VANMALSAWMA-10

VANMALSAWMA-10

Ka nu leh U Daizaui te dawr a an buai viau laiin pindanah ka inkhung a, ka ţhu hle hle thei chuang lo. Ka u in engmah a sawi si lo a, khawiah nge an kal ang aw tih te, an inkawp kim chiah sia eng nge an tih ang le tih vel mai mai te ngaihtuahin awmhmunah ka lo hah hle ringawt a, hre lawk ngat ila chu ka u tal ka zui lui duh ngei ngei ang. 

Ka insum thei tawh ngang lo chuan "Khawiah nge i awm?" tiin message ka thawn a, message en hman lo khawpin hmeichhia a chul vel lo turah ka ngai.

"Kţp hnatlangah ka kal" a rawn ti a, ka awih lo lutuk chu thinrim viau mah ila ka nui tawp. A hnatlan loh zia hrechiang viau mah ila "Eng hnatlang nge?" ka ti hram tho a. 

"Khua a lum chho zel a, vur siam hnatlang" a rawn ti a, a bahlah eih bawk si lo a thudik sawi a inthlahrunawm tawh zawk. 

"Eng group nge i nih? Hnatlan an tih ka va hre lo ve" ka tih chuan "Tlema ţhahnemngai pawlin vur kan siam mai mai. Sum tuakna a nia" a rawn ti a, ka va han awih lo lehzual tak. Khawilai hmunah emaw an hmeichhe hruai ho nen khan an intihlim mek awm sia, chhuanlamah kţp a la hmang zui, Tintin-a ang bawka sual hlawm lianpui a nih duh ve hmel ka ti tlat tawh. 

"I dawheh ziap zuap a nih chu" ka ti a, min chhang let har thei si, phone ka en sek reng a, minute sawm vel hnuah "Dawt ka sawi hleinem" a ti a, ka ngei lutuk chuan "Hmeichhia i phur kha an hmu che aw..ka u pawh a tel a, in vaiin sawm in nia, min duh tak tak tawp si lo a" ka ti a, ka zak buai peih vel lo. Zah vangin ka duh ang lo sawi ngam lo ta ila chu chhungrilah ka pai reng ang a, ka vei zui reng ang a, ka lo sawi mai lo a ni tiin keimah ka indem leh tho ang. 

"Barbie suak nge barbie tak i duh zawk?" min rawn ti a, naupanlai ka ngaihtuah kir a, barbie suak tlo lo deuh ai chuan a tak kan tih ţhin ngei mai kha kan duh zawk ţhin a nih kha. 

A message chu hrethiam lo viau mah ila "Barbie tak ka duh zawk" ka ti a, a seen ve vat mai. 

"Khatiang chiah kha a ni mai. Barbie takah in ngai rawh. Kan hmeichhe hruai ho hi chu a suak mai mai" a rawn ti a, a ngaih a sam bawk si, min bem lai hian mipa dang nen min hmu dun ve se engtin nge a tih ang aw tih te ka ngaihtuah kual nasa mai. 

"Vur chu in siam lo tihna a ni maw?" ka tih leh chuan "Tunlai khaw chin a hriat loh an tia, kan ţhulh leh a nih kha"  a ti a, ka chhang peih tawh lo.

"Sensiar dawrah lo va awm rawh. Dawr siam i rawt ve ringawt a, i ngaihven leh peih mang si lo. Daizaui kha lo lut thung se la rawng bawl a hun tawh" ka nu'n a ti ve chiah bawk nen phone hum ran chung hian ka chhuak a.

"I u in phone en tam suh se a tih che kha" ka piin a lo tih chuan "Ti reng ang chu. A rukin min hek ziah a nih kha" ka ti bak hlar a, min melh hruk a, chutah tv en leh pahin "Ka hek che pawh ka hre lo. Min zawh pawn engmah ka sawi ngai lo. Pitar ka ni tawh a, in nundan hi ka sawifiah thiam zawng a awm ve tawh lo" a ti chuar chuar a, dawt a sawi chiang lutuk ringawt. Hun remchang a awm apiangin Tintin-a a bekbawr sar sar zel a, ka hre ru ve ran tih an hre lo mai mai a ni. 

Dawrah U Daizaui a lo la buai khawp mai a, ka nu'n kuhva zawrh tel ţalh a duh a, chu chu keimahnin kan la buaipui rih a, engmah ka ti thiam ve bawk si lo, a thiam awmchhun U Daizaui leh ka nute kut a awl khat a, panhnah tak chu sil chhawk ve zeuh zeuh mah ila anni ai chuan ka hahdam daih zawk. 

"Chhamdamin min lo bia a, Ngaihtei thla a hrang nasa lutuk a rawn ti. Sarthi a ni sia, sawi tur a nei em mawni te ka ti" a ti a, a hlim loh hmel riauin ka hre lehnghal a. Chhandami a tih hi U Daizaui card denna ţhin Pa Siama fanu a ni. 

"Keichu ngaihdan danglam deuh ka nei a" ka tih chuan a kuhva thel lai chawl meuhin min en a, "Thlarau hian an damlai a thil thleng an hriat tawh ka ring lo" ka ti chiah chu a lo nui hawk a, a awih loh hmel nasa mai.

"Hre lo se chu anmahni in te an hre chat thei nang. Thlarau inpuanna tih te a tam a, thil ni lo tawp chu tuman an sawi lo ang a, an ziah pawh ka ring lo. Thlarau lungawi lo phuba lakna tih te chhiar tur a tam a, anmahni thattu an puan dan te pawh hmuh tur a tam alawm. Keichu thlahrang hi an awm tak tak ka ring a, anmahni thattu pawh an puan ţhin ka ring. Ni lo se chu tuman an sawi lo ang" a ti a, ka ngaihdan ka sawhsawn lo thung.

"Chutiang chu ka rindan a ni ve lo. Mihring hian thlarau chu kan nei ngei a, kan thlarauin a pan lam tur hi keini lo sawi ve tur a awm lo bawk. Ngaihdan neih chu thiang a nia, mi pawi ka sawi phah lo bawk a, mihring kan thih hian kan hriatrengna te pawh hi a thi tel ve vek a, tu nge kan nih tih te, min thattu te emaw khawvela nun kan lo hman ţhin dan te hi pakhatmah kan hriat ka ring tawh lo. Mi thar hlak angin kan tho ang a, kan thih dan takngial pawh kan hriat ka ring lo. Engkim kan theihnghilh vek ka ring. Mahse hei hi keima ngaihdan ve mai mai a nia" ka ti a, a pawm loh hmel khawp mai. 

"Thlarau lam zir mite chuan ţhamawli an ti dawn che a nih hi. Sap ho pawn hmun hrang te an fiah a, thlalak ah an chhung zinga mitthi tawh an lo lan ve chang te a awm a, khawih chet ni hauh lova thil che hmuh tur a awm ţeuh bawk a, khatiang kha eng nge a nih i rin? Mit dawivaih nge meng kuau chung hian ka hmu sual ve hrim hrim zawk?" uar zet hian a ti a, a mit pahnih chu a keu tel kher bawk a, a thusawi kha ka awih loah a ngai a, a lawm chiah lo tih a hriat reng mai. 

"Ngaihdan neih chu a thiang ka tih tawh kha. Hmun hrang te chu a awm ve bawk ang chu, thlarau kan nei a, thlahrang a awm te chu ka ring lutuk alawm. Mahse thlarau hi an inpuan theih ka ring lo" ka tih leh chuan "A nih tak chu" a ti deuh hmak tawh a, "Nih leh Ngaihtei chu engtin nge a hran a?" ka ti ta nge nge a, ka ngaihven loh chuan a lungawi lo reng dawn, chu chu ka hre lawk vek. 

"In in leh Ngaihtei te in phei chu tuman zanah an kal tlang ţha ngam tawh hleinem. Tunlai tak phei chu an hlau zual a an tia, in inthlang lamah khan tlangval insual buai pawh an awm tawh ngai lo an ti. Ngaihtei thla an hmu ţhin an ti mai a, kawr var fual a ha an ti chiah lo na a an garage bulah te khan a ţhu reng zel an tia, chuan maw Ni Mami hotel pawh kha a hrang an ti" a ti lehzel a, a hawikual hrek hrek a, tim deuh daia keichu min lo enin "Rinhlelh ka nei" a ti zawi sap a. 

"Tu nge i rinhlelh?" ka lo tih chuan "Pa Muana" a hma aia zawi zawk mah hian a ti a, ka lo nui chhuak hak thung. 

"I ti awm ang lo e..Pa Muana te chu Boomer-a pa a nia, zu in ve mah se a pangngai em hi. A fate pawh mi pangngai vek an nia, tual a that lo hrim hrim ang" ka ti tan tan a, kuhva chehna in ka kutah na vak lovin a khawng keuh a, "Ngaithla rawh" a ti zui zat bawk a. 

"An inah khan thla tlem te chiah ka awm lova, a kum a kum tel ka awm tih hria la, thil pangngai lo chu ka hmu ve thiam alawm. Pa Muana te hian damdawi an tawlh ru ţhin a, tu tu nge inhnamhnawih a, tu nge a thurualpui tih ka hre lo mah se amah hi a tel ve tih chu ka hria. Awmna tur ka neih loh laia min tuam hlawm tute an nih avangin hrereng chungin ka sawi duh ngai lo a, nangpawn zep tlat ang che. I sawichhuah chuan rei deuh ka zep pui avangin keipawh jail ka tang ve thei tho a nia. Kimkimi a bo kha chuan ngaihţhat lohna ka nei lo a, ni Mami hotel a bualin ţhenkhat an siamţhat lai a nih avangin kan buai ve ţhin bawk nen, ka ngaihven vul chuk hman lo a, Ngaihtei a bo leh a, a thla a hrang an ti lehzel bawk nen, ka ngaih a ţha thei tawh lo" a ti mual mual a, "Kimkimi bo lai ang chiah khan hotel choka bik an thawm ţha mek bawk" a tih zawm leh a. 

"Hotel nen chuan eng nge inzawmna a neih?" ka lo ti a, a thusawi chuan ka beng a verh ţan riau a ni. 

"Kimkimi a bo ţum khan bualin an siam ţha a, Ngaihtei a bo hnu lawk khan Ni Mami ngeiin 'I pa Muana pawh a fel tawh lutuk, hei choka hi a fel fai lo emai siam danglam deuh ang u a ti a, kan buaipui chuk chuk mai' a rawn tia, message te kha ka chhiar liam mai mai a, ngaihţhat lohna pawh ka nei lo. Mahse, Chhandami nen kan inbiak hnu khan thil awmdan vel hi ka ngaihtuah kual a, Pa Muana a tel ve ka ring tlat. Ni Mami leh midang chu ka ringhlel lo, hmeichhe awm nem an nia, Boomer-a thihna khan a la nghawng a, an khua a har bawk a, Pa Muana hian an rilru mumal loh lai a chuh aniang. Hotel ah a that ang a, hnu hma vel thup tumin choka a siamţhat tir aniang" a ti a, a thutak reuh phian bawk a, ka awih lem lo na a ring lo angin ka awm duh ta lo. 

"Hotel choka ah kher a that tihna a ni ang maw?" ka tih chuan "Ka hriat vek bik loh chu mawle" a ti vin vak a, ka phu zawk lo chauh a ni. 

"Ka inrin loh laiin min vin tawh suh ka tih kha" ka ti ve thung a, "Keichu Pa Muana hi ka rin zawng a ni lo hrim hrim. A nupui thih hnu lawkah ka nu a hruai lut nghal thei a, Kimkimi leh Ngaihtei te lah an pawisa hmuhna tur a nih chuan patling pui pawh nise an tawm pui hreh dawn hauh lo a, an tih mualpho zui hlauin a that aniang, a thah chhan tur awm ang chu ka ngaihtuah thiam lo" a ti a, a awm ang ve viau mai. 

"Hotel chu engtin nge a hran a?" ka tih chuan "Mikhual hoin hmeichhe ţap ri te an hre ţhin an tia, ka hrechiang bik lo. Ka sawi peih tawh lo e a(h), keima sawi a nih chhung chu i awih dawn chuang lo. Mahse a hrang an tih kha chu ka ti tak tak a nia aw, ţhian ka ngah a, kan la inbe reng bawk a, min rawn hrilh ziah a nia" a ti a, ka lo aw liam mai a, hotel a mikhual te chu khaw dang daih a mi vek an ni awm sia, U Daizaui ţhianten mikhual ho thil tawn an hre daih thei lo hrim hrim. Ani lah hi bum a awl ve ropui sia, a ţhiante mizia ka hriatchian avang chuan "Ka net pack a zo a, lo thun lawk la ka hrilh chhunzawm ang che an ti em?" ka ti a, ka bu nghat a, ka rindan vel a ni. 

"An net pack duhin i hriat chak zawng ni a an ngaih an sawi mai mai a nih chu" ka ti a, "A ni lo" a ti ve tlat. 

"Hotel a thawk zawng zawng deuhthaw hi kan khaw mi an nia, chung ho pawh chuan an sawi alawm. Pindan tifai tu pakhat pawh a ban daih kha i la hre ve lo a mi?" a ti a, ka hriat loh thua ka chhan chuan "I va news lo reuh tak e aw. Ţhamawli i lo ni tak tak a nih hi. Mahni khuaa thil thleng chu hriat ve zel tur a nia, thla lah thil pawimawh ti ve lova hrang mawl tawp turah i ngai tlat bawk sia, sawi tawh lo zawk teh ang, kan inhnial thinrim mai ang" a lo ti leh a, kuhva a thel chhunzawm mawlh mawlh a, ka nu'n lo luh tir rawh a tih pawh kha ka hrilh ta chuang lo. 

"Vanmalsawma hi hmelţha i ti ve em?" ka ti ta daih a, "A helin ei rawh pawh min ti la ka ei mai ang. Hmelţha ve tho e" a ti a, a fak viau dawn emaw tih laiin hmui a chip deuh hmak a, a nuih a za tih chu ka hrereng. 

"Min bem a, tunah hmeichhe dang a chhuah pui leh a" ka tih chuan ka sawi zawh hma hmain "A hmangaihna a va dawhthei lo ve aw" a lo ti leh hmanhmawh a, a nui zui tet tet bawk. 

"Nang ti la engtin nge i tih ang?" ka tih leh chuan "E le..talhtum nen kawtah sawn ka lo chang ang a, ka zawn an lo thlen veleh a nula phurh chawpin ka vaw thla tawp ang" a ti a, thutak deuh hian "Ţhenawm pain talhtum ţha deuh a nei" a tih zawm a, ka chhungte ho hi mi dangdai tak chu an ni ve a ni. 

"Hmanraw tello in engtin nge i tih ang?" ka ti leh ngat a, "Ka ngaizawng ţalh lo mai ang. Boomer nen an in an vang ringawtin i duh a, a lerh viau chuan nangmah bawkin hrehawm i la ti dawn. Hre sa lo pawh i ni lo a, i duh ţalh a nih chuan ka sawisel chuang lo che. Vanmalsawma te ang hi chu ngaihzawng la thutak lo chi, hmelţha tih zawng apiang kawp zel thei an nia. Hetiang mi hi an mak ve ngawt mai, a chang chuan sazu pahnih an nei em mawni ka ti hial ţhin. Sazu pakhat chauh nei tan chuan a hahthlak dawn emai, an ngaihzawng neih zat nen a chhut phei chuan sazu pakhat chauh chu neise a ral vek tawh ang" a ti tan tan a, ka lo nui hak hak a, "An hmang zel kher nang mawle" ka tih te chuan "Ral thei se chu mipa zingah hian nei tawh lo an tam ngawt ang. Sahbawn aia sazu hmang nasa an tam dawn tih hriat ve kar tur" a ti a, ka zak a, ka ngaithla ning chuang bawk si lo, lerh vanglai tak ka thleng ve mek niin ka hria. 

Tintin-a lo haw chu "Khawiah nge in kal?" ka lo ti a, min la chhang duh lo zui a, "Hrilh tur che ka nei a nia" ka ti leh a, pindanah ka zui lut a, en pawh min en lovin a kawr a phelh a, min ngaihsak duh lo chu ka haw kher mai. 

"Ka biak che hi" ka tih chuan "Ni Mami bak i ti leh chuang lo ang" a ti hmuk a, dik tho mah se "Thil dang pawh a tel ve tho alawm. Pa Muana nen in inbe ngai em?" ka ti a, ka thil hriat hi U Mala ka hrilh vek mai dawn em maw ni ka ti rum rum tawh a, U Daizaui sawi kha ka awih vak lo na a rilru a kap ve run a, police ngeiin thudik a nih loh zia min hrilh se ka dam deuh ang. 

"Be ngai lo" a ti hmuk chu ngaithei lovin a darah ka kuai sawk a, kan inhmachhawn ran a, min en ve ta alawm. 

"Vanmalsawma i hmuh hian i rilru a na tlat zel em?" ka ti a, inzui fo mah se an inkawm tak tak lo ni a hriatna ka nei a, a nat ka ring bawk. 

"Rilru nat tih mai mai a ho, chutiang te chu hmeichhe hna alawm" a ti hluk hluk a, naupangte an nih lai aţanga inzui chawt kha an nia, na pawh nise a awm lutuk tlat a ni. Mahse rilru nat tih vel hi chu Tintin-a sawi hreh chi a nia, a sawi lang duh lo tawp ang. 

"Kan khuaah khan awm reng ta ila ka bo ve i ring em?" ka tih chuan nur nangin min en a, hmeichhiain kan ei loh zawng deuh te kan endan ang vel a ni. 

"Thil ho deuh deuh min zawt suh. Dawr saw ka ţhiat ang a in vai hian kan khaw sumo ah ka thawn haw mai ang che u" a ti khur khur tawh a, vawiin an chhuah naah hun nuam tak a hmang lo a ni phawt ang. 

"I sual ve sia maw" ka tih te chuan "Sual e...ki hrawl pui ka dawng ţep tawh. I ninawm viau chuan ka si ang che" a ti a, tum barin ka chhuahsan a, a fel viau nain a ngaihtheih loh chinah chuan ka nawr lui ngam bik lo. 

Ka nu pawhin "Lungawi lohna deuh a nei em ni a? Inchhung a lo luh rualin a vin nghal pung pung a, khawiah nge a kal reng reng a?" a lo ti a, ka hriat bik loh thu ka hrilh hnuah "Suk tur chu i la em?" a lo ti leh a, ka lak loh thu bawk ka hrilh leh a, min melh rum nasa mai. 

"Chhunah kan bazar daih sia a tlai chhiat hmain insu rawh ka ti ka tia lawm. Machine a awm a, engmah harsa a awm lo" a ti a, a an nasat hmain Tintin-a pindanah bawk ka lut leh a, a lo haw hma khan ka nu'n a thawmhnaw suk ngai ensak turin min hrilh tawh hrim hrim a, mipa inchengvawng lo chi hi chu engkim tihsak an ngai a, ka hah phah viau zel reng a ni. 

"Khawi suk tur lo la rawh" ka ti lut a, min lo pe ve mai a, a thawmhnaw pawm ţun chunga ka chhuak tur chu "Phir an nih hi" zawite, chang zet si hian a ti a, ka hawi let dawrh a ni ber. 

"I hre tawh maw?" ka tih chuan a bu nghat a, rilruah zawhna tam tak a lo lut a, zawt vek mah ila min chhang ţha leh duh dawn bawk si lo, a sawi duh dan tur ngaihtuah a ngai a ni mai. 

"Engtikah nge i hriat?" ka ti leh a, "I pian hmain" a lo ti daih a, ka ner nang nang a, zawt zui lovin ka chhuahsan a, lungawi lohna a nei chiang alawm. 

Zana a lengchhuak tur insiam tei kual vel te chu beisei nei deuh hian ka lo melh leh ţhin a, min hmu lo der hmak a, ka nu'n a hau hlak hlak bawk a. 

"Zantin i chhuak reng ringawt a, sawn te i lo thlak ange aw..hnathawh mumal i neih loh phei chuan fa neih thawt thawt ka remti lo a nia" a ti zat zat reng a, "I duh tak tak loh phei chuan tu hmeichhia mah tichhe miah suh, thil chhe tawh reng reng hi siamţhat leh a har ţhin a, kan thil neih hi hman huau huau loh tur a nia" a tih leh phei chuan a ning ta deuh aniang "Ka vawrh vir dawn che mawni le. Kan thil neih hman huau huau tur a nih loh chuan nangpawn i ka kha hmang huau huau bik suh, a ninawm huau huau emai" a ti a, inrawlh ve duh lovin keichu tv en ang deuhin ka awm a, ka hmu lo der ve thung ti ila a dik ber ang. 

"Ka pi i mu duh a mi?" tih leh ka pi pawm a rual a, dan tum ngial mah ila ka piin "Ka va mu chhin lawk ange. Ka mut peih loh leh ka lo chhuak leh anga a ni mai" a tih ve tlat si avang chuan pindanah an inpawm lut a, rei pawh rial lovin an rawn in pawm chhuak leh a. 

"Pawisa in inpe ru a ni maw? Laltinkhum i pi pawisa i dil lehpek em ni?" ka nu'n a lo tih chuan ring deuh tak hian "Kan thil neih hman huau huau loh tur aw" a ti lauh a, a uite ka enchimlohi a chul thuak hnuah engthawl hmel tak hian a chhuak a, thil eng emaw hriat chu a nei chiang alawm. Ka la zawt chhuak tho ang mawle. 

Rin lawk ang ngeiin Vanmalsawma te ţhian thum an lo leng a, ka nu inkhawm daih avanga dawr ka nghah zan a ni kher bawk nen, dawr chhungah an ţhu ţhap a, U Daizaui lo lut chuan midang hriatthiam ve theih loh tur hian a kutzungţang pahnih hi min hmuh kher a, a nui sang bawk a, tlaia sazu pahnih tih vel a sawi kha hrechhuakin keipawh ka lo nui ve tet tet a, rawn thar thawh leh vel a ţullo a sin mawle. 

"Zingah dar engzatah nge in thawh ţhin a?" ka ti a, hmaichhanah chuan hmeichhe dang ka thikna ka la ti lang ngam lutuk lo a, sawi tur a vang duh viau zel. 

"Dar5 ah chuan kan tho vek tawh zel. Vanmalsawma te hi kan pui ve ţhin a, sem chhuah tur ho kan buaipui a ngai a, tho tlai thei kan ni ve lo" Pekan a lo ti a, a inla pawimawh ve nasa mai. 

"Vawiinah ka ute nen in inzui em?" ka tih leh chuan Vanmalsawman "Luiah kan kal" a lo ti a, "Hnathawk an lak belh a, a indah zalen tlat. Khap deuh la a ţha ang" ti a Pektean min lo fiam te chuan a bialnu la ni lo mah ila ka lo zak ve em em a, a langchhuak ang tih ka hlau viau bawk. 

"I u a che chhia a" Pektean a tih rual chuan an ţhian thum chu an nui huk huk a, a thin a chhia ka ti reng a ni. 

"Engti zawngin? In neitute fanu kha a lo hruai a ni lawm ni?" ka tih chuan "Teuh nang aw..Madiki te chu an in bulah a drop daih alawm. Phone hmanga a hriat zawk kha kan sawm ve a, chhe lo deuh mai mawle. Mahse mipa a lo nia, a hmunah kan hre chauh sia" Peka chuan a ti a, sawi pawh a sawi ţha hleithei lo, a nuih a za a, keipawh ka bang chuang lo. 

"A mak lutuk sam leh hnute te a nei vek a, kan va lam khan a aw kha chu a pa deuh ka tia, mahse hriat mai har tak a ni. A kal no uchuak lo a, a ţawng no hlawi hlawi lo bawk a, a inchei dan a pangai bawk si, tuai tih a hriat loh reng reng" a tih zawm a, mahni nihna hai a mipa inti nula ta mai an pung zel hi a buaithlak khawp mai. 

"Zu kan in a, a ruih hnuah Tintin-a kha min zunpui rawh a tia, an va in zunpui kha engtiangin nge a zun kan hriat pui lo, Tintin-a a lo tlanchhia a, a zun dan kan zawh lahin a sawi duh mang si lo a, a tir ah chuan a ţhiannu a chesual emaw kan tia, a lo tlanchhiatsan lek a ni sia" Pektean a tih chuan pum dawm meuhin ka nui a, a lungawi loh chhan a ropui lo hle a ni. 

"A ţawngthei bawk sia, Tintin-a leh Vanmalsawma te hian kut an thlak ţhelh a, inrawlh lo ila chu an insual ang chu. A zam ţhak lo lehnghal a, min kawk sawk sawk mai a ni" a ti leh a, an inchhir hlawm awm mange. 

"Tintin-a lahin a phur haw duh tawh si lova, ka ţhiannu ka phurh tir a, keiman ka phur haw ringawt alawm. Rv ah kal kawi ang a la ti zui a" Pektea bawk chuan a ti leh a, hriat harsa khawpa hmeichhia anga insiam thiam hi an awm nual tawh tak tak a, thlalak aţang ngat phei chuan hriat chat har deuh tur a ni. 

"Kţp hnatlan naah in kal amaw ka tia" awmze nei deuha ka tih chuan Vanmalsawma chu a ţhiante lam hawiin lai deuhin a nui a, hmuh a nuam takzet a ni. Lerh lo se chu a dik ni mai tur a nia, a lerh chhung chu min bem reng mah se ka chhang lo ang ka ti ve tlat. 

"Hnatlang sawi takah chuan zanin inkhawm banah hnatlang a awm alawm. Sawmtea hi chu kal loh a tum sa a, Peka keini chu lang ve zuai teh ang" Pektea zawk chuan a ti deuh hlut a, din pahin cigarettee an lam a, Vanmalsawman "Ka lo pe ang" a tih avang chuan pawisa min pe lovin an inzui chhuak a, an inla zei ve thei ngawt mai. 

"Vawiin chuan tumaw i hruai a?" ka ti leh kher a, a ţhutna aţanga tho chhuakin ka ţhutna ang chiah plastic chair chu ka bulah a hung a, a rawn ţhu ve nghal zat bawk a, a ţhiante nen khan kil khatah an ţhu khawm ţhap a, ţhutthleng hniam a ni bawk nen, kan dawr a zim lutuk lo hlauh a, ni lo se chu an ţhian thum khan an ţhu leng teuh lo mai. Tunah chuan kan inţhuthnaihin kan insi lo chauh a, a rim tui tak pawh ka hre leh thei ta alawm. 

"Khawi kuhva kha lo la rawh ka lo thel ang" tih paha kuhva dahna kho a kawh chuan mak ti zet hian ka lo en a, "I thel fai thiam ang maw?" ka ti deuh ha mai. 

"Khatiang te mai mai ka melh fai vek thei ang chu" a lo ti a, nui tet tet chunga kho ka pek chu a lo ban vut a, "I thiam leh thiam loh kan hria ang chu" ka tih chuan a ner sawk a, han cho der vel a nuam dawn riauin ka hria. 

Kuhva chu a thel bauh bauh ka ti mai, U Daizaui leh ka nu te angin a ni ve zaih zaih lo tlat a, pakhat a thel chhung pawh rei tak a ni, mahse ka thiam ve chuan loh avangin ka sawisel hran lo. A insawi anga hnehsawh erawh a ni lo tawp mai.

"Kan khuaa kan haw hunah lokal ve la" ka tih chuan min lo en nghal vut a, "Kan khua i hmu ve hrim hrim anga bakah hmun nuam deuh deuhah te kan lengkual anga" ka tih chuan a nui suk a, a nu leh pa chanchin te, nun a hman ţhin dan te chu hrechak viau mah ila ka zawh sek chuan min nin phah ka hlau deuh a, ti hian kan innel ang a, a inhawng ve zel ang a, nakinah zawi zawiin ka la zawt zel zawk ang. 

"In khaw tlangval hoin min lo vaw hlum ang" nuih pah hian a ti a, "Engvang ngawtin maw?" ka tih chuan "An khaw nula hmelţha hi ka kalsan hleithei dawn si lo che a" a ti vel a, fiamthu mai mai mah nise a nuam ve riau a ni. 

"Naa..nangte chu bialnu i ngah e..nula tan han rin ngam chi i ni hleinem" ka lo tih chuan a hmui a pet sawi zauh a, a kuhva thel lai te chu a ngaihsak tawh lo hrim hrim. 

"Bialnu ka nei ngai lo" zawi zet a a tih chuan ka lo nui hak a, rum deuh a min melh ve te chu engahmah ka ngai lo, lerh tak tak lo se tuman an sawi lo tawp ang. 

"Ka hmuh che hian hmeichhia ka hmu tel ve ziah" ka ti a, ka thik deuh tlat ni ten ka inhria a, ka awmdan hi a mak tak tak a ni. 

Min chhan let hmain khawlaiah thawm a awm a, "Kha rukru a nih kha lo man rawh u" tih te a ni nawkin ka hria. A kho pawm lai chhuata a dah hnua Vanmalsawma tlanchhuak chu ka zui ve nghal a, ka nute hrilh lo tawpa kal chu tiin ka au a, min lo chhawn veleh "Dawr hi lo en rawh aw rukru a awm an tia, ka han en ve chhin" ka ti chiam a, "Tu nge rukru chu?" a tih te chu ka chhang hman tawh lo. 

Vanmalsawma tak phei chu hmuh tur a awm tawh lo hrim hrim a, in a intlar phei put avangin thui a tlanchhe hman lo aniang kawngpuiah an bawr laih a, chu lam pan chuan ka phei ve vat a. 

Rawlthar te hi patling pakhatin a kawr nghawngah a lo ţham bet a, hah hmel taka a thaw hluam hluam te chu ka khawngaih tlat pek a, "Ti nge i lokal ve?" zawite, chang zet a tih paha ka bula Vanmalsawma lo ding chu ka lo en ha a, min kuah a ka ban bula a hmer zui salh te chu ka lo hnar hran lo, mi an lo pungkhawm chak a, hetianga min kuah hian ka awm a nuam daih zawk. 

"Engati nge khatiang thil kha i tih a? An khawngaih che a hlawhfa an mamawh belh lo chung chung an chhawr tel ve che a" patling thinrim aw kan hriat ruala kut an han thlak nghal mai chu hmuh a hrehawm a, Vanmalsawma pawh chuan ka ban chu a hmer na zual sauh tih ka hre thei a ni. 

A hmel en tumin ka dak deuh ha a, a ni chuan kan hmaa thil thleng ngawt chu a lo en a, a pawisa lak ni awm tak chu an chhuhsak a, a chhawr tu nu berin "Ka ngaidam. Thawk zawm lo se la, mahse police hriattir kher a ngai lo, hna dang thawh tur zawng rawh se" a tih tawh hnuah pawh an nun a hmuh tur awm vak lo, inti fel tho si te chuan an la din chilh ran a, rawlthar zak leh hrehawm ti chu a kun ngul a, a khawngaihthlak reuh khawp mai. 

"Rinngama maw i nih a? I hming i va pu zo lo ve, tikha chuan tuman an ring ngam tawh nang che. Kan veng mi i ni lo tiraw? Tu nge i chhungte?" an ti a, ţhenkhat chuan fiamthu thawh nan a hmangin kawng sirah kuhva ei sen huam chungin an ding a, an nui leh huk huk zel a, ngaihdam a nih tawh chuan a zalen tawh tihna a ni sia, veng chhung mi a nih loh phei chuan an hreng reng thei lo hrim hrim, kawngpuiah a ni lehnghal.

"Tu nge i nu leh pate?" an ti leh ţhin a, mahse chu rawlthar te chuan a chhang lo. 

"Lo va haw rawh" Vanmalsawman a tih chuan lu ka thing a, "An tihzel dan ka hre chak alawm" ka ti ve tlat a, a tirah khan an buai a, an ri rum rum a, mi an lo pungkhawm chak ang bawkin an kal darh leh chak a, mi tlemte zingah chuan keipawh a tawp thlenga awm ve ka tum tlat. 

"I chhungte hming an zawh che kha" pakhatin a lo tih leh laia "Ka nau a nih kha" ti tu chu Vanmalsawma ngei a ni. A inrawlh ve duh ka rin loh lutuk laia a inbarh lut ta mai chu phawk hrain ka lo en a, ani pawh hian ka mita zawhna awm chu a hmu thei reng ang, mahse min vawnna a thlah a, chu rawlthar te chu a pan phei ta zawk a. 

"Sawmte hei hi i nau maw?" an lo tih chuan "Ka nau a nih hi" a ti nawn leh a, a dar pawh chen lo tur rawlthar chu a kuah a, a kawr a ţham bet reng tupa pawh chuan a thlah ve ta nge nge a. 

Tlai khawhnuah Pa Zaia a lo lang a, yma pawh ngaichang lova duh duh dana an lo ti ve ngawt chu a ruk tak chuan a ngaihdan a ni chiah lo maithei a ni. 

"Engtia i nau nge? A tlanchhia kha nangman a ni lawm ni lo man a?" an ti a, keimah ang bawkin a ngaihna an hre lo hlawm khawp mai. 

"Pawi a khawih a, piai liam liam kha chu a phu. Mahse ngaihdam a ni tawh chuan ka nau hi ka haw pui thei tawh tihna a ni em?" a ti a, mi tlem la awm ho chu a enkual a, "Haw pui rawh..haw pui rawh" an lo ti a, an awki nem ta lutuk te chuan ka nuih a ti za daih a, Vanmalsawman ka nau ti lo se chu an la vin luai luai ang chu mawle..mi fel ber hi an ang ka ti ţhin. 

Ka let san nghal mai dawn nge a nau chhar thar a kalkiangpui hun ka nghak dawn ti rilru neuh neuh chunga ka hawi kual chuan kil khata ka nu ding ka hmu a, a dinna lam chu a hma khan ka lo hawi phei miah lova, midang hmuh loh tur a a kil kil chuh a nih hmel a, ka hmuchiang ropui mai bawk sia. Dawr ngaihven tur a ka ti kha a ngaihven hleithei lo aniang, hetiang boruak hi ka nu lawm zawng a nia, mi fel tak a nih rualin famkim lohna lai a nei ve tho ka tih tawh kha, kan khaw mite pawn Ruat ţahbelhi an tih loh leh Ruat hawkdak-i an tia, a hming a pu zo khawp mai. 

Dawr a ka let leh chuan U Daizauin chanchin min lo zawt a, Tintin-a nula rim haw ni awm tak pawh a lo ţhu ve khur tawh. An awmdun lai chu remchangah lain Vanmalsawma lo inrawlh dan te chu ka sawi lang a, thu tlem te te belh hlek hlekin uchuak tak mai hian ka han fak vel a, U Daizaui bik phei chuan a ngaihsan hmel sawtin ka hria. 

"Phir rau rau pawh an rilru leh mizia te a inang lo thei viau a, mahse zanin a a thil tih kha chu Boomer meuh pawh khan a ti ve lo hrim hrim ang. A landan leh mizia te hi a pa thlawt a, khawngaihna a ngah thung a....awiiha" ka ti deuh hluai a, mi chuan min hmu se 'a hlim hmel e' min ti ngei ngei ang. 

"Diai duai che hian...hmeichhiain duh in han nei hi chu in awii duai duai a, puitlingin naupang an khawih reng ai chuan keipawh awm ila ka nau ka ti ve tho ang chu" a tih deuh hluk hluk laiin Vanmalsawma te an lokal a, an rei em em danah thil eng eng emaw an inzawt hmasa a ni ngei ang. 

Kan dawra eitur a leisak nual a, a ţhiante cigarette man a pe bawk a, "Ka lo bia ang che" thutak deuha a tih hnuah Tintin-a zawk chu enin a nui deuh suk a, ka u a lo ţhu tum bur mai.

"Kal ang le" a tih hnuah a nau thar chu a kalsawn pui a, dawr an pel awrh chauh tihah Vanmalsawma chuan "Mangţha muttui aw bialpa nei pa" a ti lauh a, hmeichhia emaw ti a tuai a hruai daih kha hrechhuakin ka nui hak hak a, "Khanglang che chuan a" tih hluk pahin ka u a ding uaih mai thung a, kawngkaah ding vat lo ila a tlanchhuak duh ngei ngei ang. An insual dawn lo tih hre mah ila ka u a rui tawh a, Vanmalsawma tana hriat nuam lo a chhakchhuah palh ka hlau a ni.

Ber thla kan hmang mek a, Vanmalsawma nen pawh kan la inbe ve ngar ngar a, chhanna ka la pek duh miau loh avangin ţhian bak kan la ni lo. Tintin-a nen an inzui ve ta zeuh zeuh a, mipa na na na chu neuh neuh an nei ve vak lo a, ţawngkam ngeiawm tak tak hmanga inkah fak fak an la ching reng na a an inpawh sawt khawp chuan ka hria. 

Mihringte hi kan hlimna a san ber lai pawhin kan chunga roreltu hian amah kan theihnghilh hlauin chona hmachhawn tur min chhawpchhuahsak ţhin a, chutiang deuh chu tunah ka chungah a thleng mek a ni. 

Ka u chiah Tintin-a hi ka u a nih bakah ka ţhianţhaber ti ila ka sawisual lo tawp ang. Khum ka tihfel sak laiin a awngphah hnuaiah insulin syringe kan tih mai ţhin ang hi ka chhar a, min ţhawng a, hlauhna in min tuam chhuak nghal vek a ni mai. 

Khur der der chunga syringe ka lo ken lai chuan pindanah a lo lut a, min hmu thut chu a hamhaihin sawi mai tur pawh a hre bik lo. 

"Hei hi engati nge i awngphah hnuaiah a awm a? Damdawi i khawih ve tihna mi? Engtik aţangin nge hetiang hi i lo chin ve a?" ka ti mawlh mawlh a, pawn lama awm ten an hriat hlauin zawi te tein ka ţawng a, diktak chuan au vak vak tluka chak ka nei kher lo ang. A che pawlawh ka ti dawn nge awngphah hnuaia dahţhat nachang a hria chu a che fimkhur ka ti zawk dawn? Damdawi ka hmu tel lo a, mahse syringe ringawt pawh hian min ti chiai takzet a ni. 

Min chhan duh tak lohah chuan "Kan khuaa kan awmlai khan hetiang thil hi i ti ngai lo. Vanmalsawma te ţhianho khan an tihhmuh che a mi a?" tiin mi tam tak ang bawkin puh tur leh dem tur ka zawng kual hmasa a, a duhthu ngei a ti a ni tih rin tawp a har takzet a ni. 

CONT...