KA HRINGNUN THAWNTHU-LAST

KA HRINGNUN THAWNTHU-38 (LAST)

"U Zotei nau neih hun chu keiman ka riahpui ang. Nau khawih vel ka thiam ber a, ka ute ho hi chu an rintlak loh" phur fe hian Ruattei chuan a ti zat zat a, "Nia keichu ka thiam ve lo ang. Engmah hi ka dim thiam ve bawk si lova" tiin Zamtei a pha nghal thung a. 

Tunlai phei chu min ngaihsak zual ţheuh emaw tih tur a nia, zun chhuak reng hi a ninawm e tih lohah chuan hun ka hmang nuam ţhin khawp mai. Bawihan min tihbuai a min tih nat palh te an hlau a, toys leh thawmhnaw lah an leisak awl lo a, kei ai mahin an duat zawk emaw tih tur a ni. 

Hauh a ngaih ţum a kan han hauh te hian an khawngaih ţhin tih kan hrereng a, mahse Hmangaihsanga hian kan hauh lai chuan midangin a thlavang an lo hauh a phal ngai lova, ţan tlan tur a ti ţhin. Bawiha pawh a la nauin tih a nuam a, thu a la awih ve rih khawp mai. 

"Mipa a nih ring a maw?" tiin Neihkimin a lo zawt ve khauh a, a sawi peih em a, Hruaitea te ho pawn a i fapa lo piang tur an han ti deuh kher zel a. 

"A nih ka ring..mipa a nih rinna lian deuh ka nei tlat a" nui ruh ruh chung hian a ti a, "Mampuia kan tia nga" tih leh supin ka dul a rawn khawih a, a farnu te chuan an lo nuih kar kar a. 

"Mawl e..mipa ni ang ti ve ringawt a, a hmu thei tawp si lo a" fiah mang lo a tih pah hian U Remremi pawh a nui ve reng mai. Kuangkuah hlan hian kan nupa che vel chu min thlir a, "Ka nupui hi chu ka duat a nia, ka pawm hle hle mai dawn mawni" uang zet a tih paha Hmangaihsangan min han kuah vel te chuan a lo ner nang nang ţhin a, U Remremi runhluih vel hi chu nuam a ti ve hrim hrim. 

"An zak lo e" tih pahin min han kawk a, a hmui hupin a nui tet tet bawk a, "I duat angem?" kan tih chuan lai deuh hian "Ka duat peih vel lo e a..hmelchhe awm ropui si" a ti hlak hlak a, kan lo nuihpui hak hak a. 

Kan han mu chu zan dang ang lo takin ka pang delh a nuam lo zel a, ka inlet sek a, a tawpah phei chuan ka pasal hnungchhawn zawngin ka mu ta nge nge a. 

"I nuam deuh em?" thum dût a tih pahin hnunglam aţang chuan min kuah hlu hlu a.

"Aw..a nuam mai ang. Nakin lawkah ka zun a chhuak leh ang a, thawh leh vat a ngai tho ang" ka tih chuan ka tukhumah a fawp a, hetianga min han kuah a, a taksa lum han sik hi a thlamuanthlak bik riau hian ka hria a, ka kim hliah hliah bik ni maiin ka hria. 

"Muhil rawh..i zun a chhuah chuan min kaitho mai dawn nia" dam thlup a tih pahin ka kawr chhung a lo zen lut a, "Thil dang chu nin ka nei lo. Thawh a ngai sek hi ka kham tawh lutuk" ka tih chuan a nui nghawr dawt a, sawi tur a hre leh pek lo aniang a lu kân deuhin ka beng a rawn fawp leh ringawt a. 

"Tih vak ngaihna i hre lo a ni maw?" ka tih chuan fan deuh ruih hian "I zun ai zun theih a ni mang si lo a" a ti a, ka nui ta hak hak a. 

"I ti hnem tawh alawm..a reh har tawh dawn lo emai ninawm deuh mahse ka tuar thei lutuk" ka ti zung zung a. 

Zingah a ngai te bawka hnaa kal a ngai a, tunlai tak phei chu min ngaihtuah lehzual viau tawh. 

"Siampui, i u Zotei hi lo vil uluk rawh aw" a ti leh tawh a, Siampuii lahin "Ninawm e..i sawi peih" a lo ti hlak a, an inchah nawn ngun em a ni. 

"Ka ni ten tlaiah chaw rawn ei rawh se an tih che u kha aw. Zotei nau neih hmain lokal ve hrim hrim rawh se" a tih puat puat hnuah Neihkimi chu a kal chhuak zui nghal a. 

"Haw hma theih dan ka ngaihtuah ang a ka rawn hruai ang che. Thil pek tur che a nei aniang a sawi ngun tawh emai" ka kawng a kuah paha a tih chuan ka lo bu nghat nghat a. 

"Kal tawh rawh i tlai lutuk dawn" tih pahin a awmah ka dawm a, midangin min ngaihsak loh lai chu chuhin min han fawp leh zauh a. 

"Ka rawn haw dawn hnaihah Bawiha pawh lo thlak fel ve la, kan hruai ve dawn nia" a ti a, nidang ang bawkin hlim deuhin kan invai liam a. 

Tlaiah min rawn lam a, kan chhungkua chuan Ni Biakengi te inah kan kal a, inchhung kan lut te chu an lo phul hlut a, Hruaitea pawh a lo awm vang tawh. 

"Mampuia pian hmain chaw eikhawm lawk ang u kan tia" an lo ti fiamthu a, Bawiha chu Rinêngin eiturin a lo thlem nghal a, "A sam kir hi ka duh lutuk amaw a ti lawmawm zual tawp a" a ti a, a malchungah ţhuttirin eitur kawr chu a kheh sak nghal bawk a. E

Hmangaihsanga, Hruaitea leh ka pa Chhawna te chu eng eng emaw sawiin an ti ti a, ka ni chuan "Lo kal rawh pindanah chho lawk teh ang. Heng ho hi an ti ti tawh chuan sawi ve tur a vang ţhin emai" a ti a, ka kut a rawn vuan zui zat bawk a. 

An pindan kal tur hian kailawn zawh ve kher a ngai lova, an fate inchung lama an awm laiin an ni chu inhnuaiah an awm thung a, ka tan pawh kal a awlsam khawp mai. 

Pindan a kan luh chuan sofa ah ka ţhu nghal tharh a, ka ni chuan nau puan tam tak hi ka hmaah a rawn dah ruih a, "Neihkimi te ho bulah lo lei suh u keiman ka lei dawn ka tia, chuan hei inpa hnenah i pheikhawk size ka zawt ru a" tih pahin chapal min pe bawk a. 

"I ke a vung nasa sia bun a nawm ka ring a, nau neih rualin ke vung a reh nghal mai ţhin si lo a, i neih hnuah pawh i la bun zel duh ang. Ruattei te unauin an lei nual tawh ka ring a, thil dang han lei vak tur ka hre tawh lo a" a tih chuan "A ngai hleinem..kawr fual min leisak hnem tawh bawk si. Tunah pawh min leisak tho a nih hi ka hak. Nau puan lah i lei hnem ropui si, ka lawm lutuk a nia aw" thutak deuhin ka lo ti a. 

"Ka mo tirh hian hrehawm ka tuar nasa a, lehkhathiam lo ka nia, kan rethei bawk si, i pa Chhawna tan hian kei aia ţha an beisei a, biak pawh an nei hial a, ani'n a duh mang si lova, min nei lui kha a nia. Sual theih tawpin an sual a, chaw eiţhat ngam loh chang te ka nei a, hrehawm ka tawrh nasat lutuk avang khan midang hriatthiamna ka neih phah a" a ti a, "Kan hrehawm tawrhna te hi midangte tan a malsawm naah chantir daih tur a nia" a tih zawm leh a, ka ngaithla uluk khawp mai. 

"Ka tawrhna kha ka hrereng a, mo ka neih ve hunah pawh ka mo chu hrehawm hre miah lovin ka siam ang ka ti ţhin a, keini chhungah chuan mi rethei leh hausa, lehkhathian leh thiam lovin danglamna an nei lo. Tupawh an leng vek a, an inthlahrun kan hlau ţhin. Hei vang hian inleng pawh kan ngah ţhin reng a, nangpawh chu chu hrereng rawh. Hrehawm tam tak i tuar tawh a, i tawrh ang kha midang tawrh tir ve hauh suh. Malsawmnaah chan tir zawk la, i mona te hian inleng an nei ngai mang lova, hei te hi i thlak danglam vek thei a nia. In inchhungah tupawh, mi rethei berh te te thlenga an ngam sarh chuan chhungkaw awhawm tak an ni an la ti mai ang che u. In pa pawh hi kawng tam takah kaihhruai a ngai a, inkhawm tur te, khawhar in kal tur tein i nawr ve ţhin dawn nia. Mite fak rawn mipa te hi an phenah hmeichhia an awm ţhin a, inpa a mawi chuan i mawi a ni mai" a tih hnuah "Naute thawmhnaw lei lawk ka tum ngial a mipa nge hmeichhia a nih dawn ka hre lawk si lova, a pian hunah law law ni teh se" a ti leh daih a, a inzawm lo khawp mai. 

Chaw kan han ei te chu kan eitam loh an hlau hlawm khawp mai a, Bawiha an chhaih fiam deuh reng a, "Mampuia ka hmu chak tawh" an ti deuh reng bawk a, hre lawk hawt si lo hian an mipa chei nghal ringawt a, hmeichhia a nih vaih chuan an hnual hlawm viau maithei a ni. 

Kan haw dawnah ka ni chuan "Zote ka hman leh naktukah ka lokal dawn a nia aw. I nu a awm tawh mang si lova, nau neih hma chu ka lokal zeuh zeuh thei ang" tiin min thlah a, "Lokal ziah tak tak teh?" Hmangaihsangan a lo ti hluai a, ka ni ner nang nang chu ka lo nuih a, an inhmeh tak tak a nia aw. 

"Lo phur hawrh suh nang kha, Siampuii te an awm tho alawm. Ka awm reng kher a ngai em ni?" a ti hlar a, a thin a rim hauh lo thung.

"Siampuii chu a la nau a, thla a muan phah lo. In lamah tih tur i neih loh chuan rawn phei ziah rawh. Ka hruai peih che a, ka thlah ziah peih bawk che" a ti vel a, a insawi ang tak tak khan a tan chuan kan fa hmasaber tur ang a nia, a fimkhurin eng emaw thut a awm a hlau a ni ber. 

"Kal lam chu Hruaitea rual pawn a theih mai ang. Ti daih ila Thiangtei eng nge a an? Polytechnic ah khan a lut thei ta si lova engtin nge a awm zel a?" a ti leh hluai a, ka kawr banah a pawt ţat bawk a. 

"Nakumah ka ti ţha leh ang a tih kha. Tikhan in en lawk dan te pawh a hre ve tawh anga, a tih leh chuan a tling ve mai ang" ka tih chuan thawveng huai hmel a pu a, min kaltir ve thei ta hram bawk a. 

💛

Dam tlan chuan ni pawh kan chhiar liam ve zung zung a, nau neih ka hnaih tawhin Ruattei te unau ngat phei chu an phur tlang a, ka ni Biakengi phei chu nitin deuhthaw a lokal a, kan pa lahin bualin a ka luh ringawt pawn pawnah min veng khur zel a, ka awm rei deuh leh min ko chul a, ka tluk sual palh mawlh a hlau ţhin. 

Ka dul lah chu na ka tih hlauin a chul ţha ngam tawh lova, a hnathawk a lo haw chang a a insum theih loh chuan dimte hian a han khawih a, "Mampuia chu vawiin lam i lo fel em?" a ti ta ţhin a, Siampuii leh Ruattei te mawlh hian an awmdan hi an lawm a, U Remremin a ei lo viau zel thung a. 

"Mampuia pawh ni lo, U Zotei pum a nih kha" a lo ti vin hlur ţhin a, pakhat lahin a'n runluih nghal zat zel bawk a, tlem te chauh kan awm pawhin kan nui thawm a ring viau zel. 

Ka ni lokal loh ni takin Awmtei te nufa an lokal a, kutruaka lokal an hreh ngang aniang chu eitur an lo keng nual a, a nu phei chu a cherin a mitmeng pawh a la ngui riauin ka hria. 

"Ka pu nilum ai saw ka be ve ngei a, min chhang duh lo reng reng" tiin Awmtei chu a rawn nui lut har har a, "Thinrimna a nei aniang. Amah hian a in ngaihtuah thinrim tawp zel a, a lung a awi leh mai ang" ka tih chuan "A tar â deuh tawh a ni maw?" an ti a, an nuih a za viau mai. 

Khawlum lai te hian nilum ka ai dawn a ti tlat zel a, pawn daihlimah te a ţhu daih a, Hmangaihsangan min han duat ve te hian lo thik riau chang a nei a, fimkhur ngaih chang a tam khawp mai. 

"Hmanni ah Ruattei dawrah ka kal a, Zotei nau neih hun chu riahpui ve ila a ţha ang ka ti kha 'A ţul lo keiman ka riahpui dawn. Midang tumah ka ring tawk lo' a ti nghal hlar a, ka nuih a za lutuk a" Awmtei chuan a ti bawrh bawrh a, a nu erawh a la ngawi reng. 

"A hauh lawk bur alawm. Tuman an lan thei teuh lo mai" ka tih chuan "I pa i chhun khawp mai" Awmtei nu chuan a lo ti a, kan nui tawp chiang kher mai. 

"Awmtei nen pawh in anna lai tam tak in nei a, hai theih a ni lo. I nu kha ka hre ve a, dawrah a lokal fo ţhin. I pa nen a an inkar pawh ka hre vek a, an inngaihzawn lai ngei ngei pawh ka hria. I pa kha a lerh em a, i nu lo pawh ngaihzawng tam tak a nei. Ka fate hnenah hian ka sawi duh ngai lova, thil hlui thar thawh leh pawh ka duh chuang lo. A hun lai khan thinrim viau mah ila Awmtei nen in inhmu fuh hlauh chu a lawmawm hle mai. Kan tlangval erawh home ah kan dah a, i pa thih khan a lo chhuak zawk a, a putea te hoin an dah lut lehnghal a" a ti leh duah a, a aw a zawiin a dam thlap a, lungngaih rukna a nei tih erawh hai rual a ni lo. 

"Nia nunhlui sawi sawi a ngai lo. Kum pawh kan thlah liam zel a, nunhlui pawh a liampui ve zel alawm. Ti hian unau kan inchharchhuak a, kan nun hman lehzel tur hi a pawimawh zawk a, nunhlui chu hrereng dawn mah ila ngaihmawh loh tum zawk ang chu" Awmtein a lo ti vat a. 

Dawr siam leh an tum mek thu te an sawi a, an pawisa khawl sa ang ang a bul ţan leh an tum a ni. Rei tak an lo tih tawh a nia, an tluang leh phian maithei a ni. 

Awmtei te rawn len zanah chuan ka pum a na riai riai reng a, a tirah chuan ka ngaimawh vak lova, mahse awm a tih nawm loh tak tlatah chuan ka pasal ka hrilh ve ta a, nau neih hun a la ni chiah lo bawk nen a na lai a chul hliau hliau ringawt ang chu tih nak laiin pindan aţangin rang lutukin a tlanchhuak a, a farnu te an rawn lut ve thuai a, "I pum a na em ni?" an ti a, an chiai in an mangan hmel hlawm khawp mai. 

Damdawiinah min kalpui a, thuneitu an nih miau avangin doctor leh nurse duty te chuan na ber awm ang hrim hian min lo buaipui zung zung a, "Aa..a na riai riai ringawt a" ti ve reng mah ila awmzia a awm lo. Doctor in min endik hnua haw leh mai tur a in ngai khan nau ka vei zui a ni der mai. 

Fa pahnihna a nih tawh avangin a zia deuh ka ring ringawt a, nau neih naah min la nawr lut bawk si lo, Bawiha ka neih dawn kha chuan pindan pakhatah ringawt pawh tam tak kan awm a, a ţhenin na kan tuar a, a ţhen na nei lovin an ţawng zuah zuah a, tunah lem cabin ah min dah a, chhungten min hual ţhup a, engtia awm mah a nuam lova, a nat thu pawh ka sawi peih lo. 

A rawn nat tak tak phei chuan ka thlan fim a tla a, ka hmui hnuai ka lo pet fan fan ţhin a, Hmangaihsanga lah chuan tih tur ber a hre lo, "A na em?" a tih loh leh "Engmah i sawi si lova" a ti a, a chang leh doctor hmu turin a kal a, a chang leh ka thlan min hruk sak a, rin loh deuhin Ni Biakengi chuan min han hrethiam khawp a, "Nau a la hnai lo aniang. An rawn endik reng che a, a hunah chuan an nawr lut mai ang che" a ti a, chu chu ka hriat sa tho a ni. Vei chawp tir ngai lovin nau ka vei a, na ka tawrh nasat em avang chuan kei leh ka ni tih loh chu an mangang khawp mai. 

Rei tawk fang na ka tawrh hnuah nau neihna pindanah min nawr lut ve ta hram a, fa pahnihna tih a awm thei lo, a nat dan ka sawifiah thiam lo a, Pathianin thihna tura a ruat chu nise damchhuak kan tam lo khawp ang tih hi ka sawi thiam dan ber a ni. 

Nausen ţap ngâk ngâk ri ka hriat chuan chau tak chungin ka nui a, na engang mah se nau ţap ri kan hriat chuan kan na kha a bo duak ţhin an ti a, fa pahnih ka neihna chiah a nia, chutiang chuan ka awm ve ve reng a ni.

Nau neihna pindan aţanga min nawr chhuah hnuah khumah min muttir leh te te a, nikhaw hre lovin ka awm em lo na a ka chau takzet a ni. 

Naute a ngaihven hmasa dawn emaw tih laiin ka pasal chu khum bulah a rawn ţhu a, ka kut vuan chung hian "I ti ţha lutuk a nia" zawi sup hian a ti a, a thlaphanna te a reh tawh a, hlimna in a mitmeng a ti nung sarh a, a phur hmel kher mai. 

"I nat tak tak kha chuan fa ka duh leh lo ka ti ţep a ni" fiamthu a tih pahin ka kut a fawp vang vang a, duat takin ka sam a chul hliau hliau bawk a, ka pasal min duatna chuan min ti hahdam sawng sawng thei hial a ni. 

"Kha i fanu hi pawm ve la" ka niin a tih chuan ka lo nui a, pindan chhunga awm ve dangte pawh an lo thum hak mai. Fapa neih a inrin tehreng nen fanu a nei ta daih sia, an chhaih chak tawh ngawtin ka ring. 

"Mampuia ti lovin Mampuii kan ti mai ang a" Hruaitean a tih chuan an nui ta hak hak a. 

A fanu chu a pawm hlu hlu a, lungawi hmel tak hian a en vung vung reng bawk a, a lawm lutuk sawi tur hre lo chuan "I te reuh hle mai" te a ti ta vel mai mai a, "Ţah a tum a nih kha..awi rawh" ka niin a tih chuan rang lutukin a tho a, a fanu hmel en reng chung chuan a awi ve ngial a, an hmuhnawm a, a nuihzathlak tho bawk si, Hruaitea phei chuan thla a laksak hial reng a ni. 

Naute a pian hnu ngat phei chuan an chhungte an lo thleng khawm chakin ka fanu chuan en tu pawh a ngah nghal hle a, an lokal dawn lo emaw ka tih hnuah ka putea leh pa Kawltea te an lo inzui lut a, zan lama damdawiin a min hruai tu te bik kha chu an inchei hauh lo, chuti chung chuan an lang hlui bik hle a, ka lawm em em tho si. An hnungah Thiangi a lokal ve bawk a, Hruaitean a lo ngaihven vat a. 

Ka bula naute mu chu enin ka putea chuan "A hmelţha hle mai" a ti a, patling mah nise a hlimna chuan a hnuk a ti ulh a ni chek ang chu a mittui tling pam chu ka lo hmu vat a, ka nu a ngaihtuah chhuak leh tawh a ni ngei ang. 

"Ka hria alawm...hmu ve se chu hmelţha a ti ve ngawt ang. A paw nileng leh ţhak ţhak ang a, hah a sawi ve lo ang a, phun nawi hauh lovin engkim a tihsak anga" ka lo ti a, a kun vang vang a, a rawn hawi chhuah leh chuan ka fanu biang a tawk zauh a, a ding chhuak zui nghal a, an lo ngawi ţhap te chuan min ti zam lek lek a ni. 

Rin loh takin ka putea chuan "Matein nau a vei tih kan hriat hlim khan lokal nghal rum rum kan duh viau na a motor hman tur kan hmu zo lova, rilru bet lo deuhin kan mu a, zingah fanu a neih thu kan hre leh a, Kawltea hi ka be vat a, a neih tawh ber chuan chaw ei khamah law law kan kal dawn nia a tih avangin chaw ei khamah ti hian kan rawn lang ve thei chauh a, lawmthusawi ţawngţaina in neih tawh leh tawh loh ka hre lova, Pathian in naute duhawm tak min pe a, lawmthu sawina neih a ţha ka ti khawp mai" a ti a, mak kan ti tlang khawp mai. 

Mi hriat a han ţawngţai em chu a hreh deuh aniang Pa Kawltea chu ţawngţai turin a ti a, tuman lawmthu sawi ţawngţaina neih an rawt lova, ka putea chauh hi a rawt chhuak tu a ni. Midang hriat laiin a ţawngţai ngam lo na a a nun hi hmuh theih khawpin a inthlak danglam a, inkhawm pawh a ţhulh ngai tawh lo. Zu a la nghei hmak thei lo maithei a, chuti chung chuan Pathian a hrereng tho a, hetiang a nih chuan zu in pawh a sim hlen thei vat ang. Reilote chhung chauh inhrawn mah ila ka hmangaih a, a nun danglam hi kei aia lawm an awm kher lovang. 

Ka ni chuan "Naute hming hi chu Zotei putea, Pu Sawma hian sa rawh se" a lo ti ve mauh mai a, vui an tam viau ka ring. Ka putea pawn midang ken an tum ngial tak na a an tilui tlat a, Hmangaihsanga leh Neihkimi te meuhin kan naute hming sa tura an tih takah chuan "Zodinsangi" tiin kan fanu hming chu a zia a, midang chuan mawi an tih zia an lo sawi liam liam a. 

Hruaitea leh Hmangaihsanga te chuan "Midang i hnawn kual vel a, hming sak inring sa ranin i rawnkal tih hriat reng reng" tiin an fiam zui a, a nui ve suk suk a, a zah hmel viau lehnghal. 

Damdawiin aţang chuan ka chhuak har lo a, in lah chu Zamtein a lo chei a, thlalakna tur hmun ni awm tak a lo siamah te chuan min dintirin kan thla te a la a, mahse "Chawl rawh se..na a tuar nasa a, thlalak ringawt lo buaipui suh u" tiin kan pa chuan a lo khap a. 

A ni reng lah tak a, ka la nuam lova, chawlh rih ka mamawh bawk. Kan pindanah min hruai chhoin khuma ka mu tur te chu min lo pui a, Bawiha rawn lawn kai ve pawh chu "Fimkhur rawh aw" a lo ti vat a. 

Bawiha lah chuan a nau chu bawkkhup meuhin hmuhnawm tih hmel em em hian a thlir a, ka pasal lah Bawiha bulah a rawn bawk ve a, an pafa mitmenga lungawina hlimna langchhuak chu hmuhnawm tak a ni. 

"Hmelţha i ti em?" tih pahin Bawiha chu a kuah a, pakhat lah chu a lo bu ve nghauh nghauh a. 

"I nau hi i nu ang chiah a hmelţha a nih hi. I nu ang chiahin a fel ang a, a duhawm bawk ang a, ţhatna hlirin a la bawm ve tur a nih hi" a tih te chuan hrethiam ve awm hrimin Bawiha chu a lo nui var var a. 

Nau entu an tam a, thil pek pawh kan dawng hnem khawp mai. Keipawh ka dam chho ve zel a, ka fanu lah chu a tleiin a ţah belh lo lutuk hi kan pa te unau ngaih a ţha lo zawk a, Neihkimi takngial pawn "A pian hlim hlawt aţang khan a hmelţhain a hmai fang a dik a, nakinah phei chuan a la hmelţha ngawt ang. Bawiha ang tho a kan duat rawn a la ni dawn alawm" a ti ve a, ka rilru put hmang hre ranin Bawiha a sawi tel ve zel a, engahmah a hmaih ngai lo, hei tak hi nia a finna lai chu, ţawngsual chang a neih awm pawh ka hre lo. 

U Remremi chu kan en ţhap hian a lai ţhin a, tunah pawh a rawn luh rualin kan lo en ţhap a, a tih ziah danin hla deuh aţangin ka fanu a rawn thlek leh dâk dâk tawh a, "Remi hmelţha i ti em?" ka niin a lo tih chuan rang deuh a "Ti bawk lo" tih leh inher a rual a, a chhuak nghal nalh bawk a, nuih a ti za ţhin a nia. 

Nau khawih vel thiam ve tawh viau mah ila ka chhungte hian min awl hneh a, Ruattei leh Siampuii ten an buaipui loh leh ka niin a ti a, an bual a, a zun an thlak a, tih ve tum mah ila an phal tlat ţhin lo a, rin aiin an zei phian lehnghal. 

Nau ka neih lai bawr vel a Hmangaihsanga mangan zia an sawi awl lo a, hmeichhia ka nei daih chu fiamthu nan tak an hmang bawk a, Zodinsangi a ni tak na a Hruaitea tih ang tak tak khan Mampuii an tia, Mampuia neih kan inrin nen, ka pasal an fiam zut reng pawh hi a awm lo hran lo. 

Mampuii chu tupawn an atchilh a, Hmangaihsanga phei chuan a pawm reng a, pang lum a hriat phah lutuk te chu a lawm zawk emaw tih tur a nia, hau ve ţhin mah ila a tihdan a thlak duh chuang lo. 

Zan kan han mu tur te chu inbengkangin lungawi hmel deuhin a en vung vung a, thiam lo deuha a lawm ve te chu ka lo nuih hak hak reng a. A laiah kan muttir a, amah zawk hian ka mutthilh hlana ka delh palh a hlau a, a mu mang lo ţhin ang ka ring. 

"Mampuii pian hnu hian min ngaihsak lo sawt riau" uang zet a ka tih chuan "Ngaihsak e..ka hlim em a ni" a ti a, amah zawk chu a nuih a za a. 

"Mampuii pianni a ka hlimna leh kan inneih ni a ka hlimna kha a inchen reng ang" a tih zawm leh a, Mampuii a pian khan a hlim takzet tih ka hria a, khatiang chiah khan kan inneihni ah a hlim a nih chuan; chu tluka duh chu ka nei chuang lo. Kan naute chu bawhkanin min rawn fawp a, zantin a tih ziah dan a ni. Kei lahin ka lo dawngsawng phur em em zel a, ka pasal tluka thlakhlelh ka nei miau lo a ni. 

Hringmi te hian hun leh ni chelh ding thei khawp a thiltihtheihna nasa kan nei lova, thei ngat ila chu Mampuii hi a lian thei hauh lovang. Tunah chuan a tlan kual a, a u nen an infiam a, fiah lo deuhin a ţawng ve ţhin tawh bawk a, hmanni lawka piang emaw kan tih laiin a piancham kum hnihna lawm ngei tumin a ni te ho an inbuatsaih leh mup mup tawh zawk a, a awihawm loh zawk. Duhthusam chuan nausen ni reng sela, a pa'n a han awi durh durh te kha hmuh a nuam a, lian thei hauh lo se ka ti ţhin. Mahse mi tihdan takah thing delh loh lung delh loh chu a lo ţhang lian ve zel a, nausen a ni tawh lo na a nun a tih hlim loh phah chuang lo. 

Bawiha pawh a changkang tawhin sikul a kai ve ţan tawh a, zing tin a pa'n a thlah a, chhunah Siampuiin a lam ţhin thung a. A kal tirh thla khat chhung phei kha chu kan pa hian a khawngaih a, Siampuii hruai tel va nghalin a ban hma zawng a nghah tir ta ţhin a, mahse Bawiha hi a fel chi a ni hlauh a, nghak lo mah ila ţha deuhin a tho tluan ţhak ţhin tho a, a ban dawnah erawh kan hruai ngei ngei thung. 

Inkhawm lah hi a phur thei phian a, an ban veleh ka bulah a nih loh leh a pa bulah a kal ţhin a, ţum khat phei chu phur deuhin biakin puiah a rawn tlan lut a, "Anu, a chung berah tu nge awm an tia, hosanna kan tia" a rawn ti a, ka bula ţhu te hoin an lo nuih tet tet nghe nghe a. 

"A chung berah a ni lo, chungnung berah tih zawk tur" ti a a dik zawk ka hrilh te chu a ngaithla leh tawh lo reng reng a. 

A pawimawh ber zawk chu Mampuii nen pa hran an nihna a lang miah lo hi a ni. Tuman an en hrang lova, Ruattei phei chuan a duat zawk emaw tih mai tur a ni ţhin a, thawmhnaw an lei lahin Bawiha an kep ve zel a, eitur ah pawh chuti tho. U Remremi takngial pawn a enhrang ngai lova, a sawichhuak ngai hauh lo bawk a, an felin Neihkimi ka lo ngaih ţhin dan pawh kha a dik lo hlein ka hria. 

Kimkima nen an inţhen tawh a, a chhan an han zawh lahin "Hmaikawr a phelh tawh a" a ti mai zel a, mipa a ngaihsak chhunzawm lo bawk a, Siampuii phei chuan "Nau a pai theih tawh pawh ka ring lo" a ti fo mai. Thiangi phei chuan pasal a neih a ring lo hrim hrim. 

Ţum khat Rinkimin Bawiha danglam bik zia a sawi zauh a, "Mampuii nen hian pa hran an nihna lai a lang ţhin" a tih ţum khan ka rilru a na viau hman a, mahse Neihkimin min thawi dam hneh hle a nih kha. 

Rinkimi chu khakin Bawiha hran bik loh zia a sawi a, nausen a nih lai aţanga an hnen a awm a nih avangin Mampuii aia an hmangaihna leh duhsakna a nep bik loh zia te a sawi chiam a, "In khat a kan chen ho chuan chhungkua kan ni tihna a nia, chhungkua ah en hran bik an awm lo" ti a he inchhung ka luh hlima ka pa thusawi ang chiah a sawi ve khan min thawi dam chiang hle a nih kha. Midang ngaihah chuan a ho maithei, mahse ka tan chuan a hlu lutuk tlat a ni. 

Kan pa lah hian a fate pahnih hi a chhuang em em mai a, a ţhiante an rawnkal chang te hian mûk taka an ti ti pawhin pakhat a kuah a, pakhat a pawm a, a ti ti a buai phah ngai lo. Biakin kan hlat loh avangin motor ken kher ţul a ti ngai lova, a farnute pawh a khap vek zel. 

"Lirthei nei apiangin ken zel kan tum chuan nei ve lo ten hrehawm an ti anga sin" a ti ţhin a, kan chhungkuain kan inzui a, Mampuii a pawm a, Bawiha a kai a, biakin thlen hnuah keiin an department ho inkhawmna thleng ka thlah thung ţhin a, 'chu chu ti rawh' ti a tih tur intuk chawp lovin kan tih theih leh tih tur bik kan hria a, in awhawm e min ti tu pawh kan tawng ve nual ţhin a, kohhran kan belh hnu ngat phei hi chuan nun a hlim zual a, midangte pawn min nelin ţhenrual kan ngah sawtin ka hria. 

Mampuii pian cham pawh kum khatna ang chiah khan an lawm pui a, Thiangi leh Hruaitea te inzui ngun lutuk chu ringhlelin "Eng emaw a awm tiraw?" tiin Thiangi chu ka zawt a, min melh ralh a, nui tet tet chung hian a bu nghat a. 

"Min bem ve ringawt mawle..kan in upat hleih tehreng nen kei lahin ka lo duh ve mai bawk sia, i awm tawh si lova, Thang Lm-a ka rawn a, ţha min tih pui a" a ti ta reuh a, Thang Lm-a te hi an insawn daih tawh a, Thiangi nen chuan an la inbe nasa lutuk tho. A pahrawn dam chhung chuan an inah a let ngam tawh dawn si lova, ti hian ka putea bulah a awm ve ta reng a. Neihkimi duh ang ngeiin polytechnic ah a kal ve tawh a, puanţhui pawh thiam a inti ve viau tawh. Hruaitea nen a an inkawp chu ka lawmpui thu ka hrilh a, ka ni a fel a, Thiangi hi chuan eng harsatna mah a tawk lova, innei ta tehreng pawh nise Hruaitea chhungte lam aţang chuan hrehawm a tuar hauh lovang, Hruaitea a pawimawh ta ber tihna a ni mai. 

Ka pu erawh chu ngai ţhin viau mah ila a tar tawh em avangin rawn zin thei chi a ni tawh lova,vawikhat chu chhungkuain an khuaah kan zin ve tawh a, an khuaah ngat phei chuan a induh thiamin a lungawi loh chuan biak ţawng theih a ni ngai lo. Inah a tawm deuh chawt tawh a, amahin a che hleithei tawh lo a ni ber. 

Taitei pawn pasal a nei tawh a, naute kan neih hnu lawk khan a bialpa nen an inru a, tunah chuan ani pawn fa a nei tawh a, an nupa an inhau bur bur reng a, an inţhen lek lek fo a ni awm e, pasal thlan fuh loh hi chu dam lai hremhmun a ni ringawt. 

Sawihmaih theih loh Zonuni pawh high school zirtirtu senior deuh tawhin a rim tlut tlut reng a, a tir kha chuan a ten a, tunah chuan a ngaithei viau tawh a, 'ţhatna in min hneh' a rawn ti ţhin a, Rb-a nen khan an in ngaizawng dawn emaw ka ti hman a, mahse eng em a thleng ta lo. Rb-a phei chu tun aia sang nih tumin a bei mek a, a tling a nih chuan vai ramah a awm leh vang vang dawn tihna a ni mai. Ka beidawn ngawih ngawih chang pawh a min fuih ţhin tu a nia, ka hrereng tawh ang a, thil ţha zawng zawng ka duhsak bawk. Zonuni pawh hi ka tan a hlu takzet a, intawng lo ila chu ţhianţha ti a sawi tur Thantei bak ka nei lovang. Min pui nasa a, ka rilru a buai tup tup chang pawh a ka hneh theih zia min hriattir ţhin tu a nia, hmangaihna awmzia min hrilh nasa ţhin hle bawk. Kumkhuain a ţhian ka ni reng ang a, a tan ka awm reng tawh ang. 

Zanah balcony ah kan pa nen thla eng kan thlir dun a, thla êng nen hian inzawmna thuk tak kan nei ka tih tawh kha, kan kawng a thim chang chuan kawng min kawhhmuh turin eng a chhuah a, kan hlim changin min hlimpui ve ni awm takin mawi takin a eng a, kan lungngaih chang lahin kan ţap ri a hria a, a èng dul raih ţhin a, hringnun leh thla hian inanna tam tak a nei ngei a ni. 

"Naupang harh pahnih an mut daih hi chuan a khawharthlak ţhin a" nuih hak pahin a kawngah ka kuah a, ani pawhin ka darah min lo kuah ve vat a. Kan taksa a insi chial a, ka pasal ka thlakhlelhna leh a pang lum ka deh changa ka thlamuanna hi englai mahin a bo ngai lo. 

"An mut ve em em lohin ka duat ve hman nang che" a lo ti ve nghal zat a, "Fa kan neih belh zel phei chuan duat awmzia ka hre ve lo thuai ang" ka ti a, kan nupa chuan thla eng hnuaiah hlim takin kan inchhaih zui a. 

"Ka hringnun thawnthu hi ka fate chhiar turin ziakin dah ta ila, engangin nge an ngaih ang le? Pasal atana nang ka thlang che hi ti fuh min ti ve viau ang ka ring" fiamthu a ka tih chuan "Hmeichhe tuarchhel, a tluk pawh a tho leh ţhin. Beidawnna khur aţang pawh a beiseina zawng lui ţang ţang ţhin, hmeichhe hmelţha takin damkhawchhuah nan tihtakzetin a bei a, ka sawi ang hi an ngaihdan tur a ni" thutak deuh hian a ti a.

"Hmangaihtu nei lova kan inhriat tawh hnuah pawh Pathian hian hmangaihtu diktak min pe leh leh a, nangmah ang te. Beiseina nei tawh lova kan in ngaih hnuah pawh a zawna kan zawn chuan beisei tur a awm leh ţhin. Hlim thei tawh lo tur a kan in ngaih hnuah pawh hlimna tur a lo awm veleh zel a, hringnun hi a tluang parh lo reng a ni. Mahse beidawng lo a kan kal luih zel chuan a tawp thlengin kan kal thei tho ţhin a" ka ti a, a pawm hmel khawp mai. 

Dingdihlip meuhin a hmuiah ka fawp a, ka pasal lungawi hmel ka hmuh chuan kawng laklawh a ka tawpsan lo kha ka lawm lehzual. Lo tawp ila chu tun ang hian ka hlim lo ang a, keimahni vanga midangte hlimna hian kan thinlungah engang takin nge hna a thawh theih ka hre awm tawp si lo a. 

Beidawng suh...a harsa rih a nih pawhin bei ţang ţang la, hlimna hi mitin tan a ni. Mi hausa a duhsak bik lova, mi rethei a kal kân ngai lo. A hnuhnung ber a hmasa ber a nih theihna leh, a hmasa ber a hnuhnung ber a nih theihna khawvelah hian hringnun kan chhiar ve bek bek a, i hringnun kawng zawh lai kha a laklawhah tawp san suh. Beidawnna in hneh tir lo tu te chuan hlimna an chhar nge nge ţhin. 

Engtik niah emaw chuan; tuna i nun hmanlai mêk pawh kha, 'thawnthu' mai ala ni dawn a sin!

Chuvangin, tunah khan, i hringnun thawnthu ah khân; a changtupa emaw changtunu ber niin, i chang mek a ni tih hria la. Fimkhur leh uluk takin chang rawh le. 

I nun kha midangte'n an nunsak thei lo che a. I hringnun thawnthu kha tumahin an ziahsak thei hek lo che. Nangma'n i ziah a, nangmah bawkin i chan tur a ni a. Fimkhur la, 'Edit' ţhat leh theih a ni tawh lo tih hre chungin uluk takin i hringnun thawnthu chu chen rawh le. 

A TAWP TA