KA HRINGNUN THAWNTHU-37

KA HRINGNUN THAWNTHU-37

"Ka ni ten pawisa puk an dil che em ni a?" pindan a a lo luh rualin ka lo chhuahchhal nghal a, thinrim a a hnathawk bang lo hmuah ka duh hauh lo, mahse engmah min hrilh loh avangin ka lungawi hauh lo bawk. 

"Aw inhmun leina tur" a ti ve mai a, ka thu hriat avang chuan ka tawt deuh ţun a, ka zak takzet bawk. 

"I pe em?" chang deuh fak hian ka ti leh a, "La pe lo" a kawr phelh pahin a lo ti leh a. 

"Pek an ngai lo..an dil ngam ringawt che pawh hi an mak ve hrim hrim. Ka sawi lawk vek kha, beisei nei lo se chu ţhat an chhuah hawrh lo ang ka tih kha" ka tih bawrh bawrh lai chuan ka bulah a lo ţhuin "Eng nge i lo an a?" a ti ta daih a. 

Min fawh tum ni awm taka a rawn awm hnai chu a hmui ka lo hup a, hnung lama eu deuh chung hian "Pek i tum em ni?" ka ti leh ngat a. 

"Min dil nasa a" a ti ban charh a, pek a tum leh tum loh a sawi chiang duh lem hlei lova. 

"Pe reng reng suh ang che. Anmahni vangin ka nu'n hrehawm tam tak a tuar a, ka pi leh puten an tuithlar pawhin an ngaihsak zui duh lo. Ka naupanlai lahin tuman min ngaithei lova, an thil tih zawng zawng hi ngaihdam theih pawh a ni lo. Diktak chuan engmah rawn beisei ngam tur an ni lo hrim hrim" ka ti hlak hlak a, keimah ngeiin ka la hmu khawp ang. 

"Naktukah i rualin ka chhuak ve ang a, ka putea inah min thlah kawi lawk rawh. Keiman ka be dawn" ka tih chuan "I kal peih ang maw? I ke vung khan a ti hrehawm lo che mi? Step zawh thui a ngai bawk si a" min ngaihtuah hmel tak hian a ti a, engang pawn hrehawm se ka kal ngei ngei ang. 

"Ka kal thei ang. Min ti hrehawm lutuk hran chuang hleinem" ka ti ve tlat a. 

"Ni e i kal peih chuan inbe rawh u. Sawifel tur in ngahin ka hria" a ti a, min dang ta bik lo e. 

"Lungawi lohna dang i nei lo tiraw? Vawiin lam eng nge i lo an a?" a ti dam thlup a, "Ka ţha lutuk" ka han ti a, ka nuih pah bawk a. 

A ngaih a ţha ta a niang chu thaw chhuak deuh huaiin ka sam a chul a, "A ţhat nasat chu..nitin hnathawk a chhuah ka ngai sia nangmah chiah a hrehawm i lo tawrh ka hlau a. Nupa kan nia, pumkhat kan ni tawh a, kan pahnih a kan remti thlap a nih loh chuan ka thu a thil tih ka tum hleinem. Ka la hrilh lo mai mai zawk che a nih kha. Lung lohah la duh suh" a ti a, a aw kâ dam ruih chu ngaihthlak a nuamin vannei ka inti thar leh a, ka dinhmun a harsat laia Pathian ka lo dem ve ngawt te kha ka zak takzet tawh. Harsatna tam tak ka tawrh a phal a, chutih rual chuan pasal atan mipa diktak min pe thung a, ka lo hmanhmawh mah mah ţhin a ni. 

"I va ngui ve..i lung a la awih chiah nange?" dam thlup a a tih leh chuan lu ka thing a, "Ka lawm zawk a" ka lo ti sap a. 

"I thinrim ve ngai miah lo em ni?" a nghawng a kuah paha ka tih chuan "Thinrim ve ţhin kha" nuihza aw tak hian a lo ti a. 

A malchungah amah hmachhawin min pawm kai a, nuihza hmel a la pu reng mai. A nghawngah ka ban pahnih ka suih bet a, a hmel hmuh loh hlauin ka kuah bet tlat duh lo thung a. 

"Ka thlavang i hauh hlur ţhin lai kha chuan i thinrim ţhin ngei a, mahse a hnu lamah khan i thinrim awm ka hre tawh hauh lo. I thinrim viau dawn emaw ka tih pawhin a dam zawngin thu ila leh daih zel a" ka tih chuan a lo nui hawk a. 

"Ka thinrim ve chuan i ţah hliam hliam kha" uang deuh a a lo tih chuan hriatchhuah ka nei leh hnuhnawh a. 

Ka naupai lai hi thla hnih lek a la nih lai khan thil ei chak loh chang ka nei ţhin a, anin ka chhiat phah a hlau ţhin si, kan inhnial rap rap fo a, ka luak deuh reng bawk nen, luak tur tal neih a ţha ti a min nawr luih hnuah pawh ka lo hnial zel a, min vin a, eitur awmna plate kha min hmehbel lui rawk rawk bawk a, ka rilru no lai tak nen a in nang a niang chu, rilru na deuha ka ţah ve tawh tak kha. 

"Min hau zui chuang hleinem" nuih hak pah hian ka ti a, "Min duat lehnghal tho a" zawi tein ka tih zawm a. 

"Ka nupui ber ka duat loh ten le" tih sup pahin ka darah a khabe a lo nghat a, ka dul hi len belh tawh lo se, duh duh hunah a malchungah hian ţhu thei ila tih te chu rilru a lo awm a, a angchhunga tluk luh baka hahdamthlak a awm miau lo a ni.

Ka ngen deuh tet tet avangin ka putea inah chuan min hruai a, "Tlaiah ka lo lam leh ang che" tiin min kalsan a. 

"Pute..ka nu Chhuani te chu han be teh. An tihdan hi a ţha lo reng reng ka tan a zahthlak lutuk alawm. Hmangaihsanga chauh a ni lo a, a unauten lo hre ta che engangin nge an ngaih ang?" ka ti nghal bawrh bawrh a. 

"Tukin a i rawn sawi khan ka hrilh nghal alawm. An lokal ve mek ang ka ring" a ti a, Thiangi bula ka ţhut rual chuan ka dul a lo khawih a, thinrim ru ţeuh reng e ti lo chuan kan han nui leh rih a. 

"Ka nu te pawh hi an ti ang lo ve e. Pawisa puk an dil tih kan hre ran sia, U Sangtea lokal te kha ka lo be ngam lo hrim hrim. Kan in ngamtlak ve tawh tehreng nen boruak an ti chhe leh vek" Muanpuiin a lo ti tan tan bawk a, mi pangai tan chuan zahthlak deuh a sin. 

"In inneih hnu lawk khan min hruai haw an tum a, mahse patea hian a phal lo a, mahnia awm chu a khawharthlak a a ti ve tlat a, ka nu leh ka unaute chu ngai ve tho mah ila patea hi ka khawngaih veleh tawh bawk sia" Rinrinin a ti niah niah a, Thiangi chu "Nang eng nge in chanchin?" tiin ka zawt zawm vat a. 

"Ka nu chuan lo haw rawh min ti reng a, Pa Sawma bula awm reng ringawt chu a inthlahrunawm a tia, diktak chuan keipawh ka inthlahrung. Tunah ngat phei chuan dawr te hi kan eizawnna a ni mai a, mahse ka pahrawn ka hlau tho bawk sia, ka hrethiam lo. Thang Lm-a te hi an intharah an insawn ţep tawh a, bungraw hlui dahkhawm nan a an hman an inhnuai khi man chawi a luah ka dil mai dawn em maw ni ka ti" a ti niap niap a, an dinhmun hi a la khirh ve rih hlawm khawp mai. 

"Neihkimin a lo be ngai che em?" ka tih chuan "Aw..be ve zeuh zeuh. Damdawiinah lo leng la te a tia, a â tak tak a ni. Pawisa ka neih leh neih loh te min zawt ţhin a, engtin ka va ti pawh a ni si lova, min ngai ve reuh a nia aw" a ti a, kei ngei pawn tun thlengin mak ka la ti. A unaute pawn hre ve vek se chu mak an ti ve tho ang. Midang a ngaihsakna a lantir ngai loh laiin Thiangi a duat hle sia. 

"Pawl 10 i pass em min tia, ka pass ve thlap thu ka sawi a, Women's polytechnic a luh ve theih dan ngaihtuah ila min tia, entrance neih hun tur te ka lo hrechiang ang a tia maw..amah chuan garment technology min duhpui ber a" a ti leh malh malh a, chungte chu ka tan thu thar vek a ni. 

"I dinhmun diktak a hria em ni?" ka tih chuan "Hria e..in inneih bawr lai vel khan Pa Sawma bula ka awm tlat chhan min zawt a, ka hrilh ta nge nge a nih kha. A chhe lam pawh nise mahni chanchin sawi hi a nuam chiah lova, mahse min zawt sek bawk sia" a ti a, zahzel a ka mal a rawn thai neuh neuh kher chu a nuihzatthlak duh viau mai.

"Kan buaina lak aţanga kan chhuah theih nan hian Pathian hi rin loh deuh deuhin a che ve ţhin a, Pathian pek che a ni maithei a sin. A ngainat phawt che chuan amah ti hnual lo tur zawngin awm la, i vanneih pui viau ang. Entrance exam tur te pawh chuan inbuatsaih la, kumin a i tih theih kher loh pawn nakum a ni leh mai a, zu in tawh miah lo la" ka ti a, Thiangi berkher hi chu nau ang tak taka ka en avangin ka zilh ve nasa ţhin. 

Ka nu Chhuani leh ka pa Rama te lokal chu "Engati nge pawisa puk in lo dil ngawt? Amah chauhin engmah a ti thei bik dawn lova, damdawiin pawh an unau a an enkawl lai mek a nia, vawilehkhata sum tam tham lutuk thehchhuah chu har deuh tur a sin. Midangin an hriat chuan ka chep leh vek ang a, tuna in neih sa ah hian lungawi mai ula" ka lo ti a, ka vin hauh lo bawk. 

"A zavaia tum tir kan tum pawh a ni chiah lo. Kan unaua thawh khawm kan tum a, awmkhawm vek kan chak ve tawh a, kan daih loh tak leh tlem min puk tir la kan ti a nih kha. A thu hrimah kan fanu i nia, mamawh kan neih chuan kan rawn lam ve bawk ang chu" ka nu Chhuani chuan a ti a, ka nui tawp. 

"Nu leh pu nei ve lo anga ka inngaihna a rei tawh lutuk. Chu lam chu dahţha ila, thil hlui sawi chhuah reng te hi ka peih lo. Kan inneihna pawh a la rei lova, pawisa puk lo dil nghal kha ka tan pawh a zahthlak lutuk alawm. In hmun leina tur takngial pawh in neih daih loh chuan engtin nge in insak theih chuan ang a? Ka nutei leh ka pa te inneih lai pawh khan in lo dil ru fo tho lo maw?" ka tih chuan an lawm chiah lo tih an hmelah a lang reng a, ka haider hmak thung. 

"In pasalte kan tihbuai in hlauh luatah mi hrang ang hmakin min en duh a, Atei pawh a ni tho, pasal i nei hausa a, chhawr theihna a awm lo maw kan ti dek dek a min be duh lo nghak ringawt a, chhungkaw tan ţangkaina in nei lo reng reng. In pasalte ai mahin min huphurh zawk emaw tih turin in awm a" Ka nu Chhuani bawk chuan a ti leh bawrh bawrh a, ka nu khan chhan awm lova a hlat tawp ka ring lo reng a ni. 

"Ka pu'n a tuithlar a, in en tawp a, khawlaiah vakvai mah se pawi tihna in nei lo. In chhawr theih tur pasal a neih veleh in bawh huam a, chutiang te chuan tu nge pui duh ang che u? Hmangaihna nei ve hauh lo te pawh in ang alawm" ka ti a, kan inhnial zui bap bap a. 

"Mihring hi kan dinna ngaiah kan ding reng ngai lo. Dinhmun ţhat hun a awm nge nge ţhin. Ka nu kha a retheih laiin tuamhlawm ula chu a theih ang angin a pui let ang che u. Hausak tum vek mah ni ila sum duh lutuk hi chhiatna bul a ni tho tho zel, mahni inhloh ţhak khawp a sim duh te a awm theih a, nangni pawn thil dang zawng aiin sum in hmu lian tihna a ni mai" ka ti salh salh a, ka zah duh ta bik lo. 

A tawpah phei chuan "Kan rawn tibuai leh tawh lovang che u" an ti a, an haw tau a, ka putea lah chuan "An lungawi leh thuai mai ang. Mahse intan chuan ti tau reng se a ţha zawk" a lo ti a, a ngaipawimawh lo ve khawp mai. Ka putea tak pawh hi an ngaihsak ngai chuang lova, beisei an neih vangin Rinrini leh Muanpuii an awmtir chawt a, anni lahin an lo ngaina ta phian a, amah chiaha kalsan an hreh ngawih ngawih tawh zawk. Tunah te pawh chenna tur in ţha tak an nei reng a, duham lutuk hi a ţha ngai lo, an intheh dere mai mai a ni. 

Tlai ban hun awmah a lokal leh a, Rinrini leh Muanpuii te chuan be hreh teh ngang mah se amah zawkin a be bawrh bawrh a, Thiangi a fiam zeuh zeuh bawk a. 

"Thingpui ka lum dawn..U Sangtea hian ka thingpui lum a in khat tawh emai kan lumsak ang e, chaw ei ve ru ti mah ila in duh awm si lova" Thiangin a tih lai tak chuan kawmchhak aţangin Thang Lm-an "Thiangte" a rawn ti leh lung lung tawh a. 

"Ninawm e chupa chu a" tih hlak pahin thingpui bel a la chhuak a.

"Thiangte i rawn dak dawn lo maw? Ka thil hawnsak che hi midang ka pe mai dawn a nia" a tih takah chuan ring lutuk tak mai hian "Eng nge ni?" a ti dam thluam a, kan lo nui hak hak hlawm a. 

"Lo chhuak la i hmu mai ang i hmel mitthla chunga ka lei a nih hi" pakhat lah chuan a la ti lung lung a. 

Phur deuha Thiangi chhuakin "Awii..Thang Lm zu no nen eng nge kan in anna?" a tih hluai takah chuan "An va ho ţhin e aw" tiin ka putea pawh a nui ve huk huk mai.

"Min hmuhsit dan hi a ril riau mai Thang Lm. Khangte chu nunhlui a nih kha" a tih chuan "Zu no a nih vangin i in ngaihbel ringawt a nih kha. A cute em hi, chuvang chuan alawm ka lei. I cute ka tihna zawk a nih chu Thiangte. I hmel cute deuh mitthla chunga ka lei a nih hi, i landan phei chu leilung mawina nen ka tehkhin daih zel aw. Leilung mawina i hmuhsit a nih chuan thuhran a nia, keichu leilung mawina hian min hip ţhin, chuvang chu a nia nangmah nen pawh ka tehkhin ţhin" a lo ti let a, a au lung lung lehnghal a, a nun a nawm hmel bik khawp mai.

"Ka ten lutuk che...khatiang hlei hlawi kha chuan bialnu pawh i nei thei lovang" Thiangin a tih laiin "I hmai bawl leh lung khawk rawk tak tak te hian in anna lai riau an nei a sin Thiangte" a ti vel a, Thiangi a lo lut tau nghawng nghawng a, ti hian zanah chuan kuhva an thel ang a, an nui dun leh har har tho ang. 

In kan thlen chuan Siampuiin "Lokal teh u" a lo ti chul a, choka lam kan kal phei hlawk hlawk chu Bawihan min um ve zel bawk a, dawhkanah thei leh thlai a lo awm hnur mai.

"U Neihkimi lo hawn vek a nih hi. Zotein ei vek rawh se a ti" a tih chuan "Khai a" ka lo ti hluai a, ei chhung a rei viau ang. Ka hne hman ka ring zawk mah. A huphurhawm viau rualin a lawmawm tho bawk sia. 

"Coconut hi chu a tui in rawh se a tia" a ti a, ka hmaa thei awm ho chu ka tuai let ka tuai let a, Sangzuala te khan hetiang hian min duat ve ngai lova, a chhungte ngat phei chuan eitur thleng thlengin min leisak ngai hauh lo. 

"I duhzawng a ni lo mi?" Hmangaihsangan a tih chuan "Ni e..ka lawm lutuk" ka ti a, awmdan ka thiam loh vang zawk a ni. Ka dawn ngai miah loh duhsakna ka dawng reng a, a lawmawm rualin phur taka han awm vak dan ka thiam lo. Ka tan chuan thil thar vek a ni. 

Chaw ei laiin Neihkimi hnenah "Ka eitur i lo lei ţeuh a, ka lawm lutuk a nia aw. Thei phei chu a to thei sia, i inseng nual dawn a nih kha. Ka lawm tak tak a ni" ka ti mawlh mawlh a, ka pasal ka en a, lawmthu sawi nachang ka hria chu a lung a awi hmel khawp mai. 

"U Zote ka ei ve duh aw" U Remremin a tih laiin Neihkimi chuan "Nang lah hi engkimah i lo inrawlh a, ei ngai lo ang mai hian awm ţhin suh" a lo ti hlak a. 

"I sual a nih chu. U Zotei ta vek a ni tawh" a ti a, chhan beisei deuh a min rawn en takah chuan "I ei ve dawn nia" ka lo ti vat a, 'i hria maw' tih melh tak hian Neihkimi chu a melh zui a. 

"Zaninah ka ţhiannu fanu piancham an lawm dawn a, U Hmangaihsang min hruai lawk hman angem?" Taitein a tih chuan "Khawiah nge?" a lo ti bul hmuk a, ka hriat laia biak ţhat chu nuam a ti chiah lo maithei a ni. 

"Electric vengah a nia, kal ve turin min phut tlat a, puanţhui kan zir naa ka kawm ber a ni sia" a tih leh chuan "Zamtei inhruai tir rawh. Zanah chuan mut bak tih tur a nei ve hleinem" Neihkimin khauh angreng tak hian a ti a, ka awm a nuam huaiin ka hria. 

"Min hruai peih lo takin ka tia, U Hmangaihsanga chiah ka phut ngam a" a ti nawi niaih tawh a. 

"Loh theih lohah nilengin a nupui a chhuahsan ziah a, zanah chuan inah awm rawh se. Nupa awm dun tam loh lutuk chu a ţha ngai lo. Zam, Taitei chu hruai rawh aw" a ti a, a kham zui nghal daih a, tikhan thu a tawp a ni mai. 

Taitei pawh tum deuh bar chungin a kham ve a, choka aţanga a chhuah hnu chuan a chanchin an sawi zui neuh neuh a, "A zia a danglam riau" tih te, "A duh anga thil a awm loh chuan a titau zel" tih te, "Aia upa zahna a nei lo" tih te chu an sawi tlanglawn a ni. 

"U Neihkimi hi tawh khirh viau mah se keini ai ngawt chuan a dawhthei a, a nin tawpah a chhungte a be mai ang" an ti ta ringawt a, Taitei ze danglam chu keimah chauhin hre lova midang pawn an lo hre ve chu ka lawm ru kher mai. 

Ni kan hmang liam ve zel a, kan nunphung a pangngaiin inchhungah chuan hlimna lam hlir a thleng emaw tih tur a nia, kan pa lah chuan a kal chhuah dawn apiangin "In dim rawh aw" a tih loh leh "I nawm loh chuan min rawn hrilh vat rawh aw" a ti ziah a, a farnu te nuih a za viau zel. 

Kan in entir fo a, ka naupai lai pawh a hrisel ţhain Ruattei te unau pawn ka nau neih hun an nghahhlelh thu hlir an sawi a, "Hmeichhia nge mipa a nih dawn hre lawk ngat ila chu thil ţha deuh deuh nen kan lo hmuak thei tur a nia" te an ti thul, pawisa an nei em a, naute thil ngawt an en a, a manah an buai ve ngai bawk si lo, khap tum viau ţhin mah ila an ti lui tho tho zel. 

Zanriah eikham a kan ţhut khawm laih lai chuan Bawiha chu ka bulah a lokal a, ngun thluk fe a ka pum a en laia "Hetah hian i nau tur a awm a" ka lo tih chuan "Anu'n ball a ei" a ti leh pek a, an lo nui dar dar hlawm a. 

Ka pum a lian ve tawh a, ani hrethiam fum fe ve lo chuan ball ka dawlh emaw tiin ball i ei min ti fo a, a chang leh min ân tir vak a, ka kâ chhung a bih ta ţhin a, a buaithlak thei khawp mai. 

Mut tum a kan chho chu ka pasalin min han veng uluk leh khawp a, "U Zote, engti zawng pawhin tlu la i na lovang vengtu i nei ţha emai" Ruattein nui rah rah chungin a lo ti a, ka chetsual a hlauh lutuk ţhin na lamah hian amah zawk a hah vek zel ang ka ring. 

"Naktuk aţang chuan tho hma ve tawh la, Mama rual khan tawi te te kal rawh. Fa pahnihna tur pawh nise exer i lak loh chuan i har lutuk ang" Neihkimin a lo ti a, Hmangaihsanga nen hian inanna lai deuh an nei a, a awka chhuak reng reng hi thupek anga ngaih vek mai a awl ţhin a, an awki vang nge an hmel a rum deuh vang zawk pawh ka hre lo. 

"Nia..ka sawi pawn amah hian thawhhma a ngai lo a ti tlat zel alawm" ka ti a, kailawn lai takah kan ding a, kan tihziah dan a ni, kan chho tlang tur hi ui niawm takin min lo be tawi ve ziah. 

"Hmeichhia a ni lo a a hre lo a nih kha. Tun aţanga nitin tawi te te i kal ve chuan i in fit ve deuh anga i tan pawh a nuam zawk dawn hrim hrim" a lo ti leh a, "Tv a kan en ang khan in naute kha inchungah a bet ve daih ange aw" U Remremin a lo ti ve a, sawi duh zawng a inang lo ţhin khawp mai.

Tuk dang ang bawkin dar5 velah ka harh leh a, zik mar al al pah hian thlamuan hmel taka ka pasal muhil chu ka thlir a, ka nui leh seih ţhin a. Tun thleng hian kan inhmuh hmasak ber ni kha ka la ngaihtuah let ţhin. Helai hmun hi pan ta lo ila ka pasal a ni kher angem tih te rilruah a awm ţhin a, min hmuh hmasak ber lah khan ka berh ve dawn sia, engang chiahin nge min lo ngaih ţhin hriat a chakawm khawp mai. 

Khami ni khan ka thinlung a rum a, ka nu'n min lo awmpui duh lo ngat phei se chu ka fapa vahvaihpui bak hmasak ka nei lo tih ka inhria. Zak leh tim chung chungin kawngkhar ka kik a, inchhunga ka pen luh ni kha ka hringnun thawnthu a Hmangaihsanga ka ziah lan tel ve ni a ni. Beiseina chhe te neiin ka lut a, mipa reng reng ngaihven ka tum tawh loh laiin mipa innghahna tlak tak pek ka ni a, amah vang hian ka beiseina neih ve chhun thi lek lek tawh kha a nung thar leh a, ka tih ai zawng zawng min tihsak ngai lo a, ka ti thei ngei a ni tih hriain ţha deuha ka tih theih nan min fuih ţhin thung. Kawng harsa deuhah pawh ka aia kal mai lovin min nawr kal a, chu chuan ka chakna la hek lovin a hma aiin ka chak a, inrintawkna ka neih phah zawk bawk ţhin.

A sam nem thap chul pah a ka hmui a a hmai ka nul kual dan dan lai chuan a lo che ţual ţual a, "Tho tawh rawh exer min lakpui dawn kha" ka tih chuan a mit a meng riai riai a, a tho phang mitmeng phelh phang mai ka hmuh chuan ka lo nui hak a. 

"Nupui i neih hnu hian i inthlahdah sawt riau" uang zeta ka tih chuan zawitein a nui a, zingkar aţanga ka pasal hlim hmel hmuh chu nuam dangdai tak a ni. 

"I bula mut hi a lo nuam aniang" tiin min lo fiam zawm ve vat a, ka sam hnawk niai chu dim tea hui kiangin ka bengah a zep a, "Tun a ka hun tawn mek ang hi alawm hman aţanga ka nghahhlelh tawh" a ti leh sup a, a kut phah hlai hlupa ka biang a dawm lai chuan ka lo nuih sen sen a, ka hlim hliah hliah a ni ber. A hmuia ka fawhsak zauh chuan ani pawh a lo kiai suk a, nupa te chu zingkar aţang ten kan induat hliau hliau zel a, chipchiar a han sawi vek erawh ka phal ngang lo a ni. 

Neihkimi sawi kha ţha dawn riau a hriain tawi te chu ka kal ve a, ani lah keimah vangin a kal hla lo ve ringawt bawk a, "A hma lutuk tawh chuang lova" a ti teh tlat a. 

Inkai riala kan haw dun chu kan ţhenawm lawka dawr siam Nu Hmingpuiin min lo fiam zuk zuk a, "Tunlai chu zanreiah kan va inkaitho ngai tawh love" awmze deuh hian a lo ti a, châk fal deuh ka neih ţhin lai kha chuan kan tibuai ţhin hle reng a ni. 

Hna kal tura a insiam chu ka lo pui a, "Lo ţhu mai mai rawh" a ti ve ngial nain "Ka tih theih ve tawk a nih hi" ka ti tlat a, ka ni Chhuani ten an tihbuai loh hnu phei hi chuan rilru pawh a zangkhai a, ka ke a vung nasa tih loh insawiselna hran ka nei bawk si lo, rilru a hlim sarh reng mai. 

Nidang ang bawkin a kal dawn chuan "In dim rawh aw" min ti a, ka thlir liam thlap a, hmuh phak loha a awm veleh inchhungah ka lut a. 

Chhunah Rba leh Zonuni te an rawn lang hlawl a, kan han inhmuh khawm leh takah chuan an chiau hlut a, "Ka ban hnu hian inpa pawh ka la hmu leh hauh lo" Zonuni chuan a ti a, sitting room, kan hman ţhan loh zawk na lamah kan inzui phei a. 

"Zote, Awmtei te inah i kal ve tawh em?" Rb-an a tih chuan lu ka thing mai a, "Awmtei nu pawn lo leng rawh a ti reng a, ka la kallo mai mai a nih hi" ka tih chuan "Kal ngei ngei rawh. I pa awm tawh lo mah se i chhungte an nia, Awmtei nen phei chuan pa thuhmun reng in nia, in inpawh nasat pauh leh i tan a ţha a ni mai" a ti charh charh a. 

"A thu hrimah i dul a va lian tawh vel ve a, nangni nupa hian fianrial hun in hmang ngun mah mah em maw ni i puar hma riau em?" tiin Zonuni chuan min chhaih leh tawh a, Rb-a pawh a lo nui ve ruh ruh mai. 

"Chuan Zonun engmaw i tih tak a?" ka tih chuan "Ka sumdawng ka tih mawlh mawlh kha. Vawi engzat nge ka hrilh tawh ang che le" a ti nang nang a. 

"Thil ţha deuh i ti ringawt zel a nih kha. Damdawiin a thawh aiin a nuam zawk em ni a?" ka tih leh chuan "Nuam a ni mai. Mi thuhnuaiah ka awm lova, bakah damdawiinah kha chuan kan hah sia, hun awl a tlem sia, kan hlawh a tam chuang bawk si lova" a ti a, a dik khawp mai. Kan kal hma a, kan awm rei bawk si, chawlh a awm ve mang bawk si lova, thawh tur dang hriat chuan hna dang thawh a ţha zawk.

"Zonuni sumdawng chu ka hah phah e" Rb-an a lo ti thung a. 

"Hunawl a neih apiangin veng hla deuhah ka deliver tir ţhin a" tiin Zonuni chu a lo nui hak hak a. 

"Zungbun inang te innei vel elo?" ka ti khauh a, an lo hawi rual chiang khawp mai. 

"A nalh reuh em a, ka chah tel ve chhin a. Ngaihdan dik lo te i lo nei ange aw..ka tirh kah ber a nih vangin ka pe ve mai mai a nih hi" Zonuni chuan a ti zung zung a, a hmel a pha dai a, dawt a sawi niin ka hria. 

"Ka awih lo reng reng" ka tih chuan za lo deuhin an nui a, an in upat hleih ropui mai bawk sia, thil dang zawh leh ka tum laiin Rba zawk chuan "Tui ka va in lawk" tih leh chhuah a rual a. 

Zonuni chu "In in ngaizawng em ni a?" tiin ka zawt bawl a, a nui tawi tak mai. 

"Ngaizawng lo ka tih kha. Enteh mahse a bialnu nen an inţhen hnu khan kan inbe ngun ve tawp a, nau ang chuan ka la en tho na a hmana kan inbiak dan ang kha chu a ni chiah lo. A lo leng ve ţhin bawk sia, ka nu pawn min ringhlel a min hau hrep alawm. Rba pian chuan lerh rual i ni daih tawh te min tia, engamah hmain min hau nghal ringawt mawle" a ti a, a nui zui uar uar bawk a. 

"Kum te chu engmah a ni hleinem. Amaherawhchu hmeichhia chu kan chul hma a, midang a lo melh tai daih ang tih te a hlauhawm a" ka tih chuan "Engmah a thleng dawn lo. Ka neih dawn chuan keiai upa ka nei ang chu. Tunlaiah chuan thil engkim a hautak vek tawh a, ka fate school fee tur ringawt pawh a buaithlak a, ti hian ka sumdawng ang a, ngaihzawng nei thei pawh ka ni rih lo" thutak deuh zawk hian a lo ti a. 

"I vannei khawp mai Zote" a tih phei chuan a thutak lehzualin ka hria. 

"Nia tiraw? Vanduaina tawk mawlh mawlh mah ila vanneihna chuan min kiansan chuang lo a nih hi" ka tih chuan a lo nui sen sen a. 

"Pasal i nei fel a, a chhungte lah rin ai takin an lo fel bawk si, tunah tak phei chuan an duat rawn che a ni ringawt a, hmanah kha chuan tuman an awt ngai lo che ang a, tunah chuan hmeichhe tam takin i dinhmun a din an chak tawh ang. I thil paltlang zawng zawng hriatpuitu che ka nia, tun dinhmun i thleng thei hi ka lawmpui che a, ka chhuang bawk che a nia aw. Rilru hrehawm taka i awm laiin zu hmun sa hmunah in tlu lut a, ka rilru a na emai tih chhuanlamah hmangin vawikhat pawh i tem chhin lova, ka fak khawp mai che. Ruihhlo hian kan buaina a ti kiang lo reng a ni. Thil chhe lehzualah min hnuk lut zawk ţhin a, harhfimin engkim i hmachhawn a, a tawpah ti hian nuamsa deuhin i awm thei a" a ti duah a. 

"Rb-a nen in pahnih hian min fuih nasa a, ka hlawkpui em alawm. Nia, i sawi dik chiah. Ruihhlo hian thil ţha a thlen lo khawp mai. Nun beidawng leh belh tur nei lo ni a in ngaiin ruihhlo an bel a, beidawn lehzual naah a hnuk lut a, tawpna hlimawm an nei ngai lo" ka lo ti ve a. 

Tlaiah an haw chauh a, thingpui pawh vawi hnih lai kan in hman. An kal hmain Zonuni chuan "Group ah ka lo add che ang a min dawr ve ngei ngei ang che u. Nausen thawmhnaw leh blanket vel te pawh ka zuar ţeuh a nia" a ti hram a, Rba nuih a za khawp mai. 

Inchung a ka chhoh dawn chuan Taitein min rawn su chawrh a, ka tlu ţhelh nghe nghe. Vawnbân ah invuan hman lo ila chu ka tlu ngei ngei ang.

"Ka tihpalh lutuk" a ti vat a, "I va hmanhmawh ve" ka awm dawm pah hian ka ti a, ka hlauh luatah ka thinphu pawh a rang khawp mai. 

"Nia ka hmu lo che a" a ti liam puat a, ka awih chiah lo khawp mai. 

"Inchung a chho ve tho tur i nih chuan min hmu ngei ngei ang. Lungawi lohna i nei em ni a?" vin lek lek hian ka ti a, kailawnah hian mi pahnih lek chu insi miah lo pawn kan chho thei ang. A la eng uarh a, ka thawmhnaw hak a lar bawk a, hmuh loh theih ka ni lo. Tupawn min dimdawih a, midang chu nise min sut hlau deuhin min pel vek ang. 

"Nei hran lo" a ti chhum hmak a, a meng sen ram a, ruih nei te pawh a ang alawm le. 

"Engtik khan nge i lo haw?" ka tih chuan "Tunah khan. Min va rinhlelh hmel ve a, i naupai kha i chhiat theih nan a chet ka lak i ring deuh a ni maw?" a ti kha kha a, a hmel te chu a rapawm zo vek tawh. 

"Chutiang chuan ka ngai lo. Tun hnai hian min be ţha duh lo riau a, min huatna i nei emaw ka ti zawk a" ka ti a, ka nui hul hak a, a sawi ang hian ka ngai lo tak tak alawm. 

"Nih chu" a ti hmuk a, min kalpelin kailawnah chuan a chho a, tunlai chu eng nge maw a hriat ni. 

Buaina em em tawk lovin nau pawh ka pai chho ve zel a, ka dul pawh a lian ve tawh viau mai. Taitei lah chuan min pumpelh dan ringawt a zawng a, kei chauh ni lovin Hmangaihsanga pawh a ni tho, kan nupa hian min hmu duh lo hrim hrim niin ka hre ber. 

Night cream ka inhnawih malh malh laiin a rawn lut a, a kawr hlip a, a kekawr a phelh leh hnuah boxer chauh hain khum tlangah a ţhu a, darthlalang aţang chuan ka en ru pah reng a, uluk taka ka hmai ka tuai lai chu hmuhnawm tih hmel deuh hian min lo en ve a. 

"Taitei awmdan hi mak i ti ve em?" tih pahin ka tho a, khum a ka ţhut hnua ke ka hlang tur chu min lo pui vat a, ka thusawi hre lo ang hmiah hian "I ke vung hi a reh hleithei lo a nih hi" a lo ti daih a. 

"A ngaizawng deuh tak tak chein ka hria. Hman a ka ngaidan kha a ngai reng. A ngaizawng chein i hre ve em?" chiang taka a mit a en paha ka tih chuan a nui chhuak huk a. 

"Ngaizawng lo ang" a ti liam puat a, puan min sin tir hnuah ka bulah a rawn inthawlh ve a. 

"A mizia hi a danglam sawt lutuk alawm. Ka hmuh loh laiin a hel tho che em?" ka tih chuan "Chutiang a pawimawh loh chu" a ti hluk a, hlim hmel taka ka dul a chul lai te chuan "Sawi ţha ve hle hle la" ka lo ti a, ka thin a rim hran lo, amah hi chu ka ring a, Taitei zawk hi ka ring tawh tlat lo a ni. 

"I awm loh laiin ka hmu ngai hleinem" a ti mai a, "Bawiha nau tur hu engtiat vel nge a nih tawh ang aw. A chet ţhin danah chuan mipa a nih ka ring a" a ti daih a, "Kan en leh lawk" tih leh ka puan sin lai pawh hlim a rual zui zat a. 

"Hmeichhia nise engtin nge a chet ang?" nui chung hian ka lo ti a, lungawi hmel deuh hian ka dul chu a en vung vung a, "Ka hre lo le..a mak reuh tak tak a ni. A la te awm bawk si" a ti dût dût a, tun thleng hian ka rai thu ka hrilh tirh reng ang kha a la ni. A lawmna hi a la thup hleithei chuang lo. 

A insum thei tawh ngang lo aniang chu ka dul chu a fawp kual dun dun a, "Ka fapa hian min la chhun dawn khawp mai, i dul puar len danah hian a hriat" hawi chhuah pahin thutak zet hian a ti a, ka nuih a lo za hle thung a. 

"Ka fapa hi mu tawh rawh se" tih pahin min khuh ţha leh a, ka bula a lo mut hma chuan ka hmui a fawp leh hram a. 

A ban a lu nghatin ka saisir a, kan inhmachhawn ran mai, "Ka fapa i ti reng a, hmeichhia a lo ni leh si ange" ka tih chuan a kiai suk a. 

"Ni lo ang..a landanah hian mipa a nih duh hmel zawk" tih pahin ka tukhumah a chul hliau hliau a, a hlimna hi tuman an laksak thei hauh lo ang. 

"Muhil tawh rawh..ka fapa pawh a muhil tawh ang" uang zet hian a ti a, "Nakin lawkah ka zun a chhuak leh tho ang a" ka lo ti thung a. 

"Hmeichhia in nau in pai hian nau ringawt ni lo ken tel a ngah lutuk a a buaithlak a nih hi" a ti halh a, min chhawk a chak ţhin a, min chhawk theih loh thil a tam zawk bawk si, min khawngaih em em ringawt a, tih theih mang a nei chuang si lo. 

'Thu chauhin min duat' an tih ang kha amahah hian a awm ve lo a, thu ril tak tak min fah ve ngai lo hrim hrim zawk a, ţawng duah lo mah se min duat em em tho a, a rinawm ţhin zia a sawi ngai lova, rin ngam a nih zia a lantir ţhin thung a, ka tan chuan a ţha hliah hliah ti ila a dik ber ang. 

CONT..