VANMALSAWMA-1

VANMALSAWMA-1

(Tualthahna lampang tlem telh ve ang aw. Thawnthu chhung a mi ang hi a takah a thleng kher lo thei a, thleng chin a awm maithei bawk. Fiction tak meuh meuh a ni tih in hre ran dawn nia💛)

Canteen a kan ti ti khawm mawlh mawlh laia tukverh invaw ri ţhuai chuan min ti phu nasa hlawm kher mai. Kan thusawiin a zir vang te pawh a ni mahna le. 

"Tukverh khar vek rawh u ka tih tawh kha..ngati nge in la khar loh ni?" Nu Puitein a rawn ti nghal lang lang a, a hnung berah kan ţhu a, ţukverh khar turin kan ţhian zinga mi Zuali a tho nalh a. 

"Thli a thaw nasa lutuk ringawt...ral lehlam phei saw chu a thim deuh ruih tawh. Thli hian ruahthimpui a rawn hruai ţhin em ni? Kimkimi chhungte chuan hrehawm an ti lehzual dawn mange" ring angreng taka a tih te chuan tuman kan chhawn peih lo. Kan ngui nghiai hlawm a ni ber. 

"Lo en ve mah teh u..ruah a hnai tih a hriat tawp" a ti a, tukverh khar mai lovin kan ţhutna lam a rawn hawi a, a sam sei tak chu thli thaw chuan a chhem leng nasa hle bawk.

"Ruah te chu a sur ve bawk ang chu mawle. Buaipui chiam a ngai hleinem, thil dangin min tibuai a nih hi" Vani chuan a lo ti ve hlar a, kan zirlai puite police in an ko deuh reng a, chu chuan min tibuai a ni. 

"Sensiar, i u kha police inspector a ni lo'm ni? Chanchin zawt la min hrilh ve ţhin ta che" ngenngawl angreng tak hian Lalrimawia, Riri-a kan tih ţhin chuan a lo ti ve bawk a, midang mit pawh keimahah a fu ţhup a, zak vak lo mah ila nuam lo chu ka ti. 

"Police pawh nise a sawi duh bik kher nang" ka ti a, hre pha an tlem viau ang. 

Changkan lamah hma kan sawn ve deuh a, Mizorama thleng ve lo tur a kan ngaih tam tak a thleng fo tawh a, a rapthlak thei em em mai lehnghal. Aizawl ah phei chuan rilru buai enkawlna thlengin a ding tawh a, rilru lam fel lohna avanga tualthat ta sawi tur an awm nawk vang a ni. Kan khuaah pawh zirna a ţha tawhin Aizawl a awm zel a ngai ta bik lova, damdawiin thlengin a changtlung ve viau tawh. 

Mi zawng zawngin Sensiari ti a min koh laiin ka hming tak chu Lawmnasangzuali a ni daih a, college ka rap ve ţan mek a. Nuţa panga lai ka nei a, unau zinga tlum ber leh hmeichhe awmchhun ka ni. Ni thum kalta khan kan college a mi Kimkimi chin hriat lohin a bo a, chu chu tun a kan thupui, mitinin kan khel sup sup chu a ni. 

"Karleh ah week kan hmang dawn a, inbuatsaih zawk rawh u. Kimkimi chu an hmu leh mai ang" Rinawm-an a tih te chuan rum deuh hian an melh hlawm a, min en kual a, tuman kan phur pui loh avang chuan zahzelah a dar a kan uk a, a thil ei lai a ei zawm ta daih a. 

"Police ho hian an chhui chhuah leh pawh ka ring lo. Kimkimi chhungte chu ni ila private detective ka ruai ngei ngei ang. Anmahni an hausa vak bawk si lova, police ho chuan mi hausa thubuai pawh an chhui chhuak hleithei lo a nia" kan ţhiannu tho Thartein a tih chuan Zualin mitmeiin a lo khap vat a, "Police dem ringawt suh. Min veng him tu te an nih hi aw" a ti zui zat bawk. 

"Ka dem lo thei lo ţhin alawm. Damdawi te pawh an man a, a bu pui, a hotu lam an man ngai chuang hleinem. A chang chuan police hian mi hausa an hlau emaw tih turin an awm a, mi hausa thuhnuaia awm an ang te ka ti ţhin" a tih chuan "An ni vek chuang lo. Mi dik leh rinawm tam tak an awm tho alawm" Zuali chuan a ti ţang ţang a, Vani nen chuan ngawih kan chuh tlat thung. 

"Kimkimi kha a khaw lo tih chu ka hria a, officer ho infiamna ti ten fiamthu nan an hmang fo mai. Mahse hetianga bo pil hmak hi chu a phu bik lo alawm. A bo hma lawk khan kan vengah a nu nen ka hmu a, class a rawnkal lo zui ta kha a nia" Thartei chuan a ti chuai raih a, engtia han tih tur nge pawh ka hre lo. Police ho pawh an thawk rim ve tho ang. Ruang takngial pawh hmuh loh chuan hma han lak vak ngaihna a awm lo em a ni. 

Ruah a tlak rualin ka u te ţhian ho an rawn lut a, an thawm a ring nghal hle mai. Eng emaw sawiin an nui dar dar a, an ei duh zawng sawiin an au lung lung bawk a, Kimkimi bo na chuan a nghawng ve lem lo a nih hmel. 

"I Ţhamama pawh a lo lang alawm" ka ţhiante chuan mitmei a min chhaih pah hian an han ti a, an sawi lai mek a min rawn en avang chuan rang lutukin ka ţhiante lam ka hawi nghal a. 

"Awii..ka thisen zamah current a kal" ka ti hlut a, an ner nang a, min ei loh hmel hlawm viau a ni. College ka rah ve ţan chiah laiin anni erawh chuan kum khat chiah an nei tawh thung. 

"Tintin nizan chu engtin maw?" mipa ţhenkhat chuan an lo ti a, Tintin-a hi ka u, min chhang tu chiah leh Ka Ţhamama ţhianţhaber a ni. 

"Kimkimi thla ka hmu. Kawrfual var a lo dawng ve tawh a, mahse ka duh aiin an pe lian. A pian a nalh tehreng nen, tight deuh hlek han dawng se a nalh tur a nia" ka u in a tih chuan an lo nui huk huk hlawm a, vanduaina tawk mek fiamthu nan an hmang chu hmeichhe lam kan lawm lo viau thung. 

"Kawrfual var a dawn tawh chuan dam a kan hmuh a va rinawm tawh lo ve" an tih laiin Vani chuan "In mawl a nih chu. Kimkimi chhungte chuan hria se an haw ngawt ang che u. Private detective rawih thlenga kan sawi laiin fiamthu thawh nan in lo hmang a, mipui kan ţang rual ţhin lo hi alawm buaithlak ber ziah chu. Tunah pawh in nuih liam mai mai a, he case hi a zuzi leh dawn tih ka chiang" a ti tan tan a, hmeichhe lam chuan kan thlawp zia kan lo sawi sap sap a. 

"A ninawm..engmah tih theih nei mang si lo hian in lo vei ve em em a, in duh angin thil a kal leh dawn chuang lo. In rilru a na mai mai zawk ang" Rinawma bawk chuan a ti leh a, a dik ve tho. Tunah chuan tupawn kan ngaihven rih a, mahse nakin lawkah kan buai buaiin kan buai leh ang a, tuman kan hre zui leh lovang. 'Ka chhuichhuah hma chu ka beidawng dawn lo' ti tu an awm dawn miah lo tih chu chiang sa a ni. 

"Keichu professor ho te hi ka ringhlel rum rum tawh mai a ni" ţhut leh hnawk paha Vanin a tih chuan thil dang ka sawipui ta daih a. 

Canteen aţanga kan chhuak chu ruah a lo la tam angreng hle a, kawtah kan ding ţhap a, thli thaw chuan ka vun a chhem vawt seng seng a, Zuali sawi kha a dik khawp mai; kan khaw awmdan leh kan boruak tawn mek hi a inrem hlawl lo a ni.

"Sensiar, kan zung lawk dawn nia aw..i lokal ve duh em?" ka ţhianten an tih chuan lu ka thing a, "Va kal rawh u..ka lo nghak ang che u" ka tih hnuah min kalsan diak a. 

Tlemin ka chhuak phei deuh a, kawrfual ka hak ni berkher a thli thaw nasa lutuk chu hna ka ngah phah kher mai. Ka sam leh ka kawr ven a ngai a, ţhiante bag leh phone ka kawl vek bawk a, hahthlak tak a ni. 

Canteen lama ka phei leh lai chuan ka u, Tintin-a te ţhian ho an lo chhuak ve chiah a, canteen kawtah phei chuan thli a thaw nasa bik emaw tih tur a ni. Mipa ho chuan min en ţhap a, min chhaih chak tih pawh an hmel awmdanah a hriat vek. 

Ka kawr parh tur ka ven ţang ţang lai chuan tu emaw hian min rawn din hliah a, a hnung lam chiah hmu mah ila tu nge a nih chiang takin ka hre thei a ni. 

Vanmalsawma, ka Ţhamama ngei a ni. Ani hi Boomer tihin a lar zawk a, a chhan ka hre bik lo. Ka u nen an inkawm ţan tirh aţang tawhin Boomer tihin ka hria a, an koh duatna ang a ni ve maithei. An ţhiandun hming hi ran hming ni awm tak a ni. 

Zah zelah "Kalsawn teh" ka ti hlak a, a hnungah ka nam pah deuh bawk a. 

"Khua a lum loh nen Sen sir siari biang a tai sen sir siar ang chu" a ti vel a, ka ţhiante vangin ka star tih a hre vek tawh a, zak ngawih ngawih lo mah ila a nuam chiah lo. 

"I hmelchhia a nih chu" ka tih chuan "Chuti maw?" nuihzat hmel tak hian a ti a, sawi dawt lo mah se a ruk a ka duh avang hian a lawm chiang alawm. A ţhianpa nau chu ni lo ila min bem daih tawh ang. 

"Kal ang Boomer, i hnunga pitar ding kha chu ngaihven duh suh" Tintin-an a ti lung lung a, naute ngaihtuah nachang pawh ka hre lo. Ka u ve hi chu a mawl hlum lo chauh a ni. 

"Naa..ka nupui tur hian kal a phal lo. Min pawt bet tlat a" a ti vel a, a nuih a la zat hmel reng a, min fiam kual mai mai tih a hriat khawp mai. 

"I nupui tur ka ni bawk lo aw" ka tih te chuan "Hmanhmawh suh..hna te ka zawng ve phawt ang chu" a ţhiante hriat ngei tur hian a ti leh a, duh viau mah ila ka haw lutuk ringawt. 

Ka ţhiante an rawn thleng ve hram a, Boomer nen inhnaih lutuk a kan lo awm chu mak an tih hmel nasa mai. Ani lah chuan "Ka nupui tur hi in va ngaihsak lo ve. In kalsan vek a, mipa dangin a mal sen sir siar an hmuh ve ka phal hleinem" a lo ti a, ka lamah a rawn inher zui zat bawk a. 

"I zakthei lo e Vanmalsawm, nang ang khawlai mi lutuk neih atan Sensiari hi kan phal teuh lo mai" ka ţhiante chuan an ti a, a ner sawk mai. 

Ka ţhiante rual a kalsawn pah chuan "Tikhan ti kher mah ta che u. A rilru a na ve dawn a, in â lutuk mai" ka ti hlak hlak a, anni lah chuan "A duh ve che chuan fiam reng lo chein tih tak zetin a bem ang che. A insiamţha bawk ang a" an ti mai a, an vei loh hmel nasa mai. 

Pathianni zing a ni a, ka u Mala te chhung pawh chaw ei turin an lokal a, anni hian inhrang an chang tawh na a kan inhlat lo khawp mai. Police a nih vangin kan lo hnaih nghal vat a, midang hriat ve loh a Kimkimi chanchin ka zawh chuan "Sawi tur a awm lo" a ti hmuk a, zawh zui zel chi pawh a ni lo. 

"Khaw nge Tintin-a?" a tih zawm leh daih a, ka nu'n "A la mu aniang chu. Zan mut nachang a hre lova, zing thawh nachang a hre bawk si lo. Han hau ila a pawr pawrah a ţang a" a lo ti hlak hlak a, ka u ang hi chu in tinin an kawl vek ang. Zu heh bawk si, ţangkaina a nei hlawl lo alawm. 

"Inkhawm te a tum lo em ni? Boomer nen khan an la inkawm em? Khap ang che u..Boomer te chhungah hian eng emaw dik lo a awm a nia" U Malan a tih chuan ka lo ngaihven ru khawp mai. 

"Eng nge dik lo a? An hausa thut hi tihna mi?" ka nu'n a lo ti vat a, midang chuan an ngaihven lem lo.

"An veng pa in min hrilh a, a pa hlawh ringawt a ni thei lo an tih kha. Ani lahin dawr a siam a, chumi hnu lawkah hotel a siam leh a, hotel an sak chhung te kha a rei lo lulai emai. Chhui chiang rawh u a rawn tih kha" a ti hluk hluk a, ka lo ner nang nang a, engmah phei chu ka sawi lo.

"Ani Mami nen chuan kan inhre ve alawm. Ka mihlim pui a nia, Mami berkher chuan thil sual a ti lovang" ka nu chuan a ti nghal ringawt a, ka lo lawm viau thung. 

"Mihlim sawi takah chuan biakin a i ţawngţai hian ţap ve ziah suh. Ka lo zak ţhin" mutchhuak aw thatchhe deuh hian Tintin-an a lo ti ve a, a rawn thawh lai ka hre hauh lo. 

"Pathian min hmangaihna hi ţahpui tham a ni tih hre ta che. Inkhawm lovin theu leu mai mai suh ang che" ka nu'n a tih chuan ngeiawm tak hian a lo nui vel a. 

"Mi zawng zawngin Ruat ţahbelhi an ti vek che. Biakin chhungah Pathian hmangaihna i ţahpui a, pawn lamah mi fate i rel leh tho" a ti a, meizial ţanin a fawp zui pawt pawt a, ka nu tan chuan a ngeiawm ve viau ang. 

"Laltinkhum khatiangin i nu ti reng reng suh" ka piin a lo ti vin ve hlar bawk a. 

"Ka hmingpumin mi ko ve ziah suh. A mawi lo ropui si. Ka hming ringawt hria chuan putar emaw min ti vek" a ti vin nghek a, a hmaa ka pa ding chu 'kalsawn rawh' ti ţha ve mai lovin a pawm kang nawlh a, a dinna piah deuh a a nghah chawrh hnuah engthawl hmel zet hian chokaah a lut a. 

"Keini aia fate an len hian a buaithlak a nih hi a..min pawm nawlh nawlh mai chu a nia" a lu tuai nauh nauh pah hian ka pa chuan a ti chuar chuar a, U Mala takngial pawh a nui ve ta ringawt a. 

"Nep hek che mawle..han hau ila i ngawi tlat a, ka nu ha lem pawh rawng chi hrang hrang a a ţial nian nuan hi. Laltinkhuma thil tih bawk aniang chu" ka nu'n a ti bawrh bawrh a, ka pi a chip hmân thung. 

"A pawi in sawi aniang chu mawle. Tintin-a hi a sual hran lo a nia, hau lo ula chu ka nu ha lem pawh a chei rang lovang" a la ti tlat a, ka pa hi chuan a duat ve em a ni. 

"Mi chhungkua hi keini ang an nih ve ka ring lo reng reng. Pa berin ro a rel ang a, a ţul leh fate a hau bawk ang a, nang angin tu pa mahin an fate sualna an nuih liam mai mai lovang" a tih tan tan laiin tui bottle kengin Tintin-a a lo chhuak a, "Ruat ţahbelhi, thaibawih siamchhuak tu an ti che. A fapa Tintin-a hi makpa atan awt hlawm viau lo se chu tuman an kawm duh lo ang an ti bawk" a rawn ti leh hram a.

"Lo inrawlh tei vet suh. Nangmah vang hian i pa nen nitin kan inhau tih hre rawh. Nu leh pa hmangaihna reng reng nei lo mai" ka nu'n a tih chuan "Hawrawp puiin ka hmangaih che. Nangpawn hawrawp te chiahin min hau tawh la" a ti dam vei thlup a, engtik laiin nge Tintin-a lamah hmunphiah a thlawh phei hman pawh ka hre lo. Inchung chhauhna kailawn bulah hmunphiah a let ngât a, ka u phei chu thui deuh a chho hman tawh. 

"I duh duhin awm ang che Laltinkhum. Keichuan kut ka sil hmak ang. I pa nen hian in enkawl ula, min tibuai reng reng suh u" a ti leh tawh a, karkhatah vawikhat tal kut a sil ngei ngei ţhin. Ti hian tlaiah a ngai te bawkin an inhau leh mai ang. 

"Chhungkaw sawiselbo a awm theih loh a nih hi" ka lo ti ve sap a, kan monu chiahin a hre pha ang. Mi chhungkua kan vei em em lai hian kan chhungkua ngeiah siamţhat ngai a tam hle tho ţhin si, kan ţhat lohna aiin midang ţhat lohna kan hmu lian tlat zawk ţhin thung a. 

Chaw eikhamah inkhawm turin kan insiam a, sam ka khuih lai mekin Tintin-a a rawn lut a, ani chu a lo insiam peih diam tawh. 

"Ka rualin i kal dawn em?" a rawn ti ve ngial a, ka chhungte hian keimah chauh a chhuah hi an phal zan lo ţhin a, class kal leh inkhawm tih lohah chuan mahnia chhuah ka nei ngai mang lo. 

"Teuh lo mai..ka ţhianten min rawn sawm dawn" ka lo ti vat a, a beng a meizial inzep chuan mit a ti kham khawp mai. 

"Meizial te kha la thla ta che. Athuhrimah ka pi ha lem i lo chei rang em ni a? Pitar an ni tawh a, ha lem em em chu inkhawih sak loh tur a sin" ka tih chuan "A reh leh thei" a ti mai a, a ngaihsam lutuk te hi alawm buaithlak ţhin chu. 

Ţhianhoin kan inkhawm a, biakin kal dawn hian kawng chho zawh a ngai a, khaw lum zual phei chuan thlan a tla duh a, makeup hman chiam chi pawh a ni lo. Inkhawm banah kan chhuk leh char char a, step a ni si lo; pheikhawk sang bun phei chuan a ninawm duh bik hle. 

"Khuta khu i Ţhamama te an awm" Vanin a tih chuan a kawhna lam ka en vat a, an lo awm tak tak mawle. Kan veng a inang der si lo.

"A inkhawm ve lo em maw ni?" an ti nang nang a, mahse a inchei ve thlup tho sia. 

"A hmel hi chu a ţha thlawt alawm" ka lo ti thung a.

A mitmeng mawlh hi tawrh a har ka ti dawn nge mi a hip bik ka ti dawn pawh ka hre lo, a mitmeng a uk kharh a, a mit tlangkawm lah chu ka duh dan takin a chhah deuh tap a, a meng no lem lo na a a hnar ngul sang vah nen chuan inrem tak a ni. A hrawk bawk langsar zet te hian a ti lang sexy ka ti tlat a, a hmui lah chu fawh chakawm deuh, mawi tawk chauh si hian a chhah ka ti mai, a nui mawi em em mai lehnghal a, a khabe ruh kual te hi a invuah dik bik riauin ka hre tlat pek a, a sam a kir a, a inhmeh ka ti leh tho. Ka mitah chuan a ţha hliah hliah mai a ni. 

"Kan hrilh dawn nia aw. Zuali lo kal rawh Boomer khu Sensiarin hmelţha a ti che zuk ti ang" tih leh tlan an rual ta mai a, hlauthawng deuhin ka um thla a, kawng chhukah phei chuan pheikhawk sang nen mawi deuhin a tlan luih theih loh. 

Ka ke lamah eng emaw dik lo a awm tih ka hriat rual chuan ka tlan pelh tak ten "Sensiar i pheikhawk heel a tla" an ti tuar tuar a, ka ding thei tawh lo. Dingdihlip in ka tlan thla zel a, ka zak lutuk chu ka thlan a tla nasa tawh hle bawk. 

Zawl kan thlen hnuah ka ding ve hram a, Zuali ka kuah chawt nghe nghe. Ka hah lutuk chu ka thaw ham ham a, ka hawilet ngam tawh lo. Boomer ka Ţhamama te ka tlan pelh lai pawh ka hre reng a, ka tlan ţan danin a zir lo nge ka ding thei lo kha a chhan pawh ka hre lo. Ka pheikhawk bun lai lah chu a sang ţha ar ar ropui sia, inhliam miah lova ka tlan tlang thei hi a mak zawk. 

"Boruak i hnek thla buan buan mai alawm" Tintin-an a rawn ti a, a la nui huk huk zui a, hepa hi chu ka u ni lo se tih chang ka ngah mai. 

Boomer thung chuan ka pheikhawk heel thlawn ta kha min pek pahin "Cinderella lite" min ti a, a awmzia ka hriat hauh loh laiin ka ţhiante nuih a za hle thung. 

"Boruak hi Pathian thil thlawn pek zinga ropui ber pawl a nia, khati fakau a hnek tur em ni?" Tintin-a chuan a la ti zui zel a, an ţhianho nuihza insum hmel chuan min ti zak lehzual ti ila ka sawi sual lo khawp ang. 

Boomer zawk chu ţhu hniamin ka ke rekah a man a, a kutthlak a na em em mai lehnghal. Dim lo zet a ka pheikhawk buckle a phelh hnuah din chhuah leh pahin a pahnihin a rawn khai lang a, "A siam theih ang" a tih nghat rual chuan ka lo chhuh sak a, ka zah dan em em hi sawifiah theih pawh a ni lo.

"U Daizau-in eng nge a tih?" ka ti ta ringawt a, nuihza hmel a la pu na a "In ah a awm" tiin ţha deuhin min chhang tho a.

An awmpui a nia, kan venga a rawn kal ngun vangin kan inhre ţha ve tawh viau. A ţawng duh a, kan ţhianho phei chuan kan ngaina lutuk ringawt. 

Kan in a hnai tawh tho bawk a ke lawngin ka kal a, ka ţhiante lah chuan "Cinderella kha chu lal fapa in a pheikhawk thlauh a chhar sak a, nang chu Muan dul kiar-a fapa in i pheikhawk heel a chhar sak che a, cinderella lite i nih phah a" an ti a, an nui bawk bawk a, rilru tet vang pawh ni lovin ka nui ve hleithei der lo. Ke lehlam chiah dingdihlip a ka tlan thla kha chu Tintin-a tan lo chuan ka hmuhnawm loh khawp ang. 

"I ban i vai vak vak kher a, a nuihzatthlak vek alawm" an la ti tak deuh deuh a, ka mangang em a ni. Min hriatpui ve mang bawk si lova. 

Kan inah thingpui in turin an lo lut kawi a, "Ka han inthlak lawk" ka tih hnuah inchungah ka chhoh san a, Tintin-a min tih dan phun chhuah pui hlak hlak reng chungin ka insil fai a, amah anga zakthei loah min ngai ţhin a, ka haw hlur mai a ni. 

Inhnuai ka chhuk leh pawhin ka ţhiante an lo la nui tet tet a, "In ninawm" ka tih hlak hnua choka a ka lut chu ka mihring hmuh chuan min ti ding chiang kher mai. 

Tintin-a te ţhian ho an lo ţhu ţhap a, midang ho phone en a an nuih kiah kiah laiin Boomer bik chuan min lo nuih suk a, "Ka la tam hman lo..a hnung lam chiah ka la a, a ban vai lai kha la tel thei ila ţha tur" an ţhian zinga mi Patean a tih chuan rang zetin phone ka chhuh sak a, mangang deuha ka tlan thla lai kha video in an lo cover hman hram chu niin. 

"In van nghal tak aw. Thingpui pawh ka siam sak ve lo ang che u" tih bakin ka vau thei chuang lo. Dawhkana ka phone theh thlak chu rang deuhin an chhar a, video an hmuh rual rualin an nui leh a. 

"Ka ţhiante ho hi ka ngei hle mai..ka nupui tur hi nuih suh u ka ti mawlh mawlh a" ka bula rawn din ve pah hian Boomer chuan a ti a, ka melh chho hrak a, a nuih a za ve tih chu a aw ah ringawt pawh a hriat tho sia. 

"I dam ţha vek tawh em?" thutak deuh a ka tih chuan lu min buk khum nghutin "Nausen piang hlim ang vel ka ni" a ti sup a, hmanah kha chuan shillong leh guwahati ah te an hruai ţhin a, Tintin-a a mangang ţhin hle a nih kha. 

"A ţha lutuk ringawt. Damlo tawh miah suh ang che" ka tih chuan a lawm hmel ve vur vur reuh khawp mai. 

An vaiin thingpui ka siam ve a, video erawh an la delete phal chuang lo. 

Kimkimi pawh an zawng ve zel a, ngawrh deuhin zawng ve bawk mah se a ruang takngial pawh hmuh tur a awm chuang lo. Vuina hun an hmang a, college week pawh an sawn hla a, zirlaite chu kan ngui nghiai hlawm a, kan hlau bawk. 

Ţhenkhatin "A thi tawh ang" an tih laiin ţhenkhat chuan "A tlanbo aniang" an ti a, kan khua chuan mi te ngaihven a hlawhin thuthar a awm leh awm loh an ngaichang ţhap reng a, police dem tawk an tam a, thil inti hrechiang fe fe an tam bakah Kimkimi nundan ţha lo lai mipui hriat a puangzar duh te an awm zel a, hre ve lo tu nih an hlau zawk emaw tih tur a ni. Chutiang nuaih karah chuan nitin class kan kal ve zel a, ka chhungten ka haw tlai an hlau lehzual a, min khuahkhirh nasa zual sauh ti ila a dik ber ang. 

Ka nu chuan kan nun hi tunhma aia a danglam vakna a hriat loh thu a sawi ţhin a, ţhalaite an fel viau ţhin a, mahse tunah chuan insual mai hreh lo, buaina siam ching an tam leh ta lutuk tawh tih tein a sawi ţhin a, kan veng ngat phei chu buaina siam nan a rem aniang chu; ka u police a ni chung pawhin intibuai an awm leh ţhin. 

Ruihhlo a hluar a, ţhalai tam tak a tibuai a, chung zingah chuan ka u pawh a tel ve tho a, mihring kan ţha famkim thei lo ang bawkin chhungkua pawh kan lo ţha famkim thei bik lo a nih hmel. Kimkimi bo thu chuan zoram a dengchhuak a, zu a duh zia leh fawr bo a hrat zia te an sawi tel zel a, khawngaihtu tam tak an awm laiin "A phu ve tho alawm" ti tu an awm zel bawk a, mihring rilru hi a lo inang lo thei khawp mai. 

Week chu kan hmang ta ngei a, kan house kan nep kher mai. Mipa anga insiam a inkhelh ve mai ka duh hial a ni. 

"Rohluchharliana khu a tlanchak vang ringawtin an khelh tir a, khu ball a tlan san zel khu" Riri-an a ti lung lung a, ball a um par par a, a speed a thunun thei lo leh a, pet fuh tum deuhin ball a tlanpel ta ţhin a, a hmuhnawm loh a ni tawp mai. 

"Awii...Tlumtea thiam bik zia khu. Ka ţan tawp a ni mai. Tlumte ball kha ka thinlung a nih kha aw pet dim deuh rawh" nui har har chunga Vanin a tih chuan kan ţhutna lam an lo hawi ţap mai. Kan house ţan lovin house dang a ţan miau alawm. 

"Tlumtea kan house a ni lo" ti mah ila "Kan mipa te ve khu e..ball an hlau a nih chu. Pet fuh ve thei reng reng lo mai. Rohluchharliana lah a hmaa ball a awm apiangin a zuan khum zuk loh leh a tlan pel zel a, nep zel zul hlawm lutuk. Hah hmel deuhin an rawn hawi ang hu zel lehnghal a a(h). Awii..an chhia, ka ning" a ti hlak hlak a, junior ber ang kan la ni bawk si, tlem a inti senior ve deuh te chuan an ngei hmel khawp mai. 

"Week an sawn hla kher kher hi a buaithlak. Khua a lum leh tawh lutuk a thlan nen kan ţhu chiau pur reng mai. Hetiang a nih te chuan ni tla ngai lo zion khawpui phei chu a lum ngawt ang. Ka kal chak lo rum rum thei mai dawn alawm le" Riri-an a lo ti ve hluk hluk a, tui kan in deuh reng a, lukhum khum lo phei ila chu men a har viau ta ve ang. 

"Boomer khuan inkhelh chu a thiam mawle. A khel duh tawh tlat lo a, eng nge maw a chhan ni dawn ni" Rinawman a lo ti ve khauh a, a damlo ţhin tih chu ka hria a, mahse ka dam a tih tawh hnu pawha inkhelh a duh tawh tlat lo hi kei takngial pawn a chhan ka hre bik lo. Engtin pawn awm se, a thutlukna chu engpawh lo ni se ka Ţhamama a ni tho tho. 

Rinawma leh Riri te hi kan hriat ţhan sa an nia, keini aiin an u na a kan inkawm nasa khawp mai. Mipa dang hi kan la nel lutuk lova, Vani hian fiam bawrh bawrh ngam a ngah tawh viau thung. 

"Kimkimi bialpa saw a ţhu ngawi reng zel a, a khua a har hmel ka ti" Thartein a tih takah chuan Kimkimi bialpa ţhutna lam chu kan hawi phei a, a bula mi te an nuih dar dar laiin ngawi rengin inkhel a en a, inngaizawng an nih bakah ţhian inkawmngeih tak an nia, a khawngaihthlak khawp mai. 

"Kan nu leh pate lah hian nangni ang rual kan nihin ngaihzawng neih nachang kan la hre lo an ti ve a, hmanlai te kha chuan nupui pasal an nei hma thei lutuk ringawt. Keini ang rual an nih te chuan fa an nei daih tawh ang" Vani chuan a lo ti ve thung a, an thusawi a inzawm lo khawp mai. 

"Keichu ka rilruah Kimkimi a la awm. Mi hian a nun an phawrh nasa sia, a nu te pawn hriat loh an ngah ang ka ring. Inchhungah chuan naupangchhia deuhin a awm an tia, pawn lama a awmdan an sawi kha a rapthlak hle sia. Nu leh pate hian fate hi hrechiangah in ngai mah se an hrechiang vek lem lo aniang" Zualin a ti mawlh mawlh bawk a, kan hmelmate ai pawn nu leh pate hi kan bum nasa zawk ţhin ang ka ring. 

"Nang kha ngati nge min auh vak vak a? Ka zak mai dawn alawm. Ka inkhelh leh hunah chuan i mit tuam tawh ang che" Tlumtean a rawn ti a, kan ţhiannu ngei a rawn be bawk si, kan ngawi ţhap mai. 

"Ve lutuk che hian..i inkhelh puite thiam loh vang liau liauin i langsar a, i inla changtupa ve ringawt em ni a? I mawng fual per pur nen. I ngal a sin a, i khup a lawk luau a, duhawmna i nei hlawl lo. Lar i la zo lo em em zui a, khup inkhawng bawp bawp khan tlankual leh la a nih chu" Vani chuan a ti hmak a, nuih a za ru ţeuh mai. A zia hrechiang lo hian an han khak ve ţhin bawk a tuman an ngam leh ngai mang si lo. 

Week closing kan hman hma zanah ka ţhiante nen kan inbia a, Boomer hnen aţangin message ka dawng ve hlauh bawk. 

{I u a lo haw tawh em? Ka be thei lo a biak han tum teh} tih zawng hi a rawn thawn a, romantic lem lo mah se ka lawm tawk a tling khawp mai. A dp ah chuan a zawhte, Kungawrhi thlalak a dah a, ka ngainat lem loh vangin mawi ka ti chiah lo. 

Tintin-a ka biak tlang theih loh hnuah {Ka be thei bik lo} tih chiahin ka chhang let ve a, a seen vang a, min reply lo thung. 

Zuali ka hrilh ve chuan {Be zawm zel rawh. I duh em kha} min rawn ti a, midang pawh an ni tho. Group ah kan inbe bawk si lo, be zawm zel rawh an tih vek avang chuan {Boomer min lo duat ka ti dawn mi?} fiamthu hian ka ti a, Zuali ka thawn zawh hnuah ka message ngai chu midang forward mai ka han tum a, ka chesual ta. Ka ţhiante chiah thawn tum khan Boomer ka thawn tel ve tlat!

{Umm..duat che..duat che} min rawn ti a, kei erawh zakin ka vial ngal ngal a, hetiang te chuan kan inah pawh rawnkal se ka lo hmu ngam tawh nang mawle. Ka ţhiante lah chuan min hnem ngaihna hre lovin min nuih tlawrh tlawrh hlawm a, min hnem tum ve ber Zuali chuan {Bible ah a inziak tello na a hmangaihna hian zahna a keng tel alawm} a rawn ti a, chuzawng chu thu pangai ka dawn a ni mai. 

Week closing ah chuan chawhma lam chu a ninawm viau mai. Mawng kham ţhumin thusawi kan ngaithla a, chawhnu lam erawh boruak a zangkhai ta deuh. Hun tawp dawn lamah phei chuan ka u Tintin-a te ţhian ho zai turin an sawm a, band an din ve a, zai tur a sawm tu an la nei lo thung. 'We the people' band an in tia, an tum ber chu mi hla sak hnu nalh an tih apiang lo sak chhawn ve zel a ni. A ropui lo khawp mai. 

An rawn chhuak ţham ţham chu "An uang leh ang chu aw" an lo ti a, an zia hrechiang apiang an nuih a za a, "Kan hla sak tur hi tlai khawhnu ah kan thlak a, Sensiari tih hla..Pachhunga sak ngei kha aw. Hla hlui a nia, in hre ve kher lo ang" a tih te chuan fiamthuah an ngai vek tawh a, a nau ka nih vanga chu chu sawi a nih an ring vek. Ka rindan pawh a ni ve tho, min tihzah a tum leh tawh a nih ka rin laiin a ri ta bur bur a, hall chhung a awh khat nghal mup a ni ber. 

🎶Sensiari, tleitir, Sensiari,

Enchim loh Sensiari, sakhmelmawi;

Vangkhaw tual i mawi ngei e,

Sensiari, biangno, Sensiari,

Ka hlan che hmangaihna number one,

Lo 'Yes' mai la dawn ti tam🎶 

An hla sak mai mai chu..Riri-a leh Rinawma te chuan rimawi rem lo deuh a suk ve zuk zuk pahin min nam bu lawp lawp a, ka hming hre ve tu ţhenkhat chuan nui ţhaw chungin min en bawk a, a nuam lo duh kher mai. 

A tawp dawn emaw kan tih tawh hnuah a ngai te bawkin a ri leh a, ka hawi chhuak ngam tawh lo. 

🎶Sensiari, mengmawi, sensiari,

Boomer-a duatlai duhawmte;

Ka thinlung i khuai nuai mek,

Sensiari, sam sei, sensiari,

Ka hlan che hmangaihna sipicial,

Min chhang mai la Sen sir siar🎶 a ti leh a, a phuah chawp tawh chiang lutuk. 

Lungawi lo deuhin ka hawichhuak a, stage a an ţhianho nui ruh ruh chu ka hmu hmasaber a, an fiamthu leh fiamthu loh zawh chawp pawh an ngai lo. 

"Vari saw a nui duh miah lo" ka ţhianten an tih chuan ngam leh ngam lovin kan college miss hlui chu ka melh a, kan lam a rawn hawi ve lo na a kuangkuahin a ţhu tum bar a, an zai chu a ning tawh niin a lang. Vari tih hi a hming pangai pawh a ni chiah lova, a vun a ngo em avangin Vari an tia, a pu hlen ta ni awm tak a ni. 

"Message thawn sual kha engtin emaw tak a chhaih zui che ka ring reng a ni" an ti a, ka thawnsual hnua an hla sak tum an thlak a nih chuan en lawkna hun an nei tlem viau ang. Zaithiam vak lo mah se an sa sual lo ringawt pawh kha a lawmawm hranpa ve hrim hrim. 

In thlen hnuah an hla sak kha youtube ah ka zawng a, a lo awm ngei bawk. A hla thu hriat a har zek lehnghal a, uluk deuh a ngaihthlak tum ve laiin ka nu'n min lo tir ve sek bawk nen, a ngaihthlak hleih theih meuh lo. Fa tlum ber leh hmeichhe awmchhun mah ni ila ka nu hi chuan min dim lem lo khawp mai. Nileng zankhuain che mah ila inchhung chet chu a hahthlak loh a ti tho ang. Chutiang vel chu a ni. 

Pathianni zanah chuan a ngai te bawkin kan inthlang lamah intibuai thawm hriat tur a awm leh tawh a, ka nu nen kawt laia bawlhhlawh kan dah chhuah laiin a ni nghe nghe. Thim chinah an awm na a thawm a ringin intibuai an awm tih haih theih rual a ni lo. Inchhung aţanga kan chhuah pawh khan dar10 a pel tawh a, duty an awm loh phei chuan an intibuai rei leh viau ang. 

"En reng reng suh...saw tiang a ţhing lutuk. En tlak pawh an ni love" ti ve bawk mah se ka nu chuan a en reng tho a, "An insual em maw ni le nge an inhnial zawk?" te a tia, ka ngaihven ve tih a hriat veleh en lo turin min ti leh ţhin a, a awmzia lo ve khawp mai. 

"Tintin-a a awm em han en teh" a tih takah chuan ka tlan let a, buai naah a tel ve ziah a, duty te lahin an man ngun, ngaiah an nei tawh zawk ang tih tur a ni. Hei vang hian ven deuh hlek a ngai ţhin a, mahse inchhung a ka tlan lut tur chu a rawn chhuak tur nen kan insu chawrh a, "Kal suh aw" ka tih chuan gate a thleng phei der tawh. 

"Laltinkhum va inrawlh ve reng reng suh ang che. I kal luih dawn chuan nu pawh min ti tawh suh ang che" ka nu'n ti hlak hlak mah se "Aw le ka pi" a ti a, a kal lui tho a, dan theih a ni lova, ven theih pawh a ni lo. 

"Laltinkhuma hi chu aw" ka nu chuan a ti nang nang a, buaina awmna lam a thlir reng hnuah "Ti teh va ngaihven teh ang. I u Mala lah hi a tawm bo hmak zel a, buaina a awm te chuan inrawlh vat a, man vek mai tur a nia" a ti tan tan a, a pen pah hlawk hlawk bawk a, fate ngaihtuah hi chu a na a ni. 

Kan inpiah lamah in a awm tawh mang lova, hei vang hi a ni pakhat ang intibuai an awm ve ziah ni. Kimkimi bo hnu kha chuan mi an fimkhur a, hetiang hi kan hre rih lo turah ka ngai ve ringawt a, a lo ni der si lo. 

"I phone light han ti eng teh" a tih chuan ka ti eng ve mai a, min chhuhsak hnuah "Helai hmunah hian engati nge buaina in rawn siam fo a? In kal sawn nghal loh chuan police ka ko dawn a nia" a ti vak vak a, a ring kher mai. 

Insual buan buan zinga ţhenkhat pawh chuan "Hitlûri a lokal" an ti a, a tam zawk chu an tlanchhe nghe nghe a ni. Ka nu hi tupawn an hlau a, a ţawngţai nih phei chu an duh teuh lo. Hitler han tih ngawt chu an hreh ve deuh aniang Hitlûri an ti mai zel a, an koh dan ringawt pawh hian ka nu hlauhawm zia a sawifiah chiang viau awm e. 

A luhlul zual an la awm a, ka nu aw hria ang pawn an awm lo. A thim mup a, ka nu'n a ên chin loh chu engmah ka hmu thei lo. 

"Khawih tawh suh u" tih te, "Boomer" tih te a Tintin-a au ri chu ka hriat awm chhun a ni leh tawp a, hlauthawng deuh a ka awm laiin mi pakhat hian min nghawk vak a, a na kher mai. Boomer ngaihtuah viau mah ila ka insa seng vat a, ka nu pawh chuan "Ngah nge maw fate rual lek lekin min pawh phar dawrh dawrh le" a ti leh ţhin a, a mak ber zawk chu tumah an rawn lang lo hi a ni. A chhak lawkah pawh in a awm a, an thim ţhap a, tuman thawm an chhuah lo. A reh em avangin intibuai thawm a ring lehzual a, duty takngial pawh an rawn lang lo hi thil mak tak a ni. Zu rim a nam nasa a, ka nu takngial pawh an hlau zo tawh lo a ni ber. 

Intihbuaina chheh vela awm te an reh ţhap ka ti tak na a mi an ko aniang patling rual an lo thlen chuan an kiang dual a, man chin an nei a, tlanchhia pawh an awm. 

Kan veng hi chu an inthlahdah min ti ţhin hrim hrim bawk a, tin, sawi tawh ang khan thlang lamah hian in a tlem tawh bawk. Thil sual tihna atana hmun remchang a tam a, tun a an intihbuaina thlang lawkah hian ruang pawh an chhar tawh nghe nghe a ni. 

Lei a let hlawm reng light a an han chhun chu ka phu chiang kher mai. A thawmhnaw a balin a hmai te chu a thi nasa a, chuti chung chuan Boomer a ni tih ka hai lo. A thaw a hah kher te chuan min ti mangang lehzual a, ka u in kuah din mai a han tum chu an lo dang vat a, "Melh hlum ţhak in tum em ni a? Zurui hoin an sawisak rawn tirh khan rawn in lan vat ta che u. Ka ţhianpa hi engtia tih nge in tum a? Thawhah chung hian in man ve tho dawn mi?" a ti deuh khur khur tawh a, tumah a zah zo tawh lo a ni ber. Motor an zawn mek thu an hrilh hnuah man ho zinga ding ve turin an hrilh a, damdawiin a an hruai dawn ber te chuan a ti aniang a phei ve hnuk hnuk mai. A thubuai a sân lutuk a hlau te pawh a ni mahna le. Ţhenkhat chuan an buaipui tho a, ka nu paw'n motor lo thlen hma zawng chu rap hmel deuh chungin a buaipui ve char char a, kei chuan ka hnaih ngam ngang lo a ni. Thisen hi ka hmu thei lo, a mak lutuk ka buai vek zel.

"Laltinkhuma min han tihbuai theih zia em em hi chu..tikhan thu an zawhfiah chhung zawng men leh a ngai ang a, ka pum chhungah hian hnawh luh leh theih se chu kumkhuaa rai huamin ka hnawh lut leh ang" ti hlak hlak chungin inchhungah ka nu a lut a, kei erawh chuan Ka Ţhamama ngawt kha ka lo ngaihtuah thung. 

"Sawlai lah saw a fal deuh hlek e tih vang maiin tharum a thubuai chinfel nan tak an rawn hmang ziah lehnghal a, midang lah hian ngaiah an nei tawh em maw ni thawm a rin viau pawn an ngaihven duh ngai ţhak lo lehnghal a. Kan fapa hi tel ve ziah lo se chu keini pawn ngaiah kan nei ve thei mai ang. Hre lo der hmak ila, duh duh danin han inhrual vel mah se pawi ka ti bik lo. Laltinkhuma liau luau vang hian tel ve a ngai ziah. Mipa an rawn inlan duh bawk si lo, hmeichhia chu ni lo ila ka ţhelh mit nghal vek ang. Hmeichhia ka nia, min nghawk thal tawp hlauin ka hnaih ţha ngam lo zawk a" a ti bawrh bawrh a, helai hmun kher an rawn pan ţhin hi a mak ngawt tak tak mai. Ka nu pawh hi a fakawm ve hrim hrim, a fapa a ngaihtuah vangin tlangval rual zingah a kal ngam ngat a nia, a hnaih ngam lo mai pawh a. Patling ho kha lo thleng vat lo se la chu a tal buai ve viau ang. 

Thil hi a kual a kual a, hman a an chin ţhin, an bansan ta emaw an tih kha tunah an ching thar veleh a, fashion a inthlak ang deuh hian mihring khawsak phung pawh hi a inthlak ve ţhin niin ka hria. Hnampui kan tih ho pawh hi an changkang viau na a an ramah hian sualna a nasa hlei hlei emaw tih tur a nia, kan khuaah chuan gang pawh an la awm ve em hleinem. 

Tintin-a lo haw chu ka nu leh paten thu an lo zawtfiah nawn leh a, keipawh ka ţhu ve tlat. 

"Aww...ka ţhianten min rawn hrilh a ka kal a ni mai alawm. An awm mai mai lai khang ho khan an rawn tibuai a" a ti nuah nuah a, ka nu a lungawi lo khawp mai. 

"Boomer kha a tel ve em ni?" a ti vin hlar a, "An tibuai ka tih chu mawle. Boomer te chu insual chi pawh a ni lo. Aman a dinhmun a hrechiang ber a, buaina a chawk chhuak dawn lo tih hre tawp rawh" a tih hnuah ka nu bawk chuan "A thaw kha a hahna a rei tawh em?" a ti a, Tintin-an a nin tawh hmel takzet thung a. 

"Ka ţhiante ka va pui a engtin nge a thawhah hun ka hriat chat theih bik ang a? Mahse a la rei lo ang..an buai tirh aţanga hah nghal chu nise a thi daih ang" a ti puat puat a, ka nu in a biak leh lai mekin a tho a, helmet a ban nghal vut bawk. 

"Kha..khawiah nge kal ila tum?" ti a ka pa a lo inrawlh chuan "Damdawiinah" a ti hmuk a, a kal nghal mai bawk a, "Kekawr tal ha rawh" an tih te chuan kawngka a pel daih tawh. Boxer nen chauh damdawiinah a kal dawn chu a nia. 

"Kan Laltinkhuma hi chu aw" an ti vang vang a, ka ute ho pawh hi keimah min khuahkhirh nasat tehlul nen Tintin-a chu an en liam tawp a, tunah pawh tuman an hau lehpek lovang. 

Ka ţhiante hnen a chanchin ka hrilh ve chuan Tintin-a an bia a, na lutuk a nih loh avangin chawl hahdam turin Ka Ţhamama chu an inah a awm a ni awm e. 

"Kan ve ang u" an ti a, ka zah deuh vangin ka lo hnial a, "U Daizaui kan chhuanlam mai dawn alawm" an tih tak tlatah chuan class banah an vengah kan kal a, inchhung luh pawh ngai lovin U Daizaui chu kawtah a lo awm a, phun mawlh mawlh chungin zawhte a lo chul hliau hliau mai. Sap hming a nei ve ngei a, an kaih leh sak a, Daizau-i a ni daih. 

"U Daizau" kan tih chuan min rawn enin a nui var var a, "Vawiin chu card i deng nange?" kan ti a, a lo bu zeuh a. 

"Damlo ka awmpui sia, card denna hun pawh ka la nei lo" a ti a, a ding nghal uaih bawk. Kan vengah hian in hnih vel lekin ruk deuh takin zu an zuar a, Pa Siama te in zawkah hian U Daizau hi a lo leng ţhin. Chuvanga inhria chu kan nia, chhuatah card an deng ţhin a, a lai takah ţhuin U Daizaui hi a nui ring ber ziah a, patling ho pawn an lawm ţhin hle nghe nghe. 

"Damlo awmpui ve si engatinge pawnah i awm?" kan tih chuan "Ka hlau a" a ti mauh mai a, "Eng nge i hlauh?" nui hak hak chung hian kan han ti leh a. 

"In sawichhuah tawh dawn loh chuan thil ka hrilh ang che u" a ti leh daih a. 

Sawichhuak lo tur a kan intiam sap sap hnuah an inpiah deuhah min pawt phei a, kan han ding ren rawn phawt a, "Sawi tawh la" kan tih te chuan a hawi kual zak zak a, hlauhawm a awm lo tih a hriatchian hnuah "Vanmalsawma a thi tawh" a ti sap a, han nuih dawnin a thutak angreng bawk si. A ngaihna ka hre lo khawp mai. 

"Eng nge i sawi awmzia chu ni a? Boomer te chu nizan pawn an sawisa hrep a hei kan rawn kan dawn a nih hi" Vanin a tih chuan "Tun a mi hi tu nge a nih ka hre lo reng alawm. Ngaithla chiang hle ang che u. Nizanah ka muhil thei lova, choka a ka pu leh Ni Mami te inhau thawm ka hria alawm. Choka luhna bula bang phenah khan ka biru reng a, min rawn hmu ang tih ka hlauh zia chu aw" a ti hmasa leh te te phawt a, chumi hnuah "Ni Mami zawkin thinrim deuhin 'Vanmalsawma chu a thi tawh. A sen lai khan a thi daih tawh' a ti alawm. A vin tehmai a nia aw, ngaithla ve ula chu in hlau ve tho ang. Thlahrang hi mihring ang hian ţhang ve thei se chu tun a kan Boomer hi thlahrang emaw ka tia nga ka hlau lehzual ang a, mahse thlahrang an ţhang thei si lo a" phawk hra hian a ti a, amah hi â phuang chi a ni ve a, a awmna te inhauhna a sawi chhawn leh tih loh hi chu a thusawiah rintlak a awm lo. 

Mahse, a pa leh ani inhauh dan min hrilh hi a tak tak a nih chuan tuna Vanmalsawma emaw kan tih hi tu nge ni ta ang?

CONT..(A zawmna chu thawhţan zanah aw. Thawhţan zan aţang chuan zantin, Pathianni zan tih loh chu chawl lovin ka dah tawh ang💛)