih office banah an lokal dawn a, sam khawih ngai a ni bawk nen, kan thim ka ring a" Ruattein a ti ve bawk a, Hmangaihsanga a lo nur nang mai. 

"Tikhan lo awm vel suh. I beisei aia nasain kan la lawm dawn khawp alawm. Chaw eikhawm ngei ngei a ngai ang" a farnu te chuan an ti a,"Zingkara in kal dawn chuan naktuk a ngai tawh dawn a ni maw?" Taitein a lo ti ve khauh a. 

"A nih hmel..in sawiselna em em ka nei chuang lova, ka nghak thei alawm" ka lo ti mai a, chaw kan han eikham te chu ka pasalin ka chet ve a phal tawh lo bur a ni tawp mai. 

"Awm hahdam tawp rawh. Siampuii te an awm alawm" khauh deuh a a tih chuan "Nia kan awm hi. Taitei pawh a awm a, engmah lo ti ve duh suh" Siampuiin a lo ti vat bawk a, "Ka putea te lo la hrilh suh u aw. Pathianni hian an in a chaw ei kan tum a, chumi hunah chuan ka hrilh ang" ka ti a, aw min lo pawh sap sap a. 

Hmangaihsanga hna kal tur ka thlah te chuan "In dim rawh aw" min la ti a, Bawiha chu a pawm kang a, "U nih i chak tawh em?" a ti zui zat a. 

Hriatthiam hmel vak loh chung hian Bawiha chu a bu nghauh a, "U i ni ţep tawh a nia aw, ka awm loh hlanin i nu leh i nau hi lo veng la, tumah lo tihnat tir suh aw" a ti leh a, an pahnih chuan ka lo thlir reng a, hmuh an nuam takzet a ni. 

"Kal tawh rawh i tlai palh ang" ka tih takah Bawiha chu dim deuhin a dah thla a, "Pawm ve tawh lo mai rawh..i.inti palh palh ang" a ti a, a fimkhur mai bawk sia. 

"Aw le..a fel tawh a, pawm a ngai tawh reng reng hleinem tiraw?" ka ti a, Bawiha pawh a nui ve var var mai. 

A lan theih chhung zawng kan thlir a, kan hmuh phak loh hnuah kan lut ve chauh a. 

"Zote, ka chhip hi a thak riau, ka sam ţuak min han pawh sak teh" ka pu'n a lo ti mauh mai a,"Tunhma aţanga a chin tawh a nih kha. A chhip te hi a kawlh rul zel alawm. Mi a pawh tir ţhin a, lo ţo thar tawi te te a awm ang a, chung ho chu i pawh sak dawn a nia" tiin Ruattei chuan tih dan tur min lo hrilh zung zung a, "Min lo nghak lawk rawh aw" ka ti te te a, Bawiha chu tv ah a duhzawng ka entir zet a, tweezers ka lak leh hnuah ka pu chu rem deuh hlekin ka ţhuttir a, awm mai mai ai chuan nuam ka ti daih zawk lehnghal a, a ţha phian mai. 

Ka pa Chhawna hi a pension tawh a, chuvang chuan an nupa in chhunah an lokal nghal thei a, thei leh thlai min lo kensak ţeuh a, "Luak chhuak te i nei tawh em? Chawhmeh duh tak miah loh te i nei em?" ka ni chuan a ti sawk sawk a, min ngaihtuah viau a ni. 

"Aih chutiang chuan ka la awm lo. Perfume rim ngei deuh chu ka nei a, thil dang a awm em em pawh ka hre lo. Ka chau a ka mut a chhuak reng a" ka tih chuan "Chutiang a nih te chuan awm hahdam ta che. Inchhung chet vel te chu Siampuiin a ti thei vek a, mut hmak tur che alawm" a ti ve chiah a, ka pu lah chuan "Zote ka lu hi kan su dawn em ni?" a lo ti ve mek bawk a. A chhip a la hiat nuah nuah a, darkar khat vel erh awrh chiah pawh sak mah ila ka ke a kham ţhum mai. 

"Keiman ka lo tihsak zawk dawn che mi? Zotei chu awm hahdam ve rawh se, nau pai hlim hi chuan kan nuam lo ve ţhem ţhum zel a nia" a beng bulah ring angreng tak hian a ti a, zan lam ka hrechhuak zawk mai. 

"Au vak ţhin suh ka tih kha Mabiakeng" ka pu chuan a lo ti bauh a, ka ni lah chuan a nuih liam mai a. 

An haw hnu lawkah Hmangaihsanga a lo haw ve a, "I lo ţha em?" a tih chuan ka bu nghat a, ka puin "Zote, thingpui hi a dai vek tawh va ti lum leh teh" a lo ti leh bawk sia, ka pasal pawh lawm ţha hman lovin thingpui no chu ka la a. 

"In ve nghal mai tur alawm mawle. A nghak dai te te a, ti lum leh rawh a ti zel bawk sia, putar sual tak a ni" uar fe in Siampuiin a lo ti a, mitmeiin ka khap vat thung. 

"U Hmangaihsanga hian a duat a, a thik che a nih hi. Tar hi chu an rilru a naupang ţha leh an tia, kan u in a duat vel che hi a ngaithei lo a ni hrim hrim ang" a ti zui sa sa a. 

"Ka lum sak leh mai ang. Tualah Bawiha leh U Remremi ten ball an pet a, lo va en zeuh zeuh rawh aw. Keichu pawnah awm mah ila min ko lut leh dawn tho a" ka tih chuan "Tehreng mai...ka lo va awmpui ang" awlsam deuh hian a ti ve mai a. 

"Kha aw" tih pahin thingpui chu ka chhawp sak leh a, ka pasal pawh ka pek ve hnuah a bulah ka ţhu zui zat a. Min lo kuah thuk a, ka ban bulah a hmer zui vang vang a. 

"I lo mu char char em?" a ti dam thlup a, a mitmeng a phurna awm te chu hmuh hmaih theih a ni lo. 

"Ka mu reng peih bik chuang hleinem. Ka ni te an lokal bawk sia, thei leh thlai min lo ken ţeuh mai" phur deuh hian ka lo ti a. 

"Keipawn ka lo hawn alawm. Motor ah ka dah a, nakinah kan la dawn nia" a tih laiin ka pu chuan "Ka samţuak ka pawh tir a" a lo ti a. 

"Khai a..ka pu chu Siampuii te pawh tirh mai tur che alawm" a ti a, a vin lo na a a ngaihdan a ni chiah lo tih chu a hriat theih. 

"Ka tu nu a ni tawh a, ka tir ve ang chu" a lo ti duh lek chauh a, Hmangaihsangan thingpui a in zawh vek tawh hnuah ka pu chuan "Zote a dai vek tawh va ti lum leh teh" a ti leh tawh a, thin a rim ţeuh thei alawm le. 

"A tharin lum mai rawh tun a i siam dan hi ka duh lo. A sen hangin han ti teh" a tih chuan ka thaw hak a, ka insum hram hram tawh chauh a ni. 

Thingpui sen hang ka pek leh hnu chuan a en vang vang a, "A tak mah mah a nih hi" a lo ti leh a. 

"Niminah motor kan chuang nileng a, vawiin chu ka awm a nuam thei lo. Ka pindanah han kal la ka lukham kha min han lak teh. Ţhutthleng a in lukham dah ve hi chu a pan emai" a tih chuan ka tho tharh a, kalsan vang vang chu ka chak lutuk ringawt. Min tir kual nasa tawh lutuk a, ka thingpui lum lah induh mang si lovin min lum ţhat tir reng a, ţah a ti chhuak zawk e ah. 

Ka pasalin min zui tih hre mah ila hre lo ang hmakin ka chho a, ka pu pindan a ka luh chuan hnunglam aţangin ka awm zawnah min kuah a, ka chhipah a khabe a nghat zui zat bawk. 

"A lo tir kual nasa viau che elo?" a tih chuan "Tir nasa ve tho e. Thingpui ka lum ngun a, a duh lo zel bawk sia. Midang buaipui a duh bawk si lo a, pawn a ka chhuah puiin a lum a tia, inchhung a ka luhpui leh a vawt a ti bawk sia. Min hmet rawh a tia, min hmet na vek te a ti leh a, hetiang hian mi a tih ţhin che a?" ka ti mawlh mawlh a, ka ni pawh khan a hau a, awmzia a awm chuang lo. 

"Ka lakah a pangchang a, a thikthu a chhe bawk a. Ka nupui i nih vangin sual a chhuah rih mai mai a nih hi. Dawh hram hram rawh aw, in la inmil viau lo ang tih pawh a sawi theih hleinem. Tar hi chu dawm thiam an ngai ve ţhin a, a ti lutuk a nih chuan keiman ka lo hau dawn a nia. Sual an tih loh nan che ngawih chuh tlat la, kan pu neihchhun a ni tawh a, kan ngaihlu teh a nia" a ti sup sup a, ka chhang lo. 

"I thin a rim em?" a tih chuan "Rim love" tih ringawtin ka chhang a, min kuahna aţang chuan ka tal chhuak a, lukham ka lak rual chuan min lo chhuh sak a, "Ka lo pe mai ang. Lokal teh" tih leh ka dar a min kuah rual a. 

Kan pindanah min kuah lutin "Lo mu hahdam rawh" min ti a, inthlak lam pawh a ngaihsak lo, a chhuak lehnghal nulh a. 

Ka lungawi chiah lo na a anni lam an lungawi loh ve tho ka hlau a, ka awm a nuam lo leh vel a, khuma ka ţhu ûk tawh chu ka tho leh a, a pu a lo thleng chiah a, keiin ka lo thinrim khum nghal chuan engtin nge min ngaih ang le tih thlengin ka ngaihtuah leh hman a, tar phei chu an vui peih tawh ţhin sia, a nutei te hoin an hriat phei chuan min rawn ankhum chiam duh ang chu. 

Inhnuaiah bawk ka chhuk leh a, sitting room ah an lo awm tawh lo. Choka a ka luh dawn chuan "Thingpuife tlem te chiah maw ka thlak ang" ti a ka pasal ţawng ri ka hria a, ka lo inhumruh nghal vak ringawt a. 

"In nu tih tir mai la aw..nilengin hna i thawh kha" ka pu chuan a lo ti a. 

"A chau ang mu hahdam rawh se. Engatinge i lo tirh kual chiam a? Nau a pai kan tih tawh kha" a ti nghut a. 

"Thil hahthlak ka tih tir bar lo. Ka thingpui in tur chu a lum tur alawm" a ti a, min ngaina lo riauin ka hria. 

"I duh dan tak hrilh tur che alawm. Hetiang a nih chuan ka kalsan ngam lo mai dawn a sin" a ti a, kalsan ka tum zet tawh chu "I nupui i ţan hle mai" ka pu'n a tih leh takah chuan ka ding chawt a. 

"Ţan bik ka nei lo che u. Hrehawm a tuar hnem tawh a, a tawrh zel ka phal tawh lo a nia. I awm ang hian Zotei awm ve sela chu ani pawh ka hau tho ang. Nidangah chuan lo ti tawh suh, i tunu anga i ngaih chuan duat zawk rawh. Ka ngaihsak vang hian ka nupuiin i lak aţangin min la hrang daih dawn tihna a ni hleinem" a ti nghat nghat a.

"Pindan a in chhoh khan min hek em ni? Tum chungin thingpui min pe a" tih te mai mai a sawi a, a ţawng muang em em mai lehnghal. 

"Naupang zawk a nia, in la in nel vak lo bawk a. Nangman duat hmasa la Zotei pawn a duat ve mai ang che" a ti liam vel mai mai tawh a, an ţawng ka ngaithla tih an hriat loh nan pawnah ka chhuak a, "Inbual tawh rawh aw..hei i thlan nasa tawh emai" tih leh Bawiha kaih ka rual a, Hmangaihsanga te putu an lo chhuah leh hmain pindanah ka chhohpui leh ta daih a. 

Beisei aia nasain ka chhungten min ngaihsak a, clinic ah pawh chuan kalin ka taksa mamawh tur ang damdawi te min lo chawh a, ka putea te in a chaw kan ei ţum a chanchin kan hrilh ve pawn min lo lawmpui hlawm khawp mai. Thiangi te ho pawh Ruattei te unau ang maiin an phul hlut a, Hmangaihsanga an fiam nasa a, pa a ni mai tur chu eng nge a an tih te engtin nge a awm tih te an zawt vak vak a, "Ropui tak a ni" tih bak chhanna dang a pe thei lo. Thantei te ka hrilh lah chuan helam ai mahin an lawm zawk emaw tih tur a nia, ka pu pawn ţullo deuh deuhah min tir tawh ngai bik lo, a tupa a hlau aniang. 

Ka taksaah han na em em a awm rih lo nain ka awm bawr hi chu a na ve reuh a, ka tauh chawrh ang tih te ka hlau ţhin. 

"U Zote, hei thei ka zai a lo ei rawh. Inpa in i duhzawng i ei loh a hlau ropui si" Thiangin a tih chuan choka ah ka phei vat a, a lo zai hnem em em zui a. 

"Kan eiseng awm lo e. Chhunah eng nge kan siam ang? Chhun eitur ngaihtuah hi a buaithlak tiraw? Vawiin tak chu Ruattein Bawiha a hruai hlauh zawk a" ka tih lai mekin "In awm em?" ti lauh lauh thawm a awm a, Awmtei hmu tur chuan ka chhuak nghal vat a. 

"Lokal rawh" ka tih hnuah ka thei kenlai chu hmuhin "Lo ei ve rawh" ka tih zawm a, ka hui zauh bawk a. 

Choka ah kan inzui lut a, hrilh chawp ngai lovin a ţhu tharh a, kan thei chhawp erawh chu "Ka ei peih hlawl lo" min tih sak deuh nek a. 

"Zote, i eizawhah khan inbe lawk ang" thutak deuh hian a ti a, thupui ngai bawk a rawn keng lut leh tawh aniang chu. 

"Aw le..pindanah kher i ti deuh em ni?" ka tih chuan sitting room lam a hawi hmasa te te a, chutah min rawn en lehin a bu nghat a. 

"Nau i pai niin ka lo hria a" pindan a luh pah chuan a ti a, ka lo nui mai a, tunlai chu rilru a no viau rualin ka nui reng mai, ka pum pawh a la puar hma hauhin kan hlimna ber a ni der tawh. 

Sofa ah chuan ţhuin a bag chu a hai rak rak a, diary hlui hmel tawh tak pahnih hi center table ah a dah a, "Ka pa chu tukinah ICU ah an dah lut a" a ti ban charh a, a bulah ka ţhu a, han hnem vak ngaihna ka hre lo khawp mai. 

"Zu in mi a nia, kan naupanlai pawn zan tam tam min riahbosan chang a ngah mai. Diary ziah mi a ni lova, a peih lo bawk. Mi taima a ni tlat lo a ni. Mahse tlem a zawng chhinchhiah a nei. Hemi pahnih hi ka haichhuak a" tih pahin pakhat zawk chu a la kang a, a keu thuak thuak a, inziak mang a awm lo tak tak. 

"Pakhat ah pawh hian engvak a ziak chuang lo. Diary hi a rei tawh a, ni, thla leh kum, a ngaihpawimawh fal bikte chhinchhiah nan a hmang a nih ka ring. I hming ka hmu ve a" a tih chuan kâ hauin ka lo en a. 

"A mak lutuk, a hma kha chuan engahvak ka ngai lo che a, i dinhmun leh thil dangin min tibuai lo. Ka kalpah vel mai mai che a, i hmuh laia Hmangaihsanga han kuah vel thuak thuak te kha hrehawm ka ti hran lo" tiin a inpuang a, a la nui sawng zui a. 

"Mahse thisen pek chungchang in sawi khan ka beng verh deuh pakhat a awm a, keihi AB ka nia, kan chhungah B tumah kan awm lo. Ka pa blood group berkher hi a buaithlak e kan ti fo a, damdawiin a ka rawnkal hma lawk pawh khan ka nu nen kan sawichhuak nghe nghe" a tih laia ka pasal lo lut chu "Lo va chhuak rawh" fiah angreng tak hian a tih zawm zat a.

Thil ţha lo a thleng ah angai aniang chu ani lah chuan "Eng nge i rawn tih?" a ti rum ul a, tur zet hian a melh khui bawk a. 

"I nupui leh i fate hi ka ti na dawn lo Love high. Thil pawimawh ka sawi a, lo va chhuak mai teh" ngaihpawimawh loh hmel zet hian a ti a, eitur a lo khai haw leh tawh a, protein tamna ei tam tur a min duh vang hian almond te a rawn lei ţhin a, ka mamawh tur ang chu sawi lo mah ila a hre thei khawp mai. 

"Lo ding reng suh..kan hriat chian vek hunah duh leh kan hrilh ve ang che. Hmeichhe naupai lai ka tihnat duh i ring reng reng em maw ni" Awmtei chuan a ti leh a, "Nia kal rawh..thil min hrilh ringawt dawn alawm" tih leh din ka rual a, a thil khai lai laksak pah chuan "A rei lo ang" ka ti zawi sap a, Awmtei nen a chik deuh a min en hnuah a bu nghat a, "Danglam awm suh se" a tih nghut hnuah hreh deuhin min chhuahsan a. 

"Diary a inziak awm chhun te hi kan finfiah thlap theih chuan danglam chu a awm dawn chiang alawm. I nunphung a ti danglam kher angem phei chu ka hre lo" tih paha min rawn en chuan hman a Hmangaihsanga ka lo fiam tawh dan ang bawk khan "Danglamna hian danglamna a thlen thei" ka lo ti zauh a, a nuih a za viau mai. 

"Inpa kha chuan in nunphung a danglam a hlau berin ka hria. Engpawh hria la danglam duh chuang suh. Finfiah ka duh mai chauh a nia, khami ni aţang khan rilruah a awm zui reng a, ka pa ka zawt fo bawk. A kâ a ang duh mang si lova, lehkhabu hlui ka hai chiam phah a, diary leh thil dang pawh a hlui hlui ka enkual a, Zoliansangi pian ni tih inziak hi ka hmu a, i pian hnu daiha a chhinchhiah ni awm tak a ni" a tih chuan awih lo lutukin ka lo nui hak a, "Keimah ka ni lo maithei asin. Zoliansangi tih te chu an tam emai. Keimahah i hmehbel nghal ringawt a nih kha" ka tih chuan "Ni, thla leh kum hi bihchiang teh, nangmah nen a inrem em?" a ti a, a bulah bawk chuan ţhu lehin diary chu ka enchiang a, "A inmil ngei alawm. Mahse keimah ka ni tih a chiang chuang lo. Sawi tawh ang khan nu leh pa ka nei alawm" ka la ti ve tlat a.

"Nih leh i nu khan i pian dan a hrilh ţhin che em?" a tih chuan lu ka thing a, "Nu leh pa ka nei tih ka hria a, thil dang ka hre tam lo. Mahse ka nei ngei alawm" ka lo ti a, ka kut a rawn vawn chuan rang deuhin ka la let a, zahzelah za lo deuhin ka nui hak hak a. 

"Kan chhungkaw zinga mi i nih ka ring tlat. Neihkimin nang nen a in ang min tih thu a sawi tawh a" a tih chuan "Ka hriat hma daih che hian Awmtei tih hmingpu chhungte kan neih leh neih loh min zawt alawm" ka lo ti ve vat a. 

"In inneih ni khan kan ţhian hluite an lokal ve nual a, chung ho chuan inang min tih thu an sawi vek bawk a" a tih leh chuan "Inneih ni khan ka hmu hauh lo che" ka lo ti daih thung a.

"Chhungkhat ni lo inang tak hi lo awm pawh ni se an tam ka ring hauh lo. Kei ngei pawn kan inang ka tia, unau kan nih i ring em?" ka ti deuh khawl a, ka nuih a za kher mai. 

"Drama a nih loh hi mawle..a tak tak a nih hi. I pa hi ka pa ni ve sela chuan fahrah ka nih a phal tawp nang. In hausa tih ka hria a, kan retheih lai te khan min pui ţhin ang chu" ka tih lai chuan lungngaih hmel deuh hian min lo en a, "A pawi tak tak a ni" a ti zui sap a. 

"A ho lutuk...ngaihtuah hah tawh lo la, tihian kan awm awmin awm tawp ang u. Chhungkua ka nei tawh a, nau ka pai mek bawk a, ka hlim tawh alawm. Ka hringnun thawnthu ah hian hlimna lam ka ziak ţan ve dawn mek a, min tihchhiat sak lo la" ka ti mawlh mawlh a, "I pa diktak i hriatchhuah chuan i hlim lehzual ang. Zu vanga natna hrehawm tak tuar mek pawh nise i hlim tho tho ang. Thlalak hlui ka hmuchhuak bawk a, diary kar a inzep a ni nghe nghe a, mahse a chhe tawh khawp mai" a ti a, thlalak ung deuh mai hi ka mal chungah a rawn dah a. 

"I nu hmel i la hre thei ang tiraw? A boral lai khan a la upa lo a nih chuan thlalak a mi nen hian danglamna a la awm mang lovang a, thlalak hlui i lo hmu ve tawh ţhin maithei bawk. Chuan hetah hian i nu hmel i hmu thei em?" a ti a, mak ka ti lutuk chu ţawngchhuah mai nachang pawh ka hre lo. 

CONT