KA HRINGNUN THAWNTHU-36

KA HRINGNUN THAWNTHU-36

"Hei hi ka nu alawm. Ka nu a nih hi, ka nutei khan thlalak min hmuh tir ţhin a, a sam leh thil dang engkim hi ka nu vek a ni" ka ti bah nawk a, "Ka hria, i nu ngei a ni dawn tih hre sa ran a lo keng ka ni" pangngai tak hian a lo ti thung a. 

"Engtia i neih nge? Khawia mi nge a? Mahse keichuan nu leh pa ka nei ngei alawm. Accident ah an boral dun bawk a" ka tih chuan "I ngaithla chiang lo a ni maw? Diary a mi ka tih tawh kha. Ka nu zawk damdawiin a a riah apiangin ka pa thil hlui haiin ka hmanhlel a, eng emaw tal hmuh chhuah ka inbeisei ţhin a, thlalak a hmeichhia hi i hriat ngai mi a lo nih loh chuan ka bawhzui tawh lovang ka tia, mahse i nu a lo nia" a nui sak a, hahdam huai hmel a pu bawk a, engtin nge a nih theih le?

"Khawvel hi a zim teh mai a nia aw Zote, chutih rualin thudik hi thup tum ţhin mah ila eng emaw kawng zawng talin a rawn langchhuak ţhin. Ka pa paw'n thup a tum viau na a thil ho deuh hmangin ka hrechhuak tho a, Pathian hnathawh ka ti dawn nge pawh ka hre lo, ka bialpa hlui nen in inkawp a, rin loh deuhin Ruattei dawrah kan inhmu nawlh a, ka pa damlohnain thudik min hriattir ta nge nge bawk a, diary a ka pa'n a chhinchhiah dan hi a dik a nih chuan kei aiin i naupang zawk a, ka nau i ni tihna a ni mai" a ti charh charh a, "Mahse ipa fa ka ni kher lo thei tho a, finfiahna engmah a awm chuang hleinem. Hei chu ka nu a ni ngei a, a bula mi hi tu nge a nih ka hre lo" ka tih chuan "Ka pa a nih hi" a lo ti vat a. 

"Finfiahna ka duh vang alawm DNA test tur a ka tih che. I remtihna la hmasa lova tih ngawt ka duh lova, i remtih phawt chuan senso zawng zawng ka tum vek ang. Result pawh a chhuak har lutuk lo ang ka ring. Mahse thil dang ka hmuh tir hunah che chuan DNA test kher ţul i ti lo mai thei a ni. Hei hi enteh" tih pahin diary pakhat zawk chu a keu a, "Rengpuii pasal neih hi a inti leh a, i nu kha tu nge a hming?" a ti a, min en kal a, nghet deuhin ka kut ka hum a, ka kut phah te chu a thlan huh dap tawh a. 

"Zorengpuii" ka ti tham chhal a, "I pian thu a ziahna leh i nu pasal neih chungchang a ziahna hi diary hrang hlak a nia, a kum a inang lo bawk. A awmzia chu kum1 vel lek i nih laiin i nuin pasal a nei tihna a ni mai. I pa diktak anga i ngaih kha" a ti a, a nih chuan engatinge tuman engmah min hrilh loh niang le? Ka pa chhungte pawh khan min ngaithei hauh lo chung khan sawi an nei ngai mang si lova, a awihawm loh kual vek a nih ber hi a.

"Tuman thudik tak min hrilh ngai lova, a thawi pawhin an sawichhuak ngai lo. Ka nu leh pate inneih thlalak ka hmuh theih chinah ka lang ve lo hrim hrim a, ka nutei khan a thih dawnah takngial pawh pa dang ka neih thu a sawi lo" ka tih chuan "I pa khan ka fa a ni tiin a sawi che alawm. Hei hi chhiar rawh" tih pahin diary kar aţang chuan lehkhathawn ni awm tak a phawrh a, min hmehbel nghal chawt chawt bawk. 

"Ka pa hian bawm ro deuh a nei ţhin a, a inkalh tlat a, hawn enah kan en ngai lo. Mahse hriatchian duh ka neih hnu kha chuan kha bawm kha ka ngaihtuah chhuak a, midang hriat lohin ka zawng a, a kalhna ka chhu chhia a, bawm lian lo te a nia, chumi chhungah chuan lehkhathawn a lo awm nual a, diary kha chu lehkhabu hlui kan dahna hmun a ka chhar ka tih tawh kha. Kum tam tak chhung bawm a a lo khung ţhat tawh chuan a tan a hlu hle tihna a ni mai. I nu kha a hmangaih tak tak niin ka hria" a ti dam diai a, lehkhathawn chu ka en a, a tawp lam ka chhiar hmasa a, ka nu hming a chuang kalh mai. 

"Engtin nge kum tam tak chhung a dahţhat theih zawk a? In hriat pui miah loh lehnghalin?" ka tih chuan "Tu te pawh hian thawnthu kan nei a, chutih rual chuan midang hriat atana kan duh ve hauh loh thuruk kan kawl far bawk a" a tih laia lehkha tlang ka lo zut chu "Dim rawh aw a thler awlsam tawh dawn a nia" a lo ti thuai a. 

"Ih maw..Zote, ka pa hian i nu kha a hmangaih tak tak niin ka hria. Kha lehkhaah khan i nu khan a vuina thu pakhatmah a ziak lo. An dinhmun harsat zia a ziak lang a, i nu khan nupui nei lai ka pa hi a ngaizawng a nih hmel. An chesual a, a rai a, innei thei dinhmunah an ding lo bawk. Chuan i pa, mifel tak khan faah a pawm thlap che a, chu chu midang hnena a sawi dan a ni. A fa i nih thu a sawi a, i nu nen an innei thuai reng a, chuvang chu aniang miin a fa tak i ni lo an tih miah loh. Ka fa a ni lo chu ti se tuemaw talin an hrilh ang che. Lehkhaah khan i nu khan a sawi chiang viau a sin" a tih chuan lehkha phek bawk chu ka en leh a, ka la upa vak lo nachungin ka pian lai bawr vel khan mobile phone te a la awm dawn lova, mi nazawngin land line an la nei dawn lo bawk a, lehkhathawn hi inchhai nan leh thu inhrilh tawn nan a an tawk tarh ber a ni dawn hrim hrim a, a chhunga thu awmte chu engpawh lo nise ka nu kutziak ni ngei tur ka hmu leh chuan lung a ti chhia a, ka khawhmuh a phe ruai a, ka mittui a tlak loh nan mit ka khap fak fak a. 

Awmtei sawi ang chiah khan a inziak a, ka pa hming pawh a tluan lovin a ziak tel a, ka nutein ka pa a sawi changa a hming a lam dan ţhin ang chiah a ni. Ka nu chuan amah ngaihtuah lo turin a hrilh mawlh mawlh a, ka pa fel zia leh a fa ka nih tawh thu thlengin a ziak lang a, an inkar thu chipchiar takin a ziak lo na a a thu ziah kal hmangah engkim a hriat theih thung. Hei hi siam chawp mai mai a ni lo a nih chuan Awmtei pa hi ka pa diktak a ni tihna a ni mai. 

"Engtin nge he lehkha hi a vawnţhat reng theih?" ka ti leh hram a, ka la ringhlel deuh tlat a ni. 

"Movie ah te pawh i hmu ngai lo em ni?" a ti fiamthu a, ka nui lui thei thlawt lo lehnghal a. 

"Box uluk deuh bik a nei ka tih tawh kha. A dah mai mai ngai hleinem, kan hmuh laiin a hawng ngai lo bawk a, an hunlai khan tunlai angin thil tih dan tur google zung zung thei ve lo mah se he lehkha vawn ţhat reng theih dan hi a dap ruai reng tho ang. Chuti chung chuan a chhe viau tawh tho chu a nih hi. Ti hian engkim i hrethiam tawh em?" a tih chuan lu ka lo bu zeuh a, ka lu a hai muai muai thei hialin ka hria. 

Diary a thu inziak awmchhunah lah chuan ka nu nen a kan hming a lang fo a, ka pa a nih tak tak chuan engatinge min rawn zawn miah loh tih lai hi ka hriatthiam loh awmchhun chu a ni. 

"A mak i ti em?" a tih chuan "A awihawm loh zawk. Ka chunga thil thleng chu ni lo se ka awih hauh lo ang. Hetiang thil hi a thlen theih ka ring lo hrim hrim. Midang chungah hian a thleng ve ţhin angem le?" ka lo ti hnual raih a. 

"Thleng ţhin e..tar hnua nufa inhmu chhuak chauh te pawh an awm alawm. Pafa ang tak tak a lo awm tawh, loh theih loh a inţhen, kum tam tak hnua inhmu leh te an awm a, movie pawh an siam phah hial kha. Khawvelah hian thleng thei lo pawh a awm lo a nih hi. Mak tak a ni..thil mak tak tak a thleng a, han awih lo ngawt dawn ila a thleng miau mai bawk si a, kan nu leh pate thuruk kan haichhuak a, chutih rual chuan thudik kan hriat phah a, unau kan inchharchhuak bawk a" a ti a, "DNA test chu i duh em?" a tih chuan lu ka thing a, ţul ka ti tawh tlat lo. Ka nu'n Awmtei pa a thlahna lehkhaah hian chiang takin a lang a, hei hi an inbiak tawpna ber a ni tih a hriat theih bawk. 

"Engpawh nise chhuak phawt teh ang. Inpa kha a ngaih a ţhat loh hmel ropui mai si a, kan awm rei lutuk chuan keimah bawk a nia min hauh dawn ni. Nidangah kan sawi zawm leh dawn nia. Ka pa pawh rawn hmuh kher a ngai lo. ICU ah an dah lehnghal a, ţul i tih loh chuan hmu kher duh suh, ka phut lui hauh lo che a nia aw" a ti a, ka kut a vuan leh a, ka la sawn duh ta bik lo. 

"I chanchin tlem ka hre ve a, ka hriat chhun pawh tawrhna lam hlir a ni. Ka khawngaih khawp mai che. Mahse Pathianin kawppui ţha deuh a pe che a, Hmangaihsanga rilru ngheh zia chu ka hria alawm. A kalsan tawh hnuah a let tawh ngai hauh lo bawk a, hlim deuhin awm ve tawh rawh. I phu ve tawh alawm. Ka lo tlawh zeuh zeuh dawn che nia" a tih chuan "Vaipa kha pawisa vanga nei i ni tiraw? Kimkima hnen aţangin ka lo hria a?" ka ti chhuak thawr a, ka zawhna teh thut chuan a ti hamhaih deuh niin ka hria. 

"Ni e..pawisa hi kan damchhan alawm" a ti hmiah a, hmui a chip zui hmak a, chuti chung chuan "In tlachhia a, retheih i hlau a, chuvang chuan vaipa, i hmangaih miah loh i nei a" ka ti leh a, a lo ţhen sak mai. 

"Ka nei tawh hleinem. Nakinah kan la sawi leh dawn nia. Chuan Kimkima thusawi zawng zawng ring duh suh, ka chungchang ah chuan thudik a sawi ve a ni maithei a, mahse mi dawheh, hmeichhia ai pawh a ţawngthei a nih hi. Neihkimi hmang ţangkaiin a inla lian a, engmah a ni lo a nia. Dawt hmang hian eizawn theih se chu a hausa tawh ngawt ang. Thil dangah chuan ring viau duh suh. Thil dang sawi a neih chuan thudik a sawi leh sawi loh hriat nan min hrilh hmasa zel ang che" a ti charh charh a, "Nih leh tun a kan thil tawn mek hi i nu'n a hre tawh em? I pa leh ka nu chungchang hi a hre ve tawh em?" ka lo ti a, ka thu hriat ho khan min ţhawng a, ka ngaihtuahna a ti buai a, chuti chung chuan zawhna ka ngah viau tho chu a nih hi. 

"Hre lo..mahse ka hrilh ang. Thil ka hriatchian lehzual phah thei a, i la hmin zan lo tih ka hria alawm. Mahse ka nu'n hriat a lo nei a nih chuan nangpawh i hmin ve mai ang. Nu hmun lo mah ni ila keichuan unau kan niah ka ngai a, ka nau angah ka ngai hmak tawh che. Zawi zawiin i la pawm thiam ve mai ang" a ti a, ka la pawm theih ka beisei, a sawi ang khan tunah chuan mumang ang ruai vek a la nia, chiang kuarh tawh mah se ka hmin thei rih tlat lo. Ka fimkhur lutuk vang te pawh a ni mahna. 

Inhnuaia kan chhuk chuan Neihkimi leh Kimkima te pawh an lo awm a, sawi lai mek mekin. Hmangaihsanga chu ka pu bulah Bawiha nen an ţhu a, a la inthlak bawk si lo, a ţhu tum deuh bur ti ila a dik ber ang. Tunah pawh min melh khui a, a chang chuan a naupangchhia ve thei a nia. An ep chiahah Neihkimi te an ţhu a, Kimkima min lo melh dan chu a tenawm leh tawh khawp mai. 

"Teh hlawl che u chuan! In sawi dun ta em ni?" awmze nei deuh a Neihkimin a lo tih chuan "A ni mai ang chu. A chiang vek tawh alawm" Awmtein a lo ti nghat a. 

"A ţhat chu..chaw ei ve nghal rawh aw" a tih chuan "Nidangah a ni mai. Ka nu ka thlak dawn a, ka let lehnghal zawk mai ang" a tih laiin Kimkima chu "Eng nge in lo sawidun vel a" tiin a lo inrawlh a. 

"Kan duh duh kan sawi ve bawk ang chu mawle. Mi chanchin hi lo ngaihven hawrh zel lo teh. Ţhiante pawn Kimkimi an tih tawh che kha aw" a ti hmarh hmarh a, Neihkimi mitmei pawh a veng chuang lo. Kimkima lah chu ngeiawm deuh hian a lo nui sawng a. 

"Hnam dang nupui ho hian mizoţawng an thiam thei riau mai" a ti a, Neihkimin a nghawk zeuh pawh chu ka lo hmu reng a. 

"Bialnu emaw nupui te thawhchhuah hmanga inlak len hi mipa tam tak chuan zahah an la tawh lo. Hnathawk peih lo ho hian an ching lehzual a, hmeichhe chawmhlawm nih te chu a zahthlak tehlul nen" a tih lai chuan lo pawt chatin "Ka thlah ang che" ka ti a, ka chhuahpui ta daih a. 

"Kha kha a ni mai a mizia chu. Zam lo ka inti ve hle a nia, kei aiin a zam lo a, a zak lo bawk. A lerh rapthlak lehnghal a, tupawn a zia kan hrevek a, kan ti lang lova, kan sawi lo bawk a, heivang hian kan hre lo emaw a tia, ţawngkam leh engkimah fimkhur viau ang che" a ti hmawk hmawk a, "Lo leng leh thuai rawh aw" ka ti ve ngei a, a tlan liam thlengin ka thlir zui a, hmeichhe nasa, lamţang atana ţha an tih ang chi mah nise ka unaunu ni thut thei a nia, ngainat ka tum ngei chu a ngai ang. 

Zanah balcony ah kan nupa in kan ding dun a, kan inpawh hma hauh aţangin thla eng thlir dun kan ching a, thla nen hian inzawmna thuk tak kan nei niin ka hre tawh. Kan thlir apiang hian mawi deuhin êng a chhuah ţhin a, kan nupa hian min duhsak bik a nih ka ring. 

"Awmtei nen khan eng nge in sawi?" min kuah pah hian a ti a, keiin ka âwm ka lo veng ru ran thung a, a lo hrethiam leh hman vek aniang a nuih a za emai. 

Thil awmdan zawng zawng ka sawi a, a tawp khar nan "A awihawm loh e tiraw?" ka ti tel hram a. 

"A ni ve thei tho" a tih chuan "Mahse ka nu pawh khan thudik a hre awm reng sia, min hrilh ve tur a nia" tih pahin ka ngheng a, ka ham zui bai bai a. 

"I mut a chhuak leh der tawh elo?" nuihza aw zet hian a lo ti a, "Aw, ka mut a chhuak reng zel. Ka mutthilh san hma thei che i ti em?" ka ti a, tunlai tak phei chu mut ka duh zual riau a. 

"A pawi hleinem. Awmtei thusawi chu a dik tak tak a nih chuan i pa hmu tur a i la kal ve ngei a ngai dawn a nih chu" a ti nghet charh a, hnial chi a ni lo tih hriain "Ni e..remchang hmasa berah" ka lo ti a, a ruk tak chuan ka hmu hreh khawp mai. 

Dimtea ka dul rawn khawih pah hian "A ngai reng..a puar thei lo" a ti sup a, ka lo nui hak a. 

"A la rei loh em hi..nakinah chuan i duh bak bak a lianin a la puar dawn alawm. Raipuar len tak tak chuan kan kal ţuang ţuang zel mai a nia" ka ti a, a puar tak tak hun a nghakhlel khawp mai. 

"Inhnuaiah khuan pindan siam dan awm se. Kailawh zawh reng chuan chetsual palh a hlauhawm tlat" a ti a, duh chuan kan in hi a la zauh theih lutuk a, mahse "A ngai lo..ka fimkhur mai dawn alawm. Bakah i awm tho a, min veng hneh dawn e" tih pahin ka melh chho a, lungawi hmel deuh hian min lo en let a, nupa chu fate hian min phuar nghet zual a, Bawiha awm tho mah se a fa a ni tlat lo a, chuvang tak chuan nau ka pai hma hi rei tak ka biak tawh loh Pathian hnenah lawmthu ka sawi hial a ni. Ka rai hnu hian kan inpawh lehzual tih ka hrechiang hle bawk.

"Bawiha hi Ruattei bulah a riak reng a a inthlahrun e" khum a lawn kai pah a ka tih chuan "A lawm zawk daih ang. Puipuia a haw tawh a, Taitei a insawn chhuak tawh bawk a" a lo ti then a. 

"A thawmhnaw bawm te hi lak phei a duh a, ka lo hnial a. Bawiha hian a phuar lutuk anga a duh ang a tih ve theih loh te ka hlau a" ka ti a, a inthlahrunawm duh tak tak a ni. 

"Ngaihtuah suh ţhian a kawm peih vak lo" a lo ti mai a, ka bula a lo mut ve rual chuan ka lo insiamrem a, ka dul zawna min lo kuah lai chuan "Ka âwm zawnah hi chuan min kuah suh aw" ka lo ti vat a, "Ka hria" a ti sup a, a nuih a zat hmel em em mai lehnghal. 

"Khua hi a lum tawh i ti em?" ka tih chuan "Umm" a lo ti leh ringawt a, "Khawvel hi a chhe tawh aniang, khaw vawh chhung a rei lo thei emai. Tui a hal duh bawk si" ka tih chuan "Tui i duh mi?" a lo ti vat a, a tho kang nghal uaih bawk. 

"Duh chuang lo e. Vawiin khan Awmtei a lokal a, i lo haw hun tur zawh nachang che ka hre lo a, mah se ka mamawh ang chu i lo lei ziah tho a" ka ti a, rai laia eichak neih hi chu a buaithlak a ni. Kan chak huam huam a, min tur et et ka ti mai. 

"Eng nge sawi i tum?" a ti a, a aw a dam thlup a, min laksak mai a inpeih at reng niin ka hria.

"Ice cream ka ei chak deuh a, zanin takah ka chak dawn tih ka hre lawk hauh lo a nia" ka tih chuan "Ka zu la ang" a ti nghal mai a.

"Naa..ka ei zo vek tawh" ka tih rual chuan sana a en nghal vut a, "I eichak leh reng dawn sia, Nu Hmingpuii te ka va hawn tir ang. A la tlaichhe chuang lo" tih leh thawh a rual a, rilruah a awm tlet tlet a, ka inthlahrung bik ta lo mai. 

Kan ţhenawm a dawr nei te chu a va kaitho thei ta aniang ice cream pawh ka ei thei ta a, chak lutuk phei chuan a lo tui bik em em mai lehnghal a, ka thil ei lai chu uluk deuhin min lo en a, "Eng nge?" ka tih chuan lu thing nghutin a nui suk a. 

Awmtei lokal aţanga ni hnih hnu velah a pa thih thu min rawn hrilh a, ka hmuh hma a a thih avang chuan pawi ka ti ve deuh a, hmuh chakna ka nei ve tawh miau a ni. Mahse tawrhna leh hrehawm tihna ka nei lova, han lungngaih vak ngaihna pawh ka hre lo. 

Neihkimi te chuan "ICU a an dah kha chuan a daih rei ka ring tawh lo hrim hrim a, natna a ngah em a, rin ai takin a fei zawk a" an ti mai a, kal ve an tum hlawm a, "Ka insiam anga in rualin ka lokal ve ang" ka tih chuan min en ţhap a, "Ka pa a lo ni thut thei a, a hmel ka hmu ve reng reng ang chu" ka lo ti a, min han hnial ve ngial hlawm tak nain ka tum lui tlat a, tih vak ngaihna an hre hlawm lo. 

Awmtei te inah chuan ka kal ngei a, min hruai leh vat thung. A pa hmel pawh kha ka hmu a, mahse han danglam vakna ka nei hran lo. A thih hma lawkah ka pa a nih thu ka hria a, chupawh chiang lo deuh lehnghalin. Vawikhatmah a aw ka hre lova, eng ang mizia nge a neih pawh ka hre lo. Ka rilruah chuan a cham zui ngei a, ka hmuh hnuah pawh tawrhna ang kha a awm chuang lo. Ka pian dan mumal lo lutuk hian min ti chawmawlh zo te pawh a ni mahna. Tihian tun a ka chhungkua ni mek te hi lawm takin ka pawm ang a, ka neihah ka lungawi ang a, thil dang intihbuai tir ka tum tawh lo. Ka thil tawn tawh leh paltlang tawh zawng zawng te hian chhelna min pe a, hlimna ka chhar ţan leh mek bawk a, boruak dang ka mamawh tawh lo khawp mai. 

Ni a liam ve zel a, luak chhuak te ka hre chho a, a hrehawm ve viau zel. Bawngsa rim ka ngaithei der lova, ka chhungte pawh hian an duh viau na a keimah vangin an hmeh ngai ta lova, "Ka hriat lohin ei mai rawh u" ti mah ila "I hne loh hunah kan la ei ho leh dawn nia" an ti mai zel a, inhriatthiam tawnna mai bakah sawi chhuak lo mah ila thinlung taka inngaihdam tawnna kan neih aţang chuan inchhung hi a nuam sawt a, chhungkaw dang ka awt tawh bik lo. 

Neihkimi pawh a danglam a, ka nu boral aţanga inţan a ni. Ka inchhir a, ka ngaidam bawk che u a ti hauh lo mah se a inchhir a, a nu chunga ka nu chet dan te kha hre ran tawh lovin a pawm thiam tawh a, a ngaidam thlap tawh tih chiang takin a hriat theih thung a ni. 

Ka pu pawh a la awm ve ta reng a, rin ai takin kan inpawh a, chhuna hnathawka an chhuah vek hlan te hian a tlangval lai chanchin te min hrilh ţhin a, ngaihnawm ka ti viau zel. 

Taitei chu nitin a chhuak a, in lamah lah nise chanchinbu hlui chep chhiain a inchap darh nuai reng a, a zirlaiah a tuiin a chhuak tur pawh a phur thei khawp mai. 

A tho hma tuktin a, tho hma kan intih ve viau pawn chaw a lo chhum hmin der tawh zel. 

Tunah pawh cooker a suan mek laiin ka lut a, min lo nuih ver ver a, "Thingpui i duh em? Nge coffee zawk? Tukin chu U Hmangaihsanga a tho hma lo a, a damlo em ni?" a lo ti sawk sawk a, "Thingpui a ni mai. Nizan ka nuam lo deuh a, a mu lo ve zel a" ka tih chuan "U Zotei chu pasal i nei fuh ve ngawt mai. I pasal ni lo se chu aw ka star hrim hrim ang" a ti reuh a, zak hmel a la pu duh miah lo zui a. 

"Akhaih..unau in nih hi" ka lo ti fiamthu a, "Nu leh pate inţhianţhat vang alawm" a ti a, a thutak phian mai. Zep nei lem lo chi a ni ve ah ka ngai a, ka sawi zui pui zel duh ta lo a. 

"Bawiha chu Ruattein a hruai chhuak a nia aw, ka ni te inah kan kal dawn a ti" a tih chuan "Ruattei te an tho tawh maw?" ka lo ti hluai a. 

"Aw an tho hma lutuk. Siampuii a la tho lo thung a" a tih chuan ka bu nghat a, thingpui ka inzawh veleh no ka sil a, Siampuii pindan lamah ka kal a. 

"Tukin chu i tho peih meuh nange?" bawkkhupin a lo mu a, khum tlanga ţhuin a hnungzangah ka dawm a. 

"Aw..ka nuam lo ve deuh a, Taitei a awm tho a ka tia, ka lo tho dawn mi?" inthlahrun hmel taka a tih chuan "A ngai lo, tih tur a awm hleinem. I eng nge na a? Damdawi te i ei em?" ka tih leh chuan ka malchungah a rawn bawk ta mai a, "U Neihkimi te hrilh lo la maw, ka nu leh pate an inţhen a, an ti mak ka ti. Upa ber ka nia,retheih ka hlau a, mahni in lumah pawh awm lovin ti hian mi inah ka inhlawh a, anni tal chu ţha deuh a lo awm tur a nia. Nu leh pa an inţhen chiah hi chuan fate zawk hi kan rum vawng vawng ni berin ka hria" a ti bawrh bawrh a, hnem ka tum ve ngial a, ka vel ţap a ni ringawt zawk a, inţhen tak hi chu a ţha lo khawp mai. Keipawh loh theih lohin ka pasal hmasa ka ţhen a, Hmangaihsanga nen hian intawng lo phei ila chu ka fapa hi kei aiin a rethei zawk daih ang. A fel em a, kei aia hmeichhe ţha an tam dawn tehreng nen min vuan tlat a, a rilru a nghet a, a nghing ve mai mai ngai lo bawk. Tun aia nasa hian hmangaih thei ila ka ti fo mai. 

"Tikhan mu rih rawh..nakinah eitur ka lo pe dawn che nia. Taitei nen kan awm a inchhung chu ngaihtuah duh suh" ka tih hnuah ka chhuahsan a. 

Choka a ka luh leh hnu lawkah ka pasal a lo lut ve a, "Khaw nge Bawiha?" a tih chuan Taitei zawkin a lo chhang a, "Thingpui aw..chaw ei hun a la hla" ka lo ti ve thung a. 

"U Hmangaihsang hei hi min lo ensak lawk teh" a tih chuan "Eng nge ni?" a lo ti ve vat a. 

"Hei puanţhui zir naa ka ţhiannu fanu a nia, a taksa hi ti hian a bawl vak a, i u lo zawt teh a tia" a ti a, amah si chetin a va ţhu a, phone chu an bih dun a, thingpui vil pahin ka lo thlir reng a, ka hriat laia a huat loh zia a sawi hnua a hnaih nghal mai ngam te chu mak ka tia, hmeichhe rau rau pawh a lo in an loh theih khawp mai. Kei lah hi kimki dûk chi ka nia, ka pasal hi lerh se chu hmeichhe dangin an thlem thlu hma ngawt ang. 

Taitei chuan a be ţha tial tial emaw tih mai tur a nia, Siampuii nunphung a pangngai chho a, a pui thei vek chung pawhin rawngbawl a chuh tlat zel a, Hmangaihsanga thawh hmain a tho a, a lo chiau au tu ber a ni ţhin a, ka pu leh Neihkimi te pawh a duat thiam a, a awmdanah chuan an lung a awi hmel hlawm ţhin khawp mai. 

"U Zote choka ah hi chuan lo lut ve duh kher ţhin suh, in dim la, i eitur chu ka lo siam vek mai dawn alawm" a ti dam diai a, kekawr bul chhing tawi a ha a, kawr bah a ha leh tawp a, "I mu tho ila inthlak lo em ni?" ka tih chuan "Aw ka rawngbawl hi tui an ti thei sia, tukin chu thawh ka hai a" a lo ti mai a. 

"Va inthlak rawh ka lo vil ang" ti mah ila "A ngai lo..nakinah ka inthlak mai ang" a ti tlat a, Hmangaihsanga exer la haw lo lut chu "Ka thil siam saw lo en teh" tih hluai pahin a lo kuah thuak thuak a, "Ka thlan nasa a nia" tiin pakhat lah inlakhran a lo tum ve bawk a, a rilru put hmang lantir huau lo mah se hmuh hrehawm chang a tam khawp mai. 

Ka tho tharh a, pindanah ka chho ta daih a, Bawiha leh Ruattei lo awmin an inthlak vel mek a, "I nuam nange?" Ruattein a lo tih chuan "Ka ţha alawm" ka ti mai a, ka thin a rim ru ţeuh thung. 

Bawiha chuan min rawn bawh thut a, inveng hman lo phei ila chu a na viau ang. 

"Khatin ti thut thut zel suh ka tih kha" tih pahin a kawr ka phelh sak a, a hak tur ni awm tak chu Ruattein a rawn vawm phei nghal vat bawk a. 

Hmangaihsanga lo lut te chu ka lo ngaihven peih lo, Bawiha a fiam luam a, kan inneih tak hnu ngat phei hi chuan an in ngaina lehzual viau tawh. 

Ruattei te an chhuah hnua min kuah mai a tum chu "Kal teh i thlan kha" ka lo ti hmak a, a nui hawk thawm te chuan min ti thinrim telh telh ni maiin ka hria. 

"I tho fuh nange?" tih pahin ka hnungah a rawn ţhu a, rawn kun hnaiin min rawn thlek vel a, "I lungawi lo em ni?" a tih te chuan ka tum hmak a, ka haw laklawh tlat tawh. Hmeichhe dang pawh nise an thin a rim ve tho ang. 

"Choka ah khan awm reng ta che. Rawn chhoh kher a ngai em ni?" ka ti vin hlar a, "Taitei i thik ve deuh tihna mi?" nuihza aw tak hian a ti a, "Lo hawi teh" a tih leh hnu pawh a ka hawi let duh loh avang chuan amah zawk chu insawnin ka hmaah a rawn ţhu a. 

"I thik tiraw?" a ti nawn leh a, thik ka nei ve chu a awih chiah lo a ang khawp mai. 

"Chutiang te inzawh a ngai em ni?" ka ti hlak a, nuihza hmel a la pu reng a, a lawm zawk em maw ni. 

"Ka thlan tih kha chu chhuanlam a nih kha. Ka nupui chu ka kuah thei reng" tih vel pahin a ban a phar a, ka lo kuah duh lo thung a.

"I thinrim lai pawn i hmelţha tho a nih hi" tih pahin ka hmui a rawn tawk zauh a, nuihza hmel a la pu reng chu ngaithei lovin "Min fiam daih lo mai teh aw" ka lo la ti hlar a. 

"I thinrim lai pawn i hmelţha tho a nih hi" thutak deuh zawk hian a ti leh a, "Ka ngaithei lo alawm. Kawrbah pan hling hleng leh kekawr bul tui nen a vei reng a, tu emaw thlem tum ni awm takin kawr hnuai a la ha lo zui" ka ti ve ta nge nge a. 

"Taitei chu ka nau alawm" a ti then a, pheikhawk phelh tuma a kun chu "U angin a en ve lo che, i hmu thiam ve mai lo em ni a?" tih pahin a hnungah ka beng thlawp a, a nuih a la za em em zui a. 

"A rilru put hmang chu a hriat vek alawm. Fel chu ka ti ve tho a, mahse a endan che hi ka duh lo. Kuah pah chein a awmin a nek kher zel bawk che a" ka tih chuan a ţhu ţha a, ka dar tawn tawnah dawmin ka mitah a en a, tur deuh khaiin ka lo melh ve bawk. 

"Engtin pawn awm se ka danglam dawn lo. Nupui ka nei tawh a, hei naute kan la nei dawn bawk a" a ti a, a kut pakhat zawk chuan rem lo deuhin ka dul a khawih a, min dim viau thung. 

"Ka rinawm loh san lovang che. Mipa ka nia, ka thutiam ka hrechiang bawk. I uire a nih loh chuan ka ţhen lovang che" nghet charh hian a ti a, ka thinrimna te kha an bo nghal duak ni maiin ka hria. A mitmeng leh hmel a tih takna awm chu ka hmuh hmaih tlat lo a ni. 

"I mit ti kham khawp a kan awm a nih chuan kan thiam loh a nia, kei tal ka lo fimkhur tawh dawn nia" a tih phei chuan ka nui veleh thei tawh a, ka zei ve lo tih ka hria a, mipa han lem vak chi ka ni lo bawk a, heivang tak hian hlauhthawnna a awm ve ţhin. 

💛

Chawn tha chat bawkin min ti harh leh tawh a, "Tho teh" tih pahin Hmangaihsanga ka ban a, koh nawn pawh a ngai lo. A ţhut chhuah rualin ka ke a dawm a, min buaipui lai te chuan "A na..a na lutuk a nia" ka lo ti leh ţhin a, thla li na kan chuang kai ve tawh a, ka dul pawh tlemin a puar ve tawh. A hrehawm zualpui a zo tawh e ka ti hman tawh a, mahse ka chawn tha a chat fo a, a na thei em em mai lehnghal. 

Ka inthlah dul hnu chuan "A zia em?" a ti a,ka ke ka tih chet kual vel hnuah "Aw zia e..ka ning a nia, a na thei ropui si" ka lo ti bak hlar a, mutchhuak zawng zawng a reh vek thei zel mai. 

"I ke hi a vung deuh a nih hi..i hria em?" a tih chuan ka inbeng a, ka ke vung chu hre sa reng mah ila ka hmuh rual chuan ka ner sak a. 

"Min la ti hrehawm lem lo a, ka ngaipawimawh lo a nih kha" ka tih hnu chuan reilote a hmet a, ka bulah a rawn mu leh a. 

Ka dul puar ve ak tawh chu a chul a, "Rai tak tak i ang ve tawh" te min ti thul, a la lian hauh lo a, kawr lian hnek hnuk hak phei chuan ka rai tih pawh a hriat loh, chuti chung chuan a phur em em reng tho a, "Kan naute hi eng tiat vel nge a nih tawh ang aw" te a tia, Sangzuala ka neih lai hun nen ka khaikhin fo a, engkimah a inthlau a, ka awmna hmasa nen a in nawm hleih takzet a ni. Ka pasalin min duat a, a unaute an fel bawk si, ka ni Biakengi ten min rawn ngaihven reng bawk a, hlu riau a inhriat changte ka nei ve tawh a, zing thawh huphurh viau ţhin khan hlimnain min hmuak dawn tih hriain phur deuhin ka tho ve thei tawh a, Rb-a sawi kha ka hrereng mai, khawvel hi a mum a, kan ngaihven loh lai pawhin a vir reng a, ka tan a hun ţha a rawn herchhuak ve mek niah ka ngai a, dam thlahlel hauh lovin ka nung ve hram hram zel a, tunah chuan dam nawm zia ka hre ve tawh. 

"I dul a puar deuh hian a hrehawm em? I hrehawm phal lo mah ila a insiampum hma chuan ka phawrh tir ngawt phal bik si lova" a tih chuan ka lo nui hak a, "Hrehawm mah se ka tuar hram hram mai aniang chu. Thla 9 hnuah naute hmelţha deuh kan nei mai dawn alawm. Mipa nge hmeichhia i duh?" ti a zawh pahin a lam ka hawi a, ani chuan ka dul ngawt a lo la en thung a. 

"Ka duh ve ve..mipa emaw hmeichhia pawh nise ka lawm vek ang" zawi sup hian a ti a, a pian hma hauh aţangin hlimna min thlen a, tu te pawn kan nghakhlel vek a, vanduaina tawk lova tluang deuh a ka neih theih ka beisei tlat a ni. 

💛

Chhun a Bawiha leh ka pu te nen tv kan en laiin Thiangin min rawn call a, "U Zote kalsawn deuh teh aw" mangan hmel zet a a rawn tih chuan chhuanlam siamin pawnah ka chhuak a. 

"Eng nge ni a? I va mangan hmel ve" ka tih chuan "I nu Chhuani leh Pu Rama ten U Sangtea pawisa puk an dil ţhin a nia aw. A sawi ngai em? Nu Chhuani te chuan Pa Sawma bulah an lo sawi aniang a ngaihdan ni lovin a sawichhuak a, hei Rinrini leh Muanpuii te pawh an zak lutuk. Pa Sawma phei chuan hmuh pawh kan hmu ngam tawh dawn mi a tia" a rawn ti bawrh bawrh a, ka bangbo kher mai. 

"Ka la hre miah hleinem. Hmangaihsangan a sawi ngai bawk si lo a, eng atan nge pawisa puk an dil a?" ka tih chuan "Inhmun lei a chhungkua a awm ho theihna tur a insak an duh a tia Pa Sawma hi chuan" a ti a, kan inneih hma aţang tawh khan hetiang thil hi chu a thlen ka ring hrim hrim. 

"Chutiang leina tur zat te chu a pe tawp thei bik nang. An ti ang lo emai, naktukah ka lokal ang a kan sawi ţha dawn nia. Zanah kan pa pawh ka lo ti ti pui ang" ka ti a, kan inbiakna chu kan ti tawp rih a, kan inneih dawn te khan an phur hawrh hlawm ka ti reng a, tum an lo neih sa vang mai mai a nih dawn hi. Ka tan a a zahthlak dawn tih an hre awm reng sia. Naupang engmah ti thei loah min la ngai a ni phawt ang a, mahse an duh duh a inchinleh tir ka tum tawh hauh lo.

CONT..